الشاعر كاظم العطشان

19 Jul 2022 05:50

يافشلة حمد والريل
لادگ اگهوه ولاهيل
لاظلت سنابل للگطه امخضره وشجاكم
مو فضحني الليل
چا بيّه اشيسوي لو طلع فجره
وتانيكم
شتانيكم

كاظم العطشان💜

الشاعر كاظم العطشان

13 May 2022 06:46

إلچم جرحك
إشما طاب تدري اشما تزيد الآخ
تكبر هيبة العطّاب

كاظم العطشان💜

الشاعر كاظم العطشان

03 May 2022 06:53

تحياتي لكم بمناسبة حلول العيد السعيد، كل عام وأنتم وسائر الأهل والأحباب بألف خير أدام الله عليكم نعمته وفضله
@tlbud

الشاعر كاظم العطشان

08 Apr 2022 01:06

. ابشّركم...!
برن كلّ الجروح اللاّمهن منكم
وابشركم
لگيت العافيه الغابت
عليّه اسنين من صدكم
ولاچني.. ولا چنهن .. ولاچنكم
گطعنه اهروشهه وماتت
بعد شللّي ابنبگ وفياي سدرتكم
جزركم مايهز جرفي
ولا روجة غوه وتتكحل ابمدكم
ولاتشهگ بعد ريّه...
وتحن الطيب ريحتكم
طوينه افراشكم يجناب
يوم الخبطت اعله افراگ طينتكم
ابشركم..
بدت قصة عمر ثاني
وحرگنه أوراق قصتكم ...!
تعالو ....... انغربل الماضي
ونصفّي احسابنه العدكم
تعالو...... انفك غزل صبري
هذاك الماصفه وي خيوط مغزلكم
أريد اشگد...نزف جرحي؟
وريد اسنين صبري الضاعت ابسدكم
وريد الواهس المشتول
ظل عطشان يم شطكم





كاظم العطشان💜

الشاعر كاظم العطشان

01 Apr 2022 00:14

. ذاتك صبخه.. ومالح طينك

شنهي الوازانه اعله اترابك

غلطه ايرد الدربك جدمي

وغلطه اچفوفي الدگت بابك

غلطه البايع يرجع يشري

ايهد الباز ويحوي اغرابك

گمره الدنيه وشاطي اعذيبي

چاليش انحنّ السردابك

ندريبگ يلّات وعزّه

وردينه انصلي ابمحرابك

**_ اللاة والعزة... صنمان عند قريش الجاهلية ٠



كاظم العطشان 💜

الشاعر كاظم العطشان

21 Mar 2022 19:59

لأمي... ولكل الأمهات الراحلات
•••••••••••••••••••••••••••••••••••••
خطار الحزن مافارگ البيت
وهلال الفرح ويه امي مدفون

چنهه امسافره ونتنطّر اتعود
يربي الموته هم بيهم يعودون ؟

لو منهه وبعد ماينفتح باب
والراحو بعد هيهات يلفون

امي التشجر التنور بالآه..
وأمي اعله المصيبه اتلولي وتهون

مانوّخ ظعنهه العسر الايام
ولاشبعت بطنهه وي اليشبعون

بس ضاگت مرار العوز لچمات
تفوّر الجدر خالي ابدمع العيون

تضحك من تلچهه اجروح دنياي
اوتحاذر ماتگول الليش وشلون

عجز بتهوفن ابلحن الدللّول
لوحه العجّزت بيكاسو باللون

أمي الكل شبابي اسنينهه اشموع
أمي الجنه ..وامي الدنيه والكون

ياچف الصبر بچفوفهه اندار
ياطور النواعي البيه يغنون
.............
..............


كاظم العطشان💜

الشاعر كاظم العطشان

03 Mar 2022 05:01

( قصيدة جديدة بعنوان ( مشينه)
________
مشينه اعله الخناجر خوف
وذنوب السوالف حوت تبلع واهس الملهوف
مشينه..... والجرح عريس
يضحك... والملح زافوف
وغبشنه ابخاطر المكسور
مدري الياحزن ماشين
مدري الياضريح انريد
لگينه اشموعنه ابلاخيط والديره ضواهه ابعيد
اثاري ابلا هله العنوان وديار الغرب تابوت
اثاري الدمعه مزة ليل..
أثاري الصفنه صحوة موت
تضفر بالظنون ازلوف
وذنوب السوالف حوت تبلع واهس الملهوف
اوحزَنَّه اعله الليالي البيض
حزن الگاع بحزيران... تتحزم عطش للگيظ
والصوت ابصداه ايلوذ
يامرسه اليدللي اشراع من ترعد ابحور الغيض
وعبرنه امعاند وي الريح
والخطوه نفس شايب
نفس بيهه السنين اتصيح :--
ياثوب العمر نفنوف
مايستر وكاحة شوف
والورگه التدوخ اتطيح
ومشينه اتطوف بينه الوين
لاعثرة هله ابفانوس تحضن چف المتيهين لاضحكه اعله جرف الليل تشبگ نعش المعرسين
وخذانه المامش وي الوين
وحنه ابكل سراب انتيه
مدري امن الضباب انضيع
لو غشوه ابطشاش العين
وسحگنه اعله الجمر حفاي
يابويه.... مشينه اهواي
يابويه... خسرنه اهواي
فر بينه الخلگ ناعور
نتسله بنعاوي الراح وتهزنه غناوي الجاي
حته العطش واسه الريج يجفل من زراگ الماي
ماغنه الگصب بالهور
بس جور الذبح مرات يشتل بحِّته اعله الناي
ولگينه الواهس ابلا ساس
وسروج الصبر تيزاب تشرب من صديد الكاس
فرحنه ومالگينه ابتوت
عشگنه وماعثرنه ابناس
غابه وكل شجر مشتول مشكول اعله ذمة فاس
وجرعنه الفزه جفلة طير
من شاف الطُعم مغشوش بعيون البيادر ذِل
وكرهنه امسامر الحلوات....
من خانت سواني الخل
فحطنه ولاسواحل شوف
گمره.... وتشتعل ... وتهِل
ولا مهرة بخت تشتاگ
يطرب شوگهه و تصهل
وصلنه....
وبس رماد الاوف
من طول الدرب مِثجِل
________
كُتبَت في ١/ ٣ / ٢٠٢٢


كاظم العطشان💜

الشاعر كاظم العطشان

23 Feb 2022 05:33

. الكاس مُرّ اوحلو
مو عسل دوم الكاس

والدنيه وكت اوكت
واللعبه داس وداس

والليل...اسود خلگ
لومه ابفجر ينجاس

هذا الدرب من تمر
عاگول تلگه وياس

والباس چفّك امس
هليوم چفّه انباس

وشبيك تمطر حزن
والشيب غطّه الراس

لاتشره اعله الوفه
مابيهم....... العباس



كاظم العطشان💜

الشاعر كاظم العطشان

12 Feb 2022 18:55

. احنه موش امسودنين
احنه بينه الدرب تاه
وبينه زاغ الشوف
من شح الحنين



كاظم االعطشان 💜

الشاعر كاظم العطشان

24 Jan 2022 16:54

. مره شفته

رشفته وحيل كلش مرشفته
ابخيالي وهيّه مره مره شفته
مره اكرب ابگاعه مره شفته
صحيت وبس صليل الوجع بيه
_____________________
ولاحس

بعد ماظل نفس بيّه ولاحس
ولا فرز الگعد يمّي ولاحس
ضمير الماصحه ولافز ولاحاس
يصحه ابنصبة الچادر عليه



كاظم العطشان 💜

الشاعر كاظم العطشان

05 Jan 2022 04:21

. ( ذمني )
___________________________
ذِمني..

اشما تذمني ارتاح ..!

يارخص الملامه ابشفّة المرتاح

اخضّر ع الشتايم عود

ماي اليفرح الفلاح

واشتلني اعله شفتك هيل

وشمحله المذمه من تطگ قداح

ذمني اشما تذمني ارتاح

يلسانك بخور اهنود

والنار التجيسه يشتعل فوّاح

حطني ابكل حظن منشار

گص بيهه الضلوع الواح

سوله... اعله المذمه ارتاح

ولا ذمّك...

وجيب العايزه ابطرواك

يانجمه وچذب تنلاح

من طبع السبوس ايطير

لو طشّه ابهوه المرواح

ويطيح الثگل للگاع

بس طبع اليخف ماطاح

وذبحني اعله جبلة حيف

وشكبره اليصير الحيف

من كون اليحب ذبّاح ..!

گطّعني ابمسه الگالات ...

تلگاني جديد ابكل جرف سبّاح

بير اشما تحوشه ايزود

لو ماي الركد ينزاح

ذمني اشما تذمني ارتاح ..!




كاظم عطشان💜

الشاعر كاظم العطشان

26 Dec 2021 18:58

شهگ بيّه الحزن بسكوت

مثل الماي

سكته اعله السواجي ايفوت

زتاني الوجع لليل

ها ياليل.... ماردّيتلك زاتوت ؟!

ها ياليل...

نشغات الحزن ميلاد

چم ميلاد يبدي ابزفة التابوت

ها يابوي.....

ليش يغيب بيك الصوت

وتخضّر الصفنه أشباح

ياكل السگف من طاح

اجناح المايعوضه اجناح

بچيتك والدمع صيهود

خيعونه اعله طبعه الغيم

بس يمطر دمع يرتاح

يا أول ثمر بالروح

ياسفرة عشگ للعين

يا آخر غصن تفاح

ياسبّاح عمري ومن گطعت الماي

بيش ايخضّر السبّاح

مو نشغة سفر ونساك

لاولله ..

الحزن دگ اعله وجهي ارسوم ماتنزاح

ياليرة بخت للعوز.... لاتشره ولاتنباع

يابويه... امنهد فرگاك

طشيت العطش ع الكاع

اشمّن ريحة اهدومك..

وشمّ بيهن...تعب دنيه وحزن نعناع

اشم بيهن صبر متعوب

صاغ امن الضلوع اشراع

ها يابوي.....!

ظل طيف العمر ملگاك

الله اوياك ..

يلماخذ فرحنه امتاع



كاظم العطشان 💜

الشاعر كاظم العطشان

12 Nov 2021 06:06

. ( لن أبقى هكذا )
________________________
متى تَستَفيقُ الصحارى

على صَهيلِ الرعدِ وإيقاعِ المَطر

متى يَصحو الوَهمُ ... مِن كأسِ السرابِ

مِن وَجَعٍ مُعَتَّقٍ بِخمرِ العذابِ

حتى أترعُ اليقينَ كؤوساً.....

من دنانِ الصبر

أنا لا أحبُّ برزخَ الأحلامِ

ولا باهتَ الألوانِ....

ولا حقائبَ الفجرِ

لنْ أبقى هكذا

لن أبقى على ذِمةِ الشراعِ مُسافِراً

ولا أرهنُ أشرعتي على ذمةِ البحر

لا.... لن ابقى هكذا

أُُحلِّقُ واهِماً في قفصِ الهَواجسِ

ليلي ك ليلِ السجينِ

وغِنائي كأيقاعِ الجَنائزِ

وغنائي كأحلامِ العوانس

دُلَّني....

أيها المَلاّحُ....

التائِهُ....

الثَمِلُ

على ضفافٍ

تستريحُ بها جراحات النوارسِ

دلني على رِئةٍ

لاتسكِنُها أعقابُ السَكائرِ

دُلَّني...... على كحلِ الحالماتِ

على عشقِ ليلى...

على حلمِ العذارى

على ضفائرٍ يَثمِلُ فيها ليلُ العرائسِ

لا....لا.... لن ابقى هكذا




كاظم العطشان 💜

الشاعر كاظم العطشان

02 Nov 2021 21:41

. وكأنَّ عِطرهُ إستَعبَدني ...! _________________________
فايح يبستوگة عطر
وادلال ريجك فايحه
ولوله ضحكتك بالحلم
چا هسه تقره الفاتحه
_____________________
عگبك حماماتي بچن
وخلافك اهوايه حچن
والبارحه اطيوفك لِچَن
لعبن عليّه البارحه
______________________
يقطاعي وبحسنك فِلِح
مشتاگ جرحي اعله الملح
گلبي ايتنومس بالجرح
بس كون زلفك جارحه
______________________
سالوفه من حلگ ابدوي
مملوحه يلبيهه ارتوي
آخ اشملذّك بالچوي
تچوي...وگول امسامحه
______________________
ياعنب يل ريجك خمر
عمرين اريدك مو عمر
تسقط اذنوبك من تمر
كلهن الجيتك طايحه




كاظم العطشان 💜

الشاعر كاظم العطشان

24 Oct 2021 12:36

. لأحبابنا الراحلين دون وداع
________________________

كل شي ايموت ...!

كل شي ايموت ...!

بس تبقه المواقف عايشه

ويبقه الاثر والصوت

كل شي يموت...!

بس يبقه الذهب نيشان

بچفوف الطواري ابتوت

اشكثر بينه..

تمر اعيون.....

ورسوم .........

وصور ............

وبيوت ................

ننسه المايمر ع العين

بس غفله

او نذكره ابشيلت التابوت

انهجم بيتك يدمعي

اشگد تزت احباب

خلّصت العمر زاتوت




كاظم العطشان💜

الشاعر كاظم العطشان

21 May 2022 08:52

وطني أنقذني من مُدنٍ سرقت فرحي


مظفر النواب

وأخيراً عاد النواب إلى العراق

الشاعر كاظم العطشان

06 May 2022 12:33

ها ياحزن
دگيت بابي النوب مو زنجر سوادي
وبدّليت الثوب

كاضم العطشان💜

الشاعر كاظم العطشان

11 Apr 2022 21:15

وإن اعتذَرَتْ الريحُ ، سيبقى الغصنُ مكسوراً ٠
____________________
سايسيتك

زيبگ امسودن شكظّك

كظّت الغربيل من يحضن الماي

وياجموح المهره بيك

اشما تعتني ابلايه راي

وسايسيتك

لاني گصبه ابهور ظلت

لاني بشفافك الناي

وخاصمت روحي وتبعتك

بين غلطه....

وبين ظني ....

ومستحاي

وگاودتني ..... وطاوعيتك

شفتك ابعز ّ الظهاري

اتدوّر ابصحره ال افياي

وعلجروح اتريد ترگص

گتلك ارگص.... گلبي مات

المات مايسمع بچاي

الوادم ... اشمدريهه بيّه

الوادم ... اتغرهه ضحكتي

الوادم...... امصدگه غناي

وبلچذب تضحك ابوجهي

اوبلصدك تطعن گفاي

وسايسيتك.....

چم شمع يطفه اعله چفي

وچم زفير الاووف من يخنگ ضواي ؟

ونته طير ابلاشجر وكت الغروب

لاتحط ترضه اعله ذيچ

ولاتحط ترضه اعله هاي ...!

وماكسرت ابخاطرك ومشي وراك

ولاشبرت اسنين عمري

الفحطن وظلّن وراي

وانه هسّه ابير يوسف

لاوحي ايسامر وحشتي

ولاظعن بالسچّه جاي

وسايسيتك...

يابعد هاي وي هاي
__________________________
من ديوان سفر دخان


كاظم العطشان 💜

الشاعر كاظم العطشان

04 Apr 2022 23:48

. يا خافقي المذبوح
على مغتسلِ السؤال
ماذا حصَدتَ من حقولِ الليلِ
بيادرا من الوهمِ
أونعيما من الخيال ...!!؟
ماذا غَنِمتَ من الحلمِ
سوى الدخان والشك والمُحال ....!!
ياخافقي المفجوع
لاتَبني ...
على رمالِ الوهن قصراً
فللصخورِ لغةٌ ...
لا تفهمها أذن الرمال



كاظم العطشان💜

الشاعر كاظم العطشان

23 Mar 2022 06:19

يلفاگد عطر ملگاك
وين الگاك...!
ويهون العطش للماي
بس اشلون يبن امي
ابعطش فرگاك


كاظم العطشان 💜

الشاعر كاظم العطشان

05 Mar 2022 06:34

إلى/ الجعجعة الفارغة.... الكبار اقزاما... شعراء البالونات نفخا....
مع تحية الازدراء
______
فصّل الخام..........اعله گدّك

وزرع احلام.........اعله گدّك

تستراح ......

وحته ماتحصد تعب

ولاتسولف ع السوار

ولا تمس خد التراچي

من يمر طاري الذهب

يارعيع.... البرحي عالي

وماوصل حظنه الكرب

گمبره...

وبعدك الحيمي

انته وين.....

اتسولف ابطاري السمه.....؟

انته عايش ع الرعيد

وچي بلاش... الوادم اتلمّك چِمَه

يامنصَّه البچت شعرك ...؟؟

يانده اليبچي اعله عطرك....؟؟

ونته عاگول البراري

البايت بحلگ الضِمَه

ياغشيم

المايشوف الناس نجمه

النجمه ماتشتاگ لعيون العِمه




كاظم العطشان💜

الشاعر كاظم العطشان

28 Feb 2022 19:41

. آنه بين الليل والغبشه مراسي

امناطر ارسومك حلم

وانتظر كحلة صباحك

كحلة الفرگه دمعهه

وكحلة الملگه وشِم

وابگه عايز مستحاتك

صفنتي امفرعه اعله طولي

وانتظر طولك هِدِم

حته لو عاگول تجرح...

جوري اگولن.... لاتظنّ ازهگ وذِم

وللله ماتلگه ابغلاتي

ولا ضميري ولاحلاتي

من تظل عمرك تِلِم

ولا مثل ريحة سماري ...

ريحة اگرنفل تِشِم

وللله ملَّتني المراسي...

امناطر ومامش حلم




كاظم العطشان 💜

الشاعر كاظم العطشان

21 Feb 2022 20:10

. أوقدتُ من شراييني شموعاً

فخُذ عني بعيداً شُموعَك

قد قطعتُ من الفجرِ شوطاً

وفجري ...

لايحتِملُ ليلَ رجوعك

مَندِيلُكَ المبلول..

لا يُثيرني

تلكَ دموع التماسيحِ دموعك

سأستميحُ العُذرَ من عِطركَ

وأبتِرُ كفّي عن ذِراعكَ

قد مَخَرَتْ عُبابَ اليأسِ سفينتي

فلستُ بحاجةٍ لِشراعِكَ

الريحُ صافَحَني

والموجُ هادَنَني

إرحلْ ...

لِمثواكَ ياهذا

لاينقصُ عافيتي إلاّ وداعكَ



كاظم العطشان 💜

الشاعر كاظم العطشان

05 Feb 2022 16:25

. ( هذا انته )
_____
بوگني من الليل نجمه

وطوُف بيّه اعله السوالف

وشملذ السالفه التطلگ همس

عيني وكحة شوف يطربهه سمارك

وليسرّ العين.... تهواه النفس

شنهي ليلي ابلا عذابك

ماني اتعنّه السرابك

وترس ابجودي ترس

بس ضبابك شرب من عيني ضواهه

الماتزيحه الريح وچفوف الشمس

يا نسيم العافيه وحسنك اقطاعي

يمته تمطر هله ابگاعي

والمطر للگاع من تِمحِل.... عرِس

ونته بربين الضمير النشف مايه

وياضمير النشف مايه ومايبس

ونته شوگ البات ماظل اعله طعمه

وكل لذيذ البات.... مايسوه فلس

هذا إنته....

ومن تمر نسمة طواري

اطوير ويحوم اعله عشه

ومن يمر اسمك يهدهد

چني معزوم اعله جنه

ومن اجيك ابكل جهنم ماتحس

وهسه ذني البيّه طابن

بلله گللي اشلون... بجروح الامس .؟!



كاظم العطشان 💜

الشاعر كاظم العطشان

19 Jan 2022 19:01

. رِحلةُ الدُخّان
""""""""""""""""""""""""""""""""""""""""
فِنجانٌ.... ودُخان

وخيالٌ يَحبُو من بَعيد

يَغتالُ المسافاتِ

ويَلتَهِمُ الطُرقاتِ

يُهمْهِمُ بِلُغةِ لا أفهمُها

كطِفلٍ وَليد

ماذا يُريد....!!

يقتربُ.....يَدنُو مِني

فيتصاعدُ معَ الدُخان

كأمواجِ قَلقي

يَتَلوّى........ يَستديرُ

يتلاشى...... ثم يغيب

فأصحو مع أوَّل خَيطٍ جديد

ثم أتلاشى وأغيب

فأعودُ .....

أعودُ كخيطِ هِلالِ العيد

والدُخانُ يَعيد ...

رِحلةٌ لمْ تنقطعْ قافِلتُها

وخافقي مُسافِرٌ معها

يَعبرُ السُدودَ... والحُدودَ....والحواجز

بانوراما ...بانوراما

عرائسٌ.... ودبكاتٌ

ودموعُ... وجَنائِز

وأطيرُ مع الدُخان

وأغضَبُ.....

وأشتِمُ

وأُدردِمُ ....... بِلُغةِ العَجائِز

لمْ يرنّْ هاتِفهُ الى الآن

بَرَدَتْ قَهوتي...

ولَمْ تكتَمِلْ قَصيدتي

ولَمْ يَنقطْعْ الدُخان



كاظم العطشان💜

الشاعر كاظم العطشان

01 Jan 2022 05:24

سنة جديدة مليئة بالافراح بعيدة عن خيبات الظنون ويارب عام سعيد عليكم نتمناه بالخير والعافية


@tlbud
2022/1/1

الشاعر كاظم العطشان

18 Nov 2021 20:24

. من ديوان چف رماد حاليا في مطابع القاهرة
( محطات من ذاكرةِ الوجع )
__________________________

المحطة الأولى

احنه فقره
وراية الله اشراعنه
لانذم بلماشرانه
ولانشگ زيج البخت ع الباعنه

2

مامعذور
يلشمعك نذر للناس
چا تگضي العمر منذور
مامعذور...
ياگلبي درد وياي
متعود ترد مكسور

3

ها.... ياحزن
دگيت بابي النوب ...!
مو زنجر سوادي
وبدّليت الثوب

4

آنه ويّه العيد شنهي
الفرح بيني وبينه دم

5

ليش ياتالي الدلال
ليش دمك عندي كعبه
ودمي عندك دم غزال !!

6

ياكل العطش والماي
موتگصي اويحالي ابحيل
ها... ردتك چتل بهداي
حته اتلذّذ ابموتي
شحلات الموت بيد اهواي

7

تعال انجاسم الضحكه
مثل خبزة الفقره
ابعصرة العوز

8

لاعبتني.. لعبة الحيّه ودرج
لاني صاعد
لاني نازل
لاني عثران ابفرج

9
هاي .....موش اوجوه اهلنه
ذوله ملگاهم غريب
امبيّن ال ينگط محنه....
وها يگلبي اشعدنه يمهم
يلله نمشي العوض بلله
ولاتگول اهناك. چنه

10

من تدر اشفافي حنظل اذكر اسمك
وهجس ارياگي عسل
والريحه صندل
يابعد شيبي تعال
ادروبي خضره
وعينك الزعلانه تندل

كاظم العطشان 💜

الشاعر كاظم العطشان

08 Nov 2021 21:46

. گلت اشِل جرحي ابضحكتك
واصبغ الشيب ابكحلتك
لنهه غبشه....
وطارش اخيالك عُبَر
ياحلو......
اتهدّه اعله هونك
كل حلو ايوشّل تره ابتالي العمر




كاظم العطشان💜

الشاعر كاظم العطشان

30 Oct 2021 10:13

مقطع من قصيدة...( مر قطارك )
""""""""""""""""""""""""""""""""""""""""""""""""
...............
.................
وكابرت... وشكابرت چن غيمه طاحت

والفشل ذوّب شمعتي...

ومنهو گال ابنار ذابت

وحترگ كل شي اعله چفي

وريحة الشعواط فاحت

شفت وادم...

تاهت ابحظن الملاگه

أوادم ابلا حظن تاهت

ناس تضحك......

ناس تبچي

وناس من همهه استراحت

مر قطارك...

لنهه روحي الوكحه خرسه

خرسه من شوگ انتظارك

من رصيف الماشبگ رصعة خيالك

من كحل مغتاض مالاگ السمارك

ونته وين......اتريد وين ؟؟

الياكتر شايل اهلالك..

ونته وين.... تريد وين..؟

هذا محرابي اعله طولك

صللّي كون تريد دين

ومر قطارك....

ماگلت...... باع وشريته

ولاگلت.....حنظل لگيته

ومدري ليش

الحنظل ابريج الملامه ايصير تين

ومدري ليش...

اتخضّر اهروش ابغربتي لو خبط چفك الطين

ومدري ليش

ومر قطارك.

كاظم العطشان 💜

الشاعر كاظم العطشان

22 Oct 2021 05:23

. مو هچي الفراگ ايصير
مو هچي العشگ ينباع
مستعجل تريد تروح...؟
چا گبل الفراگ اوداع
المثلك مايغمض العين
مثلك.. مايغيب ابساع
ياصرّة عجوز ابعوز
يهلال وهوه اعله الگاع
چفّنه القوافي ابليل
ماظل بالشعر نعناع

كاظم العطشان 💜
الرحمه لروحك