1986
القصائد والاشعار الحسينية
گضت بنهار عاشر طعنت السيف
وامرامه السهام اعله اليرضعون
جتنه مرحلة طعنات الاحساس
ضگتهن الم خنصر بي يگطعون
جراحات الستر ماتنزف ادموم
نتـگاطر خـدر مـن الينـظـرون
جروحك ياولينه
داروهن علينه
مثلك صيحه بينه
وينه عباس
+++++++++
چان اول براز بحرگ الاخيام
اوّل طعنه من عين اليحرگون
نزلت مني دمعه بطول عباس
ابمعركة الخـدر ويه اليشوفون
وامراكض حـرم كلـفها عثرات
واصوات انولينه ماليه الكون
المن نركض اوين
رضّو صدر الاحسين
تصرخ دمعت العين
وينه عباس
+++++++++
لحگتنه البچينه ادموع رايـات
معركة السياط وحيل الامتون
حرمه وهمّه كثره وركضت ايتام
اجمع چم طفل عشره اليطشرون
قاومنه وخسرنه اصواتنه اب لااا
بمعركة الچفوف اويه اليچتفون
اثر بيهن حرگ نار
بچفي احبال تندار
مني الايد الازغار
وينه عباس
++++++++
واجتني ليلة الوحشه ومعانات
ومئآسي خلصتها مادري شلـون
الغربه والحراسه وخوف والليل
ويا لوعة يتامه الـما يسكتون
خلصت والفجر گعدونه بسياط
شَمر اطفـال عالهـزّل يصَـعَدون
ارچب بالزغيرات
ضليت الاخيرات
اني والاميرات
وينه عباس
++++++++++
مشينه وروس اخوتي كاسره فياي
عـلى اوجـوه اليتامه الـما ينامـون
مشينه اليوم باچر مادري الوين؟
واليا مجلس بزيـنب يدخـلـون
هذا اول طريجي الجايني هواي
واكتب ذكرياتي جوه الاجفون
من حرگتها لخيام
حد دخلتنا الشام
جفني لحظه مانام
وينه عباس
++++++++
گضت ظهريه العاشر/ مراكض
وجدمي قبل هالساعه/مراكض
بثوبي النار وبصاية/مره كض
اطفّي بثوبها واتطفي بيه
ثائر الربيعي
ليلة العاسر
اتأكدوا مييت صحيح
ابو فاضل مو جريح
بظهري طعنوني لجل ياذونك
گوم طاح احسينك اينادونك
+++++++++
ماضل نصير او لا اخو بس الحرم گدامي
ياحيرتي ابرز للحرب لعيالي ياهو ايحامي
خويه اشأصير الوحّدي وفاگد اعزاز وضامي
ساعه ابرز اقتل وانجرح وبدمي ارد لخيامي
تلزمني الايتام
ضل يم الاخيام
هلبت ويرجع واحد امن اخوانك
يتوادع اوياك
ويشاهد اضماك
وايحط لسانه الگمر فوگ السانك
بيده عكازه العليل
يفزع وجسمه يميل
وكلهم بهالموقف ايذكرونك
گوم طاح حسينك اينادونك
++++++++++
آخر طلعتي ومنجرح يابو الفضل شافوني
حاطوني بسهام وحجر من كل جها يراموني
صابو جبيني ومن نزف دمها نزل لعيوني
وثگلانه من كثر النبل واسها بيها امتوني
شفت السهم جاي
ومجروحه يمناي
حاولت اصده بيسرتي وضربوها
حسيته بهداي
فت لبت احشاي
والشيبه من دم هامتي خضبوها
من ظهر مهري هويت
ودي اصيح وماحچيت
مابقى اليحچيها اموت بدون
گوم طاح حسينك اينادونك
+++++++++++
ظالم يگلهم ريَضوا اخروها گطعت راسه
يتعذب بحر الشمس من قبل لفظ انفاسه
ذكروه بأخوته وصحبته جرحوله كون احساسه
گطعوله چفه امن الزند يذكر زند عباسه
ياخويه والعين
طفوها لحسين
ونفسه عمودك بيها ضربو راسي
والماي جابوه
واگبالي بدوه
منظر الصار اوياي مـنظر قاسي
ويـن يعباسي وين
وليه صارت عالحسين
مات صاحو خاطر ايسمعونك
گوم طاح حسينك اينادونك
+++++++++
من اطمئنو للأبد ياخويه مالك جيه
سووا الما صاير ابد والماخطرلك بيـه
فتحو درع صدري اعرفت المن وشنهي النيه
حته الحوافر للعظم يوصل سحگها اعلـيه
يم النهر راح
واحدهم وصاح
وينك يبو فاضل كتلنه حسينك
هاك انظر الثوب
خليته مسلوب
ومحبس اخيك هذا شوفه بعينك
وينه حماي الضعون
نحرگ اصواوينه كون
چلمه بيها بگلبك ايطعنونك
گوم طاح حسينك اينادونك
+++++++++
عافوني بس آنه عدل الوحدي اعالج حالي
ليهسه حي ومامتت قصدوني عيفو اعيالي
اوگف واطيح اعله الوجه حرگ الاخيام ابالي
حد ما شمر وبخنجره واگف اشوفه اگبالي
احسبهن اوياه
مني 12 آه
وكل آه ياعباس تطلع بيها
مو للسمه تروح
من طلعت الروح
زينب وحيده وروحي راحت ليها
انظر البت البتول
تجمع ايتام وتگول
بصوت واحد كلهم ايحشمونك
گوم طاح حسينك اينادونك
ثائر الربيعي
الاكبر ع
غير انته الصحتني وهل اجيتك
يالاكـبر لـگيتگ واشلـگيتك
بس عطرك والاثياب
حسنك يالولد ذاب
++++++++++
متعوب واجيت اعليك انگل بالجدم گوه
درب جبته عليك اصياح علي يبني انتظر فدوه
وگعت امن المهر للگاع شوف اشلون اتلوه
فك عينك عليه وشوف حالي وفگدك شسوه
يطلع صوت عالي من نحيبي
تطلع مني چلمة يا حبيبي
يا اغلاها لحباب
حسنك يالولد ذاب
++++++++++
هذا انته علي المزيون يالوجه النبي چنك
بيك اشعملت الطعنات وين ارسومك وحسنك
منك مابقالي امچان ينشم واشمّنك
ما ادري اموت اوياك لو اگعد المنّك
ثوبك من حضنته التف بديه
طولك مابقاله كلشي اليـه
احظنك والزم تراب
حسنك يالولد ذاب
++++++++++++
اشيلك للخيم وشلون الچمك گلبي يلچمني
اشما ارفع كتر ضليت يوگعلك كتر مني
لميتك دمع وثياب طولك ماترس حضني
أگل لمّك اذا رديت بس هذا البقى امن ابني
حيره الويه ليلى والله حيره
مـو ابني تگـلي هـذا غيـره
تقره بدمعي لجواب
حسنك يالولد ذاب
++++++++++
مييت ياعلي وانخاك لم روحك اذا تگدر
جسمك بالخيام اشلون امده وجسمك اموذر
اغطيك بعباتي وهاذ اگللهن علي الاكبر
تمد امك اديها اتشوف وجهك وارجع اتكتر
صدمه تكتل امك من تشوفك
يمك تبقى حيره لو تعوفك
وآنه اگعد عله الباب
حسنك يالولد ذاب
++++++++
اسمع ليلى تنعه اعليك تكتلني ابواچيها
نايم يالولد واعليك لو. مالت اتچيها
مو لجلي الخواتك گوم هاي اسكينه حاچيها
ومن دمك رقيه تريد تمسحـهن تراچـيها
يمدلل خواتك واغله غالي
من تسألني سكنه شلونه حالي
تنزل دمعة اعتاب
حسنك يالولد ذاب
++++++++++
راح ارجع واگلهم راح واسكت ما اكملها
والتسألني يمته ايعود من ادموعي ابللها
هايه لو بقتلي اعيون بلكي اخيامنه اندلها
اتنگب انگاب المات منه اغله البشر كلها
هاي اول مصيبه وروحي راحت
شلون ولو زلمنه كلها طاحت
هدني اول امصاب
حسنك يالولد ذاب
+++++++++++
ثائر الربيعي
ام البنين ع
يبني من بعيد اتوادع اوياي
ياعباس احاذر حته من هاي
علينه حسين اشوفه حاط عينه
نجِرحه لو تشابگنه وبچينه
ياعباس احاذر حته من هاي
+++++++++++
حسين كتله امن العواطف حيل حسّاس بنظرته
احنييّن ابگد الترافه تنجرح ريته ابحسرته
گلبي لو تدري عليمن يرفظ اوداعك عذرته
ينكسر گلب الزچيه يبني گلبه لو كسرته
ودعني ابنظر يالكلك احساس
لا نكسرله خاطر يبني عباس
لا ينغث ابو روح الحنينه
نجرحه لو تشابگنه وبچينه
+++++++++
اوداعت الله لا تگلي بصوت والغالي يسمعه
تروح روحي حسين يُمه اولا اشوف بعينه دمعه
كون هسّه الزهره يَمه اتگابل حسين وتودعه
اتگله يبني وياك اخذني ومحسن اخذه بهذا وضعه
يمه المحسن اخذه بذيچ الاخيام
مايعطش ولا يحتاج اله اسهام
روحه اتردله من تنخا سكِينه
نجرحه لو تشابگنه وبچينه
+++++++++++++
انت غالي يابو فاضل اوداعك امره مو بديه
حسين ابني وانت تدري اغله من عندك عليه
وحتى زينب تكسر الها حضنت چفوفك عليه
اتباوگ النظره علينه ابنظرة الحره قضيه
يبني الخاطر اختك عيف الاوداع
لا من هسه تشعر بالامل ضاع
خدر اختك يحماي الضعينه
نجرحه لو تشابگنه وبچينه
++++++++++
عمري خلصته ابخدمته هالعمل موسهله اخسره
حسين ليفارگ خدمته ماله معنه ايعيشه عمره
تبقه عندي بس وسيله للحسن اكنسله گبره
سنيني ابديّها اعله لحده وابچي عمري قطره قطره
چلمه الاذني لابد ساعه وتفوت
من گبر الحسن راح اسمع الصوت
كسر ضهري الگمر گطعو يمينه
نجرحه لو تشابگنه وبچينه
++++++++++++
انه للطف راح اجيكم حته اعوضك عن وداعي
مني تسمع عالشريعه لعتذارك ماكو داعي
الله يتقبل چفوفك يبني مشكوره المساعي
يل شلت راسي بوفائك نبلة العين ارتفاعي
وي ام الحسن راح التقي هناك
يم المشرعه اتباركلي برباك
نتبادل رفع چفك بادينه
نجرحه لو تشابگنه وبچينه
+++++++++
اهناك اجيك اشفافي حمره امقبله حسين ابوريده
اشبع اجروحه ابدموعي لكن ادموعي شتفيده
من چفوفي خنصر اگطع بلكي ارجع خنصر ايده
حيره احتار ابضلوعه مو ضلع واحد واعيده
والايام الثلاثه يمّه باقين
اتناوب نعي وي ام الاحسين
يعلم من ننوح احسين بينه
نجرحه لو تشابگنه وبچينه
ثائر الربيعي
ثائر الربيعي:
ليالي استشهاد الصادق ع
للعزه عن صدري نزّلت الرضيع
يلله ياعــباسي نمشي للبقيع
الصادق مجلسه انحضره
نصبت ماتمه الزهره
نمشي للبقيع
+++++++++
فاطمة تنصبت عزاها اعلينه كل ليل اليجن
اتبخّره بذيچ النواعي واحمر الهسه الجفن
تلتقي بأم البنين اويكتمل كل الحزن
التفتح المجلسه اكيده بآه يحسين وتون
حگ اله الصادق علينه بالانين
اهوايه ذاكر بالروايات الحسين
بلكت خاطره انجبره
نصبت ماتمه الزهره
نمشي للبقيع
++++++++++
الماتم ابغربه مئاسي اتشوفه محد يوصله
تلگه بس اهل المصيبه املثمه وتبچي اله
والحسن بالباب واگف والمدامع هامله
هيچي لو يتمنه زاير يصرخ ابوجها هله
عينه عالسجاد كل ساعه تدور
بالبقيع بهل مسه قلّه الحضور
العبره امكسره بصدره
نصبت ماتمه الزهره
نمشي للبقيع
+++++++++++
اهوايه زاروني وبچولي يمي كل جمعه التمر
هسّه كلهم بانتظاري وانتظارك يالبدار
الصادق اعله الغاضريه عينه تربي وينتظر
نگصد ابموكب عليهم شرط مانلطم صدر
انته لاصدرك يلوحن له چفوف
وانه صدري اشخلت اعليه الطفوف الطفوف
والطف لازم انذكره
نصبت ماتمه الزهره
نمشي للبقيع
++++++++++
وموكب امن الشام يطلع بالظلام ابلا علم
حرمه وثنين ابأديها املزمات امن الالم
مشية الخايف سريعه يعثر اهواي الجدم
لافته سوده ومتربه اسمه اهات الخيم
تلتقي ويانه زينب عالحدود
والحديثه اتفتحه سكنه عالوعود
ارقيه زندك اتنظره
نصبت ماتمه الزهره
نمشي للبقيع
++++++++++
نلتقي ويه العقيله والمئاسي تكتمل
حته دخلتنه سويه والحچي وكته يحل
جعفر الصادق اجينه ويمك التم الشمل
وزينب وامها ايتلاگن حمره لدموع التهل
من تگلها يمه زينب جيتي ليش
هم عله هزله اجيتي يمه بيش
لسه بجدمچ العثره
نصبة ماتمه الزهره
نمشي للبقيع
ثائر الربيعي
مناجاة صاحب الزمان عج
ابلساني الكال اناجيك
يبو صالح شحاچيك
واني الهسه ماعندي بدايه
وشهر الطاعه شارف عالنهايه
++++++++++++
وي روحي اگعدت احسبهن اعمالي
من طاعه اشجنيت بهاي الاليالي
اقل مـن القليل ابكثرة اهمالي
نعم خيراً يرى بـس ويـنه مثقالي
ما املكلي مثقـال
وحبكم خير الاعمال
منكم سامع اكثر من روايه
وشهر الطاعه شارف عالنهايه
+++++++++
نعم من كُل امر ليلـة قـدر بيها
عليك اتنزّلت ادري انتـه راعيها
يا راعي الامـر واعمالي تدريها
وي مطـلع فجرها انته تمضيها
مولاي انته ماذون
بأمر الكاف والنون
انته الأب والي حق الرعايه
وشهر الطاعه شارف عالنهايه
++++++++++
حاشه الرحمت الله اتكون محصوره
اليجهد بالعباده اذنوبه مغفوره
منو للمثلي اظنها واضحه الصوره
بتسويف وهواي اوقاتي معموره
برجائي الحضرتك جاي
كل اعمالي بس هاي
رافع بعترافي اعليك رايه
وشهر الطاعه شارف عالنهايه
++++++++
الشياطين اعرفت ايديها مغلوله
شني عن العباده المثلي ليحوله
شبيها بالدعاء اچفوفي مشلوله
حته الساني يخجل من الايگوله
اريد الجنه وشلون
اناجي اويه اليناجون
لكن انتم اصحاب العطايه
شهر الطاعه شارف عالنهايه
+++++++++
شري صاعد وخيرك نزل صوبي
يرحمة الله انته الساتره اذنوبي
عليك ابداعة امك غيير ادروبي
اريد بهالگلب بس انته محبوبي
وابدِل عيني إبّعـين
مثلك تبچي لحسين
دم ادموعي تـنزل للسبايـه
وشهر الطاعه شارف عالنهايه
++++++++++
قبل ما ينگضي اصلحلي مضموني
خادم للخـدم مـولاي حسبوني
ازور احبابي بالـعيد ويزوروني
ابصباح العيد لجلك تهمل اعيوني
وين اتصبحه العيد
ياهـو ايقـبّل الايد
يمته ولليجي اتوزع هدايه
وشهر الطاعه شارف عالنهايه
ثائر الربيعي
جرح الامير ع
ناظر اختك يالحسن لينه وصِل
نـزلـوني منـها اذانـي الخـجـل
+++++++++
ابنيتي واعرفها شكثر متألمـه
وگفت اعله الباب تشبه فاطمه
مسحو عن الشيب يولادي الدمه
حيل خطفت لونها شلتني شل
***
السؤال ابـنظره مـتوجـه الي
انت محمول شعجب حيدر علي
حته لو چان اليشيـلك كافلي
ما اصدگ عيني غير انت الفحل
++++++++++
اقران من نظراتها سوالف دمع
ينفهم حچي الدمع ماينسمع
چنها نظرة فاطمه بكسر الضلع
من تصد لعيوني مدمعها نزل
++++++++++
نزلوني خل اسير اعله الجدم
الخاطر اختك گادر اتحمل الم
ابگلبي احسها نظرة الحره سهم
ابقى اشبع موت من قبل الاجل
+++++++
سارع الها واحضن اختك يالگمر
يبني روح وخفف اعليها الخبر
گلها مامات الفحل بس انطبر
راجع الها خل يضل عدها امل
+++++++
هلّله كل هلله باختكم والخدر
كونه سالم مو مهم عدنه العمر
ليلة الوحشه تألـمني اشكـثر
وينه كافل خدرچ اتگلي انكتل
+++++++
گلها ذيچ الساعه تلحگ عالبچي
عالهزيله ماكـو تچوه وتنتچي
تحچي المن ياهو ليسمعه الحچي
ماكو راي ايصير للماعدها اهل
+++++++++
ثائر الربيعي
استشهاد الامام علي ع
شافت عيني بابين-لچمن گلبي مرتين
فتحت مأزرك بويه وكسر ضلع ام الحسين
++++++++++++++
زغيره اني چنت*بحجر امي اسمعت
باب اندگ رجف گلبي اعله حيله
اشأجه الروحي گلت*وره امي اطلعت
ثگل جدمي ولا بيه اشيله
سنّدني حسن وحسين للزهره مشينه
وصلنه ومالگيناها وينچ يالحنينه
وصلت ثوبها امن الباب هاي امي درينه
اجر بقوتي بالثوب-لن صوت امي متعوب
بسمار بضلع نابت تنادي لاتجرين
فتحت مأزرك بويه وكسر ضلع ام الحسين
+++++++
اجه ثاني جرح*ابشهر الله السمح
الابو ضايف عله ابنيته الحبيبه
افطرت گرصه وملح*وقبل وجه الصبح
نمت ساعه اگعد تنعه المصيبه
سلام الله عليك اهواي شاغلني بنظرتك
لزمت مأزرك بلباب ماتسلم عرفتك
تقره اشدد حزام الموت من ايدك لزمتك
مدري المسجد إتروح-لو ترجعلي مجروح
راح ابقه انتظر ترجع واعيش بروحي نارين
فتحت مأزرك بويه وكسر ضلع ام الحسين
++++++++
خذت گلبي ورحت*اعرفت من ورجعت
اكو بگلبك حچي اظهر كلامه
احس گلبك بچه*نظر عينك حچه
الحمد لله الخدر هسه بسلامه
من باب الخيم للماي من يطلع كفيلچ
ترجف خيمتچ وياچ ينهد كله حيلچ
يتاخر يروح حسين بس محني يجيلج
من يلفظها بحساس-راح امن ايدي عباس
جمره تنزل ادموعچ قبل حرگ الصواوين
فتحت مأزرك بويه وكسر ضلع ام الحسين
+++++++++
حسين آخر ظِهر* تقدميله المهر
ويأشرلچ عله ثيابه القديمه
تصيحينه انتظر*وتحبين الصدر
ومثل صيحة أوز صيحة حريمه
باب الخيمه مو مسمار تلزم ثوبه سكنه
ارجع لو اخذني وياك بعدك ياهو النه
يمشي ويلتفت بهداي آخر نظره منه
من گدامچ ايروح-واتعرفينه مذبوح
خالي لو رجع مهره تسألينه وگع وين
فتحت مأزرك بويه وكسر ضلع ام الحسين
+++++++++
الچ زينب وعد*عله كلهن اشد
يم باب القصر ذيچ الظهيره
اليمر بيكم نشد* اشمنتظره بعد
دخلو بت علي ايصيح الهظيمه
كلها لو دخلتي اتصيح اجت بت الزچيه
عليچن تلتفت لنظار تلتمن سويه
ياهي امن الحرم زينب يصيح ابن الدعيه
راس اگباله موجود-يضرب شفّته بعود
شيل ايدك تصيحينه اكسرت من عنده سنين
فتحت مأزرك بويه وكسر ضلع ام الحسين
ثائر الربيعي
مولد الامام الحسن ع
بأسم الغالي اهتف عالي
مولاي مولاي مولاي الحسن
++++++++++++
نور الجلاله شع بجماله
رفعو الصلاوات / لحمد وآله
اول ولاده بهجه وسعاده
بسم الحسن صيح /بيها عباده
شهر الطاعه
هوّه شراعه
مولاي مولاي مولاي الحسن
++++++++
گلبي مظيفك واحسبني ظيفك
ياصاحب البيت سَيّرَه اعله كيفك
شهر الله جينه ليك اعتنينه
يابــو شـريفـه خادمك عينه
تمحي ذنوبي
يامحبوبي
مولاي مولاي مولاي الحسن
+++++++++
ايدك سخيه مدهه عليه
ارويني الطاف يبن الزچيه
تدريني اعاني الصاحب زماني
مهدينه مولاي حبه ملاني
شوگ العندي
ايصيح المهدي
مولاي مولاي مولاي الحسن
++++++++++
بمحفلنه كلنه للمهدي املنه
يبن الحسن وين ماترجع النه
صوت الموالي ناداها عالي
عينه للدروب / لمتاني غالي
هاي الليله
الكل تدعيله
مولاي مولاي مولاي الحسن
++++++++++
+++++++++
ثائر الربيعي
وفاة السيده خديجه
اودعچ فاطمه يُمه تعالي
الخديجه هايه آخرها الليالي
اول دمعه هاي
وهواي الي جاي
الخديجه هايه آخرها الليالي
++++++++
خلصت سنين العمر كلها عشتها
وانتي يُمه اسنينچ اگليله اعرفتها
ازغيره بس اهمومچ بدمعچ شفتها
امن الرسول امصيبتچ يمه سمعتها
يالينتهي عمرچ قتل
لثمنطعش هم مايهل/
وابطنچ ايموت الحمل
العصره ابوكتها
يتيـمه لا ابـو لا ام يتـيمـه
هظيمه بروحچ اتعيش الهظيمه
لو يمچ عساي
وهواي الي جاي
+++++++++
دمعه تفصل فاطمه ما بيني بينچ
من فگد امچ لحد وگعت جنينچ
ماتجف من البچي يالزهره عينچ
واليتم ما يـرحم ويـكثر ونينچ
ما لايگ اعليچ اليتم/
وگلبچ عليَه ينهظم/
يافاطمه بموت الحلم/
يكثر حنينچ
هذا اول جرح هاي البدايه
لدموع الحزن ماكو نهايه
لا صل لا فياي
وهواي الي جاي
+++++++
راح اموتن والرسول ابگلبه حسره
المرّه والحلوه گضينه اعليها عِشره
يُعرف اغيابي يطر گلبچ يزهره
الحالتچ والفرگتي بدلاله جمره
انتي وحيده امن البزر/
لو بيين بگلبچ كسر/
من البچي عيونچ حمر/
ياهو اليصبره
آنه ودمعتي فدوه الدموعچ
اموت اولا تلطميهن ضلوعچ
ينكسرن وراي
وهواي الي جاي
++++++++++
نامي اخر نومه الچ يمه اعله اديه
باقي عمرچ يگضي يالزهره اذيه
والرسول اخلافي صيريله تچيه
ام ابوچ انـتي تصيرين الزچيه
يذكرني ويهل الدمع/
والگبري من يعلگ شمع/
من يبچي صوته ينسمع/
ويحن عليه
ابأدينچ فاطـمه نشفي دمعته
ترد وحشة خديجه الزهره بنته
الحالتكم بچاي
وهواي الي جاي
+++++++++
هذا شهر الخير تگصينه صيامه
وادري اسم العيد يجرح باليتامه
راح اودعج راح اگلج بالسلامه
وادري باقي الليل عينج ماتنامه
يبقى الجرح اكبر جرح/
للضامي ذاك الينذبح/
راس العزيز اعله الرمح/
وحرگةخيامه
مصيبه ما اشد منها مصيبه
من ام الخدر تمشي غريبه
لا ضل عدها راي
وهواي الي جاي
ثائر الربيعي
مناجاة.
مع صاحب الزمان
+++++++++
يالدموع اسوالفــك
ضايف الله وضايفك
هذا شهر الله الفضيل
انــت وجــهه والدليــل
يابو صالح.
++++++++++
ابـابك اتوسـل بديت
طامع ابلطفك اجيت
تغني مسكينك دريت
لو اجالك
ادري تفرح باليجــيك
بيا هله تفتحله اديك
شگد حنان ورحمه بيك
ويادلالك
انه مو ذاك التريده وانت تعرف حالي
اذنب ومن عينك اوگع سيدي وما بالي
هارب امن اذنوبي
اعليك يا محبوبي
صاحب الصفح الجميل
انت وجهه والدليل
يابو صالح
+++++++++
الرحمتك يالمهدي جاي
هارب وذنبي وراي
ثگله چن سوط بگفاي
وجار بيه
حته لو تطردني اعيد
طامع ابعتق العبيد
لو عليك اقسم تريد
بالزچيه
امنيدك التوجع الزمك بالغريب الضامي
وبالطفت جمره بجدمها وجرح اذنها الدامي
ابذني طارق جايلك
لا ترجّــع سايــلك
ياحلم ربـي الطويـل
وانت وجــهه والدليـل
+++++++++
للفرج عندي انتظار
الشوفتك بعيوني نار
ضايع وانـته الـقـرار
وكلش عندي
هواي صار بعمري اعيش
مانظرتك لسـه ليــش
اوصلك دليني بيــش
اي يمهدي
روحي اذا تگطع املها بيك ما مسموحه
مثلك الامّه الزچيه شگد حنان بروحه
صرت احس اگبالكم
واحد امــن اعيالكم
يا لطف ربي الجليل
انــت وجــهه والدليــل
يا بو صالح
+++++++++
مو حچي حبي صـحيح
الشوفتك گلبي جريح
والنبض بسمك يـصيح
ياحبيبي
يمتـه مـولاي الطلوع
هل شهر ادعي بخشوع
تنزل احروفي دموع
يامجيبي
عيني ماقاصر نظرها گلبي احسه القاصر
حاضر ومعميه عيني ما تشوفك حاضر
إغفــر العاميلها
امن الصفر إبديلها
لا تغييرني ابّديل
انت وجهه والدليل
يابو صالح
++++++++
انه كل ما احتــويه
گلبي بس اجويده بيه
من يمر جرحك علــيه
يبجي اسمعه
للمشت فوگ الضعون
مابقه اعله الحره لون
تمشي وي غربه العيون
كلهه دمعه
مو طمع دنيه يمهدي دمعك المحتاجه
لا ترد ايده اليمدها منك اطلب حاجه
خادمك وبحاجتك
بس تلمني بصايتك
يالدموعك دم تسيل
انت وجــهه والدليل
يابو صالح
+++++++++
وحده بس وارجو السماح
زيدني الجرحك جــراح
ولوعــه وآهات ونياح
للحبيبه
الما بقى الحالتها حــال
وباگت الغربه الدلال
الگاع ماتستر خــيال
للغريبه
زينب الاذاها زينب وانت اعرف بيها
موشخص عادي وچفوفه حبال تنشد بيها
اعليها عينك دامعه
رحمة الله الواسعه
ياخدر ماله مثيل
وانت وجـهه والدليل
يابو صالح
++++++++++
ثائر الربيعي
ابا الفضل عليه السلام
تأخر بالولاده فات 9 اشهور
حته بالولاده اباله فد حسبان
انتظر مولد حسين ايفوت يله اصير
نزل للدنيه يوم الرابع بشعبان
كبر عمر الگمر قارب الخمس اشهور
رمضان ورجب ذالقعده ذالحجه واهلاله محرم بان
سابع من محرم مر عله العباس
بين المهد بين التوّه يزحف چان
حل وكت الضحه وبالولد مدري شصار
يعض بشفايفه بِلهاته ماكو اسنان
اجته وما لگته ام البنين الوين
رايح مادرت دورت كل امچان
يحسين وحسن ماشفتو اخيكم وين
امن امس ما راد صدري وگصته تنطي الوان
لزم ظهره الحسين وصاح زينب وين
ما اتحمل اكثر جيبي اخوچ الان
تركض اجت زينب شايله العباس
امطيين ها يزينب وين اخيچ چان
گالتله لگيته جوه كوز الماي
شرايد ماعرفته صار ساعه زمان
گلت عطشان قربته اعله وجه الماي
الغايه مو لعب من مدد الذرعان
ها ها ها
امبلل من الكوز امبلل
يغرف ماي ويشمر ماي
خروج الضعن من المدينه
آنه وعلّتي وآلام الهجر
يرقيه البعد رايدله عمر
ابدي بغربتي. وي طرت الفجر
++++++++
والله وكبرنه وصرنه انسولف
بالفرگه وينچ وين الفرگه
توه ابونه استانس بينه
علمنه توه اشلون انشبگه
يتبسم وتدمعـلچ عينه
مدري شبگتچ ليش اتحرگه
يفتح ادييـنه لـبنـياتـه
علمنه من يدخل عالملگه
اتبسّملي شكثر/ودموعه جرن
راح اشبگ منو/لو سار الضعن
لفراگ الابو/ماينفع صبر
++++++++
ماتكفي يختي اوداعچ دمعه
عيفي دمعتچ يختي ارقيه
شبعيني نظره عيفي دموعچ
صيحيلي يختي بكل حنيه
اترجعيلي واترد بيچ عيوني
مابيها دمعة عينچ جيه
ابقى عليله وانتي بغربه
واشيجمع الما بيچ او بيه
هذا اخر نظر/من عينچ الي
اخذي شوفتي/ويبرالج علي
ما انساچ ابد/كل ليله التمر
++++++++
هالگعده هاي الما تتكرر
ليله الاخيره البيني وبينچ
رفعيلي راسچ عيفي دموعج
خليني اقره الطف ابعينچ
طبعت اصابع جاي اقراها
مرسومه من هسه بخدينچ
هم مثلي لو ونيتي الحالچ
لا والي يسمع صوت اونينچ
خدچ ينضرب/يوصلني صده
اسمع صرختچ/صوتچ لو بده
يبچينه الم/من سحگ الجمر
+++++++++
بلساني هاي آخر يحبيبه
يرقيه هالليله اتسمعيها
واهمومي عن فرگاكم كلكم
الگبر الزچيه انوب احچيها
اهنا يم حسن اختي العافتني
انطيني يُمّه اخبار اعليها
عطشانه لو تركض بالهيمه
ضربوها مسلوبه اتراچيها
واسمعها تون/ونّتها الم
ماتت شوفتچ/دلالي افتهم
بيدينچ اثر/لحبال اليسر
+++++++
نتشابه احنه ونفس القامه
اثيابچ حجمها نفس اثيابي
هاج اخذي ثوبي الي تلبسينه
العبد الله لو حس طال غيابي
بحضاني لو شلته اترد روحه
ايده يمدها ايعدل احجابي
يم بابي راح اگعد وانتظره
ومهده ارسمه فوگ اعتابي
ما واحد يرد/دلالي يحس
الوان العبي/تگلبها الشمس
مذكور السبي/واعرف هالامر
+++++++
ثوبچ البسه واستر وجهي
اوگفلي يختي اگبال مرايه
اتصور انتي الاحچي وياها
صوتچ اسمع يحچي ويايه
ارحم الچ ماجيتي اويانه
شوفيهن اجدامي مچوايه
صدره اليظمنه چان بشوگه
ضاعتله منه ضلوع اهوايه
لمدلل بقى/عاري اعله الترب
كل وصلت جسد/مليانه ضرب
شيباته الابو/هم صارن حمر
+++++++
ثائر الربيعي
كلهن جمعتهن وبسجني عشتهن
من الزهره للشام
هاي اسبعطعش عام
+++++++++
وحده الزهره صار البينچ او بيني
مثل قنفذ ييمه السندي ماذيني
من اشتم هوى لن سطرته بعيني
اضل انعه اعله حالچ لو تسمعيني
السطره يالزچيه هم مرت عليه
منچ ماخذ الام
هاي اسبعطعش عام
+++++++++++
الكاظم يالحسن مثلك صبح موته
من السم يون محد سمع صوته
مثل جبدك تراني جبدي مفتوته
سلالسل مو سهام الفوگه تابوته
چبدي وسمّي مثلك ودمعي يجري لجلك
سلاسل ماهن اسهام
هاي اسبعطعش عام
+++++++++++
رغم يحسين ابنك سجنه واهواله
ماشاف الخيم محترگه بعياله
وين اتصير حالي الجسمك وحاله
ماصعدت عليه اتدوس خياله
برضتها الحوافر گيدي العضمي كاسر
مني رضت اعضام
هاي اسبعطعش عام
+++++++++
اعاين للسلاسل وابقى احاچيها
اشلون اتحملتچن زينب ايديها
وايـد ارقيه شمسوي الاثر بيـها
يگطر فوگچن دم من تراچيها
من هاي السلاسل چف ارقيه شايل
اون ابليلي مانام
هاي اسبعطعش عام
+++++++++
وحده بس بقت ما والمت عندي
وين الغربه هاي وغربة المهدي
بس اسبعطعش عام وخلص وعدي
ودي ابقى انتظر لآخر زمن ودي
يامحله انتظاره ياخذ بيده ثاره
يمسح دمع الايتام
هاي اسبعطعش عام
ثائر الربيعي
استشهاد السيده زينب ع
كأن الناعي للمدينه ينعى العقيله
لسان حال ام البنين
++++++++
يا اهل يثرب صوّت الناعي
ينعه المصيبه وهيج اوجاعي
گتله دريت حسين مذبوح
لا گلي ماتت ام الاجروح
+++++++++
اهلَ يثرب ناده زيدو بالبچي حيل
ماتت وماگال اسمها ابونّته ايطيل
ماتت الماكو النعشها والي ليشيل
انرضت بحچي الشماته مو سحگ خيل
إچبير الفضل ماچان بچتافي
قبلي ركض صوب النعي وحافي
ها يمه گتله الكربله تروح
لاگلي ماتت ام الاجروح
++++++++
الناعي عني ما سألهم هالمره امنين
من وگعت اگباله ناده ام الابنين
عن سبب موتتها انصحچ لا تسألين
شافت الشجره العليها راس الاحسين
عالشجره بعده دمه يتجاره
ماتت قهر من شافت آثاره
ها گتله يعني حسين مجروح
لا گلي ماتت ام الاجروح
++++++++++
وارجعت محتاره واحچي بدمع الاعيون
يالفضل روح الخوالك گلهم ام عون
ماتت وخلصت زلمنه الفاتحه شلون
بالنيابه عن اخوها خل ينوحون
عباس اجينه افتحنه ديوانه
الفوگ السنه مسدوده بيبانه
بس عطره باقي بمجلسه يفوح
لا گلي ماتت ام الاجروح
++++++++
سمعت ابعمتها سكنه وموتت الشام
كلهم التموا عليها اتحاچي ليتام
ماتت الجمعت شملنه بحرگ الاخيام
ابچو تستاهل بواچي وشدت احزام
كل حيله واليلطم عله اعيونه
الموت الغريبه لاتلومونه
كل الجزع للحره مسموح
لا گلي ماتت ام الاجروح
+++++++++
آنه ام عباس اگلهم ام الامصاب
اوياكم ارد ابچي عليها اخت الاحباب
مثلي هم مرت عليها گعدت الباب
ياهو ليزوره گبرها بگاع الاجناب
وحشه وگبرها ياهو ليزوره
تعمه عليها اعيوني معذوره
الينشدني عينچ بالبچي تروح
لاگلي ماتت ام الاجروح
ثائر الربيعي
في خربة الكوفه عاد المام السجاد من دفن الاجسات
بعد ماسمعت الخبر النساء والاطفال تعالى الصياح والبكاء لقد دفنو الحسين دفنو الحسين
مولاتي رقيه تسمعهم يبچون كانها لن تصدق الخبر
ذهبت لرأس ابيها وهو فوق الرمح تخاطبه
يالفوگ الرمح جاوبني گد عمري
عدنه حسين غيرك وآني ما ادري
گالو دفنو حسين
انت الفوگنه منين؟
+++++++++
ما يفهمني غيرك بويه اذا تگدر
صح عندگ جسم ضل منترك بالبر
شلون وباقي ليهسه اعله ذاك الحر
اذا جسمك قصدهم توه دفنوه
راسك ليش ما يم نحره ردوه
بلكت لو رجع يم جسمك اتعيش
اذا بالماي وجهك بويـه رشـوه
خاطر افتهم هذا انته مو انته
گلي يا رقيه صووتچ اسمعته
بسـچ لاتـگـولـي
انته الفوگنه منين
++++++++++++
كلها رد علي السجاد من صاحت
فجئه وبالخرابه ريحتك فاحـت
ثوبه اتشم ترابه زينب وطاحت
گالـلـها دفنـته وعـيفي الاشلون
لمگطّع وصـل منـه اشيغـسلون
اسم حسين اسمعه مره مرتين
وارجع هم اسأله ياهـو مدفون
أهل البيت كلها حسين بس واحد
لو عندك شبيه وعالرمح صاعد
ياروحي شتحسين
انته الفوگنه منين
++++++++++
نفرض انت ذاك الوسدك لحدك
ماعندك چفن واثياب ماعندك
للقبله اشيـوسـد عالرمـح خـدك
عيني لو خطت مايخطي لحساس
انت حسين هذا صاحب الراس
كلما عمتي زينب لاحها السوط
كل راسك تديره الراس عـباس
انت مو عدل شيْقـنـعـه دلالـي
وآنه اشلون عدله الهسه يالغالي
اشوفك شوف بالعين
انته الفوگنه امنين
++++++++++
عليك اسأل امس گلتلها ياعمه
منو ضل اليداوي اجروحه لبجسمه
امه الزهوه گالت تگعـدت اتلـمه
خل افرض تِلِم لمْطَشْرِته الخيل
مابيها اعله جسمك فاطمه اتشيل
هم ضليت اشك مو سفره وتعود
برمحك من اسولف شفتك اتميل
بعيونك حچي وافهم بواچيها
مييت لو عدل بلسانك احچيها
جاوب هالچلمتين
انت الفوگنه منين
++++++++++
احسن ما اسألك خلني بوهامي
ادعي ايردلي جسمك حته لو دامي
بيدي اگعد اشربك ماي الضامي
يكفيني الدقايق تگعد اوياي
بعدك ضامي باذنك احچي بهداي
ارجع من سفرتك وآني اروَيك
خير امن الله عدنه جابو الماي
من ترجعلي اشمّك حته تاخذني
عذبني اليسر يا بويـه عذبـني
يمته ترجع او وين
انته الفوگنه منين
ثائر الربيعي
محاوره ابو فاضل والعقيله. ع
ما ودعتني من رحت ارجعلي ياعباس
ماني اختك بگلبي اتعرف ياسيد الاحساس
يا بو فاضل يا بو فاضل يابو فاضل
+++++++++
صوتك سمعته من صحت ادركني خويه حسين
ظهره انحنه اگبالي وعثر چا گتله رايح وين
شيوصلك الحد النهر وانته بدموع العين
هلبت جرح عنده ويجي ونضمده جرح الراس
يابو فاضل يابو فاضل يابو فاضل
++++++++
چلمة تعال اتكررت واعذرني عالتجريح
لو باقي بانفاسك نفس راجع يزينب صيح
اتوچه وانهض عالسهم واگبالي اوصل طيح
بحضاني يالغالي ردت تلفظ اخير انفاس
آ يزينب آ يزينب آيزينب
++++++++++
من الخيم حد النهر صوته وصل مبچاچ
لو حته اجي ماعندي چف واتحاضن بملگاچ
ودعتچ الله انه رحت يازينب الله وياچ
خويه البگه براسچ وگع عالگاع ابو النوماس
يابو فاضل يابو فاضل يابو فاضل
+++++++++
اعرفها ناتچ غيبتك واحسبها ليگدام
طلّعته ثوبك من قبل لاتحترگ لخيام
مديته واگباله اگعدت يشبگني ثوبك گام
جاوبني ثوبك عالخدر كلشي ولاينجاس
آ يزينب آ يزينب آيزينب
+++++++++
امسحها بيمن شيلتچ ماباقي عندي چفوف
وشلون اشوفچ والسهم من عيني ماخذ شوف
جودي تبده اعله الارض يمي العلم ملفوف
يرثى يخيتي الحالتي من هالخبر تنقاس
يابو فاضل يابو فاضل يابو فاضل
+++++++++++
لو حته عن عيني غبت چلمة بخت تنگال
لا مثلي تلگالك اخت لا مثلك الگه ارجال
عگبك اروح اميسره تنشد بديه احبال
لو ناشدو وين الكفل خدرچ شگل للناس
ثائر الربيعي
يحسين آنـه امك ام الاحـزان
رد عاشورك اعله امك يعطشان
ابكل مجلس عزا تلگالي نيشان
وي اهل المنابر صوتي عنوان
بيين اهلاله بيين اهلاله
يعاشورك عليه
+++++++++
صيح انته ابمكاني يُمه يحسين
وين الساعد امي بالبچي وين
عينـوها ابدمعـكم يالمـحبـين
تدرون الزچيه عدها بس عين
بالبچي اعليه بالبچي اعليه
دعينوها الزچيه
+++++++++
الكل مجلس اجي محنيه لضلوع
واحد واحد افتر بين الاجموع
وين الگلبه مثلي ابحزنه موجوع
امد چفي اعله خده واجمع دموع
توگع ابأيدي توگع ابأيدي
اليبچيلك دمعته
++++++++++
يُمه اوداعـت الماشربت المـاي
صوتك چني اسمعه بالعزه وياي
مـن الطـم عليك اتگلي بهداي
فدوه الضلعچ آني وسهمي وحشاي
لاتلچمينه لا تلچمينه
كسر ضلعچ ييمه
++++++++
اكلف من ذبحتي وسحگت الخيل
صوت الصاحت الحگ عالمداليل
ودي ارفعلي چف بس ما الي حيل
واتشيل السهام اهوايه شتشيل
خويه لحگيني خويه لحگيني
سهم گلبي كتلني
++++++++
يالزهره آنه وانتي الحال الايتام
نبچي وللعقيله وحرگ الاخيام
نار وسوط وامعـاثرها الاجدام
وصيحتهم عليها ابدخلت الشام
وينه كفالچ وينه كفّالچ
ها يخت ابو فاضل
ثائر الربيعي
هل شهر عاشور شهر المظلمه
والبسمه نشرت قميصه فاطمه
+++++++++
بالقميص الفوگه آثار السيوف
من حسينيه الحسينيه تطوف
ياهو اكثر حرگه بالمجلس تشوف
اتروحله الزهره ابأديها اتحزمـه
++++++++
للمجالس تمشي محنية ضلوع
تدخل بكل مجلس اتلم الدموع
من تون يحسين يالغالي وتلوع
وينه ليساعدني للگـلبه ضـمه
++++++++
وينه ليساعد دمعتي بدمعه وين
والله يستاهل بچي اوليدي الحسين
ثنين عدكم وآنه ابچي بوحده عين
وعين الاخره فوگها چف لاطمه
++++++++
ويـنه لبگلبه مـثل گلبي لهيـب
ناره ماتبرد عله جرح الغريب
امفطّرات اشفافه عالغبره سليب
وشيبته بيا ذنب تتگاطر دمه
++++++++
اوياي اريده كون تتصورله حال
الواگع وصانع وساده امن الرمال
منشغل عن حاله وايصد للعيال
بآخر انفاسه ويصد لمخيمه
+++++++
الصوت مامسموع عالتله يصيح
كون بيك اتگوم وادريبك جريح
حيل ماعنده غده ايگوم ويطيح
ياثگل لسهام فوگه النايمه
++++++++
ثائر الوبيعي
الامام الصادق ع
لسان حال بنت الامام الصادق ع
شگد سولفت عن حرگ الاخيام
ودارت علـينـه بـويـه الايـام
شفته الحرگ بعيوني
بس لا بعد يسبوني
+++++++++++
بحرگ الخيم بس الحرم هيچ اسمعت من عندك
هسه الحمد لله عدل بعدك ولذنه بسدك
ماعدنه چويات اطمئن ليش الدموع بخدك
تتمنه اخو مثل الگمر من شفت روحك وحدك
تركض علينه امفرع الراس
لمن صحت وينك يعباس
وآنه الزمتها امتوني
بس لا بعد يسبوني
++++++++++++
بعيوني اشوفك بس گلت عني تظم الآمك
اتهمس بصدرك گمت مامش كسر بعضامك
لا سامح الله لو متت وجسمك تخيطه اسهامك
ماعدنه زينب بالسبي ياهو اليلم ايتامك
بويه اطمئن ما ابچي عالماي
عندي المهم تبقى اننه وياي
لو عالهزل ركبوني
بس لا بعد يسبوني
+++++++++++
تدري آنه من شفت اللهب بالخطوه صارت عثره
ويه الحرم ما روكضت من حجره وادخل حجره
بمچاني اموت احسن گلت لاخدي چف ايسطره
خو هسه اموت اولا رمح راسك عيوني تنظره
يكسر گلب حال النساوين
بالي مشه لعيال الاحسين
بهالموقف وبچوني
بس لا بعد يسبوني
++++++++++++
والكاظم اعليه ركض ياخويه وينك صحته
جاني وصحت بعدك عدل لو بعده ذبحك وكته
لا تگصد الصوب النهر جرح النهر سامعته
اسكينه لا ماي ارتوت لا عمها رد الاخته
خل يحترگ خل يوگع البيت
بس تبقى انته گبالي ياريت
من ترحل ايسلبوني
بس لا بعد يسبوني
++++++++++
مو احنه اهل بيت النبي والواجب ايقدرونه
بيتك مزار اهل العلم شمسوي ويحرگونه
يالصادق ونفرظ متت عندك گبر يبنونه
مثل الحُسين بكربله واحبابك ايزورونه
گبرك بعـد هـم مثلـه ينـزار
بي حضره لو بس رمله وحجار
وزوارك ايذكروني
بس لابعد يسبوني
ثائر الوبيعي
لقاء مولاي الامير مع الزهراء ع
مشتاگ وجيتچ يالزهره
امتانيتك بعيونچ اقره
نفس اعيوني
اصفـر لـوني
++++++++++
نظرة عينچ وملگاچ منتظرلها صارد اشگد
يالتارك غيابچ ذاك خلّه ابگلبي ماتنسد
لمسي طبرتي بهداي احرورة سمّي خل تبرد
وجروح الگلب بعدين بيهن نحچي ماتنعد
شبعيني اشلونك يالغالي
ما رايح صوتچ من بالي
من طبروني اصفر لوني
++++++++++
احچي عن صفار اللون وتحاشه الحچي القاسي
مو من طبرتي والسيف موتي بجرحي لحساسي
عظيمه اتطيح يم حسين آنه عمامه من راسي
وگعتي الوجهي بالمحراب واسمچ يمشي بانفاسي
واگع واتمنـيتچ يـمـي
چفچ چان اليمسح دمي
ودمع اجفوني اصفر لوني
+++++++++
ليهسه عليچ حسين لابس اسود ابحزنه
للمسجد اجه ومن شاف دمي الشيبتي اتدنه
يمسحها واگله اتهون يومك ماكو اشد منه
گلي اعرف ولكن كون امي اتشوفك اتمنه
اسمچ يالزهره اعله اللسانه
هم مثلي اتغيرت الوانه
من شافوني اصفر لوني
+++++++++
گطعي يم حسن مبچاچ خل سالفتي اكملها
من جابوني وسط الدار وانجمعت علي كلها
كونچ شايفه العباس ليش دموعه يهملها
زينب لو سمعها اتصيح يايمه
ركض الها
امگابلها ويمسح دمعتها
وكل حيله ايون من ونتها
هالخلوني اصفر لوني
+++++++++
عدها ام البنين اهواي من البيني وبينيچ
تشد عصابتي وتنوح وينچ يم حسن وينچ
حيدر جرحه ما يلتام الا اتلزمه چفينچ
اثنين اعيوني معميات كون اولا سطر عينچ
صحتلها ادموعچ ضميها
لو ردت زينب لاگيها
بذيچ اضعوني اصفر لوني
++++++++++
بموادعنه ساعه ازمان طابع صدري من ظمهم
عدهم حچي ما يحچون بس بنظره افهمهم
اقراها ابدمع لعيون اسلملهم عله امهم
كلهم غمضو وياي يوم الغمضت يمهم
مشتاگيلچ حيل احبابچ
اذاهم يالزهره اغيابچ
وهم فگدوني اصفر لوني
ثائر الربيعي
عندما قرب الاجل لامير المؤمنين ع طلب من الحاضرين الخروج والبقاء لولد فاطمه ع فخرجوا وقام العباس ع معهم فقال له امير المؤمنين ع
وين رايح/انت مضمون الوصيه
وين رايح/يانظر عين الزچيه
انت نفس حسينها
يابو فاضل عينها
+++++++++
ياكتله امن الاحساس/ماقصدك يعباس/
يبو الرايه.بالحچايه.اقصد تطلع الناس
طالع يالگمر وين/يهدل ظهر الاحسين/
اعز غالي.عله اعيالي.وانت الفاطمه العين
تعال ارجع عيون حسين بچتافك تصيح ارجع
اول ماگمت عباس زينب هلت المدمع
مو من جرحي من ونيت الحالت زينب اتوجع
كون تدري/اشوصت الزهره بچفوفك
كون تدري/ماتت وتتمنه شوفك
اسرار بينك بينها
يابو فاضل عينها
****
غالي بروحتك هاي/تسمع ارجع اهواي/
امن الخيمه. ينادونك.ارجعك واترك الماي
لرجع تفرق اهناك/سكنه بطاسه تتناك/
يتعثر .يجي حسينك.يمتد يبني وياك
يل كلشي انته ذاك اليوم يطيح بوگعتك كلشي
عاين جرحي راسك هيچ والدم جامد برمشي
بس انه امن اجاني حسين مو محني وگدر يمشي
ومو غريبه/هسه زينب لو عفتها
ومو غريبه/اهناك تذكرني بوكتها
امدلـله امركضينها
يابو فاضل عينها
+++++++++++
ابدي اوصيَتي بيك/واولهم احاچيك/
ثگيله وانت گد الها امانه رايد انطيك
خدر اختك تحاميه/بعيونك تخليه/
حد ما بالسهم عينك يسر ودروبه تمشيه
تعال اگبالي ياعباس ارفع عينك ابعيني
چف ام الخدر ييدك لزمه وچلمه تنطيني
حد ما توگع الچفين يحترگن صواويني
انه يمها/ليلة الوحشه امن اجيها
انه يمها /ياكل بروحي حجيها
حرگو اصواوينها
يابو فاضل عينها
+++++++++++
كلما الها صديت/زينب منها ونيت/
يوحشتها.يضل خالي.لام لا ابو البيت
باچر تطلع الروح/اختك تبقى للنوح/
عن اعظم.جرح بالطف.احچي وكلشي مسموح
شوفت عينك المجروح الجرحه مابقت چاره
لعياله يدير العين ويكشف بالحچي اسراره
بالطف لا اخو الحمّاي وبعيلتها محتاره
كلها يمك/غربة ارقيه وضماها
كلها يمك/التركض وسوط بگفاها
ابسطره لمأذينها
يابو فاضل عينها
+++++++++
باقي كلمه تنگال/انه بنعشي انشال/
تشيعوني وتدفنوني ولا ابقى اعله لرمال
تدفنوني وتردون/گلي بزينب شلون
يم اختك يبو فاضل عليه لاتنوحون
يبني اعرف شعورك زين ترى فگد الابو يكتل
انته لو بچو عباس دمعه اعليه لاتهمل
تحسب زينب الف حساب من تسمع بچيك ايحل
لاتسمعك/اخفي عن زينب ونينك
لاتسمعك/احضن الحره بيمنك
انحرح بونينها
يابو فاضل عينها
ثائر الربيعي
بنص كلبي ،،،،راسملك صوره
ضي دربي،،،،، من حبك نوره
ياهلا ياهلا بالحسن ياهلا
+++++++++
اول ولد عدها انولد ام الحسن فرحانه
يشبه محمد لو علي ماتختلف الوانه
هوه البداها ياهله ال امه فتح ذرعانه
من الولاده والكرم صار الحسن عنوانه
بگماطه فاتحه اچفوفه
وبساطه فارش لضيوفه
ياهلا ياهلا بالحسن ياهلا
+++++±++++
بسم الحسن يابالحسن نبعث تهاني الليله
اسمك علي واسم الحسن يتجمل امن اتشيله
ياچلمه شخصك ياعلي للرايد ايهنيله
بس الصلاة اعلى النبي باسم الحسن نهديله
عالكوثر ندري اتوافينه
عالمعبر انته اتمشينه
ياهلا ياهلا بالحسن ياهلا
++++++++++
يابسمه لبثغر النبي والزهره حضرت يمّه
گالتله شنسمي الولد اگبال النبي مبتسمه
گاللها مو يمي الاسم ما اسبق الله بأسمه
تتنزل احروفه مثل آيه وقليل اتفهمه
جبرائل كاشخ ابأسمك
مسرع حيل نازل ايشمك
ياهلا ياهلا بالحسن ياهلا
+++++++++
منك اخذ اسمه الحِسن يارقّتك والطافك
جامع جمالك اهل الارض يتحير الي شافك
من حيدر ومن النبي ومن الزچيه اوصافك
سبحانه لمخلي النده يتگاطر امن اشفافك
هنيالي ابحبك هنيالي
ياغالي الما مثلك غالي
ياهلا ياهلا بالحسن ياهلا
مولود الحسن...عليه السلام
اهواي انگول عالخير
بس لم الحسن غير
بيها اشگد تعابير
+++++++++
يا عالخير للزهره بضناهــا
وجه الله الحسن هالليله اجاها
بشهر الخير خيره الله نطاها
خاطر ترضى يرضى الله الرضاها
لجل الحسن اللَّــَه
شهر الخير سماه
رحمه خاطر ايصير
بيها اشگد تعابير
+++++++++
اول تهــنئه ابــهاي المســيه
بلمبارك علــي ناده الزچيــه
خجل غطه ابتسامتها الرضيه
ابتسامة حيدر الها اعظم هديه
ام اعظم مقامات
يحچيها ابتسامات
نظره تريد تفسير
بيها اشگد تعابير
+++++++
الزهره نادته بكلمه خجولــه
حلو ابني الحسن ما بيه لوله
زيغير وشايل اوصاف الرجوله
يوگــف بالمهد للــي يجولــه
بهله يفتحها ليدين
بسم الله امن العين
كريم ابعمره لزغير
بيها اشگد تعابير
+++++++++
وعنده ابنك بعد حاله شفتها
كلمة ضيـف اذا يـمـه جبتها
الباب الدار يزحف لو گلتها
الناس بزمن ابني يابختها
هنياله اليظيفــوه
امعزبهم يشوفوه
يابخت الخطاطير
بيها اهوايه تعبير
ثائر الربيعي
صيام مولاتي الرباب. ع
صايمات/ونحچي بيك آنه وسكِينه
صايمات/و أذّن المغـرب عليـنه
الليل يا عبد الله حال
افطـر اويانـه تعال
صايمات
+++++++++
هل يوليدي شهر الصوم والوادم تصومه ابعِز
هسّه جروحي مو بالليل گامت بالنهار اتفـز
وحرورة عطش لحسين الظهاري بنحري تبقى تحز
واتمايل مثل كاروك خالي وريح حزني اتهز
اهواي مات/من قبل گطعت وريده
اهواي مات/حسين ذبحوك اعله ايده
اصيامكم يا يمه طال
افطر اويانه تعال
صايمات
++++++++
اعيش اويالعطش الآم ضامي بنبله يتروه
الظهر وسكينه تلگاني اعله عتبة بابي اتلوه
جوّه اتفضلي واتگول بيتچ ماكو بي جوه
لسه ابلا سگف چم دوب الصوم بحالچ شسوه
رايحات/اعيونچ ابمجره دمعها
رايحات/مثلي هم سكنه وضعها
الخاطر اختك والدلال
افطر اويانه تعال
صايمات
+++++++++
دموعي امسحها بگماطك وكت اغروبي بيها افطر
يالبالطف نشفلك عود بلكي بدمعتي اتخضر
ما گول اعطش اعله الماي. الماي ابّالي مايخطر
ضامي حضني لمناغاك لو نسمة بروده اتمر
راويات/اجروحي بس ذبلانه عيني
راويات/وجسمي يتغذه بونيني
من اون تال الليال
افطر اويانه تعال
صايمات
+++++++++
تفرش سفره من دموع سكنه وبيّه بس تقنع
رحمي بحالچ اتموتـين گـطع الزاد ماينفع
الخاطرها امد الايد وترجف خاليه ترجع
مستحيه تلوح الزاد اضل باليسره بيها ادفع
خايفات/چفوفي من الزاد الوحه
خايفات/الگلبي لو هاجت جروحه
ليش عمري الهسه طال
افطر اويانه تعال
صايمات
+++++++++++
وادعيلك توالي الليل كافي ارجعلي يمدلل
تكتل بالسحر شوغات ليل الوحشه ذاك الحل
طلعتي بالظلام وخوف ادورك وين ما اندل
وره الخيمه وخيمنه ارماد عنك بالرماد اسأل
وين مات/وعطرك اشتمّه بسؤالي
وين مات/گبرك امن الگيته خالي
ذاب جسمك بالرمال
افطر اويانه تعال
صايمات
+++++++++++
اصيام ويخلص بطرواك انه وسكنه من نگعد
ماتترسهن الچفين شهوره عمرك امن انعد
ياعبد الله جاي العيد ثياب الوادم اتجدد
واحنه ذكريات السوگ من طبينه لينه اترد
طابات/السوگ وحبال ابادينه
طابات/اتأشر الوادم علينه
الخدري اذا عندك سؤال
افطر اويانه تعال
صايمات
ثائر الربيعي
افراح شعبان
خمسه انوار الجلاله
الكل يتباهه بجماله
الشعّ ابنوره علينه
بشهرك شعبان
+++++++++++
جمالي ..جمالي
ساطع وآنه حسين ونوري شع بالاكوان
جمالي ..جمالي
چي تشبه للزهره اوصافي انه احله انسان
والأمه الزهره/هنياله بعمره
وشيطلع عطره/ هنيالي بهاي
من هاي اوكافي/افخر بوصافي
وبرمشي الغافي/هنيالي بهاي
حلوه البسمه الي بيه
بيها اشبه للزچيه
يافرحتها الحنينه
بشهرك شعبان
+++++++++++
عيوني عيوني
وسعه ونظرتها المعروفه آنه العباس
عيوني عيوني
من حيدر وارث دورتها ومليانه حساس
حيدر ناطيني/هل خزره بعيني
وشمرة چفيني/من الكرار
وطولي شمحلاته/وارث شمراته
وطاسي وريشاته/من الكرار
والكل سامع خبرها
هاشم آني گمرها
واحمد الله التقينه
بشهرك شعبان
+++++++++++
بسجودي..بسجودي
معروف آنه السجاد واشبهلك يحسين
بسجودي.. بسجودي
انت التشبه امك وآنه اشبهكم لثنين
امن الزهره وعودي/نور البخدودي
وارثها اورودي////من الاطهار
وردات چفوني/تشرح مظموني
وبدمي ولوني//////من الاطهار
وارثهم بالعباده
هذي اشرف سياده
ربنه خصصها بينه
بشهرك شعبان
+++++++++++
ولكبر ..ولكبر
صاح اتعذروني امن احچيها وعدكم لخبار
ولكبر ..ولكبر
ياهو الاكثر واحد يشبه جدنه المختار
خلقي واخلاقي/وتصويره الراقي
من عنده شباقي/سيد الاكوان
من حسنه ونوره/وبنفس الصوره
واخلاقه ودوره//////سيد الاكوان
بشخصي جدي تجدد
صوره بيه المحمد
چن مولوده نبينه
بشهرك شعبان
+++++++++++
سماري..سماري
آنه المهدي المنكم جامع كل الاوصاف
سماري.. سماري
چني حسين وچني الكافل مرات انشاف
شماعدكم عندي/بس شامة خدي
مخصوصه الوحدي//بيها الاسرار
ومنتظره الشيعه/مهديها اتطيعه
اتجددله البيعه/////بيها الاسرار
المهدي الكل بنتظاره
الهم آنه البشاره
بيدي شراع السفينه
بشهرك شعبان
ثائر الربيعي
مولد الحبيب الحسين عليه السلام
عـندك يجـبريل اخبار
طاير فرح شنهي الصار
يافطرس ايگلي ارتاح
صار اليطييب لجناح
++++++++++++
مختبصه املاك السمه
والحور اشوف امحزمه
وحده لوحده بشّرت
مبروك جابت فاطمه
يابشر صحت المنولـد
تنـزلّـه افــواج اوتـرد
فرحانه تصعد والعجب
بيها عطر مـثل الورد
ادري بمحمد موجود
فهموني ياهو المولود
منهم ملك ابشر صاح
صار اليطييب لجناج
++++++++
ماتدري يافطرس شكو
صار الحسن عنده اخو
ايسمونه رحمه الواسعه
مو بس حلو كلش حلو
جبريل الف رحمه الهلك
اوگف الي وگفت ملك
توسطلي يم رب العرش
هالوگفه ما انساها الك
امنيتي بس هلجنحين
امسحهن بمهد حسين
يم مهدي ترجع لرواح
صار اليطييب لجناح
+++±++++
تدلل شـرايد بـعـد
وياي انزلك للـمهد
مايوگف گباله طلب
عد الله غالي هالولد
مايمنع الباري محب
لحسين اذا يگطع درب
بس انوي توصل حضرته
ما يوگـف گبالـه ذنـب
بالفعل رد جنحي المات
احسن امن اول قاطات
ابهزّت مهد كلشي طاح
صار اليطييب لجناح
+++++++++
لو بيدي ما اصعد ولن
ودي اتخذ مهده وطن
والمشكله من الهوى
اتغار اعله ابنها ام الحسن
گالتلي ارجع عـالأثـر
لهل السمه شع الخبر
احباب اله بآخر زمن
تعشگ حسين ابلا نظر
والثالث ابكل شعبان
كل شيعي تلگا فرحان
ميلاده عطره الفواح
صار اليطيـب لجناح
ثائر الربيعي
اثنين ايشبهـن الـجدي/بچتلاي
السلاسل حيل بعضامي/بچت لاي
ومثل ارقيه معصومه/بچت لاي
او لو تحضني چا ماتت عليه
+++++++++++
السجن يالمهدي اشد بچاك/لو طاف
ولهيب الخيمه لسه وياك/لو طاف
بصحن الكاظميه الجدم/لو طاف
اذكرني بدعائك هالمسيه
+++++++++
يمن صبح ومسه دموعه/طفت بي
ابداعت كل جدم جمره/طفت بي
اذا صحن الرضا الليله/طفت بي
يمهدي اتبلغه مني العزيه
ثائر الربيعي
استشهاد الامام الكاظم ع
بعالم الغربه شفت/هواي امور وقارنت
حالتي بحال السبيه/وبألمها اتصبّرت
++++++++
آنه والغربـه وسوالفها العجيبه
دمعـه دمعـه آخذ الليل واجيبه
بين زنزانه وخرابه اجمع مصيبه
اتهون بيه الغربه من اذكر غريبه
مو مهم سجني ترى/المشكله حبس المره
بالخرابه الهاشميه/لا سگف بيها سمعت
++++++++++++
النومه كلفه للقيوده امجرحاته
بدمعتة المهظوم يتغطه بعباته
كل سجين ايعيشه ليله بذكرياته
وآنـه بـآلام الخرابـه الليل اباتـه
الونّته ماتنسمع/اوسادِته تنگع دمع
الساهرت ليل باذيه/الها ما ليله نمت
++++++++++++
الريحة اهلي شوگي ياخذني وحنيني
واطلع اشتم الهوى وسطروها عيني
عبرة اسكينه الي خنگتها تجيني
بين حزني وشوگي يتخالط ونيني
يگضي عمري وماگضه/شوگي لعيون الرضا
يشبه اللهفة رقيه/والحضن ذاك الطشت
+++++++++++
آنه وجه الله ويسطرونه اعله خده
شده سجني وعندي وي سجاني شده
امگيد وسوطه اعله متني بيش اصده
واذكر آلام الحراير وحده وحده
من يحسّن بالالم/شلون صيحتها الحرم
كلفه تفسير القضيه/ آه يازينب صحت
+++++++++++
نقله من سجن السجن عذبتلي حالي
ايدي مچتوفه وظهرها الناگه عالي
روحـي اسألـها وأعـذبها بسـؤالـي
اشلون تصعد حرمه اذا ماعدها والي
عاليه اظهور الهزل/وداير بچفها حبل
للعقيله شيبقه بيه/والجرحها اتعذبت
+++++++++++
راح اموت وعيني عن اهلي بعيده
روحي تنعه الروحي موتتها وحيده
حته لو موسى يموت ابچفه گيده
يبچي للمن الگفه حزوا وريـده
في قعر سجني الاجل/موتي عن جدي سِهَل
خيل لاداست عليه/لا صبع مني افگدت
++++++++++
تلّه لا يمـي واخـت تـوگف امامي
وينك اتنادي واگلها وجدي ضامي
لا جرح معصومه اذنها وخدها دامي
لا چوت جدم الرضا حرگة خيامي
بثوبي جسمي منستر/ايشيعوني اعله الجسر
كون مو بالكاظميه/بكربله موتي ردت
ثائر الربيعي
استشهاد مولاتي العقيل ع
چنت وين/من قبل حرگ الخيم
چنت وين/حته اسمي ماسلم
يحتلف عنواني لو ذكروني
ام خدر لميسره ايسمّوني
+++++++++
آني وحده والزمن كـرر اسـمـها
امدلـلت اخوتها والحرگو خيمها
التمشي بستحياء والعاثر جدمها
والـتراب الثگّـل اعليها هدمـها
فتره بين اسم واسم/
فزعه من غيرة شهم/
واسكينه والماي
وغِرفه شامرها الگمر/
وگاصد حسين النهر/
محني الظهر جاي
كلمتين:: وبيده يفرك مِنقهر
كلمتين:: ضِعنه يا ام الخدر
بطيحة الرايه شكثر اذوني
ام خدر لميسره ايسموني
+++++++
ما سمعتو امن الزغر بچتافه جدي
ويّه الاحسين وحسن ماگلي اصعدي
اذكر بحجري الحبيبه يگلي گعدي
وبالسبي شلون الهزل اصعدها وحدي
الرابيه بحجر النبي/
تمشي بدرب السبي/
شيحلها ياناس
امعوده الچلمة هله/
اشلون اباتن بالفله/
والغربه حراس
بالاعيون::ماكو ماي امن البچي
بالاعيون::اويه الحرم صار الحچي
شگد حچي بگلبي حچته عيوني
ام خدر لميسره ايسموني
++++++++++
اذكر ابساعة حرگ باب الزچيه
شابگ اعليه الحسن وحسين اخيه
دارت ابحرگ الخيم بالغاظريه
الخايفه بسدي اجت لاذت رقيه
والحرگ نفس الحرگ/
وزادت اسياط وسحگ/
واهوايه الاطفال
والطفل من ينسحب/
ينترس جسمه ترب/
بالگوه ينشال
يعباس/ تكتل بصوت الطفل
يعباس/ بيه نار وتشتعل
عنهم اشگف مدري عن امتوني
ام خدر لميسره ايسموني
++++++++
زينب اني الما شمس كِسرت عليها
بظلمه بين اخوتها من تطلع مشيها
واني ذيچ الشبچت اعله التل اديها
وعالهزيله ابلا وطا تمشي بسبيها
والمآسي ماگضن/
ردني للشام الزمن/
بس لكن شلون
تطلع الروح وترد/
تلتفت المن واصد/
محتاره الاعيون
بعيدين/وسفه عن اهلي ابعدت
بعيدين/مادرو بيه متت
المشكله وبنعشي ليشيعوني
ام خدر لميسره ايسموني
++++++++
ماكو شي ضل اسمه يم زينب عجيبه
كلشي غربه وحته بالموته غريبه
لا ولد اسمع بچه اعليه ابنحيبه
استأجرو لليحمل بنعشي المصيبه
شامت بنعشي حِمل/
اتثاقل ويمشي ابعجل/
كل همه ليجار
غربه لحگت للگبر/
والكسر ماتنجبر/
الا ابأخذ ثار
الى الان/اني للمهدي انتظر
الى الان/ياخذ ابثار الخدر
ابگبري ادعي للفرج تلگوني
ام خدر لميسره ايسموني
ثائر الربيعي