على وزن حمزه الزغير رحمه الله قصيدة ( دهري ذبني)
غـــايــب عنّـــي
عيـــد المبــارك ياهـــو اليــگلـــي
۩ ۩ ۩ ۩ ۩
يــا بويه باچــر عيد گــوم أبسـلامــه
وعيــد اليمرنــه شلون واحنـه يتـامه
دمعــي بزغــر بالعين صايــر عــلامـه
والـدهر مّـــن البــاب صـوب سهامــه
حــزنـي دايــم
عيـــد المبــارك ياهـــو اليــگلـــي
۩ ۩ ۩ ۩ ۩
يــا بويــه هـــذا العيد عيــد النـوايــب
واشلــون أعيّـد بيــه وإهلالـه غـايــب
يــا بويـــه مــن الباب شفت المصايب
مــا يشفه ابــد بالـروح جرح الحبايب
ينــزف بعـــدك
عيـــد المبــارك ياهـــو اليــگلـــي
۩ ۩ ۩ ۩ ۩
عيــد المبــارك راح يــا وسفــه منّه
وخلالـي هــذا العيد بعد أهلـي ونه
بأحضانــه ملتمين يــا دهــري چنـه
يا وسفه سيف الموت طشر شملنه
حسره وعبــره
عيـــد المبــارك ياهـــو اليــگلـــي
۩ ۩ ۩ ۩ ۩
مبــارك دمــوع العيــن بعـدك عليــه
وعيــد اليمــر بجفـــاك عيـد الرزيه
جــرحك يابويه أنضاف وي الزچيـه
فرهدت عيدي اليـوم وسفــه المنيه
أنحــب بويــــه
عيـــد المبــارك ياهـــو اليــگلـــي
۩ ۩ ۩ ۩ ۩
كل ساعه اصد للباب ملهوفه عيني
واذكــر يمـــاي العيـن لمّـن تجينـي
ظليت أتاني تعــود بــويـه بحنيني
يــا سلوتي بجفـاك أصبـح ونينــي
ونّــي زايـــد
عيـــد المبــارك ياهـــو اليــگلـــي
۩ ۩ ۩ ۩ ۩
يا بويــه نـار أجفاك منها الگلــب شـاب
استعرت يبوالحسنين وياها نـار الباب
كــل مـا يمـر مصــاب يتجدد أمصاب
وي وشيبك المخضوب بويه الفرح غاب
غابــت روحـــي
عيـــد المبــارك ياهـــو اليــگلـــي
۩ ۩ ۩ ۩ ۩
الشاعر
موسى البديري
أنــوح مــن الرزيـــه
يحمــــاي الحميـــه
*
أنـــوح أعليك حامــي أحماي والجار
ودليلي أبنـــار بويــه أعليــك وجّــار
روحــي امچتفــه بحســرات وتجـــر
مــــدري ليـــا كتــــر دنيــــاي بيـــه
*
النــوح لــروحــي مـــا ينفــع شفه الها
وطبرتــك بويه مــا يحصل شفـه الهـا
يبــويــه أحبـــال بچفــوفــي شفلـها
اذا بــاچــــر لفتنـــي الغـــاضـــريــه
*
علــّي دنيــاي بـالإحـــزان هــامـــات
ومــن عنــدك علينا اطبــرت هامات
مــن نــاده الوحــي الكــرار هــامات
متت ويـــاك ريــــت بهـــل المســيه
*
علـّـي سيــف النــوايب دوم منسال
دمــــك يـــوم بالمحـــراب منســـال
عٓلينـٓـا نـــادت الأيتـــام مـــن ســال
يتـــامى صـرنـــه يـــا حيدر سويـه
*
الوكــت بعـدك لبــس يا حيـف ويهين
وأحــس بالگلــب نــار أجفــاك ويهـن
جرحـــك لا تظـــن يطيـــب ويهــون
يظــــل ينـــزف الـــم حــد الــمنيـــه
*
حسافــه العيــد منـي يشيل ويروح
وترك بالروح كثـــره أجروح ويـروح
لـوّن روحي مشت هاليـوم وي روح
أبــوي ولا ضگــت طعــم الـرزيـــه
*
الشاعر
موسى البديري
أشمـا تمــر فتن
ما اعوف أبو الحسن عهد عهد
حبيـبي الأولي
أنـــادي يـــا علــي مدد مدد
وعيونك مـا أخونك علـي علـي
*
يردوني اعوفك يا علـي
بأســم التطــور يالـــولي
يردوني أمل مــن عندك
يــوميــه شبهــه تنطرح
يا نسمه وبوكت الصبح
عدواني جــابو ضــدك
كــل ظنهم أتغيـر وأمـل
ضنوني عــن دربك أزل
وأنكــر يحيـدر عهــدك
يـا حجة الله أعلى البشر
وآياتــه وإســرار الســور
بيــمن اقيســـن ودك
يا ابا الحسن صدگ قبله انته للعشگ
تظـل تظـل
حبــك صدگ سحر يخنگـونه ينتشـر
أمــل أمــل
مجنونك ما اخونك علـي علــي
*
يوميه بدعــه اهل الفتـن
جابوها ألي يا ابا الحسن
يردوني اصدگ بيها
هوه الرضــع مــن الزغــر
وصرت انته أله كل العمر
يــا بــدعــه اليمشيها
ملقـــح ولايـه من الأزل
عنهـا فــلا جدمـه يـــزل
مدمــن أظــل أعليها
الما عنـده نــور أولايتك
ظلمـــه بــلايـــا محبتك
يــا نــور اليضـــويهــا
يـا منبع الضوه اتنفسك هـوه
عمــــر عمــــر
يــا حجـــة الملا بكل أيه منزلــه
ذكـــر ذكـــــر
يقرونك ما أخونك علـي علــي
*
من زغري الهــج بالولي
انهض اگولن يا علـــي
هوه العشگ عالفطــره
ياهــو اليغيــر فطــرتي
لا مــــا اعــوف ولايتي
لو طــرح ميت فكــره
ضــد حيدره ألتمت دول
مــن يوم وحي الله نزل
بهذا الحقــد احنــه ادره
فقـــاره چنه القــارعــه
ياهـو البرزلــه يـوزعــه
نصين سيفــه يشطــره
حب حيدر الحياة ما يعرف الممات
هـــــوى هــــوى
حب ساحر الطفل حب تارس العقل
ضـــوه ضـــوه
يـدرونك مـا أخونك علـي علــي
*
يا علي ناس العادتــك
رادوهــا تنــزل رايتك
صار العكس ظل تعله
مّن الله مرفوعـه تظل
يا سيـدي بكـل الـدول
محد عــرف هـل العله
معروفه رايـــات الكفر
يم رايتك مــا تستقــر
سيفــك اخــاف اتسله
راواهــم بيــوم الزعــل
بدر وحنين اوي الجمل
يا علــي معنــى الـــذله
هل الرايه بالنجف للعفه للشرف
عِلّــت عِلًــت
مــا تهــوى لا ابد هالرايه معتقد
بقــت بقـــت
مضمونك ما اخونك علـي علــي
*
گبـرك لان كعبة وسٓــوّر
يا حيــدره طول الدهر
كل حر يجيه ويشمـــه
بفيلـه ابـرهه رد بحقـد
وتعنـه گبــرك مستعــد
كـــل ظنه هوه يهدمه
يا فيل يوصل حضـرتك
وبالشدد تعرف شيعتك
عالمـــوزمــه متعلمــه
يا ابا الحسن حبك فرض
أصــل المحـبه والبغــض
كلمــن وعفٌــت أمــــه
يــا سيدي قسم أنفهمه ألي ما فهم
درس درس
نهــزمهم الجمــع وگبتك تظل تشــع
شمس شمس
ظل لـونـك ما أخونك علـي علــي
**
الشاعر
موسى البديري
قصيدة ( أجاني العيد ) لسان حال السيده زينب بعد مصاب ابيها
أجــاني العيــد وأنـه بعيني دمعـاتي
ادريهـــا تظـــل ويــاي حســراتــي
الگلب كسره صعب جبــره
الــم يبقى للتالي بغيابك
****
دمعات وآهـات عمري يصير بعــدك يا ضـوه العين
والروح عالنوح علمها الدهــر مـن بعــد ابــو حسين
بــــآلام الايـــام اگضيها بدمــع كــل هــاي السنـين
يا عــيد شتريد صوبنــي بدليلــي الأجــل سهمــين
سهم أمــي الزچيه بــأول أيامي
ويا سهم الابو منه الگلب دامي
يبو العتره صعب جبره
الــم يبقى للتالي بغيابك
*
ياريت ما جيـت يــا عيد الفطــر وأحبــابي غيــاب
والله.. بالاه.... يگضي الليل كلمن فــارگ أحباب
والروح عالنوح مفطومه صفت مــن عملت الباب
والعين كل حين دمعها على المشو يوميــه سچاب
مــا ينشف دمعها أعيوني سچابه
انادي بكل وكت يحسين ومصابه
وسحگ صدره صعب جبره
الــم يبقى للتالي بغيابك
****
لـحســين هل عين تنظـر والمـدامـع ظلــت تسيل
من صاح من ناح ينعـه حيـدره بأحـزانه جبـريـل
فــزيــت حسـيت فوگ حسين هسه داست الخيل
والراس بإحساس انظرله برمح كل ساعه ويميل
مسبيه أحس ابطيحت الوالي
ومحتــار بيتامه صــار دلالي
وسبي الحره صعب جبره
الــم يبقى للتالي بغيابك
****
ويــلاه بــل آه خبــرني علي عــن جــور الايام
والنـار بالـــدار تبقى ويـاي هــاي لحرگ الخيام
بالباب إرهـاب يظل ويـــاچ زينــب حتى بالشام
بالبيـد ليــزيد بــاچــر زينـــب تـروحين بيتـام
ايتامي بقــت عالباب حيـــرانه
أيتامج تظل مرعوبه عطشانه
العطش جمره صعب جبره
الــم يبقى للتالي بغيابك
****
بــآلام... أيتــام تسألنــي يبويـــه حيـــدر يعـــود
شوغات وآهات تعلى من تشوف اهدومي السود
ويـــلاه. ويـــاه الحنان اويـاه كله اليــوم مفگـود
وبصوت يالموت صعبـه تــرد بعـــد ايامنـه اردود
ينشدني اليتيم ودمعته بعينه
يـا زينب يرد يــا يوم والينه
ونشم عطره صعب جبره
الــم يبقى للتالي بغيابك
*
الشاعر
موسى البديري
قصيدة ( اول نور ) لميلاد الامام الحسن المجتبى عليه السلام
اول نــور للزهــره وعلـي الليله
صلوات احنه هـاي الليله نهديله
ابو محمد ابو محمد
كريم ال النبي الهادي
****
اول نــــور للــزهــره
علينه اليوم شع بدره
صلاوات
الكرم مولود والنخوه
كريم وخــوته خــوه
صلاوات
بحر يتفايض بــزوده
ابد ما حدته احـدوده
صلاوات
جــده اليوم رافــع ايـده يدعيله
صلوات احنه هاي الليله نهديله
ابو محمد ابو محمد
كريم ال النبي الهادي
****
محمد قبّـل اعـيونـه
فرح والكــل يهنـونه
صلاوات
اجــت امـلاك بارينه
تهني اليــوم هـادينه
صلاوات
الكرم مولود ديوانه
فتح من زغره بيبانه
صلاوات
الكرم جوعان چف الحسن يوميله
صلوات احنــه هــاي الليله نهديله
ابو محمد ابو محمد
كريم ال النبي الهادي
****
تصلي الليــله فرحانـه
هل الامــلاك بسمـانه
صلاوات
من الله جــابت البشره
واجت متعنيه للزهــره
صلاوات
شــع الحسن بأنــواره
يــا محلاها البشــاره
صلاوات
وأمــه بأيــة الكــرسي تنـاغيله
صلوات احنه هاي الليله نهديله
ابو محمد ابو محمد
كريم ال النبي الهادي
****
الامان مچلب ابداره
كرم تتفايض اكتاره
صلاوات
اليمــد لبـو الفـقــره
ابو محمد يعز قدره
صلاوات
يترس ايده وعيونه
الكريم اهله يسمونه
صلاوات
يگضيها لــون بالــدمعه تشكيله
صلوات احنه هاي الليله نهديله
ابو محمد ابو محمد
كريم ال النبي الهادي
****
رغـم مهدومــه بيبانه
ابـد مــا مــره ينسانه
صلاوات
ضنونـه الكـفـــر ننسه
الحسن ماغربت شمسه
صلاوات
رغم ما حضرته بعيده
تنطي من البعد ايده
صلاوات
باچر حضره وي المهدي نبنيله
صلوات احنه هاي الليله نهديله
ابو محمد ابو محمد
كريم ال النبي الهادي
****
الشاعر
موسى البديري
كعديه إلى كريم ال محمد الامام الحسن المجتبى عليه السلام
برمضان الحسن أشــرق جماله
صلي أعلـى النبــي الليله والــه
اليوم أنولد ديــوان
للزهــره الزچــيه
****
الليله أول نــور أزهـر للنبي وشــع بكمــاله
اليله حتى أمــلاك ربنه عالنبي صلـت واله
لان اول نــور ازهر للزچيه بكــل خصــاله
يا نــور وي شهر الفـرض
عم السما طول وعــرض
نور الحسن شع عالارض
والكــرم تــمم كمـــالــه
أيــه وللكــرم جـــده تــلاهــا
للزهره وعلي البــاري نطاها
بــاب الكرم موصوف للــزهـره الـــزچـيه
****
بلهفه حيدر شاله بيده وعطــر للجنه يشمه
يا علي سمـيه گالت فاطمه وفــرحانه أمــه
گلها يـا بت النبوه من الله راح يكون اسمه
وبعينه صــدله المصطفى
غــــذاه حكمــه ومعــرفه
من جده ماخذ كل صفــه
نوره من نوره أويه رسمه
وارث جــده بأخـلاقـــه وصفـــاتــه
وظل شخص الحسن مـن معجزاته
ايه الحسن لليوم للزهــره الزچــيه
****
نور من صلب الصميده ومن رحم امه الزچيه
شــابه المخـتار جــده أوالـده حــامي الحميه
كــوّنــه رب الجـــلاله ســيد لـهــاي البــريـه
لليوم أنــــواره تشــع
لكل غانمه هــوه نبع
ابن المبادئ والشرع
رغــم كــل الناصبيه
رغم أهــل الحقـد يبقى أمامي
وآنه بكل فرض ابعث سلامي
وادري يوصل الشوگ للزهــره الزچــيه
****
عالكرم لـو ردنــا نحچي حاتم يحّيــر بــزمـانـه
صعبه ما نگـدر نقـــارن بالحسن هـــايه خيـانه
فرق بين الوهب عمره وبين واهاب بس حصانه
باب الكرم سده الحسن
يشهد اله باقــي الـزمن
بالســر مضيـف وبالعلن
والوصف حــاير لسـانه
أهــلا بالحــسن نــاده مضيــفه
بحيره يظل عمر كلمـن يضيفه
يبقى الحــسن عنــوان للزهــره الزچــيه
****
شكثر تاريخ النواصب حــاول يغــير الحقيقه
الحسن مثل الذهب باقي واضح ويلمع بريقه
لان نهجه نهــج جــده والنبي واضح طـريقه
ضــده الصحــاح اتجنـدت
وچم عوره من عدها بدت
مــن ربنــا كلــها اتفـنـدت
والبقــت بــــس العــريقــه
من نفس الصحاح اقره حياته
تظهــر للعـلن كــل مكــرمــاتــه
شع رغم الحقد نور للزهــره الزچــيه
**
الشاعر
موسى البديري
ابوذيات لمولد الامام الحسن عليه السلام
بدر وجــه الحسن نــوره تــلالــه
أوجــدّه أبفخــر كــم آيــه تــلالـه
جبــل وبّصفــه محتــاره تــلالـه
شجاعه وكرم جود ابن الزچيه
*
مــــواليــن وألك دايــم هـــوانـه
شحلاته أبعطــرك ينسم هــوانـه
العمــر دونك فلا يسـوه هـوانـه⃰
العمر حبك أنطاه قيمه وهويه
3- ⃰هوانه .. يعني ذله
**
الشاعر
موسى البديري
مفجوعه الاحرار بيــوم تشييعه
من الله اكبار تبقى قادة الشيعه
نصـر الله ابــد ميصير توديعــه
(ونصر الله يظل دوم ويانه )
الشاعر
موسى البديري
موشح الى تشييع السيد الشهيد حسن نصر الله رضوان الله تعالى عليه
اليوم كـــل الشيعه وياها المسيح
تشيّع ابن المرتضى ابدمــع اليسيح
****
اليـــــوم احــرار الامــم متجمــعـــه
بــالــدمــوع الحــيد والله تشــيعــه
اليــوم نــاعــي الســيد بحسره نعـه
آه يــا فگــد العــزيــز أبهم يصــيح
****
يصـــيح يا فگــد الابـــه والمــرجلـه
اليوم صفحه ابتــدت چنـها بكــربلـه
رغـــم كـــل الصـــار تمشي القــافله
ودرب ابو الاحرار بس هوه الصحيح
****
دربـــه نمشيــه ونكمله احنــه بعزم
هــــذا درب حســـين بي ثــق نلتزم
درب ابـــو اليمــه يظــل مصنع زلم
غيره درب الذلـــه معروف وصريح
****
اليـــوم تنعــاه الارض واهـــل الفــضه
اليــوم ملچومـــه جـــروح الــرافضـــه
شــــال هــذا اليــوم شـــبل المــرتضى
اليوم كــل حـــر لفگد شخصــه جريح
****
اليوم مــو لبنـــان بس تنعى المصاب
الشيعــه والســنه وتـوّن اهـل الكتاب
اليوم كل حر من دماه اصبح خضاب
وكـــل غيــور اليــوم دمـه ظل يسيح
****
كـــل غيـــور اليــوم جــددلك عــهـد
مــا نمـــل ذكـــرك يبــو هــادي ابـــد
اليــوم شخصك بينه مـــولاي انــولد
وترس عطرك سيدي الكون الفسيح
****
الشاعر
موسى البديري
وحــگ ألــي ابچفوفـه لم الحسيـن
مـــا أبطـــل عـــزائــي لأم الحسين
أظــل اللطـم وانوحـــن لما الحسين
تطيب أضلوعه وضلوع الزچيه
*
الشاعر
موسى البديري
وافه لعمه يـِوم الــطف ابن الحــسن بوريده
هيچ يريد ابو صالــح شــباب الموقف تعيده
اليمس دين الله كون اليوم لازم تنگطع ايده
( والقاسم خط منهج دينه )
الشاعر
موسى البديري
هوسات الى القاسم ابن الامام الحسن المجتبى بمناسبة ولادته المباركه
انولد لآل النبي بهل اليوم شبيه المجتبى الازهر
مــاخــذ هيبة الـكرار وكــت الموزمـــه لــو كــر
الجده حيدره معــروف اسـد وسط الحرب يزأر
( ومن حيدر ماخذ صولاته )
الشاعر
موسى البديري
هوسه الى المولد المنتظر الحجة ابن الحسن عليهما السلام
انولــد هليله اخــــر نــور للعتــره
مــو بس احنه كل الكــون ينتظره
بظهور المهدي تكمل فرحة الزهره
( ويفرح الزهره بصولاته )
الشاعر
موسى البديري
هوسه الى الامام الحجة ابن الحسن عليهما السلام وعجل الله فرجه الشریف
رايــة عمــك العبــاس فوگ الگبــه تنتظــرك
تتاني جيتك مولاي يا يــوم ويطــر فجــرك
صبرك وين حده يصير مل الصبر من صبرك
(( ويا يوم تهز ذيچ الرايه )
الشاعر
موسى البديري
مقطوعة شعريه (انتظرتك ) الى الامام الحجة ابن الحسن عليهما السلام
انتظرتك والدموع تسيــل
دمعه تهل بأثــر دمعه
وعلى دربك أتاني أتعــود
وانطـر جيتــك الجمعه
شعلنــا أعمارنــا وذابـت
مثــل ما ذابت الشمعه
سمعنه والحچي الممصوخ
يجــرح لمّـن نسمعــه
گضينا أعمــارنا أنتانيــك
يــا يـوم وتصح رجعه
عمر نحسبله بس أغياب
بدونــك سيدي شنفعه
عمر مثــل الــورد ذبلان
واليذبــل سهــل شلعه
عمــر واحنـه بمجالسكم
ننوح وكل وكـت ننعـه
يا آخــر دعـــاء يصـيــر
عجــل سيــدي الطلعـه
يا آخــر أمــل بالــروح
امل من رافـــع السبعـه
أحلفـك بيمن أتــرجــاك
بل الــي هشمـوا ظلعـه
برضيع حسين بالعباس
بسبي الحره الصعب جرعه
تعجل بالفــرج مـولاي
وحگك سيـدي أترجعــه
الشاعر
موسى البديري
قصيدة ( باجر عاشور ) لشهادة الامام علي عليه السلام
وصاني حيدر يا زينب باچـــر عاشــور
باچر عينچ بالطف تنظر مذبـح النحور
تسهل هل الطبره يا بــويه الحره
باچر عينچ بالطف تنظـر مذبح النحور
**
نظـــر دمعــي ابــوي وگلــي يــا زينـب
گلبـــچ ادري بي مثــل الجمـــر يلهـــب
انفجعتي بيــوم شفتــي شيبي المخصب
باچــر بالطفـــوف يمــرلــچ الأصـعب
باچر خيل أتشوف اعيونچ عگب الخوان
ومحتاره بأيتام وعيله ورَكضــت نسوان
وأّخيــمْ مستعره يــــا بويه الحره
*
دمعتـچ گـال ظميهـا لظهــر عاشــور
يــوم التنظر أعيونــچ گطيعـه أنحور
تهون الطبره باچر چم جسد مطبـور
واظلــم ليلــچ ومــا بي يزينـب نــور
باچر ظلمه وليلچ يــرهب عگب العباس
باچر مفجوعه ومسلوبه مــا بين الناس
وبـــآه وحســره يــا بويه الحره
طبيبي ضمد اصــوابي وگطع نــزفه
تشاهـد باچــر اعيونــچ صور كلفـه
بصدر حسين خيل ادوس يـا وسفـه
واخــوچ الكافــل يطيـح بغــدر چفـه
چــم صـوره يشاهـد دلالـچ يــا زينب آه
فوگ الغبـره حسين مگطـع وتغسل بداه
ومرضرض صدره يا بويه الحره
*
عد راسي من أمــوت اليـوم أولادي
وللتشييــع باچــر صحبتــي أتنــادي
وصريع حسين وحـده وجده الهادي
وسبــي للشام بيكم يحــدي الحــادي
والحادي ما يرحم زينب مچتوفه أحبال
ومحتاره ابيتـام وخــدر بـــويه وأطفال
وبگلبــچ جمــره يــــا بويه الحره
**
لبـنْ راد الطبيــب وفــزعت الأيتــام
ظنهم بويـه جـرحي وطبــرتي تلتام
ترد الفزعه لكن بويه بـأرض الشام
شتم وأحجــار بويـــه بغربتـچ والآم
والأصعب ديوان الباغي متروس أجناب
مصابچ يا زينب ما مثله بالكون أمصاب
ورثيتي الزهـره يــــا بويه الحره
**
الشاعر
موسى البديري
بويــه علــي مخنوگه تدري أنفاسـي
بويــه علــي امســح أبيـدك راســي
يا بــويه مثل الفقــره
أبابــك علـي منتظـره
*
يا بــويه حيّرني الــزمن
يــوم ابن ملجم صابـك
مشتاگه اشوفن بسمتّك
منتظــره بــويــه أبــابك
يا بــويه گالــولي صدگ
دمــك يغالــي اخضابك
يــا شمسي الما غـرّبــت
مـو هسه وكــت أغيابك
ليل الحزن مــا تنگضـــي آهاتــــه
ليل الحزن يتــلاهبـن جمـــراتـه
وشيطفي بويه الجمره
أبابــك علــي منتظــره
*
يوم الشلت چفي بحـزن
ودمـــع المــوادع نـــازل
وبچف أبو فاضل صفت
وگتلــه يبــويه الكــافـل
زينــب وصيّـــة والــدك
لا يمــر بيــها العـــايـل
أعيوني رسمتلك نعـش
عـن گلبي باچـــر شايل
انرسمتْ خيّم بدمـــوعــك السچابـه
انرسمتْ خيّم أبنـــار العــّده الّهـــابه
بگلبـي الخيّم مستعره
أبابــك علــي منتظره
*
يــا بـويــه وي النــايبــه
عشت انــه تدري ابزغري
يــوم المشّت ام الحسن
حسّيتـه غـــادِر دهــــري
محلاتـــه يمك يـــا الابو
لـو ينگضي كـــل عمــري
وبحضنك الدافي ياعلي
أمنيتـــي اظلن تـــدري
محله العمر يا بــويه وانتـه اگبالي
محله العمر لــو يگضي وي الغالي
بدلالـي ظلت حسـره
أبابك علـي منتظـره
*
وي المــوادع مـــن زغــر
دلالّـــي عَــاشـــر همّـــه
وماتت على أشفاف الحزن
چلمــة يــزينــب يــمّــه
وچلمــة يبويـه يــا علي
يــا بويـه أحس متيتمه
بين أمي وفــراگ الابـو
دلالّــي طــف يـــرسمه
عشت اليتم من عمر خمس اسنيني
عشت اليتم كل ساعه أشوفه بعيني
وراسي شبگته بعشره
أبابـك علــي منتظــره
*
خيمه يبويـه مــن المـحن
لـــو عــاكســت أيامــي
أحلامي بيها اگضي العمر
انهدمت يوسفه أحلامي
چم خيمه بعــدك تحتــرگ
يا علــي كــل أخيــامي
اليوم انته بيتامك حــّرت
بالطــف تحّيـَـر أيتامـي
بويه اليتم يكسـر دليـل الفــاگــد
بويه اليتم باچــر يمر چم واحــد
لــو رحنه باچــر أسره
أبابــك علــي منتظره
*
عيد المبــارك يـــا علــي
باچـر تمــوت إخلافـــك
يا بويه چن طعــم الشهد
لـو تطلــع من اشفافــك
جفني يمــر بيـــه العمى
باچــر لوّن مــا شافــك
الموت لو يرضه أبـــدل
ياخذنـــي ريتـه وعافـك
دونك علي ريت الأجـل وافانـي
دونك علي ولا بالدمــع خلانــي
فگد الابـو شيجبــره
أبابــك علـي منتظره
*
الشاعر
موسى البديري
ميمر مجنس ( شوگ ارتوي ) الى مولاي امير المؤمنين علي عليه السلام
گلبي اليدگ ينبض عشگ
يا حبي يا عشگ الصدگ
هاذا الگلب شوفه شلون بأسمك علـــي دگـــاتــه
*
نبض الگلــب بأسمــك يظل للتالي
أيــة عشـگ مــن تنقــري للتــالي
المبغض تحيّـر ظــل ينــادي تالـي
كتله أبفخر نار وسقر
للعاده حيدر بالسوّر
دين الله بي تم للناس
اقــــره بحكـم آياتـــه
*
أبدّرت نجيبه وطاهـــره يــا حي در
انــه أرضعت حبــك علــي يـا حيدر
دارك صفت وسط الگلب يا حي دار
رغم اليضد وأهل الحقد
بگلبي تظل قبلة مجد
بنبض الگلب يا كرار
كـــل عاشــگ بهلفاته
*
شوگ ارتوي بگبــرك علي لـو قَبلَــه
حـايــر شوصفك دنيتــي لـو قَبلــه
وي الخلگ انتــه صـرت لـــو قَبلــه
قبل الملأ نورك ملّه
هذا الوجـــود أبأوله
نورك ونــور المختار
ســر الوجـــود وذاته
*
انته الأســد غيــر أسد مــا عـدها
ألامــه بيمينك بالنصــر مـو عدها
وعمــر ابن ود گبلك زلم ما عدها
نادى الخصم وين الزلم
بس انته ناديت أبعزم
انــه علـــي وذو الفقار
مــا تنّســي صــولاتـــه
*
خيـول العــده أبــدم الكـفـر حجٓـلها
ومن غيــرك لهاي البشــر حجـه الها
عونه الگصد ارض النجف حجه الها
وطاف وسعى أبركنك دعا
يا رحمة الله الواسعــه
يا حجة الله أعلى الناس
عاشگ گصد بآهــاتــه
*
نــاس التبغضـك يا علـي مـا أودها
وغيــرك ولي كـل شيعتك مـا ودها
لغيرك ابــد چلمـة عشگ مــا اودها
خير الوره يا حيدره
دنيانه انتــه وآخـــره
أول عشگ مر بالروح
نشعر طعم شــوغـاتـه
*
يالراكـع وچفــك وهـب خــاتمها
بيك الوصيـه المصطفى خاتمـها
صفحت إعمالي بالحشر خاتمها
بالاخره چف حيدره
كل محب يختم دفتره
والما ختمله الكرار
يتحيّر بحسراته
****
اسمك حرز وسط الگلب دگيتـه
علگته همي بحضـرتــك دگيتـه
بذكرك علي چف الحـقد دگيتـه
رغم الزمن يا ابا الحسن
رايه انته ظلت بالعلن
مرفوعه رغم أهل الجور
ربنا رفعها لــذاتـــه
****
الشاعر
موسى البديري
موشح الى استشهاد الامام علي عليه السلام
اليــوم زينــب يا عظـيم أمصـابها
سيــف المــرادي طبــرها وصابـها
*
اليـــوم زينب يــا عظم همها السده
اليــوم طبــرت راسها بسيـف العده
شلــون أوصف أنــه گلــب الفاگـده
يـــا حــزن بعـــد الــولــي ينتــابها
*
اليوم زينب تنحب وبعبـره وتنـوح
تدري گلب الحره ما يحمل جـروح
ريت دونك يـا علـي زينـب تــروح
ولا تفـــارگ بـالصيــام أحبـــابهـا
*
بويه نــار افــراگك تشــب بالــدليل
ودمعي ما ينشف يبويه يظل يسيل
تميــل ويــاي الــرزيا شمـــا إميــل
بــدت مــن أمــي الزچـيــه وبـابـها
*
آيه حــزن الحره يــاهـو يفســره
بالدمــع تنظــر أبـوهــا أمحيــره
بويه نادت يا وصي خيــر الورى
بويه زينب مــا يطــيب أصوابها
*
بويــه بـاب أمــي فتــح بــاب الألم
منــه راسك يا علي بسيف انجسم
آه يــا نــاره تــــوج منــها الخــيّم
جسوم تبقى مــن دمـاها اخضابها
*
اصوابي ما يشفه يا ابو الحمله ابد
غصص بالطف تنتظــر زينــب بعد
أخيول أميه باچـــر ترض يـا جسد
جسد طاها اترضــه فوگ أتـــرابها
*
بويه أجانه العيد مو وكــت الدمـع
صعبــه لــو بالعيــد زينــب تنفجـع
فيض دمعي نـــار وبراس الشمــع
نـــار يــا طبـرت علــي ومحــرابها
*
بويه أجــاني العيد بـس إبـلا هلال
شلي ابجيته والفـرح يا بويه شال
مــن رحت يــا حيـدره راح الدلال
انتــه فرحــت دنيتــي وأسبـــابها
*
شحالها الحره وغمض جفن الإمام
وفجعو بـراس الولي شهر الصيام
على الدنيا بويه مــن بعـدك سـلام
والســلام اليــوم تحـــت أتــرابهــا
*
الشاعر
موسى البديري
أهازيج للامام الحسن المجتبى عليه السلام
آنـــه بمـــولدك مديــت ليك چفـــوف
يسلطان الكــرم باب الكـــرم معروف
فــز مني الگلــب متعنــي ليك يطوف
(( وبابك يطلب حاجاته ))
***
كــون بكربـله يالحـــسن يم حسين
نبنيــلك ضـــريـــح بين هالــگبتــين
ونگصدلك زحف لو تنگطع رجلين
(( ونلبي وخل يسمعونه ))
***
ألك حضره بگلب كل شيعي مبنيه
اطوفنها أبدمـــوع العين يــوميــه
خـــل ابغيضها أتمــــوت الوهابيه
(( ونطوف الحضره أبكل ساعه ))
***
ال سعــــود صبراً والزمان يــدور
چف المهدي يهدم يالبغايا أقصـور
ويبني للحسن گبـه وضريــح ينور
(( وبالحضره يردد آذانه ))
الشاعر
موسى البديري
https://youtu.be/bOufmk6ZlHg?si=9YEj18pzmIB11Rb-
Читать полностью…
معسكر خسه ذاك وهذا للساده
وانته اختار منهو تريدهم قاده
مرحب لـو علـي الكـرار وولاده
( ما نقبل الا ويه الساده )
***
الشاعر
موسى البديري
قصيده گعديه لقرابين المذهب والسيد الشهيد حسن نصر الله طيب الله ثراه وقدس الله نفسه الزكيه
قائــد يتبــع قائد .. منســاوم بالــديـن
هذا النهج الخالد .. من مدرسة حسين
جنـود انضحي قاده
تلوگ ألنـا الشــهاده
منســاوم بالــديـن
(1)
فگدك اهوايه هضمنه وخلّه بـينا النــار تسعـر
وناح من هاي المصيبه كل غيّور وصوته كبّر
والمسيحي ينوح لجلك والمخالف گلبه منسر
سيد حسن كٓسرت ظهر
جــرح بدليــل المنتظــر
وي جرح محزوز النحـر
ليــا جــــرح دلالــه يسعـــر
يا جرح ابدلاله ينزف بعده ادموم
للرضو اوصـاله للصـار بهـل اليوم
يـدين الله وعمــاده
تلوگ ألنـا الشــهاده
منســاوم بالــديـن
(2)
اليوم تشييع البســاله الخــله بالعدوان رهـبه
اليوم مهظومه المشاعر والنفوس الي تحبه
صعبه يا سيد نودعك وحق جدك حيل صعبه
هالیوم أحس ضاگ الفضه
سيد حســن عمــره گـضه
والــراح يــاهــو يعــوضه
كـل غيــور يصيح گـلبــه
نصــر الله بهـل الليله .. شال الزود اوياه
وكل حر ظل ينعيله .. بدمعه ولوعه وآه
رحــل نبض الاراده
تلوگ ألنـا الشــهاده
منســاوم بالــديـن
(3)
مو جديد الموت عدنا الموت لجل الدين عاده
والله كرمنــه أعلـى خلقـه بالولايه وبالشهاده
لمذهب الهادي اوصيه ارواح ننطي وننطي قاده
درب الولايه الصامده
بالـدم طريقــه نعبـده
هاي المسيره الخالده
المــوت بيها أصبــح ولاده
المات من أجل أهدافه.. وما ساوم اشرار
العــالم كلـــه يخــافه .. خط درب الاحرار
الحسين أصبح مراده
تلــوگ ألنــا الشــهاده
منســــاوم بالــــديـن
(4)
ثــار من خيبر يطلبه ومــرحب يرجـعله ثــاره
يوم حيدر طرله هامه وناصفه بحد ذو الفقاره
ظنه مثــل العرب احنه نطبع ونصبح أسُاره
هــاك استمــع يـا عـاذلي
بعـــده عــزمنـــه الأولـي
هل العزم من حيدر علي
وشيعته بدربه وقراره
من حيدر مهيوبه .. مـــا ذلت هيهات
والمــات لمحبوبه .. عايش لا ما مات
نظل احنــه السياده
تلوگ ألنـا الشــهاده
منســاوم بالــديـن
(5)
ابد مو عجبه الاشوفه من الاعراب اهل الدعيه
بفرحه من طاح ألنا فارس ذول تربات ال اميه
هيه نفس الفرحه وسفه من دخل ضعن السبيه
نفس السده ونفس الجره
لــكــن عقيلـــة حيـــدره
گلبــت الشــــام الاخــــره
وعلّــــت ْ الــرايـــه الابيــــه
ما ذلت بت حيدر .. خطــت منهــج ثار
بركـــان ويتفجــر .. صعنت جيل احرار
درب بــارينـــه راده
تلوگ ألنـا الشــهاده
منســاوم بالــديـن
**
الشاعر
موسى البديري
قصيدة ( مشاهد ) بعض مشاهد حب وعشق خدام و محبي الامام الحسين لامامهم عليه السلام
صور حبك عجيبه
يبـو اليمـه وغـريبـه
ننادي منها ويــلاه
وتــرد بينه المصيبه
مشاهد حبك آيـات
تـرتلـها السمــاوات
**
يحسين شعضمها امصيبتـك هــاي
رسمتلي صــور يــا سيدي اهــواي
شفت شايب يشرب صورتك مـاي
ينــادي ما تـوافي ادمــوع عيـناي
يصيح ابدمعة العين
ريت اهناك يحسين
جسمي انداس والله
دونـــك بالميــادين
ودونـك بيه طعنات
تـرتلـها السمــاوات
****
شفت موقف صعب من بالي امحيه
ولا بـالدمعــه ويعـــدي واعـــديــه
طفلـه اهنــاك ركضــت بالتشـابيه
تكــض بنتــك رقيــه خــايفه اتيــه
تگلها ابدمعـه وبـآه
ابوﭺ حسين عفناه
صوره عدنه بالبيت
سـالـم يمنــه والله
وهلـت منها دمعات
تـرتلـها السمــاوات
لها بقيه ............
الشاعر
موسى البديري
لحد اليوم جيــل لجـيل ينقــل هيبة أفعــاله
هذا ابن الحسن معروف هز الجيش وارجاله
ساواها العســاكر ذيــچ کلها بفــردت انــعاله
( وچم رايه النكس بيمينه )
الشاعر
موسى البديري
أحله عشگ مر بينه يالمهدي يا والينه
يالمنتظر يالمنتظر يالمنتظر
❣️❣️❣️❣️❣️❣️❣️❣️❣️
أحله عشگ مــر بالمحب أحله غرام الصار
عاشرنه بالـذر بالمهد غذانه واحنــه زغــار
وعذالي من هذا ألعشگ محتاره مني تغار
منعوفـــه حبــك للأبــد يــا وارث الأطهـار
أبدم الگلب شارينه يالمهدي يـا والينه
يالمنتظر يالمنتظر يالمنتظر
❣️❣️❣️❣️❣️❣️❣️❣️❣️
بشاطي العشگ روحي رست يالمهدي محتاره
وبحــور شــوگي بهل العشگ تدريهه تتجـاره
وتــدري الدمع يــا سيدي مــا سكنــت أنهاره
وتــدري اليحب يالمنتظـر مفضوحـه أسراره
تفضحهه دمعة عينه يالمهدي يـا والينه
يالمنتظر يالمنتظر يالمنتظر
❣️❣️❣️❣️❣️❣️❣️❣️❣️
عاشــگ ألك يبن الحسن تدريني يالموعــود
وتـدري اليحب يالمنتظر ينطر حبيبه يعــود
طـال البعد يا سيدي وجفــن اليحب مرمود
وتدري النظر ياسيدي لدرب المحب مشدود
لجيتك عمر تانينه يالمهدي يـــا والينه
يالمنتظر يالمنتظر يالمنتظر
❣️❣️❣️❣️❣️❣️❣️❣️
نبته ونعاني من العطش مـــر بينه يا مـولاي
نحيه ونطگ أحنه ورد يالشوفك أعذب مـاي
يا يوم ينطــر الفجـــر يكشــف ظـلام أعـداي
وأترّجـــع الثــار بألـــف يـالمهـــدي يالوفـــاي
وجدك توافــي لديّنه يالمهدي يا والينه
يالمنتظر يالمنتظر يالمنتظر
❣️❣️❣️❣️❣️❣️❣️❣️
الشاعر
موسى البديري
هوسه الى الامام الحجة ابن الحسن عليهما السلام
باچــر رايــة العبـــاس چــف المهــدي يــرفعــها
وجذور أهــل الكفر والجور مــن الأرض يشلعها
الصفعها الحمزه اي والله يرد المهدي يصفعها
( ويذلها المهدي بچف ايده )
**
الشاعر
موسى البديري
تلولي ام البنين احتــــارت بأمــره
تصد عباس عينه من الزعل حمره
نام ابيوم ذكـــــرت زينب الحـــره
( وبزينب گام اتلوليله )
❣️. ❣️. ❣️. ❣️. ❣️. ❣️. ❣️. ❣️
الشاعر
موسى البديري
قصيدة إلى تتويج الامام الحجة ابن الحسن عليهما السلام
تتويجه رباني أمـــامي المنتظـــر
وبحبه غذاني أمـــامي المنتظـــر
تستاهــــل البيعـــه يـــا يا قائد الشيعه
*----------*----------*
مّن الله هــذا التــاج
لا مو ذهــب لا عـاج
تــــــاج الأمــــــامــه
تــوّجــك ربـــك بيــه
للمهــدي گــال أنِطيه
عـــــزه وكـــــرامـــه
لأبـن النبــي المخـٕتار
وارث علــي الكـــرار
اتلــوگ الــزعـــــامــه
ياسر وجــود الكـون
بمّحَبتــك مفــتــون
ﮔلبــي وغـــرامــــــه
سر حبه إيماني إمــامي المنتظر
تتويجـــه رباني أمامـــي المنتظر
تستاهل البيعه يـــا يا قائد الشيعه
*----------*----------*
مــنْ الــوصي الكــرار
بالحسن هالســر صـار
وانـــوبـــٕٕه بحسيــن
صــار بعلــي السجــاد
وبالبـاقــر الســر عــاد
ولصــــــادق الــديِــن
وبالكـاظم المحبـوس
للرضا ساكــن طـوس
بصلـــب الجــواديــن
وبالهـادي ســر النــور
وللعسكري مــذخــور
نــــــور الميـــــامين
ساكن أبوجـــداني أمامـــي المنتظر
تتويجــــه ربــاني أمامـــي المنتظر
تستــــاهل البيعه يـــا يا قائد الشيعه
*----------*----------*
تقشــع ظـلام الجــور
وتمليها عـــدل ونــور
تمليهـــا أحســــاس
نــورك يشــع بالكــون
أنكحل ابجيته أعيون
ونــعــطــر أنفـــــاس
سيــدي يالمــوعــود
يا يــوم لينــه أتعـــود
يا عطـــر ورد ويــاس
والــرايـــه يالقــــائــم
من چف گمــر هاشـم
هل الرايه مــن عباس
بالعـــزه وصاني أمامي المنتظر
تتويجه ربـــاني أمامي المنتظر
تستاهل البيعه يـــا يا قائد الشيعه
*----------*----------*
وي الحـشد شفــناه
بيــده يعلّي ألــــواه
مــا احسـبه غايــب
رايــة علــي ابيمناه
ترهب اگلوب أعداه
تـــرعــب كتــايــب
والگال مــا موجــود
امنيــن هــذا الـــزود
هـــــز النــــواصـب
المهدي الحشـد وياه
مــا يــربــح العــاداه
ابـــن الـــغــــوالــــب
يا نبض شرياني أمامي المنتظر
تتويجه ربــــاني أمامي المنتظر
تستهل البيعه يـــا يا قائد الشيعه
*----------*----------*
الشاعر
موسى البديري
