6549
حؤرمتلی دیلداشلاردان، ادبیات سئونلردن، بیزه دستک اولماق‌لارین دیله‌ییریک آخاغیمیزی سئودیک‌لریزله پایلاشین🌹🌹🌹
اینانیم‌می یانی بیتیر آیریلیق؟!
جار دوشوب آی صاباح گؤرونه‌جکدیر
من اٶز اوره‌ییمین قایغیسیندایام
دونیاسا گؤزلری سئوینه‌جکدیر
بوشلوغون نه قدر بئنجیل اولسادا
سنی یادداشیمدان آلماییبدیر هئچ
توم قورخوم بودور کی دئسین‌لر جانیم:
"او سنین قایدیندا قالماییبدیر هئچ"
توم قورخوم بودور کی، قورخام آ..خ یئنه
یالنیزجا بیر گؤروش قیسمتیم اولسون
توم قورخوم بودور کی گؤروشمه‌میشدن
اؤزگه‌لــــر توپلومـــو یانینــــا دولســـون
گئدیشین اؤیردیب قورخام صاباحدان
بونا دا او قدر ایسینمه‌ییم من
باشیما نه قدر دونیا اویون وار
گتیرسین یئنه‌ده هئچ دینمه‌ییم من
چکینمه؛ یاخینلاش؛ من هامان منم
سن ده می قورخورسان؟! اوزاقدا دورما!!
من کی یوخلوغونون وورولموشویام
نــه اولار بیــر داهــا کؤنلومــه وورمــا..
اَیــَر من منم‌سه، سن ایسه سن‌سن،
داها غرورونو ائندیرجک‌سن
الیمین بیر ذره دوزو قالیبسا
گرک کی "سن" "منی" دیندیرجک‌سن!!
#سیــــرداش
@qanadli_duyqular
بیلمه‌دین
من عشقیمی سؤیله‌مه‌دیم، اوتاندیم،
تک قالاندا اوتانماقدان اوساندیم.
قلبی دئییر، سنین اوچون یاراندیم،
سنه اولان محبّتی بیلمه‌دین.
هردن ائله سانیرام کی، دۇیۇرسان،
باخیشینلا کدریمی یویورسان.
آی بیگانه‌م، سن دریمی سویورسان،
سنه اولان صداقتی بیلمه‌دین.
آنیرسان‌می سنی سئون بیر کسی؟
دۇیۇرسان‌می عشق عطیرلی بیر سسی؟
آی عؤمرومون، آی قلبیمین بیرجه‌سی!
من دوشدویوم قیامتی بیلمه‌دین.
یۇخۇلاردا گؤروشورم سنینله،
خیاللاردا اؤپوشورم سنینله،
اوره‌ییمده دؤیوشورم سنینله،
منده اولان دَیانتی بیلمه‌دین.
کیپریکلرین قیوریم-قیوریم قیوریلیب،
قاشین-گؤزون گؤزللیکدن یوغرولوب،
سنین بختین منیم اوچون دوغولوب،
او گله‌جک سعادتی بیلمه‌دین.
من «سئویرم» سؤیله‌مه‌دیم، دئمه‌دیم،
سنی گؤرجک دانیشمادیم، دینمه‌دیم،
سنسیز کئچن گونومه گون دئمه‌دیم،
سنه اولان اطاعتی بیلمه‌دین.
باخیشینلا منی وورور ایلدیریم،
بیر ال‌چاتماز ذیروه‌سن سن، سؽلدؽرؽم.
ایسته‌ییرم وار سسیمی قالدیریم،
سنه اولان محبّتی بیلمه‌دین.
#ووقار_احمد
#گون_آیدین
@qanadli_duyqular
پاییز گلدی چیچک آچماز،
یوز سولاسان سولان عؤمرو
کیم تزه دن جاوان ائیله ر
آهیل یاشا دولان عؤمرو ؟
دردین چوخو، غمین بولو،
سئل لر کیمی کسر یولو
یاخین قویما انسان اوغلو
درد ائیله یر تالان عؤمرو
بیر قوش ایدی اوچدو گئتدی،
ألیمیزدن قاچدی گئتدی ،
کئچن عؤمور کئچدی گئتدی
خوش کئچیرک قالان عؤمرو
"بهمن" اوچون درین اولان،
نادان اوچون سرین اولان،
دونیا کیمی شیرین اولان
یوخو کیمی یالان عؤمرو ...
#بهمن_وطن_اوغلو
@qanadli_duyqular
سنی تاپشیریرام آی ایشیغینا!
سنی بو گئجه‌یه تاپشیریرام، گئت!
سنی تاپشیریرام آی ایشیغینا.
آستاجا-آستاجا، آرام-آرام گئت!
چاغیرسام، دایانما قیشقیریغیما!
دوز یئری، بورولما دؤنگه‌یه، تینه!
قوی هله بیر آز دا گؤروم من سنی!
هایانا گئدیرسن؟ کیمین عؤمرونه؟
من یولا سالیرام عؤمرومدن سنی.
گئدیرسن، یئریشین نه قورخاجاقدی!
هارداسا اولایان بیر تنها ایت وار.
قاییتماق ایسته‌سن قاپیم آچیقدی
هله آی باتماییب، هله اومید وار...
هله آی باتماییب، هله اومید وار
قاییتماق ایسته‌سن، قاپیم آچیقدی.
هارداسا اولایان بیر تنها ایت وار
گئدیرسن، یئریشین نه قورخاجاقدی!
من یولا سالیرام عؤمرومدن سنی
هایانا گئدیرسن؟ کیمین عؤمرونه؟
قوی هله بیر آز دا گؤروم من سنی!
دوز یئری، بورولما دؤنگه‌یه، تینه!
چاغیرسام، دایانما قیشقیریغیما!
آستاجا-آستاجا آرام-آرام گئت!
سنی تاپشیریرام آی ایشیغینا
سنی بو گئجه‌یه تاپشیریرام، گئت...!
#رامیز_رؤوشن
@qanadli_duyqular
سن
عاغلیم‌لا قلبیم آراسیندا قالان
ان گؤزه‌ل چاره‌سیزلیییم‌سن...
#جمال_ثریا
@qanadli_duyqular
ائی خوش اول گون‌لر کی من همراز ایدیم جانان‌ایله
نعمتِ وصلین گؤروب نازین چکردیم جان‌ایله.
گؤرمه‌میشدی گُلشنِ عیشیم خزانِ تفرقه
اولمامیشدی تیره ایّامیم شبِ هجران‌ایله.
مهوَشیم‌دن دوستلار! دوران جدا ایستر منی
دشمنیم‌دیر، هیچ بیلمم نئتمیشم دوران‌ایله.
یئتسه گر عاشق‌لرین افلاکا افغانی نه سود؟
یئتمک اولماز ماه‌وش‌لر وصلینه افغان‌ایله.
یاشیریب ساخلاردیم ائلدن داغِ هجرانیم؛ اگر-
ائتمک اولسایدی مدارا دیده‌‌یِ گریان‌ایله.
ذؤوقدن دیباچه باغلاندی کتابِ عؤمرومه
قویمادی دوران، کئچه اوقاتیم اول عنوان‌ایله.
ائی «فضولی!» اخترِ بختیم مساعد اولمادی
کیم اولام بیر دم مُقارن اول مهِ تابان‌ایله...
حکیم مولانا ملا محمد فضولی
@qanadli_duyqular
چكير وارليغيمی دارا، گؤزلرين
آپارير روحومو هارا گؤزلرين؟
قارا بير محبس‌دير، قارا گؤزلرين
بوراخ گؤزلری‌نين حبسيندن منی
يانديريب ياخماق‌دا اود قودرتی وار
تكجه من بيليرم نه حيددتی وار
آخی، جزانين دا بير موددتی وار
بوراخ گؤزلری‌نين حبسيندن منی
قالديم جاذيبه‌نده، بيهوش كيمی‌يم
مرحمت گؤزله‌ين باخيش كيمی‌يم
قفسه سالينميش بير قوش كيمی‌يم
بوراخ گؤزلری‌نين حبسيندن منی
گونوم ائله سندن شيكايت اولوب
بو سئوگی بير داستان، حکايت اولوب
محبت نه واخت‌دان جينايت اولوب؟
بوراخ گؤزلری‌نين حبسيندن منی
زيندانا کؤنوللو سالديم اؤزومو
عيبی يوخ، پاييزا دؤندر يازيمی
من گوناه ايشله‌ديم، آرتير جزامی
ساخلا گؤزلری‌نين حبسينده منی...!
#نوصرت_کسمنلی
@qanadli_duyqular
آی آلله آماندی ، نه بَد زاماندی،
گون گوندن، آی - آیدان، ایل - ایلدن گئدیر
دوست - دوست دان آیریلیر، قوهوم - قوهومدان
اَل - الدن اوزولور ، ائل - ائلدن گئدیر.
نییه بلالی دیر بو خالقین باشی؟
کؤنول دن آیریلیب کؤنول سیرداشی
چتین تانییاجاق قارداش- قارداشی،
نسیل آرالانیب ، نسیل دن گئدیر.
سرت قیشین یئرینی، سولغون یاز آلیر
قوجا مورگولویور، حالی سوزالیر
گنجین اوره ییندن سئوگی آزالیر
عشقین حرارتی کؤنول دن گئدیر.
بهمنم گؤزلریم دولدو وطنسیز،
سارالدی ایرنگیم سولدو وطنسیز
داها وطن اوغلو اولدو وطنسیز
نئچه شیرین - شیرین سؤز الدن گئدیر.
#بهمن_وطن_اوغلو
@qanadli_duyqular
هئچ نه ایسته‌میرم سندن آ دونیا!
گونشی هر سحر قایتار خزره
هئچ کیمه هئچ نه‌یه مؤحتاج اولماییم
یاشاییم بیر کره، اؤلوم بیر کره
هئچ نه ایسته‌میرم قایتار باهاری
روحوما چیله‌ییم بیر عطیر کیمی
هئچ نه ایسته‌میرم باشیم اوستونده
اولدوزلو گؤیلری آچ چتیر کیمی
هئچ نه ایسته‌میرم سندن آ دونیا!
کؤنلومون نه‌دی کی آرزو دیله‌یی؟
قوی باخیم خزرین آیناسینا من
ساچیمی داراسین باکی کوله‌یی...
#بابا_وزیر_اوغلو
@qanadli_duyqular
ای ساریبان
ای ساریبان آهسته گئت، آرام جانیمدیر گئدن
یار کؤنلومو چکمیش منیم، روح و روانیمدیر گئدن
سعی ائیله‌دیم افسونیله، پینهان قیلام من دردیمی
پینهان ایشیم چیخدی اوزه، سیریله قانیمدیر گئدن
قالدیم بئله زار و ذلیل، بیچاره‌یم قلبیم علیل
دوشدوم او دیلداردان اوزاق، آسوده یاریمدیر گئدن
یوخ عهدینین بونیادی هئچ، بیتمز اونون بیدادی هئچ
چیخماز کؤنولدن یادی هئچ، اَن خوش زمانیمدیر گئدن
بیر آن دایان ای ساریبان، قویما گئده بو کاروان
اول سروه اویموشدور کؤنول، سروی روانیمدیر گئدن
بیر دون گئری ای نازنین، گؤز مسکنین اولسون سنین
سنسیز بو سونسوز گؤیلره، آه و فغانیمدیر گئدن
جان ترک ائدنده جیسمینی، اینسان آچار اؤز حیسسینی
یوخدو سؤزون گؤرموش گؤزوم، بو
خسته جانیمدیر گئدن
سعدی سنه لایق دئییل، یاردان گیله ای بی‌وفا
چوخ گؤردوم اوندان من جفا، صبر و توانیم‌دیر گئدن
#سعدی_شیرازی
@qanadli_duyqular
باهاریم تَلَسدی یازیم تَلَسدی
واختیندان تِز گلدی قیشیم قوجالدیم
گؤزوم آچيلمادی اوزوم گولمه دی
چوخ بلالر چكدی باشيم قوجالديم
ايشيم دوشدو ظولمكارنان ظاليمنان
دؤنوك باختيم ياپيشمادی قولومنان
بو گؤدك عؤمورده اهلی حاليمنان
چوخ اولدو نادانيم ناشيم قوجالديم
قضانين اوخلاری عؤمرومه سوزدو
داغ دؤزمز دردلره شجاعت دؤزدو
يازيق گنجليييمی تورمه لر اوزدو
اوتوزا چاتماميش ياشيم قوجالديم
#شوجاعت_کلبجرلی
#گون_آیدین
@qanadli_duyqular
بو دره کامینا چکیر روحومو
روحوم بو دره‌ده بوغولاجاقدیر
بلکه ائله بوردا بوغولسا روحوم،
منده ائکیزلیییم دوغولاجاقدیر
بلکه بو دره‌دیر دوغولدوغوم یئر
ندن بیرده بورا دؤنه‌سی اولدوم؟!
نردیبان-نردیبان ذیروه‌یه قالخیب
نردیبان-نردیبان ائنه‌سی اولدوم
بوردا یالنیزلیغین الی الیمده
اؤلوم گدییینه یاخینلاشیرام
اوستومه آخینیر اونودقانلیغیم
یولون دئدییینه یاخینلاشیرام
هر یئر همهمه‌لی، قیشقیریقلی‌دیر
قاتیر بیر-بیرینه قولاق، سس‌لری
بورداسا داریخار سسه بؤجک‌لر
اولماسا تانرینین آیاق سس‌لری...
#عقیل_مرادی_ائلدار
@qanadli_duyqular
يېخدې ساقی بير آياق ايله بنِ افگاری،
بير تپيك، ائيله دی ويران بو کهن ديواری!
گاه معمور قېلېر باده بنی، گاه خراب،
گؤرۆنۆز گاه ياپېب، گاه يېخان معماری!
گۆن چېخېنجا ساچارام گوهر اشك انجم تك،
گئجه لر يادېما گلديكجه مه رُخساری.
دل ياخار داغ گؤزۆن فكری ايله هجر گۆنۆ،
بو چيراق ايله می ساخلار گئجه اۏل بيماری؟
يۏخ اؤزۆندن خبری کيم کی گلير دنيايه،
بزمدن دېشرا قوماز پير مغان هُشياری.
بيزه چۏخ قدر بولونماز، چېخالېم دنيادان،
مشتری يۏخ، نئجه بير بكله يه ليم بازاری؟
قيد تقليد فضولي سنه بير آفتدير،
بير حصار ائده گؤر آندان اؤزۆنه زنّاری
#ملا_محمد_فضولی
#گون_آیدین
@qanadli_duyqular
یئنه باخچامیزی سوورور سازاق
یئنه بولودلانیب یاشا دولموشام
منی بیر سطیرلیک تزه‌دن یازاق
کؤهنه دبلر کیمین اونودولموشام.
ییغیبسان باشیوا آی اولدوزلاری
گئجه اؤز اورگین چئینه‌ییر تؤکور
قورخورام دوغمایا سحر قیزلاری
ظولماتین قوللاری دان یئرین سؤکور.
خفچیل بیر داریخما بورویور منی
قیز اولوب شعریمین ساچین هؤرورم
یالنیز سن گؤرورم گلیب گئدنی
بو سنسیزلیگیمی سنسیز اؤلورم.
منی دؤیمه یاغیش بئله‌سی یاغما
بو گون‌لر کوچه‌نین زیر دلیسییم
سینه‌مه تاخدیغیم چیچه‌گه باخما
من ائله پاییزین سئوگیلیسییم
#دومان_سفراوغلو
@qanadli_duyqular
سالمیشام شکر کیمی بیر لعبت شیرین اله،
گوزلری آهو صفت، بوینوندا مشکین سلسله.
عارضی گول، زولفو سونبول، نطقی شیرین، لفظی خوش،
بورنو پسته، گوزلری بادام، آغزی: بیر بیله!
#میرزاعلی_خان_لعلی_تبریزی
@qanadli_duyqular
بو همن پاییز دئییل.
کئچن ایلکی کیمی دولوب بولودلار،
آغاجلار حسرته بورونوب یئنه.
کئچن ایلکی کیمی قالیب بولودلار،
بس نه‌دن بو قدر یاد گلیر منه؟
کئچن پاییزدا دا بئله چن واردی،
هردن گونش کیمی گؤرونن واردی.
پاییزدی... بو پاییز او پاییز دئییل.
ائله بو ماهنی‌یلا بمین بولاقلار،
کئچن ایل ووصالدان اوخویوردولار.
آی سؤزلو بولاقلار، سرین بولاقلار!
نه‌دن سسینیزده بیر انتظار وار؟
هیجران نغمه سی‌دیر ایندی نه یازسام،
طبیعت! سن منی آلدادانمازسان.
پاییزدی... بو پاییز او پاییز دئییل.
دورنالار بئله‌جه اوچوب گئدیردی،
یئلپیک قانادینی آچیب گئدیردی.
اوندا دا توی-دویون فصلی‌یدی پاییز،
اوندا دا صدالی-سسلی‌یدی پاییز.
ائله بیل آزالیب دورنا قاطاری،
ائله بیل چوخالیب توی انتظاری.
پاییزدی... بو پاییز او پاییز دئییل.
جیغیرلار کمنده دؤنموشدو اوندا،
کؤنوللو دوشموشدو کمنده او قیز.
گونش اووجوموزا ائنمیشدی اوندا،
ایکیمیزین ایدی ان پارلاق اولدوز.
او پاییز توی اوچون سؤز وئردی منه،
بو پاییز اوخشامیر توی ائیله‌ینه.
پاییزدی... بو پاییز او پاییز دئییل.
#نوصرت_کسمنلی
@qanadli_duyqular
پاییز ایله من🍂🍁🍂
منیم ده ساچلاریم بویالی سن تک
منیم ده شاخامدان قارانقوش کؤچوب
من ده سنین کیمی خَزَل‌لنمیشم
منیم ده قوشلاریم باشیمدان اوچوب
توتولور هاوام دا یامان دال‌بادال
بورویور چَن، دومان اوره‌ییم گؤیون
پیرتلاشیق کَلَف تک هئی قیوریلیرام
مین بارماق آچانمیر حالیمدان دۊیون
ایندی من قالمیشام، سویوق پنجره
تؤکولور خزللر، سُولور چیچک‌لر
داها بوش سوفره‌لی کیچیک باغچاما
قوناق گلمه‌ییرلر ناز کَپه‌نک‌لر
قدم قوی بو گئجه یالقیز اوداما
صوبحه‌دک دردلشک، چوخلو چایلاشاق
دئییرلر: بؤلوشسن دردی یونگولَر
اوندا گَل سنینله دردی پایلاشاق
قویوم قاباغینا آلما، قوز، اوزوم
بویاقلی ساچینا اینجی‌لر دوزوم
دئییم خوش گلمیسن آی منیم اؤزوم
گَل گولوم سنینله ائکیزتایلاشاق
اوز- گؤزون غملی‌دیر، اللرین یالین
سازاقدان گئیمیسن اَینینی قالین
نه یاخشی بیلیرسن دوستلوغون یولون
قوینونا آل منی بیر قوجاقلاشاق
صاباح دا گئده‌ریک خیاوچایینا
باخاریق طبیعت قیزی بویونا
قوشوللوق ائلیمین شنلیک، تویونا
ال-اله، قول- قولا گَل سیجاقلاشاق
یئریییب خزلده سئودالی، مَلَنگ
باغلاریق چؤللرین گولوندن چَلَنگ
ییغیشسین دونیادان هر نه توپ، توفنگ
غریبسن؟ عئیبی یوخ، یالقوزاقلاشاق!
#سحر_خیاوی
@qanadli_duyqular
کؤنلوم اول مخمور گؤزلردن دئییل آزارسیز
کیم گؤروبدور بو خراب اولموش ائوی بیمارسیز؟
اَل بَه ال گولزاردن خورشید دامانین دوتار
اؤز گؤزون هر کیم کی شبنم تک قیلار زنگارسیز
چکمه‌دی بولبول نفس تا گئتدی گول گولزاردن
هیچ کافر قالماسین یارب جهاندا یارسیز
خاکسارلیق پیشه قیل تا فئیض حق یئتسین سنه
کؤلگه سالماز مهر تابان باشلارا دیوارسیز
کفرسوز گر مومکون اولسئیدی نظام آب و گل
باش دوتاردی سبحه‌نین جمعیتی زنّارسیز
درد و داغ عشق ایلن صائب اولار انسان مَلک
کامل اولماز سیم و زر مغشوش اولاندا نارسیز
#صائب_تبریزی
@qanadli_duyqular
آچیل سحر
اویان گونش
آچیل بو سوْن نفسده،
بو قارانلیق قفسده،
سنیله من تاپیم یئنی حیات.
شفق‌لریم آچیلسین،
چیچک‌لریم ساچیلسین،
بو ائل‌لره باغیشلاسین حیات.
#کریم_مشروطچی
@qanadli_duyqular
سن‌سیزیک
سنی آرار، بو کوچه‌لر، بو ائولر
جانا گلدیم، آلداتماقدان اونلاری
عاشیق اولوب ائوه گلمیر دوراقلار
سوروشورلار:
هاردا قالدی بو ده‌لی؟!..
سن بیلمزسن بو سن‌سیزلیک نه درددیر
قهوه گؤزلوم! بیر چای گتیر سؤیله‌ییم
سن بیلمزسن بو درد نئجه گؤزه‌لدیر
سن بو دردی چکمه‌دین‌کی، نه دئییم؟!
بو طالعی تانری یازدی -دئییرسن
بو تسللی نه سونودور نه ایلکی
دئییرسن کی چوخ آغلاتدی سنی ده
نه سؤیله‌ییم؟! تانری آدام دئییل‌کی!...
#ووقار_نعمت
#گون_آیدین
@qanadli_duyqular
قلم آغلا
دوشوبسن زیمیستان بوران، قارینا
گوُزلرسن آچیلماز یاز، قلم، آغلا
یالوار بو گردیشین کج مدارینا
ائیله‌سه بیر قدَر ناز، قلم، آغلا
بیتیشمز جییریم پارا پارادی
منیم ازل گوندن بختیم قارادی
اینجیمه‌سن آللاه، سینم یارادی
نه ائدیم دینجلمیر آز، قلم، آغلا
همیشه یاس توتوب آغلا ایمانا
ثوابدیر، حوُرمت ائت قریب جاوانا
خططیم یاخشی دئییل، گلمه فغانا
رحم ائیله دردیمی یاز، قلم، آغلا.
#نورس_ایمان
@qanadli_duyqular
مئی‌سیز، مزه سیز، جان ایله جانان اولا بیلمز
سئودا دئدیگین هر کسه میدان اولا بیلمز
عاریفلری دیندیر کی، ندیر شعر ایله صنعت؟
شاعیر یارانان امره پشیمان اولا بیلمز!!
کونلوم ائوی بیر گولشنه بنزر کی، عزیزیم
مین باد خزان ائسسه‌ده ویران اولا بیلمز!
قلبین، اوره‌یین اودلارینا یانماسا بیر سوز
دیللرده، آغیزلاردا او داستان اولا بیلمز!
گیردیم گونشین قوینونا، مین بیر سحریم وار
بولبولده منیم، گولده، زیمیستان اولا بیلمز.
یوکسل فقط اینسانلیغا پیس گوزله باخانلار
دونیادا بیر آد قویسا دا، اینسان اولا بیلمر!
خوشبخت ائلیمین، یوردومون اوز وورغونویام من
بوندان دا گوزل بیر داها دوران اولا بیلمز!
#صمد_وورغون
#گون_آیدین
@qanadli_duyqular
#کولک
یئنه پاییز گلدی قوناقلار کیمی
سولدو محبّتیم یارپاقلار کیمی
اورک پیچیلداییر دوداقلار کیمی
کولک، نییه بئله اسیرسن، کولک؟!
نییه اومیدیمی کسیرسن، کولک؟!
سئوگیلیم گؤروشه چاغیرمیش منی،
من نئجه اونودوم اولوب-کئچَنی؟
او دئییر آستاجا: «سئویرم سنی.»
سن نئیه سؤزونو کسیرسن، کولک؟!
کولک، نییه بئله اسیرسن، کولک؟!
او، اورک آغریتدی اورک اینجیتدی،
بیر عشقین سئویملی نغمه‌سی بیتدی.
سانکی محبّتیم خیالدی، گئتدی...
کولک، نییه بئله اسیرسن، کولک
سن ده‌می سئوگیمی گزیرسن، کولک...؟!
#نبی_خزری
@qanadli_duyqular
بیر انسان اوْتوروب ، باخیر سمیرسیز
بیر قاپی دؤرد دووار بیرده دؤرد بوجاق
شنلیگی ، گزمه‌یی ، چوْخ ییغجام ، تمیز
دوْلانیر ، کئف چکیر ، خیالدا آنجاق
بختی قاپالی‌دیر ، وورولوب سانجاق
یئمه‌یی اۆزونتو ، ایچگیسی سودور
اوْدا گؤز یاشی‌دیر ، آخیر دورودور
نیسگیلی گیزله‌دیر آغرینی اودور
سئوگینی پایلاییر بوْل قوجاق-قوجاق
یاشامین الینده اوْلوب اوْیونجاق
باخیشی ، دیلی‌دیر ، گؤزو سؤز دئییر
گۆل وئریر ، شر آلیر ، هئچ گؤرمور خئییر
اوْد توتور ، کؤز دادیر هر آن کۆل یئییر
یوْرولمور ، اۆفورور سؤنمه‌سین اوْجاق
بیلیرکی هر حالدا اؤزو یاناجاق
ائله گؤزتله‌ییر چیچک‌لرینی
تر تزه ساخلاییر لچک‌لرینی
زامان آغارتسادا بیرچک‌لرینی
اۆموددن دوْلودور ، گۆللر آچاجاق
اوْلاردا اؤزو تک ایشیق ساچاجاق
بیر ائودیر دؤرد دووار بیرده بیر قادین
آغیزلار ، حبس ائدیر گیزله‌دیر آدین
تاریخلر هئی سیلیب ، ایزلرین یادین
قیز گۆلدور ، قادین بال ، دئه‌نه اوْلاجاق : ؟
بونلار « آنا » اوْلور ؛ سوْن دایاناجاق . . .
#عیسی_باغیراوغلو
@qanadli_duyqular
عشق بازلیق شورونو من عالمه سالدیم اینان،
توللاییب سجاده‌نی مئیخانه‌یه اولدوم روان
سؤیله‌دی پیریم: مئی ایچ آت بو یالانچی طاعتی
حلقه تک آسدیم قولاقدان بو سؤزو دینجه‌لدی جان
#نظامی_گنجوی
@qanadli_duyqular
ایلک گونشی گؤردویوم گوْن آنلادیم
یاشاماق
ایستی بیر گوْن‌اورتا دیر...
ایلک ساری آی دا
آنلادیم
آنلامین اومودون
قارانلیقین ایچیندن داشان ایشیق اولدوغونو...
ایندی
۴۰ یاشین گودن
ساقالین‌دا آغ توک‌لرین سایین ایتیرن
یوکو آغیر
بیر کیشییم...
ماسامین اوستونده بیلگی سایار
الیم ده تلفون
گونش‌سیز
آی‌سیز
اومودسوز...
چاییمی یودوم‌لاییرام...
گونلریمی ساییرام...
#واحیدسولطان‌اوغلو
@qanadli_duyqular
قاییت گل!
یامان چتین ایمیش سنسیز یاشاماق،
کؤنلوم گئجه-گوندوز آغلار. قاییت گل!
سئوَنی بیر گونده یوز یول اؤلدورَر-
یارسیز اؤتوب کئچن چاغلار. قاییت گل!
دئمه کئچن کئچیب، اولان اولوبدو!
واخت اولوب بوشالان بیر ده دولوبدو.
سن گئدندن سارالیبدی، سولوبدو،
گول آچمیر باغچالار، باغلار. قاییت گل!
حسرتین عؤمرومون سارایین سؤکور،
قلبیم هارای چکیر، گؤزوم قان تؤکور.
«شوجاعت» وطنده غریبلیک چکیر،
غوربته دؤنوبدو داغلار. قاییت گل!
#شوجاعت_کلبجرلی
@qanadli_duyqular
#سنه_نه_ائتدیلر
او سحرمی چیخمیشدین، بیر گون اؤنجه‌می؟
بیر پیچاغین آغیزیندا گئدر كیمی‌ایدین
دمیرلرین سویوقلوغو نفس دوداقلاریندا
گؤزلرینده قارانلیغی دار هوجئیره‌لرین
سنی گؤرر-گؤرمز آزادلیغیمدان اوتاندیم
سؤیله نه ایچرسن، چای‌می؟ قهوه‌می؟!
چوخ ده‌ییش‌میسن بیردن تانییا بیلمه‌دیم.
ساچلارین اوزون ایدی، چییینلرینه آخاردی
كؤنلوموز شن‌له‌نردی ساریشینلیغیندان
اونلارمی كسدیلر، سن‌می قیسالتدین
گولردین، ایچیمیزه آیلار دوغولاردی
گؤرونمز داغلارین آرخاسیندان
كؤهنه گولومسمه‌یینی یئرسیز آختاردیم
او سحرمی چیخمیشدین، بیر گون اؤنجه‌می؟!
چوخ ده‌ییش‌میسن بیردن تانییا بیلمه‌دیم.
بیر چای ایچرمیسن، یوخسا قهوه‌می؟!
كیبریتیم یوخ، دئمک سیقارایا باشلادین
اللرین ده تیتره‌ییر، بیر شئیین‌می وار
بئله بیر قیز دئییل‌ایدین سن اسكی‌دن
سنه نه ائتدیلر، سنه نه ائتدیلر؟
كیرپیك‌لرین ایسلانیر دایانیب دایاناركن،
او سحرمی چیخمیشدین، بیر گون اؤنجه می؟!
چوخ ده‌ییش‌میسن بیردن تانییا بیلمه‌دیم!!
#آتیلا_ایلهان
@qanadli_duyqular
اؤلدوردویون بو سئوگینین یاسیندا
گلیب دایانمیسان توی لیباسیندا
منیم اؤزوم اوچون داریخماسان دا
منیم سئوگیم اوچون داریخاجاقسان
منیم سئوگیم بیر گول ایدی تر، اینجه
سؤیله‌میشدیم سولدورارسان در اینجه
سن سئوگیسیز سئوگیلری گؤرونجه
منیم سئوگیم اوچون داریخاجاقسان
اینله‌یه‌جک گاه کامانین گاه نئی‌ین
دئمیرسنسه سنه نئجه سئو دئییم
چوخ اولاجاق سئونلرین سئودییین
منیم سئوگیم اوچون داریخاجاقسان
#جیغا_تئل_عیسی_قیزی
@qanadli_duyqular