14007
Gap bormi? Marhamat — @muhrimchatbot Tijoriy takliflar uchun @Eightmediamaker’ga murojaat qiling.
Ukraina bilan Rossiya bir-birining energetika obyektlariga “Trampingga ham!” deb tinimsiz zarbalar berib yotgani haqida har kuni xabarlar chiqavergani, bu ham kamlik qilganidek, ular bir-birining hujumidan qanday himoyalanayotgani haqidagi materiallarni ko‘p o‘qib yuborganing sababli, Qibraydagi bitta elektr stansiya hududiga oddiygina qizil pufakchaning uchib kirib, transformatorlardan biriga tegib ketishi oqibatida Toshkentning yarmi zulmatga cho‘mganini ko‘rganingdan keyin, beixtiyor, PUFAK HUJUMIDAN HIMOYA QO‘SHINLARIni tuzish kerak emasmikin, deb o‘ylab qolarkansan kishi.
Читать полностью…
Kuryerlar — kuch!
Shu joyning shundoqqina yonida davlatning tartib posbonlari uchun falon million so‘m evaziga maxsus o‘rnatilgan bo‘lma borligiga, davlatning qanchadan-qancha kazo-kazolari (bo‘lganda ham eng-englari) kunda-shunda shu yerdan o‘tganiga, shu yerda ovqatlanganiga qaramay, davlat shu vaqtgacha “ko‘rmagan” (yo “ko‘rishni xohlamagan”?) va “bilmagan” (yo “bilishni xohlamagan”?) muammoni bir kuryer o‘zining bitta videosi bilan hal qilib berdi. Skuter mingan va kamerasi bor bir kuryer bir necha o‘n millionlab so‘m maosh oladigan minglab xodimlari bor apparatdan samaraliroq va qudratliroq ekan.
Kuryerlar — kuch! Chinakam jamoatchilik nazorati — kuch! Ochiqlik va oshkoralik — kuch!
PS. Kuryerni urmoqchi bo‘lgan “zo‘r”ga qanday chora ko‘rilarkin, qiziq. Yo “prezidentimiz va xalqimizdan uzr” so‘rab, qutilarmikin?
UPD. Okaxonga “mayda bezorilik” moddasi bo‘yicha bayonnoma rasmiylashtirilibdi. Balki biror sutka qamalar.
UPD-2. Uzr so‘rabdi.
Муҳримнинг гапларига қўшиламан ва имзо чекаман. Саидқаҳҳор Холхўжаев Чилонзор тумани ҳокими сифатида яхши ишлади, дея айта оламан. Инфраструктура, айниқса, пиёдалар учун катта лойиҳалар қарийб охирига етказилди, муаммолар билан ишлашда тезкор реакция қиларди. Саидқаҳҳор акага янги вазифаларида омад тилайман.
Читать полностью…
Technovation degan xalqaro konferensiya bor. Unga avvallari Ostona, Abu-Dabi, Keyptaun, Stokgolm va Vashington mezbonlik qilgan. Bu safar anjuman Toshkentda o‘tkazildi. 30-sentyabr kuni tashkil etilgan xalqaro tadbirda O‘zbekiston prezidentining Jahon savdo tashkilotidagi vakili, Oziq-ovqat xavfsizligi qo‘mitasi raisi Azizbek O‘runov hamda investitsiyalar, sanoat va savdo vaziri o‘rinbosari Akram Aliyev so‘zga chiqdi.
JW Marriott Tashkent mehmonxonasida o‘tkazilgan konferensiya innovatsiyalar, investitsiyalar va ilmiy faktlarga tayangan holda tartibga solish amaliyotiga bag‘ishlandi. Unda bir necha mavzu bo‘yicha panel muhokamalari bo‘lib o‘tdi. Masalan, “Innovatsion transformatsiyaga investitsiyalar” sessiyasida Yashil Energy, Coca-Cola Uzbekistan, EPAM, PMI va O‘zbekiston Fanlar akademiyasi rahbarlari va vakillari sarmoya va ishlab chiqarishni yangilash masalalarini muhokama qildi.
O‘zbekiston, Rossiya, Tojikiston va Qozog‘istondan taklif qilingan shifokor va olimlar sog‘liqni saqlash sohasidagi innovatsiyalarni muhokama qildi. Qozog‘istonlik tibbiyot fanlari doktori Meyram Raganinning shu sessiyada: “Zararli narsalarni taqiqlash emas, balki ularning zararini tushuntirish samaraliroqdir”, degan mazmunda bildirgan fikri barcha spikerlar tomonidan qo‘llab-quvvatlandi.
“Transformatsiya jarayonida iste’molchilar huquqlarini himoya qilish” sessiyasida Davlat bojxona qo‘mitasi boshqarma boshlig‘i Akramjon Axlimirzayev noqonuniy mahsulotlariga qarshi kurashish sohasidagi O‘zbekiston tajribasi bilan o‘rtoqlashdi. Qayd etish joiz, bu tajriba xorijiy hamkorlar tomonidan ham muvaffaqiyatli namuna sifatida o‘rganilmoqda.
O‘zbekiston Raqobat siyosati va iste’molchilar huquqlarini tadqiq etish markazi, Qozog‘iston Milliy iste’molchilar ligasi va O‘zbekiston Texnik jihatdan tartibga solish agentligi vakillari esa yangi mahsulot toifalari bozorga kirib kelayotgan sharoitda iste’molchilarni to‘g‘ri xabardor qilish va ularning manfaatlarini himoya qilish masalalarini ko‘rib chiqdi.
Yer mehnatni qadrlaydi, bilim bilan qilingan mehnatni esa yanada ko‘proq taqdirlaydi
“Yerni boqsang, yer seni boqadi” deydi xalqimiz. Lekin hozirgi zamonda dehqonchilik qilish uchun mehnatning o‘zi kamlik qiladi, yerni tushunish ham kerak.
Bir tadbirkor bor dastmoyasini tikib issiqxona qurgan va birinchi yili yaxshigina hosil olgan. Ammo keyingi yillarda hosildorlik tushib, hafsalasi pir bo‘lgan.
“Rahbar mahallada” ko‘rsatuvida tadbirkorning muammosiga e’tibor qaratildi. Issiqxonadagi holat bilan tanishgan Agrobank vakili dehqonga tavsiyalar berdi. Shuningdek, hosildorlik pasayishining sabablarini aniqlash maqsagida “Agrolab” laboratoriyasi olimlari xonadonga kelib, tuproq tarkibini o‘rganadigan bo‘ldi.
👉 Hikoyani bu yerda to‘liq ko‘rishingiz mumkin
Ijrosi yo‘q qonun — yo‘q qonun. Ishlamaydigan qonun — o‘lik qonun. Qonunlar ishlaganida, ijrosi bo‘lganida edi, opa videoning oxiridagi xulosaga kelmagan bo‘lardi, menimcha: https://youtu.be/rQvGzdUZNFI?si=bnyY246ZhyLu4DVi
Читать полностью…
Buxorolik bog‘cha bolalari Saida Mirziyoyevaga o‘zlari yasagan taqinchoqlarni sovg‘a qilib, “pulingiz ko‘paysin!”, deyishibdi. Bolalar xursand, chunki ularning bog‘chasi uch oyda qariyb qayta qurilgan. Videoda bir qizcha ham aytyapti: “Bog‘chamiz chiroyli bo‘libdi”, deb. Bola aldamaydi.
Читать полностью…
Saida Mirziyoyeva Amerika Qo‘shma Shtatlaridan qaytishi bilan, bir muddat O‘zbekistonda bo‘lib, keyin yana safarga ketibdi. Bu safar Birlashgan Arab Amirliklariga. Yana Birlashgan Millatlar Tashkilotining tadbiriga.
Abi-Dabida BMTning Jinoyatchilikning oldini olish va jinoiy odil sudlov bo‘yicha 15-kongressi bo‘lib o‘tdi. Bu safargi kongress O‘zbekiston uchun alohida ahamiyatga ega edi: O‘zbekiston 2031 yilgi kongress mezbonligi uchun o‘z nomzodini qo‘ygan edi. Abu-Dabi anjumanida barcha ishtirokchi davlatlar O‘zbekistonning tashabbusini qo‘llab-quvvatladi.
Saida Mirziyoyevaning fikricha, bu “O‘zbekistonga nisbatan xalqaro miqyosdagi yuksak ishonch ramzi”. “Bu — bizning ochiqligimizga, muloqotga doim tayyorligimizga hamda umumiy maqsadlar yo‘lida sa’y-harakatlarni birlashtira olishimizga bildirilgan ishonchdir”, — deya qo‘shimcha qilgan u.
U kongress doirasida BMT bosh kotibi o‘rinbosari, BMTning Narkotiklar va jinoyatchilik bo‘yicha boshqarmasi ijrochi direktori Monika Juma bilan ham uchrashgan va amalga oshirilayotgan qator qo‘shma loyihalar yuzasidan fikr almashgan (ma’lumot uchun, ular iyunda Avstriyada ham uchrashgandi).
Abu-Dabiga qilingan safarning yana bir muhim yangiligi — Saida Mirziyoyeva BAA prezidenti Shayx Muhammad bin Zoid Ol Nahayon qabulida ham bo‘libdi.
“A’lo hazratlari bilan Abu-Dabida o‘tgan uchrashuvimiz — men uchun katta sharafdir... Ko‘rsatilgan ehtirom uchun A’lo Hazratlariga minnatdorlik bildiraman”, — debdi Saida Mirziyoyeva.
U BAA prezidentiga O‘zbekiston davlat rahbarining samimiy tilaklarini yetkazibdi, O‘zbekiston va BAA o‘rtasidagi savdo-iqtisodiy munosabatlarni kengaytirish masalalarini muhokama qilibdi, shuningdek, sun’iy intellektni rivojlantirish mavzusida ham fikr almashishibdi.
Fabio Kannavaro bilan yaxshi intervyu bo‘libdi. Yaxshi gapiribdi, yaxshi tushuntiribdi bosh murabbiyimiz. Muloqot yaxshi-da baribir, ancha-muncha tushunmovchiliklarning oldini oladi: https://www.youtube.com/watch?v=sL6xY79-1kg
Читать полностью…
Saida Mirziyoyeva BMT maydonlarida Janubiy Koreya prezidenti Li Chje Myon va uning rafiqasi Kim Xe Gyon, Turkiya prezidenti Rajab Toyyib Erdo‘g‘on, Armaniston bosh vaziri Nikol Pashinyan, Gruziya bosh vaziri Irakli Kobaxidze, Paragvay prezidenti Santyago Penya va uning rafiqasi Letisiya Okapmos, AQSh davlat kotibi Marko Rubio va boshqalar bilan muloqotda bo‘libdi.
Bundan tashqari, Nyu-Yorkda BMT bosh kotibi Antoniu Gutterish, AQSh Xalqaro moliyaviy taraqqiyot korporatsiyasi bosh ijrochi direktori Ben Blek, Google vitse-prezidenti Karan Bhatiya, BlackRock kompaniyasi prezidenti Robert Kapito, kompaniya vitse-raisi Tomas Donilon, Global Infrastructure Partners raisi va bosh ijrochi direktori Adebayo Ogunlesi, Moliyaviy va strategik investorlar guruhi global rahbari hamda kompaniyaning Yaqin Sharq mintaqasi bo‘yicha rahbari Charlz Xatami, Jahon savdo tashkiloti bosh direktori Ngozi Okonjo-Iveala, BMT Aholishunoslik jamg‘armasi (UNFPA) rahbari Diyene Keyta bilan uchrashuvlar o‘tkazilgani haqida avval xabar berilgandi.
BMT bosh minbaridagi o‘zbekcha nutq — alohida mavzu. Sermahsul safar.
Hozir O‘zbekistonning eng asosiy boyligi nima? Oq oltin emas. Qora oltin emas. Radioaktiv oltin emas. Hatto bugun eksportimizning asosiy moddasi hisoblangan haqiqiy oltin ham emas.
“O‘zbekistonning eng asosiy kapitali — uning yosh avlodi”, — dedi Saida Mirziyoyeva Nyu-Yorkda BMTning Aholishunoslik jamg‘armasi (UNFPA) bilan hamkorlikda o‘tkazilgan va demografik barqarorlikka bag‘ishlangan tadbirda.
Uning ta’kidlashicha, bu salohiyat kelgusida demografik dividend manbaiga aylanishi uchun bugundanoq har bir insonning, ayniqsa, ayollar va bolalarning salomatligi, ta’limi va xavfsizligiga sarmoya kiritish zarur. Shu maqsadda O‘zbekistonda demografik prognozlash tizimi yo‘lga qo‘yilyapti, “Demografik dividend – 2050” strategiyasini ishlab chiqishmoqchi.
Bu ro‘yxatda men uchun eng muhimi — ta’lim. Yoshlarning ko‘pligi o‘z-o‘zidan boylik emas: bilim va kasb egallagan yoshlargina dividend beradi. Bugun 1-sinfga borgan bola 2050-yilda mamlakatning asosiy ishchi kuchi bo‘ladi. Reja chorak asrga mo‘ljallangan ekan, hisob aynan shu bolalardan boshlanadi.
Zero, ta’kidlanganidek, O‘zbekiston “kelajagi nafaqat aholi soni, balki, eng avvalo, ular qanday imkoniyatlarga ega bo‘lishi bilan belgilanadi”.
Surxondaryodagi “elektrichkalar” — 2026-yilda jamoatchilik e’tiborini o‘ziga qaratgan mavzulardan biri. Surxondaryoning xalq tomonidan “bloger-hokim” deya ta’riflangan hokimi sharofati bilan. Yaxshi ma’noda uning sharofati bilan. Chunki bu vaziyatda u ham bir iste’molchi bo‘lsa kerak, axir temiryo‘l ham, uning vagonlari ham viloyat hokimliginiki emas, hammasi “O‘zbekiston temir yo‘llari”ga tegishli. Hokim bor-yo‘g‘i xalqning bir dardini retranslyatsiya qilib berdi.
Shundan keyin ozmi-ko‘pmi biroz o‘zgarish bo‘lgan. Biroz. Ko‘p emas. Gazeta muxbiri Otabek Turdiyev shu haqda reportaj tayyorlabdi: https://www.gazeta.uz/oz/2026/09/24/termiz-sariosiyo/
Milliy kutubxonaning orqasidagi sayilgohni avtoturargohga aylantirish bo‘yicha Toshkent hokimligining taklifi haqidagi xabarga berilgan xalq izohlarida, taxminan: “Avval bu joy avtoturargohga aylantiriladi, bir necha yil o‘tgach, yo biznes markazi, yo turar joy majmuasi qurishga berib yuboriladi”, degandek fikrga ko‘zim tushdi.
Davlatning xuddi shu tuzilmalari, hay, boshqa shaxslarning qo‘llari bilan bo‘lsa-da, xuddi shu tuzilmalari avval shunday ish qilgan, xalq buni ko‘rgan. Shuning uchun ham xalq bu davlat tuzilmalariga ishonmaydi, shuning uchun ham bu davlat tuzilmalarining xalq oldidagi hurmati ostonadan ham pastroqda. Shuning uchun ham davlat tuzilmalarining har qanday tashabbusiga yuqoridagi kabi shubha bilan, ishonchsizlik bilan qaraladi. Keyin o‘tiradi bular: “Bizning bu tashabbusimizni odamlar bunchalik salbiy kutib oladi, deb o‘ylamagandik”, deb.
Xalqning yillar davomida tinimsiz oyoqosti qilingan ishonchini qanday qilib sal bo‘lsa-da tiklash mumkin? Poytaxt hokimi oxirgi vaqtlarda juda ko‘p intervyu beryapti va shu intervyularining birida u: “Avtoturargohlar uchun ajratilgan yerlarga biznes markazlari qurib yuborilgan”, deb tan olgandi. Tan olingani yaxshi, endi o‘sha — davlatni ham, jamoatchilikni ham aldagan o‘sha quruvchilardan bu biznes obyektlari qaytarib olinib, boshida aytilganidek, avtoturargoh qilinsin. Hokimlik (umuman davlat) bitta bo‘lsa ham shunday ish qilsin axir.
Xalq ko‘rsin — davlatning kuchi faqat avtobus bekatida do‘kon qurgan yoki do‘konining peshlavhasini belgilangan talabdan jindek kattaroq yo boshqacharoq rangda qilib qo‘ygan kichik tadbirkorga emas, qonunni buzgan hammaga birdek yetishini; davlat shunday qudrati borligini, uni aldaganlarni mana shunday qimmat jazolay olishini ko‘rsatsin. Ko‘raylik.
Ana shunday xalqning davlatga bo‘lgan ishonchi haminqadar tiklanar, ehtimol. Lekin yuqorida aytilgan ish hozir davlat (hokimlik)ning qo‘lidan kelmaydimi, u holda jamoat makonlariga va umuman shahardagi bo‘sh turgan biror joyga tegmagani ma’qul. Toshkentni tinch qo‘ysin hammasi. Nima yangilik qilmoqchi bo‘lsa, ana, Yangi Toshkentida qilaversin.
Bobur shoh va shoir bo‘lsa ham, lekin Andijonda Boburshoh degan ko‘cha yo‘q, Bobur degan shoh ko‘cha (ruschasiga – prospekt) bor. Ishonmasangiz, Geografik obyektlar nomlarining davlat reyestriga qarang.
Xuddi shunday, o‘rni kelib qolganda aytib ketish kerak — Samarqandda ham Spitamenshoh ko‘chasi yo‘q (boz ustiga, Boburdan farqli o‘laroq, Spitamen shoh ham bo‘lmagan), Spitamen nomiga qo‘yilgan shoh ko‘cha bor (lekin davlat reyestrida u ham shoh emas, shunchaki oddiy ko‘cha ekan).
O‘zi shu “shoh ko‘cha” birikmasini qo‘shib, bitta so‘zga aylantirib, “shohko‘cha” deb yozishga o‘tish kerak. Ehtimol, shunda mamlakatning eng asosiy matbuot xizmati ham chalg‘imagan, qolganlarni ham chalg‘itmagan bo‘lardi.
Xidiraliyev choponi: https://www.instagram.com/reel/Ddn7P6tNSRy/?stkn=MW1nZW82OXBod2QzNQ==
Читать полностью…
Ikki kun avval, 16-oktabrda Press Qahramon bir maktabga borib, o‘z hamrohlari bilan bir boshlang‘ich sinfga kirib, xuddi sovg‘a beradigan Qorboboning ohangida o‘quvchilarga: “Kim bugun mashinaning old o‘rindig‘i – haydovchining yonida o‘tirib keldi?”, deb savol bergan videosi chiqqandi. Ko‘rgan bo‘lsangiz kerak, uch o‘quvchi xursand bo‘lib, qorataxtaning oldiga chiqqan. Keyin Press Qahramon ulardan otalarining ismini so‘rab, endi ularga jarima solinishini e’lon qilgan.
Salkam 10 mln marta ko‘rilgan bu videoning oxiri — jarima solindimi-yo‘qmi — muhim emas (ahamiyatlisi, uch bolaning shaxsi butun mamlakatga oshkor qilindi, bu esa o‘zi jiddiy huquqiy muammo). Qoidalarga rioya etilishini targ‘ib va talab qilishga hech kim qarshi bo‘lmasa kerak, lekin Press Qahramon tanlagan nobop usul 9-10 yoshli bu o‘quvchilarni juda noxush va noqulay vaziyatda qoldirganini ham tushunish muhim.
Zotan o‘sha sinfxonadagi vaziyat shu video tarqatilmaganida ham juda yomon — o‘quvchilar eng kamida o‘z sinfdoshlari oldida yoqimsiz vaziyatda qoldirilgan (kamiga, rost gapning to‘qmog‘ini yegan). Press Qahramon va uning hamkasblari biror “kotakon”ning hali 12 yoshga to‘lmagan nevarasi biror premium avtomobilning old o‘rindig‘ida ketayotganini ko‘rsa, uni jazolash tugul, mana shunday videoga olib chiqara olishiga ham ishonish qiyin, buyoqda esa hech narsadan shubhalanmay, xursand bo‘lib “doska”ga chiqqan uch o‘quvchini endi butun mamlakat muhokama qilyapti (qani endi Press Qahramon o‘sha videosi ostidagi kommentlarni yopib qo‘ygani bilan bu muhokamalarni to‘xtatib bo‘lsa).
Afsuski, Press Qahramon qilgan ishi, tanlagan targ‘ibot usuli o‘rinsiz bo‘lganini hali ham anglamagan, nazarimda. Sog‘lom fikrli vatandoshlarimiz huquq-tartibot xodimlarining maktabdagi bu xatti-harakati o‘rinsizligini faol ta’kidlab kelayotgan bir vaqtda, u bugun, 18-oktabr kuni Instagramdagi sahifasiga IIV matbuot kotibi Shohrux G‘iyosovning eski, lekin g‘alati mashhur bir videosini qo‘yibdi. U videoning ma’nosi, taxminan, bunday: melisani kimlar yomonlaydi? Melisani faqat “shoqol”lar va g‘alamislar yomonlaydi. Qolganlar esa “melisaga ishim tushmasin!” deb duo qiladi.
Xalq “shularga ishim tushmasin!” deb duo qiladigan o‘zbek melisasi vakili hisoblangan Press Qahramonning maktabdagi xatti-harakatlarini Erkinjon Turdimov boshliq Ta’lim vazirligi ham, O‘zbekiston Bolalar ombudsmani Surayyo Rahmonova ham qoraladi. Melisa jargoni bilan aytganda, “yomonladi”. Press Qahramon “NO COMMENT” degan izoh bilan Shohrux G‘iyosovning videosini go‘yoki unga qaratilgan tanqidlarga javoban chiqararkan, bu bilan nafaqat O‘zbekistonning faol jamoatchiligini, balki, hozircha, Ta’lim vazirligi va Bolalar ombudsmanini ham “shoqol va g‘alamislar”ga tenglashtirib qo‘yganini tushungan bo‘lsa bo‘ldi.
Saida Mirziyoyeva Turkiyada mamlakat rahbari Rajab Toyyib Erdo‘g‘on bilan uchrashibdi, qabul uchun minnatdorlik bildirib, O‘zbekiston prezidentining salomini yetkazibdi.
“O‘zbekiston va Turkiyani do‘stlik hamda yaqin hamkorlik rishtalari bog‘lab turadi. Muloqot chog‘ida birgalikdagi sa’y-harakatlarimiz natijalari va mamlakatlarimiz o‘rtasidagi aloqalarni yanada mustahkamlash istiqbollarini muhokama qildik”, — deb yozgan Saida Mirziyoyeva Turkiya davlat rahbari bilan bo‘lgan uchrashuv haqida.
Umuman, kun davomida u Erdo‘g‘onning to‘ng‘ich o‘g‘li hamrohligida Istanbuldagi Ibn Xaldun universiteti va “Yenido‘g‘u” maktabini borib ko‘rgan, prezidentning kenja qizi va kuyovi bilan birga Bayraktar dronlarini ishlab chiqadigan “Baykar” kompaniyasida bo‘lgan.
Ular Saida Mirziyoyevaga Turkiyaning birinchi uchuvchisiz qiruvchi samolyoti — Bayraktar Kizilelma maketini sovg‘a qilishibdi. Ajab emas, biz ham ushbu yangi va yuksak texnologiyaning asosiy xaridorlaridan biri bo‘lsak. Har qalay, harbiy havo kuchlarimizni mutassil yangilayapmiz.
Shu suratda qo‘li ko‘ksida turgan yangi hokimning orqa tarafida o‘tirgan kishi — Saidqahhor Xolxo‘jayev — shu bugungacha Chilonzor hokimi edi. Menimcha, Saidqahhor aka Chilonzorga yaxshi hokimlik qildi, imkoniyati doirasida tuman muammolarini yechishga intildi. Hatto Chilonzor hokimligining oldini parkka aylantirdi — bunaqasi hatto shahar hokimligida ham yo‘q (kimdir shahar hokimligining oldida City bor-ku, deb yengmoqchi bo‘lishi mumkin, lekin u, menimcha, boshqa narsa). Hayot Inog‘omovdan ham Chilonzorga tegadigan foyda Saidqahhor Xolxo‘jayevnikidan kam bo‘lmasa kerak.
O‘rni kelganda bir gap: Chilonzor — hozirgi Toshkentning qalbi 🙂 Chilonzorga hokim bo‘lish esa sharaf!
Menimcha, davlatimiz o‘zbekistonliklarning Rossiya–Ukraina urushida qatnashishining oldini olish bo‘yicha yetarlicha ish olib bormayapti. Hatto “urushga bormang!” degan aksiltarg‘ibot ham yetarli darajada tashkil etilmayapti.
Lekin Rossiya o‘zbekistonliklarni bu urush domiga tortish uchun o‘zi allaqachon yollagan o‘zbeklarning so‘zi bilan, o‘zbeklarning qo‘li bilan juda faol tashviqot olib bormoqda. Ular o‘zbek tilida, diniy mavzularni qo‘shib, jazavani qo‘zg‘aydigan nuqtalarga tegib (masalan, “biz besoqolbozlarga qarshi jang qilyapmiz”, degandek), urushga qo‘shilishga da’vat qilyapti.
Mana shu o‘zbekzabon targ‘ibotchilarga nisbatan jinoyat ishlarining qo‘zg‘atilishi va Rossiyadan ularni O‘zbekistonga jinoyatchi sifatida topshirilishini talab etilishi — bir o‘rinli aksiltarg‘ibot (ular Rossiya armiyasiga qo‘shilib, Rossiya fuqaroligini olgan bo‘lsa, bu O‘zbekiston fuqaroligini yo‘qotishga asos bo‘ladi — qonunda bor shu normani ham ochiq-oshkora qo‘llash, ko‘rsatish zarur); xuddi pandemiya davridagi “Uyda qoling! Niqob taqing!” degan tashviqotga o‘xshatib, tinimsiz, har kuni: “Urushga borma, borsang — O‘zbekiston uchun jinoyatchisan” degan ogohlantirishning kerak bo‘lsa har dazmoldan jaranglab turishi — hozir juda kerakli aksiltarg‘ibot.
Urushda qatnashishga qarshi yana bir zo‘r va arzon aksiltarg‘ibot — bu yollaganlik, yollanganlik va urushda qatnashganlik uchun ko‘zda tutilgan jazolarning qat’iyligi va muqarrarligini ta’minlash. Menimcha, bu masalada jinoyatchilar qonunda belgilangan jazoni to‘liq hajmda olishi shart. Jazo muqarrarligi — har qanday jinoyatga qarshi eng yaxshi chora.
Qo‘shimchasiga, yollaganlik, yollanganlik, urushda qatnashganlik uchun ko‘zda tutilgan jazolarni yanada og‘irlashtirish kerak. O‘zbekistonda istalgan jazoni zudlik bilan, bir haftaga qolmay kuchaytirish mumkinligini Namangandagi 5 yoshli qizaloq voqeasidan keyin hamma ko‘rdi. Agar bu chora vatandoshlarimizning urushga yollanishini kamaytirib, ularning hayotini saqlab qolishga yordam bersa, bu safar ham shunday tezkorlik zarur.
Yana o‘nlab, yuzlab, minglab vatandoshlarimiz tarixda qonxo‘r va bosqinchi nomi bilan qoladigan Putinning tor manfaatlari yo‘lida o‘lib ketmasligi uchun ham davlatimiz qila oladigan eng kichik ishlar bu aslida.
Saida Mirziyoyeva sentyabrda, asosan BMT tadbirlarida ishtirok etish uchun Nyu-Yorkka borganida, AQSh prezidenti tomonidan tashkil etilgan qabulda Donald Tramp bilan ham uchrashgan ekan.
Bugun u shu uchrashuv haqida fotoxabar e’lon qildi, unda, jumladan, shunday deyilgan: “AQSh prezidenti Donald Tramp bilan uchrashish hamda O‘zbekiston Prezidenti Shavkat Mirziyoyevning samimiy va ezgu tilaklarini yetkazish men uchun katta sharafdir”.
Saida Mirziyoyeva o‘sha qabul davomida Janubiy Koreya prezidenti Li Chje Myon va uning rafiqasi Kim Xe Gyon, Turkiya prezidenti Rajab Toyyib Erdo‘g‘on, Armaniston bosh vaziri Nikol Pashinyan, Gruziya bosh vaziri Irakli Kobaxidze, Paragvay prezidenti Santyago Penya va uning rafiqasi Letisiya Okapmos, AQSh davlat kotibi Marko Rubio va boshqalar bilan ham muloqotda bo‘lgan.
Tunov kuni Yunusobodda issiq suv bilan bir vaqtda sovuq suv ham o‘chib qolgani haqida yozg‘irdim-ku. Toshkentliklarning “dom”da katta bo‘lgan bizdek turlari uchun sovuq suv o‘chishi noodatiy. Lekin yilda ikki marta — bahor va kuzda issiq suvsiz qolishga ko‘nikkanmiz. Chunki, pandemiya yilidagi istisnoni hisobga olmasa (o‘sha yili bahorda ham, kuzda ham issiq suv o‘chmagandi — o‘chirmasa ham bo‘larkan-da, qarang), har doim — necha o‘n yillardan beri shunday. Yiliga umumiy ikki hafta davom etadigan bu davr qaysidir ma’noda bizning biologik vaqtimizga tatbiq etilgandek: bahorda qaldirg‘ochlar uchib kelganidek, qishda ayiqlar uyquga ketganidek, biz ham bahor va kuzda bir haftadan issiq suvsiz yashay olamiz. Sochlarimiz ham shu ikki haftada yog‘lanmay turadi-yov.
Issiq suvning o‘chirilishi shahar hayotining muhim bir qismi bo‘lgani uchun butun shahar bu haqda oldindan ogohlantiriladi, qachon qaysi mahalla, qaysi mavze issiq suvsiz qolishi maxsus reja-jadval orqali bir oy-yarim oy avvaldan boxabar qilinadi. Masalan, hozir bizning Yunusobodda issiq suv yo‘q, bizdan avval esa asosan Mirzo Ulug‘bek tumani issiq suvsiz yashadi. Shunday bo‘lishini biz sentabr boshidayoq bilardik. Hamma bilardi. Xususan, Mirzo Ulug‘bek tumani Hamid Olimjon mahallasida joylashgan Respublika kardiologiya markazidagilar ham.
Men g‘ofil banda shu vaqtgacha issiq suv faqat “dom”larda o‘chadi, deb yurarkanman. Davlatning deyarli hamma muassasasi xuddi sening “dom”ing kabi shahar markaziy issiqlik tarmog‘iga ulangan bo‘lsa, sen issiq suvsiz qolgan vaqting ular ham bu ne’mati a’lodan mosuvo bo‘lishi tabiiy hol-ku.
Tabiiylikka tabiiy, lekin men bu haqda hech o‘ylamagan ekanman, o‘ylamaganimning sababi esa “dom”lar issiq suvsiz qolgan mahal O‘ZBЕKISTONning, masalan, YURAK KASALLIKLARIga ixtisoslashgan BOSH TIBBIYOT MUASSASASIda ham issiq suv bo‘lmasligi sog‘lom aqlga to‘g‘ri kelmasligi bilan bog‘liq bo‘lsa kerak. Lekin sog‘lom aqlga to‘g‘ri kelmaydigan bu hol Respublika kardiologiya markazida odatiy ekaniga Mirzo Ulug‘bek tumanining Hamid Olimjon mahallasi issiq suvsiz qolganida xabar topdim.
Bu markazga butun O‘zbekistondan yurak kasalliklari bor bemorlar keladi. Ordering bo‘lsa — xo‘p-xo‘p, bo‘lmasa — bu davlat xastaxonasi senga pullik xizmat ko‘rsatadi va uch-to‘rt kun yotib, davo topib ketishing o‘ldim deganda 1000-1500 dollarga tushadi, biror maydaroq operatsiya ham bo‘lsa, xarajatni katta olaver.
Bir chekka tumandan shu kasalxonaga kelasan, falon pul xarajat qilasan va issiq suv bo‘lmaydigan haftaga to‘g‘ri kelib qolsang, bu kasalxona senga tefalda suv isitib yuvinib/cho‘milib olishni taklif qilishi mumkin. Tavba-tavba, bu dargohga har kuni yuzlab bo‘lmasa ham, o‘nlab bemor kelar. Shunday joyda “endi bir hafta chidaysizlar-da”, deb bo‘ladimi xayoli shundoq ham xavotirlarga to‘la bemorga?
Bu yerda ko‘p narsa baribir mutassaddilarga bog‘liq, afsuski. Ishbilarmon, odamlarning dardini o‘z tanida his qilgan, ular qanday sharoitda davolanayotganiga chin dildan qiziqqan mas’ul bu muammoni allaqachon yechib qo‘ygan bo‘lardi. Zotan, hozirgi zamonda bu muammoni (muammomi o‘zi bu?) hal qilish qiyin ham, qimmat ham emas. Xizmatining narxini yuqorida yozdim — hay, har bir qavatga bo‘lmasa ham (har bir xonaga so‘rashga ikkilandim), har bir korpusga bittadan yil 365 kun issiq suv bo‘ladigan sharoit qilib qo‘ysa bo‘lar?
Bo‘ladi. Albatta bo‘ladi. Xohish bo‘lsa, hammasi bo‘ladi. Menimcha, tibbiyot muassasalaridagi, ayniqsa, respublika darajasidagi klinikalardagi bunday kamchilikka toqat qilib bo‘lmaydi. Nafaqat Kardiologiya markazida, balki markaziy issiqlik ta’minotiga ulangan va yilda ikki marta issiq suvsiz qoladigan boshqa tibbiyot muassasalarida ham bu masalani hal qilish kerak.
Ha, to‘g‘ri, ota-bobolarimiz issiq suvsiz ham amallashgan, lekin biz hozir, bugun yashayapmiz, “insonning qadri bo‘lmagan” ota-bobolarimiz davrida emas. Hozir esa, aytishlaricha, hamma narsa, xususan, davlat siyosati ham inson qadri uchun. Respublika kardiologiya markazida yil bo‘yi, uzluksiz issiq suv bo‘lsa — mana shu inson qadri.
Menimcha.
Esingizdami, Toshkentda Li9 chapga burilayotgan BYDning ortidan superkatta tezlikda “uchib” kelib, BYDga ozgina turtilib, keyin dumalab ketgan, lekin odil sudlarimiz BYD egasini (sudga ham chaqirmay) aybdor qilib, unga pachag‘i chiqib ketgan Li9 uchun salkam 800 mln so‘m miqdorida kompensatsiya to‘lab berish majburiyatini yuklagan edi.
Odil sudlarimiz o‘shanda BYD egasini aybdorga aylantirish uchun ekspertiza ma’lumotlariga tayangan. O‘sha ekspertiza esa Li9'ning YTH vaqtidagi tezligini aniqlash imkoni bo‘lmagani haqida, “Li9 mabodo soatiga 60 km/soat tezlikda harakatlansa ham YTHning oldini olishning texnik imkoni yo‘q edi”, degan mazmunda xulosa bergan.
Lekin o‘shanda Li9'ning tezligi soatiga 60 kilometrdan karrasiga tezroq bo‘lganini ekspert bo‘lmagan, umrida ekspertizada ishlamagan odam ham ko‘rib, tushunib, bilib turgandi. Ishqilib, qaytadan, sog‘lom bir ekspertiza o‘tkazib (o‘tkazsa bo‘larkan-da, qarang), Li9'ning tezligi o‘sha YTH bo‘lgan vaqtda soatiga 120 kilometrdan ham yuqori bo‘lganini aniqlashibdi — chunki odil sudlarimiz navbatdagi sudda Li9'ning qoni qaynoq 26 yoshli haydovchisi Ma’muriy javobgarlik to‘g‘risidagi kodeksning 128-3-moddasi 4-qismi (transport vositalari haydovchilarining belgilangan harakat tezligini soatiga 60 kilometrdan ortiq kattalikda oshirib yuborishi)da ko‘zda tutilgan huquqbuzarlikni sodir etgan, deb topibdi.
Ishqilib, mantiq, sog‘lom fikr va adolat g‘alaba qozonibdi. Lekin boshqa bir savol qolyapti baribir: asl jabrlanuvchini aybdorga aylantirgan avvalgi tomosha qahramonlari hozir qayerda? Bunchalik telba-teskari, chorakta tanqidga ham chidamaydigan qaror chiqargani uchun ularga biror chora ko‘rilganmi? O‘sha sudya hali ham ishlab yuribdimi? O‘sha ekspertlar hali ham ekspertiza o‘tkazyaptimi? Mana shunisi ham aytilsa, yaxshi bo‘lardi.
Shu o‘rinda yana bir fikr. Jonajon O‘zbekistonimizga har turli reyestrlar kerak: korrupsionerlar reyestri (ular qayta davlat ishiga olinmasligi uchun), bog‘cha yo maktabda bolalarga zo‘ravonlik qilganlar reyestri (ular yana ta’lim tashkilotlariga ishga kirib qolmasligi uchun), bolalarga shilqimlik qilganlarning reyestri va telba-teskari qarorlar chiqaradigan sudyalar reyestri — eng kamida, kimningdir ishi shunaqa sudyalarga tushib qolsa, bu sudyani boshqa durustrog‘i bilan almashtirishni so‘rash uchun.
Toshkentning ichimlik suv ta’minotiga mas’ullarini yozda oftob qattiqroq urgan, shekilli (uzr so‘ragan bo‘lsa ham-da).
O‘zi, birinchidan, sovuq suv bunaqa bir sutkalab o‘chirilganini eslolmayman (ha, Eski O‘zbekiston davrida ham ko‘rmaganman, har qalay, biz yashagan mahallalarda unday bo‘lmagan).
Ikkinchidan, 23-24-sentabr kunlari ham bir o‘chgandi suv, xuddi mana bu rejada yozilganidek. Bugun yana o‘chdi, bu ham rejada yozilgan ekan, lekin shu joyida sal mantiqsizlik bor-da baribir.
Masalan, Yunusobodning 19-mavzesi o‘zi uchta mahallaga bo‘linadi: “Shoshtepa” (bular “Choshtepa” deb yozibdi), “Uvaysiy” va “Yurtobod”. Rejada bu mahallalarda suv 23-24-sentabrda bo‘lmasligi ko‘rsatilgan.
Endi, bugun, 28-sentabrda ham Yunusobod 19-mavzesida suv bo‘lmaydi, deb ko‘rsatgan. Baraka topkur, boyagi uchta mahalla o‘zi shu 19-mavze-ku :)
O‘tgan safargi suv o‘chishiga shuning uchun ham toqat qilsa bo‘lardiki, unda har qalay issiq suv bor edi, bugundan bizning mahallada issiq suv ham bir haftaga rejali o‘chgan :)
Hay, suv-moshinada suv yuboramiz, deyishyapti-ku. O‘zbekistonda umuman suvsiz joylar bor, odam bir kunlik suvsizlikdan nolishga ham hijolat o‘zi 🙈 Uzr.
Bolalarga nisbatan qabih jinoyatlar uchun jazo amaldagi qonunchilik doirasida maksimal darajada og‘ir va ayovsiz bo‘lishi kerakligi borasida, menimcha, hamma yakdil. Bunda jazo nafaqat og‘ir, balki muqarrar ham bo‘lishi shart — jazodan (ehtimoliy jinoyatchilarni hali jazolamay ham turib) kutilgan samaraga faqat shundagina erishish mumkin.
Jamoatchilikdan: “Bunday jinoyatchilarni qanday jazolash kerak?”, deb so‘ralsa, ular xohlagan gapini aytishi mumkin va aytishga haqli ham. Jamoatchilik Konstitutsiya bilan taqiqlangan o‘lim jazosini ham qayta tiklash kerak, deyishi mumkin hatto. Albatta, bu fikrga qo‘shilib bo‘lmaydi — O‘zbekistonda o‘lim jazosi tiklanmasligi kerak, lekin jamoatchilik o‘z fikrini erkin aytishga haqli.
Shu bilan birga, O‘zbekiston sharoitida eng yuqori minbarlardan, eng yuqori darajada o‘lim jazosini qo‘llash borasida fikr bildirishda, nazarimda, ehtiyotkorroq yo‘l tutish maqsadga muvofiq bo‘lsa kerak. Ha, eng yuqori darajadagilar ham odam va ular ham o‘z fikrini jamoatchilikning qolgan vakillari kabi erkin bildirishga haqli, bu borada bahs yo‘q.
Lekin O‘zbekiston sharoitida eng yuqori darajada aytilgan o‘tkinchi bir fikr ham topshiriq sifatida qabul qilinib, o‘rinsiz amaliy harakatlar boshlanib ketishi va bu qudrat egalarining o‘zi tomonidan keyinchalik xato sifatida e’tirof etilishi mumkin bo‘lgan qarorlar qabul qilinishiga sabab bo‘lishini ham istisno qilib bo‘lmaydi. Ayniqsa, sud hokimiyatiga ishonch yo‘q bo‘lgan hozirgi sharoitda o‘lim jazosining — qancha istisnosi bo‘lishidan qat’i nazar — qayta tiklanishi ayanchli oqibatlar keltirib chiqarishi mumkin.
Ozgina qudrati bor va tarbiyasi jirkanch ishlarni qilishga yo‘l qo‘yadigan shaxs o‘zining ko‘ziga dushman ko‘ringan istalgan odamga bir lahzada “besoqolboz” degan tamg‘ani yopishtira olishiga va buning uchun jazolanmasligiga ishonadigan mamlakatda o‘lim jazosining qayta tiklanishi ertaga istalgan noqulay odamning “bolalarga uyatsiz-buzuq harakat qilgan” degan soxta ayb bilan qonuniy o‘ldirilishiga sabab bo‘lishi mumkin.
O‘zbekistonda bolalarni pedofillar va boshqa jirkanch shaxslardan muhofaza etish yo‘lida o‘lim jazosigacha ham qilish mumkin va qilish kerak bo‘lgan ancha-muncha ish bor, menimcha. Avvalo, hozir mavjud jazolarning o‘zi muqarrar bo‘lishi, jazo tayinlashda bunday jinoyatchilardan jamiyatga yetadigan zarar to‘g‘ri baholanishi kerak (masalan, bunday jinoyatchilarga amnistiya qo‘llash — qanchalik to‘g‘ri?). Bundan tashqari, tegishli idoralar bunday holatlar haqida tarqalayotgan xabarlarga avvalboshdan sezgir va hushyor bo‘lishi, bunday ishlarni eng yuqori darajada kimningdir qattiq jahli chiqquniga qadar o‘z nazoratiga olishni o‘rganishi kerak.
O‘lim jazosi esa, huquqshunoslar ko‘p marta ta’kidlaganidek, bu tur jinoyatchilarning tiyilishidan ko‘ra, ularning o‘ldirilgan qurbonlari (jinoyatlarining yo‘q qilingan yagona guvohlari) soni ko‘payishiga xizmat qilishi ehtimoli yuqoriroq.
Shuningdek, bunday jinoyatlarning oldini olish uchun ko‘zbo‘yamachi ishlarni haqiqiy, doimiy harakatga aylantirish kerak. Masalan, Namangandagi keysda bog‘chadagi kuzatuv kameralari ishlamagani, bu esa jinoyatda gumonlanayotgan shaxsning xatti-harakatlari uchun qulay sharoit yaratib bergani taxmin qilinyapti. Shu kameralar xo‘jako‘rsinga turmay, chindan ishlasa va ular to‘g‘ri kuzatilib borilsa, vaziyatni yaxshi tomonga o‘zgartirish, nafaqat bunday qabih, balki boshqa tur jinoyatlarning ham oldini olish mumkin bo‘lsa kerak.
Har qanday holatda ham, ayniqsa, davlat o‘z nazorati ostidagi bolalar bog‘chasida bolalarning xavfsizligini ta’minlay olmayotgan sharoitda, O‘zbekistonda o‘lim jazosi tiklanmasligi zarur. Eng kamida, hozir tiklanmasligi kerak. Zotan, o‘lim jazosi bugungi dardlarimizga malham bo‘ladigan universal yechim emas. Ungacha ham qilish mumkin va qilish kerak bo‘lgan ishlar bisyor.
Yo Xudo, bolalarimizni o‘zing asra!
Agar “podkastlarda qatnashuvchi” degan kasb bo‘lsa, men hozir amalda shu kasb egasiman 🙂
Avvalroq “Gashtak”dagi ishtirokim havolasi bilan bo‘lishgandim (o‘sha podkast 100 mingdan ko‘p ko‘rilibdi; tavba-tavba!), bunisi endi “Ilk qadam” nomli podkastdagi ishtirokim havolasi va unda, tabiiyki, siz ham biladigan, siz avval ham eshitgan ko‘plab gaplarni yana bir marta gapirib kelganman.
Kim bilsin, balki birorta yangi gap ham bordir. Bo‘lsa, unisini siz ayting (e’tiboringiz uchun oldindan ko‘p rahmat!): https://www.youtube.com/watch?v=rbcpzQ9ZVG0
Bu tomoshani boshqalar uyushtirgan bo‘lsa-da, negadir men g‘alati bo‘lyapman, hatto uyalyapman, shekilli.
Hay, bu odamning aybi yo‘qdir, lekin uni kim yomonotliq qildi, kim uning jinoyatchilikda gumon qilinayotgani haqida prezidentgacha gapirtirdi? Prezident O‘zbekistondagi har bir gumonlanuvchi haqida har kuni omma oldida gapiravermaydi-ku axir.
Bu odam beayb bo‘lsa, unda u kimning xatosi bilan bunday sazoyi qilindi, ishidan ayrildi, shuncha yil yiqqan obro‘si to‘kildi? Shuncha gap-so‘zdan keyin hech bir izohsiz bu odamni (yashirincha?) oqlab, yana hech bir izohsiz poytaxtdagi bir katta tumanning melisasiga boshliq qilib qo‘yaveradimi?
Hatto Eski O‘zbekistonda ham bunaqasi bo‘lmagan shekilli? “Bundan battari ham bo‘lgan”, desangiz — bunaqa bo‘lishining asli noto‘g‘ri-ku! Konstitutsiyasi yangilangan, o‘rni bo‘lsa-bo‘lmasa har jabhada o‘zini “Yangi” deb ta‘riflayveradigan O‘zbekistonga yarashadigan ishmi shu?
Tavba, tavba!
Men ANORBANK’ni kichikroq bir bank deb yurardim, lekin u yerdagi sur’at juda katta ekan-ku: odamlar uch kunda bu bankda 9 mingdan ortiq plastik karta ochibdi. Sur’atni tasavvur qilishingiz uchun — agar bank 24 soat davomida to‘xtovsiz ishlasa, bu uch sutka davomida har 28 soniyada bittadan plastik karta chiqarilgan, degani.
Читать полностью…
Saida Mirziyoyeva BMT bosh minbarida o‘zbek tilida chiqish qilibdi (avvalgi safar shu minbarda ingliz tilida chiqish qilgandi). “O‘zbekiston qaysi tarafda, kim tomonda?”, degan savolga shunday javob beribdi: “Biz insoniyat tomonidamiz”.
Xalqaro huquq ustuvorligi masalasida ham yaxshi, qaysidir ma’noda, O‘zbekiston insoniyat tomonida ekanini tasdiqlovchi gap bo‘libdi. “Biz [O‘zbekiston] uchun xalqaro huquq manfaatga qarab o‘zgaradigan vosita emas, u barcha davlatlar uchun umumiy qoida. Qoida umumiy bo‘lmasa, adolat ham umumiy bo‘lmaydi”, – debdi Saida Mirziyoyeva.
So‘nggi besh-olti yilda aynan mana shunday umumiy, hamma tan olgan qoidalar asosan qudrat egalari tomonidan tinimsiz oyoqosti qilinavergani uchun dunyomiz ziddiyatlar tobora ortayotgan, o‘zaro ishonch esa yo‘qolib borayotgan makonga aylanib qoldi, insoniyatga qarshi jinoyatlar esa odatiy holga aylanib qoldi.
Saida Mirziyoyevaning BMT bosh minbaridagi chiqishi — O‘zbekistonning bugungi kundagi nuqtayi nazari — bilan to‘liq bu yerda tanishishingiz mumkin: https://youtu.be/GZzYK26pogk (audioyo‘lakdan o‘zbek tilini tanlab olish esdan chiqmasin).
O‘zbekistonda oxirgi yillarda YouTube-loyihalar juda ko‘paydi, ayniqsa, biror podkast boshlayman, deb o‘sha podkastga nom o‘ylashni boshlashing bilan, qarasang, sen o‘ylagan nom bilan allaqachon bir emas, bir necha podkast yo‘lga qo‘yib bo‘lingan.
Ishqilib, loyihalar juda ko‘p. Yaxshi tomoni, faqat sonda emas, sifatda ham bo‘lyapti. Ko‘rmaysizmi, hatto besh kishi bir bo‘lib, binoyidek podkastlar, sayohatnomalar olishyapti — milliy yutubchiligimiz shu darajaga yetib keldi, ko‘z tegmasin (kamtarligim uchun uzr).
Qizig‘i, YouTube'ning O‘zbekiston segmentidagi bu o‘sish bir to‘siqqa qarshi o‘laroq yuz beryapti: O‘zbekiston uchun YouTube monetizatsiyani yo‘lga qo‘ymagan. Bir necha yil ilgari chet eldagi ko‘rishlar hisobidan pul ishlash mumkin edi, hozir shu ham yo‘q. Bo‘lsa edi, yutubchiligimiz yanada o‘sardi.
Saida Mirziyoyeva hozir Amerikada-ku. Shu safari davomida u YouTube'ning egasi hisoblangan Google kompaniyasi vakillari bilan, aniqrog‘i, uning vitse-prezidenti Karan Bhatiya bilan uchrashibdi. Xabar berishlaricha, uchrashuvning asosiy mavzusi O‘zbekistonda YouTube monetizatsiyasini ishga tushirish bo‘lgan.
Zora shu uchrashuvdan keyin YouTube O‘zbekiston bozoriga rostmana kirib kelsa, bizda foydalanilmayotgan, biz foydalana olmayotgan xilma-xil xizmatlarini ishga tushirsa — nafaqat yutubchiligimiz, balki bizda rivojlantirishni juda istashayotgan kreativ iqtisodiyot rivojiga ham ko‘p yaxshi ish bo‘lardi.
Saida Mirziyoyeva 2023-yili BMTning Suv resurslari bo‘yicha konferensiyasida nutq o‘qigan edi. 2026-yil iyunida esa Venada BMT komissiyasi sessiyasida odil sudlov, ayollar va bolalar himoyasi, jinoyatchilik profilaktikasi va yoshlarni qo'llab-quvvatlash bo'yicha milliy hisobot taqdim etgan edi.
U endi, Gazeta’ning o‘z manbalariga tayanib xabar berishicha, Nyu-Yorkda bo‘lib o‘tadigan BMT Bosh assambleyasining 81-sessiyasi umumiy munozaralarida O‘zbekiston nomidan so‘zga chiqadi. Bungacha BMT Bosh assambleyasining Yuqori darajadagi haftaligida O‘zbekiston nomidan faqat yo prezident, yo tashqi ishlar vazirlarimiz chiqish qilgan edi.
Saida Mirziyoyeva ayni damda Nyu-Yorkda, kuni kecha BMT bosh kotibi Antoniu Gutterish bilan ham uchrashgan. Ular uchrashuv vaqtida O‘zbekiston va tashkilot o‘rtasidagi birgalikda rivojlantirib kelinayotgan barcha muhim hamkorlik yo‘nalishlari muhokama qilingan.
“Xalqaro munosabatlar tizimi uchun murakkab bo‘lgan hozirgi davrda global miqyosda yetakchilik salohiyatini namoyon etayotgani hamda xavfsizlikning barcha asosiy jabhalarida mamlakatimizni qo‘llab-quvvatlayotgani uchun janob Guterrishga samimiy minnatdorlik bildiraman”, — deya qo‘shimcha qilgan Saida Mirziyoyeva.