67
کەناڵے شێعرەکانے ناسرخزرپوور(راوێژ)
شینی کارۆ
مامۆستا ڕەسووڵ خزری ( قەلەندەر )
بە خوێندنەوەی شێعرەکەی مامۆستا قەلەندەر
هاو خەمی خۆم ڕادەگەیەنم ــ
ڕوحی کارۆ کوڕی خۆشەویستی شاد ــ
سەبر بۆ کەس و کار و بنە ماڵە ـ خزم و ئاشنا
بچووکتان #عومەرڕەسووڵی ــ مهاباد
چاوت کە گەلاوێژی پڕشەنگی بەیـانانە
نیشانەیی دەسپێکی فێنکایی دڵ و گیانە
چاوت سەدەفی دەریا، پاکانە لە بەر چاوە
مەڕوانە لە عەرزی من پڕ ژەنگە لە تاوانە
چاوت کە بە شەو هەڵدێ، هەڵدێ لەبەری ئەختەر
ئەستێرە لە ڕووی چاوت شەرمەندەیە خوسرانە
باڵات کە چنارێکە سەر بەرزە لە سەر عەرزێ
گەشتۆتە حەوێق چاوت یا مانگە لە ئاسمانە؟
بسکت شەوی تاریک و دەیجووری چلەی زستان
ئەو خۆی شەوی یەڵدایە یا عادەتی وەک وانە؟
وەک سروە لە من دەشنێ، جا سروە هەناسەی تۆ
پێموایە شەماڵ ئەنگووت گوڵ غونچە لە مەیدانە
#ڕاوێژ_خزرپوور
@rawej1
لە بسکی ئەو دارەبییە بڕوانە
ئەویش دەڵێی بۆ بسکت چاوەڕوانە
سەرنج بەرە لەم دارە سەربزێوە
شوێنی شانت، نیگارێکە بە وێوە
هەتا بگەین بە خۆشیەکەی ئێوارێ
ڕاتدەسپاردم بۆ سێبەری بن دارێ
دەڕۆیشتین، هەتا بن داری گۆرین
بە خێرایی، تا باخەڵان وەگۆڕین
وەبیرم دێ؛ بەسەر قەدی ئەو دارە
پاڵمان ئەدا، هەتا تەنگی ئێوارە
ڕۆیی وەرزی ئەو شەمامە چنینە
لەو بێستانەی پێگەیشتووە لە سینە
ڕاوێژ خزرپوور
@rawej1
کەس نازانێ با لە کام کونەوە دێت!
کەس نازانێ باران لە کام دەریا هەڵدەستێت!
کەس نازانێ بەیتی مێشێ کەنگێ تەواو دەبێت! کەس نازانێ دوایەمینی ڕیزی مردن کێیە!
کەس نازانێ ئەوەی لە دایک دەبێت چەندە دەژیت!
دایکم دەیگوت: "کەس دەفتەری بۆ ئەوەڵ و ئاخیر نەگرتۆتەوە."
بابم دەیگوت: "گیسکەڵە، ئەگەر زانیبای زستان کلکوەشێنە، قەت گاڵتەی بە زستان نەدەکرد!"
کەس نازانێ دڵی کون کون چۆنە!
نازانێ جەرگی سووتاو چییە!
#ڕاوێژ_خزرپوور
@rawej1
سەفەر
دەستی سەفەری گرت و وەها ڕووی له خەتەر کرد پشتی له من و ڕووی له هەوای گەشتوگوزەر کرد
پەنجەی پەمەیی ساکی لەنێو دەست و به ئیشتیا
خۆی نوقمی خەیاڵ و هەوەسی بێسەروبەر کرد
کانیاوی بزه ویشکه لەسەر لێوى منى وێڵ
دنیای دڵی من چۆڵه که ئەو ڕووی له سەفەر کرد
زۆرم تەقەلا کرد و بەڵام حاڵی نه بوو بۆم
گاڕاج و تڕۆمبێلی خەیاڵاتی نەزەر کرد
ڕۆیشت و سەرای ئەشقی منی کرده کەلاوه
بێ چوونوچرا ماڵی دڵی تووشی کەسەر کرد
"ڕاوێژ" بەتەمای ماوەتەوە بێکەس و تەنیا
هەربۆیە "جەلال" تەرکی کچی "ئوموبەشەر" کرد
#ڕاوێژ_خزرپوور
@rawej1
دوو شت، لەگەڵ خوێن و
دەمارم ئاوێتەن؛
نووسین، بە زمانی کوردی
دەرکەوتن، بە جلوبەرگی کوردی
دوو کەس، هەمیشە ڕۆژیانە؛
دایک و زمانەکەی
کورد و جلکەکەی
#ڕاوێژ_خزرپوور
@rawej1
کە ترپەی بارانی نیگات
لە سەر کێڵگەی هەستم
کپ بوو
ئەم بێستانەی ساوای دڵم
بە ئافەتی خەفەت
کون بوو
کە تۆ شێعری دابڕانت
بە پێنووسی بزە نووسی
من دیوانی دەرد و ژانم
دەخوێندەوە
لە سەر مێزی نەرمی شەتاو
به درێژایی
تاڤگەی هەڵچوو
لە کوێستانی سەرکێشی چاو
#ڕاوێژ_خزرپوور
@rawej1
٢ی ڕەشەمەی ١٤٠٢ی هەتاوی (٢١فێوریە٢٠٢٤)
چالاکی بنکەی ئەدەبیی سەردەم لە سەردەشت:
١-بەرز ڕاگرتنی ڕۆژی جیهانی زمانی دایک
٢- یادی ٣٣یەمین ساڵوەگەڕی کۆچی مامۆستا هەژار موکریانی
۳ـ ڕێزگرتن لە مامۆستایانی وانەبێژی ڕێنووس و ڕێزمان
٤ـ دابەشکردنی بڕوانامەی سەرکەوتن بۆ فێرخوازانی ڕێنووس و ڕێزمان
شوێن: هۆڵی ئیڕشادی سەردەشت
@rawej1
تۆ کە ڕۆیشتی ...
تۆ کە ڕۆیشتی وەری پەلکی چڕی داری وەتەن
زێدە بوو لشکری زاڵی غەم و ئازاری وەتەن
پیرەدار بەرگی ڕنی، هەور و هەوا ئەسری ڕشت
ڕووت و بێجلکە ژیان، لیخنە ڕووباری وەتەن
ڕێ چەمی، چەم شڵەژا، ڕاچەنی مەیدانی خەبات
تا حەوێق ڕۆیی غەم و ناڵە و هاواری وەتەن
تۆ کە ڕۆیشتی شکا پشتی چیا و دەستی هومێد
نێوکی چوو بەندەنی سەرکێشی مەرزداری وەتەن
خۆر لە بێتۆیی وزەی تیشکی لە پشت هەورانە
بۆیە تاریکە زەوی، جلڕەشە نازداری وەتەن
زامی کاری لە دڵی بەردی چیا بێ ئەسەرە!
سەختە زامی سەفەری عاشقی دڵداری وەتەن
پێم دەڵێ؛ بەسیەتی مەگری، مەکە هاوار و فیغان؟
چونکە قوربانیی دەوێ پەیکەری باشاری وەتەن
#ڕاوێژ_خزرپوور
ئێستا تۆ کەسێکی تری و
من شارۆمەندێکی غەریب
بەو حاڵەش،
بۆ ئاوڕدانەوەت.....
بۆ ئاوڕدانەوەم دەگەڕێم!
ئەی یار!
ئەی یار، کە بە زوڵفت سەت بەندیی دەخەیت و
سەت دڵ دەستەمۆ دەکەی
تاڵێکت ڕایەڵە و
لەچەشنی کەمەند
دڵی یاغیم بۆ بگرەوە
من دەمێکە، نە بۆ هەڵوەشان؛
بۆ گرێدانەوەم دەگەڕێم!
#ڕاوێژ_خزرپوور
@rawej1
ئێستا تۆ کەسێکی تری و
من شارۆمەندێکی غەریب
من لەچەشنی هەڵوەدایەکی دوای کۆچ، لەشوێن کەلاوەیەک بۆ حەسانەوەم دەگەڕێم
لەچەشنی پەپوولەی سەرەتای باران
ـ نە بۆ بۆن و هەڵمژینی قومێک شەڕابی شیلەیی ـ
بۆ تەڕنەبوون، بۆ مانەوەم دەگەڕێم
#ڕاوێژ_خزرپوور
چی بەسەر هێنام باسی جوداییت
چەند هەناری شکاند شەوی یەلداییت
نوقمی خەیاڵی ڕابردووم ئێستا
شەوێکە و چل شەو دەکەم گەداییت
بە سوێی دوو سێوی لێوی شەڕابیت
سوێم دەکاتەوە ماچی خوداییت
دەستی ڕەنگینی سەر سفرەی چلەت
دوو پیاڵەی چاو و فنجانێک چاییت
پەپوولەی پرچت سەر ئینجانەی سەر
دڵەودڵ دەفڕێ وەک هەڵوەداییت
تا چاو هەڵدێنم نیگات دەنیشێ
لە داری حەز و بەژنی خولیاییت
#ڕاوێژ_خزرپوور
غەزەلێکی هاوبەش؛ کتوپڕی شەوی ٢٣ی سەرماوەزی ١٤٠٢ی ئەنجومەنی ئەدەبیی سەردەم
دەرمانێ نەما، دەردی دەروونی، بە تەما کەین
دەرمانەکە، ناچار، دەبێ بەودەردە دەوا کەین
هەر دەستە، بە ئەقڵێکەوە، کورتە و کەلەلا و کۆڵ
دەستمان لە ئەقڵ بەر نەبوو، تا دڵ بەرەڵا کەین
#ساماڵ_گەنمانی
ئەقڵ و دڵ و دیدە ،کە هەموو دەردەسەرێکن
ئێمەی وەکوو منداڵێ بە کام گەورە بەقا کەین
ئازیز وەرە تا ماوە تەمەن کۆک و تەبا بین
پاپۆڕی وەفا بگرین و هەر پشت لە جەفا کەین
#ڕەبەن
گیرۆدە بەدڵ ماوەتەوە ئەقڵ و، من و تۆش
لەو گێرەیی ژینە بە ئەقڵ تۆزێ بەبا کەین
پێتوایە بناوانی ئەوینە دڵی ئاقڵ
ئەو بێنوبەرە، چۆنە بە دەست ئاقڵێ چا کەین؟
#ڕاوێژ_خزرپوور
دوێ شەو لە گەڕی گەشتی شەوانەم بە تەنێ بووم
یارێ گەیە ئاستم وتی هێواش بە نەدا کەین
گوڵباخی ئەوینی سەرە جێژنانە بەشی دڵ
تارای حەزی سەر باڵی وەفاداری تەما کەین
#قەلەندەر
شانۆیە تەمەن لەو دەمەوە شادی نەماوە
گیڕۆدەیە با دیڵی هەوای نەفسی ڕەها کەین
نامۆیە وەفاداری لە ئەو ڕۆژەوە دادێ
بەو خونچە لەمەی شاردەوە لەو باغە چ ها کەین
#دڵبە_خوێن
تا کەی دەبێ فرمێسکی دەروون بڕژێ لەبەر چاو
بۆ چارەیی ئەو زامە دەبێ ڕوو لە حەوا کەین
با ڕاوی بنێ هەرچی کە ناخۆشییە، خۆشی
حازر کە نەما، نوێژی ئەوینێ بە قەزا کەین
#خۆشناو
دڵ بەندە بە لوتف و کەرەمی وردە نیگایێک
خنکاوە خەیاڵم لە گەمەی سینگ و لەشی تۆم
تەقمانەیە خاڵی لەسەر ئەو تەختەقومارەم
سووتاوە بەهاتم بە تەمای جووتەشەشی تۆم
#ڕوێژ_خزرپوور
غەزەلێکی هاوبەش، کتوپڕی ئەنجومەنی ئەدەبیی سەردەم ١٤٠٢/٩/١٨
عاشق به بزه و لێو و مه‌زه‌ی کوڵمی گه‌شی تۆم
گیرۆدەیی ئه‌برۆتم و ئەو چاوی ڕه‌شی تۆم
جه‌رگم هه‌موو له‌ت‌له‌ت بوو وه به‌و تیری خه‌ده‌نگت
قوربانی وه‌فا و لوتف و سه‌فای سه‌یری که‌شی تۆم
بێژراوە ئەوەی من لە دڵی خۆمی دەچێنم
عالەم بێ بزانن کە مودام، چارەڕەشی تۆم
سەت ماچێ دەنووسم لەسەر ئەو دێڕە لەبانەت
با بەس بێ هەتا کەنگێ ئەمن دوورەبەشی تۆم؟
دڵ بەندە بە لوتف و کەرەمی وردە نیگایێک
خنکاوە خەیاڵم لە گەمەی سینگ و لەشی تۆم
تەقمانەیە خاڵی لەسەر ئەو تەختەقومارەم
سووتاوە بەهاتم بە تەمای جووتەشەشی تۆم
ڕاوێژە لە من بۆتە بەهاری گوڵ و گوڵزار
خۆشناوە دەکا شەو کوتوپڕ، ڕەوت و مەشی تۆم
وەی وەی کە دەکا شانە کەزی شێعری کەمەند کێش
هەستیارە دەڵێ وانە و هەر تەختەڕەشی تۆم
ئەو خاڵە کەوا خاڵی لەسەر ئەم دڵە دانا
گشت خەڵکی دەزانن کە ئەمن سەربەهەشی تۆم
تۆ داوی خەیاڵێکی ئەوین بووی لە سەرمدا
ئەمڕۆ، تەمەنێک لێرە گرفتاری خەشی تۆم
مردم لەبەرت داخی دەکەی جەرگ و هەناوم
بەو تیری نیگات لەت‌لەتی کەی، پڕژ و پەشی تۆم
تا بۆم دەلوێ دێیەوە بەر زوومی دوو چاوم
وابزانە کە من هاوسەفەرێکی برەشی تۆم
(١و٢)-#خوشناو
(٣و٤)-#هەستیار_قەڵاڕەشی
(٥و٦)-#ڕاوێژ_خزرپوور
(٧و٨)-#قەلەندەر
(٩و١٠)-#ڕەبەن
٦(١١و١٢)-#وەستا_قەڵاڕەشی
#خەون
خەونەکانم هەموو زەردن
لەگەڵ پاییز
گەڵای ژینم هەڵ دەوەرێ
بزە و پێکەنینم ماتن
نەبوو بۆ تاقە جارێکیش
لە ناخی دڵ بێنە دەرێ
خەونەکانم بە جێ دێڵم
تازە خەمیان پێوە ناخۆم
هێندە دەڕۆم
تا دەگەمە فرمێسکەکانی دایکی خۆم
.
دەبمە قەقنووس و باڵ دەگرم
دەبمە گڕ و تینی خەیاڵ
دەچمە ناو بێشکەی ساوایی
دیسان دەبمەوە بە مناڵ
خوالێخۆشبوو #کارۆ_ئاسنگەر
کوڕی خۆشەویستی مامۆستا قەلەندەر
@rawej
ئەگەر باری غەمانم سەت قەتار بێ
ئەگەر زامی تەنم ملوێن هەزار بێ
ئەگەر ئەییوبی جەستەم کرمەڕێز بێ
نییە باکم کە ڕووی تۆم لێ دیار بێ
#ڕاوێژ_خزرپوور
@rawej1
🍇 بۆڵوو 🍇
لەچەشنی چاوی بەکلڕێژاوی کچی شۆخی کورد
کە خۆی تیوتیوە داوە بۆ شایی
لە چەشنی شەوی ئەنگوستەچاوی چڕی بارانڕێژ
کە چاو نابینێ تۆزێک تارمایی
وەک بەرمیخەکی بەموورووچنراو لەسەر سینگی یار
قەتارەی لەسەر پەنجەی تارای سپی
وەک ڕیزە یاقووت لە ناخی هەنار
لەوێنەی گەلەئەستێرەی چاوگەش
شەوانی ساوی پاییز لە ئەزمێن
وەک دەستە نێزەک لە تەنیشت زەوی
کە دێن و دەچن جار جار ڕادەخوشێن
وەک بەرخاڵەی کەو قەف قەف لەسەر سینگ
ڕەشبەڵەک گەرمە تا گەرووی کەوێ
ڕوو بە فیشەکی ئافەتی ڕاوچی
لەژێر قەڵغانێک تا بەر نەکەوێ
وێنە دەسحێبی قەزوانی کوێستان
کە ئاوێزانە لە ملی شۆڕەسوار
زەمەند و زەنوێر هەنگاو بە هەنگاو...
وەک تاڤگە شۆڕە تا کۆشی بنار
وەک خاڵخاڵووکەی سەر کڵووکی خەیار
بێستانی ساوای خەیاڵ دەپێوێ
کاتێ ڕادەبرێ بێرەدا ڕێبوار
کەزیی لوولدراوی بووکی بێتارای قەتیسی ساڵۆن
کە هێشتا زاوا دەستی ناگاتێ
وەک دوو گلێنەی ڕەش و گەشی بووک لە چاوەڕوانی،
تا موژدەی هاتنی زاوای دەداتێ
پەپوولەبزەی سەر لێوی بێری کە هەڵدەنیشێ لەسەر لێوی شوان
وەک کونی شمشاڵ کە لێی دەردەچن ئاواز و حەیران
وەک ڕیزە خاڵی باڵی پەپوولە کاتێ دەنیشێ
لە تۆپی گوڵێ،
وەک ئاڵای گەلان کە دەشنێتەوە
وەک فرمێسکی چاو
کە بە ڕوومەتا شۆڕ دەبێتەوە↓
بۆڵوو بە هێشوو لەسەر شانی مێو
خۆی داهێشتووە بۆ ماچی زەوی
سەرچۆپی ڕسقی لە دەستدایە خێو
تا بە ڕەنجی شان نانی دەست کەوی
#ڕاوێژ_خزرپوور
@rawej1
دەستی نەرمی لە سەر و پرچی کڵووک دا شنەبا
گوڵ بە با نەشئە دەبێ من بە هەناسەی سەحەرێ
(ناسر)یش‌خاوەنی هەستە و چەلوبەل هۆشی دەچێ
کە چرۆ گۆپکە دەکا و خونچە دەدا بۆن و بەرێ
#ناسر_خزرپوور_ڕاوێژ
نەورۆزە دیسان چیا ڕووناکە
ئاگرلە لووتکە لە غەم بێ باکە
دەپڕژێ پریشکی کڵۆی ئاگری
بەفر لە داخان یەخەی دادڕی
شەقارە سینگی نواڵ و باپزوو
لینگی هەڵماڵی بنار تا پزوو
دەبارێ ئەشقی دەستەی دڵداران
ڕەشبەڵەک گەرمە لە گوند و شاران
دێ هەرەس دێنێ بۆ پیرۆزبایی
کۆڵان پڕ دەبێ لە گەڕی شایی
تەق تەق و یاری منالانی کورد
ئاشکرا دەڵی، سستی نەما، مرد
کانی و چۆم و خڕ دەگەشێنەوە
پۆل پۆلی مەلان دەگەڕێنەوە
تەنگانە دەڕوا، ئاوەدانی دێ
فەرحانی دەگا بە شار و بە دێ
پیرۆز بێ لە کورد جەژنی سەری ساڵ
غەمی ببێتە شامی قەل و داڵ
زەردیی بسووتێ بە زەردیی ئاگر
شادی بەشی بێ تا ڕۆژی ئاخر
سەری بەرز بێ بە بەرزی چیا
ئاسوودە بژی دوور لە مافیا
ئەوەی دەمێکە بۆی تێ دەکۆشێ
زۆر بە سانایی بۆی بێتە کۆشێ
کۆتری ئاشتی بە سەریا بفڕێ
خەتی سنووران لەمەدا بسڕێ
هاتوچۆ بکا شار بە شار ئاسان
لە یەک هەرێمدا وەکۆبن دیسان
پەڕتووک بنووسن بە زمانی کوردی
کوردیی بخوێنن درشت و وردی
لە شار و گوندان ئاوەدانی بێ
شێعری یەکسانی وێردی زمانی بێ
بسکی ئارەزووی وێڵی دەست با بێ
ئەوەی نەیارە ماڵی خرا بێ
پەپوولەی عومری باڵی ببزێوێ
هەر شەکاوە بێ لە سەر نشێوێ
کچ و مێرمناڵ، جوان و هەرزەکار
ڕوو بکنە خوێندن تا ببن هوشیار
نەورۆز و بەهار، هێمای ژیارین
دڵنیام بۆ کورد جەژنی ڕزگارین
#ڕاوێژ_خزرپوور
@rawej1
من بۆت دەنووسم هەشت
تۆ بیخوێنەوە بەهەشت
لە (بەهار)ی خۆشییەکانم
(بە) دەبەخشم، بێ جاڕوباس
تا (هار) بم لە خۆشەویستیتدا
ئەی هەشتی مارس!
#ڕاوێژ_خزرپوور
@rawej1
ئێستا وەرە یاری جوان سپەی درەنگە
تۆ نازانی دڵی من بێ تۆ چەن تەنگە
چاوەڕوانم لە ڕێگەت مەخابن دیار نی
دەرناکەوی وەک یاران دەڵێی تۆم یار نی
دەرکەوتنت وەک خۆرە لەو ئاسمانەیە
گەڕانەوەت بۆ لای من وەک ئەفسانـەیە
بۆنت گوڵی بەهارە و هێمای نەورۆزە
پێکەنینت شکۆفەی بێگەرد و تۆزە
دەنگت چریکەی قەناری وێڵی کـۆساران
ترپەت تێکەڵ بە هاژەی شەتاوی باران
شنەی فێنکی هەناسەت ئارامی دێنێ
نەرمی هەنگاوەکانت دڵ دەبزوێنێ
خێرا وەرە بۆ ئاسمان مانگی شەوی من
ماچی تریفە بێنە بۆ مانگەشەوی من
ئەی هەتاوی بەیانی گزینگی خۆشی!
کە تۆ هاتی شەو نەما ڕووناکی پۆشی
#ڕاوێژ_خزرپوور
@rawej1
بیرەوەری
بگەڕێوە ئەی پەڕیوەی شارانم!
زیندوو کەوە یادەوەری جارانم
بە یادی تۆ، زەردەخەنەم میوانە
پەنجەکانم کردوونەوە بە شانە
لە چاومدا ئێستا شەوقی ئاوێنە
هێمایەکی لاوێنەرە و بێوێنە
لە ڕێی کانیلەکەی خوارووی دەرماڵان
تا بتبینم گۆزە بە دەست وەک ساڵان
ئەگەر هاتی، بە یادی ئەو ساڵانە
سەرێ بدە لە کانی "بنشیلانە"
ئەو کانییه؛ ئاوێنە بوو بۆ ژوانێ
ئێستاش گۆیا بە ڕووماندا دەڕوانێ
وێنەی دوانەی ئێمەی لە ڕوو کێشاوە
لە جەغزێکدا دەڵێی تیشکی هەتاوە
منی تینوو هەتا لووتکەی ئارەزوو
تا نەمبینن، چاوانیتر، زووکە زوو
چاو داگرە! هەتا کانی ڕاوەستێ!
ئاوم دەیێ! بە گۆزەی نا بە مستێ!
وەبیرت دێ؛ لووسی ئەم پردە بازە
تۆ دەکەوتی، من وامدەزانی نازە!
گۆزەی شانت، دەکەوتە نێو قەدی چۆم
دەستی نەرمت دەدایە نێو دەستی خۆم
کەز و کەزی بە جۆرێ لێکهاڵابوون
خیز و سێڵاخ لە باوەشی خاڵابوون
ئێستە ویشکە، بێ شەپۆل و بێ ئاوە
بە تەنیایی لە ناخی چۆم جێماوە
لە بسکی ئەو دارە بییە بڕوانە
ئەویش دەڵێی بۆ بسکت چاوەڕوانە
سەرنج بەرە لەم دارە سەربزێوە
شوێنی شانت، نیگارێکە بە وێوە
هەتا بگەین بە خۆشیەکەی ئێوارێ
ڕاتدەسپاردم بۆ سێبەری بن دارێ
دەڕۆیشتین، هەتا بن داری گۆرین
بە خێرایی، تا باخەڵان وەگۆڕین
وەبیرم دێ؛ بە سەر قەدی ئەو دارە
پاڵمان ئەدا، هەتا تەنگی ئێوارە
ڕۆیی وەرزی ئەو شەمامە چنینە
لەو بێستانەی پێگەیشتووە لە سینە
#ڕاوێژ_خزرپوور
@rawej1
کـــــــــــــــــــۆژان
ماوەیەکە زۆر بێزارم
لە هەرچی هەمە و لەلامە
بە پەنجەی کۆژانی شێتێک
دەسووڕێم وەک داشی دامە
زۆر بێزارم و هاوارم
لە گەروومدا، پەنگی داوە
بینایی چاوم کز بووە
بەو فرمێسکەی قەتیس ماوە
گەرچی لە خەو دایە بەختم
خەو بێگانەیە لە جەستەم
نە تەنیا لە ژین بێزارم
باوەڕکە لە مەرگیش خەستەم
هێندە ئاڵۆزە دواڕۆژم
ئەندێشەی لێم ئەستاندووە
کۆرپەی ئارامیی هەڵگرتووم
کۆرپەی ژانی لێ نواندووە
جاران خۆشەویستی و ئەوین
باوەشێنی دەکرد ژینم
ئێستا کۆژان دەوری داوم
خەمێک بۆتە بە هاوژینم
خۆم داوەتە دەست قەدەرێک
کە بۆ خۆشی سەرگەردانە
هاوارە هاوار ئەی فەلەک!
دوورم خەوە لەو کۆژانە!
#ڕاوێژ_خزرپوور
@rawej1
ژیلەمۆ
کە پێمزانی بــۆ کــــــــــەسێکی تـــر
گڕت گرتــــــــــووە شێوە کــۆی ئاگر
منێش سووتـــــــام چەشنی ژیلەمۆ
بۆ حاڵی خـــــــۆم نەک لە داخـی تۆ
کە هەستم کـــــــرد بوویـــە بێـگانە
ماڵـی دڵم بـــــــــــوو بـە وێـــــــرانە
شێــــــوا ژینم خـــــــــــەونم ئـاڵۆزە
خەوم نایـــــــە هەستم بێ ســــۆزە
دەسوتێم و بۆســــــــۆ لە جـەستەم
دادەگــــــرێ ئەو حـاڵە بێهەستــــەم
بە ڕۆح و تن مـــــــــات و یـەکتـەنم
باوەڕ ناکــــــــەم تــــــــازە پێبکــەنم
غەریبێکم لــــە نێو مــــــاڵی خــــۆم
لۆمـــــەی ناوێ وەختــە بـا بــــــڕۆم
ئیتر لە ئــــــــەو ژینـــە چیم مــــاوە
کێ وەکــــوو من ماکــــــی دۆڕاوە؟!
تەنـی ســـــارد و چــــاوی تۆفـــانیم
بردی هەمـوو ڕەنگ و ڕووی جوانیم
دەڵێــــــی هەرگیز ئـــازاد نەژیـــــوم
نیشانەیـە گـــــووپی قــــەپیـــــــوم
#ڕاوێژ_خزرپوور
لەبەر چاوت دەسووتێن مانگ و ساڵم
دەکەونە بەر پەلی مێژووی بەتاڵم
وەکوو ئەو ساڵە کۆنانەی کە ڕۆیین
دەسووتێن کۆی شەو و ڕۆژی خەیاڵم
#ڕاوێژ_خزرپوور
شەوی یەلدایە، شەوزستانە، ئەمشەو
لە خەو هەستاوە چاوی شەوچلەی جەو
پڕوپاگەندەیە و گیرفان تەکانە!
مەبەستی هەڵچنینە داخەکەم ئەو!
#ڕاوێژ_خزرپوور
گەلێک شێوا و داماوم لە سووچی غوربەتی خۆمدا
مەگەر سیلەی نیگاهێکت نجاتم دا لە بێزاریم
بەشی من هەر پەراوێزە لە دنیای پڕ لە ڕەنگاڵەت
ڕەش و سپی دیارە عەشقی من، بەناچار ڕوو لە ئەغیاریم
#ڕاوێژ_خزرپوور
کوتوپڕی شەوی ١٩ی سەماوەزی ١٤٠٢ ئەنجوومەنیی ئەدەبی سەردەم
دڵم دانا لە دەرگانەت کە چی نەتکرد پەرستاریم
چ بوو ئاخر ڕەواجم چوو لە هەیوانی وەفاداریم
سەرم دانا بەقاپێ مەی لە تاڵی جامی خەندەم پڕ
هەژار هەستا،فڕی هێمن ئەمن هەر وا بەرەو خواریم.
حەزم کەوتۆتە ژێر بەردی زەلام و قوڕسی ڕووگرژیت
دەخیلت بم قەڵەم بێنە و عەفوو کە کەتن و لاساریم
هەتا کۆلکەی تەمەن مابێ و هەناسەم ڕێڕەوێکی بێ
دڵم بۆ تۆ دەکورکێنێ و غەنیمی ئەشق و دڵداریم
منم تاسەی لە داوی تۆ بە تەختەی دامەکەی سینەت
بە قەت نوێژێکی پێم فەڕزە کە ماچیکەم ئەوینداریم
بە لێوان خاڵی لێدەگرم لە ڵوتکەی کاڵی ئەو کوڵمەی
خەڵاتی دڵبەخوێن کوانێ حیڵاجی کەم برینداریم
بە بانگی ئەشقی دڵدارێکی نوێژی دڵبەریم دابەست
وەسەر پێنج فەڕزەکان ناچێتەوە، ڕێی شیوەن و زاریم
لە ئایەی سووڕەتی ڕوخساری فێری دەردەداری بووم
لەسەر هەر پەلکێ ئاونگ و، بەسەر ئەودەردەدا باریم
سەمای شادی دەکا ڕۆحم بە خونچە و زەزەمەی زارت
دەبارێنی گری عیشق و دەسووتێنی بە ئێکجاریم
بە دڵ هاتم کە بمهێڵی شەوێک من ببمە میوانت
بە هەستێکی گەلێک پاک و بە سۆزی نەغمەیی ناریم
گەلێک شێوا و داماوم لە سووچی غوربەتی خۆمدا
مەگەر سیلەی نیگاهێکت نجاتم دا لە بێزاریم
بەشی من هەر پەراوێزە لە دنیای پڕ لە ڕەنگاڵەت
ڕەش و سپی دیارە عەشقی من، بەناچار ڕوو لە ئەغیاریم
ئەوەندەت دەست بە ڕووی باڵی پەپوولەی حەز وەنا بۆیە
بەرەو لایێکی دیکە ڕادەدێرم دەستی هاوکاریم
هەتا وەرزی خەزان پاکی نەئەڕنیوە گەڵای عومرم
گوڵی هیوام دەنێمە مست کچۆڵەی ژیری هاوشاریم
کە ئامێزت وڵاتم بوو وەکوو خاکم ئەویشم چوو
هەمیسان وێڵ و ئاوارەم، شکێ دەک دەستی ناچاریم!
بەبێ بینینی ڕوخسارت لە چاومدای و دەتبینم
چلۆن بانگم دەکا ناخت کە وا من مەحوی هاواریم؟
(١و٢)ـ #قەلەندەر
(٣و٤)ـ #حەسەن_ڕەوش_پارێزەر
(٥و٦)ـ #دڵبەخوێن
(٧و٨)ـ #ساماڵ_گەنمانی
(٩و١٠)ـ #خوشناو
(١١و١٢)ـ #ڕاوێژ_خزرپوور
(١٣و١٤)- #لوقمان_ئەحمەدی
(١٥و١٦)-#محەممەد_عەلیزادە
مەسنەوییەکی هاوبەشی شاعیرانی ئەنجومەنی ئەدەبیی سەردەم
١٤٠٢٫٠٩٫١٢
غەمینە دڵی من دەسووتێ وەکوو مۆم
کەسێکم دەوێ من بسووتێ وەکوو خۆم
دڵی شێتم ئەگری وەکوو سۆ بە تاسە
نە بۆ کەس ژیان کە و نە لێدە هەناسە
#ڕاوێژ_خزرپوور
سپی پۆشە کۆساری سەرم وەکوو خۆر
ئەگەر تیشکی تۆ بێ، دەڕەنگم بە سەد جۆر
کە بەندە بەهاری ژیانم بە تۆوە
مەسیحی ئەوینم! تکایە مەچۆوە
#محەممەد_عەلیزادە
وڕەز نیم لە بوونت هەتا تۆم هەبی هەم
کە لێم دووری دەبمە خۆراک و ژەمی خەم
هەموو ڕستەکانم بە بێ تۆ خەمۆکن
تکە و بیری ماندووم لە دووریت نەزۆکن
#هەستیار_قەڵاڕەشی
لە هیجری گوڵی خۆم گڕم گرت وەکوو شەم
دەناڵم بە دایم، دەگریەم بە ماتەم
شەوانە لەخەودا دەبینم کە هاتی
بەیانی کە هەستام دەبینم کە قاتی
#خۆشناو
ببینە لەسەر دڵ گڕووی گرتووە خەم
هەمووی دادەپۆشی پەژارە و بەکۆ تەم
دەسووتێم، دەناڵێم وەکوو نەی لە تاوان
دەمێکە کە دەڕژێ تکەی خوێن لە چاوان
#نیگار