2063
ذلك ومن يعظم شعائر الله فإنها من تقوى القلوب
عن لسان فاطمة العليله (وزن الطويل )
شعندك ياوكت وياي ماخليتني وياهم
عليله وطالت المده تزيد بعلتي فرگاهم
★★★★★
اگضي ايامي بالشوغات وادعي الله اليصبرني
العطر تارس منازلهم بكل غايب يذكرني
العذرته على السفر ياريت على الون كون يعذرني
مثل الموت الي الدنيا صارت بعد دنياهم
★★★★★
بدلال العمر خلصته هسه تعودت علهم
ولاعلبال لاظنيت اهلي راح افارگهم
اروحن ظني وياهم اهلي هناك واخدمهم
الرعوني گلت اجازيهم واجازي بروحي رباهم
★★★★★
ماتطبگ جفنها العين وانام الليل ساعاته
افراگ اهلي صعب چتال ماتنحمل شوغاته
ادري بگلب ابوي حسين وادري بطيبته وذاته
عليه من الطريج يخاف وزيد بعلتي بلواهم
★★★★★
شلون بدون ابوي حسين يانار المثل ناري
ناري البلگلب تسعر يچملها الدمع جاري
خبر ماجاني من عدهم ولايدرون باخباري
دنه وكتي عليه النوح يوم بعيد وداهم
★★★★★
اريدن بويه لمتكم عليه الفرگه موسهله
رقيه وياها كون اگعد وهزن مهد عبدالله
يبويه الفرگه ماترحم شسولف عنها بس ذله
منين الگه گلب يحمل ولتني سيوف ذكراهم
★★★★★
اناطر واسكب دموعي عليه طالت المده
ظعنكم ناحر البيده زماني عاند ايرده
بوسط هيمه العمر مني بعدكم ماي وتبده
على الهجران والغربه الگلب تدرون ماراهم
الشاعر حسن لعيبي الحريشاوي
لفاطمة العليله (وزن عگيلي)
ايعين الله الطفله المهظومه
حسين الغابت عنها اعلومه
هلمعلوله يخاف عليها
حسين البلدار امخليها
يدعي الرحمان يشافيها
الظلت. متعذبه. ومالومه
مشتاگه الشوفت والدها
من حط بديره اشمبعدها
امناطر ليل. ودمعه بخدها
وصبر الواجب بيه ملزومه
ماتدري الفرگه اشتاليها
نيران المدمع تچويها
جروح الفرگه تعذب بيها
شيداوي جروح الملچومه
ابعمر الزهره سنين الذبلت
ابفرگه وكسر الخاطر مرت
بعد الراحوا تنحب ضلت
تكتل حسرتها المكتومه
معلوله وبالدار اتاني
تنادي ومن لوعتها تعاني
بويه دخيلك. لاتنساني
وجهك دوم گبالي ارسومه
والله اتخوف هاي السفره
گالت يمسافر. . بالعتره
خوفي ابطالك فوگ الغبره
وانته الوحدك وسط الحومه
الشاعر حسن لعيبي الحريشاوي
سوى الحسين ( ملمع) وزن تجليبه
(ماالدين والرشاد)
(والخير والسداد )
(وجنة العباد ) (سوى الحسين)
★★★★★
كل وجهات روحي ومنطلق عمري
وكل غانمه وراي ومعرفه بعمري
وكل حاصل امر متعلق بصبري
بحب حسين انهض واعترض دهري
(مالعمر والحياة )
(والصوم والصلاة)
(والدرب والجهات) (سوى الحسين )
★★★★★
هواجس روحي ياواحة تعابيري
ومشروع العلوم الشغل تفكيري
قرآن المحبه وكل تفاسيري
الك همال دمعي واشكي تقصيري
(مابهجة السنين )
(والعمر والحنين )
(وخافقي الحزين ) (سوى الحسين )
★★★★★
يااكثر قضية وموقف ايهمني
وكل عاشور بيها البچي ايعلمني
صرت اعشگ دموعي وافتهم حزني
محبتك منها آني واصبحت مني
(مالنور في السماء)
(والفيض والعطاء)
(ومجد كربلاء) (سوى الحسين )
★★★★★
افهمت عاشور شنهي وصار يعنيني
ملك عمري وملاها ايامي وسنيني
من احتار واتيه الراي يهديني
واقرب درب للجنه يوديني
(ماصبري المقيم)
(وموقفي الحكيم)
(ومنهجي القويم ) ( سوى الحسين )
★★★★★
شكرا ياالهي ابنيت وجداني
من غيرك اميز الدرب خلاني
ارزقني الدمعه دوم وكثرة احزاني
بحب حسين ربي ثبت اركاني
(ماعالمي القريب )
(والروح والحبيب)
(والجرح والطبيب) (سوى الحسين )
الشاعر حسن لعيبي الحريشاوي
لاستنهاض الامام الحجة عجل الله فرجه الشريف
شافي اصدور مفجوعه
وداوي اگلوب مصدوعه
يبوصالح
يبوصالح
★★★★★
چم طفل وطفل بچووه
ومٌخَيَّم للحرم حرگووه
وضعن ام الخدر نهبووه
وراس على الرمح شالووه
لاغِيرَه ورحم عدهم
اعداك المحد يردهم
يبوصالح يبوصالح
★★★★★
رعيد من الحزن لملم
بگلبك نار المخيم
اشتذكر من المحرم
جسوم مخضبات بدم
اعداك أكلوب ماتصفه
حقد بيها شكثر صلفه
يبوصالح يبوصالح
★★★★★
أبدعاشور مامثله
ولايوم المضه گبله
يمته خصمك اتذله
والحگ يرجع الاهله
اتحارب ناس خداعه للشر صاروا اتباعه
يبوصالح يبوصالح
★★★★★
لمن تسمع المقتل
وتسمع زينب على التل
وحزنها وليلها طَوَّل
ولديار الغرب ترحل
لحزنها منكسر ظهرك مولاي شكثر صبرك
يبوصالح يبوصالح
★★★★★
گلبك سيدي اتعذب
ندعي بالفرج يقرب
يمن تنظر ضعن زينب
بيد الوادم اتسلب
الله ايساعد احوالك صورها كربلا أگبالك
يبوصالح يبوصالح
الشاعر حسن لعيبي الحريشاوي
زينب تولاني الهظم (وزن فايزي )
زينب تولاني الهظم وجروح الايام
من ظيم عاشور المضه ومن لوعة الشام
خَلَّصت السنين ابچي على حسين
زينب تولاني الهظم
★★★★★
كل عام روحي معذبه كل عام لوفات
ناحت على المنها مشوا نوح الحمامات
عاشور بسمار بضلع انساها هيهات
وجروح ابد ماتنمحي وتزيد لچمات
الضل جسمه نصين ابچي على حسين
زينب تولاني الهظم
★★★★★
للموت تترادف عَلَيَّ لوعات الطفوف
ادعي لعيوني الشافته لاتصد وتشوف
على ابن امي گامت كل كتر هلنايبه إطوف
نزلت دموعي على الوجه نَزلَّات السيوف
حفرن الخدين ابچي على حسين
★★★★★
مايوم ترحل كربلا متعلگه بالروح
كل جرح لوعني مشه عايفلي اجروح
للنوح مكتوب العمر كل وكت للنوح
بالگلب مذبوح الفرح علطاح مذبوح
بكل دمعه بالعين ابچي على حسين
زينب تولاني الهظم
★★★★★
ياساعه يرتاح الگلب من كثر الهموم
غربان ساعات القهر علخاطر اتحوم
والجدم تعثر بالجدم لا امشي لا گوم
غالين شيردهم الي وحيلي مهدوم
من لوعة البين ابجي على حسين
★★★★★
گلب اليون طول الوكت ياساعه يرتاح
شحال الاخت لمن تصد شمس وگمر طاح
وبدماها روس مخضبه مشيوله برماح
گلبي تصدع ياخلگ من كل الاصفاح
والحال موزين ابچي على حسين
زينب تولاني الهظم
الشاعر حسن لعيبي الحريشاوي
ابوذيات بمناسبة تبديل الراية
گلوب النه على الگبه ورايه
ترتل للحزن ايه ورايه
عونه الي شغل گلبه ورايه
بمصاب حسين بن حامي الحميه
★★★★★
الشيعة اليوم لوعتها ولمها
لبو اليمه گصد بيها ولمها
الرايه الحمره طَوَيَّتَها ولمها
ونشر راية سواد بهلمسيه
الشاعر حسن لعيبي الحريشاوي
لسان حال فاطمة العليلة
انا العليلة والوكت ارتاح ما خلاني
وكت اليفرحني مشه وكت المدامع جاني
أنا العليلة
انا العليلة
★★★★★
اتعذبت وتحيرت وتلوعت بعتابي
لمن مشوا عني أبعدوا چنهم سعوا بمصابي
محد سئل من الاهل شنهي الحصل بحبابي
انا العليله اتلوعت محد دره ابلوعاتي
ياطارش يروح الهلي ويشرح جمر چوياتي
انا العليله
انا العليله
★★★★★
بدار الحزن ضليت أون إلهم أحن واتعذب
سيف الهظم حز العظم زاد الظلم وتشعب
بلهم طحت وتمحنت عمه صحت يازينب
انا العليله الياوكت تمطر جروح جروحي
لكلشي نهايه وانتظر ماكو نهايه النوحي
انا العليله
انا العليله
★★★★★
ايام العمر وحشه تمر گلبي جمر من همي
لامن أكو عم واخو لامن أبو ولا أمي
وبحسرتي وبغربتي لاراحتي ولاعزمي
انا العليله من هلي بدار الحزن خلوني
زين ويضل من البچي شوف وضوه بعيوني
انا العليله
انا العليله
★★★★★
حال الگلب كلش صعب وحال الغرب خلوني
صعب السهل عگب الشمل عيوني تهل اعيوني
همه الضوه وشم الهوه الجرحي دوه وعافوني
ايردون ياساعة الأهل والله الصبر تعبني
ماهمني ياذيني المرض فراگ الاهل كاتلني
انا العليله
انا العليله
★★★★★
بغربه صرت من الوكت بيكم چنت اتگوه
هموم الزمن كلهن لفن مثل المحن والبلوه
حال السعد عني أبتعد وعمري بعد مايسوه
أمودع الله يافرح بالك تمر أبابي
ماحاجه تتعنه وتجي راحوا أعز أحبابي
انا العليله
انا العليله
الشاعر حسن لعيبي الحريشاوي
الشاعر الحسيني ظاهر حبيب الهليجي (للهلال)
شهر الدمع بي ننفجع بي جم نحر وشكم ضلع
واجب عله الشيعه اليوم تبجي بدمه الواليها
*
بثوب السواد بهلتك نتجله
يهلال يل بيك نذبح وجه الله
حسين الشهيد العنه مانتخله
هل مسأله عن كربله خل تفتهم كل المله
هاي الشعائر للناس للتوعيه نحيها
*
هذا الشهر بي ينذبح أبهى الناس
حسين واهل بيته الشرف والنوماس
نستذكر الصار وجره امنل الارجاس
نحر الابي وذاك السبي وكل الجره الآ النبي
ويه النجم كون اليوم راياتنه انعليها
*
مو مستحب واجب نهل الدمعه
ونحزن مثل حزن اليتيم وننعه
والون اله كون الخليقه اتسمعه
للمنتجب سيد العرب نترجه من الله بطلب
سنين العمر بلدمعات لجل السبط نگضيها
*
تتراوه ألنه بطلعتك جن مرسوم
فوك الرمح راس الحسين المظلوم
وزينب سبيه وبل دمع يمه تحوم
حته السمه مطرت دمه تبجي وتواسي بفاطمه
بعاشرها هاي المأسات گلوب الخلگ تاذيها
*
يلي شفت جم جثه فوك الغبره
ويانه جنك هم تعيش ابحسره
الال الرسول ابعاشرك متطشره
وبلاخدر اهل الستر ونار الضمه وحر الظهر
مرعوبه داستها الخيل وحر الرمل يجويها
الشاعر الحسيني ظاهر حبيب الهليجي (العليله)
يا ضعن الماشي أبنيه – ريض بهداي شويه
أرحم حال العلويه – أنه العليله
---
مسية أغروب دمع مسجوب – نحيب اموادع الغربه
اهل ماشين تـشـوف الـعـيـن – تفارگ وين الإتحـبــه
يــودعـــونـي يخـــلــونـــــي – عليله بهمها متحجبـه
وأنــا تـألـم يـضـعــن الـهــم – دليلي برحلك أتعذبـه
اترجه بدمعة عيني – ليش الوحدي تخليني
ما أرهم دون حسيني – انه العليله
---
خذيت أحباب تركـت اصواب – علاجه الآه والحســره
عليله اشلون هـلي يرحــون – اظـل لاويـن منتظــــره
انه اترجاك اخذنـي ويــــــاك – ذنب تتركني ما غـفـره
نفس مخنوك أمنشوف النوگ – على الترحال متحضره
ما هزك دمعي ونوحي – ما ترحم هاي جروحي
خطواتك تاخذ روحي – انه العليله
انوح بصوت يضعن المـوت – احس أنهار كل حيلي
خذت روحي ودوه اجروحي – ابوي بايده يوميلـــي
كسر ضلعي بشغف ادعــــي – خطر يتناه يوحلــــي
رحت وامشيت وانه الظليت – اصيح الويل ياويلـــي
مرسومه الصوره ابالي – ودعني وارح الغالي
اكظي اسنين بلا والي – انه العليله
---
بعد هيهات يعـود الفـــات – وظن هيهـات نتلاگــــه
انــاظــرهـــم وعـاتـبهـــم – بمسيل ادموع حراگـــه
أشبقه عندي اظل وحـدي – بلهيب اگليبي واشواگه
شلي بدنياي ردت مثواي – العزيز إشيحمل افراگـه
انحب وصرخ تانوني – اعثر ونهض شافوني
وحدي بداري تخلوني – انه العليله
---
وحـگ ربي تعـــب كلبـــــي – يريد أحضاني احبابي
آشم بالدار عطـر تذكـــار – اشمه ويلجم اصوابي
اجل محتوم اظن هل اليوم – بعدهه ينطـوي اكتابي
عليله بأآه عـلــه الآنـعـــاه – يجيني وينتهى اعتابي
ما تكسر كلبك دمعه – يا ضعن وصوتي تسمعه
ظاكت بعيوني الوسعه – انه العليله
الشاعر الحسيني ظاهر حبيب الهليجي (لعلي الاكبر ع)
شلت اجفوفي ودمعي يلالي
أنخه العالي يردلي الغالي
گلبي اتفطر ردلي الاكبر
*
ربي يل فديت المنحر اسماعيل
كبش منل سمه ياربي ماظل حيل
عندي وانه امه والمدامع سيل
وحيد أبني وعليه ملتمه زلم وخيل
اشهگ يارب گوه انفاسي
مقتل ابني يدرو براسي
هيج اتصور ردلي الاكبر
*
العلي الاكبر شبيه المصطفى اتوسل
ياربي بدموعي وليدي لايرحل
مني وانه بلحسرات گمت اذبل
غريبه امه ألاهي وغربه ما اندل
سالم رده وليدي الحظني
ارحم حالي ورجع ابني
من هل عسكر ردلي الاكبر
*
انه حرمه ونخيتك وانت ليه ارحم
عله وليدي أشوفن جيش كله التم
كثر خوفي عليه ادموعي تنزل دم
لان اعرفها هايه الناس ماترحم
ماظل ماي باهي اعيوني
خافنهم يبني يفجعوني
بجبده اليسعر ردلي الاكبر
*
يامن خلصت يونس دليلي يذوب
وانت الرجعت يوسف إلى يعگوب
بقدرتك يا الاهي حقق المطلوب
يرد سالم علي ياربي ما مصيوب
يرجع وبنشف دمعاتي
ويهيد نوحي وآهاتي
بدمعي الأحمر ردلي الاكبر
*
مشه وعيني بدمعها للولد تربي
وخطواته المشاهه تكطع بگلبي
تحفظه امنل العده انخاك ياربي
علي الشمعه التضوي دنيتي ودربي
يارب ابجاه المظلومه
الزهره ترده امنل حومه
ابجاه الكوثر ردلي الاكبر
الشاعر الحسيني ظاهر حبيب الهليجي (لعلي الاكبر ع)
اودعنك اودعنك علي بدمعي اودعنك
گلتها وگلبي يتگطع مودع ياعلي مودع
*
امك يا عزيزي يبني يل الاكبر
دليلي بهل الوداع بنوح يتفطر
مو سهله واشوف اعداك تتنطر
عله جتلك يشبه المصطفى الاطهر
احظننك احظننك اخر مره احظننك
خوفي يبني ماترجع مودع ياعلي مودع
*
هذا اخر لقاء البينك وبيني
اريد اشبع نظر يايمه خليني
خوفي ماترد يبني ونظر عيني
اخذني ياعلي ولا ابقه بونيني
اشمنك اشمنك اريدن يبني اشمنك
اودعك يبني للمصرع مودع ياعلي مودع
*
اريد احجي لجن مخنوگه بلعبره
خوفي أعليك لنها الحومه مستعره
مواضيها ييمه كلها متحظره
بزلمها وخيل يبني اعليك متوزره
اظمنك اظمنك يريت بگلبي اظمنك
عيوني وشلن مدمع مودع ياعلي مودع
*
ادعي الموتي گبلك يمه ياخذني
واقبل انسحگ والسيف يذبحني
ولا شوف البواتر بيك تفجعني
وظل وحدي غريبه ومن ألي يبني
اشوفنك اشوفنك ذبيح ودامي اشوفنك
عمري بعدك شينفع مودع ياعلي مودع
*
اذا ماشوف هايه ارسومك الحلوه
احس الدنيه حفنه تراب ما تسوه
طبع كل ألام ببنها دوم تتگوه
وذا راح الولد بس الأجل تهوه
اخبرنك اخبرنك ركد حيلي اخبرنك
گلبي إعليك يتصدع مودع ياعلي مودع
الشاعر الحسيني ظاهر حبيب الهليجي (للقاسم ع)
من شوفتك حرموني وبذبحتك ذبحوني
يوليدي يالب حشاي وشل دمعهن عيناي
*
وفيت يل تنضح وفه يوليدي ونطيت الروح
يل عمرك بعمر الورد فوگك نده نزف اجروح
يل منذبح ذبح الشمع وبيا ذنب يل مذبوح
امك ولمنك وذر يا نوح ينفع يا نوح
ماقصرت يوليدي طفو شمعتك بيدي
بعدك ظلام بدنياي وشل دمعهن عيناي
*
يل دامي وفيايك شمس يل شيبت هدب وراس
انت الردت حنتك دمه وماردت شمع اولا ياس
يل رابي بحضان الشرف واطهر نسب بين الناس
موذر وذر فوك الثره بغيض الحوافر تنداس
غسلتك بدمعاتي وجفنتك بعبراتي
يل نايم وماكو فياي وشل دمعهن عيناي
*
يوليدي نيشان العرس اجروحك الماتشفه
تنزف دمه اليوم الحشر يوليدي جروحك كلفه
الليل ما يحجب شمس وشموعك الما تطفه
اشلون عينك غمضت وعمك وحيد بطفه
يبقه الدمع يبرالي يل ساكن ابدلالي
طول العمر ردت وياي وشل دمعهن عيناي
*
طشيت عمري ويل الهوه اشنفع العمر من ترحل
لو خيروني بجتلتي وياك يبني اتقبل
وين انطي وجهي بغيبتك يوليدي بعدك اسأل
بسدك ردت طول العمر جسام هيج أتأمل
اوصافك يضيعوها امك بجي يمنعوها
مسببه والحسره وياي وشل دمعهن عيناي
*
امشي سبيه وللغرب وانت الآلي ما ترجع
وسياط وبنوگ الهزل وحيل السبي من يطبع
وفراگ واهات ودمع وگلبي بونين اتگطع
مهظومه وامشي مجتفه بكاسي المأسـي اتجرع
نار الخيم بضلوعي رمله الحزن موضوعي
يا جاسم ماضاع ارباي وشل دمعهن عيناي
الشاعرالحسيني ظاهر حبيب الهليجي (الهلال)
بنزيف الدم ولهيب اخيم
يهلال الحزن تلفي
*
انه زينب اعيش بلوعه من تجبل
ظيم الطف اشوفه بيك من اتهل
شهر بيك الماسي وهلتك تجتل
برسومك يتامه وخيل من تصهل
تذوب الروح تهيج اجروح
يهلال الحزن تلفي
*
تفز اجروحي كلها ابهلتك تدري
صور مأسات عاشور الكسر ظهري
صور بيها مناحر عله ثره تجري
وانه وحده وناظر يحترگ خدري
دمع بلعين جوه الخدين
يهلال الحزن تلفي
*
يل تارس دليلي اهموم لاتطلع
ترد بيه واشوف حسين يتكطع
وألا من ناصر بهل يوم جن اسمع
من ذاكه الزمان الهسه اتلوع
يظل طبعي اون ونعي
يهلال الحزن تلفي
*
شعد لك يامصيبه البيها تلجمني
مصيبة كافلي وجفينه تفجعني
وعلم والجود لوعه ما تفارگني
وبخلافه الشمر مجتوفه ياخذني
سبي للشام وصريخ ايتام
يهلال الحزن تلفي
*
تراويني الثكاله ولوعة اعيالي
وتراويني اخوتي الطاحوا گبالي
سنين امعذبه والنوح يبرالي
يظل بيه جرح ملجوم للتالي
عله الاحباب جرح ماطاب
يهلال الحزن تلفي
شهر ذي الحجة 1446
الشاعر الحسيني ظاهر حبيب الهليجي (لعلي الاكبر ع)
لحظة أوداع بين الاثنين
بين إلاكبر اوالده حسين
سوجبت دمعاتهم
ترجمت جلماتهم
لحظة اوداع
*
لحظه بيها شگد الم مابين الاثنين
موادع الاكبر علي وي والده حسين
تعانكوا نوح ومدامع و اَه وونين
من كثرهم بل بجي صارت نياشين
العبره و الاه تاخذ الحيل
نار الاگلوب والدمع سيل
بل حزن نظراتهم
ترجمت جلماتهم
*
للأبو اتوجه علي وكل خطوه حسره
مغورگه اعيونه دمع وبوجهه عبره
قبل أيده وجبهته وظمه أعله صدره
عانگه بشهگة عشگ والدمعه حمره
نظرة إفراگ بيها ويلاه
يدري لو راح ابنه ينعاه
تسابگت عبراتهم
ترجمت جلماتهم
*
نظر نظره حسين لوليده وحبيبه
وشهگه شهگه وما گدر يكتم نحيبه
لان يدري بكربله اتصير المصيبه
ينذبح ضامي اوتظل جثته سليبه
بذاري الاتراب تضيع الارسوم
وصدره إلاكبر بخيل مهشوم
وعتلت اهاتهم
ترجمت جلماتهم
*
گله يبني مودع ودمعاته تجري
ياعلي هذا الاوداع الكسر ظهري
جنت من اشتاگ اشوفن جدي تدري
انظر الوجهك علي وينشرح صدري
ياعلي تروح روحي وياك
توذرك اسيوف ادري الگاك
نار جن حسراتهم
ترجمت جلماتهم
*
جاوبه يحسين بويه يروح دمي
الك فدوه وقانع يوذرون جسمي
رايد أوفيلك وفه بأصرار عزمي
وفه الجفين النطاهه وعين عمي
بويه يحسين عهدي هل يوم
عينك إتشوف نحري بدموم
آه يا لوعاتهم
ترجمت جلماتهم
الشاعر الحسيني ظاهر حبيب الهليجي (لعلي الاكبر ع)
ألك لو لبنك قريت الفاتحه
من شفت ذبح الابن والذابحه
*
كل أبو عنده الابن مثل الهوه
وانت شفت الاكبر بدمه هوه
وناس ملتمه توذره بنينوه
وانت تنظرله ودموعك سافحه
*
شلون من شفته وذر فوگ الثره
سيدي وتشوف حزوا منحره
وخيلهم بل سحگ اخفت مظهره
وانت تجمع بل عظام الطايحه
*
علي الاكبر هوه روحك بلجسد
شجان حالك من شفت ذاك العدد
وجان ضامي وليدك وماله سند
والعده تحيطه بصوارم لافحه
*
يعينك الله من شفت ابنك علي
طايح أعله الگاع وبدم ممتلي
وهوه من روحك اعز ياموئلي
وانت راحة نفسك امن تصابحه
*
من وگع گدامك شگلت وصحت
سيدي تمشي لون تركض رحت
وگف گلبك سيدي لا ظن متت
لان روحك ويه روحه الرايحه
ياحجة الله
ياحجة الله أشگد عذاب ابدربك
عاشور اجه الله يساعد گلبك
ياحجة الله
★★★★★
أنظر يمولاي
ماخلت الواحد صبر عدوانك
ياصاحب الراي
لامره لامرتين دهرك خانك ياحسرة الماي
عطشانه كلها بكربلا خلانك
واسوالف اهواي
للموت يمكن ماتفض أحزانك
خايف أسوولف والكلام يعذبك
عاشور اجه الله يساعد گلبك
ياحجة الله
★★★★★
لويمر عاشور
كل صوره من عاشور تخطف لونك
يلدمعك يفور
ونيران خدك مثل دمع اعيونك
مومثل الشهور
ولاليله بيه النوم مر بعيونك
ياگلب مكسور
وچم مره ايام الزمان اتخونك
وانت الونين على الونين أيذبك
عاشور اجه الله يساعد گلبك
ياحجة الله
★★★★★
مشتاگه كل روح
ياخير كلها للخلگ غاياتك
مشتاگه وتنوح
بلكت تمر درب الفرج راياتك آثار وجروح
ماتنمحي قصة هظم عماتك
إذكر المذبوح
وزلزل على راس العده صولاتك
وحاربها گوم الي تدور حربك
عاشور اجه الله يساعد گلبك
ياحجة الله
★★★★★
يايوم ترتاح
واكثر عذابك يبتدي من العاشر
ياهظم ينزاح
يومك يوزع حزنه گام الباچر
شمل الأهل راح
وهذا اليخلي الجرح ينزف حاير
وشلون من طاح
جدك بجيش اهل الغدر متحاصر
ايعينك على هاي النوايب ربك
عاشور اجه الله يساعد گلبك
ياحجة الله
★★★★★
لوهل الهلال
اشحال گلبك والجفن ودموعه
من صغر هلحال
لگيت الاهل يابوالوفه مفجوعه
بهموم الثگال
روحك على هذا الألم مطبوعه
حزنك الچتال
من الشرح يحتاج الف موسوعه
يارحمة الله الناس بيش اطلبك
عاشور اجه الله يساعد گلبك
ياحجة الله
الشاعر حسن لعيبي الحريشاوي
لهلال شهرمحرم
هلال بيه غاب الفرح لمن حضر
گوم جدد حزنك بهذا الشهر
لاتجافي الدمعة عين
ابچي لمصاب الحسين
گوم جدد حزنك بهذا الشهر
★★★★★
گوم جدد حزنك وزيد الالم
علخيم سبعين الف حاقد هجم
تدري لوماتدري ظلت بس حرم
والعليل اشگد اتعذب وانهظم
وي زين العابدين
ابچي لمصاب الحسين
گوم جدد حزنك بهذا الشهر
★★★★★
شگالت العدوان تنقل هلخبر
بسيف جده حسين مذبوح النحر
ماقره زين الكتب كلمن نكر
حسين مني گالها سيد البشر
رغم شر الحاقدين
ابچي لمصاب الحسين
گوم جدد حزنك بهذا الشهر
★★★★★
رادوا الصح بفكرهم مايصح
حسين مامرفوع راسه على الرمح
رادوا يكتبون والحق ينمسح
حسين بچفوف الشمر مامنذبح
انظر الحقد الدفين
ابچي لمصاب الحسين
گوم جدد حزنك بهذا الشهر
★★★★★
اقلام ماجوره على الطف سجلت
غلطة بالتاريخ راحت ونطوت
ولاجريمه بقصد چنها ادبرت
ولامناحر بالطفوف اتذبّحت
أسمع وزيد الونين
ابچي لمصاب الحسين
گوم جدد حزنك بهذا الشهر
★★★★★
اعدانه رادت مثل ماتهوه وتحب
مومثل ماصار بالطف ينكتب
لاسبي لانار لاسوط وضرب
وعلى فراشه حسين مامات بحرب
رغم فكر الواهمين
ابچي لمصاب الحسين
كوم جدد حزنك بهذا الشهر
الشاعر حسن لعيبي الحريشاوي
يلي شربت الماي. ٣ دگات
يلي شربت الماي. لاتنسه الحسين
لجلك نساه الماي. واتحمل البين
★★★★★
يلي شربت الماي. لاتنسه عطشان
من العذب محروم. دلاله ذبلان
اشرب وسلم اعليه. بدموع الاحزان
المَهَّد طريقك خير. جنه ورياحين
★★★★★
سلم على المظلوم. وأذكر احواله
ابحر وعطش چتال. ظلوا اعياله
وحال العليل شلون. وشماجراله
وأذكر امصاب أبدور. علزهره غالين
★★★★★
سلم على المظلوم. وأذكر رضيعه
المنذبح عطشان. بأول ربيعه
وهاي على گلب حسين أكبر فجيعه
طفل بسهم مذبوح صارت گبل وين
★★★★★
أذكر عطش عباس. يلتشرب الماي
ماشرب منه الچان. للحرم. رواي
غيرة وشجاعه ودين للخوة وفاي
مايمد چف لعداه. . الضحه چفين
★★★★★
أذكر عطش. مظلوم. بالغاضريه
دارت عليه الگوم. من كل ثنيه
حسين الوگع مرضوض فوگ الوطيه
وراس برمح مرفوع بيه رفعة الدين
★★★★★
الصادق يگول الماي كونك شربته
ومن تذكر العطشان حاله وغربته
العن يزيد اهواي. زيد ابلعنته
أجر وزوال ذنوب تكسب الدارين
الشاعر حسن لعيبي الحريشاوي ✍️
لسان حال أبا الفضل العباس
گال ابوفاضل صغت لحسين ذاتي
من الصغر للموت ناذرله حياتي
★★★★★
قسم بالرحمن لوگطعوا يميني
مااهاب الموت ادافع لجل ديني
هاشمي الضربات والمبدأ حٌسيَني
من علي الكرار جانيها صفاتي
★★★★★
قسم بالرحمن لوگطعوا يساري
مااعوفن نهجي مااترك قراري
لازم من اهل الغدر آخذ بثاري
ويبقه حد الموت بالحومه ثباتي
★★★★★
أبد بأهل الغدر مااربط مصيري
خل تغر اموالهم بالدنيا غيري
يبقه ابوالسجاد مولاي وأميري
دوم حب حسين يملك كل جهاتي
★★★★★
مااهاب الموت لولحظه لفاني
عزمي ثابت مايِغيَّرني زماني
ابواليمه شاغل إحساسي وكياني
الموت لجل حسين اعظم امنياتي
★★★★★
درع لابن الطاهره روحي وحمايه
وماتغَيَّر حبي عن فطره ودرايه
حب ابوالسجاد مايملك نهايه
هو حتما بالحشر درعي ونجاتي
الشاعر حسن لعيبي الحريشاوي
تبديل الراية ( موشح)
رَفُع راية السودة تجديد العزاء
لبواليمه واهل بيته بكربلاء
★★★★★
هي اعلان لشهر دامي وحزين
وتعزيه ونوح وبچي ولوعه وأنين
دعوه للتذكير بمصاب الحسين
وعسكره وزينب وحماي اللواء
★★★★★
هي تصريح ومعاني للكرم
للمجالس والمواكب والخدم
احياء عاشوراء إحياء القيَّم
وبذكرها ياما تبچي الانبياء
★★★★★
هي راية وفه وتجديد الحزن
وصوت للثورة لبواسلها تحن
وجبل شامخ بالترب مايندفن
هي راية بيعه لحسين و ولاء
★★★★★
رايه ماتوصفها كلمه ولامقال
ثوره ضد الظلم واصحاب الضلال
هي قصة رفض مايعرف محال
غانمه ومعنى وتحدي وكبرياء
★★★★★
صوتنا يصدح يبواليمه صداه
صوتنا لحد الاجل هذا مداه
انته درب الدين يحسين وضواه
تضحيات العمر قدمته وعطاء
الشاعر حسن لعيبي الحريشاوي
بمناسبة رفع الرايه السوداء لقدوم ايام عاشوراء
على الگبه رايه سوده تنرفع
بيها قصة منحر وكسرة ظلع
قصة لولاد الزچيه اتذبحوا بالغاضريه
بيها قصة منحر وكسرة ظلع
★★★★★
تسولف الرايه على اليوم الخطير
راد ينهي الذات والحق والظمير
تحچي قصة يوم مامثله يصير
حيود مذبوحين ظلوا علهجير
الرايه فوك الگبه تعله
تگول هيهات المذله
بيها قصه منحر وكسرة ظلع
★★★★★
الرايه جابتنه ومدامعنه تسيل
نبچي علمظلوم بلطف وقتيل
بحقه كل النوح والمدمع قليل
مستحيل انعوف نهجه مستحيل
البلسيوف مگطعينه
رفعنه رايتنه الحزينه
بيها قصه منحر وكسرة ظلع
★★★★★
حال كل أمه تعظم كل عظيم
تحچي عن امجاده وفعله الكريم
حسين الاسلام وصراطه المستقيم
قدملنه الخير والدرب السليم
حسين غايات وقضيه
رفع رايه الاحمديه
بيها قصه منحر وكسرة ظلع
★★★★★
رايه سوده اعلنت يوم العزاء
صدح هذا اليوم من عدها النداء
بث مباشر هلحزن من كربلاء
أتصَدَّر الحق والتفاني والعطاء
الرايه اعلان وهويه
للجموع الجعفريه
بيها قصه منحر وكسرة ظلع
★★★★★
هي ذكره تحچي لوعات الغريب
تگول طاح على الثرة بلدم خضيب
انشال راسه بالرمح جسمه سليب
يوم ضل وحده ينادي ولامجيب
تعلن وتنطق الرايه
للظلم لازم نهايه
بيها قصه منحر وكسرة ظلع
الشاعر حسن لعيبي الحريشاوي
الشاعر الحسيني ظاهر حبيب الهليجي (للهلال)
هل اهلالك هل اهلالك
ياشهر الدم هل اهلالك
*
يلي أتهل والدم برسمك
حته ايامك انته اتألمك
عل ضامي وذكراه تلجمك
وجن الدمعه اتلوگ الحالك
*
نار خيام بهلتك تطلع
وجم طفله وطفل اليتلوع
مرعوبه ومن دم المدمع
الحد المحشر تبقه ابالك
*
من أتهل جن تحمل حسره
عل المذبوح السحكوا صدره
مسلوب ودامي اعله الغبره
لجله المدمع ظل يبرالك
*
نورك هذا غيضك يلهب
من تتذكر لوعة زينب
مسبيه وراحت تتغرب
ياشهر الهم ظل يحلالك
*
تبقه احزانك حد المحشر
من العاشر نارك تسعر
ماتهده ودومك تتأثر
هم ونوح اصبح منوالك
الشاعر الحسيني ظاهر حبيب الهليجي (لفاطمة العليلة ع)
مشتاكه حيل الملگاك شوگ الزرع للمطره
هيج انه يلشوفك ماي والجيتك متنطره
*
انه العليله فاطمه المشتاگه
لجلك يبويه و دمعتي حراگه
خوفي رحيله بعد مانتلاگه
ليل ونهار انه بنوح وبصدري تجوي العبره
*
تخنگني عبره لو ذكرت احروفك
يابويه مشتاگه اشم اجفوفك
وعيوني ملهوفه تريد اتشوفك
أربيه عيني أعله الباب والدمعه تنزل حمره
*
طفله وعليله والجفن مايغفه
وجرح الوداع بداخلي مايشفه
والذكرياتك هل الدمع شينشفه
عطشانه روحي الملگاه وأعله الجمر انتظره
*
بعد المسافه البينك ومابيني
اسمع يبويه جنك تحاجيني
يبنيتي دمعج فاطمه يأذيني
يابويه وبهل الاحساس واني دليلي يفطره
*
بين الحياه والموت ونته ابالي
مرني يبويه بطيف وأرحم حالي
وأرحم دليلي ودمعتي يل غالي
عندي يقين بهل الحال اشفه يبويه بنظره
الشاعر الحسيني ظاهر حبيب الهليجي (ولائية)
يضي دربي وعشگ گلبي
اي والله يل مظلوم
*
مو بس البشر تبجي الك حته السمه السبعه
بيوم الي نزل من دم مطر والگاع منفجعه
كلشي بهل الخليقه اينوح يامولاي الك ينعه
عل الصار وجره بعاشور يبن الطاهره البضعه
الك حسرات والك عبرات
اثرهن بالكلب مختوم
*
احس امقصر بحزني اي والله يل والي
عاشورك يبو الاحرار جمره بگلبي للتالي
ماتهفت عهد يحسين مادامك عله بالي
انه الناذرهن ادموعي شما مر اسمك تلالي
الگلب مجروح عليك ينوح
وجرحه للأبد ملجوم
*
الك مأتم يا نور العين ناره بل الحشه تسعر
ما بالغ لون احجي وگول ابالي لك منبر
يسولف عن خيم وايتام عطشانه بلهيب الحر
وعن ضامي وجسد مسلوب وشيب يخضبه المنحر
يضي عيناي اظل وفاي
وبخدودي الدمع مرسوم
*
بوجداني وضميري اتعيش يبن الظافر الكرار
احبك مو لجل دنيه ولا عن جنة لاعن نار
احبك عارف بحقك ولن رافض ركوب العار
احبك لن يشح مثلك يصبح قبله للأحرار
الك يحسين تظل العين
تهملك دمع للدوم
*
كون ادموعي الك من دم وگضي سنيني بل عبره
وهشم أضلوعي من ألط م بلمجلس يبو العتره
وابجيلك بجي أيوب لوليده بأسه وحسره
ونوح وكون احس روحي بيها الحسره متشجره
نزف دمك رفع اسمك
يزداد العشگ كل يوم
الشاعر الحسيني ظاهر حبيب الهليجي (شوط كربلائي)
عبدالله يريت الموت كون اوياك ياخذني
يروحي ولا اظل بعدك يبني عايشه بوني
*
على حالي ينوح الكون ابني بحضني وتهظــم
بعاشرهه وعباتي فياي مالي ابكربله مخيم
لا يرحم عطش كلبـي ولا حر الشمس يرحم
وعل الغبره اشوف اجسـوم
مذبوحه وتسيـل ادمـــــــوم
وجرحي عل الابن ملجوم
وانه وحيده بالغربه والنبله بنحر ابني
*
مهضومه بدمع ظـليـت بالغربه وصعب امري
اصـيـحــن حـيـل عبدالله بحضني والدمع يجري
اخاف انه تسحكه الخيل ما عدهم رحم ادري
انحب واسجب الدمعه
وعلينه الخيل متجمعه
بحقدها لينه متطبعه
ياضيم النوايب هاي لا صبر اليصبرني
*
اترجه بدمع عيني ياخذ روحي باريها
هويت الموت من بعدك دنيه ولا اظل بيها
ماريد العمر يبني روحي الفرگه تاذيها
وشلت الدمع بالـنــوح
انظرلك وحس الـروح
طلعت واالحلم مذبوح
اناظرلك يروح امك يل رايح غفل مني
*
يعذبني الانين البيــك يالمظلوم شب گلبي
يل ذنبك طفل ضامي شكيت بدمعتي الربــي
يوليدي شلي بعمري موحش لو رحت دربي
ما ريد العـمر بـعــدك
من شفت الدمه بخدك
خالي من الورد مهدك
عله امصابك يالمدلل نار دموعي تلسعني
*
اتمنه اصير افياي يل نايم عله الغبره
لجن معذوره يوليدي اروح مجتفه بعبره
اسيـره امـك يعبدالله وي آل النبي الاســره
لشـام بـهـضــم امـشــي
سال ويل الدمع رمشي
والهودج صبح نعـشـي
الشاعر الحسيني ظاهر حبيب الهليجي (للقاسم ع)
وفه العمه وفه العمه
جاسم بلطف وفه العمه
*
جسام المعدوده اسنينه
عاف الدنيه لجل حسينه
ضحه بروحه العمه ودينه
وبهل الموقف نال القمه
*
عريس العاشر موضوعه
شاب وتضوي الهسه شموعه
من طحنتها الخيل اضلوعه
ونمزجت أوصاله ولحمه
*
راد اجفانه بزفته اثيابه
وتصير الحنه أمن خضابه
ويزفونه بيوم أمصابه
ويدفنونه بدمه وهدمه
*
قدم روحه لعمه بجفه
متهمه جروحه ولانزفه
ولاعرسه ولا ليلة زفه
راد ويحسين أيكون اسمه
*
فعلا بلطف ذل اخصومه
جيدوم وأرعبها الحومه
ورواهم جسام اعلومه
جسام ومن حيدر عزمه
الشاعر الحسيني ظاهر حبيب الهليجي (للقاسم ع)
شنهي اليوجعك يوليدي ويألمك
اون يمك وخاف ادموعي اتلجمك
*
امك يبني جاسم والدمع مسجوب
يبو طول الحلو يمطبر ومخضوب
يل قداح عطرك عل الرمل مسلوب
وحوافر اعوجيه التسحگ بجسمك
*
أحلفك بل حليبه يبني حاجيني
اذا تسمع كلامي ونوحي وونيني
بأذاني اهمس ييمه ولاتخليني
گلي بجرح الي يلجمك يبعد امك
*
يواضح المعاني وجهك أتعفر
وفوگ اشفاك آثار العطش تظهر
وحنتهن جفوفك ليش لون احمر
لان انته الردتها الحنه من دمك
*
ما جانت ييمه ابالي تتركني
انه محسبه اموتن وانت تحملني
يجاسم وانت بيدك يبني تتدفني
وتالي بنينوه ويصعب عليي لمك
*
ميت كلشي بيه تدري من فرگاك
ونخه الباري يبني كون موتي وياك
ولاريدن اعيش بدنيتي ابلياك
جفن عيني يريد أبداخله يضمك
الشاعر الحسيني ظاهر حبيب الهليجي (للقاسم ع)
عرسي هل اليوم اذلنها الهنادي
هذا وعدي زفافي البي جهادي
انه بهاي المشاعر اقاتل هل عساكر
*
القاسم وعزمي من ابو اليمه
عرسي يا يمه لو طحت يمه
امنياتي أيسيل دمي مو دمه
وجسمي يتوذر كون مو جسمه
يمه اريدن دمائي تحني اديه
اوزفتي اتصير شهيد بهل منيه
فخر بلطف اناصر اقاتل هل العساكر
*
يمه هذا اليوم والله تانيته
وعدي ابويه بزود انه وفيته
ذودي عن عمي وعن اهل بيته
جامح الصارم بيدي خليته
ابحر اليوم انه بدم المنايه
مضرب أمثال اصير ابهل الروايه
وحك ربي اناطر اقاتل هل عساكر
*
يمه لو شفتي دم الابجسمي
خلي بجفوفي حنتي دمي
شموعي اشعليهه عالثرى يمي
هذا عرسي يصير ناصرت عمي
طلبه يمه لون شفتيني طايح
كون ماريد دموع ولا نوايح
اظل بجروحي أكابر اقاتل هل العساكر
*
وعدي اذلنهم وانه ابن حيدر
بيدي فقاره والله طرهم طر
ومن زئام الموت أروي العسكر
مو فقط هاذه أكثر واكثر
بيدي صمصام علي واحرس خيامي
عن الإسلام احامي وعن امامي
عليهم گلبي شاجر اقاتل هل عساكر
*
اليوم اخلي الكاع تغرك بدمهم
ومن سعير السيف نار اشوفهم
كل اسد غاضب هيج انازلهم
حمره خلي الگاع من مناحرهم
أطلب اركاب غليظه واعتنيهه
سيفي بتار غضب لومر عليهه
اخلي الطف مجاوزر اقاتل هل عساكر
الشاعر الحسيني ظاهر حبيب الهليجي (لعبد الله الرضيع ع)
يا سهم من تنسأل شنهو الجواب
ليش طوگت الطفل نحره بخضاب
*
ياسهم من تنسأل يوم الحشر
عن طفل وبمنحره من تستقر
يا جواب ايكون عندك ياعذر
يل گصدته وجانت اهواي الرگاب
*
وي ابن كاهل حسابك بل قيام
يا شريك بهل الجرم اهل الظلام
يا جواب يكون عندك للامام
من يسالك باجر بيوم الحساب
*
شنهو عذرك طوگت نحره بدمه
ياسهم يلي إغضبت رب السمه
بيا ذنب هذا الرضيع اتالمه
وألمت گاع وسمه بهذا المصاب
*
يل گطعت ابلا رحم نحر الطفل
وي ابن كاهل شريك ابهل القتل
باجر ابيوم الحشر هم تنسأل
بفعلك العبدالله راويته العذاب
*
لوعت أمه بفعلتك ياسهم
من تناظر للابن والدمعه دم
بيها خليت المواجع والالم
سابح بدمه بحظن امه الرباب
الشاعر الحسيني ظاهر حبيب الهليجي (للامام العباس ع)
زينب واجيتك عباس والعبره تجوي بصدري
لاخيم ظلت واخوان ما ظن يكافل تدري
*
حاجيني ياحيد الزلم حاجيني
يم الشريعه جيت يا ضي عيني
لاخيم ظلت لا أخو اليحميني
حرمه وغريبه واجناب ياخويه يصعب أمري
*
اجفوفي ريت اتطيح موجفينك
والسهم كون بعيني اولاعينك
عباس بعدك ظل وحيد احسينك
عل الغبره ينزف مذبوح واكتم الاه بصبري
*
جم طفله جم طفل اليتاني الجودك
إيعرفون ماتخلف وعد بوعودك
راح انه أگلهم طايحات ازنودك
طيحتك يم جرف الماي ياخويه كسرت ظهري
*
الليل جلجل وانه محد عندي
صحراء ظلمه والعيال بسدي
والدنيه بعدك يابو فاضل ضدي
مذهوله ومتيها الراي بس اليتامه بفكري
*
عل هزل اصعد والعده يشتموني
انه الاميره بغيبتك هضموني
وهسه السبيه گاموا ينادوني
اتمنه بعدك عباس اندفن كون بگبر