6549
حؤرمتلی دیلداشلاردان، ادبیات سئونلردن، بیزه دستک اولماق‌لارین دیله‌ییریک آخاغیمیزی سئودیک‌لریزله پایلاشین🌹🌹🌹
گون دوغسا دا، ایشیقلانماز،
عؤمرون قارا گونلری.
تانرییلا کیم باریشدیرار،
باختیندان کوسکون‌لری؟
جانیمیزا هاردان دولوب،
بو دلی‌لیک هاواسی؟
آغاج‌لار دا مجنون اولوب،
باشیندا قوش یوواسی.
قوشا دؤنوب موللالار دا،
قونوب منبر باشینا.
آذان وئریب، بو شَهری-
باسدیرارلار آخشاما.
من ده تانری قوشو اولوب،
من ده قونسام منبره.
هر نه دئسم کوفر چیخار،
بلکه بوتون دین‌لره
بلکه منی دؤرد بیر یاندان،
نیشان آلار اووچولار.
او منبردن داملا-داملا،
قانیم یئره دامجی‌لار.
بیر یارالی موللا اوچار،
سنه ساری ایلاهی!
اینصاف ائله بو یارامی،
اؤزون ساری، ایلاهی..!
#رامیز_رؤشن
@qanadli_duyqular
هئچ بیلمه‌زدیم داشؽم بئله آغؽردی،
بختیم بئله بیچاره‌دی، فاغؽردی،
گئده جه ییم، گؤیلر منی چاغؽردی،
داها یئرده گزمک اوْلمور، عزیزیم...
#واحید_عزیز
@qanadli_duyqular
ظولم ائیله‌مک عشق اهلینه، جانا، نه اوچون‌دور؟!
عاشق کی وئریر جانینی... جانانه اوچون‌دور.
سئومز او قارا زولفونو هئچ کیمسه منیم‌تک،
زنجیره هوس، عشقده، دیوانه اوچون‌دور.
خلق اولمامیسان عاشقی اینجیتمه‌یه، ظالم!
باخ، گؤر، بو گؤزللیک سنه، آیا نه اوچون‌دور!
هر عاشقین اؤز سئودیگی معشوقه‌سی واردیر،
گول بولبول اوچون، شمع ایسه پروانه اوچون‌دور.
زاهید بوراخیب مسجیدی، مئیخانه‌یه گلمز،
بایقوش یاراناندان بری ویرانه اوچون‌دور.
«واحید!» منی سردفترِ عشق ایچره یازیبلار،
«مجنون» سؤزو دیللرده بیر افسانه اوچون‌دور.
#علی_آقا_واحید
#گون_آیدین
@qanadli_duyqular
تۆرکی بیر چشمه ایسه، من اوْنی دریا ائله‌دیم
بیر سوْیوق معرکه‌نی محشرِ کُبرا ائله‌دیم
بیر ایشیلتیدی «سُها» اولدوزی تک گؤرسه‌نمز
گؤز یاشیملا من اوْنی عقدِ ثُریا ائله‌دیم
امیدیم وار کی بو دریا هله اقیانوس اوْلا
اوْنا ضامین بو زمینه کی مُهیا ائله‌دیم
عرفانا چاتماسا شعر و ادب ابقا اوْلماز
منده عرفانه چاتیب، شعریمی ابقا ائله‌دیم
ابدیتله یاناشدیم دوْغولا «حافظ»-ه تای
شیرازین شاهچراغین، تبریزه اهدا ائله‌دیم
تۆرکی‌نین جانینی آلمیشدی حیاسیز طاغوت
من حیات آلدیم اوْنا، حق اۆچۆن احیا ائله‌دیم
فیض روح‌القدس اوْلدی مددیم حافظ تک
منده حافظ کیمی اعجاز مَسیحا ائله‌دیم
قمه قدّاره‌لر آغزیندا دیل اوْلموشدو سؤگۆش
من سئوینج ائتدیم اوْنی، خنجری خُرما ائله‌دیم
ایندی گؤیلرده گؤزل صف‌له صفا ایله گَزیر
منجلابلاردا اۆزَن اؤردَگی دوُرنا ائله‌دیم
باخ کی حیدربابا افسانه تک اوْلموش بیر قاف
من کیچیک بیر داغی سر منزل عَنقا ائله‌دیم
بوردا رؤشن ضمیرین ده هُنرین یاد ائده‌لیم
من اوْنوندا قلمین طوطی گویا ائله‌دیم
نه تک ایراندا منیم ولوله سالمیش قلمیم
باخ کی تۆرکیه‌ده، قفقازدا نه غوغا ائله‌دیم
باخ کی تهراندا نه فرزانه‌لر اوْلموش واله
باخ کی تبریزده نه شاعرلری شیدا ائله‌دیم
هم«"سهندیه» سهندین داغین ائتدی باش اوُجا
هم من اؤز قارداشیمین حقّینی ایفا ائله‌دیم
آجی دیللرده #شیرین_تۆرکی اوْلوردی حَنظل
من شیرین دیللره قاتدیم اوْنی حلوا ائله‌دیم
هرنه قالمیشدی کئچنلردن اوْنا بال پَتگی
أریدیب موملو بالین شهد مُصفا ائله‌دیم
تۆرکی والله آنالار اوْخشاغی لای-لای دیلی‌دیر
دردیمی من بو دوا ایله مُداوا ائله‌دیم
#شهریار، حیف ساووخدیر بو دگیرمان هله‌ده
دارتماغا یوْخدی دَنی، من ده مُدارا ائله‌دیم
#اوستاد_شهریار
#گون_آیدین
@qanadli_duyqular
«سحره اینان»
یامان اوزون چکدی بو ظولمت گئجه
گؤزه گؤرونمه‌دی اولدوزدا، آی‌دا
بیر دوغما اوز اوچون داریخدیم نئجه
کیمسه کاش قاپیمی دؤیه بو هایدا
منه بیر خوش خبر دئیه بو هایدا
کیمسه کاش قاپیمی دؤیه بو هایدا
آمما هامی یاتیب، آمما نه فایدا؟!
یئنه گون چیخاجاق، دونیا گوله‌جک
هریان باشدان-باشا ایشیق اولاجاق
هامی بیر-بیرینی بیردن گؤره‌جک
هامی بیر_بیرینه عاشیق اولاجاق
هامی دوننکیندن قشنگ اولاجاق
هر شئی دوننکیندن یاخشی اولاجاق
صاباح بوگونکوندن یاخشی اولاجاق
بوتون گئجه‌لرین سحردیر سونو
اینان، بو دونیادا سحره اینان
صاباح بیر خوش خبر گؤزله‌ییر سنی
اینان او خوش سؤزه، خبره اینان
نه غمه، نه‌ده کی، کدره اینان!
اینان بیر خوش سؤزه، خبره اینان،
اینان بو دونیادا، سحره اینان.
یئنه گون چیخاجاق، دونیا گوله‌جک
هریان باشدان-باشا ایشیق اولاجاق
هامی بیر-بیرینی بیردن گؤره‌جک
هامی بیر-بیرینه عاشیق اولاجاق
هامی دوننکیندن قشنگ اولاجاق
هر شئی دوننکیندن یاخشی اولاجاق
صاباح بوگونکیندن یاخشی اولاجاق
#رامیز_رؤشن
#گون_آیدین
@qanadli_duyqular
چكير وارليغيمی دارا، گؤزلرين
آپارير روحومو هارا گؤزلرين؟
قارا بير محبس‌دير، قارا گؤزلرين
بوراخ گؤزلری‌نين حبسيندن منی
يانديريب ياخماق‌دا اود قودرتی وار
تكجه من بيليرم نه حيددتی وار
آخی، جزانين دا بير موددتی وار
بوراخ گؤزلری‌نين حبسيندن منی
قالديم جاذيبه‌نده، بيهوش كيمی‌يم
مرحمت گؤزله‌ين باخيش كيمی‌يم
قفسه سالينميش بير قوش كيمی‌يم
بوراخ گؤزلری‌نين حبسيندن منی
گونوم ائله سندن شيكايت اولوب
بو سئوگی بير داستان، حکايت اولوب
محبت نه واخت‌دان جينايت اولوب؟
بوراخ گؤزلری‌نين حبسيندن منی
زيندانا کؤنوللو سالديم اؤزومو
عيبی يوخ، پاييزا دؤندر يازيمی
من گوناه ايشله‌ديم، آرتير جزامی
ساخلا گؤزلری‌نين حبسينده منی...!
#نوصرت_کسمنلی
@qanadli_duyqular
شُبهه
الیمده داریخیر یازدیغیم قلم،
سنین حسرتیندن، سنین بیر دنه‌م!
من یولو قایالی اورگی داغلی،
آغری ییخیلمیشی قوللاری باغلی.
ییخیلمیش دیله‌گیم جانسیز کؤلگه‌ده،
گلیشین گؤزله‌ییر گولمز اؤلکه‌ده.
قاپالی قاپیدان، پنجره‌لردن،
هارای قامچیلامیش حنجره‌لردن.
باخاراق هیچقیریر بیر دلی شاعر،
وارلیقدان آجیقلی گیلئیلی شاعر.
آغلاییر گؤزوندن کسیلمیر یاغیش،
بوروموش یوللاری یوللارجا قارغیش.
بیر پاپریز اودلاییر بوشلوغو ییخسین،
بو تشویش یوردوندان بیر یانا چیخسین.
ال آتیر سمادان دره اولدوزو،
دَرمه دور! سؤیله‌ییر گؤیلرین قیزی.
اؤگرَ‌نیر قارانلیق آدلی دهشته،
پامبیق خیالینی باساراق شته.
چورومک یوردونا آتی یَـهرلی،
گؤزلری کینلی‌دیر فکری قـهرلی.
دوشونور دورغونلوق اوجوز اؤلومدور،
هر جیغیر هر بیر ایز ایپک یولومدور.
سئوینمک داغلارین آرخاسیندادیر،
کدر آغاج اوسته جوما قارغادیر.
دورغونلوق اؤلومدور، حرکت سئوینج،
یوللاردا حیاتیم کئچه‌جک‌می‌دینج؟!
#بهروز_صدیق
#گون_آیدین
@qanadli_duyqular
حسرتین آرایا آتدی داغ ،دره،
سؤنن ایشیق اولدون،باتان سس اولدون.
قاییت، منیم گولوم،قاییت بو یئره،
ای منیم ایسته ییم،نه گلمز اولدون!
اومیدلر، آرزولار پرن- پرن دیر،
قلبه تسلی دیر خاطیره لریم.
بیر حالیمی سوروش،کؤنلومو دیندیر؛
آخشاملار یادیما دوشور سحریم.
قاییت،منیم گولوم ،یئر به یئر ائله
دردلی سحرلری،گئجه لری سن.
چاشیب باشقا یوللا کئچیرم ائله،
دوز اؤز قایداسیندا کوچه لری سن.
قاییت، یئرینه قوی آیی،گونشی،-
یئنه اولدوغو تک گؤروم حیاتی
قاییت،گؤزوم نورو،کؤنلوم آتشی،
قاییت، ساهمانا سال بو کایناتی!
#علی_کریم
@qanadli_duyqular
گئجه‌نین قوینوندا ووقارلی داغلار،
سانکی ابدی بیر یوخویا باتمیش.
دره‌لر، تپه‌لر، مئشه‌لر، باغلار،
دونیانین خئیرینی-شرّینی آتمیش.
قارانلیق گئجه‌نین مرموز سیماسی،
همی کدر دوغور، هم اورک سیخیر.
قارا ایبهام‌لارین اوچروم دونیاسی،
کیمسه‌نی بودره‌دیر، کیمسه‌نی ییخیر.
گئجه‌نین باغریندا، گؤزللیک‌لرده،
بیر شبح گؤرونور، اینسان گؤزونه.
قارانلیق چکمیشدیر، چاشدیران پرده،
قاری شئیطان‌لارین، قارا اوزونه.
شئیطان یارانمیشی تانیتدیراراق،
ازلدن قارغیمیش گئجه‌نی انسان.
اوجاقلار، مشعل‌لر یاخماقلا آنجاق،
قاچمیشدیر گئجه‌دن، قارانقولوقدان.
هله ده-هله ده بیزیم یئرلرده،
ساده اینسانلارین آندی چیراق‌دیر.
خلقین آراسیندا، کندده-شهرده،
مقدّس یئرلرین آدی اوجاق‌دیر.
ایشیقدان دوغورسا، ایستی‌لیک، ایستک،
قارانلیقدان دوغور، سویوق، آلدانیش.
محبّت آختاران، اینسانلیق دئمک،
اونا باش ائندیرمیش، بونو قارغامیش...!
#بولود_قاراچورلو
@qanadli_duyqular
سنسیز گلن صاباحا
گون آیدین...
#یوسوف_خیال_اوغلو
@qanadli_duyqular
گؤزلرين، لايلالی يارپيزدا گونش رئيحاناسی
ساچلارين داملالی باغريمدا كولش رئيحاناسی
منيم ائی آلچالی كؤينك‌ليجه‌ليم، ائی هولوجوم!
گيلانارلاردا عطش سسلی اؤپوش رئيحاناسی!
سنی هوندورلرين آنديندا درينلشديم من
سنی يارپاقلاديم آغريمدا، گولوش رئيحاناسی!
آتلی‌دير آهلی جيغيرلاردا قاليب چؤللرينی
ديل آچير اوف... دلی كيشنرتيلی قيش رئيحاناسی
و... قرنفيل‌دی، گلين گئتمه‌ده قانچيل سسيمی
و... بو داغلاردا كؤچن قيزدی ياغيش رئيحاناسی
هئیوالیقلاردا سوسوزلوق یاراسی من "كاميل"
قوی شافاقلانمادا گولسون بو باخيش رئيحاناسی!
سنی گؤيسومده سولوقلانماغا بيتميش منده
بئشه، بئش...بئش‌يوزه، بئش...بئش مينه، بئش رئيحاناسی...
#كاميل_قهرمان‌اوغلو
@qanadli_duyqular
#داریخیر...
کدر بوغاندا بیزی، شعریمیزده قان داریخیر.
سیخینتیدان باش آچانمیر بو داغ، دومان داریخیر.
دوداق-دوداق داغیلان دردیمیز دریلمه‌ده‌دیر
گونش دوغاندا، داغیلمیش دوداقدا دان داریخیر.
گون اورتادان اوزولن ال‌لرین نه‌دیر گوناهی؟
چاخیرلی دستامازیم درد اولور، آذان داریخیر.
آسیلمیشام شهرین گؤزلریندن آیلی گئجه
گرایلی‌میزدا یاشیل‌لیق یانیر، خزان داریخیر.
بو پینتی فلسفه‌لردن ساغانمیرام اؤزومو
جانیم یامان سیخیلیر، کؤینه‌ییم یامان داریخیر.
هارای سئلین ساراسیندان سینیر-سینیر داغیلیر
بو سئلده، سئوگی بوغولماقدا؛ خان چوبان داریخیر...
#دومان_بختیاری
@qanadli_duyqular
سئوگیلیم، بیر بیلمه‌دین سنسیز نه مؤحنت چکمیشم!
بی‌وجود اغیارلردن چوخ اذیّت چکمیشم.
ذؤوق وصلین خاطیره گلدیکجه، غمدن آغلارام،
اؤزگه بیر جانانه سانما دیلده حسرت چکمیشم!
مَه جمالین گؤرمه‌یه بیگانه فورصت وئرمه‌دی،
صوبح اولونجا هر گئجه، کویوندا نؤوبت چکمیشم.
«بی‌وفالیق رسمینی ترک ائت!» دئدیم، ترک ائتمه‌دین.
سندن اؤترو یالواریب اغیاره مینّت چکمیشم.
وصل یار اولماز میسّر هر بلاکش عاشیقه،
من صداقتله بو یولدا چوخ موصیبت چکمیشم.
اؤزگه‌نی دیندیردی اؤز یاریم، منی دیندیرمه‌دی،
ایندی گؤر «واحید»! خجالتدن نه ذیلّت چکمیشم.!...
#علی_آقا_واحید
@qanadli_duyqular
سنسيز توستو-دومان اولوب،
گؤيه قالخير آهيم منيم.
هئچ واخت منی ترک ائله‌مه،
عشقيم منيم، روحوم منيم!
داغا چيخسام، عيناديم اول،
قوشا دؤنسم، قاناديم اول،
سن عونوانيم، سن آديم اول،
عشقيم منيم، روحوم منيم!
سولار كيمی صاف اول، ياشا،
هر شئیده صرّاف اول، ياشا،
اوره‌كده اينصاف اول، ياشا،
عشقيم منيم، روحوم منيم!
گؤزده ايشيق، جاندا هئی‌سن،
سئحيرلی يئر، سيرلی گؤی‌سن،
دوداقلاردا يانان نئی‌سن،
عشقيم منيم، روحوم منيم!
باشيم اوسته يانان شام‌سان،
اليمده بير دولو جام‌سان،
فضولیم‌سن، موولانام‌سان،
عشقيم منيم، روحوم منيم!
گله‌جه‌ييم، صاباحيم اول،
دؤيوشلرده سيلاحيم اول،
ايناميمدا آللاهيم اول،
عشقيم منيم، روحوم منيم!
فيكير وئرمه عاغيل‌كمه،
واختسيز باتما درده، غمه،
هئچ واخت منی ترک ائله‌مه،
عشقيم منيم، روحوم منيم.
#زلیمخان_یعقوب
@qanadli_duyqular
منده ساکن اولدو درد عشق، مجنون‌دان کئچیب
اون‌دان آرتیق‌دیر مگر، عشق ایچره تمکینیم منیم
ای «فضولی»، هر یئتن طعن ائیلر اولدو حالیما
بو یئتر اهل ملامت ایچره، تحسینیم منیم
#مولانا_فضولی
#گون_آیدین
@qanadli_duyqular.
گل کی، غمدن جانیمی یاخدی فراق،
رازی می نامحرمه چاخدی فراق،
بوینوما حسرت ایپین تاخدی فراق،
جانیمی گؤر کیم، نه خوش یاخدی فراق.
#اولو_نسیمی
@qanadli_duyqular
یولوما نئچه‌مین عزرائیل چیخا،
عؤمرو مزار ایله بؤله بیلمرم
آنلا ائی ایمانسیز!: «آزربایجان‌سیز،
یاشایا بیلمرم، اؤله بیلمرم...»
#خلیل_ریضا_اولو_تورک
@qanadli_duyqular
تورکون دیلی تک سئوگیلی ایستکلی دیل اولماز
اؤزگه دیله قاتسان بو اصیل دیل اصیل اولماز
اؤز شعرینی فارسا،عربه قاتماسا شاعیر
شعری اوخویانلار،ائشیدنلر کسیل اولماز
فارس شاعیری چوخ سؤزلرینی بیزدن آپارمیش
صابیر کیمی بیر سوفره‌لی شاعیر پخیل اولماز
تورکون مثلی،فولکلوری دونیادا تک‌دیر
خان یورقانی کند ایچره مثل‌دیر میتیل اولماز
آذر قوشونی قیصر رومی اسیر ائتمیش
کسری سؤزودور بیر بئله تاریخ ناغیل اولماز
پیشمیش کیمی شعرینده گرک داد دوزو اولسون
کند اهلی بیلرلر کی دوشابسیز خشیل اولماز
سؤزلرده جواهیر کیمی‌دیر اصلی بدل‌دن
تشخیص وئرن اولسا بو قدر زیر-زیبیل اولماز
شاعیر اولا بیلمزسن آنان دوغماسا شاعیر
میس‌سن آبالام!هر ساری کؤینک قیزیل اولماز
چوخ قیسسا بوی اولسان اولوسان جین کیمی شئیطان
چوخ‌دا اوزون اولما کی اوزوندا عاغیل اولماز
مندن‌ده نه ظالیم چیخار اوغلوم،نه قیصاص‌چی
بیر دفعه بونی قان کی ایپکدن قیزیل اولماز
آزاد قوی اوغول عشقی طبیعتده بؤلونسون
داغ داشدا دوغولموش دَلی جئیران حمیل اولماز
اینسان اودی دوتسون بو ذلیل خلقین الیندن
آللاهی سئورسن بئله اینسان ذلیل اولماز
چوخ‌دا کی سرابین سویی وار یاغ بالی واردیر
باش عرشه‌ده چاتدیرسا سراب اردبیل اولماز
میللت غمی اولسا بو جوجوقلار چؤپه دؤنمز
اربابلاریمیزدان‌دا قارینلار طبیل اولماز
دوز واختا دولار تاختا طاباق ادویه‌ایله
اوندا کی ننه‌م سانجیلانار زنجبیل اولماز
بو"شهریار"ین طبعی کیمی چیممه‌لی چشمه
کوثر اولا بیلسه دئمیرم سلسبیل اولماز
#اوستاد_شهریار
@qanadli_duyqular
من سنی سئونده یاز هاواسی‌یدی
نئیله‌ییم؟ طالعین گؤزو تؤکولسون!
حیاتیم اَلینده قوش یوواسی‌یدی،
قوران اؤزون اولدون، اوچوردان اؤزون...
من سنی سئودیم کی، یولداش اولاسان
حیاتین اَن آغیر، دار یوللاریندا
دئمه‌دیم آخیردا بیر داش اولاسان
قدیم قبریستاندا، یول کناریندا... !
من سنی سئودیم کی، یویور، قاچ، اوینا!
یئنه سئچیلمه‌سین عطرین باهاردان،
دئمه‌دیم تزه‌دن گیزلن‌پاچ اوینا،
آخشام یوخوما گیر، سحر قاچ اوردان!
یادیما نه دوشور سنین آد گونون!
بیز «قوجا» دئییردیک، دونیا تزه‌یمیش...
ایلی یوخ، حیاتدا اینسان عؤمرونون
آنی دا تاریخی بیر حادثه‌یمیش...
#نریمان_حسن_زاده
@qanadli_duyqular
اونوتما!
هر گلن سئومز
و هئچ بیر سئون گئتمز.
#ناظیم_حکمت
@qanadli_duyqular
سحر اؤلمک ایسته‌ییرم
گئجه اؤلسم، باغیشلا
بیلمیرم نئجه یاشادیم
نئجه اؤلسم، باغیشلا
تانریدان بخت بورج آلسایدیم
سنه ده ساخلایاردیم
آغلاماغی باجارسایدیم
سنه گون آغلایاردیم
گیزلی اؤلمک ایسته ییرم
خبر توتسان،باغیشلا
قورخورام اونودمایاسان
یوخ،اونودسان، باغیشلا
قیش دا اؤلسم،غم ائله‌مه
یئریم ایستی اولاجاق
روحوم اوچوب جهنمه
گئدن توستو اولاجاق
سسسیز اؤلمک ایسته‌ییرم
سسیم گلسه، باغیشلا
سنسیز اؤلمک ایسته‌ییرم
سن ده اؤلسن، باغیشلا...!
#رامیز_روشن
@qanadli_duyqular
گؤرن دردی ندیر بونون؟
کوچه - باجا کئشییی‌دیر...
آللاه خئیر ائله‌سین سونون!
کؤنول‌لرین، بئشییی‌دیر...
دیرماشیر داما - دووارا،
کوچه-کوچه ، آرا - آرا...
کیم آزدیریب بونو بورا؟
بو هارانین پیشییی‌دیر؟
هردن گولور، هردن مه‌لیر...
کیمین باشینا کول الیر؟
اوردان گئدیر، بوردان گلیر،
هانسی آغیز دوشویودور؟
کیمین- کیفیر یوخوسودور؟
کیمی-کیمین آهی توتور؟
واخ- اخ نه‌یین قوخوسودور،
آمان آللاه نه اییی‌دیر؟
#مهدی_سربازی_علمداری
@qanadli_duyqular
آرامیزا داغیلیشی آیریلیغی سالان پولدور
آلتون-گۆموش ماسکاسینین آلتینداکی یالان پولدور
اوْدور اۆمود وئره‌ن دئیه ، تانرینی یاددان آتمیشیق
بیز ایتمیشیک دالداسیندا بیزی بیزدن آلان پولدور
انسان جانلی اوْلا اوْلا پولدا جانسیز بیر بیتیک‌دیر
جانلی جانین وئریر الدن آنجاق هله قالان پولدور
بیر بوْیونو یوْغونادان ، بیر قارینی آج ساخلایان
اۆره‌ک‌لره داغی چکن حاققی ائدن تالان پولدور
اوزاق گزیر چوخلاریندان بیر آرزی بیر دیلک اوْلور
چوْخون اولاق سانیب مینیب بئلینده‌کی پالان پولدور
عیسا ، پولون اوْلماماغی ، اولماغیدا دهشتلی دیر
اؤزونده یوْخ ائدن سنی اوْ قارانلیق دالان پولدور
#عیسی_باغیراوغلو
@qanadli_duyqular
هانسی اسیم‌لردن عطرینی آلیم
هانسی دؤنوش‌لرده اؤزله‌ییم سنی
منه بیر آدرس وئر اوردان آسیلیم
دئنن گله‌جه‌یم گؤزله‌ییم سنی.
پاییزین قوخوسون یاخاما یاخما
بیر گؤزوم آغلاییر بیر گؤزوم گۆلور
باخیشین مرمی‌دیر جانیما تاخما
چوخداندیر اۆره‌ییم سن اۆچون اؤلور.
هله ده سئویرم سنی بیر دنیز
هله ده اۆره‌ییم دؤنمه‌ییب داشا
ائله آه چکیرم کۆچه‌ده سنسیز
سانکی داریخمایام آیاقدان باشا.
بۆروندو سئوگیمیز قاپ قارانلیغا
بیز یامان مله‌دیک یامان اییلدیک
نعشیمی سۆرومه کور دومانلیغا
بلکه او دنیادا گؤز گؤزه گلدیک.
بو آخیر سئوگی‌دیر آخیر هوس‌دیر
ایسته‌یین ان آجی آجیسی‌سان سن
چوخداندیر دنیامیز قارا قفس‌دیر
بلکه ده گئجه‌نین باجیسی‌سان سن.
#دومان_سفر_اوغلو
@qanadli_duyqular
دؤنر پروانه هر محفلده یوز شمعه، منیم کؤنلوم
چیراغی اولمایان ویرانه‌لرده آی ایلن باشلار
#قوسی_تبریزی
@qanadli_duyqular
قارا گؤزلرینه باخیم دویونجاق
گئدیب گؤی خزره باخانا قدر
بیر داملا یاش اولوم گئجه بویونجا
آخیم یاناغیین‌دان یاخانا قدر
بیر ملک نورو وار گؤزل اوزونده
مین معنا گزیرم هر بیر سؤزونده
گیریم مسکونلاشیم قارا گؤزونده
گؤزله‌ییم آغ گونه چیخانا قدر...
#رئوف
#گون_آیدین
@qanadli_duyqular
▫️بیر ویداع نغمه‌سی، بیر پاییز سسی
دونن یومورتادان چیخان او قوشلار،
ایلک دفعه پاییزا باخان او قوشلار،
بوش قالیب سویویان یووالارینا،
پاییزین مولاییم هاوالارینا،
بیر ویداع نغمه‌سی، اوخویوردولار،
بوداقدان-بوداغا آتلانیردیلار،
آتلانا-آتلانا شادلانیردیلار.
او قوشجوغازلارین، او پروازلارین،
سسلری هاوادا قالخیب ائنیردی.
اوستوندن کئچدیکجه یئل نارین-نارین،
یارپیزلار دیکسینیب آرخدا دینیردی.
«ولَس»ین¹ سارالمیش یارپاغی‌تکی،
اؤنلار دا اؤتوردو آهسته سانکی.
«ساری‌کؤینک»لرین قیزیل کؤینه‌یی،
جیریلیب قالمیشدی ولَسده سانکی؛
اونلار دا اؤتوردو آهسته سانکی.
هئی قاناد چیرپدیقجا او «لومَکچه»لر²،
یئردن چؤر-چؤپو ده دیکَلدیردیلر.
بوینو پیرپیزلاشان خوروز بئچه‌لر،
قصداً اؤزلرینی یئکَلدیردیلر.
بیری او طرفده خوروزلانیردی،
بیری بو طرفده فره‌لنیردی؛
آنالاری باخیب فرح‌لنیردی.
بالا «چایداچاپان»³ للـه‌یی سین-سین،
قویروغو سو اوسته کولَک‌لنیردی.
تزه‌جه رنگ آلان «آلاجهره»نین⁴،
ائله بیل قانادی چیچک‌لنیردی.
دونیانین قیشیندان خبرسیز اولان،
آتیلان داشیندان خبرسیز اولان،
ییرتیجی قوشوندان خبرسیز اولان،
همین او پروازلار، او قوشجوغازلار،
بوش قالیب سویویان یووالارینا،
پاییزین مولاییم هاوالارینا،
بیر ویداع نغمه‌سی اوخویوردولار،
بیر پاییز نغمه‌سی توخویوردولار...
#موسی_یعقوب
@qanadli_duyqular
آللاه
من سنین بنده نم سن یاراتمیسان
باری حالیسانمی حالیمدان آللاه
یا اؤلدور یاداکی قالدیر آیاغا
یاپیش بیرجه دفعه قولومدان آللاه
قلبیمده روحومدا گزدیردیم سنی
مین تیکه بیلمیشم بیرجه تیکه نی
خسته یم یورغونام حالسیزام منی
قورو ظولم کاردان ظالیمدان آللاه
گئده لر دایانیر قصدیمه هر گؤن
یوز آرزوم کور اولور توستومه هر گون
بایقوشلار اولاییر اوستومه هر گون
شیطانلار چکیلمیر یولومدان آللاه
یوز کدر یاشاییر کؤنول تاریمدا
درددی غمدی دؤولتیم ده واریم دا
ائوده عائیلم ده بالالاریم دا
بئزیبدی قووغامدان حالیمدان آللاه
شجاعت هامیدان دردیمی داندیم
حقیقت یولوندا قانا بویاندیم
یایدا بوزا دؤندوم قیشدادا یاندیم
عؤمرو یاشامیشام ظؤلوملن آللاه
#شوجاعت_کلبجرلی
@qanadli_duyqular
نییه ایتیردین منی؟
بیر دلی روزگارا کؤکلَندی کؤنلوم،
بیلمیرم آپاریر بو هارا منی.
آی آخشام عؤمرومون سحر گونشی!
قایتار پاییزیمدان باهارا منی!
یئنه گؤزلریندن ایراغا دوشدوم،
بیر یانار صحرا تک قوراغا دوشدوم.
ایتیردیم اؤزومو، سوراغا دوشدوم،
گتیردی حسرتین زینهارا منی.
اتک سن اولاردین، ال من اولاردیم،
یاناق سن اولاردین، تئل من اولاردیم.
دیلینده أن شیرین کلمه‌ن اولاردیم،
سن هارا ایتیردین، سن هارا منی؟
«ممد» خیالینلا مین ایل قیزینمیش،
اینسانین عؤمروندن، عشقی اوزون‌موش.
اوره‌ییم آرخانجا کؤرپه قوزون‌موش
گاه ایتیر گؤزوندن، گاه آرا منی...!
#ممد_آسلان
@qanadli_duyqular
بیر قوجاق چیچک‌سه آلیم گتیریم
بیر پلاک بیر اوزوک بیر سینه‌ریز می؟
بیر اورپک ... بیر بولوز ... بیر داراغ می کی...؟
پولونو اوده‌ییم آلیم گتیریم...
لاپ بیر ائو
آرابا
آلماس دا اولسا
کسردیم قولومو آلاردیم سنه
گونش‌سه ، اولدوز‌سا، داغ‌سا، باییرسا
هامیسین تانریدان چالاردیم سنه...
سینایدی بوش الیم قلبیم تک گولوم
یارالار دوداغین بوزور اوستومه
دیرسکینمه تانریدیر نیسگیل‌لرینی
قلبین دن چیخاردیر دوزور اوستومه...
#واحید_سولطان_اوغلو
@qanadli_duyqular