Medicine Way | MW

26 Oct 2022 00:14

لو انت دكتور اقرا الكلام دا هينفعك ..

بعد ماتخلص الماستر بتاعك ( ونيابتك طبعا ) اقعد مع نفسك قعدة كدة واسأل نفسك سؤال محوري
"هو انا مسافر ولا قاعد في مصر ؟؟"
لو كان اختيارك انك هتسافر .. خش ع السؤال التاني علطول .. "معايا وقت اذاكر دكتوراة او زمالة مصرية ولا مش قادر خلاص ؟" ..
لو معاك وقت اقعد وذاكر وخلص وسافر يوم نجاحك بالليل .. هتاخد زبدة السفر .. إن شاء الله
لو مامعاكش وقت .. والدنيا مقفلة في وشك وقررت تسافر بدري .. سافر .. بس خليك عارف انك مسافر على وظيفة ثابتة ما بتتحركش .. ما بتترقاش .. مابتتعلمش .. في مقابل مرتب محترم وحياة آدمية ..
طيب لو كان اختيارك من الاول .. انك قاعد مش مسافر
لاسباب اجتماعية او لاقتناعك او لاي سبب .. هاتعبك معايا شوية في القراية ..
١- افتح عيادة خاصة عليها يافطة باسمك وكل الشهادات اللي اخدتها في احسن مكان في بلدك مهما كنت بتشتغل في اماكن خاصة ومستشفيات كبيرة .. هي دي اللي باقيالك
٢- اشتري لبس فورمال هاف كلاسك مريح عشان الشغل
.. لسه المريض مرتبط بالصورة الذهنية بتاعة الدكتور الابيض والاسود .. صعب اوي يقتنع بالكوتشي والبنطلون الچينس
٣- اهتم بجسمك وشكلك ودقنك وشعرك وريحة بارفانك
٤- صفحة ع الفيس بالعلامة الزرقا وكاميرا ديچيتال او هات ايفون وصور وفيديوهات ولقاءات وبروباجاندا على قد ما تقدر .. بس ماتأفورش .. وماتنصبش ..
٥- نوع مصادر دخلك من تعاقدات وشغل في مستشفى او اتنين وماتنساش القاعدة رقم ١
٦- لو جراح .. خلي إيدك تقيلة في الجراحة وماتشتغلش الا الحالات السالكة والستريت فوروورد مهما كانت شطارتك
واهتم بالورق والتذكرة والكونسنت والكلام بتاع النيابة العامة دا .. والحالات الصعبة ماتزحلقهاش .. وجهها تروح فين
٧- حدد يوم اجازتك وماتشتغلش فيه ولو على رقبتك
( دكاترة التخدير مالكوش في الحتة دي ) .. كل كام شهر خد العيال وامهم وروح حتة بعيدة ونضيفة .. ماتنساش العمرة والحج .. ماتفوتش فرصة تقعد فيها مع اصحابك قعدة لطيفة ولو كل شهر مرة
٨- العربية بتاعتك لازم يتوفر فيها ٣ حاجات .. تكييف كويس .. عفشة طرية .. عزل تام للصوت .. هتقضي فيها وقت مش قليل .. غير كده ما يفرقش .. كده كده هتتحك
٩- العلم مفيد طبعا .. بس صياغته وتقديمه هيفيدك اكتر
خليك شاطر وحرك ولسانك حلو .. ماتقفش في وش مسلمات المرضى بس تحايل عليها
١٠- لو لسه مرتبط بشغل الحكومة اشتغله بضمير واديله حقه .. هو دا زكاة علمك وعملك وله متعته .. ولو مش مرتبط بشغل حكومة .. اشتغل في مستوصف خيري ولا اعمل يوم مجاني في مركز طبي .. بس ماتكشفش ببلاش على مريض ولا تتنازل عن اجرك .. المريض الغلبان يا يجيلك الحكومة يا يجيلك المستوصف ..
١١- اتعود تصلي في الجامع او جماعة .. وصوم على قد ماتقدر واقرا قرآن .. لو سيبت نفسك للدنيا هتاخدك لابعد مما تتصور ..
١٢- اوعى تفتكر انك لو عملت كل دا هتكون في أمان من الخوازيق .. بس ع الأقل هتبقى عامل اللي عليك
١٣- اوعى تنقطع عن الحاجات اللي بتحبها بداعي الشغل
حجز كورة .. قراية .. رسم .. انشالله شوية مشي يوم الجمعة بعد الصلا .. دا مخزونك من السيروتنين .. هتحتاجه في اوقات الستريس و دي مش قليلة ..
١٤- لو شغلك اتعارض مع بيتك .. قلل من شغلك .. احنا مش مكن فلوس .. احنا بشر ولينا حياة اجتماعية ..
١٥- خلي عندك بلان بي طول الوقت وخلي دماغك فليكسبل انك تغير اتجاهك .. بس ماتعملش دا الا في الظروف القصوى
.. بالتوفيق .
د محمد أيمن .