Telegram-канал ortodoxtewadochannal - ኢትዮጵያ ኦርቶዶክስ መንፈሳዊ አገልግሎት: Unsorted

ኢትዮጵያ ኦርቶዶክስ መንፈሳዊ አገልግሎት

08 Sep 2023 08:13

እንኳን አደረሳቹሁ
#ሊቀ_መላእክት_ቅዱስ_ሩፋኤል

🥀በዕብራይስጥ "ሩፋ" ማለት ጤና አንድም ፈውስ አንድም መድኃኒት ማለት ነው። "ኤል"ማለት ደግሞ አምላክ ማለት ነው። አንድ ላይ ሲሆን ሩፋኤል ማለት ከአምላክ የተሰጠ ፈውስ ማለት መሆኑን ልብ ይሏል። አምጻኤ ዓለማት እግዚአ መላእክት እግዚአብሔር በነገደ መላእክት አለቆች ይኾኑ ዘንድ ሰብዐቱን ሊቃነ መላእክት ሾሟል። ቅዱስ ሩፋኤል ከሊቃነ መላእክት ሚካኤልና ቅዱስ ገብርኤል በመቀጠል በመዓርግ ሦስተኛ ኾኖ የተሾመ መኾኑን ልብ ይሏል። የቁጥሩንስ ነገር በሚገባ መልኩ የሰው ልጆችን ጸሎት ከሚያሳርጉ ከሰባቱ ሊቃነ መላእክት አንዱ እንደ ኾነ በመጽሐፈ ጦቢት ላይ ራሱ መልአኩ ሲናገር እናነባለን "የቅዱሳንን ጸሎት ከሚያሳርጉ ወደ ከበረ ወደ ገነት ወደ እግዚአብሔር ጌትነትም ከሚያገቡ ከከበሩ ከሰባቱ አለቆች አንዱ አለቃ እኔ ሩፋኤል ነኝ" ብሏል ጦቢ 12፥15።

🥀ቅዱስ ሩፋኤል ዓይነ ስውር የነበረውን ጦቢት የዓሣ አሞት ዓይኑን እንዲቀባ ልጁን ጦቢያን በመምከር ብልዙን ከብሌኑ ላይ አንሥቶ ዐይኑን ያበራለት መልአክ ቅዱስ ሩፋኤል መኾኑ ጦቢ ፲፩ ላይ ተገልጿል። የዓሣ አሞት ሳይቀባ ጦቢት ከዕውርነቱ መላቀቅ ቢችልም የሰው አእምሮ በሚረዳው መንገድ የእግዚአብሔር ሥራ ይገለጥና ለወዳጆቹም ያለው ጠብቆት ይረዳ ዘንድ መልአኩን በሰው አምሳል ወደ ጦቢያ ልኮ በሚጨበት የዓሣ አሞት በኩል ረቂቅ ማዳኑን ለጦቢት አደረገለት። ምናልባትም ራሳቸው በገነቡት የጥርጣሬ ቤት ውስጥ ስሕተትን ተንተርሰው በክሕደት ላይ የተኙ ሰዎች የእግዚአብሔርን ድንቅ ሥራ ዐይተው ከማመስገን ይልቅ በጥርጣሬያቸው ጸንተው ቀጥለው ይህ እንዴት ሊኾን ይችላል ይሉ ይኾናል።

🥀በእርግጥም አለማመናቸው በእምነት የሚረዱትን ነገር እንዳይቀበሉት ዓለት ኾኖ ከልክሏቸዋልና እግዚአብሔር አምላክ ምሥጢሩን የሚረዱበትን ኃይል ገንዘብ የሚያደርጉበት ጸጋ ይስጣቸው ከማለት በቀር ሌላ ምን ሊባል ይችላል! ይህ መልአክ በሌላ ምሥጢር አዛርያ እባላለሁ ብሎ ከልጁ ጋር ጦቢትን ሲረዳ ይልቁንም እንደ ሳምራዊቷ ሴት ባሎቿ ጭኗ ላይ በሞት ይሰናበቷት የነበረችውን የራጉኤልን ልጅ ሣራን ከቁራኝ ጋኔን ሲገላግላት ዐይተናል። ይህም ሥራው መናፍስት ርኩሳንን እንዲቀጠቅጥ መሾሙን በግልጽ ያስረዳል። የከበረውን የሰውን ልጅ ሰውነት ለማርከስና ማኅደረ እግዚአብሔር መኾኑን አስቀርተው በክፉ ሥራቸው ሕዋሳቶቹን ተቆራኝተው ወደ እግዚአብሔርና ወደ መንግሥቱን የሚያይበትን ዓይን ለማሳጣት ርኩሳት መናፍስት ሲመጡ ቅዱስ ሩፋኤልን በትኅርምት ኾነን ስንጠራው እነዚህን ክፉዎች አጋንንት ያርቅልናል። ሰውነታችንም የተቀደሰ የእግዚአብሔር መቅደስ ኾኖ እንዲሠራ ያደርግልናል።

🥀መጽሐፈ አክሲማሮስም "...ወለፆታ ዐሠርቱ ስሞሙ መናብርት። ወሊቆሙ ቅዱስ ሩፋኤል እሉ እሙንቱ እለ ይቀልል ሩፀቶሙ እምነፋስ ወነድ። ለእለ ይፀውሩ ወላትወ መብረቅ ወኩናተ እሳት ዘይነድድ። ወአንበሮሙ በዳግሚት ሰማይ። ወእምዝ ነሥአ እም ሠራዊተ ሩፋኤል ፳ወ፬ተ ሊቃናተ። ወአቀሞሙ ዐውደ መንበሩ..." ይላል ትርጓሜውም "ዐሥሩን ነገድ ስማቸውን መናብርት አላቸው። አለቃቸውንም ሩፋኤል ነው። ረቂቅ የኾነ የመብረቅና የእሳት ጦር ይዘው ከነፋስና ከእሳትና የፈጠኑ ናቸው ... ከዚህም በኋላም ከሠራዊተ ሩፋኤል ሃያ አራቱን ሊቃናት መርጦ በመንበረ ስብሐቱ ዙሪያ አቆማቸው..." ዳግመኛም ከከበሩ ቅዱሳን ሊቃነ መላእክት አንዱ ሲል ነቢዩ ሄኖክ የተናገረለት ይህ የእሳታውያን መናብርት አለቃ ቅዱስ ሩፋኤል የሰውን ልጆችን ይረዳ ዘንድ ከአምላኩ ከልዑል እግዚአብሔር ብዙ ሹመት ተሰጥቶታል። እሊኽም ፈታሔ ማኅፀን፣ ዐቃቤ ኆኅት፣ ሰዳዴ አጋንን፣ ከሣቴ ዕውራን፣ ፈዋሴ ዱያን..." የተባሉ ናቸው።

ጻድቁ ሄኖክም "በበሽታ ሁሉ ላይ በሰው ልጆች ቁስል ላይ የተሾመ" መልአክ እንደ ኾነ ጽፏል (ሄኖ ፲፥፲፫)። በዮሐ ወንጌል ላይም እንደ ተቀመጠው ብዙ ሕመምተኞች ተጠምቀው የሚድኑበት በቤተ ሳይዳ የሚገኘውን የመጠመቂያ ውኃ በሳምንቱ አንድ ጊዜ ያናወጸው (ይባርከው) የነበረው መልአክ ቅዱስ ሩፋኤል ነበር። ዮሐ ፭፥፬። አንድም ፅንስ በማኅፀን ከተቋጠረ ከአርባኛው ቀን ጀምሮ ቅዱስ ሩፋኤል በጠባቆቱ የማይለየው ሲሆን አንዲት ሴትም የመውለጃዋ ቀን ደርሶ ምጥ በያዛት ጊዜ ሕመሙን የሚያቀልላት እና ማኅፀኗን የሚፈታው ይኸው መልአክ ነው። ከዚህም ሥራው የተነሣ "ፈታሔ ማኅፀን" በመባል ይጠራል።

ከቤተክርስቲያን ሊቃውንት መካከል ስለ ቅዱስ ሩፋኤል በሰፊው በመጻፍ የታወቀው ቅዱስ ዮሐንስ አፈወርቅ ነው። ቅዱስ ዮሐንስ አፈወርቅ በድርሳኑ "መራሔ ፍኖት" ብሎታል። ጦቢያን በቀና መንገድ መርቶታልና። "መልአከ ከብካብ" ብሎታል። ጦቢያና ሣራን ያጋባ ጋብቻቸውንም የባረከ በመሆኑ። /budge,1915 pp.526-533/ በዚህ ድርሳኑ ሩፋኤል የቅዱስ ዮሐንስ አፈወርቅ ጠባቂ መልአክ እንደ ኾነ ተገልጿል። "ለአንዲት ሰዓት ለግማሽ ሰዓት ለዓይን ጥቅሻም ቢሆን አይለየውም ነበር" ይላል። ዮሐንስ አፈወርቅን ወደ አርቃድስ ንጉሥ የላከውም ቅዱስ ሩፋኤል ነው። ንጉሥ አርቃድዮስም በቅዱስ ሩፋኤል ስም/ምናልባት የመጀመርያውን/ ቤተክርስቲያን ሠርቶለታል። ፓትርያሪክ ዘእስክንድርያ ቴዎፍሎስ /385-412/ በጻፉት /in raphaelem Archangelum/ ድርሳን ውስጥ የሚከተለው ታሪክ ተገልጧል። ፓትርያሪክ ቴዎፍሎስ ከንጉሥ ቴዎዶስዮስ ጋር የቅዱስ ሩፋኤል ቤተክርስቲያን በእስክንድርያ ከተማ እንዲታነጽ ጠየቁ።

🥀በመጨረሻም በሜድትራኒያ ባሕር በምትገኘው ጳጥሬስ በተባለችው ደሴት በቅዱስ ሩፋኤል ስም ቤተክርስቲያን ታነፀ። ይህ ቤተክርስቲያን የታነፀው ደሴት መስሎ በተኛ ዓሣ አንበሪ ላይ በመሆኑ ሕዝበ ክርስቲያኑ ለክብረ በዓል በሄዱበት ጊዜ ዓሣ አንበሪው ተነቃንቆ ቤተክርስቲያኗም ልትፈርስ ደረስች። ሕዝቡም ወደ መልአኩ ቅዱስ ሩፋኤል ጩኸታቸውን አሰሙ በዚህ ጊዜ ሊቀ መላእክት ቅዱስ ሩፋኤል ፈጥኖ ደርሶ ዓሣ አንበሪውን በሰይፈ ወግቶ ጸንቶ እንዲቆም አደረገው። ቅዱስ ቄርሎስ ፓትርያርክ ቴዎፍሎስ ያሠሩትን የቅዱስ ሩፋኤል ቤተክርስቲያን ጳጉሜን ሦስት ቅዳሴ ቤቱን አክብሮአል። ይህቺ ዕለት በዓለ ሢመቱም እንደ ኾነች ይረዷል።

🥀ዓሣ አንበሪው ደሴት መስሎ የተኛባት ያቺ ቦታ ቤተ ክርስቲያን ተሠርቶባታል። ዓሣ አንበሪው ሊያነዋውጻት ሲል መልአኩ በሰይፍ ወግቶ አጽንቷታል። ዓሣ አንበሪ በተባለው ዲያብሎስ ምክንያት መቅደስ ሰውነታችን በኃጢአት ተነዋውጾ ሊፈርስ ሲል መልአኩ ቅዱስ ሩፋኤል በምልጃው በትር የዲያብሎስን ፈተና ቀጥ አድርጎ የሚያቆምልን መኾኑን ብንገነዘብና ምልጃውን ከጥልቅ ልባችን ብንጠይቅ እንዴት ያምር!! የአብዛኛዎቻችን ሕይወት የተመሠረተው ደሴት እንደ መሰለው ዓሣማ መልካም በሚመስል ግን ባልኾነ የሕይወት ፍልስፍና ላይ ነው። በዚያውም ላይ የቅዱሳን መላእክት ምልጃ እንዳይረዳን የመላእክትን ተረዳኝነት ከሕይወታችን ገፍተናል። እግዚአብሔርንና የእርሱ የኾኑትን በሙሉ ለሕይወታችን አያስፈልጉም ብለን ተግባቦት አቁመናል። ከእነርሱ ይልቅ ከዓለማዊነትን ጋር ላለመላቀቅ ተጣብቀን ተያይዘናል። የሚያረካን ዘፈን እንጂ መዝሙር አይደለም፤ የሚስማማን ዘረኝነት እንጂ ክርስትና አይደለም፤ የምንመርጠው ምድራዊ ደስታን እንጂ ጣዕመ መንግሥተ ሰማያትን አይደለም። በማይቋረጥ ንውጽውጽታ ውስጥ ነን። ስለዚህ በቅዱሳን መላእክት ምልጃ የሚያፍገመግመንን ኃጢአት እናቁመው። ወደ ኦርቶዶክሳዊ ሕይወት እንመለስ። ይህ ነው ዓሣማውን ወግቶ ማጽናት!!