5137
القصائد الرثائية للآل الأطهار ع
رسالة وأعلم انها ستصل اليك
يا بقية الله
......
السلام عليك يا بقية الله
انتظرنا الصيحة في ليلة القدر لعلها تكون هي الليلة الموعودين فيها .
وبعدما انتهت الليله ولم نسمع الصيحة . اعدك ان يقيني بك لن يتضعضع
سأجدد عهدي اليك
سأبقى بأنتظارك ولن يصيبني اليأس
واعاهدك بدعاء العهد كل صباح
واندبك بالندبة كل جمعة
ولا يمل ولا يكل قلبي من دعاء الفرج
واني على يقين سيأيتي اليوم الذي فيه تظهر لتأخذ بثار اهلك
وتملا الارض عدلا وقسطا
سيدي ابا صالح انت غائب عن العيون ولم تغب عن القلوب
مازلت ولي نعمتنا التي بك عاش نبض القلوب ونستنشق الهواء
بك ومنك واليك اوجد الله كل شي
سيبقى مع كل نبض هتاف
(اللهم عجل لوليك الفرج)
......
العبد المذنب
محمد حسن ضيغم
٢٣/من شهر رمضان
شما بقينه انشم هوه بدنيانه
نشكر الله انحب علي خلّانه
ــــــــــــــــ
لو سجدنه امن الفجر حد الفجر
عل ولايه والله ما نوفي الشكر
ان جان افضل من الف ليل القدر
بالفضل ماله عدد مولانه
ـــــــــــــ
الملائك سجدت ال آدم لأن
يحب حيدرنه علي جنه عدن
آدم بحبّه العلي يمّه اندفن
اتباهه جيف ابمرقده جثمانه
ــــــــــــــ
النار ما حركَت نبي ابراهيم اكيد
لأن يجري حب علي بنص الوريد
الماتمسّه النار بالمحشر يريد
ايخلّي حيدر ينبض ابشريانه
ــــــــــــــــــ
مثل ما كسّر علي اصنام العده
كسّر اصنام الهوه امن الافئده
النادى بين الناس حيدر قائده
يضلل اعليه الوحي ابجنحانه
ـــــــــــــــــ
نشكر الله حب علي بينه يشع
وبينه نورك علي وفاطم منجمع
بلايه خيط ايموت ندريبه الشمع
بلا اساس البيت تهوه اركانه
ـــــــــــــــ
بلا علي ميفيد دين ومعتقد
بلا علي مانعرف القلهو احد
بلا علي رب الجلاله ماانعبد
بلا علي جن شكَكَت قرانه
ــــــــــــــــ
الشاعر محمد حسن ضيغم
/channel/kasaedalatharDaygham
وحشه الليالي
عكَبك يغالي
ـــــــــــــ
موحش علي داري صفه مظلم يبو الحسنين
وآنه بمصابي املوّعه وتهمل دموع العين
مدري اسكّت مهجتي لو لا اسكت احسين
راح الصبر مني وصحت صبري اجيبه امنين
دهري بجالي
عكَبك يغالي
ـــــــــــــ
الماعدهه ابو تبقه بحزن وتون طوال الليل
ومن الهظم كل بت تضل ذبلانه وبلا حيل
هاي آنه بويه ياعلي خلافك دموعي اتسيل
من دارك ابليلة قهر جاوبني ليش اتشيل
شايل دلالي
عكَبك يغالي
ـــــــــــــ
مكسورة الخاطر صرت والهم ولاني اليوم
ودمعي اليصب وبفركَتك مو ماي اشوفه ادموم
ريت المنيه بهل وكت يم العقيله اتحوم
من لحضة البيهه شلت لا ما عرفت النوم
الصار اعله بالي
عكَبك يغالي
ـــــــــــــ
زينب أنه يا بالحسن انه العزيزه اعليك
تدري بقيت بكل الم كل ما يمر طاريك
لو بيدي والله ياعلي بروحي اجي وأشريك
ولا شفته ذاك الي جره وبيّه يصير البيك
شتوصفه حالي عكَبك يغالي
ـــــــــــــ
بويه واشد من هل وكت باجر تشوفه العين
بطف كربله افكد عزيز المهجه اخيي حسين
وعكَب الخيم من تشتعل انطي الوجه لا وين
وكافل ضعوني اعله النهر يبقى بلا جفين
ونظروا خيالي
عكَبك يغالي
ـــــــــــــ
الشاعر محمد حسن ضيغم
اجاني العيد يابويه ... وانت بعيد عن دارك
ومحتاره شرد اجواب ... من يلفيني خطارك
-----
باجر من يهل اهلال ... عيد الله يبو الحمله
تجري دموعي بخدودي ... جرحك روحي متحمله
شلون افرح يمن غايب ... لتضن غيبتك سهله
مو بس آنه متيتمه ... يحس بهل يتم جارك
-----
الوادم لو لفاهه العيد ... وي فجره تحط شموع
وآنه من الصبح بويه ...اذكرنك واهل ادموع
عكس هاي الخلك گلبي ... بويه من الصبح مفجوع
نارك بالگلب تسري ... بويه ما طفت نارك
------
چنت بويه بصباح العيد... تتعنه وتعايدني
هم لو نايمه بهيده ... بالمعايد تگعدني
وهسه شلون يابويه ... حسرة روحي تضهدني
يل تارك حزن بعدك ... بين جروحي تذكارك
ـــــــ
ياعيد الفطر ابعد ... ماريدك تجي عليه
لا ام لا ابو عندي ... سهمك ما رحم بيه
بس چف الحزن باجر ... احس ينطيني عيديه
عيديتي حزن وهموم ... وبيه انرسمت آثارك
-----
ثوب الوان هاي الناس ... تلبس لو لفاهه العيد
وكل واحد يعيد اهله ... وشمحلاته ثوب جديد
بس آنه بثياب السود ... وحسرات الدليل اتزيد
ياعيد ابتعد عني ... ماريد اسمع اخبارك
--------
الشاعر محمد حسن ضيغم
/channel/kasaedalatharDaygham
موال
مع هوسات
للامام الحسن المجتبى
------
ياربيع العمر يا روح البتول
يمته نگصدلك مشي اعله چفوفنه
وترف رايات العشگ من كربلاء
وللبقيع بطيب گلب تشوفنه
عالتراب هناك وبدمع العيون
يالحسن نكتبهه والله حروفنه
وصوت منك نسمع يهز السماء
ياهله وميّك هلا بضيوفنه
نريد نرجع للاهل وانت الامير
بلايه عطيه يالحسن متعوفنه
ماي من نهرك يبو نهر العظيم
بالكرم واحسانه يملي جروفنه
-------
هوسات
ياشمعة محمد هاج بينه الشوگ
محروگ الگلب والشوفتك محروگ
يامعشوگ يصبر والله يامعشوگ
وگبرك مايوصل ويزوره
-----
لو نگدر نروح ونبني الك حضره
ونكتب عل مناير علي والزهره
وتبقى گبّتك يالمچتبى منوره
وليلة ميلادك نحييهه
----
ناذر نذر گلبي وغايته غايه
لازم للحسن اگصدله مشايه
ارفع عمري مو بس ارفع الرايه
ومن بيتي اگصدله اعله اجدامي
-----
الشاعر محمد حسن ضيغم
مولد الامام الحسن المجتبى عليه السلام
دگينه بيبان الفرح بگلوبنه
ونادينه بأسم المجتبى محبوبنه
.....
هلليله كل الكون تضوي شموعه
بأسم الحسن شفنه انكتب موضوعه
حيدر علي امن الفرحه تجري ادموعه
ومنوره بنوار الولاده ادروبنه
.....
بيت الكرم والجود فاتح بابه
وكل الرسل تلگاهه يم اعتابه
احباب ربنه الحسن ندري احبابه
ونحقق بهذا الفرح مطلوبنه
......
الحسن ميلاده شمس معلوگه
وبكل گلب وآلآه ينبع شوگه
ياس او ورد فاطمه تنثر فوگه
والهه ابمحبتنه نخط مكتوبنه
.......
دگينه بيبان الفرح هالليله
وعالعهد نبقه المجتبى ندعيله
لرض البقيع ان شاء الله نمشيله
ونكحّل ابذاك التراب اهدوبنه
.........
بميلاد.ابو محمد زهت دنيانه
جن وانس تتباشر او فرحانه
عرش الله تتباهه اصبحت اركانه
ومن كوثره يوم الحشر مشروبنه
......
الشاعر محمد حسن ضيغم
/channel/kasaedalatharDaygham
انشر وتُؤجر ان شاء الله
ابوذية
وحگ الصاح لحگي عَلَي يماي
عَلَي بالطف اشوف ابكدر يماي
بحين الشفت چف مگطوع يم ماي
عرفت الخيم راح اتوج عليه
...
الشاعر محمد حسن ضيغم
/channel/alnaay2022
/channel/kasaedalatharDaygham
نعي
حرت دمعات عيني وين اهلهه
الك لو للي صاحت وين اهلهه
تون زينب وتسمع ون اهلهه
على الناگه وتگلهم فلّوا اديه
....
الشاعر محمد حسن ضيغم
آنه الگبل ما واحد الينساني
تالي غريبه ومحّد من اخواني
آه ... صرت ادير اعيوني
آه ... زينب اتعرفوني
ـــــــــــــــــــــــــــــــــــــــــ
زينب آنه ام الخدر ... الگبل چنت امدلله
تالي مرمرني الزمن ... السبي وموتي وكربله
العايش ابين اهله كل هم مايجيله
المصيبه الكبره لليفگد خليله
وهل مصيبه اتحوّلت بس للعقيله
آنه الي ما واحد نظر لخيالي
چتّال اخوتي بالدرب يبرالي
آه ... اخواني من عافوني
آه ... زينب اتعرفوني
ـــــــــــــــــــــــــــــــــــــــــ
عندي عشرة ويالاهل ... چنّه نتجمّع سوه
حسين نور يصير الي ... الگمر يصبحلي الهوه
مرّه شفت حسين فيّالي برداءة
والتواضع صار يعكس كبريائة
اذكرت من فييّتله ابحر كربلائه
من شفت اخوي اموسّد اعله الغبره
فييّتله ابذيچ العبايه الحمره
آه ... وتالي منّه اخذوني
آه ... زينب اتعرفوني
ـــــــــــــــــــــــــــــــــــــــــ
الوي اخوته ابنص هله ... يبقى راسه مرتفع
والذ چلمه ابدنيته ... خويه لمّن يستمع
چلمه الخويه اشحلاهه ابصوت اخوتي
وما سمعت الچلمه من طفهم لموتي
مااجيتوا شگد صحت مو راح صوتي
فراش الاجل متبلل امن ادموعي
لجل العليهم صرت ادگ اضلوعي
آه ... ليش شو ماجوني
آه ... زينب اتعرفوني
ـــــــــــــــــــــــــــــــــــــــــ
آنه بضعة فاطمه .....الوارثه منهه الحزن
بگد ونين امي صرت ... ليلي ونهاري اون
صدگ من گال وحچه بهاي النوايب
زادت البنت اعله امهه بالمصايب
والله ياعالم شفت كل العجايب
كسر الضلع طبرة علي وچبد انسم
حرگ الخيم تل وسبي وذبح ودم
آه ... بيمن اتوصفوني
آه ... زينب اتعرفوني
ـــــــــــــــــــــــــــــــــــــــــ
غربه كلشي بدنيتي .... حتى موتي ابنص غرب
بالمنازع ناطرت .... ولي امن اخواني يطب
عيني للباب ودمع تارس عيوني
ردت منهم يعتنون ايجبّلوني
يغسّلوني يكفنوني يشيعوني
غربه التشيّع ماكو من احبابي
وآنه الردت چفهم يهيل اترابي
آه ... ليش ما ذكروني
آه ... زينب اتعرفوني
ـــــــــــــــــــــــــــــــــــــــــ
الشاعر محمد حسن ضيغم
ابوذيات
لمولد الامام المهدي
نخيت الّي انشقله الگمر وانطار
يدلّيني الفكر بالعشگ وانطار
الك يالمهدي اضل ملهوف وانطار
تبرّد جمر كل فرگاك بيه
.........
الك يسره رفعنه وأيد يمنه
يمن غيرك فلا للگلب يمنه
يريت ابكربله ابهل يوم يمنه
ونزور وياك گبر ابن الزچيه
........
بحبك ماعرفت الجزع والياس
يمن عيسى امامه اتصير والياس
بميلادك شعلنه شموع والياس
ومهجنه انطشهه لجلك واهليه
......
الشاعر محمد حسن ضيغم
/channel/kasaedalatharDaygham
المهدي المهدي ذخري
يبقى هو عمري
بسمه الذكريات .... عنوان الحياة
(( نور الله ايشع من نوره))
ـــــــــــــــ
المهدي نور امن الجلاله ومنجهل سرّه
كل خصال البيه تشبه والد الزهره
الله فوّض ليه كلشي بعالم القدره
وأله كل هذا الوجود يصير طوع امره
سره سره مجهول
وحبه حبه ميزول
اصل الامنيات.... عنوان الحياة
(( سر الكون اصبح من سرّه))
ـــــــــــــــ
هذ ابو صالح نعرفه يتبعه الصالح
والرفض منهج امامي واقعا طالح
اليحب المهدي حتما بالعشكَ سارح
زاده مالح بينه ندري ايغزّر المالح
حبه حبه فردوس
منّه ناخذ دروس
الكل الكائنات.... عنوان الحياة
(( ملح البي ايغزّر بينه))
ـــــــــــــــ
نور ابو صالح ملانه وفاحت اعطوره
والشمس والكَمر تاخذ ومضه من نوره
غايب وحاضر امامي واجب انزوره
وندعي من الله علينه ايعجّل اظهوره
عجّل عجّل بساع
واملي قسطاً الكَاع
يا نبع الفرات.... عنوان الحياة
(( حبك فاض وينبع كوثر))
ـــــــــــــــ
انت يا كلشي بعمرنه وكلشي الك عابد
ومثل ادم واليحبك يبقى الك ساجد
كلها تفنى وانت تبقى وحدك القائد
وعل خلائق يا امامي الكل فعل شاهد
باجر باجر انشوف
كلها اكَبالك تطوف
أي والذاريات.... عنوان الحياة
(( للفردوس الرايه بأيده))
ـــــــــــــــ
سيدي ويوم الولاده وبشهر شعبان
تعتني كل الملائك والانس والجان
تزور كَبر حسين جدك مظهر القران
والّي ينكر انت غايب تابع الشيطان
احنه احنه وياك
نبغض نبغض اعداك
والحد الممات.... عنوان الحياة
(( بحب ال آل انموت ونحيه))
ـــــــــــــــ
الشاعر محمد حسن ضيغم
/channel/kasaedalatharDaygham
اجمل صور العطاء الالهي لعشاق الامام الحسين عليه السلام "أحبّ الله من أحبّ حسينا.."
ولادة ولي النعمة -الحسين بن علي عليهما السلام- اقتربت..
/channel/kasaedalatharDaygham
( الموقف الاول )
(في الحضة التي انصاب فيها راس امير المؤمنين عله السلام في المجسد وراح عنده الحسن والحسين عليه السلام)
ركضوا لبوهم ساعة انصاب
وصاحوا يبويه داحي الباب
والله علينه صعب المصاب
مطبور راسك ياولينه
ـــــــــــ
شبكَوا ابوهم ويلي الاثنين
ويجرون دمعه الحسن وحسين
وبالمسجد ايجرّون الونين
وحيدر علي زايد ونينه
ــــــــــــــ
مخضوب راسه ودمه يجري
ونادى الحسن يابعد عمري
افراكَي يصعب بويه ادري
رايح يبو روح الحنينه
ــــــــــــــــــ
يظالم بالفتاوه بهاي شفتاك
وسيفك بالصيمده شعمل شفتاك
الحسن نادى يبويه بحين شفتاك
انصبت حسيت اجت ليّه المنيه
ــــــــــــــــ
( الموقف الثاني )
عند جلوس الايتام عند باب دار امير المؤمنين
علباب كَعدوا ياعلي ايتامك
يدرون انت مصوّب بهامك
يجرون دمع العين جدّامك
يصيحون منهو النه يبو الشيمه
ـــــــــــ
جابوا لبن بيديهم ويبجون
تتشافى من جرحك علي يريدون
لو رحت عنهم هل يتامه شلون
صعبه المهج من تصبح ايتيمه
ـــــــــــــــ
الكِلب من يوم حزنك تدري بي هم
يمن خلّصت عمرك تدري بيهم
اليتامه اخلافك انت تدري بيهم
يتيم امن الهظم شابكَ اخيه
ــــــــــــــ
( الموقف الثالث )
(عندما جمع اولاده في الدار واخبرهم برحيله وطلب من زينب ان تختار لها كفيل)
علي بداره ومن جمع اولاده
بصوت راح امشي يولدي ناده
الليله حيدر ناح حيل افّاده
يريد بولاده يوصّي اوصيّه
ــــــــــــ
انه رايح عنكم وتدروني
وانتوا يولادي ضوه البعيوني
لاتتركوا زينب اتوعدوني
وعينه لبنيته التنوح اربيّه
ـــــــــــــــ
كَلهه يبنيتي الطفوف اتريدج
ياهو كافل ردتي الج وعضيدج
عليه يازينبنه اشري بأيدج
وكَالت العباس اريده ليّه
ــــــــــــــ
ابو فاضل نهر متروس غيره
وامل بيه والكَلب ما يوم غيره
كفيلي بالطف وماردت غيره
ونعم منّه كفيل الهاشميه
ــــــــــــــــــ
( الموقف الرابع )
( بعد التغسيل والتكفين والتشييع)
الدار وحشه خلاف حيدر باقيه
دموع بنته امن المحاجر جاريه
شلون تبقى ودار حيدر خاليه
وهي لا ام لا ابو الويّاهه
ــــــــــــ
يل تغسل المرتضى بكل هيده
وصيّه مني بوس قبضة ايده
ولاتكَله بزينب انه اوحيده
خاف ينزف جرح راسه بهايه
ــــــ
ومن تشيعه اقره بيتين النعي
خل عليه ابهاي اهلّن مدمعي
ادري راح يكول زينب ارجعي
عليج أتأذه يبنتي هوايه
ـــــــــــــ
الزمن يمطر بالمصايب علي راد
واسكت والبجي سكته علي راد
صحت يابويه ما اسمع علي رد
ارجعت مكسوره ودموعي جريه
( الموقف الخامس )
زينب بعد ابيها وطرحها لمصيبة كربلاء
تبجي ليل انهار عل عافوهه
شلون متيتّمه الاهل خلّوهه
ريت وي نعش الابو شالوهه
والمغيسل لحضه ما خلاهه
ــــــــــــ
كربله باجر تناطر يومهه
من تفر محد يجي ويلومهه
من الشموس امغيّرات ارسومهه
الزمن جم محنة وهظم راواهه
ـــــــــــــــ
جبل بس المصيبه هدّمتني
وبدل خيمه رقيه هدّمتني
يبويه السوط اخبرك هدّمتني
بكثر السوط ماحس متن اليه
ــــــــــــــــــ
الشاعر محمد حسن ضيغم
بالحسن يا مولاي .. ايتامك الحد الصبح
مذهوله ومتيهه الراي ... تدعي الله يتشافى الجرح
بلكنّه جرحك طاب .... متنطّره اعله الباب
يا بالحسن يا مولاي
ـــــــــــــ
ياجابر كَلوب البشر ... جم خاطر اعليك انكسر ..معقول ترحل .. يابو الحميه
ايتامك الليله ابحزن ... يم بابك اتنوح وتون ...وردتهه تذبل ... يابو الحميه
ضل الطفل ينشد طفل ...عن جرحك ودمعه يهل ... هل محنه تطول ... يابو الحميه
فدوه العمر والله يروح ... للعيّشانه ابرحمته
ماتسوه من بعده الروح ...شفنه الحياة ابنعمته
ليش الولي ينصاب .... متنطّره اعله الباب
يا بالحسن يا مولاي
ـــــــــــــ
كَعده اعله بابك للصبح ...بلكن دوه الجرحك يصح ... يابو اليتامه ...ارحم دمعنه
نسهر ليالي وما نمل ... بس لا يحيدر ترتحل ...كَوم بسلامه ... ارحم دمعنه
ما يسوه عمر بلا علي ...غيرك فلا يوجد ولي ... تاج الامامه ... ارحم دمعنه
بينه الجرح ريت ايدير ... ولا ننظر الدمك يصب
يابو كَلب حيل اجبير ... فراكَك يبو الحمله صعب
ارحم كَلبنه الذاب ... .... متنطّره اعله الباب
يا بالحسن يا مولاي
ـــــــــــــ
يارب يل امسير الفلك ... بدمعة يتامه اتوسّلك... تشفي ولينه ... ماعدنه غيره
بوجوده معرفنه اليتم ... يتبسّم النه ونبتسم ... حيدر علينه ... ماعدنه غيره
نصبح يتامه ابفركَته ...ياربي شافي طبرته ... نرفع ادينه ... ماعدنه غيره
بجاه النبي وأم حسين ... ارحم كَلبنه ورد علي
ما تكَطع ادموع العين ... صبح ومسى اتضل تنهلي
عليه الدم سجاب ... .... متنطّره اعله الباب
يا بالحسن يا مولاي
ـــــــــــــ
سجدة شكر نسجد سوه ... لو جرحك ايشافي دوه .. ونغفى اعله جفّك ... ونشم عطورك
وتمم اصيام الشهر ...تعايدنه يافارس مظر ... نكَعد ابصفّك ... ونشم عطورك
ما يحله عيد بلا علي ... عيد الله حبّه الاولي ... سر ما نعرفك ... ونشم عطورك
لا ما نريدك يا عيد ...اله وعلي ويانه يضل
مانلبس الثوب اجديد ... لو مر على الوالي الاجل
ملبسنه سود اثياب ... متنطّره اعله الباب
يا بالحسن يا مولاي
ـــــــــــــ
ماينحمل فكَد الابو ... يرد غيبة الغالي منو ... كهف الحياره .. ندعيله يشفه
ها يا طبيبه اشعطّلك ... جاوبنه خل نستقبلك ...ردنه البشاره ... ندعيله يشفه
طمنّه مو فاض الصبر ... عمر اخذه وانطيله عمر .. بدمع ايتجاره ... ندعيله يشفه
لاتكسر كَلوب ايتام ... منتظره من عندك خبر
تخبّرهم الجرح التام ... وياكم يكمّل هالشهر
رد يا طبيب اجواب ... متنطّره اعله الباب
يا بالحسن يا مولاي
ـــــــــــــ
الشاعر محمد حسن ضيغم
دار الزمان وما رحم بحوالي
وخلّاني اودع الغالي بعد الغالي
بعيدي اصبحت محتاره ... حروف الزمن غدّاره
وخلّاني اودع الغالي بعد الغالي
ــــــــــــ
متعوده من يكَبل العيد اعليّه
اتعنّه اعايد صاحب الحنيّه
لو شافني ينادي هله بهل جيّه
انتي يزينب اغلى كل عيديه
راح الابو وبكَلبي ضلّت حسره ... بالعيد جا ياوجه عيني اتنظره
ماشوفه ليش ابداره ... حروف الزمن غدّاره
وخلّاني اودع الغالي بعد الغالي
ــــــــــــ
جنت ابصباح العيد اصد لعيونه
شلونج يكَلّي وردت انشده شلونه
كوثر محنّه منترس ماعونه
حتى الطيور ابنظرته مفتونه
يتبسّم اشما صد اليّه ابعينه ....يبنيتي لو ناداني اشم اجبينه
وصارن محال اخباره ... حروف الزمن غدّاره
وخلّاني اودع الغالي بعد الغالي
ــــــــــــ
الكَبل جنت اتعنّه ابوس جفوفه
بكل عيد تسبيحي تصير حروفه
هل عيد مرمرني بجروح سيوفه
والدي ابكبره وروحي تمشي اتطوفه
يا عيد ماريدن بعد عيديّه ... بكَبره العزيز وبعد ميرد ليّه
كَلبي الحزن خطّاره ... حروف الزمن غدّاره
وخلّاني اودع الغالي بعد الغالي
ــــــــــــ
الوادم تحنّي ابيوتهه بيوم العيد
وتلبس الوادم بالهنى ثوب اجديد
وبدمعي احنّي الباب وونيني ايزيد
عن دنيتي حيدر علي راح ابعيد
ياعيد الاكشر لاتمر ابداري .... ياعيد تفجعني وتعرف اخباري
فراكَ الابو تشب ناره ... حروف الزمن غدّاره
وخلّاني اودع الغالي بعد الغالي
ــــــــــــ
ياعيد مااكَدر اصد وجه حسين
نذكر علي ونجري الدمع عالخدين
المحرابه ما تكَدر تصد هاي العين
هاي المصايب جانت الزينب وين
من زغري يتّمني الزمن واويلاه .... مصاب الزجيه او والدي ما انساه
يبقى الدمع يتجاره ... حروف الزمن غدّاره
وخلّاني اودع الغالي بعد الغالي
ــــــــــــ
الشاعر محمد حسن ضيغم
صلوات صلوات على الامام المجتبى
ــــــــــــ
يريحانة نبينه
الحسن انت ولينه
ينور ال بل مدينه
الك حطّينه زينه
على اعناد على اعناد اميّه والّي ناصبه
ـــــــــــــــــ
يوجدان الزجيه
وكَلب حامي الحميه
افتخرنه رافضيه
نضل حد المنيه
اليواليك يواليك جعفر الصادق مذهبه
ــــــــــــ
البقيع الي بي نور
الملائك تنثر ازهور
وتخلّي ابكَبرك اعطور
هنيئا من اجه ايزور
اليزور يزورك حتما يحصّل مطلبه
ـــــــــ
كريم وبابك اجبير
اليكَصدك ماضن يحير
تسوّي الماضن يصير
صعب سر ماله تفسير
عرفناك عرفناك يرابع سر اهل العبى
ــــــــــــــــــــــــــــــ
يمولاي ومتى انشوف
ضريحك مثل الطفوف
نجيك بلهفه ونطوف
ومواكب يمّك انشوف
اليواليك يواليك يمّك يأسس موكبه
ــــــــــــــــ
الشاعر محمد حسن ضيغم
المبدع
السيد محمد الجيزاني
والمبدع الملا عباس البحراني
فرحانة فرحانة
والشيعة فرحانة.
أداء
حسين الفرطوسي
عباس الكرعاوي
كلمات
محمد حسن ضيغم
أداء
عباس الكرعاوي
علي أبورغيف
للشاعر
محمد حسن ضيغم
/channel/kasaedalatharDaygham
الليله فرحه الليله
حيدرانهنيله
شعبان ... يا هله بأعياده
شعبان ... والعرش ميلاده
ـــــــــــ
العالم بقدسيته ...وكل محب وبّيته ...الليله شاعل بالولاده شموعه
هل شهر عم خيره ... اتوزّع بكل ديره ... بماي كوثر منكتب موضوعه
امن الفرح جبريل صف جنحينه
المولد العباس ويّه حسينه
الاكبر وسجاد كَرة عينه
خمسطعش مولود بي مهدينه
ندري حيل اولامه
الفرح هاي ايامه
شعبان ... علينه بالحب عاده
شعبان ... والعرش ميلاده
ـــــــــــ
الليله تضوي بنورهه... الجنه حلوه اعطورهه ..الله خلاهه امنجل احبابه
حسينّه ابميلاده ... حكَ تهوس الساده ...والخلكَ بالفرحه هاي اسبابهه
ثلاثه من شعبان بيه جنونه
الرابع بشعبان ضوّه عيونه
الخامس بشعبان بيه ضنونّه
اهدعش من شعبان كحل جفونّه
بخمسطعش مهدينه
الله ينصر دينه
شعبان ... الشيعي نال امراده
شعبان ... والعرش ميلاده
ـــــــــــ
شيعه والتمّينه ... مو ورد بالزينه ...كَلوب علّكَنه ونطش اعمارنه
مهيّئينه ارواحنه ...ياشمس مصباحنه ... ندري بالمهدي يجي خطارنه صحنه صوت الليله وأناديكم
عهد والله انوالي الي يواليكم
يا ال طه انعادي الي يعاديكم
احنه من الذر نأامن بيكم
هل مهج مختمومه
بفاطمه المعصومه
شعبان ... نهني كل الساده
شعبان ... والعرش ميلاده
ـــــــــــ
فاطمه انهنيهه .. بهل وكت ندعيهه ... اتديم هل خدمه علكل خدامهه
المهج كون تشوفهه .. تلمنه بين چفوفهه ... نروح فدوه احنه التراب اجدامهه
المحب بالميلادة گرة عينه
نهني ام حسين وتهنينه
نقسم اعليج بعلي والينه
بدفترج يم الحسن سجلينه
العاقبه شمحلاهه
بحبكم ونتباهه
شعبان ...الاجر صار ازياده
شعبان ... وللعرش ميلاده
.....
بفرح يخص يومنه ...حلوه بيض هدومنه ... ونطش جكليت علروس الشيعه
صوتنه يتعالى... للحسين او وآله ... العمر سهله كون ليه انبيعه
احنه عباده وشرف سمونه
وخدم خدام السبط شافونه
علشرف هل عالم يحسدونه
العاقل بحب الحسين جنونه
الموش من خدامه
خل يعض ابهامه
شعبان .... فضل ربك زاده
شعبان .... والعرش،ميلاده
......
الشاعر محمد حسن ضيغم
/channel/kasaedalatharDaygham