376
Кино және соның төңірегі: ойлар, рецензиялар, шолулар, т.б.
Код 3
Парамедиктің, бізше айтсақ — жедел жәрдем фельдшерінің бір күні
Фильм америкалық парамедиктің 24 сағаттан тұратын 1 ауысымын көрсетеді. Басты кейіпкер Ренди айтпақшы: бұл медицина емес, бұл кәдімгі қара жұмыс.
Шынымен де, жедел жәрдем жұмысының ауруханадағы дәрігер жұмысына қарағанда көп айырмашылығы бар. Оны фильм жақсы ашқан. Ситуация мен көтерілген проблема ауыр болғанына қарамастан, мұның бәрі юмор арқылы, басты кейіпкер Рендидің көрерменмен тілдесуі арқылы беріледі.
Күлдіріп отырып жылатады деуші ме еді, сондай фильм. Стилистикасы жағынан Дэвид Эйрдің "Патруліне" ұқсастық бар. Онда да екі патруль полицейінің бір күндік (плюс-минус) өмірі көрсетілген еді.
Рэйн Уилсон — атышулы "Офис" ситкомындағы Дуайт Шрут образымен жақсы таныс. Комедия рөлдерді жақсы бере білетін мықты актер. Сондықтан, бұл фильм жоқ дегенде іш пыстырмайтыны сөзсіз.
Драма / The Drama
Роберт Паттинсонды әуелден мықты актер деп есептеймін, бірақ Зендеяға көзқарасым толық қалыптасып үлгермеген еді. Бұл фильм оны драманы да ойнай алатын, күрделі кейіпкерлерді алып шығуға қауқарлы әртістер қатарына қосып берді өзім үшін (кешіріңдер, "Эйфорияны" қараған жоқпын).
Эмоция мен сезімнің барлық спектрін көрсететін әдемі картина. Кез келген жағдайдың артында контекст тұратынын ескертетін фильм. Киноға өз саласының суретшілері атсалысқаны көрінеді, түстер, интерьер, жарық — сахналардың атмосферасынан, кейіпкерлердің сол сәттегі көңіл-күйінен хабар бергендей болады. Фильм бір жақты түйін жасамайды, финалына нүкте қоймайды. Сонысымен қызық сияқты, отырып алып талқылай беруге болады.
2027 жылғы "Оскар" номинациялар қатарынан көрінетін шығар.
Жазбағалы көп болыпты :)
Scavengers Reign (қазақша "Өлексе жегіштер мекені" дейміз бе) деген қызық мини-сериалды аяқтадым. "Махаббат, Өлім + Роботтар" антологиясының форматына ұқсайтын қызық жоба. Анимация демесең, сюжеті, құрған әлемі, планетаның тіршілігін суреттеуі — ғаламат.
Рекомендейшн.
Биыл "Оскардың" үздік фильм номинацияна кілең жақсы фильм кіріпті. Өзім үшін анық фаворит жоқ, әрқайсысы өзінше мықты.
Бірақ үздік әйел рөлін Джесси Бакли ("Хамнет") алуы керек.
2026 жылы көрген алғашқы екі фильм — екеуі де рекомендейшн
Аңдар патшалығы / Le règne animal (2023)
Белгісіз себеппен адамдар біртіндеп хайуанға айнала бастағаны туралы француз антиутопиясы. Әйелі аңға айналып кеткен соң ұлын осы індеттен қорғауға ұмтылған отағасының оқиғасы.
Heldin (қазақшаласақ — Батыр әйел дегенге келеді, орысша релизі "Ночная смена"), 2025
Ауруханадағы медбикенің бір ауысымы. Медицина қызметкерлерінің жетіспеуі біз сияқты дамушы елде ғана емес, дамыған елдердің де проблемасы екенін түсінесің. Көрермен медбике болып істейтін әйелдің қасында жүргендей болады. Өте әсерлі кино.
Менің атым Қожа 2: Жаңа саяхат
Классикаға айналған "Менің атым Қожа" фильмінің сиквелі деп ұсынылған картинаның цифрлық релизі шықты.
Не дейін? "Менің атым Қожа" сиквелге де, приквелге де, спин-оффқа да, ремейкке де мұқтаж емес туынды еді. Біз оны түпнұсқа деп қабылдаймыз, болды. Басқа формада, басқа интерпретацияда қабылдай алмаймыз. Біздің түсінігімізде — Қожа әлі де сол ауылда, сол мектепте тіршілік етіп жатыр. Ол есейген жоқ, ол өзгерген жоқ.
Жаңа фильмді өз басым канон емес, фанфик деп қабылдадым. Түпнұсқа фильмдегі кейіпкерлерге ұқсас актерлер алынған, сол фильмге ұқсас локациялар, ұқсас антураж таңдалған. Болғаны осы. Әрі қарайғы іс-қимыл — сценаристер мен креавтившілердің қиялы.
Елестетіңіз, араға 15 жыл салып Гарри Поттердің жалғасын түсірсе — тек түпнұсқадағы актерлердің орнында соларға сырт келбеті ұқсас актерлер болса, ал сюжеті ешбір трансформацияны көздемейтін атүсті құрастырылған болса қабылдар ма едіңіз?
Қашқын / The Running Man
Уақыт өлтіруге тамаша фильм. Экшн да, юмор да молынан. Оның үстіне әлеуметтік мәселелер, қазір өзекті болып жүрген — фейк ақпарат, дипфейк, пропаганда жайы да қозғалыпты.
Арни ойнаған түпнұсқа фильмді балақай кезімде көрдім, сюжеті толық есімде жоқ. Ол фильм көңіл көтеруге арналған таза экшн болған сияқты, ал жаңасына күн тәртібіндегі мәселелер қосылыпты.
Көріп тастауға болады.
Отандық кино арасынан — техникалық орындалуы, актерлер ойыны, диалогы, түс коррекциясы — бәрі көңілден шыққан фильм болды мен үшін.
Әлеуметтік желіде дым түсінбей шықтық деп жазғанды да, "неткен картина, шіркін-ай" деп тебіренгенді де көп кездестірдім. Екі тарапты да түсінемін, өйткені, бұл өткінші емес — толғануды қажет ететін кино.
Қазақта "бақұлдасу" деген сөз бар. Қазір бұл сөз қолданыла ма — білмеймін. Не туралы деп сұрасаң, бұл бақұлдасу туралы фильм. Біреу жеке қасіретіме қатысы бар деп қабылдар, біреу тұтас елдің қасіретін метафораға жатқызған картина деп түсінер.
Мінсіз фильм демеймін. Маған, мысалы, кейбір жерінде музыка сүйемелдеуі артық болып көрінді. Күрсінуге арналған мелодрама сияқты болып кетіпті сол жерлері.
Бірақ идеясы, оны көрерменге жеткізу жағына келсек — жыл фильмдерінің бірі дер едім. Фестивалдік әлеуеті де зор деп ойлаймын.
Басы тәп-тәуір келе жатты да, соңғы серияларына келгенде авторларда қиял жетпей қалғандай көрінді.
Читать полностью…
The Boiling Point / Точка кипения
HBO биыл 4 сериядан тұратын "Adolescence" / "Өтпелі кезең" мини-сериалымен бір дүркіретіп еді. Соны түсірген Фил Барантинидің бірнеше жыл бұрынғы жұмысына тап болдым. "The Boiling Point" / "Точка кипения" деп аталатын драмада басты рөлде Стивен Грем ойнайды ("Өтпелі кезеңде" әке рөлімен белгілі) және бұл фильм де "Өтпелі кезеңдегідей" бір кадрмен түсірілген. Бұл алғашқы секундтан-ақ көрерменді шиеленіскен ортаға атып ұрады, ақырғы титрға дейін кейіпкерлермен бірге тызақтап, жаныңды қоярға жер таппайсың. Бұған "монтажсыз кадр" тәсілі әсер етсе керек.
Фильмнің артынан 4 сериядан тұратын мини-сериал түріндегі жалғасы (2023) шықты. Фильм ұнаған болса оны да көру уәжіп.
Дэвид Ф. Сандбергтің қолынан шыққан хоррор фильмнің барлығы жақсы деп ойлаушы едім. Соңғы жұмысы "Until Dawn" сәл сылдыр болып кетіпті. Сюжеті оригинал болмағасын шығар деп түйдім, Sony Playstation шығарған ойынға сүйенген картина екен. Рекомендемеймін, бірақ режиссерден күдер үзбеймін.
Читать полностью…
Астанада ЕХРО кешенінде түсірілген шетелдік фантастикалық фильмнің трейлері шықты. Басты рөлде — Том Фелтон ("Хәрри Поттердегі" Драко Малфой).
https://www.youtube.com/watch?v=PgKIPAtFCWo
"Субстанция" шыққанда боди-хоррор тақырыбы көп қозғала бастады. Бірақ оған дейін де бұл тақырыпқа қалам камера сілтеген Алекс Гарландті атамасақ — көзі қарақты көрермен деген атағымызға сын болар еді. "Men/Род мужской" — боди-хоррордың жарқын үлгісі. Ал көтерген тақырыбына қарап режиссерді көреген деуге болады.
Егіздер Дэнни және Майкл Филиппу фильммейкер болмас бұрын ютубта треш роликтер жариялап, сол арқылы танымал бола бастаған екен.
Бір қарағанда жай тентектік болып көрінсе де, роликтерінен бір таланттың иісі байқалатын дейді көзі қарақты көрермен.
Роликтер продюсерлердің көзіне түскен соң егіздер "Бабадук" фильмінің түсірілім алаңына шақырту алыпты. Алғашқыда барып кел-шауып кел жұмыстарды атқарған.
Олардың дебют жұмысы "Talk to Me" (орысша прокатта — "Два, три, демон, приди!") керемет табысты болып шықты. Сыншылар да жақсы бағалады.
Ағайындылардың екіншісі жұмысы — "Bring Her Back" ("Верни её из мёртвых") фильмі де жақсы баға алып жатыр. Тіпті 2025 жылдың үздік хорроры дегендер бар.
Өз басым осылай деп түпкілікті шешім шығаруға асықпаймын. Бірақ хоррор сүйер қауым назардан тыс қалдырмауы керек деп есептеймін.
Оммаж қалай кетті?
Кадрлар: Әділхан Ержановтың "Дала қасқыры" (2023)
және
Джеймс Менголдтың "Логаны" (2017)
300 жазылманға жету деген бір психологиялық белес болып көрінеді де тұрады 🙂
Киносүйер достарыңа бір насихаттап жіберіңдерші, өтініш. 300 оқырманға жетіп жаным бір жай тапсын 😊
"Музыка ойнап біткенше қашып үлгер". А-А-А-А! — деп шыңғыратын Тэрон Эджертон әлжеліде хит болып жатқанда осы бір тамаша актер ойнаған мини-сериалды ұсынайын.
Қара құс / Black Bird деген 2022 жылғы мини-сериал, алты-ақ бөлім. Сюжетіне өмірде болған оқиға алыныпты: есірткі сатамын деп 10 жылға сотталған кейіпкерге федералдардан ұсыныс келеді. Ол психикалық ауытқушылығы бар қылмыскерлердің түрмесіне ауысып, 20 шақты жас қызды зорлап өлтірді деп күдікке ілінген адаммен дос болып, жасаған қылмыстарын ашуы керек.
Бір қиындығы сол — әлгі күдікті шынымен псих па, әлде псих болып көріну үшін әдейі рөл ойнап жүр ме — дәл басып айту қиын.
"Байқа! Алаяқ!" — егде жастағы адамдарға көшеде кезіккен, болмаса телефон шалған бейтаныс адамдарға сене беруге болмайтынын түсіндіруді мақсат еткен фильм.
Қазір банк шотынан ақша ұрлау, адамның көңілшектігін пайдаланып алдап кету өршіген заман. Осындай алаяқтық істердің егжей-тегжейін комедия арқылы, отбасы қарым-қатынасына құрылған сюжет арқылы түсінікті тілмен беруді шешіпті авторлар.
Абсурд тұстары да, келіспей қалған жерлері де бар енді. Бірақ әке-шешеңді ертіп бір күліп қайтуға болады деп ойлаймын.
Ернар Нұрғалиев комедия түсіруге төселіп алды. Жылына екеуден-үшеуден ұра береді. Кезінде "Жаным, ты не поверишь" біраз шулатып еді. "Әкеңнің баласы" да экшн мен ситуациялық комедияға толы фильм болып шығыпты.
Кезінде Пьер Ришар мен Жерар Депардье ойнаған "Папашиді" еске түсіреді. Демалыстың кешін қысқартып, бір күліп алуға лайық дүние шығыпты.
Қазақстанның стримингтерінен іздеңіз.
Аватар: От пен күл
Аватар әлемі, соған қолданылған киноның озық технологиялары Джеймс Кэмеронның бағы да, соры да болды. Өзі планканы көтеріп беріп, көрерменін тым еркелетіп алды.
Үшіншісіне техникалық тұрғыда мін айта алмайсың. Бірақ мына кереметтің бәрін бұрын көргенсің, таңғалдыра алмайсың. Сюжеті де екіншіні қайталайды деуге болады, тіпті сюжеттің кейбір тұстары бірдей ме деп қаласың.
Эмоцияңды оятатын, кейіпкерге шын жаның ашитын сәттер үшіншіге қарағанда екінші бөлімде көп болды.
Барып жатсаңдар қазақша дубляжын көріңдер.
Батырбек досым екеуміз тағы бір досымыз — Ақеркенің подкасына барып, "№37" фильмін талқыладық. Аздап спойлер бар, сақ боласыңдар ғой. Өйткені сюжетіне қатысты теорияларды талқыладық, бұл жерде сюжет ашпаса тағы болмайды.
Тыңдау
Билігіміз қазақша дубляждың дамуына аса үлес қоспай жатса да (биыл үкіметтің қолдауымен бірде-бір фильм/мультпильм дубляжданбады), Disney ақшасын аяп жатқан жоқ. Киностудия әртістерімізге өз қалтасынан төлеп, тағы бір жаңа жобасын қазақ тілінде дубляждап шығарды.
"Аңдар шаhары 2" кинода – бейсенбіден бері. Дегенмен, әдеттегідей орыс тіліндегі сеанстардың саны әлдеқайда көп. Астананы алсақ... Ертең қала кинотеатрлары мультиктің қазақша нұсқасын 21 рет көрсетпек, ал орысшасын – 76 рет.
KZ дубляж да, RU дубляж да Қазақстанда жасалған. Дубляж режисөрі әрі әктөрі – Шах-Мұрат Ордабаев. Клохаузер деген томпақ гепард полицейді өзі дыбыстаған (екі тілде де).
Фридом медианың өніміне шүйліккен екенмін, тағы біреуіне тоқталайын:
"Адасқан" — детектив стиліндегі сериал деді. Бастапқы 1-2 сериясы тартымды болды, кейінгілері есінетіп, жалықтырып жіберді. 6-бөліміне әзер жетіп, аяқтамай жауып тастадым. 30 минуттан тұратын 6өлімді үзіп-үзіп қарап, 2 күнге создым. Тым іш пыстырарлық.
Операторы - Азиз Жамбакиев. Берлиналеде "Күміс аю" жеңіп алған кезінде. Бірақ, кадрлары мемлекеттік телеарналардан көрсетілетін арзанқол сериалдардан айырмасы жоқ. Тіпті, облыстық телевидениенің операторы түсірді ме деп қалдым бастапқыда.
Қазақтың Албастысы
Әділхан Ержановтың "Қазақтың қорқынышты ертегілері" сериалындағы Албастыға қарап: "өзіміздікі, қазақтыкі" (озыныкы ондырысты) дегің келеді.
Білмеймін, сөзбен айтып жеткізе алмаймын, бірақ осы жиіркенішті сұмырайды көргенде — түрін жасаған адам батыс киносындағы клишелерді көшіріп ала салмай, қазақтың дүниетанымын біліп істегенін ұғасың.
Сонда бұлар Бекіре - Осетр, ал Икра - Уылдырық екенін білмеген бе? Бекіренің уылдырығы қара болатыны рас, бірақ балықтың өзі ақ немесе сұр түсті болады ғой.
Сериалға "Қара бекіре" деп ат берген кезде басқа нәрсені меңзеді деп үміттенемін. Әйтпесе, атау қисынға келіңкіремей тұр.
"Бөө" атып шығып, кенеттен шошытуға арналған хоррорлардың дәуірі емес қазір. Хоррор жасаушылар қазір үрейдің артына әлдебір авторлық идеяны, әлеуметтік мәселе қосып, тіпті болмаса визуалымен таңғалту арқылы жаңашылдық әкелуге тырысып жүр осы жанрға. Сол трендтің арқасында біраз хоррор режиссерлер алдыңғы планға шығып алды.
Солардың бірі - Зак Креггер. Мистика мен реализмді араластыра отырып, көрерменді экранға телміртіп қоятыны бар. Әзірше екі картинасы бар, екеуі де қатты рекоменделеді:
- Варвар / Barbarian, 2022
- Орудия / Weapons, 2025
Джеймс Ганның "Супермені" қанық, жарқын түстер арқылы балалар аудиториясын көбірек қамтығысы келгендей. Бірақ, сюжетте елдер арасындағы соғыс — өмірде болып жатқан қазіргі жағдайға сілтеп, көрерменін геосаясаттан хабардар болуға итермелейді. Әрі сүліктей жабысып сүйіскен көріністер балалар көретіндей нәрсе емес. Қысқасы, екіұдай ой тастайды екен.
Кейіпкердің фанаты болмасаңыз өткізіп жіберсе болады екен. Бұрынғы Снайдер салып кеткен салмақтылық жетпей тұр.
Қатты әсер еткен бір сахнасы бар. Бірақ ол спойлер болады. Сондықтан оқу-оқымауды өзіңіз шешіңіз:
Диктатор басқаратын бір агрессор ел көршісінің шекарасына басып кіргенде, әлсіз елдің халқы жерін қорғау үшін жалаң қолмен қарсылық танытады. Нөпір халықтың арасынан екі бала Суперменнің белгісі бар жалауды көтеріп, қаһарманды көмекке шақырады. Осыған қарап: шынымен қазір Украинаға Супермен сияқты жойқын күші бар біреу келіп көмектеспесе, қазіргі жасалып жатқан әрекеттің әсері ел мен жерді қорғауға аздық етіп тұр деген ой келді.
Еске бір түсе қалады да, бастан кетпей қоятын фильм бола ма? 1990 жылдары көрген, әлдеқашан ұмыт болған бір фильм сөйткені бар. Белгісіз себептермен еске түсіп кетті де, қалай да соны қайтадан тауып көруім керек деген ой маза бермеді.
Бұл ынтазарлық бірнеше жыл бұрын басталды. Актерлері де, сюжеті де ұмыт болған. Тек бір мезеттік үзінді ғана есте қалған. Сол бойынша іздеуді бастадым.
Іздеу жүйелері көмектеспеді, соңғы кезде ChatGPT пайда болып, содан үміттеніп едім — одан да қайыр болмады. Сюжеті ұқсас фильмдерді біраз жағаладым. Нәтиже болмады. Таба алмайтыныма мойынсұнып, күдер үзе бастағандай болып едім. Кенет... ТикТок лентасынан кездейсоқ тап болған бір үзінді көзге оттай басылды. Дәл өзі!
Сіздерде де сондай жағдайлар бола ма?
Ұсқынсыз өгей сіңлі / The Ugly Stepsister
Кәдімгі, классикалық "Күлшеқыз" ертегісінің боди-хоррор стиліндегі нұсқасы. Норвегтер бас қатырып отырмай, фильмге "Құрбансыз сұлу болмайды" деген көпке мәлім моралді тірек етіп алыпты.
"Субстанцияны" ұнатқандардың көңілінен шығады деп ойлаймын. Жүйкесі жұқа адамдар қарамай-ақ қойғаны дұрыс болады-ау.
Егер осы хоррорды көрген болсаң және ол саған ұнаған болса, мына фильм де көңілден шығуы тиіс: "Вопль" / "El llanto" (2023).
Жай қорқыту үшін емес, әлеуметтік астары бар хоррорлар ұнайды.