Telegram-канал m_a_m985 - ش̀́ع̀́ور̀ كآ̀تب 🇮🇶✏📚: Unsorted

ش̀́ع̀́ور̀ كآ̀تب 🇮🇶✏📚

07 August 2026 08:59

تولد النوارس
من مناديل الوداع المرفرفة
على أرصفة الموانئ.

- لوركا

ش̀́ع̀́ور̀ كآ̀تب 🇮🇶✏📚

04 April 2026 18:40

حاج چلوّي عندّه محل كباب ، حاطله ميز وفوگه صندوگ الفلوس وگبال الصندوگ حاط لاِفتة وكاتب عليّها ( اذا ما عندك فلوس أكل ولا تگلي ) ، حاچ چلوَّي هواي يلومونّه ، چا حاج انت تخلي العنده والما عِنده ياكل ويروح ؟ يگوللهم : الله يشوف ..

فد يوم من الأيام حاج چلوّي گاعد يلملم غريضاتّه ويعزل بالمَحل ، فَـ حط وارد هذاك اليوم بجيبه وطگ المَحل قفل ورجع يتمشى لبيتّه ، فـ فجأة : فوگ راسه ثلاثة ملثمين ، واحدهم دنگه وعيونه تدجح : يله عيني فلوسك ..

حاج چلوّي گاللهم : دقيقة ، اسمعوني ( بلا نسمعك بلا هالسوالف يله فلوسك ) ، گاللهم : بس اسمعوني ، انه عندي وارد مال بس هذا اليوم ، شنو رأيكُم تجون وياي للبيت وانطيكُم وارد مال أسبوع ؟ ، هذولي الثلاثة واحد يباوع للثاني ويضحك شگاعد يحچي هذا ؟ تريد تضحك على منو ؟

فگاللهم واللهِ تاللهِ وباللهِ أنطيكُم وارد هذا الأسبوع كامل بس ترجعون وياي للبيت وما داعي تخافون من شي ، انه وعجوزتي لوحدنا عايشين بالبيت فلا تگولون مسوي كمين !

البقية ضحكوا ، فواحد من هالثلاثة گال هالرجُل أقسم بقسم عظيم واحنه ما خسرانين شي ، خلي نروح وياه ونشوف تاليها شنو ، فالحاج چلوّي أستقبلهم بهذاك البرد الأزرگ الينشاف وقدملهم الچاي والضيافّة وجاب الهُم وارد الأسبوع كامل !

الجماعة من غرابّة الموضوع صارو بـ حيرة ! شنو يستقبلنا ؟ شنو يقدملنا الچاي ؟ شنو ينطينا فلوس أسبوع كامل ؟ حجي انت ليش هيچ سويت ؟ فأبتسم حاج چلوّي ..

فگاللهم انه لو انطيتكُم الفلوس گبال المَحل چان انحسب الموضوع سرقة وچان رب العالمين راح يعذبكُم بالنار بسببي ، أما هسه أنتم شربتم من چايي وصرتم ضيوف عندي وانه معلمنّي علي أنو أكرم ضيفي وهاي الفلوس حلال زلال عليكم ! حاج ، هاك فليساتك ومن هاي اللحظة ايدينّا ما تمتد للحرام ابداً.

شاهِد كلامنا چانت اكو هواي خيارات گدام حاچ چلوّي ، بس : ﴿ فَبِمَا رَحْمَةٍ مِنَ اللَّهِ لِنْتَ لَهُمْ وَلَوْ كُنْتَ فَظًّا غَلِيظَ الْقَلْبِ لَانْفَضُّوا مِنْ حَوْلِكَ ﴾ - آل عِمران ١٥٩