797
بوت التواصل مع القناة @PrincessS_bot
وقلت له ايش البرامج اللي قد بعتها لهم، مثل ايش يعني ، قال لو اقلك ما عتصدقنيش وعتقل اننا مجنون ، انا صاحب برامج كبيرة مثل واتس اب واتليجرام وتيك توك وغيرها ، بس اُنتسبت لليهود واشترو كل شي من جذورة حتى المعلومات اللي بنحتقن ها كلها منهم وفيهم ، قلت له وايش تتوقع وانت بعت دينك ونفسك واهلك وناسك وبلادك قبل بيعك للبرنامج لكن ما نفعل حب المعيشه ذل ، قلت له ايوه ذلحين خلينا نرجع لموضوع اشرف ، قال ايوه .. ايوه اشرف مش بعيد هو اللي خطف بنتك وفعل الليله هذه بكلها ، بس لحظه من انت لما اصبحت عدو اشرف او تورطت معه باي مصيبه من انت ؟؟ قلت له يمني ،طيب ايش اللي خلاك متاكد ان اشرف له يد في موضوع خطف بنتي ؟ قال بما اننت تعرف اشرف فمابش غيره يفعلها ، بيلعب بحياة خصمه كيف ما يشتي ويمسحه في لحظات من الوجود .. قلت له مش وقت تعرض لي خوفك من شخص اكثر من خوفك من ربك وقلي ايش قصة الجهاز هذا الاسود وليش تكهرب جسمي كله اول ما قربت منه ولمسته ؟؟ الرجال فتح عيونه بقوه وبيبسرني وقد اكل الاستغراب ملامحه قال هاااه .. ما قلت ؟ ..
وما دريت الا وتلفوني بيرن ..
_ هاه يا معتز وصلت لشي ؟
_ايوه يا يمني الشي اللي بيخترق وكلمتني عنه اعتقد انه نفس المصدر اللي مشغل في وضع الحمايه والامان لعمنا يعني شي فوق قدراتي بس شا ازيد ابعسس فيه واذا وصلت لشي شا ابلغك ...
قفلت الخط .. وجالس بنفكر وانا بنبسر لا عيون الرجال اللي قبالي ،ما دريت الا وعمنا بيتصلي ، واول ما فتحت المكالمه سمعت ...
_ يمني .. اين انت يا ابني انا بنلاحق في موضوع بنتك وشكلي قد وصلت لشي واشتيك تجي لا عندي الان ضروري فلت كل شي في يدك وجي
_ يلاه نص ساعه واكون عندك ..
قفلت التلفون وخرجت من الغرفه والرجال بيقل اين عتسير يا اخي خليني ارحلي ، ابسرته وقلت له اذا قدرت تفتح الباب ذيه رحت لك وقفلت باب الغرفه وانطلقت لا عند عمنا ....
يتبع...
#في_بيتي
#يمني
#منيرالنقيب
ما بتقل اين بنت؟؟! والله ما شليت بنتك ولا انا داري ماهو الخبر ، قلت بطل كذب بنقلك شقتل ابوك اين بنتي خيرة الله عليك ، قال والله ما بنتك عندي ولا انا داري من انت ، بس انا داري من اللي هجمو عليا خطينا من هنيه وشا اجابرك بكل شي ، على طول ضربته بقفى المسدس في راسه لما دوخ (فقد الوعي) وفعلت له قيد في ارجله والكل وطرحته في الخانه حق السيارة ونزلت طريق الحوش اللي خرج منه ، وصلت وقد رحله عمنا مع رجاله اول ما دخلت الحوش لقيت بيت كبير دورين وبه ما يقارب خمس سيارات في الحوش وثنتين منهن حارقات وقد به ثلاثه ميتين في الحوش ذيك دخلت البيت وقده منخول بالرصاص وبندور يمين وشمال والغريب ان البيت من داخل معمور بطريقة شعبية قوي كأنه بيت في القرية ، وبنصيح يا سلى . ياسلى اين انتي يا بنتي وانا بندور لقيت باب مخفي تحت بيت الدرج حاولت افتحه بس كان ثقيل قوي يعلم الله من ايش مصنوع الباب ذيه وكان به شاشة بصمه امان للباب صورت الامان ورسلته لمعتز يفك لي الشفرة حق البصمة قلي انا شا احاول بس اذا لقيت البصمه المامنه عيكون افضل قلت له خير .. خير ، قفلت وخرجت من البيت لسيارة وعلى خرجتي لقيت في المكتب حق البيت لصقة شفافه عريضه شليتها ، فتحت الخانه حق سيارتي وعادنا بنطرح اللصقة على اصابيع الرجال ، ما دريت الا والرجال صحى وقلي من انت محجور لا تقتلني قلت له كيف افتح الباب اللي تحت بيت الدرج حقك ، ابسرني وافتجع وقال اين باب مشنا داري مشنا داري ، على طول عمرت المسدس وضربت من جنب اذنه وقلت له الثانيه شا ادخلها من تيه الاذن واخرجها من الثانيه ، قلي حاضر حاضر وادالي الرقم السري حق الباب ، طرحته في الخانة وقفلت عليه خانة السيارة ورجعت لا بيته اول ما وصلت لا جنب الباب هذا واحس كهرباء مره ثانيه في جسمي وبنحس الكهرباء وهي بتمشي في كل عروقي كانها مخلوطه بدمي لما جلست للارض ، حاولت اوقف على ارجلي بالقوه وفتحت الباب ودخلت لقيت غرفة سريه فيها اجهزه غريبه وشاشات مراقبه حول الحوش بكله وكمبيوترات وبحوثات وكتب وحاجات غريبه ، وانا بندور ملان الغرفه وبنصيح يا سلى اين انتي يا بنتي وبنقلب وبندور في المكاتب والدواليب لقيت خزنه مفتوحه كان داخلها شوية اوراق وطبع فلوس بالدولار والسعودي وما يقارب تسع سبايك ذهب وكيس اسود قماش شليته ولقيت داخله جهاز اسود مكعب بشكل مستطيل ساع الخازن بس ما بش فيه اي منفذ اول ما مسكته حسيت جسمي كله تشنج وكأن حاجه تلبستني وفجاه بدأ الجهاز يومض كان فيه خمس لمبات صغار بتومض بشكل والوان غريبه وكأنه اشتغل اول ما مسكتة ، والكهرباء في جسمي كان تزيد وبنحاول ارجم الجهاز من يدي بس كانت يدي متشنجه قوي ما قدرتش ما دريت بنفسي الا لما ارتجمت للارض وفقدت الوعي ، كنت ابسر مشاهد غريبة واشكال ناس اول مره ابسرهم بتمر امام عيني بطريقه سريعه وموحشه اول ما فقت ابسرت نفسي ممدد على الارض والجهاز في يدي بس ما عدبش كهرباء في جسمي وقد بنقدر اتحكم بجسمي قمت على طول واتصلت للخبره حقي وقلت لهم يجو للموقع اللي انا فيه وينقلو كل شي داخل الغرفه تيه للمكان السري حقي ، واتصلت لبلال اخي قلت له يجي معاهم وينتبه ، وشليت نفسي وخرجت وانا معي الجهاز وصلت لسيارة طلعت والرجال بيصيح من الخانه اول ما مسكت السكان حسيت نفسي شا ادوخ مره ثانيه ، والدنياء امامي رجعت بطيئه قوي والرجال بيصيح وانا صيحت وقلت اصه يا كلب بنقلك اصه قبل ما انزل اطفيك من مره وشغلت السيارة ورحت لي من هنيك ، شويه وقد عمنا بيتصلي وانا بنسوق السيارة ما رضيت اجاوب عليه وكل شويه يعيد الاتصال ويفعلي رسايل وانا بنبسر لتلفون والجهاز الاسود وهو في الكرسي اللي جنبي وبنسوق ولا رضيت ابسر ايش رسل شويه ومعتز بيتصلي ولا رضيت ارد على احد ما دريت الا وبلال بيتصلي قال قد وصلنا وقد بننقل كل شي في الغرفه السريه تيه ومن هم الرجال اللي ميتين هنيه ماهي الحرب اللي قاعت في البيت ذيه؟ بس يا اخي الغريب اننا لقيت في الشاشات اللي بالغرفه رسالة في شاشه سوداء بشكل غريب مكتوب فيها بنتك عترجع ، قد مسكت بداية الخيط انتبه تفلته ...
يتبع ....
#في_بيتي5
#يمني2
#منيرالنقيب
طلعت ولقيت اخي بلال في الدرج مسكته وقلت له اسمعني عمنا عيسالك عن المره والرجال اللي ساعدوكم وقت الحادثه حاول تختصر الموضوع ولا تديلش اي تفاصيل زياده عيد له نفس المجبر الاول وخلاص ، قال طيب حاضر يا يمني بس ليش ما به لا تقلقنيش قلت ما به شي افعل اللي قلت لك وشرجع اجابرك ونزلنا ورجع بلال بيقلي طيب وجدتي مالها ؟ قلت له مش وقت ذلحين ركز لما نكمل ونخرج من عند عمنا وبعدا عنتجابر ..
كمل عمنا يسال اخي وقلت خاطرك يا عم معي شويه عمل وعنتواصل صيح لي وقال يمني اعقل انتبه تفعل شي بدون ما تجابرني ولا تقلقش ذيه الموضوع خليه عليا قلت له ولا شفعل شي يا عمنا لا تقلقش ...
خرجت ومعتز بيتصلي ...
هاه يا معتز جابرني وصلتو لشي ؟
_ ايوه وصلو خبرتنا لمكان شخص واعتقد ان له صله بالمره والرجال يا يمني ..
_ حلو رسلي الموقع يا معتز وكمل واحذف الرسايل
_ حاضر من عيني بس بنقلك ما قدوش اكيد عاد احنا بنشك وما قدحناش داريين اين البيت بالضبط بس داريين بالحارة
_ تمام يا معتز رسلي الموقع.
شليت نفسي وتوكلت للحصبه جنب جولة الساعه ودخلت تيك الحارة اللي جابرني عليها معتز وبنبسر الحي فقير والناس اللي فيها يرحمو كل واحد بيلاحق بعد رزقه وبنفكر ايش علاقتهم بذيه المكان وجلست يومين كاملين في تيك الحاره بنلوي وبنحاول اختلق صداقات واجابر اي احد على اساس اننا بندور بيت للايجار وعرفت من هم الاغنياء حق تيك المنطقه وما شغلهم وعلاقاتهم بس كل شي كنت اوصله كان طريق مغلق مابش له علاقه مباشره بجماعة "القبضه" او المره والرجال روحت للفله اللي فيها زوجتي بتتعالج وعلى دخلتي سمعت عمنا من الديوان وهو بيجابر في التلفون وبيصيح وبيجابر بقلق وخوف ، انتبه يمني يحس او يشك بشي يمني مش بسيط بنقلك ولو حس بشي عتكون نهايتنا كلنا ويخرب كل شي بنيناه فوق روسنا ، ما عادناش متحمل وجودة جنبي اشتي اخلص منه في اقرب فرصة ،
سمعت عمنا لما وجعني راسي رجعت ورى وخطيت دلا على سان عمنا ما يحسش بوجودي او يدرى اننا سمعت مجبرة ، طلعت و دخلت غرفة زوجتي جلست جنبها ومسكت يدها وهي في الغيبوبه وبنجابرها من انتي ومن هو ابوش ولمه ابوش بيفعل كل هذا معي. وهو ما ابسر مني اي شر طيب ليش يشتي يخلص مني وهو اللي قربني منه وزوجني بش ، ونا بنجابرها فجأه سمعت صوت جدتي وهي بتصيح ملان الفله ياااسلى وااااسلى يوووه يالله سترك اين انتي يا بنتي ، خرجت ساع المجنون لا عند جدتي وبنقلها مابه وهي بتبكي وقالت بنتك "سلى" كانت راقدة جنبي يا ابني خرجت للحمام ورجعت وما عدبش لها وجود يعلم الله اين سارت بتجابرني وهي بتبكي ، نزلت ساع المجنون وبندور ملان الفلة يا سلى يا بنتي وعمنا خرج من الديوان وبيقل مابه نبعت على طول لا فوقه ومسكته من صدره وقلت له بنتي.. اين بنتي ؟؟!! حرااام لو يقع بها شي لا اقتلك واشرب من دمك ...
يتبع....
#في_بيتي5
#يمني2
#منيرالنقيب
قبل 23 سنه ...
اقدرا ليش فعلتي بابني كذيه يا اقدار حرام عليش , قالت الان الشريح هبا تتحلل وتختفي في دم ابنك وقد بدأ تحلل الماده كل اللي اشتيه ان العبقري اللي جنبك يربطه بالاجهزه اللي هنيه وانا با اكلمك يا بابا ايش عنفعل ....
يتبع ...
#في_بيتي_يمني
#منيرالنقيب
ومعتزقلت له تمام شغلت السيارة ومكنت معتز الفلاشة قلت له ركبها في الابتوب وابسر ما فيها يا معتز قال تمام اول ما ركب الفلاشه الابتوب حق معتز طفي على طول معتز سحب الفلاشة وقلي وقف وقف وقفت نزل معتز على طول كسر الابتوب وقلي اسحب بترول من السياره يا يمني سريع قلت له ليش قال ما بش وقت وهو بيكسر الابتوب بحجر سحبت بترول شل البترول ورشه فوق بقايا الابتوب وحرقه قلت له ما وقع يا معتز قال هذا الفلاش له علاقة بنفس النظام حق فلة عمنا حاجة فوق قدرتي وقبل ما يتم سحب او معرفة ما في لابتوبي قلت احرقه وخلاص , قلت له بس يا معتز انت سحبت الفلاش سريع مستحيل يحصل اللي بتقول عليه قال ايوه مستحيل بس النظام هذا بيخوفني يا يمني أي شي معرفش في البرمجه أخاف منه فقلت افعل كذيه احتياط قلت له سابر يا معتز ورجعنا للفلة حق عمنا طلعت معتز رجع لا غرفته وانا طلعت لطيرمانه حق عمنا وهو وحده جلست ومكنته الفلاشه وقلت له ايش فيها يا عمنا ؟ قال ليشب تسأل يا يمني مالك تيه اليومتين بتسال خيرات مش عوايدك قلت له اصلاً قلت لمعتز يكربها في جهازه نشوف ايش داخلها بس الابتوب طفي اول ما ركبناها وحرقنا الابتوب على طول ابتسم وقال انا داري المهم ذلحين روح وبعدا عنتجابر في كل شي قلت له خير وقمت اروح وبعدها مرت الأيام مهمه ورى مهمه وأنشأت لي فريق يخصني معتز واخي وعصام ووليد وناس كنت اضمهم لفريقي بنفس الطريقه اللي ضميت فيها عصام ووليد ,كملت اعمر بيتي الخفي غير البيت اللي طارح فيه عائلتي واخي وصلت لراس الكبير حق الحشيش واكتشفت من بيورده وكيف بيتم توزيعه وحتى اين بيتم زراعته في اليمن كنت اشتري الكل واسحب الكميات كلها واتلفها نغبشت خلية الدبابير وكل زعيم كان أوصل له كان اصفيه اشتي اوصل لراس الاصبع بس كنت ما أوصل لشي كنت اكتشف ان نظام القبضة هذا متشابك وكل شخص في مجاله بيكمل الثاني بدون علمهم وكل ما تتم تصفية شخص يطلعو بدله عشره واقوى من اللي قبلهم ويتم توزيع الحشيش بشكل اكبر وبطرق اخطر وبأضافات مواد قاتله اكثر ساع اللي بينتقمو مننا بطريقة غير مباشرة وفي يوم وانا في مهمه انا وعمنا تحاصرنا وكنا نحسب انها نهايتنا ما درينا الا بشخص لابس بدلة سوداء ومقنع دخل صفاء الرجال اللي محارين لنا وانا بنبسره كانت بنيته ضعيفه قوي كمل صفاهم ورحله خرجنا انا وعمنا وانا مستغرب بنقله من هذا يا عمنا كان يقل مدري وكل ما اقله ضروري نبسر من هو يا عمنا يعني هذا الشخص بيعرف كل تحركاتنا كان يغير الموضوع ويقل مابش داعي للقلق يا يمني يمكن انه منهم وفيهم وتم ارساله لتصفية الرجال اللي في الموقع قلت بس يا عمنا الشخص هذا ابسرني كان المفروض يصفيني انا والكل لو الموضوع على ما بتقل بس عمنا كان يقلب ويغير الموضوع ويقل يا يمني ذلحين مش وقت معانا مهمه جديده وكل يوم كان يزيد الغموض حق عمنا ويزيد الغموض حقي والكل بس كان به اساله بتاكل عقلي اكل به شي مرتبط به شي خفي وكبير عمنا ما يشتيش يقوله لي طيب ليش وجلس هذا السؤال في راسي يكبر يوم بعد يوم وانا بنلاحق الشر وأهله بكل انواعة كل هدفي أوصل لاصابع القبضه واقضي عليهم وفي يوم ما دريت الا واخي بلال بيتصلي ...
الوووو
رد عليا وهو متوتر وبيصيح يا يمني اين انت
خير يا بلال مابه قال خرجت أوصل الحجه حقك وبنتك وهجمو علينا ناس فوق شاص اربعه رجال وقفت وبنشتبك انا وهم بالرصاص وزوجتك كانت بتقاتل معي
ايوه وذلحين اين انتم قلي ما حصل يا بلال لا تجننيش
قال أصيبت زوجتك برصاصه في بطنها وانا نبعت ابسرها وقد كان الرجال بيقربو مننا ما دريت الا بسيارة اجره تكس بتسوقها مره وقفت ونزلت بسلاحها ومعاها رجال ملثم بشال وصفوهم بطريقه خياليه كاننا بنبسر فلم كملو يصفوهم وسحبوهم كلهم لا فوق التكس وشلوهم وسارو والمره طلعت فوق الشاص والرجال فوق التكس
وانا ذلحين ماشي طريق المستشفى يا يمني قد اتصلت لعمنا والكل
خلاص تمام يا بلال بنتي وقع فيها شي
ماشي لا تقلقش
خلاص تمام يا بلال قفل وانا جايي للمشفى
مادريت الا وعمنا بيتصلي وبيقل اين انت يا يمني قلت ماشي للمستشفى قال وانا والكل بنتي لو يقع بها شي ما شا اسامحكش يا يمني قلت له تفائل يا عمنا وقفلت الخط
كنت قريب من المشفى وصلت قبل على وصلو اخي نزلت من فوق سيارتي ونبعت لا فوق السياره حق اخي وماسك بطن مرتي وبنقلها سعليش لا تفتجعيش قالت سعليك انت ما عيقع بي شي طمني على سلى قد افتجعت قوي قلت لها سلى ولافيها شي قالت اقرب اشتي اقلك شي انا خبيته عليك وقلبي بياكلني كل يوم ضروري أقوله قلت لها مش وقت دخلنا المشفى وحضنت المره ونزلت وهي بتقل الا ضروري اقلك طرحتها فوق السرير في الطوارئ مسكتني من صدري وقالت به شنطة صغيره في دولابي افتحها وابسر اللي فيها بس بدون ما يعرف ابي , ودخلوها الدكاتره لا غرفة العمليات وعمنا وصل بيقلي طمني يا يمني ما في بنتي قلت عادهي في العمليات ومحد بلغنا شي نبع لا عند اخي بلال وبيسأله ما حصل بلال كلمه وبيوصف له اشكالهم , قلت يا عمنا عنطلعهم
#يمني
البارت "23" والاخير من الفصل الرابع
بعد ما اتصلي عمنا سرت لا عنده على شان موضوع الفلاشة حق الرجال حق المانيا اللي من المحتمل انه واحد من أصابع القبضة , اول ما وصلت وعمنا جالس في الطيرمانه مخزن قلي ارحب يا يمني جلست وبنبسر بقعة في الطيرمانه فيها كفته قات قلت لعمنا من كان عندك ضيوف يا عمنا غريبة انت ما تستقبلش احد عندك , عمنا ارتبك وغير الموضوع وقال ذلحين مش وقت الهدار هذا خلينا في المهم يا يمني كان به امير سعودي زار اليمن بشكل خفي واتقابل هو والرجال في السفارة السعودية بشكل سري , كيف يا عمنا في السفارة وهي مقفله من أيام الحرب وكيف يدخل امير سعودي بالسر ؟؟ مشو هذا السؤال اللي توقعته منك يا يمني المهم ماعلينا الرجال شل فلاشة من احد المكاتب والفلاشة هذه هي سبب مخاطرة الأمير وزيارته لا صنعاء بس الرجال وصل للفلاشة قبلة واضطر يخفيها في السفارة انا الان شا أوضح لك المكتب والمكان اللي اخفاها الرجال فيه وشا أوضح لك كيف عتدخل وتخرج من السفارة بدون محد يعرف وفي حال انكشفت فضروري تصفي أي شخص يقابلك , كيف يا عمنا اصفي أي شخص وايش في ذنبهم العسكر اللي بيداومو هنيك وبيحرسو ؟ مقصدش العسكر يا يمني اقصد الرجال اللي داخل السفارة هولا مش عسكر , طيب يا عمنا والرجال حق المانيا اين هو مش قلت لي انك عتديه لا عندك بمعرفتك ؟ او قد ادتيه وصفيته والكل ؟؟ عمنا قال هااااه .. لا لا ما صفيتش بس عاده ما قد وصلش وما عنصفيش اول ما يوصل عنحقق معه انا وانت , قلت له خير يا عمنا اذاً شنزل البس البدلة واشل سلاحي وانطلق , قال الله معك يا يمني وخليك حذر يفضل انك تدخل وتخرج بدون محد يحس بك ..تمام , ان شاء الله يا عمنا , خاطرك وقمت شليت نفسي ونزلت دخلت الغرفة اللي فيها السلاح بنلبس البدله وبنشل لي سلاح , بس كل ما ادخل الغرفه تيه عيني تجلس على باب الخزنه الكبيرة اللي عرض الجدار ومدري ليش فيني فضول اعرف سرها وما داخلها ومستغرب من نفسي انا مش فضولي بس هذه الخزنه حاسس ان وراها سر كبير عمنا ما يشتيش احد يعرفه حتى لو هو انا , كملت وخرجت من الغرفة وقدنا فوق السيارة داخل الحوش بس الفضول سيطر عليا قوي وقلت يا يمني انزل وشل معك معتز هو الوحيد اللي عيدي لك سر الخزنه تيه نزلت من فوق السيارة وقلت اطلع استأذن من عمنا اشل معتز معي , وطلعت سريع لطيرمانه اول ما وصلت لقيت شخص في نفس سن عمنا جالس مخزن عند عمنا اول ما ابسروني عمنا توتر قوي والرجال والكل كان متوتر قوي اول ما ابسرت لا عيونه حسيت برهبه غريبه قوي وخلتني متسمر مكاني ومشنا داري ليش كأني اعرف الملامح هذه بس عمري ما قابلته هذا الشخص عيونه فيها شي غريب شدني بقوة واذكر هذه العيون اننا كنت ابسرها في اكثر احلامي في اغلبية احلامي ابسر نفسي وانا رضيع وفي حضن شخص بيحاول يسكتني وهو بيبكي ومقدرش اشوف من وجهه الا عيونه بس , وانا بنفكر ما دريت الا وعمنا بيقل بنبرة قلق على ضبح ما طلعك يا يمني ؟؟ ليش ما سرتش مهمتك ؟؟ وانا شارد وبنبسر الرجال اللي مخزن جنب عمنا وقلت هاااه ..هااه المعذرة منك يا عمنا بس طلعت اقلك اشتي اشل معتز معي على شاا.... قاطعني وقال شله شله يلاه رحلك يا يمني سريع وعنتواصل بالتلفون اذا به جديد هيااا امشي يا يمني مالك ؟؟ هااااه حاضر يا عمنا نزلت من عندهم وانا بنفكر في اللي حصل لأول مره عمنا يتوتر كذيه قد قابلت الموت انا وهو اكثر من مره بس عمري ما شفته خايف كذيه ومن هو ذيه الرجال وليش عمنا افتجع حين ابسرته ليش عمنا بيخفي عني هذا الشي ماهو السر طيب ليش الرجال هذا بنحسه معروف بالنسبه لي ؟؟ والف سؤال سيطرو علي راسي وصلت للغرفه حق معتز دخلت وهو مخزن وبيغني في الغرفه والكمبيوترات قباله وثلاثه لابتوبات ورجع الغرفه ساع المرقص قلت له وريحهم وقف الغنيه وقال وهو بيمزح , ايش الفوضة هذه محد يقدر يجلس في بيته وهو مرتاح انا قلت ممنوع احد يدخل يزعجني ضروري اغير الموظفين حق الفله هذه الصدق , ضحكت من مجبره وقربت لا عنده قلت هيا قووم قام وسلم عليا قال يا حريو مالك ما تجلس عند الحجه حقك وخلي المهمات هذه لي انت قدك طري ماعدنتش حق بهذله قلت له ناهي يا توم كروز يا رجل المهمات المستحيله هيا نرحلنا قال اين عنسير يا يمني ؟ قلت له عنسير نخرج الباص حقك , ضحك وقال ما دام وهو الباص فضروري نخرج شل الابتوب حقه وخرجنا قدحنا فوق السيارة وماشي لا موقع المهمة ما دريت الا ومعتز بيقلي هيا مالك مطنن وساكت اقل شي قلي اين عنسير..! واااو واااا يمني قلت هاااه قلي صباح الخير اين حسك قلت لك الزوجة خربتك قلت له اسمعني يا معتز مش وقت المزاح اشتي منك خدمة قال أأمر قلت له اشتيك تخترق النظام الأمني حق فلة عمنا به خزنة في غرفة السلاح حق عمنا اشتيك تبسر اذا انت عتقدر تخترقها ...
مساكم الله بالخير ...
با اوقف نشر القصة. #يمني بشكل يومي وان شاء الله شا انزلها لكم كلها يوم الخميس الجايي في منشور واحد بدل القطوعه وحريق الدم ...
مع الاحداث اللي بتحصل والقهر الواحد يستحي والله يزيد ينشر او يقول اي شي المهم نسال من الله السلامة للجميع ....
#منيرالنقيب
#يمني
-البارت "22"
وصلت المانيا اليوم الثاني عمنا بدأ يتواصل معي وقال شا ارسلك اسم وصورة شخص انا بنشك انه اصبع من اصابع القبضة، عيوصل اليوم عصر المانيا، قلت له ايوه ومفعل قال فعلو له كمين ويشتو يصفوة واشتيك تنقذة وباقي التفاصيل شا ارسلها لك لتطبيق اللي فعلة معتز على شان محد يراقب، قلت له طيب، للمغرب وانا وزوجتي في احد المطاعم في برلين عمنا رسل لي رساله، دخلت التطبيق وموجود صورة الشخص ومعلومات عنه والبيت اللي عيجلس فيه في برلين، وعمنا قال الغريب ان الرجال دخل المانيا بشكل سري يعني كأنه مش موجود وطرحوة في بيت بسيط بدون مراقبه يمكن قالو له به مهمه او شي وهم با يصفوة الساعة 11 الليل، اشتيك تتحرك للبيت وتجهز نفسك يا يمني، وكمل وشل الرجال للمكان الفلاني، عند شخص يمني وحاول تخرج منه اي معلومات، وفلته وهم با يرجعوه لا عندي لليمن، كملت اتعشي انا وزوجتي ورجعنا للفندق والساعة تسع خرجت من الفندق وسرت للموقع اللي قلي عمنا شليت سلاح وانطلقت امام بيت الرجال ، وبنراقب البيت الساعة 10:56 دقيقة ابسرت سيارة وقفت ونزلو ثلاثه اشخاص ملثمين ومعاهم مسدسات ودخلو بيت الرجال نزلت على طول وهم بيدقدقو الباب اول ما فتح الرجال الباب انا ضربت رصاصه خلف راس الرجال اللي واقف امام الباب وعلى طول ضربت رصاصه في راس الشخص اللي واقف يمين الباب والشخص الثالث ضرب عليا رصاص وكوني في كتفي وانا ضربت عليه اكثر من اربع رصاص في صدره والرجال اول ما ابسر قفل الباب ودخل سريع نبعت زبطت الباب وبندخل الثلاثه اللي صفيتهم والرجال نزل من الدرج وفي يده مسدس وبيقل من انت من انت شقتلك، قلت له لا تقلقش انا جيت انقذك ذلحين ساعدني ودخل الجثث قبل ما يركزو علينا الناس سحبهم معي لا داخل وجابرته بالموضوع كله انهم عيصفوة وهو كان يقل ايوه وانا بنقول ليش قالو اجي بتيه الطريقة وفعلو هذا كله لأول مرة يخلوني افعل كذية لكن انا داري من غريمي وكل هذا بسبب الملف والفلاشة اللي معي، قلت له ذلحين مش وقت هيا نرحلنا وضروري يوصلهم خبر انك ميت، قال هيا، وخبر موتي خليه عليا انا داري كيف افعل ،وخرجت انا وهو وشليته لا بيت اليمني اللي كلمني عليه عمنا، قال طيب وانت من انت ومن قلك تفعل هذا كله؟!!.. قلت له انت عتدري بكل هذا في وقته، قال طيب ما عيرجعني اليمن، قلت خلي هذا علينا، ودخلنا بيت اليمني وعالجني وربط يدي قال الرصاصة دخلت وخرجت من اللحم ما تضررش العصب ولا العظم كملت ورحت لي، وصلت للفندق ودخلت التطبيق وجابرت عمنا بكل شي، قال خلاص بكرة الصبح ترجعو لليمن طوالي ما تتاخرش قلت له حاضر، وزوجتي ابسرت يدي وافتجعت، جلست وجابرتها بكل شي وكانت مطننه قوي ومش مصدقة اي كلمه او ان به عالم كذية وان ابوها واحد من اكبر رجال العالم ذية وقلت لها بس تخلي هذا بيني وبينش انتي زوجتي وكل شي بيني وبينش عيكون واضح وحياتش الان معي انا ولنا حياة تخصنا، فكل شي اقولة لش تمشي بعده، قالت حاضر بس يا يمني اشتي اشتغل معاكم مشتيش اجلس كذية اتفرج وشدي روحي للوطن حقي حبيتها في راسها وقلت لها انتي الاساس وانتي وكل بنت في اليمن تعتبرين العمود الفقري حق بلادنا، وبكرنا الصبح وسافرنا،وبعد ما وصلت اليمن انا وزوجتي كنت ابسرها ام ثانيه لبنتي كانت تحبها قوي وبعد يومين رجعت اكمل عملي مع عمنا شليت التقارير من اخي عن كل شخص دخل لاعند صاحب البقالة وخرج، وقال الغريب يا يمني ان صاحب البقالة ما بيخرجش من البقالة نهائياً، والتقيت بوليد وقال عصام بيجلس يشتغل بالمتر وبيسير عند واحد بيقولو انه بيتاجر في الحشيش ويخرج طريق بيته طوالي، قلت يعني ما ابسرتش بيبيع او يتعاطى قال ماشي حتى قد طلعت معه مشوار واشوف هو بحسه او ماشي لكن طلع صاحي وبكل وعية، وشكله انسان خرج من قذارة وتاب، قلت له شكرا خلاص روح وشرجع اتواصل معك، اتصلت لعصام وقلت له نلتقي في المكان الفلاني، قال حيا حيا اين انت يا رجال قلت يومين وتتصلي وقدلك ما يقارب اسبوعين ولا سمعت منك نخس قلت انشغلت قوي بس لا تقلقش الان تعال للمكان الفلاني، قال ما ينفعش يا اخي به ناس بيراقبوني يشتو يوصلو لزبون حقي باي طريقة قلت له وهذا المطلوب، قال سابر، وصل فوق المتر وانا نزلت الفريم قلت له لا تسلمش عليا خرج لي البضاعة، خرج الكيس من جيبة وقال قدرت ادي نصها والنص الباقي في بيتنا، قلت له تمام ذلحين عنتجابر شوية ونتصايح وشا امد لك فلوس وانت تقل ماشي وترجمها لي من الفريم وانا شرجم البضاعه لك وارحلي خلي اللي بيراقبونا يحسو ان احنا احترشنا، قال تمام يا عمنا وبعدا اين اسير، قلت له شرجع اتصلك، واتصايحنا ورجمت له البضاعة ومشيت واثنين فوق متر اللي كان بيراقبو عصام رجعو يراقبوني انا، مشيت ودخلت كافية، وواحد منهم نزل وجلس في الماسة اللي خلفي وهو لابس ثوب ومستبك، خرجت التلفون وبنقول الووو يا اخي مابش كل اللي حصلته مضروب ومغشوش، مابلا تصبر عليا لما ابسر شخص ثاني، وطرحت التلفون وجالس اشيش
#يمني
-البارت "21"
- جابريني اين انتي يا بنتي
- انا يا ابه في الستين ماشيه طريق حدة وبه اربعه فوق سيارة هيلوكس غمارتين بدأو يعارضو سيارتي وابسرتهم ملثمين ومعاهم سلاح يشتو يقتلوني يا اباه
-خلاص انتي استمري من طريق الستين لما توصلي للجسر حق الرئاسة وعتلاقينا هنيك
- حاضر يا اباه حاضر بس خليك في الخط لا تقفلش
- ما عدقفلش يا بنتي سعليش
هيا يا يمني هيا عيقتلو بنتي عيال الكلب ،وخرجت انا وعمنا سريع فوق السيارة وهو جالس يكلم بنته في التلفون وصلنا لا تحت الجسر حق الرئاسة ومنتظرين اول ما ابسرنا سيارت بنت عمنا عكسنا الخط وبنمشي طريقها اول ما مشيت قطعنا الخط بالسيارة ونزل عمنا على طول بيضرب على الهيلوكس وهو بيصيح بكل صوته كان فوقة ملامح اول مرة ابسرها واول مرة ابسر عمنا ضابح كذية نزلت وبنرمي معه ما ابسرنا الا والسواق لف بالهيلوكس لا فوق الرصيف واقتلبت الهيلوكس قربنا وبنضرب رصاص على الهيلوكس كان قد شكلها ساع المشن وصلنا وقدهم كلهم ميتين ماعدا واحد كان يأن من الوجع وعمي كان يغير القرن حق البندق ويضرب عليهم رصاص ولا رضي يوقف، كنت اسحب عمنا واقلة خلاص قد ماتو يا عمنا هيا نرحلنا وهو جالس يضرب سحبت عمنا بقوة ومسكت البندق من يدة وبنصيح خلاااص يا عمنا هيا نرحلنا قبل ما يجو الناس هيا هيااااا، وما كرهن رجع حسه وقال هاااه هيا هيا، انا طلعت فوق سيارتي وعمنا قال انا شطلع مع البنت يا يمني قلت له تمام، وطلع مع بنته ومشيو وانا بعدهم وصلنا للفلة دخلنا وعمنا بيقول لبنته من ايحين بيراقبوش ومن هم هولا قلدني الله لا احرق كل كلب داخل صنعاء قالت مدري يا اباه خرجت من البيت كان معي مشوار وعلى رجعتي ركزت عليهم، عمنا قال يعني قدهم داريين اين بيتي اللي طارح عائلتي فيه، ضروري انقلكم من البيت ذية وخرج تلفونه يتصل، مسكت يد عمنا وقلت له اهداء يا عمنا لو هم داريين اين البيت انهم دخلو يصفو من في البيت كله ما عيراعوش لما تقضي بنتك مشاويرها، يعلم الله كيف صادفوها وشكلهم يعرفو السيارة ضروري تغير سيارت بنتك، قال ايوة صح، رجعت اقل لبنت عمنا ايش الموضوع اللي كنتي تشتي تكلميني عنه وهي كانت تبسرني وهي متوتره ليش تكلمت قبال ابوها، قالت بما انك تكلمت قبال ابي فما عدبش داعي اننا اخبي اسمع يا اباه انا مريت للفلة وطلعت وسمعتك وانت بتتكلم مع شخص وقتلته يا اباه افتجعت ونزلت ارحلي، قدنت قاتل يا اباه انت ويمني بتقتلو خلق الله بكل تيه البساطة وهذا الدم البارد، قلي من انت يا اباه طول عمرك مخبي شخصيتك واعمالك كلها مبهمه وما عاد بنبسركش في البيت الا راس السنه حسنه ومشغول فوق تلفونك وصلت لا مرحلة اننا بنخاف منك وما عاد بنسطيش اكلمك بشي وقررت اجابر يمني واعرف منه، وعمنا بيسمع بنته وهي بتجابره وهي بتبكي وهو كان مبتسم اول ما كملت كلامها حضنها بقوة وباس راسها وابسر لا عيونها وقال لا تقلقيش يا بنتي مابنقتلش الا من يستاهل الموت الف مرة واقذر ما خلق ربي، انا تغيرت من زمان وما بنخاف الا من الله وكل عملي في رضى الله واساله ان يغفر ذنوبي، ومن يوم ما عرفت يمني دريت ان معي ضهر وشخص اوثق فيه في مالي واهلي، ولذالك يا بنتي يمني طلب يدش ما رئيش؟ اول ما سمعت عمنا قال كذية استحيت وتوترت قوي ما دريت ما افعل خرجت تلفوني وقلدت ان به اتصال وبنتكلم في التلفون وخرجت، شوية وخرج عمنا بعدي قال هيا مالك خرجت يا ابني خلاص قدنت من اليوم ابني ومن اهلي، قلت يا عمنا مش كذية احرجت البنت واحرجتني قال ما يعجبنيش اللف والدوران واحنا ما شيين على سنة الله ورسولة ومابش احلى من البساطه المهم جهز نفسك غدوة العرس تشل زوجتك في الفلة اللي في حدة وذية مفتاحهها شا اجهزها من واللى وما عنفعلش عرس وشغله عنخلي العرس سكته اهلك واهلي وخلاص، مالك واقف وبتبسرني كذية هيا تحرك سير جهز نفسك، قلت طيب وعملنا يا عمنا قال مشو عليك من العمل معك اجازة ثلاثه ايام انا شا اكمل العمل هيا قوم رحلك وانا شا اخرج انا وبنتي وبيننا اتصال، خرجت وانا مطنن وفيني احساس غريب قوي ما قدرتش افهمه ، خرجت بنسوق السيارة وانا بنفكر في مجبر عمنا، طيب كيف عتتزوج يا يمني وتكون عائلة من جديد وانت خايف من هذا الشي يكفيك اللي عانيته عندما ماتت عائلتك قبالك وانت لاحول ولا قوة لك، بس هذه المرة وانت بكل تيه القوة عتقدر تحمي عائلتك؟؟ هل المشكلة في حماية عائلتك يا يمني او في حماية كل عائلة في البلاد تيه، طيب يا يمني هل ضروري انت تحميهم كلهم او تنشر ثقافة ان كل شخص يحمي نفسة وعائلته ويكون لحمة مرر امام الظالم ويكون لين امام المسكين وانا جالس بنفكر سمعت الأذان نزلت الجامع اصلي وبعد الصلاة قام واحد شباب بيشحت وهو بيبكي عن سوء حالة وعدم قدرته على توفير الاكل والشرب لجهاله وصاحب البيت بيهدده انه عيخرجة من البيت اذا ما دفعش المتاخرات هذه الليلة، وكان يتكلم وهو بيبكي كان يبكي لانه وقف يشحت لاول مرة على شان جهاله كان يبكي من الكرامة اللي كسرها على شان يجمع له خمس
#يمني
-البارت"20"
عصام شل الزلط ودخل بيتهم وطلع معي فوق السيارة، وقال اسمعني انت من الدولة او تبع شخص او ايش ما كان هدفك انا معك ومتجمل من معروفك ووقفتك معي اكثر من مرة وهوذا انا معرفش حتى اسمك بس شكلك ابن ناس واعتبرني اخوك الصغير لو تقلي اموت شا اموت لاننا حاسس داخلي ان ما عيجي منك الا كل خير واي شي عنفعله ما عيغضبش الله، قلت له هذا يدل على اصلك بس مشتيش منك تكون مندفع كذيه ومشاعرك تتحكم فيك، وبا تفدي براسك اي شخص يوقف معك في اي موقف لا تكنش تفكر بتيه الطريقة وانتبه تطرح في نفس المصيدة اللي اطرح فيها شعبنا كله بسبب هذا التفكير، ما تتبع احد الا وانت تعرفة وتعرف مبدأه وتكون اهدافة واضحه امامك واذا حسيت انه خرج من الطريق الصح مش انت ملزم تتبعه بالعكس ضروري انك تحاربة لما ينزل من السلطه اللي اكتسبها بسبب ثقتنا ودعمنا، كنت اشوفه بيبسرني وساع اللذي ما وصلش القصد من كلامي رجعت خرجت شريحته وقلت له ركبها في تلفونك يا عصام، قال ليش انا خرجت من هذا السوق وكل الارقام اللي في الشريحه ارقام اللي يبيعو والزباين وكل شخص له علاقة في هذا السوق ولو افتحة عيتصلو لي ناس باقي فوقي لهم زلط حق بضاعة ما قد حاسبتهمش وشدخل في مشاكل، قلت له كم الزلط اللي عليك ولمن؟ قال هاااه عندي 130 الف ريال لفلان هو اللي ماسك تيه المنطقة وبيوزع لنا البضاعة نبيعها في حدود مربعنا قلت له طيب ومن وين بيجيب البضاعه؟ من اللي فوقه؟ قال مشنا داري ومحد يسطى يسأله قلت خلاص ذلحين ركب الشريحة واديلي ارقام الزباين المهمين حققك اللي بيشترو كميات كبيرة وبتحس انهم اغنياء وتتصل لرجال تقله ان الزلط معك عتجي تحاسبة وخرج الشريحة شا اشلها واستخدم تيه الشريحة من الان وشتواصل معك عليها، قال تمام واتصل لرجال وقله شا اجي ادي لك الزلط، وقفل وخرج الشريحه وشليتها منه، وقلت له اسمعني هذه الفترة شديلك انا زلط وعتشتري من الرجال خمسة اضعاف الكمية اللي كنت تشتريها وانا شامر لا عندك اشل البضاعة منك وكل يومين تتصل وتشتري كمية اكبر، عيبدأ يسالك من وين بتدي الزلط ومسرع بتبيع البضاعة، تقلة معي زبون بيشتري الكمية مني كلها عيقلك ادي رقمة او قلي من هو وعيحاول يعرف من ذية الشخص تقلة كل اللي معي رقم صاحب المتر اللي بينفع الزبون اما الزبون مشنا داري ايش اسمه او كم رقمه او من هو عيقلك ادي الرقم حق صاحب المتر، قله ما شديش هذا رزقي وصايحه على اساس انك زاعل انه يشتي يشل الزبون عليك افتهم لك يا عصام، قال ايوة افتهم لي بس هو عيقلب عليا وعيقل ما عيديش لي بضاعة، قلت ايوه وهذا اللي نشتيه وانت احنق وقلة خلاص مشتيش بضاعة عليا وعلى اعدائي وشل نفسك ورحلك، قال بس يا اخي عيعاملني معامله شوعة يدي ناس يفعلو لنا مشاكل في الحارة وما شقدرش عليه، قلت ما عليك هذا كله خلية عليا، وانا شرجع اتواصل معك واقلك ما عنفعل، ذلحين شل تيه سير مكن الرجال الدين اللي فوقك وتيه تشل بها بضاعة، قال ايوه بس بسبب اقتحام البيت من الصعب انهم يفرو بضاعة هذه اليومتين، قلت مش مهم الكميه المهم تغري الرجال بالزلط وتشل الكمية اللي عيوفرها كما كانت، قال تمام قلت له طبعا انا شا اكون اتصلك ما عيطلعش عندك رقم فلا تقلقش ، قال طيب واذا حصل شي واشتي اتواصل معك انا كيف افعل؟ قلت له لا تقلقش انا عيني عليك طول الوقت واذا عيحصل شي ما عتدري الا وانا عندك، الان انزل وافعل اللي قلت لك، قال طيب ايش اسمك يا اخي، قلت له يمني، ابتسم وقال كلنا يمنيين ونزل، وانا شغلت السيارة ومشيت وفاهم ان قصده اننا بنضحك عليه وما رضيت اقله اسمي، اتصلت لا اخي التقيت معه وشليته بالسيارة للبقاله اللي شليت منها علاج، وقلت له لما تكمل الموضوع اللي قلت لك اشتيك ترجع تراقب البقالة تيه وتبسر صاحبها لما يروح اين بيته واي شخص ينزل لا عندة وتشك فيه اشتيك تراقبة، قال تمام، قلت له اشتري لك متر او سيارة وراقب يا اخي بلال قال ششتري متر احسن من السيارة المتر محد يركز عليه قلت قدنت اخبر، نزلت اخي وقلت شا اسير لا عند عمنا نبسر ما عنفعل، ما دريت الا وبنت عمنا بتتصلي ...
- الوووو
- جاوبت وهي متوترة وبتتكلم سريع هاه يا يمني كيف احلك ،
- الحمد لله
- اسمعني اشتي اقابلك ضروري يا يمني بس بدون ما يعرف ابي رجائاً
- قلت ليش بدون ما يعرف ابوش انا مقدرش افعل شي بدون ما يعرف عمنا فما بالش لما اسير اقابل بنته
- قالت انت عتفهم لما نلتقي ما ينفعش ابي يعرف واذا مصمم ابي يعرف فخلاص انسي الموضوع
- قلت لها خير .. انا شرجع ارد لش وقت ثاني الان انا مشغول قوي او بالاصح افكر وارد لش خبر
- قالت تمام
قفلت وانا بنفكر ماهو الخبر اللي تشتيه مني بنت عمنا البنت ما يعجبهاش اللف والدوران ومتعلقة بابوها وما تخبيش اي شي عنه فما هو الموضوع هذا، طيب اجابر عمنا، عمنا عيقلي سير قابلها وابسر ماهو الموضوع وجيت تقلي، او عيتصلها ويقلها مابه، ووقتها البنت ما عاد عتجابرنيش بالموضوع، ولا ما عليك يا يمني جابر
#يمني
- البارت "19" ...
وبدأنا الاشتباك مع افراد طاقم السفينه قارب جى من الجهه الثانيه لسفينه والقارب اللي انا فوقة واحد مننا اطلق ار بي جي اطرحت على حافة سطح السفينه وطرح جهاز ساع طيارة التصوير اللي بيستخدموها في الاعراس طرحها في البحر ومشيت قرحت اثنين الغام مائية وقربنا من السفينه وطلعنا كان فيها ما يقارب 11 جندي مسلحين اول ما طلعنا تفاجأت ان السفينه فعلا كانت محمله اسلحة ومدرعات وصواريخ اشتبكنا مع الجنود وجريت انا و"أيهم" لا غرفة القيادة حق السفينه وصلنا والباب مقفل طرحنا قنبلة على الباب وانفجر الباب ودخلنا كان به اربعه اشخاص من افراد طاقم السفينه والقبطان وشخص لابس بدلة وجنبه اثنين مسلحين بيحموه على طول اشتبكنا وصفيينا المسلحين و"ايهم" نبع يقيد افراد طاقم السفينه والقبطان قبل ما يرجع الاتصال ويبلغو على هجومنا قربت لا عند الشخص اللي لابس بدلة وبنكلمه من انت ؟ بس ما كانش يرد عليا وكان يتكلم بلغة اجنبيه مفتهمليش شي من كلامه ، بس من ملامحة كان شكله بيهدد والقبطان كان يتكلم عربي مكسر كان يقول احنا معانا حصانه انتو بترتكبو اكبر غلط , قلت له الحصانه مجرد درع غبي اخترعتوه على شان تشرعو كل اعمالكم القذرة ، اتصلت لعمنا وقلت له يا عمنا سيطرنا على السفينه قال خلاص خلال نص ساعه با توصلكم الأسلحة وعبو السفينه وعنبلغ ان احنا اكتشفنا أسلحة على السفينه قلت له لا.. لا يا عمنا مابش داعي أصلا السفينه محمله سلاح فعلا قال ما بتقل يا يمني كيف محمله سلاح ؟ قلت هذا اللي لقيناه يا عمنا قال خلاص دور شحنة الادوية واتلفها يا يمني مثل ما اتفقنا وانا شا ابلغ بعد نص ساعة قلت له طيب بس معي طرد وشكله مهم، وكان في السفينه عسكر بسلاحهم وتم تصفيتهم ما باقي الا افراد طاقم السفينه والقبطان، قال الجثث كلها ترجموها للبحر تخلو بس اربع جثث عسكر تخلسوهم الميري حقهم ولبسوهم لبس عادي وتخلصو من أي شي يبين انهم عساكر اجنبية والطرد اذا هو مهم قلت لي ؟ قلت ايوه يا عمنا مهم قوي قال خلاص عتوصل لشاطئ عتلاقي سيارة تبع اليو ان مصفحة ومعكسة تطلع فوقها انت والطرد وتتوكل وعيكون في بلاغ لكل نقطة انهم يخلوك تمشي بدون تفتيش وحتى بدون ما توقف وعتوصل لا اب عتلاقي في المنطقة الفلانية شخص معة سيارة اسعاف تسلم له السيارة المصفحة وطلع الطرد فوق الإسعاف وتتوكل على طول لا صنعاء قلت له حاضر يا عمنا وافراد طاقم السفينة ما نفعل بهم؟ قال كتفوهم وخلوهم على سطح السفينه وتوكلو قلت له تم , مشيت بندور في السفينه ولقيت شحنة الادوية شليت عينه من العلاج والباقي خرجت القنبلتين ورجمتهن للوسط انفجرين وطلع دخان اسود وكانت ريحته قوية مع اننا كنت لابس قناع ضد الادخنه بس ريحته وصلت لا انفي قلت للجماعة اللي معي بالاوامر حق عمنا وانا انتظرت دقيقتين وفتحت الباب ابسر الادوية، كنت افتح الكرتون وفعلا اُتلف العلاج وكان يضهر عليه مادة سوداء مترسبه وكأن قدلة فترة كبيرة منتهى ومتخزن بطريقة سيئة نزلنا فوق القوارب ومعي الرجال الأجنبي وتوكلنا طلعت فوق السيارة وضربت ابرة مخدرة لرجال لما فقد الوعي واتوكلت وفي اب غيرت السيارة بسيارة الإسعاف اول ما وصلت صنعاء لقيت عمنا منتظر لي في دار سلم نزلت من فوق الإسعاف وطلعنا الرجال فوق سيارة عمنا وشخص جى شل الإسعاف ورحلة واحنا توكلنا للفلة اول ما وصلنا قلي عمنا نزل الرجال للغرفه في البدروم الغرفة الطارفية قلت له حاضر نزلته وطلعت عند عمنا وبنتكلم في موضوع العملية ومعتز كان جالس مخزن مفتهن وقده غليظ كأنه اغترب بانت الفهنه على وجهه قلت كيفنت يا معتز والله ومفتهن وبتطعمهن قال لا تجابرنيش مشنا فاضي تحمد الله مخزن الان عندك شوية وادخل غرفتي معي عمل ضحكنا شوية واتجابرنا قال عمنا انزل يا يمني طلع لي الحيوان اللي بالغرفة اللي تحت من يوم ما سرت للان ما ادينالش حتى وطلة ماء قلت له طيب نزلت فتحت الباب وهو راقد شليته وطلعته ,قله عمنا ذلحين ما عتقليش ما عاد باقي من قذارة تحت راسك ولا مع من بتتعامل قال هاه .. يا عمنا والله ما به شي وقد جابرتك بكل اللي اعرفه , مادريت الا وعمنا خرج مسدسه وطرحها وسط راسه قمت على طول وقلت مالك يا عمنا ليش تقتله؟!!! ما يسبرش مش كل شي قتل..!!! , قال لا تقلقش يا يمني انا فعلت له اخر فرصة يعترف بس الحيوان حيوان والله يبارك في معتز قد طلع لي كل ما احتاجة من تلفون التافه هذا , قلت بس يا عمنا معه عائلة , قال يا يمني سبق وقلت لك مابش معة عائلة هذا خبزي والعجين وبيدعي بهذا الشي على شان يستعطفنا , قلت له سابر يا عمنا , ذلحين انا شستأذنك اروح ابسر اهلي وبعدا عنتواصل قال اجلس شوية قلت ماشي خليني ارحلي بس , قال تمام وقد طرحت لك زلط فوق السيارة خليها حاجتك واعتبرها هدية مني والف شكر على وجودك يا ابني يمني , قلت تسلم يا عمنا بس ما بنفعلش كل هذا على شان يقع لي هدية بنفعل كذية على شان اليمن مشتيش احد يوجعها اشتي يرجع لها سيادتها وعزها وكرمتها قال كل شي في وقته يا يمني ودام وبه
#يمني
-البارت "18"
قلت له هنية لك يا معتز عادنت خرجت من الموت وحالتك حالة وجالس بتهم الباص؟ !! قال مفعل ما معي الا الباص ذية يا يمني، ذلحين من صدق عتقدرو تخرجو باصي او ماشي؟ !! ورجعنا كلنا بنضحك وصلنا للفلة وطلعنا لطيرمانه، وعمنا قال لرجال يا قاسم مامعك في بيت فلان وكم لك بتتواصل معاهم ومن سمح لك تمر للجبل قلي كم قد اللي يعرفو منطقة الجبل يا نذل، قال والله محد يعرف شي يا عمنا انا وصلي تهديد عيقتلو عائلتي كلها وطلبو مني اننا اتواصل مع ناس خارج البلاد ونبلغ على الشحنة حق الادوية حقك، عمنا قلة وانت على طول فعلت اللي قالوه ما قطعش فيك العيش والملح واننا رفعت من شأنك وخارجتك من الموت وقلت عتفديني بكل غالي معك، وفي الاخير كذيه تجازيني ،قال انا اسف يا عمنا اقتلني افعل اللي عيطيب نفسك بس انا معذور هددوني بعيالي، قله افتجعت على عيالك وبعت عيال الشعب كلهم صح ما همكش الاطفال اللي عيموتو بسبب خوفك وانانيتك يا حقير، قال هاه ايش من اطفال انا مابش عندي اي معلومات يا عمنا كل اللي وصلي اننا استخدم سلطتي وامنع وصول شحنة الادوية تيه، وما عرفت انها تبعك يا عمنا الا من فلان اللي كنت في بيته اليوم، وانا قلت له طيب وما قصة الخفجي والكراتين اللي شليتهن؟ !!! قال هااااه .. وعمنا قال انا شرجع اجابرك يا يمني هذا حقير ودمة مخلوط بغساول واي شي خبيث في البلاد تيه عتلاقيه له يد فيها، قلت طيب كيف يا عمنا ومعه جهال وعائلة، عمنا ضحك وقال صدقت ان العينه هذا يكون معه جهال او عائلة، مش بعيد يكون هو من انهاء عائلته وهذا كله لاجل المال وعمرة ما يشبع ساع النار هل من مزيد، العالم هذا احقر مما تتخيل يا يمني ذلحين نزل ابوه للغرفة الحمراء قبل ما اقتل ابوة، نزلته وطلعت لا عند عمنا وانا في راسي الف سؤال، طلعت ومعتز جالس جنب الثلاجه قد شرب العصير كله والكيك ، قلت يا عمنا قلي ليش زعلت من قاسم حين سار بيت فلان وافتجعت اذا قل لحد عن الجبل، مع ان ثلاث سيارات مصفحات خرجين من نفس البيت وسارين للجبل، قال هولاك تبعي ولهم هدف معين ووجودهم هنيك بعلمي، وبسلطتي، لكن النذل هذا ايش سار به وكيف عرفو ان معي شحنة ادوية اكيد عرفو خطتنا يا يمني ذلحين كيف عنفعل بشحنة اللقاحات اللي عتدخل اليمن باقي لها يومين وتوصل الميناء، ومعتز قام قال ادولي رقم السفينه واسمها واي معلومه معاكم عن الشحنة اللي بتتكلمو عليها، اشتي جهاز كذا وكذا عمنا قال اكتب كل شي تحتاجه يا معتز وانا شا اوفرة لك خلال نص ساعة، الان يا يمني انت تتحرك تسافر عتوصل عتتلتقي بشخص عيوفر لك قاربين عسكرية ومعة رجال عيجلسو معك وانا شا اوفر اسلحة ومعدات عسكرية انتو تهجمو على السفينه وتسيطرو عليها وتخفو قل طاقم السفينه وانا شا اوفر من يحمل السفينه بالمعدات العسكرية وعيتم تبليغ الدولة ان السفينة محمله سلاح مشي محملة علاج وكمان به مادة دخانيه في القنابل هذه يا يمني ترجمهن وسط العلاج عيتلف العلاج على طول ويخليه مادة سوداء معفنه، مابش امامنا حل الا نفعل كذيه، صح عيقع اضطرابت بين اصابع القبضة المسيطرة على اليمن، بس لا تقلق احنا عملنا نهداء الوضع وان العملية حصلت بسوء فهم على شان ما يشكوش ان احنا عرفنا بموضوع اللقاح، قلت له تم يا عمنا، قلت له ومعتز عيروح يا عمنا، قال ماشي معتز معة غرفة عنطرح فيها كل جهاز يحتاجه معتز عينفعنا قوي ما كنتش متوقع انه بكل هذه الخبرة والذكاء، نزلت خلست البدلة وطرحت السلاح، ولبست وعمنا نزل بعدي طرح لي فلوس وجاب لي تلفون قال عنتواصل انا وانت بذية التلفون ورقم الرجال اللي عتلتقي معه موجود في التلفون اسمه أيهم، وشل تيه البطاقة معك اذا وقفتك اي نقطة تفتيش اعرض عليهم تيه البطاقة وبا يمشوك على طول قلت تمام يا عمنا، خرجت واتصلت لا اخي
- الوو اين انت يا بلال
- انا في البيت يا اخي قلي ما فعلت من معتز؟
- لا تقلقش يا اخي معتز معي انا شا اروح واجابرك ....
روحت ابسرت بنتي وجدتي واطمنت عليهم وطرحت زلط عند اخي وقلت له يا بلال تجلس في البيت ما تخرجش وانتبه بنتي في ذمتك قال ما يحتاج توصيني يا اخي انت وبنتك كل اهلي وتعتبر بنتي سير ابسر عملك ولا تقلق، سافرت عمنا اتصلي قال اوصل للفندق الفلاني وقلهم اسمك ابو صلاح، قد حجزت لك جناح وخلي الرجال يجي يقابلك هنيك واطمن ما عيطلبوش اوراق هويتك في الفندق وعيكون لك معاملة خاصة، وصلت واتصلت لرجال وجى للفندق وقررنا نتحرك الساعة 1:00 الليل وعنوصل لسفينه الساعة 2:21 بعد نص الليل، طلعنا ثمانية اشخاص مسلحين فوق قاربين سريعة، وتحركنا،وقد معانا معلومات وصلت من معتز عن مكان السفينة بالضبط وباقي معلومات السفينه تبع من ومن وين جايية وغيرها من المعلومات وكمان طلعت غير مصرحة ولا لها وجود في كشوفات الميناء يعني كانت عتدخل بشكل خفي وتم الكارثة بدون ما نعرف من غريمنا، وفوق هذا كله سهولة امن بلادنا ووو ......
#يمني
_البارت "17"
(القبضة)
جالس مطنن فوق تلفوني وعمنا بيقل مالك يا يمني ما تجاوب التلفون مالك مطنن من بيتصلك ؟ قلت له هاااه مابلا اخي بيتصلي قال جاوبه ،
- الووووو يا بلال خير مالك اتصلت لي
- يا يمني اسمعني جلست اراقب البيت وخرجين ثلاث سيارات مصفحات فقمت الحقهم واراقبهم وصلو لا بيت تحت جبل ودخلو بس الطريق مقطوعه وفيها عسكر ما قدرتش ادخل وجلست بعيد منتظر احد يخرج ،
-ايوة وبعدين ما حصل ماهو اللي خلاك تتصلي ؟؟
- قال شوية وصلت السياره المرسيدس البيضاء ودخلت والغريب اننا ابسرت الباص حق صاحبك معتز كان بيخطي بعدها وكان قفاه سيارة بتراقب معتز اول ما وقف نزلو من فوق السيارة اربعه بسلاحهم وشلو معتز بالباص ودخلوه البيت هذا اللي عند الجبل ، قلي يا يمني ما جاب بمعتز لا هنيه
- ما بتقل يا بلال شلو معتز ؟؟
- ايوة ايوة يا يمني شلوه كان بيراقبوه ومشو داري وخلوه يراقب صاحب السيارة لما وصلوه لا هنيه وشلوه
- خير ..خير يا بلال قلي اين البقعة هذه بالضبط وانت رحلك من هنيك سريع وانتبه اذا احد بيراقبك رحلك الان بتسمعني
- طيب شا ارحلي بس ما عنفعل على سب معتز يا اخي ؟
- انت رحلك وخلي الباقي عليا المهم تنتبه واذا حسيت احد بيراقبك او شي اتصلي على طول
- تمام يا اخي ...خاطرك
قفلت المكالمه وعمنا بيقل مالك يا يمني ما وقع بصاحبك معتز او هو مريض ولا شي ؟ قلت له اسمعني يا عمنا انا خليت اخي يراقب الرجال اللي شليت منه الزلط قال ايوه وبعدين ،قلت جو ناس شلوه بالغصب في سيارة جي كلاس سوداء واخي لحق بعدهم ودخلو بيت فلان ،عرفته ؟؟ قال ايوه عرفته كمل قلت وبعدا خرج صاحب مرسيدس بيضاء وسار للخفجي وشل كراتين ورجع لتحرير عند العماير والمخازن حق الصيدليات قال ايوه قلت وبعدين اتصلت لمعتز يراقبه وسار بعده للمنطقه الفلانيه بيت عند جبل وعليه حراسه وعسكر وشلو معتز ، ذلحين ما عنفعل يا عمنا قال انت متاكد ان صاحب المرسيدس خرج من بيت فلان وسار للخفجي قلت له ايوة متاكد انا كنت اراقبه قال اول شي انت بتفكر بطريقة ثانيه خارج الصندوق وعجبتني قوي ويعني فعلت نفس الحركة لما دريت اين كان ابن المسؤل ..!! قلت له ايوة بس مش وقت المجبر هذا يا عمنا صاحبي مسكوة كيف عنفعل قبل ما يقتلوه شا موت قهر انا اللي ودفت به سنب وقال انتبه تفكر بتيه الطريقة احنا في طريق شوعة قوي وافعل حساب لكل شي واي شخص تعرفه يمكن يموت في لحظات اذا تحسرت فانت ضعيف ومشنت مناسب لطريق تيه هيا قوم يا يمني نسير نخرج معتز ، قلت كيف عنخرجه والبيت فيه حراسة مشدده وعسكر من الدولة قال بنقلك هيا وخلي الباقي عليا انت ذلحين فعلت لي خدمة بدون قصد وخدمة كبيرة قوي ، نزلت انا وعمنا وطلعنا فوق السيارة وانا مستغرب ايش الخدمة اللي فعلت لعمنا ما قصدة ، ابسرت عمنا قلت له عتجي كذيه طيب انزل غير واتسلح يا عمنا قال امشي يا يمني وما عليك ، مشيت بالسيارة وعمنا اتصل وقال خلو الظرف على ماهو محد يفتحه وصاحب الظرف ينتظر لا يخرجش وقفل ، ابسرني وقال طيب يا يمني ليش قررت تفعل كذية وبدون ما تبلغني ، قلت له يا عمنا قلت شفعل كذية واراقب كل شخص نتعامل معه يمكن اوصل لاحد اصابع القبضة ، قال بصراحة فاجأتني وفعلا انت وصلت لاحد اصابع القبضة ، وصلنا للمنطقة ووقفت السيارة وقلت يا عمنا كيف عندخل ونتجاوز العسكر والصبيات تيه بكلها ضروري نخطط ، ابتسم وقال امشي بس لا امام نقطة الحراسة ووقف وخلي الباقي عليا والبس قناعك مشتيش احد يتعرف عليك ، قلت حاضر مشيت وانا مستغرب وماسك سلاحي ،عمنا قال اطرح السلاح يا يمني ، اول ما وصلت العسكر وقفو وقفت السيارة وعمنا نزل الفريم اول ما ابسروة تممو وفتحو الطريق وانا مستغرب مشينا ما يقارب اربع مية متر وصلنا لا تحت الجبل وبه صبيات كبار تحس ان ما بش طريق وعمنا بيقل امشي وكل ما امشي ابسر عسكر موزعين ملان المنطقة وحراسة مشدده مشينا بعد الصبيات وبه نفق تحت الجبل دخلنا بالسيارة شوية وبه قبالنا بوابة حديد كبيرة وكيمرات عرض الجدار من اليمين والشمال وقفت امام البوابه وعمنا فتح البوابه بتلفونه لما طار عقلي ودخلنا وبه صااله كبيرة قوي وبه غرف من زجاج وسلاح وصواريخ وقوارب كأننا دخلت منطقة عسكرية اجنبيه سريه . وماشي وانا مطنن ما قدرت حتى اسال عمنا ماهو هذا كله وكيف ؟!!!! دخلنا لا نهاية الصاله والنفق فيه عدة اتجاهات قال لف يمين ، وانتبه تتكلم مشتيش حتى يتعرفو على صوتك وصلنا لا مكان قال وقف وقفت ونزلت انا وعمنا وبه سته عسكر جريو لا جنب عمنا وبيمشو بعدنا دخلنا من غرفة ونخرج لا غرفه وفي كل غرفة ندخلها يوقفو اثنين عسكر عند بابها يحرسو وصلنا اخر غرفة وما عاد خلفنا الا اثنين عسكر أشر لهم عمنا يوقفو وصلنا لا امام الباب وباب الغرفة افتتح على طول ، وصلنا والغرفة مفروشة مجلس عربي استغربت وبنجابر نفسي كل تيه الحراسه على سب مجلس عربي ، عمنا قال اجلس جلست وهو جلس ومسك جهاز افتتحت الستاير اللي على الجدار وبنبسر
#يمني
-البارت "16"
(القبضة)
بنتشاقر من الطاقة وهم بيقولو لعمنا مابش داعي للمراوغة ابسرنا بالكيمرة سيارتك لما وقفت جنب الباب وشخص مقنع شل الرجال مع ابن المسؤل انت غريمنا تتبعنا السيارة ومشيت لا جنب بيتك، وعمنا مبتسم وبيرد بكل برود قال وما يثبت لكم ان ذيك بيتي؟ مابش معي غير البيت اللي شليتوني من قبالة ذلحين بدون كثر هدار تشتو تقتلوني اقتلوني ولا تطولو في الموضوع وهو بيجابرهم عمنا ابسرني من خلف الطاقة حق الغرفة وغمز لي، واحد منهم قال اكيد عنقتلك ساع الكلب وما عنقبركش عنرجمك في الازرقين بس منتظر يوصلني الامر من اخو المقتول، عمنا قال بما ان مابش فيكم رجال يقتلني ومنتظرين اوامر اسيادكم هيا واحد منكم يقوم يوصلني للحمام، والرجال رد وقال يا سعد وصله للحمام اللغجه هذه ما عاد اشتيش ابسرة قبالي انا شقتل ابوه انا داري، وخرج عمنا وخلفة سعد وانا منتظر خلف الباب اول ما وصلو طرحت المسدس في راس سعد وقتلته ودخلت على طول صفيت الاثنين اللي داخل ورجمت لعمنا مسدس وقلت له سيارتنا خارج هيا نرحلنا قال كيف دريت اين انا يا يمني قلي كيف، قلت مش وقت يا عمنا ذلحين هيا نرحلنا خرجنا من الهنجر للحوش وعمنا ابسر الدينه وفوقها دبة شل الدبه وفتح الخزان حق الديزل وعباهاه ورش في الهنجر وحرق الهنجر كله قال ذلحين هيا نرحلنا يا يمني، طلعنا فوق السيارة ومشينا من جنب القاطرة اللي مجنبه عند باب الهنجر وهي محمله نفط وعمنا خرج البندق من فريم السيارة وضرب نار لما فجر القاطرة وسط الشارع وقال انطلق يا يمني سررريع سررريع، وهربنا من هنيك وقد عمنا حرق الدنيا كلها بعده قلت له لين اوصلك يا عمنا للفله او بيتك قال وصلني لا بيتي اطرحني وانت سير انتظرني في الفلة قلت له سابر يا عمنا، اول ما نزل عمنا قلت له هاه امسك تلفونك يا عمنا قال يعني عرفت اين انا بسبب تلفوني انا ما طرحته الا وانا راكن ما معي، مشيت من عند عمنا واخي فعلي رساله قال لو انت وحدك اتصلي ضروري اتصلت له قلت هيا ما فعلت يا بلال ، خير طمني؟ قال جلست ما يقارب ساعة وانا بنراقب الرجال ولا تحرك ما دريت الا بسيارة جي كلاس سودا بدون رقم معكس كلها وقفت امام الرجال ونزلو ثلاثه اشخاص وشلو الرجال بالغصب ومشيو، قلت ايوة وانت ما فعلت قال شغلت المتر ومشيت بعدهم وصلو الرجال للمكان الفلاني في حدة ودخلو فله وانا الان منتظر امام الفله ومحد قد خرج للان يا يمني، قلت له خلاص انتظرني عندك وانا شا اجي لاعندك اذا احد خرج او دخل اتصلي يا بلال قال تمام، وصلت وبلال جالس فوق المتر وبيراقب وقفت بعيد منه واتصلت له قلت يا بلال اذا احد خرج انا شلحقة وانت اجلس راقب وتتصلي على كل شخص يدخل ويخرج قال حاضر يا اخي ولا يهمك ، افتتحت البوابه وخرج واحد فوق سيارة مرسديس بيضاء شغلت سيارتي ولحقت بعدة ودخل في منطقة الخفجي، استغربت الحي هذا كل الناس اللي فيه فقراء ويرحمو الله وصل ونزل من السيارة وبعد خمس دقايق رجع ومعة اثنين اثيوبيين محملين كراتين طرحو الكراتين فوق السيارة ومشيو والرجال طلع فوق المرسديس ورحلة لحقته لتحرير دخل مكان الصيدليات وجنب السيارة ونزل جلست 15 دقيقه منتظر احد عينزل او يحملو الكراتين بس محد نزل، ما دريت الا وعمنا بيتصلي قال اين انت يا يمني انا في الفلة تعال لا عندي سريع، اتصلت لمعتز وقلت له يجي لتحرير وصل قلت له اشتيك تجلس هنيه تراقب صاحب المرسديس ذيه لما ينزل وتراقب كل تحركاته قال طيب قاتي في البيت يا يمني والباص حقي ما عدبش فيه بترول خليتني اجي مستعجل بدون ما اجهز نفسي قلت له ولا تقلق تيه زلط سير عبي بترول وشل قات وكل حاجتك وجي هنيه بس سريع شا اراعي لك لما ترجع وسار ورجع قلي ذلحين قلي ما هو هذا كله شغل العصابات والمراقبات يا يمني ؟!! قلت له خلاص غدوة شا اجابرك بكل شي ذلحين افعل اللي قلت لك، قال ولا يهمك، شغلت سيارتي ومشيت وصلت لا عند عمنا وهو في الفله طلعت لطيرمانه قلي من هو اللي دخلته بيتي يا يمني وفتح لي تصوير الكيمرات وانا ومعتز في الطيرمانه قلت له ذلحين اديتني لا هنيه سريع على سب ذيه الموضوع ومالك فلت اهلك لا عاد يقتحمو بيتك من جديد قال قد خرجتهم من البيت ذيك وما اديتكش على سب هذا الموضوع، دعيتك اشتي اقلك ان صاحبنا اللي عيدي الشحنه حصلت معه مشاكل وعرقلة وبالرغم ان البضاعه مسجله ادوات مطبخ بس تم تفتيشها في الميناء حقهم وتم حجزها، ذلحين كيف عنفعل وكيف عنبدل علاج اللقاح حق شلل الاطفال قلت له طيب وبالنسبه لشوالة الزلط انا خبيتها في الجباء ي عمنا، قال اسمعني انا داري ان اللي دخلته بيتي هو صاحبك معتز قلي انت واثق فيه قلت له يا عمنا مشو داري بيت من هو ذية ومشو داري بشي يخصك للان ما كلمته شي كل الحكايه اننا خليته يفتح تلفونك ويتبع اخر رقم اتواصل معك، قال يعني معتز عبقري لتيه الدرجة ويفهم في البرمجه؟!! قلت يا عمنا معتز يعتبر بحر في هذا المجال واتوقع منه اي شي قال
#يمني
-البارت "14"
(القبضة)
فاهم خطورة الكلام اللي بنقوله لك يايمني لاعتقراه في كتاب ولاعتشوفه في مسلسل ولا فلم لان هذه حقيقه وجدت على شان محد يعرفها كان من اول يُعرف من هو المسيطر ويتم القضاء عليه باي شكل من الاشكال فتم تغيير الفكره هذه واتبعو فكره محد يعرف الزعيم ومن يتراس العالم والاعمق من هذا كله اي واحد يخلوه زعيم يخلقو له منافس على شان يجلس مشغول في نفس الدائره ومايخرجش منها التجار لهم منافسين ورئيس الدولة له احزاب والاحزاب تنافس وماتعرفش السبب وبعد مايسيطر الحزب يرجع اخس من الحزب السابق زعيم العصابات يكون له منافسين في نفس المجال وكل شخص يقتل الثاني ويقوم باضعافه ومحد يعرف السبب المهم انهم يجلسو على نفس الموال ونفس الدائرة وانا وصلت يايمني لمرحله اننا ضقت اشتي ادرا من بيدير هذا كله فقررت اننا انزل من سلطتي واتنكر شويه برجل عادي صاحب مال وجاهه وسلطه واحل مشاكل هذا وانفي هذا واطلع هذا وانزل هذا ، منتظر لراس الكبير اللي عيدور بعدي انا الان دخلت تحت عالم اصبع العصابات وشجلس انغبش فيه الى ان يثور زعيمها ويفصح عن نفسه المهم من الان انت عتكون احد اصابع القبضه بدلي وانا شاكبرك شويه شويه من تحت لافوق على شان تعرف كل شي بالتفصيل حالياً يايمني معانا مهمه وضروري ننفذها المهمه يايمني خطيره قوي، طيب ياعمنا اسمعني خليني استوعب الكلام اللي قلته لي بالاول الان احنا نعتبر تحت السلم وانت نزلت من راس السلم لاتحت على شان تقدر تتمكن، يعني وانت بالسلطه هذه كلها ماكنتش تقدر تفعل شي قال هو هذا يايمني مهما كانت سلطتك تحس انك مقيد وانت تبعهم ماتقدر تفعل شي واذا حد تمرد يعرفو كيف ينهوه حتى لوكان رئيس دوله وقد حصلت كثير على ما اظن وحتى لوكان صعلوك صغير او زعيم عصابه كل شي مسسطيرين عليه ويخافو من الصغير قبل الكبير لان الكبير بيكونو ملمين عليه ويعرفو يضربوه من اي مكان يحبو اما الصغير مايعرفو عنه الا القليل والصغير مايهمش
اذا حصل ضربة وسقط، يعني من بالمختصر يا يمني كل ما كبرت ثروتك وسلطتك كل ما زاد خوفك ويسهل عليهم تدميرك ، انت الان قتلت شخصين مهمين في ذية العالم انتبه تتحسر عليهم او يأنبك ضميرك لان كل شخص عنلاقيه في طريقنا ذية يستاهل يموت الف مرة لانهم قتله ورضو ياكلو من ضهور المساكين ، المهم نرجع لموضوعنا معانا مهمه خطيرة يا يمني تعرف عقايقر التحصين حق الاطفال ؟ قلت له ايوه اعرف علاج التحصين يا عمنا ، ماله؟ قال به شحنه وصلت لاطفال اليمن بالتعاون مع دولة عربية للاسف الشحنه هذه كلها مضروبه وفيها فيروس خامل بعد ما يحقنو الطفل ب15 سنه يشتغل الفيروس ويتحول لا مرض قاتل مابش له علاج ويمكن يمسح ثلثين الشعب يا يمني، قلت له ما بتقل يا عمنا معقولة هذا المجبر بدل ما يحصنو الطفل من الامراض يحقنوة فيروس قاتل، ماهو الحقد هذا كله علينا وليش بيفعلو معانا كذية اشتي افهم ما كفاهمش الدمار والخراب هذا بكله؟ !!!! قال لا تزعلش منهم يا يمني هم بيقومو بعملهم ازعل مننا احنا، طبعا صعب ينفذو هذه المهمه في اي بلاد ثانيه لكن في بلادنا سهل جدا ، يخزنو بشوية قات وحق ابن هادي لرقابه حقنا وبا تمر الشحنه بدون فحص جودة او حتى يبسرو اذا العلاج مناسب او لا، يعني مثل بعض المبيدات السامه اللي بتستخدم في القات مسموح باستخدامها عندنا مع انها محظورة عالميا، فهمت يا يمني قصدي، قلت ايوة فهمت طيب ذلحين احنا ما عنفعل وكيف عنمنع تيه الكارثة قال نقدر ندمر السفينه اللي محمله الشحنه ونقدر ندمر الشحنه في المينا ونقدر ندمرها حتى وهي محملة في البر، بس ما نشتيش ندمرها او يعرفو ان احنا دمرناها، احنا عنبين لهم ان خطتهم نجحت على اكمل وجه وعنقوم بتغيير العلاج بدون علم الدولة انا قد طلبت من معاريف نفس العلاج من بلاد عربية وعتوصلني الشحنه بعد وصول شحنتهم بيوم وعنقوم بتغييرها واتلاف السم حقهم، مهماتنا كلها عتكون خفيه بدون ما يعرفو ان به شخص بيحارب خططهم او يفشلها المطلوب منك يا يمني انك تعرف كيف تدخل لا مخازن فحص الجودة والرقابة الطبية وفي المخازن عيتم تغيير البضاعة مثل ما اتفقنا ا،لان تتحرك للمكان الفلاني عتلاقي شخص تقلة( انا طرف من الاطراف ) عيديلك ثنتين شنطات فلوس تشلها وترجع لا عندي، قلت له تمام وصلت للمكان ولقيت شخص بسيط بملابس بسيطه وكأنه شاقي وجالس على الرصيف ومعة شوايل صحات ماء فاضيه وقماقم ما صدقتش ان هذا هو الشخص المقصود بس في نفس الوقت ذكرت الشيبه حق البقالة اللي شليت منه العلاج وقبل ما اوصل لا عندة اتصلت لا اخي يلحقني وقلت له الشخص اللي شا اقابله اشتيك تجلس تراقبة وتعرف اين عيسير وكل تحركاته ومكان سكنه. ....
يتبع....
#يمني
#منيرالنقيب
#في_بيتي5
#يمني2 ... البارت الثالث...
قلت الرساله في جميع الشاشات يا بلال ؟
_ايوه يا اخي ذلحين مفعل ...
_صور لي الشاشه ورسلها سريع وكملو نقل كل شي في الغرفة تيه للبيت السري حقنا يا اخي...
_حاضر من عيني ...
انهيت المكالمه وجالس افكر في قصة الرسايل هذه اللي بتطلع في كل مكان اسيرة طيب من هو هذا اللي بيخترق كل الاجهزة بالطريقة الغريبه تيه ، ما دريت الا ووصلتني رساله من اخي بلال ،جيت ابسر الصورة اللي رسلها واستغربت رسلي صورة الشاشه وهي طافيه مابش فيها الرساله قمت على طول اتصلت له ...
_ الو بلال .. ايش الصورة اللي رسلت الشاشه طافيه ومابش رساله ؟
_ ايوه ..ايوه يا اخي من اول بنصور الشاشه وعاد الرساله مكتوبه فيها للان بس الغريب اننا كل ما اصورها ما تطلعش الرساله في الشاشه حاولت اصور فيديو بس نفس الحكايه فقلت ارسلك الصورة تبسر ..
_ كيف يا بلال ما بتطلعش ؟؟ طيب خير انت قفل وكمل عملك وبعدا عنتواصل ...
ايوه هيا ماهو الخبر يا يمني كيف عتفعل ، حتى لو سالت معتز انا متاكد ان هذا الشي فوق قدراته وخبرته ، ماشي ..ماشي ، معتز طحطوح واتوقع منه كل شي ، شليت تلفوني واتصلت لمعتز ...
_ هاه ..معتز ، كيف حالك
_ حياا.. نحمد الله ، مالك ما بتجاوبش على اتصالات يا يمني ، قد جى عمنا لا عندي بيقلي انه بيتصلك وما بتردش فقلت له خير شبسر وقمت اتصلك ، ايوه قلي مابه ...
_ يا همتاه كم فيك هدار يا معتز
_ هههههه ايوه انا داري ذلحين قلي مابه قبل ما اعيد لك الهدار كله
_هههه ماشي يا منعاه ، ذلحين اسمعني تذكر موضوع الرساله في شاشة المراقبه حق عمنا بعد ما خطفو سلى ..
_ ايوه اذكر ..
_ قد طلعت لي نفس الرسايل في عدة اماكن وذلحين شا ارسلك صورة شاشه فيها الرساله بس الغريب ان الرساله ما بتطلعش بعد تصويرها ، شكله مهكر محترف قوي انا شا ارسلك الصورة وانت ابسرها واذا وصلت لشي بلغتني .. ولا تنسيش حاول تدعمم عمنا وقله اننت بتتصلي وما بنردش هيا خاطرك يا اخي ...
وكملت طريقي بالسيارة والرجال مقيد في الخانة ، اول ما وصلت لا بيتي السري واللي ما يعرفش حتى عمنا ، نزلت فتحت الخانه وشليت الرجال ودخلته للبيت نزلته البدروم في غرفة ما بش فيها الا كرسي واحد وماسه والغرفه معموره حجر بدون رنج او اي أضافه طرحته فوق الكرسي وفكيت القيد من يداته وهو بيقلي من انت يا اخي ما تشتي مني بس بعد ما فكيت القيد وسنبت قباله ما بيننا الا الماسه الرجال سكت على طول ، وانا جالس بنبسرة سكته ولا سألته شي، بنبسر لا عيونه وبس ، بدأ الرجال يقلي اللي هجمو عليا هم ناس انا ماسك عليهم حاجه ويشتو يتخلصو مني ، ناس اكبر مني ومنك يا اخي محد يقرب منهم لان كل شي في يدهم انت مش قدهم .. وانا بنتبسره سكته ،الرجال زاد التوتر عنده ورجع يقل لو تشتي زلط او اي شي شديلك كل ما املك المهم اننت تخليني ارحلي .. وشويه ويقل يا اخي انت من رسلك من هو اللي فوقك كائن من يكون اوعدك اننا احميك منه واخليه يخدمك ، ابتسمت وقلت له الرجال اللي بنشتغل عنده واقف قبالك وبيبسرك لين عتوصل ، الرجال سمعني وسكت على طول وهو مستغرب من ثقتي ، جاهل مهما حاول يستوعبها ما عيقدرش يفهما هي ثقة بالله يشتي لها اخلاص به .. المهم رجع يقول يا اخي اذا كان على موضوع البنت والله ما انا داري عن الموضوع هذا شي ،وانا قد فعلت كل شي في دنيتي محد يتخيلها ومستعد اقلك بكل شي بس موضوع بنتك والله مالي علم به ، ورجع يدني راسه وقال هذا كله من تحت راسك يا اشرف انا داري ، قلت له ايوه الان بدأت تتكلم في اللي اشتيه ، هيا من هو هذا اشرف اللي بتجابر نفسك عنه ، ابسرني وقال هااه .. وحاول يكذب بس بيبسر دمه في عيوني واننا شقتله في اي لحظه لو كذب وحاول يلف ويدور ، مغط ريقه وقال يا اخي، اشرف هذا هو اللي تهجم عليا للبيت هو صاحبي من زمان قد جمعنا اكثر من عمل وحاجات كثيره ، بس مع الوقت مدري ماله تغير واصبح يحارب كل شخص يعرفه ومع الوقت قوته بتزيد فوق ما تتصور واي شخص يعرفه يخاف منه او يقتله .. ومع الوقت ما دريت الا وقده بيحاربني انا ويشتي يتخلص مني، وهذا السبب اللي خلاني اهرب واجلس متخبي باقي عمري منه ، قلت له طيب وانت ما بتشتغل او ما بتفعل لما قرر اشرف يتخلص منك ، قال هااه .. ما بنفعل شي يا اخي انا مخترع واعتقد اننت قد ابسرت بحوثاتي واختراعاتي في بيتي ، ومشنا داري ماله، قد قلت لك يا اخي قلب على الكل .. قلت له طيب ما قلتليش ايش بتشتغل لما قرر يتخلص منك ولا تعيديلش نفس الهدار حق اول على شان ما نطولش مع بعض ، قال بنشتغل في اختراع برامج وبيعها للخارج ، قلت له وليش ما بتبيعهاش لداخل تنفع وتستنفع من بلادك ، قال اليهود يقدرو الشي اكثر مننا ، قلت له اصه انت والفكر الغبي هذا والمعتقدات المأبلسه ..
#في_بيتي5
#يمني2 ... البارت الثاني ..
بنقلك يا عم بنتي اين بنتي انا مأمن لك كل اهلي وتحت سقفك ، قلي ايش الموضوع يا يمني اذكر الله ومسك يداتي وبيحاول يهدأني قلت له بنتي سلى يا عم كيف تختفي من الغرفه اخر الليل ومابش لها وجود ، قال ماهو ..ماهو ؟؟ ما بتقل ؟ وكان مستغرب قوي ، بعدت يداتي من صدرة وقلت يا عمنا بنتي يعلم الله من شلها من وسط البيت بنتي مخطوفه بنقلك ، كيف مخطوفه يا يمني كيف والحراس ما بيفعلو كيف دخلو للفله وخطفوها ، قلت له جي نراجع الكيمرات يا عم وعنبسر من دخل وماهو الموضوع وصلنا للغرفة وفتحنا تسجيلات كيمرات المراقبه ، وفجأة طلعت شاشة سوداء ومكتوب فيها ، كل جرح يقوي صاحبه اكثر ..
وانا بنقراء التفت لا عند عمنا وانا مش فاهم حاجه ماهو هذا وماهي تيه الرساله بس اول ما ابسرت وجهه عمنا ابسرته توتر قوي وكانه داري بشي بس مخبي عليا فقلت له ماهو هذا يا عم ماهو هذا ؟؟ ابسرني وهو قلق وقال هاه ..هاه مشنا داري ماهو هذا حتى انا مستغرب قوي قلت له انت غريمي يا عم قلدني الله لا اشرب من دمك انا داري اننت مخبي عليا شي بس انا داري كيف اخرج حقي وقمت اخرج مسكني من يدي وقال يا يمني انا اعتبرتك مثل ابني واديت لك بنتي ووثقت فيك بكل ما املك وغالي عليا فكيف تشك فيني كذيه كيف تفكر اننا ممكن أضرك بشي ، هزرت يدي وقلت له قد الخبر معك وانت اخبر وخرجت اتصلت لا اخي وقلت له يجهز نفسه هو وجدتي عنرحلنا . وقمنا خرجنا وسرت الفله حقي واخي بيقلي خير يا يمني قلي مابه لمه خرجنا ومالك تصايحت انت وعمك قلت له مش وقت ذلحين اول شي القي بنتي وبعدا كل شي عيتضح يا اخي بلال ، قلي معقوله يا يمني يكون عمنا له يد في خطف بنتك سلى ؟!! قلت له انا ما عاد افتهم لي شي يا اخي بس خليني اجمع حسي شوية وشا اقلك ما عنفعل ، اتصلت لمعتز وقلت له بالموضوع واذا سألك عمنا عن شي قله مدري وافعل نفسك مش فاهم شي واستمر معه تمام ، قال حاضر من عيني يا يمني لكن كيف خطفو البنت انا شجنن قلت له عسى في ذلك خير يا معتز ، وجالس اتواصل مع كل الرجال اللي بيشتغلو معي وكل شخص عرفته في مجال العالم اللي انا فيه بس ولا وصلت لشي فجأه ابسر شاشة تلفوني رجعت سوداء نفس الشكل اللي طلع في شاشة كيمرات المراقبه في بيت عمنا وطلعت لي رسالة ، اذا تشتي بنتك جي لا حزيز جوار كذا كذا بعد ساعة ، على طول شليت سلاحي وتوكلت طلعت فوق سيارتي ورسلت الموقع لمعتز واتصلت له ..
هااه يا معتز ابسر الموقع اللي رسلت لك واديلي تفاصيل اكثر عنه ابسر بيت من هو وما نوع السكن ذيه قال حاضر ابشر، وبنسوق السيارة طريق الموقع ذيك بطريقه جنونيه وصلت ودخلت من شارع فرعي بطنج (طريق مش مسفلت ) وبنمشي بالسيارة وكل ما دخلت اكثر كل ما خفت البيوت ورجع المكان خبت (مكان خالي ) ولا عاد به بيت كنت ابسر وبه بعض الاضواء بعيد مني وانا ماشي وصلت ولقيت حوش كبير وبه ثلاث سيارات رنج روفر وباص اسود صغير خبيت السيارة خلف تبه تراب ونزلت رجل وجيت من خلف الحوش هذا اول ما قربت ما دريت الا وبه اشتباكات بالرصاص وصياح وفجاء افتتح الباب الخلفي للحوش وخرج منه رجال في يده مسدس ولابس ثوب ابيض وحافي وكان يهرب ونبع تمدد خلف شوية تراب يتخبى لان المكان كله ظلام ومابش اي ضوء خرجو بعد ثلاثه لابسين بدلات سود نفس البدلات حق عمنا وبعدها خرج عمنا وبيصيح دورو في الخبت هذا كله ما ترجعو الا به سريع ..سريع ،ورجع دخل طريق الحوش ، والمسلحين بدأو يدورو في المكان ذيك وهم مسرجين كشافات مركبه في سلاحهم انا قربت شويه شويه من الرجال اللي هرب منهم لما وصلت لا عنده وهو بيراقبهم نبعت لا فوقة وطرحت يدي في فمه وطرحت المسدس في راسه قلت له لسمع نخس انا جيت اخارجك من هولا سلم سلاحك و ذلحين شا افلت لك وجي بعدي على شان تسلم راسك، بس مدري مالي اول ما قربت من الرجال هذا حسيت كان به كهرباء دخلت جسمي بكله وحسيت بشعور غريب ، المهم الرجال ابسرني وهو مفجوع وهز راسه وبيقل تمام ..تمام ، فلت له وقلت له جي بعدي وكنا نسحف بيداتنا وحنا ممددين على بطوننا على شان محد يبسرنا لما قفينا منهم رجعت مسكت الرجال وقلت له قم وخطيته قبالي لا عند سيارتي طلعته فوق السيارة في الكرسي الامامي وقيدت يداته طلعت فوق السيارة وبنبسره رجال كبير في السن بنفس عمر عمنا وهو بيقل قوى قوى يا اخي اخطي من هنيه وانا شا اجابرك بكل شي ، طرحت المسدس فوق راسه وقلت له ما شتحركش من هنيه الا لما تقلي من انت ومن هم اللي بيلاحقوك وليش يشتو يقتلوك واين بنتي يا ابن الكلب من انت على سب تخطف بنتي حرام لا اقتلك هنيه ساع الكلب ولا يرف لي جفن لو ما تقلي اين شليت بنتي ، قال حاضر .. حاضر يا اخي انا لي منعك لا ترفعش صوتك عيسمعونا ويقتلوني ، قلت له شقتلك انا بنقلك بنتي اين بنتي خيرة الله عليك وبندهف راسه بالمسدس ، قال هاه ..
مساكم الله بالخير ورمضان كريم وبما ان احنا في شهر الخير جو نكمل رواية #في_بيتي
#في_بيتي ..الفصل الخامس .
#يمني2... البارت الأول ...
ايووة يا اشرف قدلنا ثلاثه وعشرين سنه ولا رضي يمتسح الموقف ذيك من راسي لما دخلت علينا اقدار انا والمخترع اللي اديناه من لندن وحنا واقفين في الكهف السري اللي على قفى اخر جبل من بيوتنا المعموره في القرية حقنا ودخلت علينا اقدرا وهي واقفه باب الغرفة حق الكهف و بتهز راسها بتيك الطريقه الغريبه ...
اول ما ابسرتها قلت اقدرا..!!! ما فعلتي بأبني يا بنتي؟ حرام عليش..! قالت..اسمعني ولو كلامي عيكون قاسي وغريب انت ذلحين ضروري تخفي ابنك واختلق اي عذر لهلك عيكون في مصلحة الجميع ..
ماهووو ؟!! ما بتوقلي للجنان وانا بنصيح ما بتقولي يا اقدار هذا قده جنان من يفلت كبده ماااشي .. ماااشي لا هنيه ويكفي .. وبنجابرها وهي بتبسرني ساكته ومبتسمه .. وانا بنعيد نفس الكلام وقد بنفكر في داخلي البنت قالت لمصلحه ابني وبنبسر ابني وهو مرقد قبالي وقد الدبابيس خلف اذنه وقد فعلت "اقدار" فعلتها ، قلت شفعل المستحيل على سب احمي ابني ....
سمعتني يا اشرف ايوه قبل ثلاثه وعشرين سنه ...
لحظه ..لحظه اخو يمني "بلال" بيتصلي يعلم الله ما قد به ..
الوو "بلال" ..خير يا ابني ما به ؟
اسمع يا عم لا تقلقش بنتك في المستشفى هجمو علينا ناس مسلحين ووبنتك اُصيبت وذلحين قدنا في المستشفى وقد اتصلت ليمني وقلت له يجي ..
ما قلت؟؟!! .. ما وقع ببنتي ؟!!!في اي مستشفى انتو انا جايي الان..
خير يا اشرف مابه طمني ؟؟
مش وقت يا محمد بنتي مكونه في المستشفى شا اسير ابسرها وعنتواصل
يالله سترك سير وطمني عليها ويمني اين هو يا اشرف
قال اخوه انهو اتصله وقده في المستشفى ذلحين خاطرك...
بعد الحادثه بثلاثه ايام ...
جلست مكاني وانا مطنن لا وجه جدتي وهي بتقل محناش اهلك وباقي المجبر حقها اللي اغرب من الخيال ..
بنسمعها ومتجمده مشاعري كأننا ظل خالي من كل المشاعر لاول مره احس كل شي فيني توقف ما عاد بنسمعش صوت جدتي بس عادنا بنبسر شفايفها بيتحركين يعني بتجابرني بس ما عاد بنسمعش شي .. رجعت اجابر نفسي ناهي مالك يا ايمني اذكر الله وفجأه سمعت صوت جدتي بعد ما طرحت يدها في كتفي وبتقل يمني يمني وهي بتهزني مالك يا ابي وروحي مالك جي حيا يا روحي انت وحضنتني لا صدرها وبتبكي قلت لها ناهي يا جدة من هو ابي؟؟ واين امي ؟طيب جابريني معي اخوه ؟من هم اهلي؟ يا جدة انا فدال ارجلش جابريني قوى ..
وهي بتبكي وقالت مشنا داريه يا ابني ابوك ما رضيش يجابرني بأي شي ثاني وكنت كل فترة اساله وهو كان يزعل وقلي رجائاً يمه لا تفتحيش الموضوع هذا مرة ثانيه يمني ابني .. ابني انا يمه .. يعني ابوك حبك ساع ابنه واعظم وكلنا حبيناك واعتبرناك ابننا واحنا اهلك يا ولدي .. قمت من عندها وانا بنمسح دموعي ونزلت احب راسها وقلت ايوه انتو اهلي يا جدة انتو اهلي وشليت نفسي وخرجت من عندها ونا بنفكر ماهو الخبر هذا يا يمني ماهو اللي بتقوله جدتي كان داخلي قهر الدنيا لمه ابي فلتني وكيف سخي يفلت ابنه ويعلم الله كم جلست امي تبكي عليا كل ليله ومن جهه ثانيه قلت لك الحمد يا الله عوضتني ب أب وام غير اللي ماتو عليا وارجع اقول اعقل يا يمني امك وابوك ماتو خلاص، رجعت اجابر نفسي وانا بننزل من الدرج حق الفله اللي عمنا نقل زوجتي فيها تتعالج ما دريت الا وعمي بيتصل ..
ايوه يا عم معك
يمني اين انت يا ابني في الديوان النازلي انزل لا عندي
حاضر يا عم شنزل لك ذلحين
وصلت لا عند عمنا اول ما ابسرني نبع حضني بقوة وبيبكي وبيقل يا يمني بنتي في غيبوبه قالو الدكاتره بنتي في غيوبوبه يا ابني وقدلها ثلاثه ايام وبيبكي ..
مسكته من اكتافه وقلت له قدر الله يا عم ما نقدرش نعترض عليه لكن حقنا عنشله من اللي تهجمو علي مرتي واخي ومش وقت البكاء والقهر يا عم يا اما نوقف ونشل حقنا ولا ننكسر ونجلس نبكي بدون حيله .. مسح دموعه وقال ايوه.. ايوه يا ابني يمني ضروري نبسر من هم هولا اين اخوك اتصله وقله يجي نستفسر منه اكثر عن الحادث ..
وعن اللي تهجمو عليهم ..
اتصلت ..هاه يا اخي اين انت
الو انا عند جدتي دخلت وهي بتبكي وبنحاول اهدأها مدري من غثاها يا "يمني" ..
سابر يا اخي كمل وانزل لديوان اشتي اجابرك ..
حاضر ..حاضر من عيني ..
ابسرت عمنا ورجعت افكر ماهو اللي بيخبيه عمنا عليا وليش بعد ما قله اخي ان به مره ورجال غارو عليهم من المسلحين هدأ وما قيمش الدنيا على سب بنته وذلحين ذكر ويشتي يلاحق بعد الموضوع طيب ليش صورتي وانا جاهل كانت عند عمنا من هو عمنا ذيه ومن هو الرجال اللي كان معه ومن هي تيه المره وانا بنفكر ما دريت الا وعمنا بيقل يمني وااا يمني اين سار حسك يا ابني صلي على النبي ، قلت له هااه مصلى على رسول الله ما به شي خليني شطلع انزل اخي واجي لك قال تمام ..
بالكيمرات اللي في مكان الحادثه وأكيد عنعرفهم , قلت يا بلال ذلحين روح سلى بسيارتي وانا شجلس انا وعمنا هنيه وعمنا اتصل لناس خرجو السياره اللي كان بيسوقها اخي ومحد جى من البحث يستفسر عن الحادثه عمنا استخدم سلطته , وبعد ثلاث ساعات من الانتظار خرج الدكتور وقال الحمد الله تجاوزنا الخطر بس البنت عادهي في غيبوبه ومقدرش اطمنكم بشي الا لما تصحي عمنا قال بنتي في غيبوبه ومسك الدكتور من صدره وبيهزوره ويقله وانت ليش دكتور ايش مهرتك مسكت عمنا وبنقله اهدأ يا عمنا ذليحن ما به شي انت روح زوجتك وابنك وانا شجلس واذا ابسرنا الموضوع خطير عنسافر بها قال ايش نسافر بها شدي امهر دكاترة العالم لا هنيه قلت له خير يا عمنا ذلحين روح عائلتك قد تعبو قال طيب يا يمني , وانا جلست وبنفكر في كل اللي حصل طيب ماقصة الشنطة اللي بتجابرني عليه زوجتي وهي في تيه الحاله وبعد ثلاثه أيام زوجتي ما زالت في الغيبوبه وعمنا قد نقلها من المستشفى للفلة وجهز في غرفة احدث الأجهزة الطبيه وكادر اجنبي يعالجوها ويتابعو حالتها بس مش الفلة اللي بنجلس فيها انا وعمنا , فلة ثانية في الجراف ,وجدتي وبنتي وعمتي زوجة عمنا وابنها جالسين في الفله تيه منتظرين كلنا متى زوجتي تفوق من الغيبوبه ما دريت الا وجدتي جت لا عندي وقالت يا ولدي اذكر الله مش كذيه قلت يا جده عقلي عيطير كل ما انظف شي اكتشف انه بيتوسخ اكثر وكل ما اشتي البلاد تيه تعيش في سلام وخير احس انها بتلعني ما عادناش داري من انا يا جده تعبت كل شي مبهم امامي به حاجات غريبه بتحصلي وكوابيس غريبه وبنبسر في منامي اشخاص معرفهمش واحس انهم قراب بالنسبه لي واعدائي في نفس الوقت , وكل ما قلبي يتعلق في شي احسه بيختفي وكل شي اقرب منه بيموت يا جده وقرحت بكاء في حضنها وكانت تتنهد وتقلي اذكر الله يا ابني اذكر الله قمت شليت نفسي وسرت بيتي فتحت الدولاب وشليت الشنطه اللي كلمتني عليها زوجتي فتحتها ولقيت فيها ورقة مكتوب فيها من زوجتي انا اسفة يا يمني لقيت هولا الصور يوم ما قلت لك به شي ضروري اكلمك به ولا تكلمش ابي بس انت كلمت ابي فاضطريت اكذب واغير الموضوع واخبيه لا وقته وبما انك الان بتقري رسالتي فهذا وقته طبعا لقيت الصور هولا في المخزن اللي بغرفت ابي ومحد بيدخل فيها نهائياً بس انا دخلت فيها يوم ما خطفو ابي وانت انقذته طبعا ما كنتش اعرف من في الصور وما عرفت الا بعد ما تزوجنا وكنت تروي لي صورك وانت جاهل فاستغربت انك نفس الشخص اللي بالصور والغريب ما بيفعلين صورك عند ابي ومنهم الأشخاص اللي معك في الصورة وسامحني ما قدرتش اكلمك بكل هذا والشي اللي اشتيك تعرفه اننا بنحبك وشجلس معك وفي ضهرك طول حياتي ... طرحت الورقه وبه صورتين شليتهن الصورة الاؤله فيها انا وانا صغير وجنبي بنت عمرها تسع سنوات ورجال ومره بس عند وجه المره والرجال الصوره محرقه يعني ما قدرتش ابسر ملامحهم لكن البنت اللي جنبي كان شكلها مألوف بالنسبه لي وما قدرتش اتعرف عليها كأن به حاجه غريبه قوي تربطني بالبنت تيه بس مشنا داري ايش هي والصورة الثانيه فيها انا والبنت وانا ماسك جهاز اسود غريب وبنبسر للبنت والبنت ماسكه للجهاز والكل بس كانت تبسر لا فوق بطريقه غريبه ,
وبعد ساعتين من التفكير ما بيفعلين صوري عند عمنا من وين جاب صوري وانا جاهل ومن الأشخاص والبنت اللي معي في الصورة وايش الجهاز هذا اللي انا ماسك له طيب يعني عمنا يعرفني من صغري ولا ايش الحكايه ما قدرتش أوصل لحل شليت نفسي ورجعت للفله وقررت ما اكلمش عمنا بالموضوع وشنتظر لما تفوق زوجتي واستفسر اكثر وبعدين شعرف الخبر كله , وبعد يومين وقد الهم اكل فؤادي اكل دخلت لا غرفة جدتي وبنتي سلى راقده وجدتي بتصلي جلست لما كملت جدتي تصلي نبعت لا عندها قلت يا جده خليش فوق السجادة وشسالش حاجه وسالش بالله اذا بتعرفي شي لا تخبيش عليا , قالت خير يا ابني تكلم شليت المصحف وطرحت يد جدتي فوق المصحف وقلت بحق كتاب الله يا جده تكلمني انا تعبت وقد شجنن مسكت راسي وقربته لا حضنها وقالت شاكلمك يا ابني لو اعرف شي وبه شي اشتي اجابرك به من زمان بس ما لقيتش الوقت المناسب ذلحين قلي ماهو الموضوع خرجت الصورتين ورويت جدتي وقلت هذا انا يا جده طيب منهم هولا اللي جنبي ومن البنت تيه اول ما ابسرت الصورتين قرحت بكاء وكانت تحضني وانا مستغرب قوي قلت ماهو يا جده قوى جابريني انا فدالش قالت اين لقيت الصور هولا يا بني قلت مش مهم يا جده اين لقيتهن جابريني من هم هولا قالت يا بني انت مش ابننا ولا بلال اخوك ولا احنا اهلك قبل 23 سنه واحد صاحب ابوك اداك لا عند ابوك وقال خلي ابني عند واعتبره ابنك ولان ابوك متجمل من الرجال هذا قال ابشر والله لا اعتبره ابني ولا تقلق وطرحك ورحله وابني جى لا عندي جابرني بكل شي ومكني جهاز اسود قال للوقت المناسب يا مه جابري يمني بكل شي ومكنيه الجهاز ذيه ......
ضحك وقال قصدك اننا ما قد حاولتش اكثر من مره وكنت اشتي اجابرك بس مالقيتش الوقت المناسب قلت له ايوه كيف حاولت وما طلع معك ؟؟؟ قال أي شي اقدر اخترقة يا يمني مخابرات برامج عالمية العاب عالمية وكل شي اقدر اخترقة بس النظام حق عمنا هذا غريب كانه من عالم ثاني وله عقول غير العقول البشريه قلت له كيف يعني يا معتز فهمني اكثر , قال تعرف يا يمني حتى اننا دخلت من قوقل ماب اشتي احدد موقع الفلة حق عمنا بس الغريب انه بيطلع انها ارضيه صحراء كأن مابش للفلة وجود وكل ما اشتي ادخل النظام ذيه كأن النظام هذا مابش له أي علاقه في التكنلوجيا تيه ولا عمره ارتبط بالنت بنقلك كأن له مصدر مختلف مش من عالمنا , استغربت قوي من مجبر معتز وقلت له على حسب كلامك ف عمنا اقوى واذكى مما نتصور وبما ان معة ذية النظام فهو مش بحاجتك يا معتز طيب ليش بيدعي الضعف في بعض الحاجات وبعض الحاجات احس ان العالم كله في يده ويقدر يفعل أي شي ومعة سلطة في كل شي , والغريب ان بعض المهمات سهله قوي ويقدر ينفذها من مكانه بأتصال تقول ليش بيسير ينفذها هو بنفسه او يخليني انا اسير انفذها , حتى المهمه هذه اللي شا اسير انفذها تعتبر عند قوته شي تافه ويقدر ينفذها باتصال ؟؟؟ قال والله مالي علم كل ما واحد تعمق في موضوع عمنا هذا يضيع ويحس انه دخل في متاهه مابش لها نهاية يا يمني لا تتعمقش بما اننت بتبسر الرجال بيخاف الله وما بيفعلش أي شي غلط فحنا معه لنهايه واذا بتشك ان به شي غلط فكلمني من الان يا يمني انا واثق فيك , قلت له لا لا يا معتز الموضوع مش قصة اذا كان عمنا في الطريق الصح او الغلط الموضوع ثاني قوي المهم ما عليك انا كما وصلت لشي شا ابلغك قال تمام وبعدا عمنا قده واثق فيك وبيمدحك في كل كلامه وقد زوجك ببنته قلت له ايوه المهم ذلحين ما علينا اشتيك تخترق لي الكيمرات حق السفاره شدخل ادي غرض وارجع قال ايش من سفارة وليش وقفت هنيه السفارة في الشارع الثاني ؟ قلت له شدخل البيت ذيه به نفق سري من البيت ذيه لسفارة بس اشتيك تخترق لما ادخل واخرج قال تمام انطلق وما عليك بس لحظه يا يمني لحظه به ما يقارب خمسة رجال داخل بيلوو على السفارة ومعاهم سلاح غير العسكر اللي بيحرسو السفاره من خارج وحوش السفاره , قلت له ايوه المهم تبلغني بتحركاتهم اول بأول انا شدخل ذية المكتب اشل غرضنا واخرج سكته واهم شي مشتيش احد يبسرني هيا ركب السماعه في اذنك يا معتز وجابرني بكل جديد قال انطلق ولا يهمك وعقبالي لما نخرج باصي ضحكت ونزلت , دخلت البيت هذ هو ثلاثه أدوار وفاضي محد ساكن فيه ومعمور وسط حوش كبير واسوار الحوش هذه مرتفعه قوي وفوقها زنج يعني محد يقدر يبسر ايش داخل الحوش ذية ومكان تواجد البيت هذا محد يركز عليه مع ان الكل بيمر من الشارع هذا المهم , ونزلت للبدروم ودخلت غرفة فيها باب صغير محد يقدر يدخل منها الا وهو بيحبي على ركبه ويداته دخلت الغرفة هذه على ما وصفلي عمنا ولقيت جدار قبالي سنبت وبه ستارة مغطية للجدار ذية وقدهي ملان تراب فتحت الستاره وخلفها باب سري حديد ثقيل قوي الباب ضد الانفجارات بس الغريب ان الباب كان مفتوح ومردود ردد على طول اتصلت لعمنا وقلت له يا عمنا باب النفق ذية مفتوح ومردود ردد وقد به بيوت عناكب على الباب شكله مفتوح وقدله سنين محد استخدمه قال ايوة انا اخر مره خليته مفتوح نسيت ما اقفله لا تقلقش قلت له سابر يا عمنا الان شدخل وشتواصل معك لما اكمل المهمه قال تمام دخلت من النفق والغريب ان النفق الارضيه حقه مبلطه برخام لكن الجدران وما تبقى من النفق عبارة عن تراب وبه نفس لاوصق فسفوريه موزعات على طول أرضية النفق وبنكلم معتز عن طريق الاتصال بالسماعه اللي مركبه في اذني قلت له معتز انا دخلت النفق قال ايوه انا بنرسم الطريق اللي بتمر منه وبنحتفظ بها اذا احتجناها مره ثانيه قلت له تمام وصلت لا مكان وبه نفق على يساري استغربت لان عمنا ما كلمنيش عليه وقلت يا معتز ايش في في يساري من نقطة وقوفي قال في عدة بيوت وتخرجك لا تحت جسر الماليه وبعدها وزارة الماليه والصافيه , ليشب تسال ووقفت مكانك يا يمني ؟ قلت به نفق المهم عنرجع نبسر موضوعه مره ثانية وكملت طريقي كنت كل ما اقرب من النفق الطريق ترتفع شوية شوية لما وصلت للباب فتحته ودخلت وبه غرفه متر في متر معموره بشكل دائري ساع فتاشت الصرف الصحي وسلم طلعت وفتحت الغطاء حق الفتاشة وخرجت لا غرفة فيها أوراق وكتب واجهزه قديمه ملان تراب خرجت من الغرفه ومعتز بيكلمني بتحركات الرجال اللي بيحرسو الماكتب من داخل السفارة وصلت للمكتب المنشود ولقيت الفلاشة تحت المفرشه وفوقها كنبة جلوس شليتها وخرجت بدون محد يبسرني وخرجت من السفارة وفي الفندق وصلت لنفق اللي على طريق الماليه وضويت بالكشاف وكان شكله طويل قوي دعممت وكملت طريقي وخرجت من البيت ذية وبه في الكراش حق البيت ثلاث سيارات مصفحات ومدرعة وصلت لا عند معتز وطلعت فوق السياره اتصلت لعمنا وقلت له الموضوع تم في صمت قال حلو جداً الان تتحرك لا عندي يا يمني انت
Читать полностью…
مساكم الله بالخير
بما اننا وصلت لثمانيه الف متابع وشويه في فترة قصيرة بدون مساعدة احد وبدون حتى اشهار الصفحه او نشر مقاطع فيديو فيعتبر انجاز بالنسبه لي وكمان كسرت حاجز الهروب من المنشورات الطويله وخليتكم تحبو القراءة وتنتظرو كل جديد ف معي لكم خبرين الخبر الأول يعتبر شوعه بالنسبه لي بس حالي بالنسبه لكم , طبعا للأسف ما قدرتش اسوي الكتاب وكل ما اكمل مشكله تطلع مشكله ثانيه فقررت اكمل لكم قصة في بيتي هنيه في الفيس والخبر الثاني عتلاقوه في نهاية الفصل من قصة يمني , وايضاً به ناس اذكياء قد فهمو ان احنا قد بدأنا في اكمال قصة في بيتي بس بطريقة مبهمه وثانيه , وكما عودتكم باختلافي واسلوبي الخاص في سرد القصص فتوقعو مني أي شي غريب ومختلف ....
متشكر لكل متابع من وسط قلبي...
انتظرو الليله الساعة 9:00 م
#منيرالنقيب
https://www.facebook.com/profile.php?id=100003895032550&mibextid=ZbWKwL
،ما دريت الا والرجال قام لاعندي وجلس امامي وقال بشكل مباشر تشتي بضاعة؟ موجود عندي بضاعة ملكي ومن افخر الانواع والكميات اللي تحتاجها اوفرها لك والبطريقة المناسبة ، قلت له بضاعة ايش ومن انت؟ قال لا تقلقش انا كنت اراقب اللي بيديلك بضاعة ودريت انكم احترشتو ، قلت هاه ايوه ايوه بس اشتي حاجة حالية واشتي كميات كبيرة قوي انت ما عتقدرش عليها، قال خلاص شل رقمي وانا شتواصل مع المورد حقنا رأساً وابسره ما عيقل واعرف ما يطيب نفسك، قلت له سابر هات رقمك، شليت رقمة وقلي جيب رقمك انت والكل قلت له لا لا انا معرفكش ولا انا واثق فيك فاصبر عليا لما نتعرف وبعدا عتشل رقمي انا شرجع اتواصل معك، وقمت رحت لي وبنبسر اذا عاده بيراقبني او ماشي بس ما كانش يراقبني، عمنا اتصلي وقلي يا يمني تعال لا عندي سريع درينا اين مكان الفلاش والملف حق صاحب المانيا المهمه خطيرة قوي وشكلنا عنشل معانا رجال والكل .....
يتبع....
#يمني
#منيرالنقيب
مية ريال او اكثر ويمكن اقل ، راعيت لما خرجو المصليين كلهم والرجال شل الزلط اللي جمعو له وخرج من الجامع جلست اراقبه وصل للخط وبنشوفة بيمشي رجل مفتجع يطلع مواصلات ولا شي وينقص من الزلط اللي جمعها قربت لا عندة بالسيارة وقلت له تشتي اوصلك يا اخي ولا شي، افتجع مني وقال لا لا تسلم قلت له يا رجال اطلع الله المستعان مابه شي والناس لبعضها، طلع بعد ما اصريت عليه وصلنا لا حارته وانا بنفكر معقولة كان عيمشي هذا كله رجل، وطول الطريق ساكتين ما بنتكلمش وصلنا للحارة قال هنيه يا اخي تسلم الله يبارك فيك قلت له اين بيتك اوصلك قال خلاص مابش داعي، كان خايف اوصل لا بيته وابسر صاحب البيت وهو بيصيح فوقة، قلت والله معذر ما اوصلك لا بيتك قال طيب مشينا وصلنا امام بيته وبه ثلاثه رجال من الحارة واقفين وزوجة الرجال واثنين اطفاله واثاثه في الشارع والرجال بيجابرو صاحب البيت ما يسبرش يا اخي تخرجهم لشارع وصاحب البيت بيقل عندهم اربعه اشهر متاخرات ما فتحتش بيتي سبيل وانا معي جهال يشتو ياكلو ويشربو وكل رزقي من الايجارات، والرجال اللي جنبي اول ما ابسر عائلته نزل وبيصيح فوق الرجال ليش يخرج اسرته من البيت وقد اتفقو انه يدي الايجار اليوم وصاحب البيت قلة هيا اين ايجاري يا نذل رحلك من بيتي ومشتيش منك شي وكان يصيح قوي والجهال افتجعو وكان يبكو الاب ما درا ما يفعل افتجع على جهاله وسكت وسار يحضن جهاله سكته ويقلهم سعليكم ما به شي، وصاحب البيت جالس يصيح ولا سكت، نزلت ودهفت صاحب البيت وبنقلة سكته لسمع نخس قال وانت ما دخلك قلت له خير ..خير سرت لا عند الرجال واسرته وقلت شل الحاجة المهمه بس من اثاثك واطلع انت وجهالك فوق السيارة الرجال استغرب وكان فوقة عزة نفس كبيرة قال يا اخي لا عاد نشغلكش عنلاقي بيت لا تهم، قلت بنقلك اطلع، وطلع هو واسرته وخطينا سرت استاجأرت بيت ودخلو فيه واديت لرجال زلط يسير ياثث بيته وهو مطنن لا فوقي ومستغرب ومش مصدق اللي بيحصل كان يبسرني كأننا ملاك نزله من السماء، واشتريت تلفون وشريحه وطرحت في التلفون رقمي ومكنت الرجال وقلت له لما تكمل تأثث بيتك وتجهز امورك كلها اتصلي الرجال كان ساكت والدموع قد غسلت وجهه وما كنش يقدر يتكلم كان بس يهز راسه فلته ورحت لي، سرت لا عند صاحب البيت اللي خرجهم صيحت له نزل وقلت له اشتي استاجر العمارة كلها واستثمرها الرجال فرح وقلت له بس تعال معي للمكتب حقي نوقع العقد ونتفق وشليته لا مكان وضربته ضرب عمري ما ضربت احد كذيه وطرحت له زلط في فمه وقلت له خبي تيه الزلط على شان تديها لله ويدخلك بها الجنه قله انك كنت نذل وحقير وكنت تقدر الناس بجيوبها بس وقمت رحت لي، جالس في بيتي بنلعب انا وبنتي والرجال اتصلي قال انا وليد اللي ساعتني يا اخي انا كملت اثث وجهزت امور بيتي كلها والله ما انا داري كيف اجازيك قلت له اخرج للمكان الفلاني وقمت خرجت شليته لا مذبح قلت له ذلحين انت عتشتغل معي واول عمل لك تراقب هذا الشخص لمدة اسبوع وانا شرجع اتصلك وتقلي كل تحركاته قال تمام، طرحته يراقب عصام ورحت لي وكملت العرس وقدنا حريو واليوم الثاني الصبح عنبكر نسافر لا المانيا انا وزوجتي ومشنا داري ايش المهمه اللي مكلفني عمي بها وليش خلاني اسافر ....
يتبع ...
#يمني
#منيرالنقيب
ابوها وخلاص ما دخلك من المواضيع بين البنت وابوها، ما دريت الا وعمنا بيتصلي ..
- الووو
- يمني اينت انت اششتيك الان تجي لا عندي فلت اي شي في يدك وتعال سريع
- حاضر يا عمنا عشر دقايق واكون عندك .....
وصلت لا عند عمنا في الفلة وقلت له خير يا عمنا مابه؟ !! قال اسمعني الدنيا مقلوبة على الاجنبي اللي شليته وقد به جهات كبيرة بتضغط على اصابع القبضة اليمنيه اصبع العصابات واصبع الدين وخايف يعرفو مكان الجبل يا يمني، اشتي منك تنقل كل ما داخل الجبل بشكل سري عيتم توفير قواطر مقفصة ساع قواطر النفط وغيرها تنقل كل شي تمام، قلت له طيب واذا لاحظو علينا ومسكتنا الدولة، قال من جهة الدولة ما عليك خليه عليا انا خايف من الجهات الخفية اشتي كل شي ينتقل بشكل سري، قلت حاضر بس اين عننقلهن، قال توصل للمحطة الفلانيه خلفها في حوش وهنجر تدخل الهنجر عتلاقي نفق تدخل به وهنيك عتلاقي ناس ينزلو بضاعتنا، قلت سابر يا عمنا، طيب والرجال قد حققت معه عرفت من هو وما في راسة من كوارث؟ قال ايوة حققنا معة ووصلت لحاجات ما كنت اتوقعها يا يمني، وشكلك بعد ما تكمل المهمه تية عتسافر المانيا، قلت معذر من خير يا عمنا ذلحين معي موضوع اشتي اجتبرك به وقبل ما اكمل كلامي ما دريت الا وتلفوني بيرن خرجت التلفون والمتصل بنت عمنا، قلت يا عمنا تيه بنتك سبق واتصلت لي قالت تشتي تقابلني ضروري بدون ما تعرف انت، قال طيب ذلحين جاوبها وابسر ما تشتي ...
-الوووو
-الوو يمني اين انت؟ يشتو يقتلوني بيلاحقوني يا يمني اتصل لا ابي وكلمة
- من هم اللي عيقتلوش؟ طيب اين انتي؟ ؟
وعمنا سمع قتل شل التلفون من يدي وقال الووو بنتي اين انتي جابريني ....
يتبع.....
#يمني
#منيرالنقيب
مثلك فاكيد كل حالي في اليمن عيرجع قلت سابر يا عمنا كان خاطرك , نزلت فوق السيارة ولقيت واحده من الشنطات اللي انا جبتهن من عند الرجال وهي ملان زلط بالدولار ,روحت البيت اطمنت على بنتي واخي وجدتي وتجابرنا ودخلت رقدت , اليوم الثاني خرجت اشتريت عقار وقلت شعمر قصري بمزاجي انا وكيفي ومكان ثاني اشتريت بيت وروحت طرحت لا اخي فلوس وشليته للبيت وقلت له اثثه وانقلو فيه قال تمام , شليت نفسي وسرت لا بيت عصام في مذبح الشخص اللي كونته في البيت اثناء الاقتحام اول ما وصلت نزلت من السيارة وبنسمع صياح في ببيت عصام نفس الصياح اللي بيحصل في كل بيت يمني ... هيا عتسيرو تطلبو الله ودخلو صرفة مابش خبز في البيت والكهرباء قطعوها ما عدبش شي في البيت نبيعة ونملي بطون الجهال وابسرت عصام بيخرج وهو ضابح وبيعرج لا فوق المتر حقه صيحت له ابسرني وافرح نبع على طول بيسلم عليا ويتحضني , قلت له من اللي بيصيح أصواتكم ملان الحارة قال هذا ابي بيصيح فوقي انا واخي نخرج نشتغل شليت نفسي وقلت اخرج اشتغل وعاد رجلي بتوجعني، خرجت زلط قلت له ادخل مكن ابوك تيه يشتري مصروف للبيت وكل ما يحتاجو واطرح المتر والحقني لا فوق السيارة , ابسر الزلط وفرح قال ما يسبرش يا اخي كيف اشل منك زلط وانا حتى ما اعرفش اسمك وبعدا منينه شقضيك قدك داري بالبير وغطاه لما كنت اشتغل مع الجماعة كنت اقدر اوفر الصرفة لكن ذلحين قدك بتبسر وضع البلاد بيسحبك بالغصب لطريق الغلط قلت له ذلحين افعل اللي قلت لك والحقني .....
يتبع ...
#يمني
#منيرالنقيب
المهم وانا بنفكر كيف اصبحت الدنيا سهله امامي والكل بيحترمني ويتمم لي ومابش صعوبة في شي، وكيف كان كل شي صعب قوي قبل فترة، هل كان ضروري اننا احارب الشر على شان يكون لي شأن كنت عايش بمبداء مغلوط اننا امشي جنب الرصيف وكافي الناس خيري وشري وما عليا من احد هذه قاعده تنفع للمواشي مش للبشر ما خلنقاش الله في الدنياء لأجل ذية ،وصلنا وبنبسر السفينه لو نقرب عليقطانا رادار السفينة ويتم التبليغ عننا، شغلنا جهاز تشويش الاتصال بالسفينة صح الرادار عيلتقط القاربين بس جهاز الاتصال عيكون خارب لمدة دقيقتين بالكثير وضروري نسيطر على السفينة قبل الوقت ذية، شغلنا الجهاز وانطلقنا وصلنا جنب السفينة وبدأو يضربو علينا نار ورجمو الغام مائية حول السفينة، استغربت قوي هذه سفينة نقل او سفينة حربية ليش فيها العسكر هولا كلهم والسلاح هذا كله ....
يتبع....
#يمني
#منيرالنقيب
الصاله كلها قبالنا الجدر من زجاج والستاير اللي بالجدر الثانيه كله شاشات حق كيمرات المراقبه وغرفه فيها معتز وهو مقيد ومغطيين لوجهه والغرفه الثانية فيها رجال واقف وبيلوي على الغرفة كأنه في مصيبه وقده متوتر قوي قلت يا عمنا هذا صاحب المرسيدس البيضاء ، عمنا شل الاسلكي وقال ادولي الظرف وصاحبه ، وبنبسر العسكر وكلهم مقنعين ، دخلو الغرفة اللي فيها معتز واثنين دخلو الغرفة اللي فيها الرجال ، دخلوهم الاثنين لا عندنا وخرجو العسكر ، بقيت انا وعمنا ومعتز وصاحب المرسيدس ، عمنا قال ايوه يا قاسم ، وانا بنقل كل تيه الفجوات وكل المشاكل اللي بتحصلي منينه وطلعت منك يا نذل ، والرجال واقف ومدني لراسه ولا سطى يدي نخس ، عمنا أشر لي اقوم افك لمعتز وابعد الخرقة من فوق راسه ، فكيت لمعتز ومعتز بيتلفت يمين وشمال وبيقل مالكم من انتو ؟ ليش مسكتوني انا ضعت في الطريق ما دريت الا وانا امام المنطقة تيه بحجر الله فلتو لي انا طالب الله بعد حالي ، وابسر عمنا وطنن ومن كثر ما كان مستغرب جلس للارض وقال عمنااااا...!!!! وقد الاستغراب والدهشة اكلت فؤاده ، عمنا قال ايوه عمكم يا معتز قلي بكل تحركات النذل هذا اين سار وما فعل ، معتز كان في حالة ذهول وبيتأتأ وقال هاااه ..هاااه مشنا داري بشي ما راقبت احد ولا اعرف احد ، عمنا قال انا اللي كلفتك تراقبه عن طريق صاحبك من التحرير ، جابرني ولا تقلق يا معتز ، قال هاااه..هااااه طيب ..طيب ، سار للبيت الفلاني في نقم نزل الكراتين فوق سيارة صالون قديم ، وبعدين رجع للمنطقه تيه ، قال سابر ، عمنا رجع يبسر الرجال وقال ليش شليتو المجنون ودخلتوه بيت فلان وما معك في بيت فلان يا نذل وانا بنقول كيف خربت شحنة الادوية وقد كنا مجهزين كل شي ، كلب الفلوس عيجلس كلب ، وخرج مسدسه ويشتي يقتله ، نبعت مسكت يد عمنا وقربت بنشاورة لا تقتلش يا عمنا عاد احنا عنخرج منه ماهو اعظم واخبث ، قال سابر ، وقمنا نخرج من هنيك واثنين عسكر كتفو صاحب المرسيدس وغطو وجهه وطلعوه فوق سيارتنا وخرجنا انا وعمنا ومعتز والرجال ، اول ما خرجنا من المنطقة بعدت القناع ، وقلت يا عمنا ذلحين عتفهمني ما هو هذا كله ؟؟!! قال مش وقت يا يمني خلينا نوصل للفلة وعنتجابر ، ما دريت الا ومعتز من الكرسي الخلفي بيحضني وبيقل يمني ..يمني لك الحمد يارب لك الحمد .. كان قصدي ان هذا اخر يوم لي ، قلت له لا تقلقش يا معتز اجلس وهداء خليني اسوق يا اخي ، جلس وقال يا خبرة الباص حقي عتقدرو تخرجوه او ماشي ، وعمنا قرح ضحكة ....
يتبع...
#يمني
#منيرالنقيب
طيب يا يمني فهمني كيف فتحت الغرفة حق الاسلحه واتسلحت ولبست البدلة قلت له حفظت كلمة المرور وانت بتفتح الغرفة، قال المشكله كل شي بتفعله بيخليني احنجك اكثر ومقدرش ازعل منك، ذلحين كيف عنفعل بالمشكلة تيه يا يمني، ما دريت الا واخي بلال بيتصلي اتصال وانا حذرته انه يكون يتصلي المفروض يفعلي رساله بس بما انه اتصل فاكيد به مشكلة كبيرة ...
يتبع....
#يمني
#منيرالنقبب
#يمني
البارت "15"
وصلت لا عند الرجال وقلت له انا طرف من الاطراف قام من مكانه وفتح باب السيارة ورجم شوالة لسيارة وقفل وقلي رحلك، شليت نفسي ومشيت واخي فعلي رساله قال خلاص قدة تحت نضري رجعت لا عند عمنا دخلت الفلة وصلت لطيرمانه وعمنا مش موجود كنت اتصله ما بيجاوبش عليا لأول مرة اتصل لعمنا وما يردش عليا نزلت لا عند الحارس وقلت له اين عمنا ؟ قال خرج بعدك ب 10 دقايق قلت له سابر وطلعت لطيرمانه فتحت الشوالة وداخلها شنطتين زلط بالدولار لأول مرة في حياتي ابسر زلط بتية الكيمه، حسيت بخوف حين ابسرتها ومشنا داري ليش ما دريت الا وبنت عمنا بتتصلي ...
- الووو
- جاوبت وهي بتبكي وتصيح ،ا يوة يا يمني اين انت شلو ابي من جنب الباب
- قلت حاولي تهدئي كيف شلو ابوش من هم اللي شلوة وما وقع جابريني؟ !
- قالت مدري كنت راقدة ما سمعت الا صياح جيت ابسر من الطاقة وهم بيطلعو ابي معاهم فوق هيلوكس وقفاهم ثنتين سيارات رنج روفر سود، شليت البندق حقي ونزلت وما عدبش احد الا سيارت ابي مفتوحة ذلحين قوى يا يمني اين انت؟
- خلاص لا تقلقيش شوية واوصل لا بيتكم وقفلت الخط
شليت الشواله وطلعتها للجباء حق الطيرمانه اخبيها ونزلت للبدروم فتحت الغرفة السرية حق عمنا لبست البدلة وشليت سلاحي وتوكلت،
وصلت لا باب بيت عمنا واتصلت لبنته نزلت فتحت لي باب الحوش دخلت السيارة ونزلت على طول لا فوق. سيارة عمنا دورت فوقها ولقيت تلفونه عند الدعسة حق البترول شليته ودخلته جيبي وقلت لبنته اجلسي في البيت واي شي يحصل او احد يدق الباب تتصلي لي على طول انتبهي تجاوبي على احد، خرجت واتصلت لمعتز ...
- الوو معتز اين انت؟
- قال انا في البيت يا يمني، خير ما به
- قلت له خلاص انا 10 دقايق واكون عندك وقفلت الخط
وصلت باب بيت معتز واتصلت له يخرج ، خرج وهو بيتلفت يمين وشمال اشرت له بضوء السيارة وصل لا عندي طلع فوق السيارة ابسرني وانا لابس للبدلة وقدنا محمل سلاح بكلي افتجع وقال يمني ماهو هذا كله ماهي البدلة تيه وليش السلاح هذا كله؟ قلت له مش وقت يا معتز شا افهمك كل شي ذلحين اشتيك تفتح لي ذية التلفون ضروري، قال حق من هو؟ قلت له وانا قالب وجهي معتز انت بتفهمني او ماشي بنقلك افتح لي التلفون ذية، قال لحظه لحظه ونزل لا بيته ورجع ومعة لابتوب وجهاز صغير وفلاش فتح اللاب وشبك التلفون وفتحه على طول جيت ابسر التلفون وبه رسله واتصال من رقم غريب فتحت الرساله ومكتوب فيها تعال الان امام بيتك ماشي عندخل نصفي كل افراد اسرتك، قلت يا معتز عتقدر تطلع لي موقع هذا الرقم او اين بيسير ومع من بيتواصل قال ايوة شقدر بس احتاج نت قوي وما يفصلش، قلت له انزل ادي عدتك كلها وارجع نزل شل كل قلافدة وطلع فوق السيارة شليته للفله حق عمنا وصلت طرقت اربع مرات والحارس فتح ودخلنا نزلت انا ومعتز وطلعنا لطيرمانه ومعتز بيتلفت يمين وشمال ومطنن في الحلى اللي داخل الفلة هذه بكلها، قال يا يمني اين احنا مسرع دخلنا الجنه اكيد هذه الجنه صح، قلت له اجلس يا معتز وارتبط بالنت ذية النت قوي مربوط بالاقمار الصناعية قال ناهي ناهي يا يمني قلي ماهو الحلى هذا بكله حق من القصر ذية قلت له مش وقت يا معتز الله يحفظك ذلحين افعل اللي قلت لك سريع، جلس يشتغل وانا ضربت الزرار على شان تطلع الشغاله، طلعت وابسرتني انا ومعتز وتغيرت ملامح وجهها قلت لها شوفي لنا اكل وعصير لظيف قالت تمام ونزلت، طلعت بالعشاء والعصير ونزلت ومعتز اول ما ابسر العشاء فلت عمله ونبع يتعشي وانا منتظر كمل يتعشي وجلس خمس دقايق قال يا يمني هذا الموقع اكثر مكان بيتواجد فيه صاحب الرقم وقبل ساعه تقريبا كان متواجد في ذية الموقع في منطقة جدر وبعدين رجع لا موقعه المعتاد، قلت حلو خلاص تعال معي ونزلت انا وهو ورجعته للبيت وقلت له اكمل عملي وشرجع لك يا معتز، قال تمام، انطلقت لا جدر للموقع اللي محدد عندي في التلفون، وصلت للمنطقة وهي قفرة فاضية فيها عدة بيوت بس وكلها جرب فاضية وبه اثنين هناجر، هنجر فاضي مافيه شي والهنجر الثاني قباله قاطره وبه سور حوش حول الهنجر نزلت من فوق السيارة وطلعت فوق السور بنبسر وبه دينه محملة مواصير مواد بناء وجنبها هيلوكس، نزلت وطلعت من قفى الهنجر ودخلت لويت حول الهنجر والباب مقفل ركبت الكاتم في المسدس وضربت القفل ودخلت والهنجر فيه تخشيبه حديد فيها عدة مواصير ما دريت الا وبه واحد خلفي قال وقف مكنك وهو معمر البندق لا عندي اول ما لفيت ضربت على طول رصاصه اطرحت في راسه ودخلت للبدروم وصلت لا نهايته وبه درج ونهيتها غرفه طلعت وبنتشاقر من الطاقة وبه ثلاثه مخزنين وعمنا جالس وسطهم مخزن ...
يتبع...
#يمني
#منيرالنقيب
مساكم الله بالخير.
انا اسف غيبت عليكم غصب عني مش بيدي واعتذر لاننا حتى ما قدرتش اقلكم المهم
ان شاء الله من اليوم عنكمل باقي قصة #يمني من حيث ما وقفنا البارت 14
الساعة 8:00 م
#منيرالنقيب