6549
حؤرمتلی دیلداشلاردان، ادبیات سئونلردن، بیزه دستک اولماق‌لارین دیله‌ییریک آخاغیمیزی سئودیک‌لریزله پایلاشین🌹🌹🌹
یولوم دار دالانا دیره‌نیب آرتیق،
ساغ-سولوم داغ-دره، قارشیم قارانلیق.
چاشمیشام، عاغلیم دا چاتمیر دادیما،
اؤزوم های وئریرم اؤز فریادیما.
دوشدوگوم دالانین یوخمودور سونو؟
دونیایا گلمه‌میش هاردان بیله‌یدیم،
دونیانین بو قدر پوچ اولدوغونو؟
#بختیار_واهابزاده
@qanadli_duyqular
مَن مین ایل اَوول ده گَله بیلردیم
مین ایلدن سونرا دا اؤله بیلردیم
واختی باشقا جوره بؤله بیلردیم
دوشوب سَن دوغولان هَفته‌یه، آیا
سَنی سئومک اوچون گَلدیم دونیایا...
#زلیمخان_یعقوب
@qanadli_duyqular
نئچه پاییز کئچیر او، آیریلیقدان
یوبانما قار یاغار، خاطره میزه!
یئنه قارانقوشلار گل- ها گلده دیر
باغچادا خزللر یئتیشیب دیزه
چینار آغاجینین سون یارپاقلاری
وحشی یئللریله سۆرگون گئده جک!
سنله اکدیگیمیز، آلما آغاجی
یاریسی دیشلنمیش آلما وئره جک!!
#ارشد_نظری_توخای
@qanadli_duyqular
طوبایام، هم سلسبیلم،
هم منم جنّات و حور
هم شرابام، هم سرابام،
هم سوسوزام، هم فرات
هم منم موسایا آتش،
هم منم آنَسۡتُ نَار
هم کلیمین طورویام من،
هم تمنّا، هم نجات
گنج پنهانام بو سیرری
من نه پنهان سؤیله رم
جیسم و جانام، کُن فَکانام،
واجیبم، هم ممکنات
#مولانا_عمادالدین_نسیمی
#گون_آیدین
@qanadli_duyqular
كيمليگين اؤزونه قیيمایان‌لارین،
نه دئییم، چوخ‌لاری آنا بیلمەدی
چوخ دا قينامایین، ھارين‌دير، ھارين
نئیلەسین آ قارداش؟! قانا بیلمەدی
چوخ‌لاری اؤزونو ایتیردی بئله
اؤزلوگون باتیریب بیتیردی بئله
اؤزونو آد-سانا یئـتیردی بئله
بير اوووج بارماغین، سانا بیلمەدی
چوخ‌لاری یاندیردی یاخدی چوخ‌لارین
دونیا چوخ قودورتدو قور-قودوق‌لارین
باشی آج، قارنی لئش، اولو توخ‌لارین
نئیلەسین، نەليگين دانا بيلمەدى
آی تانری قون یئره، اوینا اؤزون ده!
چوخ‌لاری یاد اولدو، باتدی سؤزونده
هئچ کیم حاق اوزوندە، حاققين گؤزونده-
آلیشا بیلمەدی، یانا بیلمەدی.
آی دده قیناما، دانلاما منی!
باشیمدا دومانی، گؤزومده چنی
آرزیمین گؤزلری، قان گؤیرچینی
ساختا دیزَلگەیه قونا بیلمەدی...
#اینام_گومانلی
@qanadli_duyqular
#بو_سئوگی
گلنده یاشیمی هئچ سوروشمادی،
باخمادی زامانا، یاشا بو سئوگی.
بیردن بیر دلی‌سوو اوغلانا دؤندو،
توتدو پنجره‌می داشا بو سئوگی.
دئدیلر: یول آختار قیز اوره‌یینه،
سوزول داملا-داملا، سوز اوره‌یینه!
اود قویدوم یانمیشین بوز اوره‌یینه،
آز قالدی دونیانی آشا بو سئوگی..
او سسلر هله ده قولاغیمدادی،
باهارین حسرتی یاناغیمدادی،
هله کی پاییزین سیناغیندادی،
گؤرَک دؤزه‌جک‌می قیشا بو سئوگی؟!...
#زلیمخان_یعقوب
@qanadli_duyqular
سنسیزلیک...
نئچه پاییز کئچیر اوْ آیریلیقدان
یوبانما، قار یاغار خاطیره‌میزه
یئنه قارانقوشلار گَل‌ها‌گَلده‌دیر
باغچادا خزللر یئتیشیب دیزه
چینار آغاجینین سوْن یاپراق‌لاری
وحشی یئللریله عؤمۆر سۆره‌جک
سنله اکدیییمیز آلما آغاجی
یاریسی دیشلنمیش آلما وئره‌جک
کۆچه‌میزده‌کی اوْ کوولان آغاجی
ایندی‌ده اؤزۆنۆ اؤوسه‌ییر سنسیز
اۆرک پنجره‌مین سوْن باخیشیسان
ایندی‌ده آستانام گؤینه‌ییر سنسیز...
#ارشد_نظری
@qanadli_duyqular
گون آیدین گول اوزلو سئودیییمه
گون آیدین یئر اوزونو آیدینلادان یئنی گونه
گون آیدین گؤرمک اوچون گؤزله‌یه‌نه
گون آیدین
گون آیدین
گون آیدین...
#ناظیم_حیکمت
@qanadli_duyqular
اوره‌ییمده بیتن سئوگی ماهنیسی،
پاییز بوداغیندا یازیلی قالدی.
سسین یاییلمادی دار کوچه‌میزدن،
آدین دوداغیمدان آسیلی قالدی.
گئدیردین، گیزلیجه گؤزوندن ایراق،
اوخشادیم آغلادیم سنه بیر اتَک.
اَلیندن یاپیشیب آپاریردیلار،
یایلیغا بۆکولن بایرام پایی تک.
گئدیردین یول‌لاردا باهار سولوردو
بولود گؤزلریمده یاشا دولوردو
شافاق قان قوسوردو چیچک‌لر گۆلوش
بنؤوشه ساچلارین، سازاق یولوردو.
قلبیمده بیر آرزی آه چکیر منیم،
سنسیز اوزاقلاردا بیته‌جه‌یم من
داها یوواسیندان کوسن قوش کیمی
تانرینین گؤزوندن ایته‌جه‌یم من.
الوداع هر گئجه یازدیغیم شعر!
سنی بالتالاییب مندن آلدیلار.
من ائله پاییزدا تورپاغا دوشدوم،
کفن‌لنمه‌ییمی قیشا سالدیلار.
#دومان_سفراوغلو
@qanadli_duyqular
دئییل الله اۆچون زاهید ائدیرسه مسجیدی تعمیر،
تشخخۆس ساتماغا ایستر ایشه سالسؽن اوْ دۆککانی.
چئویرسه بارماغؽ تسبیه، آلدانما، ریا بیل سن،
سایؽر گؤرسون چاتؽرمی آلماغا دۆنیانی، ایمانی.
#فوضولی
@qanadli_duyqular
ایندی
اوره‌ییمده قالان بوم بوش یئرینی
رهنه‌ده وئرمیرَم ساتیرام ایندی
داریسقال چاغلاردا داریخان آندا
داها آغلامیرام یاتیرام ایندی
نه گئجه-گونوم اول نه گوندوز-آییم
سویله‌مه دونیادا یوخ منیم تاییم
بلکه او گوزلرده یوخ ایمیش پاییم
حسرتی گیله‌مه قاتیرام ایندی
بو دوداق‌لار پئچیلدامیر آدینی
اونودوبدور شیرین دیلین دادینی
اویرنمه‌دیم سئودالیق ساوادینی
عشقین باتلاغینا باتیرام ایندی
کورپه یئتیم کیمی چاغلامیرام من
سنی خاطیرلاییب آغلامیرام من
بختیمین قاپیسین باغلامیرام من
سوکوب چرچیوه‌سین آتیرام ایندی
قاییدیب اوبایا سازاغی آلما
بیرده آرامیزا آراچی سالما
وئردیغین چوره‌یی باشیما چالما
اوزوم پیشیریرم شاتیرام ایندی
#رقیه_عبدیلی_سازاق
@qanadli_duyqular
بنده نی عفو ائیله یه ملّت گرک
معبده مئیخانه دئدیم، بیلمه دیم
باشینی دیواره ووروب سیندیران
عاقله دیوانه دئدیم، بیلمه دیم
من نه بیلیم قارغا خوش آواز ایمیش؟
بایقوشا بایقوش دئمک اولماز ایمیش!
تلخ ایدی اؤقات- شریفیم بیر آز
بایقوش او حئیوانه دئدیم بیلمه دیم
گؤردو فلانکس یوخودا بیر گئجه
قول بویون اولموش یاتیری حور ایله
سرخوش ایدیم شیره ی- انگور ایله
اویقویا افسانه دئدیم، بیلمه دیم
بیغ و سقَل صؤحبتین الدن سالین
ائیله مه یین ذمّ او قیزیل دیش لری
عصریمیزه لازم اولان ایش لری
اؤیردین اوغلانه دئدیم بیلمه دیم
دوءشمن- دین گؤیده گزیر قوش کیمی
معبدی ویران ائده جکدیر، اگیل
کس سسیوی باشیوا بیر چاره قیل
قاری- قورآنه دئدیم، بیلمه دیم
گؤرجک الینده قزته جعفرین
رنگی پوزولدو، سیریغی کورلادی
غئیضه گلیب، بومبا کیمی گورلادی
آغزینا قورخانه دئدیم، بیلمه دیم
وزری، وبالی، گوءنهی بوینوما
مشدی، جانیم وئر پولونو آج لارا
پئیکری عوریان لارا، مؤحتاج لارا
گئتمه خوراسانه دئدیم، بیلمه دیم
حاجی داداش، سالما اؤزون زحمته
وئر او پولو ملّت- بی دؤلته
کافر اگر بورج وئره بو ملّته
بند اولار ایرانه دئدیم، بیلمه دیم
اویموش عجب غفلته قارداش لاریم
چورتا گئدیب، صوءبح و مسا یوخلایار
من ائله بیلدیم کی، او سِر ساخلایار
سرّیمی قلیانه دئدیم، بیلمه دیم
آتدی الین، قایمه ی- خنجره
دوردو بئش- اون ووردو من- موضطره
من ائله بیلدیم کی، او سؤز یاخشی دیر
یاتما موسلمانه دئدیم، بیلمه دیم
دوستا دئیر دوست خطیّاتینی
کی، ائده اصلاح عیوباتینی
دین و وطن دوءشمنی ظنّ ائیله دیم
مؤعجزه بیگانه دئدیم، بیلمه دیم
#میرزا_علی_معجز_شبستری
@qanadli_duyqular
داغلار
من سیزی بیر داها گؤره بیلمه‌سم
خاطیره‌می عزیز ساخلایین، داغلار!
دؤشونوزدن لاله دره بیلمه‌سم
سیز منی آراندا یوخلایین، داغلار!
اوجا باشینیزدان کولک گؤنده‌رین
مخمر دؤشونوزدن چیچک گؤنده‌رین
بولوددان بیر بیاض اؤرپک گؤنده‌رین
ماتم یایلیغینی باغلایین، داغلار!
من کی چوخ سئوردیم داغ هاواسینی
سئون اورک‌لرین خوش سئوداسینی
بیر غریب گلینین توتوب یاسینی
دوست اوچون دویونجا آغلایین، داغلار!
#نیگار_رفیع_بیلی
@qanadli_duyqular
سئوگی
دورنا دئییل
پاییزدا کؤچه...
#نوصرت_کسمنلی
@qanadli_duyqular
پاییز...
اوخشاییر روحومون قارا ساچلارین،
پاییز کیم دئییر کی داریخمالی‌دیر؟
دیلینی آنلاسان، ایچینه وارسان،
گؤررسن نه گؤزل، نه باخمالی‌دیر!
سون باهار گلنده باهارلانیرام،
بارلانیر دویغومون تام آغاجلاری.
سویونوب تؤکورسه، دئمک سؤزو وار،
عوصیانی نه بیلیر چام آغاجلاری؟!
یارپاقلار هاوادا یاللی گئدیرلر،
گلیر قولاغیما چال-چاغیر سسی.
یاغیش خئییر-دوعا وئریر تورپاغا،
پاییز طبیعتین خینا گئجه‌سی.
تکجه فصیل دئییل، دئوریم‌دی البت،
اینسانین چیخمایان سسی‌دیر پاییز.
باشقا فصیل‌لرین دادی بیر یانا،
شاعیر اولانلارین بسی‌دیر پاییز.
#خان_صنم
@qanadli_duyqular
«یازیمیز پاییزا دؤندو!»
بیزیم ائوده بیر آی باهار
قالانی، پاییزدی، قیشدی!
بو نئجه بیر پای بؤلوشدو؟!
بو نه اویون، بو نه ایشدی؟!
گئجه گیریر دریمیزه!
گوندوز گیزلین گیزلین قاچیر
آرزولاریمیز قوجالیر!
اؤلوم بیزه قوجاق آچیر
هامی یالقیز، تانری کیمی
هامی یورغون، شیطان کیمی
هامی اؤزونده قیوریلیر
یارالانمیش ایلان کیمی
آی آوارا گزن قورشون
گل کؤکسومو پارچالا کئچ
قانیم سنه حلال اولسون
هر نه قدر ایچیرسن، ایچ
آنامی پاییز آپاردی!
بابامین اوجاغی سؤندو!
دومان چؤکدو باشیمیزا
یازیمیز، پاییزا دؤندو!
#میرحسین_دلداربناب
@qanadli_duyqular
مَنده گوناه آراما
اؤزون کوسدوردون منی
اوره‌ییمه توخونان،
سؤزون کوسدوردو مَنی
هَردن سوزولوب آخان
مَنی یالنیز بوراخان
دؤنوب یادلارا باخان،
گؤزون کوسدوردو مَنی
سوروشما هیجران نه‌دن
غَم‌دی قلبیمی دیدَن
مَندن آیریلیب گئدن،
ایزین کوسدوردو مَنی
یاندیم قوورولدوم داها
دَردیمی بؤلدوم داها
دؤزدوم یورولدوم داها
دؤزوم کوسدوردو منی
هَر کَسه گولوم دئیَن
اوجاغیم کولوم دئیَن
هامییا گولومسه‌ین،
اوزون کوسدوردو مَنی
#نوصرت_کسمنلی
@qanadli_duyqular
هئچ نه ایسته‌میرم سندن آ دونیا!
گونشی هر سحر قایتار خزره
هئچ کیمه هئچ نه‌یه مؤحتاج اولماییم
یاشاییم بیر کره، اؤلوم بیر کره
هئچ نه ایسته‌میرم قایتار باهاری
روحوما چیله‌ییم بیر عطیر کیمی
هئچ نه ایسته‌میرم باشیم اوستونده
اولدوزلو گؤیلری آچ چتیر کیمی
هئچ نه ایسته‌میرم سندن آ دونیا!
کؤنلومون نه‌دی کی آرزو دیله‌یی؟
قوی باخیم خزرین آیناسینا من
ساچیمی داراسین باکی کوله‌یی...
#بابا_وزیر_اوغلو
@qanadli_duyqular
كؤک اوسته بوداغی نئچه‌دی بيلديم
بوداغدا يارپاغی نئچه‌دی بيلديم
سالخیمی ساچاغی نئچه‌دی بيلديم
بو ياشيل آغاجين آلتی بيزيم‌دی
ساچاغی ترپنیر تئللرين كيمی
يارپاغی اويناشير اللرين كيمی
دویمه‌سی آچيليب توللرين كيمی
بو ياشيل آغاجين آلتی بيزيم‌دی
بو سئوگی، بو لایلا، بو بئشيک بيزيم
چكر نوبه‌ميزی بو كئشيک بيزيم
نه‌ييميزه لازيم ائو-ائشيک بيزيم؟
بو ياشيل آغاجين آلتی بيزيم‌دی
سو ايچر سئوگينين كؤكو عؤموردن
سئوگی ال اوزمه‌سين تكی عؤموردن
خوش بير خاطيره‌دير ايكی عؤموردن
بو ياشيل آغاجين آلتی بيزيم‌دی
كؤنلوموز هاوالی گؤزوموز ده آج
گنجليیين هاواسی باشيميزدا تاج
بير سنسن، بير منم، بير ياشيل آغاج
بو ياشيل آغاجين آلتی بيزيم‌دی
آتش آللاهين‌دی، ايستی آللاهين
اوجاق آللاهين‌دی، توستو آللاهين
بو ياشيل آغاجين اوستو آللاهين
بو ياشيل آغاجين آلتی بيزيم‌دی
دن كيمی سپه‌له توخوم كيمی اک
زليمخان بو آنين لذتينی چک
هله بيزدن سونرا چوخو دئیه‌جک:
"بو ياشيل آغاجين آلتی بيزيم‌دی"
#زلیمخان_یعقوب
@qanadli_duyqular
آیریلدیم هر یئردن اوزولور الیم
آغاج اؤز کؤکوندن اوزولن کیمی
گؤرموشدوم کؤنلومده اوچور دویغولار
دورنالار قاتارا دوزولن کیمی
وئرمیشم من سنه نذیر کؤنلومو
گئری قایتارماغین اوزور کؤنلومو
سنین سرت جاوابین ازیر کؤنلومو
یارپاق آیاق آلتدا ازیلن کیمی
اینجیدین یا کوسدون نه دئییم سنه
قویمارام کؤنلومده بو آتش سؤنه
گله رم قاپینا گله رم یئنه
یوخوشدان چوخورا سو گلن کیمی
#بختیار_واهابزاده
@qanadli_duyqular
منی دیندیرمه سن آللاه اوره‌ییم پارتلایاجاق
ایل‌لرین حسرتی بویدا دیله‌ییم پارتلایاجاق
یارامین هر بیری ضامن‌دی اورک بومباسینا
سینه‌مین دردینی دئشسن کوره‌ییم پارتلایاجاق
اوقدر دردی آغیردیر گؤزو قان پنجره‌مین
اوتاغیم ناله تپیر وای، دیره‌گیم پارتلایاجاق
نه دویون‌لر دوشور آللاه گؤزومون یاشلارینا
کیپریگین نشتری اوسته گره‌گیم پارتلایاجاق
اود - سازاق ال-اله وئرمیش فله‌یین قصدینه باخ!
قانلی تر ایچره، کوفولداق کوله‌گیم پارتلایاجاق
دام-دوار قالمادی اسرک یوموروق‌لار یئمه‌میش
دؤزه بیلمز بونا بارماق، بیله‌گیم پارتلایاجاق
خایالیم کئچدی بیر آن خان چوبانین کئچمیشینه
دئدی شاعیر دوداق اوسته توته‌گیم پارتلایاجاق
بیر نفسلیک آرا وئر قانلی خایال قان گؤزومه
یوخسا شعر دفتریم اوسته اوره‌ییم پارتلایاجاق!
#مهدی_سربازی_علمداری
@qanadli_duyqular
یاغیش یاغدی، هئچ قویمادی-
گوز آچیب گؤرم یوخومو
ایسلاندی، اوشودو؛ گرک-
گونئی‌ه سرَم یوخومو.
سنسیزلیک سلقه‌می قاتیب،
یوخوم زیر-زیبیله باتیب.
گلسن گرک بیرده یاتیب-
سیلم-سوپورم یوخومو...
#نادر_الهی
@qanadli_duyqular
جان وئرمه غم عشقه کی عشق آفت جان دیر
عشق آفت جان اولدوغو مشهور جهان دیر
سود ایستمه سودای غم عشق ده هرگز،
کیم حاصل سودای غم عشق، زیاندور
هر ابروی خمه ، قتلینه بیر خنجر خون ریز
هر زلف سیه قصدینه بیر افعی ایلان دیر
یاخشی گورونور صورت مهوشلرین اما،
یاخشی نظر ائتدیکدیده، سرانجامی یاماندیر
گر دئرسه فضولی کی گوزل لرده وفا وار
آلدانما کی شاعر سوزو البته یالاندیر ...
#ملا_محمد_فضولی
#گون_آیدین
@qanadli_duyqular
گئدیرم، ایزیم بؤیویور،
سۇسورام، سؤزوم بؤیویور،
باخؽرام، گؤزوم بؤیویور،
دۆنیا منه تانؽش گلیر.
بۇنون داغؽ-داشی تانؽش،
بونون یایؽ-قیشی تانؽش،
گؤزلریمین یاشؽ تانؽش
دۆنیا منه تانؽش گلیر.
بیر دفعه‌ده گلمیشممی؟
گلمیشممی، گؤرموشممی؟
یاشامؽشام، اؤلموشممی-
دۆنیا منه تانؽش گلیر.
#رامیز_رؤوشن
@qanadli_duyqular
حقّیم دییل تئز یئتیشم حُسنونه
من گرک بیر عمر گؤزله‌یم سنی
گۆندوزلر اوخشایام خیاللاریمدا
گئجه لر قلبیمده گیزله‌یم سنی...
#شیروانلی_خاقانی
#گون_آیدین
@qanadli_duyqular
یولوما نور چیله، بیرجه یولسا دا،
اویان، دور، آ بئیتیم، یاتما یازیغام!
اؤزون دید-پارچالا اؤز ال‌لرین له
منی نامردلره ساتما یازیغام!
آلینیب ائلیم‌دن سئوینجیم-نئشه‌م،
ازل‌دن آغلاماق اولوبدور پئشه‌م،
من کی یامان گونو آز گؤرمه‌میشم-
داها آلوولارا قاتما یازیغام!
چتین گونده کؤمه‌ییمه چات باری،
چالیش-ووروش، یورولاندا یات باری
باتاندادا دریالاردا بات باری-
دایاز گؤلمه‌لرده باتما یازیغام!
شجاعتم یارالانمیش بولبولم،
آرتیر گوندن-گونه غوباریم-نالم
قییما آرزولارا چاتمامیش اؤلم
انصافی-موروتی آتما یازیغام!
#شوجاعت_کلبجرلی
@qanadli_duyqular
او آخشام گلدیم سیزه
نه حورمت ائتدین بیزه؟
بیر دوراریق دیز-دیزه
قانیندا یوخ حرارت
عشقیمی قانمادینیز
هیچ ده اینانمادینیز
نه اوچون اوتانمادینیز؟
هئچ ساتیلیرمی آفت؟
بیر شاعیرم یارالی
سئودیگیمدن آرالی
سیز ساتدینیز مارالی
من چئکیرم خجالت
داغلاردا کی صاف سو یام
عشقیمین یولچوسویام
دئمیرم کی قوچویام
یئرینده دور فراقت
#صمد_وورغون
@qanadli_duyqular
بير دريا گئنيشلی اوره‌ک گزيرم
دردس دالغاسينا پای وئريب گئده‌م
سسسله‌نم داغلارين داش قاياسينا
اؤزوم اؤز سسيمه های وئريب گئده‌م
ال آتام گونشين قيزيل تئلينه
دولانام قورشاق تک يازين بئلينه
قارانليق گئجه‌ده ظولمت يئرينه
ايشيقلی اولدوزلو آی وئريب گئده‌م
كؤنولم دؤندرم چرخين فله‌يين
باغلايام يولونو فيتنه كله‌يين
آلام اوره‌كلرين سازاق كوله‌يين
يئرينه يام-یاشيل يای وئريب گئده‌م
#فاطمه_عبدی_کونول
@qanadli_duyqular
من گولوشونه اؤلدوم، او اؤلوشومه گولدو؛
فرقلی‌یدیک ایشده...
#اؤزدمیر_آصاف
#گون_آیدین
@qanadli_duyqular
بیرده دون خاطیره لر ایزله رینه باخ نه اولار
ویصالین آغ گولونو ساچلارینا تاخ نه اولار
یئنه گل ال - اله وئر منله گئدک سئوگی یولون
بیرده اول یاز بولودو , شنلیگه دول ,شاخ, نه اولار
حسرتیندن له لی ییر دویغولارین قان دوداغی
اؤپوشه دورسا ویصال حسرتیلن آخ نه اولار
شاختا وورموش اَته شین کورسوسونو قور یئنی دن
او سیحیرلی گؤزولن , کیپریگی بیر چاخ نه اولار
بیلیرم اود ووراجاق سوندا بو عشقین یئنی دن
اولسون ! اود وور اوره گین کؤسکونو بیر یاخ نه اولار
#مهدی_سربازی_علمداری
@qanadli_duyqular