3793
🔻کابان کاناڵێکی خۆماڵیی فەرهەنگی ، ئەدەبی و کۆمەڵایەتییە کە زۆرتر دەپەرژێتە سەر چیرۆک و ڕۆمان و هەروەها بابەتگەلی دیکەی کۆمەڵایەتی و هونەری و ... بەڕێوبەر @MTMUKRYANMK
تاقانەی خانمێ
بەشی ٥٥
لەوەتی مارە کراوم وەکاز سێ نامەی بۆ ناردووم ، لەیەکیان دا نووسیویەتی سەیران گیان گلێنەی چاو و ڕووناکی دڵەکەم وامەزانە لێت بێ هەواڵم .
من وەک وەلی دێوانە بەدوای عەشقی تۆوە وێڵم ، ڕۆژی پێوەهاتنەکەت لەدوورەوە چاوەدێریم دەکردی .
ئاگام لەهەموو شت بوو و ئەگەر مردن بەپارە با دڵنیابە داروونەدارم دەدا تەنیا بۆوەی تۆ لەتەنیشت پیاوێکی دیکە نەبینم .
خۆشەویستەکەم نازانم لەمەوبەدواوە چی بکەم و چۆن بژیم ، من لەداهاتووی تۆ بێ ئاگام بەڵام دەزانم خۆم بێ تۆ مردوویەکم کە تەنیا جووڵەم هەیە ، نازانم بێ خۆشەویستی و پشتیوانی تۆ قەرارە ژیانم بەکامە ئاقار دا بڕوات .
سەیرانەکەم دەزانم تۆش خەمباری ، چاوەکانت درۆیان لەگەڵ من نەدەکرد پڕ بوون لەهەست و ویستی خۆشەویستی و ئەوین ، نازانم چەندە لەگەڵ ئەو پیاوە هەڵدەکەی بەڵام هەرکاتێک بگەڕێیەوە و بەمن ڕازی بی باوەشم بۆت ئاوەڵەیە و گەر پێویست بێت هەتا گیانئەڵایە چاوەڕوانت دەبم .
لەکۆتاییدا نووسیبووی خۆشەویستەکەی هەتاهەتاییم بەختەوەرییت ئەوپەڕی ئاواتمە .
لەنامەی دووهەمدا نووسیبووی : پشت و پەناکەم سەیران گیان ژیان بەبێ تۆ مانای نیە ، تاوانی تۆ نیە ئەودابڕانە چونکە من لەژیانمدا هەمیشە مەحکووم بووم بەدابڕان لەخۆشەویستەکانم ، قەدەری من وابووە لەدایک و باب و خوشک و زێد دابڕام ئێستاش لەتۆ ، ئازیزەکەم دەردی دووری و دابڕان لە عەزابی قەبر ناخۆشترە .
باوانەکەم بۆیە واناڵێم خەمبار بی من دان بەجەرگم دادەگرم بەمەرجێک تۆ دڵت خۆش بێت و هەست بەبەختەوەری بکەی .
لێرەشدا تەنیا بەختەوەریی منی بۆ گرینگ بوو ، دەستم کرد بەگریان و لە خودا پاڕامەوە ئاگاداری وەکاز بێت چونکە سڵامەتی ویم لەبەختەوەریی خۆم پێ گرینگتر بوو .
نامیلکەی سێهەمی کە بۆنێکی خۆشی لێدابوو بەم شێوەیە بوو :
باوانی باوانم سەیران گیان : پێم خۆشە بزانم ئایا تۆش بەقەد من خەمباری ، من ئامادەم حەیا و شەڕەفم نەبێ هەموو شتێکم بکەمە قوربانی بۆ وەدی هاتنی ئاواتەکەمان ، ئامادەم سەرووگیانم دابنێم بۆ شەوێک سەرلەسەر سینگی تۆدانان .
نووسیبووی کە هەتادوا هەناسەی ژیانی هەوڵ دەدا بۆ وەدی هاتنی خەون و ئاواتەکانمان .
دوایەش داوای کردبوو دیسان بەوردی بیری لێ بکەمەوە هەتا کارلەکار نەترازاوە و ڕەدووی کەوم ، بەزۆر قسەی دیکەی پڕلەهەست و ئەوینی پاک کۆتایی بەنامەکە هێنابوو و وەک هەمیشە ئاواتی بەختەوەریی بۆ خواستبووم و دیار بوو دوو دڵۆپە فرمێسک بەسەر کاغەزەکەیەوە وشک ببۆوە .
کاغەزێکم بۆ نووسی نە عەتر و بۆنم لێدا و نە ئەو ڕۆمانە عاشقانەیەم بۆ نووسی کە ئەو چاوەڕوانی دەکرد ، نە بۆم نووسی بەبارتەقای زەوی و ئاسمان خۆشمدەوێی ، نەمنووسی لەگەڵ وی زانیم مانای عیشق و خۆشەویستی چیە ، نەمنووسی لەقورسی باری ئەوخەمە پشتم چەماوەتەوە ، نەشمنووسی بێ وی ژانە ژارە ژین ، نەمنووسی عیشق و عاشقی لەگەڵ تۆدا زۆر چێژبەخش و هیوابەخش بوو .
نەمهێشت دڵۆپەفرمێسکێکیش بڕژێتە سەرکاغەزەکە و تەنیا نووسیم کاک وەکاز من هیچ هەستێکم بۆتۆ نەماوە و نامەوێ جارێکی دیکە بەڕێبواریش بێیەوە سەر ڕێگام .
کەس ئاگای لەدڵی زامدار و پڕلەئێشی من نیە ، سوێند بە داهێنەری عەشق و ئەوین کچێکی بێ ڕەحم و بێ بەزەیی نیم بەڵام لە پێناو ئاسوودەیی خۆشەویستەکەم من لەخۆم و هەست و ویست و وجوودی خۆم مایەدادەنێم بۆ وەی وەکاز ژیانێکی خۆشی پڕلەبەختەوەری هەبێت ، خۆشەویستی یانی لەخۆبووردەیی یانی تەنیا مەبەستت بەختەوەری ئەوکەسە بێت کەخۆشت دەوێ بێ وەی بەرژەوەندی خۆتی تێدابێ .
وەکاز بەختەوەر بێ کێشە نیە بامن هەر بەسەگەمەرگی و دوور لە باوەشی وی بژیم ، بەڕاستی گەردوون بڕەبەختەوەری و ئاسوودەیەک بەوەکازی خێر و خۆشی لەخۆنەدیتوو قەرزدار بوو .
وەکاز نابێ شەق لەداهاتووی خۆی بدات و ژیانی بکات بەدۆزەخ دوای دابڕانمان لەیەکتر ، وەکاز دەبێ بژێت ئەویش ژیانێک پڕ لە شادی و سەربەرزی ، دەبێ ببێت بەبابی کوڕ و کچی جوان و بەقاقای پێکەنینی هەموو خەم و پەژارەیەکی هەتا ئێستا دیتوویەتی بڕەوێنەوە .
✍ ماری موکریانی
#تاقانەی_خانمێ
کابان | KABAN
👆👆
نازدارەکەم، دێمەوە لە جیاتی وردە قامی شەوکۆڵانان، کۆنە حەیران و سوارۆ و بەیتی دم دم دەڵێمەوە.
سۆمای چاوە بێسۆماکەم! بۆیە دێمەوە ئەگەر رەسووی نادری بۆ پەروانە فەرمانی لێدانی تەپڵ و دەهٶل دەدات و شایی گەرم دەکات، من بە هێدی و هێوری و بە بێ درۆ، لەسەرخۆ بە هەوایەکی تازە چیرۆکی ڕاستەقینەی مەم و زین و ئایشەگوڵ و خەج و سیامەند و لاس و خەزاڵەکانی سەردەمتان بۆ دەبێژم.
هەموو کەسەکەم! لە جیاتی رەسووی نادری و حەسەن تووزەلە خۆم دەبمە شایەر و شار بەشار و سپێدە وئێوار ڕەشبەڵەكێ دەگێڕم و ئەوەی دەیڵێم نایڵێمەوە، پەروانە باڵابەرزەکان بەو هەوایەیان هەڵدەپەڕێنم کە هەوای خۆماڵی بێ. وایان لێدەکەم نوێژ و ڕۆژوویان لە بیر دەبەمەوە و گەڕی ڕەشبەڵەکیان لێ خاو ناکەمەوە.
کەسی بێکەسیم! دێمەوە پرێسکەی بن هەنگڵی شەوکار لە حەمامێ ناکەمەوە و پرێسکەی پڕ لە هەنیسکی هەناو و گرێ پووچکەی دڵی کۆلاوم لە چوارڕێیان لە بازاران... دەکەمەوە و بەسەرهاتی ئەوڕۆ و دوێنێتان وەها بۆ دەگێرمەوە کەس نەیگێڕابێتەوە و هەتا هەتایە لە بیر نەچنەوە.
ئارامی حەسڕەتەکان! حەسڕەت مەخۆ بۆ نەمانی شێتەکان، من زۆر لە بارام و بیلی بیلی وسولەیمانە شێت... شێت ترم ، زۆریش واوەترم، شێتێکی شڕۆڵ و شڕ و شووڕ و بێ سنوور، بەزمی وا دەگێڕم هەموو خەڵکی وەربگێڕم.
نازدارەکەم! دیمەوە دەبمە سەیدە لووشە و کەف هەڵنالووشم، شەکرۆکان بۆ زارۆکان دێنم بە دیاری و لە قوڵایی دڵیان وەپێکەنینیان دەخەم.
بینایی چاوانم! مینەگەزۆی چیییی! من سەت ئەوەندەی مینە مینەترم، مینەیەکی ژیان بێزراو و زیزم، ناتەمیزم، بە خۆ هەڵمیزم، لە گەزۆش شیرینترم. دێمەوە و ئەوجار من بە دوای فاتێ دا دەگەڕیم و لە شەقامان، لە کۆڵانان، لە بن دەرکان، لە کۆڵبەران، لە ڕێبواران لە نازداران لە دینداران لە بێعاران... لە پەپوولان، لە بولبولان، لە چاک و خێو ، ئەو لاوانەی هەن لەسەرکێو... دەپرسم ئەرێ فاتێی منتان نەدیوە؟ دەگەڕێم و دەگەڕێم، هەر دەگەڕێم هەتا فاتیلێی خۆم دەبینمەوە.
گەورەم! دێمەوە و دەبمەوە مام ڕەحمانی بازنەفرۆش و دەستێ کچۆڵان زۆر بە ئارامی و نەرمی دەکوشم و زۆر بە مەبەست بازنەی وەفاداریان دەکەمە دەست.
باڵابەرزەکەم، ڕاستە سۆمای چاو کزە و سەر و دەست لەرزە و ڕاوکەرێکی شڕۆڵم، بەڵام پیرێکی پیتۆڵم و دەچمە شەوڕاوی شەتاوان و سۆنە دەگرم بە داوان. دەچمە سەر تەپکان و بە تەپکان قەل و قاڵاوان پێوە دەکەم وقیڕەیان لێ دەبڕم.
نازەنینەکەم! دێمەوە و دەبمەوە حاجی ڕەشە و مامەشەشەی شارەداری و بە فرمێسکی چاو کۆڵانان ئاوپڕژین و بە مژۆڵان گەسکەماڵیان دەدەم. بۆنی تۆزیان هانای هەناوە و گەرد وتۆزیان دەرمانی چاوە.
خۆشکە بە پەرۆشەکەم! کوا دێڵم خەڵکەکەم دوای دۆی ناسر بێ دۆ بن؟ دەبمەوە شوان و گاوانە پیرە و گاڵۆکێکی بە درێژایی دەجلە و فورات بە دەستەوە دەگرم هەتا دەمرم، هەر لێدەخوڕم. تۆش دەکەمەوە مەشکەژێنی کوردان و مەشکەیەکی پڕ بە ئاوی گۆلاوەکانی ورمێ و وانێ. سیپەکێکی هەڵدەبەستین سێ پای لە نێو دڵی سێ وڵات دابێت، سەر سێ پەکان بگەنە چاوی ئەستێرەکان و شڵق و هۆڕی مەشکەمان ڕۆژهەڵات و ڕٶژاوا بشڵەقێنێت. جا ئەوجار دۆی دادە دەکەینە نێو دەم و زار و گەروو و وەرگان، تا تینوایەتیان بشکێ و ورە و هێز بگرن چێدی نەترسێن لە گورگان.
ئازیزەکەم! لە جیاتی بۆن و تامی کەبابی حەمەشەل، توورەکێکی پڕاوپڕی نانەویشکەی لاباسک و کێو و دۆڵم بەشانەوە و بۆنی وان و وانەکانی لێ دێ. خورجێنێک تۆی گوڵالە سوورەی لە ڕەنگی خوێنم پێیە. بۆنێکی ئەوەندە خۆشیان لێ دێ، بۆنی ژیانە، بۆنێکی دیکەیە، لە وەی دووکانی سۆفی مستەفا جیایە.
دەباشە تۆش خوشکٶڵە دەست دە بوخچە و کیسان و شانە وکلچۆک و کەلدانان و مە‌هێڵە ڕیشٶلی فاتمی خواکەرەمی و مەرحەمەتی ئامەخانێ لە برەو بکەون.
دادیلێ! خەمت نەبێ کە هاتمەوە نە دێمە دیوانت ونە دەبمە میوانت، خۆ جاران وا نەبووی، گەلێک میوانگر و بە سفرە و خوان و بە خەندە و دوان بووی! ئایی ببوورە وەخۆ هاتمەوە ، خۆت کوتت ونی ونم و خۆم ناناسمەوە و مەیەوە.
باوەشێک ڕێز و ئامێز ، پێکەوە دەبین بەهێز
نوسینی: پەروانە/ ئەحمەدێن
کابان | KABAN
لە ستایشی ژیاندا
ئەزموونی شاعیر و نووسەر
ڕەفیق سابیر
بەشی ۲۰
مۆسیقا ؛ پدرام شەهلایی
تۆمار و خوێندنەوە ؛ موشتاق فەیزیابی
دیزاینەر و پێشکەشکار تەکنیکی ؛ دیاکۆ گەرمیانی
س؛ڕێگاپادکەست
#لە_ستایشی_ژیاندا
کابان | KABAN
تاقانەی خانمێ
بەشی ٥٤
دوو سێ مانگ دوای ڕۆیشتنەوەی وەکاز بۆ تاران کوڕێکی خزمی دایەگەورەم ناردیە سەرم ، بابەحاجی ڕازی بوو مێردی پێ بکەم ، هەرچەندی خۆم لە داروبەرد دا و گریام و پاڕامەوە و نووزامەوە سوودی نەبوو .
بە بابەحاجیم گوت من دڵ و قسەی تۆم نەشکاند مێردم بەوەکاز نەکرد ، تۆش ئەگەر منت خۆشدەوێ و بەختەوەری منت بۆ گرینگە دڵم مەشکێنە و بەمێردم مەدە ، گوتی هەتا مێرد نەکەی من ناحەسێمەوە دەترسێم وەکاز زەبری خۆی بوەشێنێ و بەزۆری بتبا ، گوتم وەکاز ئەوەندە ناپیاو نیە بەڵام بابەحاجی قسەی کەسی بەگوێیدا نەدەچوو .
کاتێک ئەو هەواڵەم دا بەوەکاز بەبانگووسەڵا گریا ، گوتی ئەو ڕۆژەی خانم لەبەر چاوم تەواو بوو هەر وەک ئەمڕۆ تێکچووم ، سەیران درەنگ نەبووە پێ لە کەری شەیتان بێنە خوار بەیانی دێم بە بێدەنگی پێکەوە دەگەڕێینەوە تاران لێرە مارەت دەکەم .
بەڵام من قبووڵم نەکرد و گوتم هیوادارم کەسێک ببێتە هاوسەری ژیانت کە شایانی ئەو هەمووە خۆشەویستیەی تۆ بێت و بەگریانەوە ماڵئاواییم لێکرد .
دایکم گوێی لە قسەکانم بوو و لەباوەشی گرتم و گوتی ڕۆڵە کەس ناتوانێ لەگەڵ چارەنووسی خۆی بەشەڕ بێت دیارە خوداش ئاوای لەچارەی تۆ نووسیوە و هەر بۆخۆشی دەزانێ خێرو شەڕ لە چی دایە .
چاوم دە چاوی دایکم بڕی و گوتم هەمووتان دەستتان کردە یەک بۆ چارەڕەش کردنی من و ئەو بەڵایەتان بەسەرم هێنا ، بۆ دەبێ من مافی هەڵبژاردنی هاوبەشی ژیانی خۆم نەبێ ؟
گوتم دایە بۆخۆت باش دەزانی و درۆم لەگەڵ نەکردووی من شێت و شەیدا و عاشقی وەکازم ، تۆ بەڵێنت پێدام بۆ گەیشتن بە ئارەزووەکەم یاریدەدەرم بی کەچی ئێستا دەستی من دەخەیە ناو دەستی کەسێکی کە خۆشم ناوێ و ئاواتی بەختەوەریم بۆ دەخوازی .
هەر هەمووتان بەنیفرەت بن کە ژیانی منتان کردووەتە کایە و یاری پێ دەکەن ، ئێوە دەدەمە بەر حوکمی ئەو خودایەی کە دژی شکاندنی دڵی عاشقانە .
نەمدەویست غرووری خۆم لەوە زیادتر لەبەر چاوی بنەماڵەکەم بشکێنم هەر بۆیە پشتم لەدایکم کرد و چوومە حەوشە و لەگەڵ گەڵا زەردەکانی پاییز و هەوری سەربەتەمی ئاسمان هاوسەفەر بووم ، لەدڵی خۆمدا گوتم وەکاز گیان لە کوێی ئارامی دڵە پڕتاسەکەم بمبوورە ، زۆرم هەوڵ دا بەداخەوە سوودی نەبوو .
دوایە ڕووم لە ئاسمان کرد و گوتم خودایە ڕۆژی حەشر بەربینگت پێ دەگرم و لێت دەپرسم چۆنت دڵ هات ئەو زوڵمەی دەرحەق من و وەکاز بکەی ، ئەی ناڵێن خودا دلۆڤانە ، نازانم تۆ دلۆقانیەتی چی لە دابڕانی ئێمەدا دەبینی ؟
دوو حەوتوو دواتر بەپەلە و بەنابەدڵی لە سیامەند مارە کرام ، سیامەند کوڕێکی جوان و ڕێک و پێک و سەنگین و گران بوو و خانوو و کار و ماڵی خۆی هەبوو و
بێ شک سیامەند خەونی زۆر خەجان بوو بەڵام ئی من نا .
کاتێک بە دەنگی چەپڵەی کوڕان و هەلهەلەی کچان هۆشم هاتەوە بەر تازە کار لە کار ترازابوو و ئێمە بە وەکیلایەتیی بابی سیامەند و باپیرم حەڵاڵی یەک بووین و حەرامی هەموو دونیایە .
وەکاز تەلەفۆنی دەکرد بەڵام من وەڵامم نەدەداوە لە لایەک مارەکراو بووم و پێم خەیانەتێکی گەورە بوو و لەلایەکی دیکە بیرم لە داهاتووی وەکاز دەکردەوە دەمگوت با بڕوات وەدوای ژیانی خۆی بکەوێت و دڵ لە من بەربدات .
زۆر جار دەمدیت دایکم بەگریانەوە وەڵامی تەلەفۆنەکانی دەداوە و چاوەکانی وەک گۆمی خوێن سوور دەبوون ، دەمزانی دەردەدڵ بۆ دایکم دەکا بەڵام قەت نەمپرسی باسی چی دەکەن ، دڵنیام بشمپرسیبا دایکم بۆ وەی هێندەی دیکە نەڕووخێم ڕاستی پێ نەدەگوتم .
دوای وەی بەشەرعی مارە کراین ڕۆژێکی خەزوورم و سیامەند هاتن بردیانم بۆ پشکنینی خوێن و یاسایی کردنی مارەبڕینەکەمان .
هێندەی پێ نەچوو پێمەوە هاتن بە زێڕ و زەمبەر و جلک و پێداویستییەکی زۆر ، کە لەو کاتدا کەم کچ ئەو شتانەی بۆ دەکرا .
هەر دوای ویش پرسیاریان کرد بزانن بۆ کەی بگوێزرێمەوە و بابەحاجی گوتی کوێزتنەوەکەی بمێنێ هەتا لای بەهارێ ، من هەر هەمووم پێ بە قومار بوو و دامنابوو هەتا ڕۆژی بووکێنیش دان بەجەرگم دابگرم بزانم ئەو خودایەی شەو ڕۆژ هەراسانم کردووە دە هانام دێ یان نا .
دەمگوت بەرلەوەی دەستی سیامەندم وێکەوێ هەر لە پەردوودا خۆم دەکوژم بەڵێنێکە بەخۆم و وەکازم داوە بە ژین هی ئەو بم و بەمردن هی گڵ .
✍ ماری موکریانی
#تاقانەی_خانمێ
کابان | KABAN
🌹 دڵنووسێک بۆ ٧ی پووشپەڕ
✍️ فەرەیدوون حەکیمزاده
شاری سەردەشت وەک یەکەمین شاری شیمیایی لێدراوی دونیا، سی و حەوت ساڵە لەگەڵ مەرگ و کۆخە و نەخۆشی بەرامبەرە. ئەو کارە قێزەونە تا هەنووکەش لەسەر هەست و نەستی دانیشتوانی ئەو شارە شوێنی نەرێنی داناوە.
٧ی پووشپەڕی ساڵی ١٣٦٦ی هەتاوی ڕۆژێکی نەگریس و ناخۆش لە ڕۆژمێری خەڵکی سەردەشتدا بوو. کاتژمێر ٤و٢٥ خولێک، فڕۆکەکانی ڕژیمی بەحس شاری سەردەشت و گووندی ڕەشەهەرمێ وەبەر ڕهێڵەی بۆمبی شیمیایی گازی خەردەل و موستارد دەدەن.
ئەو کارەساتە سەدان شەهید و زامداری لێکەوتەوە و زۆر بنەماڵە خەساریان بە خۆوە دیت.
ئەو ڕۆژە ناخۆشانە بۆ خەڵکی ئەو دەڤەرە ڕۆژانێکی زۆر ناخۆش بوو کە ئەگەر گەلی کورد خاوەن خان و خوانێک بان، ئەوڕۆ شاهیدی شارێکی دەرخوردی خەڵکی سەردەشت دەبووین.
▶️نووسەران بە نووسراوە و شاعیران بە شێعر و هونەرمەندان بە سرود و وتن لەو کارەساتە دواون، ئەو نووسراوەی دەیبیسن دڵنووسی فەرەیدوون حەکیم‌زادەیە. فەرموون با گوێ بیسی بین.
س ؛ ڕۆژنامە
کابان | KABAN
سڵاوو ڕێز
کاکی بەڕێز
هەربژی بۆ پێنوس و ڕێنوس وهەستی گەرمو بێخەوشی کوردانەو سابڵاغیانەو ڕەسەنت،
ئازیز داخەکەم ، ڕۆژگاری خۆش و پاک وخاوێن وکوردانەو مەردانەی سابڵاغ و سابڵاغیان
نەماوە ، لەڕۆژگاری پێشودا بەرلەوەی بەهۆی پروپاگەندو تەبلیغاتی بانک و وام ،کۆکردنەوەی ماڵ وسامان وڕاکێشانی خانوبەرەی گەورەو دونهۆم وسێ نهۆم،بەر لەداهاتنی
دیەو بیمە (بەمانای فێڵ وتەڵەکەو دۆشینی گەل)( نەک بیمەی بەڕاستی)، ئەوکات کە نەداری وهەژاری شورەیی وعەیب وسەر شۆڕی نەبوو، ئەو دەورەیەی هەموو خانۆکان حەوشەوحەساری گەورەیان هەبوو،دەرکە بەڕووی هەموکەس دا ئاواڵەبوو، میوان خۆشەویست ومیوانداری سوک وسادەو هاسان بوو، دەرودراوسێ،کاتی شێوخواردن بە مەنجەڵە شۆرباوەوە ،بەکەوڵەنانەوە بێ هەواڵ پێدان ،دەستیان دەبەر سەردەرانەی دەرکەی تەختەی ماڵان دەناو بەوردو درشتەوە ،بەقاقاو پێکەنین ،مەنجەڵە شۆرباوەکەیان لەسەر کورسێکە دادەناو هەتا شەو شەق دەبو لەبەر فتیلە وچرای نمرە 7،یافانۆس وگڕسۆز دادەنیشتن وبێ پاشملەوێژی(غەیبەت) وتووێژیان دەکردو منداڵی ماندو لە کایەی ڕۆژانە هەرکام بەلایک دا دەکەوتن ودەنوستن ،وبەباوەش وبەکۆڵێ دەیان بردنەوە، ئەو ڕۆژانەی سابڵاغیان ،دەقرچەقرچی گەرمای نیوەڕۆیەدا بۆ نوێژی نیوەڕۆیەو نیوەڕۆژە(نەهار)خواردن ،مەڕمەڕشایان بەسەر تەلیسە برنج ولپەونیسک ونۆک وماش وبڕوێش وقەندوچا دا دەداو دەچونەوە، دڵنیا بوون کەس وێیان ناکەوێ وێشیان نەدەکەوتن، یا پاش نوێژی ئێوارێ
دوکانەکان دادەخران وبەرەو باغی مکایل وگڕاوان وپردی سوروقۆپی مەولەوی،سێ کانیان و هەوارگە بەدیمەن وسەرسەوزە فێنکەکانی دەوروبەر ،بەتایبەت کانی شێخان وخەزایی وقوڵقوڵاغ وپردی سوور و.....دەڕۆیشتن، ئەوکات کە دەنگخۆشەکانی ئەوڕۆژە هەربۆدڵخۆشی خۆیان وهاواڵان کۆڕو کۆبونەوەکانیان
بەدەنگی خۆشی مەردانە و بەهەواوگۆرانی موکریانی وبەندو
باوی کۆنی مێژوویی
گەرم دەکردو دەڕازاندەوە، یا ئەوکات کە نەزمیەو عەدلیە لەناو شار کەمڕەنگ وبێڕەنگ بون ،وەپیروبەساڵاچوەکانی گەڕەکەکان کوێخاو خاوەن بیروڕابوون و لەناو خەڵک دا ڕێزی تایبەتیان هەبوو، بێ هێزوچەک ،هەربەزبان ئاوری شەڕو ناکۆکی نێوان خەڵکی گەڕەک وناوشاریان دەکوژاندەوە،یا دایامین دایکی هەمو منداڵی گەڕەک بوو، یاخاڵە دەروێش هەمیشە گیرفانی پڕ مێوژو لەب لەبی بوو ،وە هەمو منداڵانی بەچاوی نەوەکانی دەنواڕی ومست مست بەشی هەموانی دەدا،یا خەڵکی کۆڵان لەپێشدا سواغی سەربانی ماڵە هەتیوەکانیان وەپێش ماڵە خۆیان دەخست ،ڕابرد،
بەداخەوە ئەوڕۆ باس هەرباسی پوڵ وپارەوبەرتیل دان وبەرتیل خواردن وپێشێل کردنی ڕەوا(حەق،ماف)وپەرەپێدانی کارەساتە،کارەساتەو کارەسات،
ئەگەر ئەوخوشکە بەڕێزە خامەڕەنگینە بەئەزمونە سابڵاغیە بەڕێزەمان کەباسی سابڵاغی جارانی کردوە ،وەئەوە دیاردەی دڵپاکی ودڵسۆزی بەڕێزیانە،وبنەماڵەکەیان هەر لەکۆنەوە بۆ گەشەوپەرەی شارەکەمان زۆر تێ کۆشاون،وەکو ناوەکەی خۆیان ،بەسەرشاردا بگەڕێ ودەورێ لێدا دەبینێ ،ئەی هاوار سابڵاغ بۆئاوای بەسەر هاتووە، ،
بالەبیرمان نەچێ مەهاباد هەتا
سابڵاغ بوو :شارێکی چوکی شادوئاوەدان وڕنگین سەنگین وپڕ لەکەسانی دڵسۆزو مەردو ڕەندو ئازاو بەجەرگ ودڵسۆزو دڵاواڵە وڕێزدارو بەبڕوا بوو،
وێژەو ئەدەب وشیعر وشاعرانی ئەوکات ڕێگای دروستی کوردایەتی ومەرداتی وچاکی وپاکی یان دەنواند، هۆنەر هونەرەکەی لەخزمەتی گەل ونەتەوەدابوو،
چایخانەکان جێ کۆبونەوەی خێرخوازان ومزگەوتوتەکیە
جێی خواناسی وبڕیاری مرۆانە بون،
بەڵام پاش ئەوەی ڕژیمی پاشایەتی ،لە ڕواڵەتدا بۆ ئاوەدانی ولەبنەوەدا بۆ تێکدانی ڕایەڵ وپۆی گەڕەکەکانی سابڵاغ ولێک بڵاوکردنی دانیشتوانی کۆڵانەکان و هاوپێوەندی دانیشتوانی بەلێدانی شەقام وخەیابان لێک پچکڕاندو لەهەموولاوە خەڵکی لاوەکی تێخزاند،ئەوبیروڕاوهاوپێوەندی ویەکەتی ودڵسۆزیە نەما، بەتایبەت بەدانی وام و رەهن ی
خانو ،وە قەرزدارکردنی خەڵک وقیستی بانکی، کەس هۆشی نەماو هەر دەفکروبیری وام وەرگرتن وخانووبەرە سازی و کڕین وفرۆش کەوتن، خۆ بڵاوکردنەوەی مادەی هۆشبەرو مواد مخدر و.....ڕێگای بۆ دورخستنەوەی خەڵک لێکتر و،
پەرەپێدانی نالەباری خۆش کرد، سابڵاغ بووە لێڕەوارودارستان وجەنگەڵ،بووە ئەوەی ئێستا دەبیندرێ، کەس ئاگای لەکەس نیە، شەیتانی،شۆفاری، سود خواردن، درۆ ،مافی خەڵک پێشێل کردن،کڵاوبازی،ئاکاری ناشایست،،،ناحەزی ونالەباری خۆیان لەدەس داوە،هەر وەسەر یەک نانەو بەس،
شا ژنە بەجەرگ وکوردی پۆشە کان،بونە ئەفسانە، شارپڕە لەپۆشاکی بێگانە،کوڕوکاڵ دەبیری لایی کێشان(پێبڕکەی ماشێن)دان،
پیرەکان لەفکری نان،ساماندارەکان ئارەزوی ڕیزەئاپاڕتمان، گەنجەکان تێ دەکۆشن بڕۆنە هەندەران،
....بڵێم چی ؟ چم دی؟ چم نەدی؟!
ببورن کاتم بەفیڕۆدان .
لەگەڵ ڕێز ؛ حەسەن شەریفی
سابڵاغ (مەهاباد)١٤٠٣/٠٤/٢
کابان | KABAN
ڕا و بۆچوونی ڕێزداران کاک ئەسعەد بەرزەنجی و کاک حەسەن شەریفی لە ڕاست ئەو دوو بابەتە
👇👇
حه‌سره‌تێك و وه‌ڵامێك
نووسین: په‌روانه ئه‌حمه‌دین
ده‌نگ: مه‌ناف ئێران په‌نا
س؛ ڕادۆبەش
کابان | KABAN
این متن از دکتر حسن بیات در خصوص انتخابات جاری به نظرم نکات جالبی دارد .
Читать полностью…
تاقانەی خانمێ
بەشی ٥٢
بابەحاجی زۆر توڕە بوو بەڵام وەکاز بەلەسەرەخۆیی و بوێرانە چاوی لە چاوەکانی بابەحاجی بڕیبوو و چاوەڕێی وەڵام بوو .
وەکاز گوتی مام حاجی ڕاستە من لە کوردستان نەژیاوم بەڵام دەزانم لەکوردەواریدا ڕێزی میوان لەسەرووی هەموو شتێکە و دەڵێن ماڵی بێ میوان بەقوڕ گیرێ یان میوان ئازیزی خودایە ، واوێدەچێ وێڕای ئەو تاوانانەی بەرانبەر خوێن و گۆشتی خۆت واتە برازاکانت کردووتە لە دابووکلتوری کوردەواریشدا زۆر وەدوا کەوتووی .
بابەحاجی یەک بەو ماڵە نەڕاندی گوتی تۆ کێی هاتووی لەناو ماڵ و لای بنەماڵەی خۆم بەو شێوەیە زماندرێژی دەکەی ؟ وەکاز گوتی ئەدی بۆ دەڵێن خوێن نابێ بەئاو ، خوێنت بۆ برازاکەت وەجووڵە نەکەوت ، من وەکازم وەکاز برازای لە پشتێت چۆن نامناسی ؟
بابەحاجی گوتی من برازام نیە برازام هەبا لەبەر ئەنوای خۆمدا پەروەردە دەبوون ، لەو کاتەوە خوشکەبەڕەڵاکەت ماڵی تێکنا و پەنای بۆ بێگانەیەک برد و بە زۆرەملی ماڵ و سامانی براکەمی داگیر کرد من حاشام لە بوونتان کردووە .
وەکاز گوتی مام حاجی لەخودا بێتەوە ئیزن نادەم کەس بێ ڕێزی بەخوشکی من بکات ئێستاش یەکەم و کۆتا جار بێ ناوی خوشکی من بەبێ ڕێزی دێنی ، خۆشکێک کە هەتا مرد ناوی ئێوەی بەخراب نەهێنا ، خوشکێک کە دوای مردنی زانیم خوشکمە و ڕۆڵی دایکێکی دڵسۆزی لەژیانمدا گێڕا ، خوشکێک کە پێچووکەی سپی هۆندەوە و بەکچێنی سەری ناوە زۆر لەوەی پیرۆزترە تۆ بێ ڕێزی پێ بکەی .
ئێستاش بەهاوار هاوار و هەڕەشە و گوڕەشە و خۆ گیف کردن ئەوەی ڕۆیی ناگەڕێتەوە ، هەر ئەوەندە کە شەو و ڕۆژ لە ترسی دادگایی خودا ئاراوقارات لێ هەڵگیراوە بۆخۆی گەورەترین ئازارە ، بۆ شەڕ و ناکۆکی و خوای نەکەرانێ دۆستایەتی ڕووم لە ماڵت نەکردووە .
بۆ وەش نەهاتووم تازە ببی بە خوێنهەسێن و پشت و پەنام و جێگری بابم و دەستی بابانەت بەسەر سەرم دابێنی ، من هاتووم داوای کچەکەتان دەکەم و چی چاوەڕوانی و داوایەکتان لەکابرایەکی بێگانە هەیە و چی شەرتوومەرجێکم بۆ دادەنێن بێ منەت بن .
بابەحاجی گوتی من کچم نیە بۆ بەمێرد دان حەوت کچیشم هەبا نەمدەدا بەتۆ ، چۆن خوشکی تۆ پێی شەرم بوو مێرد بەکوڕی من بکات منیش بەخزمایەتی ئێوەم شەرمە .
نەمدەویست هێرش بکەمە سەر کوڕێکی نەخۆشی بێ دەسەڵات کە بەستەزمانە کە لە سووچێکی ژوورەکە لەدونیای خۆیدا بوو و چاک و خرابی بۆ لێک نەدەبۆوە ، بەڵام بەخۆم نەوەستام گوتم ڕەبی حاجی بە کەشیدەکەت بخینکێی چۆن ویژدانت ئیزنی پێ دەدای ئەو خوشکە جوان و چاک و تێگەیشتووەی من لەو کوڕەت مارە بکەی ؟
گوتی جا چی بوو کەس کەسی چاک بێ هەر لەڕێی خودا دا کاری وا دەکا ، بەتەشەرەوە گوتم وەباڵ بەئەستۆم ڕاست دەکەی هەر بەو شێوەیەی کەتۆش لەڕێی خودا دا نەتهێشت دوو مناڵی بێ دایک و باب هەڵوەدا بن !
زۆر هات و هاوار کرا باسی چاک و خراب کرا ، مام حاجی سوار بوو و وەکاز پیادە بەهیچ جۆرێک ملی نەدەدا و دوایین قسەی ئەوە بوو هەتا من مابم مەسڵەت لەگەڵ برازاکانم ناکەم و تەواو .
کچێکیش بڵێ مێرد بەو کوڕەی دەکەم وەک سەگ بەلەعنەتی دەکەم و بۆ هەتاهەتایە حاشای لێ دەکەم .
وەکاز بەدڵێکی بەخەمەوە بێ ماڵئاوایی هەستا ڕۆیی ، ئەو شەوە ماڵی ئێمە دەتگوت مەیدانی شەڕی براکوژییە و هەر یەکەو قسەیەکی دەکرد ، تەنیا کەسێک کە بێدەنگ بوو و ئاگای لە دونیا نەبوو مامە فەقیر و داماوەکەم بوو کە جارجار بەدەنگی بەرز پێدەکەنی و خۆی ڕادەژاند .
من بە لێقەوماوی و نامرادییەوە چوومە ژوورەکەی خۆم و هەتا بەیانی فرمێسکم بۆ خۆم و بۆ داهاتووە نادیار و پڕ لە کێشەکەم هەڵڕشت ، دەمزانی کەس ناتوانێ کاریگەری هەبێ لەسەر بڕیاری بابەحاجی و قسە هەر قسەی خویەتی .
حەوتوویەک دوایە وەکاز و بنەماڵەکەی گەڕانەوە بۆ تاران بەڵام بەر لە ڕۆیشتنەوەیان من و وەکاز دووبارە عەهد و بەڵێنی خۆمان نوێ کردەوە ، و گوتمان بۆ گەیشتن بەیەک هەنگاومان زۆر تیژتر و بەگوڕتر لە پێشوو دەکەین و بەستەڵەکی سەر رێگای بەختەوەرییمان بەیەکەوە دەتوێنینەوە .
✍ ماری موکریانی
#تاقانەی_خانمێ
کابان | KABAN
🎥ببینید//
🔹همزمان با برپایی نمایشگاه تخصصی هنرهای چوبی؛
🔴از کتاب هنرمند مهابادی رونمایی شد
١۴٠۳٫۰۴٫۰۵
🆔 @HajeMedia
🆔 @HajeNews
بیری ئازادی
لە ڕێگا، یەکێک لە سەربازەکان بە پێکەنینەوە وتی: بەرپرسانی ئەم بەندیخانەیە کە دەچین، دەرفەتێکی باشیان بۆت ڕەخساندووە.
لە قسەکەی تێ نەگەیشتم! کام دەرفەت؟ جا کارەسات لەوەش تاڵتر دەبێت؟ لە وڵاتی غەریب حوکمی زیندانی هەتاهەتایی بە سەرتا بسەپێنن!؟
ئەو زیندانە تەنیا تایبەت بەوانە بوو کە سزایان، زیندانی هەتاهەتایی بوو. بۆیە کەس باسی ئازادی نەدەکرد. جۆرێک لە ژیان بوو کە هەر ساتێک مەرگێکی تێدا تاقی دەکرایەوە.
پاش چەند ڕۆژ تازە زانیم مەبەست لە دەرفەت چییە. لەو شارەدا نەریتێک هەبوو کە شێوەی یاسای بە خۆیەوە گرتبوو. هەرچەند مانگ جارێک، بەپێی پشکخستنی بەرپرسانی زیندان، یەکێکیان هەڵدەبژارد. دیانبردە سەربانی بەندیخانە. خەڵکی شاریش کە پێشتر ئاگادار کرابوون، بە گەورە و بچووک، ژن و پیاو، ڕووناکبیر و ڕەمەکی... هەموو دەهاتن. ئەو کەسە نیوکاتژمێر مەودای هەبوو کە وتارێک پێشکەش بەو خەڵکە بکات. جا ئەگەر خەڵک وتارەکەیان وەبەر دڵ کەوتبا، دەیانکرد بە چەپڵەڕێزان. واتە لە لایەن کۆمەڵگاوە بەخشراویت و ئازادی. دەنا ئەو تەنیا دەرفەتەش بۆ هەتاهەتایە دەبوو بە هیچ. تۆ کە جارێک لە لایەن دەستەڵاتەوە سزا دراوێت، ئەگەر جاری دووهەم لە لایەن خەڵکیشەوە تاوانبار بکریت، واتە دەردەکەت لێ دەبێت بە دوو.
ڕۆژانی هەوەڵ لەچەند کەسێک کە ساڵانی ڕابردوو، دەست لە گۆچان درێژتر لە سەربان گەڕابوونەوە، پرسیارم کرد، بەڵام تەنیا زەردەخەنەیەکی تاڵیان پێشکەشم کرد! ئاخۆ باسی چییان کردووە؟ چۆنیان باس کردووە؟ گریاون؟ پاڕاونەتەوە؟ هاواریان کردووە؟ ئەو خەڵکە بە چی ڕازی دەبن کە ئەو ئازادیەت پێ ببەخشن؟؟؟
دەیانگۆت لە ڕابردوودا چەند کەسێک توانیویانە ئازاد بن. بەڵام وەکوو ئەفسانە دەهاتە بەر گوێ. لانیکەم هەتا نۆ ساڵ، ئازادی وەکوو پڵاوی خانەقا هەر ناوەکەی بوو. کەس تامخوای نەکرد. ئەو نۆ ساڵە بە شەو و بە ڕوژ بیرم لێ دەکردەوە. ئاخۆ ئەوە ناوی دەرفەتە یان ئەشکەنجە؟ چاوەڕێ بوون، خۆی ئەشکەنجە نییە؟ کاتێ تۆ یەکجار مافی قسەکردنت هەیە ئەویش کاتەکەی دیاری نەکراوە، ئەشکەنجە نییە؟ کاتێ کابرا بە لاوی هاتۆتە زیندان، ئێستا پیر و کوێر، بە لێو قەبرەوە دەلەرزێ، تازە ئازادی بۆچییە؟ ئاخۆ ئەوە ئەشکەنجە نییە کە کابرا هاودەنگ و هاودەردی تۆیە و لەلات دانیشتووە بەڵام حەز بە ئازادی تۆ ناکات؟ ئەشکەنجە نییە کە هەرکەس وادەزانێت ڕازی ئازادی تەنیا لای خۆیە و باقی سەرلێشێواون و ئازادیەکەشی تەنیا بۆ خۆی دەوێت؟ ئاخۆ خەڵکی شار بۆ قسە و هاواری تۆ، وەکوو بەزمێک بۆ ڕابواردن ناڕوانن؟ ئازادی تۆ ئەسیری چەپڵەی ئەوانەوە؟ بۆ دەبێ کارت بکەوێتە لای کەسانێک کە باسی ئازادی و گوێزژماردن بەلایانەوە یەکێکە؟ سواڵی ئازادی مانای هەیە؟
ڕۆژێک وتیان دوو کاتژمێری دیکە حازر بە. تۆ هەڵبژاردەی ئەمجارەی. خەڵک چاوەڕوانن.
هیچ دڵەڕاوکەم نەبوو. حازر و ئامادە بووم. لە پاش نۆ ساڵ بیرکردنەوە لەخۆم، لە کۆمەڵگا، لە ئازادی، من وڵامی هەموو ئەو پرسیارانەم دەزانی.
دوو سەرباز منیان بردە سەربان و تەنیا لەبەرانبەر بەو خەڵکە بەجێیان هێشتم. قنج و قیت ڕاوێستا بووم و سەیری ئەو خەڵکەم دەکرد. یەکێک هاواری کرد: دا دوو قسەی خۆشمان بۆ بگێڕەوە، با تۆزێ پێبکەنین. یەکێکی دیکە بە قاقاوە وتی برا بێتاوانەکەم، دەزانم دایکی پیرت چاوەڕێتە، ئەگەر هەتا ئێستا نەمردبێت! ئەوی دیکە وتی: جا ژن و منداڵت تاوانیان چییە؟ تۆ ئەوانیشت بەدبەخت کردووە. ژنێکی زەردئەسمەری، سینگ و بەرۆکی خۆی ئاوەڵا کردبوو. هاواری دەکرد: بۆ ئێرە بڕوانە....
بەڵام من بێدەنگ لە بێستنی ئەو هەموو قسانە کە هیچیان بۆم گرینگ نەبوو، تەنیا بۆ ئەو خەڵکەم دەڕوانی. زۆریان ڕست و کەمم بیست. ئاخرەکەی یەکێک وتی براگیان بۆ هیچ قسەیەکمان بۆ ناکەی؟ خۆ تۆ تازە هاتوویت... جەماوەر بێدەنگ بوون.زۆر لەسەرەخۆ ڕووم کردە خەڵکەکەو وتم: من لەسەر داخوازی خۆم لێرە نیم. بەرپرسانی زیندان بۆ خۆیان منیان هەڵبژاردووە. دەنا من قسەیەکم نییە کە ئێوە پێی کەیفخۆش بن.من لەم زیندانەدا ڕازی بەختەوەریم دەستخستووە. من لە ئێوە ئازادترم. ئێستاش کە منیان هێناوە، تەنیا تکام ئەوەیە، مەرد بن و ئەو بەختەوەریەم لێ تێک مەدەن. من لێرەدا بە ئاواتی خۆم گەیشتووم...
پاش چەند چرکە،لەو بێدەنگیەدا،دەنگی چەپڵەیەک و دوان و دە و سەدان چەپلە بەرزەوەبوو. من هەر دەمڕوانی...
کە هاتمە خوارەوە، وتیان: لە ئێستا بەولاوە تۆ ئازادی....
دینۆ بوتزاتی_ئیتالیا/(محسن ابراهیم)
خوێنەری خاوەنبیر؛
ئەو پیاوە بە هۆی بیڕکردنەوەی قووڵ، لە مانای ڕاستەقینەی ئازادی تێ گەیشت.زانی کە ئازادی لە پێشدا لە دەروونەوە چەکەرە دێنێت. کاتێک کە تۆ زاڵ دەبی بە سەر دەروونی خۆتدا. نە گاڵتە و نە چەپڵەی خەڵک کار ناکاتە سەر ویست و ئیرادەت. بە پێچەوانەی ئەو چەند کەسەی پاڵ دیوار، کە ئازادییان بە قاقای بڵحانە و قسەی سووک دەزانی، یان ئەو ژنە کە ئازادی لە ڕووت بوونەوەدا دەدیت...
عیسا ئەحمەدی١٤٠٣/٠٤/٠٢
کابان | KABAN
📸 عکس هایی از روستاهای مهاباد (ساوجبلاغ موکری) و پیرانشهر در دورەی قاجار
⭕️ آلبوم خانه کاخ گلستان
کابان | KABAN
وڵامێک بۆ پەروانە
کەسەکەم بۆ نایەڵی بێمەوە؟خۆ منی سەرگەردان ئەوەندە سەرفەراز نیم، پێشوازی و شانازی و گاو و گەردوونم بۆبکەن.
کەسی کەسانم! جا چیە قیلە و قودرەت نەماون! دێمەوە دەبمە قیلە، بەڵام نەک قیلی کەوای سپی، دەبمە قیلی قیلەتاوی شەقام و ڕێگا و بان، هەتا پێتانم بخەنە بان.
زێدە لە ئازیزانم! دێمەوە باخی گوڵان دەژێنمەوە، کۆڵەبارێکی نەقاونەقم لە تۆوی گوڵان و خەڵف وڕێشەی دار و دەوەنانم پێیە. گیابەند و خاو و بەیبوون دێنم لە بێستوون،
ڕیحانەڕەشە و وەنەوشە لە نۆدشە، تۆوی خاشخاش و گوڵە هێرۆ لە کێوی شاهۆ، سێو و گێوژ و شێلان و لێمو لە بناری قەندیل، کەما و بیزا و شنگ لە بنار و لاسێبەرەکانی سپی سەنگ، ترشۆکە و نانەحاجیلە و قازیاخە و کووزەڵە لە لێوارەکانی چۆمە پیرۆزەکەی شاروێران و گابازەلە... خەڵفە بەن و دارە توو لە هۆبەتوو، نارنج ، هەنار و لێمۆ لە ئامێد و لە زاخۆ. پەڵک و چنار و بێ و داربووز دێنمەوە لە ڕەواندووز. کیفۆک و مەندۆک لە ئاکرێ و دەهۆک. شیرین بیان و مێمووک لە کێڵگە ڕەنگینەکانی کەرکووک. گۆڵە کاخڵی و شەشپەڕ لە کێوی سێ سنووری داڵانپەڕ. گوڵەباخ و یاسەمەن ونەسرین لە خانەقین و شارەشێرینەکەی قەسری شیرین. دار قەزوان لە مەریوان. شلێر لە دەشتی شلێرێ. ژالە و کەنێر لە پیرە هەولێر. سەیدووکە و ڕێواسان لە هەریر و باتاسان...جاترە و بێژان و مەرزە وبەهارات لە کێوە رەنگینەکەی ئارارات دێنمەوە.
گێوژ و شیلان و هەرمێم وەراندوە لە ورمێ.گۆزەڵە ئاوێکی لێواولێویشم لە زمزمەکەی کانیاوی دم دم و ئاوی ئەرەس و دەجلە و فورات و سیروان و گادەر و جانداران پێ یە.
مەرگم ڕەپێشت کەوێ! دێمەوە دەچمە گڕاوان و تەپ و تۆزی دووری بە ئاوێ دەشۆمەوە و تاقەداربووزی لە خۆم زیز، ئاشت دەکەمەوە.
با بێمەوە خوشکۆڵێ هەڵت بگرم بە کۆڵێ و بە خێرایی دارهەلووکان سەرکەوین لە زاوابووکان، جا دەستبکەین بە تووکان لە دووژمن، لە نەیار، لە تاوانبار، لە جندۆکان.
زێدە لەکەسانم! با وەگەڕێم دەستنوێژێک لە کانیلەکەی مام قەمبەران و تەیەمومێک بە خاكی گۆڕستانی بداغ سوڵتان و کڕنوشێک بەرەو مەرقەدی پێشەوا بگرم، نوێژێکی درێژ دابەستم، ئەوەندە درێژ هەتا هەتا نەیبڕم و چ سڵاوێک بۆ راست و چەپ نەدەمەوە.
بینایی چاوم! لێـم گەڕێ با وەگەڕێم، شیر پاکم و هەڵناگەڕێم و وەرناگەڕێم و هەر هەڵدەگەڕێم.
کەسم! دێمەوە و داری سەرچاکان ئاو دەدەم و کێلە ڕووتەکان بە ئاڵ و واڵی سوور و زەرد و سەوز ئاسای تیشکی ڕۆژێ دەڕازێنمەوە. چلدانە و ملدانەش ناگرمەوە، تازە ئیتر سێ بەردە و حەوت بەردە و چل و چلدانە... بۆچی؟ بۆ کێ بگرمەوە؟
ئاشنای ڕۆشنام! دێمەوە شەو سەڵا بۆ ڕۆژوانی ڕەمەزان ناکەم ، دێمەوە سەڵا بۆ دواڕۆژی ڕۆژان دەکەم.
خانم و خاتوون! دێمەوە دەبمەوە فەقێلە، بەڵام حەڵۆی بە شەقان ناکەم و هەڵوا دەبەخشمەوە.
کەسی خاڵی پەروانە! لە باتی ئاغای حەمەڕەسووڵی ئەیازی خوا لێی بێ رازی، خۆم دەبمە نامەبەر، پەیامی دڵدار بۆ یار و نامەی شادی و مزگێنی ئازادیتان بۆ دێنمە بەر دەروازە.
دیاری دیارانم! نەک هەر لە گەرەک هەرمەنیان لە گەرەکی جوولەکان، شوانان، ڕزگەیان، قوولەقەبران، سێ ئاشان، سەربەرداشان، سەرخڕێ ، پشت قەڵا ، دەباغخانە ، پشت تەپ ، گەڕەکی شوانان، باخی سیسە ، گوومرگ و.... خوان و کەوڵ وسفرە و مەجوعمەی جیژنی شادی سەهۆڵبەندانەکەی مەهابادێ دەڕازێنمەوە و هەموو ساڵی ماڵ بە ماڵ دەیگێڕمەوە.
بەڕێزە زیزەکەم! شەمۆلە دامەگرە کەر نەماوە! وڵات و دونیا پڕ لە کەرە! منیش دێمەوە، دەبمە کەری خۆوڵاتی و دەچمەوە قوڵکەی کەران بۆ لەوەڕان، بەڵام ناچمەوە نێو ئەوان کەران.
.دڵسۆزە بە پاڕێزەکەم! دێمەوە قایەتی سەیر و سەمەرە و دەسکردی داپیرە بۆ منداڵان ناگێڕمەوە، ئەوەندەم قایەت و بەند و بالۆرە و هۆرە و بەسەرهاتی هات ونەهات و کەوتن و هەستانەوە پێن.... مناڵەکان وەها شاگەشکە دەکەم هەتا هەتایە لە بیریان نەچێتەوە.
دێمەوە تیتل وبیبلەکانی دایە فێر دەکەم، دایەی خۆیان باشتر بناسنەوە و فریوی مام گورگە و دانوولەی نەخۆن، چون ئازارە، ژەهرەمارە، تاڵە، کەکرەیە.
دێمەوە چێرۆکی مریشکەقوڵە ومام هۆمەرەی بنکەندی و بە خۆی و بە تووڵە قەندی... بۆ هەموو مریشکەکان و مامەڕان دەگێڕمەوە ئەگەر پێک بێن و ڕێک بێن، مام ڕێوی دەتەڵە خەن و کەوڵی زۆڵی بفرۆشن بە وردە پووڵێ.
کەسەکەم بۆنایەڵی بێمەوە؟ دێمەوە بۆ زاوابووکان سروودی ژیان و بەندی خەنەبەندان دەچڕم، هەر ئەو سروود و بەندانەیان بۆدەچرم هەتا دەمرم.
مامۆستا ژیرەکەم دادە پەروانە ! دێمەوە دەبمە مەلاحوسێن و ماملێ، هەوای بارگەی مەنیجێ و بازی بێریان و چیرۆکە بەرز و رێئالیەکەی "پیرۆت"ی سەرلەنوێ بە هەوا و ڕەنگ و بۆیەکی دیکە وەسەرێک دەنێمەوە جا سەر دەنێمەوە.
👇👇
🖊 یادداشت: ئۆمێد پایکار
🔴 داشخانه؛ دەرەتفێی مەهاباد
له‌م لینکه‌دا بیخوێنه‌وه:
👇
📎 https://www.haje.ir/Newsdetails.aspx?itemid=22199
@HajeNews
کۆمەڵێک سێروو و شاوە لە کاتی وێنجەدروون
( ڕەنگە بۆ تاقمێک نۆستالژی بێت )
وەرزێڕی ئازا و وریا ، کەیوان ڕەمەزان
پێنج‌شەممۆ ۷ ـی پووشپەڕی ۲٧٢٤
ناوچەی شاروێران ـ مەهاباد
چاوی شەیدات تیری داوم لە سینە
قەڵەم و دەستیش هەروا لە کەمینە
پەڕوباڵم شکاوە چەشنی بولبول
دەخوێنێ ئەمما هەر مات‌وحەزینە
لەچاوانم سرووشکی سوور دەچۆڕێ
لەنێومندا شەپۆڕی ترس و شینـە
بڵێی ئاخۆ حاسڵ ببێ مورادم
لەنێو سەردا نەمێنێ بوغز و کینە
دەڵێم ڕۆژێ ئەتۆ بانگکەمە جێژوان
دڵی ئاشق و سەوداسەرم ببینـە
بەڵێنم داوە هەر ڕوژێ ئەمن دێم
بەرەو ئاسۆت گڕی ئەشقم بە تینە
🔶هەڵگورد سوڵتانی
کابان | KABAN
بەرە و پیرچوونی (( حەسرەتێک و وڵامێک )) و (( سابڵاغی جاران )) .
خوشکی زێده عه زیزم پەروانە خانم سڵاو رۆژ باش .
گه ڵێک جاران دەکەومه یادی یاران
ده کەومە کۆری شایی و بەزمی جاران
گەڵیک جاران خەیاڵ دەمباتە جێژوان
چ شیرینه ژیان و مان دەگەل وان
بیرکردنەوە له رابردوو هەستی مرۆڤ ناسک و لەتیف دەکا ، به چەشنێک سواری ئەسپی خۆشبەزی خەیاڵ دەبێ و نەک به پڕتاو بەڵکوو بە قەدەم هێدی هێدی شریتی عومری رابردووی به سەر دەکاتەوە دەگەڵ شادێکان دەستەملان دەبێ و ناخۆشێکانیش دڵتەنگی دەکا و بە ناچاری ئەژنۆی خەم لە باوەش دەگرێ.
حەسرەتێک و وڵامێک و سابڵاغی جارانم چەند جار به گوی دڵ گوێ داوەتێ ، نەسرێکی رەوان و ساکار و هەتا بڵێی دڵنشینه به چەشنێک که کوردێکی نەخوێندەواری ساویلکەش لێی حاڵی دەبێ و چێژی ڵێ وەردەگرێ . گا به کوڵ دەگەڵی دەگری و گا قاقا پێدەکەنێ لەشت ساغ و قه ڵەمت هه ڕوا دەروەست و ره نگین بێ ، هەڵبەت به بروای من سابڵاغی جاران له باری ئەدەبێوە به هێزترە ، ئێمه مانان زیاتر هه ست بەو دیمنانەوە دەکەین چوونکه تەمەنێکمان ڕابواردووەو دەگەڵیان ژیاوین نۆستاڵۆژێک خەم خواردنه بۆ رابردوومان . ئەوەی ڕاستی بێ نووسینی ئەوجۆرە بابەتانە ئارەزوی چەندین ساڵەی منەو و ڵێم بۆته خوڵیایەک ئاخر ئەوەندەی بەندە لە گەڵ مێژووی نەتەوەکەمان ئاشنام چ ئەوانەی بیانی نووسیویانە و چ ئەوانەی مێژوونووسانی خۆشمان نووسیویانه بێجگه له یەکێان زۆر بەیان له ڕوانگەی سیاسێوە نووسراوه کەمتر ئاوریان وە لایەنەکانی ئابووری و کۆمەڵایەتی داوەتەوە ئارەزوومە مێژووی کورد به ڕوانگه ((ویل دورانت کە تاریخ تمدن و مرتضی راوندی که تاریخ اجتماعی ایران ))نیان نووسیوە بنووسڕێ ، هەڕ چەند زۆر باش دەزانم هەڕ ئێستا دەفەرموون : بەغدا بۆ پیاوی هەژار دووره حەقیشتە ، چونکه ئێستا ڵەم بوارەدا نە کەوتووینە دارەدارەش ، به ڵام کاتێک ئاوڕێک ڵه ڕابردوو دەدەمەوە نالی مان هەیه که به شێعره بەناوبانگەکەی به ناو شاری سولێمانیدا دەخوڵێتەوەو به یادی رابردووی ده فه رموێ :
قوربانی تۆزی رێگەتم ئەی بادی خۆش مروور
ئەی پەیکی شارەزا به هەموو شاری شارەزوور .
یان گه شتی مامۆستا هەژارم دێتەوە یاد که له سەرەتای بەرەو موکریان دا ده فه رموێ:
شەوەتاریکەکەش و ماته زەوی
که وته خۆ کێوی که وی دار و دەوی
به موکریان دا دەگەڕێ و بەم جۆره تاسەی دڵی خۆی دەشکێنێ
یان ڵه سەردەمێکی تازەتردا بامیەی شیڵەداری کاک قادری لوتفیانی و داشامەجیدی کاک ئەحەدی ئەنجیری و دەچمەوە سابڵاغی خاتوو شیڵان حەسەنپوور به هانامانەوە دێن و به سابڵاغ دا دەخوڵێنەوە و لەم بەستێنەدا مەڵە دەکەن . یان کاتێک شریتی شارەکەم سنەی کاک محێدین حەق شنای گوێ دەدەمێ که زۆڕ به ڵێهاتوویی و دڵ نشینانه مێژووی شاری سنە دەخوێنێتەوە ئۆخژنم دێتەبەر و تۆوی گوڵی ئاوات ڵه دڵمدا چەقەرە دەکا ، ڵه خۆشیان گەز گەز باڵا دەکەم و گەلێک هیوادار ده بم که هێدی هێدی خەریکین بەو دەستە چیلانەوە کەرەسەی نووسینی مێژووی کۆمەڵایەتی ساز دەکەین . مێژوویەک که نه تەنیا بەردەنگی هاوتەمەنی ئێمه دەپێکی بەڵکوو بۆ بەرەی داهاتووش چێژی خۆی دەبێ و هەڵ و مەرجی پێشکەوتنی کۆمەڵیش دەرەخسێنێ .
خوشکه ئازیزەکەم ئاواتەخوازم نەک به لاره لار و گۆچان به دەست بەڵکوو وەک تاڤی لاویت قیت و قۆز بەو هەست و بیری کوردانه و زانستیانەت لە بنج و بناوان و کەلێن و قوژبنی رابردوومان بکۆڵێوه و بزانی ڵه مێژووی به سەرهاتی ڕابردوومان چمان بۆ لواوه و ناو ئاخنی کەشکۆڵەکەت ڕازاوەتر بکەی . هیوادارم ته من درێژ وسڵامەت و دڵ شاد بژی زۆڕ باشیش دەزانم بەو چەند ڕستەیە ناتوانم بەڕەو پیرت بێم و دەسخۆشانەت ڵێ بکەم ، به ڵام دیاری شوانه و ڵێم قەبووڵ بفەرموون ، چون به داخەوە قەڵەمم کوڵه و لە سەڕ فەزای مەجازیش لەوە زیاتر درێژدادری ناکرێ . هیوا دارم له دەرفەتێکی ڕەخساوتردا زیاتر چێژ ڵه مرخ و کەسایەتی جەنابتان وەرگرم . دڵنیاشم هه ڕ ئەوجۆرەی میللەت ڵه ناو دڵی دڵ سۆزان و کوردپەروەرانی نەتەوەکەمان جێگیر بوون ، هەڕواش ئەو هەڵکەوتوووانە ئەگەر بە ڕواڵەتیش لە بەر چاو نەمێنن بۆ هەتا هەتایە به رەنگ وبۆن و لیباس و بیچمی کوردانەوە لە ناو دڵی نەتەوەی خۆیانا ئەژین .
ڵه کۆتاییدا پڕ به دڵ سپاسی کاک مەنافی ئێران پەنا وکاک مستەفا مەحموودی و کاک ڕەسووڵ شەریفی دەکەم که بۆ ساز کردنی ئەم فایل و کلیپه پڕبایخە ئەرکیان کێشاوه . عه رزی کاک مەنافیش دەکەم لە خوێندنەوەی سابڵاغی جاران دا دوو هەڵەی بچووکی تێدایه .
1ـ کاتێک دەگاتە گۆرانی مریەم سابڵاغی مریەمی به چەشنی فارسان (مەریەم) دەخوێنێتەوە .
2_شێعری مامۆستا هێمن کە دەخوێنێتەوە لە جیات چاوی جوانم نەدی (( تێر )) بە چاوانم دەفەڕموێ :
چاوی جوانم نەدی (( پڕ )) بە چاوانم .
سەڕکەوتنتان ئاواتەخوازم .
ئەسعەد بەرزەنجی
27/خاکەلێوەی/2722
کابان | KABAN
سابڵاغی جاران
نوسین : پەروانە ئەحمەدێن
خویندنەوەی: مەناف ئێران پەنا
دەنگ هەڵگر: رەسوڵ شەریفی
میکس : مستەفا مەحمودی
کابان | KABAN
تاقانەی خانمێ
بەشی ٥٣
ڕاستە ورەمان دەدا بەیەک بەڵام لەقووڵایی دڵەوە دەمانزانی پێک گەیشتنی ئێمە زۆر ئەستەمە ، تەنیا تین و تەوەژمی خۆشەویستی نێوانمان بوو گوڵی بەخیز دەکرد .
ڕۆژ و حەوتوو و مانگ دوابەدوای یەکدا تێ دەپەڕین و خەم و دووری و ئازاری پێک نەگەیشتنی ئێمەش پێوانە نەدەکران ، هەردووکمان خەمبار و بێ دەسەڵات خۆمان دابووە دەست قەدەر و چارەنووس .
تەنیا هێڵی پەیوەندییمان تەلەفۆنی بەدزی بوو ، بەداخەوە براکانیشم لەسەر دڵی بابەحاجی بوون و پێیان خۆش نەبوو من و وەکاز بۆ یەک بین .
بابیشم لەو ناوەدا نەیدەزانی لای من بگرێت یان لای بابی ، ئەو کات گەورەی ماڵێ قسەی دەڕۆیی .
تەنیا پشت و پەنام و جێی ڕاز و نیازم دایکم بوو و زۆری وەکاز کەوتبووە بەردڵی و دەیگوت خەمێ مەخۆ قەڵەمی خودا بەکەس ڕەش نابێتەوە .
جارێکی کاک قادر و دادەناسکێ هاتن بۆ خوازبێنی و جارێکی دیکەش دایک و بابی ئەسرین هاتن ، بەڵام قسەی بابەحاجی یەک بوو و نەدەگۆڕا .
کاک قادر چووبوو شکوای هاویشتبووە بەر کەیخودا و گەورەپیاوەکانی ئاواییەکەی خۆی ، ئەوانیش هاتن بۆ لای بابەحاجی بەڵام بێ سوود بوو .
پاشی چوار مانگان وەکاز هاتەوە بۆ سابڵاغ لە سەر ئیزنی دایکم لەبەیانیەوە چوومە ماڵەکەی هەتا لای ئێوارێ ، چەندی شێوووەردمان داوە بە ئاکام نەدەگەیشتین .
لەکۆتاییدا وەکاز گوتی جارێکی دیکەش دێمەوە لای مامەحاجی ئەمجارەی دەستی ماچ دەکەم ، لەبەری دەپاڕێمەوە ، نیوەی سەروەت و سامانەکەمی بەقەڵەم و کاغەز بەناو دەکەم ، جا ئەگەر ڕازی بوو ئەوە باشە دەنا دوو ڕێگامان لەپێشە .
یان هەڵتدەگرم و دەتبەم لەتاران مارەت دەکەم یان دەبێ لەنێوان من و باپیرت یەکمان هەڵبژێری ، چونکە من چیدیکە بەرگەی ئەو شەڕەخۆتڕێنەی ناگرم .
سەیران قبووڵ بکە و لێم تێبگە من زۆرم بەدبەختی و بێکەسی و نەهامەتی دیتووە پێویستم بەحەسانەوەیە ، بەتەنیا و بێکەس ئەو بارە زۆر قورسە بۆ شانە لەرزۆکەکانی من .
ئەوە ئەو ڕۆژە بوو لێی دەترسام کە ڕۆژێک وەکاز مافی هەڵبژاردن بدات بەمن ، ئاخر نەوەی حاجی ساڵەی وا بەناز پەروەردە و پۆشتەوپەرداغ و تێروتەسەل بۆ ڕەدوو کەوتن دەبێ !
خۆ خەڵک هەر ڕواڵەتی ژیانی یەکتر دەبینن نازانن لەناخەوە ژیانی ئێمە مۆرکەی لێداوە ، بەو کردەوە دژی ئینسانییەی باپیرم ، هەموو کەس دەستی بۆ باپیرم بەسینگەوە دەگرت و دووقەد لەبەری دادەهاتنەوە .
وەکازیش مافی خۆی بوو خۆ نەدەکرا پاشماوەی تەمەنی چاوەڕوانی من بێت ، ئەویش پێویستی بەژن و ماڵ و ئاسوودەیی هەیە و تەمەنیشی بەرەوسەر هەڵکشاوە .
بەوەکازم گوت من هەردووکتان هەڵدەبژێرم ، وەکاز گوتی لەمەبەستت تێناگەم ، گوتم قەت ناهێڵم سەری بابەحاجیم لەناو کۆمەڵگادا شۆڕ بێ ،ڕەدووکەوتن لە من ناوەشێتەوە .
وەکاز گوتی دەی ئەوە بەئاشکرا دیارە باپیرت هەڵبژارد ، گوتم نا بەڵێن دەدەم لەتۆ بترازێ هیچ پیاوێک نەکەمە باخەوانی باخی سێوانم .
بەژین هی تۆم و بەمردن هی گڵ ، ئەگەر دایانم بەتۆ ئەوە باشە دەنا وەک دادەخانمێ دەبمە بووکی ژێر گڵ و مێرد لە من حەرام بێ .
وەکاز هیچ هیوایەکی لەقسەکانمدا بەدی نەدەکرد و دەیزانی من کچێک نیم ڕەدوو بکەوم ، هەرچۆنێکی بێ هەوڵی دا لەگەڵ بابەحاجی پێک بێت .
هات دەستی ماچ کرد گوتی بەنۆکەری خۆتم قبووڵ بکە ، گوتی هەرچی بووبێت لەنێوان و تۆ و خوشکم من مناڵ بوومە و تاوانی منی تێدانیە ، گوتی نیوەی سامانەکەم بەناوی خۆت و کوڕەکانت دەکەم ، گوتی سەیران بەختەوەر دەکەم ، گوتی چیدیکە بێکەسم مەکە جێی بابم بۆ بگرەوە پێویستم بەباوەشی گەرمی تۆیە ،...
بەڵام قسەی بابەحاجی وەک کلکی حوشتر بوو نەدرێژ دەبوو و نە کورت ، گوتی دایکم مرێ و بابم مرێ مەگین بەسەر کەلاکی مندا سەیران تێپەڕێ و بەبووکیت بۆ بێ دەنا هەتا من مابم بە لەبزی من دانایە بڵێم مێرد بەتۆ بکات .
بەشین و گریان و دڵ بەخەم دیسان دەستبەتاڵ وەکازم بەڕێ کردەوە بۆ تاران و ئەمجارە دەبوو خۆ بۆ دابڕانێکی هەتاهەتایی ئامادە بکەم .
✍ ماری موکریانی
#تاقانەی_خانمێ
کابان | KABAN
.
یادێک لە ئوستادی بێوەکی دەنگ و ئاواز.
5ی پووشپەڕ هاوکاتە لەگەڵ دواکۆچی ئوستادی مەقام و گۆرانیی کوردی، مرۆڤێکی لەدڵ نزیکی خۆشەویست حەسەن زیرەکی زۆر ژیر و زیرەک، ئینسانێکی زۆر بەئەمەک و هەست ناسک و ئەوینداری جوانییەکانی وڵاتەکەی، کەسێکی وشەزان کە هەرچەند خوێندەوار نەبوو بەڵام سەدان وشەی ڕەسەن و ناوازەی لەتۆی شێعری ئاوازەکانیدا پاراست،
پڕ بەدڵ خۆشم‌ویست و خۆشم دەوێت،
بۆ ڕەنجەکانی کە لەدەست دەوران و ئێرەیی ناکەسان کێشای پەشێوم.
یادی لە دڵمایە هەروا کە لە دڵی هەموو کوردێکی دڵپاکی خاوەن هەست و لایەنگری مۆسیقای کوردیدا جێی گرتووە.
خودا ڕۆحی شاد بکات هەروا کە زۆر جار دڵی ئێمەی بە دەنگی بلاوێن و بێوەک و وێنەی خۆی شاد کرد.
محەمەد ناهید
کابان | KABAN
تاقانەی خانمێ
بەشی ٥١
سەیران : دوای دیتنی دادەناسکێ و مێرد و منداڵەکەی هەستێکی زۆر خۆشم هەبوو ، دەتگوت ساڵەهایساڵە ناسیومن هیچ نامۆییم لێ نەدەکردن .
دادەناسکێ نەک هەر لەلای وەکاز گەورە و خۆشەویستە بەڵکوو لای منیش زۆر خۆشەویستە و بەڵێن بێ ئەگەر لەگەڵ وەکاز بۆ یەک بین وەک خوشکێکی بچووک لە ئەمرووگوێی دەرنەچم .
دوای هاتنەوەم لە لای وەکاز و بنەماڵەکەی وەک مریشکی هێلکەکەر دەرووژوورم دەکرد حەجمینم نەمابوو نەمدەزانی چۆن ئەو قسەیە لەلای دایکم بدرکێنم ، ئاخیری دایکم گوتی سەیران دەزانم قسەیەکت پێیە و بیڵێ هەم خۆت ڕزگار بکە و هەم منیش .
گوتم جا تۆ چووزانی قسەم پێیە ؟ گوتی هەر دایکێک مناڵی خۆی نەناسێ دایک نیە ! کچم دایک نۆ مانگ و نۆ ڕۆژ و نۆ سەعاتان دە زگ و پشتی خۆیدا هەڵگێڕوەڕگێڕی کردبی چۆن نازانێ کچەکەی چی لەناو دڵ دا ؟
گوتم ڕاست دەکەی دایە گیان بەڵام ئەوەی من لە ناو دڵمدایە دەترسێم ببێتە هۆی ناکۆکی و ناخۆشیی نێوانمان ، گوتی نا کچم دایک و ئەولاد وەک نینۆک و گۆشتن قەت لێک نابن ، جا ئێستا ئەو هەمووە شێر و ڕێویەم بۆ مەهێنەوە پێم بڵێ بزانم چت لە دڵدایە .
بەوردی و بە جوانی هەر هەموو شتێکم بۆ باس کرد و گوتم وەکازم خۆشدەوێ و لەو بترازێ هەر چی پیاوە لەمن حەرام بێ ، ئێستاش بەتەمایە بۆخۆی بێت و قسە لەگەڵ بابەحاجی بکات .
دایکم گوتی جا ئەگەر بۆخۆی دێتە لای بابەحاجی ئەو پرسەگورگانەیە بۆ بەمن دەکەی ؟ گوتم نا دایە گیان من حەدی وەم نیە پرسەگورگانە بەتۆ بکەم .
ئەگەر کەسێک مافی پرس پێ کردنی هەبێ بەر لە هەموو کەس تۆی ، یەکەم زێدی من ناوزگی تۆ بووە ، تۆ شەو و شەونخوونیت لەگەڵ کێشاوم ، تۆ ژانووژوورت کێشاوە بەمنەوە و ...
بۆیە بە تۆم گوت بۆ وەی پشتم بەرنەدەی و وەک چیایەکی بەرز پشتم پێت قایم بێ ، دایکم کە گوێی لەقسەکانم بوو گوتی ڕۆڵە گیان دایک چی بۆ لە هەموو شتێک گرینگترە لەو دونیایەدا لە بەختەوەری مناڵەکانی وەتر .
من بێ وەی کوڕەی ببینم و بیناسم لەدڵەوە بەو پەیوەندییەتان دڵخۆشم ، بەتایبەت کاتێک دەزانم باپیری تۆ چەندەی ناحەقی دەرحەق ئەو کوڕە و خوشکەکەی کردووە .
هیوادارم پەیوەندی نێوانتان ببێتە هۆی ئاشت بوونەوە و تەبایی و داهاتوویەکی خۆش چاوەڕوانتان بێت ، بەڵام بۆخۆت باش دەزانی بابە حاجیت یەک دەندە و عینادە ، هەر بۆیە دەبێ پێشتر قسە لەگەڵ بابت بکەم .
دایکم قسەی لەگەڵ بابم کردبوو ، لەقسان بابیشم بەو پەیوەندییە ڕازی بوو و پێی خۆش بوو ئاوێک بەو ئاگرە دابکرێت و وەکاز وەک ئەندامێکی بنەماڵەکەمان بێتە ئەژمار ، بەڵام بابەحاجی گەورەی ماڵێ بوو و کەس مافی بڕیاردانی نەبوو و ئەوەش دوودڵێکی زۆری لە لای هەموواندا بەدی هێنابوو .
وەکاز و دادەناسکێ زۆر بەپەلە بوون و بابیشم نەیدەوێرا باسی ئەو شتە لەلای بابەحاجی بکات و ئاگری کۆن بەبا بکات ،
ئێوارەیەک بێ ئاگاداری و پرسی کەس لە دەرگای ماڵمان درا ، کاتێک براکەم چوو دەرگای کردەوە وەکاز بەتەنیا هاتبوو بۆ لای بابەحاجی .
بابەحاجی بەدیتنی وەکاز گەشاوە و گوتی کوڕە غەریب وا دیارە جارێ هەر لێرە ماوی !!!
هەموومان بەسەرسووڕمانەوە چاومان تێیان بڕی ، ئایا بابەحاجی و وەکاز یەکتر دەناسن ؟ بەڵام دوایە زانیمان بەڕێبواری یەکتریان دیتووە و بابەحاجی ڕێی بەنزینخانەی پێ نیشان داوە و دوایەش خولێکی ناو بازاڕیان پێکەوە لێداوە .
بێدەنگێکی ناخۆش باڵی بەسەر ماڵمان داگرتبوو ، کەس زاتی نەدەکرد سرتەش بکات ، دوای ماوەیەکی زۆر وەکاز گوتی مام حاجی ئەوڕۆژەی باسی دوو برازات کرد گوتت لەمێژ ساڵە پەڕیوەی تاران بوون .
زۆریشت دوعا کرد خودا لە گوناح و تاوانەکانت خۆش بێ ، لەو ڕۆژەوە من فکر لە قسەکانت دەکەمەوە و پێم خۆشە بزانم چی تاوان و گوناحێکت لەگەڵ برازاکانت کردووە و بۆ ئەوەندە لە ڕۆژی لێ پرسینەوە لە بارەگای خوا دەترسێی ؟
بابەحاجی حەوت ڕەنگی هێناوبرد ، تەواوی جەستەی دەلەرزی ، پشووی سوار بوو و دەستی کرد بەکۆخینێکی بەتەوژم ،
دایکم دەسبەجێ شەربەتێکی ئەسکەنجەبینی بۆ هێنا ، دوای خواردنەوەی شەربەتەکە بابەحاجی هێندێک هێور بۆوە و بەغەزەبەوە چاوی لە چاوی وەکاز بڕی و گوتی جا ئەوە کێشەی بنەماڵەییە چی پەیوەندی بەڕەشووڕووتێکی بێگانەی دمڕووتی وەک تۆ داوە ؟
✍ ماری موکریانی
#تاقانەی_خانمێ
کابان | KABAN
🔻چرا بعضیا با کوچکترین مسائل ناراحت میشن؟
شاید مسائلی که به نظر شما کوچیک هستن واسه اونا بزرگ و با ارزش باشند.
ممکنه مدت زیادی تحت آزار روانی قرار گرفته باشند و در موقعیت های اجتماعی بسیار حساس تر از دیگران باشند.
مدت بسیار زیادی احساساتشون رو سرکوب کردن و دیگه ظرفیتی برای نگه داشتنشون ندارند به همین خاطر سریع واکنش نشون میدن.
مدت زیادی همه چیز در زندگیشون درست پیش نرفته و امید زیادی دارن که دیگه همه چیز خوب پیش بره ، به همین خاطر با کوچکترین مشکلی به هم میریزن و گذشته براشون یادآوری میشه…
💡به سادگی آدما رو قضاوت نکنیم.
کابان | KABAN
👍👌قضاوت بر اساس داده‌های درست ، همراه با انصاف و بی‌طرفی
هەر لێرەڕا فێنکایی هەست پێدەکرێ
بیشه ـ لوڕستان
کابان | KABAN
کۆپی کردن و ڕاگوێستنی بابەتەکانی ئەم کاناڵە تەنیا بە هێنانی ناوی کابان وەک سەرچاوە ڕێگەپێدراوە❗️❕🙏
Читать полностью…