مقدمة للعباس ع.. تجليبة
حلم زينب ع..
حلم زينب خذت بي يوسف الصفنة
جنه تكول هيج وساعة مو جنه
..............
حلم متناقض وما مش امر واضح
كلشي يعاكس الثاني الحلو مالح
لون بي يوسف يفكر سنة وسارح
ميفيده العلم لا تنفع الفطنة
...............
نهر ماشي لنهر وبظهره جم شفة
ترس ظهره عذب واتدنه اله بلهفة
شال الماي ماي وذبه من جفه
وكال شلون اضوكه ولا اله اتدنه
..............
كام الهه يرد صبخة تنطره خيام
وغيمة بدربه عرضت من زلم وسهام
الرادو اغتياله امنية ايتام
الشفاف مفطرة وتنطر خبر عنه
..............
ما جازي الشريعة النهر متشوفه
حضن شفاف الأيتام امسه بجفوفه
ناوي للخيم بس كطعو جروفه
وكع كلبه كبل وكعة وعد سكنة
..............
عله الشاطي وكع ماي عله جرف الماي
الهوايه صفه شوية وموش هواي
غشه العين السراب وكلشي رايح جاي
وبعد ماكو محال ولا جزء منه
.............
الخادم.. حسين الغالبي
مقدمة للعباس ع ..
مات الاحساس – وانفجعنه
من راح ابو الغيرة الشهم بالغاضرية
@ @ @ @ @ @ @ @ @
الليلة لـيـلة فـاجـعـة وليـلة مناحة
والصبر نفسه الصبر كاتم جراحه
عكب الأيام المضت لا ماكو راحة
والـزمن هـد بحزن والهم سلاحه
لا متنقاس – بيهه ليلة
كلش حزينة ومؤلمة هاي المسية
@ @ @ @ @ @ @ @ @ @
شاف أبو فاضل هالأطـفـال بحسرته
الماي ياعـمي سـمـع مـنـك طـلـبـتـه
وجهه داره عله النهر حضر جربته
كلهه بشري سكنة وانتظرت رجعته
رفعة الراس – يوفي وعده
من طبع ابو الغيرة الوفه لحد المنية
@ @ @ @ @ @ @ @ @ @
كـطـعـو جـفـوفـه غـدر والـرايـه طاحـت
وسهم صوب عـينه ويـلي ودمهه سالت
لن هوه عله الغبرة جسمه وهيه حارت
جن جـبـل شامخ تـصدع وأرضه مـالـت
خويه عباس – كلبي ناده
ما جانت ابالي اشوفنك رمية
@ @ @ @ @ @ @ @ @ @
جان ابو فاضل علينه والله خيـمة
وبـوجـوده القـافـلة كلهه سـليـمة
احنه من بعده بقينه بوسط هيمة
يا هضيمة عكب اخينه يا هـضيمة
صعبة يا ناس – فكد اخونه
عكبه تولتنه وسف كوم الردية
@ @ @ @ @ @ @ @ @ @ @
خـوة العـباس خـوة ماكـو مـنهـه
شكد حنين علينه مثل الأم لابنهه
فركته صعـبة علي خـيـم حـزنهه
وآنه بعـده تايهه وضايع وطنهه
عيونه حراس – عالظعينة
دار الزمن صرنه اسارى لال امية
@ @ @ @ @ @ @ @ @ @
الخادم.. حسين الغالبي
مقارنة بين عابس والحسين ع ..
بحر طويل..
اثنين جانو بالطفوف مجنين
عابس الأول والاستاذ الحسين
واحد هدومه يشك .. واحد بصدره يشك
ذوله جانو بالعشك متقدمين
.............................
العشك مو هين يتعب ومو ياهو اليجي يعشك
شحلاته لو كبر وياك واكثر يحله من يعتك
يهنيال الوكف بالطف وعلى ذاك العشك لحك
وشاف بعينه هل اثنين شسوو والميتصدك
لحك عله اثنين ما منهم بعد
ولا حصل الهم ابد كفؤ احد
ما مثلهم بالعشك .. همه بس عشكو صدك
ينضرب بيهم مثل للعالمين
.............................
عابس اول العشاك صارت قصته مشهورة
عاش ويه الحسين وشاف حسين بصوته والصورة
فكد عقله وصبح مجنون تلومه الناس معذورة
ما هامت مثل ما هام ولا عرفت شني شعوره
الما عرف طعم العشك يسال شكو
حسين خيمة وعابس بطبعه بدو
لون عنه يفترك .. يحرك بروحه حرك
كون دوم يشوفه ما تغمضله عين
.............................
وصلت مرحلة بعابس كدما حب ابو اليمة
وسط المعركة والجيش فرحان ويشك هدمه
يشوف شجم سهم جاله ويشاكف بالعشك سهمه
جن ورقة صبح صدره وكتب بيه السهم جلمة
ياهو مثل حسين من هاي الخلك
حكه عابس لو يجن وهدومه شك
حكه معذور وعلي .. بالعشك جي مبتلي
وفقط بلسانه تظل كلمة حسين
.............................
العابس عاشكه ويهواه هم يهواله فد واحد
لو مر ذكره بلسانه يوكف وكفة الجامد
حسين استاذ للعشاك الطف بهل حجي شاهد
وعلى السواه ابو اليمة لحسين العشك ساجد
سوالف العشاك خرت ساجدة
من ابو اليمة بعشك ربه ابتده
خضر بكلبه وكبر .. وانتشر هذا الخبر
والحديد شما صلب اصبح يلين
.............................
رفع راس العشك عالي جيف الحبه هم عالي
وصاح خيولهم يخيول تعاي واوكفي كبالي
تشوفين الصدر مفتوح دوسة صدري تحلالي
اريدن كلشي متخلين اريدنه صدر خالي
عابس انجن بيه هل شك الهدم
لا تلوموني عله صدري المنهشم
اليعشك الله ينعذر .. لون شك ليه الصدر
لا تفسرون شيسوي العاشكين
.............................
يحسين العفو منك ما نوصل للتحبه
خلنه نهيم بيك هواي ودلينه العشك دربه
عشاكك تقبلنه عليك الظلت بغربة
وشكة راسنه بتطبير عربون العشك حسبه
ريت بس عشاكك احنه ننحسب
وما نزل ونبقه نمشي بهالدرب
ريت نبقه بخدمتك .. يا حلاة محبتك
وخالد الحبك يظل طول السنين
.............................
الخادم.. حسين الغالبي
مقدمة للانصار..
انته بس اشر بديك كلشي التريده يجيك
انته بس امر يغالي المستحيل يمر عليك
................................
يا رحمة الله بهالارض / حبك علينه اصبح فرض
ولهل سبب جينالك
صحبة منيه وشد ظهر / تجايه لو شفنه خطر
بالموزمه اتعنالك
يقترب منك محال نوكف بوجهه جبال
يحلم يلوحك ثواني حاشه ما يدنه ليك
................................
لتحرك لسانك ابد / بس اشر بوكت الشدد
تلكانه يمك جينه
من اول إشاره كل محب / تلكا كطع نص الدرب
يفهم حبيبه بعينه
باصبعك اشر تعال تلكه مصطفه الرجال
كلهه متلهفه وتتاني ياهو منهم يفتديك
................................
شما بالك يفكر بأمر/ اطلب ولا تلكه عذر
يتنفذ اللي تريده
شما تطلب ومهما كلت / نقسم نجيبه لو ردت
جيش الشمر ويزيده
مطلبك يسهل اكيد لجدمك نوصل يزيد
ماكو شي يصعب يوالي يسهل من نسمي بيك
................................
ياهو التريده تأمره / انصارك انته مسطره
تنطر تخدمك كلهه
جي طعمه احلى من العسل / يتنفذ امرك بالعجل
بس انته يله تكلهه
أي امر عند النصير ترمش وجاهز يصير
ولو تأخر عنه لحظه تسامحه يظل يرتجيك
................................
انته سليمان العصر / واحدنه باذن المقتدر
اصف ابن برخيه
بل اكثر واكثر بعد / ومو قله سبعين العدد
يعني شردت مكظيه
وحته لو جنه قليل ماكو عدنه مستحيل
هم نطب لمملكتهم وبعرشهم نعتنيك
................................
الخادم.. حسين الغالبي
نزلة لمسلم ع.. فائزي
مسلم رسول الحسين ع
مسلم مفخرة // محد ينكره
ــــــــــــــــــــــــــــــــــــــــــــــــــــــــــــــــــــــ
يل تعترض خل نفترض عندك ادلة
قدمها واشكال الحصل خلي نحله
شنهو الغلط لو للحرب سيفه يسله
كتلي ابن عمه وجب هوه اليكله
خل انفسره // محد ينكره
ــــــــــــــــــــــــــــــــــــــــــــــــــــــــــــــــــــــ
يلي على مسلم تشب نار الملامة
من دزه الحسين امتثل امر الامامة
هوه رسوله الما يزل عن التزامه
واكبر علامة تنحسب هاي العلامة
كل هذا الجره // محد ينكره
ــــــــــــــــــــــــــــــــــــــــــــــــــــــــــــــــــــــ
معصوم ابن خير المله وضح كلمته
من هالخلق ياهو الكدر ينكر عصمته
اختار ابن عمه السفير انطا مهمته
خله الامر هوه الذي يديره بحكمته
اترك مظهره // محد ينكره
ــــــــــــــــــــــــــــــــــــــــــــــــــــــــــــــــــــــ
صار بخطر اعظم هدف قبل البداية
حسب حسابه وانتفض بس عنده غاية
كال الحك عله الكوفة من ايد البغايا
حته يحافظ عالوضع هاي الدراية
راد اياخره // محد ينكره
ــــــــــــــــــــــــــــــــــــــــــــــــــــــــــــــــــــــ
متازم امر الكوفة يتطلب وضعهه
يشهر حسامه عله الفتن ويرد بدعهه
ما يعني هذا الجلمة ابدا ما سمعهه
واكبر دليل الثورة هل جابت نفعهه
كلهه تذكره // محد ينكره
ــــــــــــــــــــــــــــــــــــــــــــــــــــــــــــــــــــــ
صح السبط انطا امر يمشي بمساره
لاجن اكيدة تبقه بالسر جم عبارة
بس مسلم اليعرفهه من ياخذ قراره
معناهه صارت ثورته حق بجدارة
بالحق انظره // محد ينكره
ــــــــــــــــــــــــــــــــــــــــــــــــــــــــــــــــــــــ
الخادم.. حسين الغالبي
اساسية لمسلم ع
على لحن (يشبه عمه عباس) باسم الكربلائي
مسلم رجف الكوفة – جانت ترعد جفوفه
غيمة وتحمل انذار
مطرت غضب قتاله – ضد زمرة النذالة
غيمة وتحمل انذار
ــــــــــــــــــــــــــــــــــــــــــــــــــــــــــــــــــــــ
مسلم من ابـن عـمه السبـط للكوفـة مـرسـال
كله اكشف وضع ذيج الكتب من يوفي بالكال
نـفـذ هـالأمـر لـمـن وصـل واسـتـخـبـر الحال
شاف أهـل الغـدر باعـو نفـسهم والوعـد زال
جمع ناسه واصحابه – والقه الحجة بخطابه
زاغت كل الابصار
ما واجهو مقاله – ضد زمرة النذالة
غيمة وتحمل انذار
ــــــــــــــــــــــــــــــــــــــــــــــــــــــــــــــــــــــ
خاف عله الحسين من الغدر دزاله طارش
لا تـقـدم عـله الكـوفـه ابـد وفـايـه ما مـش
وانه من بعـد هاللحظة اظن ما ابقه عايش
ابـليـس ابأهـل هـالـمـنطـقـة أذيـاله فـارش
ردتك سيدي ترجع – وانه اتاملك تقنع
دربك كله اخطار
وتوضح الرساله – ضد زمرة النذالة
غيمة وتحمل انذار
ــــــــــــــــــــــــــــــــــــــــــــــــــــــــــــــــــــــ
خطط للحرب جان الهدف تكبر حدوده
جهـز عـدته للمعـركة وحـضر جـنوده
معـروفه الزلم واحـدهـم ينفـذ وعـوده
خانو مسلم بنص الدرب والهم يسوده
تركوه هالبطل وحده – وجيش الطاغية ضده
حاطت بيه الاشرار
ما بيهم الوفاله – ضد زمرة النذالة
غيمة وتحمل انذار
ــــــــــــــــــــــــــــــــــــــــــــــــــــــــــــــــــــــ
هجمو عـالبطـل هجـمة حقـد جيش آل أمية
بي لا مـا رعــو حــرمـة الاهــه ولا نـبــيــه
ما هاب العدد من صلب اخو حامي الحمية
ولاهو استـسلم لطاغـي ابـد حـد المـنـيـة
واضح للخلق وصفه – حته اليجهله يعرفه
شب ابيت الاطهار
من اطهر السلاله – ضد زمرة النذالة
غيمة وتحمل انذار
ــــــــــــــــــــــــــــــــــــــــــــــــــــــــــــــــــــــ
كـلـبـه اتحـمـل هـوايـه بـعـد كافـي يـصـابـر
جرد سيـفـه بـيـمـيـنه ودخـل بـيـن العـساكر
جن صقر بسمه وهد عالفريسة وهوه طاير
كلمـن شافـه يصرخ منه يا رب انـتـه سـاتـر
بيوم الموزمة امجرب – جنه حيدرة من طب
بس بلايه انصار
مشهودة إله البساله – ضد زمرة النذالة
غيمة وتحمل انذار
ــــــــــــــــــــــــــــــــــــــــــــــــــــــــــــــــــــــ
ضربة سيـفـه لو عالهام اجـت كلش اليـمة
جيش باكـمله عـنده سهـل يصبح غـنـيـمـة
روس اهل البغي طشرهه بجفوفه الكريمة
الزلم هــيـهـات أبــد لا مـا تــرد مـنـه سـلـيـمـة
فارس يمتلك قدرة – قبضة سيفه جن صخرة
حطم بيهه كفار
اشجعهم بخصاله – ضد زمرة النذالة
غيمة وتحمل انذار
ــــــــــــــــــــــــــــــــــــــــــــــــــــــــــــــــــــــ
الخادم.. حسين الغالبي
نزلة لام البنين ع.. عكيلي
شجرة تقوى بدار الزهرة
ـــــــــــــــــــــــــــــــــــــــــــــــــــــــــــــــ
عــن أم العــبـاس أتـكــلـم
من أشـراف الوادم تـعـلم
بت خير انساب التتقدم
يم حيدر كبرت هل شجرة
ـــــــــــــــــــــــــــــــــــــــــــــــــــــــــــــــ
أربع أثمار الحملتهم
ايثار وعز من رضعتهم
هيه ليوم الطف ربتهم
رادتهم لأيام النصرة
ـــــــــــــــــــــــــــــــــــــــــــــــــــــــــــــــ
أخبركم شي يا أولادي
حسين السيد من ينادي
كل شي يكوله هو البادي
ربتهم يمشون بأمره
ـــــــــــــــــــــــــــــــــــــــــــــــــــــــــــــــ
شكد تحمل ايمان وتقوى
للنسوان تمثل قدوة
أربع أولاد انطت فدوة
واتمنت لو تملك عشرة
ـــــــــــــــــــــــــــــــــــــــــــــــــــــــــــــــ
رب الكون شكد منطيهه
راد يجازيهه يعليهه
ياهو اليكدر يوصل ليهه
ما رادت جاه ولا شهرة
ـــــــــــــــــــــــــــــــــــــــــــــــــــــــــــــــ
كل شي تريده عليهه تقبل
بلا تأخير بسرعه اتحصل
اقره الحمد وهيه تسهل
باب مراد لكل الفقرة
ـــــــــــــــــــــــــــــــــــــــــــــــــــــــــــــــ
الخادم .. حسين الغالبي
اساسية لام البنين ع
خنكة هوه هذا المسه // من اصعب الليالي
واصعب واشد نفسه الوفه // يفكد الليلة غالي
مشبوحة / هالانظار – محزونة / عالاقدار
ــــــــــــــــــــــــــــــــــــــــــــــــــــــــــــــــــــــ
دنيا خنكة بلا هوه / وصاير اظلم كل ضوه
هلت انجوم السمه وحزنانة
وخايف الليلة الصبر / خاف ما يلكه كبر
لو يموت من الحزن دفانه
كلهه غدت متاثرة // تتنطر العلامة
تتمنه يلفيهه الاجل // وام الوفه بسلامة
متعلمة / هالايثار – قدوتهه/ ام الاقمار
ــــــــــــــــــــــــــــــــــــــــــــــــــــــــــــــــــــــ
كرب الليلة الوعد / وانتهى وكت السعد
حانت اللحظة التمر جتالة
الكلب ما رحمته / وبسهم جن صابته
لازم يودعهه وبيا حالة
متيتم الليلة الوفه // لو ودع الحبيبة
ليهه المنية اكبلت // منهه خلص نصيبه
وبذاته/ تشب نار – دمعاته / عله الصار
ــــــــــــــــــــــــــــــــــــــــــــــــــــــــــــــــــــــ
عايش بظلهه قبل / ربته مثل الطفل
بالخلك ظل يرتفع مقداره
نشرته بين المله / وانطت اروع امثله
كل مثال ايعجب اليختاره
نذكرمن اشنترك اذا // سولفنه هالمسية
يا موقف ويا واقعة // سوتهن الوفية
يا مكثر/ هالاخبار – كل واحد/ اله اسرار
ــــــــــــــــــــــــــــــــــــــــــــــــــــــــــــــــــــــ
دخلت لبيت الولي / لنهه نادت يا علي
بعد بسمي فدوة لتسميني
عيوني ما يتحملن / شوفة حسين وحسن
تطيح دمعة منهم اتبجيني
اسمي اسم امهم لجن // حاشه اسد بعدهه
واتمنه اصبح خادمة // واتشرف بولدهه
تدريهه / يكرار – مشروعة / هالاعذار
ــــــــــــــــــــــــــــــــــــــــــــــــــــــــــــــــــــــ
موقف الطف العجب / خالد او وحده انحسب
للشمس اربع بدور انطتهم
قدمت اربع درر / للحسين بكل فخر
وعكست الاية وعليه وصتهم
صارت منار لهل بشر // ما الهه أي شبيهه
كل النسه تفخر لون // تتباهه مرة بيهه
من عدهه / نبع صار – بيهه كل / وفه مار
ــــــــــــــــــــــــــــــــــــــــــــــــــــــــــــــــــــــ
الخادم.. حسين الغالبي
نزلة للعليلة..
مقارنة بين صبر أيوب وصبر العليلة ع
صبري صبر أيوب لكن حالتي امر
..........
ابتلى الباري نبيه وضاك طعم اللوعة
وترست الونة دليله ونة ما مسموعة
تبجي يم راسه حزينة العايلة ومفجوعة
وصبره جان بكاع روحه بذرته مزروعة
ما حمل هم لمصابه عالالم صبر
..........
انه طفلة وهم عليلة لاجن أصعب حالي
الحبايب كلهه راحت داري اصبح خالي
جسمي وسط الدار باقي وروحي يم الوالي
والليالي عليه كلفة والحزن يبرالي
ماتت احلام الطفولة والقهر كبر
..........
جان صابر عالبلاء وربه بس جدامه
رفع ايده للدعاء اتحققت احلامه
الله فرج عن نبيه وجازه صبر ايامه
رجع ماله وأهله كلهم وانتهت آلامه
مستجابة الدعوة منه وبالفرج ظفر
..........
صحت يا ربي دخيلك مسني ضر الفركة
بلكت يرد الحسين وبلكت يصح ملكه
صوت ونة ودمعة ابعث صوت حايط الكه
انه اول طفلة يطلع شيبي من الحركة
شيبت وانه زغيرة وعيني بالاثر
..........
يا إلهي عليك اقسم بالحسين وشيبه
ترده إليه وكون سالم اني اريد تجيبه
كلبي يلجمني عليه وجنه حس بمصيبة
ما ذكر عنده عليلة وطولاهه الغيبة
لهل سبب كلبي تنبأ والدي بخطر
..........
ماكو اي طارش وصلني شح علي مرساله
كلت هاي السمه مرايه خل اشوف أحواله
بعين كلبي باوعتله مكطعات اوصاله
والمكان البيه اغفه سحكته الخيالة
بطيف موت ويه الحبايب ناظري عثر
..........
الخادم.. حسين الغالبي
اساسية للعليلة ع.. نصاري
على لحن (الدنيا ما ترحم) باسم الكربلائي
حسرة بكلبهه تروح لكربله ظلت
ياخذهه وياه ابوهه فاطمة اتمنت
رادت تبقه كل حين.. ويه الوالد حسين
فاطمة اتمنت
..............
عليلة وخالية الدار من اهلهه
لون يرجع ابوهه هذا املهه
ما تكدر عله فراكه كتلهه
تعاتب هالزمان اللي خذلهه
للطف ما أخذهه ولا حملهه
شلون الموت ما جاهه وحملهه
ما رادت تظل يتيمة ولا تعيش بهم
واحزان الفراك عليهه تكثر وتلتم
تبجي وتدمع العين.. ويه الوالد حسين
فاطمة اتمنت
..............
تون وتنتظر ما وصلت أخبار
ما عرفت شنو البيهم جره وصار
كلبهه آيس وباقي مشتعل نار
وحيدة بعد اهلهه وموحشة الدار
من بعدو عليهه بحكم الأقدار
كل لحظة تشوفن الهم آثار
عافوهه بالدار وحيدة بدمعة تتسله
حته الرضيع التنطره صابته النبلة
ماكو بس الونين.. ويه الوالد حسين
فاطمة اتمنت
..............
تكول من الزغر عني الفرح غاب
وأعظم من مصابي ذاك المصاب
ذبحو كل هلي وما ظلت احباب
كل جثة رمية فوك التراب
تصرخ شنهي ذنبي وشنهي الأسباب
يا ويل العده من يوم الحساب
يا ربي أدعوك ابد لا ترحم بحاله
كلمن تعده عله طه وحاربو اله
جازي هالملاعين.. ويه الوالد حسين
فاطمة اتمنت
..............
طفلة وفاكدة الوالد زغيرة
من جانت تعيش بجاله أميرة
كل صبح ومسه تشتم عبيره
بحاله عرفت وعرفت مصيره
كل همهه تجي ويه المسيرة
تقبل حته لو صارت اسيرة
متعلقة يا ناس بابوهه وما أظن تصبر
تبقه بلياه حزينة صعبة ما تكدر
الله هوه اليعين.. ويه الوالد حسين
فاطمة اتمنت
..............
كاللهه ادزلج انه مرسال
لكن دمعه كبل الطفلة ينهال
ظلت بالأمل بس الوعد طال
هم الفركة صاير كد الجبال
شكد تنزل دموع وتشرح الحال
صاحت يمته اخلص همي ينزال
كلما يمر يوم يزيد المدمع وانحب
مني المنية يربي يا وقت تقرب
كلهم عني ماشين.. ويه الوالد حسين
فاطمة اتمنت
..............
الخادم.. حسين الغالبي
اساسية للعليلة..
على لحن (سامحيني) باسم الكربلائي
غطت غيوم المآسي // بيت الحسين
والحزن ناصب خيامه // ومطرت اونين
تبجي الجروح بحرارة عله العليله
وعاجز السان الصبر ينحب دليله
هالمسية – هالمسية
ــــــــــــــــــــــــــــــــــــــــــــــــــــــــــــــــــــــ
نـيــة الـوالـد يـسـافــر وي عــيـالــه
يـتـرك الطـفـلة وحـيـدة ودمعه ساله
تـبقه بس هـيه ويه هـمهه والله حالة
تدري ماشي بلايه رجعة شد رحاله
انـولـدت الحـسـرة بكـلبهه بارتحاله
تـحـمـل مـفـارك ابـوهـه اسـتـحالـة
نادت بحركه يغالي // بويه فدوة
خلي عبد الله اخويه // يمي سلوة
طفلة وتفارك ابوهه والله ليلة
وعاجز السان الصبر ينحب دليله
هالمسية – هالمسية
ــــــــــــــــــــــــــــــــــــــــــــــــــــــــــــــــــــــ
حدر الظعن وتشوفه وهوه صاعد
صعـبة الحـسين شيكلهه انه مارد
يـدري رايـح للمنية وبـيهه زاهـد
تكله ماظن بويه كلبي يبقه صامد
يـمكـن تـصبـر دليـلي من تعـاهـد
توصل هـناك وتخيـم ردلي واحد
انجوي بنار الرزية // وهذا حالي
مدري شيخلصهه صعبة // هالليالي
عرفت برجعة ظعنهم مستحيلة
وعاجز السان الصبر ينحب دليله
هالمسية – هالمسية
ــــــــــــــــــــــــــــــــــــــــــــــــــــــــــــــــــــــ
ركضت لعـمتهه زينب ولرقـية
رادت تودع اهـلهه بهـالمـسـيـة
تدري ساير هالظعن للغاضرية
تـكـلهـم ادري هالمسيـرة للمنية
انه اعاتب ماكو واحد حن عليه
يـبـقـه يمي مـن اونن عـالرزية
انه ما احمل اشوفه // خالي داري
لا ابويه ولا اخوتي // شيطفي ناري
حته لو ابجي الدهر كله قليلة
وعاجز السان الصبر ينحب دليله
هالمسية – هالمسية
ــــــــــــــــــــــــــــــــــــــــــــــــــــــــــــــــــــــ
راحو وخـلوني وحـدي بـس خيالي
طفلة مهضومة وزغيرة بلايه والي
وانه كـل ساعة اكـولـن هـسه اجالي
بلكي يسمع خل يجاوب عـن سؤالي
تـدري يحـسيـن بجروحي والجرالي
مـالـي بـس ربي اسـاله يـهـدي بـالـي
ابقه بس اصرخ واونن // وانه وحدي
بلا معين عله البواجي // منهو عندي
الله شاهد عالمصيبة ارد اشتكيله
وعاجز السان الصبر ينحب دليله
هالمسية – هالمسية
ــــــــــــــــــــــــــــــــــــــــــــــــــــــــــــــــــــــ
الخادم.. حسين الغالبي
مقدمة للعليلة.. مجرشة
يل عفتني – وفاركتني
بويه بغيابك يتيمة – وحشة فراكك أليمة
ــــــــــــــــــــــــــــــــــــــــــــــــــــــــــــــــــــــ
آنـه الـعـلـيـلـة والـمـرض يـابـويـه هـد كـل حـيـلـي
مـا نـام لــيـلـي بـس أون ونـهـاري أصـبـح لـيـلــي
راواني دهري شكد حزن وروحي بألم تشكيلي
وخـيـالي صـورلي صـور مـنهـن صحـت يـا ويـلـي
كلي عدي – واستعدي
لهاي المصيبة العظيمة – وحشة فراكك أليمة
ــــــــــــــــــــــــــــــــــــــــــــــــــــــــــــــــــــــ
من جنت أشوفـك يالولي دنيايه انسه شبـيـهه
وردة حياتي انته الجـنـت وبكل وكت اسـكـيهـه
متعوفني انطـيت الوعـد يل كلمتك توفيهه
ليش ارحلت لأرض الغرب هالسفرة شر تاليهه
عذبتني – واهجرتني
جنت الي يا بويه خيمة – وحشة فراكك أليمة
ــــــــــــــــــــــــــــــــــــــــــــــــــــــــــــــــــــــ
من ودعـتـنـي ودمعـت عـيـنـك عـرفـت بأمـرك
متردلي من عـني ارحلت جنهه المنية تـنطرك
شلون اتركتني وما ترد يا بويه عفية لصبرك
من شفـت دمعة طـفـلتـك تشكي الهجر وتخبرك
دمعة الهم – بخدي تلهم
تشرح آلام الهضيمة – وحشة فراكك أليمة
ــــــــــــــــــــــــــــــــــــــــــــــــــــــــــــــــــــــ
ون الـدلــيــل لـفـركـتــك هدم جـبـل من صـبـري
بخدي حفر دمع الألم نهر الحزن ظل يجري
ما خلص لأجلك بجي والليل أطـبكـه بـفجـري
نار الحـنـيـن لشـوفـتـك بكليبي ظلت تـسـري
هذا حالي – ها يوالي
مأتم لروحي أقيمه – وحشة فراكك أليمة
ــــــــــــــــــــــــــــــــــــــــــــــــــــــــــــــــــــــ
يـلي عـفـتـنـي بهـل وضع بـيـن الألم والحـسرة
حال الـعـلـيـلة بـلا ولـي يـمـتـه تـحـن وتـذكـره
كلي يبو اليـمه الكلـب وي هالشدد شـيـصـبـره
نفرض تحمل هالوكت بس طولت هالسفرة
ما تجيني – تقرهه عيني
داري دونك جنه هيمة – وحشة فراكك أليمة
ــــــــــــــــــــــــــــــــــــــــــــــــــــــــــــــــــــــ
الخادم.. حسين الغالبي
نزلة لخروج الظعن..
تتخلد / سفـرة هالظـعـينة
تتخلد / من أرض المدينة
ــــــــــــــــــــــــــــــــــــــــــــــــــــــــــــــــــــــ
حدر ظـعـن الحـسين كاصد للمـنـية
لن شاف بخطر صار دين الله ونبيه
رادو بذل الأرواح بأرض الغاضرية
هـمهـم يـبـقه الاسلام ويعـم البـرية
دين الله / بهل ايد الأمينة
ــــــــــــــــــــــــــــــــــــــــــــــــــــــــــــــــــــــ
خيرة هالخلك جاي وي هاي المسيرة
منهـم كل شخص جان يـنعـد بعـشيرة
مـو عـاديـة هالناس عـالـوادم أمـيـرة
عـتـرة طـه والكـون بالاصبـع تـديـره
والخالق / فضلهم علينه
ــــــــــــــــــــــــــــــــــــــــــــــــــــــــــــــــــــــ
وعـدو رب الأكوان ما خلفـو وعـدهم
عافو كـل العـزاز عافـو كـل أهـلهـم
يعني فوك الأرواح انطو كلشي عدهم
هـاي الدنـيـا والله كـلـهـه فـدوة الهـم
مرخوصة / شوية شما نطينه
ــــــــــــــــــــــــــــــــــــــــــــــــــــــــــــــــــــــ
واحـدهـم بـالايـمان وبـعــزمـه يـقـاتــل
متعني عله هالموت وأصبح دمه سايل
مـا رادو جــزه ولا رادو أي مــقــابـــل
بس عدهم هدف كون ما يحكمنه باطل
من عدهم / ثابت هذا بينه
ــــــــــــــــــــــــــــــــــــــــــــــــــــــــــــــــــــــ
ثـورتهـم بالأزمان خالـد محـتـواهه
واللي يحارب الجور كدامه لكاهه
أعـظـم ثـورة لليوم لا ماكـو سواهه
سر هـذا الخـلـد جان الله مـبـتـغـاهه
ما ننسه / لا وشما بقينه
ــــــــــــــــــــــــــــــــــــــــــــــــــــــــــــــــــــــ
جـمعـو بين الاثـنـيـن ايمان وبسالة
قـدوة للـيـتـبعـون خـط رب الجـلالة
وقـدوة للـيـضـدون أتـباع الضـلالـة
لهل لحظة يعيشون هاي أكبر دلالة
ينطونه / لو احنه انتخينه
ــــــــــــــــــــــــــــــــــــــــــــــــــــــــــــــــــــــ
مو للشـيـعـة بـس لا للعـالم منارة
ضربو أروع أمثال ثبتت وبجدارة
صارو رمـز الايثار للحرية اشارة
لو تـتـبعهـم الناس يلكون البشارة
خل تفرح / كل روح الحزينة
ــــــــــــــــــــــــــــــــــــــــــــــــــــــــــــــــــــــ
الخادم.. حسين الغالبي
اساسية لخروج الظعن.. هجري
هالمسية – حزن ومواجع
والبرية – تهمي المدامع
عالذكرى هاي بكل وكت تبقه حزينة
ــــــــــــــــــــــــــــــــــــــــــــــــــــــــــــــــــــــ
ظعن أهل بيت النبوة حضر أغراض السفر
كاصد لطـف كربلاء وهـذا مـكـتـوب القـدر
تركو الطفلة العـليلة وكلب هالطفلة انكسر
عنهه راحو ودعـوهه وكلمن بموته ابتشر
ظعن الاحباب – للطف مسيره
من عكبهم – ما تبقه ديرة
رحلة منية وفاجعة من المدينة
ــــــــــــــــــــــــــــــــــــــــــــــــــــــــــــــــــــــ
هالمسيرة أفـضل مسيرة ظـلت بمـر الزمن
قـافـلة طهـر وطهارة والهـدف جـنة عـدن
تركت الدنية بكبرهه اتحضرت لجل المحن
أرخصت دمهه الشريف ورادت تزيل الفتن
اسمى غاية – راحو لجلهه
والمنايا – اتعنو الهه
غايتهم يزول الظلم تخلص سنينه
ــــــــــــــــــــــــــــــــــــــــــــــــــــــــــــــــــــــ
هالظعـن شعلة وتضوي للبشر درب النصر
تـنـقـله مـن المـذلة بـساحة العـز يـسـتـقـر
تعـلـمه درس التـوكل والعـقـيـدة والصـبـر
جم فـئـة جانـت قـليلة والعـدو مـنهـه يفـر
هذا كاله – الله بكتابه
والينصره – يجزي حسابه
هوه الجعل ال النبي خيمة علينه
ــــــــــــــــــــــــــــــــــــــــــــــــــــــــــــــــــــــ
ساير الظعن بهمومه وماكو للرجعة أمل
لاجن الأمر اليصبره لأمر بارينه امـتـثـل
يعني كل اللي يشوفه كل هم بدربه حصل
كله عين الله تنظره وأمره للباري انتـقـل
هذا مكتوب – يمتحنه ربه
وهذا معناه – ربه يحبه
خصه الله من بين المله وهوه اليعينه
ــــــــــــــــــــــــــــــــــــــــــــــــــــــــــــــــــــــ
للحـرب يدري مسيـره لاجـن بكـلبه ألـم
جايـب وياه البنيـن وجايـب وياه الحـرم
كال الحسين بصلابه قتل الرجال انحسم
والحرم تصبح سبايا والطـفـل لا ما سلم
كلهه ضحت – انطت دماهه
هيه فازت – خسرت عداهه
والله للايتام البقت تحرسهه عينه
ــــــــــــــــــــــــــــــــــــــــــــــــــــــــــــــــــــــ
الخادم.. حسين الغالبي
مقدمة للعباس ع .. موشح
كلبي يسأل عالوعد اصبح طويل
نـنطـرك يـبـن الصميدة يا كفـيـل
@ @ @ @ @ @ @ @ @ @ @
يـا كـفــيــل الـعــايـلـة مــن الـديــار
من العطش صاير كلب هالطفلة نار
اتـنخـتـك يـابا الـفـضل كلتـلهه صار
والعـطـش خويه تـره مـاذيـهه حيل
@ @ @ @ @ @ @ @ @ @
اتوجهت صوب النهر طالب الماي
كلت ما أتأخـر آنه بـسـرعة جـاي
لا يجـي للـمـشـرعـة واحـد وراي
آنه وحدي أسـكـيكـم وماكو بـديـل
@ @ @ @ @ @ @ @ @ @
طـول عـلينه غـيـابـك يـالعـضـيـد
العـيـن تـربي أي علامة من بعـيد
ما نريد الماي بس شخصك نريد
نقارن بـشـوفك عطشنه مستحيل
@ @ @ @ @ @ @ @ @ @
ماكو منك صوت رد عله السؤال
ولا كلت يلي حجـيـت انـتـه تعـال
هـمـوم كلبي صارت بكـد الجـبال
وبغـيابك ماكو بس حزن وعـويل
@ @ @ @ @ @ @ @ @
اذن لازم صار مكـروه وبطـيـت
ما تحمل كلبي وبسرعة اجـيـت
ومن لكيتك ما تحملت وبـجـيـت
ابالي هالمنظـر ابـد ماله مـثـيـل
@ @ @ @ @ @ @ @ @ @
والـفـرات اسـتحـه مـن دم الجـفــوف
وصاح يا ريت آنه معمي وما أشوف
ولا شفت ذاك الجره بوادي الطفـوف
يـبـجـي ظــل والدمعة من عنده تسيل
@ @ @ @ @ @ @ @ @ @
ريـتـه كلبي ما سأل عـن الوعـود
شنهي من دونك طعم هذا الوجود
يـلي جـنـت لـزيـنـب الأخ الـودود
الـنـهار بـغـيـبـتـك يا خـويـه لـيـل
@ @ @ @ @ @ @ @ @ @ @
الخادم .. حسين الغالبي
نزلة للانصار..
أهل الفخر.. رسمو صور.. بالغاضرية
....................
من ثار الحسين ورفض يبايع
هيهات ابد ما ذل مله المسامع
ابظهره وكفت صحبته تدافع
واحدهه جاي وعن عقيدة قانع
جاي وعرف.. ثورة شرف.. لابن الزجية
....................
هالتقوى هالايمان وهالعقيدة
هاي الصفات لصحبته الرشيدة
واضح كلامه والوصف نعيده
هالصحبة ماكو منهه ابد وحيدة
يعرفهه اذن.. وقت المحن.. تبقه قوية
....................
من سمعو بصوت السبط نخاهم
كلشي اليملكونه بقه وراهم
همه الشهادة بالحرب مناهم
لكل الخلك أصبح درس فداهم
معنى الدرس.. ننطي النفس.. للحق هدية
....................
فعلا اجه وقته وثبت مقاله
من ابتده طف النصر قتاله
ثلة قليلة وتنتصر محالة
لاجنهه اجت واشتدت البسالة
ثبتو أمر.. الينتصر.. أهل القضية
....................
كل واحد أصبح جيش إذا نعده
حب الحسين بقوته يمده
يكلبهه أرض الغاضرية وحده
وروس الغدر يشمرهه كومة بعده
يعني شحصل.. لو بالمثل.. هجمو سوية
....................
رسمو صور للتضحية عظيمة
والله بدربهم ماكو اي هزيمة
حته المنية تعتبر غنيمة
وعليهم الباري الفضل يديمه
ظلت صفة.. أهل الوفه.. الهم هوية
....................
الخادم.. حسين الغالبي
اساسية للانصار .. فائزي
الحسين مدرسة العشق
انه طالب : مدرسة ابن الزجية
هالمواهب : بالعشك فاضت عليه
عاشك وعندي فنون / ناجح بدرس الجنون
................................
فاتح حبيبي مدرسة وجن صوته ناده
الرايد يطب يدرس عشك محتاج ارادة
شما كثرت الام المحب تالي سعادة
وانه أدخلت هالمدرسة وخذت الشهادة
علمتني : افدي عمري لخاطر الدين
خرجتني : عاشك لمولاي الحسين
لاجله اشلع هالعيون / ناجح بدرس الجنون
................................
صارت مواهب عندي من هاي الدراسة
واتثبت بكلبي الامر شكله واساسه
حسين اليحبه ويعشكه يرفعله راسه
جي هوه ماخذ بالعشك دور الرياسة
هوه وانه : أستاذ والطالب يحبه
للأمانة : صعبة من يمشي عله دربه
وابد ما ظنه يهون / ناجح بدرس الجنون
................................
عابس انه ومضرب مثل صرت عله اللسان
كلما يشوفون الخلق أي شخص ولهان
محبوبي ما ظنه بشر ما جنه انسان
جنيت بحسين شكثر شككت قمصان
مو بديه : حيه كلبي ومات عقلي
للمنية : الناس تبجي وانه اهلي
ساير بدرب المنون / ناجح بدرس الجنون
................................
محبوبي لاجله اتشككت قمصاني مرة
بس هوه عاشك خالقه وشككله صدره
انطه الحبيب أكثر بعد شكاله نحره
لا ما يسويهه محب عفيه عله صبره
وين الكه : بهل برايا حسين ثاني
مثل عشكه : لربه ماكو حيراني
بنفسه يفدي والبنون / ناجح بدرس الجنون
................................
عشكت زليخا يوسف وذابل وجهها
تالي ادركت هوه طلع عاشك مثلها
نادت يمحبوب الاحب هلت دمعها
ارزق زليخا محبتك طهر كلبها
يوسفي جان : بس وسيلة الوصلتني
لرب الاكوان : لدربك انته اللي جبتني
عالعباد انته الحنون / ناجح بدرس الجنون
................................
ربي الحسين لكل عشك خليته اية
يدلي اليتيه حضرتك من البرايه
غاية الغاية لكلشي ترجع للبداية
يعني انته جنت المنطلق وانته النهاية
بكربلاءه : حسين خلد هالقواعد
وبنداءه : جان يعرف ياهو رايد
استبشرت انه ويه جون / ناجح بدرس الجنون
................................
الخادم.. حسين الغالبي
نزلة لمسلم ع.. هجري
قبضة جفوف السفير // خلت الباطل يحير
ــــــــــــــــــــــــــــــــــــــــــــــــــــــــــــــــــــــ
مباركة هاي الجفـوف وبـيـهه سـر مـن الأزل
الله خالـقـهـه خـصـوصا والـوحي بـيـهه نـزل
الـهـه دور مــن الالـه اتــهــدم أركـان الـزلــل
جفوف مسلم هيه هايه جنهه جف خير العمل
الهه ما صح النظير // خلت الباطل يحير
ــــــــــــــــــــــــــــــــــــــــــــــــــــــــــــــــــــــ
لزم بـيـهـه السيف وأكـبـل والصعب عنده سهل
اتقدم وما هاب كثرة وسيفه من غـمـده يسل
العـده هـابـت مـشـيـتـه والكـلـب مـنه وجـل
عرفت أكبل ياهو ليهه بضربة السيف التشل
وعله ايده هالمصير // خلت الباطل يحير
ــــــــــــــــــــــــــــــــــــــــــــــــــــــــــــــــــــــ
الشجاعة مو جديدة هيه عـنده من المهد
والوكت هسه وكتهه مسلم لحربه استعـد
شافـته كوم الردية والرعـب بـيهه انـولد
المنية بيده صارت واقترب يوم الوعـد
يرسل الشر للسعير // خلت الباطل يحير
ــــــــــــــــــــــــــــــــــــــــــــــــــــــــــــــــــــــ
مـو عـجـيـبـة هالـقـضـيـة هـوه مـن بـيـت الـنـبي
يعــني واجـب من صـفـاتـه ما يـطـخ راسـه وأبـي
ما يـفــرق عـمــر عـدهــم لا جـبــيــر ولا صـبــي
كل شخص ما يزل منهم عن درب لو يمشي بي
واثق الخطوة يصير // خلت الباطل يحير
ــــــــــــــــــــــــــــــــــــــــــــــــــــــــــــــــــــــ
وابتده مسلم قتاله وحصد روس أهل الكفر
كام راس بـراس يـردم والسـبـع مـنـه يـفـر
جـنه مـو وحـده يـقـاتـل ما يـهـم لهـل أمـر
عـفيه كلبه والشجاعة والمهم عنده النصر
حته ما راد النصير // خلت الباطل يحير
ــــــــــــــــــــــــــــــــــــــــــــــــــــــــــــــــــــــ
عـنـده ايمان وعـقـيـدة بالقـضية وانتصر
صار قربان الخليقة وفضله عم كل البشر
شاهد الكوفه عـليه وخـلـدت ذيـج الصور
لهل زمن موجود ذكره وهذا واضح بالأثر
يبقه خالد هالأمير // خلت الباطل يحير
ــــــــــــــــــــــــــــــــــــــــــــــــــــــــــــــــــــــ
الخادم.. حسين الغالبي
اساسية لمسلم ع..
الرحلة الكاملة لمسلم ع
على لحن (قررت رحيلك) باسم الكربلائي
خله تضحياته – خاتمة حياته
خالد ونذكره – من بعد مماته
ــــــــــــــــــــــــــــــــــــــــــــــــــــــــــــــــــــــ
يدري أبو اليمة الخيانة بهاي الأمة
راد مـبعـوثه يرسله وكـشـف اسمه
صبح من حـسين مرسل ابـن عـمه
مسلم الشخص الوحيد لهـل مهـمة
وهذا اختياره – حصله بجدارة
السبط يأمره – هذا افتخاره
ــــــــــــــــــــــــــــــــــــــــــــــــــــــــــــــــــــــ
ما رفـض أمر السبط ابـن الزجـية
كله روحي أنطيهه الك والله هدية
انته مصباح الهدى لهاي الـبـرية
مو خـسارة بدربك تصير المـنيـة
طاع أمر امامه – وهاي أجل علامة
ما طلبله أجره – رايد الكرامة
ــــــــــــــــــــــــــــــــــــــــــــــــــــــــــــــــــــــ
تـرك أهله وبنته بايمان وصلابة
رغـم ما يعـرف تأذو مـن غـيابـه
يـدري بالله يعـلم ويجـزي حسابه
هالصفة يملكهه بس أهل النجابة
نيته سليمة – وهالصفة عظيمة
غيرته تجبره – يرفض الظليمة
ــــــــــــــــــــــــــــــــــــــــــــــــــــــــــــــــــــــ
بكل عـزم متعـني للكوفة وأهلهه
وابتده بذيج المهمة بس وصلهه
بجفه يم أهل الغدر روحه حملهه
وعـن كـتـبهه للسبط هوه سألهه
ياهو بعده ثابت – الرد اجاله خافت
خل يجي وننصره – وخصمه بيهه شامت
ــــــــــــــــــــــــــــــــــــــــــــــــــــــــــــــــــــــ
بايعو عالنصرة أصحاب الخيانة
وكالو لمـسـلم تـوصل هالأمانـة
نـنطـرك يـبـن الزجـية يا حمانه
تقدم عله الكوفة يل ترفع لوانه
يعرف النوايا – تنكلب هالاية
والوعد تنكره – كلهه بالنهاية
ــــــــــــــــــــــــــــــــــــــــــــــــــــــــــــــــــــــ
ذيج الوعـود لأبـو اليمه نطـوهه
ما مضت فترة طويلة وأخلفوهه
والنوايا السـيـئة لا ما بـيـنـوهه
بابن عـمه غـدرو وهـل ثبتوهه
ما وفو وعدهم – الخيانة عدهم
قبل بيهه خبرة – ولا يغر عددهم
ــــــــــــــــــــــــــــــــــــــــــــــــــــــــــــــــــــــ
الأمـل جـان الأمــل جـيــشــه يـعــده
وكـلمـن الكاتب امامه يـوفـي وعـده
وسفة مبعوث الحسين ويبقه وحده
بلا نصيـر ابـيـن الأشـرار التـضـده
فقدو الارادة – خانو القيادة
كلمن انطه عذره – وخسرو الشهادة
ــــــــــــــــــــــــــــــــــــــــــــــــــــــــــــــــــــــ
حـاطـتـه كـوم الردية والـوضـيـعـة
ونادتـه يا خارجي عـن الـشـريـعـة
يخـضع الهه رادته الظـالم يـطـيعـه
اتفاجئت من موقفه وذيج الصنيعة
وحده بس يصابر – حرك الضماير
سيفه من يشهره – تنذكرله باجر
ــــــــــــــــــــــــــــــــــــــــــــــــــــــــــــــــــــــ
شهـر سـيـفه ما قـبـل هاي المـذلة
رفـض كل أمـر البغـي وشـما يكـله
يـدري بي ذاك النذل شـرطه يـخـله
قصده لو انطه الوعد خصمه يشله
يعرف النذالة – طبع هالحثالة
ما مثلهه زمرة – هاي أشر سلالة
ــــــــــــــــــــــــــــــــــــــــــــــــــــــــــــــــــــــ
العطش ويلي العطش قوته نهاهه
ونفسه عرفت بالأجل هسه اجاهه
لأن طبع الظـالم التـضعـف ولاهه
هايـه أطـباع العـده وهـذا مناهـه
الباطل بنظامه – يكره الشهامة
والخصم يغدره – ماكو اي سلامة
ــــــــــــــــــــــــــــــــــــــــــــــــــــــــــــــــــــــ
بذل كل قـوته ويظـل خالد جهاده
عنده موته بهالدرب أكبر سعادة
تحله بعـيـونه لون تدنه الشهادة
وصار حجة هوه من ربه لعباده
هالدرب يسلكه – وقدم اليملكه
والسبط يبشره – بالأجر يشركه
ــــــــــــــــــــــــــــــــــــــــــــــــــــــــــــــــــــــ
من دخل مسلم غصب قصر الامارة
مجـتـف بحـبـل الغـدر مـثل الأسارى
ظـن ابـن مـرجـانـه هـذا انـتـصـاره
كلهم اخـذو للسـطـح وأعـلن قـراره
ارمو هالمخادع – أرد اشوفه واكع
واليضد نحذره – بدمه يغدي ناكع
ــــــــــــــــــــــــــــــــــــــــــــــــــــــــــــــــــــــ
ويلي من سطح القصر طاح وتكسر
بــلا سـبــب وبــلا ذنــب الله أكـــبـر
لهل مصيبة بله ياهـو اللي ايتصبـر
الصخر كـلبه سـمـع بـيهـه وتـفـطـر
مو سهل مصابه – ويا حزن غيابه
تبقه بينه جمرة – وننحب عله بابه
ــــــــــــــــــــــــــــــــــــــــــــــــــــــــــــــــــــــ
الخـبر لمن وصل عـند الظـعـيـنـة
اتأثر حسين وبقـت روحه حزينة
كال مبعـوث الفخر بيه انـسـليـنه
جان أملنه نشوفه لو احنه اجينه
ضحه وانطه دمه – من أجل هالأمة
واحنه هل نشكره – ويبقه خالد اسمه
ــــــــــــــــــــــــــــــــــــــــــــــــــــــــــــــــــــــ
الخادم.. حسين الغالبي
مقدمة لمسلم ع.. عكيلي
انتظار حميدة ع
تنادين الوالي ارحم كـلـبي
لصوب الباب عيونج تربي
ــــــــــــــــــــــــــــــــــــــــــــــــــــــــــــ
عيونج ذبلانة من الحركة
يكتل حيل شعـور الفـركة
كـلـبـج يـم الـبـاب ودكـه
وبلكي الوالي يكلج كربي
ــــــــــــــــــــــــــــــــــــــــــــــــــــــــــــ
ما مش والي ولا من صوته
يـونس رد من بطـن الحوتة
ومـسـلم مـيـرد الا بـمـوتـه
بطـن الكوفة مخـرج ما بي
ــــــــــــــــــــــــــــــــــــــــــــــــــــــــــــ
يا مخرج من بطـن الكوفة
وادمهه عله الشر ملهوفة
شكد وعود انطت مخلوفة
ناده النصرة ومنهو يلبي
ــــــــــــــــــــــــــــــــــــــــــــــــــــــــــــ
ما لـبـو مـن نـاده عـلـيـهـم
للنصرة انـشـلـت رجلـيهـم
لا مـن نـخـوة خـيـر بـيـهـم
كلمن كال امشي انه بدربي
ــــــــــــــــــــــــــــــــــــــــــــــــــــــــــــ
ظل وحده بدربه بلا ناصر
يشد يا جرح البي ويكابر
هجر اطفاله وغدر الغادر
لريح الموت ينادي هـبي
ــــــــــــــــــــــــــــــــــــــــــــــــــــــــــــ
هـبـت ريح المـوت بـسـرعة
بسطح القصر وظهره تدفعه
الناس تـباوعـله ومقـتـنـعـه
طـاح وصـاح لأجـلــك ربــي
ــــــــــــــــــــــــــــــــــــــــــــــــــــــــــــ
الخادم.. حسين الغالبي
نزلة لام البنين ع.. ميمر
أم الـوفه ياهالناس تحمل قـضيـة
خدمة ابو اليمه حسين ابن الزجية
ــــــــــــــــــــــــــــــــــــــــــــــــــــــــــــــــــــــ
قسمتهه صارت وي علي وفرحانه
بـس دخـلت لبـيت الـولي حـزنانـة
كـالـتـله اسـمـي غـيـره وعـنـوانـه
اســم الزجـية فاطـمـة مـو آنـــــه
جان الوفـه والايثار عدهه سجية
ــــــــــــــــــــــــــــــــــــــــــــــــــــــــــــــــــــــ
حب الكلب ابن النبي والـزهـرة
خلت كلبهه لاجله اجمل حضرة
ظـلت تطوفه بكل وكت وتذكره
من عرفت اليجري عليه وامره
نذرتله كل الاولاد لاجله هـدية
ـــــــــــــــــــــــــــــــــــــــــــــــــــــــــــــــــــــ
ربــتهـم وخـلتهــم يطـيعـونـه
ويا سيدي لو رادوا يحاجونه
رادتهم بيوم الطف ينصرونه
هيهات ابد لا والله ميخـلونه
وهاي الثمار ادت دور بالغاضرية
ــــــــــــــــــــــــــــــــــــــــــــــــــــــــــــــــــــــ
ضحـو للحـسيـن النـفـس يـفـدوهـه
ذيـج العـهـود العـاهـدو يـوفـوهـه
ارض الطفوف بكل عزم هـزوهـه
افضل شهادة ويه السبط عرفوهه
لجل العقيدة الارواح تصبح ضحية
ــــــــــــــــــــــــــــــــــــــــــــــــــــــــــــــــــــــ
من جاب ابن حذلم خبرهم ليهه
كالـتله ولدي للشهادة انطـيهـه
انه انـشـدك كـلي بخـبر واليهه
وهذا الخبر يجرحهه ويأذيهـه
ما حزنت عله الاولاد ظلت وفية
ــــــــــــــــــــــــــــــــــــــــــــــــــــــــــــــــــــــ
الخادم.. حسين الغالبي
مقدمة لام البنين ع.. هجري
وصية ام البنين ع للعباس ع
يا كمرنه – ارد اخبرك
هالوصية – من تحين الواقعة
ــــــــــــــــــــــــــــــــــــــــــــــــــــــــــــــــــــــ
يبني دين الله الحنيف احتاجك انته واخوتـك
شبل حيدر انته اعـرفـك والمواقـف خبـرتـك
بيوم الطفوف انه اريدك نصرة الحق غايتـك
تنصر حسين الحبيب وتفـدي لجله مهـجـتـك
هذا واجب – هوه سيد
وانته بامره – وشيكلك تسمعه
ــــــــــــــــــــــــــــــــــــــــــــــــــــــــــــــــــــــ
حيدر الضمك لاخـيك وانتـه تدري من قـبل
رادك لطـف المصايـب وانته من حيدر شبل
انته عاهدته ووعدته وتوفي لازم يا نفـل
اتأدي دورك بالطفوف ومو مهم ميت عدل
هذا عهدك – يبقه دائم
للمنية – بالدم انته توقعه
ــــــــــــــــــــــــــــــــــــــــــــــــــــــــــــــــــــــ
يا كمر هاشم وصيتي تبقه لحـسين السـنـد
هوه اخوك ومن يعوزك توكف بيوم الشدد
مثل خـوة علي لطه لحـظة ما عـنه ابـتعــد
هالوعـد منك اريده وادري توفـيلي الوعـد
انه اريدك – من تنفذ
كل وصيتي – حق رباتي ترجعه
ــــــــــــــــــــــــــــــــــــــــــــــــــــــــــــــــــــــ
يمه لو كطعـو جفـوفـك فـدوة للغـالي اصبحـن
ولو سهـم بالعـيـن يـنبـت اثـبـت بهاي المحـن
انته مو أي شخص يبني كلبك من الله امتحـن
معـدنـك مر عالمواقـف هنه شخـصك وضحـن
كلهه قوتك – خلهه بيدك
تحمي اخيك – عنه كل شر تمنعه
ــــــــــــــــــــــــــــــــــــــــــــــــــــــــــــــــــــــ
يبني صير لزينب انته فيهه من شمس السبي
هـيـه مـن حــيـدر امـانـه امـخــدرة ال الـنـبـي
لا تخـليـهـه وحيدة وبـيـهـه يحـدي الناصـبـي
انـه ادريـك الـغــيــور الـمـا قــبـلـهـه يـالأبــي
يابو فاضل – انته كافل
كلنه نعرف – انته للعز منبعه
ــــــــــــــــــــــــــــــــــــــــــــــــــــــــــــــــــــــ
يبني راسي ارد ارفعه باجر بيوم الحشر
من تقـوم الناس كلهه خايفه من الـقـبـر
كلمـن باعـماله واكف ولجزاءه يـنـتـظـر
وانه قـرباني جفوفـك بيهن اتجازه الاجر
والزجية – من تكلي
وفه عباس - انه راسي ارفعه
ــــــــــــــــــــــــــــــــــــــــــــــــــــــــــــــــــــــ
الخادم .. حسين الغالبي
نزلة للعليلة ع
بويه اموت انه بغيابك والعمر خلص
..................
جنت اعيش انه بوجودك وانته خيمة عليه
والزغير شما يعاني يشتكي لواليه
كل شخص يفقدله غالي جرحه من ماضيه
اصبحت بعدك وحيدة وقوة لا ما بيه
وانه يجرحني مصابك والعمر خلص
..................
انه جنت اكثر عزيزة وكلبك شكد حبني
كلت اردلج يالحبيبة وظني متخيبني
شلون يتخيلها بالي انته التعذبني
تدري يحسين بمماتك ما ردت تحسبني
شلت اسمي من حسابك والعمر خلص
..................
ليش يابويه اتركتني تدري بيه اعليلة
لو ردت اشكي همومي ياهو عندي اشكيله
بويه خلي يمي كلبك انه اريد ارويله
كل جرح مر بغيابك كل هضم كل ليلة
جرحي وصلني لعتابك والعمر خلص
..................
دهري ظالم ما رحمني خله كلبي يعاني
هم زغيرة وهم عليلة وبالحزن خلاني
وهم يتيمة بلا حنانك منهو ظل يرعاني
اصبحت بالهم جبيرة وبس جرح راواني
جانت الجنة برحابك والعمر خلص
..................
ادري لو تكدر تجيني هذا لا ميفوتك
انه بفراشي عليلة وكلبي حن لصوتك
ما سمع منك علامة جنه حس بموتك
حته لو ميت اريدن هالكلب تابوتك
ارد اشم ريحة جنابك والعمر خلص
..................
رحل عن جسمي دليلي يبحث بكل هيمة
بلكي يلكاك ويكلك تارك انته يتيمة
اصبحت سلواهه دمعة وماتم الهه تقيمه
وتمتلي بهمهه سماهه والحزن جن غيمة
ابجي يا بويه عله بابك والعمر خلص
..................
الخادم.. حسين الغالبي
اساسية للعليلة..
شد الرحال الابـو وبـنيتـه خلاهـه
ما يرجع من السفر وفراكه اذاهه
نار نار تستعر – نار نار هالهجر
وبنيته خلاهه
ــــــــــــــــــــــــــــــــــــــــــــــــــــــــــــــــــــــ
بنية من بيت الرسالة الهه قصة
جانت ابحر السعادة عدهه حصة
لاجن اندار الزمن حصله فرصة
وعكب ايام السعد يمليهه غصة
رحلة مصيبة ابـتـدت من نيـة الوالـد
من كلهه بنتي الصبر عرفته ميعاود
مات مات كل صبر – نار نار هالهجر
وبنيته خلاهه
ــــــــــــــــــــــــــــــــــــــــــــــــــــــــــــــــــــــ
الظعن جهز اموره هالمسية
وانكتم امر السفر للغاضرية
راد الحسين الرحيل بلا اذية
ورايح بنيته تعـرفـه للمـنية
كالـتله لـو ما خـذتـنـي بـويـه وياكـم
خليلي اخويه الطفل ينسيني فركاكم
كال كال اعتذر – نار نار هالهجر
وبنيته خلاهه
ــــــــــــــــــــــــــــــــــــــــــــــــــــــــــــــــــــــ
ليلة الفـاركهه ابـوهه والله ليـلـة
هيه اذا يـصعـب امـرهه تشتكيله
وهـسه شتسوي اذا طـول رحيله
تظل خلية من الاهل دار العليلة
طفـلة وحيدة بقـت ما تحمـل فراكه
كل نبضة من الكلب تحسب للملاكه
وين وين يا كتر – نار نار هالهجر
وبنيته خلاهه
ــــــــــــــــــــــــــــــــــــــــــــــــــــــــــــــــــــــ
زرعـت الطفـلة صبرهه بـذرة بـذرة
ونطرت يعود التركهه وبيهه حسرة
هـيه ما تـدري الابـو بكليـبه جمـرة
هـذا حكـم الله بـعــباده وهــذا امـره
حـكـهه زغــيـرة عـمـر ومــدللـة جـانت
وهسه يتيمة اصبحت وبيا وضع صارت
صار صار هالامر – نار نار هالهجر
وبنيته خلاهه
ــــــــــــــــــــــــــــــــــــــــــــــــــــــــــــــــــــــ
ويـلي من رد الظعن ما رد الحسين
دورت عـيـن العـليلة شمال ويمـيـن
اتاكدت ماهو التنطره ودمعت العين
وجانت الحسرة بكلبهه تهد السنين
شنهي الحياة اصبحت من بعد ابو اليمة
جان الامل شوفـته وتحـضنه وتشـمـه
راح راح يندثر – نار نار هالهجر
وبنيته خلاهه
ــــــــــــــــــــــــــــــــــــــــــــــــــــــــــــــــــــــ
الخادم.. حسين الغالبي
مقدمة للعليلة.. بحر طويل
دمعة بنت أبو اليمة سهم صوب دليله بهم
مو طـبعه يصد عـنهه تحجي ويا ولا يهتم
ــــــــــــــــــــــــــــــــــــــــــــــــــــــــــــــــــــــ
على جلمة أنه حاضر عـودهه الطـلب يـسهل
مطـلب من بعـد مطـلب نـفـذهـن وأبـد ما مـل
عـزيزة عـنده هالطـفـلة ما راد بـوكـت تـنـذل
لجن حان الوداع اليوم دمع عـين العـليلة هل
وبدت رحلة عذاب الروح حزنهه بالكلب خيم
ــــــــــــــــــــــــــــــــــــــــــــــــــــــــــــــــــــــ
كالتله اخذني وياك لـتخـليـني أظـل وحدي
اذا أبقه وحـيـدة هـنا جـني مـيـتة وبلحدي
عكبكم مظـلمة الدنيا ولا سلوة بقت عندي
جرح فـركاكم شكبـره ما يبره ويظـل يدي
صفه بس الدمع بالدار وهمومي بدت تلتم
ــــــــــــــــــــــــــــــــــــــــــــــــــــــــــــــــــــــ
كالـتـله يـبـويـه اسـمع فـدوة لا تـفـاركـنـي
عـليلة وكلبي ما يحـمل لون انته تـودعـني
وردة وأذبـل بـلياك اذا شوفـك نـشـف مـني
ميمر الوكت دونك زماني أدري ميرحمني
غيابك ليلته وحشة وأنه بعـطرك أظل أشتم
ــــــــــــــــــــــــــــــــــــــــــــــــــــــــــــــــــــــ
من شاف الحسين الحال ودمعة بنته تتجاره
كـلـبـه لـدمـعـة الـطـفــلـة ون وبـانـت آثـاره
حار بأمـره والجلمة بـقـت بـلسانه محـتارة
اذا كـللهه ما أرجع يـدري تـرفـض أعـذاره
الله يعـينه عالموقـف فـقـد كل حـيله واتهدم
ــــــــــــــــــــــــــــــــــــــــــــــــــــــــــــــــــــــ
اذا كـلـبـه كـدر يـصـبـر شـيـصـبـر كـلـب بـنـتـه
تـتحـمل وداعه شلون تـنسه بـسـمته بـشـفـتـه
غصب عنهه صبح واقع متدري ولاهي حاسبته
والأصعب من هذيج وهاي المنية منهه ماخذته
أجـلهه اتـمـنـتـه يـقـرب فـراك الوالي ما يرحـم
ــــــــــــــــــــــــــــــــــــــــــــــــــــــــــــــــــــــ
الخادم.. حسين الغالبي
مقدمة للعليلة.. تجليبة
غفت من الهموم وصبحت بالهم
عليلة والصبر من عدهه يتعلم
ــــــــــــــــــــــــــــــــــــــــــــــــــــــــــــــــــــ
راحو كل اهلهه والظعن حدر
تكله وحشة من بعدك يبو الاكبر
عله فراك الولي مهمومة ما تكدر
لا يمهه ابوهه ولا اخو ولا عم
ــــــــــــــــــــــــــــــــــــــــــــــــــــــــــــــــــــ
مو عادة ابو اليمه يخليهه
وحيدة وظلت تناطر يرد ليهه
ياهو يظل يواسيهه ويسليهه
كل لحظة البدون حسين الف مأتم
ــــــــــــــــــــــــــــــــــــــــــــــــــــــــــــــــــــ
كل ليلة التمر عله الابو تنعه
زغيرة عله البواجي وهلت الدمعة
ميت كل امل يخبرهه بالرجعه
صعبه هوايه من هالطفله تتالم
ــــــــــــــــــــــــــــــــــــــــــــــــــــــــــــــــــــ
عليلة وخايفة والليل هم يعيل
سهم يرمي الكلب من يجبل الهه الليل
حته من الجبير الفركة تاخذ حيل
شلون البعده ريشه زغير ما ملتم
ــــــــــــــــــــــــــــــــــــــــــــــــــــــــــــــــــــ
تكول اللي حصل ما مر عله بالي
جنت كل ما اريده يحضر كبالي
بقه بس ذكرى هسه وساكن اخيالي
غدر بيه الزمن خلاني اتيتم
ــــــــــــــــــــــــــــــــــــــــــــــــــــــــــــــــــــ
الخادم.. حسين الغالبي
اساسية لخروج الظعن..
حج الحسين عليه السلام
حجة مختلفه / صارت بطفه
بقافلة متكونة من احباب كلبه
حسين كاصد كربله هالمرة كعبة
ـــــــــــــــــــــــــــــــــــــــــــــــــــــــــــــــــــــ
كلهه تدري الحج فريضة عاللي يتمكن
هيجي كال كتاب ربنا وماكو بي أي ظن
لكن حسين الغريب بحجته اعلن
راح البي لربي وادري بلا شرط مأمن
الظعن طالع / يدري ما راجع
بعمره تاكل يعني كل خطوة عله دربه
حسين كاصد كربله هالمرة كعبة
ـــــــــــــــــــــــــــــــــــــــــــــــــــــــــــــــــــــ
قافلة عشق الجلالة لله منواهه
حسين ماخذ كل عياله وطفلة خلاهه
قافلة فعلا عجيبة ومخفي معناهه
ليش حته اطفال رضع اخذت وياهه
عليهه مو واجب / منهو اليحاسب
تاخذ اليسال الحسبة ترده حسبة
حسين كاصد كربله هالمرة كعبة
ـــــــــــــــــــــــــــــــــــــــــــــــــــــــــــــــــــــ
الكعبة للحجاج مكصد كلهه تدريهه
حسين كاصد كربلاء ونيته ليهه
ناده لمن قربلهه وباوع عليهه
هيه هاي الكاع هيه موت اشم بيهه
بغاضريتنه / محله موتتنه
اليحب يموت من اجل اليحبه
حسين كاصد كربله هالمرة كعبة
ـــــــــــــــــــــــــــــــــــــــــــــــــــــــــــــــــــــ
الرايح يحج يلبس ابيض ثوب احرامه
حسين نفس الثوب ماخذ هوه وايتامه
اللون نفسه لغير غاية توضح ايامه
تالي لنه جفن غطه جدمه للهامة
بابيض الملبس / وحجته الاقدس
احرم ولبيك ناده وقبل ربه
حسين كاصد كربله هالمرة كعبة
ـــــــــــــــــــــــــــــــــــــــــــــــــــــــــــــــــــــ
الطواف عليك واجب لو تحج مرة
وطافت عله حسين ويلي خيولهم كثرة
ما كفاهه بس تطوفه داست بصدره
ولو سبع مرات اهون وصلت لظهره
هشمت ضلوعه / ونته مسموعة
صوت ونته يكول جنه لله لبه
حسين كاصد كربله هالمرة كعبة
ـــــــــــــــــــــــــــــــــــــــــــــــــــــــــــــــــــــ
بسبعة لازم كلمن يحج يرمي شيطانه
حسين بالسبعين يرمي يزيد واعوانه
فرق بين اليلعن الشر فقط بلسانه
وبين من واجهه بنفسه بقوة ايمانه
ذاك من جلمة / هذا من عزمه
ومن عزم هذا انبنت للدين قبة
حسين كاصد كربله هالمرة كعبة
ـــــــــــــــــــــــــــــــــــــــــــــــــــــــــــــــــــــ
من مراسيم الفريضة ذبح الاضحية
فده عن الحاج مكة وحجته مكضية
واعظم اضحية عله حجة بخالص النية
عالترب اهل ابو اليمة كلهه مرمية
شيبة مدمية / وسلب ترجية
صاح هالقربان ربي ليك اقربه
حسين كاصد كربله هالمرة كعبة
ـــــــــــــــــــــــــــــــــــــــــــــــــــــــــــــــــــــ
بحجة حسين الوحيدة اختلفت الصورة
لان ما كملت وصارت حجة مبتورة
صح سعي مشكور لاجن روس منحورة
ويا ذنوب العنده حته نكول مغفورة
بذاك يوم الطف / زمزم اتخلف
ما روه كلوب العطاشى الجنهه خشبة
حسين كاصد كربله هالمرة كعبة
ـــــــــــــــــــــــــــــــــــــــــــــــــــــــــــــــــــــ
الخادم.. حسين الغالبي
