Telegram-канал iamarabian - وتتخبط مشاعرنا 💔: Unsorted

وتتخبط مشاعرنا 💔

11 Aug 2023 08:31

مش عارفة من وين نبدأ وعلى كثر الكلام والاقتباسات اللي تشبه اللي نمر بيه إلا ان مزال فيه حاجات نحس بيها مالقيتلهاش وصف يمكن في ناس تشبهني وزي مانرتاح في وقت خنقة وضيقة لما نلقى كلام يعبر عني فكرت نجي نكتب لسببين الأول لأن ممكن نرتاح والثاني يمكن حد يلاقي كلامي متفصل على مقاسه ..
عارفين شعور إنكم تخافوا تكسروا بخاطر حد وطول الوقت تحاولوا تكونوا في safe side لا تؤذوا وتتأذوا .. وتلاقي اكثر حد تخاف تشوفه مكسور هو اللي كسرك ولا هو سائل عليك أصلا ..
لما يكون فيه شخص مهما كانت حالتك سيئة ومهما صار معاك خلاك تصنف الناس اللي حواليك وتعيد ترتيب مكانتهم مابين ناس يرجعوا غرباء ومابين ناس يكونوا الأقرب عمرك مادخلته في التصنيف .. وعلى كثر ماتشوف منه مواقف طول الوقت تلاقيله مبرر لأن مكانته ثابته عندك ولا تقبل التقييم ..
عارف شعور إنك تكتشف إنك لا شيء بالنسبة ليه وإن كل التصرفات الحلوة اللي كنت تشوف فيها منه واللي خلاتك تفكر إنه صاحب عشرة ماهي إلا شعوره بأن المعزة اللي تعامل فيه بيها والتزامك طول الوقت إنك تكون معاه في الشدة قبل الرخاء ماهم إلا واجب عليك وأقل من الواجب لأنه هو ذا قدر ومقام لا يليق به إلا أن يعامل بهذه الطريقة .. في حين إن هو في الغالب عمره ماكان معاك في ولا ظرف ولو كان معاك حيكون معاك في الظروف اللي يوقف معاك فيها الغريب قبل القربب .. وزي ماقلت لأنك عمرك ماحطيت علاقتك بيه تحت التقييم وعمره ماقصر إلا ولقيتله مبرر ..
تكتشف في أول موقف يصير تجبرك ظروفك ماتكونش معاه وواقف جنبه إنك المذنب المقصر الغير مبالي وينسى كل وقفاتك .. وفي الواقع إنت المبادر وأنت السبب الأساسي لاستمرار العلاقة بالمظهر الكامل في عيون الناس ..
إنت السبب في شعور الإنسان اللي قدامك إنه أحسن منك .. لأن وقت كنت تعطي من غير مقابل حسسته إنه أحسن منك وإنك لازم توقف معاه وتقتل روحك عشان ترضيه وإنه يلومك ع تقصيرك (من منظوره) وحتى بعد تشرح ظروفك يقابلك بعدم رضا ولازم تقبل وتكمل في دور المذنب اللي لازم يدير أي شي عشان ينول الرضا وتكمل العلاقة من غير ما يبدي أي نوع من أنواع الإستياء ..
عارفين الشعور بعد ماتوضح قدامك الصورة .. صدمة .. أحيانا دموع وأحيانا تتمناها وماتنزل .. ألم نفسي وأرق .. وعلى قدر خيبتك ممكن تتحول الصدمة لآلام على مستوى الجسد (من تجربتي الشخصية) ..
من هنا لازم توقف لروحك وقفة جادة وعمرك ماتستثني حد من التقييم وطول الوقت تدير تقييم لعلاقتك مع الناس .. قيم العلاقة المكتملة واللي تحس إنك محسود عليها قبل العلاقة اللي تسودها مشاكل لأن العلاقة المكتملة نادرا مايكون سبب اكتمالها تقدير الطرفين لبعض وغالبا ماتتغذى على طرف دون الآخر عشان تستمر ..
وقبل كل هذا قيم علاقتك بالناس اللي طول الوقت واقفة جنبك لأن في مرات تكتشف إنك إنت الطرف الظالم .. وحتى من غير وعيك تكتشف إنك مارديتش ربع وقفة الناس اللي تحبك معاك وممكن تكون محسسم بالنقص ومخليهم طول الوقت يسعوا لرضاك .. حتى ولو ما اتهمتهم بالتقصير زي الحالة اللي حكيت عنها في البداية
الحل الأنسب برأيي حتى لا تظلم أو تظلم هو المعاملة بالمثل وقصدي بالمعاملة بالمثل هو رد المعروف لأي شخص بقدر معروفه وفي حال صار معاك شي من اللي حكيته اكتفي إنك تعيد ترتيب الشخص في مكانته المناسبة واللي مرات تخليك تقطع علاقتك بيه عوضا عن إنك تعامله بنفس أسلوبه ..
وخلي في بالك قول الامام الشافعي (ما ﺭﻓﻌﺖ ﺃﺣﺪﺍ ﻗﻂ ﻓﻮﻕ ﻗﺪﺭﻩ ﺇﻻ ﺣﻂ ﻣﻨﻲ ﻣﻘﺪﺍﺭ ﻣﺎ ﺭﻓﻌﺖ ﻣﻨﻪ)
صحتك ألزم ماعليك وعمرك ماتحس إن في حد أحسن منك وتتجاوز وتتغاضى عشان تنول رضاه .. ديما حافظ على العلاقات اللي عمرك ماحسيت إنها جت على حساب صحتك أو كرامتك وتحس فيها إنك أحسن
حافظ على الناس اللي يشوفوا فيك حاجات حلوة إنت نفسك مش شايفها .. الناس اللي تشوف الخير اللي فيك .. اللي تكون معاهم بعفويتك .. الناس اللي تحبك بكل عيوبك وماتحسبلك بالورقة والقلم .. الناس اللي تحسسك إنك صاحب فضل لمجرد سؤالك عليها وعمرها ماتنساه مش اللي تنسى وقفاتك لمجرد موقف ماكنتش معاهم فيه ..
#Toxic_relationships