2652
ومن طين العراق جسدي، ومن ماء العراق. - السيّاب. سايات : @PlusEvebot
"الحاجات بتيجي أول ما نبطل ندور عليها أو نستناها، السؤال بقى هل لما هتيجي هايكون لسه جوانا نفس الشغف؟"
- أحمد زكي.
اخر خسارة لليابان بدور مجموعات كأس اسيا كانت سنة 1988 واليوم العراق كسر هذا الرقم، الف مبروك فوز باستحقاق والقادم افضل ان شاء الله.
وبهاي المناسبة اتمنى يصير اكو تحرك تجاه اللي يرمون سواء بعد فوز المنتخب او بالاعراس او الفواتح او اي مناسبة، وأدعم أي قانون متشدد تجاه هيچ كائنات ما تستحق تعيش.
أعتقد أن أهم شيء أدركته على مر السنين هو أن الكثير من الناس يهابونني. تعلمت استخدام ذلك ضد الناس، خاصةً بمجرد أن تدرك أن خصمك ليس مستعدا ذهنيا للعب من أجل الفوز، لذا يمكنك أن تحصل على الكثير من الفرص.
أثناء المباريات، يكون استشعار الحالة العقلية لخصمك مفيدا جدا. خذ مبارياتي ضد ويسلي (أحد أفضل لاعبي العالم) كمثال. عندما واجهته، دائما ما كنت أمنحه فرصا للعب حركات محفوفة بالمخاطر وهو تقريبا لم يستغلها أبدا. هذا يعني أن لدي ميزة نفسية هائلة تجعلني متفوقا عليه. هو لاعب رائع وفهمه للعبة ربما لا يكون أسوأ من فهمي لكنني قادر على التفوق عليه لأنه ليس على استعداد لتحمل المخاطر.
إن عدم الاستعداد لتحمل المخاطر هي استراتيجية محفوفة بالمخاطر، لأنه يعني أنه سيتم التفوق عليك وتخويفك.
- ماغنوس كارلسن، المصنف الأول عالميا في الشطرنج، في حديث ينطبق على الشطرنج والحياة عموما.
بيوم الاحتفال باللغة للعربية وتحديدا يوم 18 من الشهر الفات شفت كثير يحتفلون عن طريق التغني بمقاطع على شاكلة "ألمٌ ألمّ ألَم إلى بقية الخُرم.." وصوت صفير البلبل ومنحولات امرؤ القيس الأشبه بالطلامس، وغيرها من أنواع الكلام المتكلف والركيك، فعليا اللي سووه أشبه بأنك تروح تهني شخص بالبيت الجديد مالته وتگله حلوة سلة الزبالة مال البيت.
وبشكل عام، الألفاظ المتقعّرة والغريبة عمرها ما كانت تدل على جمال أسلوب كاتبها أو اتقانه للغة، اللغة العربية أوسع وأرفع وأغنى من هاي الأمثال اللي ترست مواقع التواصل.
بكتاب البيان والتبيين، ينقل الجاحظ كلاما للبشر بن المعتمر في نصحه لمتعلمي الخطابة، يقول "وإيّاك والتوعّر، فإن التوعّر يسلمك إلى التعقيد، والتعقيد هو الذي يستهلك معانيك، ويشين ألفاظك. ومن أراغ معنى كريما فليلتمس له لفظا كريما."
وقال ثمامة: قلت لجعفر بن يحيى: ما البيان؟ قال: أن يكون الاسم يحيط بمعناك، ويجلِّى عن مغزاك، وتخرجه عن الشّركة، ولا تستعين عليه بالفكرة. والذي لا بد له منه، أن يكون سليما من التكلف، بعيدا عن الصنعة، بريئا من التعقد، غنيا عن التأويل."
المصيبة اليوم أغلب العوائل صار معدل أبناءهم مجرد شي يتفاخرون بي گدام الناس ومنافسه بينهم، اللي يجيب معدل ٩٠ و ٨٥ صار فاشل ويترزل وينسب ويتحاسب، لو تجيب ٩٨ لو انت فاشل!
مهما كانت نتائج ابنائكم ادعموهم وافرحوا بيهم لان الحياة ما توگف على السادس ولا القسم الجامعي والتعيين، الطرق هواي والحياة دائما تنطي فرص.
"ليس المُهم كيف ماتَ الحُسين، اعتقد علينا أن نسأل لأجل ماذا مات الحُسين."
*اللوحة للرسام الإيراني روح الله الأمين.
"أوبنهايمر أفضل وأهم فيلم في هذا القرن. إذا شاهدت فيلما واحدا في دور السينما هذا العام، فينبغي أن يكون أوبنهايمر. أنا لست من جماعة نولان، ولكن هذا الشخص ستنخلع أبواب الصالات من شدة الإقبال على فيلمه."
- المخرج وكاتب السيناريو بول شرادر حول رأيه عن الفيلم.
فيلم "أوبنهايمر" توفر بالسينما، تطبيقات السينما تعطلت خلال فترة الحجز على الفلم، السيرفرات توقفت عن العمل والقاعات حجزت بالكامل.
الفيلم فيلم سيرة ذاتية للعالم الأمريكي أوبنهايمر، مدير مشروع مانهاتن وهذا المشروع أنتج أول قنبلة نووية بالتاريخ، لذلك أوبنهايمر يلقب ب "أبو القنبلة الذرية."
أغلب مواقع التقييم أعطت علامة كاملة أو قريبة من الكاملة للفيلم، يقال ان مخرج الفلم كريستوفر نولان استخدم وسائل تصوير حديثة للفلم، انفجارات نووية حقيقية بدون cgi الخ..
كريستوفر نولان بنفسه قال:
"بعض الناس الذين شاهدوا فيلمي "أوبنهايمر" غادروا صالة السينما وهم محطمين تماما، ولم يستطيعوا الكلام، مستطردا: قصة أوبنهايمر كلها أسئلة مستحيلة، ومُعضلات أخلاقية، ولا توجد إجابات سهلة في قصته، هناك فقط أسئلة صعبة، وهذا ما يجعل القصة مُقنعة للغاية."
الفيلم يواجه حملات تشويه من قبل اليساريين لأن "طاقم العمل لا يحتوي على أشخاص من ذوي البشرة السمراء وأتهموه بالعنصرية على الرغم من ان الفيلم مثل ما ذكرت سابقا هو فيلم سيرة ذاتية، يعني نقل لوقائع تاريخية لا يجوز تحريفها لكن على ما يبدو ان اليساريين ما عندهم مشكلة ان يحرفون التاريخ من اجل اجنداتهم المريضة. اليساريين وصلوا لدرجة من السفاهة بحيث ان فلوس الحملات ضد الفلم اكبر من ميزانية الفليم نفسه.
تسريب اسئلة الفيزياء مو مفاجئة ابدا، مجرد نتيجة للعشوائية الماشي بيها العراق من سنين، اسئلة تتسرب قبل ايام ايام من قبل مدرسين و معاهد كاملة بسبب علاقاتهم مع السياسيين، اخطاء فادحة لغوية و علمية باسئلة المتميزين و اسئلة محذوفة من المنهج و اثرائية يتفاجئ الطالب بوجودها امامه بالامتحان الوزاري.
عموما، هيچ اشياء تضر بسمعة العراق التعليمية عالميا و راح يجي يوم شهادة العراق ماكو دولة تعترف بيها و يصير الدارس والما دارس ثنينهم بدون شهادة.
العراق نحو الهاوية بسبب الكلاونات اللي يحكموه.
أضحى مبارك وكل عام وانتم واهلكم وكل اللي تحبوهم بالف خير وينعاد عليكم بالصحة والسلامة. استمتعوا بالحياة بأقصى قدرتكم وتذكروا دائما ماكو أهم من الناس اللي تحبوهم.❤️
Читать полностью…
هواي اشوف شباب وبنات يختارون صفات شريكهم بالزواج على حسب مخاوفهم تجاه الشريك مو على رغابتهم بي، بمعنى انك تشوف الشاب يدور على بنت مابيها الصفة او السلوك كذا وكذا والبنت تدور على شاب مابي كذا صفة وكذا سلوك
لا شك بضرورة هالشي بس المشكلة لما يكون مركز "النفي" يكون هو المركز اللي تنبني عليه المعايير.
"هي راح تكون زوجة جيدة الي لو مابيها هالصفة"، هذا الكلام يعني ان خوفك يتحكم بيك بخيار حرج مثل الزواج ويدفعك لنسيان او تناسي الاشياء اللي تريدها بشريكتك.
نيتشه يگول:
على المرء الذي يقدم على الزواج أن يطرح على نفسه السؤال التالي: "هل تعتقد أنك ستظل تجد محادثة ممتعة مع هذه المرأة حتى آخر العمر؟ كل شيء عدا ذلك يكون عابرا في الحياة الزوجية، الزواج محادثة مطولة."
الزواج معادلة صعبة وعلاقة معقدة مو سهل تدخلها بخوفك من صفات او سلوك بس.
سألت كل اصحابي العايشين خارج العراق، خصوصا اوربا عن الاجواء بمناسبة عيد الحب
كلهم أكدولي ان الاجواء عادية وحالها حال أي يوم، والسؤال هنا ليش بالعراق اكو مبالغة بالاحتفال طلاب الجامعات كل شوي مسوين ترند والمحلات كلها دباديب حمر وهالخريط
ماكو تفسير غير ان المجتمع العراقي مجتمع استهلاكي ومشوه ومحروم.
"اللهم اجعل بيننا وبين فارس جبلا من نار لا ينفذون إلينا ولا ننفذ اليهم."
- عمر ابن الخطاب
اليوم أعلن كلوب انه ماراح يستمر بتدريب نادي ليفربول، انتهت أعظم منافسة بين مدربين بتاريخ كرة القدم، منافسة بدأت من 2014 بين بيب غوارديولا و يورغن كلوب وانتهت بهذا اليوم.
Читать полностью…
ايريك سبوليترا، مدرب نادي ميامي هيت (يلعب بالNBA) اتفق وي زوجته -نيكي- على الطلاق، وحسب القانون الأمريكي ف زوجته الها حصة 50% من كل ما يملك حتى راتبه السنوي تاخذ نصه.
بنفس الوقت، ايريك متفق وي نادي ميامي هيت على عقد جديد براتب 120 مليون دولار بدل عقده القديم 15 مليون. زوجته تعرف بقضية العقد الجديد لذلك قررت ان تماطل بالطلاق علما العقد الجديد يدخل حيز التنفيذ وتربح 60 مليون دولار بدل ال7 ونص اللي المفروض تاخذهم.
ولان ايريك مدرب قديم لهذا النادي ومحبوب من الادارة، ادارة النادي قررت تماطل هم بقضية التجديد وطلعوا اشاعات ان هم انسحبوا من مفاوضات تجديد العقد و ايريك راح يصير بدون وظيفة.
زوجة ايريك صدگت الاشاعات هاي وكملت الطلاق وحصلت 7 ونص مليون دولار ووراها گبل نادي ميامي أعلن عن تجديد عقد ايريك ب120 مليون دولار (بالمناسبة هذا اعلى عقد بتاريخ الNBA) وماراح تحصل منهم ولا فلس.
مشهد بيبر بوتس وهي تحمل قناع بدلة آيرون مان مستوحى من مشهد حقيقي، مشهد فيفان سينا وهي تحمل خوذة أخيها ايرتون اسطورة الفورمولا وان وهي تبكي على وفاته بعد ان لقي مصرعه أثناء السباق.
Читать полностью…
الإحتفال بالسنة الجديدة كأصل بدأ حتى قبل ميلاد المسيح ب45 سنة وتحدد يوم 1 يناير كبداية للسنة بأمر من يوليوس قيصر. مو شي ديني ابدا وحتى لو يعتبر ديني هم فقد دلالته الدينية وصار شي عام بكل الكوكب وحتى حلال شرعا بفتوى من السيد السيستاني.
من يجي محرم الحسابات الممولة من العتبة ومجلس المحافظة ينشرون المسيحيين اللي يشاركون باجواء محرم وصورهم تترس التايملاين بكل مواقع التواصل الاجتماعي علساس هم كيوت ويتقبلون الكل وبأول فرصة طلعت حقيقتهم. وطبعا بمحرم لازم الكل يتعاطف، والمكونات الباقية تلغي كل احتفالاتها ومناسباتها حتى ما تنجرح مشاعر كم نفر حاكم الناس بالمليشيات والابتزاز وبالي الوادم بعقد نفسية مدتها 10 قرون كاملة على روس الناس.
الناس وحرمانهم بحجة "قدسية المدينة" مجرد رفسات حمير تريد تگول احنا موجودين، قدسيتيش هاي اللي يهزها عزف كمان وشجرة؟ وبعدين وين چانت القدسية من فاز نصيف الخطابي بالانتخابات واللوگيه مالته طلعوا للشوارع يحتفلون ويهوسون؟
لأول مرة بتاريخ البشرية، لأول مرة بتاريخ العلم، العلماء تمكنوا من تخليق نموذج جنين بشري عمره 14 يوم بدون الحاجة الى بويضات من أنثى بشرية ولا حيوان منوي من ذكر بشري، النموذج فائق النجاح لدرجة أنه أطلق هرمونات وجعل اختبار الحمل إيجابيا. الجنين ممثل في الصورة باللون الازرق والمشيمة باللون الوردي.
Читать полностью…
البوست السنوي بمناسة نزول النتائج:
بما ان اليوم النتائج، ولان الوزارة اكيد مثل كل سنة ماراح تعرف توفر موقع مال اوادم للنتائج، فلازم انت هنا تحس باكثر من 450 الف طالب ينتظر نتيجته، السيرفرات ضعيفة وماتتحمل يطبلها كل هذا العدد بوقت واحد سوية، ما الها داعي تفتح الرابط علمود تعرف صديقك شگد معدله، انتظره هو يگلك شگد معدله. وماكو داعي تفتحين الرابط حتى تعرفين بنت عمتچ جابت طبية لو لا، هي راح تگول من تحصلها. وماكو داعي ببيتكم تفتحون رابط النتائج بنفس البيت من 10 اجهزة، واذا طلعت نتيجتك سد الموقع واطلع لان غيرك اعصابته تالفه وينتظر نتيجة تعب سنة أو اكثر.
منظمة DRC منظمة دنماركية غير ربحية "مجانية" تابعة لمجلس اللاجئين الدنماركي ومهمتها بالعراق تنفيذ اعمال تنموية وانسانية.
بالبصرة تحديدا، المنظمة تنشط بمجال تحديد و تفكيك الالغام و المخلفات الحربية مثل الصواريخ الغير منفجرة.
مشكلة الألغام ومخلفات الحروب مشكلة قديمة بالبصرة وأهل البصرة نفسها خسروا هواي ضحايا بسببها والشركة چانت تزيلها بشكل مجاني كمساعدات للعراق. هذا هو جزاء احسانهم؟
مادام حكومة العراق ساكته عن تصرفات شعبه الهجمية، مصيرنا ننعزل عن بقية الكوكب نخسر الدعم العالمي ونخسر فرصة ان شركات مثل apple أو BMW أو أو أو تفتتح مصانع بالعراق.
موضوع الحر ما يتعلق بالعراق بس، حاليا اكو موجة حرارة تاريخية تضرب الكوكب، وغالبا راح تطول.
Читать полностью…
اغنى رجل بالعالم ومالك تويتر، ايلون ماسك غرد بتويتر وگال اريد قتال بالحلبة ضد مارك مالك الفيسبوك والانستگرام ومارك وافق على النزال.
النزال صار شبه رسمي، دانا وايت رئيس اتحاد الUFC للفنون القتالية وافق يقيم النزال، ومتوقع المباراة هاي تكسر الرقم القياسي بعدد المشاهدات بتاريخ الفنون القتالية.
منو تتوقعون يفوز؟
الأكل خارج البيت خصوصا الوجبات السريعة:
اولا: 99% من المطاعم مايسوون مطابخهم مكشوفه للزبائن مثل هواي مطاعم باوربا والخليج، لان مقدار الوصاخه مستحيل احد يتوقعه لدرجة ان بعض المطاعم ما تغسل الخضروات اصلا، حتى مفتشين الصحة من يطلعون كشف يرضوهم بغده وكم فلس، وبالنسبة للمواد المستعملة فهي اردأ المنتجات لان ارخص واغلبها قريبة جدا للاكسباير اذا مو اكسباير.
ثانيا: الجبن مجرد معجون بنفس طعم الجبن الحقيقي
ثالثا: خالي من أي فائدة غذائية تذكر + كله دهون مشبعة ضارة بشكل بشع والدهن يگلون بي الف مرة وما يتبدل ابد لحدما يخلص ويضيفون جديد وهكذا
رابعا: الفلوس اللي تدفعها مقابل هذا الاكل تكون فلوس بنفس سعر المواد الطبيعية اللي بالسوق + ايجار المكان + التغليف + العمال + الشيف + الدليفري الخ.
طبعا التغليف مال المطاعم مصيبة يضر البيئة بشكل مرعب وكمية ورق وبلاستيك اللي يستخدموه يحتاجله منشور وحده.
النتيجة صحتك خربت + ميزانيتك خربت + بيئة العراق صارت اكثر تلوثاً بفضلك لان زودت النفايات اللي راح تنحرق بعدين لان بالعراق ما عدنا نظام اعادة تدوير.
اذا عندك صديق مشتغل سابقا بهذا المجال وسألته راح يأكد كلامي، روح اتسوق بنفسك واشتري مكونات طبيعية انت تشتريهم بايدك وتعلم تسوي اكلك بنفسك، راح تكلفك سعر اقل وافضل لصحتك وافضل لبيئتك.
لمصلحة الطلاب، صار تعاون ما بين هاي القناة وقناة دوبامين، سوينالكم سلسلة "شلون تدرس بتركيز عالي لفترات طويلة"
السلسلة أربع بارتات مفيدة وفعالة لكل الطلاب وخصوصا طلبة السادس والجامعات وكلها خطوات عملية بس تبدي تطبقها راح تشوف فرق.
- البارت الأول
- البارت الثاني
- البارت الثالث
- البارت الرابع
بالتوفيق لجميع الطلبة
هذا الشخص سوه تجربة اجتماعية بالتيكتوك، نشر فديوات ثنين، فديو موجه للنساء والسؤال چان بي: شنو ردة فعلچ اذا رجلچ اجه وگال احبچ من كل گلبي وانتِ خوش امرأة بس انتِ سمينة وجسمچ ما عاجبني واني ما عندي انجذاب الچ بسببه.
الفديو الثاني موجه للرجال والسؤال چان بي: اذا مرتك اجتي وگلتلك انت سمنان وجسمك بالنسبة الي مشكلة وما عاجبني وما اشوفه جذاب بعد.
بطبيعة الحال، التعليقات عند الجنسين انقسمت لردود ايجابية وسلبية.
عند الرجال، 87% منهم چانت ردودهم ايجابية حول الموضوع وان ماكو مشكلة، و13% بس ردودهم چانت سلبية وما تحل الموضوع او راحوا لانهاء العلاقة.
اما عند النساء، 93% من النساء تجاوبوا وي التجربة بشكل سلبي و 7% بس ردودهم چانت ايجابية تحاول تحل المشكلة.