مُلهَـــم💛

10 Feb 2024 12:26

رح احكيلكم مثال:
لاحظت على حالي انو بكون لطيف مع الناس لما انا بكون منيح ومبسوط

بس لما بكون متدايق او عندي مشاكل هون اما بنعزل او مابكون منيح اصلا😂😂😂

وحتى كنت كتير مهووس بالانتاجية لدرجة اعتبر انو الحكي مع الناس عن المشاعر او هيك شي تضييع وقت بس مابعرف ليش عم بتغير هلأ وصرت اشوف انو الحياة اكبر من ( كم ساعة أنجزت اليوم )😂😂 اي فصاير عادي بترك شغلي بنص الجلسة مشان احكي مع حدا اذا كان متدايق او اساعد حدا من اهلي لانو هالشغلات مارح ترجع، اما الدراسة والشغل دوما موجودين، بلشت الاحظ انو السعادة موجودة بشغلات كتير بسيطة ممكن حديث مع شخص او تشوف فيلم او اي شي بسيط، كنت قبل انا دوما افكر انو لازم بس اشتغل اكتر لانجح اكتر وهيك بالاخير بكون سعيد

يمكن هالشغلة كتير منكم بيعرفوها بس انا من جديد عم بتعلم هالموضوع بعد ما طلعت من هوسي بالانتاجية والانجاز وكم ساعة باليوم😂😂😂

اي وبالبوست يلي فوق بقصد الواحد خصوصي يعطي الحب للناس القريبين منه ومايتوقع منهم شي وهنن رح يحبوه اكتر بسبب هالشي، اما اذا في شخص بحياتك بيكرهك وانت بتحبه هاد اصلا مالازم تحاول معه لانو مارح تحسن تغيره

من فترة شفت فيديو حكا جملة كتير حلوة: اختر الاشخاص يلي هنن بيختاروك ❤️ وهاد السر للعلاقات الحلوة، ماتحاول تغير شخص ماله مهتم فيك لتخليه يحبك لانو مارح تقدر، اختر فورا الاشخاص يلي بحبوك ويلي هنن بالاصل منيحين معك وهيك بتوفر على حالك كتير وقت ومشاعر. وبتعرف مين القريبين منك يلي بدك دوما تكون لطيف معهم وماتتوقع منهم شي. اما الغريبين بحس لازم نخلي حواجز بينا وبينهم ومانسمح لاي حدا يدخل لحياتنا لانو هو لسا غريب اصلا.

مُلهَـــم💛

09 Feb 2024 15:38

بصراحة كمية الرسائل الحلوة ماطبيعية🥹⚡️ شكرا الكم عطيتوني كتير طاقة كنت بحاجتها💓 وفي رسائل رح احتفظ فيها مشان اقراها كل فترة ^_^ شكرا لكل كلمة حلوة عم تبعتولي ياها 💓

رديت عالكل تقريبا بس لسا في كم رسالة

في ناس كمان جداد بالقناة ماكتير بيعرفوا عن محتواي، شوفوا هالرسالة فيها كم بوست بعبروا عن محتوى القناة:
/channel/MolhamHafez/2909

وكمان شوفوا قناة اليوتيوب موجودة بوصف القناة

القناة بدها تزبيطة صرلي زمان ماغيرت شي فيها😂

مُلهَـــم💛

09 Feb 2024 13:15

من فترة وصلني رسالة من بنت من القناة عم تسأل ليش صرلي كذا شهر ماعم بنشر شي

بالفترة الماضية كتير عم تتغير اهدافي وأولوياتي وعم بتغير معها انا كمان

مع انه انا بالاصل كنت بحب اني انعزل عن العالم بس بالفترة الماضية انعزلت اكتر بكتير وهالشي تأثيره علي ماكان حلو بصراحة

شكراً الكم لانو عم تتابعوا قناتي جد هي نعمة انو في ناس بحبوا الشغلات يلي بحكيها فشكرا الكم كتير💛 مع انو انا مالي مميز بشي معين، الفرق الوحيد بيني وبينكم هو انو عندي قناة وبشارك عليها افكاري، لهيك بنصحكم اذا بتحبوا تبلشوا تعملوا قنواتكم وهالشي ممكن بالمستقبل يفيدكم بشغل او بشي تاني بدكم ياه🤍

واحد من الاسباب يلي بخليني اكمل بهالقنوات انو بالمستقبل يمكن ما اكمل شغل بالطب فبدي يكون عندي طريق تاني برا الطب بس مابعرف اش رح يصير كله خير انشالله

هلأ مشتهي ارجع متل قبل واكون متحمس واشارك معكم نصائح عم بتعلمها متل ماكنت اعمل قبل

مُلهَـــم💛

02 Feb 2024 21:05

🎂 انتبه يا ملهـم ⚡️

1⃣ حدد أهدافك منيح واسأل حالك مين بدك تكون
وأي شي مارح يوصلك لأهدافك ماتعمله
2⃣ الفرق التطوعية أكبر مثال لتضييع الوقت، بدهم يستغلوا الشباب بحجة تطوير المجتمع بس هنن قصدهم انو بدهم موظفين ببلاش، هالوقت هو وقتك لتبني حياتك مو لتبني حياة فريق غبي تطوعي، ابني حياتك أحسن
3⃣ماتخلي الجامعة تشتتك عن أهدافك
4⃣الجامعة مهمة كتير، بس مو أهم من أهدافك، ماتخليها تسرقلك أهم شي عندك يلي هو الوقت، تذكر انو من زمان ماكان في جامعات أصلا وكان في ناس مبسوطين وناجحين، ماتنخدع بسهولة فيها
5⃣استغل وقت الجامعة لصالحك ماتخليها تستغلك واستخدمها كأداة لتوصل لواحد من أهدافك وبس. ماتكون عبد عندها
6⃣أكيد ماتترك الجامعة لأنها رح تفيدك، بس ماتخليها كل حياتك وتعطيها كل وقتك
7⃣في كتير روبوتات على شكل بشر بس بيتبعوا الأوامر وبقلدوا يلي حوليهم مع انه يلي حوليهم اصلا مالهم ناجحين بس بقلدوهم وبفكروا انو رح يحصلوا على نتيجة مختلفة، بس انت مالك هيك
8⃣كل اسبوع اسمع كتابين، هالشغلة رح تفتحلك كتير ابواب ورح تغيرلك عقلك
9⃣تعرف على ناس ناجحين وقرب منهم واعملهم رفقاتك
0⃣1⃣كتير سهل انك تغير حياتك، بلش بالخطوات الصغيرة يلي اليوم بتقدر تعملها، لما بتغير بوصلة حياتك وبتاخد خطوات صغيرة، هالخطوات بتبني مع الوقت وبتلاقي حالك عم تنجح بكل هالشغلات بعد كم سنة
1⃣1⃣ ماتعطي أعذار، ولو كنت بسوريا بتقدر تنجح كتير اذا بطلت تقول لو مالي بسوريا كان وضعي احسن، تجاهل كلشي ابواب مقفولة ودور عالبواب المفتوحة والفرص الموجودة، رح تكون مفكرها مالها موجودة لأنك بس عم تركز عالبواب المسكرة بس بالحقيقة طلع في كتير فرص. بس لازم تدور عليهم.
2⃣1⃣ دور على اشخاص عم ينجحوا بالشي يلي بدك ياه واسالهم شلون وصلوا، اكيد رح يساعدوك
3⃣1⃣ الأسلوب هو أهم الشي، في فرق بين انك تقول بدي اشتغل لحتى أطالع مصروفي، او تقول بدي اشتغل لحتى أعمل ثروة
4⃣1⃣ ماتحاول تغير حدا، افضل طريقة هي انك تلاقي الاشخاص المناح واللطيفين وتحطهم بحياتك. وكلشي اشخاص مامنيحين حاول طالعهم من حياتك بأسرع وقت اذا بتحسن.
5⃣1⃣ لما بتحس انو الحياة صعبة كتير وماعندك دافع، دخل الايجابية على عقلك من خلال الكتب الصوتية او حلقات بودكاست او اي فيديو فيه افكار حلوة، لازم تزرع الايجابية بعقلك
6⃣1⃣ لحتى تأنجز أكتر قلل أوقات الاستراحات، لانو كل مابتاخد استراحة بتعطي لحالك فرصة انك تضيع وقت وتتلهى وبدل ماتاخد 30 دقيقة راحة بتصير 3 ساعات، لهيك بكل مرة بتشتغل اشتغل اقل الشي ساعتين او 4 متواصلة ولو كانت صعبة المهم انك رح توفر كتير وقت لانك عم تقلل اوقات الاستراحات يلي بتسببلك تضييع الوقت
7⃣1⃣ اسأل، رح تتفاجأ شلون لما بكون عندك سؤال وبتبعته ل 10 اشخاص عندهم الخبرة بهالمجال بكمية الاجابات المفيدة يلي رح تاخدها ورح يعطوك كلشي بيلزمك، بس لازم انت تبادر وتسأل. تعلم من الاشخاص وخود خبرة منهم.
8⃣1⃣كون لطيف دوما وانشر الحب حوليك، رح يرجعلك.
9⃣1⃣اعمل متل مروان 🤍
0⃣2⃣مهما عملت رياضة، مارح تستفيد الا لحتى تاكل كتير، الاكل اهم من الرياضة وأصعب وبده وقت أكتر 💪

مُلهَـــم💛

01 Feb 2024 10:09

الشغلات يلي بتصير معك مالها مهمة
الشي المهم هو انت شلون عم تتعامل معها🌺

الاشخاص الايجابيين دوما بكون عندهم ردة فعل ايجابية لكلشي بصير معهم

لهيك بتلاقي ناس اوضاعهم سيئة بس دوما ايجابيين ومبسوطين وكمان بتلاقي ناس كلشي بحياتهم منيح بس دوما مكتئبين

لازم تغير هالشي بعقلك كل مابصير عندك ردة فعل سلبية لازم تلاقي طريقة لتحولها لشي ايجابي

هي من الشغلات يلي تعلمتها من أمي، مابعرف شلون بتعمل هيك بس حتى ولو صارت اكبر مشكلة بالعالم بتلاقي طريقة لحتى تشوف الشي الايجابي بالمشكلة وتضحك كأنه مافي شي، انا بالعكس كتير بدقق على كلشي بصير معي لهيك كنت دوما بسهولة بلاقي حالي متدايق من أي خطأ صغير أو من أي مشكلة، لهيك هلأ قررت أغير هالشي


في شغلة حلوة تعلمتا من David Goggins بيحكي انو كل شخص عنده صوتين براسه، الصوت الاول يلي بقلنا انو نحن فاشلين وكلشي بشع بالحياة، والصوت التاني يلي هو أفضل نسخة مننا يلي دوما بتعمل كلشي بتقدر تعمله بالامكانيات يلي موجودة هلأ لحتى تكون أحسن، هاد الصوت يلي لازم نبلش نهتم فيه ونركز عليه كل مامنسمع الصوت الاول

وكمان نفس الشي بحس جواتنا في شخصين، شخص فاشل وشخص ناجح، ولهيك دوما عم بسأل حالي شلون الشخص الناجح يلي اسمه ملهم رح يتصرف بهي اللحظة؟ شلون رح يمشي بالشارع؟ ...الخ

هلأ عم بقرأ كتاب جديد ل Jim Rohn بيحكي انو حياتنا متل البوصلة، المهم توجهها بشكل صح، متل الصاروخ يلي بينطلق للقمر لازم نغير زاويته بدرجة معينة ليوصل للقمر واذا ماغيرناها مستحيل يوصل، لانو لما انت بتوجه البوصلة تجاه هدفك انك مثلا تتعلم لغة جديدة فحتى ولو كل يوم ماعم تدرس الا كم دقيقة، بعد 5 سنين رح تلاقي حالك وصلت لهالهدف لأنك وجهت البوصلة بهالاتجاه، كتير سهل انك تغير حياتك من خلال انك توجه هي البوصلة باتجاه هدفك وكل يوم تاخد خطوة صغيرة، المشكلة بتصير لما بتخلي هالهدف بعقلك وما بتاخد أي خطوة لتحققه فبضل عايش الهدف جوات عقلك وبعد خمس سنين؟ مارح يكون في شي لأنك من خمس سنين ماغير اتجاه حياتك أصلا

مُلهَـــم💛

17 Jan 2024 16:46

كل يوم تخيل انك رح تعيش بس 24 ساعة
وهي هية كل حياتك🤍

😁 ماعندك ماضي ولا مستقبل🫶
😁 انت هلأ ولدت بهالوضع يلي شايفه حوليك
😁مافي شي تندم عليه لانو أصلا ماكنت عايش
😁 مافي حدا تخاف من رأيه
😁 ورح تموت بعد 24 ساعة

- اش بدك تعمل بهي الحياة؟
- هل بدك تكون سعيد فيها؟
- مع مين رح تقضي هالوقت؟
- شلون رح تتصرف مع أهلك؟
- هل رح تعمل رياضة بحياتك؟
- هل رح تكون لطيف مع الناس؟
- اش رح تكون أهدافك لهي الحياة؟
- كم صفحة رح تدرس بهي الحياة؟
- كم بدك تطالع مصاري فيها؟
- رح تتعرف على أصدقاء؟
- في شي مشتهي تعمله؟
- بما انك رح تموت بعد 24 ساعة
فشلون بدك الناس تتذكرك؟


معك 24 ساعة بس 😀

اش رح تعمل فيهم؟🕓❤️

مُلهَـــم💛

14 Jan 2024 23:49

بعد ماتموت بشهرين ماحدا رح يتذكرك اصلا..

لهيك لازم تبطل تهتم برأيهم بالشغلات يلي عم تعملها اليوم🌇

مُلهَـــم💛

20 Nov 2023 16:20

The Hard times won't change. But you can.
And that's how life changes for you.

مُلهَـــم💛

10 Nov 2023 15:04

⬜️ حياتك مالها اصعب من حياة غيرك، انت كسلان.
⬜️ الايام البشعة رح تجي، لهيك هلأ لازم تكون مبسوط طول ما حدا مات او ماصارت مصيبة
⬜️ لازم تصدق انك بتقدر تعمل كلشي ويكون في جواتك نار وطول الوقت عم تشتغل لتوصل لهدفك
⬜️ طول ما انت فايق خليك عم تشتغل، مافي وقت للراحة، الا اذا بدك تضل مكانك
⬜️ اذا انت ماعندك دافع لتكون احسن معناتا انت مرتاح بوضعك الحالي ولهيك ماعم تنجح، لازم ماتكون مرتاح بحياتك كأنك حطيت شمعة تحت ايدك، لازم ترفعها ليروح الألم
⬜️ الاكتئاب والزعل هنن بس مؤشرات عم يقلولك انو حياتك بتقرف ولازم تعمل شي لتصححها، المشاعر هي بس مؤشرات على وضعك الحالي
⬜️ لازم تكون فخور بحالك، انت بتكون عايش مع حالك 24 ساعة باليوم، اذا انت ماوثقت بنفسك مين يلي بده يوثق فيك؟؟ في كتير ناس بفكروا انو التواضع هو انك تكون كتير ضعيف ومهزوم وخايف ولهيك بضلوا فاشلين
⬜️ اكتب اهدافك واختار اهم اهم هدفين منهم وركز كل وقتك عليهم، هيك بتأنجز اكتر متل وقت الامتحانات، وبقية الاهداف الصغيرة بتصير متل هوايات جانبية لبين ما تخلص اهم هدف او هدفين
⬜️ كل يوم اكتب وتخيل هدول الهدفين بعقلك انك محققهم ولازم تآمن انو بتقدر تعمل كلشي ان شاء الله
⬜️ مو مهم تحقق اهدافك، المهم انك تصير الشخص يلي بيقدر يحقق هي الاهداف يلي عنده هي العقلية وطريقة التفكير والثقة بالنفس يلي بتخليه يعمل كلشي بده ياه
⬜️ لازم تضل عم تفكر وتحكي عن هدفك الكبير او اهم هدفين طول الوقت وهيك بتحققه بأسرع وقت ممكن (كمان متل شهر الامتحانات)
⬜️ اذا حطيت كل طاقتك وجهدك بشي مستحيل تفشل، مافي شي اسمه عملت يلي عليك وفشلت، لو عملت يلي عليك كنت نجحت

مُلهَـــم💛

27 Oct 2023 18:53

الشي البشع انو نحن مامنقدر نعمل شي💔

مُلهَـــم💛

24 Oct 2023 14:33

عم بجهز فيديوهات كتير حلوة🍿
اشتركوا بقناة اليوتيوب لتوصلكم الإشعارات: اضغط هنا💯

مُلهَـــم💛

16 Oct 2023 14:24

🍰 في شغلة نسيت اذكرها بالفيديو
مشان موضوع سحب المصاري لسوريا بدكم للاسف تلاقوا حدا بتعرفوه عنده حساب paypal وتبعتوله ياهم من الموقع لحسابه وهو بيبعتلكم ياهم بشركة الهرم او غيرها

وفي غروبات عالفيس بكون اسمها فريلانس سوريا او هيك شي مليان فيها وسطاء عندهم حسابات paypal بيعملوا هالشغلة بس بياخدوا نسبة شي 15%

مُلهَـــم💛

15 Oct 2023 17:01

الوصفة السرية لحتى تبني قنوات ناجحة عالسوشل ميديا هي نفسا الوصفة السرية لسلطع برغر🍔

والوصفة السرية لسلطع برغر هي الحب♥️

مُلهَـــم💛

14 Oct 2023 12:17

دخولك القناة، يضع بين يديك سلاحًا فتّاكًا في وجه عدوّك، إيّاك أن تتركه:

تحرك من أجل فلسطين:
/channel/act_for_pal

مُلهَـــم💛

12 Oct 2023 11:03

فقرة التعليقات | كيف تتعامل مع الوحدة والخوف من الامتحانات📝

رابط الفيديو: اضغط هنا❌

مُلهَـــم💛

10 Feb 2024 11:45

تعامل مع الناس بالحب 🎂

من سنة تعرفت على شخص رائع💛 دوما بينشر الحب حوليه

مابعصب على الناس القريبين ولو قصروا او غلطوا
وبيعطيهم بدون مايتوقع شي منهم
دوما بخلي الحب هو الدافع للي حوليه
بصيروا بيشتغلوا اكتر وبيعملوا يلي عليهم لانو بحبوه مو لانو رح ينزعج منهم، اول مرة بحياتي بشوف هيك شي🌸 عنجد عم بحكي الموضوع كتير رائع مالي مصدق انو في هيك ناس اصلا بالحياة

انا بشكل عام يلي بيعرفوني بيعرفوا اني لطيف مع الناس

بس بعد ماتعرفت عليه لاقيت اني لازم اشتغل كتيييير على حالي بهالموضوع⚡️

مُلهَـــم💛

09 Feb 2024 13:15

هاد رابط صراحة اذا حدا بحب يبعتلي شي:
/channel/B9Bot?start=219844804
رح احاول قدر الامكان أرد عالكل☕️💗

مُلهَـــم💛

07 Feb 2024 16:44

لما مابكون في حدا غيري بالبيت بعمل هيك بالالعاب مشان بس يرجعوا اهلي يشوفوهم😂 المهم مابعرف ليش عم بحكي عن هاد الموضوع الحساس جدا هون عالقناة

عملت قناة جديدة عالواتس ومابعرف اش رح انشر عليها☕️

ماتدخلوا عليها ابدا: لا تضغط هنا 💛

مُلهَـــم💛

01 Feb 2024 15:25

بآخر 20 مرة عملت قهوة.. تقريبا أغلبهم طلعلي فيهم قلب حب💗

ايش يعني؟😁

مُلهَـــم💛

25 Jan 2024 12:36

امبارحة قبل ما انام شغلت على موبايلي كتاب صوتي طوله ٤ ساعات

سمعت اول نص ساعة وكان كتير حلو وبعدا نمت

فقت الصبح لاقيته خلصان✅

هل هيك خلص سمعته وتعلمت كلشي فيه؟😁

لازم أجرب هالطريقة بكليّة الطب كتير ناجحة✏️

مُلهَـــم💛

15 Jan 2024 05:55

هل الموضوع بيستاهل انك تشيل كل هالمشاعر السلبية بقلبك تجاه شخص تاني؟

ولا تسامحه وترجع سعيد متل قبل؟

مُلهَـــم💛

20 Nov 2023 16:25

الأوقات الصعبة مارح تتغيَّر
بس انت بتقدر تتغيَّر🏆
وهون بتبلّش تتغيَّر حياتك🍿

كأنك عم تشوف فيلم وعم تشوف البطل عم يعمل شغلات جديدة ويخاطر ويكون ذكي وشلون حياته عم تتطور بشكل رهيب🔥
هاد البطل هو انت، انت البطل بقصة حياتك🌇

مُلهَـــم💛

11 Nov 2023 19:05

الحرب هي اكتشفنا فيها انو كل الدول العربية محتلة الا فلسطين ❤️

مُلهَـــم💛

04 Nov 2023 20:17

There is a moment when every boy realizes no one is coming to save him, and that's when he becomes a man.

And some boys never get there and stay children forever.

شلونكم؟؟ انشالله كلشي تحت السيطرة؟🏆🍰

مُلهَـــم💛

27 Oct 2023 18:36

محللون: "إذا لم يتحرك العالم الآن وإذا لم تتحرك الضفة الغربية والقدس والداخل فإن غزة ستكون على بعد ساعات قليلة من مذابح جديدة".

محللون: "جيش الاحتلال يقطع الاتصال بشكل كامل عن غزة تمهيداً لمجازر غير مسبوقة خلال الساعات القادمة".💔

مُلهَـــم💛

16 Oct 2023 19:01

أعلم أن الحياة تزداد صعوبة، لكنني أعلم أيضاً أننا نزداد قوة🏆🌇

مُلهَـــم💛

16 Oct 2023 14:18

طريقة الحصول على العميل الاول على موقع خمسات ومستقل | شرح عملي

رابط الفيديو: اضغط هنا❌

مُلهَـــم💛

14 Oct 2023 18:20

النصيحة الوحيدة يلي فادتني من كتاب العادات الذرية

رابط الفيديو: اضغط هنا🍦

مُلهَـــم💛

13 Oct 2023 14:03

كيف تحصل على مهارات جديدة دون أن تخرج من باب منزلك؟

رابط الفيديو: اضغط هنا🏠

مُلهَـــم💛

11 Oct 2023 11:03

اذا بتدرس وبتشتغل بنفس الوقت رح تكون شخص فاشل ❌

رابط الفيديو: اضغط هنا☀️