6549
حؤرمتلی دیلداشلاردان، ادبیات سئونلردن، بیزه دستک اولماق‌لارین دیله‌ییریک آخاغیمیزی سئودیک‌لریزله پایلاشین🌹🌹🌹
منده سیغار ایکی جهان، من بو جهانه سیغمازام
گؤوهری لامکان منم، کؤن و مکانه سیغمازام
عرشله فرش و کاف و نون، منده بولوندو جمله چون
کس سؤزونووو ابصم اول، شرح و بیانه سیغمازام
کؤن و مکاندیر آیتیم، ذاتی دورور بدایتیم
سن بو نیشانلا بیل منی، بیل کی، نیشانه سیغمازام
کیمسه گمان و ظن ایله اولمادی حق ایله بیلیش
حقی بیلن بیلیر کی، من ظن و گمانه سیغمازام
صورته باخ و معنی نی صورت ایچینده تانی کیم
جسم ایله جان منم ولی، جسم ایله جانه سیغمازام
هم صدفم، هم اینجییم، حشرو صراط اسینجییم
بونجا قوماش و رخت ایله من بو دکانه سیغمازام
گنجی-نهان منم من اوش، عئینی-عیان منم، من اوش
گؤوهری-کان منم من اوش، بحرو و کانه سیغمازام
گرچی محیطی-اعظمم، آدیم آدمدیر، آدمم
دار ایله کون فکان منم، من بو مکانه سیغمازام
جان ایله هم جهان منم، دهر ایله هم زامان منم
گؤر بو لطیفئیی کی من، دهرو زمانه سیغمازام
انجم ایله فلک منم، وحی ایله هم ملک منم
چک دیلینی و ابصم اول من بو لیسانه سیغمازام
ذره منم، گونش منم، چار ایله پنج و شش منم
صورتی گؤر بیان ایله، چونکی بیانه سیغمازام
ذات ایله هم صفاتیله، قدریله هم براتیله
گل شکرم هم نباتیله، بسته دهانه سیغمازام
شهد منم، شکر منم، شمس منم، قمر منم
روح روان باغیشلارام روح و روانه سیغمازام
ناره یانان شجر منم، چرخه چیخان حجر منم
گؤر بو اودون زبانه سین، من بو زبانه سیغمازام
گر چی بو گون نسیمی یم، هاشمی یم، قریشی یم
مندن اولودور آیتیم، آیته شانه سیغمازام
#نسیمی
@qanadli_duyqular
اؤیرتمن دئییلم،
عاشیقلیگی سنه اؤیره‌دم.
بالیقلار ،
اوزمه‌یی اؤیرتمندن اؤیرنمیر،
سرچه‌لر ،
اوچماغی اؤیرنمک اوچون هئچ بیر اؤیرتمنه احتیاجی یوخ.
اؤزون اوزمه‌لیسن
اؤزون اوچمالیسان
عاشیقلیک، کیتاب-دفتر ایسته‌میر
و تاریخین بؤیوک عاشیقلرینین چوخو
یازیب-اوخوماق بیلمیردی.
#نزار_قبانی
@qanadli_duyqular
"کلبجرلی ایوب"
نئچه گوندو سنی گؤره بيلميرم
یاریم اولان ، یاری جانیم نئجه سن؟!
باشینا دولانماق دوشوب کؤنلومه _
آچان گولوم ، تر باهاریم ، نئجه سن؟!
آغ بیر شام سان ، کاش پروانه ن اولایدیم
یانا _ یانا سنی اودا سالایدیم
قوللارینین آراسیندا قالایدیم
قوینو جننت ، باغچا _ باریم ، نئجه سن،!
سن اولمایان واختی هایام _ حشیرم
"ایوب" دان آیریلیب ، اؤزگه له شیرم
سنی گؤرمه ینده یئتیمله شیرم
پای اومدوغوم ، خزنه داریم نئجه سن؟!
#ایوب_کلبجرلی
@qanadli_duyqular
سلام اولسون برک داریخدیغیم،
آیریلیق و یوخلوغوندا جانیم آغزیما گلن،
سنه!...
#محمود_درویش
@qanadli_duyqular
چوْخ دئدیم گۆله‌شیب سنی ییخارام
بوْینونو کئچیردیب قوْلا سیخارام
اوْد ووروب ، یاندیریب ائله یاخارام
آنجاق باجارمادیم ، دؤیوش یوْلونو
سانیردیم کی سنی داردان آسارام
قارنینا بیر کینلی نئشتر باسارام
دویموردوم قارشیندا بئله سوسارام
من سوسدوم بوْینوما سالدین قوْلونو
نئیله ییم گاه سنه وورولور اۆرک
کؤکسۆنده لیلله‌نیر دورولور اۆرک
هردن‌ده ال اۆزور قیریلیر اۆرک
نه ساغینی بیلدیم نه‌ده سوْلونو
یاراشیر دوْغرولوق ، یالان اۆزونه
سارای لار سالیرسان تالان اۆزونه
اوغورلار آچیرسان بالان اۆزونه
منه ده وئریرسن تیکان کوْلونو
چکدیییم نفسلر اوْ نفس دئییل
بوْغازیمداکی سس همن سس دئییل
چاتدیغین بو یۆک‌لر هله بس دئییل
آتیرسان چیینیمه دردین دوْلونو
آتاسان ، آناسان ، نه سن آ دونیا
آغ یئل تک باغیر اوغلو اسن آ دونیا
اوْلسامدا فیلمیندن کۆسن آ دونیا
ایشینده سرت دایان ، اوْینا روْلونو
#عیسا_باغیراوغلو
@qanadli_duyqular
آغرى آغزيندا يئم اولماقدادى باغريم مله‌ييم
قیما من بير قوزو تك چؤلده چوبان‌سيز مله‌ييم
آغلاييش اَللرى آتميش منى درد تنديرينه
گؤز ياشيندان منه وئر گؤز ببه‌ييم_ گؤز ببه‌ييم
ايتميشم اورمان آرا، آه! جاناوار قورخوسو وار
گل كى وارليق ديله‌يين اوركك اوركده بله‌ييم
هئچ منيم آغليما سيغمازدى سیغال‌سیز ساچلیم
ياشلارين قانلى الينده بئله درد ايلمه‌له‌ييم
شيغييیب ايلديريمين بوْز سسى وورسا آغاجى
من آغاجليق باشى اوسته گره‌ييم دير، اَل، اَييم
هايلا سن، هايلا منى، اى دلى سوى آرزولاريم
یارا یاغمیش آدینا، قوی چیه‌لک‌لر چیله‌ییم
#بهروز_صديق
@qanadli_duyqular
ال‌لرين اليمه دَیمه‌يه‌يدی كاش،
ساچلارين اوزومه توخونمايايدی.
گرک اوّل‌کی تک سن اوره‌یی داش،
ائله اوّل‌کی تک سايماز اولايدين.
بو ايستی‌لیک هاردان؟! سن كی بوز ایدین.
قلبيمدن سن نييه اووجوما دوشدون؟
سن منه ال‌چاتماز بير اولدوز ايدين،
گؤيلردن قولومون اوستونه دوشدون
بو دا ووصال گونو...يوخ، سئوينمیرم،
ايندی داريخيرام بس نه‌لر اوچون؟
من می بو ذیروه‌يه چيخديم، بيلميرم،
يوخسا سن داريخدين دره‌لر اوچون؟
دونَنه يول يوخدور ...زامان آپارد‌ی،
تأسّوف زامانا چاتار می گؤرن؟
داها سنه گلن يوللار قوتاردی،
آرزودان او یانا يول وار می گؤرن؟
اؤتن گون‌لریمه بير عوممان دئديم،
بوشالدی اوره‌ییم... دولمور کی، دولمور.
ساحیله چاتميشام... هارايا گئدیم؟
دنيزه مقصدسیز قاییتماق اولمور...
#نوصرت_کسمنلی
@qanadli_duyqular
بئينيمده ساوالان گؤزۆمده آراز
يوْل آليب گئديرم دوماندا چن‌ده
درديمی سيزلايێر بير صدفلی ساز
نسيگيله بوْيانێر ماهنێدا منده
ساغێمدا يارادێر سوْلومدا يارا
باغلانێب آياغێم كؤچه بيلميرم
سنه كؤرپۆلَنن قوْلومدا يارا
بو سێنێق كؤرپۆدن كئچه بيلميرم
اۆزۆمۆ دؤندريب خزره سارێ
سێنێرام ايچيمده آيلی بير گئجه
گؤزۆمده سۆرگۆندۆ دورنا قاطارێ
يايێلێم‌لێ بير گئجه، يايلێ بير گئجه
حسرتله دايانێب بير آه چكيرم
آرزێمێ گؤزۆمده سئله دؤندهرير
ساحيلدن-ساحيله گۆناه چكيرم
باغرێمێ ياندێرێب كۆله دؤند‌رير
بير قوْشما يازيرام يارێسێ سۇدا
يارێسێ توْپراقدا اوْد دۇتۇب يانێر
بارماغێم آز قالێر سنی اۇنودا
بلكه ده وئرديگی ايلقارێن دانێر
بلكه ده يازێمێز يازێلمێش بئله
بلكه ده ساوالان سێغمايێر منده
اۆره‌ییم توْخونور تیکانلی تئله
دۇماندا یاغێشدا بوْراندا چن‌ده
#دومان_بختیاری
@qanadli_duyqular
سنی من سئویرم،سن ده کی منی
سئوگینی گؤرورلر چوخ آرامیزدا
واللاه چیخمامیشام سنه وفاسیز
بیر شیرین جان دا بیل یوخ آرامیزدا
گؤزلرین سؤیله ییر منیم عشقیمی-
دای منیم دئمه ییم نه یه گره کدیر
یازمیشام جانیمی اوغورونا من-
"من سنی سئویرم"،دا نه دئمکدیر
بیلمیرم; سن یازیق یامن یازیغام!
بلکه ایکیمیزین طالیعی بیردیر
دوشموشم یاد ائلین قوجاغینا من!
یا سنین قولونا قیفیل-دمیردیر!؟
نیسگیل باغچاسینی سوواران گؤزوم
هله ده گؤزله ییر یولونو سنین
من ایتیرمه میشم سنی،سن ده گل-
اوزاقدان ال ائله،بیر آزجا دا، دین
اوره ییم هردن بیر اسیب-تیتره ییر
قاپینی دؤینده بیر قادین الی
آما یوخ! من سنه دوز اینانمیشام
سارا کیمی سنی گؤرموشم دلی
هله ده آرزولار کوچه سینده یم
بیلمیرم بورادا، نه ایزله ییرم!
سن ایله یاشایان- گلن گونلرین
یولونو سولاییب،تمیزله ییرم
باهار دا گولنده من ده گولورم
بیلیرسن; یالاندیر منیم گولمه ییم
اؤزومو آلدادیب،گولورم آنجاق-
سنسیز یاخین گلیر منیم اؤلمه ییم
هر گئجه ایشیمدیر دوز باغلاییرام-
اوره یین سیزلایان یارالارینا
گونده مین یول"جانیم قوربان"دئییرم
گؤزونون آغینا - قارالارینا
سن ایله اؤزومون آراسیندایام
سانما کی اؤزومو سئچه جه یم من
سنین دیرناغینا بیر داش دئیمه سین-
اؤلوم ایچگیسینی ایچه جه یم من
سنین باخیشلارین آپاریر منی
بلکه سون دوراغا،سون لیاقته
اؤلمه سم سنینم،اؤلدورولسم ده
ویصالیمیز قالسین قوی قییامته
سنین اوغوروندا آغ گئیینمیشم
بو خالات یاراشیر منیم بویوما
سنه گلن قادا،قوی منیم اولسون
کیمسه توخونماسین،منیم سویوما
مین کره اؤلوبسه،دوغولسام،یئنه
دیله ییم ده سنسن،سئوگیلیم ده سن
باش داشیما آدیم یازیلماسین باخ!
اوستونه قازیلسین:"یاشاسین وطن"
#محمد_سعیدافضلی
@qanadli_duyqular
یوخوما گلمیشدین بو آخشام یئنه
غریب اوره‌ییمه چیراق گتیردین
نه یاخشی، نه یاخشی منیم سئودیجه‌م!
اؤزونو یوخوما قوناق گتیردین.
گؤز-گؤزه باخارکن دانیشیردیق بیز
بال کیمی سوزوردو سوْی دوداغیندان.
قیزیب سوزجوک‌لرین حرارتیندن،
نارین تر آخیردی آل یاناغیندان.
یئلکن‌سیز گمی‌یدیم، دالمیشدیم سنده
قارشیندا دینمیردیم، گلمیردیم دیله
ائله سنده باتماق ایسته‌ییردیم کی،
سئومیردیم یئتیشم بیر ده ساحیله.
قویموشدوم چیینینه آغریلی باشیم
چکیردیم ایچیمه سیجاق سسینی
نه واختدان، نه واختدان آرزولاییردیم
قیزیل گول عطیرلی خوش نفَسینی.
دئییرم کی یوخو اولمایایدی کاش
قول‌لاریم بوینونا بیر ساریلایدی
صوبح اولدو، چاغیردی خوروزون بانی
نه اولار دان یئری گئج یاریلایدی.
دئییرم یوخودان آییلمایایدیم
ایستیردیم گؤزلرین مزاریم اولسون
گزَم کوچه-کوچه درین روحونو
دولاشیق یول‌لارین گوذاریم اولسون.
دئییردین: قهَرلی بو دونیامیزدا
محبّت، تانرینین مؤعجوزه‌سی‌دیر
دونیانی بیر دیوان ساناساق اَیَر،
سئویشمک، شعرینین سون دیزه‌سی‌دیر.
دئییردین: دونیانی نه توپ، نه توفنگ،
یالنیزجا سئوگیمیز نجات وئره‌جک.
دونیادا محبّت ویردیمیز اولسا،
بشر سئوگی اکیب اومود دره‌جک.
آییلدیم یوخودان هراسان بیردن
اؤپدویون ساچلاریم چیچک‌لنیردی
باهار بویلانیردی پنجره‌میزدن
ائو بوتون قیزیل گول اییسی وئریردی...
#سحر_خیاوی
#گون_آیدین
@qanadli_duyqular
ال وورما قلبیمه، یارالی تئل دیر
عهدینی داندیغین گؤر نئچه ایل دیر؟
عشقین له یازدیغیم سؤزلری بیر-بیر
اوخویوب،آغلاییب،جیریب آتمیشام.
یازیق دردیم نه دایازدی، نه درین
ایتیرمیشم آغریلارین قدرین
بس دیر داها سندن گلن کدرین
حسرتین باغرینی یاریب آتمیشام.
"شجاعتم"قارالانمیش کؤنلومون
پارچالانمیش،پارالانمیش کؤنلومون
بو اوخلانمیش،یارالانمیش کؤنلومون
سن اولان طرفین قیریب آتمیشام.
#شوجاعت_کلبجرلی
@qanadli_duyqular
سن یوخکن
بیر نئچه دؤنه
داها سئودیم سنی...
حلال ائله!
#الیف_شافاک
@qanadli_duyqular
رغم جیل، درد ایسته یه ن ، درمانلی آنیم سن سن هئی..!
ورد عشقیله دعای خسته جانیم سن سن هئی..!
یانقین ایللردی گونشدن توم قارانلیق سیلکه نیر
آیریلیقلاردان قیزارمیش آسیمانیم سن سن هئی!
عقل ایستیر،باش قوپارسین باغری چیلغین خولیادان
ظن ائدنمیر کی اوسانماز اول روانیم سن سن هئی..!
یورقالانمیش بیر گؤزه‌م ! هربیر دیلک‌ده ایسلانان
مرره- مرره ! گؤزله نیلمیش مهربانیم سن سن هئی..!
یاندی باغریم ،یاندی کؤکسوم، داد الیندن آیریلیق!
یا جانین آل "آلتایین"، یا سسله جانیم سن سن هئی..!
#سعید_سلطانی_آلتای
@qanadli_duyqular
بیر گولوشه قوناق ائت
کؤنولوم داریخیر آخی
قاش-قاباقلی باخیشین
ائویمی ییخیر آخی...
توتما یانا اوزونو
یومما خومار گؤزونو
دئمه گئتمک سؤزونو
منی چوخ سیخیر آخی
دوز باغلاما یاراما
یول- یولاغی آراما
سنه،خوش گلیر آما
مندن جان چیخیر آخی!...
#مهدی_سربازی_علمداری
@qanadli_duyqular
"قوربانیمی قبول ائله آراز!"
صمد!
نه یازیم صمد؟!
دن‌لی خرمنیمین یانماسین یازیم؟
سرین سو کۆزه‌مین جالانماسین یازیم؟
داغلی سینه‌مین آلوْولانماسین یازیم؟
من سنه نه یازیم صمد؟
حسرتیمی کیم یاخاجاق؟
گؤز یاشیما کیم باخاجاق؟
آراز؟..
یئنه ده آخاجاق!
صمد!
کیمی چاغیریم؟
نه قدر باغیریم؟
صه... مد!
سؤیله منه، سؤیله آراز!
نه‌دن بیزله اوْلدون بؤیله آراز؟
کسدین ایکی قارداش آراسین،
آلدین موغانین ساراسین،
بوْغدون ائلیمین دیَرلی بالاسین!
بسدیر!
بس... دیر!.
قوربانیمی قبول ائله آراز!
#بولود_قاراچورلو
@qanadli_duyqular
دئدی اول یار سحر وقتی گلیم، لیک نه سود
وقت معلوم دئییل، شام ایله بیردیر سحریم
#حکیم_محمد_فضولی
#گون_آیدین
@qanadli_duyqular
منه، یاشادیغین شهرین قاپی‌لارینی آچ!
سنه دئیه‌جک‌لریم سؤیله‌مکله قوتارماز
ایللردیر یاشامیمدان چالدیغیم زامانلار
آدینا دویونلَندی.
منه یاشادیغین شهرین قاپی‌لارینی آچ!
باشقا شهرلری اؤزله‌یک اورادا سنین‌له.
بو ائولر، بو کوچه‌لر، بو مئیدانلار،
ایکیمیزه یئتمز...
#اؤزدمیر_آصاف
@qanadli_duyqular
گول نفسین گول قوخویور، آی گولوم!
دئ، گول نه‌دیر، چیچک نه‌دیر یانیندا؟!
بو دونیادا ملکدن ده گؤزلسن،
حوری نه‌دیر، ملک نه‌دیر یانیندا؟!
نه قدر کی سن یۏخلارسان، من وارام،
نه قدر کی سن سئورسن، یاشارام.
بیر گؤزَله گؤز اوجویلا باخمارام،
گؤزل نه‌دیر، گؤیچک نه‌دیر یانیندا؟!
سنسیز اولسام، وارلیغیمی سارار غم،
سنسیز اولسام، بیرجه آندا اؤله‌رم.
گؤزلریمی سنه قوربان وئره‌رم،
بو جان نه‌دیر، اورک نه‌دیر یانیندا؟!
#علی‌بالا_حاجی‌زاده
@qanadli_duyqular
سحرده گول یوزون شاها! چو گولشنده گلاب اوینار
آنی گؤرسه صفاسيندان، فلكده آفتاب اوینار
عجب ذات مطهّر سن، نظیرین یوخدور ای دلبر
وجودون نورو شؤوقوندان، جماليندا نقاب اوينار
چو گؤردو يوزونو عئينيم، دئدي عاغليم تماشادير
كي لعلين حوققا آلتیندان معلق دورموش آب اوینار
قورولموش شاهوار مجلیس کی چنگ ودف، نی و قانون
ترنملر قیلیر مطرب کی چنگینده رباب اوینار
فلک عکسینه دؤور ايله ر مگر آخیر زامان اولدو
قفسده طوطی و بولبول، چمنلرده غراب اوینار
فرحدن جومله عشّاقين نیازی گؤيلره چیخدی
حسددن زاهید خُشكون قاباغيندا شراب اوينار
نسيمی اوش بو انفاسین شعاعیندان منوردیر
کی نرد و تار و شطرنج، اود و یئل، سو و تراب اوينار
#عمادالدین_نسیمی
#گون_آیدین
@qanadli_duyqular
هئچ بیلیرسن کی نه لر اولدو بو گونلر یولداش!
نیه گؤزلر هاواسى دولدو بو گونلر یولداش!
آه! او یازلار کی دئییردین هامی سین زای دئدیلر
گول چیچکلر هامیسی سولدو بو گونلر یولداش!
باخیشین اودلودو باخما منه بنزین کیمی ام
کیم گؤزوندن باهارى يولدو بو گونلر یولداش!
او کی یوخدور بو شهرده گولر اوز پنجره دیر
قاش_قاباقلی دوواری بولدو بو گونلر یولداش!
او قدر ایری یولا دوز دئدیلر، سوللارا ساغ
ایندی بیزده ساغیمیز سولدو بو گونلر یولداش!
اودو روستم کی وئره بورجونو، وام سیز یاشییا
او کی آج قالمیا هرکولدو بو گونلر یولداش!
ائلیمین دردینی بیلدیم، منه "عارف" دئمه دن
دئدیلر بو کیشی منگولدو بو گونلر یولداش!
#عارف_ساسانی
@qanadli_duyqular
گئدیرسن
سن ایندی گئدیرسن، اوزوگولَر، شن،
سؤیله، اؤتن گونلر یادا دوشدومو؟!
قایا اوره‌ییمین زلزله‌سیندن،
دره اوره‌یینه صدا دوشدومو؟
گئدیرسن، بم‌بیاض دوواق باشیندا،
اللرین دیزینده نه تیترک گئدیر!
قیشقیرا-قیشقیرا گئدن ماشیندا،
ایکی‌یه بؤلونموش بیر اورک گئدیر.
گومان یوخ تزه‌دن سئویلیم، سئویم،
سینه‌م آغریلارین دوستاغی اولوب.
سنه بو سئوگینین عؤمرو بیر سئویم،
منه بیر عؤمورلوک گؤز داغی اولوب.
گاه یاغیش چیله‌ییر، گاه دؤیور کولک،
نه‌دن یوللاریمین چنی اؤتمه‌ییر؟
آغاجدا توتمایان جالاق یئری‌تک،
گؤزومدن حسرتین ایزی گئتمه‌ییر.
سسیمه سس وئرر داش دا، قایا دا،
بیلیرم دیلینی چیچک‌لرین ده.
بیر ده سنلی گونلر چتین قاییدار،
سمتینی دَییشسم کولک‌لرین ده.
نیسگیلین کؤنلومده کؤک آتیب درین،
گؤیَریر هر سؤزون هر گیلئییمده.
چوخالیب قات کسن خاطیره‌لرین،
چورویور حسرتین نمیشلیگینده.
عهدینی ایتیریب تاپدیلار سنی،
گونَشدین، گئدیرسن آی اولماق اوچون.
اؤزگه تندیرینه یاپدیلار سنی،
اؤزگه سوفره‌سینه قویولماق اوچون.
بویلانیب بو عشقین اؤتن یازینا،
داها پاییز-پاییز سویویاسی‌یام.
ییخیلیب کدرین چارپاییسینا،
سرخوش آدام کیمی اویویاسی‌یام.
#رامیز_قوسارچایلی
@qanadli_duyqular
نسیمی بابامی دیری سویدولار
مگر سوسدو دیلی، کسیلدی سسی؟
چوخ حاق گؤرنلرین گؤزون اویدولار
گؤرونمزمی اولدو حاقّین جیلوه‌سی؟
هله کؤکسومده‌دیر دده‌مین سازی
سؤزوم دوستا مرهم، دوشمنه اوخدور
چاغیرسام، دادیما گلر ائیوازی
کؤمه‌ییم، دایاغیم، ائل-آرخام چوخدور
بولود تک کیشنه‌رم، سئل تک آخارام
داغلار دا یولومو سدّ ائده بیلمز
شهاب اوللام، شیطانلارا شاخارام
«سهند»ین هئچ زامان باشی اَییلمز
زمانه باشیمدا بوستان اکسه ده
ظولمه، حقسیزلیگه باش اَیمه‌میشم
آیاغیم مین کره داشا دیسه ده،
نه بودره‌مک، نه یورولماق بیلمیشم...
#بولود_قاراچورلو
#گون_آیدین
@qanadli_duyqular
یئنه ده بیر منم,بیر سس سیز شه هر
دولدورور چئوره می سس سیز قبیرلر
هویوخوب قالمیشام اؤلودن بتر
گؤزلریم قارالیر,هرله نیر باشیم
روحومو یانینا چکیر یولداشیم
بوردا وئریبدیلر داشلار باش باشا
باش داشا دؤنوب مو؟یوخسا داش باشا؟
من تکم ,قارالان قبیرلر قوشا
گؤزومون یاشیدیر اله نیب گئدن
اورکدیر شه هرده دیله نیب گئدن.
باشین قالدیران کیم ,باشین اه ین کیم؟
تورپاغا دؤنن کیم, تورپاق یئین کیم؟
بیری سوروشماز کی :"قاپی دؤین کیم؟"
اورک دولانسادا باشدان,آیاقدان
آییرد اولمایاجاق یاتمیش,اویاقدان!
ینه ده بیر منم,بیر سس سیز شه هر
دوتور اللریمی چوروموش اللر
ندیر بو اوغلانین یاناغیندا تر؟!
حایاتین سونونجو اؤپوش یئری می؟
یوخسا اینتیحارین قورخو تری می؟
ینه ده بیر منم!
ینه بیر منم!
#عقیل_مورادی
@qanadli_duyqular
داریخمالار، گؤزلریز آیدین...
آهیم پیلله-پیلله گؤیلره چیخیر،
اولدوز آلوولانیر، آی آلوولانیر
گئجه‌نین قوللاری بوینومو سیخیر،
دیلیم لال، اورگیم سئوگیمی دانیر
هانسی دنیزلرین دالغالیغیندا،
هانسی لیمانلاردا بورویوبدو چن؟
بلکه قارانلیغین کور قوجاغیندا،
هانسی دومانلارین اَتگینده‌سن؟
اوْلورسا اؤزونو گؤستر بیر تهَر
قوشلار پنجره‌نین گؤزلرین یئییر
ائله اؤز-اؤزونه دولاشیب شهر،
کوچه‌میز پالتارین دَییشیک گئییر
یئنه دیزلرینه تاپداییر یامان،
یئنه ده دفتریم ساچلارین یولوب
دئییرسن آناسی اؤلوبدور گومان،
یئنه ده شعریمین اۆره‌گی دولوب
الیم اللرینده تیتره‌ین، آی قیز
آدینی سسلدیم، سن هئچه سایدین
منی قوجاغینا چاغیریر پاییز،
ائی داریخمالار، گؤزلریز آیدین...
#دومان_سفراوغلو
@qanadli_duyqular
ايندى
اينصافدان غِيرتدن قورو آد قاليب
چوخ ايشين آچارى پول اولوب ايندى
آدام وار شدّاددان كئچيب قاباقا
وار-دؤلت الينده قول اولوب ايندى
آرى گوله بازدير، ميلچک قالاغا
قوزقون لئشه قونار، دورنا بولاغا
اؤيود كئچمز قورقوشوملو قولاغا
اَيرى يول چوخونا يول اولوب ايندى
سازينى ترسينه كؤكله‌ييب فلک
قازين يئريشينى يئرييير اُردک
كئچه قيمتينه ساتيلير ايپک
جَهالت نه يامان بول اولوب ايندى؟!
"موغان اوغلو" كؤنلون چيخمايير ياس‌دان
تولكوسوز كند اولمور، چاققالسيز بوستان
بايقوش ساراى گزير، قارغا گولوستان
بولبولون باشينا كول اولوب ايندى
#بختيار_علی_مرادى_موغان_اوغلو
@qanadli_duyqular
#کیمی_؟
قاپینی آچیق بیراخ؛
هئچ کیمسه،
گؤرمه‌سه‌ده!
بلکی بیری گلر؛
السیز - آیاقسیز،
وارلا یوخ آراسی.
حاچاندیر گؤزله‌ییرم.
#آتیلا_ایلهان
@qanadli_duyqular
مادام کی،
سئومیرم آرتیق،
او حالدا، هر آخشام،
اونو دوشونرکن ایچدیم!
مئیخانانین اؤنوندن،
نه دئییب کئچیم؟...
#اورخان_ولی
@qanadli_duyqular
ای سس‌سیز صداسیز سمیرسیز شهر
سولطانسیز خاقانسیز امیرسیز شهر
سینیری مفتیل‌سیز دمیرسیز شهر
داریسقال کوچن‌ده قاچانین هانی؟
یا گئنیش گؤیونده اوچانین هانی؟
هانی منم دئیه‌ن سیلاح گزدیرن؟
هانی قولتوغوندا ایلاه گزدیرن؟
هانی اوره‌یینده گوناه گزدیرن؟
یا جننت قاپیسین آچانین هانی؟
طالعین الیندن قاچانین هانی؟
ای گؤزل ، گؤرکملی چاتما قاش آدام
کیمیندن آشاغا کیمدن باش آدام
گؤزومون ایچینه باخان داش آدام
کهلیک‌تک سوزه‌نین اوچانین هانی؟
الینی بوراخیب قاچانین هانی؟
گؤزلرین ایشیقسیز باخیشین سرین
تورپاقدیر-سوموکدور مرمر پیکرین
هانی آیاقلارین هانی اللرین؟
قدح قالدیرانین ایچه‌نین هانی؟
دوداقدان دوداغا کؤچه‌نین هانی؟
دئییرلر یارانیر سورعتدن زامان
سورعت توکه‌ننده یوخ اولور اینسان
بیز بیز آز چؤر-چؤپوک حایاط بوروغان
پوزولور وارلیغین یولو عونوانی..
حاققین یازدیغینی پوزانین هانی؟
دئییریک، گولوروک سیزدن خبرسیز
بوراخیب گئتدیییز ایزدن خبرسیز
دئییب، گوله‌جک‌لر بیزدن خبرسیز
حاق دَییشمه‌یه‌جک قانون قایدانی
حاققین یازیسینی پوزانین هانی
کیمی کوچه-کوچه سولندی گئتدی
کیمی قاپی-قاپی دیلندی گئتدی
کیمی ائل باشینا دولاندی گئتدی
بویادی تاریخین اوزونو، قانی
هانی بو گرچه‌یی پوزانین هانی؟
ای سس‌سیز- سمیرسیز صداسیز شهر
سولطانسیز-خاقانسیز گداسیز شهر
قاچماق ایسته‌ییرم کوچه‌لرینده
توتولوب قالمیشام یوخ اللریمده
گؤودم یئر اوزونده، روحوم درینده
منه‌ده بیر یئر آچ منی‌ده تانی!
یاخیلیب یاخاما گؤیرچین قانی
#عقیل_مورادی
@qanadli_duyqular
اینصافی وارسا دا قوی اؤزو دئسین
فلک اودا سالیب کیمی منیم تک؟!
وار می بو دونیادا گؤرن قیریلان
کؤنول کامانینین سیمی منیم تک؟!
آلدانیب زامانین چال-چاغیرینا
کیم وئریب چیینینی یوکون آغرینا
آچیب قول‌لارینی باسیب باغرینا
کیم اؤپوب اوخشاییب غمی منیم تک؟!
بهمن‌م آغلارام من ایچین-ایچین
قاریشقا بیر چؤپده سیناییر گوجون
ائله یئرده دوشوب یاشاماق اوچون
یازیق تاپا بیلمیر چمی منیم تک!
#بهمن_وطن_اوغلو
@qanadli_duyqular
قوربانلیق
یایین ایستی بیر گونونده
داغدان غمگین گونش دوغدو
هله او گون، گون باتمادان
بهرنگی‌نی آراز بوغدو...
یاییلدی بیر کولگه سودا...
سولار آشدی... چالخالاندی...
آراز اوزون بیر نیل سانیب
بهرنگی‌نی قوربان ساندی...
او زامانکی باغچالاردا
قوشلار اوچدو، گول الندی...
آراز اوددو قوربانلیغین
قیزیل سولار حلقه‌لندی...
اوزاق‌لاردان آخیب گلن
آراز اوغلون قوجاقلادی
قارا یئرده یاتدی صمد
سئل آغلادی... ائل آغلادی
بهرنگی‌نی یاد ائدرکن
جان اودلانار، اوره ک یانار
دستان لارين اوخویانلار:
حورمت ایله اونو آنار
ظولمت چوکسه افوق‌لارا
یئنه گونون رنگی قالار
یوروش ائتسه شاختا، بوران
اونودولماز گوللو باهار...
#حبیب_ساهیر
#گون_آیدین
@qanadli_duyqular