6549
حؤرمتلی دیلداشلاردان، ادبیات سئونلردن، بیزه دستک اولماق‌لارین دیله‌ییریک آخاغیمیزی سئودیک‌لریزله پایلاشین🌹🌹🌹
💠#گون_آیدین، هم‌وطن‌لر
شاعیر اولماقدان اؤترو
بیر آز گونش، بیر آز هاوا،
بیر آز یاغیش اولمالی.
بیر آز آغاج، بیر آز یووا،
بیر آز دا قوش اولمالی.
بیر آز گئجه، بیر آز کوچه،
بیر آز ایشیق اولمالی.
بیر آز جاوان، بیر آز قوجا،
بیر آز اوشاق اولمالی.
بیر آز اؤزگه، بیر آز دوغما،
بیر آز تانیش اولمالی.
بیر آز نغمه، بیر آز دوعا،
بیر آز قارغیش اولمالی.
بیر آز سئوگی، بیر آز گوناه،
بیر آز ثاواب اولمالی.
بیر آز شوبهه، بیر آز سؤال،
بیر آز جاواب اولمالی.
بیر آز دونن، بیر آز بو گون،
بیر آز صاباح اولمالی.
بیر آز کافیر، بیر آز مؤمون،
بیر آز آللاه اولمالی...
#رامیز_رووشن
@qanadli_duyqular
سنی سئویرم آنجاق بو منده قالاجاق
چونکو سن ده هرکس کیمی
سئوگینی بوشا چیخاریرسان!
#تورقوت_اویار
@qanadli_duyqular
#تیراختور
#مورمن
سؤزلر: #سئور_شهابى
@sever_shahabi
آلا گؤزلر
یئنه قیلینجینی چکدی اوستومه
قوربانی اولدوغوم او آلاگؤزلر
یئنه جلاد اولوب دوردی قصدیمه
قلم قاش آلتیندا پیالا گؤزلر
باشیمدان گئتمیشدی سئودانین غمی
خیالیم گزیردی بوتون عالمی
بو دوستاق کؤنلومی دئیین ینه‌می
چکدینیز سورغویا سئوالا گؤزلر
سودا یولچوسویام ازل یاشیمدان
کؤنلوم آیری گزیر جان سیرداشیمدان
داغی‌دیر هوشومی آلیر باشیمدان
سوزولوب گئدنده خیالا گؤزلر
گرد‌نین مینا‌دیر بویون تاماشا
آی‌دا حسد چکیر او قلم قاشا
بیر جوت اولدوز کیمی وئریب باش باشا
یانیب شعله سالیر جمالا گؤزلر
منیم سئوگیلیم‌دیر او گؤزه‌ل پری
قوی اوزه وورماسین کئچن گون‌لری
من قدیر بیله نم ازل‌دن بری
سیزینله یئتمیشم کمالا گؤزلر
جهاندا هر حکمی بیر زامان وئریر
دونن دوران سورن بوگون جان وئریر
ایل‌لر خسته‌سی‌یم یارام قان وئریر
سیز منی سالدینیز بو حالا گؤزلر
#صمد_وورغون
@qanadli_duyqular
«سسسیز اوچوروم»
سسسیز اوچورومون اوجوندایام،
گئرییه باخدیغیمدا قانادی یوْلونموش قوشلاری گؤرۆرم
دمیرلری پاسلانمیش قفسلرین آچیق قاپیلارینی
چئوریلیرم، باخماق ایسته‌میرم.
یاشیللیغا اینانمادیغیم اۆچۆن، بوْزاریر اؤنۆمده‌کی منظره!
آغرییا سۆرۆکله‌ییر منی قارانلیق دۆشۆنجه‌لر
و اؤلۆمۆن سسسیزلییی لال-دینمز دایانیب یانیمدا.
گؤرۆرم، بیلیرم
بیلیرم، گؤره-گؤره چوْخ شئیلری یئنه ده گؤرمۆرم.
بدنیم پارچا-پارچا، روحومو دلیب کئچن گۆللـه‌لر سوْیومور
و سسسیز اوچورومون اوجوندا
بو سوْن نفسیم اوْلسون دئیه چالیشسام دا
ساییسی یادیمدان چیخیبدیر نفسلریمین.
هئچ بیر شئی قالمادی،
هئچ بیر شئی اۆستۆمدن قاطار کیمی کئچمیر آرتیق
قوش اوْلوب اوچماق دویغولاریمی قارا دیوارلار پوْزدولار اوْتاغیمدا
دویغولانا بیلمیرم هئچ بیر شئیه...
من بیر شئیه اینانا بیلمیرم، بیر شئیه.
بلکه ده آسیلی قالدیغیم «بیر» سؤزۆنۆن اۆستۆنده‌یم
سؤزۆمۆن اۆستۆنده‌یم، آسیلی قالمیشام.
آسیلی بیر،
بیر آسیلی بیلیر
بیر سؤزۆمۆن اۆستۆنده
«بیر» سؤزۆنۆن اۆستۆنده...
دۆنیانین حبس‌خانا اوْلدوغونو بیلیرم
بیلیرم، آسیلدیغیمدان سوْنرا حبس‌خانانین قاپیسینین
ابدی آچیق بوراخیلاجاغینی دا بیلیرم.
بیلیرم دۆنیا موحاریبه مئیدانی اوْلسا دا بئله
آیاقلاریمی سئوگی مینالارینین اۆستۆنده بوراخدیغیمدان سوْنرا
صلح بیان‌نامه‌سی امضالایاجاقلار حؤکمرانلار - دیکتاتوْرلار، بیلیرم.
سن ائوده اوْتوروب قزئته اوْخویارکن،
خبریمی ائشیده‌جکسن... موغایات اوْل... چایین سوْیوماسین...
هر شئیین سوْنو قاپ-قارا قارانلیقدا یوْخ اوْلور
یوْخ اوْلور اوّلدن اوْلمایان «بیر» سؤزۆ، یوخ اوْلور.
یوْخ اولور،
اوْلور،
یوْخ اوْلور،
آسیلمیر،
آسیلیر...
بیر سؤزۆنۆن اۆستۆنده آسیلی قالیرام
بیر سؤزۆنۆن...
سؤزۆنۆن بیر-بیر
بیر سؤزۆنۆن آسیلیرام اۆستۆنده
اۆستۆنده‌یم بیر سؤزۆنۆن
سؤزۆمۆن اۆستۆنده دایانیب آسیلیرام.
اومودلاریم بالیق اوْلماق آرزوسوندایکن
سیزین حَیَطینیزین ماوی حوْووضوندا غرق اوْلدولار.
ایندی پاسلی قفسلرین آچیق بوراخیلمیش قاپیلاری،
مینالارین خنثی اوْلماقلاری
و سنین سطیر-سطیر قزئته اوْخوماغین،
دامداکی پیشیکلرین بالیقلارا شوْرگؤزلۆک ائتمه‌یینی گؤرمه‌مه‌یین
گؤیلرین ابدی‌لییینه دالیب آغلاماغین
فوْتوقرافچی‌لارین ایشینه یارایار ساده‌جه، بیلیرم.
گله‌جه‌یین اوْلمادیغی سوْن نقطه‌ده
گئرییه باخا بیلمه‌دیییم سسسیز اوچورومون اوجوندا
بو سوْن نفسیم اوْلسون دئیه چالیشسام دا
سوْن سیقارئتیمی آلیشدیریرام...
یانیرام...
بونو سن گؤرمه‌یه‌جکسن...
#علی_چاغلا
#گون_آیدین
@qanadli_duyqular
گئتمه بورالاردان گئتمه سئوگیلیم
بۆتون تانییانلار سنی سوراجاق...
اۆره‌ییم من دییل احتراملیدیر
احترام قویماغا قالخیب_دوراجاق!
سنسیز نئجه کئچسین گۆنوم آیلاریم
اللرین الیمه چاتسین قورتولوم
نه قدر داریخیب آختاریم سنی...
اولماسان بو شهر باتسین قورتولوم.
بو دردی دره‌یه داغا‌می آتیم؟!
یوخسا گؤزلریمده یاشا باغلاییم
بو، سئوگی دردی دیر منه یاپیشیب
نئجه گؤزلریمدن سۆزوب آغلاییم...
بیر دنیز قورموشام گؤزلریمده من
ایسته‌سن گئده‌سن بوغولاجاقسان!
تزه‌دن باشقا بیر انسان بطنینده
منی سئومک اۆچون دوغولاجاقسان...
الیمدن هئچ بیر ایش گلمه‌ییر منیم
آتیبسان تکلیگه سیخیبسان منی...
بیر سئچیم واریندی منیم یانیمدا!
«یا گئتمه یا دا قال» سئویرم سنی....
#مهدی_غمسیز
@qanadli_duyqular
ای کؤنول! هر یانا پرواز ائیله مه
چون کبوتر طعمه ی باز ائیله مه
کیمسه نین سیررینی کیمسه ساخلاماز
دگمه یی سن محرم راز ائیله مه
#اولو_نسیمی
#گون_آیدین
@qanadli_duyqular
من سنی گؤزله‌ییم هاچانا کیمی؟
گؤر ساعات نئچه‌دی؟ نئچه سئوگیلیم؟
قویما سئوگی سحر آچانا کیمی
منی قورتوم-قورتوم ایچه سئوگیلیم
اووودا بیلمیرم دامی-دوواری
تاخچادا قوزو تک مله‌ین تاری
گل کی آیاغینین سسیندن ساری
قالیب سکسکه‌لی کوچه سئوگیلیم
گلنده سسسیز گل! گل باهار کیمی
گولنده سسسیز گول! باغچالار کیمی
سسسیز کی اوره‌ییم شپه-قار کیمی
اوچار! هئچه بتدی هئچه سئوگیلیم
گؤزلرینده دومان، باخیشیندا چن
گؤزله‌دیم گلمه‌دی! نیگرانام من
آی آللاه قویما بو سینیق کؤنولدن
بو سینیق کؤرپودن کئچه سئوگیلیم
#نادر_الهی
@qanadli_duyqular
کوچه‌میز هئی منی فیکره سالیر
اوینادیر گیزلیجه کال احساسیمی.
گلینجه بیر دوداق سئوینمه‌دی هئچ
گئدینجه توتارمی گؤرن یاسیمی؟
یولون دوشه‌جکدیر ایستر-ایسته‌مز
او زامان آغلا دا، گول ده، سئوین ده!
حایاتین نه‌دی سین، تامسین ایسته‌سن
بیر رومان دادی وار هر بیر ائوینده.
قاپی وار صاحابی یاشارکن اؤلوب،
اللری کَرمه‌لیک، قلبی دوم دورو.
قاپی وار دالیندا پولیس دایانیب
قاپی وار آچیرسان، نیکاح مأمورو
قاپی وار «آغزی وار دیلی یوخ»وندور
نه تهر دؤیورسن آچیلمیر طاغی
میللته آزادلیق نقشه‌سی چکیر،
اؤز ائوی چئوریلیر اولور دوستاغی.
ائله ائو واردی کی مئتیره گلمیر
نه اوجو بللی‌دیر نه‌ده بوجاغی.
ایچینده ریفاها دالان بیر آنا،
ائولاد حسرتینده یانیر قوجاغی.
بیرده اوچ دووار وار، ییخیق بیر تاوان،
انفجار اولمادان گؤزل یورد ایدی.
طالعین اللری قاریشماسایدی،
بلکه بو یئرده ده، دووار دؤرد ایدی.
ائولرین بیرینده نشئه بیر بابا،
احتیاج ایپیندن آسلاییر اؤزون.
یادینا دوشور کی کئچن گون نئجه،
بیر نخود تیریاکا ساتدی اؤز قیزین.
دووارین دالیندا بخت‌سیز بیر قادین،
چؤره‌یه قارشیلیق عیفّتین وئریر
کیم بیلیر بالاسین دویورماق اوچون
نئجه نانکورلارین قوینونا گیریر!
بیرینین قاپیسی گاراژ قاپیسی
زانتیاسی گئدیر بئنزی دایانیر
توخانیر مورگولو ثانیه‌لره
بیرقاپی یوخلاییر، بیری اویانیر
بیر ائوین گؤرکمی اسکی چؤل کیمی
بو باشین تیکیرسن، او باش سؤکولور
یاشامین بو قدَر دویونو وارکن،
هله آرد-آردا دا، بینا تیکیلیر.
دؤرد قاپی اویانلیق عدالت اؤلوب
اعلانین نَدَنسه ووران اولماییب!
دؤنگه‌نین باشیندا یئتیم بیر اوشاق،
ایل اولار حالینی سوران اولماییب
کوچه‌میز دونیانین بالا وِرژِنی
گیریشی چیچک‌دیر، چیخیشی خزل
کیم بیلیر بو چیچک هانسی مئوسیمین
کیم بیلیر بو خزل سونمو یا ازل...؟
#خان‌صنم_هاشم‌زاده
@qanadli_duyqular
گَل
سارالیب باغچامیزین گۆللری ده سنسیز، گَل
آغلاییر بوغدامیزین تئللری ده سنسیز،
گَل
اوْخشایاردی ناز اَلین پنجره‌ده گۆللرینی
سوْزالیر لاله، قرنفیل‌لری ده سنسیز، گَل
نه چؤرکده تامیمیز وار، نه سودا، نه هاوادا
هئچ یاپیشمیر بو سحر یئللری ده سنسیز، گَل
نَفَسینچۆن داریخیر باخ بو ائوین داش- دوواری
چیرپینیر پنجره‌نین، میل‌لری ده سنسیز، گَل
موسیقی وۇرغونوسان سن، بو سینیق تار اۆره‌ییم
اؤزله‌ییر بَم‌لری، هم زیل‌لری ده سنسیز، گَل
داریخیر گۆل اۆزۆنۆ، گؤزلرینی اؤپمک اۆچۆن
آنانین، اللرینه، اللری ده سنسیز، گَل
#سحر_خیاوی
@qanadli_duyqular
#مجنون_تک_آواره
یئنه یارب نه غمگین‌دیر منیم بو شاد اولان کؤنلوم
رموز عشقدن آگاه اولوب اوستاد اولان کؤنلوم
گؤروبدور یاری اغیاره، اولوبدور محو نظّاره
ائدیبدیر سینه‌سین پاره، منیم آباد اولان کؤنلوم
نییه پیمانه‌دن کئچدین، نییه زنجیردن قاچدین
نه‌دندیر چؤل‌لره دوشدون، منیم برباد اولان کؤنلوم
فراغین روز محشردیر، سراسر محنت و غمدیر
او زولفون کیمی درهم‌دیر، منیم آزاد اولان کؤنلوم
باخین بو ناتوان زاره، گونو بختی کیمی قاره
گزر مجنون تک آواره، منیم ناشاد اولان کؤنلوم
#خورشیدبانو_ناتوان
@qanadli_duyqular
#سلام_شاعیر_داریخیرام
سلام شاعیر داریخیرام، بو تک‌لیک
یئنه منی اوزو یوموشاق تانیدی.
یئنه پاییز، یئنه سویوق، یئنه من،
یئنه یئریم سوبالارین یانیدی!
هله سنه دئمه‌دیییم بیر گئرچک
هله سنه آچمادیغیم یالان وار.
دوز بیر ایلدیر یوخو یاتا بیلمیرم
قورخورام کی یاستیغیمدا ایلان وار!
آغ توک تاپدیم آراسیندان ساچیمین
قوپارمادیم ساخلامیشام چوخالسین
اوتوز ایلده جاوان قالیب نئیله‌دیم؟
جانی چیخسین ساچلاریمین قوجالسین.
گل بیر گون اوتوراق قدح- قدحه
گؤرک گؤز یاشیندان نه قالیر شاعیر؟
ايچیمده اَن معصوم ملک‌لر اؤلور
ان گؤزل قادینلار قوجالیر، شاعیر!
#گونل_مولود
@qanadli_duyqular
یازیریق سئوگیدن، یازیریق آنجاق،
ائله سطیرلرده آلیشیریق بیز.
محبّت اولوبدور اویون-اویونجاق،
هانسی محبّتدن دانیشیریق بیز؟
اودلارا قالانماق اؤتَری حیس‌دیر،
کلمه‌لر بیچیملی، سؤزلر بیچیملی.
چوخلاری دیپلوم‌سوز متخصّص‌دیر،
ائه، اورک آلداتماق بیر سو ایچیمی،
سئویم‌می؟! تردّود قطع ائده بیلمیر،
بعضاّ ایتیریریک اینام، اومیدی.
اورک وار دویغولار فتح ائده بیلمیر،
اورک وار هندسی فیقور کیمی‌دیر.
بیر قلبه گیرنده بویالی سؤزلر،
گؤرن اؤز سؤزونو اورک دئدی‌می؟!
آختاریر، آختاریر، آختاریر گؤزلر،
ایشله‌ییر بیر ساعات کفکیری کیمی.
تبسّوم‌لر ساختا، سؤز قیمتلی‌دیر،
یالانی یالانلا آلقیشلاییرلار.
چوخلاری کؤنولدن سخاوتلی‌دیر،
هر قیزا بیر کؤنول باغیشلاییرلار.
ائله محبّتدن یازیریق، آنجاق،
ائله سطیرلرده آلیشیریق بیز.
محبّت اولوبدور اویون-اویونجاق،
هانسی محبّتدن دانیشیریق بیز؟!...
#نوصرت_کسمنلی
@qanadli_duyqular
ایچیمین دره‌لرینده
تالانمێش بیر قبیله‌نین
ایت‌لری هۆرۆر بوُ آخشام.
#سیدحیدر_بیات
@qanadli_duyqular
اونوتماق ایسته‌رم، اؤزوم اؤزومدن
بیر داها آیریلیب هاچالانماییم.
گئجه‌لر یاتیرام بیر فیکیرله من،
سَنی دوشونمه‌ییم، سَنی آنماییم.
بو ائله قایغی کی، بو ائله غَم کی،
آزدیرار یوز ایللیک یولوندان سَنی.
سَحَر ده، آخشام دا دوشونورم کی،
گَرَک دوشونمه‌یم هئچ زامان سَنی.
اونودار فیکیرده، خَیالدا تَکجه،
اونوتماز اورکده سئوَن ,سئونی.
مَن اؤزوم اؤزومه "اونوت!" دئدیکجه،
اؤزومو اونودوب تاپیرام سَنی.
اونودوم دئییرم، آنجاق نه فایدا؟!
یادیمدان چیخمامیش دوشورسن یادا.
عشقیمین اودونو سؤندوره بیلمیر،
غَضَبین سئل کیمی آشیب داشسا دا...
#بختییار_واهابزاده
@qanadli_duyqular
بو سئوگینین عؤمرو بئله قیسایمیش،
بنؤوشه‌تک بیرجه هفته یاشادی.
سئوینمه‌یه صبری بئله چاتمادی،
نه یاشادی، غم طرفده یاشادی.
بو تر غؤنچه آچیلمادان سولارمیش،
بو محبّت هانسی سمته یول آلمیش؟
سئون‌لرین گونو قارا اولارمیش،
گؤرن کیملر سئویب کئفده یاشادی؟
او اورکدن گولدویوموز گون هانی؟
صداقتدن دانیشدیغین دیل هانی؟
بو سئوگینین سهو می دوشدو عونوانی؟
اؤز عؤمرونو ائله سهوده یاشادی...
#نوصرت_کسمنلی
@qanadli_duyqular
ایر من تانری ایله گؤروشه بیلسه‌یدیم؛
اونا دئیَردیم کی،
سنه یاخشی باخسین...
#رؤوشن_عبداله_اوغلو
#گون_آیدین
@qanadli_duyqular
گلنده آغرینی اؤزونله گتیر!
گلنده آغرینی اؤزونله گتیر!
سنه بیر سؤزوم وار اینجه‌دن اینجه.
تکلیگی تک قویوب جان ائویمه گیر!
کؤنلومه یولداش اول کؤچوم گئدینجه!
آللاه چوخ گؤرمه‌سین آغ گونلرینی،
گتیر قایغینی دا قارا دۆیۆنده!
بسله‌رم من سنین درد گول‌لرینی،
قانیملا سولانان جان دیبچه‌یینده.
دردی ده اؤلدورن درد کؤته‌یی‌دی،
دردینه درد اولوم... چوخ دا اوزولمه!
چوخ دا کی اوره‌یین اود پته‌ییدی،
آتیب اوره‌یینی یانیما گلمه!
سنی دۇیا-دۇیا دئییرم بونو،
گؤزونون گؤلو ده گؤزلدی، گؤزل.
تزه گئییمینی، تزه دۏنۇنۇ،
تزه داغ-دۆیۆن‌له دۆیمه‌له‌ییب گل!
اؤزونو تانیماز دردینی دانان،
بیر ده اولانینا بئله یوخ دئمه!
آی منی دوست بیلیب باشا دولانان،
گیزلی یارانی دا مندن گیزله‌مه!
یا دردی یاری بؤل، یا دا اۆزۆلۆش،
قوی عؤمرون خالچاسی اؤنه سریلسین!
دۇزلۇ گؤز یاشی‌یلا بال سیزان گولوش،
بیرلیک خمیرینه قوی اَنده‌ریلسین!
قایغی بوستانیندا هر دیلک بیتیر،
وئریب قازانجینی یانا چکیلمه!
گلنده آغرینی اؤزونله گتیر،
سندن اینجییه‌رم، الی بوش گلمه!
#آغا_لاچینلی
@qanadli_duyqular
#رومان
هر عؤمور روماندی، اوزون، یا قیسا-
شیرین سئوگی‌لری، آجی سهولری.
سنین یاشادیغین بو رومانینسا
نه چوخدو جیریلان صحیفه‌لری.
بوردا اوج-اوجادی دوغرویلا یالان،
بلکه، بو رومانی یازان ناشی دیر؟!
بو آغ واراق‌لاردا لکه‌سی قالان،
یا دوداق بویاسی، یا گؤز یاشی دیر.
چوخدا واراق‌لاما بو رومانی سن،
غفلتاً سَکسَنمک تهلوکه‌سی وار.
هانسی واراق‌داسا بیرده گؤررسن،
هله قورومایان قان لکه‌سی وار.
بو کیمین قانیدی؟ بو نه قاندی؟ نه؟!
کیمین قاتیلیسن؟ کیمین جلٓادی؟
باتیر بارماغینی بیر وور دیلینه،
گؤر تانیش گلیرمی بو قانین دادی؟!
دادی یوخ، تامی یوخ، بو نئجه قاندی؟
هاردان بو واراغا سیزیلیب بو قان؟
بیر یوخ، سنین عؤمرون ایکی روماندی؛
بیری تانری یازان، بیری سن یازان.
تانری‌نین یازدیغی بو دئییلدیکی،
بیر دؤن عؤمرونه باخ، اوتوز ایلدی کی-
تانری‌نین یازدیغی او رومانی سن،
کؤرلایا-کؤرلایا عؤمور سورورسن.
بیر باخ او سهولره، یانلیش‌لیق‌لارا،
گؤر نئجه جالانیب، بیری-بیرینه.
نئچه دوستلوق‌لارا، تانیشلیق‌لارا،
سن نقطه قویموسان وئرگول یئرینه.
گؤر نئجه قوشموسان سن بو روماندا،
دوغما فعل‌لری یاد ایسیم لره.
بؤیوک سئوگی‌لرین کئچیب یانیندان،
اویموسان یالانچی تبسّم‌لره
...نه دئییر اوزاق دا سس‌لنن اذان،
دئییر ایندن بئله بو گیلئی نه‌دیر؟
ایستر تانری یازان، ایستر سن یازان،
هر ایکی رومانین سونو عینی‌دیر-
آمٓا سونا گئدن یول‌لاری باشقا،
اؤلنده تانری‌یا اوزونو توت دئ:
-اِی بؤیوک رومانچی، منی باغیشلا!
#رامیز_روشن
@qanadli_duyqular
سندن نه گیزله‌دیم، قیسقانجام یامان
سن منی سئوسن ده دونيالار قدر،
يانيمدا گؤرمه‌سم سنی بيرجه آن،
گؤزومون يوخوسو چکیلیب گئدر
دئميرم بؤيوكدور بو طبيعتيم،
بلكه ده، بلكه ده بو بير آزاردير
قلبینه دَيمه‌سین سؤزوم-صؤحبتيم،
سنده محبّت ده، ناموس دا واردیر
سنین وفانا دا اینانیرام من،
آنجاق نه اولسون کی بؤیوکدور شهر،
اؤزون ده حدّيندن آرتيق گؤزلسن،
ديديب پارچالاییر منی شوبهه‌لر...
#صمد_وورغون
@qanadli_duyqular
یئنه بو شهرده اوز اوزه گلدیک
نئیلیک ؟ باشقا بیر شهریمیز یوخ
بلکه ده بیز خوشبخت اولا بیلردیک
بلکه ده خوشبختیک خبریمیز یوخ
آرادان نه قدر ایل کئچیب گؤرن
تانییا بیلمدیم ، منی باغیشلا
من ائله بیلیردیم سنسیز اؤلرم
من سنسیز اؤلمه‌دیم منی باغیشلا ...
#رامیز_رووشن
@qanadli_duyqular
دنیزی وئردیم کی، سنه هدیه
گلدیگین ساحیله گله‌سن بیرده
منی گؤرمه‌ینده او منم دئیه
منیمله دانیشیب گوله‌سن بیرده
دوشوندوم آیریلیق گلندن بری
سن منیم عشقیمه چیراغ اولاسان
اونون چون وئردین می منه گؤیلری
منه گؤیلر قدر اوزاق اولاسان؟
#نبی_خزری
@qanadli_duyqular
ایسته‌ییرم عرضی-حالیم دانیشام،
بو غربت‌ده مندن ائل اینجیمزمی؟!
بیر کسیم یوخ، نه ده دوستوم-تانیشیم-
طعنه سؤزدن اهلی دیل اینجیمزمی؟!
دونیا مالی چوخ شیریندی اینسانا،
جانیم قوربان عاریفلره-قانانا
عادتیندی سنین چرخی زامانا-
چرخ أیسه، آغادان، قول اینجیمزمی؟!
ایمان دردین دریالارا قاتیلیب،
زر متاحین میس یئرینه ساتیلیب
شئیدا بولبول دار قفسه آتیلیب
اونون ناله‌سیندن گول اینجیمزمی؟!
#نؤورس_ايمان
#گون_آیدین
@qanadli_duyqular
چؤرک نه لازيمدی سو نه گرک‌دی
هر گون اؤز ايچينی يئیه‌ن آداما
ليباس آختارمايين پالتار گزمه‌يين
دردی پالتار كيمی گئیه‌ن آداما.
كيمی‌یه گول وئریر چیچک گؤسته‌رير
كيمی‌یه اود وورور شيمشک گؤسته‌رير
زامان آدديم باشی ديرسک گؤسته‌رير
ديزينی يوخوشلار دؤيه‌ن آداما.
آرخاسی آناسی آتاسی يوخدو
گوللری ساراليب بوته‌سی يوخدو
فرهاد كولونگونون خطاسی يوخدو
باشی داشدان داشا دئیه‌ن آداما.
#زليمخان_یعقوب
@qanadli_duyqular
ایز سال!
سیّاح دوستوم! یول اوزون‌دور،
یول داشلی‌دیر، قایالی‌دیر.
اینسان‌اوغلو کئچیلمه‌ین-
قایالارین قارتالی‌دیر.
آختاریشلار عالمینده،
چوخ ییخیلیر، دورور اینسان.
سن‌سه باخیب داغ باشینا،
هامار یوللار آختاریرسان.
شلاله‌لی یاماج‌لاردا،
هامار گزمه، دوز آختارما!
دوستوم! حیات یوللاریندا،
اؤزون ایز سال، ایز آختارما!
#ممد_آراز
#گون_آیدین
@qanadli_duyqular
بیلین یاران. بو دونیاده هره بیر یاریلن اوینار
کیمی خانه نشین اولموش. کیمی بازاریلن اوینار
کیمی تخت مرصع ده باشیندا تاج شاهانه
کیمی زیندان ایچینده ال - ایاغی دارایلن اوینار
کیمی طالبدی دونیایه ، کیمی عاشیقدی عقبایه
کیمی سازه ، کیمی نازه ، کیمی تک تارایلن اوینار
کیمی مجنون سراغیندا ، کیمی لیلی فراغیندا
کیمی یارین اوزه رینده یاتان شاهمارایلن اوینار
کیمسی شاد و خرم دیر ، کیمی لیل و نهار آغلار
فلکده سرگران اولموش ، خورشید زار ایلن اوینار
#خورشید_بانو_ناتوان
#گون_آیدین
@qanadli_duyqular
سئوگيميزين جنازه‌سين
آدديم_آدديم بويلاماها!
بو جنازه شيشه جكدير
اوره‌یينده قويلاماها!
بللى ائتمه كدرينى
گيزلى ساخلا قهرينى
خاطيره‌لر دفترينى
حالوا كيمى پايلاماها!
تانرى سئوگينى سئويرسه!
سئوگيميزه جان وئريرسه!
بو اؤلو بيردن ديريلسه!
سئوينجيندن خايلاماها...
#سئور_شهابى
@qanadli_duyqular
اولموشام دهری-بلا ایچره بو گۆن دیوانه من،
وارمادیم مئیخانه‌یه، سؽندیرمادیم پئیمانه من.
عهدلردن کئچمدیم، پئیمانلر سؽندیرمادیم،
لاجرم بی‌مهرله تک، اولموشام افسانه من.
ترکی-گۆلزار ائتمیشم، بۆلبول کیمی من، ائی رقیب،
عاقبت بیر گوشه ایچره گلمیشم افغانه من.
عشق رۆخسارین‌دا بیر دم وصلیله شاد اولمادیم،
هر طرف سئیر ائیلدیم، دۆشدوم عجب هیجرانه من.
غم یۆکون چکمک‌دن، ائی دیل، بیر دم آزاد اولمادیم،
هرچی جهد ائتدیم، نه حاصیل، یئتمدیم جانانه من.
دوش گؤردوم کیم، گلیبسن گۆلبئیی-احزانیما،
اول زامان نذر ائیلدیم جانو دیلیم قوربانه من.
گؤرمییم دۆشواردیر، واللاه، سنی، بیل، ائی رقیب،
زۆلفه باغلی قوی گئدیم، آخیر دۆشوم زیندانه من.
دؤورو دؤنموش دؤور دؤوران ائتمه‌دی کامیمجا آه!
دۆشمنیم‌دیر، بیلمزم کیم نئتمیشم دؤورانه من.
وارو یوخوم‌دان قالان آنجاق منیم بیر جان ایدی،
ناتوان، داخی دئدیم: صرف ائیلییم مئهمانه من.
#خورشید_بانو_ناتوان
@qanadli_duyqular
سن گلمه‌سن‌ده گؤزله‌رم سنی
نه اولاجاق! جیبیمدن گئتمیرکی
جانیمدان گئدیر.
#صباح_الدین_علی
@qanadli_duyqular
دئدیم: سئوگیه باخ بو کپه‌نک‌ده
بیر سئوگی اوغرونا اؤلومه گولور
فیرلانیر باشینا عزرائیلی‌نین
اینجه قانادلاری یانیر، تؤکولور
دئدی: سهو ائدیرسن باخ بو کپه‌نک
بیر عؤمور سئوگینی سالیبدیر تورا
آنجاق فیکیر وئرسن هاردا ایشیق وار
بوتون کپه‌نک‌لر اوچاجاق اورا
دئدیم: شمعه بیر باخ، اونا نه دئمک؟
اونون سوچو ندیر؟ یانیب اَریییر
بیر قوجاق دولوسو حسرتله یازیق
اوتانیر، آلیشیر، یئرلره گیریر
دئدی: یانماق ایشی، ایشیق واری‌دیر
او کی ایشیق وئریر یانسادا سولماز
قارانلیق دونیانین بودور قایداسی
یانماسان باشینا دولانان اولماز
دئدیم: سئوگی ندیر؟ بیلیرسن‌می هئچ
یانیب یاندیرب‌سان بو گونه قدَر؟
گؤز یاشین آشیب‌می کیپریکلرینی
اؤلوب دیریلیب‌سن یئتیش‌سین سحر؟
دئدی: سئوگی دئمک بوتون یالان‌دیر
ایندی کی اینانمیر گؤز گؤردویونه
«سئوگیه اینانسام، اینانسام بیر گون»
اوندادیر دوشرم بو کور دویونه
دئدیم کی کپه‌نک هرجائی دئییل
کپه‌نک سئوگینین پیغمبری‌دیر
بیر ایشیق کی پوزور قارانلیق‌لاری
جانین قوربان اولسا اونا یئری‌دیر
#فرزین_نقی‌یان
@qanadli_duyqular