Telegram-канал lakvahid - صدای مردم لک: Unsorted

صدای مردم لک

03 Jun 2025 12:30

‍ «متل لکی»(پاچا)
«میره خُصه»
بیه دتی تموم باوه ئو دا ئو برا ئو فامیللی کُل مردوین ، کسی ناشدی تا لا بهی ارینو و پرو لار بوئنی.یه روژ سر ناتی ور ئو چی ویرو بیاون و شیریلی هنی.هر چی هرچی ، آویونی بگر ئو بیاونی ورده .تا رسیه قلاو قلاچکی.دیتی در ئی کوشکه وازه ، چیو نوم ، دیتی ار سر تختی جوونی دریژرا بیه خدا و قدره مزانتی . جوُن تموم بدنی پر اج درزن بی .ار بلنگ سری کتاوی بی.دت گِ ساواد داشتی دیتی نویسیایه :هر کسی هر روژی یه پره اج ئی کتاوه بخونی ئو یه درزن ئی بدن ئی جوونه باریه دریر ، وخدی گِ درزنل تموم ایر آوردیِ ئی جوونه زنیا ماوُ ئو ماوازِتی ئو ماوه صایی ئی قلاو قلاچگه.
دت گِ ئی بی کسی هیواوُی دس کردیه خونن کتاو ئو ایر اوردن درزنل .چند روز گذشت هر چند درزن هنی منویی ، وتی بچم هوایی بیرم ئو بام عه باقی درزنل بارمی. داتیه دریر دیتی یه دت بدگل و بد ماژیکه دیری مگیری. وتی چات هونه خُلکت پره؟ وتی: والله م دت بی کس و کاریکم، ار تک یکی کلفتیم کردیه ، ئیسگه کردمسیه دریر ئو تار کردمسی.
دس آیشدَر مل ئو ئسرل پاکا کرد و آوردِی مال .دت بد ماژی بیتیه وردس و هر سیله مهردی بینم چه مهی. اویش ساواد داشدی،کتاو خونی و ای درو وژ میش کردویتی.وخدی گِ کتاو رسی ئی پره آخر ، بد ماژی یهات یِ پره خونی و درزن آخر آوردیه دریر. جهال زنیا بی و دیتی دتی هایتیر ور دم . هر چن بدگل بی ولی چوین شرط بویی و نکاح وژ ایر آورد. دته رنگینه بیتیه وردسی و فربون ارینه موئرد.
آدت صو تا ایواره کار بویتیه گیری و زاری و خصه هواردن.
یه گذشت تا یه روز جهال وتی میا بچم اری شیَر هر کوم هر چتونی مِی بوشن تا ارینتو بارم . دته بدگله وتی کراس بقلی بقو ، کلاش سقری،گردِوَن طلا و شاوال هفت چرخ و گلونی رنگ ئو رنگ و بان سرونی و لالرزونه و نوم ممکی و هل و میخک و سرداری مخمل و کلنجه زر بفت و فوته و لچک و فریت کاو و چه و چه و چه . گی هات دته رنگینه وت: تو چته مِی؟ وت : م هویچم نمی فقط میره خُصمی ارینم بار.جهال واسرنگا برد و ارتک وژ وتی یه دیر چه هیستنیکه؟
وخدی ئی شیر هاتی دوما ، هر کوم سوقاتیل دانیه بی . جهال هر قلاور دته رنگینه بی .چوین میره فروش وتویتی هر کسی و گرد ئی میره راز دل بوشی یا میره شیقا میرتی یا وژ.
جهال دیتی دته رنگینه چی ئی پادیواری هر گیریا و درد دل و گرد میره کردی و هر اج اول کُل چی ار بیو دا.ئسگه وتی: ئی میره مِ هونه دردم سنگینه ، تو طاقت شنفتن نیرینی ، یا تو شیقتا بیر یا مِ.دت میسدی شیقا بیرتی، جهال رسی و گرتی بخل ، وتی: دیر بسه کُل چی فیمیم.
ئی دواره دته رنگینه و چن دسه ساز و دوهیل داوات کردی و دته بد گله کرده کنیژ.
هونه یاونه رسینه کوم وجوم کُل دوسی برسی.
ئی دسم پرو ، ئه دسم پرو، هرچمی وت کُل درو.

#مهدی_زینی

صدای مردم لک
/channel/lakvahid