الشاعر الحسيني ظاهر حبيب الهليجي (للسيدة فاطمة الزهراء ع)
رحلتي بدمعه وبعبره
وداعاً فاطمه الزهره
*
الله وياج رحتي وضلعج امهشم
حدر الگاع ما يبطل نزيفه الدم
وجرحج للحشر مولاتي مايلتم
عله أصحاب السقيفه لا ولايبره
وداعاً فاطمه الزهره
*
رحتي وريحت الدخان بثيابج
وبگلبج سعير النار من بابج
ولحد هسه دموعج تشكي بعتابج
والمحسن مصابه بداخلج جمره
*
غفت عينج غضب من ذاك اولهم
وذاك الي هجم عل دار صاحبهم
تظل مشؤمه للتاريخ سيرتهم
غايتهم نوايا السوء للعتره
وداعاً فاطمه الزهره
*
حرگوا بابج وبابج بقه قبله
عليه مكتوب كلا كلا للذله
اليريد الحق يقره وهوه يندله
وتاريخ المزيف ينتهي امره
وداعاُ فاطمه الزهره
*
ظلموج بقساوه صحبة المظهر
ولا راعوا أحاديث النبي الاطهر
المعروفه فدك موروثه للكوثر
اولهم اخذها وأتضح غدره
وداعاً فاطمه الزهره
*
وحگ حيدر علي يابظعة المختار
عهد يبقه الدمع لمصيبتج مدرار
وعله مصابج نخلي عل صدر آثار
الجفوف الأيد تبقه علصدر ذكره
وداعاً فاطمه الزهره
*
يظل ضلعج ألم بينه أعله طول البين
ماننساه للمحشر وحك حسين
وألج مهما نقدم احنه المقصرين
اشفعي بيوم نار الباري مستعره
وداعاً فاطمه الزهره
الشاعر ظاهر حبيب الهليچي ( استشهاد الزهراء ع)
يمه گلبي بل عبره انچوه
يمه صعبه اشتمه الهوه
يمه بعيني مذبوح الضوه
يمه
*
انه زينب وادعي ربي بهل مسيه
ويه روحچ روحي تطلع يل زجيه
وبگبر واحد يدفنونه سويه
والله بعدج عمري طشيته بديه
رحتي وانه ابقه بعبرتي
رحتي وانتي كلشي بديتي
رحتي جرحي ماصحله دوه
يمه
*
يل مشيتي والحزن حته بخيالي
يالحنينــه شلون بيتج يبقه خااـي
هل مسيه ودمعتي عگبج تلالــــي
يمه غير الموت بعدج ماحلالي
زينب يمه دمعتها دمه
زينب يمه حيل مألمه
زينب هيه والميته سوه
يمه
*
والله دنيه ابلايه أم ما تسوه كلشي
شلون افارگها التي بشرياني تمشي
ادعي الله بعد نعشج كون نعشي
من النحيب عيوني سالن وي رمشي
ياروح تبقه بعد أم الحسن
ياروح يعني ابقه ابلا وطن
ياروح گلبي بهموم ارتوه
يمه
*
اتشيب أمن الزغر كلمن تفكدُ امهــا
الوالده البتها مثل ثوب ويلمــهـــا
خلاف امها بعد المن تشكي همها
هيه بس الام تره اتحس بألمهـــــا
ونيت گلبي بلونه انصهر
ونيت بعدج وظهري انكسر
ونيت عمري دفتر ونطوه
يمه
*
صحت والعبره بدليلي وعيني تدمي
شتسوه ايامي بعد من راحت أمي
راحت الجانت سنيني كلها يمي
هيه روحي وفارگة هل الليله جسمي
آهات ذوبت حته العظم
آهات والله من گد الهظم
آهات جسمي بمصابج خوه
يمه
الشاعر ظاهر حبيب الهليجي (استشهاد سعيد ابن جبير)
منهاج الطف منهاجك ----- شيدته ابدم اوداجك
يسعيد وأصبح تاجك ----- دم الشريان
---
مظلوم وصبح نحرك ثمن حبــــك
شلت حب الحسين بروحك وكلبك
عاشك للشهاده واصبحت دربــــك
تعله بهل النهج مولاي يم ربـــــك
لا للحجاج وحكمه ----- دمك خط هاي الكلمه
نبراس وشع للأمه ----- دم الشريان
---
يا ثالث ذيبح وراسه يتكلـــــــــــــــم
نطق بأسم الجلاله واشتكه امن الهم
سعيد ابن الجبير وللفخر معلــــــــــم
نبع نحرك سليل الزود بتوســـــــــــم
ثبت تاريخه بنحره ----- مكصد للهايم گبره
وفاي الأبن الزهره ----- دم الشريان
---
امتلا گلبك يعالي الشان وتصــــــدر
على العالم عشكت المرتضى الاطهر
وثمن حبك هديته من دمه المنحــــر
هنيأ يا سعيد الجنه والكوثــــــــــــــر
نورك ساطع للتالي ----- كبرك شامخ ظل عالي
مهيوب ويبقى يلالي ----- دم الشريان
---
انثلم سيف الحقد يم منحرك يسعيد
عدت طف المواجد والروايه اتشيد
صرت مثل الحسين ابموقفه اوي يزيد
رسم صوره ثباته والزمان ايعيد
ذليت الطاغي وربعه ----- ولاهبت اسيوفه وجمعه
ويشهدلك رب السبعه ----- دم الشريان
---
هليله الك نهمل مدامعنـــــــــه
ذكرك يالحبيب حسين يجمعنـه
عهد مولاي الك تبقه مجالسنه
بحبك على المأتم والله عاهدنـه
مولاي بيوم امصابك ----- نادت بالحسره احبابك
حزنانه وكلهه ابابك ----- بدم الشريا
الشاعر ظاهر حبيب الهليجي (العسكري ع)
هاي المسيه كلها بعزيه لبن الزجيه
قيموا العزاء. قيموا. العزاء
،،،،،،
الكواكب والنجوم إعليه منفجعه
الك حته الارض يل عسكري تنعه
عظيم انته وألاهك خله هل رفعه
فرض مومستحب واجب الك دمعه
نسل النجابه كلها بمصابه. تبچي إعله بابه
قيموا العزاء. قيموا. العزاء
،،،،،،
حته الطير لمصابه بچه لجله
والاشجار چنها أدموع تهمله
يعين الله الامام الي فگد خله
ابوه العسكري پكلبه الحزن خله
يدوي نحيبه فاگد حبيبه. المهدي لهيبه
قيموا العزاء. قيموا. العزاء
---
محد بل بشر يصبر مثل صبره
عله الشافه وشهوده بهاي سامره
بمأسي من بني العباس كل عمره
السبب واضح لأن ذرية الزهره
كل المظالم. من الشراذم لن امه فاطم
قيموا العزاء. قيموا العزاء
---
لون ضيمك عله هل الناس يتوزع
تصيح الغـوث منه تجزع وتهرع
لچن انته الرضاة الباري تتضرع
شما زادت نوايب ليك ما تجزع
ماكو بصفاته صابر حياته. والحد مماته
قيموا العزاء. قيموا. العزاء
---
موج الماي ترجم نوحه لمصابه
والليله الهوه مخنوگ يم بابه
والتربان راسم دمعه بعتابه
للمات وغريب مفارگ احبابه
الشيعه تنعه صارتله دمعه الليله تودعه
قيموا العزاء. قيموا. العزاء
---
الشاعر الحسيني ظاهر حبيب الهليجي (العسكري ع)
مظلوم الحسن مظلوم بسامره رحل مسموم
****
طبگ جفنه بمرار وهم
من گد الهظم والغم
وچبده الي يخذمه السم
حيله أمنل ظلم مهدوم
---
رحل والروح بل احزان
من حقبة بني الشيطان
بسم چبده صبح قربان
مات وجرحه ضل ملچوم
---
عاشر من بني الزهره
موته پگاع سامره
مو مرم الف مره
ودلاله يفيض اهموم
---
خلف قضبان بلدمعه
وسجنه الحالته ينعه
ينوح الحاله والوضعه
يرحل والجبد مخوم
---
وليله الماطلع صبحه
باقي للحشر جرحه
ولا مره الامل لمحه
بصر وبداخله مظيوم
الشاعر الحسيني ظاهر حبيب الهليجي (للامام العسكري ع)
مفجوع. گلب الزهره
ودموع. تهمل حمره
*
للحضره اجت بل نوح متحزمه
لبنها العسكري المظلوم متألمه
بونين الفاگده والمدمع اتكلمه
تگله بداخلي يبني الك حسره
مفجوع. گلب الزهره
ودموع. تهمل حمره
*
سم جبدك احسه بجبدي واتلوع
ومثل ماجبدك اتكطع أنه اتگطع
بنحيب وآه والعبرات والمدمع
حسن يبني دليلي بي الف جمره
مفجوع. گلب الزهره
ودموع. تهمل حمره
*
بوطان المبغضه وقله من أيحب
صار الموت عندك يلحسن ارغب
لان كلها سنينك بيها تتعذب
من سجن السجن ماشايف الگمره
مفجوع. گلب الزهره
ودموع. تهمل حمره
*
يرد بيه مصابك يبني للمظلوم
بخيالي صورته من وذروه الگوم
وثلتيام عل غبره بلايه اهدوم
وعظامه عله الرمضاء مطشره
مفجوع. گلب الزهره
ودموع. تهمل حمره
*
مصابك أهون أمن حسين وايتامه
عله عياله ييمه حرگوا اخيامه
وبعد أكثر حوافر طحنت عظامه
ومات ومنحرم ماظايگ الگطره
مفجوع. گلب الزهره
ودموع. تهمل حمره
الشاعر الحسيني ظاهر حبيب الهليجي
يلمهدي اليوم حيلك مهدوم
بسامره اتنوح والدمع ادموم
آهاتك من تشكيها بس الله اليعرف بيها
يلمهدي اليوم يلمهدي اليوم
*
بمصاب العسكري هل الليله يم بابه
لفه المهدي ودمعته بعينه سجابه
بخياله انعاد ظلم الصار واسبابه
لبوه أونار صدره أعليه لهابه
بعينه الدمعات بصدره العبرات
مهدوم الحيل ونار الحسرات
جلماتك من تحجيها بس الله اليعرف بيها
يل مهدي اليوم يل مهدي اليوم
أنفاسه تلجمه والهوه مخنوگ
بصدره علمصيبه والگلب محروگ
وبعيونه الضوه كثر الدمع مبيوگ
المناحه للأبو من ابنه مثل الطوگ
يعيش الياويل ودموعه تسيل
يبقه أبلياه مايملك حيل
واهاته الي يحويها بس الله اليعرف بيها
يل مهدي اليوم يل مهدي اليوم
*
جم جرح ابجرح هليله تتذكره
من كسر الضلع حد يوم سامره
عشتهن لحظه لحظه وانت بلحظره
يا نار ابدليلك هسه الموجره
صرخات ايتام لودرب الشام
عايشها بنوح لونار خيام
نارك ياهو يطفيها بس الله اليعرف بيها
يل مهدي اليوم يل مهدي اليوم
ابوك احقاد صابوا جبدته بالسم
بمثل هل يوم وأنت تشوفه يتألم
البگه براسك مأسي ودوم ماترحم
جثيره إحباب فاگد أولها تتهظم
گلبك مجروح علظل مذبوح
فوك التربان والدم مسفوح
ايام الي تگظيها بس الله اليعرف بيها
يل مهدي اليوم يل مهدي اليوم
*
يل فاگد عزيزك الله الي يعينك
مظيوم وعله خدودك دمع عينك
ايام وليالي ماهده اونينك
عشتها بل مناحه سيدي اسنينك
ياراعي الثأر بخدوك صار
دمع التبجيه لجل الاطهار
لجماتك من ماضيهه بس الله العرف بيها
يل مهدي اليوم يل مهدي اليوم
الشاعر الحسيني ظاهر حبيب الهليجي (استشهاد رسول الله)
ياعلي هل الليله روحك هايمه
من دفنت الهادي ياراعي الحمه
*
يعينك الله يا أمير المؤمنين
من ترد الفاطمه بدمعة العين
ياعلي بوداع سيد المرسلين
سيدي الحالك بجت أرض وسمه
*
شحال گلبك من جفن عينه غفه
شحال گلبك من دفنت المصطفه
شحال گلبك والدمع ماظن كفه
ومن تشوف الدار وحشه ومضلمه
*
شحال لو نشدوا عليه سبطينه
بويه جدنه اليوم مامر بينه
شيقنع الليله الحسن وحسبنه
هنانه انفاسك اظنها الخاتمه
*
ياصبر من تدفن الهادي بديك
وهوه عينه ياعلي تدمع عليك
يدري بعده النايبه منهم تجيك
يدري بصحاب السقيفه المجرمه
*
يا مرار أتعيشه من بعد الابي
وانت المفارگ اخو مو بس نبي
تودعها وترد اظن دارك حبي
دموع عينك سيدي نزلت دمه
*
الشاعر الحسيني ظاهر حبيب الهليجي(أستشهاد رسول الله ص)
وحشه دنياي رد يمنواي
بويه لو أذن بلال تنفجع روحي
*
انه الزهره يبو الزهره الك نوحي
بلال أشما يأذن يلجم أجروحي
أسمك من يذكره تنفجع روحي
أحس دنياي بعدك للحزن توحي
ونة الليل تهدم الحيل
بويه لوأذن بلال تنفجع روحي
*
عليك أبكل اذان ادموعي تكطر دم
أشما يشهد بلال أبكل صله أتألم
أجر گوه النفس وگليبي يتخذم
عگب عيناك تراها الدنيه ماترحم
عايشه هموم حالي كل يوم
بويه لو أذن بلال تنفجع روحي
أخلصه الليل وانه دمعتي اتلالي
اعاتب بيك بويه وجنك أگبالي
واگلك يل عفتني ناظر الحالي
ادعيلي يعجل موتي يل الغالي
ارجه ملگاك وبقه وياك
بويه لو أذن بلال تنفجع روحي
*
أون أعليك والشهگه بأثر شهگه
مرني بطيف بويه أعليك مختنگه
احظنك حيل گد ما جانت الفرگه
ونذر عمري اطشه بساعة الملگه
ذابت الروح تدي الجروح
بويه لوأذن بلال تنفجع روحي
*
أحن وأشتاگ الك يامنبع الرحمه
أشيقنعهن عيوني أعليك متعلمه
تهيم الروح بويه أو ثوبك أشتمه
يبو الزهره عليك الزهره متألمه
جنحي مكسور دمعتي تفور
بويه لو اذن بلال تنفجع روحي
ختامآ يا رسول الله طلب منك
تدعيلي اموتن حته اشوفنك
وبلهفه حناني وشوگ احظننك
وأقبلهن اديك وحيل أشمنك
گلبي لهاب جن شمع ذاب
بويه لو اذن بلال تنفجع روحي
الشاعر الحسيني ظاهر الهليچي (استشهاد رسوله الله)
ألك مدمعنه ردد --- وداعا يا محمد
*
وداعا والدمع يلهج عله أمصابك
رسول الله ترانه أنعيش بطيابك
أحاديثك مناهج ألنه بغيابك
يريت اليوم كون التعزيه أبابك
والحزن يتجدد --- وداعا يا محمد
*
رزيتك والخميس أنعيشهه بكل يوم
يبو الزهره رحلت بدمعتك مهظوم
تناظر بالوجوه أتشوف بيهه أسموم
ما همهم مصابك بس علي مهموم
عليك وحيله ينهد --- وداعا يا محمد
*
تاريخ الحقد يشرح مأربهم
ألتهو بالحاكميه وهذا واقعهم
شريعتهم بنوهه من سقيفتهم
ومصيبه فاطمه أول مظالمهم
نسيل أدموم عل الخد --- وداعا يا محمد
وصيتك للوصي غصبوهه بالبهتان
خلافتهم شريعه موت مو قرأن
ذبح وأرهاب للأسلام ظل عنوان
مسيل الدم ثمن حقبتهم وللأن
بصرختنه أنتوعد --- وداعا يا محمد
*
عهدنه لئالك ولجلك مئاتمنه
نذرناهه فداء الكم مناحرنه
رضينه أنموت وما توكف مجالسنه
ويجي يوم بحظرتك ينعه منبرنه
بجمعنه ونلبس أسود --- وداعا يا محمد
*
يثرب بالدمع هليله والحسره
يبو القاسم جمر فكدك فلا يبره
شما طال الزمن بينه ألك عبره
تظل مستعره للمحشر يبو الزهره
وعدنه وأنته تشهد --- وداعا يا محمد
الشاعر الحسيني ظاهر الهليچي (رجوع السبايا)
تعبانه حيل امن السبي وحيل السبي أذاها
لا أخوه زينب من اجت بس العليل وياها
*
يله يشيعه اتلگو زينب هايه
أمنل شام ردت لاكن بلا رايه
رايتها ضلت فوگ المسنايه
يم الذي ذل الفرات ومايه
متغيره حيل امن الالم ماتنعرف خلاها
تعبانه حيل امن السبي وحيل السبي أذاها
*
بمتون زرگه ردت ولا خوان
يا شيغه والهسه عطرها الدخان
وبچفوف اديها گيدها ضل نيشان
ازگوها بدموع البچي عل عطشان
هاي الأميره الصابره ضيمه الدهر راواها
تعبانه حيل امن السبي وحيل السبي أذاها
*
من بعد ما چانت زلم يحموها
تنام بخرابه زينب يخلوها
عطشانه بهموم وقهر يسگوها
فوگاها والناس بحجر يرموها
ياشيعه والحادي شتم حيدر علي وبچاها
مالومه حيل امن السبي وحيل السبي أذاها
*
هل الليله ابچوا عل اجت تعبانه
يا رافضيه امن البچي عميانه
چن شمعه زينب بل حزن ذبلانه
يم گبر اخوها الريحته عطشانه
يم الحسين بكربله والكافل اتلگها
تعبانه حيل امن السبي وحيل السبي أذاها
*
وياهه روس اخوتها ردت هل يوم
خلتها ويه اجسادها بدمع ادموم
ونصبت عزيه بأربعين المظلوم
ملچوم جرحچ يبقه زينب للدوم
ردت لهلها ابلا اهل لأرض النبي بمبچاها
تعبانه حيل امن السبي وحيل السبي أذاها
الشاعر الحسيني ظاهرالهليجي (الامام الحسن ع)
حسين المظلوم بچفوفه اليوم يدفن معصوم
ياصبر البي يتصبر ودلاله بعبره أتفطر
حسين المظلوم حسين المظلوم
*
رد حسين بل حسره ودمع جمره
الحسن هل يوم بيده نزله الگبره
اليضل ابلايه أخيه گلبه شيصبره
الاخو الفارگ أخيه ينكسر ظهره
رد ابلا روح ويون وينوح ومدمع مسفوح
رد بممشى يتعثر ودلاله بعبر تفطر
حسين المظلوم حسين المظلوم
*
رد گوه ايتوچه أرسومه متعوبه
چن دافن مهجته ويه محبوبه
ومن گد البواچي أعليه نگع ثوبه
وصبح أحمر لان دمعاته مخضوبه
متعوب اهواي ومتيه الراي شيصبره الهاي
لفراگ الغالي امگدر ودلاله بعبر اتفطر
أخو يدفن أخيه شلون من يرجع
أويطب للبيت بس نوح وبچي يسمع
إ يتمنه الموت وبغيره فلا يهجع
لأن فگد الاخو يا نوح اله ينفع
رد أبلياه موته اتمناه ومدفون وياه
ينحب والمدمع احمر ودلاله بعبره اتفطر
حسين المظلوم حسين المظلوم
*
ألاخو طبعه عزيز وللأخو تچوه
بدونه الدنيه هاي كلها ما تسوه
لأن يشعر بدونه بحاجه للنخوه
وبو اليمه رجع من الدفن توه
بدموع العين راجع وونين لفراگ الزين
ونيران الفرگه التسعر ودلاله بعبره اتفطر
*
الحسن لحسين چن انفاسه يشتمه
لون ليله يچل أوهوه مو يمه
شلون اينام وباله يضل رسمه
كل لحضه يذكره وينلچم لچمه
يبقه بعبرات ونار الحسرات بصدره وآهات
صبره بفرگاه يتعذر ودلاله بعبره تفطر
الشاعر الحسيني ظاهر حبيب الهليجي ( الامام الحسن)
ليلة أمصاب الحسن --- ودعه حسين بشجن
يگله خويه ردتك ألطف كربلاء
هناك تحضر شدتي --- من بلائي بغربتي
يا أمامي
*
حسين يم الحسن كاعد ينعه حاله
الموت ياخذ يدري أخيه لا محاله
عينه تدمع لجل أخيه والجراله
راحل ألفردوس جده شد رحاله
يكلمه بنوح وانين - راح أظل أبلا معين - وحدي مكسور الظهر في كربلاء
ردتك ويايه تظل - ويصبح هناك الاجل - نواجه جيووش الاعادي بكربلاء
هاذه منك طلبتي – من بلائي بغربتي
يا أمامي
**
ها يبن حيدر مصيبتنه سويه
جبدك وجبدي تخذمه أل أميه
أنت جبدك ذاب بالسم هل المسيه
وأني جبدي أسهام بالطف تقسي بيه
جبدك بسم أنفطر - وجبدي بسهام أنشطر - وجبدك أول نايبه من كربلاء
لاكن أنت تندفن - وانه أبقه بلا جفن - عل الرمل ضامي بدمائي بكربلاء
هاي سطر بمحنتي --- من بلائي بغربتي
يا أمامي
خويه نعشك أنه أشيله بدمعه العين
وكبرك أترابه أهيله بحسره وونين
والمصيبه بغاضريتي ولوعة البين
أنه والعباس نبقه أبلايه تكفين
أثنينه ننزف خضاب - موذرين أعله التراب - والرؤوس أعله الرماح بكربلاء
موذر أنه من السيوف - والكفيل أبلا جفوف - نبقه عل التربان في طف كربلاء
حكهه تنزل دمعتي --- من بلائي بغربتي
يا أمامي
*
بعدك أتدور النوايب وأبقه وحدي
بديرة أجناب وأعاين كلهه ضدي
أمذبحه أولادي وأخوتي وجرحي يدي
وأنظر لزينب سبيه ويجري خدي
بأخر أنفاسي شفت - وريت ما شايف متت - زينب بدمعه وحيده بكربلاء
أنظر بجفهه الحبل - وشاهدت سوط النذل - من يطك أختي بغيابي بكربلاء
ياظلامته ألتي --- من بلائي بغربتي
يا أمامي
*
دمعت أعيوني حجتهه مو كلامي
أمودع بشوك الاخووه يا أمامي
خويه للزهره وعلي وصل سلامي
كلهم حسين بفگدكم جفنه دامي
وصل لأمي كلام – وعني بلغها السلام – تواسي زينب من بعدنه بكربلاء
ولعلي أوطاهه النبي – خويه بلغ مطلبي – يجمعون أيتامي في طف كربلاء
أشكي يمهم حالتي --- من بلائي بغربتي
يا أمامي
الشاعر الحسيني ظاهرالهليجي (أستشهاد الحسن ع)
؛
إعليك يبن الزهره أقسم هل قسم
بل حسين واخته و براعي العلم
*
ابتدي وياك بل دمعه الكلام
يل القريب امن الله ادعي للأمام
الدنيه يا مولاي طفحت بلحرام
ذاك من داك الذي منها سلم
*
شيل جفينك يبن حامي الحمه
ادعي للتعحيل يم رب السمه
يظهر الاهل العروش المجرمه
سيدي الايام تطلگ بل ألم
*
سيدي رجوة محب وانت الكريم
ادعي للمهدي تره الدنيه جحيم
ظاع بيها الزين وتعله اللئيم
يعيش بيها الماله مقدار وحشم
*
اي وحگ امك صبح مر الزمن
ناس باعت دينها بابخس ثمن
وناس لاحظ وبخت تحكم وطن
والله من احجيلك يمل القلم
*
الحرام اصبح مباح بهل الزمان
واليريد الله صفه ماله مجان
وبي هاي الناس مبيوگ الأمان
سيدي والخوف بل ناس انرسم
لشاعر الحسيني ظاهر حبيب الهليجي ( كعديه للامام السجاد ع)
اهات ومدامع كل حياتي
متل النار تسعر ذكرياتي
من الغاضريه. والحد المنيه
*
زين إلإعباد وسنيني ظلن بطف المأسي
محني ظهري وسيل دمعي والحزن بعروگي راسي
انه ما ينقاس همي وتتعب بحمله الرواسي
كل لحضه انه بعبرتي
ليلي ونهاري بدمعتي
چن جمره تلهب حسرتي
والهدب شاب ويراسي
بعيوني صور ذبح الغوالي
ولوعات السبي وذيچ الليالي
عايش بلرزيه والحد المنيه
*
موقف إيذوب دليلي أذكر العمتي وخواتي
مگيدات اوديره غربه لحظه انهت كل حياتي
والاشد موتت رقيه الخلت الموت بلهاتي
ماتنسي ذيچ المحن
نوم الخرايب والشجن
ينعاد چن بيه الزمن
وادعي ساعتها المماتي
وجروحي تفز من چلمة اخيام
اذكر تحترگ واتطش الإيتام
لوعه اتعيش بيه ولحد المنيه
*
اشما اغمض عيني يسرح فكري ويعيش المواجع
يشوف صورة طفل ضامي وصوره للأكبر يوادع
وصورة تكطع نيط گلبي بيرغ العباس واكع
وانظر ابوي أعله الثره
واعضامه كلها امكسره
گدامي گطعوا خنصره
موقف ايهيج المدامع
وصوره للطفل بگماطه دامي
والسهم بوريده وهو ضامي
نيراني سريه والحد المنيه
*
شفت برزخ يوم عاشر وذيج الأهوال الرهيبة
جم يتيمه گبالي تركض وچم محب ينعه حبيبه
وعل التراب اجساد تدمي موذره بغيض وسليبه
جسام طفوا شمعته
ومن دمه صارت حنته
وامه تزوح وعمته
وأنه اصبرهه الغريبه
درب الشام آه اشسوه بينه
والناس بحجر ترمي علينه
منهم بس اذيه والحد المنيه
*
جم عزيز بأيدي المه وكتم بكلبي الرزية
وبالحوافر عيني شافت لحم ابوي الضاع ضيه
وشفت اخوتي اولد عمي موذره بذيج المسيه
انظر خواتي تنظرب
وايتام مچتوفه برعب
وعمتي دمعتها تصب
عل هزل راحت سبيه
واختم هل كلام بدعة العين
واسوني يشيعه يا موالين
ضليت بعزيه والحد المنيه
الشاعر الحسيني ظاهر حبيب الهليجي (للسيدة فاطمة الزهراء ع)
يظلموها ويهظموها
بعد فكد النبي الزهره
*
من بعد النبي شافت مآسي فاطمه منهم
وفتح باب الهظم والنوح ذاك الصار أولهم
الاخذ منها فدك بل زور وبين كل مئاربهم
زمره لا شرع لادين ديدنهم مصالحهم
وكتب تشهد عله الأوقد
باب الطاهره إيشجره
*
ظلموا فاطمه أونكروا رسول الأمه والدهـه
العصابه من بعد فگده كلهم اصبحو ضدها
وتاريخ الحقد موجود هوه الي يحددها
محسنها وضلع والباب والبسمار شاهدها
سقيفتهم حقيقتهم
بغض للهادي والعتره
*
عاشت بل نحيب وآه وعبره أتسابگ الدمعه
من ظيم والم مرها بجت الها السمه السبعه
يعصرها النذل بل باب اوهيه فاطمه البضعه
وطبع جفه بحقد ياحيف وفوگ الخد بقه طبعه
بقه بخدها أثر ندها
الثاني بحقده وبغدره
*
بيتج كعبه ويعرفون ماراعوه يل كوثر
وحرگوا بابه هل أوغاد بغضآ للنبي ويحيدر
وجنينج ياذنب من طاح وظلعج ليش يتكسر
حقج يم ألاه الكون وهوه شاهد المتظر
كسر ضلعج وأثر دمعج
الله بهل الجرم ادره
*
يتامه اخلاف عين امهم يجيبون الزجيه امنين
ويعين الله علي وصبره لون احمر تسيل العين
بيده يدفن الزهره ويسمع من گبرها ونين
عله الظلوا يتانوها زينب والحسن وحسين
تضل أبهم ودمع من دم
تودع ايتامها الحره
الشاعر الحسيني ظاهر حبيب الهليجي (ولائيه للحسين ع)
هذا أحساسي انت أنفاسي
حسين ياروحي يا أعز ناسي
*
روحي لو قدمها الك بيدي هديه
مقصر وضلع امك الزهره الزجيه
انت وي الدم احسك تمشي بيه
وانت من روحي بعد اقرب اليه
حبك بگلبي منهحك دربي
دنيتي ضلمه وانت نبراسي
*
صعبه موسهله إمنوصف هذا حبي
يبو الاكبر يل خذت روحي أويگلبي
والمحبتك واجب اسجد شكر ربي
لأن دلاني إعله دربك صار دربي
تمشي وي دمي خادمك اسمي
مرتفع شاني بيك نوماسي
*
كرست كلشي بحياتي الك مولاي
لاطمع لامال رايد مصلحه بهاي
يل نفس اعتبرك انت وانت عيناي
اكثر امنل الضل احسك انت وياي
انت سلطاني بيك عنواني
بخدمتك اني مرتفع راسي
*
الله اليحبه يحسبه منل مواليين
وهو سبحانه رزقني امحبة حسين
أمحبته هيه هدايه وجوهر الدين
ونعمه من يرزقني لجله دمعة العين
يا إنس روحي وبلسم اجروحي
بعالمك عايش ثابت بساسي
*
محبته مو هسه لا منذيچ إلإصلاب
بعالم الذر الله راد انصير اله احباب
حسين أتنفس محبته چن هوه الهاب
بأبي هوه وأمي وكل الأحباب
انهي موضوعي بسمك دموعي
وبحر شوگك گلبي بي راسي
ما مثلك ابد جابت مره بهل الكون
فقط امك رحمهه البيك يتجله
يا اقدس بشر سواه رب الكون
من هاشم واسمه بأسمك أتعله
بزغ نور النبوه وشعت الاكوان
وتيجان الفخر ربك الك خله
يامنقذ الدنيا من الجهل والجور
من يوم الصرت ذاك الفكر وله
يارحمة وأجت للوادم بهل اليوم
افلح من ذكره باسمك وصله
اهنيكم ونفسي بمناسبة وﻻدة
منقذ البشريه نبي الرحمه محمد ابن
عبدالله رسول الانسانيه
الشاعر الحسيني ظاهر حبيب الهليجي
استشهاد الامام الحسن العسكري
گلبه مهموم چبده مسموم
غمضن إعيونه. العسكري اليوم
**
مو عواطف من نسولف هذا تاريخ الإمام
شما حجينه بطيب ذاته حتمن يطول الكلام
العسكري كلها تعرفه من نسل خير ألانام
سنينه عايشها بمراره في طوامير الظلام
نهجه معروف. . من الاطفوف
والثمن عمره جبده مخذوم
**
العسكري صبره وثباته كسر قانون الزمن
عل جراله امنل المآسي ذلهن وذل المحن
ذلهن بصبره وشموخه وگفن گباله انحنن
انت رمز الصبر تبقه بصوت واحد رددن
صوته هيهات باقي ما مات
بأرض سامره. بصمته ادموم
**
صارت ايامه مأسي امنل الطغات الظالمه
والقساوه استخدموها لأن أمه فاطمه
وهذا منهجهم يعرفه وحيل جان يألمه
بعد مايحتاج نشرح عل الظلم ليش او لمه
راحه ما شاف. لحضه ما خاف
من بني طغيان جرحه ملجوم.
**
صابر سنينه گظاها يلهج السانه بدعاء
عل جراله امنل مظالم يحمد الله إعله البلاء
مارضخ للطاغي قطعأ منهجه عز وإباء
راد سامره بصموده مثل منهج كربلاء
رافع الهام رغم الالام
رافض الذله. صرخه للدوم
**
ذل بني العباس صبره وذلها كل المغريات
وصوته بعده الهسه يدوي كلا كلا للطغات
ما أمد جفي وابايع لو يكلفني الحيات
الحيات الذله بيها افظل يكون الممات
وعدي للموت. يبقا هل صوت.
رافض وطبعه. بعهده ملزوم
**
الشاعر الحسيني ظاهر حبيب الهليجي ا(لإمام العسكري)
يا سليلا للشموخ يا خصيما للرضوخ
سيدي تبقى منار يا ملاذ الحائرين
*
يل حسن يل عسكري گضيته عمرك
شامخ ومثل النخل ظليت دهرك
الله يدري شجان يحمل ضيم صدرك
ولا صبر ايوب لا يعگوب صبرك
عشتا رمزا للثبات في طوامير الطغات
سالكا نهج الذبيح رافضا للظالمين
*
كل دهاليز السجن مذلوله يمك
تنحني كل ما يمرها طاري اسمك
رغم ذاك الجور كله الما يهمك
نلت بي أعله المراتب ذاك همك
يدوي صوتا من جديد قائلا كلا يزيد
كاسرا قيد الظلام مثلما ناده الحسين
بكل معايير المفاخر بيها طاريك
أوحگه تاريخ المراجل يفتخر بيك
سنين يوسف مو مثلهن حلن أعليك
قيود لقيود الظلامه صارن أيديك
أين حكام الظلام أين ابناء اللئام
باقيا انت الظمير يبن خير المتقين
*
وثقت سامره قصه من خلالك
أتظل عقيمه لدنيه ماتنجب مثالك
سيدي أوما أظن بعد تلگه بدالك
عله أهموم الي شفتها والجرالك
تعتلي عرش الأباء في أعالي الكبرياء
فيك يحتار الزمان ياسراج الثائرين
*
يبو محمد أدعي للمهدي بظهوره
كل موالي ابدمعه يشكيلك شعوره
الدنيه مره والظلم يطفح فجوره
ظاگت أوياهو الحكمنه يطول جوره
أصبح الدم يراق مستباحا في العراق
سيدي ادعوا لنا. عند رب العالمين
https://youtu.be/55yEGf9qRAA?si=2MI6daFMy4fZerqG
Читать полностью…
الشاعر الحسيني ظاهر حبيب الهليجي (أستشهاد رسول الله؛)
ماريدن عمري البغيابه
راح الما مثله بأطيابه
انه الزهره وگلبي بحسره
*
صرت كلي جرح وهمل دمه الدمعه
عله الراح اوبعد هيهات للرجعه
ابوي وحگي من ابجي آله و انعه
العليه گاعد وسمه هليوم منفجعه
راح الساكن جان بروحي
راح اليشفي بنظره جروحي
بصدري العبره وگلبي بحسره
*
علي حته الهوه منشتمه يجويني
ابوي الما أبد وحدي يخليني
انه بنيته العزيزه الضاعت اسنيني
وحشه البيت بعده ودمعتي بعيني
ارسم صوره بالي وانحب
واتذكر وجهه واتعذب
الموت اتنطره وگلبي بحسره
*
تعال أرجع يبويه بحضنك تظمني
وبديك امسح دموعي يلرحت عني
انه البضعه التسميني كثر وني
ادعي الباري كون وياك ياخذني
ياخيمة بنتك هل الطلبه
وياك اتوسدها التربه
شينفع صبره وگلبي بحسره
*
يا شمعة حياتي الفرگه ما ترحم
خذو نعشك اشوفه وانه اتهظم
وناشغ وهمل أعله لخد دمع من دم
وصيحن بويه اخذني وياك اتالم
آنه الزهره ودمعي يلالي
مكسورة خاطر عل غالي
اشتم عطره وگلبي بحسره
*
دنيه او ما اشوفك بيها ماتسوه
يروح الزهره انت اوبيك تتگوه
انكسر ظهري بغيابك بويه وتلوه
شلي بعمري بعد والموت آنه اهوه
يل عايش بعيوني وروحي
الفگدك لا مايبطل نوحي
بصدري الجمره وگلبي الحسره
الشاعر الحسيني ظاهر حبيب الهليجي (استشهاد الرسول ص)
اليوم اجيتك يل حبيب فاطمة بعبره ونحيب
بويه يم گبرك اجيتك اشكي همي
*
اشتاگت الروح واجيتك والحزن يبرالي
ابنيتك العاشت مأسي من رحت يلغالي
من تشاهدني وحگك بويه تبجي الحالي
فاطمه جيت اشتكيلك يل تعيش ابالي
جرحي بعدك ماشفه ولا جفن عيني غفه
مفارگه النوم وعليك عيوني تدمي
بويه يم گبرك اجيت اشكي همي
*
النار شبوها إعله بابي وانـه بنتك يل الابي
نكروا انه بت محمد وانت موانت النبي
بويه ادعيلي اموتن هذا منك مطلبي
لأن شفت انجوم ظهري منهم واحبي حبي
منل سقيفه الظالمه بويه تعبت فاطمه
عل جره الحالي يريتك كون يمي
بويه يم گبرك اجيتك اشكي همي
*
طبع اصابع فوك خدي من حقدهــم ظــل اثـر
وعيني حمره من السطرني وهذا ظلعي الي نكسر
وهذا محسن جبته بيدي موته من عنده اعتذر
خاطري مكسور بعدك والله دلالي انصهر
ادري تسمع جلمتي ودمعتك وي دمعتي
أم ابيها الي انكروها وضاع اسمي
بويه يم گبرك اجيتك اشكي همي
*
يل جنت كلشي بحيلتي صعبه بعدك حالتي
ليل ونهار اعله فگدك انه اعيش بحسرتي
والله اتمنه جفوفك بويه تمسح دمعتي
ذبل عودي امنل المناحه وحيل تعبت حالتي
جرحي ماصحله دوه
مفارگه وگلبي انجوه
من غبت عني الحزن يمشي ويدمي
بويه يم گبرك اجيتك اشكي همي
*
كوثري من الدمع وشل يارسول الله عليــك
حزني فاق الكون كله وانه بلدمعه ارتجيك
طلبه ادعيلي يبويه يدنه موتي حته اجيــك
ظاكت الوسعه بغيابك للجليل ارفع اديـــك
يل جنت ليه وطن
هسه دنباتي محن
بل مدامع والمناحه ذاب جسمي
بويه يم گبرك اجيتك اشكي همي
*
الشاعر الحسيني ظاهر الهليجي (للمشاية)
اذن آذان الغياره صاح حي إعله َلزيارة القبلة العشگ المنارة
طلعة المشايه
*
أجت زوار أبعشگها للطفوف توجهت
عافت الدنيه أوحسنها وطلكتهه أمنعتنت
بيا حسين الصوت تهتف وللظريح اتوافدت
غطت الشمس وظواها هل الملاين الإجت
موسم الحج اربعينه زيارة حسين وبنينه شوكه بعيون الظغينه
طلعة المشايه
*
حيرت عقل الخليقة شلون يوصفهه القلم
من عهد ادم لهسه من وجد من هل الكرم
لليزور حسين يلگه سفرة ممدوده وخدم
بيهه مالذه وطابه خير من الله النعم
معجزه الزوار آيه تحولت بالكون رايه اتلگت اظعون السبايه
طلعة المشايه
موكب العشق الحسيني ياحلاته وهيبته
خيط اسود لابدايه ولانهايه بطلعته
توجه المبدئ وجوده وكل كيان وغايته
حسين دين الله الحقيقي وقبلة الحق قبلته
ماتلمهه الناس ديره اتناصره بهاي المسيرة صحبه صارتله وعشيره
طلعة المشايه
*
الواحد وسبعين جانت هسه ماتنعد ابد
رغم كل هاي الظروف توكلت ونطت وعد
سيل من البحر يبدي بالعشك كاتب عهد
بدربك اتوثق المحبه وانطت المنحر سند
تبقه تبقه الغاضرية كعبة احرار البرية هدمت اركان اميه
طلعة المشايه
الشاعر الحسيني ظاهر حبيب الهليجي (للمشاية)
خيط اسود شايلين الرايه
هل ملايين واجت مشايه
*
الف وربعميه عنوان العشك
هبت الزوار للعشگ الصدك
اجوا للبگلوبهم أسمه يدگ
تركت الاوطان اجت عنايه
*
طلعوا و راياتهم ويه السمه
وبل حزن لجل الحسين محزمه
تواسي حيدر بربعينه وفاطمة
تصيح لبيك ونضل وفايه
*
اليوم تتلگه ألاجت من السبي
زينب وملگاهه َمو ممشه حبي
اتطوف وياهه گبر سبط النبي
ويم ابو اليمه تسوي اقرايه
*
كعبه صارت كربله عد شيعته
بثوب مو ابيض سواد وطافته
بربعينه واجب تحج حظرته
والنواصب تنبغض من هايه
****
أربعين حسين صارت عاشره والملايين التزوره اتناصره
طلگتها الدنيه رادت اخره
ترضي رب الكون هايه الغايه
الشاعر الحسيني ظاهر حبيب الهليجي
دم تسيل الأعيون نعشك فوگ الأمتون
خويه يل حسن راح عمري إويل يشعون
*
ثاني واحد من اخوتي اليوم اودعه
ويا وداع ألي اودعه ماله رجعه
انه زينب والحسن گلبي يفجعه
حته هذا الكون يبجي وياي اسمعه
ما يكفيني انعاك واجب موتي وياك
أبنعش اثنينه انصير واخوتنه اليودعون
*
بداخلي نمرود ناره حيل تلهب
موتي من كثر المصايب والله گرب
من صباي الهذه يومي وانه أنحب
مثل شمعه بنوح ذابت روح زينب
حزن محمله الروح سنين ودمعي مسفوح
ريت الليله ينشال نعشي ويل الإخو كون
ياخو زينب منكسر اختك ظهرهـــا
اليوم انت أوباجر الطف تنتظرها
يل الحسن اختك صعب باجر أمره
لا يظل حسين يمها أولا گمرها
أمشي الديرة أجناب وترك عل الثره احباب
وحدي ولا أخو أوياي الاختك ينحب الكون
*
شيعوك ونعشك اليرمونه بسهام
هما كسروا ضلع أمي وطبرو الهام
نفس هاي الگوم باجر تحرك اخيام
بكربله تذبح اخوتي وترعب ايتام
ابقه ابدمعة عين ولا عباس وحسين
بظلمه وحشة الليل والشمات يحدون
*
يا كريم اهل الكساء الكل يعرفون
سمتك جعده بأمر من اليبغظون
ويم محمد مارضوا دفنك يخلون
مودع انت وباجر انه بكربله شلون
من تندار الايام وامشي بدمعه للشام
وحدي ودمعي مسفوح وعدواني يشتمون
الشاعر ظاهر حبيب الهليجي (السجاد ع)
عمرك مواجع - نوح و مدامع - الذيچ الفواجع
يا سيدي. ياسيدي
---
شما ضگت العذب ينزل دمع عـينك
من يوم أنحرم ياسيدي حسـيـنـك
بمناحه وآه خلصت سيدي اسنينـك
مثل نوح الحمام بصـدرك اونـيـنـك
قمة بلائك – ولوعة بكائك – من كربلائك
يا سيدي --- يا سيدي
---
نوايبهه الطفوف بگلبك وتسعـر
والك بيهه علامه بجفك الاطهر
علامه گيد تبقه وياك للمحـشـر
تنظرها ودليلك نوح يتفطر
تبقه العلامه – اليوم القيامه – تشكي الظلامه
يا سيدي --- يا سيدي
---
الـك عـبره تظـل العـمتـك زينـــب
شفـتـهه مجـتـفه وللشـام تـتغـرب
وعليل انته بوكتهه وياهه تتنحب
كل لحظه الـتـمـرك انـتـه تـتـعـذب
وفوك العوالي - روسي الغوالي - ودمعك يلالي
يا سيدي --- يا سيدي
جم لوعه بدليك تشرح آلامـــك
عن سكنه ورقيه لوله لخيامـك
لو عمتك وحيده تلملم ايتامــك
لو ذاك الرضيع الذبحه كدامـك
طف اعله بالك – باقي بخيالك – وكلشي الجرالك
يا سيدي --- يا سيدي
---
يـازيـن الـعـبــاد ورابـع الـعـتــــره
الك فوك الشريعه تبقه هل العبـره
لبو فاظل تشـوف إچـفـوفه متبـتـره
بموتك عل الوجن خله الدمع ذكره
صوره بعيونك – تبقه بظنونك – تهيج شجونك
يا سيدي --- يا سيدي
الشاعر الحسيني ظاهر حبيب الهليجي
وداعا ياعلي السجاد وداعا ياعلي السجاد
*
غمض جفنك يبو الباقر حزن والام
تبدي أمنل الطفوف وتنتهي بل شام
بذهنك ياعلي يدوي صريخ ايتام
كل لحظه العشتها ابداخلك تنظام
وداعا يا علي السجاد وداعا يا علي السجاد
*
تخلص الليل بل دمعه وگلب شاجر
تردلك ذكريات الظيم بل العاشر
بيها انته عليل او ما الك ناصر
جم غالي يطيح أبدمه وأتناظر
وداعا يا علي السجاد وداعا يا علي السجاد
متت وانته أبدليلك سيدي حسره
عله الجانت أميره وتالي متيسره
وشمر يحدي بظعن عماتك اتنظره
وعفت فوگ الرمال أجساد متوذره
وداعا يا علي السجاد وداعا يا علي السجاد
*
بأخير آنفاس عينك سيدي أبدمعه
حكگ وانته ابوك أبجفك اتجمعه
أريدن ماي صوته بأذنك اتسمعه
يعينك سيدي رب السمه السبعه
وداعا يا علي السجاد وداعا يا علي السجاد
يا زين العباد أو اشهگت انفاسك
تلجمك عل المصيبه الشيبت راسك
المصيبه الفارگت بلطف اعز ناسك
ميت والطفوف اتعيش بأحساسك
وداعا يا علي السجاد وداعا يا علي السجاد
