184
قناة الرادود منير القريشي لنشر وتلحين القصائد
گــواج الله زينب گــد ما تونين
وي الثمانين
ماتستراحين
ــــــــــــــــــــــــــــــــــــــ
جلـد الارض من گـد ونينچ كــزبر
والحبـــل بأيدچ الف مــره استغفر
عظم الچفوف إمن السياط إتكسر
ظل يوگع إمن إمتونچن لـون احمر
سوط الشمر أذاچ وبيدچ تشگفين
وي الثمانين
ماتستراحين
ــــــــــــــــــــــــــــــــــــــ
فــوگــاچ راس الگــطــعــو چفينـه
همــزين عالي الرمــــح وتشوفينه
شــوفيهه ذيـچ النبلــه ذيــچ إبعينه
چاوي الرمح بإحساسه عم إسكينه
وماي الزعل من طاح يوزن فـراتين
وي الثمانين
ماتستراحين
ــــــــــــــــــــــــــــــــــــــ
عباس راســـه أينگـط اعليچن هيل
ما أذته من داست إبصـــدره الخيل
أذته أم عبد الله التــــدور بالليــــل
طلعت الحرمه أتكلف أتهـد الحيل
هاي الحاله كسرت بخاصرته ضلعين
وي الثمانين
ماتستراحين
ــــــــــــــــــــــــــــــــــــــ
تعبـانه بس رايـچ يظــل أفضـل راي
مذبـوحـه بس مذبوحه سكته وبهداي
بـوجهج رمـاد الخيمه يابت مـــولاي
خلصت العركه وإنتي زاعلتي الماي
وچهج ينگط إرماد بس ماتغسلين
وي الثمانين
ماتستراحين
ــــــــــــــــــــــــــــــــــــــ
ذريتي الإرمـــاد إبوجــه كـل حرمه
يعنـــي المـــلامح لــو تبين زحمه
يحسين صحتي إبريني خويه الذمه
برگــع رقيــــه جـــره ذاك الــزلمه
وحتى إمن التراچي حرموهه يحسين
وي الثمانين
ماتستراحين
ــــــــــــــــــــــــــــــــــــــ
من الصبــح للعصــر بــس تتباچن
بالليــل نمتن چــا منـو اليــرعاچن
يمكن علي إبوصلـت سمه غطاچن
والمهدي حـد هذا الوكــت ينعاچن
گالو يبچي من دم كل هاي الاسنين
وي الثمانين
ماتستراحين
ــــــــــــــــــــــــــــــــــــــ
لمــن وگفتن قـــــرب باب الساعات
رف شـــارب العبــــاس يالعـــلـويات
راس الحسين إبشعـره طلعن شيبات
من طببــــوچن بالقصـــــر مسبيات
حتى الدمع معصوم لابس حجابين
وي الثمانين
ماتستراحين
#العبدالحسيني_محمدالجماسي
آ يزينب آ يزينب
باول اسنينچ يزينب..تبتدي الرحله الطويله
ومن بعد موت الزچيه..شِلتي الهموم الثجيله
والله صعبه انگول عَنِّچ..بت علي حامي دخيله
تالي ماتالي سِبِيَّه..وتركب النَّاگه الهزيله
آ يزينب...آ يزينب
إسمچ المعروف زينب...واسمچ الثاني الحبيبه
ويلي تالي اتبدَّل اسمچ...من حبيبه للغريبه
مو عجيبه ايموت گلبچ...لاكن اتحمَّل عجيبه
جبتي كل عمرچ مصايب...امصيبه اصعب من مصيبه
آ يزينب...آ يزينب
بعد اخوتچ زين عشتي...فتره ياروح الزچيه
عشتي لاچن عشتي ميته...من مصاب الغاضريه
خلصت انفاسچ يزينب...امن السبي وديوان اميَّه
اصعب اثنين اعله اخوتچ...جرحچ وموتت رقيه
آ يزينب....آ يزينب
ياهو مثلچ يالحزينه...ذبحو اهله وكل حياته
وگلبچ المكسور شَيَّب...من عذابه ونايباته
عادت التگرب منيته...تحظر احبابه ابمماته
صعبه من انگول زينب...ماتت ابديرة شماته
آ يزينب...آ يزينب
سيد علي الموسوي
يمته...نذبح الوحشه ونسويلك صحن
يمته..قطع نكتب من هنا قبر الحسن
يمته ياسبط النبي وروح الزچيه
نعتنيك افواج من الغاضريه
نوگف اعله الباب ونأدي التحيه
بالدمع نقره الزياره الحسنيه
يمته..والاجدام الحظرتك يتسابگن
يمته..قطع نكتب من هنا قبر الحسن
يمته يالوالي تخف اجروح الاسنين
وبحظرتك تجتمع كل المحبين
تملي كل الدنيه رايات الموالين
حاظرين وداعتك خدام الحسين
يمته..عالي رايات العزاء ايرفرفن
يمته..قطع نكتب من هنا قبر الحسن
والله حسره وشوگ بينه للزياره
يمته ويه المهدي تلفيك الحياره
هذه ولدك يالحسن كلهم غياره
الا يبنولك مناره ابصف مناره
يمته..ياولينه ويشهد اعلينه الزمن
يمته..قطع نكتب من هنا قبر الحسن
شيعتك يابن علي وكلنه ابخدمتك
لو نبيع ارواحنه ونبني حظرتك
احنه حشدك ياولينه وتحت امرتك
امن النجف حد مرقدك نفرش سفرتك
يمته...اي وحگ حيدر نذل اهل الفتن
يمته..قطع نكتب من هنا قبر الحسن
ياكريم آل النبي ابلهفه اعتنينه
والعزائك سيدي الليله اجينه
ابمجلسك يبن الزچيه انمد ادينه
والنعم منك يبن حيدر علينه
يمته..نخلص امن آلامنه وهاي المحن
يمته..قطع نكتب من هنا قبر الحسن
سيد علي الموسوي
اشتياق لحد الاختناق من العقيلة للحسين عليهم السلام ..
يالهادِم رِكِن حَيلي .. يمغَيِر تَفاصيلِي
لِعيونك ذِبَحني الشوگ .. مِنّك نَظره وَدّيلي
°°°°° °°°°° °°°°° °°°°° °°°°°
وين ايصِد نَظَرهه العين تِطلَع صورتك يحسين
وانظُر بيهه واتلهَف
الصوره تنشبُگ ياريت وتِحچي وتسمَع اتمنيت
چا ثِگْل المَواجع خَف
چا گِتلك حبيبي اهواي مشتاگاتلك عيناي
وبچَم موقف احتاجيت طولك كون چان اوياي
ابدونك غارت اعيوني .. وشِكْلي اتغير ولوني
يالمالَك عوض بالكون .. الفگدك چاره سَوّيلي
°°°°° °°°°° °°°°° °°°°° °°°°° °°°°°
عيني اليا كتر تندار تلگه الحضرتك تذكار
احچايه اهنا اهنا ضِحكه
ابطولي تارك انت آثار ينشافن جروحي اكبار
دونك عيشتي ضنكه
چنت الراحه والبسمه وصرت الآه واللَچمه
منّك فرحتي وحزني دونك تخنِگ النسمه
روح اختك يجارحهه .. يمغيّر ملامحهه
ما ظل عندي غير الآه .. ويا وسفه وأيا وَيلي
°°°°° °°°°° °°°°° °°°°° °°°°° °°°°°
إلمن ظلّتي إلمن وليش اعيوني ما يعمَن
لو ما شوفك اگبالي
شِلّي ابصوتي يالمبعِد لو ما بسمك ايردد
لتظن صوتي يهنالي
غير اسمك ولايرهم بيه الساني يتكلّم
احچي ابيقضتي ابطاريك ولو نِمْت ابهواك احلم
ابروحي ما بقت كل روح .. ظلّت بس بَقايه اجروح
وشوَية نظَر وانفاس .. واشواگي وتِواسيلي
°°°°° °°°°° °°°°° °°°°° °°°°° °°°°°
ظَل كلمن يشاهدني ياهِي انتي يناشدني
شَكلي اتغير اهوايه
لا إنت ولا عباس وتتفرج عليه الناس
لا خيمه ولا رايه
اتهوِّن كل مصيباتي واجروحي ومعاناتي
لاچن فرگتك مَتهُون هي اكبر عذاباتي
مرّات السبي انساه ابكل هضمه وعُظُم بلواه
بس ما أنسه عطرك لا ياوِردِي وتراتيلي
°°°°° °°°°° °°°°° °°°°° °°°°° °°°°°
اذكر وآنه عالناگه راسك يمّي واشتاگه
شگد حاولت اشبگنه
ابچي والعِده يضحكون ما يدرون ما يدرون
خيّي اشگد اعشگنه
خويه وجارت الايام بالكوفه وبعد بالشام
ما بيهم حميه الناس لو شَمّات لو شَتّام
عثرت ناگتي مرّه وما صارت علي عثره
طاحت بت علي ايصيحون وشفت الناگه تبچيلي
°°°°° °°°°° °°°°° °°°°° °°°°° °°°°°
لگبرك صرت احِن كل يوم يَمنَسّيني معنى النوم
ارد اوصل واطوفنّك
تِنشَم انت ما تنشاف يالمِثلك ولا ينعاف
چا ليش اني اعوفنّك
ربّي العن شمر وايزيد الحد ما جرح اخويه ايهيد
همَّ الفارگوني اوياه وخَلّو جسمه عني ابعيد
امن الطف انه ميته اِعليك .. شفتك ترفس ابرجليك
ابهالحاله وعليَّه اتخاف .. ابچَفّك رِجعِي تَومِيلي
°°°°° °°°°° °°°°° °°°°° °°°°° °°°°°
ياسر حسن
رقية بنت الحسين (عليها السلام)
ليش آنه من دون البنات
ماعـندي ظلّت أمنيات
الصبح عالناگه انام
وباليل بالهيمه ابات
وين ابوي وين ابوي وين ابوي
أمنيات
ــــــــــــــــــــــــــــــــــــــ
چم قصه ابقصه وموقف مر بيه
راح ابدي وياكم باحساس ابنيه
آنه ايسمّوني ازغر مسبيه
ومن ركض العاشر تعبن رجليه
طفله ازغيرونه .. ومارحموني
وامنگع طولي .. ابدمع اعيوني
واصرخ ياعمه .. مامبري الذمه
ذاك الابسوطه .. اذه امتوني
خليني انامن عالتراب
بس لايوگعون الحجاب
آنه رقيه وبت أمام
واحجابي للعالم صلاة
وين ابوي وين ابوي وين ابوي
امنيات
ــــــــــــــــــــــــــــــــــــــ
جو الطف حار وكلش خانگني
الخيل اتخوفني أمن اركض تلحگني
لو اشرد من النار التحرگني
الشمر ايسبني وخولي بسوطه ايطگني
والـمثلي ازغيره .. ابعمر الورده
يوجعهه الجفه .. اعليهه ايمده
ماتحمل سطره .. اتخوفهه الخزره
يغـمه اعلي مده .. واگعد مده
گلولي وين الغالي وين
وتدرون ابوي اشگد حنين
يگلب الدنيه لو يشوف
اجدامي واديه امحرگات
وين ابوي وين ابوي وين ابوي
امنيات
ــــــــــــــــــــــــــــــــــــــ
ارقيه الـماواحد چان ايبجيني
شمامة گلبي احسين ايسميني
ايحبني أمن امتوني ومن اذني وعيني
ومن ازعل چان ابوسه ايراضيني
چان ايسولفلي .. عن ابنيه
سافر والدهه .. وظلت هيه
راح وخلاهه .. نجمه وطفاهه
واشكد هالقصه .. تجرح بيه
وهسه افتهمت القصه زين
من چتفو مني الادين
الابنيه لو والدهه راح
تكره طعم هاي الحياة
وين ابوي وين ابوي وين ابوي
امنيات
ــــــــــــــــــــــــــــــــــــــ
الناگه التتعثر خاف اتوگعني
ومن اوگع ادري الحادي ايضيعني
احبال الـمربوطه بچفي اتلوعني
وامتوني أمن الطگ كلش توجعني
عالروس انه انظر .. چنهم اهلي
شو بيهن واحد .. يتلفتلي
اتعلق بي گلبي .. سترك ياربي
بس لا راس احسين الينظرلي
كلما يضربوني يميل
وادموعه من اصرخ تسيل
نظراته احس بيهن حنان
بي من ابوي اشگد صفات
وين ابوي وين ابوي وين ابوي
امنيات
ــــــــــــــــــــــــــــــــــــــ
ابنيات الكوفه ازغار اشمحلاهن
اتمنيت انه اشگد العب وياهن
بس هنه ابراحه ومحد اذاهن
لاطگهن سوط ولا حر جواهن
ومن صار المغرب .. كلهن راحن
يارقيه وباچر .. نرجع صاحن
كلتلهن باچر .. للشام انسافر
ومن شافن خدي .. الازرگ ناخن
كل وحده ابوهه اوياهه راح
للبيت اخذهه تستراح
ابهاللحظه حنيت الابوي
آ يا هذيچ الذكريات
وين ابوي وين ابوي وين ابوي
امنيات
ــــــــــــــــــــــــــــــــــــــ
وبالشام انختمت اخر ايامي
ومن گد اهاتي ونوحي والامي
غمضت اعيوني وشفته باحلامي
بس شفته امجرح وامبين ضامي
مديت اچفوفي .. بس بحرگه
طفله ومحتاجه .. الهاي الشبگه
وناداني الغالي .. يبنيتي تعالي
وفزيت ورجعت .. نفس الفرگه
تالي ابطشت جابوه ذبيح
ابنص القصر ضليت أصيح
شميته من ثغره وغفيت
واعله النحر كل حلمي مات
وين ابوي وين ابوي وين ابوي
أمنيات
محمد الجماسي
#اللهم_عجل_لوليك_الفرج
#تراث
زينب يـالتنشدوني عليها
زينب بالخرابه منزليها
ياهند اشتنشدين...... وانه الجنت زينب
ــــــــــــــــــــــــــــــــــــــ
بالله ياهند ارد انشدچ صدّي ليّه وجاوليني
ليش غيرني زماني وليش كون تضيعيني
راح يوم الچنت زينب بيه وإنتِ التخدميني
وراح الدلال البيه عشت
وإنصبت بالطف إنصبت
إشچنتي ياهند وشچنت
واصبحت ماتعرفيني
هم يخطر إبالچ ياهند چان
زينب تنسبي وتوگف بديوان
آنه واليسر وين... وانه الجنت زينب
ــــــــــــــــــــــــــــــــــــــ
هند من عالكرسي طاحت وصرخت والگلب يلهب
ليش متغيره رسومچ يالعلي والله يزينب
وين البيوت المزهره راحت والخدر المرتب
الله الله شجره
بهلچ وحالچ غيره
صاحت وديعة حيدره
ماعلى المحتوم معتب
دهري هدّم بيوتي عليّه
وتدرين شعفت بالغاضريه
عفت أهلي مطاعين.... وانه الجنت زينب
ــــــــــــــــــــــــــــــــــــــ
شلون صدّت فزع صدّت هند تصرخ يالعقيلة
ليش مـا تنشف عيونچ وليش حسراتچ تجيله
وين ذاك الخدر راح وين ابوفاضل چفيله
صاحت بصوت الفاجعه
عباس ظل عالمشرعه
ومنه الچفوف مگطعه
وهدّمت لحسين حيله
يوم الچان ابوفـاضل وجوده
سالم والعلم ملتزم جوده
من چانت الچفين.....وانه الجنت زينب
ــــــــــــــــــــــــــــــــــــــ
ياهند گطّعت گلبي غربتي بشفرة الونه
ضمدي جروح البچبدي ولا تنشديني اعله اهلنا
ومادريتي شلون نزله بكربله يوم النزلنه
صعدت صواويـن الإبه
وخدور بيها مرتبه
بسيوف أهلها محجبه
والفلك گطبه بنزلنه
ويدير الفلك گطب الفراسه
والعباس فاروق الحراسه
وبذيچ الصواوين.... وانه الجنت زينب
ــــــــــــــــــــــــــــــــــــــ
آخ يبيوت المزهره وآه يابدور المضيه
گبل ماچانت ضحايه جسومهم فوگ الوطيه
مغسله بدم الشهاده مچفنه بثوب الحميه
چانت حياتي مأمنه
وحرّاس بيتي معينه
وماچنت هيچ مدوهنه
ودوهنتني الغاضريه
ومن چانت صناديد الرساله
تنهى وتامر بسبف العداله
ومن حي چان الحسين.....وانه الجنت زينب
ـــــــــــــــــــــــــــــــــــــ
ياهند وانـصاب گلبي بطبره من طبرات الأكبر
آه ياجمرة شبابه بالگلب لساعه تسعر
گبال عيني ومن اشوفه ضلع من جسمي يتكسر
وهـدمت حيلي كربله
وگيدت عليل بسلسله
وفجر عيوني حرمله
من وريد الطفل فجر
وبحبال اليسر زرني زماني
وسهم العلگمـي صكني وعماني
وطفي شمعة العين.... وانه الجنت زينب
ــــــــــــــــــــــــــــــــــــــ
ياهند شحمل بعيني ويه سيل الدمع ساجم
حمر ويخضّب چفوفي مثل حنة عرس جاسم
زفته وحسرة شبابه جمر بگلوب الفواطم
ياهند يكفيچ اليسر
وجرعت بالكوفه الصبر
والشام أصعب كل أمر
أچفي ظالم وأجي الظالم
وظهري بالرماح مكسرينه
ومتني بالسياط موسمينه
وهذا على الدهر دين.....وانه الجنت زينب
الشاعر المرحوم
كاظم المنظور الكربلائي
#اللهم_عجل_لوليك_الفرج
شور للسبي
آ يخويه. يابو فاضل. آيخويه
……
من اجيتك خايفه وترجف اديه
نام حارسهم واخاف يفز عليه
هاي اول مره اطلع تدري بيه
بيه مابيه وصلتك للخويه
آ يخويه. يابو فاضل. آيخويه
…….
خويه تدري بعون ابنهه عثرت اختك
ولاوجعني وليدي بس توجع فركتك
من عمت عيني وصلتك ماعرفتك
دنيا ليل وانته وسهامك حضنتك
آ يخويه. يابو فاضل. آيخويه
……..
يالحنين الما يگصر ويه اخته
آنه اول تالي اسولف وانته سكته
كل نعي الفكدت اخوهه اني كلته
ياخسارتنه الجبيره خويه انته
آ يخويه. يابو فاضل. آيخويه
…….
چفك الدللني عاتبته اعله وضعي
والله تعبانه وردت يمسحلي دمعي
واحچي شلعان الگلب واشكيله وضعي
من السبي يرجف دليلي جوه ضلعي
آ يخويه. يابو فاضل. آيخويه
……..
جابو الماي الوكع لجله علمنه
انه وسكينه بچينه وماشربنه
والله دنيا المو بشر توصل ضعنّه
تدري من المستحه چم موته متنه
آ يخويه. يابو فاضل. آيخويه
………
خويه مبري الذمه ما كصرت ادري
ومدري بخلافك اكضّي شلون عمري
رايحه ودرب السبي يكسرلي ظهري
في امان الله اعوفنك يذخري
آ يخويه. يابو فاضل. آيخويه
……..
الشاعر حسين صادق العقابي
عن مقتلك عَشر سنين .. مَرّت وزينب كِل حين
تبچي اغيابك
يالمجتبه وبذكراك .. بوسط الخرايب تنعاك
وتحيي امصابك
∞∞∞ ∞∞∞ ∞∞∞ ∞∞∞
بعد ما دفنت رقيه والگلب منهه انفطر
وگِضَن من مجلس عزاهه وشِكَن هَمهن للنحَر
بِدَت تعزيّه جديده ليوم سابع من صَفَر
لـ اللَطم آثار سوّن وبيهن من السوط اثَر
تنادي بگلبهه المالوم .. آ يالحسَن يا مسموم
بگلبي اصوابَك
يالمجتبه وبذكراك .. بوسط الخَرايب تنعاك
وتحيي امصابك
∞∞∞ ∞∞∞ ∞∞∞ ∞∞∞
ويّه راس حسين تِحچي وراس حمّاي الضَعَن
شلون اگله البقه براسه الراسه فصلو عالبدن
عظم الباري اجركم يخوتي بيوم الحسن
بمثل هذه اليوم اخونه بغرقد الآه اندفن
اختك وابد ما تنساك .. تتذكر ارباهه اوياك
تحن لترابك
يالمجتبه وبذكراك .. بوسط الخرايب تنعاك
وتحيي امصابك
∞∞∞ ∞∞∞ ∞∞∞ ∞∞∞
وي راس القاسم ابنك تحچي مخنوگة نفِس
اليوم سبعه بصَفَر عمّه وتذكر شصار بأمِس
امس حرموك من ابوك و هسه حرموك العرس
وذِبل لونك يا وسافه بتُرب وبدَم وشمس
تواسي الحسين وجسّام .. وكل بني هاشم الاكرام
وكل احبابك
يالمجتبه وبذكراك .. بوسط الخرايب تنعاك
وتحيي امصابك
∞∞∞ ∞∞∞ ∞∞∞ ∞∞∞
للحَرَم صدّت ونادت بالدموع اللاهِبه
گومن نواسيهه رَمله على امصاب المُجتبه
لا إبن لا والي ظلّت باليسر متعذبه
بين كوفه وشام تمشي وراس ابنهه تعاتبه
عفتوني لا خِل لا بيت .. انتّ وكريم اهل البيت
شنَفعَه إعتابك
يالمجتبه وبذكراك .. بوسط الخرايب تنعاك
وتحيي امصابك
∞∞∞ ∞∞∞ ∞∞∞ ∞∞∞
ها يخويه يبو محمد بالخرابه اتذّكّرِت
من اجيتك بالمنيه وعنّي ضمّيت الطشِت
بطشِت هذا راس اخويه شُوف خافن ما شفِت
وعالرماح اهلي واشوفن غالي كل صوب التفِت
بمذبح حبيبي اتعنيت .. وبنحري گتله ياريت
دم خضابك
يالمجتبه وبذكراك .. بوسط الخرايب تنعاك
وتحيي امصابك
∞∞∞ ∞∞∞ ∞∞∞ ∞∞∞
حسين ظل يالحسن وَحْده وچان حيل بعازتك
يحشّم بهَل من مُناصر وصحبك وكل اخوتك
موذرين اعله الوطيه ونار حرگو خيمتك
وخوف نِص الهيمه ركضن فُرجه صارت عيلتك
الما شافو الهن اخيال .. يتعثرن بين ارجال
هَم بحسابك
يالمجتبه وبذكراك .. بوسط الخرايب تنعاك
وتحيي امصابك
∞∞∞ ∞∞∞ ∞∞∞ ∞∞∞
من بعيد بكل شجوني للبقيع ابعث سلام
من عذاب الشام اوّدي اشواگ ودموع هيام
راح ارِد للغاضريه شگد اكو بصدري كلام
اربعين من الليالي امرافگه اولاد الحرام
راح اشتكي للخوّان .. وامنيتي اوصلّك چان
واشكي ابابك
يالمجتبه وبذكراك .. بوسط الخرايب تنعاك
وتحيي امصابك
∞∞∞ ∞∞∞ ∞∞∞ ∞∞∞
ياسر حسن
صفر ¹⁴⁴⁵
منير القريشي
حَضـرن عبــايــات اليســر
كريم الحاج فليح
ونسألكم الدُعاء
حَضـرن عبــايــات اليِّسـر يـالــفــاطميـــات
بـاﭽـر علـى هَتـك الخِــدر تبـﭽـي السموات
الـﭽـانـت عَـزيـزه أمـدللـــه ** بــاﭽـــر سبيَّـــة كـــربلــــه
يـالـفـاطميــات .. يـالـفـاطميــات
ـــــــــــــــــــــــــــــ
بـاﭽـر يبـاﭽـر لـــو يطـــر فَجـــره وصبــاحــه
بـاﭽـر ألـــم بـاﭽـر حِـــــزن بـاﭽـر منـــاحـــه
بـاﭽـر كلبـﭽـــن يمتلـــي أبهمـــــه وجــراحـــه
بـاﭽـر وداعــــاً للــــدلال ومــاكــــو راحـــــــه
بــاﭽــر تنــامَـــن عـالتــرب يـالــفــاطميــات
وأعلــه النشـوفـه بـالغُــرب تبـجـي السمـوات
وكــل وحـده مـن الـعـايلــه *** بــاﭽـــر سبيَّـــة كـــربلــــه
يـالـفـاطميــات .. يـالـفـاطميــات
ــــــــــــــــــــــــــــــــــ
كــل وحـده بـاﭽــر لــو وكــع دامــي ولـيهـا
كـل وحـده واجـب عـدهـا وأتـأدي العليهــــا
وحـده تحـامـي السكنـه وأتكضهـا أمنـديهـــا
وحــده الــرُقيــه أتِسَكــن النــوح وبـﭽيهـــا
أحمــن بنــات أبــن النبــي يـالــفــاطميــات
ولمــن تعثــرن بـالعبـــي تبـﭽـي السمـوات
ويَّ الــــدمــوع الــهــاملـــه *** بــاﭽـــر سبيَّـــة كـــربلــــه
يـالـفـاطميــات .. يـالـفـاطميــات
ــــــــــــــــــــــــــــــــــ
بـاﭽـر علـى الـرمضــه لَــوَن يـوﮔـع ولينــه
بـاﭽــر يحــرﮔــون الخيــم كلهـــن علينــــه
وأمنـالســـياط أمتــونَّــــه أتـــورّم وأدينــــه
بـاﭽــر يسلبـونــه العِــده والحسـره بينــــه
بـاﭽــر أذا صـب مـدمعـي يـالــفــاطميــات
أنعـــن وخلـــن بـالنعـــي تبـﭽـي السمـوات
ولـو شفتــن أيـدي أمـﮕبلـــه *** بــاﭽـــر سبيَّـــة كـــربلــــه
يـالـفـاطميــات .. يـالـفـاطميــات
ــــــــــــــــــــــــــــــــــ
بـاﭽــر أذا خَلصـــوا جَتِـــــل بـاجــر زلمنــــه
ننســه الــــدلال وللسَبـــي خَنشـــد حــزمنــــه
بـاﭽــر تحضـــرن للهظـــم بـاﭽــر يســرنــــه
بـاﭽــر تــره شـوك الفلــه يــاكــل جــدمنـــــه
تبـﭽينـــه بـاﭽــر فــــاطمــه يـالــفــاطميــات
ﭽيـف الجِــدم ينـزف دِمــه تبـﭽـي السمـوات
أبيـا شِــده أحنـه ومعضلــه *** بــاﭽـــر سبيَّـــة كـــربلــــه
يـالـفـاطميــات .. يـالـفـاطميــات
بــاﭽــر رِدت منـﭽــــن لَــون تمشـــن سبيـــات
لا تمشـــن أبـــذلــــه أبـــد مشيـــي الأسيـــرات
رغــم العبــي لمحَــرِﮔــه وحَــرﮒ الجـــابـــات
مثــل أمـﭽـن أمشـن فــاطمـه مشـي الأميـرات
ضمـن حـزنـﭽـن بـالــﮕلــب يـالــفــاطميــات
وأعلينـه كــل ذاك الــدَرب تبـﭽـي السمـوات
حملــن حـديـــد السلسلـــــه *** بــاﭽـــر سبيَّـــة كـــربلــــه
يـالـفـاطميــات .. يـالـفـاطميــات
ــــــــــــــــــــــــــــــــــ
بـاﭽـر علـي أظهـور الهــزل بـالـغـاضـريـــه
وأبــلا وطــه نــركــب تــره آ يـالــرزيــــــه
ونمـر علـى حســين السبــط روح الــزﭽيــه
نشـوفـه تخضـب بـالــدِمــه فـوﮒ الــوطيــه
ونشــاهـــد أبـﭽبــده السَهَـــم يـالــفــاطميـات
ولـو ننظـر الـراعـي العَلَـم تبـﭽـي السموات
صعبــه عَلَـــي هـالمسـألـــه *** بــاﭽـــر سبيَّـــة
مقدمة ليلة ام البنين ع
.
.
.
الفاگدله محبوب .. لـو صـار الغـروب
گلـبه تـره يذوب
مـن گــد الفراگ
---------------------------------
المامچــوايين مـثلي ومــا امتــانين
بطـلي نـوحچ كافـي گــالو لاتــونين
امن الدرب موكافي وگفه يم البنين
ذوله حقــهم نــار گلــبي مامجربين
والعنده محجوب .. لــوصار الـغروب
گلبه تره ايذوب
مــن گــد الفراگ
----------------------------------
زارعه اعيوني اعـله درب الغاضريه
ونار فگد احسيـن چنهـا اتچوي بيه
اوف من يلفــيني وكــت المــغـربيه
انه احس حـته النفس يصعب عليه
البالحسره مصحوب .. لو صــار الغــروب
گلبه تره ايذوب
مـن گـــد الفراگ
---------------------------------
اليشــبه ام الاربـعـــه بدمــوع خــده
خـل يحضـرله چـفن هسه اعـله گده
المنــجـرح دلالــه دلالــه اشـــيــشده
وگلبي هجر حسـين كل ساعه يمرده
والمثلي محسوب .. لــو صار الـغـروب
گلبه تـره يذوب
مـن گــد الفراگ
----------------------------------
المثلي الله ايساعده الـفاگدلـه غالي
من يصبره وعـاميه اعـيونه اللــيالي
البيه سامع عالحچي ون اعله حالي
المابچه كل عمره طگ گلبه وبچالي
والحزنه مكتوب .. لــو صار الغـروب
گلبه تره يذوب
من گــد الفراگ
----------------------------------
اتراب طييه ابكثر ماحس ابحنيني
ظل يـون اوياي چــيه يسمع ونيني
الــناس ظــنها امتـانيه اربــع بنيني
وانه كــل همــي ابو اليــمه يجـيني
والعمره مسلوب .. لو صار الغروب
گلبه تره يذوب
من گــد الفراگ
----------------------------------
حسـين عني بعيــد وگريبــه المنيه
خاف تـبقه بــشوگه نيــراني سريه
نــاذرتــله والله مــن يــرجــع الــيه
روحي اطشنها اعله جدمه واهليه
الگاعد بالدروب .. لو صـار الغروب
گلبه تره يذوب
من گـد الفراگ
----------------------------------
خادم الحسين ع
حيدر تركي الكربلائي
تـخـلـص حياتي ومن حياتك أبدي
يا خــيــر مــن مُـدَّت إلـيـه الأيـدي
وبصحره لو وحدي گلت مو وحدي
اقـرب الـيّـه مــن الـوريـد الـعـنـدي
انت الحسين انت الزمن
وعـيـونـي لـو يمّك غفن
مـعـنـاها الي حبك وطن
واغفه اعله باب احدودك
انـت الامـان انت العشگ
لولاك امس ضاع الصدگ
خـلّـيـنـه ابـد مـانـفـتـرگ
وانطيني چف من جودك
====================
بـس انـت ياجـرح الـسـنين بگلبي
خلّاني جرحك أبچي وأعرف ربّي
يـحـسـيـن مـافـكّـر اعـوفـن دربـي
وين الگه حب بالدنيه يشبه حبي
يارحـمتي وباب الضوه
كـل الـعـشگ من نينوى
جرحك مثل طبع الدوه
عكس الجروح ايشافي
مــنــك ارد بــهــيـبـتـي
من طيبتك كل طيبتي
اتـعـنّـه لـيـك بـشـيـبتي
ولجرحك اركض حافي
===================
ياخـيـر مـن تـبـكـي عـليهِ المِـلّة
شـمـا ادنـگ بـدربـك ابـد مو ذلّة
يحـسـيـن دمعي بمجلسك ماملّه
المايبچي لاجلك بالعواطف شلّه
يادمعي صب هذا الجرح
كـون الدمـع لـون الـذبـح
ريـت الگـلب فوگ الرمح
مــا يــبــرد اولا ســاعــة
يحسين اخذ ماي النظر
بلـكـي وتـرد عيـن الگمر
وماينحني بطـولك ظهر
ومــا تـنـكـسـر بـوداعــه
=====================
اتـمـنّى يـم بـابـك يـغمّض جفني
واتـمـنّـى رايـة مـن اموت اتلفني
خـايـف اجـيـك وانـت مـاتعرفني
وتطلع خدمتي لنفسي ماشايفني
خايف اجي بيوم الحشر
مـا الـگـه لـدمـوعـي أجر
مـا نـلـتـقي وعـندك عذر
چـانـت خـدمتي لروحي
اتـمـنّـى مـنّـك يـاهـلـة
وبگبري اعرف الأسئلة
گِـلـهـم خـدمني بكربلة
شاب وتلچمه اجروحي
====================
يـاخـيـر مـن يُـعـطـي بلا مـنّـيّة
بلون النوارس خلّي عندي النيّة
جـيـتـك حـيـاتـي ذابلة ومحنيّة
واسـتـقـبلتني وگتلي إخذ حنيّة
گِـتـلـي هـذاكـه مأتمي
إخـلـع وقـارك وإنـتمي
وبدمعك إدخل عالمي
فـاز الـيـطـب بدموعه
آنـه الإجـيـت مـن الـعدم
يـحـسـيـن ماخذني الندم
تحسبني ريت من الخدم
والــوادم الــمــفــجــوعــة
=======================
يـاخــيــر مــن رُدّت إلــيــه الــوادم
ردني اعله جرحك بيّة كسرة ونادم
آنـه ودمـعـتـي وگـلـبـي للطف قادم
عـنـدي شـكـبـرهـا من اصيرن خادم
ردني لخيامك منچوي
بدمعاتي لاجلك أرتوي
للمِـثـلـي گلبك يحتوي
مـحـد حِمَل بس گلبك
مـاريـد اعـوفـك ياوفه
الـيـمّـك يـحـدِّد مـوقفه
من عابسك ياخذ صفة
ايعـيش ويموت بدربك
=====================
محمد جبر الدراجي
تسألن عالگمـر وين وتجاوب دمعة العين
اذا رد محني الحسين
گولن مـــات عبــاس
***
اختصارن للحچي والنوح والدمعات
اختصارن للمأسي الجايه واللچـمات
اذا مـــارد ابو فــاضــــل يعـــلويات
يعنــي انتــن البعد شـــوية مــسبيات
والماعدها كفال يگيدوها بالحبال
الماشافولها اخـيال
راح تشوفها الناس
***
لون لحسين اجـانه محمل بضيمه
وعينه تگول غيمه وتمطر الغيمه
اذا جــر العمود وطاحت الخــيمه
يعنـي تحضرنه للشــرده بالـهيمه
ابوفاضــل اذا غـاب كلشي يصير سلاب
احسبن هذا الحساب
ضعنه بلايه حراس
***
اذا لازم كفــاه رد لينه أبو سكينه
يعنـي انگـطعت العباس چـــفينه
يعني الجــيش بعـد الظهر يولينه
واخـــونه لايهـــد ولا يحـــامينه
اشيجيبه الصدره مخسوف ومفرهدته السيوف
لا بي شوف ويشوف
منه نكطع الياس
***
يعلويات خـــل بالخيـمه نتـــنطر
بلكي ويــرد سالم ويـه ابوالاكبر
حسين اعله الشريعه كـلش تأخر
بس لا ابــوفاضل كــافلي اتوذر
اذا عبــاس مذبوح يعني للسبي نروح
السيــاط امتونها تلوح
التمشي ويه الارجاس
***
هــذاك حسين اجانه لكن اشحاله
يمكــن عالــشريعه عــاف دلاله
امبـــين منكـسر وعيونه هــماله
عگـب عباس ياهو الـذي يبراله
الماله اليوم خوان تتـــولاه العـدوان
ويوگع علـــى التربان
ويگطعله الشمر راس
***
حيدر تركي الكربلائي
يا أم البنين
(أيحرك الباب الريح)
أيـحـرك الباب الريـح والـگلـب يفرح ويصيح
ميّة هلا ابـجـيـتهـم
ميّة هلا ابـجيــتهـم
*---------------------*-----------------*
طـال الهجـر وأنـه أنـتـظـر وبعيني دمعه
صوتِ اعتله مـيّـــة هــــلا ومحد يسمعه
صـبـري ذبـل وأزرع امــــل مـا بيّة فجعه
مـــن الـبُـعـد شـمـل الـولـد يـاربـي رجعـه
احبابي بلكي ايسمعون
هذا الحچي والمضمون
*---------------*---------------*
عـمري شمع يخلص دمـع يـــدرون هُـمـه
أفـرك بِــدَي شـحت عَلّـي كـلـمـة يـيُـمــه
بحكم القدر گـلبـي انكسر وسنيني ظلمه
حــگـي أوّن نـار الــحــزن شـلـون أكظمه
ما شافت اعيوني النوم
مشتـاگـة أگـولـن هاليوم
*-----------------*---------------*
جرحي نزف كلشي اختلف والـهـم حملته
ما صح شفه بلحظه اختفه التعبِ التعبته
قاسي الزمن غـاب الظـعـن وشگد نطرته
هُـمـه الـدوه حـتـى الـهـوه مـسلـوبـه لـذتـه
بـس المناحه امخلين
اتــمنـه أنـادي الطيبين
*-----------------*--------------*
يلفي الـغرب وآنه اقترب من المنيه
لـمـن مشـوا مني خـذوا اخر وصيّه
دمـعـاتي دم يـهـل الشيم ردوا علـيـه
جفني انجرح فكري سرح والبـيـه بـيـه
ما ادري بحبابي اشصار
اصفن واصيحن بـالـدار
*---------------*-------------*
دمعي أيهلي ومـحــد ألــي وحشه المدينه
عفت العـتب وادري السبب ابـقـه حـزينـه
إلـهـم نـحـت واسمع گِـلـت كـلمـة اجـينـه
اتضل صابره وتنسه الجره روحي الحنينه
اتأمـل الفـرحه اتـعـود
وبالجيّه أنزعهه السود
*-----------------*--------------*
انسه الحزن ريت اندفن والموت أريـده
اشبع بچي ونفس الحچي بـالـليل أعيـده
لا مـو سهل جفني يـهـل واصبح وحيده
اشضل بعد ولـدي السند عـنهـم بـعيـده
تركوا صورهم علبال
وأيردد الساني وگال
*----------------------*----------------*
✍خـادم ام البنين (ع)
الشاعر رعد الجريخي
السيدة زينب و ابا الفضل عليهما السلام ...
ســــــــلامـــــــــــــــات
على چفوفـك والانفـاس
على عيونك على الراس
علـى طـــولك يعبـــاس
ســــــــلامـــــــــــــــات
–·––·––·––·––·––·––·–
چفوفك يعِزي وهيبتي ياما سگن چبدي و روَن
باچر يموتنه الضمه لو عالنهر يتگطعن
ويا چف يحامينه بعد اخلافك يحماي الضعن
اتذكرت لمن چان ابونه يگعدك
باحضانه وتقبل شفافه بزندك
وگلي بجناحين الله راح يزودك
حــــــــــرامــــــــــــــات
اعيش آنه اعله هالحال
بحياه ما بيهه كفال
وانه الما بان الي خيال
حــــــــــرامــــــــــــــات
–·––·––·––·––·––·––·–
عيونك البيهن اطمئن بشوفتهن انسه كل ألم
بيهن شفت جود ودرع ومحمل عليه يرف علم
ونفس الوكت بيهن شفت دم جامد ونابت سهم
بعطرك اروينه وعوف المسنايه
الجدمك فده يروح الفرات ومايه
گلبي يطيح ولا تطيح الرايه
العطــــــش مــــــــات
بعد ما نعطش الماي
الك بس اشعر ضماي
العذب دون الاخو داي
العطــــــش مــــــــات
–·––·––·––·––·––·––·–
عباس گل لام الخدر خل انتوادع يالاخت
ابريني الذمه اذا وياچ لحضه قصرت
يا زينب انتي اتكفلي بالخدر لو عنچ غبت
ثمانين طفله وطفل لتضيعيهم
ولو بسمي صاحو صِبري وصبريهم
ولو ماي صح ماتو عطش رويهم
اعــــتـــــــــذارات
عتبچن يغلي ناري
بله ايميني ويساري
اقبلن اعتذاري
اعــــتـــــــــذارات
–––·––·––·––·––·––·–
لو بالعمد راسي انخسف وعالگاع طحت من المهر
عينچ على حسين الذي ظهره بغيابي ينكسر
لا تعتنون المصرعي خايف گلبكم ينفطر
كل خوفي يا زينب أنه كل خوفي
تشوفين راسي وناظري وتشوفي
استقبلت گاعي بصدري مو بچفوفي
مــــــــــعـــــانــــــــــاة
طريق المشرعه ايكون
الشماته بي يهوسون
اعله مشيتكم يضحكون
مــــــــــعـــــانــــــــــاة
–·––·––·––·––·––·––·–
باچر يجيبون الهزل وبحسره اصد للعلگمي
واتخيلك تثني الركب وتگعد اباب مخيمي
وتگلي يا سيدتي ركبي اعله چف الهاشمي
عفت الخيال و واقع ارد احچيهه
يصعدونه اجانب غداً تعلم بيهه
ولو موت اگلهم ابد ما سويهه
عبـــــــــــــارات
ثگيله يسمعوني
بعد ويشتموني
الاسيره يلقبوني
عبـــــــــــــارات
–·––·––·––·––·––·––·–
مذبوح اخوهه اعله النهر والحادي مر عالمشرعه
عمدا يعذبهن نوه وما وگف لاجل اموادعه
من الهزيله سلّمن وگلوبهن متصدعه
اعتذرت اسكينه بدمعة الحيرانه
وگالتله لو ادري النهر ينهانه
چا ما گلتلك عمي أنه عطشانه
الزمــــــن فـــــــــات
ومشينه اويه الذبحكم
وتبعتونه برمحكم
وكبر بينه جرحكم
الزمــــــن فـــــــــات
–·––·––·––·––·––·––·–
ياسر حسن
محرم ¹⁴⁴⁵
☆☆☆☆
كلمات والحان
مهدي التقي
والشاعر سيد علي الموسوي
༺༺༺༻༻༻
༺༺༻༻
༺༻
الخادم منير القريشي
للاربعين
.
.
.
عطشانه اهـواي .. بـس مـو للـماي
الوجهك يحسين
عطـشانه اهـواي
_____________
صــار اچــم يـوم امفـارگني
وخدي امن المدمع يحرگني
اســئــل عــنــك يـامـاي الله
يـالوجــهـك چـان امــغرگني
محــروگــه ابــدلالي الـخيمه
وگـلــي اســئل عـنك ياغيمه
يـامــاي اعيــوني الشـيــلمك
يـالمــتبدي بحظــن الـهــيمه
اشتاگت عيناي .. بـس مـو للـماي
الوجهك يحسين
عطـشانه اهـواي
_____________
ميته امن الشوگ امخليني
مـن عذبك يمــته اتـرويني
حارگني افــراگـك حارگني
ومحـد ياخــويه ايطـفيني
شمـات اهــواي الـشـافوني
وعنـك كـل ساع ايسئلوني
يابس حسيته امن اغيابك
يابو اليمه السان اعيــوني
ثــق يارجـواي .. بـس مـو للـماي
الوجهك يحسين
عطـشانه اهـواي
_____________
احتاجيتك بــدروب الــغربه
چــتالــك من مـتنـي ايظربه
دورت اعــلــيـك ابأشــيــائي
المــاضلت منهن بــس تــربه
سلبـوهن كـلهــن مــن عنـدي
وضلت بس دمـعاتي ابخدي
اشعر كل دمعه امـن افـراگك
يمـكن يابــو اليــمــه ابگــدي
احچـيلك هاي .. بس مو للماي
الوجهك يحسين
عطشانه اهواي
_____________
بحچايـاتــك جــاي اتــذكر
وافـرك بچفـوفي واتحـسر
من سمعت حسراتي الناگه
شـو گامـت تمشي وتتـعثر
شــوگك موتنــي وتدريني
راح اغـفـه وبلـكت تلفـيني
اول مــاغمــضت اعــيوني
لن سوط ابمـتني ايوعيني
هـمــي وبلـواي .. بـس مـو للـماي
الوجهك يحسين
عطـشانه اهـواي
_____________
اشتاگيــتك ياروحــي وعــمري
وشوگك مدري اشسوه بصدري
اعلــه افــراگـك لا مـامتــعـوده
وكلــش زيــن ابـزيــنب تــدري
ابهجـرك مــدري اشـصاير بــيه
اختــك بخـــلافــــك مــعـــميه
مــن يـوم الشـفــتك عالغـــبـره
اتطــشــر وانـــلـــم يــــومـــيه
ملهوفه اعظاي .. بـس مـو للـماي
الوجهك يحسين
عطـشانه اهـواي
_____________
تعــبنـــي افراگــك تـعــبني
شمـعه وهجــرانـك ذوبــني
احلــم ترجع واگـعـد والـگه
راس گــدامــي ايــعـــذبـني
راسك من ابـچي ايضــمونه
ومن اسكت همه ايطــلعونه
ماكفــاهـم جــرح امــتوني
رادو دلالـــي ايجـــرحــونه
نوحي ومبچاي .. بـس مـو للـماي
الوجهك يحسين
عطـشانه اهـواي
_____________
تمت والحمد لله
حيدر تركي الكربلائ
للاربعين
.
.
.
هاج الحنين بروحي .. سولفلي يامذبوحي
احچيلي عن جرح الرمح
وانه احچي عن اجروحي
----------------------------
يالنابت ابـراسك رمـح .. شلونك يبعـد اعيوني
لونك احسه امن التعب .. يشبه امن الحر لوني
متاذي گلي امن الرمح .. لومن حچي الگادوني
بعيونك الذبلانه احس .. نظـرة الـــم لمتـــوني
كل هذا وتحس بيه .. يالمــنترس حــنيه
گلــبك اليه منفتح
وانه احچي عن اجروحي
-----------------
البيه وحقك مو جرح .. واحــد ولاهـــن مـيه
الف وتسع ميــه الذي .. يحــسين صـارن بـيه
بالرايه مأساتي بـدت .. مــن طاحــت الحـنيه
ونختمت ابشام الحزن .. من غفت عين ارقيه
ابنــادم المايحــملـــهن .. طاحن على اختك كلهن
وحدتهن اتگول الملح
وانه احچي عن اجروحي
-----------------
خويه الشفتهن بالدرب .. ماينحچن يالغالي
ياهي الاسولـفها الك .. وياهي التضل ابالي
زينب يبو اليمه تطب .. ديــــوان اول تـالي
وتصور ابنــص الزلم .. حرمـه بلايـــه والي
ثق مقتلك حسيته .. الديون من طبيته
واستوعبتها منذبح
وانه احچي عن اجروحي
-------------------
رمحــك يـخويه بالارض .. لو گعـــدو اينبتــونه
ايذبحوني كل ما ريضو .. راسك امن ايحركونه
چم مره من عدهم وگع .. ياخــويه ويــشـيلونه
يتعـــمدون ابهالـــفعل .. گلب اختك ايحرگونه
شحچيلك وشحچيلك .. ومن ياهي خويه اشكيلك
والصار لاماينصلح
وانه احچي عن اجروحي
-----------------
كلما اســولف عالسبي .. ابصدري الحچي يتكسر
وليش الملامــح يالاخــو .. ابوجهك احس تتغير
بس وحده اسولفها وبعد .. ما احچي يابو الاكبر
خــويه خــذوني للســـبي .. بنــاگه تــگوم وتعـثر
كل ماتهل اعيوني .. ايضربوها ويضربوني
لاليلي ليل اولا صبح
وانه احچي عن اجروحي
_
حيدر تركي الكربلائي
لمولاي الامام الحسن المجتبى ع
مشتاگه الاعيون بلكت يردون
الما أنسه عشرتهم طـولت سفرتهم
بلكت يردون
ــــــــــــــــــــــــــــــــــــــ
ننتظرهم ولــو نــدري مـايجــونه
بالليالي شــمــوع نشعل عـودونه
جدنه وآمنه فاطمه وحيدر ابونه
وآخر المشوار راح الغالي اخـونه
گالولي هيهات مايرجع المات
ارضي ابنهايتهم طـولت سفرتهم
بلكت يردون
ــــــــــــــــــــــــــــــــــــــ
المگبـره مـن تاخــذ احــد مــاتــرده
عالرمــل مايرجــع الوســدنه خــده
بالطشت ضـل الحسن ممرود چبده
وباچر الگه احسين عالتربان وحده
الحسن مسموم واحسين مظلوم
الطيبه مــودتــهم طـولـت سفرتهم
بلكت يردون
ــــــــــــــــــــــــــــــــــــــ
ردت اموت اعله الطشت بس موبديه
مـثـل مـا مـاتـت عـلـه المـنـحـر رقيـه
عـود مـتـفـقيـن كـــل احــنــه سـويـه
اربـعـتـنـه انـروح لارض الـغـاضـريــه
بس حُكم الايام مانعرف اشضام
والدنيه غــــدرتهم طـولت سفرتهم
بلكت يردون
ــــــــــــــــــــــــــــــــــــــ
يم ضـريــح الهـادي ماقبلـو نـدفنه
بالـنـبـل يرمـوه مـو مـسـلــم كــانه
هذا نعش الورد ليش انكسر غصنه
نِده وريحة هيـل ضـل ايطيح منه
راعي الكرم شال وگلبوهه الإدلال
وسَـــدّو مضايفهم طـولت سفرتهم
بلكت يردون
ــــــــــــــــــــــــــــــــــــــ
مات بس شيموت الذكره ابگلبنه
ياما ويــاهــم تــقــاسمنه ابتعبنه
عله ارموش العين يادنيه كتبنه
مانصب الدمعه هيه اللي تصبنه
ارحم بالاعزاز ريض يجناز
مو هينه فرگتهم طـولت سفرتهم
بلكت يردون
ــــــــــــــــــــــــــــــــــــــ
گمت اشوف الحسن صوره ابعين جاسم
بــي اشــم ريــحــة اعــزوبيه ومــكــارم
نـاذره وبالــــطــــف اوفــي الــنــذر لازم
كــون احني اچــفــوف عريس الهواشم
واصرخ يمسموم عرس ابنك اليوم
والــحــلــوه لمتهم طـولــت سفرتهم
بلكت يردون
#العبدالحسيني_محمدالجماسي
تمشي واتمر السنيـــــن وزينب ام گلب الحزين
كل سنه اتهيج الـجروح من تمــــــــر الاربعين
................................................................
سنة ماالهه شبيـــه ولامثلهـــــــه
بيهه زينب يثگل اعليهه حملهــه
يوم عشرين ابصفر ردت لهلهه
اكبر من الگاع دمعات التهلهـــه
آه يادرب اليســــــر يشبــــه اسياط الشمر
ومثل حسرة فاطمة حين وصلت للحسين
.............................................................
عمـه يالسجاد وين حسين صاحت
گلهه ذيج اگبور اهلنه وهيه ناحت
ابكثر مامشتاگـة من الناگة طاحت
چن احس روح العقيلة اهناك راحت
تنعة گامت بلشجن وينعه وياهه الضعن
والرباب ابلا شعور اتصيح ياعبدالله وين
...............................................................
حسين گلبه اتفطر ابهاية العزية
يسمع اختة اشلون تنعه الهاشمية
ويلي ماحظرت ابها المجلس رقية
ماإجت بالشام وافتـــهه المنيــــــة
احسن اتموت ابسفر ماتجي وتشبع قهر
راس ابوهه حضنته اتگله كاتلني الحنين
..........................................................
اه يازين العباد اشلون حاير
شاف جابر ينحب ابـنص الــمگابر
گله عن الحال لاتسال يجابر
اهنانه كل اجروحنه وكسر الخواطر
ضل يعددلـه الجروح وجابر ايون وينوح
اهنا عمرنه كله ضاع وانفگد نور المبين
........................................................
يافجيعه المامثلـه اتــصح فجيعـــه
حين راحو يم گبر راعي الشريعه
زينب اتنادي يبو اچفوف الگطيعه
حسرتي أكبر يخويه امن الوسيعــه
سامحتكم يخوتي لكن ابقه ابحسرتــي
للمدينه من اروح اشراح اگل لم الــبنين
..........................................................
سيد علي الموسوي
قصيدة للسبي
ضموني جوه جروحكم خاف. خويه
امشي سبيه وطولي ينشاف. خويه
لا مو بديه . امشي سبيه
....
والله ماظل حيل بيه. الهوه لو يدفعني اطيح
بلا اخو بين الشماته. خويه بعد المن اصيح
هنا رماد هنا جثثكم. وين اكعد واستريح
واسمعت جوه الحوافر. صوت من نحر الذبيح
راح اليكول الچلمه بحساس. زينب
مو حلوه بس بلسان عباس. زينب
بضيم العليه. امشي سبيه
.....
بالچثث كل خطوه اعثر. وعالوجه لن طايحه
چم صلاة الوحشة اصلي. وكل اخوتي مذبحه
كمت ما لحّك يهلنه. اقره آنه الفاتحه
نوّمت آنه رقيه . ولبو فاضل رايحه
شفته وصحتله راسك الحار. وينه
جسمك مغطه سهام وحجار. وينه
بهاي المنيه. امشي سبيه.
........
رايده احچي وياك وانته. بس نحر شابع نبل
يابو فاضل ضمني يمك. حضرو خويه الهزل
كبال راسك همه صاحو. لخته حضرنه الحبل
إلذبح والرمح عدهم. منه مايسلم طفل
تعبانه يابعد اختك هواي. تدري
مشكوله ذمت العطش والماي. تدري
وبلا خويّه. امشي سبيه.
......
حسين تدري شلون اجاني. من طحت يم النهر
بأيد يتوچه اعله سيفه. وخله ايد اعله الظهر
كتله ها يابعد اخيتك. صاحلي مات الكمر
مو ظهر مكسور منه. كل الحسين انكسر
صابغ لحيته الشيب الحسين. ينحب
من كتله ننطي وجوهنه وين. ينحب
عيني جريه. امشي سبيه
.......
الفجر طر وآنه اشوفن. صعد كل راس برمح
اظل المن يابو فاضل. امشي كل خطوه بجرح
عالرماح انظر اخوتي وين ابو الوجه السمح
وهاي قافلة السبايا. انتصارات الذبح
الوجهه اليسومر ابيض يصير. كلبه
الله يذكره حسين بالخير. كلبه
. امشي سبيه
.........
نسألكم الدعاء
حسين صادق العقابي
مقدمة عزاء
.
.
.
زيـنـب ابـگــد مابـچـت لـخـوانـها
شيبت حتى السمه امـن احزانـها
يازينب .. يازينب .. يازينب
___
مـن كـثـر دمـعـات زينـب عالــوجن
شـيدت بـخـدودهــا بـيـت الــحـزن
مـثـل زيـنــب مانـظــن احــد يــون
كربــلـه مــاطـاحـت امــن الـسـانـها
يازينب .. يازينب .. يازينب
___
الدنـيه تـصفن لـو عـلـى زينـب تـمر
وكـل حـزنهـا ماوصـل عـشـر الـعشر
الدمـعه من دمعـات عـيـن ام الخدر
اتـظـعـظع الدنـيه وتـــهـز اركــانــها
يازينب .. يازينب .. يازينب
___
اعيون زيـنب چـانت ابگـد ماتسيل
چــوت ابدمعــاتـها ظــهــر الـهــزيل
وبالاخص من يـنذكر طاري الكفـيل
يـنـفــجر مــن عــينــهــا بــركــانــها
يازينب .. يازينب .. يازينب
___
الشمر چان ابسوطه يظربها اشكثر
وسود خلـه امتـونـها سـوط الشـمر
اتمـنت العـباس ابـو زنــود الـســمر
حـاظـر ويـنـظــر فــعـل عــدوانــها
يازينب .. يازينب .. يازينب
___
سولفــت فــوگ الـهــزل ســالـوفه
انـدار راس حســين چـان اتشوفه
اتــگلـه تقــبل بالحــبـل مچـتــوفه
زينـــب الــچــان الخــدر عنــوانـها
يازينب .. يازينب .. يازينب
___
طالــعه انه اويــاك مـن نـفـس الـعـرگ
واعـدتــنـي وگــتــلــي لا مـانـفــتــرگ
مـن صـحــت ويـنك خيمــنه تحــترگ
مــاشــفـت غــيــر الـــخـيـم دخــانــها
يازينب .. يازينب .. يازينب
___
الفاگده اخوتها عجيبه اتـشـم هوه
هيـه والمــيـت يحـسبــوهــا ســوه
الـزينـب ابـهـا الـحاله يـنـفع يـادوه
اشـيــنــف وذَبــحـو كــل ولـيــانـها
يازينب .. يازينب .. يازينب
___
جــرح عـيــنـي اشــما اســده يـنــفتح
خـويـه كـل مـاشــوف راسـك عالرمح
اسـئل الليـل اعــله زيـنــب والصــبـح
واسـئــل ابــدربـك حــبـــل ذرعــانــها
يازينب .. يازينب .. يازينب
___
الحالي شــفت العدو يبــچي والصديق
اخــتــك الــبــس الــدلال الـهـا يــلـــيق
شـلــون وي ذبـاحك اتخـلص الطــريق
ونـاگـــتي يــاخـويـه بـيــده اعــنـــانها
يازينب .. يازينب .. يازينب
___
حقـها زينـب تبـقــه تـنـعــه ومـاهــدت
اخيول عشره اتـدوس اخـوها شاهدت
الشمـر مــن شــافـتــه هـيــه اتــأكــدت
حــسيــن مـيــرد وزمـــنـــهـا خــانــهـــا
يازينب .. يازينب .. يازينب
___
حيدر تركي الكربلائي
يهدا ثوابها الى روح الشهيد خادم الحسين ع
سيدكريم الموسوي
تنامن لو الي خاطر// وراجن ليلت العاشر
خيمه ماكو من باجر// بويه بويه نامن
=========================
نامن بناتي من وكت _ وتهنن بهل النومه
والساتر الله آمن الصبح _ العاشر يحير يومه
باجر تركضن من عصر _و تتطشرن بالحومه
باجر ابوجن ينذبح _ وتنسلب حتى هدومه
بيه هسه اعزيجن // بعبيجن مااوصيجن
الليل شكد يبجيجن// بويه بويه نامن
=========================
ركضن سوه وكت الحرك _ علويه وي علويه
من هسه اكللجن تره _ ظمن شكو ترجيه
ولو شفتن اخيول العده _ كامن يسحكن بيه
غطن وجهجن بالعبي _ ولا توصل اي ابنيه
الحافر باجر انه ادري // يشيل وياه لحم صدري
بالي يمجن وفكري // بويه بويه نامن
=========================
العدهه ابن غالي الابن _ تحسب بعد متشوفه
والعدهه اخو مثل الكمر _ باجر تضيع اجفوفه
شماتي كلها امنكبه _ شماتي شام وكوفه
نيتهم ايموت الخدر _ بس الله حامي احروفه
يابس ريجي واللساني// ماتو ولدي واخواني
وانه براسي شي ثاني // بويه بويه نامن
=========================
اي وحده لتحاول تجي _ لمن اون تسمعني
تشوفني ازحف للخيم _ بس الشمر يمنعني
تصيحني ووكف منحني _ ثكل الرمح لوعني
بس زينب ارخصهه تجي _ تندل شنو اليوجعني
زينب يابعد روحي // ماينحسبن اجروحي
لحالج ونتي ونوحي // بويه بويه نامن
=========================
باجر اظلن بالشمس _ من تنكطع انفاسي
بس اطئنن بالسبي _ يمشي وياجن راسي
شجاب الدلاال اعله الحبل _ ادري بحبلهم قاسي
تموتن خجل طول الدرب _ شيطيبه جرح احساسي
جاي اتخيل المنظر// سم الله الكل طفل يعثر
سبايه تمشن ابهالبر// بويه بويه نامن
=========================
لهذا السبب نامن كلت _ مادام انه يمجن عدل
باجر بناتي اتحظرن _ ليل اليمرجن مو سهل
عبدالله جيبنه الي _ بيه تعلق هالطفل
شوفنه هذا شكد ترف _ باجر تره هم ينكتل
الله يساعد اكليبي // من هسه وكثر شيبي
يروحي من الهظم غيبي// بويه بويه نامن
=========================
تمت _ علاء الزيدي
منير القريشي:
🍁الطفل الرضيع ع🍁
يا سلام الله يمه عبد الله
يا سهم لا يكعد ابني نايم اسم الله
.................................................................
يا سوالف ماي يـلطولك نـهر
يمه ناطرتك شهر يـتبع شهر
كلت تكبر يلولد توفي السـهر
ما دريــت يخونا بســاع القدر
وينك اوين الطفوف العين غمضها شتشوف؟
بالكلـــب عله يمه عبد الله
يا سهم لا يكعد ابني نايم اسم الله
ابني وجه النور وربــــات الضوى
عمره ست شمات ما شـــابع هوى
يــشبه العباس هم شايــــــــل لوى
وفى ويــــا حسيــن وابدا ما روى
ضحى روحه لوالده شافه بالطف وحده
كلشـــي ما خلى يمه عبد الله
يا سهم لا يكعد ابني نايم اسم الله
يبني الله وياك يـــــــاهو الظل الي
يــــــمه جنت اتمنى تصبـح كافلي
مـن رحت حسيـــت راحو كل هلي
وما بقت بلساني بس جلمة علــي
يا علي ردلي الرضيع انا امه بدونه اضيع
دنيا بس ذله يمه عبد الله
يا سهم لا يكعد ابني نايم اسم الله
يـــــاسهم بله على كيــفك هونـك
غيـــــــر تـــــعرف المن يودونك ؟
كبل لا توصلــــــــــــه كله شلونك
ابني ما يــــــــحمل شرار عيـونك
لطفلي لا تكرب ابد آه يا فكد الولد
سهمه يندله يمه عبد الله
يا سهم لا يكعد ابني نايم اسم الله
من تردلي بحظن ابــــوك وغافــــي
ورغم دمك وجهك شـــكد صافـــــي
يا كبر لوليله ميــــــــــــت دافــــــي
الكمر يـطفى اوجهه لا ما طافــــــي
ريت بعدك لا عشت ومن شفت نحرك متت
في امان الله يمه عبد الله
يا سهم لا يكعد ابني نايم اسم الله
☘لخادم الحسيــــــــــــن
رعــــد الفريجي
عشق وخدمة
احسين يامن مجلسك رباني
الناس عالم وانته عالم ثاني
ــــــــــــــــــــــــــــــــــــــ
ياعجيب الاوجدتني أمن العدم
ياوحيد وعندك آلاف الخدم
ياغريب وعالرمح راسك علم
اشكر الله الخدمتك أهداني
ــــــــــــــــــــــــــــــــــــــ
عالـمك يحسين عالم كله نور
ومجلسك راحه وشفاءاً الصدور
وين ماتندار وي شمسك ندور
كلهه تطفه واسمك النوراني
ــــــــــــــــــــــــــــــــــــــ
من عرفتك صارلي اهواي اهتمام
بين اهلي واصدقائي والعمام
اكتب اسمك عله اعيوني من انام
حتى اشوفن وجهك الرحماني
ــــــــــــــــــــــــــــــــــــــ
ثوبك الاسود عله الكعبه رداء
الناس تتنفس هوه بس آني لا
آنه اتنفس حسين وكربلاء
يالتوزعلنه الأجر مجاني
ــــــــــــــــــــــــــــــــــــــ
أمن الامواج العاليه وآخر زمان
بس سفينة خدمتك هيه الامان
يبقه ذكرك كالصلاة ابكل لسان
وآنه بحروفك اطهر الساني
ــــــــــــــــــــــــــــــــــــــ
الناس تفرح من تسوي المنجزات
واحنه نفرح من نقيم التعزيات
انته منجزنه تظل طول الحياة
وكل عمل منك صدر انساني
ــــــــــــــــــــــــــــــــــــــ
انطيتني اشكد خير وانطيتك دمع
كون من الطم عليك اكسر ضلع
مالي بالدنيه عشيره ولا ربع
انته صيتي وقدوتي وصحباني
ــــــــــــــــــــــــــــــــــــــ
احسين احلفك بالسبايه وبالضعن
افزعلي يامولاي لو لفني الچفن
اوياك اخذني الحضرتك وانته الوطن
وحاشه لو يوم الوعد تنساني
محمد الجماسي
#اللهم_عجل_لوليك_الفرج
((ساگي الحرم))
راح.. راح.. ساگي الحرم.. راح
طاح.. طاح.. حامي الخيم.. طاح
يابت علي اتلگيني
موتني المقويني... حامي الخيم... طاح
///////////////////////////////////
كفّالج وحارس بناتي
غطيته يم عون بعباتي
عباس جمّل نايباتي... واجيت
مثل امس ما خلاني اگوده
سوده الثواني ابدونه سوده
ويابويه من شميت جوده... بجيت
يابت حيدر جيسي اعيوني ليش الطف أغروب
طحت بضيج ومحتاج امي مدري اشگد متعوب
اصواب العباس المايرحم رايد عشر اگلوب
نام... نام... راعي النهر.. نام
شام.. شام.. افراگ الگمر.. شام
غربني ما بين الناس
الله اولحد عباس.. حامي الخيم... طاح
//////////////////////////////////////
حاولت أضم هذا انكساري
وحفاني تالي بالصحاري
شما أنوي أقوه أكسر قراري...غريب
اترجيته اگعد شوف دمعي
بسمار نومك وأجه بضلعي
جا ياهو ياخذ ثار ربعي... وحبيب
اشگد حاجيته ما حاجاني وأسمع بس اونين
طلعت السهم امن اعيونه وطحت وبست العين
گتله اشصاير بس تتگلب عباس آنه احسين
ليش.. ليش...يمشي الاخو.. ليش
جيش... جيش..طوله الحلو ..جيش
وآخر رساله ابعينه
حسيتها اعله اسكينه..حامي الخيم... طاح
//////////////////////////////////////
خلاني الأقرب من وريدي
حاير اتلفت واطگ بيدي
جتالي يازينب عضيدي.. واخوي
بالساعه أون ما صد عليه
ومن گتله عباس ورقيه؟
طاحت دمعته ابنص أديه...اخوي
مات السگاي اليترسهن شحجي لهاي الطوس
واتفقت كل الخياله فوگه وفوگي ادوس
والله ايساعد گلبج يختي لو گطعوها الروس
راي.. راي.. مامش بعد... راي
ماي.. ماي... حلم المهد.. ماي
گعدي الرضيع اوليدي
عباس راح امن ايدي... حامي الخيم طاح
//////////////////////////////////////
ليا صوب وجهي بلّه اديره
وعالگاع عامود العشيره
طيحة ابو فاضل جبيره..وعذاب
الحاجبه يسوّه الشريعه
غيّر خريف الطف ربيعه
واجفوفه النحبهن گطيعه.. مصاب
لا خلاج الله اتشوفينه من غير الجفين
لمن شلته ادخيلك ناده يا مولاي احسين
خليني اعله الشاطي الظاهر يدريج اتموتين
ناح.... ناح. يازيني..ناح
صاح.. صاح.. اخ العبي.. صاح
وگلي اختي خل تعذرني
بالكوفه فيي تطلبني... حامي الخيم طاح
//////////////////////////////////////
بعيوني ماضلت بواجي
ومن طاح ابو حلو المحاجي
اتيقنت تنباگ التراجي.. واموت
عالخيمه والعامود ناوي
بس خاف تلتم العلاوي
ويقرن عله الخوه نعاوي.. واموت
طاري العباس ايتعبني خيرحمن تعبان
وبعد انتي اعرف يالعطشانه بدموع العطشان
بلّغي العلويات امجاني ما ضلت خوان
آه.. آه... آه.. كربله... آه
آه.. آه.. عالعايله.. آه
خلصت يحره انفاسي
وماضل سواد براسي.. حامي الخيم.. طاح
أحمد ماجد الكلابي
اللهم عجل لوليك المنتقم الفرج بحق غربة مولاي سيد الشهداء ع بعد مقتل مولاي قمر بني هاشم
يالاكبر يوليدي
@@@@@@@@@@@@@@
يايمّه كون آنه بحلم
وترجعلي هسه بكربلة
تفتح عليّة خيمتي
وتگلّي بلسانك هلة
هذا حلمي وهسه افز من نومتي
والگه طولك واگف بنص خيمتي
وماكو حزني ولا ونيني ودمعتي
يايمه چنت عطشان من ذبحوك بالحومة
يمه اگعد مسايه اغروب ماتصلحلك النومة
يمه يوليدي علي
يمه هم ترجع الي
يالاكبر يغالي
ومنك اسمع ياهلة
وكلها تسمع كربلة
بس هاي اعله بالي
@@@@@@@@@@@@@@@
ومنين اشيلك ياعلي
ومن كل كتر شايل جرح
ياريت لا عيني غفت
ولا طر عله اعيوني الصبح
يمه جابوك وشفت دم رگبتك
الله ياخذها الچفوف الصابتك
فرگة ماتحمل عيون الحبّتك
شمخلية الجروح البيك شفتك گلت مو هوّه
مو حلوة الجروح اعليك لا يوليدي مو حلوة
يمه ماريد العمر
يبني ردتك للگبر
تحملني چفوفك
ياسيوف الصابتك
ردت اشوفن زفّتك
مو طايح اشوفك
@@@@@@@@@@@@@
اتباها بيك اعله النسه
يمه واگللهن كُبر
ماكبّريتك للسحگ
ياحافر الفوگك عبر
آنه اخاف اعليه من عين الحسد
سايمة الله اعليه الساحگ عالولد
شلون اخلّص كل حياتي بلا سند
شمسويه الحوافر بيك يالتشبه رسول الله
وحدك طحت بين الناس محّد صيّح اسم الله
يمه شمسوية الغرب
حاطه الله اويه الحرب
غارت من حلاتك
يمه ماريد الهوه
ارد اعاتب نينوى
ماتدري بغلاتك
@@@@@@@@@@@@@@@
يايمه عيني اعله السهم
صلفة الچفوف العافته
نحرك مثل لون الگمر
من صوّبت ماشافته
منين اجيب اعيون تغفه اعله الجره
الشافن احبيبهن بحظن الثرة
يمه عيني اعله السهر متحظرة
ياأُم التعوف اوليد مامدفون ياهيّه
ياأُم التشوف اوليد فوگه النار مطفيّة
ياهي شافت عالرمح
راس ابنها المنذبح
يرمونه بحجارة
شفت المدلل امس
رافعينه بالشمس
والحَر ونهاره
@@@@@@@@@@@@@@@@
اسم الله عليك من العطش
ويروحلك فدوة النده
يمه ابدالك بالخيم
ريت آنه كون اموسّده
هاي مو دنيه التعوفك للترب
ولاهي ناس الجبرتك تدخل حرب
صلفة عين الشافتك من تنضرب
رحت وراح حلمك ليش وانت بروعة ايامك
كل ظني يجيني الشيب موتي يصير گدامك
يمك بحزني اگعدت
تفتح اعيونك ردت
واسگيك باديّة
يروح حزني يالولد
يمه احظنك للأبد
لو ترجع اليّه
@@@@@@@@@@@@@@
محمد جبر الدراجي
يبست عيوني ،، بالطف عليك من الدمع يبست عيوني
١-
لا شفت عـرسه ولا شفت حنه
اعله ابني خبروني يهل المحنه
عـمـري خلصته بــس اجر ونه
يا نبض كلبي ،، ما شفت دربي
ابجي عليك بكربله ما يخلوني
٢-
يـبـنـي يمدلـل يـا ضـخـر دنياي
لا تموت امك اكعد احجي وياي
مـا الــي غيرك انته لب اعشاي
سابح بدمك ،، لا تموت امك
يمك انوحن يالولد ما يودوني
٣-
عليك اضل اصرخ يـا نـضـر عيناي
وداعـة اعـيـونـك مــا ابطل ابجاي
من رحت راحت ضحكتي وسلواي
ما بطل نوح ،، والولد مذبوح
خافن اموت من الحزن يمه ادفنوني
٤-
من اذكر الحنه تهيج اجروحي
شلونه اودعنه العايش بروحي
المغرب وتكثر ونـتـي ونوحي
دمعتي بخدي ،، شجم ولد عندي
يمه وعليك من اللطم تعبت امتوني
٥-
تفرهدت روحي وراح اعز ناسي
يـا علـــي الفركه شـيبـت راسي
رايده اشتمك باخــــــر انفاسي
انطيني بس شمه ،، يالولد يمه
يوليدي بالطف من متت غيرت لوني
حسين عبد الجليل المالكي
رحتله اعله النهر ولكيته طايح
وكلتله يابو فاضل وين رايح
هسه شيب حاجبي ،، طاح اخوي وصاحبي
١-
رحتله اعله النهر ودموعي تتجاره
شاف ادموع عيني وحرك ايساره
بجفنه جنت احبه وجفنه مصيوب
شمدلي السهم وشلون مختاره
دليني يخويه اليوجعك وين
بطيحت رايتك جن طاح الحسين
بس كلي السهم شمسوي بالعين
منرد لوحدي شلكه النساوين
كوه أنه عرفته هاذه عباس
داست فوك صدره الخيل والناس
دمعي بلل شاربي ،، طاح اخوي وصاحبي
٢-
من عندي خذوك وراح ارد وحدي
موش الماي انته الكطعت جبدي
كل حيلي انهدم من شفت السهام
مخربه يابو فاضل خدك الوردي
صدك دارت عليك الخيل والناس
بعيونك سهم ومصوب الراس
من شفتك يخويه اباخر انفاس
صحت هسه نكسر ظهري يعباس
انته اول شمس بايكها الغروب
بعدك يابو فاضل ضلمه الدورب
كون ادفنه بجانبي ،، طاح اخوي وصاحبي
٣-
جدمي من التعب بالكوه اشيلنه
شميته وردت بعيوني ادفننه
لكيته اعله الترب مطروح عباس
وما ينطيني كلبي هناك اعوفنه
شكد حاولت اشيله وطاح مرتين
يا ناس الكمر ماعنده جفين
ما صارت كبل ياحيرة حسين
طيحت كافله وحرك الصواوين
كوم اكعد لخيك ضال بس روح
الفاكد يابو فاضل دمعه مفضوح
هسه زينب عاتبي ،، طاح اخوي وصاحبي
٤-
واكف عالشريعه ومنحني ظهري
وكل دمعاتي ما طفن جمر صدري
ومن ابعيد اشوف ارماد الخيام
ارجع مدري اضلن والله مادري
حرت بينك يخويه وبين الاخيام
شعوفك وانته صاير كومة إسهام
موش اعله التراب المثلك ينام
ومادري زماني بعدك شضام
خلافك خويه زينب تشبع اهات
ما اكدر اكلها كافلج مات
الطبره كون بحاجبي ،، طاح اخوي وصاحبي
حسين عبد الجليل المالكي
ليلة 6 محرم
بلغ سلام العرش والتحية
ينصرهم الله رجال القضية
لبسو درع وحرام عن وحده الإسلام
1
ذوله من حيدر حبهم من الذر
ياعشكهم ياعشكهم
صوتهم كبر والظلام انطر
من غضبهم من غضبهم
بيدهم رف العلم وكفو كبال الخيم
حسين أبو اليمه أبتسم
(هذا حبهم)
أبو فاضل ناده اله هي هاي المرجله
ذولة ثمرة كربله
(هذا حبهم)
ذوله الأشاوس بعشكهم عقيدة
كل واحد أقسم يقدم وريده
يامعشر الظلام عن وحده الإسلام
2
حلوة لمتهم هاي غيرتهم
حيدرية حيدرية
الشرف ميزتهم وهاي شيمتهم
فاطمية فاطمية
همه ميزان الوفه والعلم والمعرفة
بشوكهم أجمل صفه
(رافضيه)
شافو الدنيا وَهَم هوسو أهل الشيم
للحسين انطو قسم
(للمنية)
صاح ابن ظاهر نسوي العلينه
وي المناحر نكطع أدينه
ونطبقت الإحكام عن وحدة الإسلام
3
الشمر جن ناده أيها القادة
أسمعوني أسمعوني
أخذو كل غالي واتركو الوالي
طاوعوني طاوعوني
عابس بصوته سمع كله حبنا بي جزع
تالي للعسكر رجع
(ماوصلهم)
حسين هاذي عيلته منو اليوصل خيمته
اله نسحك هامته
(من يصلهم)
حسين بخيامه يشوف ويراقب
حس بالشماتة ترد لو تحارب
ماقبلت أهل الشام عن وحدة الإسلام
4
منهو يوصلهم والكمر عدهم
بالحريبة بالحريبة
حصِد يحصدهم ويكص شاربهم
مو عجيبة مو عجيبة
شراح يحصل ياترى بزعل ثاني حيدره
راح تصبح مجزرة
(كلشي حاصل)
عن يساره ويمنته شاف أهله وصحبته
جون صاح بغيرته
(يابو فاضل)
بالهجمة الأولى كتايب خذوها
وبثاني هجمة الثياب انزعوها
ليلة الشمر مانام عن وحدة الإسلام
5
كربله هاجت بالجثث ضاكت
كل أرضها
الزلم بالواقع ضلت أدافع
عن عرضها
كلب عابس محترك يصيح جنني العشك
بجفه يطبكهم طبك
(ما يسامح)
ونافع وقيس وهب دينهم عالشر وجب
وابن ظاهر ماتعب
( سيفه جارح)
أهل العقيدة بأديهم أمانه
وأهل المذلة تريد الخيانة
ونتشرت الإعلام عن وحدة الإسلام
6
لضحو بدمهم حسين خلدهم
بالنهاية
لهذا موقفهم الله كرمهم
بكل عناية
اليوم صار الهم أسم أعلى حتى من النجم
والله منهم والنعم
(هل المراجل)
وي ابو اليمه بقوا وبالطفوف استشهدوا
بالمذلة مارضوا
(الحكم عادل)
حسين الوفاهم تباها بصحبته
وخله كبرهم يصير بحضرته
ذوله إلي رفعو هام عن وحده الإسلام
شطره
امجــــد صاحــــب الشطــــــري