ميمر ( شح الهوه) إلى بطل كربلاء ابي الفضل العباس عليه السلام الجناسات معرفه للقائ
شال اللوه. وشح الهوه
سيفه برگبهم ما روه
الطف ونــزل بي عباس
صاحـت الــوادم حيـدر
**
حيدر علــي كــف. الگمـر مــن كفـه
غيّره بفخر وسط الحـرب مـن كفـه
ميــزان حيـــدر والكفــل مــن كفــه
چف الفحل بيهم نزل
موت وحمل چفه الأجل
هبت غضب ذاك اليوم
ريــح الإلـــه الأحـمـر
١_كف
٢_لا غيره كفو لها
٣_كفت ميزان ثانيه
*
أجيوش الكفر ماكــو ابـد منجه ألها
صــوفر زرعهــه مـــن وصـل منجلها
مثل الصگر صــوب الحرب من جلها
سيفه الحكم يموت السلم
من عينه لو وجه سهم
بالحــرب عين العبـاس
التـوگـع عليه يتطبـر
١_لا نجاة
٢_ منجل الحصاد
٣_حين دخل عليهم
**
مثــل الغنم يــوم النــزل حــاد ألهـا
سيفه ابزغر چفه الگمر حـاده الها
عالمشرعه حــط بالحـرب حـد الها
خط أبعزم حد للزلم
اليوصـل خيمّنـه ينثلم
حد ورسم چف عباس
يـا هــو اليعبـره يگــدر
١_حادهم بسيفه
٢_حد السيف
٣_حد لا يتجاوزونه
*
طشــرها چــانت بالحــرب مصطفـه
جن سيفه كـالو بالحرب مس طفــه
غيــر الـرؤوس الحــاقــده مصطـفه
يقره الفلق مما خلق
چم هامه سيف الله فلق
جيش ابرهه وأهل الفيل
صــارو عصــف وأتبعــثر
١_اصطفاف العدو
٢_مس من الجن
٣_لم يختار
*
الــرايــه ابيمينــه وللنجــم عــــلاها
الچانــت سليمـه ابخــزرتـه عـــلاها
شــال العذب بس مـا شـرب علاهاااا
أهل الجفه تنقل صفه
يم النــهر خـــان الوفه
لا ما أشربك يا مـــاي
وگلب الحسين أتفطر
١_رفعها
٢_اي جعلها مريضه
٣_حتى لا يقولون شرب ماء
**
عــن الخيّم عــود أنمنـع شاطــي الها
گلبــه أبجمـر ذاك الوكــت شــاط الها
بسيفه الگمر صوب النهـر شاط الـها
الهم گصد سيفه حصد
يهنونه كل واحــد شرد
كلمن سلم من عباس
ظــل العـمر يتعـثر
١_النهر
٢_احترق قلبه
٣_ركض بتجاههم
*
وسط الحرب غيض انفجـر بركانه
زلــزال والطــف يــرتجـف بــركانـه
چن سيفه نــاده بالحـرب بـركه انه
بحز الرگب الچف ما تعب
العبــاس بيــده لهل السبب
اگطع أبـروس الأنذال
بچف الگمر اتبختر
١_بركان
٢_اركان الطف
٣_من البركه
**
وجهه الگمر مثل البـدر مــن طــرها
زاغت اگلوب اهل الشـرك مــن طـرها
روس ال أميــه صــارمه مــن طـــرها
يشبه علي من يعتلي
عــباس ربــاه الـــولي
حيدر وربى العباس
بالحرب الله يستر
١_اشرق
٢_حين مشى بينهم
٣_ شطرها
*
الشاعر
موسى البديري
قصيدة ( اول مره ) تروي حال الامام الحسين عند شهادة أخيه ابي الفضل عليهما السلام
اول مــره حسين انظــرله بمشيه يميل
وشمس العاشر چنها بعينه صارت ليل
رد حســين ولازم ظـهره
مرسومه بنظراته الكسره
بمشيه يميل
****
حيره منين اسولف وابدي بأحزاني
يــوم اتوادعــوا للمــوت خــوانـــي
هــوو للگـــاع واحـد شابگ الثاني
بســاعتها تغّـَيـر شكلــي والــوانــي
اول مـــره بعمــري انظــر هيــچ اوداع
انظر لحسين شلون اهوى فوگ الگاع
وخانگته يــا حيف العبره
مرسومه بنظراته الكسره
بمشيه يميل
****
ودعني ومشــه ودلالي راح ويـاه
احس حسين كل خطوة جدم ينعاه
يا ريت النهــر كله انگطع مجـراه
لان خلّــه بـدليــل حســين اخ وآه
عطشان حسينك انظــرله مــو للماي
چنــه ينــادي بيــك اتــروه ظل وياي
محتاره انظر لابن الـزهره
مرسومه بنظراته الكسره
بمشيه يميل
*
عطشان اعلى اخيّــه وگلبــه يتلــوه
واجتــه مــن الشريعــه چلمة الخوه
مــن طوله اشوفه حسين من اهوى
تعنّـه المشــرعـــه ودلالـــه يتچـوه
ينظرله حسين ابدمعــاته بـــلايا زنــود
وبكتره الرايه وچفينه لصــدره الجــود
بــدلالـــه تتــلاهب جــمره
مرسومه بنظراته الكسره
بمشيه يميل
*
تعنه المشرعـــه ومتغشي بأحــزانه
صگر چنه وكسيره بهيمه جنحـانه
نظــر عبـــاس طاحـت يمّه ذرعانه
روحــي بطيحتك مـــا تروه عطشان
يا عباس اگعــد يا خويــه شلون الحال
تنتظــرك زينـــب والخـدّر والاطــفــال
خلينـــي نـــاداه بحســـره
مرسومه بعيونه الكسره
بمشيه يميل
****
راد يشيــل اخيَّــه وگــلّــه خلــينـي
بأحضــانك امــوتن يـا نظـــر عيني
ضمايه اطفــال بأخيـــامك تتانيني
اوصّله اشلون وآنه بكتري چفيني
خليني اعلى الشاطي موذر يا مولاي
ريحانت دلالك تنطــر منـــي المـــاي
بلغ سكنــه گوطر عمره
مرسومه بعيونه الكسره
بمشيه يميل
*
رجع منْ الشريعه حســين بالگوه
اصدنله واگــولن هــوه مــو هـوه
وصل للخيمه حيــره ينادي وبلوه
چنه يگــول راحــت خويه المروه
رد حســين وانظــر طــوله ظــل يمــيل
يا زينب عالشاطي بحسره عفت الحيل
لا يمنه يــا خويه ويسره
مرسومه بعيونه الكسره
بمشيه يميل
**
الشاعر
موسى البديري
1447 هجريه
قصيدة ( اول مره ) وكأني بزينب تندب ابا الفضل العباس عليه السلام في أيام السبي ودخول الشام
يا ابو فاضل يــا ابو فاضل
هاي أول مــره ضعنــي بلايـا كـــافل
*
خويه يا غيرة هلـي
يا ذخر حيدر علي
حيل صعبـه كافلي امـشـي أسيــره
انــه تـربات الستر
وانــه قبله للخـدر
يحدي بضعوني الشمر كـلفه وچبيــره
خويـه أول مــره ضعنـي يمشي بـس بــلا ضـوه
كــل شــي مـن بعـدك تغيــر حتى بالــريه الهوه
ياعطش گلبي أعلى طولك خويه ضامي وماروه
هــاي أول مـــره خـويه نمشــي لكـن مو سوه
يــا حســـافه يـــا حســــافه
ضعني يمشي والعدو يبره المحامل
*
خويه يا نبـض الگلـب
بلا گمر وحشه الدرب
منين مـا اصدن غــرب تبره لضعنه
لحالتي صعـب الشرح
منين مــا اديرن ذبــح
گبالي راسك عالــرمح يا ابو المحنه
كلفه يــا عباس خويــه لضعني يبــره الأجنبي
مــن جبتني بعزه للطف ضعني بي هيبــة نبي
وسفه عــدوانك تنــادي للسبي گومي اركبــي
والله يــا عبــاس كلفــه بــت محمــد تنســبي
خويــه صعبه خويـــه صعبه
يهوى عالشاطي الوفــه وي المراجل
**
خويـه أظن هذا حلم
ضعني خالي من الزلم
بــس عليل وتنشــتم بنت الوديعه
ريـت وافاني الأجل
التفت ماكـو الأهـل
صحت والمدمع نزل آه يالشريعه
ضعني يــا عبــاس يطلع وانته مــا تبـره الضعـن
صعبه يــا ابو الغيــره خــدّر للغــرب مــن ينسبن
خـــويه عالنوگ الهزيله بعــد عينك هــل المشـن
أعيوني المضعيات طولك خويه حگهن لــو عمن
دمعــــي يجــــري دمعـــي يجـــــري
خويه يا عباس دمع الحره سايل
*
ركبتنــي بنـــاگتي
وتبره لضعوني إخوتي
هسـه حيــره حيرتــي امـشي سبيه
خويـه محتاره أبحـرم
مـن هـــوه ذاك العــلم
راسي ريته الي أنهشم بالغـــاضـريه
ضعني يمشي بلايا كافل خويه ما اصدگها هاي
حلم هــذا لــو حقيقه الســوط مطبــوع ابگفـاي
يــا عطش روحي لحنانك والله مـا يرويها مـاي
هيبه گبــل الناگه تمشـي هسـه اعــوفنك وراي
عالشـــريعـــــه عالشــريعــــه
طايحه الغيره يخويه وحملي مـــايــــل
**
خويه ضنوت حيدره
انــه أروح أمـيســره
وبـالحــرم متـحيـره وادخل دواوين
جرحي ما يشفه ابد
يا محن انظــر بعــد
مــن بلد امشي لبلد يا عملت البين
خويه عيـــد الشام وسفــه أوجـوهــم مستبشـره
وامشــي بالسوگ وشمــاته كلهه ضعنـي تنظره
دخلــت الديــوان زحمــه وتــدري انـــه أمخدره
ومن ضرب ثغــر الامامه صحت سبـع الگنطره
خــويه وينــك خــويه وينــــك
وسفه خصمك يـــا كفيلــي بينه عايــل
ـــــــــــــــــــــــــــــــــــــــــــــــــــــــــ
الشاعر
موسى البديري
يا ابو فاضل من طحت عالمشرعه
يا ابو فاضل بينــه حلـــت فــاجعـه
حرگوا أخيام الستر الخيل داست يا صدر
*----------*----------*----------*
من طحت عالشاطي خويه ظلمه صارت يالگمر
رد اخــوي حسين منــك يمشي مكســور الظهر
خــويه باخــر ساعـه يمكن ادري ما عندك خبر
گاعد الشمر أعلى صدره بسيفه حز منه النحـر
يـــا هضيمه مــن بعد ذاك الذبــح
يــا هضيمه راسه مرفــوع برمح
بگلبي ظل يسعر جمر الخيل داست يا صدر
*----------*----------*----------*
خويه اسولف يا مصيبه من بعد ذاك الجــره
أخيولهم رضتله صــدره والضلــوع مكسـره
الظهره مكســور بغيــابـك هسـه نايم عالثره
والله لــو مـوجـود چفك ياهــو يلمس منحره
يا حسافــه طيحتــك كســرت ظهـر
يا حسافــه أعيوني صاحبها السهر
خويه وبتالي العمر الخيل داست يا صدر
*----------*----------*----------*
خويه وأصعب حاله مرت يا گمر روحي وهلي
بالخيــم نيــران وجــتْ ومــا بگــه ناصــر الي
هجــت الأطفــال بالبــر والنّسـه يـا ابــن الولي
واسمــع العــدوان صاحت هاي زينب بت علي
يــا كفيلـي صعبه زينب تنشتم
يــا كفيلـي والشمــاتــه تبتسم
نــار فگـــدك تستعر الخيل داست يا صدر
*----------*----------*----------*
يا ابو فاضــل خويه صعبـه هسه مچتوفه بحبل
وامشي مسبيه وأسيره وسفه تالي اعلى الهزل
خــويه احتــار بجـوابــي عنــك مــن أرد أنسأل
عمنه يـــا زينب تأخـــر صعبــه شيقنــع الطفـل
يـــا مصابي للجره بطف كربلـه
يــا مصابي يالجثثكــم بالفــــلا
بروحي زين وظل صبر الخيل داست يا صدر
*----------*----------*----------*
خويه يـا عباس حگــه دمــع المعــاتب نـزل
هــاي أول مـره تــدري الليل أجاني بلا أهل
واسمع الشمــات نادت ويــن راح ألي كفـل
شگد تمنيتـك تسمعـه خويــه ويمرلك زعـل
صعبه شامت يمي وبليل الخطر
صعبه شامت بعــد عينك يالگمر
خويه مذهولــة فكر الخيل داست يا صدر
*----------*----------*----------*
موقف شگد صعب اگوله مر عليه ابكربلـه
لا خيّـم ظلــت يخــويــه بالبــراري العــايله
سكنـه عنــك نــاشدتـني والمدامــع ســايله
عمه ماكـو ألي كفلنــه أنتي صيري الكافله
بالبراري خويه أطفال وحـرم
بالبراري من بعد حرگ الخيّم
لله سلمنــا الأمــر الخيل داست يا صدر
*----------*----------*----------*
الشاعر
موسى البديري
نبــــــعُ الوفـــــاءِ رمــــزُ الإبـــــاءِ
هــــذا هــو العبــاس
*----------*----------*----------*
طالـــع بالمصــادر وابحــث واقــره
عـــن رمـــز الإبـاء وقبلتـــه الحــره
عن معنه الوفه وعــن ضاهر وسره
بالعبــاس كــــل الدنيــــا متحيـــره
تروي العجائب عن ليث غالب
هــــذا هــو العبــاس
*----------*----------*----------*
ابــن حيدر علــي ونعمين مــا خَلّف
الـــوفه بعبــاس والعبـاس يتشرف
حارة بيه الدنيا تلمــه ارض الطــف
للإخلاص قبلـــه أصبــح ومصحف
والكــونُ رتل من هذا يسأل
هــــذا هــو العبــاس
*----------*----------*----------*
اروي لك قصص و ادريهه معــروفه
عــن عبــاس بـس بدمعـــه مذروفـه
چــم معصـــوم دنــگ قبــل اچفوفه
إذاً حگه الشعـــر من تعرگ احـروفه
لا زالَ ضامي بحرُ الكلامي
هــــذا هــو العبــاس
*----------*----------*----------*
نافــذ للبصيــره الصــادق يوصفـــه
اذن معصـــوم بس الــلازم يعــرفـه
الآبه ويـه الوفه يغفن تـره بجــرفه
انگطع كل الوفــه مــن انگطع چفه
الكــونُ كبـــر فيــــهِ تحيـــر
هــــذا هــو العبــاس
*----------*----------*----------*
قــرآن الگــمـــر بيــه الوفــــاء أيــــه
اجيـبن يـــا مفســر يشــرح ويــايــه
وصل شاطي الفرات بيمنته الرايــه
مله جوده ورجع بس ما شرب مايه
روى الحياةِ بالمكـــرماتِ
هــــذا هــو العبــاس
*----------*----------*----------*
علـي اختاره النبي بأمر الله بالتعيين
أخــــوه وهامتــه قدمهــه لجـل الدين
وعلي اختار الگمر ناصر لاخوه حسين
وافــه لخوّته بهامــــه وگطـــع چفيــن
عهــدا تكـــرر من وافى حيدر
هــــذا هــو العبــاس
*----------*----------*----------*
الشاعر
موسى البديري
نضحي ارواح فدوه منه لحسين
وابـد مـا بيها والله منه لحسين
نطلب حاجه وحده من الحسين
يقبلنا خــدم ابـن الزچیــه
الشاعر
موسى البديري
هوسات الى انصار الحسين ع
**
نعمين وثلث تنعـــام مــن أنصار ابــو اليمه
دون حسين بالميدان واحـــدهم رخص دمه
نهار العاشر بعاشور عل عايل صبح ضلمه
(( والكون احتار بأنصاره ))
*
مـــا چن بالحــرب سبعين واحد بالاف ينعد
سمـــا العاشــر بالملاگـــه چنـــه بغيم يتلبد
لن عابس برز للجيش نفسهم ما بعد يصعد
( واحتار الجيش أبصولاته )
*
الحشد أنصار ابو اليمه نفــس الموقف أتكرر
عنده بالحشد عابس حبيب وياه علي الأكبر
ذو الفقار واحدهم على العدوان موت احمــر
( وعالساتر وفو انصاره )
الشاعر موسى البديري
أبيات ابوذيه الى أنصار الحسين عليه السلام
بخيـــام حسيــن ذاك اللـيـل ون صار
وفــزعوا للحسـين أصحــاب وأنصـار
على الموت احنه نبقه وياك ونصــر
لحد مـــا ننذبح بسيــوف أميــــه
*
الدنيا إخـلاف عينك حيل مـــره
ولا بعــدك يمرنــه الفــرح مـــره
لوّن أنمــوت دونــك ألــف مــره
منعوفــك ابـــد بالغـــاضريــــه
*
الشاعر
موسى البديري
والله ونعميــن مــن أنصــــاره
والله ونعميــن مــن أنصـــاره
*
نعــم الأنصــار أهــــل الغيـــره
مـا يــرضــون حســين بحيـره
أنـريد المـوت ونـــرفض غيره
وأعلــى العايــل شنّــو غــــاره
*
أنصــار حسين أهــل النخـوه
وافـــو للـصحبــه وللــخــوه
الدنيـــا أبغيــرك لا مــا تسوه
نــــادو والمــدمـــع يتجـــاره
*
نــادو يحسين ابــن الــزهـره
دونـــك فــوز الضحه بعمـره
كـــون أنضحــي 100 مــره
يــا روح الــديـــن وأنـــواره
*
امشــو بهــذا الليــل الچلچل
الظــل يمــوت ويـاي ويٌقـتل
صاحو هيهـــات ومــــا نقبـل
ألا ودمنــه أتفيــض أنهـــاره
*
شيخ الأنصــار أعلـن خطبه
شتگولــون بهــاي الصحبـه
نـادو كلنــه حسيــن أنحبــه
دون الموت أنصير أســواره
*
عــابس نــاده وگلبـه أتحيـر
لا مـا اعوفك يــا ابن حيـدر
كــل ساعــه دونـــك اتطبــر
مجنون ومقبــوله أعـــذاره
*
كبّر جون ودمعه أعلـى الخـد
مــا عنـــدي غيـرك كــل احد
دونـــك هـــذا اللون الأســود
ودمي يصير لــــدمك جــاره
*
وفــو لحسـيــن الـــوفـــايـه
أبـــاب المـرقــد صــارو أيـه
لحسين التگصــد مشــايــه
يـــزور أصحــابه كلمن زاره
*
الشاعر
موسى البديري
حسـينــيه فــدائيــه
زلم شمرتها ثوريه
تنــادي للابد علي علي مدد
****
المجالس جابت القاده
جنود بخدمــة السـاده
تذل فــرعون واحفاده
تظل طــول العمـر
جابــت زلــم ثــوريه
للمــذهــب فــدائيــه
زلــم كـلها حسينــيه
العمر نذروه نــذر
الـدرب بحسـين ننـدله
المجالس ترفض الذله
التماده بصوتنه نگله
فلا نشخى العدد
علي علــي مدد
*
الحاقــد يفهــم الفكره
اللطم علمـنا عالثـوره
شعل بينه الف جمـره
ابد مــا تنطفي
اليضَّدنه انذله ونضده
العلينـا اطـاول شحده
جنود المرتضى تــرده
وفي يتبـع وفي
ولا بينــه التعــز روحـــه
الشــهاده بيهه اطــروحـه
الحرب احنه الها الملوحه
عقيـده ومعتقـد
علي علي مدد
*
نزعــل سـاعه لـو مـده
نتـوحـد ساعـة الشـده
اخونـه بروحنه نسنده
زلم شيعــة علي
نمطـرها غضـب احـمر
نقلعه البـاب وي خيـبر
اسد واحـدنه مـن يزأر
خصمنه يبتلي
التطاول ضدنه وتماده
نظرها صولت الســاده
ذلــت اهـلـه واسيــاده
أله الكـون استعد
علـي علـي مــدد
*
عـابس علَّـم الشيعــه
العمـر لحسينّه انبيعــه
يظل قائــدنا ونطيـعه
أمـر يأمر امــر
جنوده ونفخر بهايه
ابد ما تهوه اله رايه
قاده وتمشي مشايه
تظل طول العمر
بيضه وصافيه النيه
بحرب لابسله بيريه
بالفتوى الجهـاديــه
جهز عده وعدد
علي علـي مـدد
*
الشاعر
موسى البديري
تجليبه مذيل بهوسه عگيلي إلى أنصار الامام الحسين عليه السلام
الأنصـــار أتخلــد مــوقفهــم
*----------*----------*
مثل أنصــار أبو اليمه صعـب نلگـه
وي المـوت تلاگــو لجلـه فــد ملگـه
عشگهم صار ياهـوه يفرط ابعشگه
( ولحسين أرواح ايرخصوها )
*----------*----------*
قائـدهـم حبـيـب الــي رخـص عـمـره
أسد واگف رغــم مـــا منحني ظهـره
أضحي الــروح فــدوه ينـادي للعتـره
( شيخ الأنصار يسمونه )
*----------*----------*
جون اسود شكل بس ابيض الموقف
وســط الحومه واگـف بالنصر يهـتف
دمــي اليــوم وي دم السبــط ينــزف
( وحسين يغير الواني )
*----------*----------*
عابس جننـاه بــس عشگ أبو اليمه
يحس ضـرب السيف أتقبله وتلثمـه
من فـرط العشگ مــا يشعر بجسمه
( لحسين اتوذر محبوبه )
*----------*----------*
بـربــر آيـات عشگــه اليــوم رتلــها
وقـــران الغـــرام حسـين سجــلـها
ينادي روحه فــدوه حسين اقبلـها
( وخادم للعتره اختاروني )
*----------*----------*
زهيــر الشــاف جنــات الخلـد حـبه
وأبـو الاحرار بالطــف للعشگ كعبه
ضامي ومــاي بيده حسين اليشربه
( وحسين يرويها أنصاره )
*----------*----------*
الشاعر
موسى البديري
موشح إلى انصار الامام الحسين عليه السلام
خطــوا الأنصــار آيـــات الشـــرف
ورخصوا دمهم لجل أقدس هدف
*---------------*---------------*
رخَصّــوا دمهــم لجــل ديــن الإله
والله لحسين السبــط دينــه اجتباه
هــو يحــي الديـن من نحره ودماه
ومثـــل دم حسيــن هم دمهم نزَف
*---------------*---------------*
خطـــوا الأنصـــار آيـــات الــــولاء
يــوم نزفت عالارض ذيــچ الدماء
سجلوا أروع دروس مـن الـــوفاء
نهـــر والضامي عذب حبهم غرَف
*---------------*---------------*
خطوا أســرار المجد أهل الصـمود
يوم لحسين انتمــوا صــارو جنود
همّــه سبعين وتـعنـــوها الحشـود
ولا شخص منهم ابــد گلـبه رجَف
*---------------*---------------*
خطـــوا الأنصـــار بالطـــف انتصـار
مثله ما أظن بالسمه وبالارض صار
الله كــرمهـــم أوي حســين المـــزار
أباب أبـو أليمه الدهـــر الهـم وگـَـف
*---------------*---------------*
خطـــوا الأنصــار أعظـــم ملحمـــه
حيرت أهـــل الأرض وأهل السمــه
وقعوا لحسين مـــن فيـــض الدمه
موقـف أبكل جيل مثله ما أنَوصَف
*---------------*---------------*
خطوا أوي حسين لــوحة كبــريــاء
مــن تفايض دمهم ابطـــف كربــلاء
سجلــوا أنبـــل دروس مــن الآبــاء
وحگه هـــذا الكون بيهم لـــو هَتَف
*---------------*---------------*
خطو آيات الدمـه بـأرض بالطفــوف
ورخصــو ذيــچ المنــاحر للسيـــوف
مثل هاي التضحيه ما أظــن نشـوف
الحب جنـون الهم عبــر حـد الشَغـَف
*---------------*---------------*
الشاعر
موسى البديري
قصيدة حروف من الذهب إلى سفير الإمام الحسين عليه السلام
حروفْ منّ الذهب
أسم مسلم كتـــب
بيده رايه وسيفه أيه
لنصرت حسين
*
أبفخــر تاريخ المواقف والكــرامه مسجله
أبعّــزه تاريــخ الشهامــه نبتديهــا أبسملـه
مسلـم وقصـــة خلــوده حيــرة كــل الملـه
مسلم أول شعله ضوت گبــل ثــورة كربله
بـــدايــة كـــــربلاء
رخص فيض الدماء
شبه عمه رخص دمه
لنصرة حسين
*
مسلم وتاريخه يشهد ما خضع لأهـل الكفر
دارس بجامعة حيدر فلسفــة معنى النصـر
تخرج بأعلــى شهـاده بالشجـاعـه وبالفــكر
مسلم أتخـرج سفيــر وعَــدّهِ حـيدر للأمــر
ثبت هذا العهد
فــلا يهتز ابــد
رخص عمره وفيض نحره
لنصرت حسين
*
حسين مو صدفه اختياره عـن أراده ومعــرفه
يعني مسلم بالأسـاس اختاره جـده المصطفى
حسين من دون أهل بيته بهل السفاره مشرفه
يدري بالكوفـــه وغـــدره مـــا تغير مــوقفــه
ثبت عنده الهدف
فــلا گلبه رجـــف
لا يبالـــــي راسه عالي
لنصرت حسين
*
رغم غدر الكوفه مسلم ابــد مـــا طـخ هامته
جيوش حاطــت بيه ولكــن رفت بعـــز رايتـه
مثــل حيدر صال بيهم نفــس عــزمه وهمتـه
چنــه ذو الفقــار بيده مـــوت ضـربت يمنتـه
بــرز شمّرت علي
العدو ظل مبتلي
شـــال سيفه واخــــذ حيفه
لنصرت حسين
*
بين بنيــان الامـــاره وبيــن حضـــره قائمـــه
شوف فلسفة المــواقف مــن يسجلها الدمــه
ضحه مسلم دم وريده دون ابن حامي الحمه
صـــار قبله وشـــع منـــاره وربك بعز كرمه
منايــر مــن ذهــب
شمس چنها الگبب
وبدمـــائه خط ولائه
لنصرة حسين
*
الشاعر
موسى البديري
ابيات ابوذيه لسان حال السيده حميده بنت مسلم بن عقيل عليه السلام
تحن روحــي تعــال اسمــع لحنـها
الحزن صــايـر بعــد عينـــك لحنــها
إســهـام أمصــابــك أللــيلـه لحنــها
وصــابن گلبـي مثــلك هالمسيـــه
♠️♠️♠️♠️♠️
گلبي الحسره مــن بعــدك يجـرهــا
وعلــى الآلام بـس ربــي يجـرهــا
صدگ بالسوگ ظل جثتك يجـرهــا
الشامت بويه بغضاً بالزچيـــــه
♠️♠️♠️♠️♠️
الشاعر
موسى البديري
قصيدة ( ياهو أنته ) إلى ابو الفضل العباس ومكانته عند أهل البيت عليهم السلام
يــا أبو فاضــل ... ياهو انته
حيره شخصك ... ما عرفته
الف لام وميم نــزلت بالــسور
لهسه بالتفسير محتاره البشر يا هو انته
****
عنك أحــروفي اجـت تكتــب قصيده
شعدها عنك فكــره يــا ابـن الصميده
غير كافــل أخته بس انگطعــت أيـده
وأنت چــان الــدين يتــروه بـــوريده
الدين من دمك روه
والوفه طش بالهوه
انت لجل القل هـوه دمــائــك
يا أبو فاضل ... انـــه حاير
ومثلي حيره ... من المنابر
شتارك بگلب اليحبونك إثــر
لهسه بالتفسير محتاره البشر يا هو انته
****
كل حروف الشعــر نجمعها ونوصفك
حگهـا خجــلانه فــلا تگــدر تنصـفك
الساقــي انته الكافـــل وأكثـر نعـرفك
صـرت ظهر حسين ما نگدر نفهـمك
انتــه جيشه لو ظهر
حيــرتــنا يالگمـــر
شتــارك ابگلبه اثــر رحيلك
انتـه ظهــره ... لو عضيده
بحيره تنشد ... هالقصيده
وبحر شخصك ما شفت مثله بحر
لهسه بالتفسـير محتــاره البــشر يا هو انته
****
حايــر أبمــوقــف ولا مــره فهمتــه
ولا گدرت أبشعري يالكافــل وصفتـه
حسين من گلك يخـويه بنفسي انتـه
يعني فدوه يگول شخصك ما عرفته
حيره يا ابـن الولي
يا هو اليوضح ألي
الكافل انته لو علي يشوفك
يا أبو فاضل ... يا عظمها
كلــمه رايــد ... افتهمــها
حسين من كلك فدوتك يالكمر
لهسه بالتفسير محتاره البشر يا هو انته
****
واهــمْ الينظــر الك گبــه ومنـاره
وانته بيك أعقول هل الوادم حياره
اعتذر ما ﭼنت اعرفـك بس زيـاره
وانته دين ومبدأ وفكـره وحضاره
من گصدت المشرعه
النهر يجري ومنبــعه
الماي محّـد مــانعــه تشربه
يجري مايه ... وما شربته
قصَدك انته ... مــا عرفته
لان تدري حسين دلاله انفطر
لهسه بالتفسير محتاره البشر يا هو انته
****
يا گمر محتــار ياهــو الـي اسـأله
عن سؤال يَحّير ومـا عنــدي حَلّه
انته ﭼم معصوم ﭼف أيدك يقَبله
حگي مـن احتــار بيك العمـر كلّـه
حيّـرَتـنـي الأسئــلة
عن عظمْ هل المنزله
شخصك ايه مُنزَله وعجيبه
شخصك ايه ... للبريا
ايه ماكو ... منها ايه
آيــه حـدْ اليــوم رتلها الــدهر
لهسه بالتفسير محتاره البشر يا هو انته
****
الشاعر
موسى البديري
رف لواها المنايا رف لواها
زلــزلاهــا بيمينه زلــزلاهــا
•••
بـــرز طـوفان المنايــا وروج أصــبح بالــــرمال
جـزر صارت مـن لفاها اليمنه تاهت والشمال
الخوف من ضربت يمينه نام بأصلاب الرجال
من علي شمرت حسامه اتخاف من عدها الجبال
حاصراها بحسامه حاصرها
زلــزلاهــا بيمينه زلــزلاهــا
***
بـــرز عباس وزلمهم بــأمــره كلهـــا محيـــره
هـــذا مــــو عبـــاس صاحت هــذا قالع خيبره
جمّــع الجيش بحملتـــه بـــزوده رد وطشـــره
گلــب يـــوم الطف عليهم صــــار يوم الاخره
حيـراها الاعــادي حيـراها
زلــزلاهــا بيمينه زلــزلاهــا
***
غيمت يوم الطفوف وبيه احترات هل الملا
ســـورة الرعد ابحسامه نزلت وي الزلزلـه
سيل نازل بــال أميه بيها ضـــاگت كــربلـه
چــن بــرائه اليوم نزلت بيه ماكو البسمله
واشتراها الحرايب واشتراها
زلــزلاهــا بيمينه زلــزلاهــا
***
وصل يم شاطي الفرات وملك ماي المشرعه
حاضت اسيوف الأعادي چن لفتها القــارعه
خيل تردم خيل ضاگت بيها كـــل الواسعـه
بيده جاب إلها المنايا المــــوت بيده يوزعه
حيرها بحملته حيراها زلزلاها بيمينه زلزلاها
***
وارث الكـرار طبهـــا هـــذا طــاعون الحرب
حيـــراها منين تشـــرد تيهت حتـــى الـدرب
لا يمين البيــهـا ثابـــت لا يســـار ولا گـــلب
ناس من هيبة يمينه تموت ناس من الضرب
طشراها الاعادي طشراها
زلــزلاهــا بيمينه زلــزلاهــا
***
غيـــرة العباس سورة ونزلت ابيوم الطفوف
رتلتهــا مــــن لفاها أهنـــاك بالحومه الألوف
عالعدو نزلــــت علامه انكتبت بحد السيوف
للوفــــه إيه أترتــل ضحه للخوه الچفــــوف
رتلاها الاخوه رتلاها
زلزلاها بيمينه زلزلاها
___
الشاعر موسى البديري
مــن طحـــت يــم النهـر
تدري شنهي الي انكسر
ظهر الحسين يا أبو فاضل يا أبو فاضل
*
يا ابو فاضل من رحت صوب الشريعه
بقـه أمنـاطــر جيّتـك روح الـوديعــه
شحالــه لمّــن شـــاف چفينــك گطيعه
ضاگـت أبعـين الاخو هــاي الــوسيعه
ناده يا خويه الگمر بيك اشد انه الظهر
صار نصين يا أبو فاضل يا أبو فاضل
*
تــدري يا خــويه شجـره ذيـچ الظهيره
ابطيحتك ظهــره انكسر شيـخ العشيره
ومن رجع للخيمه شفت أبوجهه حيره
چنــه گلــي صرتــي يــا زينــب أسيره
من أجه وهل مدمعه بعينه شفت المشرعه
وبيهه چفين يا أبو فاضل يا أبو فاضل
*
من رجــع للخيمه يــا خــويه وسألته
گتلـــه ويــن الكافـــل وهلّــت دمعته
عينه گالت عـل النهر يا وسفــه عفته
أبصفه جـــوده ورايته وچفينه شفته
شفت يا خويه الِأمرْ بالسهم طافي النظر
ماخذ العين يا أبو فاضل يا أبو فاضل
*
خـويه يــا فگـــد الاخــو يسعــر لهيبه
وابد مــا تشبها كــل محنــه و مصيبـه
حسين صارت روحه من بعدك غريبه
نــاده چنــه منين ابـو فاضـــل أجيبـه
يا نظر عيني وعمّت وي سهم عينك طفت
ناده الحسين يا أبو فاضل يا أبو فاضل
*
شگــد رزايـــا مـــرت بــروح الزچيه
مثــل فگـــدك ابــد مــا مــرت رزيــه
طيحتــك اكبــر مــآسـي الغاضــريـه
حسين داست صدره بعدك الاعوجيه
هذا يا خويه الجره حسين گطعوا منحره
بالميادين يا أبو فاضل يا أبو فاضل
*
الشاعر
موسى البديري
https://www.youtube.com/watch?v=_p7TqbXTIog
Читать полностью…
كــربلائي وثائــر دارس من العاشـر
مـا اطـخ الهامــه مـا اطــخ الهامــــه
*-----*-----*-----*
كربلائــي طبــع دم الثــائــر اليجـــري بـوريده
كربرئــي كل مـن يضحي أبدماه لجل العقيده
كربلائــي المـا خضــع للظالم ولا مدلـــه أيـده
كربلائــي ألابــس اگـلاده الشهاده فــوگ جيده
كربـــلائي المنهـج ثوره ظـــل يتأجـــج
مــــا اطـخ الهامـه مـا اطــــخ الهامــــه
*-----*-----*-----*
دارس اني ســر بقاء العاشر الثـوره الكبيــره
دارس اني الموت مو للروح لا موتت ضميره
دارس اني حسين ثائـر عالظلم مو للعشيــره
دارس اني زينب ابخطبتها ثـوره ومو أسيـره
زينـب الثـوريــه خطـت الحــريه
مــــا اطـخ الهامـه مـا اطــــخ الهامــــه
*-----*-----*-----*
عالي راسه حسين ثـــار وصـــار للثــوار كعبــه
عالي راسه اليتخذ منهــج أبــو الأحـرار دربـــه
عالي راسه الماخذل ناسـه طبيعي الكــل يحبـه
عالي راسه الضحه مـن اجل المبادئ مو لحزبـه
عالي راسه أبموته يدوي ثـوره أبصوته
مـــا اطـخ الهامـه مـا اطــــخ الهامــــه
*-----*-----*-----*
عالسواتـر زلــم علمهــا الحسين أعلـى البسالـه
عالسواتـر ثــورة العاشر جديده أعلى الظلاله
عالسواتـر زلــم ضحت دمها مـن اجل الرساله
عالسواتـر دم الحـسين انتصر والله أبـرجالــه
عالسواتــر زودي دمي خــط أعهـودي
مــا اطـخ الهامـه مـا اطــــخ الهامــــه
*-----*-----*-----*
طبعه ثائر دم الحسين النزف من فيض نحره
طبعه ثائر دمــه لمـن سـال أعلن دمــه نصـره
طبعه ثائر كلمـن بعاشــر محــرم صـاغ فكـره
طبعه ثائر كل حسيني وكل غيور يصير ثوره
ثـوره دمه و أيه للحگ أعظـم رايـــه
مــا اطـخ الهامـه مـا اطــــخ الهامــــه
*-----*-----*-----*
من وريده حسين لا للذله خـط دمـــه شعــاره
من وريده صـــار نبراس وعقيده وشـع منـاره
من وريده رســـم للاجيـــال منهــاج انتصــاره
من وريده عكس فكره الموت للحگ مو خساره
من وريـده القانــي عالنصـر ربانــي
مــــا اطـخ الهامـه مـا اطــخ الهامــــه
*-----*-----*-----*
الشاعر
موسى البديري
بفضل الله ومنه وصل اليوم الجزء الأول من ديواني ( وحي الدموع ) قصائد في واقعة الطف
بعد تأخره بسبب الاعتداء الصهيوني على الجمهوريه الاسلاميه
شكرا للاخ الشاعر أبو ياسر الكعبي الذي كان له الفضل في تشجيعي ومتابعة التنضيد والإخراج والطبع
وشكرا لجمعية المنبر الحسيني لتكفلها بطباعة الديون على نفقتها الخاصه
كتب الله لهم الأجر وجعلها في ميزان حسناتهم شكرا للاخ مصطفى الركابي لسعيه الحثيث في طباعة الديوان
موشح إلى انصار الامام الحسين عليه السلام
خطــوا الأنصــار آيـــات الشـــرف
ورخصوا دمهم لجل أقدس هدف
*---------------*---------------*
رخَصّــوا دمهــم لجــل ديــن الإله
والله لحسين السبــط دينــه اجتباه
هــو يحــي الديـن من نحره ودماه
ومثـــل دم حسيــن هم دمهم نزَف
*---------------*---------------*
خطـــوا الأنصـــار آيـــات الــــولاء
يــوم نزفت عالارض ذيــچ الدماء
سجلوا أروع دروس مـن الـــوفاء
نهـــر والضامي عذب حبهم غرَف
*---------------*---------------*
خطوا أســرار المجد أهل الصـمود
يوم لحسين انتمــوا صــارو جنود
همّــه سبعين وتـعنـــوها الحشـود
ولا شخص منهم ابــد گلـبه رجَف
*---------------*---------------*
خطـــوا الأنصـــار بالطـــف انتصـار
مثله ما أظن بالسمه وبالارض صار
الله كــرمهـــم أوي حســين المـــزار
أباب أبـو أليمه الدهـــر الهـم وگـَـف
*---------------*---------------*
خطـــوا الأنصــار أعظـــم ملحمـــه
حيرت أهـــل الأرض وأهل السمــه
وقعوا لحسين مـــن فيـــض الدمه
موقـف أبكل جيل مثله ما أنَوصَف
*---------------*---------------*
خطوا أوي حسين لــوحة كبــريــاء
مــن تفايض دمهم ابطـــف كربــلاء
سجلــوا أنبـــل دروس مــن الآبــاء
وحگه هـــذا الكون بيهم لـــو هَتَف
*---------------*---------------*
خطو آيات الدمـه بـأرض بالطفــوف
ورخصــو ذيــچ المنــاحر للسيـــوف
مثل هاي التضحيه ما أظــن نشـوف
الحب جنـون الهم عبــر حـد الشَغـَف
*---------------*---------------*
الشاعر
موسى البديري
شوط كربلائي في فضل الأنصار عن غيرهم وقول الامام الحسين عليه ما وجدت أصحاب خير من اصحابي
گـــال حسين ابــو اليمه
كلمه تحيّــر الأفكــار
مثل أنصاري ما موجود
ولا ينعاد هيچ أنصار
*---------------*---------------*
كلمـه تحيّــر الاذهــان كلمه أتحيّــر الألباب
عن أنصار ابو اليمـه تحير شتكتب الكتاب
بهاي الكلمه والمضمون سد حسين عنها الباب
كــل جيــل اليمـر حاير
أمس والجاي والحاضر
بذاك الصــار بالعــاشر
فدوه گالو من أنموت بدربه نعيش بس أحرار
*---------------*---------------*
مو مــره لــون أنموت خل انموت الف مـره
ونرجــع نحترگ بهواه بعالي الــريح نتذره
قليله نحسها ومقصرين لابن الطاهره الزهره
العشگ لحسين مـو للغير
عسل لجله الممات يصير
اليحب حسين حگه يحير
شهيد المات مـــن حبه ويه حسين الـــه تذكار
*---------------*---------------*
حبيب الناهز التسعين شمعة شوگ اله صاير
قـــدم للعشگ ايـــات رتلها بظهــر عـــاشر
لذلك من يزور حسين لابــد ما الــــه زاير
حبيب وقائــــد أنصاره
يزور حسين مــن زاره
يسجـــل بيـــده زواره
ربك خص حبيب بهــاي هـــوه يسجل الزوار
*---------------*---------------*
چون اسود وجه موصوف لكـن ابيض النيـه
هيــچ حسين نـاس يـريد الاهم مو كثره نوعيه
العشگ گالــو قيود يصير بـس لحسين حريه
كل شي يختلف لجله
حتى الموت اله احله
المحبه طاعه مو ذله
عجيب الحب لبواليمه شبيها لا ابد ما صار
*---------------*---------------*
اليحب حسين جده يگول الله اليغفـر اذنوبــه
مر بالطف عشگ ما صار عاشگ ويه محبوبه
عشگ عابس لبو الأحرار شگ صدره گبل ثوبه
السيوف بحب ابو اليمه
يحسها اتبوسه وتشمه
يا حـــب الوصــل يمـه
بيها الكــون حــد اليوم بوصافه بقــه محتـار
*---------------*---------------*
لــون انعــدد الانصــار نحير أنوصف أنصاره
وهب لو عن برير اهناك بحر ما نوصل اسراره
نور يشع علـى الأجيال حسين تشعشع أنواره
ضمايـــه بحبــه اتروو
بطينة كربلــه انعجنوا
نور بكل عصر ضوو
بيهم حـارت الكتّـاب شكتب عنهم شتختار
*---------------*---------------*
للحب جامعه وقانون صاروا والله واطروحه
وكل جيل اليمر بيهم لازم تحترگ روحــه
الما فاهم عشگهم ذاك خـل يبطــل ابنـوحه
كون اليبچي فـــاهم زين
سر ذاك العشگ لحسين
چــان حسين ألهم ديــن
لذلك عــــاشوا بكل جيل ديــن ومنهـج الثوار
الشاعر
موسى البديري
*
قصيدة ( نموت وياك ) لسان حال الانصار يقولون لأمامهم الحسين عليه السلام
نموت وياك حتى نعيش يحسين
بس ويــاك احنه نعيش مــرتين
كل شي وياك بي روح حتى المـات مذبــوح
مــــــــا مــــــــــــــات
****
اصعـب موتـه بــس ويـاك وبنفــس الوكت سهـله
الصعوبه البيها انته حسين انته الدين وانته اهله
نتخيّر بيــن جنــه ونــار ويـــاك الممـــات احــلــه
نــرخص دونـــك الارواح يمن روحك علينا اغله
فدوه نروح الك يا والد العتره
يا ديــن الالــه ومنهجه وسره
ودونك دمنه مسفــوح حتى المــات مذبــــوح
مــــــــا مــــــــــــــات
****
لــوّن نمــوت الك يحسين مـــو مــره الف مــره
ونــرد نعــيش هــم وياك ودونـــك والله نتــذرى
منعوفك ابد يحسين وحگ ضلع امـــك الــزهره
الخلود المات بس وياك الممات العَز الك عمره
الخلود وياك يا سـر الله والدين
المات وياك عايش هذا يحسين
يا قبله من الجــروح حتى المـــات مذبوح
مــــــــا مــــــــــــــات
****
المــات بكربلائــك هــاي دونــك يا ابــو اليــمه
وفوگ الغبره ظل مطروح تغسل من نزف دمه
هــذا الفــوز يـــا مــولاي وهــايه نعمّة النعمّـه
الموت شگد صعــب لكن دونك مكرمّهَ ورحمه
نضحي ارواح الك يا وارث الهادي
لحد اخــر نفس بس بأسمـك انادي
انته الروح للروح حتى المات مذبوح
مــــــــا مــــــــــــــات
*
اتخــذوه جَمــل هاليــل مــن گلهم ابــو الاكبــر
گالــو يــا ابــو عبدالله العّـنــك يبتعــد يخــســر
محمد انتــه بالميــدان نشوفــك يــا شبل حيدر
گبل نحرك يبو الاحرار نرَخّص سيدي المنحر
مناحــرنا الك يبــن النبــي فـــدوه
هوه العمر دونك كل شي ما يسوه
الا ودمــه مسفـوح حتى المـــات مذبوح
مــــــــا مــــــــــــــات
*
وعــدّ جــدك مناره تصير الك يا سيدي وحضره
وتزورك سيــدي البلــدان يبن الطــاهره الزهره
شعظها احنه بضريحك ذاك يـمْ بابك نشم عطره
يتَخَلد مـنْ يصير ويــاك تــرفعه وترفــع بقـدره
يحسين الخلــود انطيتــه الــرفعه
يبن سر الوجود الطاهره البضعه
بنيت ابدمك اصروح حتى المــات مذبوح
مــــــــا مــــــــــــــات
*
يحسين شكبــر حضنّــه احنـه نصيـر بكتـارك
ونــور البينه يــا مــولاي ماخـذ هيبة انوارك
يمر بينا غــدا مولاي كـل عاشگ گصد زارك
دنيــا واخــره يحسين نفخــر احنــه انصـارك
باچــر بالامــامه تنـــدعي الامه
دنيا واخره احنه ويه ابو اليمه
يمن اسمك على اللوح حتى المات مذبوح
مــــــــا مــــــــــــــات
*
الشاعر موسى البديري
قصيدة ( ياهو أنته ) إلى ابو الفضل العباس ومكانته عند أهل البيت عليهم السلام
يــا أبو فاضــل ... ياهو انته
حيره شخصك ... ما عرفته
الف لام وميم نــزلت بالــسور
لهسه بالتفسير محتاره البشر يا هو انته
****
عنك أحــروفي اجـت تكتــب قصيده
شعدها عنك فكــره يــا ابـن الصميده
غير كافــل أخته بس انگطعــت أيـده
وأنت چــان الــدين يتــروه بـــوريده
الدين من دمك روه
والوفه طش بالهوه
انت لجل القل هـوه دمــائــك
يا أبو فاضل ... انـــه حاير
ومثلي حيره ... من المنابر
شتارك بگلب اليحبونك إثــر
لهسه بالتفسير محتاره البشر يا هو انته
****
كل حروف الشعــر نجمعها ونوصفك
حگهـا خجــلانه فــلا تگــدر تنصـفك
الساقــي انته الكافـــل وأكثـر نعـرفك
صـرت ظهر حسين ما نگدر نفهـمك
انتــه جيشه لو ظهر
حيــرتــنا يالگمـــر
شتــارك ابگلبه اثــر رحيلك
انتـه ظهــره ... لو عضيده
بحيره تنشد ... هالقصيده
وبحر شخصك ما شفت مثله بحر
لهسه بالتفسـير محتــاره البــشر يا هو انته
****
حايــر أبمــوقــف ولا مــره فهمتــه
ولا گدرت أبشعري يالكافــل وصفتـه
حسين من گلك يخـويه بنفسي انتـه
يعني فدوه يگول شخصك ما عرفته
حيره يا ابـن الولي
يا هو اليوضح ألي
الكافل انته لو علي يشوفك
يا أبو فاضل ... يا عظمها
كلــمه رايــد ... افتهمــها
حسين من كلك فدوتك يالكمر
لهسه بالتفسير محتاره البشر يا هو انته
****
واهــمْ الينظــر الك گبــه ومنـاره
وانته بيك أعقول هل الوادم حياره
اعتذر ما ﭼنت اعرفـك بس زيـاره
وانته دين ومبدأ وفكـره وحضاره
من گصدت المشرعه
النهر يجري ومنبــعه
الماي محّـد مــانعــه تشربه
يجري مايه ... وما شربته
قصَدك انته ... مــا عرفته
لان تدري حسين دلاله انفطر
لهسه بالتفسير محتاره البشر يا هو انته
****
يا گمر محتــار ياهــو الـي اسـأله
عن سؤال يَحّير ومـا عنــدي حَلّه
انته ﭼم معصوم ﭼف أيدك يقَبله
حگي مـن احتــار بيك العمـر كلّـه
حيّـرَتـنـي الأسئــلة
عن عظمْ هل المنزله
شخصك ايه مُنزَله وعجيبه
شخصك ايه ... للبريا
ايه ماكو ... منها ايه
آيــه حـدْ اليــوم رتلها الــدهر
لهسه بالتفسير محتاره البشر يا هو انته
****
الشاعر
موسى البديري
قصيدة ( اول مره ) تروي حال الامام الحسين عند شهادة أخيه ابي الفضل عليهما السلام
اول مــره حسين انظــرله بمشيه يميل
وشمس العاشر چنها بعينه صارت ليل
رد حســين ولازم ظـهره
مرسومه بنظراته الكسره
بمشيه يميل
****
حيره منين اسولف وابدي بأحزاني
يــوم اتوادعــوا للمــوت خــوانـــي
هــوو للگـــاع واحـد شابگ الثاني
بســاعتها تغّـَيـر شكلــي والــوانــي
اول مـــره بعمــري انظــر هيــچ اوداع
انظر لحسين شلون اهوى فوگ الگاع
وخانگته يــا حيف العبره
مرسومه بنظراته الكسره
بمشيه يميل
****
ودعني ومشــه ودلالي راح ويـاه
احس حسين كل خطوة جدم ينعاه
يا ريت النهــر كله انگطع مجـراه
لان خلّــه بـدليــل حســين اخ وآه
عطشان حسينك انظــرله مــو للماي
چنــه ينــادي بيــك اتــروه ظل وياي
محتاره انظر لابن الـزهره
مرسومه بنظراته الكسره
بمشيه يميل
*
عطشان اعلى اخيّــه وگلبــه يتلــوه
واجتــه مــن الشريعــه چلمة الخوه
مــن طوله اشوفه حسين من اهوى
تعنّـه المشــرعـــه ودلالـــه يتچـوه
ينظرله حسين ابدمعــاته بـــلايا زنــود
وبكتره الرايه وچفينه لصــدره الجــود
بــدلالـــه تتــلاهب جــمره
مرسومه بنظراته الكسره
بمشيه يميل
*
تعنه المشرعـــه ومتغشي بأحــزانه
صگر چنه وكسيره بهيمه جنحـانه
نظــر عبـــاس طاحـت يمّه ذرعانه
روحــي بطيحتك مـــا تروه عطشان
يا عباس اگعــد يا خويــه شلون الحال
تنتظــرك زينـــب والخـدّر والاطــفــال
خلينـــي نـــاداه بحســـره
مرسومه بعيونه الكسره
بمشيه يميل
****
راد يشيــل اخيَّــه وگــلّــه خلــينـي
بأحضــانك امــوتن يـا نظـــر عيني
ضمايه اطفــال بأخيـــامك تتانيني
اوصّله اشلون وآنه بكتري چفيني
خليني اعلى الشاطي موذر يا مولاي
ريحانت دلالك تنطــر منـــي المـــاي
بلغ سكنــه گوطر عمره
مرسومه بعيونه الكسره
بمشيه يميل
*
رجع منْ الشريعه حســين بالگوه
اصدنله واگــولن هــوه مــو هـوه
وصل للخيمه حيــره ينادي وبلوه
چنه يگــول راحــت خويه المروه
رد حســين وانظــر طــوله ظــل يمــيل
يا زينب عالشاطي بحسره عفت الحيل
لا يمنه يــا خويه ويسره
مرسومه بعيونه الكسره
بمشيه يميل
**
الشاعر
موسى البديري
1447 هجريه
مثل موج البحر ما حدّته اجروفه
مسلم صال بيها وحيّر الكوفه
*
برز شمّرتْ علي العدو ظل مبتلي
اسد يزأر
ينــادي اتدللــي الحرايب بس الي
مثل حيدر
أعيـــد الـَكـــّرهْ والكــوفـــه أحاصــــرها
وضـــربات الصميـــده اليــوم أكـــررها
وَاشَوّف أجيوش أميه الرفضتْ أتشوفه
مسلم صـــال بيها وحيّـــر الكــوفـــــه
*
نزل ليـث الحــرب تـولاهــا ضـــرب
كتــابيهــم
لبس درعه الڴلب حمم سيفه يصب
يحاصرهم
بــركــان وتفجــر بـــس حـمم ينثــر
الحرب عنوانه مسلم مــا قبــل يغدر
مسلم هاشمـــي وتربيتــه معــروفه
مسلم صـــال بيها وحيّـــر الكــوفـــــه
*
تحّيــرْ صــولتـه الجيــوش ابيمنته
يطشرها
بحيدر نخــوتــه بعزمه وضربته
يذكرهـــا
ورث عمّــه الكتايب سيفـه يخلسها
ورايـــات الكفــر بالكـوفــه نكســها
ومثل صولات عمه الصوله معروفه
مسلم صـــال بيها وحيّـــر الكــوفـــــه
*
طوعه أتحشمه هــا يالمـــوزمه
تعنـــاهــا
بعمّه أتحـــزمه مثل حامي الحمه
تـــولاهــا
صاح الجيش حيدر هــذا حاضــرهــا
ذو الفقـــار دمـــر كـــل عساكــرهـــا
مــا ثنـــه بيمينه وضــربت اجفوفــه
مسلم صـــال بيها وحيّـــر الكــوفـــــه
*
رغم اهــل الغدر تخلد كل عصــر
نزف دمه
زرع مسلم نصر رخص كل العمر
حيِّه الامه
ﮔــوم انظــر ضريحه وشاهد انــواره
كـــريم ومـــا يـــرد ابيـوم خطـــاره
وباب الحاجه بابه وهـــاي معروفه
مسلم صـــال بيها وحيّـــر الكــوفـــــه
*
الشاعر
موسى البديري
الى سفير الحسين مسلم بن عقيل عليه السلام
بچيت اعلى السفير ادموم واجريت
وروحي ابنار چبده اليوم وجريت
دهري شبيك تمشي عكس وجريت
وي مسلم سفير الغاضريه
___
الى اولاد مسلم بن عقيل عليه السلام
گصد گلبي بحزن وبنوح طفلاك
طف لحسين وانت اليوم طف لاك
يمسلم لو يمر عالبال طفلاك
دمع عيني يهل غصبن عليه
___
موسى البديري
