6549
حؤرمتلی دیلداشلاردان، ادبیات سئونلردن، بیزه دستک اولماق‌لارین دیله‌ییریک آخاغیمیزی سئودیک‌لریزله پایلاشین🌹🌹🌹
اوْردا کی دیل-آغیز سؤزدن اوسانیر
سوْروشون مطلبی تئل‌لر سؤیله‌سین!
دوْداق دانیشارسا اوْد توتار یانار
گرکدیر زخمه‌لر ،أللر سؤیله‌سین!
#بولود_قاراچورلو
@qanadli_duyqular
سویوقدان ایستیدن ساخلانان جانیم
قورو یئردی آخير بير گون مكانی
أزل دن قايداسی بودور دونيانين
گاه يازی چاغيرير گاه زمستانی
ناواخدان بری دی مثل دير إئله
فله یین سیررینی بیلن یوخ هله
بیری هامبال اولور گؤتورور شله
بيری بول قازانير روزينی نانی
چوخ اولور سخاسيز نا انصاف دا وار
دؤلتی آرتيقجا اولار طاماح كار
معطلم قرارينا روزيگار
اوجالديرسان آلچالديرسان اينسانی
يارپاق كی سارالدی يئتیشیب واختی
شمشیر چوخدا دئمه اؤلوم اوزاق دی
تاراج اولدو نئچه شاهلارین تاختی
هانی یئر اوزونون خانی خاقانی
#آشیق_شمشیر
@qanadli_duyqular
منه دلبر او کؤنول مولکونه سولطانیم بس
دین و دیل وئرمَه‌گه اول غارت ایمانیم بس
عاشق صادق اوچون محضر شاهید نه گرَک
منه اثبات جنون بو سر عریانیم بس
نه ایشیم واردی منیم سئیر گولوستانه گئدم
سئیر گولشَن منه بو خلوت ویرانیم بس
نئیلیرم سیریمی هر ناکسه اظهار ائله ییم
منه غم یار و رفیقیم دلِ سوزانیم بس
حور و جنت اولا من ایسته میرم یار اؤزومه
منه یار اولسا اگر اول گولِ خندانیم بس
چوخ دا تعریف ائله‌مَه باغِ بهشتی زاهید
کی اونون کوئی منیم روضه‌ی رضوانیم بس
بولبول و طوطی و قُمری سنه ارزانی اولا
ای "نباتی" منه بو طبعِ سخندانیم بس
#حکیم_ابولقاسم_نباتی
@qanadli_duyqular
#جهنمده_بیتن_گول
فلکین قانلی الیندن بیر آتیلمیش یئره اندی
بیر فلاکت آنانین جان شیره سندن سودون امدی
بوللو نیسگیل شله سین چیگنینه آلتدی
تای توشوندان دالی قالدی
ساری گول میثلی سارالدی
گونو تک باغری قارالدی
درد الیندن زارا گلدی
گونو گوندن قارا گلدی
خان چوبان سیز
سئله تاپشیرسین اوزون
یوردوموزا
بیر سارا گلدی
بیر وفاسیز یار الیندن سانا گلمز یارا گلدی
بیر یازیق قیز
جان الیندن جانا گلمز جانا گلدی
گئچه جکده "الموت" دامنه سیندن
بو رایا درمانا گلدی
بیر آدامسیز "سوری" آدلی الی باغلی دیلی باغلی !
سوری کیم دیر ؟
سورو بیر گولدو
جهننمده بیتیبدیر
سورو بیر دامجی دی گوزدن آخاراق ئوزده ایتیبدیر
سورو یول یولچوسودور اَیری ده یوخ، دوزده ایتیبدیر
سورو بیر مرثیه دیر اوخشایاراق سؤزده ایتیبدیر
او کونول لرده کی ایتمیش دی ازلدن
اودو گوزدن ده ایتیبدیر
سوری بیر گوزلری باغلی اؤزو داغلی سؤزو داغلی
اولوب هاردان هارا باغلی !؟
بوشلایب دوغما دیارین اوموب البته یاریندان
ال ئوزوب هر نه واریندان
قورخمایب شهریمیزین قیشدا آمانسیز بورانیندان نه قاریندان
گزیر آواره تاپا
یاندریجی دردینه چاره،
تاپا بیلمیر
چوخ سئویر عشقی باشیندان آتا آمما، آتا بیلمیر
اووا باخ اووچی دالینجا قاچیر ! آمما چاتا بیلمیر
ایش دؤنوب لیلی دوشوب چوللره مجنون سوراغیندا
شیرین الده تئشه
داغ پارچالایر،
فرهاد اتورموش اوتاغیندا
تشنه لب قو
نئجه گور جان وئریر دریا قیراغیندا
وارلیغین سون اثری آز قالیر ایتسین یاناغیندا
سانکی بیر کؤزدو
بورونموش کوله
وارلیق اوجاقیندا
کؤزه ریر پیلته کیمین یاغ توکه نیب دیر چراغیندا
بوی آتیر رنج چاغیندا ، قوجالیر گنج چاغیندا
بیر آدامسیز "سوری آدلی" الی باغلی دیلی باغلی!
سوری جان!
اومما فلکدن؛
فلکین یوخدی وفاسی
نه قدر یوخدی وفاسی٫ او قدر چوخدی جفاسی
کوهنه رقاصه کیمین
هر کسه بیر جوردو اداسی
او آیاقدان دوشه نی
ایستر آیاقدان سالان اولسون
او تالانمیشلاری ایستر
گونو گوندن تالان اولسون
او آتیلمیشلاری ایستر
هامیدان چوخ آتان اولسون
او ساتیلمیشلاری ایستر
قول ائدرکن ساتان اولسون
نئیله مک قورقو بوجوردور
فلکین نظمی ازلدن اولوب اضدادیله باغلی
قاراسیز آغلار اولانماز
دره سیز داغلار اولانماز
اؤلوسوز ساغلار اولانماز
گره ک هر بیر گؤزله بیر دنه چیر کین ده یارانسین
بیری اَنسین یئره گویدن
بیری ؛ عرشه اوجالانسین
بیری چالسین ال آیاق غم دنیزینده
بیری ساحلده سئوینج ایله دایانسین
بیری ذلت پالازین، باشه چکیب یاتسادا آنجاق بیرینین بختی اویانسین
بیری قویلانسادا نعمتلر ایچینده
بیری ده قانه بویانسین
آی آدامسیز سوری آدلی
ساچلاریندان دارا باغلی!
نئیله مک ایش بئله گلمیش "چور" گلنده گوله گلمیش
فلکین اگری کمانیندا اولان اوخ آتیلاندا دوزه دیمیش
دیلسیزین باغری دلینمیش ایری قالمیش "دوز" اییلمیش
اونو خوشلار بو فلک
ائل ساراسین سئللر آپارسین
بولبول حسرت چکه رک گول ثمرین یئللر آپارسین
"قِیسی" چوللرده قویوب "لیلی" نی محمیلر آپارسین
"خسرو"ی "شیرین" ایلن ال اله وئرسین"فرهاد"ین قامتین اگسین
باخاراق چرخ زمان نئشه یه گلسین
کئفه دولسون
سوری لار سولسادا سولسون
بیری باش یولسادا یولسون
سیتقا بیر اولدوز اگر اولماسا اولدوزلار ایچینده بو سما ظلمته باتماز
داش آتان" کول باشی" قویموش
داشینی اوزگه یه آتماز
سن یئتیشسن هدفه اوندا فلک مقصده چاتماز
داها افسانه یارانماز
سوری آی باشی بلالی! زمانین قانلی غزالی !
سوری بیر قوشدو خزان آیری سالیبدیر یوواسیندان
ال اوزوبدور آتاسیندان
جوجه دیر حیف اولا سود گورمه ییب اصلان آناسیندان
او زلیخا کیمی یوسف ایین آلمیر لباسیندان
بونا قانع دی تنفس ائله ییر یار هاواسیندان
درد وئرن درده سالیب آمما خبریوخ داواسیندان
آغلاییب سیتقایاراق بهره آپارمیر دوعاسیندان
او بیر آئینه دیر رسام چکیب اوستونه زنگار
اوندا یوخ قدرت گفتار ئوزو چیرکین، دیلی بیمار ،
گنج وقتینده دل آزار
گوره سن کیمدی خطاکار!؟!
گوره سن کیمدی خطاکار!؟
#جهنمده_بیتن_گول
#مرحوم_عاصم_اردبیلی
@qanadli_duyqular
قارغا بالاسی
تک صبیر گتیردی قارغا بالاسی،
«آز یاشا!» دئدیلر چوخ یاشایانلار.
اینجیدی... اینجیدی قارغا بالاسی،
بیلمه‌دی اؤلومون تئزی گؤزل‌دی،
عؤمور یوخ، اؤلومون اؤزو گؤزل‌دی.
بیلمه‌دی... بیلمه‌دی قارغا بالاسی،
ان چوخ او دویاجاق «آتش» سسلرین،
ان چوخ او گؤره‌جک آتش‌کس‌لری.
#صدام_لاچین
@qanadli_duyqular
تاپدیم... تاپدیم
بو بیر سئوگی یوخوسویموش،
بیر بنؤوشه قوخوسویموش.
تاپدیم... تاپدیم،
بیر مئشه‌نین یاخاسیندان
تاپدیم سنی.
بیر چیچه‌یین قوخوسوندان
تاپدیم، تاپدیم، تاپدیم سنی.
من ده گئدیب ایتمیش ایدیم،
بیر تالادا بیتمیش ایدیم؛
تاپدیم... تاپدیم،
رقیبیمدن قاچان واختی
تاپدیم سنی.
منه ساری اوچان واختی
تاپدیم سنی.
تاپدیم، تاپدیم، تاپدیم سنی.
آللاه، بو سن اولمایاسان!
بلکه ائرکن سولمایاسان.
تاپدیم... تاپدیم،
شکیلده نه سوسلَنمیسن،
تاپدیم سنی!
صورتینده گیزلَنمیسن،
تاپدیم سنی!
تاپدیم، تاپدیم، تاپدیم سنی!
یوللار اوزون، اۏتو سولغون،
آختاریرام یورغون-یورغون؛
تاپدیم... تاپدیم!
هیجرانیمدا، عذابیمدا
تاپدیم سنی،
بو خاطیره کیتابیمدا
تاپدیم سنی،
تاپدیم، تاپدیم، تاپدیم سنی!
#موسی_یعقوب
@qanadli_duyqular
«ممّد آراز»ا
قارداشیم!
سن منى بیر آخشام قوناق ساخلادین،
یارامى یارانلا یویوب باغلادین،
منیم گؤزلریم‌له بعضاً آغلادین،
قویمادین گؤزلریم دولا، قارداشیم!
تویونا گلمیشم، هر یئر خونچادیر،
بوش الیم بوكولموش قانلى غونچادیر،
بیرجه اوره‌ییم وار، پارچا-پارچادیر،
او سنه چاتاجاق، آلا، قارداشیم!
اوره‌ییم شیشه‌دیر، اوره‌ییم حلیم،
كیم اونو ایكی‌یه بؤلدو، نه بیلیم،
آل، او چیلیک-چیلیک، او دیلیم-دیلیم،
اونو بیر-بیرینه جالا، قارداشیم!
دره‌لر كئچه‌رم، داغلار كئچه‌رم،
اؤزومه آلوودان پالتار بیچه‌رم،
ظولمتى اریدیب سئل-سئل ایچه‌رم،
قویمارام ائل داردا قالا، قارداشیم!
من «سهراب طاهر»اَم، نه لازیم اؤیود؟
بیرجه اوغلوم قالیر، اونو سن بؤیوت!
گئدیرم ووروشا، سیلاحیم اومید،
قالماییم قارداشدان دالا، قارداشیم!
#سهراب_طاهیر
@qanadli_duyqular
ائله سئویم سنی، کیمسه بیلمه‌سین
یارالؽ اۆره‌یه، خال دۆشن کیمی
یوْخلوغون، ائله‌جه یاخؽب یاندؽریر
قوروموش زمی‌یه، قوْر دۆشن کیمی
نئجه سئویم سنی، کیمسه دینمه‌سین
ائله‌بیل ازلدن جۆت یارانمؽشیق
گل یاشام گمیسین ائله سۆردۆرک
قومارباز الیندن جۆت قازانمؽشیق
اۆزۆلمه، پوْزولما، پوْز یاساقلارؽ
کدردن گؤزۆنه دومان سینمه‌سین
یاغؽش یاغاندا، دئ ائله چیسله‌سین
قاپؽندا سالدؽغؽم ایزی سیلمه‌سین
#سعید_قوشاچایلی
@qanadli_duyqular
ایز سال!
سیّاح دوستوم! یول اوزون‌دور،
یول داشلی‌دیر، قایالی‌دیر.
اینسان‌اوغلو کئچیلمه‌ین-
قایالارین قارتالی‌دیر.
آختاریشلار عالمینده،
چوخ ییخیلیر، دورور اینسان.
سن‌سه باخیب داغ باشینا،
هامار یوللار آختاریرسان.
شلاله‌لی یاماج‌لاردا،
هامار گزمه، دوز آختارما!
دوستوم! حیات یوللاریندا،
اؤزون ایز سال، ایز آختارما!
#ممد_آراز
@qanadli_duyqular
آللاه!
نه وار، نه یوخ؟
مندن نه خبر وار؟
گئجه‌لری اؤزوم سایارام؛
اوزومه آچیلاجاق نئچه سحر وار؟
بَیَنه‌جکسن‌می منی؟
بنده‌نی هانسی گؤزله گؤره‌جکسن؟
آللاه!
اؤزوم گلیم،
یا کیمی‌سه گؤندره‌جکسن؟
#واقیف_صمداوغلو
@qanadli_duyqular
شعر نه درده ده‌یر دوستلار!
عوصیان هارایی اولمادیقدا؟!..
شعر نه درده ده‌یر آرتیق،
ایسته‌نیلن واخت
وولکانلاری اویاتمازسا؟!
شعر نه درده ده‌یر،
ظالیم‌لرین باشیندان
تاجلارینی
آلمازسا؟!...
#نزار_قبانی
@qanadli_duyqular
سنین دوستاقین اولموشام
دئ... الیندن هارا گئدیم
سنی دئییب قوجالمیشام
هارا واردیر هارا گئدیم
تئللریندن بیر سیم آییر
دردیمی هریانا یاییر
نیسگیلیمی شاییر، شاییر
ساچلاریندا دارا گئدیم...
منیم آدیم "دلی قیز"دی
شعیریم چیچکلی یارپیزدی
فصلیمده یاز یوخ، پاییزدی
بو سئللره سارا گئدیم.
#دلی_قیز_حدیث
@qanadli_duyqular
گئجه، تئل ـ تئل تؤکولور پنجره‌دن
چالینیر داردا داریخماق
ایچیلیر ایت عاراغی
شهرین کؤکسو داغیلمیش کوچه‌یه
کیرناسلیق
و آیاق توتمادا مین بیر شووه‌رک یالقیزلیق
تای - توشوندان گئری قالمیش
دلی گؤز ایندی ده وار
شعر یازیر.
#یعقوب_نیکزاد
@qanadli_duyqular
نه تئز اَللرینی اوزدون دونیادان
بالانی تک قویوب هارا گئتدین سن؟
نئجه یوخ اولورموش بیر آن‌دا اینسان
ائله بیل دونیادا هئچ یوخ ایمیشسن
گونش غوروب ائتدی...اوتاق قارالدی
بیر آن‌دا یوخ اولدون سن خیال کیمی
ایندی دوشونورم: سندن نه قالدی
کؤنلومده خاطیره‌ن قارا خال کیمی
منی بویا-باشا یئتیردین، آنا
بیزه بورجلو بیلدیک هر زامان سنی
سن منی دونیایا گتیردین، آنا
منسه یولا سالدیم دونیادان سنی
سن منه بئشیک‌ده لای-لای چالمیسان
بو گون لای-لای چالیم سنه منده‌می؟
سنین شیرین-شیرین لای-لالارینی
من سنه قایتاریم جنازه‌نده‌می؟
#بختییار_واهابزاده
@qanadli_duyqular
قیشدا دوغولماغیم بس ائیله ر منه،
منی اؤلدورن ده یاز اؤلدور آلله !
بیلیم هانسی گوندو کؤچه جه ییم گون
عؤمور تاریخیمی یاز اؤلدور آلله !
قوی یاتیم یوخودان قالدیرما منی
عجلین جنگین دن سالدیرما منی
زاریدا _ زاریدا اؤلدورمه منی _
اؤلدوره بیلیرسن ساز اؤلدور آلله !
آجی گولوشلریم اوره ییمده خال
دوداغیم قیفیللی _ باخیشلاریم لال
آلیرسان جانیمی بیر دفعه لیک آل
بو قده ر آغریلا آز اؤلدور آلله !
#زلیمخان_یعقوب
@qanadli_duyqular
یئنه باغلار او باغلاردیر، فقط باغدا گولوم یوخدور،
گولوم یوخدور، بو دونیادا آییم یوخدور، ایلیم یوخدور.
زامان دؤنمز اؤز حؤکموندن بیز آیریلدیق، تئز آیریلدیق،
دیلیم بار وئرمز، آی دوستلار! دئیَم کی سئوگیلیم یوخدور.
چیچک‌لردن، کولک‌لردن، من آللام عطرینی یارین،
دیلک اولماز، اورک اولماز، سئونلرچون اؤلوم یوخدور.
گولوم! اغیار قیلینجی‌یلا، سئورکن آیری دوشدوک بیز،
بو حسرتدن، بو مؤحنتدن، داها مودهیش ظولوم یوخدور.
سئویب یاندیم، کولک قالخدی، کولوم سوورولدو افلاکه،
منی گزمه بو دونیادا! اودوم سؤندو، کولوم یوخدور.
آغاج یانسا، فغان ائیلر، دئیر اؤز دردینی آشکار،
دئمک‌چون دردیمی یاره، بمیم وارسا، زیلیم یوخدور.
سنینله بختیارام من، آییم سنسن، ایلیم سنسن،
بو دونیادا منیم سنسیز آییم یوخدور، ایلیم یوخدور.
#بختیار_واهابزاده
#گون_آیدین
@qanadli_duyqular
عشق مکتوبو
سنله منیم آرامیزدا
اییرمی ایل فاصله وار
آمما دوداقلارین
دوداقلاریمدا دینجه‌لنده
ایللر توکه‌نیر
بیر عؤمرون جامی سینیر
#نزار_قبانی
#چئویرن_حمدالله_جعفرپور
@qanadli_duyqular
شهریمیز دن کئچدی اسکیلر
ایریشدی تازه لر
قونچا لبلرین ائدیب ساقی
جیگرلر تازه لر!
کیمدیر اوستادین شها! بالله
کیمین شاگیردی سن؟
دۆرلو _دۆرلو نوعیله چالدین
بیزه اندازه لر
وجهینی گؤسترمه گیل زاهیدلره،
عابیدلره
مصحفین ترکین اوروب انوارا
یوْلدان آزه لر
سرو قددینده گؤزلین خلعتینی
بیچمڲه
گتیره جنتدن آنا حوریلر
اندازه لر
ای نسیمی! شعرینی شیرین
ورقلر اۆستۆنه
نازنینلر اوْخویوب آلتین قلمله
یازه لر
#عمادالدین_نسیمی
#گون_آیدین
@qanadli_duyqular
هانسی اسیم‌لردن عطرینی آلیم
هانسی دؤنوش‌لرده اؤزله‌ییم سنی
منه بیر آدرس وئر اوردان آسیلیم
دئنن گله‌جه‌یم گؤزله‌ییم سنی.
پاییزین قوخوسون یاخاما یاخما
بیر گؤزوم آغلاییر بیر گؤزوم گۆلور
باخیشین مرمی‌دیر جانیما تاخما
چوخداندیر اۆره‌ییم سن اۆچون اؤلور.
هله ده سئویرم سنی بیر دنیز
هله ده اۆره‌ییم دؤنمه‌ییب داشا
ائله آه چکیرم کۆچه‌ده سنسیز
سانکی داریخمایام آیاقدان باشا.
بۆروندو سئوگیمیز قاپ قارانلیغا
بیز یامان مله‌دیک یامان اییلدیک
نعشیمی سۆرومه کور دومانلیغا
بلکه او دنیادا گؤز گؤزه گلدیک.
بو آخیر سئوگی‌دیر آخیر هوس‌دیر
ایسته‌یین ان آجی آجیسی‌سان سن
چوخداندیر دنیامیز قارا قفس‌دیر
بلکه ده گئجه‌نین باجیسی‌سان سن.
#دومان_سفر_اوغلو
@qanadli_duyqular
دئموکراسی؟
هه... کسین‌لیکله!
آنجاق،
منیم کیمی،
دال‌بادال،
سنین عشقینین دیکتاتورلوغونا
سس وئرن،
دلی بیر قادینلا نه ائده‌جکسن...؟
#السمان
@qanadli_duyqular
جان عئشقه دۆشدۆ ای کؤنۆل!
یارب! نه دیر تدبیریمیز
جان نئله سین بیچاره چۆن
حقدن بودور تقدیریمیز
#عمادالدین_نسیمی
#گون_آیدین
@qanadli_duyqular
عؤمروم داغدا-داشدا کئچیبدی منیم،
سیلدیریم قایالار دفع ائیله‌میشم.
قلبیمه او قدر دَییبلر منیم!
منسه باغیشلاییب عفو ائیله‌میشم.
اینجیمه‌دیم هئچ واخت دوستون سؤزوندن،
چون کئچه بیلمه‌دیم دوستون اۆزۆندن.
ایندی هامسی گلیر ایکی گؤزومدن-
گنجلیکده نه قدر کئف ائیله‌میشم.
وئرمیشم قلبیمه تابی-دؤزومو،
دئیه بیلمه‌میشم اورک سؤزومو.
«ائیواز»ام آی قارداش، اؤزوم اؤزومو
ساغلیقدا بیر یوللوق محو ائیله‌میشم.
#یتیم_ائیواز
@qanadli_duyqular
آفتابین طلعتیندن ماه تابان رو توتار
چین زولفوندن ختادا نافه ی آهو توتار
بیلمه رم حوری میسن یوخسا ملایک یا پری
کیم کی گؤردو آی یوزون شرمنده اولدو خو توتار
گؤرموشم هر قاندا كيم اصلان قيلير آهو شیکار
من عجایب قالمیشام اصلانلاری آهو توتار
#اولونسیمی
#گون_آیدین
@qanadli_duyqular
حایاتینا گلنمه‌سم
اؤلومونه گله‌جه‌یم
مزارینین باشینداکی
بیر داش کیمی گؤزله منی
#زلیمخان_یعقوب
@qanadli_duyqular
یئنه هاوالانیب آرخانجا گئدیب
بیچاره قلبیمه گولوبدور عالم
ائله دوشونمه کی من‌لیییم ایتیب
سنینله کوسولو قالا بیلمیرم
اومید‌دن دانیشما، اونو اوزموشم
زاماندان سوروشما، تامام بئزمیشم
طالئع‌دن کوسموشم، بخت‌دن کوسموشم
سنینله کوسولو قالا بیلمیرم
سوندور بو شامی دا چیراق‌سیز قالیم
کیتاب‌سیز، قلم‌سیز، واراق‌سیز قالیم
لاپ بوتون دونیایا ماراق‌سیز قالیم
سنینله کوسولو قالا بیلمیرم
حاضیرام ساللانام دار آغاجیندان
ال چکم ذلیل تک کور آغاجیندان
قالارام یاشاماق احتیاجیندان
سنینله کوسولو قالا بیلمیرم
هارداسان؟ یولومو هارادان سالیم؟
هانسی دردین آغیر؟ هانسینی آلیم؟
داغیت ویران ائله، خارابا قالیم-
سنینله کوسولو قالا بیلمیرم
سینمادیم، قالسام دا هردن اومیدسیز
دفن ائتدیم اؤزومو ثبوت - شاهیدسیز
سن ایلهام پریسی، من «واحید عزیز»
سنینله کوسولو قالا بیلمیرم
#واحید_عزیز
@qanadli_duyqular
بلکه بویلانیرسان یوللارا هردن،
یئنه گؤزله‌ییرسن آرخانجا دوشم.
باغیشلا، هئچ سنه خبر ائتمه‌دن
چوخدان او شه‌هه‌ردن چیخیب گلمیشم!
سن اوندا نه گؤزل گولدون اوزومه،
بیر آنلیق اونوتدوم کده‌ری-غمی،
دوشوب گولوشونون سونسوز اوزونه
جوشدو خیالیمین اومید یئلکه‌نی!
دئمه وفاسیزسان، قیناما منی،
زامان قوووشدورور ، هم آیری سالیر!
گئج گلیب تئز گئدن قوناقلار کیمی
غیابی سئوگیسی یاریمچیق قالیر.
#شاییق_صادق‌زاده
@qanadli_duyqular
بیرگون قاباغیمی کسه‌جک اؤلوم
ذره جه عئینیمه گلمیر اؤلمه ییم
ائله اوتانیرام گله سن گولوم
سنین آیاغینا دورا بیلمه یَم...
نامرددیر اؤلومدن اوشه‌نیب قورخان
بیر شربت نه دیر کی ایچه بیلمه یَم؟
ائله اوتانیرام عادی یاغیشدان
سنین گؤز یاشینی سئچه بیلمه یَم...
ائله اوتانیرام گلیب -گئده سن
سنین گلیشینی دویا بیلمه یَم
اوستومه سپدیگین چیچکلری من
گؤزومون اوستونه قویا بیلمه یَم...
ائله اوتانیرام اوتانیرام من
آییلام کؤنلونو آلا بیلمه یَم
دردیم تزه لنه خجالتیمدن
اؤلمک ایسته یَم من، اؤله بیلمه یَم...
#شاهمار_اکبرزاده
@qanadli_duyqular
خورشید کی قیْلدی صبحدم عرضِ جمال
درگاهیْنا اۆز سۆرمک ایله ، بوُلدو کمال
چۆن یئتدی کمالا ، قیْلدی سن ماه ایله بحث
اوْل ترک ادب ، وئردی کمالیْنا زوال
#ملا_محمد_فضولي
#گون_آیدین
@qanadli_duyqular
وار اونون
یوز ایل بوندان بئله یاناسی یام من
سینمده سؤنمه ین اودو وار اونون
اونا سیمسار اولانلاردا عزیز دیر
قوهومو وار اونون یادی وار اونون
او زاماندان آیلار ایللر اؤتوشوب
جاوان ایدیم ساچلاریما دن دوشوب
بیرجه دفعه باخیشیمیز اؤپوشوب
هله داماغیمدا دادی وار اونون
بهمنم ساتیلماز کؤنلوم همده می
سئومیشم ایلقاری دوغرو صنه می
چاغیردیم جرراحی یاردی سینه می
گؤردولر کؤکسومده آدی وار اونون.
#بهمن_وطن_اوغلو
@qanadli_duyqular
هردن گولوشون دوشور یادیما،
هردن غمین، ملالین.
هر شئیی سئزه بیلن،
هر شئیه دؤزه بیلن قلبین،
پریشان حالین.
ساکیت آخان سولار کیمی آخیب گئتدین،
دوستلارینین اوره‌یینده آغری بوراخیب گئتدین.
یئنه گله‌جک باهار،
یئنه چیچک آچاجاق چمن،
بوداقلاردان ساللاناجاق سالخیم-سالخیم یاسمن.
قوشلار قاطار-قاطار
غوربتدن وطنه دؤنه‌جک.
گونش یئنه دنیزدن دوغاجاق،
داغلارین دالیندا سؤنه‌جک.
آغ گؤیرچین بالاسی کیمی چیرپینان کیچیک قیزین،
سئوگیلیسینین سینه‌سینه یاسلانیب
ایستی گؤز یاشلاری تؤکه‌جک سنینچون.
یانیب آغلایاجاق ایچین-ایچین.
سونرا حزین بیر تبسّومله
قالدیراجاق باشینی
سیله‌جک گؤز یاشینی.
یئنه دونیادا ووصال اولاجاق،
اولاجاق آجی هیجران.
بیرجه سن دؤنمه‌یه‌جکسن،
دؤنمه‌یه‌جکسن گئتدیگین ابدی یولدان.
#نیگار_رفیع‌بیلی
@qanadli_duyqular