1986
القصائد والاشعار الحسينية
ميلاد زين العابدين ع
اجانه زين الاعباد
بخشوع احييله ميلاد
كريم وبالحشر يذكرنه لابد
نهديله الصلاة بصوت واحد
+++++++++++
نزل للدنيه بس امذبله اجفونه
ابطن امه عباده مساهره عيونه
المن من بچه چنهم يعرفونـه
تربه وسبحه جابوله يسكتونه
علي السجاد من صار
بجبينه شافوا آثـار
تسع اشهر حمل خلصها ساجد
نهديله الصلاة بصـوت واحـد
+++++++++
دلّاعة الولد من صار جابوله
امصلايه لان شيريد عرفوله
كاروكه بشكل محراب صنعوله
بصلاة اعلى محمد من يهزوله
ساجد ليلته ايبات
آيه واهله آيات
سادات البريه والله شاهد
نهديله الصلاة بصوت واحد
+++++++++
امـه بـالمهـد مستغربـه الأمـره
محتاره الولد شيتمتم ابثغره
اصابع ايده بيهن يحسب اتنظره
اثاري ايسبح بتسبيحة الزهره
بكلشي ابن الميامين
يشبه والده حسين
ملك نازل يقبله وملك صاعد
نهديله الصلاة بصوت واحد
+++++++++
زينب شالته وناغته يالغالي
اشحلاتك يالولد تتبسم اگبالي
تِعرف وآني هم اعرفها يالوالي
انته وآني رفجه نبقى للتالي
بعد عمتك يمزيون
جمالك مالي لعيون
يصد النه الگمر عباس گاعد
نهديله الصلاة ابصوت واحد
ثائر الربيعي
استشهاد الامام الكاظم ع
غربه ومتت موتت مساجين
عن اهلي كثرت چلمة الوين
رمشي ياهو ايغمضه
عني وينك يالرضا
موتت مساجين
++++++++++
لچمه لچمه روحي تطلع واعتبر موتي مريح
من تجيني لوية السم آه يبني الحگني اصيح
مره اگعد مره انهض وارجع الوجهي اطيح
ساعه ابرد ساعه احتر مشكله بچبدي جريح
السجانه ما صاحو سلامات
بس چلمة البشرني ها مات؟
سمَي بعروگي مضه
عني وينك يالرضا
موتت مساجين
++++++++++
اگبالي صارت كل صوركم من اجاني الاحتضار
روحي تطلع وآنه اردها ابعيني باقي الانتظار
رايد اعيوني اليسدها چف عزيز وگلبه حار
گلبي عطشان اعله چلمة بويه من ولدي الزغار
لو عالاقـل معصومه وياي
بجفها اعله شفتي اتگطر الماي
اتگلي سجنك ماگضه
عني وينك يالرضا
موتت مساجين
+++++++++++
بروحي ضلت هالوصيه والتفت مامش حبيب
مني ياخذ للمدينه چلمه يحچيها بنحيب
فوگ ربوه ايعلَي صوته مات ابن جعفر غريب
جسمه منرض بالسلاسل وثوبه من دمعه خضيب
تركوها گعدتكم عله الباب
المن بعد ماترجع احباب
الكاظم النحبه قضى
عني وينك يالرضا
موتت مساجين
+++++++++++
هل اجاني موتي وينك وانتظرتك ما اجيت
ايگلبوني يمنه يسره او لو درو بيه انتهيت
ايمددوني وارجع التم من زغر گيدي انحنيت
جر اديه ايمددوها بكل قساوتهم دريت
سجّـانه واتجبلـلها مسجون
ايسدوهن بسطرات الاعيون
المن دمعها فايِضه
عني وينك يالرضا
موتت مساجين
+++++++++++
هسه اقلها لو تجيني للنعش رايدله شيل
الغربه بويه استثگلوني والحچي يطلع ثجيل
منهم اسمع تعبتنه وعالنعش جسمي يميل
مو هداوه بكل حملهم عالجسر شمروني حيل
ويه النعش ماعدهم انصاف
شمروا شمر من فوگ الاجتاف
اعضامي كلها مرضرضه
عني وينك يالرضا
موتت مساجين
ثائر الربيعي
في ليالي استشهادها
العقيله (عليها السلام) ترحب بزائريها
***
هلا بالجاي والماجاي معذور
بعيده الشام واليسعالي مشكور
الما يگدر يجيني لكبري للشام
خلي لكربله يكصدها ويزور
مر بين الضريحين
روح بدمعة العين
اوياك ابچيلي دمعات
يم شباج الحسين
***
هلا بالجايين لگبري خطار
هلا وميت هلا بيكم يزوار
هلا البيهم عطر من گبر الحسين
شوفتكم تذكرني بالانصار
لگاصد كبري بعويل
بصدرك لا تدگ حيل
صوت بلطم الاصدور
ايذكـــرني بالخيل
****
ضايع بالحوافر جسم الحسين
عميه خيولهم سحگته مرتين
ادوره شلون وانه بعازة الحيل
زين ويمشي جدمه العمره خمسين
عمتـــكم يخدام
مشت ما بين الازلام
حرت مابين الاحسين
وبين اركاض الايتام
***
شوفتكم ابابي تهيد الالام
تتزاحم ابصحني امنيتي خدام
انه بالشام عشت الغربه مرتين
بلحدي ومن جنت مسبيه بالشام
اليمي غربه هل ناس
ابد ماعدهم احساس
ضريحي خالي جا ليش
غير انه اخت عباس
***
يالگاصد ضريحي بدمعتك نوح
دموعك من تطيح تواسي الاجروح
حرگوا كل خيمنه وگوه للشام
خذونه وعفت اخوي حسين مذبوح
امشي ودايره العين
نشدني النساوين
عليمن دايره الشوف
كلتلهن على حسين
***
استچنوا فدوه يمي لاتردون
احبكم من تجون ابابي تبچون
تنگعون الضريح وگلبي وياه
هاي دموعكم ترويني تدرون
البيت الكم يـ الاحباب
اليه عتبت الباب
يواسيني الاجه يزور
بطينه الفوگ الاثياب
****
علي ثائر الربيعي
استشهاد العقيلة ع
عگب الدلال العاشته ويه الوليان
ماتت غريبه ام عون ماعدها اخوان
****
ياگلبي اجزع بالبچي وكون اتموت
بصياح ونك كون مو ون بسكوت
على الماتت ومحد فزع للتابوت
يشيعها عمت الساده ضل ياهو الچان
ماتت غريبه ام عون ما عدها اخوان
*
عاشت غريبه وماتت ابغربه ام عون
موش من اهلها غربه بيها يشيعون
والشام فوگ النعش گام يصيحون
هاي الجنــــازه ضلـــت بلا دفان
ماتت غريبه ام عون ماعدها اخوان
*
مو مره ماتت زينب ولا مرتين
الموته الاولى چانت على الچفين
ليليه گام تموت بفراگ احسين
شح حيلها گد ماتون عـ العطشان
ماتت غريبه ام عون ماعدها اخوان
**
ليليه جانـــت تنعى فگد الاعزاز
تبچيـــهم وهليوم هيه التعتاز
يبچيها اخو ويمشي بنعشها جناز
يشيعها واحد رادت من الاحنان
ماتت غريبه ام عون ماعدها اخوان
***
زينب بهضمه ماتت معصبه الراس
بالگبر لاچن ضل يحز بيها احساس
يدفنها رادت كون اخوها العباس
هــوه الينزلها اللحـــد بالذرعان
ماتت غريبه ام عون ماعدها اخوان
****
وحشة گبـــرها ذكرتـــها بمصاب
وحشة هذاك الليل من دون احباب
النومه موش الاولى الها على تراب
بليل الخرايب نامــت على التربان
ماتت غريبه ام عون ماعدها اخوان
علي ثائر الربيعي
وفاة ام البنين… عليها السلام
+++++++++++
شباقي بيها روحي راحت من زمان
اي يملك الموت باكثر من مكان
مات ثلثيني قهر
وحصه ضلت عالنهر
اي يملك الموت باكثر من مكان
++++++++++
يفترض تسئلني المن عايشه الهذا الوكت
بالرغم راحت بنيني وبجفاهم مامتت
والضعن ذاك انتظاره يگطع انفاسي وعشت
عل عسا وهلبت يردلي حسين ولهذا اصبرت
ضل مچاني خالي عالعتبه وغريب
وما رجعلي اشگت بچيت اعله الغريب
باقي لدموعي اثر
وحصه ضلت عالنهر
اي يملك الموت باكث من مكان
+++++++++++
ورگِتي امن زمان طاحت من رجع خالي الضعن
ومن دخلنه حسين داره ريتها اعيوني انعمن
آه ياعباس صاحت زينب وگلبي انطعن
گلت مات حسين يعني ابلايه عباسه اظن
روحي طلعت من شفت ذيچ الضعون
استغربت زينب اجتني ابلايه لون
عدها ما باقي نظر
وحصه ضلت النهر
اي يملك الموت باكثر من مكان
+++++++++++
ياملك بس عندي چلمه لو جواب الها يصح
يمته روح حسين طلعت بالرمح لو بالذبح
ابيا جرح روحه اسحبتها وهوه كل جسمه جرح
وحرمه يم جسمه اسمعتها امترب الوجه السمح
تمسح ابخدينه من ذاك التراب
امنين چانت تاخذ الزهره خضاب
صدره لو من النحر
وحصّه ضلت عالنهر
اي يملك الموت باكثر من مكان
*
يالله ملك الموت عجل روحي اخذها بالعجل
من عِيوني اسحبها روحي تطلع وبيها بلـل
من دموعي الحرمه راحت عالهزيل ابلا اهل
وآني احس ابموتي غربه ابعازت الچف الكفل
غربه ليشيلونه نعشي اعله الچتوف
وزينب الصعدت هزل بين الصفوف
اثنينه ابعازت گمر
حصه ضلت عالنهر
اي ملك الموت باكثر من مكان
+++++++++++++
حته منكر لو سألني وين افنيتي العمر
ادري من يسمع جوابي عن سؤاله يعتذر
بالبدايه ابيت حيدر خادمه وبيها افتخر
وخاتمت عمري بواچي وابني من طين الگبر
حسين ابلل گبره من مجره الدموع
وحيل اشيل اچفوف والطم عالضلوع
او ليلي بونين وسهر
وحصه ضلت عالنهر
اي يملك الموت باكثر من مكان
+++++++++++
هسه كلهم بنتظاري ياملك متوقعه
تفتح اذراع الزچيه ياهله ام الاربعه
موكب وحراسه ولدي حته زينب طالعه
حته في يوم القيامه ام الخدر متگبعه
هسه كلهم بالگبر متجمعين
وعيني بين الزهره مابين الحسين
بيهم ايلمني القدر
وحصه ضلت عالنهر
اي يملك الموت باكثر من مكان
ثائر الربيعي
نزلة لوفاة ام البنين
روحي وامنيتها
واولادي اربعتها
بالجنه ونخدمج يم الاحسين
++++++++++
شلّج بالجواري آني وبنيني
نخدمچ يم حسن بس جربيني
شوفها بخدمتي اخلاصي وحنيني
اكنس مو بديه برمشه عيني
وتعرفينه انــتي
اخلاصي بخدمتي
وصلولچ حناني وعني تدرين
بالجنه ونخدمچ يم الاحسين
+++++++++
دنيه واخـره رب البريـه
خصصنه الرضاتچ يالزچيه
وجـابتني الچ هسّه المنيه
كل امنيتي مرضاتچ عليه
ام الاربعه اني
بيكم عالي شاني
اتمنـى ابجزاتچ لم الابنــين
بالجنه ونخدمچ يم الاحسين
++++++++
غايه كــل عباداتي وعملها
روحي بموتي يتحقق املها
مو قصدي الجنان اولا حللها
منچ نظـره تسوه الجنه كلها
التنظرله الزچيه
هاي اعظم هديه
يكفي بشوفتچ تتكحل العين
بالجنه ونخدمچ يم الاحسين
++++++++++
واطمئناني هيچ بروحي نازل
يمج يسكن الينطيله كافـل
تقبليني المهم وحسيني قابل
بچفوف ابني افرشلچ منازل
يالزهره وغلاتچ
چي بيهن رضاتچ
صيت ابني وچفوفه واصل الوين
بالجنه ونخدمچ يم الاحسين
+++++++++
عمري وناتج ايامي وثمرها
كلها ابغرفة الچف الشمرها
عالي ام الگمر اصبح قدرها
صارت ناسي تهديلي بنذرها
واليقرالي سوره
تتسهل اموره
اذا مو انتي شاني يعتلي منين
بالجنّه ونخدمچ يم الاحسين
ثائر الربيعي
الزهراء. عليها السلام
انتي حجه اعله الارض واهل السمه
نادي ابو صالح يعجّل مقدمه
++++++
انتي ناديله يبو صالح تعال
شيعتك لزيارتي رادت وصال
الهسه گبري مخفي عنهم لايُزال
ندري بس المهدي گبرچ عالِمه
+++++++++
وين يم حسين گبرچ اي مكان
انزورچ اعله المحتمل يم الحنان
بين قبري ومنبري روضة جنان
الهادي گال وگلنه يقصد فاطمه
+++++++++
ومره گالو بيت الاحزان الگبر
وين ما تبچين چنتي امن الكسر
يم. جفن مجروح وادموعچ حمر
نسكت ونسمع جواب الغانمه
++++++++
الماعرفني ايگول وين وگبري وين
جوه كل منبر ينوح اعله الحسين
بالمجالس فاتحه الچف اليمين
اجمع ادموع الجرت للمظلمه
++++++++++
اگلوبها الخدام بانيلي ضريح
وعطري موجود ابدمعها من يطيح
ابحرگه كلمن يبچي لحسين الذبيح
آنه اسجلها الچفوف اللاطمه
++++++++++
لكن انريد الحقيقه وخل نشوف
وبضريحچ ويه ابو صالح نطوف
يمته والشباچچ انمدها الچفوف
الگلبه ضامي ازيارتچ تروي الضمه
ثائر الربيعي
الزهراء. طلب حاجه
الشايل هم وجروح يخفيها
يعرف يگصد وين يحچيها
حاجات الينگضن
ابابچ يم الحسن
+++++++++
احلفچ بالنزف نحره
ردت يم الحسن نظره
اليه بعينچ الحمره
والباگو نظرها
وحده البينچ وبيني
لوعه ودمعي لحسيني
بداعت اخته اغيثيني
وبداعت خدرها
ادگ بابج يزهره وگلبي مكسور
اريدچ حاجتي تگضيها اليه
احلفج بالبگه اعله الغبره منحور
واحلفج بالمشت عنه سبيه
شانچ عالي وجيت هالليله
يم باچ مسكين ذب حيله
جمراتي الينطفن
ابابچ يم الحسن
++++++++
وانتي امي وتعنيتج
واعرف يمه حنيتج
سائل كاصد البيتج
تدگ بابج دمعتي
يمچ نوخت نوگي
الگبرچ يم حسن شوگي
تروه بحضرته اعروگي
وارد ماخذ طلبتي
امان الكل گلب يم ضلع مكسور
حنينه وماكو احن منج علينه
ولا نندل مزارچ نعتني انزور
وعله شباچچ انمدهن ادينه
ليطلبچ تنطين بچفوفه
الزاير والزهراء متعوفه
وعطرچ يملي الصحن
ابابچ يم الحسن
+++++++++
ضل عندي طلب ثاني
غير اهمومي واحزاني
خادم انحسب آني
وي اهل الخدامه
حته لو خلص عمري
نورچ يحضر الگبري
هله بالدمعته تجري
لحسين وخيامه
ولا عندي عمل بس دمعي لحسين
عساها تمحي لذنوب الثجيله
خلصت العمر من انسأل وين
واسمعچ گلتي حملك انه اشيله
صحتي المنكر عيف لحسابه
يمي الخادم صار إكـتابـه
بدمعاته الي جرن
ابابچ يم الحسن
++++++++++
بدنيه ضاعت اسنيني
تاخذني وتوديني
يالزهره انتي مشيني
وي اهل المجالس
انطيني بعد همه
شدي احزامي للخدمه
وحرگه الجرح ابو اليمه
ابچي وعندي واهس
حياته البتعد عنكم اترى اتضيع
عُمِر وابلا خدمتچ شنهي لذته
الهوى والدنيه بيه تشترتي اتبيع
الگلب من يبتعد عنكم شمرته
عميه الماتبچيچ يالزهره
اليبعد عنچ ضاع كل عمره
اسنينه بجرحچ رون
ابابچ يم الحسن
+++++++++
واسألچ يم حسن وينه
المحسن مافتح عينه
مثلچ چفه چاوينه
بالباب ولهيبه
من طحتي وگع يمچ
بلل شفته من دمچ
ظلمه ودخنه وايكلمچ
وينچ الحبيبه
ابأمان الله متت يايمه مفطوم
حليبچ مارواني وموتي ضامي
ولا زينب شفتها ومنها محروم
على اخواني ابلغهم سلامي
فگدي الظهره حسين يحنيله
ايعوضني العباس ايشد حيله
واچفوفه لو هون
ابابچ يم الحسن
ثائر الربيعي
چلمتها ابخجل تحچها وتردها
وين امي ادفنتها وجيت من عدها
+++++++++++
ليش امي ادفنتها وبسواد الليل
راجع منحني بالممشه بويه اتميل
لو فگد الزچيه اخذ ذاك الحيل
اجروحك چانت الزهره التضمدها
+++++++++++
شلون وللـگبر مـن نزلـتها هناك
اشحچيت اويه الزچيه وشحچت وياك
ابخد امي جرح احچيلي بويه ارجاك
شلون اعله الترب من وسدت خدها
+++++++++++
احچيلچ يزينب كونچ اتگدرين
ريتچ يمنه وكت الدفن وتسمعين
اشلون اعله امه صاح بصوت يُمه حسين
لازم بالچفن مايقبل ايهدها
++++++++++
مو ونه اسمعت من عدها صوت النوح
گلت يمكن الزهره ردت الها الروح
مدت ايدها ولحسين بيها اتلوح
ارجع زينبك ضلت الوحدها
+++++++++++
اصعبهن يزينب بيها گلبي انصاب
من شافوني فوگ امهم اهيل اتراب
اثنعش يايمه صاح حسين بويه حساب
اخذ من ثوبه وصله وعالچفن شدها
++++++++++
وي الحسن گعدو عالگبر يبچون
ماضلت الواحدهم ابوجها اعيون
نرد الدارنه يالحسن خويه شلون
زينب لو درت الله يساعدها
++++++++++
امي ماتردلي او لا گبر ينزار
لو دافنها بويه بوسط هاي الدار
نغفه اعله الگبر انه واخوتي زغار
الدار ابلايه ام شلون اشاهدها
ثائر الربيعي
استشهاد الزهراء ع
حسين نظرة عينك اتأذيني
من. تگلي اشلونچ اتبچيني
***
عيف الاشلونچ وشخبار الضلوع
وحده من اعيوني بس تجري الدموع
ويه كل نغزة ضلـع لجلك الـوع
فكري يم طف كربله ايوديني
+++++++++
شو تعال اتقرب احضني ابأديك
مالي حيل ارفعلي چف واحتويك
انته تبچي عليه وآنه ابچي عليك
وضعك الابچي دمه امخليني
+++++++++
لو گلت يايمه شبگيني بحنان
ارتوي يالزهره من حضنچ امان
وخايف الچم ضلعيچ اليحضني چان
احچي من ابعيد وتحاچيني
+++++++++
خايف اعله ضلوعي حالي هسه زين
شلون رض ذيچ الحوافر ياحسين
ضلوعك التتناثر الما ادري وين
اهناك تسمع مني صوت اونيني
++++++++
هناك انشدك ليش نايم عالتراب
گوم نام ابحضني ضلعي يُمه طاب
اگعد اترجاك ما اسمع جواب
وابقى الطم فوگ سطرة عيني
+++++++++
يُمه هذا اوياك خاتمته الكلام
لو شفت عباس بلغله السلام
گله امي الزهره توصي اعله الخيام
من تراعي زينب اتراعيني
ثائر الربيعي
استشهاد الزهراء ع
اشرح الأمي اعله گبرك ما اجيت احتج
يا ثگل بابي بعصرته كله جسمي ارتج
وانطفت عيني بسطرته بجفني سوت فج
يارسول الله
+++++++
اسوالف اعيون وحچيها
ينزل اجروح ابچيها
يارسول الله اعله گبرك
هاي آخر جيه اجيها
نار وصيحه يم الباب بدايات الجرح هايه
متحجبه بحجاب البيت بخماري مامغشايه
من الطارق اله ناديت جوابه بسطره ويايه
من ركل بابي لزمته وحاولت مارد
ويه لسعة سوط الاول چفي منه انهد
انه حرمه وهمه كثره ماعرفت شگد
يا رسول الله
+++++++++
مو الم ضلعي وعذابي
آنه كل همي بحجابي
امنين ما اندار احيرن
الحايط اخشن مدري بابي
خجل والخوف والدخان مريت بظرف قاسي
عالحايط اسند ايد بالاخره سترت راسي
مااگدر اصيحن آه احس انگطعت انفاسي
روحي تطلع وانه اردها محسن ابّالي
انه ام تعرف حناني والولد غالي
مختنگ مثلي عرفته حاله من حالي
يارسول الله
+++++++++
لسعه لبچفي سببها
الباب صار احمر خشبها
النار كل ماجاها تعله
ياكل بثوبي لهبها
لا عندي مساحه وكون يگدر عالركض جدمي
انحلت واعيوني عالبسمار بده تسلل بجسمي
فوگه اتنگط ادموعي وبده يتلون ابدمي
من وصل مگفاي احسها انشلت ايديه
وسوطه مافكني بقساوه ينزل اعليه
بوحده من سطراته وگعت مني ترجيه
يارسول الله
++++++++++
من شفت ماعندي چاره
خطرت ابالي العباره
كل صبح تسألني زينب
اشگد بعد محسن صياره
جنيني الاغله من روحي الكل الشوفته متاني
فز من طگت اضلوعي صاح وصوته اذاني
اودعچ وانه ماشفتچ سلميلي عله اخواني
صارت الوگعه سويه انه ووليدي
السوط عن محسن احاول اشگف بايدي
ميت ومد ايده رايد يشبگ بجيدي
يارسول الله
++++++++
غمضتها اعيوني فتره
فتّحت عيني وانظره
علي مچتوف وعليه
نظرته مليانه عبره
خلو عن ابن عمي اصيح بكل حرف ذبحه
لو اكشف لربي الراس ادعي بجفني وبجرحه
آمر عبده ردلي انوب تولاتي بچعب رمحه
والحسن وحسين اجوني منه يحموني
فوگي وگعو من ضربهم اكثر اذوني
و زينب هنا يمه صاحت ضربو امتوني
يا رسول الله
++++++++++
صعبه ليام العشتها
والليالي المانمتها
كل نفس اشتمه يلچم
ضلعي وال آه احبستها
اون بخفيه بفراشي عن حيدر اظم صوتي
جيتك اكشفلك همومي من شفته گرب موتي
افتحلي الگبر بويه وگلي للگبر فوتي
تبقى آثاري اعله گبرك وآني راح امشي
مابقت چم شعره منه امن البچي رمشي
جسمي ناحل مايتعبه اليحمل ابنعشي
يا رسول الله
ثائر الربيعي
استشهاد الرسول ص
وداع الحسين ع والعقيله للرسول ص
يُمه حسين أخذني الجدي ويا
گلّه اشلون اودعك زينب اهنا
زينب خلها بعدين
وابقى يمي يحسين
+++++++++
يم الحسن منظر شفت اتمنه ماشايفته
لوداعه جدي من رحت اذيته من ودعته
من شافنه ادخلنه سوه وحسين لازم اخته
صوت الهله ابعبره طلع والحسره چن خانگته
عله فراش المنيه والنبي گام
هله براعي المصيبه وام الاخيام
شيقصد خيمتي وين
وابقى يمي يحسين
++++++++++
خليني گلّي الوحّدي روحي انتي زينب لِمّي
من شافني بعبره اطلعت وبدمعي يعثر جدمي
يتوسل حسين النبي خليها زينب يمي
مو انت گتلي من قبل هيه شريچة همي
هذا آخر طلب منك يمولاي
نتوادع سوه خل زينب اوياي
ناده لا تروحين
وابقى يمي يحسين
+++++++++++
مو مثل الاول والدچ متغيرات اوضاعه
لو شايفه حسين شكثر اذّه الرسول اوداعه
چانت بدايتها بنظر يبچون ضلوا ساعه
مو نحره هالمره اشعجب جدي يقبل اضلاعه
كلساع ويبلـل شّفّته ابماي
حسيت ابعطش يافاطمه هواي
اسألچ وانتي تبچين
وابقى يمي يحسين
+++++++++
كافور گله وزعت كلمن وحصته الباچر
ماكترتلك حصّتك لاينكسرلك خاطر
لو حته اخليلك چفن يتمزك امن الحافر
لرماد سدرك والرمل كافور يوم العاشر
من يبقن ثلاث ايام الاوصال
غاطيها التراب وذاري الارمال
يمته احچي بصواوين
وابقى يمي يحسين
+++++++++
وتوادعوا تالي همس مارادو ايسمعوني
وثنينهم نظره بدمع يافاطمه اينظروني
لجفوفي اشرله النبي واشرله صوب امتوني
شاهد دمعتي حسين اجه يركض مسحلي اعيوني
اشيقصد ياهو يُمه الاسمه عباس
بس ذكر اسمه هيبه وترفع الراس
ويمته ينطي چفين
وابقى يمي يحسين
+++++++++
اكثر حچيهم بالرمز بس همه ليفهمونه
شال ايده شفته المصطفى وبحرگه صك اعيونه
ما ادري قصده ياجفن يايُمه ليسطرونه
للباب والحايط نظر بدموعه واصفر لونه
اسمع طاري إخوك وحايط وباب
ياهو المن اخوتي يرضع تراب
اولا ترحل تنادين
وابقى يمي يحسين
++++++++++++
ثائر الربيعي
استشهاد المام الحسن ع
عذابي ومماتي اعله جرحچ يهون
وغربتچ يزينب ابهذيچ الضعون
مثل هيچي ليله
اعله ظهر الهزيله
بهذيچ الضعون
++++++++
تودعين الحسن وانتي دمعتچ هسه مستوره
چبير اخوانچ واعرف بدمعتچ يختي معذوره
عزيزه انتي ونظرتي اعليچ اشوف بدمعتچ صوره
ماتبجيها يم حسين دمعتج هايه مجبوره
بحرگهن خيامچ يشغلچ يتيم
يلوذ بعباتچ وصياح الحريم
حسرتچ طويله
اعله ظهر الهزيله
بهذيچ الضعون
+++++++++
مو آخر طشت هذا يخيتي اتشاهده اعيونچ
ولا آخر چبد مفتوت تخطف شوفته لونچ
هسه اگبالي من تبچين واخوانچ يسكتونچ
تجيلچ فتره من تبچين سوط ايدگ عله امتونچ
اموت ابدياري وعيالي ابأمان
يزيتب غربتچ تحير الزمان
العظيمه العقيله
اعله ظهر الهزيله
بهذيچ الضعون
++++++++
قبل موتي اريد العين عليچ دموعي تهملها
يزينب دخلتچ للشام شده وياهو ليحلها
تذكريني وعليچ اتصيح هاي اخت الحسن كلها
ادموعچ لو اجه طرواي لثيابچ تبلـلها
زمن مايرجعه اليدفنه التراب
يريت انه يمچ بهذاك المصاب
عذابچ اشيله
اعله ظهر الهزيله
بهذيچ الضعون
++++++++
يصادفكم سنة وانتي وفاتي بناگه تحييها
اعله رمله تنظر اعيونچ بالنظره تعزيها
اشلون الحرمه تلطم عاد اذا مچتوفه ايديها
بين احسينچ وجسّام نظراتچ تديريها
يعين الله گلبچ چثيره الجروح
اعله اخوتها زينب تخلصيها نوح
ولا تبقى حيله
اعله ظهر الهزيله
بهذيچ الضعون
++++++++
يشيعوني الاهل باچر اخوتي الي يشيعوني
على طولي جسد والراس ملتحمه يدفنوني
اعليه ماتم ايعزون وادمهم ينوحوني
وتجيني انتي بظلام الليل اويه اخوانچ تزوروني
لچن يالعقيله اضل تالي وين
بعيده دفنتي اعله اخوي الحسين
طويله الرحيله
اعله ظهر الهزيله
بهذيچ الضعون
ثائر الربيعي
استشهاد الامام السجاد ع
ياهو بيهن يوجع اكثر
جرحي لو جرحك يالاكبر
طعنت خناجر كربله
لو جرح گيد السلسله
++++++++++
خلصت وجيتك بالاكبر وجرحي مرسوم اعله حالي
خويه وارتاحت عيوني من سهر ذيچ الليالي
من إخوتي اليبچي فوگي ويحني ظهره ما بقالي
صح متت راسي اعله جسمي ابگلبي متگطعه وصالي
خلي نحسبهن سويه
اعرض جروحك عليه
نبديـهـا بيك المسأله
لو جرح گيد السلسله
++++++++++
تذكر الخيمه يالاكبر بيها اجيت او ودعتني
بالمرض ثگلانه جدمي ونار اجتني حاوطتني
صارت العوچيه جمره والزمت بيها چوتني
وبين دخان المخيم عمتي تسحبني اجتني
هيه تسحبني بأديها
والسياط اتدگ عليها
من سوطه عمتي مايله
لو جرح گيد السلسله
++++++++
ما اقارن انته تحكم ياهو بينه الجرحه اكبر
انته هنيالك عفتها الغربه من جسمك توذر
لو الف سيف اعله نحري او لا حبل بچفوفي وانجر
آه يا صوت اليصيحه ابوجهي من اجدامي تعثر
زلمه مو سهله وتشوفه
اعياله واحبال بچفوفه
تبچي اعله حاله العايله
لو جرح گيد السلسله
++++++++++
عن رمح خاصرتك ابلغ لو الم حچي الشماته
اشينزف امن اعروگه گلي التنضرب يمه خواته
آه ماصاحن عليه حال اخوهـن عارفاتـه
امضيّگين ابگيده عنقي اتجرحه ابسط التفاته
مادرت عيني عليهن
ساكت واسمع بچيهن
يكتل سبي لمدلـله
لو جرح گيد السلسله
++++++++++
الشام آه الشام بيها ابگلبي چن محترگه خيمه
بكل نفس تطلع واردها روحي من گد الهظيمه
ديره ديره ايدخلونه بالحجر صابو يتيمه
واسمع ايصيحوني هذا عايش السلبوا حريمه
ياكُبر چلمه الحچوها
بيها روحي گطعوها
الكم دموعي الهامله
لو جرح گيد السلسله
++++++++++
اسنيني والفتره وراكم غربه يا خويه العشتها
الدمعه لحسين ومصابه ليله ابد مافارگتها
من اجت ساعة وفاتي الكربله اعيوني درتها
خويه يالاكبر چفوفك تحمل بنعشي ردتها
هسه اجيت واني يمك
ضمني ياخويه واضمك
واشبعني چلمة يا هله
لو جرح گيد السلسله
ثائر الربيعي
مولد الحبيب الحسين عليه السلام
عـندك يجـبريل اخبار
طاير فرح شنهي الصار
يافطرس ايگلي ارتاح
صار اليطييب لجناح
++++++++++++
مختبصه املاك السمه
والحور اشوف امحزمه
وحده لوحده بشّرت
مبروك جابت فاطمه
يابشر صحت المنولـد
تنـزلّـه افــواج اوتـرد
فرحانه تصعد والعجب
بيها عطر مـثل الورد
ادري بمحمد موجود
فهموني ياهو المولود
منهم ملك ابشر صاح
صار اليطييب لجناج
++++++++
ماتدري يافطرس شكو
صار الحسن عنده اخو
ايسمونه رحمه الواسعه
مو بس حلو كلش حلو
جبريل الف رحمه الهلك
اوگف الي وگفت ملك
توسطلي يم رب العرش
هالوگفه ما انساها الك
امنيتي بس هلجنحين
امسحهن بمهد حسين
يم مهدي ترجع لرواح
صار اليطييب لجناح
+++±++++
تدلل شـرايد بـعـد
وياي انزلك للـمهد
مايوگف گباله طلب
عد الله غالي هالولد
مايمنع الباري محب
لحسين اذا يگطع درب
بس انوي توصل حضرته
ما يوگـف گبالـه ذنـب
بالفعل رد جنحي المات
احسن امن اول قاطات
ابهزّت مهد كلشي طاح
صار اليطييب لجناح
+++++++++
لو بيدي ما اصعد ولن
ودي اتخذ مهده وطن
والمشكله من الهوى
اتغار اعله ابنها ام الحسن
گالتلي ارجع عـالأثـر
لهل السمه شع الخبر
احباب اله بآخر زمن
تعشگ حسين ابلا نظر
والثالث ابكل شعبان
كل شيعي تلگا فرحان
ميلاده عطره الفواح
صار اليطيـب لجناح
ثائر الربيعي
يا مولاتي يا ام عون
بيش ابچيلچ ام عون
ماتكفيچ الاعيون
++++++++
وين يتحصل دمع گــد مستواچ
وهاي ياعين الجروحچ تتســع
صار مألوف الدمع وبكل مكان
يختلف عن كلها رايــدلچ دمــع
دمعه سمره توگع ابلون الرمــاد
ودمعه خرسه الصوتچ المامنسمع
بچفي ولطمة الراس
اكبر منها لحساس
كون انزفلچ امتون
ماتكفيچ الاعيون
+++++++++++
ودمعه بيضه بلون نيتچ بالدعاء
ربي اقبل مني نحره المنگطع
ودمع تلزم بالرمش عن لاتطيح
الفوگ هزله ابلاوطاء بيا وضع
تشبگ بظهر الهزيله من تميل
من اقل هويه الضعيفه تندفع
الهاي ادموعي شتفيد
فزعت كافل اتريد
واخوانچ يسمعون
ماتكفيچ الاعيون
+++++++++
رايد ابگد مستحاتچ ابچي حيــل
الرادو ايچتفون اديها وتمتــنع
اب آه كافل والهزل مرت عليه
حسره وبصدر الگمر من تنجمع
الزينب انه اوّيني اوين الونين
الغــربتِچ ياقابلــيه التــتسع
ميته ابحرگ الاخيام
وميته بطبة الشام
والعنچ يسألون
ماتكفيچ الاعيون
+++++++++++
گد حجم منزلتچ ابگلب الحسين
هيچي كون ابعيني دمعه تنجمع
من علي الاكبر اعز خدرچ علــيه
وشقّت الجيب اغله من كسر الضلع
ماكو هظمه امن الطم ابخدي عليچ
مو غريبه ابچفي خدي منصــفع
الطم ما اكو آثار
ابراسي من الاحجار
بالشام اشيشمرون
ماتكفيچ الاعيون
++++++++++
لابقت دمعت اخو توگــع وراچ
لا ولد ناصبله ماتــم منفجــع
ونعشج الكزبر خجل من شيعوه
مستحي اعله امتون غربه ينرفع
وين يتحصل دمع گد مستواچ
وهاي ياعين الجروحچ تتــسع
انه ادموعي بس ماي
وانتي جروحج اهواي
ابگدهن انجرح كون
ماتكفيچ الاعيون
ثائر الربيعي
استشهاد السيده زينب ع
لسان حال اموالبنين
عندما اتى الناعي للمدينه ينعى العقيله
++++++++
يا اهل يثرب صوّت الناعي
ينعه المصيبه وهيج اوجاعي
گتله دريت حسين مذبوح
لا گلي ماتت ام الاجروح
+++++++++
اهلَ يثرب ناده زيدو بالبچي حيل
ماتت وماگال اسمها ابونّته ايطيل
ماتت الماكو النعشها والي ليشيل
انرضت بحچي الشماته مو سحگ خيل
إچبير الفضل ماچان بچتافي
قبلي ركض صوب النعي وحافي
ها يمه گتله الكربله تروح
لاگلي ماتت ام الاجروح
++++++++
الناعي عني ما سألهم هالمره امنين
من وگعت اگباله ناده ام الابنين
عن سبب موتتها انصحچ لا تسألين
شافت الشجره العليها راس الاحسين
عالشجره بعده دمه يتجاره
ماتت قهر من شافت آثاره
ها گتله يعني حسين مجروح
لا گلي ماتت ام الاجروح
++++++++++
وارجعت محتاره واحچي بدمع الاعيون
يالفضل روح الخوالك گلهم ام عون
ماتت وخلصت زلمنه الفاتحه شلون
بالنيابه عن اخوها خل ينوحون
عباس اجينه افتحنه ديوانه
الفوگ السنه مسدوده بيبانه
ليهسه عطره بمجلسه يفوح
لا گلي ماتت ام الاجروح
++++++++
سمعت ابعمتها سكنه وموتت الشام
كلهم التموا عليها اتحاچي ليتام
ماتت الجمعت شملنه بحرگ الاخيام
ابچو تستاهل بواچي وشدت احزام
كل حيله واليلطم عله اعيونه
الموت الغريبه لاتلومونه
الگال الجزع لحسيني مسموح
لا گلي ماتت ام الاجروح
+++++++++
آنه ام عباس اگلهم ام الامصاب
اوياكم ارد ابچي عليها اخت الاحباب
مثلي هم مرت عليها گعدت الباب
ياهو ليزوره گبرها بگاع الاجناب
وحشه وگبرها ياهو ليزوره
تعمه عليها اعيوني معذوره
الينشدني عينچ بالبچي تروح
لاگلي ماتت ام الاجروح
ثائر الربيعي
رأس السنه
بس انته گدامي
بيك افتتح عامي
يا صاحب العام
يبقى اكبر احلامي
بدمعاتي للضامي
والحرگ الاخيام
++++++++
الشيب اخذني والعمر
يركض ركض واني انتظر
چا يمته الاگيك
بلكت واگول ابهالسنه
موعد ظهورك چن دنه
احساس احس بيك
يكثر مثل شيبي الك شوگ الگلب يالمهدي
كل مره اگول ابهالسنه وتخلص سنه وتعدي
وبكربله عندي وعد راس السنه وياك ابدي
وزيارتي انويها
والشخصك اهديها
واترسها اختام
اوراقي واقلامي
دمعاتي للضامي
والحرگ الاخيام
*
واحچيها يم جود الگمر
غيرك منو يحني الظهر
مثلك اكو وين
يشهد علي عطر الصحن
ماعوفك وام الحسن
يامجلس حسين
تخنگنه لهموم اشكثر بس مجلسه يحيينه
الماعنده لوعه اولا جرح ضايع يعيش اسنينه
يالتنزل دموعك. حمر لروحه يا مهدينه
الكل عايش ابخيره
ماكو محب غيره
والباقي اوهام
هاجرهن اوهامي
بدمعاتي للضامي
والحرگ الاخيام
+++++++++
ما اگطع اوياك الامل
وادعيلك المهدي العجل
خل تحيه الارواح
يمته ونشوف المنتظر
يمسح على روس البشر
ويداوي الاجراح
هنياله والعنده بخت كحل اعيونه بشوفك
ويلزم سره ومن يوصله ينزل يقبل چفوفك
واتنصحه واتگله الذنب عوفه آنه الماعوفك
اهجرهن اهوائك
وصححهن اخطائك
وجروحي تلتام
تدري الگلب دامي
بدمعاتي للضامي
والحرگ الاخيام
++++++++
للزهره هم عندي عهد
كل ليله اذ مجلس عقد
بي حرگه وادموع
احضر اواسي فاطمه
چفي اعله صدري لاطمه
وابچيها لضلوع
بالدمعه اختم وابتدي عامي اعله حرگ اخيامه
يالزهره بيديچ السجل سجليني من خدامه
ماناسي جرح ام الخدر ولوعه ضياع ايتامه
راس السنه ابديها
واعيوني احاچيها
اشگد مرت ايام
وليهسه ما عامي
بدمعاتي للضامي
والحرگ الاخيام
+++++++
ثائر الربيعي
وفاة ام البنين
يا محله الدموع ابهل عزيه
للطيبه الوفيه
الكاتلها الحزن لبن الزچيه
++++++++
تستاهل بچي بس يختلف نوعه.
عن باقي المدامع
ماتت والنعش يبچي اعله تشييعه
هلبت غالي راجع
عله چتف الغرب يا وسفه مرفوعه
وتسمعها المسامع
ريتك يابو فاضل
انت النعشي شايل
وتحفرلي گبر بالغاضريه
++++++++
احچي وما سمعني اليحفر ابگبري
بس طلبه اخيره
مثل الناده حط ابني عله صدري
دفنوني بحصيره
خجلانه لان مامنحني ظهري
ولضلوعي كسيره
لا مسطوره عيني
اولا واگع جنيني
خدي بيها اثر لطمت اديه
++++++++
چلمه بالگبر من التقي اويه حسين
شوف اعيوني ذني
ذبلت والليالي ما اغمض عين
كونك راضي عني
اگضي انهاري ابني اگبور الك من طين
وتسمع ناسي وني
سئلوني ونينچ
للاربع بنينچ
واجوبهم عله حسين الاذيه
+++++++
واشلون ابو فاضل يلطم الٱمه
واچفوفه گطيعه
يرفع بالزنود وبالگلب هظمه
ويركض للشريعه
هلبت لو يردله چفه وايلطمه
بصدره للوديعه
للماتت وحدها
لا ضل والي عدها
مِن غمض جفنها بالمنيه
+++++++++
لا تقصد حوائج بالبچي اعليها
ابچي اعله المصيبه
لبگلبگ حوائج هيه تگضيها
وتعرفها الحبيبه
خل اتمِن عليك ابدمعه تبچيها
للراحت غريبه
الزينب والكفلها
ما صارت مثلها
جرح ام البنين ابهل قضيه
ثائر الربيعي
وفاة ام. البنين ع
رد يبن حذلم لعد طف الحسين
واصعد اعله التلّه وانعه ام البنين
++++++++++
رد يناعي وتعرف ابروحي اشتريد
مو بنيني مطلبي حسين الوحيد
ايلوح فوگ التله گبره مـن بـعـيد
لا تعيد اجروحه واسمع مني زين
++++++++++++
نادي بس عالراس لا تشبچها اديك
امن الحصيره ايلملم ضلوعه ويجيك
يوگف ويوگع ترى ويزحف عليك
يذكر الصاحتله سلبوني بأنين
+++++++++++
بالنيابه اگباله عني احچي بخـشوع
مو منيتي گله كتلتني الدمعوع
اتواكلت لضلوعك ابصدري الضلوع
مو عطش گلبي التفطر بالحنين
+++++++++
غمّضت عيني الك گد مابچيت
وسبّلوها البيها ترجعلي دعيت
من قميصك وصله لو ترجعلي ريت
والبصر يرجع وانوحك مرتيني
+++++++++
هاي اخير احچايه مـني بيها اگول
اعليك طلعت روحي والزهره البتول
ودي ما اموت العمر لجلك يطول
بين دمعي ولطمي وابني گبور طين
++++++++++
صد يناعي للنهر واحچيها حيل
ابعبرة المهظوم نادي اعله الكفيل
ماتت امك والنعش رايدله شيل
عن دفنها صاحو العباس وين
+++++++))))
ثائر الربيعي
ام. البنين ع.
عودة الضعن للمدينه
ردن خواتك بالضعن
فاتن عَلَي ماسلـمن
ملگانه صار الشده
ماوحده عرفت وحده
+++++++++
متعودات امن السبي لليركض ايلاگيهن
لو شايل ابأيده حجر لو جاي يشمت بيهن
من عندي خافن شاهدن كل حيلي اركض ليهن
سمعنها چلمة يا هله بس الهله اتبچيهن
يستغربن چلمة هله
شيحلها هاي المشكله
فات الضعن واتعده
ما وحده تعرف وحده
++++++++
وجه الضعن مابي گمر لا رايه راجع ظلمه
يُمه ينادنّي قبل ما وحده صاحت يُمه
مو همّه چذّبت النظر بس گلبي يصرخ همّه
وحدتهن امن المستحه بالبچي الصوت اتظمه
وحدتهن اتنوح ابستر
حته ابغيابك يالبدر
باقي خدرهن بعده
ما وحده عرفت وحده
++++++++
انه بحرارة لهفِتِي بـبروده اشو لاگوني
انه اعرفتهم عالعطر بس همه ماعرفوني
بيهم تعب من السفر لو گلت ماشافوني
صحتلها انه ام الگمر زينب يبعد اعيوني
اعليّه ابصعوبه تلتفت
واركض عليها اتقربت
كلمن دمعته بخده
ماوحده عرفت وحده
++++++++++
ام البنين انتي صدگ هاي الاجت گدامي
ومنين اجه الوجهچ شمس متعوب مثلي وضامي
هسه آنه مريت ابسبي ومحرگات اخيامي
اجدامج شبيها بعد مجروحه مثل اجدامي
متعثّرات ابيا درب
ومنين اجه الثوبچ ترب
حيلچ شجاله اتبده
ماوحده عرفت وحده
+++++++++++
يم الخدر گلبي احترگ مثل المخيم ناره
من اعتنيله ابكل صبح وحسين فارغ داره
دور المدينه ابكل درب من جدمي باقي آثاره
تعّبني يم عون النشد وحسين ادور اخباره
لو شفتي برسومي ضمه
يم گبر امچ فاطمه
الظهريه تخلص گعده
ماوحده عرفت وحده
+++++++++++
انسيها زينب حالتي لبگلبي كل حد ماله
احچيلي من راح الگمر وضع الاحسين وحاله
يتعثّر اگبالچ رجع ياهو الوگف تچاله
بعيونچ اعيونه بچت يمكن اجيت ابّاله
خوما ذكر اسمي وبچه
لمن عله سيفه انتچه
ضامي ودمع ماعنده
ماوحده عرفت وحده
ثائر الربيعي
استشهاد الزهراء ع
آنه الوصيت.قرآن.يم گبري اقرالي
نامتلك عين.متعوب.اگعد يالغالي
ياعلي زينب بچت
دورتني وما لگت
+++++++++++
هوّمت عينك عالگبر آنه اعرف ابحنيتك
بالطيف اجيتك واعتذر من نومتك صحيتك
اتركها جيتك للگبر البيها جنت وصيتك
وهسه اريدك ياعلي مسرع ترد البيتك
يم زينب روح .بالدار.وحشه محتاره
توصل للباب.واتعود.مدمع يتجاره
اهواي احسها اتعثرت
دورتني وما لگت
+++++++++++
بترابك ارجع ياعلي ثوبك تضل اتشمه
بي ريحة امها تطمئن لو شمته بالظلمه
دخلت الداري وناشدت وينج يفاطم يمه
اخوتها گعدو عالبچي ضمها الحسن وتظمه
گعدت عالباب.وحسين.يمها ايتانيني
يمه اترجعين.لو عاد.وياچ اخذيني
العشره وياچ انتهت
دورتني وما لگت
++++++++++
زينب زغيره اعله التعب شلون وتباري اخوتها
عينك عليها لو بچت انت امسح بدمعتها
توها يتيمه وكل مسه عنك تظم ونتها
تلگاها بثيابي تِشم تتنفس بريحتها
تكبر واتشوف.الام .اكثر من كلها
وحدها اشلون.للشام.شده وشيحلها
لو مشت واتيسرت
دورتني وما لگت
+++++++++
من غسلتني وكفّنت من اهمستلي ابأذني
انه علي يافاطمه من عدها ادري اشتعني
يابعد فاطم ياعلي احچيها ماتسمعني
وياك اميل اعله النعش من تمشي واتشيعني
صاحتني اوياچ.مدفون. اسمعها دموعك
من عندي امشيت.مكسور. گلبك وضلوعك
اتلگّتِك مدري شحچت
دورتني وما لگت
++++++++++
الله يعينك ياعلي صبرك اشد من امري
تگطع عليه ازيارتك مو سهله حيدر ادري
اشتاگ الك يا با الحسن مهظومه حته بگبري
اتمنه لو زاير يجي وبدمعه يجبر كسري
حسرة مجروح.كل يوم.تتمنه احبابي
تتعنه اتزور.وهواي.تسجد يم بابي
كلها تتمنه غدت
دورتني وما لگت
ثائر الربيعي
بمناسبه ذكرى الليال الفاطمية تم نشر اكثر من ٢٥٠قصيده على هذا الرابط
/channel/+Y3tikfAuCuZkYmVh
يرجى نشر رابط القناه ليصل الى الخدام
تجمع رقيه /هالمسيه/ ابين طفلين
ابن الزچيه/وابن اخيه/ابن الاحسين
كلمن ويروي الم
بين بسمار وسهم
ابن الاحسين
+++++++++++
اثنين بحجر طفله التقو تسمع حوار الي اندار
وتقاسمو دمعة حزن. كلمن حچه بروحه الصار
الگل منهم بنار انچوه چان الحديث شگد حار
احروره سهم گاطع نحر ومحروگ چان البسمار
وطفله والمها /لبجدمها/نار الاخيام
اتقبل اديهم/والحچيهم/تحمل الام
والدمع ينزل خيم
بين بسمار وسهم
+++++++++++
بالاقدم واول جرح گالو حديث النبديه
عبد الله للمحسن نده ياعمي جرحك احچيه
يالمحسن شكبرك چنت والموت اجاك اتحس بيه
موتك ذبح لو مختنگ لو منطلگ شنسميه
شفت الشهاده/ابلا ولاده/صارت شلون
دمك نزفته/وبعدك انته/امغمض اعيون
كلشي منك ماسلم
بين بسمار وسهم
+++++++++++++
آنه يعبد الله اسمعت طگتين وحده امن الباب
وبالثانيه آه اسمعت اعرفته ضلع امي انصاب
ليهسه عطره اخر نفس اشتميته ريحة عطاب
من اوگعت خدي انچوه حدري جمر مدري تراب
من ودعتها/ماشفتها/واسمعت صوت
تانيني يبني/اوياك اخذني/لحظه لتموت
روحي صارت بالعدم
بين بسمار وسهم
+++++++++++
زين انت يالمحسن متت ما باچي حيل اعله الماي
لا ذبلت اشفافك عطش لا باد حيلك بهداي
وبنظرة امك ماشفت. حيره والم بيها هواي
اشگد بللت شفتي دمع والدمعه ماتروي ضماي
لا شايف امك/من تضمك/وانت عطشان
واتحبب ايدك/بس وريدك/بي نبظ چان
عالوجه فگدي انرسم
بين بسمار وسهم
+++++++++++
عبد الله انت اتگمطت بس انه ابد ما ملفوف
ابكاروكي ما هزّوني ابد لا تعبت ابشيلي چفوف
اينادون امه الينولد مبروك هيج المعروف
ابوجه امي من صاح النذل بسطره خذت منها الشوف
حرموني منها/ومن حضنها/والامل مات
لا ناغه شفتي/اصبع اختي/ببتسامات
لا شفت عودي ابتسم
بين بسمار وسهم
++++++++++++++
لهنااا وصل حده او وگف كل الحچي امن الجهتين
لمن بچي ارقيه اعتله وزادت جرح عالجرحين
ختموها يا رب العجل للمهدي ياخذ ثارين
ضلع الزچيه المنكسر وجروح وضلوع حسين
ياربي عجّل/ثم عجل/واشفي كل روح
مهدينه يظهر/ليتأخر/گلبه مجروح
باقي دمعه يجري دم
بين بسمار وسهم
استشهاد الامام الحسن العسكري ع
احچيها بيني وبينك
يالمهدي الله ايعينك
من زغرك دموعك حمر
گدامك الام شكثر
+++++++++
يبني بـوداع المـنيه ودي اودعك
من تصيح اعليه يابويه اسمعك
ويه تنصيبك امام ويجري دمعك
الغربه تبدي يالولد وامك تضيعك
غير اليتيم ابراسه
تمسحله اهله وناسه
مو خايف ايگضي العمر
وگدامك الام اشكثر
++++++++++
راح اموت ابغربتك تبچي عليه
صعبه خمس اسنينك اشتحمل اذيه
وامك اكثر تصبح اعليها الرزيه
تبجي فگدي وغيبتك يبني سويه
كل مغربيه ابابك
يالمهدي طال اغيابك
فگد الابن للأُم جمر
وكدامك الام شكثر
++++++++++
السم يبو صالح يفتلي تالي چبدي
اتشيعوني يعني ما راح ابقى وحدي
إستذكروها ابدفنتي آلآمه جدي
عندي راس وعالترب وسدولي خدي
من ثوبي ما سلبوني
اهلي التسد اعيوني
مو بالحصيره بالگبر
وگدامك الام اشكثر
++++++++++
بكل مصيبه تبقى عدنه اكبر مصيبه
للسليب وحالت ابنيته السليبه
امنين ما انظر سبي الخدر عجيبه
تمشي وي الغربه زينبنه الغريبه
تگضيها تالي اسنينك
دم تجري لهلك عينك
يقرح جفون ادري الخدر
وگدامك الام اشكثر
+++++++++++
تصبح بسامره الي گبه ومناره
وكلها تتوافدلي ناسك للزياره
ابگلبي من هسه عله الزهره انكساره
وبالبقيع اگبور اهلنه بس حجاره
يمته وتمر اعليهم
تالي الزمن تبنيهم
بثار الزچيه والكسر
وگدامك الام اشكثر
+++++++++++
والزمان اتعيشه يا صاحب زمانك
ابلا امان وعايشه الناس ابأمانك
عن عيون احبابك امضيع مچانك
بغربتك تستغفر الهم ياحنانك
تسمعهم اليدعولك
بزيارتي ايصلولك
تدعي بحفظ راعي الامر
وگدامك الام اشكثر
ثائر الربيعي
زيارة مولاتي العقيله زينب.ع لقبر الزهراء ع
بعد عودتها من كربلاء
+++++++++++
يمه اجيت/اشكي همّي اعله الگبر
انسبيت/كلشي اخذ مني اليسر
كلشي راح ومابقالي بحالي حال
نزفت اويه دموعي چلمات الدلال
وانسبيت
++++++++++++
الباتت بگلبه الهظيمه نبرة الصوت التفسره
اتجاوزت عثرت مشيتي بالنفس صارتلي عثره
اتطول سالفتي الگصيره بين كلمه وكلمه حسره
تلسع الساني امن اسولف تطلع اويه حروفي جمره
حيلي راح/وشييب ارموشي القهر
صوتي صاح/وطولي لمحجب ظهر
آنه اول تالي يظهرلي خيال
طاحت اويه ادموعي چلمات الدلال
ونسبيت
+++++++++++++
صار مده ما وصلتچ لازرت گبر الزچيه
بالبقى مني اجيتچ كلشي غالي راح اليه
راحت ابطيحت اخوتي مني كلمة هاشميه
تكملت اسمي اليذكره لو غريبه لو سبيه
وانوليت/وليت الماعدها اخو
لو شكيت/امن الالم صاحو شكو
مابقه التنخينه ماضلت رجال
طاحت اويه ادموعي چلمات الدلال
وانسبيت
+++++++++++
شيلتچ لسّه اعله راسي امتربه يمچ جبتها
گاع رمله امن المخيم الوگعت احسين اركضتها
الخيل اجته وانه عالتل حيل لو بيه امنعتها
ابردتـي صوب المخيم كسرت اضلوعه اسمعتها
مادريت/اشباقي منه ومندفن
من اجيت/الگبره واسمعته يون
ضامي گلبي يختي زينب لايزال
طاحت اويه ادموعي جلمات الدلال
وانسبيت
++++++++++++
الجرحن گلبچ يزهره بيه مرن وحده وحده
اليرفع الصوت ويكلمچ مالگيت الي يرده
يالبديچ اشگفتي سوطه امچتفه انه شلون اصده
شوغت البسمار ارحم شدت احبالي انه شده
كون اموت/يفترض ذاك الوكت
بطولي افوت/وحدي عالناگه اصعدت
وين اخوتچ ادري يتبادر سؤال
طاحت اويه ادموعي جلمات الدلال
وانسبيت
++++++++++++
لسه رجفه امعاشرتني من درب ذاك المشيته
اعيون ماهي اعيون اهلنه والغريب الرافگيته
كلمة الخو ماتعبتي المنّه اسمع فارگيته
ايميل راسه برمحه صوبي ايضلل اعليه لگيته
مرني ليل/ يكثر ابعيني البچي
عالهزيل/ماكو تچوه وانتچي
اغفه گعده خلصت ذيچ الليال
طاحت اويه دموعي چلمات الدلال
وانسبيت
++++++++++++
جيتچ اتوچه اعله دمعي انه زينب يمه اخبرچ
روحي عطشانه محنّه
يمه ضميني اعله صدرچ
كسرت الخاطر جبتها رايده اطبگها اعله كسرچ
جيتچ ومابيه رجعه
يم حسن فتحيلي گبرچ
وين اروح/عندي بس موتي ستر
بالجروح/خلصت كل العمر
كلشي موجوده اعله. موده عني شال
طاحت اويه امتوني چلمات الدلال
ونسبيت
ثائر الربيعي
الاربعين
ياهله ابريحة اهلنه ياهله
يابو فاضل رد ضعنّه الكربله
+++++++++
ياهو بينه ايگوم يتلگه الضعن
حيل عندي وعامره اوصالي عسن
اوگف اعله التله واتلگه الاجن
اترس الدنيه هله امن استقبله
+++++++++
ملگه واينسيهن الام السفر
صح بصيره العين بس حيلي الگصر
والذراع البيها الاگيها انكسر
چف اخو لا ضل يلاگي امدلـله
++++++++
الحمد لله اعله السلامه مالگت
بيها روح وعدله زينبنه اجت
من بعيد اسمعته صوت اختك بچت
صوت. وينك من بعيد اترتله
++++++++++
اشلون ياعباس من اتمر عليك
والضعن عطشان يالكافل يجيك
خويه من تراب گبرك شيل اديك
منظر اسكينه صعب تتحمله
++++++++
ابني عبد الله فتح عينه وگعد
من بُعد يسمع دللو يالولد
لسه عطشان ودليله المابرد
بس حضن امه اليحل المسأله
+++++++
ماكو رايه ايلاگي اختنه لا علم
وين مگعدهن منو الينصب خيم
فوگ گبري تگعد الحره بالم
من دموع الحره گبري اتبلـله
ثائر الربيعي
مولاتي رقيه ع
غريبه هالحكايه سبيه امن السبايه
كتلها راس ابوها بخرابه شيعوها
+++++++++
ماتت ومشبوگه اديها ابلهـفه چانن شابكات
طابعه اشفافه اعله خدها امن العطش متفطرات
موت ملگه مدري فرگه اثنينهن متجمعات
اجفونها الماترضـه تنسد مـن شهـر ماطابگـات
روت قصه عجيبه محب كاتل حبيبه
على طشته لگوها بخرابه شيعوها
+++++++++++
ساعة ازمان وگضنّه اجهاز ميتهن سريع
ادموعهن كافي الغسلها التمن اعليها الجميع
ماكو تابوت اعله گدها فصلوا مهد الرضيع
گعده من صلّن عليها امصاب طفلتهن فضيع
صلاة اعله الاميره ابتكبيرة اسيره
بصعوبه ايكبروها بخرابه شيعوها
++++++++++++
دارن بصحن الخرابه شييعنها اويه العليل
يامتن مافوگه لچمه والنعش رايدله شيل
وحده تتچّه بالاخره بالمشي مابيها حيل
يا ونين اهل الخرابه ينسمع والدنيه ليل
واصعب من فگدها يدفنوها وحدها
غريبه الودعوها بخرابه شيعوها
++++++++++
اتكرر الصوت ابدفنها هم مثل دفن الذبيح
للگبر من نزل اخته يسمع ارقيه تصيح
لا توسدني اعله خدي ينلچم خدي جريح
بهيده بتراب التهيله فوگ اذني لايطيح
صعبه وانت تدري گبري بهذا عمري
اهلها الفارگوها بخرابه شيعوها
+++++++++++++
فاتحه ازغيره اعله گدهن فرشن الماتم تراب
بالدموع استقبلتهن سكنه هيه ام المصاب
تجرح انواعي حميده ناحت بطور العتاب
آه يرقيه ومصابچ عيدي صاحتها الرباب
الاكبر من ابنها تذكرها بحضنها
الخالي وعذبوها بخرابه شيعوها
++++++++++
ثائر الربيعي
طريق الشام
عله الناگه/احچي وي احبال اديه
عله الناگه/زينب آنـه الهاشميه
والله مو سهله انچتف
ياحبـل امـرك كـلف
++++++++
ناگه عن ناگه بعيده كلمن بهمه وجروحه
والدرب مايرضه يخلص كلمن ويحجي اويه روحه
طفله توگف عالهزيله الراس ابوها وماتلوحه
وانه اسولف وي چفوفي ابدمعتي سري ابوحه
عقيله آنه/المابچت حته اعله ابنها
عقيله آنه/انت المشيب جفنها
بخدري آنه الينحلف
ياحبل امـرك كـلف
++++++++
من صرت وامي الزچيه گماطي بسم الله تشده
آنه چم مره بحضنها وحيدر اعلينه تعده
يم حسن نادها هذا اگماطها لايبقى مده
خاف افز مختنگه منه للصبح تكضيها گعده
او تچتّفني/ياحبل هيچ بسهوله
او تچتّفني/وتِنزل ادموعي خجوله
يحچي دمعي الينذرف
ياحبل امـرك كـلف
++++++++
ابزغري عالممشه بهداوه علمتني امي الزچيه
هيچي لو عثره خفيفه صاحت اسم الله عليه
اخواني لو سمعو يجوني ركضه ويلزمون اديه
وهسه من الخيم للتل اعثر اكثر من رقيه
گمت وحدي/مابقى ايتچيلي والي
گمت وحدي/مني مستغرب خيالي
العثره لبعمري بألف
ياحبل امرك كلف
++++++++
ناگتي حنت عليه ياحبل اقره ابدمعها
يانياگ ابهيده امشن تلچم العثره ابطبعا
رفقاً بحال اليتامه وقدرن زينب وضعها
لا تگع بت الزچيه وينكسر خوفي ضلعها
اشيرچبها/والشمر يحدي الضعينه
اشيرچبها/سوطه ما طاح امن ادينه
اليوگع بحاله اتعرف
ياحبل امرك كلف
+++++++++
ياحبل اكبر جريمه انته للحره وخدرها
حته تكبيرة صلاتي يصعب اعليه امرهها
ودي ارفعها بدعائي ياحبل وانته التجرها
فارِگت تسبيحت امي اچفوفي من ساعة يسرها
دمع عيني/يكتب ابظهر الهزيله
دمع عيني/هذا تسبيح العقيله
كلشي صاير يختلف
ياحبل امرك كلف
++++++++
وبرجعتي للمدينه اشكي لمتون والمها
لو زرت گبر الزچيه اشكي كل جروحي يمها
بس اگلها يالزچيه بنتچ اتبدل اسمها
جيتچ واسمي الغريبه الخايفه الحرگو خيمها
ترى چفوفي/فارگتها اخواني كلهم
ترى چفوفي/بيها اثر تارك حبلهم
لا ولد ضل لا عرف
ياحبل امرك كلف
++++++++
ثائر الربيعي