🌹مامۆستا گۆران🌹

20 Jul 2021 21:53

🍂 قالە مرد

عاسمانی شینی ئەیلوولی قژ زەرد!
نازانی تینووی فرمێسکە ڕووی هەرد؟

نازانی کزەی هەناسەی بێ تین
چەند گەڵایەکی زەردی بۆ هانین:

بە ڕەنگی فرمێسک لێیان نووسرابوو
قالە مرد ، هەی داخ ، باخ بەرەڵڵا بوو؟

شاغونچەی خەڵفی تافی جوانی
بوو بە داخی دڵ گەڵاڕێزانی!...

عاسمان سا بگری بە بێ هیوایی
فرمێسک بڕێژە: تک تک، ئەسپایی!

فرمێسکی تک تک، لێکدانەوەی مەنگ
نیشانەی جۆشە بۆ دڵی زۆر تەنگ!!

قالە مرد، قالەی ئایشەخان و کورد
قالە نا، دایکی قالە مرد، کورد مرد؟

قالەی خوشکان و قالەی خزمانی
ڕووناکیی چاوی گشت سلێمانی

کزەی بای مەرگی پێش وادە دای لێی
ئیتر ئێجگاری تاریک داهات جێی

تاقە تروسکەی وەجاغی بوو، ئاخ!
تاقە نەمامی ناو باغی بوو ، ئاخ!

لە ناوەڕاستی شەقامی عومرا
ئایشەخان، سا مەرگ! قالە ون کرا...

قالە تیری مەرگ پێش وادە پێکای
ڕۆڵەی گەورەت مرد، ئای ئایشەخان ئای!

نا، نەمرد قالە، تەنیا قالەی لەش
کەوتە ئەودیوی پەردەی ئەودیوڕەش

بەڵام قالەگیان، قالەی دروستی
هەرگیز ون نابێ لە باغچەی هەستی!

یادی گەورەیی و شیرینی و چاکی:
بەڵگەی مانە بۆ ژیانی پاکی!

✍: #گۆران
📚: #دەنگی_دەروون

*´¨)🧚‍♂
¸.•´¸.•*´¨)🧚‍♀ ¸.•*¨)🧚‍♂
(¸.•´🧚‍♀ (¸.•` 🌼🧚‍♂
╭┅═ঊ🍁ঊ═┅╮🧚‍♀
@mamostagoran

🌹مامۆستا گۆران🌹

09 Jun 2020 07:35

🌸 دواسرنج ...

*بۆ قژزەردی بەر دەرگا، لە سەرەڕێی بەندیخانەما لە مووسڵەوە بۆ هەولێر

ئەی قژ زەرد! ئەی بەژن و باڵا کەڵەگەت!
بۆ کز ڕاوەستاوی بەرانبەری من؟
بۆ دەستت ناوەتە ژێر چەنەی خەفەت،
لە عاستی دیمەنی دەربەدەری من؟

ئەو چاوە کاڵانەت نیگای دەربەستبوون
لەبەرچی ئەگرنە گرفتاریی من؟
سرنجت ڕووی دەمی پرسکردنی ڕوون
ئەکاتە کەلەپچەی دەستی دیاریی من؟
ئەبینم:پەپوولەی نیازی گفتوگۆ،
دوو ڵ ڕاوەستاوە لەسەر گوڵی لێو:
ئاخ، خۆزگە هەڵئەفڕی، ئەمزانی ئاخۆ
ڕاپێریی چی پێیە بۆ گیانی پەشێو؟

ئەی قژ زەرد! بە بەژنی ناو دەرگا گرتووت،
هەروەکوو پەیکەری شۆخی خەمحواری!
مەلێ بووم لە باخچەی هونەرا بێ جووت،
بۆ جوانیم ڕێک ئەخست شیعری دڵداری!

بەڵام ئەهرەمەنی گەڵای باخ سیسکەر
بێزارە لە جووکەی دەنووکی کوردی؛
ڕاوکەری دارستان لە باڵدار پیسکەر
جێی چینەی لێ تەنیم بە داوی وردی...

وا ئێستا ئەبینی گیرۆدەی داوم؛
لەبەردەم جوانێکی وەک تۆی دڵ نەرما،
لەگەڵ(گارد) لە (پاس)ڕاوەستێنراوم،
تا داخی گرانتر خول با لە سەرما!

ئەی قژ زەرد، ئەی گەردن بە ناز لارگرتوو،
دیوێکم لە پاسا تۆی، دیوێک باخە؛
ئەکەمە هەچ دیوێک نیگای ئارەزوو:
بۆ گیانی(قەفەسی)م سەرچاوەی ئاخە!

بۆ لای باخ ئەڕوانم: بەهار وەک پەری
فستانی گیاو گەڵای سەوزی پۆشیوە؛
زەرد و سوور گوڵباخی داوە لەسەری؛
ئارەقی سەر کوڵمی دڵۆپی زیوە!

بۆ لای تۆ ئەڕوانم، قژ زەردی نازدار،
ئەبینم دوو چاوی ناو ڕیزی برژانگ
پرشنگێک ئەگرنە نیگای گرفتار،
نەمدیوە لە گۆمی بەر تریفەی مانگ!
پرشنگی نیگایەک کە لە ڕووی ڕووناک
هەڵئەستێ و تیژ ئەکشێ تا ناخی دەروون،
کڵپەی نوێ ئەخاتە کوورەی عەشقی پاک
دەفری گیان لیپ ئەکا لە خۆزگەی بەربوون!

بەڵام ئاخ، دووگاردی چاو لێم داپچڕاو
چەپ و ڕاست وەستاون بۆم دوشمنانە،
کەلەپچەی لە دەسما تون کلیلدراو
نیشانەی ڕێگامە کە بۆ زیندانه!

هەر ئەوەم لە دەست دێ هەتا ئەتوانم،
ئا لەم هەڵوێسەدا، هەل بە کار بێنم؛
وەک تینووی چاو لە ئاو بە کوڵ بڕوانم؛
ئەو چاوەی تێم بڕیت نەیترووکێنم،
بۆ ئەوەی بتوانم لە پەردەی بیرم
نیگارێ هەڵکەنم شێوەی لێت بچێ؛
تا هەرچەن گازی گرت لە لەش زنجیرم
ئازارم سووکتر کا خەیاڵی کچێ:
کە شۆخەو قژزەردەو باڵا ڕێک و بەرز
خەمخواری نەناسە وەک فریشتەی عەرز!

✍: #گۆران
📚: #دەنگی_دەروون
*´¨)🧚‍♂
¸.•´¸.•*´¨)🧚‍♀ ¸.•*¨)🧚‍♂
(¸.•´🧚‍♀ (¸.•` 🌼🧚‍♂
╭┅═ঊ🍁ঊ═┅╮🧚‍♀
   @mamostagoran

🌹مامۆستا گۆران🌹

05 Jun 2020 04:35

‌ 🔶🔶🔸🔸🔸🔶🔶
✅ @tapuynusrawe

#شیعر: مامۆستا #گۆران
#گۆرانی: بە دەنگی
خاتوو #مەرزیە_فەریقی
ــــــــــــــــــــــــــــــ

"هیوا مەگری"

هیوا مەگری، هەنسکی نیوەشەو بەس هەڵ دە، بەس بگری
لە چاوی بێقەرارم بۆچی دەرمانی وەنەوز ئەبڕی؟

کوڕی خۆم! کۆرپەڵەم! میوانی دونیای تازە خوڵقاوم
ئەدا گریەت، بە زەربەی چز، لە ڕۆحی پڕگلاراوم

چییە ئەم گریە بێغایە، کڕووزەی نیوەشەو، خورپێن؟
چییە ئەم قەترە وردانەی لە چاوت بێ‌مەئال ئەڕژێن؟

لەگەڵ ئەو غونچە ساوایەی لەسەر خەڵفی بەهار ئەڕوێ
چییە فەرقت؟ لەبەر چی ئەو هەتاکوو سیس ئەبێ ئەنوێ؟

وەکوو ئەو بەرخە بچکۆڵەی کە هەر ئێستا لە دایک بوو
لەبەر چی نەشئەیی یاری، هەڵت ناداتە سەر پاشوو؟

ئەڵێی ئەو زەڕنەقووتەی پەپکەمارە، فەڕشی هێلانەی
چ ئێشێکە، کوڕم؟ بۆچی لەسەر ئەم هەڵکڕووزانەی؟

چییە توخوا؟ چ سیڕڕێکە وەها مەحکوومی گریانی؟
کە تۆ هێشتا لە خەم ناگەی؟ لە مەعنای گریە نازانی؟

ئەگەر وەک باوکە حەسرەت دیدەکەت، زەهرت بچێژایە
زەمان گەردی ئەمەلتی گشت، بە دەم باوە بپێژایە

لە ناو کڵپە و بڵێسەی نائومێدی و حەسرەتا یەکسەر بسووتایە
بەهاری عومری جوانیت، هەم گوڵ و هەم بەر

بەڵێ ڕۆڵەم، ئەگەر وەک من کەمێک بەدبەختی ئیدراکیش
لە تۆشی ڕەش بکردایە
نە وەک شەو، ڕۆژی ڕووناکیش

حەقت بوو عەرش بلەرزێنی، بە ناڵەی ڕۆحی پڕ ئێشت
لە ئەستێرەی سەما بپژێنی فرمێسکی دڵی ڕێشت

حەقت بوو ئەم هەموو گریانی نامەفهووم و بێ‌مەعنا
زمانی بەست و تەقریری شکاتت بێ، لە دەست دونیا

حەقت بوو بێوچان بگری، بە سەر تاوانی باوکیما
بەحر پڕکەی لە تف، بیدەی بە ناوچاوانی باوکیما

بەڵام ڕۆڵەم، کە تۆ هێشتا لە فەجری زیندەگانیتای
لە بەر دەرگای تەلیسمی بەختی مەجهوول و نیهانیتای

بە چی مەعلووم بە شوێنی هی منا ئەڕژێ، چەمی عومرت؟
سەراسەر پێ پێکەنین و خوڕڕەمی نابێ، خەمی عومرت؟

بەڵێ بەرخم! ئەگەرچی هەر وەکوو یەک ژینی گشت لایە
لە بەینی بێشکە و قەبرا، بڕینی عەینی ڕێگایە

هەموو هەر قافڵەی بێ‌ئیختیاری سەر زەمینێکین
هەموو دێین و دەڕۆین تاکوو ئەگەین، یەعنی ئیتر ئەمرین

وەلێ کۆچی ژیان، کۆچێکی پڕ سێحر و پڕ ئەفسوونە
لە یەک سەرچاوە دوو قەترە، یەکێ لێڵە و یەکێ ڕوونە!

هەیە وەک من بەسەر دڕکا ئەنێ هەنگاوی ئاوارە
هەیە هی واش کە فەڕشی ژێری پێی، ئاوریشمی گوڵزارە

ئەوەندەی ڕۆحی مەئیووس و مەلوول تاری ئەکا دونیا
ئەوەندەش نوور لە ڕۆحی شادەوە، ئەڕژێ بەسەر سەریا

کوڕم! هەر وەک لە ئوعجووبەی ژیانا بەختی بەد ئەگری
شتێکیش بەختیاری، پێکەنین، گرتوویە چوار دەوری

بە خۆڕایی مەترسە، خەم مەخۆ، مەگری، لە ئێستاوە
بە چی مەعلووم کەچی لەو تەختی ناوچاوانە نووسراوە؟

ــــــــــــــــــــــــــــــ

#تاپوی_نووسراوه

✅ @tapuynusrawe
🔶🔶🔸🔸🔸🔶🔶

🌹مامۆستا گۆران🌹

16 May 2020 15:15

🔗 ناڵەی بێکار

تا هێزی بزووتن لە لەشما بەگوڕ بوو،
من کوڕ بووم بۆ ئاغا و ئاغا باوکی کوڕ بوو؛

لە (ماندوو نەبوون) سەرایشم واق‌وڕ بوو،
عەماری لەبەری تەقالام پڕپڕ بوو

(نامەخوا!) و (ئافەرین!) سەری لێ شێوانم
دڵسۆزی بۆ ئاغا ئەوەندەی ڕەتانم:

تا ڕادەی ئەوپەڕی شەکەتیی گەیانم!
پەکم کەوت.. نەخۆشی لەشی تێک شکانم!

نەخۆشی ناو جێ بووم: بێ شۆربا، بێ دەرمان،
بۆ زمان تەڕ کردن(نەختێک ئاو!) ئەمناڵان،

بەرگوێم کەوت باوکی کوڕ(نەک ئێستا،هیی جاران)
قیڕاندی: بۆ نایبەن فڕێی دەن لە کۆڵان!

ئەو دەستەی لە کۆڵان گەیشتە فریای من
دەستێ بوو بە تۆز و ئارەقی ئیش چڵکن؛

زۆر دوور بوو لەو دەستە خاوێنەی وەک هیی ژن،
پارووی چەور ئەگلێنێ بێ ڕەنجی ئیشکردن!

ئەو دەستە چڵکنەی دوو لێوەی تەڕ کردم،
دڵۆپی فرمێسکی کەوتە سەر ڕووی زەردم،

بە قووتی دەمی خۆی ڕایگرتم نەمردم:
ڕەنجبەر بوو، نۆکەر بوو ، هاوپیشەم، هاودەردم!

تا ڕۆژی کەوتنم گەیشتە شەش و حەوت،
ژوور سەری بەرنەدام هاودەردی بێ سرەوت؛

بە زەبری دڵسۆزی ئەوەندەم نزیک کەوت:
پەتاکەم تووشی بوو لە لاما ئەویش خەوت!

وا ئێستا ئەو کەوتوو من لە جێ هەڵساوم،
کوناوکون ئەگێڕم لەشی تێکشکاوم؛

لە فرمانم ئەپرسێ: زمانم، گوێم، چاوم
بۆ قووتی ڕۆژی خۆم، هیێ هاوڕێی داماوم!

فرمانێک قەیناکا قورسیش بێ بە شانم ،
لە ژێریا لێم دەرچێ گشت جومگەی ئێسقانم،

هەر تیابێ چەن فلسێک هیچ نەبێ بتوانم:
نان بکڕم بۆ خۆم و بۆ هاوڕێی نیوگیانم!

فرمانێ، ئەی کۆمەڵ! فرمانێ،فرمانێ
بۆ دەردی بێکاری، چارەیەک، دەرمانێ،

زۆر شەرمە لە چەرخی بیستەما ئینسانێ
بێ ئێش بێ و سکی خۆی هەڵوشێ بۆ نانێ!

ــــــــــــــــــــــــــــ
📚 #فەرهەنگۆک

پەتا: وەبا، نەخۆشی ساری
هەڵوشێ: هەڵگوشێ
ــــــــــــــــــــــــــــ
✍: گۆران
📚: #دەنگی_دەروون

*´¨)🧚‍♂
¸.•´¸.•*´¨)🧚‍♀ ¸.•*¨)🧚‍♂
(¸.•´🧚‍♀ (¸.•` 🌼🧚‍♂
╭┅═ঊ🍁ঊ═┅╮🧚‍♀
   @mamostagoran

🌹مامۆستا گۆران🌹

12 May 2020 16:45

🔖 دیاریی خوای شەڕ

دیاریی خوای شەڕ: خەشمەو قینە،
دوشمنییەو ڕقە و کینە،
بەدخواهییەو نیهادی پیس:
باری لێکدانەوەی ئیبلیس!
دیاریی خوای شەڕ: پڕ بەدڵ ترس
یەک زمان و سەدهەزار پرس؛
گومان لە ڕاست، بەڵام باوەڕ
بە درۆ: (ئاخ، دیاریی خوای شەڕ!)
دیاریی خوای شەڕ ڕەنجەو ئازار،
مەرگی لەشکر، وێرانیی شار؛
بۆ دایک: تاقانە کوشتن،
بۆ کۆرپەی ناز: هەتیو خستن!
خوای شەڕ ئینسان لە هاو جینسی
ئەکا بە گورگێکی برسی؛
ئاگر، قورقوشم، غازی خنکێن٭
ئەداتە دەستی پڕ لە جوێن
ئەکا دەمی و پێی ئەڵێ: عەرش!
بۆ بن دەریای تاریک و ڕەش،
بۆ ناو هەور و برووسکەی بەرز،
بۆ جێی دوور دوور لەسەر ڕووی ئەرز...
عەرش! وەک دڕندە، وەک هار عەرش!
دنیا ڕەنگ‌کە بە خوێنی گەش!
پەلامار دە ، دەستوبرد کە،
بگرە،ببڕە،بدڕە،ورد کە:
قەڵا، تەلبەن، شوورا، سەنگەر؛
حەیوان، ئینسان، شاری، عەسکەر،
ژن،پیاو،پیر،جوان،دەست،قاچ،سنگ،سەر...
پێشێل کە هەرچیت دێتە بەر!
بێسووچ بکوژە، سەربەست دیل کە،
دەرگای مێشک و دەم کلیل کە،
کۆمەڵ برسی، وڵات لات کە،
نەخۆشی زۆر، دەرمان قات کە،
قوتابخانە، بیمارستان،
کۆگای فەنکردی کۆن و جوان،
شوێنی بە کەڵک گشت خاپوور کە،
بنچینە و بان خواروژوور کە!
دەزگای شارستانی تێک‌دە:
ئەمڕۆ ڕۆژی مەحشەر لێک دە!
ـــــــــــــــــــــــــــــ
📚 #فەرهەنگۆک

* غازی خنکێن: خنکێنەر، غازی موخنیق
ـــــــــــــــــــــــــــــ
✍: #گۆران

📚 #دەنگی_دەروون

*´¨)🧚‍♂
¸.•´¸.•*´¨)🧚‍♀ ¸.•*¨)🧚‍♂
(¸.•´🧚‍♀ (¸.•` 🌼🧚‍♂
╭┅═ঊ🍁ঊ═┅╮🧚‍♀
@mamostagoran

🌹مامۆستا گۆران🌹

07 May 2020 11:11

🔖 جەژنی نەورۆز

بە سووڕێکی تر ئەستێرەی ئینسان‌گر٭،
قەومی کۆنی خستەوە جەژنی ئاگر،
کام قەومی کۆن ، کام جەژنی بەرز و پیرۆز؟
قەومی مادی! جەژنی بڵندی نەورۆز!
ئەو نەورۆزەی کە هەزاران بەهارە،
لە دێی کوردا گڕی ئاگری دیارە
باوباپیرمان هەتا ئەڕۆن پشتاوپشت،
لەم ئاگرەیان دەورە داوە،چین چین ، گشت!
لە چوار دەوری ئەم ئاگرە: ڕەنگاوڕەنگ
کۆڕ گیراوە، بە پێکەنین و ئاهەنگ؛
بانگی شێوان هەتاکوو بەربەیانی،
چۆپی بووە و بەزم و نۆش و گۆرانی!
لەو سایەوە، تا ئێستاکە بەم چەشنە:
هەموو سەری ساڵی تازەمان جەژنە؛
میوانی کۆن بەڕێ ئەکەین و تازە،
بە پێکەنین ئەگاتە بەر دەروازە!
خۆشیت هێناو فەڕت هێنا و شیرینی..
تۆ بۆ ئێمە بەهەشتی خەو بینینی!
بە هاتنت بای بەستەڵەک، بەفری دەشت،
گیانی سپارد؛ گوڵی ڕوا جێگای گەشت
لە تاریکی، لە چوار دیواری زستان،
سەرفەراز بیت ، سەرفەراز بوو مەلی گیان!
ئێستا ــ ئۆخەی! ــ ئاسمانێکە و هەتاوێ،
گیایەو گوڵەو مەلە و خوڕەی چەماوێ
چی خۆشترە لەوەی تەبیعەت جوان بێ،
ماوەی سرنج پانایی گشت ئاسمان بێ؟!
گیانی سەرمەست، باڵداری ڕێی هیوا بڕ،
بەرز بێتەوە بە پەڵەی هەور بدا دڕ؛
بفڕێ، بڕوا بۆ کوردستانی ئاوات،
ماندوو نەبێ هەر بڕوات و هەر بڕوات
هەتا ئەگاتە لووتکەی شاخی سەربەست،
بێزنجیریی گەل ئەبینێ و ئەبێ مەست!⭐️
ـــــــــــــــــــــــــــ
📚 #فەرهەنگۆک

* ئینسان‌گر: مەبەست لە کەوکەبی ئەرزە کە ئینسانی تیا ئەژی.
ـــــــــــــــــــــــــــ
✍: #گۆران

⭐️#کورتە_‌لێدوانێک:

مامۆستاگۆران ئەم پارچە هەڵبەستەی لە ساڵی ۱۹٥۳ لە گۆڤاری (ژین)دا بەمجۆرە بڵاوکردۆتەوە، بەڵام پێشان دواشیعری بە جۆرێکی تر و چەند شێعرێکی تریشی لەگەڵ بووە. وا لێڕەدا جۆری پێشووی دواشیعر و شیعرەکانی پاشەوەی ــ بۆ خاتری مێژووی بیرو ئەدەبی مامۆستاگۆران ــ ئەنووسینەوە:

هەتا ئەگاتە لووتکەی شاخی سەربەست،
تاج ئەبینێ و تێر ماچ ئەکا پێچکەی تەخت
٭٭٭
ئەی جێی هیوام، ئەی جێی خەوی بێداریم،
ئەی ڕۆشنیم، ئەی جەژنی یادگاریم!
هەزار سپاس، هەزار دروودی بێدەنگ،
بەڵام بە کوڵ ، بگا بە گیانی هۆشەنگ،
(هۆشەنگی باپیری ئێمەو ئێرانی،
داهێنەری بنچینەی ئاوەدانی!)
کە ماری کوشت و بەردی دا لە یەکتر؛
پزیسکی دی و ئیتر تەلیسمی ئاگر،
بە کەڵکی خۆیەوە بە تۆوە( نەورۆز )
بوو بە فەڕ و ڕژایە ژینی پیرۆز!

شایانی وتنە مامۆستاگۆران ئەم پارچە شێعرەی بۆ (ڕەشید نەجیب) نووسیوە. م.م.ک[محەممەدی مەلا کەریم]

📚 #دەنگی_دەروون
*´¨)🧚‍♂
¸.•´¸.•*´¨)🧚‍♀ ¸.•*¨)🧚‍♂
(¸.•´🧚‍♀ (¸.•` 🌼🧚‍♂
╭┅═ঊ🍁ঊ═┅╮🧚‍♀
@mamostagoran

🌹مامۆستا گۆران🌹

04 May 2020 09:45

🔖 ئیلهامی ((هاوار))

٭ بۆ مەفکوورەی بەدرخانییەکان

دەروێشێکم دی لەسەر دەخمەی شا
ــ شای سەلاحەددین ــ بە کوڵ ئەگریا

هاواری ئەکرد، ئەیلاوانەوە!
دڵی ئینسانی ئەتاوانەوە!


دەروێش میرێک بوو خێوی تەخت و تاج
چەرخ لێی وەرگەڕا کەوتە بەر تاراج

ئەی چەرخی غەددار، ئەفەربازیچە
بە حەسیرگیری فەرش و قاڵیچە

سەری ڕاهاتووی تاجی سەربەستی
کەی ئەنەوی بۆ زیندان پەرەستی؟

سنگێ کە تەختە جێگای ئارامی
کەی قنیات ئەکا بە بای ناکامی؟

وەک شێر نرکانی، وەک ئاگر هەڵچوو
زنجیری پچڕان لە زیندان دەرچوو!

گەلێ هەڵمەتی برد بۆ پێچکەی تەخت
بەڵام نەخووسا بەردی دڵی بەخت

گەلێ کێشای دەست بۆ جقەی ئەفسەر
بەڵام ناوچاوی نەینووسی زەفەر!

سەری خۆی هەڵگرت ڕووی کردە شاران
توێشووی ڕێی تەنیا عەشقی کوردستان!


ئێستا لە دەشتی شام لەسەر قەبری
باپیری گەورەی، بۆ وڵات ئەگری

بۆ وڵات ئەکا شیوەن و هاوار...
کوردە غیرەتێک زینهار! سەد زینهار!

بە کۆمەڵ بگرن گوێ لە هاواری:
کۆمەڵ جەلب ئەکا ڕیققەتی باری!

🗞 #گۆڤاری‌هاوار ژمارە ۱۰،لاپەڕەی ٥

✍ #گۆران

📚 #دەنگی_دەروون
🗓۱۹۳۲/۱۰/۲۳

*´¨)🧚‍♂
¸.•´¸.•*´¨)🧚‍♀ ¸.•*¨)🧚‍♂
(¸.•´🧚‍♀ (¸.•` 🌼🧚‍♂
╭┅═ঊ🍁ঊ═┅╮🧚‍♀
@mamostagoran

🌹مامۆستا گۆران🌹

02 May 2020 11:50

سڵاو و ڕێز بۆ هەموو خۆشەویستان و ئەدەب دۆستانی ئازیز ، زۆرسپاستان ئەکەم کە هەر هاوڕێمانن، وەک دەزانن چەن مانگێکە وەک پێویست نەمانتوانی لە خزمەتتاندا بین و شێعرەکانی ئەم گەورە مامۆستایەتان پێشکەش بکەین ، هەر بۆیە سپاسێکی بێ بڕانەوە لەو کەسانەی دەکەم کە لەو ماوەیەدا کاناڵەکەیان جێنەهێشتووە و بە ئامادەبوونیان دڵگەرممان ئەکەن،زۆر زۆر داوای لێبوردن ئەکەم بۆ ئەو ماوەیە کە کاناڵمان وەستان بەڵام پشت بە خودا لە ئەمڕۆوە دیسان لە خزمەتتاندا دەبین و هیوادارم کاناڵەکە بەە هەموو دۆست و ناسیاو و ئازیزانتان بناسێنن و دڵگەڕمان بکەن!

هاوڕێیانی زێدە! ئەوا دواهەمین شێعری کۆمەڵەی #سروشت_و_دەروون پێشکەش کرا ، ئیشەڵڵا لە سبەینێوە هەر ڕۆژە شێعرێک لە کۆمەڵەی #دەنگی_دەروون بڵاو دەکەینەوە،هیوادارم بتوانین خزمەتێکی بچووک بکەین و چاوەڕوانی پشتگیرییەکانتانین 🌹


*´¨)🧚‍♂
¸.•´¸.•*´¨)🧚‍♀ ¸.•*¨)🧚‍♂
(¸.•´🧚‍♀ (¸.•` 🌼🧚‍♂
╭┅═ঊ🍁ঊ═┅╮🧚‍♀
@mamostagoran

🌹مامۆستا گۆران🌹

11 Sep 2019 19:29

🖇تازە؟

کە شەو هات و پەردەی ڕەشی کەوتە سەر
جوانیی ، تەبیعەت کەژ و دەشت و دەر

هەموو نووست ، هەموو مرد،کش و بێ ئەسەر:
سەما،تازە جیلوەی ستارەی نەزەر؟

کە گوڵباخ،نێرگز، سەمەق، یاسەمەن
هەموو نوقمی بەحری تەمی ئەم شەوەن؟

هیلاکی گروشمەن، وەنەوزێک ئەدەن:
سەما، تازە جیلوەی ستاری نەزەر؟

کە کپ بوو قەراغی چەمی پڕ لە قاز
لەسەر ڕووی نەما زینەتی ئیهتیزار
لە سەر لێوی لاچوو بزەی نووری ناز:
سەما، تازە جیلوەی ستارەی نەزەر؟


کە دڵ کەوتە ناو دۆزەخی دەردەوە
کە عیشق و شەبابی خوا بردەوە
گڕی شاعیرییەت کە دامردەوە:
سەما، تازە جیلوەی ستارەی نەزەر؟


🌹گروشمە: کریشمە ، ناز و عیشوە

✍گۆران

📚 #سروشت_و_دەروون

*´¨)🧚‍♂
¸.•´¸.•*´¨)🧚‍♀ ¸.•*¨)🧚‍♂
(¸.•´🧚‍♀ (¸.•` 🌼🧚‍♂
╭┅═ঊ🍁ঊ═┅╮🧚‍♀
@mamostagoran

🌹مامۆستا گۆران🌹

09 Sep 2019 17:42

🖇دار چوالەی پشکووتوو

"لە گەڕانەوەدا بە چەمی قلیاسانا"

لە پاش بڕینی ماوەیەکی دوور
گیانی وەڕەسی ڕێگای سەرەوژوور

دی:(پاس)کشایە ناو پێچێکی لێژ
لای چەپ:چناری باریک و درێژ

ڕەپ ڕاوەستابوون لە کەناری ڕێ
سەربازی پاس بوون بۆ پشت سەری کێ؟:

ڕیزێک نەمامی دارچوالەی نازدار
کە ڕێک وەستابوون لەسەر گیای بەهار

وەک بووک ئەندامیان لە سووراو نابوو
لەنجەی تاو تاویان بۆ چپەی با بوو

پەڕی هەڵاڵەیچوالەی سووراوڕەنگ
جار جار ئەوەری بە خشە پێی هەنگ

هەر وەک پەپوولە باڵ فڕە فڕکەر
ئەنیشتە سەر یەک لەسەر گیای سێبەر!

لەگەڵ لێشاوی پەڕەی گوڵ بارین:
با بوو شەپۆلی:(بۆنخۆش)ی چین چین


چەمی تانجەرۆی سەردەمی نیسان
پڕە لە وێنەی سروشتی جوان جوان

بەڵام من چاوم گێڕا خوار و ژوور
لە ڕیزە داری چوالەی تارا سوور

جوانترم نەدی وەک بووک وەستابێ
سەیرانگای چەمی وا پێ ئاوا بێ!

✍گۆران

📚 #سروشت_و_دەروون

╭━═━⊰✹💞✹⊱━═━╮
❣ @m_f_bryar ❣
╰━═━⊰❀💞❀⊱━═━╯

🌹مامۆستا گۆران🌹

07 Sep 2019 18:40

🖇ئەی گەلاوێژ

بە شەو گەشت و گوزاری خاتیرات هەر وەک شنەی شەوبا
لە ڕۆحی پڕ تەئەسورما ئەکا سەهرەی خەفەت بەرپا

ئەڵێی بەحرێکی قووڵ و مەنگە دنیای پڕ لە بێدەنگی
بەسەریا هاژە هاژ ئەڕژێ ئەنینم سۆزی ئاهەنگی!

هەتا سەر ڕووی زەوین چین چین نەویوە پەردەیی تاری
لە خۆیشم دیار نییە وێنەی دڵۆپی ئەشکی بێداری!

دڵم وا گێژ ئەدا گەرداوی یەئس نائومێدیی ڕەش
مەگەر تۆ بێیتە ئیمدادم گەلاوێژ،ئەی ستارەی گەش!

مەگەر تۆ ئەی گەلاوێژ، ئەی بزەی لێوی سەحەرگاهان
مەگەر تۆ بسرەوێنی قوڵپی ئێشی قەلبی بێ سامان!

لە چاوی تۆوە پرشنگێ ئەگاتە ڕۆحی بەدبەختم
ئەکا مەستی تەسەللی تا شەوی دوایی سەری سەختم!

دەسا ئەی شا ستارە ، ئەی گەلاوێژی گەش و تابان
کە هەڵهاتی بە ئەگریجەت بشۆ چاوی شەوی گریان!

✍گۆران

📚 #سروشت_و_دەروون

*´¨)🧚‍♂
¸.•´¸.•*´¨)🧚‍♀ ¸.•*¨)🧚‍♂
(¸.•´🧚‍♀ (¸.•` 🌼🧚‍♂
╭┅═ঊ🍁ঊ═┅╮🧚‍♀
@mamostagoran

🌹مامۆستا گۆران🌹

05 Sep 2019 18:45

🍂 شێعر بۆ پڕۆفایل🍁

پاییز... پاییز...
بووکی قژ زەرد
من مات، تۆ زیز
هەردوو هاودەرد!

✍گۆران

*´¨)🧚‍♂
¸.•´¸.•*´¨)🧚‍♀ ¸.•*¨)🧚‍♂
(¸.•´🧚‍♀ (¸.•` 🌼🧚‍♂
╭┅═ঊ🍁ঊ═┅╮🧚‍♀
@mamostagoran

🌹مامۆستا گۆران🌹

03 Sep 2019 20:03

🖇سەوزەگیای پاییز

"بۆ گیانی بەرزی مەولەوی"


گیا وردەی پاییز
سەوزی نەرمونۆڵ
قەیفەپۆشی ڕووی
تەختی خاک و خۆڵ!

دڵگیری ، جوانی
بێ دڕک و داڵی
دوا یادگاری
بەدیعی ساڵی!

هەچ ئێوارەیێک
دیدەنیت ئەکەم
سەمای پاییزم
تیا نامێنێ تەم!

مەستی بادەی حەز
پڕ نەشئە و خەیاڵ
ئەسووڕێمەوە
لەم یاڵ بۆ ئەو یاڵ

ئەنجا دێم ، لەسەر
سینەی نەرم و شل
ڕائەکشێم تاوێک،
نوقمی تەئەمموول..

تاوێک نەغمەی مەل
تاوێک شنەی با
تا ئەودیو شاخی
ئەندێشەم ئەبا:

خۆم بە خۆم ئەڵێم:
یاران من چیم کرد؟
بۆچ عومری جوانیم
وەک پیر بەسەربرد؟

منیش لە دایکی
تەبیعەت زاوم
بۆچ کردەوەی ئەو
نابینێ چاوم؟

ها، وا بەسەرچوو
خەزانی پیریش
کەچی ئەو زیاتر
ئەکا ئارایش!

تازە سەوزە گیا
سەرلەنوێ ئەڕوێ
مەل لە ماجەرای
عەیش و نۆش ئەدوێ!

تازە سروەی بای
قودسیی(عیسافوو)
گیان ئەکاتەوە
بەر دنیای مردوو!

ئەی گیا سەوزەکەی
دڵ فەرەحاوی
وەک تۆ سەرگەرمیی
سەودای هەتاوی

منیش لەمەو پاش
وایە بڕیارم
تیژگی خۆر بێ لام
نازخەندەی یارم

تا گەرمایـی ژین
ماوە شادی کەم
ئیتر وازبێنم
لە ئاشنایی خەم!

✍گۆران

📚 #سروشت_و_دەروون

*´¨)🧚‍♂
¸.•´¸.•*´¨)🧚‍♀ ¸.•*¨)🧚‍♂
(¸.•´🧚‍♀ (¸.•` 🌼🧚‍♂
╭┅═ঊ🍁ঊ═┅╮🧚‍♀
@mamostagoran

🌹مامۆستا گۆران🌹

01 Sep 2019 19:02

🖇پاییز

پاییز! پاییز!
بووکی قژ زەرد
من مات، تۆ زیز
هەردوو هاودەرد.

من فرمێسکم، تۆ بارانت
من هەناسەم، تۆ بای ساردت
من خەم، تۆ هەوری گریانت
دوایی نایە: دادم، دادت.
هەرگیز،هەرگیز،
پاییز! پاییز!

پاییز! پاییز!
شان و مل ڕووت
من مات، تۆ زیز
هەردووکمان جووت
هەرچەند گوڵ سیس ئەبێ بگریین
ئاڵتوونی دار ئەڕژێ بگریین
پۆلی باڵدار ئەفڕێ بگریین
بگریین.. بگریین.. چاومان،نەسڕین
هەرگیز،هەرگیز
پاییز! پاییز!

✍گۆران

📚 #سروشت_و_دەروون

*´¨)🧚‍♂
¸.•´¸.•*´¨)🧚‍♀ ¸.•*¨)🧚‍♂
(¸.•´🧚‍♀ (¸.•` 🌼🧚‍♂
╭┅═ঊ🍁ঊ═┅╮🧚‍♀
@mamostagoran

🌹مامۆستا گۆران🌹

01 Sep 2019 18:54

سڵاو ڕێز بۆ هەموو خۆشەویستان و ئەدەب دۆستانی ئازیز ، زۆرسپاستان ئەکەم کە هەر هاوڕێمانن، بەم چەشنە هاتینە کۆتایی کۆمەڵەی #دوو_هاوینە_گەشت و لەمڕوە شێعرەکانی بەشی #سروشت_و_دەروون بڵاو دەکەینەوە،هیوادارم بتوانین بە باشترین شێوە شیعرەکانی ئەم بەشەیشتان پێشکەش بکەین!

✍کۆڕی بەڕێوبەرایەتی کاناڵی مامۆستاگۆران

*´¨)🧚‍♂
¸.•´¸.•*´¨)🧚‍♀ ¸.•*¨)🧚‍♂
(¸.•´🧚‍♀ (¸.•` 🌼🧚‍♂
╭┅═ঊ🍁ঊ═┅╮🧚‍♀
@mamostagoran

🌹مامۆستا گۆران🌹

13 Jul 2021 18:36

🌸 بەردەنووسێک*

لە خاکی گڵکۆما ئەی گۆڕستانگەڕ
ئاخێک بنێژە؛
بە کێلی مەڕمەڕما فرمێسکێکی تەڕ
لە چاو بڕێژە!
لە دنیای ڕووناکتا منیش گیانێ بووم
لە لەشی جوانا؛
وێنەی پەپوولەیەک ئەهاتم ئەچووم
بەناو گوڵانا!

کۆشی گەرمی دایک جێگای نازم بوو،
گیان بووم لای باوک؛
ناوبانگی چاوڕەشی ڕشتەی ڕازم بوو،
بووبوو بە لاوک؛

بەڵام ئاخ کە ناڵەی لاوکی لاوان
زوو مەستی کردم،
بە ڕێی عەشقی پاکا نام مل و تاوان
بۆ لاڕێی بردم!

لاوێکی نامەردم تووش هات لە ڕێما،
بە سوێن و پەیمان،
وەک ڕەشمار پەپکەی خوارد، نوست لە ناو جێما؛
ئابڕوومی تکان!...

پاش ئەوەی ماری پیس زەهری خۆی ڕژان،
کشایەوە کون؛
هۆی شەرمی لە باوکم کرد بە مایەی ژان
کەتنکەری ون...
ڕووی نیازی زەردی دایک و باوک خۆم
بێسوود کەوتە گەڕ،
خۆیشی چەشنی باوکی تفی هەڵدا بۆم؛
گوێی لێ کردین کەڕ!

ئەو کوڕ بوو سەرەڕای ئەوەش دەستدار بوو،
بە دەستووری گەل
ناپاکیی کردەوەی دوور لە پرسیار بوو،
بەڵام ، ئاخ ئەجەل!
منی ((کچ)) مامزی بەندیخانەی ژین:
سزای تاوانم،
بە دەستی باوکی خۆم چووم بۆ سەربڕین!
پرچی پەخشانم،

تلا له خوێنەوە و کەوتە سەر چاوم،
ئیتر نەمبینی:
لە جەرگی باوکما سەری بڕاوم
چۆن بوو برینی؟

یان دایکی دڵسۆزم وێرای بە بێ شەرم
بۆ جوانەمەرگی
وەک دایکان شیوەنێک بگێڕێ بە گەرم؛
ڕەش کا بۆی بەرگی؟

* تێبینی: لەسەر کێلی گڵکۆی گەورەکچێک هەڵکەنراوە

✍: #گۆران
📚: #دەنگی_دەروون

*´¨)🧚‍♂
¸.•´¸.•*´¨)🧚‍♀ ¸.•*¨)🧚‍♂
(¸.•´🧚‍♀ (¸.•` 🌼🧚‍♂
╭┅═ঊ🍁ঊ═┅╮🧚‍♀
@mamostagoran

🌹مامۆستا گۆران🌹

07 Jun 2020 05:09

#یار

یار ، یار!
شیرین لەنجەو لار!
چاوم ڕوا،
سەبرم سوا،
هێزم لێ بڕا،
هەر نەهاتی، دەرنەکەوتی،
بۆچی توخوا؟
یار،یار،شیرین لەنجە و لار!

ژماردم گشت ئەستێرەی شەو،
تاقتاقکەرەم کردە خەو؛
لەبەر کزەی بای سار تەزیم،
لەگەڵ گەڵای درەخت لەرزیم،
ئاونگ وەک گیا تەڕی کردم،
هەر نەهاتی ئەوا مردم...
چاوەڕوانم،
پەرێشانم،
پەرۆشە گیانم...
سا بمگەرێ هێزی ژیانم
یار، یار ، شیرین لەنجە و لار!

نیگام تینووی تەماشاتە،
دادووراوی سەر ڕێگاتە،
گوێم عەزرەتی ترپەی پێتە،
هەمیشە ئاراستەی ڕێتە،
دڵم پڕ تاسە و پەرۆشە
دۆزەخێکە و گەرمی جۆشە،
یار، یار ،
دەرمانی ئازار!

✍: #گۆران
📚: #دەنگی_دەروون
*´¨)🧚‍♂
¸.•´¸.•*´¨)🧚‍♀ ¸.•*¨)🧚‍♂
(¸.•´🧚‍♀ (¸.•` 🌼🧚‍♂
╭┅═ঊ🍁ঊ═┅╮🧚‍♀
@mamostagoran

🌹مامۆستا گۆران🌹

21 May 2020 10:57

#بۆ_هیوای_کوڕم

هیوا،مەگری ، هەنسکی نیوەشەو بەس هەڵدە، بەس بگری!
لە چاوی بێقەرارم بۆچی دەرمانی وەنەوز ئەبڕی؟

کوڕی خۆم! کۆڕپەڵەم! میوانی دنیای تازە خوڵقاوم!
ئەدا گریەت بە زەربەی چز، لە ڕۆحی پڕ گلاراوم!

چییە ئەم گریە بێغایە، کڕووزەی نیوەشەو خورپێن؟
چییە ئەم قەترە وردانەی لە چاوت بێ مەئال ئەڕژێن؟

لەگەڵ ئەو خونچە ساوایەی لەسەر خەڵفی بەهار ئەڕوێ
چییە فەرقت؟ لەبەرچی ئەو هەتاکوو سیس ئەبێ ئەنوێ؟

وەکوو ئەو بەرخە بچکۆلەی کە هەر ئێستا لە دایک بوو،
لەبەرچی نەشئەیی یاری هەڵتناداتە سەر پاشوو؟

ئەڵێی ئەو زەڕنەقووتەی پەپکەمارە فەرشی هێلانەی:
چ ئیشێکە، کوڕم، بۆچی لەسەر ئەم هەڵکڕووزانەی؟

چییە توخوا چ سیڕڕێکە وەها مەحکوومی گریانی،
کە تۆ هێشتا لە خەم ناگەی؟ لە مەعنای گریە نازانی؟

ئەگەر وک باوکە حەسرەتدیدەکەت زەهر بچێژایە
زەمان گەردی ئەمەلتی گشت بەدەم باوە بپێژایە

لە ناو کڵپەو بڵێسەی نائومێدی و حەسرەتا یەکسەر
بسووتایە بەهاری عومری جوانیت: هەم گوڵ و هەم بەر!

بەڵێ، ڕۆڵەم ئەگەر وەک من کەمێک بەدبەختی ئیدراکیش
لەتۆیشی ڕەش بکردایە، نەوەک شەو، ڕۆژی ڕووناکیش

حەقت بوو عەرش بلەرزێنی بە ناڵەی ڕۆحی پڕ ئێشت
لە ئەستێرەی سەما بپژێنی فرمێسکی دڵی ڕێشت!

حەقت بوو ئەم هەموو گریانی نا مەفهووم و بێ مەعنا:
زمانی بەست و تەقریری شکاتت بێ لە دەست دنیا!

حەقت بوو بێ وچان بگری بەسەر تاوانی باوکیما
بەحر پڕکەی لە تف، بیدەی بە ناوچاوانی باوکیما!

بەڵام، ڕۆڵەم، کە تۆ ئێستا لە فەجری زیندەگانیتای
لەبەر دەرگای تەلیسمی بەختی مەجهوول و نیهانیتای

بە چی مەعلووم بە شوێنی هی منا ئەڕژێ چەمی عومرت؟
سەراسەر پێکەنین و خوڕڕەمی نابێ خەمی عومرت؟

بەڵێ، بەرخم! ئەگەرچی هەروەکوو یەک ژینی گشت لایە
لە بەینی بێشکەو قەبرا، بڕینی،عەینی ڕێگایە!

هەموو هەر قافڵەی بێ ئیختیاری سەرزەمینێکین
هەموو دێین و دەڕۆین، تاکوو ئەگەین، یەعنی ئیتر ئەمرین

وەلێک کۆچی ژیان کۆچێکی پڕ سیحر و پڕ ئەفسوونە:
لە یەک سەرچاوە دوو قەترە: یەکێ لێڵە ، یەکێ ڕوونە!

هەیە وەک من بەسەر دڕکا ئەنێ هەنگاوی ئاوارە
هەیە هی وایش کە فەرشی ژێری پێی ئاوریشمی گوڵزارە!

ئەوەندەی ڕۆحی مەئیووس و مەلوول تاریک ئەکا دنیا،
ئەوەندەش نوور لە ڕۆحی شادەوە ئەڕژێ بەسەر سەریا!

کوڕم! هەر وەک لە ئوعجووبەی ژیانا بەختی بەد ئەگری
شتێکیش ــ بەختیاری ــ پێکەنین گرتوویە چوار دەوری!

بە خۆڕایی مەترسە، خەم مەخۆ، مەگری لە ئێستاوە!
بە چی مەعلووم کە چی لەو تەختی ناو چاوانە نووسراوە؟

✍: #گۆران
📚: #دەنگی_دەروون

*´¨)🧚‍♂
¸.•´¸.•*´¨)🧚‍♀ ¸.•*¨)🧚‍♂
(¸.•´🧚‍♀ (¸.•` 🌼🧚‍♂
╭┅═ঊ🍁ঊ═┅╮🧚‍♀
@mamostagoran

🌹مامۆستا گۆران🌹

14 May 2020 09:59

🍂 ڕۆڵەی بێ دایک

نە ئاخ لە سینەدا ئەخواتەوە پەنگ،
نە فرمێسک ئەتوانێ بڕژێ بە بێ دەنگ

نە زمان ئەوەستێ لەمە زیاتر،
نە قەڵەم وەک لاشەی مردووی سارد و سڕ

نە فام لە جێگای خۆی ئەمێنێ، نە هۆش؛
دیمەنێ من بینیم بەرد دێنێتە جۆش

کێ دایکێ ئەتوانی بێنێتە بەرچاو،
بە مەرگی تاقانەی جەرگی هەڵقرچاو،

دامابێ لە دەشتێ؛ هاواری بە کەس ـــ
نەگا هیچ، هەر خۆی بێ و مەیتی کوڕی و بەس!

ئا، سەیری دیمەنی وەها کاریگەر
کام ویجدان ناداتە بەر نووکی نەشتەر؟!

بەڵام ئاخ، ئەوەی من دیم بەم دوو چاوە
مەینەتێکی سووکە ئەمەی بەلاوە:

نەک دایکی کوڕمردوو، دیم کۆرپەی ساوا
لای مەیتی دایکیا، فرمێسک لە چاوا،

کەوتبوو بە بێ شیر، بێ لاوانەوە،
ناو جەرگی ئینسانی ئەچووزانەوە!

✍: #گۆران
📚 #دەنگی_دەروون
*´¨)🧚‍♂
¸.•´¸.•*´¨)🧚‍♀ ¸.•*¨)🧚‍♂
(¸.•´🧚‍♀ (¸.•` 🌼🧚‍♂
╭┅═ঊ🍁ঊ═┅╮🧚‍♀
@mamostagoran

🌹مامۆستا گۆران🌹

08 May 2020 11:48

‍ گۆرانی مەزن
خوێندنەوەی #باست_حەمە_غەریب
تاوێ نەگەڕا چەرخی موخالیف بە حسابم
بێ ناڵە نییە سانییەک تاری ڕوبابم
هەر لەحزەیەکی مەهدی هەزار گریە بوو، ئەفسوس
ساڵانی مناڵیم و هەموو عومری شەبابم
گەر ڕاستە مەلەک نامەی ئەعمالم ئەنوسێ
با سوور بێ وەکو خوێنی جگەر، خەتتی کیتابم
شەمعێکە لەسەر لێوەلەرەی مەینەتی من ڕۆژ
ئەستێرەی شەو شاهیدمن، سەختە عەزابم
ئێستە، خەلەلی عافییەتیش باری بەدەنمە
هەرد دەردە ئەدا پاچی، لە بونیانی خەرابم
توخوا دڵەکەم، کوانێ ختوراتی جوانیی؟
بۆ ڕەش بوو هەموو ئوفقی خەیاڵات و سەرابم؟
هەیهات، چ بێ میهر و وەفا دەرچوو نیگارم
حاڵی بە گەرم پرسش ئەکەم، ساردە جەوابم
زیاتر سەبەبی عەقڵ و شعوورە خەفەتی من
بۆ غەفڵەت و نسیانە هەموو نۆشی شەرابم
ساقی، بە فیدای دیدەی مەخمورت ئەکەم دین
لێوڕێژم ئەوێ پیاڵەی مەیی ئەجری سەوابم.

*´¨)🧚‍♂
¸.•´¸.•*´¨)🧚‍♀ ¸.•*¨)🧚‍♂
(¸.•´🧚‍♀ (¸.•` 🌼🧚‍♂
╭┅═ঊ🍁ঊ═┅╮🧚‍♀
@mamostagoran

🌹مامۆستا گۆران🌹

05 May 2020 01:51

🔖 کوردستان

کوردستان: جێگامی، جێی هەزار ساڵەم
پەروەردەی ئەم دۆڵ و سەرلووتکەو یاڵەم!

هەناسەم تێر بۆنی بای کوێستانتە
دوو لێوەم پاراوی بەفراوانتە،

سرنجم ڕاهاتووی زیوی زەڕکەفتە
بە زەردەی سەر بەفری ئێوارەوەختە

گوێم فێرە بیستنی خوڕەی قەڵبەزە
لەو عاستەی ژوور بەفرە، داوێن گیای سەوزە

زمانم پشکووتووی قسەی جوانتە
قسەی ناو گۆرانیی شاخەکانتە

هیی ناو چیرۆکی گوێ ئاگردانتە
هیی ناو لایە لایەی مناڵانتە!

قوڵپێ با خوێنی ناو دەمارەکانم
بە زەبری عەشقی تۆ ئەیدا ، ئەزانم!

عەشقی تۆ ئەی دایکی خۆم و هاوخوێنم
هەر لە پشتی باوکا چووە هەوێنم

ئەشچێتە هەوێنی کوڕ و کوڕەزا
تا تاقێ کورد مابێ لە چیای بەرزا


کوردستان: ئەگەرچی دوورە دنیای تۆ
دۆڵ و دارستانی چۆڵ و تەنیای تۆ

دووری لە شارستان،لە ژینی تازە
لە شەوی ڕووناک و پڕ لە ئاوازە

پڕ لە پێکەنین و پڕ لە نەنووستن
پڕ لە سووڕانەوەو پڕ لە کۆڕ بەستن...

ئەگەرچی تۆ دووری لە ڕۆژی شاران
ڕۆژی پڕ لە گەردش ، هاتوچۆ و جووڵان

ڕۆژی پڕ لە زانست، پڕ لە فەننی جوان
کتێب و ڕۆژنامە، هەیکەل و مەیدان!

ڕۆژی پڕ لە خۆراک بۆ گیان و بۆ لەش
ڕۆژی پڕ لە ئافرەت ،پڕ لە باخچەی گەش

ئەگەرچی تۆ دووری لەم گشت جوانییە
جوانییەکی تر هەیە کوردستانییە:

جوانییەک کە دەستی هونەری یەزدان
نەخشی کێشاوە، نەک سەلیقەی فەننان!

جوانییەک کۆن نابێ هەرگیزاو هەرگیز
زستان و بەهار و هاوین و پاییز:

جوانیی سەختی شاخ و دۆڵی قوڵ و مەنگ
ملەی بەرز، پلەی خز ، دەربەندانی تەنگ

مێرگی سەوز، چەمی خوڕ، دارستانی چڕ
دێی بناری دەشتی پەناگردی خڕ

دەعبای ناو ئەشکەوت و ماسیی گۆمی شین
باڵداری ڕەنگاوڕەنگ ، پەپوولەی نەخشین


بەڵێ ئەگەر بێت و ڕۆژێ لە ڕۆژان
لە کۆشتا لێک بدەن جوانیی هەردووکیان

ئەو حەلە سەرانسەر ئەبێتە بەهەشت
لە لووتکەی شاخەوە تا پانتاییی دەشت!

کوردستان، کوردستان، کوردستانی جوان!
درەنگیش بێتە دی ئاواتی گۆران

دەربەست نیم، سێبەری پیرەدار بەڕووم
ئەو تاوەی ئەشکێنێ تاسەو ئارەزووم

کە ماویە ڕۆژی زەرد بگاتە دەم کەل
لای ژوورووی سەرتەوە ئەجریوێنێ مەل

پۆلی ژن ، زەرد و سوور، ئەکشێ بۆ ناو ڕان
شوان ئەڵێ بە شمشاڵ: ((هەوری لار، ئامان!))

بەڵام ئەگەر بێت و بە دوو چاوی خۆم
بتوانم ببینم بەری هیوای تۆم

ئەو حەلە: کوردستان، کوردستانی جوان
هەڵپەڕین لە من و بەستە لە ژیان!
ـــــــــــــــــــــــــ
📚 #فەرهەنگۆک

۱ـ ملە: لووتکە، جێگای بەرز لە شاخ
ـــــــــــــــــــــــــ
✍: #گۆران

📚 #دەنگی_دەروون

*´¨)🧚‍♂
¸.•´¸.•*´¨)🧚‍♀ ¸.•*¨)🧚‍♂
(¸.•´🧚‍♀ (¸.•` 🌼🧚‍♂
╭┅═ঊ🍁ঊ═┅╮🧚‍♀
@mamostagoran

🌹مامۆستا گۆران🌹

03 May 2020 07:42

🔖 ئاخ، هەزار ئاخ

ئۆف،هەزار ئۆف! ئاخ، هەزار ئاخ! تا قیامەت ئاخ و داخ!
من کە سنگم بەردە، تەبعم بەرزە چەشنی شاخ و داخ؛

من کە خوێنم ئاگرە،
چوونە جۆشم حازرە،

من کە مایەی فەخری تەئریخی بەرووم،
تاقە ڕەنگی ئابڕووم

مەردی،بێباکی، دلێری بوو هەموو...
کوا؟ ئەگەر ئەسڵی نەبوو؟

بۆ سەرم نەرمە لە عاستی بەندی دیلی، داخەکەم؟
بۆ لە نزمی و پەستییا وەک گۆمی لووتە شاخەکەم؟

ئۆف، هەزار ئۆف! ئاخ، هەزار ئاخ!
نەگبەتیی کوردی هەژار، ئاخ

بۆچی ئەو سنگەی سپەر بوو بۆ پەلاماری عەدوو
بوو بە پەردەی سەر قەفەز بۆ دەربڕینی ئارەزوو؟

بۆ زوبانی بێگرێم
نایەڵێ سەربەست بڵێم:

ڕێبوارم، سەربەخۆیی کەعبەمە؛
دەشتی خوێن گەر ڕێگەمە،
بێ خوتوورەم، بەردەبازم کەلـلەیە،
تا ئەگەم بەو قیبلەیە!

بۆ نەهاتە سەر دەمم ئەم چەشنە گوفتارانە قەت؟
بۆ نەبوومە پاڵەوانی کردەوەی ئازانە قەت؟

ئۆف، هەزار ئۆف! ئاخ، هەزار ئاخ!
غیرەتی کوردی هەژار، ئاخ!

ئەی، ئەوەی قەومانی بەش بەش کرد بە پێی خاک و زمان،
دای بە هەر قەومێ نگین و تاج و تەختی حوڕ ژیان!

کوا نگینی بەختی من؟
کوانێ تاج و تەختی من؟

بۆ لە خاکی پاک و زاری بێگرێم،
غەدر ئەکەی؟ نابەخشی پێم؟

یا ئیلاهی حەققی خۆم داوا ئەکەم:
کوا نگین و تەختەکەم؛

بۆ لە عەرشی دادپەروەر، بۆ دڵی کوردی هەژار!
تاقە تیرێکی ستەم عەکسی بکات و بێتە خۆار؟

ئۆف، هەزار ئۆف! ئاخ، هەزار ئاخ!
خالیقی کوردی هەژار، ئاخ!
ـــــــــــــــــــــــــ
📚 #فەرهەنگۆک
۱ـ گۆمی لووت: بەحری مەییت لە فەلەستین کە لە ڕووی دەریا زۆر نزمتر کەوتووە
۲ـ سپەر: قەڵغان
۳ـ نگین: ئەموستیلە،مۆر
ـــــــــــــــــــــــــ
✍: #گۆران

📚 #دەنگی_دەروون

*´¨)🧚‍♂
¸.•´¸.•*´¨)🧚‍♀ ¸.•*¨)🧚‍♂
(¸.•´🧚‍♀ (¸.•` 🌼🧚‍♂
╭┅═ঊ🍁ঊ═┅╮🧚‍♀
@mamostagoran

🌹مامۆستا گۆران🌹

02 May 2020 11:50

🔖 بێدارییەک...

ژوورم تەنیاو دنیای بەر پەنجەرەی ژوور
بە چواردەوری باخچەی کۆشکا،هەتا دوور

دارستانی سەروەو سنەوبەری سەوز
شەو ڕووناکە و چاوم یاخی لە وەنەوز

ئەی بولبولی شەبەقی شەو! بخوێنە
هەستی ((جوانی پەرستی))م بورووژێنە

با بە زەبری مەستیم بە ئاوازەی نوێت!
وێڵی دارستان بم کاتێک: خەڵک ئەنوێت!

ئەگەر عەشقی هونەر، وەک تۆ، ئەی بولبول
لە ناو ڕەگما لەگەڵ خوێنا بدا پل

منیش وەک تۆ، خەوم ئەخەمە ژێر پێم
دێم بە چڕی دارستانا ئەگەڕێم

بە لای لەشی سپی پەیکەرەکانا
تێئەپەڕم ، دەستی چەپ لە گیرفانا

ئەشێلم گیای نوقمی بن داری ئاونگ
بای دارستان‌لەرزێن ئەمژم پڕ بە سنگ

بە شەپۆلی گەڵای سەوزا کە ڕوانیم
سۆزی لەرەی نوێ ئەچێتە گۆرانیم

وەک شووشەی عەتر وشەکانی هەڵبەستم
ئەگرن بۆنی گوڵی لەیلاخی دەستم

ئەوسا مەگەر زاتێک بنێمە بەر خۆ
دەم لە جوانیی تۆ بەم هەواری مۆسکۆ!

✍: #گۆران

📚 #سروشت_و_دەروون
🗓1962.6.6 ــ هەواری بەرڤیخە

*´¨)🧚‍♂
¸.•´¸.•*´¨)🧚‍♀ ¸.•*¨)🧚‍♂
(¸.•´🧚‍♀ (¸.•` 🌼🧚‍♂
╭┅═ঊ🍁ঊ═┅╮🧚‍♀
@mamostagoran

🌹مامۆستا گۆران🌹

10 Sep 2019 19:44

🖇بەهاری پاش باران

وشکە چەم وەک چەمەنی سەردەم هەڵساوە
بەرگی سەوز و نەرمی بەهار ژاکاوە

هەر هێڵی گاسنی وەردی کێڵراوە
هەتا چاو بڕ ئەکا جۆگەلەی ئاوە

جووتیاری نەقیزەی درێژ سەر شاننەسەر
بەرەو ماڵ لەقەلەق گای داوەتە بەر!

تا ئەژنۆ لە قوڕداو کەپەنەک بەسەر
بۆ ڕانی تەریوی هەڵپە و خەم لەبەر

مامەی شوان، وەکوو خۆی، بەرخی باوەشی
تەڕتەڕە و هەڵدەستێ هەڵم لە لەشی!

کچانی کۆڵەگیای کۆڵاندن بەکۆڵ
ڕووەو دێ ڕەویون وەک مامزی چۆڵ

لە ئاو هەڵکشاوە پەل و پۆی باڵدار
ڕەنج ئەدا فڕە فڕ ناگاتە سەر دار

تەڵانی ناو باخی پڕ فەرشی گیای سەوز
لێڵاوی باراناو کردوویە بە حەوز

لە لێواری حەوزا گوڵاڵە و بەیبوون
ساوان و ئەلەرزن لە تاو نوقوم بوون!

درەختی هەڵووژەی بەفر داپۆشیو
دار سێوی ڕازاوە بە پۆیلانەی زیو

هەڵاڵەی وەراندوون تەوژمی باران
وەک بووکی ڕووت کراو کەوتوونە گریان!

لە بەرپێی نەمامی چوالەدا سەوزاو
لە ڕوومەت تکاوە ڕژاوەتە ئاو

گوڵباخی گەشاوەی گەڵا تێکشکاو
بە کوڵمیا دێتە خوار ئارەق لە گوڵاو

وەک یاری شەرمنی دەس لە مل ئاڵاو
بە گووپچڕ دەرباز بووی شانە و قژ شێواو!


ئەمە دیمەنی پاش وەشتی نیسان:
پێشێلی ستەمە گشت شتێکی جوان

تا هەوری ڕووی ئاسمان دڕ ئەداو هەتاو
ئارامیی شیرینتر ئەخاتەوە ناو!

✍گۆران

📚 #سروشت_و_دەروون

*´¨)🧚‍♂
¸.•´¸.•*´¨)🧚‍♀ ¸.•*¨)🧚‍♂
(¸.•´🧚‍♀ (¸.•` 🌼🧚‍♂
╭┅═ঊ🍁ঊ═┅╮🧚‍♀
@mamostagoran

🌹مامۆستا گۆران🌹

08 Sep 2019 19:33

🖇بەسەرهاتی ئەستێرەیەک

بانگی شێوان: لە ئاسمانی خۆرنشین
ئەستێرەیەک ئەجریوێنێ:گەش،شیرین!

دەورو و پشتی دەریای شینە بە تەنیا
سەرنج ئەدا لە ئێوارەی ڕووی دنیا!

لە پرشنگیا هەیە شێوەی چاوی کاڵ
لە لەرزینیا زەردەخەنەی لێوی ئاڵ!

وەک ئەو گوڵەی ئەیدا لەسەر نازدارێ
تێر نابێ لێی هەرچاوێ بۆی ئەنواڕێ!

منیش یەکێ لەو تەماشاکەرانەم
دڵ گیرۆدەی ئەم جوانیی ئێوارانەم

لەسەر گردێ بەرانبەری ئەوەستم
کەیلی بزەی ئەبێ سەرنجی مەستم!

تاریک دایە... ئەستێرەی تڕ بەر و دوا
فڕێ ئەدەن چارشێو لە عاستی دنیا

بەڵام ئێستا ئەو ئەسپایی بەرەوخوار
هەڵئەخلیسکێ،کز کز،ئەگاتە لێوار

لێوی تینووی کەل وەک دڵۆپ ئەیمژێ
ئەی داخەکەم مەرگی نیشتن ئەیکوژێ!

ئەم ئەستێرە ، بەسەرهاتی دڵگیری
لە کام ڕۆحا نابزوێنێ سا زویری؟!


🌹مەبەست لە دەریای شین ، ئاسمانە

✍گۆران

📚 #سروشت_و_دەروون

*´¨)🧚‍♂
¸.•´¸.•*´¨)🧚‍♀ ¸.•*¨)🧚‍♂
(¸.•´🧚‍♀ (¸.•` 🌼🧚‍♂
╭┅═ঊ🍁ঊ═┅╮🧚‍♀
@mamostagoran

🌹مامۆستا گۆران🌹

06 Sep 2019 19:04

🖇شەوێکی بەهار

تاریکە شەوێ :نوقمی ڕەشی چیهرەیی دنیا
دیلی تەمی ئەسرار بوو دەر و دەشتی حەقایق
چووبوونە پەنا پەردەیی خەو کەون و خەلایق
موستەغریقی ئەندێشە ئەبوو ساهیری تەنیا!

تاریکی، تەمی دەشتی دڵ و تانەیی سەر چاو
شاباڵی پەخش کردبوو تاکوو ئەبەدییەت
بێدەنگی لە چوار لاوە موهاجیم وە خرۆشاو
وەک زوڵمەتی شەو نەیبوو ئەویش نووک و نیهایەت


جار جار لە ئوفوق ڕائەوەشا شیری برووسکە
گرمەی غەرەبی گوێی کەڕ ئەکرد هەورە تریشقە
باران سەرەتای ریققەتی بوو: نم نم ئەگریا
وەستابوو زەوی تینوو زەلیلانە لەبەریا!
ئەمجا بە خوڕەم باری، لە پاش یەک دوو دەقیقە
ئافاقی ئەمەل ڕەش بوو ،نەما پێوە ترووسکە!

تاو تاو لێی ئەدا تەپڵی هومووم تەرزە بە ئاهەنگ
وەختێ کە ئەهات حەملەیی تونگ و خرۆشان
ئەیڕشتە دڵی پیاوی سەبوو کەڵکەڵەیی جەنگ
هەر وەک دڵی خەووافی ئەترسان و ئەلەرزان!

لەم حاڵەتەدا ڕۆحم وەکوو چاوی گلاوی
ئانێکێ بە قەد ساڵێ پری زەهری ئەلەم بوو
ناگا: هەمیسان نیشتەوە لافاوی تەبیعەت
ئاهیستە... نەما زەلزەلە و نەعرەیی حیددەت!

کەوتە تەنکی هەوری ڕەش و چڵکنی پێشوو
ئەلوانی قەزەح تێکەڵی بوو، کون بووە ناوی
ئەستێرەیەکی جوانی گەشی پڕ لە تەبەسسووم
دەرکەوت و گەیشت لێوە بە دڵ زەوقی تەماشا
بەحری هەوەس و شەوقم وەها هاتە تەلاتووم:
بۆ سەیری جەمال کردنی دنیایی بەیانی
هێشتا شەوی زۆر مابوو کە من کەوتمە سەحرا
وەک شێت... بەڵام شێتی شێعر ، شێتی جوانی!

✍گۆران

📚 #سروشت_و_دەروون

*´¨)🧚‍♂
¸.•´¸.•*´¨)🧚‍♀ ¸.•*¨)🧚‍♂
(¸.•´🧚‍♀ (¸.•` 🌼🧚‍♂
╭┅═ঊ🍁ঊ═┅╮🧚‍♀
@mamostagoran

🌹مامۆستا گۆران🌹

05 Sep 2019 18:44

🖇دیمەنێکی بەهار

ئەم لا یەک پەڵە ، ئەولا یەک پەڵە: هەوری ڕەنگاوڕەنگ
له ناوەڕاستا: بە دەم ئاسۆوە ڕۆژی شۆخ و شەنگ

سەوزەگیا پاراو، گوڵ و گوڵاڵە مەستی ڕەنگ و بۆ
درەخت تازە شین، سەر لق ڕازاوەی گوڵ،گەڵا،چرۆ

سەرتاپای چیمەن دەرئەدا چین چین مرواریی ئاونگ
چەشنی تارای سەوز ئەدرەوشێتەوە، لێی ئەتکێ پرشنگ

نەسیمی بۆنخۆش، کزەبای فێنک، وەک نەوای ئیلهام
سەمای جوانیی پەریی تەبیعەت دێنێته ئەنجام!


قاسپە قاسپی کەو، نەغمەی چۆلەکەو بولبولی دەنگخۆش
پیاڵەی نەشئە، حەتتا بە ڕۆحی بەردیش ئەکا نۆش!

وەک بگری بە کوڵ دنیای سەرمەستی قاقای پێکەنین
لە هەموو عاستێ فرمێسکی گەرمی کانی هەڵقوڵین!


مەلی سەر بنچک ، پەلوپۆ ڕەنگین! خۆ من هەڵۆ نیم
لێم مەفڕن جووت جووت ، مەترسن ئاخر، پێتان بڵێم چیم:

منیش وەک ئێوە لە دنیای گەورە گەردێکم بچووک
حەتتا ناشتوانم بفڕم ، بخوێنم ، بە باڵ ، بە دەنووک!

بەڵام وەک ئێوە لە دڵما ئەگڕێ مەیلی سەربەستی
ئەمەش ئایینم وەک ئایینتانە: هەردە پەرەستی!

✍گۆران

📚 #سروشت_و_دەروون

*´¨)🧚‍♂
¸.•´¸.•*´¨)🧚‍♀ ¸.•*¨)🧚‍♂
(¸.•´🧚‍♀ (¸.•` 🌼🧚‍♂
╭┅═ঊ🍁ঊ═┅╮🧚‍♀
@mamostagoran

🌹مامۆستا گۆران🌹

02 Sep 2019 18:27

🖇هەوری پاییز

لە دەڕیاوە قەتاری هەوری باڕشت کەوتە دووی پێشەنگ
بەسەر چــۆکــی چیادا چــۆکی داداوە، کش و بێدەنـگ

بە سەر پاییزی زەردا با بە خوڕ بگری، بە کوڵ بگری
لە سەر ئاخر گەڵا ، ئاخـر چڵی تەنیایی گوڵ بگری!

بە خوڕ بگری، بە کوڵ بگری: بەسەر دەشت و دەری وشکا
بەســەر داری گەڵالەردا ، بەسەر پــووشا ، بە ســەر دڕکا

بەسەر سەرچاوەیی کزرا، بەسەر زیخی چەمی دێما
بەســەر هەر وشکییێکا وا لە هاوینــی گەرم جێ ما

بەڵێ بگری ، بە کوڵ بگری، هەتا ئاخر دڵۆپ بگری
بە گریەی هـەوری پاییز با نوقم بێ سینەیی کزری!

بەفــر ئاســۆی بڵنــد بگـرێتە چــوارچێــوەی بلوورینی
لە چەم هەڵسێ خوڕە و هاژەی شەپۆلی ئاوی خوێنینی

دڵــۆپــی سارد و فێنک با لەســـەر دار و دەوەن بـڕژێ
پەپوولەی زەردی ئاڵتوونی لەسەر لق هەڵوەرێ، بپژێ

بەڵــێ! بگری هەور، بارانی پاییـز ، بـێ وچان بگـری
لەسەر باغچەی گوڵێ وا سیس ئەبێ ئاخر چڵی عومری

بگرمێنێ، تەپ و نم دابکا، بیکاتە شەست، هەرگیز
نەوەستێ قوڵپی گریانی، نەوەستێ قوڵپەکەی پاییز

تــەبیـعــەت زەرد و ژاکاوە، لە حاڵــی گیانکەنشتایە
نیشانەی ماتەمـــی پاــییز لە فرمێسکـی درشتایە!

✍گۆران

📚 #سروشت_و_دەروون
🗓1933

*´¨)🧚‍♂
¸.•´¸.•*´¨)🧚‍♀ ¸.•*¨)🧚‍♂
(¸.•´🧚‍♀ (¸.•` 🌼🧚‍♂
╭┅═ঊ🍁ঊ═┅╮🧚‍♀
@mamostagoran

🌹مامۆستا گۆران🌹

01 Sep 2019 18:54

وەک پێشەکی بۆ #سروشت_و_دەروون گۆران دەڵێت:

سروشت و دەرون، پێشکەشە
بۆ:خاوەندی ئەو دەروونە ڕوونانە کە دەرسی پێشکەوتن
لە سروشتی جوان وەرئەگرن.
بۆ: گیانی ڕابەرەکان و سەربازە نەبەزەکانی ڕاپەڕین!
چ مردوو، چ زیندوو، چ هێشتا نەزاو.

*´¨)🧚‍♂
¸.•´¸.•*´¨)🧚‍♀ ¸.•*¨)🧚‍♂
(¸.•´🧚‍♀ (¸.•` 🌼🧚‍♂
╭┅═ঊ🍁ঊ═┅╮🧚‍♀
@mamostagoran

🌹مامۆستا گۆران🌹

31 Aug 2019 10:21

‌ 🖇 گوڵی خوێناوی

کوڕ
بڕوانە شایییە چۆپییە لەو ماڵە
گوێ بگرە زوڕنایە دەھۆڵە شمشاڵە
زەرد و سوور تێکەڵ بوون ژن و پیاو ھەرایە
لەونێوه ھەر ھاڕەی ھەیاسەی تۆ نایە
سا توخوا خێراکە با بڕۆین دەست بگرین
بە کامی دڵداری پێکەوە ھەڵپەڕین

کچ
گوڵ نەبێ بۆ سەرم ئاڵ چەپکێ زەرد چەپکێ
نایەم بۆ زەماوەن نایەم بۆ ھەڵپەڕکێ

کوڕ
کچ لە ڕێی جوانیتا کچ لە ڕێی جوانیتا
کچ لە ڕێی نیونیگای ھاتوچۆی کانیتا
پاییزە، گەڵای دار ڕژاوە باغ ڕووتە
گوڵ کوانێ؟ گوڵ لێوی بە بزە پشکووتە

کچ
گوڵ نەبێ بۆ سەرم زەرد چەپکێ ئاڵ چەپکێ
نایەم بۆ زەماوەن نایەم بۆ ھەڵپەڕکێ
بتدایە دڵ بە من بە ھەموو مەعناوە
دوو چەپکت ئەھانی لە باغچەی پاشاوە


کوڕ دەڕوا و لەبەر خۆیەوە بە گۆرانی دەڵێ
باغچەی پاشا لەوبەر ئاوە
خێڵی دوژمن دەورەی داوە
ئەڕۆم ڕێگام لێ گیراوە
ناڕۆم چاوکاڵ لێم تۆراوە
بەرەبەرە لە دێ دوور کەوتەوە

کوڕ
بە باغچەی پاشادا ورد گەڕام خوار و ژوور
زەرد ھەبوو بۆم چنیت چنگ نەکەوت گوڵی سوور
نازانم ئەمجا دێیت بۆ شایی و ھەڵپەڕکێ

کچ
نایەم گوڵ ماویەتی بۆ سەرم سوور چەپکێ

کوڕ یەخەی مرادخانیی ترازاند
ناتەوێ ئەم زامی سەر دڵەم لەباتی

کچ
ھەی ھاوار تفەنگی دوژمنیش پێکاتی؟
ڕاکشێ تاوێ سەر بنێرە سەر ڕانم
با بگریم بۆ دڵێ بۆ گوڵێ دۆڕانم


✍گۆران

@mamostagoran

@kavehmoulani