4016
السلام عليكم الى الرواديد الكرام تم نشر قصائد الليالي الفاطميه 1444 هـ بتوفيقٍ من الله عز وجل ونظره من صاحب الزمان عج #نسألكم_الدعاء #الشاعر_حاتم_صبري_الكاظمي
بدمه الفده الدين ... ميعوفه الحسين
هيهات لا ما ينساه ... اليستشهد بحب مولاه
لكل دمعه بالعين ... ميعوفه الحسين
_______
حُـب الشهامه اول درس مر بينه
واعله العقــيده الصادقه ايدلينــه
واحــدنه بيـــضه بخدمــته چفينه
عاش العمر بس الحسين بعيــنه
شيسوي بالغيــر ... و حسين أبو الخير
شيريد من خيره انطاه
اليستشهد بحب مولاه
لكل دمعه بالعين ... ميعوفه الحسين
_______
الأنسان ما يبـحَث عليه الجاهيّــه
حسـينيك يدوّر ياهو أصدَق نيـــّه
صيـــت الغنه و أسمائــنه وقتيــّه
ترفعك فقط دمعه عله المسـبيّه
اليخدِم بلا صوت ... ويه حسين ميموت
ما دوّر أمـــــوال و جاه
اليستشهد بحب مولاه
لكل دمعه بالعين ... ميعوفه الحسين
____
الخِــدام كون الدنـيا ما تِشغلُهم
ميلوگ والله بس الحسين إلهُم
العافوا حسين و بالأمس دللهُم
لو ما قِــبـــــلهُم الله ما يقبَــلهُم
أعظم شهامه ... اليرضي إمامــه
الله يحــشــره ويــــــاه
اليستشهد بحب مولاه
لكل دمعه بالعين ... ميعوفه الحسين
_____
صـح فقره بس مثــال الرِفعــه
أغنـانه الله حـسين صرنه رَبعه
لو مات خادم چان عالطف ينعه
الآلاف تطلع وره نعشه اتشيعه
هالمكرمه هاي ... من سيد الماي
الله يطـــيّــب مَـــثــواه
اليستشهد بحب مولاه
لكل دمعه بالعين ... ميعوفه الحسين
____
مبخوت بالخدمه اليخلّص عمره
لو مات بالآخِره أجـــــره شكبره
چم خادم إختارته انحس الزهره
هنياله يم حســـين حفروا گبره
لو دِفـنته الناس ... اتلگا العـباس
بحضنه الحسين اتلگاه
اليستشهد بحب مولاه
لكل دمعه بالعين ... ميعوفه الحسين
حاتم صبري الكاظمي
الأمام الصادق يخاطب الأمام المهدي سلام الله عليهم :
شلونك و الشــلونك عايشه وياي
نفت مني رقـــادي غيـبتك مولاي
گلبي اعليك حته لو شربت الماي
أنه ذاك اليتاني و كاض خاصرته
___
مثل دمعك غريبه دمعتي الحمره
مته نــگعد ســويه و نبچي بالعبره
على السحگته الخيل وطشرت صدره
أنه ذاك الي چتفوا بالسبي عمته
___
شصــبر سيـــدي و الينتـظر يتعب
تعال وياي نمــشي لكربله و ننحب
ونسولف هيچ ضربوا عمتــي زينب
ورضيع بلايه راس بچفها شايلته
___
ونگعد بالمخــــيم نثغب اعله الصار
هنا ركضت رقيه وطاحت اعله النار
يسطــروها اذا صـــوب الرمح تندار
گلبي بغيبـــتك يالمهـــدي شــيبته
___
امشينـــه نروح بون يشَـــيب الراس
نوكف عالشــريعه ابخنگت الانفاس
اريدك كــــون تنعالي عله العباس
هذاك الـ بالأخوّه شمحله سالفــته
حاتم صبري الكاظمي
بصحراء نطوف .. بعيونك شــوف .. يا طـــه
خدرك مچتوف .. فاگــدله چفوف .. يا طـــه
و بيــا الالام ... متانينه الشام
يا طه
_____
يمن صلّى علـــيك الله ... و ملائــكتــه تجي اطـوفه
بناتك بالصحاري جروح ... اعله نوگ الهزله مچتوفه
وجوه من الشمس ذابت ... لـ عيون الذلّــه مكشوفه
شيتانينه بعد بالشــام ... مو كــافي سـبي الكـــوفه
بگلب المحروگ .. و چف المشبوگ .. ممشاها
حيف اعله النوگ .. من سوگ لسوگ .. ممشاها
يا جفــن اينـــام ... متانــينه الشام
يا طه
____
حلم رافگــني بس واقــع ... عله عيـــوني السبي كابوس
الحُسين انداس بالحافر ... و انه بروحي الشماته ادوس
أنه الشجرة الـ عله ايتامي ... و عَلَيْ عين العساكر فوس
اطيح من الهزيله لو ... وگعلي واحد من الروس
تشتمني الناس ... بعين الاحساس ... مبچاها
تعاتــب يا راس ... لراس العـــباس ... مبچاها
ما ادري شضام .. متانيــنه الشام
يا طه
____
سبينـه ( ما رأتهُ ) عين ... غصب بي من طلعنه اليوم
وسِــف خــدَّر بــني طه ... انسِبَت مثل الترك و الروم
اطأطأ راسي مو بيدي ... فـــرحــانه بدمـعـنــه الگوم
رمل حار و سياط تحوم ... يجدي من ضريحك گــوم
بگيــد الجلاّد ... زينـــب تنگـاد ... ترضاها
والگيد الحاد ... بعُنُق السجاد ... ترضاها
أنهض ما دام ... متانينه الشام
يا طه
_____
اكابر عالجـــرح و اصبر ... اكل گلبي الهضُم و الحر
منو ايمد أيده من رمحه ... اذا شافــوني من اعــــثر
من العريس ارد رملــه ... اعله راسه اعله الرمح تفتر
و أسمع ليــله يم راسه ... تگلّــي انزلّــي يالاكـــبر
يا عمري الراح ... شــالوا برمــاح ... خـــلاها
الأم ما تـــرتاح ... مكسوره جناح ... خـــلاها
تِنَخــه و ما گام ... متانينه الشام
يا طه
_____
الحياة بلا أخو هيمه ... سراب سنيني من بعده
سوه اتربـيـنه و اكبرنه ... بدلال الـ ماكو من عنده
الزمن فرقنـه بارض الطف ... يجدي العايشه بسِدّه
و اجه بس برمح راسه ... و جماله راح من خدّه
بشيبه الدم صار ... و تراب الحار ... بعيونه
و شــما احـــتار ... لزينــب يندار ... بعيونه
فوگاي خيام ... متانينه الشام
يا طه
_____
شيتانينـه بعد أكثـــر ... من عنـــده الدهر شيريد
مـو كافـــي ربيــباتك ... يُرض منها الحبل چم أيد
ايتلگونه بضحك و طبول ... شنو بالشام صاير عيد
عجيبه البيدها المُصحف ... مچتوفــه تِطُب ليزيـد
شگد فرحانين ... الما عدهم دين ... شتموها
يطلبونه بدين ؟ ... و براس حسين ... شتموها
بعيون سهام ... متانينه الشام
يا طه
الشاعر حاتم صبري الكاظمي
https://youtu.be/Hj4l9WG0kNA?si=hPdJ2hUX0x3ohRq0
Читать полностью…
قلبين ظلينا…
هي تناديه كأبٍ غاب،
وهي تواسيها بقلبٍ مكسور.
وبين الوجع والصبر…
بقى الفقد واحد.
[ گلبين ظلينا ]
أداء وألحان #حسين_فيصل
للشاعر #حاتم_صبري_الكاظمي
.
من إصدار
قصة الحسين
#محرم1448
https://www.instagram.com/reel/DZmh4xKoacy/?igsh=MWozaGtmb2xidDZ1OA==
خوَّتنــه تصيح ... اوگف لا تطيح
بالگوّه مشـيت ... تدفع بيه ريـح
ما چنّي الحسين الروح صاحت
مو عــباس كلها الخــوّه طاحت
______
أمشي و أعثر و اوگع ... بدت روحي احس تطلع
مِــن نـاده حُســين
ما ادري شنــو البــيّه ... گـوّه تمــشي رجــليّه
و دربي مدري وين
انظر من بعيد ... شو ما عنــده أيد
گتله لا تطــيح ... شلون ابقه وِحيد
جيته من الخيام ... نــــاداني ســلام
واگف حَسبيت ؟... امتَچي اعله السهام
تركُض لِيه حته عيـــوني راحت
مو عــباس كلها الخــوّه طاحت
______
طِلَعت الخيمه نُص حيلي ... گلت يا زينب ادعيلي
ينطيني الله حيل
شو صـيحِاتَـه من گلبه ... براسه خاف اكو ضربه
آحّــا يالكـــفـــيل
اليِذْكُر مِن نِسوك .. الشايل عـطر ابوك
يصيـح اعله النهر .. ألحگ طاح أخوك
طِحْت اعله الحِنين ... شـو ما عـنده عين
گعدت و ليّه صاح ... ( هَلْ أَنتَ الحُسين )
يبعد اهلي نَعَم و الروح ناحت
مو عباس كلها الخــوّه طاحت
_____
دخيلك يا علي بويه ... حِضنته و صحت يا خويه
شمـــسـوين بيك
راسك مِنهِـشِـم كلّه ... مُردت عينك النبله
مَگطوعات اديك
كلشي بروحي ناح ... صخره و حيلي طاح
بخاصِـرتك يخوي ... شمــســويه الرمـــاح
ما ظل عندي صوت ... راح احچي سكوت
شستـــحمـــل وراك ... عـــباس ارد امـوت
الخــيمه و دنيــتــي ويايه مالت
مو عــباس كلها الخــوّه طاحت
____
أشوف بواهِسك تبچي ... ما تگدر و لا تحـچـي
يبــعد عيــوني گول
زينـــب خلها تـعذرني ... اذا ما راضــيـــه عـني
تـعاتـــبني البـــتول
گِلتـلك يا هَــواي ... شتِعذَرك يا رجاي
تريدك بـس تگوم ... بعـــد مَتــريد ماي
يحاچيي لنّه حَسْ ... حِزن وجها انترَسْ
سِكـت لَنْ الأخــو ... انگـطع منّه النَفَسْ
لطم راسه الحسين و روحه نادت
مو عــباس كلها الخــوّه طاحت
______
يروح و يوگف و يرجَع ... بلكت بي نِفَس يسمَع
عساه ايرد يعيــش
حچه ويمشي علىٰ كيفه... و يتــوچه علىٰ سيفه
اظل وحيدي ليش ؟
شيســـوي بالحياة ... و ضماير شامتات
يصيحَن من بعيد ... أخو عبـــاس مات
اجه و زينــب وراه ... يگلـها ما يجيچ
باخير انفاسه مات ... بقه يسلم عليچ
عمود الخيمه طاح و هيّه گالت
مو عــباس كلها الخــوّه طاحت
الشاعر حاتم صبري الكاظمي
قِسّيسِ الطَف الشــابْ
مِـنْ خِيرَتـها الأصـحاب
بحسين و غرامَه ... أعلىٰ الله مَقامَه
______
أصبح مِنَّ الأنصـــار ... مو من أهل الدينار
شاف اگلادة حُب احسينه أحله مِن صَليبه
الدين القـيّم يدريه ... بحسين و صلّه اعليه
أقرب واحد شافــــه بگلبه و الوادم غريــبه
عيسه ايناديِ مبروك ... لحسين انته المملوك
و هنياله الِّي صار الظــامي يا عالم حــبيبه
صـــاح بـ مولا مفتــون
أسمي وَهَبْ المجنون
بس أعلن هيامه ... اعلىٰ الله مقامه
______
لا مو خمسه و عشرين .. يصرخ كل عمري حسين
الحُب يعني تموت لمحبوبك هيچ الحُب يقيسه
ما دوَّر صيت و جاه ... رايد بس حُب مولاه
واگف يحرس خيمة زينب بهاي يغبطه عيسه
حته ايطَهْرِ الأنفاس ... يبوس بخيمة عباس
هاي الخيمه العَــبّاسيه أحــله من الكَـنيسه
صاح اويه حسـين و زاد
شمـحلاتـه الإسـتشــهاد
صادِق مِنْ كلامه ... أعلى الله مقامه
___
"يُوحنّا" شما يقـــراه ... يقره اَباْ عبد الله
من تصـغر بعـــيونه الدنيه حسين بگلبه يكبَر
بالحُـب شَرّع قانون ... لازم تِطلع مَجـنون
تدرس يم عابس و يعلمك توصــل يمّه أكــــثر
اويه حسين الرايح غير ... يلگه اويا كل الخير
مَفهوم الحُب وَهَبْ ايگوله: لازم انطي مَنحر
بالطف أعــظم إنسـان ؟
من يمـوت و عطـشان
و الواســه إمامه ؟ ... أعلىٰ الله مقامه
___
يهتف "و رأيتُ الدين" ... كلّه بوجهك يحسين
نَصراني و صرت احسيناوي هاي اغله هويه
"حائك" عندي بتبجيل ... اتْعادل سبعين انجيل
" مَتَّىٰ و مُرقُس لُوقا " بـ "سينك" لا شَي بالقضيّه
صِرت بحبك مَرزوق ... أجمل واحد مخلوق
گالوا يوسف بس انته أجمَل واحد مر عليه
" يُوحنّا " اتسِده " الياء"
و " نونك " تاج الأسماء
و ليك اليحني هامه ... أعلىٰ الله مقامه
_____
أُمّـه بدور الترسيخ ... أول أم بالتــــاريخ
حْسين و ثُمَّ حْسين تگلّه حْسين و تالي أمُّك
من يعطش گِلّه الماي ... أسگيك بهاي و هاي
قاتِل دون الطيب خَلّني بيك حسين اشمك
صيح اگبال الاطياب ... ( إنّي وَهَبُ إبنُ حَبَابْ)
بصِينية القاسم أعلگلك شمعه وحنتي دمك
مو بس حته الزهراء
تِـفــرح حتـه العَذراء
تگلّي ابنچ وسامه ؟ ... أعلىٰ الله مقامه
_____
يضحگ عالدنيه و گال ... أعظم كل الأعمال
حسين ينادي هل من ناصر؟ أركضله بدمعتي
يا ريت يردلي الحيل ... هيهات ادوسه الخيل
لو ذبحوني و أحياني الله هم ابقىٰ بخدمتي :
أول نَصـــراني أموت ... حِضن حسيني التابوت
يســتاهل لو يم أقــدامه ايشــمروها رُگبتـي
لـو ألالاف المــرات
ما عوفك لا هيهات
موت الحُب شهامه ... أعلىٰ الله مقامه
الشاعر حاتم صبري الكاظمي
..
مَتّىٰ و مُرقس ولوقا ويوحنا الكتب الأربعة التأريخية عن حياة اليسوع ( المسيح ) في الديانة المسيحية
.
قصيدة السيدة ام البنين عليها السلام:
تاهَت روحي من دونك
مشتــاگه حچي عيونك
گـلبي يــســأل شــلونك...يمذبوح
______
بالروح ... مرسوم ... لو مـدري أوهــام
مذبوح ... مسلوب ... مسحوگ العظام
أسولف أنه و جروحي ... يا حيلي و بلا حيل
يگــلي كل جــرح بيّـه ... بيك اشسوَّت الخيل
گلبي يكـسر الخــاطر
ما ضايگ طعَـم حافِر
كلـشي راح بالعــاشِــر ... يمذبوح
______
عالگــاع ... لا ثـوب ... يا روحي عُريــان
منحــور ... وتصيح ... يا يمــه عطــشان
مو أنه الـ اريــد الماي ... أنه امروّه ابـ نجيعي
احفري ونگطي بنحره ... خل يشرب رضيعي
طفّـك جــرح لاگــاني
أمــوت هـواي خلاني
بعــدك أنــي مو أنــي ... يمذبوح
_______
ويــاك ... و هناك ... شفت الحرگ صار
وچفوف ... ازغار ... مــحــتــرگه بالنار
اركض ويه ركضــتها ... تمــد روحي أديّـه
أخـاف النار لا تــوگع ... عله اعـبايـة رقيّه
بدُخان الخيمه مَخنوگه
أصـابع چـفهــا محروگه
تراچــي منــها مبيــوگه .. يمذبوح
______
بالبــيت ... و العين ... منها النـظر راح
مگطـوع ... مرفـوع ... راسك عالرماح
أتــرَف مِـنّه ما شــافت ... بحيث اتلچمَك الريح
بس يسـمع تـوِن زينب ... گبـالي راسـك ايطيح
انكسَر ظـهري علىٰ مودك
شِفِتْ رَفسَه عله اخدودك
يحـلمــي الــراح شيعودك ... يمذبوح
____
بحبـال ... شمّــات ... مربوطه عالنوگ
نسوان ... عدنــان ... دَخـلوهن السوگ
عـلويـاتـــــك ايشوفـــن ... وأنه وياهن الصار
من فوگ السطح راسك ... يترامـــونه بحجار
حصل يا ريته ما حاصِل
بحَجَر شفت بدمع هامِل
ضربوا راس ابو فــاضل ... يمذبوح
____
يا نـاس ... ناديت ... وين البخت وين
منحـور ... ينشال ... شمسوي الحسين
أنه ام الاربعه روحي ... بحـبيـبي بدلــوها
و لا بالخيزرانه انظر ... اسنونه ايكسروها
يقـضــه لو حلـــم شفـته
زرگـه مــن الضرُب شِفته
صاحت روحي ويه اخته .. يمذبوح
الشاعر حاتم صبري الكاظمي
إنّـا تَوَسَلنا - و اسْتَشفَعنا
بِكَ يا مولانا
————-
بَوصلة دمعاتي گلبك
الله خـــــلاني أحبك
واحد و دونك اضيع ... يا حسين
بخدمتك ياهوّه يُرزق
ينكـــتب هذه مــوفّق
عبد عبد الله الرضيع ... يا حسين
إنّـا تَوَسَلنا - و اسْتَشفَعنا
بِكَ يا مولانا
____
لـ غــيرك المَد إيده ذِلّه
يالتسوّي الصعبه سهلـه
گلبي دَگ بابك فقير ... يا حسين
مارِدِت أعله اعله چتفك
ردت بس شويه اعرفك
يلّي لموك ابحصير ... يا حسين
إنّـا تَوَسَلنا - و اسْتَشفَعنا
بِكَ يا مولانا
_
مِنـــين ما دِرنَه وَجهنه
لمذبحك كلنه اتِجَهنه
ابلايه بــابك تايهيين ... يا حسين
بخيمِـــتَك نِلتَم لِگــــونه
خَدَمْ و انحِسبَكْ أبونــه
انته يالگلبك حنين ... يا حسين
إنّـا تَوَسَلنا - و اسْتَشفَعنا
بِكَ يا مولانا
__
السيّد اليعتِـق عــبيده
و هوه يختــار اليفيده
الـ يلـتزم و الي يعـيف ... يا حسين
ايحبنَه گلبك ما عِتَقنه
و اعلمــودك إنخِلــقنه
ابحبك ايْـبَين الشريف ... يا حسين
إنّـا تَوَسَلنا - و اسْتَشفَعنا
بِكَ يا مولانا
___
اتلِمنَه و انته بيـوم عاشر
جسمك اطشره الحوافر
كربــله تــــارسها بيـــــكِ ... يا حسين
ابـفيّ رحمتـــــــك كلنه يمــك
وبالشمس ظل عاري جسمك
و زينــب اتفَي علـــــيك ... يا حسين
إنّـا تَوَسَلنا - و اسْتَشفَعنا
بِكَ يا مولانا
___
امقصــرين اشما نطينه
بكل وكت عينك علينه
اتمد يمينك من نطيح ... يا حسين
أيـها المَـــلكُ المعظم
الحَـيا عـدنــه مُحــرَّم
نموت دونك يا ذبيح ... يا حسين
إنّـا تَوَسَلنا - و اسْتَشفَعنا
بِكَ يا مولانا
الشاعر حاتم صبري الكاظمي
باسْمَكْ العَظيمْ الاعْـظَمْ
ربـــي وَفقــنه ابـ مُحرَّم
" لا تُـفرِّق بَيْننا " و بين الحُسين
_____
هذه شــهــر الخِـدمــه لينه...اتـفـتحت ابوابـه
ارزقنه دمعه ارزقــنه ونّـه...عالـسلــيبه اثيابه
انعيــش من انمـوت إحنه...و نحترگ بمصابه
حســين اليحبّــه و يريده...لـ المجـالس جابه
اينادي يحسين بخدمتك
"عايش بـخيمة رحمـتك"
" لا تُـفرِّق بَيْننا " و بين الحُسين
______
بينّه و بين الّي رَدْ ... جنحان فِطْرِسْ بالمَهَدْ
" لاتُــفَـرِّقْ بَـيْـنَـنــا طَـرْفَــةَ عَـيـنٍ " لـ الأبَــدْ
حسين أبونه بِرّه واجب...والأبـو سِـرّه الولَـدْ
خِـدمتـه بيــها الأصــاله...وِرِث عنْ أبٍّ و جَدْ
بخيــمِـته يحلَه شَمِلنَـه
حسين أبو الاكبر وطنّه
" لا تُـفرِّق بَيْننا " و بين الحُسين
______
بطاري ابو اليـمّه السوالف...تحله طول سـنــيني
مو فقــط تارسـهه عــيني...هــوّه أصـلاً عـيــنـي
بجاهه و ادري شگد تحبّه...رضه حسين انطيني
مِـن يبــاوعلي ابـ نَـظــرتَه...هــاي بــَـس تكفيني
ناتِــج الغــالي العـشگته
من يحبني اتحبني إنته
" لا تُـفرِّق بَيْننا " و بين الحُسين
______
غيمه گلب حـسين يمطر...عالخلگ حنــيّه
روه اليـشـتـاگ لـ محــرم...دمعة إنســانيّه
نموت من دون المجالس...ربي لو ما هـيّه
يعنــي ناس بلا مشــاعـر...بلا ضمائر حيّه
حُب الحسين الحيـانه
والِـد و عِـشنه ابحنانه
" لا تُـفرِّق بَيْننا " و بين الحُسين
______
اتعَلَمت ما أفشِـي حبّــنه...يبقه بيني وبينه
مِــنْ أَزَغِّــر روحـي يَمّــه...أكبــر أنه بعيــنه
حسين لو أنطِــي حياتي...ما أفُكْ من دِينَه
أنه و گلبي مِنْ جــروحه...ربــي لـَتعــافينه
مِن تُــرابه كوَّنتــنِي
أنه منّه و هوّه منِّي
" لا تُـفرِّق بَيْننا " و بين الحُسين
______
ما عِشِــت ويـّاه لــكـنْ...هـوّه عــاش اويايـه
حسين ويّــاه ارتباطـي...مــثل چَــف و رايّـه
كِلــــمَة الخــادِم قلــيله...حسين عنده هوايه
عَبِد أبو الأكـــبر إللــهي...أحــله مِـهْـنَـه هايه
سيدي الـ يامِـر و ينهي
هوّه حافُظ ماي وجهي
" لا تُـفرِّق بَيْننا " و بين الحُسين
_______
دوم مِخـتار اليحبهُم...اتوفـق الي ايريده
تخلّي لـ القَــدّر نعمته...الخـــير كلّه بإيده
تره الـ ما ينْصِف إمامه...أي عـذُر ميفيده
الـ يبتعد عنْ الحسين الرحمه عنّه ابعيده
الـمايخلّي حسين والي
مـاله أول مـالـه تــالي
" لا تُـفرِّق بَيْننا " و بين الحُسين
______
كلشي لعيون ابو الاكبر...لـ اليجيلك گاصد
تنــطي گتله حلَّــفتنـي...إنته بأغلــه واحد
رأفِـته و طيــبة حـنانه...لـ هالكلام الشاهِد
الگاعد بصــحنَه كــأنَّـه...جــوّه گلــبه گاعِد
ما تِــسِـد بابــك علـــينه
وانته شِفتْ حسين بينه
" لا تُـفرِّق بَيْننا " و بين الحُسين
_______
الشاعر حاتم صبري الكاظمي
مقطعين تقرأ لتهية العزاء بداية المجلس :
يلا استعد حان الحزن
شهر الحُسين استقبله
بِسْم الذي راسه برمح
عيش بدمعتــك كربله
_
هبَّـت رياح من الخـيم .. شِد حيلك بحيل الجرح
عاشور لو هَل سـيـدك .. ينرُفع راسـه اعله الرمح
لو رِدِت بحسينك تحس .. مسحوگ منه كل ضلع
سافر إلى طف كــــربله .. صوت الرميـثي إستمع
مقطع يحسين بضمايرنه *
يســتاهل حسين البذِل
و مقصر شما تنطي إله
يالـ آمنــت بالمـنــذبـح
عِيش بدمعــتك كربـله
_
فارگنه چم خــادم أمس .. ويانه زينب ينتـظُر
هاي السنه دموعـه شمع .. عنده محـرم بالگبر
چم رمله يم باب الخيم .. محروم ابنها من العرس
حمـزه الزغـــير نســتمع .. زفة دمه بصـوته نِـحِس
مقطع يمه ذكريني
شمعة شبابك تنعلـگ
بليـل الســبي للعايله
للاربعــين الزيــنبــي
عيش بدمعتك كربله
حاتم صبري الكاظمي
اللهم عجل لوليك الفرج
____
من بسـم الله ... لو بسـم الآه
بيش ابدي وياك ... شو كلك جرح
شلونك مولاي ... شو تبچي هواي
حقك و حسين ... شالوا عالرمح
يالمهــــدي هذه محرم شقره و شكتب يا موضوع
عن العبـــاس اكـــتبلــــك لو أقره مكسرين ضلوع
لو طفله اتحاچي ابوها : أشرب يبو راس المگطوع
اللهم عجل لوليك الفرج
______
نَفَسَك بالروح ... مثل المذبوح
و يرسم دمعك ... من أول سهم ؟
صـدر التنـزيل ... ركضـــتله الخيل
يهوسَن فوگاه ... گـــدام الخـــيــم
اتگلُّب بجروحك وحدك كل عاشور بدمع العين
شتحس بالحــافر يتگلَّب گـدامــــك جسم حسين
بالسَبْ تسمع شِمِر ينادي : جــيبوها زينـب وين
اللهم عجل لوليك الفرج
______
بيــدك لازم ... حِـنــةِ القاسِم
وصوت أمّه يصيح ... مذبوح الولَــد
تلوليله بنــوح ... نايم مــذبوح
و تهز بيديك... بس خالي المهد
طير الجـــنّه و كاروكه محروگ و بي صيحـة آه
مــذبوح و عبد الله ينادي : مظلوم آبو عبدِ الله
من إيد حسين بدمعاته المَحـــسن عمه اتلگاه
اللهم عجل لوليك الفرج
_______
بخيــام الآل ... صوت الاطـفال
شبي عمنه حسين ... مكسور الظهر
يسمعون الناس : ... مـات العــباس
بعَمَد امطشر ... الرأس من الگمر
يالمهدي الواحد من يفگد إنسان اتصبره الناس
بس حسين بيش اتصبَّـر يســـوه هواي العباس
أول مره يرد يم زينــــب أختــه و يلطم عالراس
اللهم عجل لوليك الفرج
_______
أفجع توديــع ... من بعده تضيـع
العيله بصحراء... حر نار و ضمه
بدمعه بلا صوت ... شبگات الموت
بيــن الخـــوان ... وي بت فاطــمة
ايوصــيها و دمعاتك انته يالمهدي وياها اتسيل
لميــهم يا خويه اعيالي شما عـــندچ زينب حيل
أمر الله تشوفين بعينج اطشر بضلوعي الخيل
اللهم عجل لوليك الفرج
_______
جدمك ما چَل ... ترُكض لـ التـل
يالمهدي تشوف ... عَمتَك حايره
و عمّك من صوب ... ايسلبُوه الثوب
و الشِمِر بسيف ... يگطــع منحــره
الله يعينك يالمهدي كل يوم من الطــــف بعام
وين تروح و گاعد تبچي بگلبك ما ادري شضام
گلي شلونك و تبـــاوع أخذوا عمــاتك لـ الشام
اللهم عجل لوليك الفرج
حاتم صبري الكاظمي
يـ آخِـر نور ... ألف عاشور
جِزانه و يمته نتلاگه بضريح حسين
_______
علىٰ هذه المسير و جيل يتبع جبل
ألف عاشــــور مر و ندعــي بالتعجـيل
" شَديد القِوه " إنته و ما بگـالك حيل
شما شفت الحُسين ادوس فوگه الخيل
وي كل اهلال ايفز جرحك .. بتنوّر اهــاتـه
المثلك صبره هم يتصبر .. شاف بدمعاته
بين النار و بين الخيل .. امراكض عمــاته
شگلــك غيـر ... عساك بخيــر
شگلك وانته كل عمرك .. گضيته ونين
_____
شتحس من ذكريـــاتك لـلخيم ترجَع
يا آخـر قــصــيدة و زينــب المَطـــلَع
شصاحت من شفتها من الخِدر تطلع
و علىٰ صدر الحُسـين الشكر يتربَّــع
يالمهدي و بـ " خرَجَت زينب " .. ميّت چم مرّه
تريد تحضنه و ما تگدرله .. امطشر عالغبره
تشبـــگ إيده و يوگع چفّه .. ويــلا يالزهــــره
يداحي البوب ؟ ... انذبَح مگلوب
تصيح ودمعك بخدك .. مثل نهرين
____
مثل گلــبك گلبنه ليــش ما شيَّب ؟
يالمحبــوب يعني المشــكله بالحَـبْ
بعـضنه ابلا وقـــار يگــول اسم زينب
من نحچي بخــدرها كــون نــتــأدب
زينب ستر الله بتوصيفه .. نتحـاسب باچر
طور الرادود اليختــــاره .. و كلمات الشاعر
المامقبوله نحسها بصدرك .. أقوه من الحافر
الخدر معناه ... ( حجابُ الله )
بنت حيدر شرف حيدر .. شرف هالدين
____
شــان الدنيــه يشـــبه ( حيّةِ رَگطه )
تِغُر بعض البشر بالمـال و السلـطه
إذا يغلــط الخــادم إغــــفر الغلــطه
عليك بخد رقيـّه الي انسِلَب قــرطَه
غفلتنه و تَصحيح الواقع .. يم بابـــك يبدي
التايب بيـنه بحرگه ينادي .. غيرك ما عندي
عن نسياني و عن ذنوبي .. أسف يالمـهدي
الذنب مغفور ؟ .. بلطم الصدور
رضاك نريده و الشاهد .. دموع العين
______
بحنـان الأب تِــلـم اولادك الخــدام
تسامحنه عليك حسين هذه العام
ما نسوه يمهدي ابدونك احنه ايتام
غطينه بعبــاتك عدنه چنها خـــــيام
چف العباس بچفــينك ... بالسابع ليـنه
جدك عطشان و ياريتك ... مـاي تسوينه
بشوغة عبد الله اناديلك ... وينك مهدينه
غيابك طال ... يمهدي تعال
إذا نستاهل الجـيّه ... نشوفك وين
الشاعر حاتم صبري الكاظمي
كلشي إلك ينملك
انتــه انتــه المَـلِك ... ياحسين
قصيدة [ سيد الروح ]
أداء الرادود #حسين_فيصل
@hussainfaisal_7
للشاعر #حاتم_صبري_الكاظمي
@hatam.s.k
.
من إصدار
قصة الحسين
.
#محرم1448 #العراق #البحرين
https://www.instagram.com/reel/DZS61JsIzLu/?igsh=MW85OTc3Y21vNzM2Yw==
حـــلم حـــبه و لا رايد منافق
أفق للخيـــر بعـــيوني منافق
أكيد الي ما يحب حيدر مُنافق
الصوچ من اللبن لو مِــن ابيــّه
__
خطر لو بيه دربي بعلي مـؤمن
امانه بگــــلبي ما انطيـه مؤمن
علينه ايحـبه بس الچان مؤمن
يبين الطاهـــر ابحامي الحميه
__
حاتم صبري الكاظمي
أزورَك مِنْ علىٰ الناگه
إخِتْ و بغُربه مشتاگه..بهالأحساس
بسَلام و دَمـعه وياهه
زيــــارَة وارث اقراهه..عله الـراس
____
توجهت وصحت وبشـيب الجــروح
ســـــلام الـلـه يــوارث آدم و نـــوح
سِمَعت بزينـب اختك بالسبي اتروح
إجيـت ويــاي بــس بـراس مــذبوح
تُوَضـيت بشَـفَـقْ نورك
انه أول زايره اتــزورك..عالــرمــاح
بإسم كل غالي فوگاهه
زيــــارة وارث اقــراهه..عله الراس
_____
( لَقَد عَظُمَت ) يبو اليمه الرزايه
( لَقَد جَـلَّت ) بِأَن نِطــلَع ســبايه
بعد عــينــك مــشيت بلا حمايه
و لَو راسك أشوفه بعيني رايــه
علـيك شمـا نَـظَر يربـي
الرمح بي أنته لو گـلبي...يغــالي
يشايل كل حِسِـن طــه
زيــــارة وارث اقــراهه..عله الراس
_____
سلام جروحي ليك الگلب ما ناح
يما مرتــاح بــس الـعـَـدو مــرتاح
قـــريت الكَـهَــف يا قُرآن الجراح
أول مــرّه اشـوفــك فوگ الرماح
سلام الله عله جروحك
يشايل زينــب ابروحك..والعــــيون
شفــتني أبچـي! معناهه؟
زيــــارة وارث اقـــراهـه..عله الراس
_____
اوْرَثِـتْ داوود بــس لـ الأن ألِمحَك
شعجب ما لان جوّه الراس رُمحك
يَوجـه الخــير بالـدَم غابْ صُبحَـك
و گلــبي صار خـويه بلون جَرحـك
وكـت خَــلاّك تاليّـــه
ذبيــح و أنه مسبــيّه...و غريــبه
أنه الـ بس ظيم راواها
زيــــارة وارث اقـــراهـه..عله الراس
___
يوارث موسى كَلّم جرحي و تشوف
وَلَو عيــنك رَمـُـل بيــها من الطفوف
الرمــح مَگـدر ألوحه زرگه الچـفوف
و چَفْ العـافيــه بالحَـبِـل مچتــوف
حِچتـلك حالتي دموعي
الشمر بالرمح لضــلوعي...كســـرهه
الگلب رَغمـــاً علىٰ آهـه
زيــــارة وارث اقــراهـه..عله الراس
______
(قَصَدْتُ حَرَمَــكْ) أَحرِم بالدمــوع
و إنتــه (حَرَمَكْ) عالـرمــح مرفوع
گــوَّه من الرمــح گالــولي منــزوع
أحضنَك ردت بس ما عندك ضلوع
وگفــنه و إنته جابــولي
حِضنتك و انكسَر طولي..يظَـهري
جَبِهتك أمسح ادماهه
زيــــارة وارث اقراهه..عله الراس
______
شمــسوين بيـــك و عاينـيتَــك
امْتَـرْبَه و يابِـس الدَم بـ لِحيتَك
مَحــفــور النــحــر لا ما دِريتَك
الرمُح خُطارك و فاتحله بيتــَك
وگلتلي امغـيره اعيــونچ
يزينــب بالسبي شلــونچ...يخـــويه
گلــتلـك من بدينــاهه
زيــــارة وارث اقراهه..عله الراس
_______
بخـرابــه من تلاگـــينه ســويه
وين امشي تعايِن بــس علـــيّه
تگلي و أمسـح بشيـــبك بديـه
اجه موعــد لقــائي وي رقيّــه
التقيتو الشَبْگه بالشَبْگه
شحـلات الأبــو بالمـلگه...اويه بِنْـتَـه
أمس گالت سمعـناهه
زيــــارة وارث اقراهه..عله الراس
____
الشاعر حاتم صبري الكاظمي
لا سكوت .. طول السبي يحچي الجرح
كون اموت .. و ثــنينه فـــوگ الــرمـــح
_____
اوياك ضميت السـوالف بـ ألف بـير
ما شِفِـت من يوم ذبحك خويه خير
يا بو رمح العالي حَبْل ايدي گصـير
وحگ شِــيبَك جرح خوتـنه چــبيـر
كون اعيش .. ويّـــاك انه قصــة الذبـــح
كون اموت .. و ثــنيـنه فـوگ الــرمـــح
______
تدري چم مرّه ارد امـوت بهالشــهر
لفرگتــك من لـيــلة الحــادي عَشر
الرمـح لو عنــده يبــو الأكـــبر ظَهَر
چــان من اسْوالفــي اويــاك انكسَر
بدمعي باب .. بـس لـ مصــابك ينفتِــح
كون اموت .. و ثــنينه فـوگ الــرمـــح
_______
هواي بـچتــني رقــــيـــه شلــون هاي
مدري شنهو بچفها اجت تركض وراي
رغـم عطـــشــانه و تنــــاديك ابگـفاي
بويه عوف الرمــح و اشرب بيدي ماي
من الفرات .. ضمـــيته من خلّو يِشِح
كون اموت .. و ثــنينه فـوگ الــرمـــح
________
رمل حار و شوك مَتروسه الأرُض
خَلصــتها عله اعيــالك بس رَكُض
الرمح ظل يهتَز عليّــه و ينتــفُـض
لَمَن شــاف الســوط بمتوني يرُض
شرد اگول ... و مْصابي لا ما ينشِرِح
كون اموت .. و ثــنينه فـوگ الــرمـــح
________
الدنيا و الكوفه بهضمـتي تِـشْـتِـرِكْ
و ناسـها متــحــبنه أجــزم ما أشِــكْ
الشـــام گالـــوا ذيج ظلـــيت ارتبكْ
هناك نلگـه شَتِم و طبول و ضِحِكْ
هنـاكه نار ... من گلـبي لا ما تنمِسِح
كون اموت .. و ثــنينه فـوگ الــرمـــح
_____
صوتي مبحوح وخِفَتْ من الونيــن
و كِثُر ما عالتَّل صِحِتـلك يا حسين
من أجيك الشـمر : زينب گلّي وين
من البچي اعليكم بعد ما عندي عين
عندي ليل ... من فرگتك صار الصبح
كون اموت .. و ثــنينه فـوگ الــرمـــح
_____
راح اطب الشـــام واستقبل رذيل
و ما أخلي يشوفني تعبـــانه حيـل
بقصره بلساني و كلمتي عنها قيل ؟
هاي زينب تحچي لو هذه الكفيل
بـ إنتصار .. قَصره و غـروره أكتِسِـح
كون اموت .. و ثــنينه فـوگ الــرمـــح
الشاعر حاتم صبري الكاظمي
قصيدة نزلة ليلة الانصار ( يحبيب بن مظاهر)
الرادود الحاج #باسم_الكربلائي
الشاعر #حاتم_صبري_الكاظمي
___
ليلة 6 محرم الحرام #محرم1448
حسينية ام الحسن الفاو - #البصرة
https://www.instagram.com/reel/DZ7wTPUI9m4/?igsh=MXg2ZHE2dTA2ZTkxNA==
قصيدة : إنا علىٰ دين الحسن
الرادود : #علي_سعيد_الوائلي
@ali_saeed_alwaeli
الشاعر : #حاتم_صبري_الكاظمي
@hatam.s.k
مجلس عزاء حسينية الشكرجي
#كربلاء_المقدسة
#محرم1448
https://youtu.be/hStz4HKyEJ4?si=rQNaAiviF6YLRa_7
https://www.instagram.com/reel/DZw9vDSI5x_/?igsh=Zm53Z2x6YzYwY2p2
عرّيــس الورد
دَمّك حَنّه چَفّك..يالمَيّت و زِفّك..عريس الورد
مو إنتــه تِــرِد
يمبچي خواتــك..مِتــغيره حلاتك..مو إنته تِرِد
___
دَللتَـك عـمُر...واعله الصبُر...نُص گلبي احِفّك
رِمشيني أمَد...وَكـــت البَرِد...بضـلوعي ألفَّـك
أمك بيك أهِم...تكبـــر حلم...و تحنـّي چفّـك
أمنـية النفِس...بـ أحله عرِس...يوليـدي ازفّك
أفرح و انسعِد
واتردلي دَلالك..من فدوه لجمالك..أفرح و انسعِد
مو إنتــه تِــرِد
يمبَچي خواتــك..مِتــغيرَه حـلاتك..مو إنته تِرِد
___
يا ريـــع التـعب...چنك ذَهـب...يا كل حلالي
قَمَري وَجنـــتك...وبضحكتك...حلوه الليالي
شمـيتــــك هوه...أجمل ضوه...بعــيني يلالي
من بعد الحسن...وبهالزمن...بس انته غالي
طبعاً تنحسِد
نسوان الهواشم..العدها مثلي جاسم..طبعاً تنحسِد
مو إنتــه تِــرِد
يمبچي خواتــك..مِتــغيره حلاتك..مو إنته تِرِد
___
ضَمَّـــيـــتَك ذُخُر...يــوم الكـبُر...لو شَحْ نَصيبي
تِسع اشهُر شِلِت...أمْ و گلِـــت...تَـعــبَك طَبيبي
الأُم دون الإبــــن...لمَّــن تِحِـن...تعرُف نَحيــبي
ربيــتك عشـــگ...يبني و صدگ...يسوه حلــيبي
يا شــيخ الولِد
من هسه ارد احشمك...بالطف افدي عمك..يا شيخ الولد
مو إنتــه تِــرِد
يمبَچي خواتــك..مِتــغيرَه حـلاتك..مو إنته تِرِد
_______
وصاني الحسن...يوصل ظعن...أهل الشهامه
لو طــب كربله...وحسين اله...ايلبسه العِمامه
گــــلّه والـــدي...يا سيـــــدي...يبلـغك سلامــه
يوصي قاسمَك...بمخيــــمك...ايزفــوا عَمامــه
اوگــفلَه عبِـد
يالتشبَه عضيده .. بس اتأشر ايده..اوگفله عبِد
مو إنتــه تِــرِد
يمبچي خواتــك..مِتــغيره حلاتك..مو إنته تِرِد
___
حسين برگــبتك...و بذمتـــك...لو مـــالـــه أحد
يا بعـد الگـــــلب...خل عالتُرب...يتـــوسد الخَد
جاسم بالدمــــه...و لفــــاطمه...متـــحني تصعد
يبنـــي احنه فِـــده...بيــت الهُــده...آلُ مُـحمـد
بالخيمه أصِـد
عمــاته الثواكل...ايزفوا بالهلاهِـل...بالخيمه أصِد
مو إنتــه تِــرِد
يمبَچي خواتــك..مِتــغيرَه حـلاتك..مو إنته تِرِد
_______
الشاعر حاتم صبري الكاظمي
قصيدة لمسلم بن عقيل سلام الله عليه :
أجمل واحد بين الناس
شال السيف ... چنّه نبي
إبراهيـــم و بيده الفاس
صاح الموت ... چنّه نبي
الكوفــه تِشهَد لمُسلِمها
و النعــم أَسَــد هاشِمـها
سلام الله عليه
____
مُطــهَّر و مَـنبَـتَه طـاهِر
الحرُب تسمي أبو طاهر
صــديق أبو فاضل صـاير ... غيره ما يقبل
يدرونه ليش ايظل غالِب
عَمّــه عليْ ابن أبو طالِب
التاريخ اله فــارِس كاتِـب ... طرازه الأول
أسد الساده المغوار ... فوگ الگاع ... يمشي نهر
قمر الطـــف العباس ... بالكـوفــــه ... هوه قمــر
شگد ابعيد من العين
و گاعد بعيون حـسين
بَطَل بعُمْر الخَـمسين .. بس لو صال .. خمسة عشر
صــاحوا إلحـگ يبن ازياد ... واحد عاد ... وجها وَلي
مو مُسلم أبو راس الحار ... يا ســتــار ... هذه علي
روحــه حيـدر امعلمها
و النعم أسد هاشمـها
سلام الله عليه
____
جميل احسّه ايصير اجمَل
لحســـين إذا مسـلم يزعَل
گالـــوله بايـــــع ما يقـبـــل ... ما يبيــع ديـــنه
صاح و نِـطه الخانوا ظهره
يا زمـــرة أم رايــه الحمره
الله اشـترا لـ ابـنِ الزهره ... واحنه شـاريــنه
يا عُــبـــــاد الدينـــــار ... ضـوگوا النار ... سيفي زعَل
سيفي فاس ابراهيـم ... بالتحــطيـــم ... و انتو هُبَل
صح وحدي وانتو هواي
بــس أبو فـــاضــل وياي
الموت البي حُب مـولاي ... أي والله ... چنه عَـسَل
والفـاني بطاعـــة مولاه ... عاف الجاه ... عنده فرُق
مُسلم دلاّنه الحُب وين ... گال حسين ... حُبّـه رزُق
و طــوعه نــادته مِنْ يمها
و النعــم أســد هاشمـها
سلام الله عليه
______
قـــرأن نـاطــــق و الفارِق
لحســينه سـوّاه الخــالِق
نعم ( هوَ السَيْفُ الناطِق ) ... بيــد أبو الأكبر
گله اهجِــم بمَـرَضـي أني
شِد ظهرك و عندك هاني
چــا لو وِصَـــلّه الهَمَداني ... اعليه منو يگدر
مسلم لوحة إعجاز ... و الإنــــجــاز ... طبعه كَـلِفْ
اثلثمية فارس راح ... اليشرد صاح ... وحده بألفْ
جيش الكـــــوفه الجـــرار
بواحـــد صـــــاروا طــشّار
هذه ابن اخو حامي الجار...صلب الأيد..گلبه تَرِف
مو شــــيعة علي لا غلطان..بني سفيان..همه أصل
همهّ الگطعوا نحر حسين..البيهم زين..ديــنه قَتِل
يفــضَــح الي فاسِد دمها
و النعــم أســد هاشمـها
سلام الله عليه
______
علــمنه بالدنـــيه غرامه
اليستشهد بطاعة اِمامه
يوم الحشـر ماكو ندامه... الله بي ايبــارك
لحسين التشيله الغيره
باچر يحصِّــل من خيره
اليبچي عليه لا مو غيره... ينحشُر ضاحِك
غربـــيـل الدنيــه يدور .. و بعاشور .. قلّه هَلَه
الما يلزم ثوب حسين .. باچر وين .. منهو اله
تمــشي بدرب الشيطان
لو تمشي اويه العطشان
حسين بگلبه اكو مچان...خوش انسان..سِعره غِله
افــلان الدوّر مُلــك الرَي ... أخِر شي ... عُمره ذِبَح
امدلل بحسين الي رِضاه ... و بدنياه ... كلشي ربَح
و مســلم بشرف يختمها
و النعــم أســد هاشمـها
سلام الله عليه
____
امچتف خَذوا بس اشكبره
بعينه القصـر صار شصغره
لـ البـــاري مـــن سلّم أمره... وبگلب دامي
بسطح القصر صحت شلونك
لـ الغـــربه رايــــــح بظعــونك
حسين السلام اعله عيـــونك... أيها الظامي
يا سر الله المكنون...بس يردون...موتك الك
يذبحونك يا مظلوم...هاي الگوم...تسبي هَلَك
و شمروا و الظالم گال
جسمه ايجــروا بحبال
مـسلم بس رغم الحال...دمه السال...چنّه مَلَك
مات اعله حسين ومحروگ...للمعشوگ...منه گلُب
مسلم عهــده العاش وياه..حب مولاه...ينسه صعُب
هيچي لـ الخَـــدم فَهمها
و النعــم أســد هاشمـها
سلام الله عليه
الشاعر حاتم صبري الكاظمي
قصيدة للسيدة فاطمة العليلة عليها السلام:
فرحانه و أحـضر بالدوه و ثياب الحسين
ويحاچي عمامي منكسر ودموعه بالعين
ايگلهم باقيـه هنــانه هنــانه
ما نــاخِـــذها ويـــانه ويـــانه
______
شِلَـتْ حيلي ... اسهَرِت ليلي
صلاة الليل أبوي بـ حِجـــرتي صـلّـه
بـ ألَم مَخــفي ... يـلِم چَــفي
حِجابي و شِلتَه ويه اگماط عبد الله
بضوه وَجها والدي اتوضيت
الراح لو لحظه اله اشتاگيت
الأبو ضحكت عافيه لـ الروح
و بوجـــوده يا حـــلاة البيت
تعبانه واحس بــروحي ماكو حيل بيه
لكن أصحه لو بس والدي يباوع عليه
گتله جروحي فرحانه فرحانه
ما نــاخِــــذها ويـــانه ويـــانه
____
أدورهن ... و احضرهن
عصه السجاد بيدي و الدوه امحَضره
ولا اتعب ... أجي لزينب
و أگلــها خلّي يمي سِبـــحة الزهـــره
مســـافره و لا ما گلت لا وين
و الهــــوادج اخـوتي امحضرين
و البـــنات تــگــول الي شلونج
بخير ما دام اني اشوف حسين
وحده تگلي اصبري و تبچي ما ادري شبلاها
و الشبگــتني ذيـــج و رايــحه الدمعــه وراها
وحده تحاچي بفلانه فـــلانه
ما نــاخِـــذها ويـــانه ويـــانه
____
نِخــليــها ... مَــرض بــيــها
سِمعت واجه حسين و يمسح اعله الراس
عِشِت صَدمه ... و نِده يُمه
عنــدج هاي امــانه ابنيـــتـــي يـم عـــــباس
حچايه بيها كلشي بيّــه بان
واعرفتها بدمــعــة الخوان
أنه مقصوده و گلت يمكن
والدي بـــس لا عَلَي زعلان
مو قصة مرض ادري السفر يراد اله حيل
گتله عالاقل اخذوني لو بس اسرج الخيل
گال لـ عــمي تعبــانه تعبـانه
ما نــاخِـــذها ويـــانه ويـــانه
_______
بدمع هامل ... يبو فاضل
صحت معــقوله بــتكم تبقه وحـدها
تره هـــيّه ... البــنــيّـــــه
الـف مـــوته تــــمـــوت ابلايه والدها
گِــله لا يتـــركني و يـسـافر
افراگه أكبر كسره للخاطر
حضنه بس يروح من عندي
يعني راح يصـــير لـ الحـافر
الموت بكـــربله ينـتظره خلّه يحن عليه
ريت ايگلي صعدي فاطمه بمحمل رقيه
بس تسولف احضانه احضانه
مـا نــاخِـــذها ويـــانه ويـــانه
_____
بقت روحي ... مع جروحي
تعاين علىٰ الضعن يگطع فــيافـي البــر
على حسيني ... بقت عيني
و بقـــيت اقـــراله الله يسلم المــنــحر
من مِسح راسي ولاني الويل
و صدگ هسه ما بگالي حيل
يعـني راح انتـــظره بس ادري
تِنــتظر صـــدره ابويه الخيـل
طارش دمعتي يسمع خبر ظعنه وحچوها
يا نــاس العــليله بكـــربله ذبحــــوا ابوها
الگال بفرگته انه ميــــته انه
ما نــاخِـــذها ويـــانه ويـــانه
الشاعر حاتم صبري الكاظمي
قصيدة السيدة فاطمة العليلة عليها السلام :
من وَدَعِـت .. أجمل وطـــن
گـلبــي مِـشه .. ويّــه الظعن
نبضي وگف .. مــدري الزمن
گالولي رايح
بدمعي .. كِتَـبِت عله باب جروحي
بدمعي .. مِشه عني الماخذ روحي
______
شمحله ضحكاتك ... بلوحة احلامي
ومن رحت صارت ... لوحـــة الالامي
بيها رحــلة مــوت ... انكتَـب گدامي
الســـلام اعليــك ... أيـهــا الضــامي
نَفَـسي نَبَضـي و هـوه ريتي
فرگــتك يعني عندي منيتي
لو حِرگ باچر الطف خيامك
يا حُسين انذبح ضِـوه بيتي
يا كربله ... شگد عدها حظ
من أخذتك ... أخذت نَـبَض
فراگك أشد ... من المَرَض
وجهك دوايـه
وحدي ... البقه بس صبري وبس نوحي
بدمعي ... مِـشَــه عــني الماخذ روحــي
_______
مدري اودعنك ... مدري ما ودعك
تعـوف التحبك ... هذه مـو طبعك
بعالم الرؤيــــه ... أرســم بدمعــك
وگعـت اقلامي ... من وگع ضلعك
بسبحة الزهره أدعي واذكرك
اسم الله يا والدي عله صدرك
أفرش عــيوني الك من أصلي
باچر ايصلي سيف اعله نحرك
بجالك عِشِت ... أحلى عمُر
بالرؤيه شفـتك ... منكــــسُر
يا بويــه ما ... عنــدك صــدُر
من دوسة الخيل
عيــني ... شكو سِر عن حزنچ بوحي
بدمعي ... مِـشَـه عني الماخذ روحي
_____
اعليك اسولف راح ... و شـبقه منّــه
الهوه بدون حسين ... شلون أشِمنّه
الچــــان يحضـــني ... طَشِروا حُضـنه
بكــربــله يا ريـــت ... بيــــدي ألمنــه
من حنانك اظل تالي وحدي
دينـتي و كربـله كلـهـا ضدي
بالأمس خدي بي عطر أيدك
هـسه بس دمعتي عله خدي
يا بويه مُر ... طعم البُـعِد
يذبــل بلا ... مـــاي الورد
رِد إنتــه ... لو الأكبر يـرد
رجِّـع رقيــه
بگلـــبي ... صده كلمــة " يا مذبوحي
بدمعي ... مِـشَـه عني الماخذ روحي
____
ضج عله اسماعي ... صوت بونيـنه
الوالي رَد مُـهــره ... يـم نـساويـنـه
لعمتي چنّه الصوت ... لگلبي فَك عينه
" گلي يالميــمون ... ويــن واليــنه "
بدمــك امـرِّغ اتعـرفه هـامـه
گـلها ثوبه انسِلب و العمامه
الظليمه الظلـــيمه يــنـــادي
ماكـو واحد فِـــزَع يم إمامــه
و بذو الجناح ... انظـر دمه
أرفع چفوفي ... لـ الســمه
ها يا عــــلي ... يا فـاطــمه
ذبحوا حبيبي
صيحه ... هــا يروحي لطف روحي
بدمعي ... مِشَه عني الماخذ روحي
____
من يســـألوني ... حچايــه مخنـوگه
شلون اگل للجاي ... يريدك بشـوگه
شفته بالرؤيــه ... ضلوعه مسحوگه
و خيم عمــاتي ... بنـــار مَــحــروگه
شگد تمنيــته حلمي أچَــذْبَه
والله يجــمَــــعني ويّه الأحبـّه
و من عسه بگلبي لا مو حبيبي
حرمـله بالسهم يرمي گلــبه
ناعي الضـــوه ... ينعه الصبح
يا أهــلَ يَثــرب ... و الجـــرح
راس الحسين ... اعله الرمح
و سلبوا بنــاته
طفله ... و نزل اوي الصايح موحي
بدمعي ... مِـشَـه عني الماخذ روحي
الشاعر حاتم صبري الكاظمي
الخدمه جــنّه الله عَـلّه اصحابها
من تِـدور احسين تـــنــدَل بابـها
_______
حسين يعرف گلبك ابـ نِيته شكو
عوف (سوّه فلان) لو (هذه منو)
الخَدَم مثل الوِلِد و حسين الأبـو
يعني بس يم الحسين احسابها
_______
حسين(نعمه)وصعبه لو منّه انچفه
مو بـ عـشر ايام الي ايحــبه اكتفه
شو خلص عاشور و (فلان اختفه)
صدگ هالخدمه قلـيله احبابها
_______
صير واعي بخدمتـك دوم و نَـبِـهْ
لا تِخِدمه لـ نَفسَك حســين انتــبِه
حـسين رايد گلــب منك مو وَجِـه
الخدمــه تعـرف ياهو گــد اثيابها
_______
تره الخدمه واضحه بلا حَل وَسَط
ما تـريــد اليمـشي دوم اعله الغلط
يشـتري الخــدمه الذي گدها فقَـط
لـ الحـسين البــاع عــمـــره جابـها
_______
بــجـاه هالدنيه التَعَب لَــنــقـايـضَه
و بخدمته حسـين هنــياله الحِـضَه
يا سَــواد اوْجــوهـنه لــو ما رِضَــه
الزهــره تِـمسـحنه تــره من اكتابها
_______
المال عوفه واليريــده عنهـا مال
الخدمه صاحبها رُبَه بلگمة حلال
زينــب من المَحــمل اتگلك تعال
يلّي كاتِـب ( ما يطيح احجابها )
_______
بكامره تِنــشِـغل ؟ تالي اتزغُـرَك
خلّي عين الزهره هيّــه اتصورَك
لا تِسَــوْده خـَـلّه أبـيــض دفترك
الناس عوف الزهره نول اعجابها
الشاعر حاتم صبري الكاظمي
.
تقرأ نهاية المجلس :
مِنْ عطش مُحرَّمَكْ إجـيتك نِـدَه
عُمري يا حسين اَنَه بعزائــك بِـدَه
عايش ابفَضِل دمائك
عــمري كلّه كربلائك...يا حسين يا حسين
________
يالـ سَلَّمْتَـك روحي ... اتوضَّت بيك اجروحي
حَبـــيتك مذبوحي ... يا ابا عبد الله
و سبحان الحَبيــته ... أكبر عـــالَــم بيـــته
عَـيـَّشــنِي ابعافيتـه ... يا ابا عبد الله
أيــــام الله ايامـــك أيامـــك أيامــــك
رابي بنص اخيامك بخيامك بخيامك
دللتنــي من دِخَلتْ انه بخيمـتك
الله لا حِرمني من طَعم خدمتـك
و لا حِرمني من عزائك
عــمري كلّه كـــربلائك...يا حسين يا حسين
______
حُبْك طول اسنيني ... حاضِن دمعة عيني
ضــايــع و ادَليــني ... يا ابا عبد الله
إســلوبك إنســـاني ... أنسه و ما تنــساني
سَـميتــك سُلطاني ... يا ابا عبد الله
مشكور و ممنونك ممنونك ممنونك
شايلــني بعيـــونك بعيونك بعيـونك
ما أحيــر اذا و لا ظَــهر ظل إلي
راح انادي عنـدي انته يا بو علي
هذه خيري مِنْ عطائك
عــمري كلّه كــربــلائك...يا حسين يا حسين
______
أسمع صــوت الهايم ... يهتف أغـنه الوادم
الصاير عندك خادم ... يا ابا عبد الله
خالِد بيـن اعماقي ... راحوا و انتـه الـ باقي
يَمْـقَـسِّــم أرزاقـــــي ... يا ابا عبد الله
أشــهَد أَنَّك ظامي يا ظامي يا ظامي
بس اتروي أحلامي أحلامي أحلامي
يا حِلِم حُسيني باقي لـ الخاتِمه
بالگـــبر تجــيني سيدي فاطمه
ابدي و انتهي برثائك
عــمري كلّه كربلائك...يا حسين يا حسين
الشاعر حاتم صبري الكاظمي
هلا بشهر الخدامه ... إلىٰ أهل الكـرامه
بده وقــت المــدامــع يلا حـيَّ عالعـزاء
يهل بيض النـوايه ... إجه شهر السبايه
العراق اسمه بمحرم عدكم اصبح كربلاء
________
لـ الحــزن ... بالسمه ... رفعة الزهره العـلَم
اتحضروا ... لـ الدمع ... هَبَّت ارياح الخـيَم
فـاطــمه ... الوالــده ... والولِد انتوا الخَدَم
لـون الأســود عَــيَّشكُم بالـطــف يا إحساس
حسـين بلا ثوب وجسمه بچم حافر ينداس
الينصُب موكب چم خيمه ينصُب وي عباس
بحسين و مُجرياته ... العمر و الله شحلاته
وحلات الگعده يَـمَـه اباب الحسين السماء
إرفــعوهــا الروايه ... إجه شــهر السبايه
العراق اسمه بمحرم عدكم اصبح كربلاء
_____
كل عَــمَل ... بي حُسين ... الله لا ميرجعه
بالــوفـــه ... تِقــلـــدون ... إنـتو أم الاربعه
أغله شي ... ننطـي اله ... ما نـوفي إصبعه
عِيشوها الدنيه المُرّه تِحلَه الكُم بعـدين
لو ما مَجلس بالعاشر ما تِسوه الفلسين
أهل الدمعه يسموكم وايضاً رَبْع حسين
نقاوه و كلها غِيره ... يسموكم عشـيره
انحِذف كلشي و كتبتوا بس للحسين انتماء
استِعِدوا لـ الرزايه ... إجـه شهر السبايه
العراق اسمه بمحرم عدكم اصبح كربلاء
________
عـــارفَـــاً ... بالحسين ... لازم اتعيـش الدهر
لو عِطش ... مــوكبــه ... سوي بدموعك نهر
شمـعه لو ... تِشتعل ... ايشُكرك بنفسه الگمر
يا ناس حسين انطــانه لكن شنــطيناه
يا ناس انبيض وجـهه حتى انظل وياه
فُقره بمولانه الضامي ( قَدْ أغـنانا الله )
خِدمته الذِبنه بيها ... سلام الحُب عليها
برِزق هاي الخدامه المُخلص ينوله البقاء
بحــزن ماله نهايه ... إجــه شهر السبايه
العراق اسمه بمحرم عدكم اصبَح كربلاء
الشاعر حاتم صبري الكاظمي
حنين و لـ اليحبك ... أبد ميضـيعه گلبك
تِدَلي خيمة الخدمه ... أبد ميضيعه گلبك
_______
هذاك انه المُـــقصر و الأنـاني
اعله بــاب الدنيا بذنوبي لگاني
الحنين إنته الأبد ما دار ظهره
اعلمودي نحر عبد الله نطاني
بوكت عافوني جيتك ... أحن واحد لگيتك
التايه چَــفَّك ايـلزمه ... أبد ميضيعه گلبك
______
شِفِت نفسي و صرت من البعـيدين
أجــيــك و دِنــيتــي گالتــلي بعـدين
اروح هــواي عــنـــك لچـن معروف
ويــن نــروح هم نـرجع للحســـــين
الرزق يابــو رقـيّـه ... إذا تِـرضه عليه
منو يعرفك ولي النعمه ... أبد ميضيعه گلبك
_______
شفت الدنيا چـــذبه بحلگ خرسان
گالــوا حلوه ؟ ثاري الناس عمـــيان
و لگيت أهل البساطه ابابك املوك
لذلك مَـجــلســك ســـوانـي إنسان
بعشگ يحسين باقي ... عشگ فطري و عراقي
عشگ من أول اللطمه ... أبد مَيضــيعه گلبــك
_______
امچلب بيك كل نبضه تِنِدهَـك
تِــحِـب الفقره يالمحد يشبهَك
يبو گلب الچبير لخيمـتك جاي
منو اليوگفلي من ادير وجـهك
وحگ عيـونك انـذَل ... إذا من عندي تِزعَل
رضاك اعله الخِدَم رحمه ... أبد ميضيعه گلبك
_______
تريـــد الحــار جرحه بشتَّـه الاجواء
تِـدَور اگــلــوب لا مَــدوِّر اســـمـاء
تره المو ناس صارت ناس بحسين
وشنو الانســان لو ما رِضــه الزهراء
شيفيد الخادم انصيح ... إذا من عينك يطيح
و المكـسور شيلـمه ... أبـــد ميضيعه گلبك
_______
يطيح الينتچي اعله الدنيا يندَم
بـخت عدنه بعـزائــك كلنه تلتم
هذوله احنه بشر من طين الحسين
و سمار اوجوهنه ارماد المُخيم
تلمنه و والله حيره ... يلموك بحصـيره
اليعيش بعاشرك لچمه ... أبد ميضيعه گلبك
الشاعر حاتم صبري الكاظمي
قصائد شهر محرم الحرام 1448هجريّه على بركة الله 👇
Читать полностью…
رَفَـــعَ الكَــفَّ و كانَتْ ... وَقـتَها ليسَتْ صُدَفْ
في (غديرِ الله) بانَتْ ... أَصـلُـها كــل النُطَفْ
و النبيُّ فيهِ قـالْ ؟ ... عيدُ أبناءِ الحَلالْ
____
جــمَّع اســروج الجمــال ... وصَعَد و ألقه كلمته
و چان حته ابليس يسمع ... الـمايريــده بدنيـــته
و صاح طه هذه اخوي .. و هذه ظهري الـ لا فته
بس هوّه من روحـه اقترَبْ
بــولايتــــه الي مـــا رِغَـــبْ
ما عِنـــده ديــن و ماله رَبْ
و هـــذه مشكوك بنُـطــفته
و بَـياضُ الإِبْـطِ بانــا ... و اعتلىٰ كفُّ العَلي
و نِداءُ العِــشقِ كانــا ... فازَ مَنْ والىٰ علي
قالَـها دُونَ جِدال ؟ ... عِيدُ أبناءِ الحَلالْ
____
الله فرحان بولايـة علي و الما فــرح خــاسر
و الثلاثه الـ بالزِويّه اسوَدَّت اوجوه و ضمـاير
خاف بس اليوم الهُم لـ علي تِرجع كلها باچر
بــخٍ بــخٍ مــا تِـنــفــعـه
الصم چـــفّه لمن بايعـه
من وره خشمه و رافعه
علي چان لـ خَشمه كاسِر
خَطَطَوا مَكْرَ المَطامَع ... بحِقــودٍ أقْـبَـلـــوا
عاشِـــراً أو كانَ رابَــع ... ( فـ عَـــلـــيٌّ أولُ )
عـِيدهُ فَوقَ الكمال ... عِيدُ أبناءِ الحَلالْ
___
الـ ما يِـقِـــر بأمر الولايـــه ريــــح جنّه ما يِشِمــها
علي صاحب فَضِل كل الصُحُف مَتوَصفه بقَلَمها
الزائـــف بديـــنه يفضــحه و الولايـــه الها زِلمـها
و بْولايـته الديـن اكــتمل
الـ ما رادتِه اتحُوز الفَشَـل
عِدنه علي و عدهــا هُبَل
بحب علي انكسِّر صَـنَمها
بعليٍ قَـــــد عَــليِنا ... يا عـــلي مـــنك اليك
ناصِبي : عَلَي لَدينا ... أنْتَّ قُلْ لي مَنْ لديك ؟
قُلْ لـ أشباهِ الرجال ؟ .. عيدُ أبناءِ الحَلالْ
__
الدين لَعقِ اعله أفواه الچانت لحيدر ترفضه
علي تنـصيبه سماوي العايفه ما كمل فرضه
إختصرها الشـاف غيره ابدنيته أُمــده حَضه
ذيــچ العــقول امخربطه
و حــلوگــهم مِتــخــيطه
الأسلام عدهم بس غِطه
امـزَيَّــف و أكـلته الأُرضه
فـ عليٌ في حـــــياةِ ... المرءِ إنْ ينساهُ : سوء
هل سَمِعتُْم بصلاةِ ... قُبِلَــت دونَ وضــوء
أعلنوها بـ ابتهال ... عيدُ أبناءِ الحَلالْ
الشاعر حاتم صبري الكاظمي
يَـكْتابْ الاهات ... منْ الطَّفْ قريتَك لـ اليسُر
كِــل الحكايات ... راوَتــني نَــجمَـــات الظهُر
.....................
جيت و حِـــــمَلـتَك بالدَمِـع...وافْتَحتَك وجِفْنِي رِمَشْ
بدِيبـــــاجـــتَك عالَم حــزن...عنــــوانَك بسيف انِقَـشْ
بثُگلَك عله چفـــوفي أحِس...شِلْت اعله چفيني نَـعَشْ
بصفحاتك من أقره الضِمَه...يستَيقُض بروحي العَطَشْ
مجروحه صفحات ... ونَّه اعله طارِف كل سطُر
كــل الحِــــــكايات ... راوَتــنِي نَــجمَـــات الظهُر
...........................
شابَت عُيوني ابمَطلعَك...شــما أقرَه بيك وأستـــمِر
بِجـْلَادَك اتــْخيَّل عِـــبِي...و قمـــــاش خَيمَه تِستعِر
مِــتعَـنون ومِن أَبجــَدَك...من ألـفُظ احروف الخِـدِر
من بعَدْ اسِمْ زينب عَلَيْ...بكل صَفحَه يطلَعلي شِمِر
لـ الفاطـــميّات ... من أُقـــره أَبياتْ الصــــَبُر
كِـل الحـِكايات ... راوَتــنِي نَــجمَـــات الظهُر
..........................
يــتصـــَفَحَك بالي و أَوِن...وادخِل مُعارك لـ الألـَم
ومِنْ أوصَلَك لـ المُنتَصَفْ...لونَك تغــــييّر چَنّه دَم
دون الورَق وَرقه شــِفِت...مِــــتشابِها ابلون الـعَـلَم
قصّة كَـفيل و لِـ النِصِـف...جوّاهه مَحروگـــه خِـيَّم
اخيامْ الأَميرات ... ترويلي عن غَـــيـبَـــة بَـدُر
كـل الحـِكايات ... راوَتــنِي نَــجمَـــات الظهُر
.........................
عَــنَّ الــــشـَباب الـمـنذبِحْ...مَكسُوره صَفحاتَك أَحِسْ
الكاتِبْ عَــلي الأكبَر وگــع...مدري الوگع وجه الشَمِسْ
والصَفحَه الأُخْرَه عَن شِبل...زغَيّر هِدَه لـ عـَمّه النَفـِس
القاسِم ضِرَب أروع مَـــثَل...سـَوّه الـحَرُب زفَّةْ عِـرِس
دموم اويَّه دمعات ... حِنْـــــتَه بَعَدْ هذه العُمـــُر
كِــــل الحـِكــايات ... راوَتـنِي نَــجمَـــات الظـهُر
..........................
بزَينب تموت اَهل الشِعِر...اموَصُفها وبموقف أَبِي
عِفْةْ الله وگفَت شـامخه...كِلــها اعله تـَـل الزَينبي
بظَعَن السَـبايه مِن رَحَل... مو زينب اليمشـي نَبِي
الراوْي كِتَب لا مو مَـرَه...أَنظُر جِبَل يمـشي بْسَـبِي
أَقرَه الـــروايات ... غُربه و فجـــــــايع ما تِمُـر
كِـــل الحـِكايات ... راوَتــنِي نَــجمَـــات الظهُر
الشاعر حاتم صبري الكاظمي