رغم أن الحديث يقول أن الرباب إستشهدت " ١٠ " رجب إلا أن حديث العشق يقول غير ذلك ( رباب إبن الزهره مات " فماتت " )
########
خايفه ، الغربتها الدنيا عنك خايفه
شايفه ، حالها أنت بفركتك ما شايفه
حيل متغيره الكبل سلوة فؤادك
الكبل جيت كربله شوفتها زادك
ذابله بحر وعطش وصارت سبيه
وماتت بيوم الرجع خالي جوادك
ما أظن يحسين تعرف هالسبيه
ألف موته ماتت بشوك المسيه
ولمهد تذكارك تلولي وتنام
والآمر يحسين صارت خارجيه
ولخارجية علي تباوع طايفه
خايفه .. خايفه .. خايفه
#############
حيل يراد وصبر وكت المصيبه
وبالاخص الرافك الذابح حبيبه
سهله بس الما سمع بيها الوحي
دارت الدنيا وصفت حرمه غريبه
الدار ذاك التستضل بفيه
حدره كعدت بالشمس علويه
بلا سكف يحسين مر عليها عام
وبالقصر يحسين تذكار ورزيه
سالفه ، ذكره ذاك الخدر ضل وسالفه
خايفه .. خايفه .. خايفه
###########
جانت عيوني كبل سلوتها رسمك
هسه مجتوفه بهزل مروني يمك
تدري وبذاك القصر هضمتني جلمه
فوك نظرات الزلم شتموني بإسمك
بحضني راسك يالولي ضميته
و ثغرك الذابل دمع رويته
عني ما شفتك شكفت سياطهم
ماصحت باسمي والكلب داويته
نازفه ، السوط بيه وعينك أنت النازفه
خايفه .. خايفه .. خايفه ..
###########
طلعت أودعك شفت ردت مهرك
ركضت احشم ابني بلكي ينصرك
مهده خالي وما لكيت وليدي
الخيل كالوا دفنته بنص صدرك
صعبه اتاني المشه وما تاناني
وصعبه صدرك شال واحد ثاني
حته من ابني عليك أنا أغار
كبري صدرك ومسكني وعنواني
عايفه ، كلبي الردته وطن شو عايفه
خايفه .. خايفه .. خايفه ..
###########
أبو الرباب المياحي
###########
صح خالي مهدك من الولي البارحه
بس سبحة الزهره بدي ما طايحه
واتنطر صيار الولد ليله بيوم
مو انطر شوكت أنا اسوي الفاتحه
وتسألني عماته شوكت يضوي البيت
مو أسأل الخيل الاجت والرايحه
حدر الحوافر ما سحكتن نعمه
بهوسة العسكر ما سمعتن يمه
ما حاجي بعده وكلبي يتراواله
بين الحوافر ضايع و ناداله
تناغيني جنت وأنا افكدك
عبد الله ما مذبوح بعدك
#########################
بين الأمس واليوم يمه هوايه
بهيبه جنه وجان راعي الرايه
هسه الفرق مو ما سمعت حجايه
لا يمه أسمي الصار هسه حجايه
من حضني اخاف عليك لمن تغفه
ومو حضني نايم فوك المسنايه
ما بين آمال الأمس واليوم يبني
جن ماتت امالي وتيتم حضني
أتمنه أشوف وليدي جنت البارحه
واليوم أمني يعوف راسه الذابحه
تمنيت اناغيك واكعدك
عبد الله ما مذبوح بعدك
######################
الليله المضت احسبها حيل بعيده
سنين احسهن ركضتي من البيده
من سمعت زغير نحره ويردون
نبله على كده و الرمح ميفيده
يا كسرتي وصاير غنيمه وليدي
من جفي اخاف عليه والولي بهيده
يبني الخدر غالي وركضت بضلمه
بكل خطوه أموت وما سمعت اليمه
هلبت يرف كلبك لدمعة حرمه
توميلي ردي وطلعت أمك هضمه
والخيل ما وصلت لعندك
عبد الله ما مذبوح بعدك
#################
بين الأمس واليوم كلشي تغير
أنا السبيه و أمس أم الأصغر
بمهدك أثر دخان يبني ونيران
وبجفوف زينب أمس يبني مبخر
اليوم على مهدك بس سبايه التمن
تلوليه أمس جانت جفوف الخدر
بين المهد وامك سوالف حرمه
اشهر طويله متانيتها اليمه
مهدك شريج رباي ذاك وسهري
وناره شريج النبله ذبحت خدري
طريت هيمه بنار مهدك
عبد الله ما مذبوح بعدك
##################
حاجيني يمه و خل ارد واتصبر
ابجي على فكدك ببواجي الخدر
مو سهله يمه الطلعه ما بين اجناب
خدر الحسين شلون طر العسكر
النحر الشفاف حسين صلت فوكه
شجم حافر البيهن ييمه تعثر
منك فلا شبعان مهدك بعده
وينطر دليلي لهسه منك رده
يم كل مهد متروس اذكرك
بعيوني حلم أعمى شيفسرك
يا حلمي فزيت شيردك
عبد الله ما مذبوح بعدك
##################
أبو الرباب المياحي
############
بسمه عيونك دخت يا حلو العيون
شهله عيونك ويكتل حلاها
كسرة الحاجب نبي يحتار بيها
دخيل ربك من رسمها شكثر بالحاجب تباها
تباها الله و حرت بعيونه واحتاريت
لون عيونه أقرب شي للاوهام
يقبل ربك من نغالي بالفاه ؟
السمه جنه وعليه مطشر الشام
الشمس شامه بطرف جفنه حطاها الخلقها
مو غلو يحسين والله ولون عينك
وانا ادري الخلق عينك هم عشقها
كهوه يمكن لون عينك
عينك أول عين سمره
شفت ليل الله برموشك
وبوسطهن شفت كمره
ليلك أبيض من صبحنه
الغاله بعيونك اعذره
صلاة الشوك بعيونك
أصلي ولونهن خمره
وطواف الهيل بدلالك
اطوف وافتر الحضره
أنا الما شفتك ومفتون
يعينج علي يالزهره
يوسف وحسنه وجماله
فدوه للشامه البجيدك
الغروب بلون شفتك
ولؤلؤ سليمان متبدي بوريدك
كون أصير دموعك النزلن بمصباح عاشر
حته أموت ببين رمشك كبل لتدوسك حوافر
من خيالي وردت أشرك ، بس خفت نيران ربه
خفت اطبها وما اشوفه وادري ما احمل فراكه
ومن كدما بجيت عليه دمع رمشيني تلاكه
وأهم يحسين و كل همي بذيج المشت عالناكه
لمن تلتفت للخيل ، تدور عليك ؟ مشتاكه ؟
بحوافرهن تدور عليك ؟ صدك بالحافر مثلم
صدك مترمله الشيبه ؟ ومخضبه اللحيه بدم
صدك يحسين من شالوك تتطشر شما تلتم ؟
صدك ذاك النحر عطشان ؟ صدك عالنهر تتيمم
صدك سبط النبي يحسين بصياره انصب مأتم ؟
لا يحسين ما مذبوح بس هاليله خل احلم
بس شحلم وذباحك يحد بالسيف وتبسم
خل يتحضرن للنوح والمدللها تتيتم
تحضر للذبح يحسين واتحضر أنا لنوحي
بميلاد الجرح مبروك ، ألف مبروك ياروحي
أبو الرباب المياحي
ما كاطع نزاع القوم ، كاطع كلب الحسين
دار على الأبو يمناه ، وللخيمه يدير العين
وبسهم المنيه ، تصوب كلب أبيه
وا أصغراه ... وا أصغراه
#########
صد لعمته وحن لسهرها
تناغي بليلها لطرة فجرها
ناغت أبني بجيلين زينب
إله ولمحسن النغص عمرها
كلبها المانسه الأولى ، بسهمك صارن ثنين
يمكلف هالرزيه
تصوب كلب أبيه
وا أصغراه ... وا أصغراه
#########
صد لسكنه و تذكر دلاله
مرت ذكره من مهده بخياله
من تلتم خواته تلولي وينام
العليله لجسمه وسكينه لخياله
صغيره ومهده ماينلاح ، وطفله هيه بت سنتين
ما لولت رقيه
تصوب كلب أبيه
وا أصغراه ... وا أصغراه
#########
وصد لخيمتي وياريته ماصد
هدت منتخي شيبي علي هد
أبد مو عمره يا نبله وغلطتي
مو عبد الله كون أمه أتوسد
لو ما شفته من نازع ، وأنطر ردته عمرين
مات وعينه إليه
تصوب كلب أبيه
وا أصغراه ... وا أصغراه
#########
أنا أمه واسولف يانبل واسمع
لا صوتي كبل وخيالي ما يطلع
هسه أركض وادور بين ألف خيال
خفت كماطه حدر الخير يتكطع
يالكاطع نحر طفلي ، لو رامي بعد سهمين
و خيمرن عليه
تصوب كلب أبيه
وا أصغراه ... وا أصغراه
#########
الله يعين أبوه بدورة عيونه
انحنه وحشمهم وراد اليعينونه
صعدت روحمن كليلي من صبتيه
روح حسين لو روح اللي بمتونه
روح حسينه الصعدت ، يا نبله وكضن روحين
وصرت أنا سبيه
تصوب كلب أبيه
وا أصغراه ... وا أصغراه
#########
الرباب العالهزيله مو سبيه
وما مجتوفه أنا بحبال أديه
أنا مسبيه من شفت السهم جاي
وأنا مجتوفه من عاين عليه
يبني شعلمك عالنوم ، ما بين الخيول وبين
رمل الغاضريه
تصوب كلب أبيه
وا أصغراه ... وا أصغراه
#########
أبو الرباب المياحي
#########
دلوني .. دلوني
بالولد دلوني
يا صوب أروح و وين
واطلع بلايه حسين
خافن يعرفوني .. دلوني دلوني
######
خاف أطلع بهذا الليل ، وينشاف طولي
المحد يعرفه
وخاف ابقه وخافن خيل ، توصله قبلي
وضلوعه ترفه
ضل عكلي ما بين وبين ، خدري ودليلي
والأولى كلفه
ياذوني .. ياذوني
بالشوف ياذوني
أهونلي سيف الجتال .. ولا ينلمح مني خيال
خافن يعرفوني .. دلوني دلوني
######
من هدت علينه الخيل ، وشبت نار
بضلوعي يمه
من الخيمه طلعن يزغير ، للهيمه فرن
والهيمه ظلمه
وعكس النسه من فريت ، للخيمه يمه
مهدك أضمه
يحركوني .. يحركوني
وياه يحركوني
لا توصل لمهدك نار
مهدك ييمه ينزار
خافن يعرفوني .. دلوني دلوني
######
لا شور عندي لا عگل ، ما ضل راي
والحيره حيره
عبد الله يمه يالولد ، يا ضنواي
أمك أسيره
لا رخصه لا أعرف وين ، بمنواي
أمشي ليديره
بجوني .. بجوني
عبد الله بجوني
كدامي يسكون الخيل .. جا ليش عطشان الهيل
خافن يعرفوني .. دلوني دلوني
#####
أنا أدري هذا اخر يوم ، بالغاضريه
باجر سبيه
ردت أخبر بحالي حسين ، إبن الزجيه
وأخذ وصيه
وأخذ رخصتي للسبي ، من المذبوح
باخر مسيه
ودعوني .. ودعوني
من كال ودعوني
لا حيل عندي ولا راي .. ويتوادع حسين وياي
خافن يعرفوني .. دلوني دلوني
######
يا ليل أعاتب يا ليل ، حرمه وتعاتب
فكدت ولدها
اليم مهده تسهر يا ليل ، وتناغي جانت
ريحانه عدها
مسبيه صارت يا ليل ، بين الاجانب
وسلبوا مهدها
يسبوني .. يسبوني
لو غبت يسبوني
يا ليل انطرني اودعه .. هلبت يناديني واسمعه
خافن يعرفوني .. دلوني دلوني
######
أبو الرباب المياحي
#######
رايحه يمه الولد
برمح مشيول المهد
لوليت ، ناغيت ، ربيت
وجرحي يكبر
آه يالأصغر .. آه يالأصغر
######
نويت ... موادعي وياك من فوك الهزل
وأجيت ... وكلهم الحداي مروا على الطفل
دريت ... من وصلنه لجثتك جر الحبل
ردت اناغيك من أمر
متاع إلي بدرب السفر
إحتار ... اندار... والنار
وجرحي يكبر
آه يالأصغر .. آه يالأصغر
######
بجيت ... إستاحشت لايام جنت كبالي
حجيت.. وعالرمح رفعوه مهدك خالي
يبيت ... جنت اضمك للكبر وأمالي
شلون يا يمه أطب
وأنت نايم عالترب
يا حيف ، بالطيف ، مر ضيف
وجرحي يكبر
آه يالأصغر .. آه يالأصغر
######
يماي ... شفت كلب الوالده وشوغاته
بضماي ... اروة دوم بنظرته وضحكاته
هواي ... جنت أشمه بلمسة مناغاته
ردته يكبر وأرتجي
وبعده ما شابع حجي
بيا حال .. لو طال .. الترحال
وجرحي يكبر
آه يالأصغر .. آه يالأصغر
######
سحاب ... وأترف من الغيم ابني جفوفه
سراب .. كل حلم بيه جنت ماشوفه
عتاب ... فارك أمه وليدي وسط الحوفه
جان متروس المهد
غافي الولي على الولد
أحتام ... ما نام ... ايام
وجرحي يكبر
آه يالأصغر ... آه يالأصغر
######
أهيم ... من يناغيني ويحرك شفافه
اليم ... الحافر المر بيه وبده أوصافه
يغيم ... شبيه مايك هالورد ما شافه
غيم مر على الخيم
كبل ليشوفه السهم
ألام ... وسهام ... وخيام
وجرحي يكبر
آه يالأصغر .. آه يالأصغر
#######
أبو الرباب المياحي
######
الظن سلوه لجروحه يتمنه
حسره وضل لموته يتمنه
كماط ومهد طفله يتمنه
السهم بوليده والنازع أبيه
######
خطف لوني السهم وبلونه لوني
روحي ورده ومنجل فراكه لوني
أنا ورده بعز خريف الله لوني
ما مر بي صفار المار بيه
#######
أنا وحسينه بدمك حنينه
جفوف وضهر لفراكك حنينه
عبد الله تراهي أمك حنينه
تشم كماطك بكل مغربيه
########
الصديقه الرباب تكول
على طول الطف أمس بالبيد فرن
عبد مو كعبه أمس بالسوك فرن
ترن ساعتهم وانا ألجم ف الرن
ويه كل ساعه يمر راسك عليه
#######
الذبح لا لاعب وليدي للها
حرورة سهمه من نحره للها
الكتل عبد الله يتقرب للها
ويفجع كلب حره وهاشميه
#########
نبلتك يمه عبد الله سنلها
بعمرك يمه عبد الله سنلها
كتلتك كبل ما صارت سنلها
بس أبني عبد وابن الزجيه
#########
الصديقه أم البنين تكول
يريت خيال زينبنه نحيطاه
خدرها بنص حرم هاشم نحيطاه
دمعها انشاف بل شافوا نحيطاه
بوكت ماكالوا إلها الخارجيه
#########
الصديقه أم البنين تحجي عن الحسين
لون عيونه جن كهوه فدله
السهم جوعان من مره فدله
عليه وريت أنا أغديله فدله
أمه لحسين ولأمه الزجيه
##########
يرد على أم البنين سيد الشهداء
يمن بالذر عرفتي الله وأمنتي
أم رباي يمه أنتي وأمنتي
زينب والحسن حاشه أمه أنتي
وحك عباس بحساب الزجيه
########
الشب نار بخيامك لمسلم
بسقر و اللي نكر حبك لمسلم
حميده ترسل موادع لمسلم
وعتاب أول يتيمه هاشميه
##########
أحلام الصبه بنيته جفنها
يريت وكون أخو إلها جفنها
سواده يفشل الظلمه جفنها
حميده بلا أهل يهل الحميه
#########
يكربك لله كرب اللم منلها
اليريد الجنه بكتلك منلها
رحت ما حسبت بتك منلها
أخبرك يا فحل بتك سبيه
#######
مسح جفه وحميده وياه هاميت
أنشدك عمي اخيك عدل هاميت
يعم كللها أظن مهشومه هاميت
مسلم وأنتي ضليتي إليه
######
أبو الرباب المياحي
#########
* الجناس الثالث لنحيطاه ( النحيط هو :- البكاء الذي لا يظهر ويبقى في القلب ، و صوت البكاء المتردد في الجوف )
هذا مهدك .. خل ألوليه و أنام بسده
هذا مهدك .. خاف تستاحش عبد وتفكده
هذا مهدك .. بعده ما بارد خلافك بعده
هذا مهدك .. عليه كل دمع الرباب تبده
طيفك لفاني وفزز أحلامي
لو برد مهدك تخلص أيامي
لخاطرك عشت ونسيت ألامي
يرجع وليدي يكحل عيوني
وبالدمعه أروي وليدي الضامي
الماله أمل ما يسهر الليل
وليل الفراك بروحي يعيل
خلاف المهد والضحكه ذله
عبد يمه ، عبد يمه ، عبد يمه
#########
عبد يبني .. بأمك ليا ديره تمشي الهزله
عبد يبني .. تعيش التفارك ظناها بذله
عبد يبني .. زغيره أحلامي صفنت الطفله
عبد يبني .. أم الوحيد تعيش بظله
ظلك مفاركني من لوعة أمس
عينك الغمضت لو عين الشمس
أعذرني يمه من أناغيلك همس
السوط يلفيني أذا سمعولي صوت
وأنت تدري بخدري أعز من النفس
عبد الله يمه شسوت الخيل
زغيرون مالك عالسحك حيل
ولالك نحر يتلكه نبله
عبد يمه ، عبد يمه ، عبد يمه
#############
بان شيبي .. كبل مامش شيبه بيه
بان شيبي .. شيبت ذيج المسيه
بان شيبي .. و أجنبي يأشر عليه
بان شيبي .. من شلت راسك بديه
شلون لو طول عبد بيه السفر
وبيه من هسه الحبل تارك أثر
خلكي مو كلبي عبد يمه أنكسر
موش من هضمي ولا من لوعتي
بس شفت شيال رمحك من عثر
وهزله النوك مو مالة مداليل
و لو مال راسك أمك تميل
واليحدي ناكتها خوله
عبد يمه ، عبد يمه ، عبد يمه
########
يا حبيبي .. مثل جفك ثاري هالدنيا زغيره
يا حبيبي .. زغيره وشيخها أنشال بحصيره
يا حبيبي .. ضاكت الدنيا عبد والحيره حيره
يا حبيبي .. وين أرد من السبي وما عندي ديره
عبد يا بيت هذا العكبك ألفيه
نايم بالشمس وأنا أستضل بيه
و ردت كاروكك الخالي أحنيه
طبوا خيمتي وحركوا الكاروك
و جمعت رماده يا يمه وأناغيه
يالعطرك شريج الهيل
إلك ما لايكه الياويل
ميلوك على طولك دمع ثكله
عبد يمه ، عبد يمه ، عبد يمه
########
أبو الرباب المياحي
في إحدى معارك الطف ، أغار جيش إبن سعد على أنصار الحسين فأحاطوهم وأكثروا فيهم القتلى ؛ ولم يخرج من الحصار إلا القليل ، فخرج من معسكر الحسين فارسان فقط ، فدخل أحدهم من الميمنه والأخر من الميسره ، فإلتقى الفارسان في وسط المعسكر وما هي إلا دقائق حتى عادوا بالأنصار إلى المعسكر وقد كسروا الحصار .
فكإني بأحد القادة من جيش الشام يقول ..
يمنته الجيش وين ويسرته وين
ومن يا صوب حيدر داخل علينه
ألف بالخيل ضاع وشربته الكاع
والف دخيل لاذ ببخت أبو سكينه
ود مرسال لابن زياد بالريح
مظنن ساعه تبقه بعد سبعينه
وحك عباس طب الميمنه العباس
شفت بس روس طارت وسمعت وينه
اليرد السيف غمده ثنين لا غير
لو جيشك كضه لو جلمة حسينه
زحف وصلوا حسين وصاحوا بصوت
يحسين الحك لا يكضينه
عليك حسين سيفك ، رده لكرابه
########
هسه الميمنه عرفانها للعباس
شضيع ميسرتنه وطيح القاده
و بجفيه خضره مشدده الروس
دخيل الساده جم عباس بالساده
علي وحمزه ومحمد أدري ميتين
هذا منين شايل هيبة أجداده
بوسط الجيش شفته تلاكه وي عباس
و طر الميمنه وطشرها بعناده
وطر عباس يسرتنه وضحك ثغره
أظن متزامطين وبالعدد زاده
اليفر من عباس يتلكاه الهم عباس
روس القاده شدها بمهرها كلاده
ورد لخيمة ليلى ، وروس القاده بسرج الخيل
#########
علينه تزامطوا عباس والعباس
دخيل زماط هاشم والحرب لعبه
واحد نهر سوه من الخيم للماي
بدم قادتنه الآخر يترس الجربه
أكو عدهم طفل بحزامه شدوا سيف
خاطر وره الطف ما ينحزن كلبه
يمكن جربة الدم حته يسكي السيف
سيف بلايه دم للهاشمي صعبه
شفت الطفل هوس وابتشر من جاه
أخيه وجنه طالب هالحرب طلبه
رجف وكماطه حله وشابك العباس
جبر عباس كوه بمهره يركبه
العالمهر عوده ، عرفت الثاني ياهو
########
عرفت الثاني الأكبر شيمة حسين
علي وجنه علي بكل هيبته وزوده
من شفت الطفل هوس بنص الجيش
عرفت العالمهر تجايته وعوده
كل ما يتعب يعاين لأخيه يزود
طر كلب المعسكر ثبت حدوده
يضيع الليل كله بدورة العين
نجوم الله ببياض عيونه موجوده
سماها عيونه سوده وليل صفين
وحيدر حيل جفه ومالك زنوده
حيل الله وجماله ثنيهن بيه
يهيم اللي يذبحه برصعة خدوده
الاصغر يشد زوده ، حي أخو سكينه
############
بكفاه السمه ضلمه ودنيا ليل
الشمس شامه بخده ضيعها الاله
طغى نوره على الشمس ضيعها بيه
ولذلك ضلمه ما اشوف الوراه
بخزرة عيونه شفت نظرات أبوه
ترهب عيونه إذا أنت بكفاه
اختلف ميزان الوجود بهالعيون
ثابت وكون اليطوفه وسبحاه
كبل ساعه الجيش ما ينشاف جان
منين يبدي و وين يكضي ومن اجاه
كمت أعد فرسانه وأرجع أعيد
وكبل لا أعد غيره أعرف طيحاه
ولاخير الجيش راح ، ومالكه أنداده
######
أبو الرباب المياحي
مهده خالي .. طفلك الما شاب عوده مهده خالي
وعلى بالي .. أثر خطواته البحلمي على بالي
حسين غالي ..فدوه نحرك ها ييمه حسين غالي
يا حلالي .. إستاحش كليبي وذكرتك يا حلالي
الليالي .. يا تعب عمري وسهر ذيج الليالي
لا يوالي .. متني يتمته ييمه لا يوالي
حن كلبي ودلالي لجمني
كل نومك يا غالي على متني
متوسد متغطي برمله
جا وامك عبد الله يبني
كاروكك متني .. ومضغاتك
تشيمني يبني .. ضحكاتك
مناغاي وسهري .. لعبد الله
ما خضر تعبي .. بخطواتك
يواسني ويبجن .. من ابجي
يا كسرة صبري .. وعماتك
من أذكر مناغاك يتبده العمر
الما نايم بكاروك نايم بالكبر
عبد الله يمه أنا الرباب أنا الرباب
عبد الله يمه أنا الرباب أنا الرباب
##########
والله هضمه .. حته ما كملته حلمي والله هضمه
بعده جدمه .. حته ما ماشيله خطوه بعده جدمه
لا ييمه .. الرمل موش أدفه من حضني لا ييمه
عاد أرحمه .. يا سهم وبطوله أنت عاد أرحمه
وين أشمه .. فرهدت من عندي نحره وين أشمه
طفله يمه .. أنسه عمري أنا بضحكته وطفله يمه
سهرانه بكل ليله على مهده
ولو هدني أستاحش وأفكده
وين أسهر كاروكه ومحروك
ردت أسهر يا نبله على لحده
ما نايم بلحده .. ما شفته
الخيل بحوافرها .. مطلعته
حوافرهن ثجيله .. يعورنه
و يا سهم يمكن .. ساحكته
فرهدن لحده .. وكاروكه
لا يا سهم كله .. فاكدته
يمه ولفركاك ميلوك الصبر
الما نايم بكاروك نايم بالكبر
عبد الله يمه أنا الرباب أنا الرباب
عبد الله يمه أنا الرباب أنا الرباب
#########
لله أمري .. لربك الخالق ضحكتك لله أمري
ضاع عمري ..ضعت بين الخيل أنت وضاع عمري
ضاع خدري .. النار وصلت طرف مهدك ضاع خدري
شعظم صبري .. كماطك كبالي تكطع شعظم صبري
هين أسري .. أنزل من الرمح عارك هين أسري
بيه تدري .. سوك كامل شاف طولي بيه تدري
مو راسك يوليدي على متني
ومو ضحكاتك تسمعها أذني
ما أسمع بس كلمة سبيه
وبسوطه بمجانك يطكني
كل ظني تردلي .. ما ادري
يتبده رباي و .. كل سهري
رايح يوليدي .. بلا رده
يتمت أحلامي .. يا بزري
شيبات برمشي .. لفراكك
شصبر والرايح .. كل ذخري
تبده دمك يمه وتبده الخدر
الما نايم بكاروك نايم بالكبر
عبد الله يمه أنا الرباب أنا الرباب
عبد الله يمه أنا الرباب أنا الرباب
########
يتم أهله .. أنت أول طفل موته يتم أهله
والله ذله .. لو جهبت المهد خالي والله ذله
شرد أكله .. طيفي ذاك البيه تمشي شرد أكله
كون كحله .. يبني مو دم فوك رمشك كون كحله
شلون أصدله .. ويابس الدم على عينك شلون أصدله
مو خوله .. أنت التصعدني ناگه مو خوله
ميت بس ما فاركت أحلامي
من دونك ما متخيله أيامي
ريت النار الشبت بالعاشر
حركتني وما وصلت لخيامي
بخيامي كاروكك .. وتذكارك
من الزهره ضميته .. لصيارك
ما وجت الخيمه .. بالعاشر
بكدما وج كلبي .. من نارك
شمنومك بهيمه .. يوليدي
مو حضني هذا .. ولا دارك
راح أهد الدار وأبقه أنا أنتظر
الما نايم بكاروك نايم بالكبر
عبد الله يمه أنا الرباب أنا الرباب
عبد الله يمه أنا الرباب أنا الرباب
###########
أبو الرباب المياحي
عوفه ثغره البيه محمد نام جم ليله بدفاه
وسبح بثغره لربه الجان بيه ريحة إله
وعوف سحك ضلوعه والمحبس وكلشي
وعوف ماي المشرعه الزاعل ضماه
وحته لا تحسب شجم فطره باشافه
ولاتهم بكلشي شافه وجم نذل واكف وراه
وعوف حته الخيزرانه الما همها ثغره
اللجمت فطور الضمه وإذت شفاه
وحده أذتني بحسين وهمت بيه
أتعطل السلب المحبس ما خذاه
وشاف زينب على تلها وشال أصبعه
كلت نار الغيره كلبه وبالعجل خنصر أنطاه
شلون من بين الحوافر شال جفه
محلفج بالباري زينب وأقسم عليج بعلاه
رجعي لا ينشاف طولج ، عز أخوج
يا خضار سنين عمري والربيع
موش خدرج لا يزينب ، لا يخيتي
خيالج أغله من الرضيع
نحري هذا أهون عليه ، بزري أهون
فدوه لخيالج البحضني صريع
صابر حسينج بكلشي لجن يخته
ضلال لو شافوا تره حسينج يضيع
ولا تبجين ، زينب دمعج عكال
أطيح أنا ولا عكالي يطيح
حسين جاس الغيره كبل العاطفه
ومن نسيم الباري بيه شميت ريح
بيه أذتني الشهامه ، ينازع وعينه لخيامه
ألف وأربعميه بيه ، ولأن سالم خدره ، أبد ماهو جريح
حسين كون بكل كنيسه الكاله رايه
الكاله صوره وتسجد كباله المسيح
حسين كون بكل مكان ألكاله مأتم
وكون عد البوذه ألكاله ضريح
العرف قصته وما بجاله ، يشوف ياجد ماهو جده
أنا وي حسين ما أجامل أبد ، كلش صريح
بكلشي أحبه ، بغيرته بعطفه ، بوجوده ، بأزليته
بالسنين المرن ولليوم ريح إحسانه عالدنيا يفيح
أنا أحب حسين زلمه ، مو لأن ثالث اليمه
وهمت بيه عالرمح راس ومن على الرمله ذبيح
- أنا أحبه
- أبو الرباب المياحي
كبرج ودنياج ضلمه خلاف عباس
مودعه الله وبالسلامه يالسبيه
إرتاحي زينب من عذاب وغربة الناس
لوطن حيدر روحي ولحضن الزجيه
باقي أثر سوط وحبل
وأثر طيحه من الهزل
وأثر لجمه بكلبج ويمكن رقيه
مودعه الله أم عون يمه وبالسلامه
خلاف عمتنه الحنينه الكل يتامه
ويلاه ويلاه .. يمه أم عون ويلاه
#####################
إرتاحي من ضيم الهجر و غربة الشام
خوفي لا عصرات كبرج تهيج الآلام
موش جلدج يلجم سوطهم واصل للعظام
عميه يعيون الشعر و عيون الأقلام
شفكرت ترثيه خدرج
إنتي سر الله سرج
وإنتي زينب بت علي والهاشميه
مودعه الله أم عون يمه وبالسلامه
خلاف عمتنه الحنينه الكل يتامه
ويلاه ويلاه .. يمه أم عون ويلاه
#####################
يا عقلية آل طالب و فخر المدينه
شراع جنتي للنجاة وحسين السفينه
آه يكسرة موتج بغربه و حزينه
وين عن نعشج رباب وخوله وسكينه
ماكو حرمه الدفنتج
ولا إخوان الزتتج
بلا دموع حسين وحشه هالمسيه
مودعه الله أم عون يمه وبالسلامه
خلاف عمتنه الحنينه الكل يتامه
ويلاه ويلاه .. يمه أم عون ويلاه
#####################
ما كفه ضيم السبي ولوعات دربه
للدنيا مطلوبه يزينب بعد غربه
غربه أشد من موتج وعالمهدي صعبه
دموعه حمره عليها ؤ تاذيه كلبه
غربة المرقد بعيد
على حسينج والعضيد
يدنن دموعي لضريحج والدرب يبعد عليه
مودعه الله أم عون يمه وبالسلامه
خلاف عمتنه الحنينه الكل يتامه
ويلاه ويلاه .. يمه أم عون ويلاه
#####################
غربه شامج والمدينه وغربه يا درب الضعن
غربه من تمشي الجنازه ومامش عيون البجن
كلشي غربه خلاف أخوتج هلبت بلحدج وطن
هلبت تلكاج أخيج أبو جسام أنا عودج الحسن
كوه صبرج بت علي
يا هلا بجيتج إلي
من أهد يوم الطشت وأنطر إلج جيه
مودعه الله أم عون يمه وبالسلامه
خلاف عمتنه الحنينه الكل يتامه
ويلاه ويلاه .. يمه أم عون ويلاه
#####################
خلصت الغربة يزينب لو بعد ناسين وحده
بعد وحده أشدهن وما خلص دين الغربه بعده
على التل لمن وكفتي الصدره جان يشمه جده
شفتي خيل تدوس فوكه وبالرمل مديوف جبده
أدري غربه هواي عمرج
وغربة حسين التعورج
حسينج وميدان صاير عليه تلعب خيل أميه
مودعه الله أم عون يمه وبالسلامه
خلاف عمتنه الحنينه الكل يتامه
ويلاه ويلاه .. يمه أم عون ويلاه
#####################
كل هذا صبرتي عليه وثغرج سبح لربج
الذكر ما فارك لسانج ولا جاس الجزع كلبج
فوك الهزله وتصلين بذكر ربج خلص عمرج
بس لا تنساها يا شعري الجلمه الجانت تعورج
بحجيهم إلج جم لجمه
بس أصعب وأشد جلمه
الماله عرف بالله يكل لبت علي يالخارجيه
مودعه الله أم عون يمه وبالسلامه
خلاف عمتنه الحنينه الكل يتامه
ويلاه ويلاه .. يمه أم عون ويلاه
#####################
- من وطن الحسين لمنفى الدنيا بعد الحسين
( زينب غربيه )
- أبو الرباب المياحي
دفن يا طبول الشام دفان
ثلث تيام مرمي بغير دفان
برد بمنازعه والخيل دفان
بحوافرهن دمه روح الزجيه
######
هنا يالحبكم بشر كلبه لمهداه
عزائي من أول العصمه لمهداه
على اللي تفز مرعوبه لمهداه
تركض بس خلي وتلولي هيه
######
وحك اللي بغصن خاوي بلادام
يريت العله ما طابت وال بلادام
عميه عيوني من يعبر بلادام
يومج يالرباب وحيل بيه
######
بحر الشوك شيعبره بلا فاي
فايه الحيل وما عندي بلا فاي
كعدت بالشمس عكبك بلا فاي
وتنوح عليك كل صبح ومسيه
#####
همت بالحاجب ورمشه ملفته
و غزل بيهن الدنيا ملفته
يعينه حسين ربه ملفته
دلاله اليوم محتامه على فيه
######
مكدره الليله بدوي بربابه
عليك برب محمد و بربابه
بملكه حسين عينه بربابه
ملكاهم يحيدر عز عليه
######
وحك الدلل أم زينب من سماها
العرش مكدر و دنيا من سماها
جتال أم عبد ما أظن من سماها
كتلنها حوافر خيل أميه
######
أون معذور يفضحني هياماي
هظيمه تموت عطشانه وهياماي
أعذريني ييمه بس هياماي
وهيه اللولت بمهدي عليه
#######
- العزاء لكل الوجود ولرب الوجود بفقد السلطانة الرباب
- هنيئا للحسين لقاء ربابه بعد طول إشتياق
- يوم إستشهاد الصديقة الرباب جلة محاسنها
- أبو الرباب المياحي
يا جبير الكوم غارت خيلها
وعيت الغيجان وانهد حيلها
وتيهت مشراكها من الغروب
لون عينك هذا يشبه ليلها
في هندس الليل .. يوبص صارمه
لون الرقه عطشى .. يرويها بدمه
هكواي تملا العلكمي من الفرسان
بالثار تطلب .. و بضلع فاطمه
( رباط )
ياويل الطف .. كف ذراعه
###############################
هماج جان العلكمي من جبينك
هكوه الملائك جان ودها تعينك
تحسب بقت وإنت تحصد بنحورها
زايد عليهم شلك بسبعينك
حيا گرمانها أنفهگت .. خليه الحومه
و حلوص الجيش .. وضيعيت علومه
والجيش داج ببين أخوك وبينك
موتاً لفاهم حروته .. وحل يومه
( رباط )
الماي أصفر .. من كد خوفه
###############################
گبيسا مليت الطف بنود الرايه
وأغداف يدحى الجود والسكايه
حلياك همام مظن سوه الذات
هو واحداً لحسين صار هوايه
سرا حناشلهم سرت .. منك مفر
نيران يبلص صارمك .. يملا سقر
الفا مفازيعا غدايى يزهمون عباس
مافي ضلام يضلهم .. وأنت الكمر
( رباط )
عباس الطف .. محبس بيده
###############################
أبو الرباب المياحي
###############################
ملح سوالف الله وحجيه الحسين
و الباقي هوامش ما إلهم صيت
من جنه أشباح نناغي بالروح
شفت الله يحبه وأني حبيت
كبل لا يحجي موسى ويوكف بطور
كبل نمرودهم والنار و البيت
جبرائيل جان يسبح حسين
وأنت حسين بس الذات ناغيت
آدم جان فكرة طين مو طين
وأنت على العرش يحسين صليت
فطرس جان توه بجنحه الريش
وذنب والذات كله لخاطره عفيت
بجذعها الناغتك من لولت الروح
سكاها العلكمي ومن فدك كاعه
وحك عيسى ي أبو والروح للروح
ينور الذات و أحجيها بقناعه
يخو زينب يناغي الماله اخوان
بخي زينب وأخوها الذب ذراعه
وأخوانه أثنعش بس وسطة البير
بيك تحشم و شوكك متاعه
مجلس سوه كل ما دكله بسمار
نوح يناغي فاطم و بجزاعه
المبلل دمع شيهمه بالطوفان
وأبو سكينة إنكتب وسطة شراعه
الجزع الكم صبر ملح العشك بيه
وأجزع صابره سكينة بوداعه
يملح سوالف الله العشك هم لون
لسمه عشك الرباب أعلن الطاعه
يرف جناحي بإسم الناغتك دوم
وأتعلى بسماها وشوكي جناح
أنا من اليوم احبك وأنا من العام
واحبك من جنت يمك بالارواح
أبو الرباب المياحي
خايفه .. خاف الولي لمهدك الخالي واكعدك
خايفه .. بروحي أهم وأنت ما مذبوح بعدك
خايفه .. خاف جابولك رمح موش على كدك
خايفه ومحتاره بينك بين خدري
أنت عمري وخدري أعز منك يعمري
بين نار وهيمه وابني محير أمري
بين أفر بالهيمه واركض شارده
بين ستري وبين كلب الوالده
بين نار الخيمه بين سياطهم
بين انوح عليك نوح الفاكده
علي يبني .. علي يبني .. علي يبني
##################
خايفه .. خاف نار الخيمه توصل للمهد
خايفه .. اطلع من الخيمه ادور عالولد
خايفه .. أوصل لجسمه واشوفنه برد
شلون عبد الله إذا بردان جسمك
بلايه روح و أنا ملهوفه اضمك
خاف ماضلك نحر جا وين اشمك
وصلت مهدك نار ذيج الخيمه
حضنته مهدك وركضت بالهيمه
بيه خل يطفي المهد يوليدي
روحي كاع وعطر مهدك غيمه
علي يبني .. علي يبني .. علي يبني
#################
خايفه .. انسبي وعبد الله يبقه لوحده
خايفه .. على الهزله اصعد واديه مشدده
خايفه .. و عالتعب ما يوم روحي معوده
بت دلال حسين رافكها خوله
أم الأصغر عاشت خلافه مذله
عدد جرح حسين مالت بيه هزله
ألف خطوه بالسبي جان الدرب
وألف مره يا علي صاح الكلب
يا علي بكل خطوه ما بين الزلم
خاف تعثر ناكتي بنص الغرب
علي يبني .. علي يبني .. علي يبني
###############
خايفه .. الشال راسك عالرمح يوليدي اشوفه
خايفه .. على الهزله يميل طولي وي جفوفه
خايفه .. طولي محد شايفه وتنتظره كوفه
أنا إذا زينب تباوعلي استحي
ربات أبو سكينه أنا ربات الوحي
جرحي وآثار الحبل ما تنمحي
مو العاشر جرحي لا ذيج المصيبه
جرحي كل عين التصد ليه غريبه
جرحي سوك وطايفه وديوان جان
تصفح بوجهي وأنا لزينب ربيبه
علي يبني .. علي يبني .. علي يبني
##############
خايفه .. من أمس يوليدي كلش خايفه
خايفه .. حجار شمرت علي كل الطايفه
خايفه .. وأنا كل عمري زلم ما شايفه
عيني ما باوعت بس لحسينها
هسه عسكر بين رمحه وبينها
باكوا حلمها و ذبلوا رمشينها
متاع درب السبي واخر ذكره
مهد أبني ذاك الما حضيت بكبره
جتفوني وسلبوا حته المهد
راداه غنيمه اللا هناه ببزره
علي يبني .. علي يبني .. علي يبني
######################
أبو الرباب المياحي
################
عاجر أدريها المدينه شلون طلكت
خرز طين أدري سماها شلون شالت دره
سبحانه سمارك يا ضوه الليل
وسبحانه السمار الوشح الكمره
سبحانك نده بطارف اشفاه الورد
الكمر شامة شفتك وشمس الله يمك سمره
قدس الله رماد كل دله بمضيفك
وقدس الله النار ذيج الليها تبره
نارك اليندلها كل سائل يضيفك
وقدس الله أثر كل حنطه على ضهره
قدس الله كل كصب شايل مضيفك
ودام ضله البيه تلوذ الفقره
سبحانه سمارك يابو جسام
سبحان الله ذاك اللا شرك بأمره
سبحتك مثل ملكاك للضيف
أول يا علي لميت دخل كبره
سبحانه الخلق من نوره صاغك نور
وبيه يتباها محبس ، والحسن شذره
دخت بكهوتك جني افتر وي الهيل
وأنا أدري بكهوتك خمره
تفاح النبي يحسد طواف الهيل
وأنهار العسل من كهوته المره
سبحانك بكدما جنت مرجع لليتامه
وسبحان الحجار العالبطن مشدود
عنبر جان حصة كل طفل جوعان
وحصتك بالدنان وشرط باللي يزود
الغيم يشبه نظرتك لأطفال المدينة
والمطر دمعك من تغفه اليتامه بجيدك
بجيدك كلاده النجم ، ومظلوم جان
من الترافه البالنحر بين وريدك
أكو شامه زغيره كلش ، فوك نحرك بالعلامه
بسدها جانت ، تشمها وتنام اليتامه
رمش عينك جان مأمن كل فراشة
بعطر نحرك جان تسبيح النحل
الكاصدك جان لهداية وشاف عينك
يهيم بيها و يشرك أكثر من قبل
الرسل ماكو إلها داعي واكو عيونك
ربك الخالقها عينك ، وعلي بعيونك يدل
يعينه الله الراد يتغازل بعينك
والحسن يا حسن وصفك مو سهل
أبو الرباب المياحي
راح آخر قرابين الرساله
ونن وابجن بون الثكاله
يا بيت الوحي تطشر دلاله
ثكل الجنازه يريدله متون ، من السوط زركه متونها أم عون
هنا يا هلي ليمت تفزعون ، ذبلت الورده وراحت من أيدي
عمه علي .. عمه علي .. راحت الورده من أيدي
#########################
آخر بگايه بريح العزاز
زلمه عليل البيها جناز
يحسين هسه لطولك اعتاز
غطي اللحد بارد لحدها ، ويم اللحد خليه مهدها
بلكت يخي تلكاه ولدها ، وما اغفه مره بصوت آه يوليدي
عمه علي .. عمه علي .. راحت الورده من أيدي
#############
آه يا ليالينه المضن يا خيه
بداهن العاشر فرد صبحيه
الحيد ذاك النستضل بفيه
بسن الرماح حسين مشيول ، مو صدره راكت ذيج الخيول
ليليه يختي بصدرج تجول ، وريته النبل ذاك بوريدي
عمه علي .. عمه علي .. راحت الورده من أيدي
#################
بشم الهوه ما شبعان صدرج
شيواسي كلبي من يذكرج
كليلي بالله شلون أعذرج
جنت من احن لحسين الكاج ، حسين ثاني بذاك ملكاج
راح الحسين بيوم فركاج ، راحت سلوتي وهسه صرت لوحدي
عمه علي .. عمه علي .. راحت الورده من أيدي
##########################
عمه علي حضر النعش
أرد ابجي جن ليل أهدعش
راحت رباب من العطش
يا ماي كلي شبيه خليت ، الكامن أنا من أرد للبيت
كبالي هسه والها حنيت ، تامور سري ربات عمري وخلدي
عمه علي .. عمه علي .. راحت الورده من أيدي
##########
أبو الرباب المياحي
خايفه أوصل للمهد
وما اشوفن بيه ولد
و أنا دلالي أنمرد
خالي مهده شعدهم يسلبونه
آه يالأصغر ... آه يالأصغر
#####
أسرع بخطواتي كوه على الجدم
أدري ماهو بس اخاف من السهم
خاف يندل ويجي صوب الخيم
و ركضت النيران ل عبي الحرم
لمهده أركض خايفه
بنبلته جن طايفه
كون السهم ما شايفه
ولا نزل دمه على عيونه
آه يالأصغر ... آه يالأصغر
########
ساعه أثكل ساعه أهمن جدمي
بمهده ما يغفه إذا مو يمي
و مانام إله يمر إليه بحلمي
لا يفز و يصيح اريدن أمي
ظلمه ويخوف الليل
و الركض رايد حيل
وأتسابك وي الخيل
زغير جسمه خافن يسحكونه
آه يالأصغر ... آه يالأصغر
#######
عاندت روحي وكلت ما مذبوح
عگلي يدري لجن ما تدري الروح
ياهو اليصبره يواسي روحه المجروح
نايم و أكعده و للسبي و ياي يروح
مو عالسهم بإحضاني
ويغفه وربابه تتاني
يفز عالمهد يلكاني
متجيه وراسي على متونه
آه يالأصغر ... آه يالأصغر
#######
هنه بس خطوات وأوصل مهده
وصرت أثكل بالمشي و متعمده
خاف ما نايم من أوصل بعده
وادري ضامي والعطش فت جبده
خاف أصل مهده وأهز
و نايم وخافن يفز
الجان لعيوني حرز
خايفه أمشي للسبي من دونه
آه يالأصغر ... آه يالأصغر
#####
والله بيك تحيرت يا بزر شيبي
مذبوح كالوا المن يدر جا حليبي
أنت أخوي ووالدي وذكره حبيبي
جنت اشوفك مو ابن علتي وطبيبي
من تبجي يمه انذل
من تضحك اتدلل
كلب أمك تعلعل
كلبي أنكسر برسومك يجبرونه
آه يالأصغر ... آه يالأصغر
######
أبو الرباب المياحي
######
يعم الهدوء فجأة ، يتعب الكل من البكاء ، بحت أصواة ثكلى ، أعيت المواساة قرينة الكافل ونظيرته بالقوة والعظمة ، وعليل ينازع علته ليثني على رب يرى دلائل ذاته على أسنة الرماح ، للجميع دور في الفاجعة ؛ ورواية لم تروى لأن الرب يعلم جيداً أن لغز الحسين سيكون طريقا لأولي الألباب ليستمعوا لكلمة الله المخضبة بالدم والرمال ، لحظة ، ما هذا الأنين !! صوت بكاء يداهم المشهد الهادء ، شيء من التسبيح والذكر ؛ وصلاة لا أعلم لعباداة أي دين تعود ، مهد مرسوم على الرمال وظل كأنه يهز فوق المهد الخيالي ، بكاء خافت ؛ فهي تعلم جيداً أن صوت أنينها يعيد مشهد قتل الحسين لكل من سمعه ، يطرق الباب فجأة ؛ يحمل العليل سهما إليها ؛ يكف أنينها قليلا وتضع السهم في وسط المهد الخيالي تشد عليه قيود سبيها كالقماط ؛ تضعه في حجرها ؛ ثم كأنها تقول له شيء ، أكاد أسمعها ، لم أفهم شيء لشدة الهدوء ؛ فقط صدى سقوط الدمع ، عبارة واحدة قد سمتعها ، كأنها تقول " دللول ، دللول .. عبد يمه دللول ، دللول ، دللول"
سألتزم الصمت لا أنوي أيقاض صغيرها ؛ لذا سيكون للنص بقية ... سيخبرني بها رجل هاشمي يعلم جيداً ما أجهله عما قالته هذه المرأة
إنها شريكة الرب في كلمته ؛ شريكته في الحسين .
أبو الرباب المياحي
سمعن بجي بليل الخرابه
وكل فاكد تذكر مصابه
فزعت ركض أم المصاب
هاي البواجي من الرباب
راح أبنها .. راح أبنها
######
دنت زينب للبواجي ودمعه بالعين
يا رباب على التراب إنتي شترسمين
حرت يختي على الرمل المن تلولين
بمشهد دموعج أشوف منازع حسين
ضميها العبره .. لا تبجي الأسره
انتي اخر ذكره .. من الضامي
أنا بمصيبه وراح خدري
دموعج ترد شوغات عمري
كومي يخيتي من التراب
هاي البواجي من الرباب
راح أبنها .. راح أبنها
######
عمره مو مالت بواجي مناغه كون
ومو مهد كاروكه ما بين الجفون
برمش لوليله رباب بهيده كون
خشن جفج خاف ياضي العيون
شحال اللي يشوفج .. تركضين بخوفج
الياذنه جفوفج .. مابين خيول
يا كسرتي بموته تعذب
جم مره بالحافر تكلب
ومن صدره ثكلان السحاب
هاي البواجي من الرباب
راح أبنها .. رح أبنها
######
مدري اصبرج مدري أصبر روحي بيج
مدري انعه حسين مدري انعه عليج
مهد أدري العالرمل بالحسره ذيج
كماط لو بحبال مجتوفات أديج
الكماطه متونج .. وكاروكه عيونج
شينومه بدونج .. حدر الخيل
خافن يفز والليل ظلمه
وميهيد إله تناغي أمه
ناغيله هلبت بيه جواب
هاي البواجي من الرباب
راح أبنها .. راح أبنها
######
التمن بنات حسين كلهن يمها
وزينب بدمعتها أبتدت مأتمها
أم وتواسي وحيدها الشيمها
ليلى على الأكبر رمله والقاسمها
شيواسن منها .. وشنهي يسكنها
والرايح عنها .. ما ودع أمه
كون الموادع مثل الغروب
كلما تودعه يردلك أنوب
تبخر حلمها مثل السراب
هاي البواجي من الرباب
راح أبنها .. راح أبنها
######
اليفارك إبنه وهو ذخره لشيبه
حصته الليل ودمعته ونحيبه
أنطر الطيف اليمر بيه ويجيبه
حته أشكيله واكله أمك غريبه
ضليت بحيره .. اشكي المن غيره
مايدري اسيره .. وعالهزله الرباب
هلبت يفز ويكلي يمه
ممشاج بين أجناب زحمه
عوده الطري تمنيته شاب
هاي البواجي من الرباب
راح أبنها .. رح أبنها
######
أبو الرباب المياحي
#######
سارت وعيني تصد عالقافله
و ودعتهم مو وداع مدلله
أنا بت ركن الشيم والمرجله
أنا العليله .. أنا العليله
###############
إذكرت أيامي الكبل متروس داري
بين ليله و رمله من يخلص نهاري
أفز وألكه حسين أبويه بإنتظاري
كالوا مصلايته رمال الصحاري
وبلا نحر صلاها أبويه النافله
أنا بت ركن الشيم والمرجله
أنا العليله .. أنا العليله
##############
ذكريات ببالي مرن عن قبل
مناغه أذكر للرباب وللطفل
وإسمعتهم حضروا نوك الهزل
سهل حالي بس وضعهم مو سهل
شطوله درب السبي برفكة حرمله
أنا بت ركن الشيم والمرجله
أنا العليله .. أنا العليله
################
بعده ما أبعد وأشوفنه الضعن
مدري أصبر روحي لوصبر المشن
اليوم وي حسين راحن لو إجن
مجتفه بهزله ترد أخت الحسن
الخدر فارك بيته وأبعد عن هله
أنا بت ركن الشيم والمرجله
أنا العليله .. أنا العليله
###############
إحنه تربات الوحي وبيت الخدر
خذت من أم الحسن طبع الصبر
أنا أصبر بس اليرافك شمر
أبد ميلوك العفاف ويه اليسر
شيفض ذاك الدرب وشيحمله
أنا بت ركن الشيم والمرجله
أنا العليله .. أنا العليله
##############
جم سؤال ببالي ما حصل جواب
المهد محروك شتناغي الرباب
شلون زفوا جاسم لحضن التراب
ببالي يعرض مشهد بشكل السراب
و مشهد وداعه ويه رمله أتأمله
أنا بت ركن الشيم والمرجله
أنا العليله .. أنا العليله
##############
حسين جم نبله اللي صلت عالنحر
كلي جم حافر على ضلوعك عبر
شلون غطت عمتي ذاك الأثر
أثر سوط بيوم مرت عالنهر
موادع العالناكه صعب أتخيله
أنا بت ركن الشيم والمرجله
أنا العليله .. أنا العليله
##############
ردت أشوف حسين لورد للخيم
إلج زينب خويه مرسال السهم
هذا من عينه وسهم ضل بالعلم
مات أخوج بسهمه ماظن من ألم
لأم أخوها السهم ريت توصله
أنا بت ركن الشيم والمرجله
أنا العليله .. أنا العليله
##############
بتكوه يا خويه ردت أتلكه حيد
أي يبعد إختك بعد عالجيش زيد
مثل جدك يا علي تطوي الحديد
وبالركب لفه مثل طوك العبيد
وعيد صفين الصميده بكربله
أنا بت ركن الشيم والمرجله
أنا العليله .. أنا العليله
#################
أبو الرباب المياحي
################
تعبانه .. عبد الله بعد مابيه حيل مناغه يبني
تعبانه .. گظن عشريني توها وضهري محني
تعبانه .. جمره بكلبي بس بردان حضني
تعبانه .. أدفع مهدك وأتخيل وياه
يردك من يرد شوكي ذبحني
ترد يمه لحضن أمك
لو مالك بعد رده
حل يمه وكت ممشاك
وكت فركاك لا بعده
يزغير على نبلتهم
أبوك وما حمل جبده
شجاب النبله يم نحرك
بالفاس أكطعوا ورده
أنا وكل ظني أعد خطوات من تمشي
ليليه الدمع يمه يفرهد شوفي ورمشي
حسبت ممشاك والضحكات وكلشي
بس بهاي لا ما حسبت يمه
عبد يمه عبد يمه يمه
أشيلن نعشك وأنت متن نعشي
ذبحني الشوك يمه .. وكلبي محروك
ذبحني الشوك يمه
وحز كلبي فراكك .. من العروك
ذبحني الشوك يمه
ذبحني الشوك يمه .. وكلبي محروك
ذبحني الشوك يمه
########
ملجومه .. زغيره احلامي بس جان السهم أكبر
ملجومه .. يفشلة تعب عمري الزرعه ما خضر
ملجومه .. المانزلته من متني عفته بلا هدم بالبر
ملجومه .. سؤال ببالي راسك ياهو حزاه
وسيفه شلون حصل بيك منحر
ملمس جفي أنا يعورك
مو حزة خناجرهم
زغير على الذبح يبني
ما تكسر خواطرهم
كافي عليك ثكل الكاع
داسوك بحوافرهم
راسك عالنبل مشيول
طافوه بشوارعهم
هاي اول مره أحس روحي يتيمه
من أشوف وليدي عالنبله غنيمه
بلا كلب ذباحك ولا عنده شيمه
انطاني راسك بالسبي شلته بديه
ووين انومك يمه وأنا بلايه خيمه
عبد والناكه عثرت .. وسطت السوك
ذبحني الشوك يمه .. وكلبي محروك
ذبحني الشوك يمه
########
مهضومه .. و حك رباي اريده بجلمه اليمه
مهضومه .. لا صوته سمعته ولا حجه بكلمه
مهضومه .. عبد فطمته النبله حضني شيفطمه
مهضومه .. أبوك حسين ضل لا ناصر وياه
وما كبران وينصره عزيز أمه
سمعت يبني من حسين
ما متحملك مهدك
كل ما صاح اريدن عون
تطيح وزينب تردك
نحنه ضهره على الكاروك
مو مالة ذبح بعدك
يعينك الله ها يحسين
آخر دمعه إله بزندك
يعينك الله نازع فوك متنك
و شهكاته الاخيره كبرنك
خذاه الموت ذاك الترس حضنك
ومن حرة صوابه حل الكماط
وتلكه بنحره السهام الأجنك
كلت كلبي الحسره .. كماطه مشكوك
ذبحني الشوك يمه .. وكلبي محروك
ذبحني الشوك يمه
########
عطشانه .. وما يرويني ماي وأنت ضامي
عطشانه .. ودللو يا نبلته بالمهد نامي
عطشانه .. الك عطشانه إذا تسمع كلامي
عطشانه .. وصار هواي عيني مفاركه النوم
انامن يمه إذا تلفي بمنامي
رد يمه المهد خالي
ومشتاك لمناغاتك
اريدن من ارد للبيت
تتلكاني ضحكاتك
أنا بحلمي شفت بزرك
أنا وعديت شيباتك
ولوليت لبزر بزرك
وعرفن حلمي عماتك
يبجن عالهزل لو الك حنيت
رد وأترس أحلامي وكلي رديت
ومن أرجع عبد الكاك بالبيت
يموت الماله أمل والطفله مذبوح
بخلافك ييمه بذله ضليت
متت يوليدي ضامي .. وبخيل مسحوك
ذبحني الشوك يمه .. وكلبي محروك
ذبحني الشوك يمه
########
دللول .. يمهد وليدي يالخالي دللول
دللول .. أمك مو عدوك نايمه بجول
دللول .. و راسك عالسهم يوليدي مشيول
دللول .. آخر مره الوليك عبد يمه
باجر بالسبي أمك يمدلول
هذا اخر سهر يمه
وآخر مره الوليك
وما رفت عبد يمه
إيدك وأنا اناغيلك
أشمك وين والحافر
ضيعها تفاصيلك
نام بسرعه لا تسهر
ضايع بالسحك حيلك
شلون الولي لمهدك ومهدك خلي
وشلون مو جفك يجدم محملي
شلون عالغبره أعوفن كل هلي
توني يمه عرفت لوعة فاطمه
حسين توه عاشها غربة علي
الذله بيوم شفت .. المهد مبيوك
ذبحني الشوك يمه .. وكلبي محروك
ذبحني الشوك يمه
########
أبو الرباب المياحي
########
قريتك .. حرز لايامي ولسنيني الثكاله
ولكيتك .. أمير برمحه ويعاين دلاله
هويتك .. أنت سري ومنفضح سر الثماله
يريتك .. كون ما عطشان ما مر بيك خيل
يجرحي .. عمت عين الحافر شذلاه حاله
ها يشيخ العطش موش ولامك
وليش فاركها الحنان خيامك
وليش عاري ووين جا هندامك
وين صيت الخضره ذيج العالمتون
وليش تتراكض ببيده ايتامك
عطرك شبداه كلي
تنازع أنت لو تصلي
بموته سبح ربه مشتاق لوصاله
#######
وجوباً .. أنا صياري لخاطرك والعله
أنوحن .. على الدمعه الطاحت على التله
واموتن .. لمن أسمع بيك مرت ذله
يروحن .. شلون مسبيات علوياتك
هضيمة .. وداع زينب من تمر عالهزله
شلون خدرك يطر ذيج الهيمه
شلون تغفه الحرمه مامش خيمه
زحمه أشكي لزلمه مات بضيمه
بس أظن يومين ما نامت أم عون
تلكه حرمه تضيع من عدها يتيمه
ضلن بعازت عزيه
عليك ما ناحت سبيه
ينجلد هالخارجي كلمن بجاله
#########
غريبة .. الينذبح عدها أخو وتبجيله
مصيبة .. الكضوا كلها إخوانها بفد ليله
يشيبة .. برمش اخيته البالرمل تغسيله
يهيبة .. وشيخ هاشم والحسن عوده واخوه
عليمن .. و بحصيره ينجمع ونشيله
بياذنب يا ثار هالمنك خذوه
كلي جم سائل المنك يتموه
الثوب ضايع جان وبجسمك لكوه
و حته إذا مبيوك ما يتسلب
المشكله أدري بثوبه ميراث من أبوه
اقتلوا خير العمل
يا لثارات هبل
و ثار هدم أصنامنه من عياله
########
يخيمه .. وكون بيها اليستضل بفيايه
حريمه .. لا رايه حمره اندكت ولا ثايه
هضيمه .. حسين مات بيوم شاف الرايه
يتيمه .. واليهوس بيها مو عباس أخوه
يشوفه .. بلا نحر مجفي على المسنايه
حسين شيصبره ويرد للعيله
ومحني ضهره ومحد يتجيله
عنه راح لفكده ضل يشكيله
زحمه عالخيال لو ضهره أنجرح
أنكسر ضهره حسين ونهد حيله
تمدد بنص البيده
وطاح الحسام من ايده
وإستبشرت دارت عليه خياله
#########
يجرحك .. حسرة الأكبر علي بلحظة وداعه
يذكرك .. القاسم بجده محمد والشجاعه
يعورك .. النوه لسفره وراح وعيونك متاعه
شيصبرك .. من ترد لخيمتك تلكه الرباب
شتكلها .. كماطه حله وشابك بمتنك ذراعه
بحزامه سيفه أبني يريته
وحته مهره تخيريتيه
ابنج يخدري ضامي ورويته
ولمن ردت ناصر اليه
من مهده طاح ويبجي لكيته
ربابي أسنديني
مات كبال عيني
بطوله ما واكف ولا شفته خياله
######
( رباطات )
نازع فوك متني .... وغمض عيونه
نازع فوك متني .... وغمض عيونه
المجان البيه أشمه .... السهم صاباه
المجان البيه أشمه .... السهم صاباه
لأن بمتوني موته .. ضحكن عيونه
لأن بمتوني موته .. ضحكن عيونه
######
أبو الرباب المياحي
يا طرف غيمه ، و أترف من الغيم جفك
يا نبع ربك ، نزف كوثر مو دمه جرحك ونزفك
يا شذر رحمه ، واليتامه تضوك ربك يا علي بعطفك
يا مثل طه ، وبس علي و ربه وعلي يا علي يعرفك
يا شريج الله بحنانه وعطفه
يالبنه الإسلام كله بجفه
ياللي من عينك خذوا للكهوه صيت
يالسمارك كمره ياهو يوصفه
ياللي عد ربك لكيت إسمك جبير
شلون مو أول علي تصير الأخير
يموت كافر لو نبي الميعرفه
يا ولي و والي .. يا علي العالي
يا علي
################
يا جذر سره ، بيك حيدر يبتدي سر الإله
باطنه وأمره ، بيك وبإسمك علي زين سماه
دل في ذاته ، بذاته يا ذاته علي دل علاه
يا صنيع الله ، وباقي هالأرواح من صنعه الوراه
ياللي لون الليل فكره من العيون
والنجم شامات والسبعه الجفون
والكواكب كلها يم جيدك تصير كلاده
محراب طولك والملائك يمك يسجدون
والشمس ثغرك لفاطم لو بسم
{ وَالشَّمْسِ }
وبضحكتك يا علي ربك قسم
يوسف ويعكوبه بالحاجب يهيمون
يا ولي و والي .. يا علي العالي
يا علي
################
يا كنز ربه ، ببيته ضم كنزه لمحمد عونه
يا ذخر طه ، وبيك طه يا علي خيعونه
يرهب بطوله ، طوله جان الحسن ويخافونه
يا دخيل الله ، جان أبو سكينة سمار متونه
و عباس جان بخزرة العين
ترهب عيونه عدال جيشين
كبله إسمه حيدر يدخل الجيش
يطر المعسكر إسمه صوبين
جبريل فد مره دخل كدامه
تيه العركه وسجد يم الشامه
شامه بوجنتك أم الحسين
يا ولي و والي .. يا علي العالي
يا علي
################
يا كبر كلبك ، ياللي رخصت الذهب بعمامه
يا حنان الله ، ياللكيت الله بسواد لثامه
بحرب ما شده ، علي بس للفقره شد حزامه
الحرب مو شده ، الشده لو طفله بجت كدامه
علي وحدر الثوب مشدود الحجر
الزجر طفله بدينك وبإسمك كفر
علي سفرة بيتك تشبع سلف
حسينك ليا سبه بجوعه فطر
علي تجوع الزهره والزهره حريمه
ليش خبزة زينب بجف اليتيمه
وفوك بطن الحسن للصخره أثر
يا ولي و والي .. يا علي العالي
يا علي
################
ها يدين الله ، علي العروة الوثقى والحبل المتين
يختلف لونك ، مثل دينك ما قريت ل الله دين
مستحب عندك ، الصلاة والواجب الماله معين
تكرم بكلشي ، عاليتامه توزعه مهر أم البنين
أنت ربك خالقك إلنه ثواب
ماي من جفك أظن نهر الشراب
مدري شمسوين ويجازينه بيك
مدري من عطفه إله خلاك باب
واليريد الله وجوب يكصدك
أنا أعبدك رب علي اللي يعبدك
كافر أنا بدونك وديني سراب
يا ولي و والي .. يا علي العالي
يا علي
################
أبو الرباب المياحي
################
هنا يمن شلت النعش
شيع الولي بهيده
بهيده واريه الثرى
وبهداي فل قيده
ثكيله حيل السلسله
وسنين صار مشدده أيده
نحفت عظامه من الثكل
ياريت شالنهن أديه
ياريتني أنا البالسجن
وانا العصر جبدي الحزن
وجنازتي وحشه لأن
جتالي شيعني وبجت .. عينه عليه
على المسموم .. وا ويلاه
وا ويلاه وا ويلاه وا ويلاه
#########
بنعشه لتمر عالجسر
لا ينرمي التابوت بسهام
ولتمره من يم القصر
لا يذكر المسبيه للشام
لا يذكر مراكض حرم
ومراكض النيران بخيام
غربه وجرح بس مو جرح
مثل السبايه وكربله مامش رزيه
ما ضاك حافر لا عطش
صح غربه بس عنده نعش
ومو وحده بليل إهدعش
ولا سلبوا ما مرته ، بناكه سبيه
على المسموم .. وا ويلاه
وا ويلاه وا ويلاه وا ويلاه
#########
وأنصبله موكب بالدرب
و شـَّيعه ويه المشايه
وغـَّسله بماي العلكمي
ومو جفن لفه برايه
ولا تبجي يمه لغربته
لحسين سوي قرايه
خلصن سنينه البالسجن
نوح وبجي عالغاضريه
سهل السجن بس مو سهل
جرحه المشن فوك الهزل
يذكر حرمهم والحبل
واحد ومن .. زينب لخوله لرقيه
على المسموم .. وا ويلاه
وا ويلاه وا ويلاه وا ويلاه
#########
بسرعه شيلوا جنازته
لا ينرمي الجثمان برماد
ليوصي ليظنوه هجر
ومنظر محمد بيه ينعاد
وشموع نشروها لأن
شايل كمرها اليوم بغداد
منظر الظلمه يألمه
ويذكر مصيبة فاطمه
لحد الولي عرش السمه
وبالسمه مأتم والنعت .. جرحه الزجيه
على المسموم .. وا ويلاه
وا ويلاه وا ويلاه وا ويلاه
#########
أبو الرباب المياحي
#########
أختنك بيت الله باللات وهوه العزه
وضج سواده وضاق صبره وما إحتمل
نذر هو يطوفها لو نسمة هوه من الله تمره
ويشهك الله بريته ، ويزفر بقوه هبل
يا سموم أصنامهم لوثت روحي
رايد من الذات نسمه ، حل في قلبي الأجل
وسبح من أدم لعيسى ، ما حضه بنسمه على كده
وللعتيق بليس وسوس ، أوكف هنا ، ما قبل
وصل يم أسمك محمد وبده بتسبيحة الزهره
يا محمد يا علي ، يا علي يا علي يا علي
مامش أقرب لله منك ، بذكرك أتقرب أيا خير العمل
هنانه الله أنطاه هواه ، وما تحمل
شوكه طر حيطان كلبه وسبح لربه بعلاه
هنانه حته بليس ساجد ، للهوه وللنور هذا
من أهد ما طاووس جان وهو مشتاك لهواه
وبده بيت الله يسبح ، يا علي ، يا علي
وسجد جبرائيلها وسجدت سماه
وسجد هذا النور لله ، والملائك والوجود
وكل نفس بالكون ضل ساجد وراه
هنانه دل النور ذاته ، وقر وجود النور ربه
وعرفوا بهالنور مو هو الإله
فكرة الياقوت من عينه بدت والزمرد طرف جفنه
أظن لو شافه حواري ، الله هذا وعيسى إبنه
الذات دل ذاته بذاته ، وخلق من نوره صفاته
حقهم يسجدونله وحقهم يحسبونه رب
أدم بتفاحه واللهفه خذته ، وعصى ربه
وعلي بالاشباح صايم وبيده كوثر ما شرب
يدور أبناء السبيل ويحفظ وجوه اليتامه
وخبزت الزهراء بأول عالم تحضر خبزهم
وخاف لا ينساله واحد ، علي حط أسمه علامه
ولذلك جان حيدر ، حافظ ورازق وللوادم حرزهم
نزل مره لفلك نوح ، وأضلم الكون بجفاه
هالشمس لمعة عيونه , علي بالسبعه شمسهم
جان جبرائيل من ينزل بأيه ، يبقه حاير
أكو نورين يم الله يصلن وأنزل للبيت النبي وهمه نفسهم
أبو الرباب المياحي
دللولج بدت حسبيهن حساب
ست أشهر يضل متروس مهده
وراها تحضري يا روح الحسين
حلم عندج تلولين على لحده
وكبالج وليدج راسه مرفوع
بسهم والدمه حار ويجري بعده
وأمنيتج لسهمه بس تلولين
وسبايا والحبل من وحده لوحده
وحيره تجيبج وحيره توديج
الصبر مريود بس الشوك شده
أصبري ؟ شلون وإنتي كبالج حسين
برمح مرفوع والدمعه على خده
أعذريني رباب بظنتي أرويه
شفته من العطش ممرود جبده
وأنا شفت السهم لمن كبل ليه
ولا أكدر أحضنه ولا أهده
أهده يضيع بين النار والخيل
وحضني ودار فوك الركبه زنده
عميه عيوني شفت وليدي الزغير
مواعد موت وبيه لهفه على وعده
حضني وعينه إلج ويا محله العيون
عبد ، وسبحانه الخلق والصاغ عبده
الثغر ثغر الحسن وعيون عباس
وملامح هيبه جنها أوصاف جده
بيه رحمة محمد لجن الطول
ما لحكت أشوف الطول حده
رغم ذبلان عوده ويابس الدم
بس أدري بخيالج بعده ورده
بس ما خضرت يا هضمة حسين
بوردة روحي اليوسف يحسده
لوليه رباب مبارك بطيف
وأحفريله كبر كون على كده
بسندانه أدفني وليدي الزغير
وكل عاشر تجي النبله تحصده
- مبارك للرباب مولد حسينها الأصغر
- مبارك للحسين مولد تذكار الرباب
- العزاء للمهدي ميلاد جرحه الأكبر
- أبو الرباب المياحي
أخي .. عوف ديوان الهواشم
أخي .. وأحمل بيمناك صارم
أخي .. هذا أخوك حسين نايم
حسن .. أنا أحاجيك الوديعه
حسن .. ضامي اخيك عالشريعه
حسن .. تكلب الخيل برضيعه
يا زهراء .. يا زهراء
أخي يا حسن .. ريت وافتني المنيه
أخي يا حسن .. أختك مشت سبيه
أخي يا حسن .. صار أسمي خارجيه
زينب يخوها .. حسن
خلافك سبوها .. حسن
صلى الله على .. الحسن إبن علي
#############################
أخي .. الريت أشوفن زوده
أخي .. يشيم أخيك عوده
أخي .. جا ما فكدها زنوده
حسن .. جا تحير بأمره
حسن .. الجيش طر تطره
حسن .. تلاثه ولد الزهره
يا زهراء .. يا زهراء
أخي يا حسن .. لكافلي أنطي العلكمي
أخي يا حسن .. العركه عيد الهاشمي
أخي يا حسن .. كلي خويه تشيمي
يالسمره زنودك .. حسن
شيمني بزودك .. حسن
صلى الله على .. الحسن إبن علي
#############################
أخي .. ريت بالطف حاضر
أخي .. جا منيتهم العاشر
أخي .. ويعثر الحافر بحافر
حسن .. جان شيمت الزجبيه
حسن .. تحير بيك الغاضريه
حسن .. بيدك تصير المنيه
يا زهراء .. يا زهراء
أخي يا حسن .. وتجيم لدلالك بنحور
أخي يا حسن .. وأسمعها تهلهلك حور
أخي يا حسن .. وتعزب موته بعاشور
عود الزجيه .. حسن
ويحامي أخيه .. حسن
صلى الله على .. الحسن إبن علي
#############################
أخي .. محيره أختك يا ولي
أخي .. و كبالي راية كافلي
أخي .. تنسبي بنيت علي
حسن .. تناسيته جبدك والطشت
حسن .. أعذرني لمن حشمت
حسن .. حسبالي حي وما متت
يا زهراء .. يا زهراء
أخي يا حسن .. ما ضل راي ولا شور
أخي يا حسن .. من ديره لديره ندور
أخي يا حسن .. حسينك ضامي ومنحور
مجتوفه اديه .. حسن
زينب سبيه .. حسن
صلى الله على .. الحسن إبن علي
#############################
أخي .. بالخطوه الأولى تعثرت
أخي .. يا عودي بيك شحشمت
أخي .. يا ريتني أنا اللي متت
حسن .. ناموسك أنا وشانك
حسن .. العضمه قوه بديوانك
حسن .. يسبينه رد لإحسانك
يا زهراء .. يا زهراء
أخي يا حسن .. علويه تلوذ بعلويه
أخي ياحسن .. مسبيه تواسي بمسبيه
أخي يا حسن .. والغربه تعاين بيه
يا خويه تدري .. حسن
بالغربه كبري .. حسن
صلى الله على .. الحسن إبن علي
#############################
أبو الرباب المياحي
#############################
حسين وداعتك ما همني شي بالكون
بس ما أمشي إلك مولاي بالله شلون
شكل لجرحك ونحرك
المرض نساني ألم خدرك
أهم بجروحي وأنسه اليوجعن بيك
عمت عين المرض وأبعدني عليك
وعمت عيني أهم بروحي وأنساك
وعلي كابوس أضوكن طعم فركاك
جرح ما أريد أعيشه ولا أمر بيه
يمر بيه الضعن بس أنا ناسيه
أفه يا روحي والله
نسيتي صواب عبد الله
ونسيتي الجانت تلولي وتناغيه
عادي الحيل يخلص شلي بالحيل
كون بحيلك وأنت حدر خيل
هم ألطم عليك وجرحك أبجيه
بس منك أريد العون
ماريد أحسد اليمشون
أريد أمشي مثل كل عام والرايه
ترف وياي من الفاو مشايه
ما أريدن فرق خطوه خساره
و لا أريد أنحرم من الزياره
أريد من أوصل أعتابك
تكلي وليدي شجابك
و أريد أتشيم كبالك و أواسيك
نسيت اليوجعني وجنت أهم بيك
كلشي ولا سواد الوجه يمك
وحك جرحك وحك بسمار أمك
وعلي خجلان منك بويه يحسين
وأنت أرحم و أحن طلاب دين
وكت خله الخلك تلطم وأنا أتكتر
وكت وبمجلسك يحسين أتعذر
يعمن ريت العيون
ما أمشيلك شلون
أريدن هالشهر منك .. وعساني بالشلل عكبه
أهو فراك الوطن هين .. فراك عيونك الغربه
ضمان منيلي وأمشي بعد عام
وبعد مره أواسي المشن للشام
أنا الما عاد عمري من الولاده
حسبته من لطم وأعلن حداده
شيطلع الفجر وبراسي ألف حساب
أخاف الموت لا باجر يوازيني
وبعد صدري لطم ما شابع ولا شور
وبعدهي من البجي ما بطلت عيني
أول مره أخاف الموت وأنت أدره
شحلات الموت كون بحضرة الزهره
وأموتن بالمشي لو بالمجالس
وسواد عليك حتى بكلبي لابس
تخلص ما تضل هنه البقن ساعات
كاتب هالرساله ضل عدل لو مات
وصيتي على الرباب بجادري تلطمون
وعساها بالعمى لو تبجي لإجلي عيون
يبجي على الرباب الراد يسليني
الما يهديلي دمعه عليها ناسيني
يفرحني الذكرني لو ذكرها
وذكر من الخيم ركضة خدرها
وأجيت بباله من يحجي بعشكها
ولو موجود هسه هدومه شكها
وذكرني شلون تسعدني القصيده
إذا جابوا إسمها وصحت عيده
الثواب بجادري دمعات خلوه
ولتهدون جادر بل أحركوه
وأركضوا بجادري ما بين نيران
وعيشوا شصار من ركضن النسوان
يربعي أنا بثوابي حبوا الحسين
عشك يا ريت من كون بخساره
وفي وكلش وفي صويحبي كون
يهديلي لو مشه خطوه بزياره
#############################
- قد تكون الأخيره إلا إن أراد الله أن أمجد ذكر سلطانتي الرباب لعام أخر .. أسألكم الدعاء بعد أيام موعد عمليتي الجراحيه وقد يكون موعداً لإنكسار قلمي فأرجو من أصدقائي خدمة الحسين من الشعراء أن يكملوا رسالتي ، منكم من يعلم شيء عن أحلامي في أحياء ذكرً قد دفن .. أحيوا ذكر الرباب فهي مظلومه .. جزيتم عن الحسين خيراً .
أبو الرباب المياحي
#############################
