797
بوت التواصل مع القناة @PrincessS_bot
شخص بيتلاقى اومره بطريقة ثانيه وغير مباشره ، حتى الاجتماعات حقنا بتكون بطريقة غير مباشره ك انهيار اقتصاد ، او حرب قامت ، او كارثه حصلت ، او انقلاب او غيره من المصائب اللي بتحصل في كل بلاد الخمسه هولا اللي مسيطرين على البلاد تيه يا يمني يترأسو (اصبع المال بشت انواعة كتجاره مشروعة او غير مشروعه واقتصاد مشروع وغير مشروع ، اصبع العصابات مشروعه وغير مشروعة مثلا ك عصابة الدولة تسمى عصابة مشروعه وعصابات ك المافيا وغيرها تسمى غير مشروعة ، اصبع الديانات بشت انواعها وطوائفها ، اصبع النظام بكل اختلافاته ، واصبع العداوه ، ينشئ عداوه بين كل ما تم ذكره سابقاً يا يمني) والمخيف محد يعرف من هم الخمسه الاساس لهذه المنظمه او الجماعه وهي تعتبر اذكى منظمة في عالمنا منذ قرنين او اكثر ، انا يا يمني الان متنكر بشخصيه ثانيه ونزلت بين افراد العصابات والمشاكل اللي بتحصل اشتي اتعرف على الاربعه الباقيين وقدلي ما يقارب 19 سنه وانا بنحاول اخلق نظام داخل النظام هذا بدون ما الفت انتباه احد ، انت فاهم حجم الكلام اللي بنقوله لك يا يمني ؟؟؟ ....
يتبع ...
#يمني
#منيرالنقيب
الله خيرك انت ريت والله وانت ابني ، قلت هيا وكيف مش قلت اننا ساع ابنك ، قال اذا انا قلت فانت ابني ماعدبش ساع ، وضحكنا وبنكمل نتعشي ولا كأن به شي حصل ، عمنا خرج تلفونه وفعل عدة اتصلات ، وقلي اسمعني يا يمني خرج ابن المسؤل وانت مغطي لوجهه ووصله لشارع الفلاني وفك قيده وابعد الخرقه من راسه وطرحه في الشارع ورحلك ، قلت له سابر يا عمنا ، قال وانتبه يبسرك او يتعرف على ملامحك ، نزلت القناع حق البدله لا وجهي وقلت له كذيه حتا انا ما اعرفنيش ، ضحك وقال انزل غير البدله واتلثم بشال قلت سابر ، كملت اتعشي شليت قاتي من عند عمنا ونزلت غيرت وتلثمت بالشال وشليت الولد وطلعته فوق السيارة وخرجت ، فعلت رساله لا اخي "سير للموقع حق بيت الرجال عتلاقي سيارة نيسان بيضاء المفتاح حقها مطروح فوق التاير اللي قدام باليمين شلها واديها لا جنب الفله من بعيد واطرح المفتاح بقعته ورحلك " فعلي رساله وقال تمام ، وصلت ابن المسؤل لشارع اللي قال عمنا ونزلت بنفك له وهو بيصيح لا تقتلنيش شديلك اللي تشتيه قوى لا تقتلنيش وبيبكي ، نزلته والخرقه فوق راسه وقلت له اوقف لا تتحرك ، وطلعت فوق السياره ومشيت وانا بنبسره بالمرايه وهو واقف مكانه وحتى ما بعدش الخرقه من وجهه واصلت طريقي ومشيت خرجت التلفون حق الولد اللي كونته في البيت حق مذبح وهربته وخرجت اوراقه بطايقه وقد كان به اكثر من 40 رساله و37 اتصال اجي ابسر الرسايل كلهن من ارقام زبون 1 زبون حده زبون صاحب سعد زبون مدري ايش وكلهن اتصالات ورسايل من زباين كان يبيع لهم الحشيش ، ما دريت الا وبه اتصال مكتوب اخي الغالي يتصل ، جاوبت وهو بيقل يا اخي هذا تلفون اخي ضاع عليه لو تسمح نشتي التلفون قلت له انا صاحب اخوك ، قلي في اي مستشفى انتو قال احنا في مستشفى كذا طيب انت ايش اسمك انا اعرف اصحاب اخي كلهم ، قفلت الخط وسرت طريق المستشفى وفعلت رسالة لصاحبي معتز لاقيني للماكان الفلاني بعد ساعه ...
يتبع ...
#يمني
#منيرالنقيب
ايوه بنسمعك ، شوية وقد به طلق نار من المكان اللي انا جيت منه اللي كانو في الديوان جو وحاصرونا وقفت على طول ونبعت بجسمي كله من الطاقة لا داخل قمت ورجمت قنبلة دخانيه لصاله وقربت دلا دلا ، ابسرت واحد بيتشاقر من الباب الخلفي لا خارج ضربته رصاصه خلف راسه على طول وما دريت الا بطلقة رصاص تطرح في ضهري لما اطرحت للارض ، اقتلبت وضربت نار على اللي كوني ، قمت وما دريت الا وانا بنسمع صوت عمنا وهو بيقل يمني بتسمعني التفت وقلت ايوه بنسمعك بس ما بنبسركش اين انت ، قال هذا جهاز اتصال مربوط بالبدلات حقنا ، اضغط على الزرار اللي فوق اذنك اليمين مرتين وعتقتلب عندك الرؤيه وعتقدر تبسر اللي بيمشو في الدخان قلت له يا عمنا انا مكون وقع لي رصاصه في ضهري قال لا تقلقش البدله بالكامل ضد الرصاص ، ضغطت الزرار وفعلا تحولت عندي الرؤيه وابسرت كل من بيتحرك في البيت ، لقيت واحد من اللي عمرهم عشرين سنه اول ما ابسرته قلت له سعليك ما شقتلكش ارجم سلاحك ورحلك ما دريت الا لما ضرب عليا ثنتين رصاص في بطني على طول ضربت عليه رصاص في رجله وقربت لا عنده وانا قدنا مكبود ما بنقدرش اتنفس بسبب ضرب الرصاص في بطني والوليد ماسك رجله ومفلت للمسدس جنبه وبيبسر الدم وبيبكي ، شليت المسدس وضربته في راسه بقفى السلاح حقي ونزلت للبدروم وعمنا بيشتبك مع اللي في الحوش خلف المنزل ، نزلت للبدروم والبدروم كله صاله واحده وفيها كراتين وشوايل وبضاعات حشيش بشكل كبير قوي دورت ملان البدروم وما حصلتش ابن المسؤل ، وبنكلم عمنا ما حصلتش الولد يا عمنا ، قال انا قد صفيت اثنين والباقيين هربو من البيت ذلحين شدخل وندور ، طلعت على طول لا عند الشخص اللي كونته فوقته من وبنقله سعليك اول ما فاق ابسرني وافتجع ويشتي يصيح مسكت فمه وبنقله سعليك ما شقتلكش قلي ايش اسمك وجالس افرتشه لقيت مجموعة اوراق في جيبه مربطات بربل وفيهن بطايقه ولقيت تلفون اسود صغير وبنقله قلي ايش اسمك قال اصمي عصام قلت له اسمعني يا عصام الان عتقوم وتطلع فوق متر وتهرب من هنيه تمام قبل ما تجي الدولة تداهم المكان وقومته وطلعته لا فوق المتر ما دريت الا وبيقلي تسلم يا عم تسلم وشغل المتر ورحله ،رجعت لا عند عمنا دورنا ملان البيت ومابش احد ، قام عمنا يتصل وبيصيح مابش احد في البيت يا كلب انت واللي معك قلت لي المعلومه اكيده ماهو لعب الجهال حقكم هذا ، انا داري كيف اتصرف معاكم ، وانا سمعت اصوات الطقومات بتقرب قلت يا عمنا مش وقت ذلحين به طقومات جاييه للبيت بسبب الانفجارات وطلقات الرصاص ، وهو جالس يجابر التلفون وقلهم وزيد طقومات الدوله جاييه انا قلت مشتيش اي طقم ولا عسكري ابسره ، حاضر انا داري كيف شتصرف معاكم وقفل الخط ، وجرينا لا فوق سيارتنا وشغلناها وهربنا من مكان الموقع ، وعمي بيقول كيف .. كيف ؟؟!! اشتي افهم كيف ما طلعش ابن المسؤل هنيه؟!! ضروري اليوم احصله قبل ما تخرج الامور عن السيطره ، قلت له قد فعلنا اللي علينا يا عمنا وماعيفعل المسؤل هذا كان عينتبه لجهاله وقده رجال ، قال مشنت فاهم يا يمني ذلحين روحنا للبيت ، اول ما وصلنا للبيت عمي قال انزل غير ملابسك يا ييمني واطلع بعدي لطيرمانه ، قلت سابر ، اول ما نزلت اتصلت لا اخي قلت هيا مه يا بلال ما فعلت ، قال راقبت التكس طلعو فوقها اثنين وصلو لتحرير ونزل واحد وطلع فوق شاص ، ولحقت اللي بيسوق التكس وصل لا بيت في مكان كذا كذا ، نزل اللي بيسوق التكس وبعد شوية نزلو اربعه من البيت بسلاحهم ، وطلعو فوق التكس راقبتهم ، وسارو لا بيت فلان الفلاني عرفته يا اخي قلت له ايوه اعرفه اعرفه وبعدا ، طلع بيت المسؤل اللي خطفو ابنه ، قلت له كمل قال انتظرو باب الباب وصل واحد شباب فوق سيارته قطعو عليه باب البوابه وشلوه بالغصب وراحو لهم وهم بيشتبكو مع الحراس اللي عند البوابه قلت له ايوه ، قال ولحقتهم سارو لا مذبح ودخلو حوش جلسو 15 دقيقه وبعدا خرجو فوق هيلوكس بدون رقم ، ومعاهم الولد ولحقتهم ورجعو لا نفس البيت حق الرجال اللي راقبته دخلو بالهيلوكس وخرج شخص واحد بس بالهيلوكس ورحله ، وذلحين انا رجعت قبال الفله حق عمكم ، قلت له خلاص سابر رسلي رساله اوصف لي بالضبط بيت الرجال ذيه ورحلك للبيت وانتظر اتصال مني قال تمام يا اخي، طلعت لطيرمانه وعمنا في الحمام بيتحمم ، فعلت لعمنا رساله وقع لي عمل ضروري ساعة ورجع لك يا عمنا ، ونزلت شليت السيارة وسرت للموقع اللي وصفه لي اخي ....
مشاركة للمنشور واعجاب بالصفحة وتعليق برأيكم عن احداث القصة للان ، على شان تضهر لكم الأجزاء السابقة وتوصلكم اشعارات الأجزاء اللي با ننزلها ...
يتبع....
#يمني
#منيرالنقيب
شل اي متر من حق اصحابك يا بلال وسوقة انت وجي للفله اللي كلمتك يا بلال ، وانتظر خارج بعيد من الفله بدون محد يبسرك ، وعيخرجو ناس راقب واحد منهم واعرف اين عيسير ، بدون محد يدرى بك ، قال حاضر تمام الان با اجي ، وبعد ساعة الا ربع اخي فعلي رساله قال به تكس وصلت للباب ونزل صاحب التكس ورحله وخلى التكس مفتوح ، قلت له ايوه راقب التكس يا اخي واحذف الرسايل وانتبه تتصلي او تفعلي رسالة ، قال تمام .. تمام ، خرجو الناس من عند عمنا ، وبعد دقيقتين عمنا اتصلي قال اطلع يا يمني لا عندي قلت حاضر .. طلعت لا عنده ، اطمن عليا وعلى جدتي ، وقال طرحت اهلك في البيت اللي قلت لك ، قلت له ماشي وهذا المفتاح مشكور ، ابتسم وقال كل يوم بتذهلني اكثر وبتعجبني شخصيتك وطريقة تفكيرك قوي ، قدلي عمر كامل قابلت اشكال وانواع الناس بس انت ثاني وطريقة تفكيرك ثانيه ، المهم اسمعني الرجال اللي قتلته ، مكانه اصبح فاضي وكنت ناوي اطرحك انت بدله وتمسك مكانه ، بس الان خلاص انت عتكون جنبي انا وعملك كله عيكون بجانبي ، حميتني وحميت بنتي بدون اي مقابل ، وتلفوني رن من رقم غريب جيت اجاوب ..
- الوووووو من معي
- ايوه يا يمني هذه انا كيف حالك ..
افتجعت بنت عمنا بتتصلي وانا جنب ابوها ماهو الحنبه هذه
- قلت الحمد لله انا ذلحين جنب عمنا ، ابوش تامريني بشي
- قالت ماهو وليش تتكلم كذيه ..!!!
مكنت عمنا التلفون وقلت له بنتك اتصلت لي مشنا داري من وين جابت رقمي وبتطمن عليا وعلى جدتي امسك جابرها ان الكل بخير
عمنا كان يبسرني باستغراب كبير مسك التلفون وقال يا بنتي قفلي وبعدا عنتجابر ، قفل الخط وقلي انت رجال ما يتكررش واذا فلتك من يدي فانا غبي ، اسمعني يا يمني بنتي شكلها اعجبت بك وانت اول شخص تعجب به بنتي، فلذالك ما رأيك ازوجك ببنتي ؟ قلت له ماهو تزوجني ببنتك ...!!! قال ايوه ازوجك بنتي ، قلت له انا ما بش عندي مشكله بس بالأول اسال بنتك وشوف ايش عتقول ، ابتسم وقال ذلحين خلينا نرجع لموضوعنا ، قلت له موضوعنا يا عمنا اننا معرفش عنك شي من انت وماهي سلطتك وما عملك وايش اسمك الحقيقي وما عيكون عملي مشتيش اشتغل وانا مغمض عيوني مشنا داري ما بنفعل ، قال كل شي عتعرفه مع الوقت ، رن تلفون عمنا جاوب ، وقال ماهو ؟؟ ما قلت ؟ طيب اين هو الان ؟ خلاص قفل وانا شتصرف ؟ ابسرني وقال هذه اول مهمه لك يا يمني اشتي تسير للمكان الفلاني ابن المسؤل كذا مخطوف مع شوية صعاليك اشتيك تسير وتدي ابن المسؤل لا عندي سريع ....
يتبع...
#يمني
#منيرالنقيب
سكته ابتسم وقال ذلحين ارتحت حاول تهداء مجرد كلب مات ما يسوى حتى ضبحك ، استغربت من عمنا كيف له ساكت وما زعلش لاننا قتلت رهينه عنده ، مسكني من ضهري وخرجني من الغرفه وقال ذلحين خلينا نسير نبسر جدتك وكل شي عيسبر ، طلعنا فوق السيارة وعمنا بيسوق وصلنا للمشفى واطمنت على جدتي عمنا طرح لي زلط حق العملية والعلاج ، وقال كما قد جدتك خرجت من المشفى وقد امورك جاهزه ، ذيه مفتاح بيت في بقعة فلان سير اجلس فيه انت وعائلتك لما تهدأ الاوضاع وبعدا عنتجابر انا وانت ، قلت له سابر ، وقال اطمن انا شا احل اجراءات الطلق الناري اللي حصل لجدتك واخارجك من السين والجيم وكيف اصيبت جدتك ، تمام ، قلت له تسلم ،وجالس قدلي يومين انا وابنتي واخي في المستشفى وبنفكر في كل اللي حصل ولين قد وصلت وكيف توحشت واصبحت قاتل ، اليوم الثالث قررو لنا خروج وعادنا بنعامل على اوراق الخروج ما دريت الا ورقم غريب بيتصلي ، اول ما جاوبت ..
-الووو من معي
-هاه يا يمني كيفنت وكيف قد جدتك
-الحمد لله بس من معي ؟؟
- انا بنت عمكم على قولتك منتظره لك خارج المستشفى ...
يتبع....
#يمني
#منيرالنقيب
او ماشي بس الاحتياط واجب وانا قدنا كاره اننا اجلس في مكان الضعف قلي ولا عليك من الصبح شخرج ادور ، طيب واذا لقيت والايجار غالي يا اخي كيف نفعل ، قلت له سهل الزلط لا تهمهاش شرجع اجابرك بالموضوع كله في وقته ، خاطرك يا اخي شا اقوم ارقد ، دخلت ارقد مابش نص ساعه الا وعمنا بيتصلي ، يا يمني الووو .. يمني قلت ايوه يا عمنا خير ، قال الان تخرج انت واهلك من البيت سررريع ، راقبوك بعد ما خرجت من عندي ، قلت من هم اللي راقبوني ؟؟ قال بنقلك اخرج من البيت انت واهلك سريع وجو لا عندي ، قلت له تمام ..تمام قفلت الخط وقمت صحيت جدتي وبنتي واخي وطلعتهم فوق السيارة وهم بيسألوني خير يا ابني ما به جابرنا ، قلت اطلعو فوق السيارة مابش وقت شا اجابركم في الطريق ، بنقفل باب بيتنا ، ما دريت الا بسيارة فورتشنال سوداء جاييه طريقنا وهي مسرعه ...
يتبع...
اعجاب بالصفحة ومشاركة المنشور ليصلكم باقي اجزاء القصة ..
#يمني
#منيرالنقيب
وبنبسرهم بيخرجو من السيارة واتمترسو خلف سيارتهم وبيرمو علينا ، وعمنا نزل على طول وبيرمي عليهم وجرى يتمترس خلف صبة مطروحه في نص الرصيف ، وانا من قفى السيارة بنرمي عليهم بدأت ابسر الناس بيتبسرونا من الاجبي حق بيوتهم وبدأت اسمع اصوات صفير الطقومات كنت اصيح يا عمنا هيا نرحلنا قبل ما يوصلو ، عمنا ابسر رجال منهم هرب والباقيين بيضربو علينا نار عمنا لحقه ، وانا افتجعت لا عاد يقتلو عمنا طلعت فوق السياره ومشيت بعد عمنا ودخلنا حارة قلت اطلع يا عمنا اطلع اول ما طلع قلي الحقه هذا غريمي حرام ما يفلت يا دمي يا دمه ، لحقت بعده وابسرناه وهو بيدخل زغط ، وقفت السيارة وعمنا نزل على طول وفعله رصاصه في رجله لما طرحه للارض ، ونبعنا الاثنين سريع مسكنا الرجال وطلعناه فوق السياره ومشينا ، وما درينا الا بسيارة يارس بعدنا وبيضربو علينا نار ....
يتبع...
متابعة لصفحة ومشاركة المنشور على شان تضهر لكم الاجزاء السابقة وتوصلكم اشعارات الجزاء اللي باننزلها
#يمني
#منيرالنقيب
شا اموت قلت لها ما عتموتي ولا شي اتصلي لا بوش ، وانا بنسوق ساع المجنون ابسر البنت وما بتردش عليا وقدهي فاقده الوعي وتلفونها فوق حضنها وابوها بيقل الوه يا بنتي الوووووو ، شليت التلفون وقلت يا عمنا انا يمني ، قال يمني..!!!! ما بتفعل مع بنتي وليش تلفونها معك قلت لك ترحلك ليش عاد الرفاس ، قلت له اسمعني للهدر حقك به ناس هجمو على بنتك وبنتك ذلحين مكونها شسعفها لا اقرب مستشفى وانت الحق ، قال ماهو !! بنتي .. بنتي ماتت يا يمني ؟ من هجم عليها ؟ لا تسرش المستشفى جي لا عندي سريع مكن بنتي التلفون اجابرها ، قلت له ذلحين هي مدوخة ، قال وهو بيصيح بكل صوته اين انت ؟؟؟ بنتي لو يقع بها شي حرام ما يكفيني دمك ، قلت له انا جايي لا عندك ، قفلت التلفون ومشيت بالسيارة ، وانا ماشي كنت ابسر طقومات وسيارات الأوبل بتمشي سريع طريق الحادث ومكان ضرب الرصاص ، طرحت رجلي لحد يبسر السياره وفيها طلقات رصاص ، وبنبسر من المراية ما دريت الا بطقم بيدور وطلع من فوق الرصيف وبيلاحق بعدي وعمنا بيتصل بتلفون بنته شليت التلفون وجاوبت قال اين انت ؟؟ قلت يا عمنا بيلاحقني طقم قدنا جنب جولة الثقافه قال انتبه يمسكوك امشي سريع وانا شتصرف طرحت التلفون وماشي مغلق طبلون ، ما دريت الا لما الطقم جنب ووقف ودور ورجع ، استغربت قوي وقلت مالهم وقفو ورجعو وكملت طريقي وصلت للحي وعمنا قده فوق سيارته اول ما لقيني خرج يده وقال واصل للفله ، وهو دور ولحقني ، وصلت والباب مفتوح دخلنا السيارات ، ونزل عمنا شل بنته في حضنه وكان يمشي طريق البدروم ومن كثر خوفه نسي انه مصاب في رجله وكان يجري ببنته ، وصل طرح بنته فوق السرير وانا وقفت عند باب الغرفه وهو فتش لبنته وبيحاول يفوقها بس هي ما تجاوبتش معه نبع لا عندي وقلي من اللي هجم على بنتي من اللي هجم عليها؟؟ ، قلت له ثنتين سيارات فورتشنال نزلو مسلحين وضربو عليها رصاص وانا ابسرتهم ونبعت اسعف بنتك ، قال وما دراك اين مكان بنتي انت غريمي انت غريمي ، ومشع المسدس وطرحه فوق راسي ، على وصول الدكاتره ابسروه وافتجعو قلهم ادخلو عالجو بنتي سريع ، وقلي سلم مسدسك ، انا تفهمت الموضوع وقلت الرجال خايف على بنته ومن حقه يفعل كذيه خرجت المسدس ومكنته والحارس نزل ودخلوني في غرفة وقفلو عليا واخي اتصلي بيقلي اين انت يايمني قلت نص ساعه وتروح مالك تاخرت ، قلت له اسمعني قفل ذلحين واتصلي بعد 15 دقيقه اذا تلفوني مغلق او ما جاوبتكش جي لي للبقعه الفلانيه الفله كذا كذا وبلغ ما دريت الا وعمنا فتح باب الغرفه ودخل لا عندي ....
يتبع...
#يمني
#منيرالنقيب
لاخي وسرت للمشفى اطمنت على بنتي سلى ، ورحنا وجلست حاضن لها لما رقدت وكل شوية ابسر تلفوني ايحين عيتصلي عمنا ، او يفعلي رساله ويصيح ليش خرجت من الفله وقد اتفقنا ، بس ولا فعلي اتصال ولا رساله كنت متوتر قوي وبدأت اقلق ، وفي نفس الوقت اقمرت قلت ما شتصلش ولا شا ابرر له اين سرت مشنا عبد معه واذا عيخرجني من العمل الرزق بيد الله ، اتصلي معتز قلي اين انت يا يمني مالك ما تجي العمل قلت له سافرت الحديده انا وعمنا معانا عمل ، قال هات يابي هات وطورت علاقتك مع عمنا المهم قع رجال وانتبه لنفسك ، قلت له ولا عليك ، جيت ابسر الساعه قدهي 10:00 الليل واخي بلال قال عيخرج البقاله ويرجع وقدله نص ساعه مش عوايده يتاخر قلقت عليه طرحت بنتي عند جدتي وخرجت ، دورت اخي ملان الحارة ومابش له وجود ، سألت بس محد ابسره بنتصله وتلفونه مغلق على طول وبدون تفكير شليت متر حق واحد من الحارة وانطلقت لا بيت عمنا في بيته المعروف اللي فيه عائلته وبنفكر في الطريق لو هو سبب اختفى اخي فما عيبسروش مني خير ، وصلت للبيت وبنصيح لعمنا وبندقدق الباب ، جاوبني ابن عمنا ولد صغير عمره عشر سنين قلت له اين ابوك ؟ قال بابا في الحديده قلت له ادخل قول لابوك يمني عند الباب يشتيك ضروري ، قال بنقلك سافر الحديده ، وسمعت بنت قالت من هو هذا اللي عند الباب يا عمر قال رجال يشتي بابا وبنقله مسافر وما رضاش يرحله ، قربت وهي ملثمه وبتشاقرني من قفى الباب وقالت من انت يا اخي قلت انا يمني بنشتغل في الحوش حق التشليح اشتي عمنا ضروري قالت هاه انت يمني ، وقالت لاخوه خلاص ادخل ، اخوها دخل وهي قالت ما جابك لا هنيه وليش بتصيح ، قلت لها اخي اختفى وبنتهم ابوش ما شا ارحليش من هنيه الا بخبر ، قالت خلاص اصبر شلبس وعنخرج جمعه قلت سابر ، انتظرت لما خرجت بالسيارة وقالت اطلع ، اول ما طلعت ما دريت الا واخي بيتصلي ....
#يتبع
#يمني
#منيرالنقيب
الاناقة والذوق والرقي ، طيب ليش مش مبين عليه وليش كل تيه السريه في بيته ذيه طيب بيته الثاني صح انه كبير بس بيت عادي واثاثه عادي ساع اي بيت في صنعاء ، طيب ليش خلاني اديه للبيت وما خلانيش اسعفه للمشفى ، ومن هو عمي عبده صاحب البقاله وليش خاف اول ما قراء الورقة وايش اللي جاب لي وكيف علاج في بقاله مش في صيديله ، طيب بنته ليش فيها كل تيه السيمخه وخلاها تخرج تيه الساع ما خفش عليها ، اكيد ما عيخفش معه بنت بالف رجال ، ما دريت الا لما دخلت الخدامه ومعاها العشاء طرحته قبالي اجي ابسر وبه نص ذبيحه ورز وببس ومعصوبة اكل طلبوه من مطعم ، قلت لها اجلسي يا خاله كلي معي قالت لا لا عيب ما ينفع ، قلت الا ينفع اجلسي بس ، ما رضيت قلت لها لحظه ، قسمت لها من اللحمة واديت لها من العشاء ومكنتها شلته وهي خايفة قلت لها سعليش كلي ويهنا قالت شكرا وقالت اذا احتجت اي شي اضغط على الزرار اللي قبالك اقتلبت ابسر بقعتي حق التخزينه والزرار موضع فوق الماسة قلت لها طيب ،كملت اتعشي وطرحت باقي العشاء عند الباب وضغطت الزرار والخدامه رجعت وشلته قلت لها نزلي باقي العشاء للحارس قالت تمام ، ورجعت بقعتي اتوضع وشليت الريموت وبنغير الاضاءة حق الطيرمانه ، واطرحت وبدأت اخزن ، ما دريت الا لما طلعت بنت عمنا لا عندي ...
يتبع...
#يمني
#منيرالنقيب
ودخلنا الفله .. قصدي القصر ، اول ما وقفت السيارة ونزلت سريع اشتي انزله وصل الحارس حق القصر ، وبينزله معي نزلنا للبدروم ودخلنا غرفة ، كأن الغرفه هذه غرفة عمليات في مستشفى فيها اجهزه طبية والسرير طرحناه فوقها ، والحارس سار فتح الباب م دريت الا لما دخلو اثنين دكاتره وهم ملثمين وخرجوني من الغرفة ودخلو عند عمنا ، خرج واحد منهم في يده ورقة قلي سير.. سير للبقاله الفلانيه اللي في الشارع الفلاني واديله الورقة تيه وشل العلاج منه وارجع سريع ، استغربت من مجبر الدكتور قلت له كيف اسير اديلكم علاج من بقاله ؟!! قصدك من صيدليه ، قلي سير للبقالة حيث ما قلت لك وما عليك، يلا سريع مابش وقت للهدار ، قلت حاضر ..حاضر خرجت بالسيارة وبنفكر في الطريق ماهو هذا كله ومطنن من كل اللي حصل ومن البرود اللي في عمنا وليش ما افتجعش وهو مكون ،كأن الموضوع عنده طبيعي طيب كيف اسير ادي علاج من بقالة..؟!!! ، ما دريت الا وعمنا بيتصلي قلي اوصل للبقالة وقلهم اين عمي عبده ومكنه الورقة ، وصلت ولقيت البقالة دخلت وبه شيبه قلت السلام عليكم اين عمي عبده ؟، ابسرني وبهرر وتوتر قلي ما من عمك عبده؟ وما تشتي؟ من انت ؟ خرجت الورقة وطرحتها فوق الماسه قلت مكن عمي عبده تيه الورقة سريع مابش وقت ،اول ما ابسرها خرج سريع للباب حق البقاله وبيتلفت يمين وشمال ، ورجع دخل قلي راعي ودخل للمخزن حق البقالة وخرج وفي يده مشمع دعاية وقلي يلاه رحلك من هنيه سريع ، شليت المشمع الدعاية وخرجت طلعت فوق السيارة وجيت ابسر ما داخل المشمع وفيه علاجات ومغذيات وحاجة مربعه مغلفة بمشمع وملصقة بشلشيان احمر ، رجعت سريع للقصر حق عمنا وطرقت بس محد فتح لي نزلت بندقدق الباب واصيح بس ولا احد رد عليا ، كان قدنا متوتر قوي مشتيش العلاج يتأخر على عمنا ، ما دريت الا بواحد طرح البندق في ضهري وانا بندقدق الباب وبيقلي من انت وما بتفعل هنيه ؟!!....
يتبع...
#يمني
#منيرالنقيب
يا ابني هذا ضوء السمش ، قدلها خيرات مضويه ، وشكل الدنيا قدهي عصر وما عاد بنسمعش صوت الحراثه شكلهم راحو لهم يا ابني وفلتونا هنيه ، قلت ما شي يمه كيف عيفلتونا اخي كان خارج البيت وداري ان احنا هنيه لا تقلقيش ، ورجعت اهز بنتي بيدي اليمين وبنحاول اسكتها قدنا عاطش قوي وما عدبش فيني قوة حتى اننا اصيح ، وبنتي سلى كانت تقل اشتي ننه اشتي ننه ، مقدرش اوصف القهر اللي انا فيه وانا بنسمع بنتي بتدور تاكل او شي تشربه وتدور امها ما دريت ما اقلها ، مديت يدي بالقوة بنحاول احفر الفتحه على شان اقدر ابسر لا عند امي سوى وقد الضوء حق الكشاف ضعيف ، وانا بنحفر ما دريت الا وانا بنحس كتف ضويت بالكشاف ولقيت زوجتي جنبي كان ارجلها للخصر تحت الانقاض وراسها مدفون تحت التراب وما ضاهر من جسمها الا من بطنها لا عند الاكتاف وعادنا بنضوي وبنبسر الملابس حق زوجتي مش قادر استوعب الفجيعه ما دريت الا وبنتي سلى سكتت رجعت اضوي لا وجهه بنتي وبنلطمها دلا بنحاول افوقها وكنت اقل سلى بنتي قوى يا بابه لا تفلتينيش واصيح بكل صوتي ياااااااااارب قوى يااااااااااااارب رحمتك ، وفجأه حسيت انفاس بنتي سلى وهي بتلامس وجهي ، قلت الحمد لله الحمد لله ، ورجعت بنحاول احفر التراب من فوق زوجتي بيدي اليسار كنت اهزها من كتفها واصيح لها بس ما كانتش ترد عليا، كيف ترد عليا وراسها مدفون تحت الانقاض ، ورجعت اصيح يماااه امااااه انا فدال ارجلش ردي عليا وما كنت اسمع الا وهي بتتنهد وتتوجع ، طفيت الكشاف وحاضن لبنتي ويدي الثانيه فوق جثة زوجتي وبنبسر لضوء البسيط حق الشمس اللي جنب امي وهو بيختفي شوية شوية .. لما فقدت الوعي ...
-الليلة الثانية ....
فتحت عيوني وانا بنسمع صوت الناس من فوقنا وبنسمع صوت الشيول وهو بيحفر ، كنت اصيح بكل قوتي مفتجع يكبسونا بالانقاض وهم بيحفرو بالشيول كان صوت الشيول اخبث من صوت الصاروخ ومن كثر ما كنت اصيح بنتي سلى قامت وهي بتبكي رجعت سكت وحضنتها وبنقلها سعليش يا بابا وكانت تبكي بصعوبه ما عدبش معاها صوت من كثر التعب وقلة الهوى والجوع ، وكانت تقل نانا اشتي يمم ، وعيونها بتتقلب ، ما دريت ما افعل مديت يدي لا عند صدر جثة زوجتي وبنحاول اخرج ضرعها وبالقوة قدرت اخرج ضرعها وقلبت بنتي سلى لا فوق صدر امها وقلت اشربي يابابه اشربي كان الموقف ذية من كثر بشاعته كنت احس قلبي بيتكهرب اطرحت سلى فوق امها وهي بتشرب من ضرعها وبتحاول تمد يدها تشتي تلمس وجهه امها وانا كنت ارجع يدها واقلها اشربي يا بابه اشربي ، شربت لما رقدت ، لصيت الكشاف وبنبسر من الفتحه لا عند امي ، وهي بتقل يالله ..يالله وقدهي هالكه خلاص بتلاحق انفاسها الاخيره ملاحقه ، رفعت الضوء حق الكشاف لاعند الفتحه اللي كان يدخل منها ضوء الشمس ، وبنلصي الكشاف واولعه ما سمعت الا واحد بيقل به ضوء هنيه باقي ناس ..باقي نااس اين الشيول يجي ، وانا بنصيح مااشي ..ماااشي ، مفتجع يجي الشيول بغشامة يحفر ويقتل امي ، ما سمعت الا الشيول بيقرب وبيحفر وابسرت الجدر اللي قفا امي لما اقتلب لا فوقها وكبسها ، صيحت بكل صووووتي يمااااه يماااااااااااه واخر شي ابسرته رجل رجال من الفتحه اللي كنت ابسر منها ودوخت ...
يتبع
#يمني
#منيرالنقيب
يااااااالله وفقدت الوعي بعد ما حسيت ان التراب والحجار ارتجمت لا فوقي بقوة وكبست عليا وانا حاضن بنتي ....
اول ما بدأت افوق ، وقبل ما افتح عيوني حاسس بثقل ضاغط على جسمي بقوة ومشنا حاسس بجسمي وبنسمع طنين في اذاني بقوة كان صوت الطنين ذيك عيفجر راسي اول ما جمعت حسي ذكرت انهم قصفونا وانا حاضن لبنتي استوعبت أن اللي بنحسه فوقي هو تراب وانقاض جيت اشتي افتح عيوني بس ما قدرتش اول ما تتحرك رموش عيوني التراب يدخل لا عيوني طيب اين بنتي "سلى" انا كنت حاضن لها بس ما عاد بنحسش جسمي كله فقدت الاحساس ومشنا داري هل بنحرك يداتي او ماشي اشتي احس بنتي ، اشتي اقوم ،اصيح ، ما قدرتش فمي ملان تراب بدأ عقلي يستوعب ودريت ان اهلي كلهم ماتو تحت الانقاض وانا قد بنلفظ انفاسي الاخيرة ، كنت اتنفس بصعوبة التراب كله فوق صدري ، الوجع اللي في صدري قسم صدري نصين مش بسبب التراب الانقاض اللي ضاغطه على جسمي ، ماشي كان وجعي وقهري على بنتي زوجتي امي ابي اختي ،اشتي اتنفس التراب بيدخل لاحلقي كنت اتقهد تقهاد ( ابكي بغصة) كانت تخرج الغصة بصعوبه قوي كنت احسها بتفلخ ضلوع صدري وهي بتخرج وكان كل اللي يخرج مني هو صوت ااااه ..ااااه ، وفجأة بدأت احس بحاجة بتتحرك عند بطني وبنسمع صوت امي بتقل بوجع وبصعوبه يالله ياالله ...
يتبع...
#يمني
#منيرالنقيب
الشقة وغرفة الحارس ومشنا داري ايش السبب ، واعلنو في النشرات عن الخبر والموضوع وعن خطورة الساحره امواج ، وكم قد به ضحايا بسببها ، وما قد فعلت هي وعصابتها ، وانه تم قتلها بسبب مقاومتها مع رجال الامن ، وفي خلال اسبوعين خرجنا كلنا من العمارة مع جميع المستأجرين ، وكل واحد ابسر له بيت ، وبحر سرت للمشفى اسال عنه ، وعن ابوه ، وكانت صحته تمام وابوه بدأ يتحسن ، وقلت له ما عتفعل قال مشنا قادر اشكرك ، بس شا اخلي ما تبقى من عمري الاحق بعد الحارس هذا لما اديه او اقتله قلت له قد قتله المرنج ابن عاقل الحارة ، قال ماشي ما قتلش عادهو بخير محد عيقتله الا انا استغربت من كلامه ودعممت ، والرجال صاحب الالي كان فيه جلطه نصفيه فمه اصبح على شق ، ولا يومنا هذه معروفه هذه العماره بعمارة ام العرج ، ومحد بيسكن فيها ، (وتعلمت ان الشر والطيبه والخبث والجمال مش موجود في من يتصفون به بل موجود في نفوسنا وفي طريقة نظرتنا للاشخاص ، قبل الحكم عيد النظر الف مره وفي كل مره ستخرج بحقيقه غير سابقتها ).
#انتهى.
-اتمنى ان القصة نالت اعجابكم وعشتو احداثها ....
#بنت_الجيران
#منيرالنقيب
انا وابي وامواج
بتهددني بقتل ابي وامرتنا نفعل هذا كله بنينا الدرج من خلف الشقة على شان هي بتنزل بشكل سري لا عند الحارس وتدير اعمالها واخفت كل شي حتى وجودنا ، حاولت اتكلم مع باقي اهلي بس ما قدرتش حاولت اهرب ابلغ بس ما قدرتش كل ما ابعد من العمارة افقد الوعي وما ادري بنفسي الا وانا في غرفة الحارس او في شقتنا ، قلت له طيب كيف مات المرنج وعاد امواج ما جت لشقة كيف العمال ابسرو امواج ويعرفو اسمها وحصل معاهم كل اللي حصل ، قال الاسحار موجوده في العمود حق العماره والحارس هو اللي فعلها وهو اللي دبر هذا كله وضحو بالرجال على شان تطلع اخبار على العمارة انها مسكونه ومحد يستأجر فيها لما يجهزو نفوسهم وهذا فعلا اللي حصل ، وما درينا انا وابي الا واحنا في الشقة ، ولما ابسرتني بنضرب الحارس لو كنت ركزت ورفعت عيونك كنت عتبسر امواج وهي في الدرج الخلفي هي اللي قالت انزل اضرب اخوها وافتح الباب لانك عتجي وتشوفني وانا بنضربه ويتاكد الموضوع عندك بكل الكلام اللي قالوه ، والسبب الثاني انه تكلم معك عن المقاول وجاب لك معلومات عنه، امواج زعلت وفعلت به كذيه ، والحارس ما كنش اعجم بس مدري ايش تكلم وامواج طرحت جمر في فمه والغريب ان اخوها ما يقدرش يكسر لها اي كلمة مسيطره علينا كلنا ، انا نفسي مشنا فاهم كيف قادر اجابرك بهذا كله بدون ما افقد الوعي او يحصل لنا اي شي ، ولاننا ضقت اول ما حسيت نفسي حر اقدر اتحرك بمزاجي قررت اطلع وارجم نفسي من الجباء واخلص نفسي من العذاب هذا ، قلت له لو كل الكلام اللي قلته صح كيف عتفلت ابوك في يدها وانت مضحي بكل هذه السنين لاجل ابوك كيف عتفلته ذلحين ، قال ما شقدرش اوضح لك انت كان باقي لك يومين وتوصل لمرحلة الجنون وتنتحر هذا اذا ما جننتش بسبب موت ابوك او امك ..قلت ايوه انت جيت تهددني بموتهم ..!! قال انا مأمور افعل كذيه من امواج ،ورفع الشميز يروري لي ضهره وضهر كله مشطط ومذبح بأمواس ، قال كل شوية تخلي اخوها يشطط ضهري ويعبي قلص دم ويديه لأمواج .. وهو بيتكلم ما درينا الا بصوت صاااايح ملان العمااارة لما سنبين شعر راسي لأول مره اسمع ساع ذيك الصوت بحر وقف وهو مفجوع ورجعت ملامحه ساع اول ابسرني ونزل سريع ، وانا ماسك اذاني من قوة الصوت ، اول ما وقف الصوت خبيت الجنبيه تحت الفنيلة ونزلت سريع وانا بننزل كنت ابسر المستأجرين بيخرجو من الشقق حقهم وبيسألو ماهو هذا الصوت ؟!! وصلت باب شقتنا وابي واخي عند الباب اول ما ابسروني قلي ابي ..علي اين كاننت يا ابني وما خرجك من البيت ؟ قلت له هاه انا سمعت صياح يا اباه وقلت اخرج ابسر مابه بس اول ما خرجت سمعت الصياح وافتجعت ورجعت قلي ادخل سريع ، دخلنا وكلنا مستغربين من الصايح منينه جى وانا فارح ان الكل سمع الصايح ذيك وجالسين نتجابر في الصالة ومستغربين من من الصايح ذيك ، فقلت يا علي تيه فرصتك اننت تتكلم بكل شي وكنت مصدق لكل كلام بحر لاننا كنت احس بضيق من يوم ما شفت امواج ومن تصرفاتها الغريبه وتصرفات اخوها العملاق ومن الورقة اللي رسلت لي وكل المشاكل اللي حصلت معي ، قلت اسمعني يا اباه لا تقلش اننا مجنون ولا شي ، يمه تذكري صاحبي اللي جى يزورني اليوم قالت ايوه قلت لها ايش اسمه قالت بحر ، صلو على رسول الله بحر هذا مشو زميلي هذا ابن صاحب العماره وساكنين في الشقة اللي قبالنا واكيد كلنا قد سمعنا قصص عن الجن والكلام هذا عن العماره او ماشي؟!! ، طيب يا اباه به ساحره تزوجت بابو بحر وجالسين في الغرفه وبيفعلو حاجات فوق ما يتصورها العقل ولو مش مصدق لي جي نهجم على الشقه يا اباه ، قال كيف نهجم على الشقة يا ابني باي حق وما عنقول لناس وبعدا الشقة فاضيه للجننان حقك هيا مه انت قلت نجي البيت وعتبطل مجنانه ، قلت له يا اباه انا ابنك طيب سايرني انت بنفسك قلت الشقة فاضيه من عيلومنا عنقول ان احنا سمعنا الصايح الكريه هذا من الشقة ودخلنا نتاكد ، واذا ما بش احد عنقول ان احنا غلطنا وحلينا الموضوع مع الحارس قال ما يسبرش يا ابني انت بتفهم ، واخي نبع وقال يا اباه ما فيها شي لو فعلنا على ما قلنا علي وبعدا هو صدق يا اباه ماهو الصوت اللي سمعنها اسألك بالله عاد جسمي مقشعر لا ذلحين ، ابي قال هيا تمام عيالي الاثنين جننو ، شخطي بعد مجبرك يا علي لكن لو مابش شي انا داري كيف اتصرف معك وخرجنا من الشقة انا وابي واخي وامي بتشاقرنا من قفى الباب ، عاد ابي بيقل يا جهالي خلونا ندقدق الباب اول واذا محد جاوب نكسره ، عاده ما كملش كلامه نبعت انا واخي زبطنا الباب لما كسرناه ودخلنا اول ما دخلنا شمينا ريحة شوعه قوي والشقة ملان دخان وبندور في الشقة لقينا في الصاله بحر وهو مقيد وهو مخلس وجسمه كله دم والعملاق في يده امواس من حق العمليات بيشطط ضهر بحر ، وقفنا كلنا مطننين ومستغربين قوي من هول المشهد اللي بنبسره نبع اخي على طول مسك يد العملاق وبيحاول يضاربه دهف اخي للارض وكان يصيح ساع الغول وابي نبع له، العملاق مسك ابي من رقبته ولزه لاعرض الجدر بيخنق ابي ، خرجت الجنبية من
#يمني
-البارت "13"
"القبضة"
سرت للمشفى وسألت عن المريض عصام اللي كونته في البيت حق مذبح ، قالو في غرفة الرقود الدور الثالث ، طلعت واخوه الكبير جنبه ، ابسرت عصام وهو ممدد وقد خرجو الرصاصه من فخذه اول ما وصلت قلت كيف حالك يا عصام قال الحمد لله بخير وهو بيبسرني ومستغرب ، وقال اعذرني يا اخي ما اذكركش يمكن لاننا مريض، قلت له ايوه ما تذكرنيش واخوه قام وقال انت اللي معك التلفون صح ؟ قلت له ماشي واين تلفون؟! ، انا اسف يا عصام نسيت ما اشتري لك عصير حق الزيارة وخرجت عشرة الف مكنت اخوه وقلت له سير اشتري العصير وانا شجلس عند عصام لما ترجع ، اول ما خرج اخوه جلست جنب عصام قلت له اسمعني هذا تلفونك وهذه اوراقك بس انا شليت الشريحه حقك على سب ما تدخلش في العمل الوسخ هذا مره ثانيه ويعلم الله كيف كان عتكون نهايتك لو فلتك في ذيك البيت وانت فاهم قصدي ، حاول يقوم وبيبسرني وهو مقعي فمه قال هو انت اللي هربتني من البيت صح ؟!! وقرح بكاء ونبع يحضني قلت له ذلحين انا شا ارحلي قدنا داري اين سكنك وداري كيف اوصلك خلي تيه الزلط معك حق علاجك وكما قد خرجت وقدنت بخير انا شا امر لك بس توعدني انك ما ترجعش للعالم الوسخ اللي كنت فيه ، قال اقسم بالله ما انسي لك هذا الجميل اللي فعلته ولو تطلب راسي لا اديه بدون ما افكر واذا رجعت للعمل الوسخ هذا فمشنا رجال وشل التلفون مشتيش قلت له انا شبسر ومشتيش احد يعرف بأي شي ولا تكلم احد عني ، تمام قال حاضر من عيني ، وقمت رحت لي قبل ما يوصل اخوه ، سرت للمكان اللي اتفقت التقي فيه انا وصاحبي معتز ، اول ما وصلت قلت له اطلع فوق السيارة طلع وهو مستغرب وقال والله يا يمني وقد معك سيارة قلت له مشي حقي ذلحين اسمعني بما انك العقبري حق شلتنا ومعك كمبيوتر في راسك وتعشق البرمجه والاختراقات والامور هذه شديلك مبلغ ، تستأجر في مكان غير اللي انت فيه وتشتري كل الاجهزه اللي تحتاجها وتجلس في البيت تشتغل كل اللي شا اقوله لك ، قال ماهو المجبر هذا كله يا يمني ومالك بتكلمني بطريقة تخوف لأول مره ابسرك بكل هذا البرود حسستني اننا طلعت مع زعيم مافيا ، قلت له شا اوضح لك كل شي في وقته ذلحين مابش وقت ، بعد يومين افتعل اي مشاكل في حوش التشليح حق عمنا واتسبب بطردك وخروجك من العمل يعني اخرج من العمل بدون لفت انتباه ، وانا شرجع امر لك للبيت واديلك المبلغ اللي اتفقنا عليه ، قال يا يمني انت صاحب الطفوله حقي وبنوثق فيك اكثر مما بنوثق بنفسي فلذالك ما عاد بسألكش او اناقشك وشا اقلك قلدك الله فيني وانا من يدك تيه لا يدك الثانيه ، قلت له سابر ذلحين انزل ، قال وصلني يا رجال عيب عليك ، قلت ماشي انزل يا معتز وخليك نبيه وكون ابسر وراك اذا احد بيراقبك او شي ، قال من عيراقبني يا يمني لا تجننيش ، قلت له انسي ايام البساطه وكل شخص بعد حاله ومحد في حول احد وتخيل ان العالم كله بيراقبك وانتبه ، قال سابر .. يا يمني ما عيحصل الا كل خير ويعلم الله ما قد في راسك والصدق مشنا مقتنع بكل الموضوع اللي قلته بس لأننا اعرفك واعرف اصلك وطبعك انا بعدك وكل كلمة قلتها لي تعتبر بالنسبه لي أمر ، قلت متفقين اذا هيا الله يفتح عليك ، وشغلت السيارة ورجعت للفله حق عمنا دخلت السيارة ، وخرجت ادخل السيارة الثانيه اللي وصلها اخي ، طلعت لا عند عمنا جلست شوية معه ، وهو مخزن وبيقلب اوراق وفوق الابتوب والتلفون وانا مخزن ولا اديت له نخس ، طرح كل شي من يده وابسرني وقال يمني .. قلت له معك قال انا ما شسألكش كيف عرفت مكان المخطوف او كيف عرفت من اللي خطفه ولا شسألك كيف قدرت تشل المخطوف والخاطف ، لاننا مش متعود اسأل، كل شي اعرفه بطريقتي الخاصه ، قلت له اذا أبسرت اي شي مني اتاكد اننا تعلمته منك .. قال قلت لك اننت ذكي وبتعرف ايش تقول وكيف تتصرف ، ذلحين اسمعني لأن اللي شا اقوله كلام ما يستوعبش اي عقل كلام عمرك ما كنت عتسمعه او تعرفه كلام يدخلك عالم ثاني محد يعرفه الا قله قليله جداً بس اشتيك تركز معي شويه ، يعتبر اخطر كلام عينقال في عالمنا ذيه ، قلت له باقي اخس من العالم اللي احنا فيه يا عمنا ، ابتسم وقال قلت لك اللي شا اقوله لك عيفعل اعادة ضبط لمفهومك كله انسي كل شي تعرفه واسمعني ، قلت له قول يا عم وقد شكلك بتطعمهن قوي ، ضحك واول كلمه قالها يا يمني عمرك سمعت عن "القبضه" او وهم القبضه او عائلة القبضة او قبضة الشيطان او ظل القبضة ؟؟ قلت له ماشي ايش هذه المسميات كلها يا عمنا ، قال كلها مسمى واحد تبدأ من الخنصر وتنتهي بالابهام اسمهم الاصابع الخمس هولا اللي بيحكمو العالم وكل خمسه تحتهم خمسه وهكذا من اعلى واحد اللى اصغر واحد والخطير في الموضوع ان الخمسه اللي تحت ما يعرفوش الخمسه اللي فوقهم وكل خمسه بيعتقدو انهم الاساس او الزعماء وما بش احد فوقهم وهذه هي اقوى حركه لهذه الجماعة ، انا واحد من الخمسه اللي مسيطرين على البلاد هذه ومعرفش منهم الاربعه اللي معي ولا واحد منهم يعرف الثاني وكل
#يمني
-البارت "12" ...
طلعت فوق السيارة وخرجت من الفلة حق عمنا وسرت طريق الموقع وانا مخطط في راسي اننا اوصل ادق الباب واللي عيفتح لي شقتله وادخل ولين ما وصلت ، وصلت لا اماام البيت لبست القناع ونزلت وصلت للباب الصغير اللي جنب البوابه الكبيرة وكان الباب مفتوح استغربت ودخلت دلا ..دلا وفي يدي المسدس وعرضه الكاتم ومابش احد في الحوش مابلا السيارات وسمعت صياح في غرفه في الدور الاول قربت من الطاقة بنسمع ، وابسرت الرجال بيصيح فوق العسكر حقه ما يقارب سته اشخاص وبيقول داهمو البيت اللي في مذبح يا عيال الكلب شلو البضاعة كلها البضاعه بملايين حق ناس الان تسيرو كلكم لا هنيك مشتيش ابسر احد عندي الا لما ترجع البضاعه الان تتحركو ، تخبيت قفى البيت وكلهم خرجو ما عدا الحارس حق البوابه وصاحب البيت اللي خطف ابن المسؤل ، وخرج معاهم للحوش بيبسرهم وهم بيطلعو فوق السيارت وخرجو وخرج تلفونه واتصل وبيقول قلدني الله لو ما ترجع بضاعتي لا اقتله وشنثرها نثره محد قد سمع بها وقفل الخط ودخل بيته ، دخلت بعده سكته وطرحت المسدس قفى راسه قال من انت؟؟ وهو مفتجع ماتشتي وكيف دخلت بيتي مشنت داري من انا ،قلت له اسمعني ما شا اكررش كلامي شقتلك هنيه ساع الكلب ومحد عيدرى من غريمك ، اين ابن فلان ، قال هاه حاضر.. حاضر لا تقتلنيش ابن فلان في البدروم نازل قلت له امشي قبالي ، وسحبت التلفون من يده وشليت المسدس اللي في خصره ونزلنا للبدروم وكان معه ثلاث غرف ساع السجون مخصصهن للعمليات حقه ، فتح الباب وابن المسؤل جالس ومغطيين على وجهه ومقيدين له ، وعاده شباب في العشرينات من عمره ، قلت للولد قوم وقلت لرجال امسكه في يده ومشيه قبالي قال قد اديت لك المخطوف ما عاد تشتي مني شله ورحلك ، ضربت رصاصه من جنب اذنه قلت له لا تناقشنيش مره ثانيه، ابسر في مسدسي كاتم ودرى ان مابش سفاط ،ومشي سكته طلعنا للحوش وقلت له اطلع فوق سيارتك وطلعت المخطوف ورى وانا ركبت جنب السواق وخليته يطرق للحارس يفتح بدون ما ينزل الفريم وخرجنا من بيته وانطلقنا طريق الفله وقد احنا قريبين من الفله قال هاه انت مرسل من عمنا ، قلت له بنقلك امشي سكته ازيد اسمع نخس شطرح الرصاصه الثانيه وسط عيونك ، قال حاضر ..حاضر كنت عتقل انك من طرف عمنا وكنت شا اجي لا عندك انا والمخطوف مابش داعي يتعب نفسه ،وعمنا اتصلي جاوبته قال اين سرت يا يمني عتجي او اتعشي واخزن وحدي ؟!! قلت له خمس دقايق وانا عندك معي لك هديه حاليه ، قال لا عاد تزيدش بها يا يمني انا ضابح ومشنا داري كيف عنحل المصيبه اللي فوق راسي قلت له خير ..خير خمس دقايق واكون عندك ، ومشينا وصلنا امام الفله ومديت يدي للهون وضربت الهون اربع مرات بدون ما الفت انتباه الرجال والباب افتتح ودخلنا نزلت الرجال وخليته يجلس على رُكبه ونزلت المخطوف وجلسته جنبه واتصلت لعمنا قلت له انزل للحوش ، قال قدنا في الدرج قد جابرني الحارس ، وصل وابسر الرجال واستغرب قد كان عيونه عتنكع للارض من كثر الاستغراب ،رجع يغالط وقلي من هو هذا يا يمني؟؟ وليش اديته لا عندي قلت يا عمنا ذيه اللي خطف ذيه ولثمت الرجال بالشال حقه على شان ابن المسؤل ما يتعرفش على اللي خطفه ،وبعدت الكيس الاسود من راس المخطوف عمنا ابسر ابن المسؤل لما جلس للارض وقال هذا ابن فلان ، قلت له ايوه قال وكان مخطوف مع الكلب ذيه؟!! قلت له ايوه قال كيف فعلت يا جني كيف دريت كيف سويت ؟؟؟ قلت مش وقت انا كملت مهمتي الأوله اللي وكلتني بها ذلحين باقي العمل عليك ، قال ايوه صح ، صيح للحارس قال نزل الولد للبدروم ودخله في الغرفه رقم 4 ، وقال لرجال قوم يا نذل وطلعنا انا وعمنا والرجال لطيرمانه ، قله ليش خطفته وعادنت كنت عندي قبل شويه يا سعم ما قصدك تشتي تثير المشاكل بس ؟؟ لكن انا داري كيف اربيك ، الرجال جالس ساكت ولا فتح فمه ، ما دريت الا وعمنا بيقلي سلم له تلفونه ومسدسه وخليه يرحله ، قلت اخليه يرحله بكل تيه البساطه ؟!! قال ايوه خليه يرحله ، قلت سابر ، سلمت المسدس والتلفون حق الرجال والرجال قام وخطي لا عند الباب حق الطيرمانه سكته بدون ما يتكلم ما سمعته الا وهو بيعشق المسدس ويشتي يقتل عمنا ، على طول خرجت مسدسي وطرحت له واحده في وسط راسه ، وعمنا جالس بيتعشي ابسر ورجع يتعشي ولا كأن به شي حصل ، قال ليش قتلته يا يمني ليش؟؟ قلت كيف ليش قتلته وهو... قاطعني وقال انا بنضحك معك لو في يدي لا نقتله سبع مرات هيا اجلس نتعشي ، قلت له نتعشي والرجال ميت قبالنا ودمه ملان الطيرمانه ، قال اجلس ما عليك منه شكله يفتح الشهيه ، جلست وانا بنجابر نفسي هذا وحش مش بني ادم ايش القلب اللي معه وايش الحنكه هذه كلها وهل قلي اسلم لرجال مسدسه لانه داري ان الرجال عيفعل كذيه وانا شقتله لان عمنا ما بدرش منه اي ردة فعل ولا كان مستغرب، أو قلي اسلم لرجال مسدسه وكان يشتي الرجال يرحلهمن صدق ، وجالس اسأل نفسي الف سؤال ، ما سمعت الا وعمنا بيقل هيا تعشي مالك مطنن قلت بنتعشي يا عمنا كثر الله خيرك قال كثر
#يمني
- البارت (11) ....
قلت له طيب يا عمنا ادي لي معلومات اكثر من هم اللي خطفوة وكيف قدرو يخطفو ابن المسؤل فلان ، وهيبته ملان اليمن ، قال اقلك قوم معي عنسير انا وانت يا يمني ، عادنا منتظر باقي المعلومات ، ونزلت انا وهو للغرفة حق الاسلحه اللي في البدروم ، بس هذه المره لما فتح الباب حفظت كلمة السر حق الغرفة ، وانا بنتسلح قلي امسك البدله تيه البسها في الغرفه الثانيه قلت له تمام ، وانا خارجي ابسرته وهو بيقرب من الخزنه اللي عرض الجدر خرجت لبست البدله ، وكانت البدلة ثقيله قوي ، كملت خرجت وعمنا خرج من الغرفه وفي يده شنطه ولابس نفس البدله حقي بدلة سوداء وكأن داخلها حديد او شبك حديد مفتهمليش ، ومتقنعين بقناع ساع الخوذة الكاملة بس نصها يلتبس ساع القماش ، وقلي هيا يا يمني هيا ، طلعنا فوق السيارة وخرجنا من الفلة وكل شوية بيبسر تلفونه ويتصل ، ويقل طيب كيف حصل وليش هذا كله ، خلاص .. خلاص قد وصلتني كل المعلومات حتى ارقام تلفونات كل افراد العصابة وهوياتهم وعائلاتهم واماكن سكنهم خلاص خلو الباقي عليا محد له دخل بتسمعوني محد له دخل ، ومشتيش ابسر اي طقم تبع الدوله هنيك او اي عسكري ، وقفل الخط ، استغربت قوي قلت يا عمنا اللي وصلني للان ان قوتك وسلطتك اقوى من المسؤل ذيه فكيف عنسير نخرج ابنه ونخدمه ، وانت مش أسف به ولا بأبنه ، قال انا داري يا يمني بس بعض الاحيان ضروري تهش الغنم بعصاك للمرعى ، وضروري تضبط الامور بين مثل هذه الشخصيات على شان ما يختلش نظامنا ، قلت نظامكم ؟؟!! ضحك وقال لا تكن تركز على كل كلمة اقولها يا يمني ، قلت له طيب بما اننتو داريين اين موقعهم ليش ما تخلي الدولة تسير تتم المهمه احنا ما دخلنا يا عمنا ؟؟ قال لو كان شخص غيرك بيقلي هذا الكلام كنت شا اقول انه خايف بس انا دري مالغرض من سؤالك ذلحين ما علينا خلينا نسير نخرج ابن المسؤل وبعدا عتفهم ، قلت له سابر يا عمنا انت اخبر بس ليش يا عمنا ما نسير لا بيوت افراد العصابه ونتصلهم ونهددهم ان احنا نعرف اهلهم واماكن سكنهم قال لا لا ، بعض المعلومات المفروض ما نستخدمهاش لصالحنا وبعدا خلينا نرفع الادرنالين يمكن يقلبين القات عندي واطعمهن قلت له بعدك يا عمنا ، ماشي طريق الموقع في منطقة مذبح ، وبنفكر بيني وبين نفسي كيف يا يمني قدنت تشتي تهدد الناس بأهلهم ايش الخبث اللي قدنت فيه ؟!! بس يا يمني هولا كلهم مجرمين وعيال سوق ويستاهلو القتل لا ترحم احد منهم ، بس اهلهم لا يا يمني اهلهم لا ، وصلنا للموقع وبنبسر البيت اللي فيه العصابه ، حووش كبير وفي النص البيت مع ان كل البيوت اللي في مذبح ملتصقه ببعض وشعبية ، ايش معنى البيت هذا منفرد لوحده ، قلي عمنا هيا اقتحم البوابه بالسيارة يا يمني وننزل نضرب عليهم نار من شق وطرف ، قلت له ماشي يا عمنا ، هذه المره خلينا ننفذ المهمه تيه بمزاجي انا وبطريقتي ، ابسرني وهو مفتهن قال بعدك يا يمني ما عنفعل ، قلت نتسلق من السور سكته ونركب الكاتم في اسلحتنا ونصفيهم سكته بدون دوشه وبدون محد يسمعنا ، ونتاكد اذا ابن المسؤل هنيه او ماشي قال المعلومات اللي معي اكيده يا يمني الا ابن المسؤل هنيه قلت سابر ، وطلعنا من فوق السور وعمنا مشي من الجهه اليمين وانا من الجهه اليسار ، كان به داخل الحوش سيارة هيلوكس بدون رقم وسياره تكس قديم بدون تواير وثلاثه مترات ، والبيت دور واحد مع البدروم ، وعمنا جى من خلف البيت وصلت امام الطاقة وبنبسر سته اشخاص مخزنين لابسين اثواب واثنين اشخاص منهم لابسين لبس اصحاب المترات وبالقعشات وفي العشرينات من اعمارهم وفي نص الديوان كميات حشيش كبيرة ، وبيقسموهن بينهم على شان يوزعوهن في السوق كان شكلهم مسطولين ، قررت انا شنزل للبدروم وابسر اذا شلقي ابن المسؤل ، اول ما دخلت سمعت ضرب رصاص واشتباك خلف البيت عند عمنا ، على طول رجعت ورى خرجت من البيت ، وابسرت السته الاشخاص قامو اللي بالبندق واللي ماسك مسدسه ، اول واحد خرج من الديوان كونته في رجله ، والباقيين جلسو في الديوان وكان يضربو عليا نار من الطيقان حق الديوان ، وانا بنضرب نار وفي نفس الوقت مشتيش اقتل احد خصوصا اللي اعمارهم عشرين سنه عادهم في بداية عمرهم ، على طول جريت لا خلف البيت ولقيت عمي متمترس جنب الباب الخلفي وبيأشر لي سكته ادخل من الطاقة به اثنين عند الصالة ، وقد به واحد عند الباب الخلفي ممدد في الارض وغارق بدمه ، وعاد عمنا بيجابرني ما درينا الا لما ارتجمت قنبلة لا جنبنا ، نبعت انا وعمنا للارض نتمدد وقرحت القنبلة ، طنيين اذاني ورجعت لي الذاكره مره ثانيه لا وقت ما قصفو بيتنا والطنيين اللي حصل بسبب انفجار الصاروخ ، ما دريت الا وعمنا بيسحبني من ضهري وبيقل يمني .. يمني بتسمعني قلت هاه ايوه ..
#يمني
- البارت العاشر ....
خرجت انا وبنتي سلى ابسر بنت عمنا وهي فوق السيارة جنب المستشفى ، اول ما وصلت طلعت فوق السيارة وقلت لها الحمد لله على السلامة ، قالت الله يسلمك ، ياربي محلى البنت تيه ، بنت من هي قلت تيه بنتي سلى ، اقتلبت صورتها وقالت يعني انت متزوج ، قلت لها كنت متزوج بس توفت ام سلى الله يرحمها ، شلت بنتي لا حضنها وبتبوسها وتلاعبها ، قالت لي كيف جدتك ؟ قلت الحمد لله وقد بنعامل على الخروج، شلت العصاير والفواكة من الكرسي الخلفي ومكنتني ، قالت هيا انا شا اوصلكم للبيت اللي كلمك ابي عنه ، قلت لها ماشي انا شا اسير وحدي انتي ذلحين كفيتي ووفيتي ما نشتيش نتعبكم معانا ، قالت انا مدينه لك بروحي ومشنا دارية كيف اجازيك يا يمني ، قلت لها ما حصل شي واي شخص مكاني كان عيفعل كذيه ، قالت مش كل شخص من ايحين به ناس تضحي بروحها على ناس ما تعرفهاش او قوية قلب مثلك او في مثل ذكائك ، بصراحة انت الشخص الوحيد اللي تشبه ابي وبنشوف فيك حاجات كثيرة نفس ابي ونفس الغموض حقه محد يدرى ما في قلبك ، وقتها عرفت ان بنت عمنا بدأت تعجب في شخصيتي وشكلها عتتعلق فيني ، قلت لها خير ..خير ذلحين معي عمل خاطرش ، قالت هاه لحظه ، خرجت لي مشمع دعاية وقالت قد ابي اخبر بك وقلي امكنك تيه ، جيت ابسر المشمع الدعاية وداخله زلط بالعملة السعوديه واليمنيه والدولار ، قلت لها حق ايش هذه قالت قال ابي خليها حاجتك وكما قدنت فاضي تمر لا عنده ، قلت لها تمام ، شليت الزلط وكملت اجراءات الخروج ، وسرت ادور بيت نستأجره ، جلست الف بالسيارة ملان شوارع صنعاء ابسر اذا ابه احد بيراقبني ولا شي ولما تأكدت استأجرت شقة مفروشة ، وطرحت جدتي وبنتي فيها وخرجت انا واخي وهو بيقلي يا يمني ، منينه معك الزلط تيه بكلها ، قلي بأيش متورط يا اخي ، ما عاد باقي معي في الدنيا الا انت وما معك غيري لا تخبيش عليا انا اخوك الكبير ، قلت اسمعني شا اجابرك بالموضوع كله وكلمته بالموضوع كله ، وقلت له ذلحين انا متورط مع ناس سلطتهم فوق الدولة بيفعلو كل ما في راسهم ولا هم ضاربين لحد كرت ، مبينين انهم ناس بسطاء ومحد يقدر يشك بهم بشي لكن في الباطن كلمة ملوك قليله في حقهم وغناهم ، مشتيش منك تخاف يا اخي ما بنموت الا مره واحده ، واشتيك تكون ضهري وتشتغل معي سكته بدون محد يعرف وشا اكون اتصلك ايش تفعل وايش تسوي ، قال تمام يا اخي ، افديك براسي وروحي ، ومعتز صاحبي بيتصل ،جاوبته قال يا يمني اين انت ؟ بنتصلك واراسلك وانت ما بتجاوبش او عادنت في الحديده انت وعمنا ؟ والله شكله ارتاح لك يا ولد قلي كيف فعلت ؟! قلت له قدنا في صنعاء يا معتز ، ولا عاد تتصليش انا شرجع اتصلك واقلك اين نتقابل ، قال ليش ما به ، قلت ولا شي واذا احد سألك عني قل مدري وقول ان احنا ما عاد بنتواصلش خصوصا مع اصحاب الورشة حق عمنا ، قال ولا تقلق يا يمني وانا اخوك ، قفلت الخط ورجعت اخي لشقة وقلت له حاول تبسر اي بطاقة مش معروفه واشتري ثنتين شرايح وتلفونات صغيرة عنكون نتواصل بهن وانتبه تتصلي ، قال تمام ولا يهمك ، واتوكلت لا عند عمنا وصلت للبوابه وطرقت اربع مرات وقد كانت الساعة تسع الليل ، الحارس فتح لي البوابه وبيتمم لي استغربت من الحارس لاول مره يتمم لي، المعروف عنه انه بيفتح البوابه وعيونه للارض وما يتكلمش مع احد ماله اليوم ، قلت له اين عمنا ؟ قال في الطيرمانه بس عنده ناس ، قلت له سابر ، فعلت لعمنا رساله قلت له انا في الحوش حق الفله و قلي الحارس عندك ناس ، قال ايوه خلي الحارس يدخل السيارة لا خلف الفله لحد يبسرها وانت انتظرني في الدور الأول ، لحد يبسرك ، قلت له تمام ، دخلت الفله وطلعت لطيرمانه سكته ، وبنتسمع من خلف الباب ، وسمعت ، واحد بيتصايح مع واحد ثاني وعمنا بيسد بينهم ، الأول قال كيف يخليني ادخل الشحنه ويتم تقسيمها على المحافظات والدفعة الاكبر يأمر بالقبض عليها ، والثاني قال ، لا تحسسنيش اننت اول مره تشتغل قدك تعرف النظام المطروح علينا ، والدفعة اللي تم مسكها بس لتطمين الشعب واعلانها في النشرة فقط ، وعيتم استرجاعها ، الأول قال ، ولو ليش ما يتم تبليغي بهذه المعلومات ، عمنا قال خلاص اهدأو كان الوضع كذيه بسبب ضربة لأحد المسؤلين ، صح قد تم تهديده وتصويره وابتزازه ، بس في نفس الوقت لا بد ما الكبير والصغير يحتار وما يعرفش اين الصح والغط ، وسمعت احد بيطلع من الدرج ، دخلت للحمام سكته وابسرت الخدامة طلعت ومعاها صحن مدري ايش فيه ودقت الباب ودخلت ، اول ما دخلت خرجت من الحمام سريع ونزلت لدور الاول ودخلت المجلس اللي تحت بدون ما اولع الضوء وقفلت الباب وجالس بنفكر في الخبر اللي سمعته ، كنت اضن ان عمنا عبارة عن تاجر كبير ومعه مال وثروة وبثروته بيسيطر على من يشتي بس الموضوع طلع اكبر مما كنت اتخيله ، كيف الاثنين اللي بيتكلمو عنده واحد كأنه من الدولة والثاني كأنه رجل عصابه وبيتفقو عند عمنا ، من هو عمنا هذا وماهو العالم الخبيث اللي تورطت فيه ، خرجت تلفوني واتصلت لا اخي قلت له
#يمني
-البارت التاسع ...
على طول خرجت المسدس وبنضرب عليهم نار جلست ارمي وبنجري طريق السيارة وبنصيح بكل صوتي على طول لفو وهربو من الشارع اللي مقابل لنا وهم بيضربو نار اتجاهي جريت طلعت فوق السيارة واخي مطنن بقعته بيقل ما به يا يمني ، من هم هولا ؟ وليش بتضرب عليهم نار قلي ما به ، وجدتي حاضنه لبنتي وبتقل يا الله سترك يالله سترك ، وقد به طلقتين دخلت من الفريم الخلفي حق سيارتي ، انطلقت بالسيارة وعمنا كل شويه يتصلي وما رضيت اجاوب عليه ، وجالس بنفكر ذلحين مفعل ؟ هل اشل اهلي عند عمنا ، كيف اشلهم عنده وانا مشنا واثق فيه وقد ربما يفعل اي شي بهلي او يهددني بهم ، ما دريت مفعل انطلقت على طول طريق بلادنا ، واخي بيقلي من هم هولا يا يمني جابرني انا اخوك ، قلت ما بلا حصلت مشكله واتضاربنا جنب العمل وشكلهم لحقوني للبيت ، قال وكيف تضرب عليهم نار يا اخي لو يموت احد تشتي تضيع ما تبقى من عمرك ، قلت له مفعل يا اخي قدها بحق الشيطان ، قال وذلحين لمه عتشلنا البلاد جي نسير نبلغ عليهم وانتهت المشكله ، قلت في نفسي ايش نبلغ يا اخي ما دراك ما به ، قلت هاه كيف نبلغ عليهم ما اقل للقسم اتضاربنا وذلحين بيلاحقوني عيضحكو عليا يا اخي مشو سابر ، ذلحين عننزل البلاد اسبوع لما يهداء الوضع وبعدا معذر من خير ، ما درينا الا وجدتي بتأن .. اقتلبت ابسر وبنقل مالش يا جده ما بينش ما وقع بش قالت بنحس ضهري بيحرق، وقفت السياره طوالي ونزلت ابسر جدتي وفيها طلقه في خلف كتفها اليمين كنت اصيح بكل صوتي ياااجده يااااجده قوى ما عاد معي الا انتي نزل اخي بلال عندها وانا طلعت فوق السيارة وسرت اسعفها للمشفى على طول دخلت جدتي وكملو الاجراءات قلت لهم محناش داريين منينه جت الرصاصه شكلها راجع او طايشه ، وقلت لا اخي خليك عند جدتي وانتبه لبنتي شا اسير ادي زلط وارجع قال تمام يا اخي الله معك ، ورجعت لا عند عمنا كل شويه يتصل ويفعل رسايل وانا مدعمم ولا رضيت ارد عليه ، وصلت للفله ، طرقت اربع مرات وافتتح الباب ، دخلت السيارة ونزلت على طول طريق البدروم دخلت الغرفه اللي بيعالجو فيها ومابش احد فيها رجعت طلعت لدور الاول وبنصيح لعمنا ، ما دريت الا لما اتصلي جاوبته وقلي اطلع انا في الطيرمانه ، طلعت لا عنده وهو مخزن ، قلت له اين سار الرجال اللي خطفناه دمه في ذمتي وذمتك بنقلك اين سار ؟ قال اين انت طول الليل بنتصلك وما بتردش عليا يا يمني قلت كان معي عمل واول ما كملته جيت ، قال وكيف فعلت من اللي هجمو عليك ؟ قلت له ايوه صح كيف دريت يا عمنا انهم عيهجمو علينا ؟؟ قال المهم اننت هربت منهم وما حصلكش شي ، قلت الحمد لله ، ذلحين قلي اين الرجال ، قال اجلس ارتاح وخلينا وعنتجابر ، دخلت الخدامه وقالت بنتك يا مدير قالت تجاوبها ، عمنا قام على طول وقلي اجلس يا يمني راعي لما اقوم اطمن على بنتي وارجع لك ، نزلت بعد عمنا سكته وصل للغرفه اللي فيها بنته وبنسمعه من خلف الباب وهو بيقلها كيف قدنتي يا بنتي قالت الحمد لله بخير يا به ، قلي ما عاد فعلت ، قال تعرفي ابوش من ايحين بنفلت حقي ولا تقلقيش قد غريمش موجود في الغرفه اللي في البدروم جنب الغرفه حق العلاج ، اول ما سمعته نزلت جري للبدروم وعمنا سمعني ونزل بعدي وهو بيصيح يمني ..يا يمني وقف اين عتسير وقف، وصلت للغرفه حق البدروم وهي مقفله بنزبط الباب وعمنا بيمسكني بيقلي قلي مابه مالك ، قلت له افتح يا عمنا الباب ماشي انت غريمي ، قال بنقلك اهداء وقلي مابه ، من كثر الضبح مشعت المسدس لا راس عمنا قلت له افتح الغرفه قبل ما افتح راسك ، قرب راسه للمسدس حقي وقلي افتح راسي هيا اضرب يا يمني اضرب ، مسكت على راسي وجلست للارض وانا بنقل يا الله حلها ..يالله حلها ، قلي بنقلك ماوقع يا ابني جابرني ، قلت له كونو جدتي وذلحين هم في المستشفى مشنا داري كيف وضعها قلي مستشفى ايش قلت له اسم المستشفى ، قال ذلحين قوم جي معي نسير لا عند جدتك نطمن عليها وبعدا سهل ، ما عليك الا ما يطيب نفسك ،ما سمعت الا الرجال داخل الغرفه بيصيح ويقول باقي بنتك واخوك يا يمني حرام ما يفلتو .. سنبت ساع المجنون وبندلهف الباب واخبطه واصيح فوق عمي افتح الباب بنقلك افتح اشتي ادري ما عرفه باسمي وعائلتي ، قال انا شفتح لكن حاول تهداء قلت له حاضر انت بس افتح ، دخلت والرجال ممدد في الارض وفي يده مغذية ومربطين على جله بقعة الاصابه والغرفه فيها سهاري احمر ، قربت دلا دلا منه وبنقله منينه تعرفني وتعرف عائلتي يا كلب ؟؟ ضحك وقال معرفتي بسيطه امام اللي جنبك هو عمنا كلنا وهو اللي علمنا كيف ندير شغلنا ، بس بحق ما قلت لي يا كلب ما عتوفيش 24 ساعه الا وقدك بتقبر ما تبقى من عائلتك ، اول ما كمل يتكلم خرجت المسدس لا ارادي وضربت عليه رصاص اكثر من طلقه في بطنه وواحده في راسه ، وجالس ابسره وهو غارق بدمه ، وبنتنفس بغضب وعيوني حمر وملامحي كلها ملامح قاتل عيقتل اي شخص على سب اهله ، ومنتظر عمنا يصيح فوقي ويقلي ليش قتلته ، التفت لا عند عمنا وهو بيبسرني
#يمني
-البارت الثامن ....
طلعنا فوق السيارة وخطينا وبه سيارة يارس بتلاحقنا وبيضربو علينا نار ، قلت يا عمنا من هم هولا ، قال تبع النذل اللي معانا لا توقفش امشي سريع يا يمني ، مشيت بالسيارة وهم بعدنا بيضربو رصاص قد السيارة حقنا من ورى ساع المشن من كثر طلقات الرصاص عليها خففت السرعه حقي شويه قبل ما نوصل للخط الرئيسي واليارس قربت مننا اول ما قربت عارضتها بقوة هربو مننا وحنبو في حفره وقفت السياره ونزلت وبنطلق رصاص عليهم وهم فوق السياره وعمنا جنبي بيضرب عليهم رصاص ما درينا الا وبه طقم تبع الدولة جايي طريقنا ، على طول جرينا انا وعمنا فوق السيارة وانطلقنا ، والطقم حق الدوله بعدنا وصلنا للخط الرئيسي والطقم بعدنا وفوقه ما يقارب اربعه عسكر ، وصلنا لا جنب الجسر حق بيت بوس ونزلنا من تحت الجسر وبنبسر قبالنا نقطة عسكر وعمي قد خرج تلفونه وبيتصل وقد به في النقطه ثنتين اوبل وثلاثه طقوم منتظرين لنا ، وبنقول ما عنفعل يا عمنا ؟ ما عنفعل اواصل او اوقف قال وقف .. وقف انتبه تتجاوزهم ابسرت الرجال المصاب بالكرسي الخلفي وقلت طيب والرجال اللي معانا ما عنقلهم وقد عندهم خبر ان احنا متورطين بالاشتباكات اللي حصلت في دار سلم قال اوصل لا عندهم ووقف قلت طيب والسلاح اللي معانا شكلنا ودفنا يا عمنا ، قال بنقلك وقف وبس ، اول ما وصلنا للنقطة وقفت السيارة ونزلت وانا رافع يداتي لا عند راسي وبنقلهم اهدأو احنا مسلمين احنا مسلمين ، وهم معمرين البنادق لا عندنا وعمنا نزل وفي يده التلفون وبيصيح من هو الضابط المستلم حق النقطه ، من هو الضابط المستلم ، وصلو العسكر كتفوه وهم بيقلهم مكنوه التلفون ، واحد من العسكر شل التلفون ومكن القايد حق النقطه واحنا بيقيدونا ويفتشو السيارات ويبلغو وقدهم عيطلعونا فوق الطقم ما دريت الا والضابط المستلم بيصيح فلتو لهم ..فلتو لهم ، وصل لا عند عمنا ومكنه التلفون وقال لعمنا احنا اسفين واللي ما يعرفك يجهلك ، وانا مطنن ماهو الخبر هذا ؟!!!! فكو القيود حقنا ورجعو طلعو المصاب فوق سيارتنا وسلمو لنا السلاح وفتحو لنا الطريق نمشي وهم بيتممو لنا ، طلعت فوق السيارة وانا ساع البليد مشنا قادر اصدق كل اللي بيحصل قد كنت اقول هذه نهايتنا ، وعمنا قال يمني يا يمني ، شغل السيارة وامشي قلت هاه .. حاضر بس باقي تلفوني شله العسكري ذيه ، الضابط صيح فوق العسكري والعسكري خرج تلفوني ومكني ، شغلت السيارة ومشيت ، قلت من انت يا عمنا قلي من انت ؟؟ وماهي السلطه اللي معك لما بتفعل هذا كله ، فوق هذا كله عادهم طلعو الرجال المكون معانا وهم داريين ان احنا عنخطفه بالقوة ويمكن انك تقتله يا عمنا ، وسلموه لك بمجرد اتصال ، قلي من انت ؟؟ قال خلينا نوصل للبيت وعتعرف كل شي ، وقام ربط عيون الرجال وفعله ضربه بالمسدس لما افقده الوعي ،وصلنا للفله وضربت الهون اربع مرات والحارس فتح لنا البوابه ودخلنا مسكنا الرجال ونزلناه للغرفه والدكاتره موجودين قلهم خرجو منه الرصاصه وخلوه فاقد الوعي لما انزل لكم ، قلت يعني فعلنا النثره هذه كلها يا عمنا على سب تجي تعالج غريمك هنيه ، قال عادي يا يمني عادنت في بداية الطريق وعتتعلم كل شي ، انت اطلع لطيرمانه وانا شا اسير اطمن على بنتي ، قلت له ماشي انا شا اروح بيتي وبعدا عنكمل كلامنا ، قال ما ينفعش تخرج الان خطر على حياتك ، قلت لا خطر ولا شي انا شخرج وخلاص معي اهل اشتي اطمن عليهم مثل ما انت بتخاف وتطمن على عائلتك ، وقدنا ماشي طريق البوابه عمنا قال للحارس ادي ليمني مفتاح السيارة اللي خلف البيت وخليه يرحله ، طلعت فوق السيارة وانطلقت لا بيتنا ، اول ما وصلت قد كانت بنتي راقده عند جدتي واخي مخزن في الديوان اول ما ابسرني قام لا عندي وقلي اين كاننت يا يمني وماهو الخبر اللي جابرتني بالتلفون ، قلت له مش وقت يا اخي شدخل الحمام ، واتعشي وبعدا عنتجابر ، دخلت الحمام فعلت دش بارد ، وانا بنفكر من هم هولا وماهي سلطتهم وليش متنكرين بأعمال غير اعمالهم عمنا متخبي خلف ورشة تشليح والغريم متخبي خلف معرض بيع سيارات ، وطيب ليش الدولة بتمشي بعدهم وليش ما يتم القبض عليهم ، وكل مشهد في الاشتباكات والصياح حق الجرحى كانت تضهر امامي وتختلط مع حادثة القصف اللي حصلت في بيتنا ، كانت تتصارع الاحداث داخل راسي ما بين مظلوم وظالم ، طيب يا يمني من انت ؟؟ قلي من انت ؟؟ وما تشتي مني ، ليش كل هذا بيحصل معي ؟ خرجت من الحمام تعشيت وخطيت اتمدد في الديوان واخي بيقلي هيا خير.. جابرني ما وقع؟!! قلت له اسمعني يا اخي ، اشتي منك حاجه بس محد يعرفها ولا تسالني ليش ، قال اامر ، قلت له من غدوة اشتيك تخرج تدور لنا بيت للايجار بعيد من تيه المنطقه وما تكلم احد لا من الحاره ولا من اهلنا ، قال ليش ياخي خير مابه ؟ قلت افعل على ما قلت لك ، واول ما تلقي اشتيك تنقل اخر الليل ، قال وانت اين عتسير قلت له في حال اننا مش موجود او مشغول تفعل اللي بنقلك ، قال لمه يا اخي قلي انت متورط بشي ولا شي ؟؟ قلت له مشنا داري انا متورط
#يمني
-البارت السابع ....
اول ما دخل عمنا ابسرني وقلي كمل المكالمه حقك ، واخي في التلفون بيقل الو ..الو يا يمني ما بتقل اين فله واينه في الأصبحي ؟ قلت هاااه .. خلاص لا تتصلش ولا شي انا شا اروح من نفسي ولا تقلقش انسي كل الكلام اللي قلت لك ، قال ما بتقل يا يمني لا تقلقنيش عليك يا اخي انا فدالك ، قلت له لا تقلق كان في راسي موضوع وذلحين خلاص ، قال المهم انا شتصلك بعد 15 دقيقه يا اخي واذا ما جاوبتنيش شفعل اللي قلت لي ، قلت له طيب طيب يا اخي ذلحين قفل خاطرك ، قفلت التلفون وعمنا جالس قبالي بيبسرني وهو مبتسم ، قلي يا يمني بنتي عادهي فاقده الوعي واعذرني انا كنت خايف وقلق على بنتي ، قلت له عذرك معك يا عمنا ، ما حصل شي ، قلي ذلحين جابرني بالقصة بالتفصيل ، كلمته قلي تقدر توصف لي اشكالهم قلت لا بسين اثواب وملثمين بشيلان واحد منهم طويل وعريض عملاق وهذا اللي كونته في يده على ما اعتقد قال طيب حفظت ارقام السيارات ، قلت له ما بش فيهن ارقام يا عمنا ، قال انا داري ان مابش فيهن مش معقول يغلطو مثل تيه الغلطه ، المهم اسمعني شل المسدس ذيه ، وجي بعدي ، مشينا في البدروم ذيك وصلنا لا غرفه وجنب الباب لوحة الكترونيه ساع حق التلفون ضرب كلمة السر وافتتح الباب ، دخلنا ولقيت اسلحة ما ابسرتهنش حتى في المخازن حق المعسكرات ومرتبات وتنظيم فيهن خيالي قلي ادخل يا يمني وسلح نفسك ، قلت له ليش اسلح نفسي او ابسرتني قاتل ، قال انا شا اجابرك في الطريق ، قلت له اين عنسير ؟!!، قال انا شا اوصلك لا مكان وتقلي اذا اللي با ارويلك هن نفس السيارات او ماشي واذا ما تشتيش تنزل معي براحتك لكن ما شا افلتش اللي تهجمو على بنتي ، قلت له طيب ،شليت لي بندق جنب المسدس ولاحظت ان به خزنه قفى بعض الصناديق اللي فيهن ذخيرة والخزنه كبيرة ساع حق البنوك ، وانطلقت انا وهو ، وبنقله في الطريق وانا بنسوق السيارة لينه عنسير يا عمنا ؟ وكيف بتقلي مشنت مافيا..!!! انت قد عديت مرحلة المافيا على السلاح اللي معك في البيت حقك وشغل العصابات هذا واللي هجمو عليك وهجمو على بنتك ودكاتره تجي لا بيتك بشكل سري وكل هذه الامور ؟ قال هيا مالك يا يمني رجعت كثير اسأله قلت له مش قصة كثير اسأله ، انا ذلحين شا اسير معك ومشنا داري احنا عنرجع او ماشي فمن حقي اعرف على ايش بنقاتل ، قال ايوه من حقك بس ذلحين خليني اوصل مشتيش تشتت تركيزي ، ما دريت الا واخي بيتصل ، جاوبت عليه قال الو يا يمني اين انت انا في الأصبحي ، قلت له انا قدنا جنب البيت قوم روح وعنلتقي في البت واجابرك بكل شي ، قال يلا تمام ، قفلت الخط وماشي في الطريق اللي بيرويلي عمنا وصلنا لا دار سلم ووقفنا قبال معرض وفي المعرض سيارات فورتشنال خيرات وقلي هن نفس هولا قلت له ايوه وتيك اللي بنص هي نفس السيارة اللي هجمو علينا واطلقو نار من الخط الثاني ، قال خلاص انت اجلس هنيه وانا شنزل ، قلت له يا عمنا كيف عتنزل وحدك وما عتفعل اتصل وبلغ عليهم وعتجي الدولة تتصرف معاهم ، قال انا الدولة وبيجهز نفسه فوق السيارة ، قلت له طيب يا عمنا لا تحنبنيش معك كيف افلتك تنزل وحدك وفي نفس الوقت مشنا راضي انزل اقاتل ناس مشنا داري ماهي المشاكل بينكم ، ابسرني وقال تعرف ليش الذئب رقبته كبيرة !! قلت له ليش؟؟ قال لانه بينجز عمله بنفسه فلذالك لا يمكن ينحني لحد، وفتح الباب ونزل ابسر الباب مقفل رجع لا عندي قال دور بالسياره واصدم الباب لما تنكعه ، قلت له مشو سابر يا عم نتهجم على خلق الله طلع فوق السيارة وقلي مش وقت تبرير الان يا اما ننجز عملنا ولا عيقرح راسنا هنيه، قلت سابر.. سابر ، دورت بالسياره وصدمت الباب لما نكع للارض ورجعت ريوس وعمنا دخل وعلى طول بيرمي طريق المكتب حق المعرض وهم بيرمو عليه من عند باب المكتب ومن الطيقان وعمنا متمترس قفى السيارات وبيرمي عليهم ، ابسرتهم حاصروه نزلت على طول وعمرت البندق وبدأت اطلق عليهم اول ما ابسروني اللي عند الباب دخلو مدخل ما دريت الا وبه اثنين جو من خارج المعرض وبيرمو عليا نبعت سريع تخبيت قفى سياره جنب عمنا ، وبنبسر عمنا وقلت له حاصرونا ما عنفعل وهو ابتسم وقال عنفعل كل ما يلزم ، وكان مطمن ولا كأن احنا في اشتباك وكأن الموضوع عنده طبيعي فما عاد افتهمليش هي قوة قلب منه او عدامه ، ومشع قنبله من خصره ورجمها لا عرض المكتب ، انفجرت لما حسيت اذاني بيطنيين قوي رجعت لي الذاكره ايام ما قصفو بيتي وتذكرت كل مشهد وانا تحت الانقاض ما دريت الا وعمنا مسكني من كتفي وبيهزني ويقل يمني هربو فوق السياره هربو يا يمني هيا نلحقهم وانا بنبسره وساع الشارد ، قلت له هاه هيا ..هيا حرام ما يفلتو ، رجعت لي نفسية الانتقام واشتي اقتل اي شخص قبالي ، قمنا جرينا سريع لا فوق سيارتنا طلعنا انا وعمنا وبنلاحقهم ملان دار سلم وبنرتمي ملان الشوارع كنت اسوق بيد وارمي عليهم بالمسدس باليد الثانيه وعمنا بالبندق بيرمي عليهم من الفريم ، اطرحت طلقه في التاير حقهم لما تقلبت السياره وسط الخط ، وانا وقفت السياره
#يمني
-البارت السادس ...
قلت له لحظه جاوبت التلفون ...
-الو بلال اين اينت يا أخي ؟؟؟
- قال هاه يا يمني انا في البيت خير مالك واين سرت...!!
-قلت له كيف في البيت قد دورتك ملان الحاره وبنتصلك وتلفونك مغلق اقلقتني عليك يا اخي الله يسامحك ..
-قال انا سرت سوق القات اشتريت قات وتلفوني كان طافي وطرحته في غرفتي يشتحن .. ذلحين قلي اين سرت
- قلت له سابر يا اخي خلاص انا نص ساعة واروح
رجعت قلت لبنت عمنا انا اسف حصل سوء فهم وفتحت الباب وقدنا شنزل وقلت اعذروني ، قالت اصبر انا اتصلت لا ابي وجابرته وقلي اوصلك لاعنده ، قلت لها طيب ووصلتني لا عنده وصلنا للبوابه وطرقت اربع مرات ودخلنا قالت اطلع جاوب ابي في الطيرمانه ، نزلت وهي جالسه فوق سيارتها وسلاحها جنبها ، طلعت لا عند عمنا وهو مخزن سلمت عليه وقلت له المعذرة منك حصل سوء فهم ، قلي ليش خرجت وقد كان بيننا اتفاق ، قلت له بنتي كانت مري.... قاطعني وقال هذه مش مشكلتي ، ومش مبرر انك تجي لا باب بيتي اخر الليل تصيح ودقدق وتقلق عائلتي ، قلت له قصدي انك شليت اخي لاننا رحت لي بدون ما اكلمك ، قال انت قصدك اننا في المافيا اخطف ناس ومدري ايش ، يا ابني اللي تمشكلت معاهم في الحوش من اقاربي كان به شوية مشاكل على اراضي ، بس شكل خيالك واسع وبيتهيئ لك حاجات فوق الخيال ،على العموم شل الزلط تيه ورحلك انت ما تلزمنيش ، قلت له خير انا شا ارحلي وما كنبش داعي انك تخليهم يوصلوني لا عندك كنت عتفعلي رساله والزلط تيه مفعل بها وحق ايش؟! ، قال حق تعبك معي وباقي معاشك ، شليت الزلط وخرجت منها باقي معاشي وطرحت الزلط الباقيه وقلت له الباقيه ما تلزمنيش على العموم اعتذر على اي غلط حصل مني ، خاطرك ، وقمت رجعت وبنته جالسه فوق السيارة وصلت لاعند الحارس وقلت له افتح الباب ، وعمنا اتصل للحارس قال افتح له الباب ، وخرجت من عند
هم وخاطي في ذيك الشارع والدنيا ظلام اشتي اوصل للخط اطلع متر وارحلي لقيت متر قبل ما اوصل لشارع طلعت معه وما دريت الا وبه ثنتين سيارات فورتشنال سود معكسات ماشيات سريع من جنبنا شكيت ان به شي وعيسيرو طريق الفله حق عمنا ، رجعت قلت ما دخلي وبعدين ذكرت ان المسدس حق عمنا معي فقلت للمتر ارجع يا اخي ورجعت لا جنب الفله حق عمنا ولقيت السيارتين واقفات بعيد من الفله وبيراقبو ، وانا مخبى في نهاية الشارع فوق المتر وصاحب المتر بيقلي مالك يا اخي ما بتراقب؟! قلت له اهدأ واصبر قال يا اخي اشتي اطلب الله لا تأخرنيش خرجت من جيبي خمسه الف وقلت له هاه امسك هذا حق ما عتجلس تراعي معي، دخلها جيبه وقال ما ذلحين نجلس لصبح يا سيد الناس رجعت اراقب ما دريت الا لما بنت عمنا خرجت من الفله والسيارتين تحركين بعدها وبيراقبوها قلت لصاحب المتر تحرك بعد السيارات واحده من السيارت اللي بيلاحقو بنت عمنا تقدمت ومشيت والثانيه جالسه خلف سيارت البنت ، نزلنا من النفق حق جسر الرئاسه وما دريت الا وقد السيارة اللي بالخف تقدمت من سيارت البنت وبيعارضوها وواحد خرج يده وبيأشر لها تجنب ، وقفت في نص النفق ، وصاحب المتر وقف بعيد منهم قال منهم هولا وما به؟! ، نزلت من فوق المتر سريع وبنجري وصاحب المتر عكس خط وهرب رجعت اجري طريقهم نزلو اثنين من فوق السياره بالبنادق ويشتو يفتحو الباب بس البنت امنت الباب وكان يصيحو افتحي افتحي واحد منهم خفع الفريم بقفى الألي لما كسره ، والبنت خرجت البندق وبدأت تضرب عليهم نار هربو لا قفى سيارتهم وبيرمو على البنت انا وصلت وبنرمي عليهم كونت واحد في يده ما دريت الا لما طلعو فوق سيارتهم وهربو ، وصلت للباب حق سيارت البنت وبنقلها ما وقع بش انتي بخير؟ ، وهي كانت متوتره وجهت البندق لا عندي وضربت نار انا وطيت على طول وبنصيح انا يمني سعليش انا يمني ، وقفت وقالت يمني..!!! منين جيت قلت رجعت ادي المسدس وابسرت هولا بيراقبوش ، منهم هولا وليش يشتو يشلوش ؟ ما دريت الا والسياره الثانيه جت من الخط الثاني وبيضربو علينا نار وهم فوق السياره على طول تمددت وتقلبت لا تحت السياره حق البنت كملو ضربو نار وهربو حتى بدون ما يوقفو السياره ، خرجت من تحت السياره وقلت للبنت افتحي لي الباب وافسحي للكرسي الثاني انا شا اسوق ، قالت تمام ، نبعت للكرسي الثاني وانا طلعت وانطلقت قد كان الباب حق السيارة منخول بنقلها وقع فيش شي ولا شي ، قالت ماشي بس بنحس بحاجه حامية قلت لها اينه ، وجيت ابسر وبه دم فوق السياره جيت ابسر البنت اين كونوها ، وكان به دم في البالطو حقها من عند نهاية الفخذ تحت الخصر ، قلت لها سعليش ، اضغطي بيدش هنيه وشسعفش ، اول ما ابسرت الدم افتجعت قوي وكانت ترتجف وتبكي ، قلت لها اتصلي لا ابوش وجابريه وانا شسعفش للمستشفى لا تفتجعيش سعليش ، خرجت التلفون وهي بتبكي وبتقل يا يمني شا اموت ..
#يمني
- البارت الخامس ...
طلعت بنت عمنا لاعندي لطيرمانه ، وقفت باب الطيرمانه وابسرتني وقالت انا اسفه والف شكر لك على كل اللي فعلته مع ابي وراحت لها حتى قبل ما ارد عليها ، رجعت اخزن وبعد ساعة ونص ما دريت الا لما دخل عمنا وفي يده عكاز قمت على طول مسكته وساعدته لما جلس ابسرته بيفتح المشمع الدعاية وبيخرج القات ، قلت ما عتفعل يا عمنا انت مريض انزل عند الحجه ارقد وارتاح وطمن جهالك مش وقت القات ، قلي خزن وافتهن يا ابني واسمعني ، ماهي حكايتك انت لفت انتباهي بقوة قلبك وذكائك وحنكتك وفاجأتني قوي ما توقعتش هذا كله يطلع من مجرد عامل عندي في الورشة ، وحتى أمانتك ما قربتش للمشمع الدعاية حقي ولا جالك الفضول انك تبسر ما بينه جابرني من انت وماهي قصتك ، جابرته بقصتي كلها واحنا مخزنين فكنت ابسره يتأثر مع احداث قصتي وما قد حصل معي ويضحك من بعض المواقف ويتفاجأ من بعض قرارتي ، قلي طيب من اين اديت المهاره هذه كلها معقوله كل هذه الخبره من مجرد بعض اشهر تدريب في دورات ومدري ايش ، قلت له ماشي تقدر تقول هي فطرة فيني وبيني وبينك الواحد لما يفكر يعيش على شان ينتقم فيكون كل شي بيتعلمه يتقنه في اسرع وقت وتكون خبرته فوق ما يتصورها العقل ، ورجعنا نكمل التخزينه وبنتجابر من موضوع لا موضوع ، كنت ابسر عمنا وهو بيبسرني بنظره غريبه ، قلت له خير يا عمنا او قدنت تاعب او شي ، قلي امرك عجيب يا يمني قلت له ليش؟؟ قال منتظر من اول تسألني في اي شي حصل تيه الليله لكن انت ساكت ولا سألتني سؤال ، قلت له ليش اسألك ايش دخلي انا قمت بواجبي وخلاص اما الباقي هو يخص حياتك انت وخصوصياتك ما يحق ليش اسالك شي فيها ، الرجال ابتسم واعجب في شخصيتي قوي وقلي انت اذكى بكثير مما توقعت خلاص اسمعني اللي حصل الليله ما عتقولش لحد من اهلك او حتى اصحابك وزملائك في العمل ولا كأنه حصل شي حتى صاحبك معتز ، قلت له اذا ما تشتيش احد يعرف فهذا من حقك ، ومش من حقي اننا اقول لحد اطمن يا عمنا ولا كأننا موجود اصلا انا راقد اليوم في بيتنا ، قال ايوه تعجبني انت عتجلس في الفله هذه لمدة اسبوع ما عتتصلش لحد ولا عتخرج منها وقاتك واكلك وشربك وكل ما تحتاجه عليا انا ، قلت له اللي فهمته اننا محبوس عندك هنيه لما تطمن ان محد يعرف باللي حصل ومشنت واثق فيني ، قال بصراحة ايوة قلت له الان انت دخلت في حدود خصوصياتي وهذا اللي ما شسمحش به ، المفروض اننت تحترم خصوصيات حياتي مثل ما انا احترمت خصوصياتك يا عمنا فالكلام اللي بتقوله ما ينفعش ولا عيحصل ، قلب وجهه وقال الا عيحصل ابسر انا قد بنبسرك ساع ابني واعجبت في شخصيتك ورجالتك وعقليتك ، فخليك ذكي ولا تهدمش الصورة اللي رسمتها في عقلي ، استغربت من كلامه قلت كيف الرجال هذا بيتكلم بتيه الطريقه ومش مبين عليه انه ذكي وقوي نهائياً مبين عليه انسان بسيط شاقي على اسرته وخلاص ، قلت له كمل كلامك ، قال مش الغرض الوحيد اننا اخليك هنيه انك تكون محبوس وخلاص ماشي عاد معانا عمل واشتيك تكون جنبي وتنجز لي بعض الاعمال ، قلت له في تيه الحاله ممكن اجلس ، بس تلفوني عيجلس معي وشتصل لهلي واستقبل اي مكلامه توصلني براحتي ، قال ولا يهمك المهم اذا احد سألك اين انت ، تقل انك سافرت معي للحديده معانا عمل قلت له حاضر ، قلت له طيب من به في الفله تيه ، قال مابش فيها احد الا انت والحارس والشغاله معاها غرفه في الدور الاول ، قلت يعني اقدر اتحرك براحتي مابش عائلة ، قال ايوه قلت اذا متفقين يا عمنا بما اننا شجلس لأجل عمل ما يمنعش ، خرج مسدس وقلي خلي هذا معك في حال حصلت مشكله ولا شي يعني كغرض انك تنتبه للبيت حقي ، قلت له سابر يا عم ، جلس خزن شويه وقلي خاطرك انا شا ارحلي وبيننا اتصال قلت سابر ، مسكته ونزلت معه للحوش طلع فوق السيارة ورحله ، الحارس كمل قفل البوابه ورجع دخل غرفته في المحراس بدون ما يكلمني او حتى يبسرني ، دعممت ورجعت اطلع اكمل التخزينه وانا مطنن من كل اللي بيحصل كملت ورجعت ارقد وانا بنفكر ايش افعل ، وبنفكر في بنتي وباقي اهلي ، قمت الساعة 9:00 الصباح على اتصال اخي
-الوه هاه يابلال خير مالك ؟
-قال يا يمني بنتك سلى تاعبه فيها حمى وجالسه بتبكي بتدورك
-قلت له قوم اسعفها وانا نص ساعه واكون عندك
قمت على طول لبست الملابس حق العمل الوسخه اللي كانت فوقي وطرحت المسدس في خصري وخرجت وصلت للباب الصغير اللي جنب البوابه وهو مقفل بالمغلقه رجعت ادقدق باب المحراس واصيح بس محد جاوبني رجعت لا داخل بنصيح للشغاله بس محد بيرد عليا ، قلت ايوه والحنبه ذلحين كيف اخرج من هنينه ومابش احد في الفله لويت على الحديقة حق الفله ولقيت سلام كبير شليته وطرحته لا عرض الزنج اللي فوق السور وطلعت حاولت انزل بس ما قدرتش المكان مرتفع ، ضبحت قوي وبنهم بنتي رجعت على طول للبوابه الكبيرة خرجت المسدس ورميت على القفل بعدت السلسله وفتحت البوابه وخرجت اول ما خرجت وبنجري ابسرت الحارس خرج بعدي وقفل البوابه ، قلت شتصرف معه لما ارجع بحق ما دعممني ، اتصلت
#يمني
-البارت الرابع ...
جيت اقتلب ابسر من هذا اللي موجه السلاح لا ضهري ، اول ما اقتلبت ابسرت بنت لابسة بالطو ومغطية وجهها بالمقرمة ساع الشال تبلدت مشاعري وجالس مطنن لا فوقها وهي ماسكه البندق ، كانت الفكره في راسي اننا اقتلب واسحب السلاح بس اول ما ابسرتها بنت قعيت فمي ورجعت ساع البليد مشنا مصدق اللي بنبسرة .. ما دريت الا وهي بتقل يايه بتسمعني بنقلك من انت قبل اطعفر دمك لشارع ... قلت لها هاااه .. انا "يمني" قالت امااااانه كان قصدي اننت تركي ، عنتخيبل او مه وعمرت البندق وطرحته في صدري وقالت بنقلك من انت وما معك هنيه ؟؟ ابتسمت وقلت لها انا اسمي "يمني" وبنشتغل مع صاحب البيت ذية .. من انتي ؟ قالت مكانك لا تتحرك ، وانا واقف مكاني بنبسرها سكته وبنتحيلى لها من وسط روحي وابسرتها لما رجعت ورى وهي موجهه السلاح لاعندي وصلت لاعند السيارة اللي كنت بنسوقها وفتحت الباب وطرقت اربع مرات والباب افتتح على طول رجعت لا عندي وبتقل للحارس دخله للحوش نبسر ما قصته ، والحارس كتفني من ورايا وانا جالس اتبسرها ، وبنقل للحارس مالك مسوم عادنا دخلت انا وعمنا وخرجت من عندك مسرع نسيتني ذلحين معي العلاج فك لي انزله يعالجو الرجال ، قال انا داري اننت خرجت من عندي بس هذه اوامر مقدرش اخالفها ،رجعت ابسر للبنت طلعت فوق السيارة ودخلتها للحوش ونزلت وطلعت فوق سيارتها الحبه ودخلتها للحوش ، ونزلت وفوقها هيبه مشي في كمن شنب ، وماسكه البندق بيد وصلت لا عندي وقالت اجلس على رُكبك ، على طول مسكت البندق وسحبته من يدها وقلبت الحارس للارض ، وهي تفاجأت وجالسه بتبسرني سكته مستغربه كيف قدرت اقلب الحارس وهو بكل تيه الجثه ، وجهت سلاحي للحارس وقلت له لو تتحرك شكسر رجلك ، وخطيت لا فوق السيارة تبعي وشليت المشمع الدعاية وهي قربت مني دلا بتبسرني قفلت باب السيارة ومكنتها سلاحها ونزلت سريع للبدروم وصلت للغرفه فتحت الباب ودخلت مكنت الدكتور المشمع وخرجت الحاجه المربعة اللي مغلفة وعليها لصقة ومكنت عمنا وهو مرقد فوق السرير وعمنا بيبسرني وهو ممطنن وقلي ليش ماكنتني انا ليش ما طرحته عند الدكتور مع باقي الحاجات قلت له العفو يا عمنا بس حاسس ان هذا حاجه مهمه فقلت ضروري امكنك ، وما درينا الا لما دخلت البنت وهي بتقل من هو هذا قليل الذوق وابسرت ابوها وقالت يووووه يالله اباه وجريت لا عنده بتحضنه وتقله ما وقع فيك من هو الكلب اللي تجراء وكونك ، وعمنا مخزن ولا كأن فيه رصاصه قلها سعليش يا بنتي ما فيني شي لا تقلقيش ، وهي بتحضن ابوها وتطمن عليه وبتصيح فوق الدكاتره يعالجو ابوها اللثمه حقها ابتعدت ، اول ما ابسرتها ما صدقتش الحلى اللي فيها كنت اتوقع مع الشحطه اللي فيها ان معاها شنب وشكلها شوعه بس طلعت قمر ومن كثر حلاها نسيت ان ابوها اللي هو عمنا جنبي وبيبسرني وانا جالس مطنن فوق حلاها التفت لا عندي وابسرتني وانا مطنن فوقها في تيك اللحظه رجعت احس قلبي بيدق من جديد وكان قدله فتره متحجر ولا عاد بيحس بشي او يخاف من شي ، رجعت تبسر لا عند ابوها وقالت من هو هذا المحترم يا باه وبيبسر نفسه طرزان تهجم عليا وسحب السلاح عليا وضرب الحارس للارض قلي من هو قبل ما اقتله هنيه ابوها قال وهو مبتسم هذا يمني واحد من العمال حقي في حوش التشليح ، وابسر لاعندي وانا مطنن فوق حلا البنت وبيقلي يمني ..يا يمني، ركز عليا وانا مطنن فوق بنته وقال تحااااحو يا ولد من بنحاكي ، ابسرته وقلت هاه .. ماهو ..اامر يا عمنا ما في نفسك قلي شكرا لكل اللي فعلته معي اليوم ، ذلحين سير لاعند الحارس وقلة يطلعك لطيرمانه وانتظرني لما اجي لا عندك لا تروحش ، قلت له حاضر من عيني اذا احتجت شي يا عمنا اتصلي وخرجت وهو بيقل لبنته اديتي اللي قلت لش ؟ قالت ايوه فوق سيارتي ،انا سرت لاعند الحارس تأسفت له وقلت له قلك عمنا تطلعني للطيرمانه ، طلعني دخلت الطيرمانه تيك ومسنب عند الباب مشنا مصدق ان به طيرمانه بكل الحلى ذيه من فراش واثاث وستائر وديكور وبناء وتحف حاجات حتى ما ابسرتهاش لا في مسلسلات ولا افلام حاجة فوق الخيال دخلت اول ما دسعت على الموكيت ذيك غرست رجلي من كثر الفخامه حقه وجلست في راس الطيرمانه في النص، احلى بقعة والشاشه تيك قبالي من طرف الجدر لا طرفة وجالس بنتبسر الحلى حق الطيرمانه ما دريت الا لما دخلت مرة حبشية وفي يدها صحن فيه صحات ماء وببس وطرحتهن قبالي وخرجت ورجعت وفي يدها مشمعات دعاية طرحت واحد قبالي والثاني طرحته في الزوة وبه تحت الشاشة ماسة سوداء فتحتها وخرجت منها عصاير ومشروبات طاقة ومشروبات اول مره ابسرها، قلت لها يا اخت هذه ماسه او ثلاجه؟!! ، قالت ثلاجه ، قلت لها وماهو المشمع الدعاية اللي طرحتيه قبالي ، قالت هذا القات حقك بس قال المدير ما تخزن اصبر لما يجي العشاء وخرجت ، قلت ايوه تيه ليلة ترد الروح ، خرجت تلفوني واتصلت لا اخي اطمنت عليه وعلى بنتي "سلى" وقلت له اننا ما شا اروحش شرقد في مكان عملي ، رجعت اطنن وبنجابر نفسي معقوله هذا كله حق عمنا ، وكل هذه
#يمني
البارت الثالث ...
فتحت عيوني وانا في المستشفى وعمتي وزوجها عندي وعيالهم وناس من اقاربنا اول ما ابسرت عمتي قلت يا عمه بنتي ..بنتي اين هي؟؟ طمنيني عليها ،قالت بنتك بخيره اطمن ،كان فيني كسر في رجلي اليمين وكسر في احد ضلوع صدري وبعض الكدمات ونزيف داخلي ، وبنتكلم انا واقاربي قالو ان اهلي كلهم انتقلو لرحمة الله حتى عائلة اخي بلال واخي بلال في العناية دخلت فيه شضية لما قرح الصاروخ وهو جنب البيت وحالته غير مستقرة ، وبنتي في العناية بسبب الغبار اللي في رئتها والكدمات وتضررت لانها شربت من حليب امها وبسبب اللي حصلنا ، طيب يا عمه كم قدلي في المستشفى قالت تيه الليله الثانيه يا ابني ، وبعد شهر وقد خرجنا انا واخي وبنتي من المشفى وجالسين في البلاد ، اخي عاده تاعب شوية ويشتي له رعايه ، وبنتي الحمد لله بس فيها ربو وتخاف من الاماكن الضيقه والظلام واصوات الطائرات وحتى القريح حق الاعراس اذا سمعتهن تدخل في حاله وتتشنج ، وطول الفتره تيه تجمدت مشاعري ما عدبش فيني بكاء القهر والظلم جالس افكر في الانتقام اشتي انتقم من الكل من عند اللي صنع الصاروخ لا عند سواق الشيول اللي كان يحفر في الانقاض بكل عشوائية ، من عند الكبير لصغير في تيه الدوله وخارجها على كل مهمش وعلى كل شي وصلنا للحاله تيه اشتي بس انتقم ، الكل اصبح عدو بالنسبه لي ، لان بعد اللي حصلي يا اما اكون مستضعف وفي حالة يرثى لها او اكون وحش ولحمي مر ، رجعت ابسر الناس ثلاثه انواع ، خراف ، واسود ، وثعالب .. الاسود تاكل الخراف واقوى من الثعالب بس الثعلب رغم ضعفه ذكي يقدر ياكل من بقايا الخراف ، وما يسمحش للاسد انه ياكله ، فقلت يا يمني اول شي ضروري تكون قوي كنت اتواصل انا وصاحبي معتز اللي قصفو بيته وقررنا نسير عدة دورات وندرب نلتمس مع القوة المصيدره على الدولة ونكسب القوة وبعد اربعه اشهر وقدنا اسد ، ما عجبنيش الوضع قلت ايش الفايدة ارجع اظلم من اضعف مني ايش الفرق بيني وبين صاحب الطائرة وهو بيقصف بيتي ، فقررنا انا ومعتز نرجع ونطلب الله بالحلال وناكل من تعبنا كان صاحبي معتز بيشتغل في حوش تشليح سيارات ودخلني معه ، عمنا صاحب العمل انسان غريب معه اكثر من اربعه احواش تشليح وكل حوش اكبر من الثاني والانسان هذا جلده وفيه حاجات وتصرفات غريبة وغامضه قوي بس للامانة كل ما احتاج منه فلوس ولاشي ما كانش يردني وهذا اللي خلاني استغرب اكثر من شخصية عمنا ، اشتغلت وقدرت استاجر بيت في صنعاء وطرحت اخي وبنتي وجدتي فيه ، وجالس اشقى عليهم ، المهم عمنا صاحب العمل برغم من ملابسه البسيطه وبيشتغل معانا الا انه كان فيه جانب غامض من حياته ، كان يجو لاعندة ناس بافخم اللبس والسيارات ومرافقين ، ويدخلو لامكتبه اللي في حوش التشليح ويهتابو منه ويخافو ويحترموه قوي ، وكل ما يجو عندة ناس يخلي الحارس يجلس واقف امام المكتب ينتبه اذا احد من العمال عيجي او شي ، وفي يوم تاخرت في عملي وجالس بنشتغل قد الساعه 11:40 دقيقه منتصف الليل وما عدبش احد في الحوش الا انا والحارس وعمنا مخزن في مكتبه ، ما سمعت الامصايحه عند الباب قربت شوية ابسر ما دريت الا وبه ثلاثه لابسين اثواب ملثمين وبسلاحهم ضربو الحارس في راسة لما طرحوه للارض ودخلو للمكتب حق عمنا ، قمت قربت ودخلت من الباب وبنتشاقرهم وهم بيصيحو فوق عمنا وموجهين البنادق لا فوقه ، وبيقولو حرام لا نقتلك ..حرام لانقتلك ،وهو جالس بقعته مخزن ولا في حسه ولا ضارب لهم كرت وكان يتكلم بكل برود وثقه ، اشتد الصياح بينهم ما دريت الا لما عمنا قام وبيداهفهم ومشع الجنبيه يشتي يطعن واحد منهم ، وهم على طول كونوه في رجله اول ما ضربو عليه نار دخلت على طول ومسكت واحد من خلفة وضربته للارض وشليت سلاحه وكونت واحد منهم في رجله وشلو انفسهم وهربو لحقتهم لا باب الحوش وهم طلعو فوق سيارتهم وهربو ، رجعت سريع لاعند عمنا وبنقله ما فيك يا عم .. وجلست بنحاول ارفعه اسير اسعفه وهو كان ماسك رجله وبيبسرني وهو مستغرب كيف قدرت اطاير ثلاثه رجال وهم مسلحين ، ومستغرب من قوة قلبي ، خرج لي سويس سيارته من جيبه طلعته فوق السيارة وفتحت باب الحوش وخرجت السيارة قلي انزل قفل الباب واسحب الحارس لا غرفته وارجع بدون ما تفوق الحارس خلي ابوه مدوخ لما نرجع ، نزلت فعلت اللي قلي ورجعت طلعت ، وماشي طريق المستشفى ، قلي لا تشلنيش المستشفى شلني بيتي قلت كيف اشلك بيتك يا عم وانت مكون قال بنقلك شلني بيتي ، قلت حاضر وبنسوق طريق بيته ، قال مش بيتي ذيه شلني في بيتي اللي في منطقة الاصبحي استغربت وقلت له هااه مشنا داري اين بيتك يا عم معرف الا بيتك ذيه اللي بتعزمنا فيه نتغداء او ننفعك ، قال اخطي وانا شا اوريك ، خاطي وهو بيرويلي الطريق وخرج تلفونه وبيتصل قال جو لي للاصبحي سريع ، وصلنا ودخلنا منطقة لأول مره ادخلها عادهي خبت ومابش فيها بيوت خيرات ، فيها عدة فلل وبس ، وصلنا امام حوش كبير وقلي اضرب الهون اربع مرات وبس ، قلت له حاضر ما دريت الا لما فتحو لنا البوابه
#يمني
-البارت الثاني...
اول ما حسيت شي بيلامس بطني رجع الاحساس كله لا جسمي وكنت احس جسمي كله بيوجعي اشتي أتحرك بس ما قدرتش احرك ارجلي ولا جسمي يدي اليسار تحت الحجار والتراب مسحت التراب اللي بوجهي وعيوني ،فتحت عيوني بس كانت الدنيا ظلام حاولت ارفع راسي بس كان به صبة السقف محوزه لي يعني بالكاد اقدر ارفع راسي وانا ممدد وابسر لا عند بطني ولقيت ضوء الكشاف والع جنب خصري والتراب مغطي لضوء حق الكشاف ما باين من الضوء الا شوية والانقاض مغطيه جسمي كله لا عند خصري شليت الكشاف وحاولت ارفع راسي ولقيت راس بنتي "سلى" فوق بطني وباقي جسمها ممدد فوقي وتحت الانقاض طرحت يدي على شعرها اللي ملان تراب وبقايا حجار الصبة وبنمسح راسها وبالكاد بنقدر اتكلم وبنقول بنتي .. يا سلى قوى يا بابه جاوبيني ، بس كانت تحرك يدها فوق بطني وما بتتكلمش حاولت اسحبها لا عندي وما قدرتش طرحت الكشاف في فمي وبنحفر وابعد التراب من فوق يدي اليمين على شان اقدر اسحب بنتي وانا بنبكي اول ما قدرت اخرج يدي اليمين حسيت التراب بينزل والصبة اللي فوقي هبطت شوية خرجت يدي وكلها دم وبنمد يتداتي بالقوه بنحفر التراب من فوق بنتي وسحبتها شوية شويه لما وصل راسها لا عند رقبتي اول ما سحبتها حسيت ثقل الانقاض زاد على نص جسمي المدفون بس كان كل همي ابسر وجهه بنتي ولو حتى للمره الاخيره ، مسكت راسها وبنرفعه لاعندي وابسرت وجهه بنتي مورم وملان تراب وشوية دم نزل من راسها لما حسيت روحي خرجت من جسمي بعدت الكشاف من فمي وكنت انفخ لا وجه بنتي واقلها سلى يابابه بتسمعيني وهي كانت تون وهي مكتومه وعيونها مغمضات ، كانت الأنه حقها تذبح صدري كنت ابكي واحضنها طرحت يداتي على ضهرها وبنتحسس جسمها اذا هي معوره حاولت امد يداتي لا نهاية ارجلها بس ما قدرتش اوصل طرحت راسها على كتفي وكنت اتنفس بصعوبه وكل ما حاولت اتفل التراب من فمي ما كانش يكمل طرحت راسي وقلت ربي من لي غيرك يامن اخرجت يونس من بطن الحوت اخرج بنتي سلى من القبر ذيه ، وما سمعت الا صوت امي وهي بتبكي ، حاولت التفت للجنب اليسار على شان ابسر ابي وامي وكان به فتحة صغيره اقدر ابسر بها لا عند امي ابسرتها وهي جالسة مرتزحه على بقايا الجدر ونص جسمها تحت الانقاض وحاضنه بس لراس ابي وباقي جسمه مختفي تحت خبث الانقاض ، كنت اصيح اماه يماااه وبنضوي من الفتحه بالكشاف لا عند وجهها وبنصيح يماه كيف انتي طمنيني قوى ، قالت وهي بتبكي ، ابوك مات يا يمني ابوك مات ما بيتنفسش ريت والله وانا اقدر احضنه قبل ما اموووت ، قلت يمه ابي ما متش يمكن مدوخ بس سعليش يمه ، وبنضوي جنبها ابسر اذا شلقي زوجتي او اختي ، وقدنا ميت قهر وخوف حين ابسرت الدم بينزل ما راس امي وبيرسم القهر على وجهها ، وهي فيها السكر ، ضويت ولقيت بس يد اختي وهي مرفوعه لا فوق وشعرها وشويه من ضهرها وباقي جسمها مدفون ، دريت ان اختي ماتت والكل ، وكنت اضوي بالكشاف يمين وشمال بندور زوجتي وبنضوي بالكشاف من الفتحه الصغيره تيك واتشاقر مشاقره ، وبنحس انفاس بنتي "سلى" وهي بتلامس رقبتي بس كانت انفاسها ضعيفه قوي ومتقطعة وكل نفس بيخرج بأنة وجع ما قدرتش اتحمل الوجع اللي انا فيه والقهر ، كنت احس نفسي بيضيق مش بسبب الانقاض كان بسبب قهري كنت ابسر ساع الوميض الابيض بيضهر في وجهي ويختفي وصوت الطنين والضغط في اذاني بيضرب شوية شوية وبقوة كان احس جسمي بينكمش لما قد عظامي عتتكسر ويرجع ، وفقدت الوعي وانا حضن لبنتي "سلى" ...
فقت وانا بنسمع صوت امي بتقل يمني يااا يمني قوى يا ابني جاوبني قوى يا ابني جاوب بنتك بتبكي وكنت اسمع صوت سلى وهي بتبكي بس كان صوتها بعيد وانا عادنا بنحاول افوق وكل شوية كان صوت البكاء حقها وصياح امي يقرب اول ما فتحت عيوني لقيت بنتي بتبكي فوقي وهي بتمسح التراب من وجهي وبتقل باباااا بااااباااا .. وكان ضوء الكشاف موجهه لا عيوني ، اول ما ابسرت بنتي مسكت وجهها وبنقل هاه يا بابا سعليش وحاولت اوقف بس خبطت راسي في الصبه وذكرت ان احنا تحت الانقاض رفعت وجهها لا عندي وكنت ابوسها واقلها سعليش يا بابا انا بخير حاكيني ما بيوجعش وهي بتبكي، وسمعت امي وهي بتصيح لي بصعوبة ونفسها بيتقطع ، يمني يا يمني قوى يا ابني جاوبني ، صيحت قلت هاه يمه سعليش انا بخير قالت جاوب بنتك قوى قد شبعت بكاء قلت سعليش يمه بنتي في حضني بخيره حاكيني كيف انتي ما بتحسي ايش بيوجعش قالت ما بيوجعني الا قلبي ادعي يا ابني ادعي الله واستغفر واذكره قوى قلت اصبري يمه شوية وعيخرجونا لا تقلقيش ، قالت لا يخرجونيش يخلوني جنب ابوك ذيه قده قبرنا اسال الله ان يخرجك انت واختك وزوجتك وبنتك يارب ، وتبكي ، وبنتي بتبكي حاولت ادي بنتي على جنب شوية على شان اقدر اضوي بالكشاف لا عند امي واجابرها ، وقلت يمه خلي ايمانش بالله قوي اصبري انا فدال ارجلش يمه اصبري قوى ، ما كانت ترد عليا كانت بس تون بقهر ، وابسرت به ضوء من خزقي صغير جنب امي ، وقلت يمه بتبسري الضوء؟ اكيد باقي شويه ويوصلو لا عندنا يمه ، قالت
#يمني
-البارت الأول ...
(تحت الموت)
-أليله الأولى ...
كملت اشقي وبننفظ ملابسي من التراب والبلك وفكيت الشال من احقاوي لاننا كنت اتحمل، ومراعي للمقاول يجي يحاسبني حق شقايا انا وباقي العمال وصل المقاول ادالي شقايا انا والعمال وقال غدوة محد يجي الا لما اتصلكم ما عاد عنشتغلش بسبب الحرب والقصف صاحب العمارة مفتجع وقال نوقف عمل ، روحت اشتريت مقاضي بالتقسيط وماشي في الشارع بنحسب كم باقي معي وكيف شفعل معي ابي وامي واختي وزجوتي وابنتي "سلى" عمرها سنه فديت روحها هي السلى حق فؤادي ، ايوه كيف عتفعل يا "يمني" ابوك كبير في السن بغير شغل وانت مصدر الرزق الوحيد للبيت ، اخي بلال الكبير مزوج ومعه اربعه جهال ساكن في الدور الثاني حق العماره مستأجرين في بيت اربعه ادوار اخي في الدور الثاني وانا وباقي اهلي في الدور الأول ، اخي معه تكس ومابيقدرش يوفر حتى صرفة بيته ونص الشقاء حقه بيصلح بها التكس ، طبعاً انا مهندس طيران ، ايوة مهندس طيران والله لا وراكم كيف قدرت اكمل دراستي بعنا كل مالنا في البلاد وكل ما نملك على سب اكمل دراستي ، وبعد ما تخرجت وقصدي اننا شا اعوض ابي واهلي ونعيش عيشه محترمه بس شاء القدر اننا اشتغل شاقي واطلع بلك واخلط سمنت ، المهم وانا جالس بنفكر في هذا كله ومروح للبيت رجل قلت اقتصد حق المواصلات قدنا في حارتنا الساعه 8:15 ليل فجأه سمعت قصف صاروخ نزل للحارة لما حسيت الارض شلتني وطرحتني ، قمت وانا بنقول يالله وماهو في بيتنا ..يالله وماهو في بيتنا ، ايوه كل يوم داخل البيت تجلس حاضن لاهلك وانت بتسمع القصف ومشنت داري في اي لحظه متى عيتم قصف بيتك كل ليله احضن بنتي واحاول اطمنها وهي بتبكي من الصاروخ ، كل ليله بنفتجع على ابي وامي ابي فيه الضغط وامي فيها السكر واختي قد فيها الكبد بسبب الفجايع من القصف ذيه ، ولما اخرج من البيت اشتغل ، كل صاروخ يهجم على الارض اقل يالله ماهو في بيتنا واتصل واطمن قدلنا على ذيه الوضع ما عدة سنوات ، سنوات وانت ما بتحسش بالامان طول الفتره تيه وانت بتحس انك ما تقدرش تحمي اهلك وكل شخص تعرفه كأن احنا مجرد اهداف ومنتظرين متى يتم التصويب علينا ، فوق هذا كله بنلاحق بعد لقمة العيش تخرج تشتغل وانت بتودع اهلك كأنك ما عتبسرهمش مره ثانيه ، سنوات وما قدرتش اعتاد على الوضع ذيه كل يوم بنحتضن بلحاف الموت ،لحنا اللي متنا ولا احنا اللي عشنا ، المهم نرجع لموضوعنا ، جريت بكل قوتي وبنبسر الدخان والنار والناس بيجرو طريق البيت حقنا كنت اجري وانا مفتجع كأن كبدي تفتت اشتي اوصل وفي نفس الوقت مشتيش اوصل وابسر بيتنا قده عبارة عن انقاض مخلوطه بدم اهلي وصلت وقد اهل الحارة متجمعين وبيصيحو وبيحاولو يخرجو الناس قصفو بيت صاحبي معتز البيت اللي قبال بيتنا جريت بكل قوتي واخي الكبير بيسعف معاهم قلت له وبيتنا ما وقع فيه قال ولا شي ، على طول دخلت البيت واهلي كلهم متجمعين تحت بيت الدرج مثل ما علمتهم اين يتخبو اثناء القصف وصلت حضنت بنتي وقدهي بتشنج من كثر ما افتجعت وبنطمن على اختي وامي وابي وزوجتي وبنقلهم سعليكم ما وقع شي و "سلى" بتبكي بقوة في حضني واختي قدهي مصفرة وقد شكلها عتفقد الوعي وامي بتدعي وابي قد حالته حاله ، ورم قلبي من كثر القهر ما كفاش قلبي لزعل على صاحبي وهله او على وضع اهلي ، قلت لهم هيا قومو ننزل للبدروم ، طبعا صاحب العماره قد ادى لكل المستأجرين نسخه من مفتاح البدروم في حال به قصف ننزل نجلس فيه ، والدنيا ظلام وصلت عند باب البدروم وبنتي في حضني وماسك يد امي وبننزل في الظلام ذيك والصياح من خارج وهم بيسعفو بيت صاحبي "معتز" وابسرت ثنتين نسوان من المستاجرين مع ثلاثه جهال بينزلو للبدروم معانا وصلنا للبدروم طرحت ابي وامي واختي جنب العمود وسرت ادخل النسوان بجهالهم وبنتي في يدي وزوجتي مسنبه جنبي ،مكنت سلى الكشاف على شان توقف بكاء وعادنا بنقل لزوحتي تشل بنتي "سلى" مني على سب اساعد النسوان ما درينا الا بصوت غريب قوي بيقرب مننا والارض بتهتز على صوت صفير كان الصوت مختلف قوي بسبب قرب الصاروخ ذيه غير اللي كنت اسمعهن بيضربين جنبنا او في منطقة قريبه مننا ، دريت ان الصاروخ ذيه عيقصف بيتنا نبعت على طول وانا حاضن لبنتي وحضنت المره بيدي الثانيه واشتي انبع احضن باقي اهلي ما دريت الا لما اطرح الصاروخ في بيتنا في لحظات حسيت الارض بترتفع وتطرح وتهتز كأنه حلم ومن قوة الضربة حق الصاروخ حسيت انه اطرح في ضهري وعلى طول ينفجر الصاروخ ، على طول ابسرت الدرج حق باب البدروم لما وقد اهتدمت الجدران للارض وفوق النسوان وجهالهم اختفى الباب من كثر الدمار والحجار بتنزل فوقي انا واهلي وانا جالس حاضن لبنتي وبنغطيها بضهري والغبار طلع من كل بقعة وفجأه اهتد البيت فوقنا طبعا كل هذا حصل في لحظات بس بالنسبه لي كانت اطول واخبث لحظات في عمري ، اخر صوت سمعته هو صوت امي وهي بتصيح بكل صوتها ياااااااالله.
تحت الفنيله حقي ونبعت طعنت الرجال في يده وقد بنسمع امي بتغور من باب شقتنا ، الرجال اول ما طعنته ابسرني بنظره حتى ما حركش يده ولا فعل اي ردة فعل للوجع ، وجالس خانق لابي ،اخي وقف وشل السلسله اللي فيها القيد ونبع من قفى العملاق بيخنقه بالسلسله العملاق بعد يده من رقبة ابي وقد كان وجهه ابي مزرق جلس ابي للارض وهو بيسعل وبيحاول يرجع نفسه ، مادرينا الا واموج خرجت من الغرفة اللي في يميننا وهي بتجري بيداتها وارجلها وبتصيح صياح غريب ساع الضبع ودخلت الغرفه الثانيه اللي في يسارنا وانا ماسك لرجل العملاق بنحاول ننكعه للارض انا واخي ، ما دريت الا لما دخلو اثنين من المستأجرين ونبعو يساعدونا وبالقوة قدرنا نطرح العملاق للارض ونثبته ، ونبعت انا وواحد ندخل الغرفه اللي دخلت فيها امواج ، اول ما فتحنا الباب ابسرنا امواج وهي واقفة ومخلسة بكلها وجسمها كله مجعد وشكلها يفجع الجن نفسهم ، وشم الغرفة جيفة اموات ، وبه ارجل معز مربطات بخيوط ومعلقات ملان سقف الغرفة والجدران فيها رسومات واشكال خبيثة ، وابو بحر ممدد في راس الغرفة كان يبسرنا وهو مبهرر ويشتي يصيح بس ما قدرش ، الرجال قرب وهو طارح يده في فمه وبيقل اعوذ بالله من الشيطان ، قامت امواج رجمت لا فوقه رماد لما نكع للارض وكان يهتز بقوة ، مسكت الرجال وسحبته لا خارج الغرفة وقفلت الباب وبنصيح لناس يجو ، وهي كانت تخبط الباب بقوة وتصيح ، وبه ناس قد فكو القيد من بحر وبيبسرو ما فيه وهو كان فاقد للوعي ، والحارس طلع وهو مفجوع بيصيح مابه مابه ، اول ما ابسرته قلت يا اباه هذا اخوهم امسكوه هو ابن الكلب السبب في كل شي ، اول ما سمعني هرب على طول ولاحقه ابي وواحد من المستأجرين ، وقد المستأجرين كلهم باب الشقة وناس داخل ، وقد به اثنين بيساعدوني واحنا ماسكين للباب الغرفه اللي فيها امواج محد ساطي يفتح ، وكنت اصيح بلغو القسم ، بلغو القسم واسعفو بحر والرجال اللي رشت الساحره فوقة رماد ، وقد لنا ما يقارب خمس دقايق واحنا في الشقة مثبتين للعملاق وماسكين للباب وبنبسر بحر والرجال وبنسمع صياح امواج واخوها ، وكل واحد بيسال مابه ماوقع ؟ وبيتكلمو ، واحد من الجيران دخل وفي يده سلاحه ، قال ابعدو مني افتحو الباب شقتل ابوها بنت الكلب ، وبحر فاق وكان يصيح ابي يامنعاه انقذو ابي قبل ما تقتله ، فتحنا الباب حق الغرفه والرجال موجهه للألي ، وابسرنا امواج لما قشعر بدنا كله وهي بتتقفز في الغرفة تيك ، والرجال كان يقلها انبطحي على بطنش شقتل ابوش شقتلش وقرب شوية من الباب وحنا خلفه بنبسر ، ما درينا الا لما امواج وقفت وابسرت الرجال وكانت تقله اقتلني هيا ، ما درينا الا والرجال كان يرتجف بقوة وانا بنقله ارميها ارميها والرجال بيراجف ومقعي فمه ما قدرش حتى يتحرك ، ما درينا الا لما قربت لا عنده مسكت الألي وخبطته في صدر الرجال لما دهفته لا ورى ونكعته للارض ، وبعد ما سلبته السلاح وجهة الألي نحونا وبدأت امواج تطلق نار علينا وهي بتتقفز ، كلنا هربنا من الشقة وقد كنا سحبنا بحر والرجال لا والرجال بس اخوها كان في الشقه مثبتين له اخي واثنين رجال ، كلنا هربنا والعملاق قام ، وجرى لا باب الشقة وقفل الباب وكلنا واقفين عند الدرج مفتجعين لا يقع بنا شي ولا شي وفلتنا صاحب الألي داخل ،ما درينا الا وواحد من المستأجرين اطرح للارض وبيصيح رجلي رجلي ، جينا نبسره ورجله بتنزف دم وقع فيه طلقة ، ومادرينا الا وخمسه عسكر بيطلعو من الدرج جري وبيسألونا مابه جابرناهم وصلو وكان يصيحو لهم يسلمو انفسهم ، وما درو الا بطلق نار عرض الباب لما تكون واحد من العسكر في يده ، اقتحمو الشقه وبنسمع بس رصاص وصياح العملاق وامواج والعسكر ، وبعد دقيقه جينا نبسر وقد واحد من العسكر ميت ، والعملاق ميت وجنبه السلاح ، وامواج ، غارقة بدمها وهي حاضنه لأبو بحر من خلفه ويداتها في رقبته ، ومابش خمس دقايق الا وقد العسكر والاسعافات ملان العماره وقفلو الشارع وخرجونا كلنا من الشقة ، وصاحب الألي كان فاقد الوعي اسعفوه مع باقي المصابين وبحر ، وابو بحر خرجوه وهو مبهرر وبيبكي ، ذكرت ان ابي خرج يلاحق الحارس نزلت سريع ادورها خرجت لشارع ولقيت ابي والرجال قلت لهم اين الحارس قالو هرب ما قدرناش نمسكه ومشع مسدس وكان يطلق علينا فلتناه ورجعنا بس سمعنا طلقات رصاص رجعنا سريع ولقينا الحارس مغطى بدمه وواحد داعس له في صدرة والبندق في يده قلنا من انت قال انا ابن العاقل اللي جنبكم خرجو الناس تحوشو وبيقولو المجنون قتل الرجال انا ابسرت الطقومات والاسعافات خيرات فلت وجيت ابسر مابه ،قلي ماوقع ما عاد فعلتو اين الجنيه والعملاق وليش قد الحاره ملان عسكر وقامت القيامه قلت جي نطلع وشا اجابرك ، وبعد يومين لقيو في الشقة اكثر من ثلاثه الف سحر ، ودمم ميتات وقرون وسط الجدران وكتب سحر ، وفي غرفة الحارس اسحار وصور بطايق ناس وصور المستأجرين كلهم وتفاصيل عن حياتهم وبطايق ناس مفقودين من زمان واشياء تشيب الراس واخفو العسكر عننا حاجات من اللي لقيوهن في
Читать полностью…
#بنت_الجيران
-البارت السادس ...والاخير
قفل باب غغرفتي وبيبسرني بنظرة غريبه وانا متجمد فوق السرير ما قدرت حتى اتكلم واقله ما تشتي ، وهو بيصلح النظارة فوق عيونه وبيبسرني ويبتسم وفجأة تتغير ملامحة كأنه بيبكي ورجع يبتسم ، وقلي (كيف شعورك وانت مش قادر تشكي وجعك وكل ما تأشر نحو الشر محد يصدقك ويبسروك مجنون كيف شعورك وانت فاقد الثقه في تصرفاتك واقرب الناس لك مش قادرة تفهم وجعك ؟؟ كل ما يميل قلبك اعرف ان الميلان عبارة عن خروج من الطريق المعتاد وتصبح طريقك ملفته للانظار ، لك حرية الاختيار امك او ابوك شرجع لك بعد يومين ...) وفتح الباب حق غرفتي على وصول امي وفي يدها العصير قالت اين عتسير يا ابني اجلس اشرب العصير اقل شي، قال لها تسلمي يا خاله انا مشغول قوي وخرج من البيت ، وامي بتبسره وهي مستغربه وقالت لي مال صاحبك ذيه يا علي .. علي بتسمعني مال صاحبك ؟ هااه .. ماله شي يمه مابلا معه عمل ضروري واتصله ابوه وخرج مستعجل ، طرحت لي العصير وسارت تكمل عملها ، وانا مطنن وبنفكر في مجبره ماقصده وكيف درى بأيش بنحس ، ايش النرجسيه تيه اللي فيه وبكل ثقه يدخل بيتنا ويهددني حرام ما راحت له ، بيهددني بابي وامي اكيد عيدهددني هو قاتل وقد الامر عنده طبيعي بس يا انا يا هو والليله ضروري افعل حل للهدار هذا كله ، وانتظرت طول اليوم وانا بنفكر كيف افعل به ، واخر حل وصلت له اننا اهجم على شقتهم واذا وصل الحل اننا اقتله شقتله لاننا مقدرش اجابر اهلي بشي محد عيصدقني بيبسروني مريض نفسي ،راعيت الساعه 1:20 بعد منتصف الليل قمت شليت الجنبيه حقي ودخلتها من تحت الفنيله حقي وخرجت من غرفتي سكته لحد يسمعني وبنحاول افتح باب شقتنا دلا دلا على شان ما يطلع صوت اول ما فتحت الباب ابسرت بحر فتح باب شقتهم وطلع جري طريق الجباء حق العمارة ، وانا طلعت بعده وصلت وباب الجباء مردود ، فتحته وابسرت بحر في طرف الجباء ويشتي ينبع وينتحر وجالس بيبسر لشارع قربت دلا دلا وانا ماسك للجنبية اول ما قربت منه سمعته وهو بيبكي وبيقل يارب سامحني وقده عينبع نبعت على طول حضنته من وراه وسحبته لما نكعنا على ضهورنا اقتلبت على طول لا فوقه وانا طارح للجنبية فوق رقبته وبنقله قتلت امواج واخوها يا كلب وذلحين تشتي تنتحر حرام لا اقتلك هنيه ساع الكلب ، وهو بيبسري بدون اي مقاومه وقلي اقتلني طيب قد كنت شنتحر ليش عادك انقذنتي هيا اقتلني اشتي اموت وارتاح، استغربت من كلامه قلت له كيف ترتاح وانت بتعذب خلق الله قتلت امك يا عقي والديك وزوجها وبتعذب جهالهم ليش ، وفوق هذا جيت لا بيتي تهددني بقتل ابي او امي ، الرجال كان مستغرب من نص كلامي وقلي من وين جبت الكلام هذا ومن قلك اننا قتلت امي الله يرحمها وكيف قتلت زوج امي ، ابي عايش مشو ميت..!! قلت له بطل كذب شذبحك هنيه انا داري ، قلي بكل برود تشتي تقتلني اقتلني ولا قمت من فوقي وخلينا نتجابر مابش معي وقت، استغربت من مجبره وقمت من فوقة وهو قام وجلس جنبي وقال اكيد امواج وصلتك لا تيه المرحله وكان باقي لك شوية وتنتحر ، بس للاسف انا وصلت لتيه المرحلة قبلك بس خليني شا اجابرك بالقصة من بدايتها ، صاحب العمارة هو ابي مشو زوج امي ، امي ماتت بعد ما ابي تزوج بالثانيه ، وقرر ان احنا نسكن في الشقة مع زوجته الجديده قلت له ايوه كمل قال ، اولا امواج هي زوجة ابي الجديده ، والشخص كبير البنيه هو ابنها ، وحارس العمارة هو اخو امواج ، هم عصابة وصيادين رجال الاعمال ، بالسحر والشعوثة وغيرها ، قلت له ما بتقل كيف امواج زوجة ابوك ؟والعملاق ابنها.؟!! وامواج شكلها في سني كيف معاها ابن اكبر منها؟!!! ، والحارس كيف اخوها وانا ابسرتك وانت بتضربه في الحوش ؟؟ طيب اذا ابوك عايش قلي اين هو وليش مخفي للامر ؟!!مالك تشتي تجنني ..!! ابسرني وابتسم وقال وهو هذا سر عملهم وضربة القاضية لهم ، كل اعمالهم الخبيثه بيرجموها فوقي وخلوني انا صاحب الشخصية الخبيثه وهم المظاليم وكل هدفها زوجة ابي انك تقتلني او انا اقتلك او انك تنتحر ، المهم اسمعني ، انا ابن ابي الوحيد ، ابي قرر يعمر العمارة وتعرف على الحارس والحارس دله على امواج واتزوجها ابي ، امواج انت لو تشوف شكلها يمكن تشخ تحت نفسك من الخوف ما عاد افتهمليش هي ساحره او معاها جن او هي جنيه في نفسها مشنا داري لليوم ، قلت له بطلك كذب انا ابسرت امواج وفوقها جمال ما قد ابسرته في احد ، قلي شفت ملامحها كلها ولا بس عيونها ؟؟ قلت له هااه .. الصدق عيونها بس !! قال وهكذا خدعو ابي لما تبعد اللثمه تبسر تجاعيد وجهها ويختلف شكلها قوي كأن عمرها فوق ال70 سنه ، المهم خليني اكمل لك بعد ما انتقلنا ابي اصبح طريح الفراش وما يقدرش يتحرك او يتكلم وطارحه له في غرفة ، وبتستخدم اسحارها وشغلها في الغرفة تيه ، وابي كل اسبوعين ادي له اكسجين وابر ، واعتقد انك ابسرتني وانا نازل من الدرج وفي يداتي دم ..! قلت له ايوه قال ابي زاد مرضه وكان يسعل دم فنزلت سريع ادي له العلاج ، امواج وابنها العملاق والحارس سيطرو عليا