-
تنويه : هذة القناة لا تناسب الذوق العام، لذا، كل شيء هنا يمثل ذوقي الشخصي للناشر ولا يشترط ان تنال اعجاب المتابع..
مَوجودة العلاقة هاي بحياتك ؟؟
تمسك بيها هوايَّ
لانها هي الطريق وهي الحل وهي الجواب
انتهت الحلول ومموجودة !!
ساعد نفسك بطبيب نَفسي
متگدر تروح طبيب نفسي ؟
روح دور ؏ هالناس رح تلگاهم
تلگاهم لتگول ما الگاهم ،، اكو صديق يحبك ومستعد يسمعك
اكو شخص يحبك مستعد يفرحك
اكو اي احد التفت دور حتلگة
قبل لتروح تدور
لازم نفهم الآية اللي تگول
" ونفس من سواها فألهمها فجورها وتقواها قد أفلح من زكاها وقد خاب من دساها "
تعرفون يعني شنو دساها ؟
يعني خَتلها .. دفنها .. وأدها ( هَم دفنها )
فَ الرسالة وضحت !!
اتمنىٰ من الله إنُ يساعدنا إننا نزكي نفوسنا ونرجع نحيي اللي مات بينا
ونعيش بروحنا الحقيقية مو المزيفة
يارب لا تكلفنا إلا وسعنا
ولا تحملنا ما لا طاقة لنا به
واعف عنا واغفر لنا وارحمنا
انتَ مولانا❤️.
أخُذ نَفس عَمييييق
وأفتح عينك وإقرة الاحرف الجاية ..
تُعرف شنو اللي يخلي (الروح الحقيقية)
اللي ندفنت تطمن وتطلع وتظهر مثل الروح المزيفة بشكل طبيعي !!
شنو اللي يخليني اكون إنسان حقيقي كامل
عايش بروحي الحقيقية بدون تشويه ؟
شنو اللي يساعد فطرتي إنُ تورد مِن جديد ؟
كُل هذا بچفة
ونظرة كُلشي وكُل شخص بكُل مكان
( مِن غير تعميم طبعًا )
بالمجمتع بچفة ثانية
عِدهم الرجال ..
يعني صوت عالي
الرجال ..
يعني ميبچي وميضعف
ونظرتة قاسية وعنف وعضلات
والنساء ..
يعني صوت ناصي ونظرة بالگاع
وطاعة وإستسلام ورضا بالقليل
النساء ..
قلة حيلة وذل وإهانة ما الها حدود ..
دفن بدفن بدفن
دفن للشخصيات الحقيقية
شوف شكَم واحد دفن مَشاعرة وتحول لـ آلة مَتحس ..
شوف شكَم واحد دفن تفكيرة
وتحول لشخص ميفهم رغم إرتفاع معدل ذكائة ..
واللي دفن إبداعة واللي دفن صوتة
واللي دفن ودفن ودفن
تدري شنو اكبر مشكلة بنص كل هَذني المشاكل
واكبر حتىٰ من الدفن نَفسة
المُشكلة إنُ بَعض المجتمعات
( البيوت والعوائل )
تشجع أبنائها ؏ دفن الأجزاء المُهمة الثمينة من انفسهم والطفل يسمع الكلام حتى يعرف يعيش بهالبيوت
مو بس هِيچ ..
هالعوائل هاي يكافئون الطفل ويكرموه لما يسوي هِيچ
هنا الطفل هوَّ دفن ( روحة الحقيقية ) علمود يحميها ويحافظ عليها
بمكان سِري كلش عميق
و وياها جَرح أعمق
ويعيش ب ( روح مُزيفة ) مُصطنعة حتىٰ يگدر يتعامل ويّ البيئة الهوَّ بيها
وتبقى روحة الحقيقية حية وتنبض
بس تبقىٰ بداخلة خاتلة
منتظرة تتطمن وتحس بالدفا الحقيقي المو بشروط علمود تطلع
الحُب ديتحول لحُب مَشروط
والقبول ديتحول لقبول مشروط
والطلعة دتتحول لطلعة مشروطة
والإحترام كذلك إحترام مشروط
كُلشي بشروط .. كلشي بمقابل
شيسوي الطفل (خَطية)
علمود ينحب وينقبل ويُهتم بي ؟
يسوي شي صعب كُلش ..
شنو هالشي !!
( يدفع ثَمَن ) ..
يضطر يرضي المقابل
يضطر يغير شخصيتة
يضطر يصير مثل ما هُمة يردون
ليش !!
لأنُ ببساطة هوَّ محتاج
المُختصر
مُهم كلش حدودك تكون واضحة
وگاعك تكون آمنة
ومُهم إنك تدافع عنها وتحميها
مهم إنُ
تكون ضد أي أذىٰ من اي نوع
تحديد المسافة بينك وبين أي أحد حَقك
بيتك النَفسي مُلكك مو ملك أحد ثاني
حافظ عليه ولتخلي أحد يهدمة
لأنه أمانة راح يسألك عليها منو ؟؟
راح يسألك عليها الله
اللي سَلمك عقد ملكيتة المؤقتة من خلقك.
وأكو ناس يكونون واگفين ؏ الحدود منتظرين الإذن منتظرين الأشارة الخضرة اللي تخليهم ينطلقون منتظرينك تفتحلهُم الباب
وأكو ناس رايحة جاية وتحوم داير مدايرك كُل املها إنك تشرف خيالها او تنتبه إلها
وناس واگفة هناااااااااااك .. بعيد كلش بعيد متدري تتقرب لو تبعد
وهَم أكو ناس تكون مِثل مصاص الدماء
وجودها بالحياة بس حتىٰ تخلص دمك
يردون ياخذون منك كُلشي
تكون إنتَ صاحب العطاء الذي لا ينقطع
تنطي .. تنطي .. تنطي
تنزف .. تنزف .. تنزف
وتفهم وتقدر وتعذر وتستحمل
وتگطع من نَفسَك كُل يوم وصلة إلهم
وتدفع كل يوم ثمن غالي علمود رضاهُم
وهُمة !!
ولا يشبعون ولا حيشبعون
ليش كُلشي لازم يكون بيدك !!
لأن أكو ناس هوايتها الإقتحام ..
إقتحام الآخرين
يتقرب مِنك ،، يتقرب أكثر وأكثر
يشوفَك فاهي وفاتح كُل حدودك
فَيدخل ( لبيتك النفسي )
بكيفة يفتر ويحس المكان مكانة
فَ يبدي بأستهلاك مشاعرك
راح يخليك تحزن بمكانة
وتتوجع بدالة وتشيل همومة بالنيابّة عَنة
وبعد ما يبدي ب إستهلاك أفكارك
راح تحتار بمشاكلة
وتعاني من كُل خطوة يخطيها وبعد شوية يبدي شيسوي ؟؟
يوجهك ويرسملك يومك باللي هو يريدة
اليوم مزاجة حلو ؟؟ يحليلك يومك
اليومك مزاجة مو حلو ؟؟ يطينلك عيشتك ،، وتبقىٰ تتأثر من الحرف اللي يگولة وانسىٰ روحك بعد علويش ساكن بجسمك
انساها بعد إقتحمك
فَلازم !!
تحط حدود لكُل شخص
هوايّ نحاول نطلع من هالنصوص
بس دائمًا نحس روحنا رَح نفشل
ورَح نعثر واحنّة طالعين من نَص
هوايّ نگدر نطلع من هالنصوص
بأساليب مُتَعَددة وطُرق مُختلفة
بس محتاجين شغلة ..
لازم نعرفها ونفتهمها كلش زين ونمارسها وهاي الشغلة هِيّ ( الوَعي النفسي )
إحنّه محتاجين نُعرف اكثر عن نفسنا ومشاعرنا وشنو اللي يخلي مشاعرنا تندفع محتاجين نعرف عن علاقاتنا بمختلف انواعها وانماطها لازم نعرف شگد منها مشوه ومؤذي
وشگد منها صحيح ومُفيد
محتاجين نعرف عن أفعالنا
مو بس افعالنا
حتىٰ ردودها اللحظية واليومية ويّ المُقابل محتاجين نعرف شنو أصل ردودنا ومنين اجت وليش هيچ صارت ووين حتودينا
محتاجين نشيل فِكرة الناس شتگول.
وعلى الطريق رأيتُ كل حكايتي
هل أترك الدربَ القديم ينادي؟
وأسير وحدي والحياةُ كأنها
نغماتُ حزنٍ صامتٌ بفؤادي!
( علاقة ) .. إي علاقة شبيك صافن
علاقة إنسانية حَقيقية ..
تجيك بيها رسايل عكس كُل الرسايل المشوهة اللّي وصلتلك قبل
مِن چنت دتتربىٰ وتتعلم او حتىٰ بتجربة سابقة مؤذية
اللي خرب كلشي علاقة بغض النظرعن نوعها بس هِي علاقه اسريّة
فَ اللي يصلح كل هذا هَم علاقة ..
نوعها مندري شنو ، أخوّة .. صداقة .. حب( زواج )
أي علاقة يوصلَّك بيها حُب غير مشروط
حُب ثابت دائم عَميق ميتغير اذا تغيرت إنتَ او تغيرت أحوالك ..
علاقة يوصلّك بيها إنك مقبول كُلك ؏ بعضَك
مثل ما إنتَ بضعفك أحيانًا
وعجزك مَرات وفشلك بعض الوقت
حتىٰ من يكون رافض تصرف معين من تصرفاتك
يبقى يحبك ويريدك ميتشرط عليك
علاقة يوصلَّك بيها إنُ اللي گدامك يهتم لحسابك إنتَ مو لحسابة هوَّ علمودك مو علمودة وإنُ شايفك إنتَ
مو شايف نفسة أو شايف شخص ثاني بيك
علاقة تحس بيها إنك موجود ومتقدر ووجودك يفرق
وإنك تستاهل
علاقة متكون مُضطر بيها إنك تدفع ثمن علمود ترضي أحد
علاقة بيها مَساحات للحرية والحركة
مو للضيگة والخنگة والتشويه مَرة لُخ والوأد !!
مو تدفن روحك وانتَ حي
علاقة تكون بيها نفسك ..
نفسك وبس
هَالعلاقة مُمكن تكون صداقة مُمكن تكون حُب ( زواج )
مُمكن تكون علاقة علاجية ( مهنية ) علاج نفسي يعني
وبالحقيقة اي علاقة حقيقية توصلّك بيها هالرسايل
هي تكون علاقة علاجية حتىٰ مچنت يَم طبيب نَفسي
لازم نعيد قِراءة الآية اللي تگول
"وَإِذَا الْمَوْءُودَةُ سُئِلَتْ بِأَيِّ ذَنْبٍ قُتِلَتْ"
الوأد يَعني دَفَن في التُّراب حَيًّا
هَاي قَبل چانوا يدفنون البنت
لمجرد إنها تجي للدنيا بنت ،، بَس إحنة لازم نفهم إنُ هَالوأد مو بس للبنات الصغار أيام الجاهلية .. لا
الوأد ظاهرة إنسانية تتكرر كُل يوم
كُل ( روح حقيقية ) مُمكن تتعرض للوأد عن طريق شنو !! ( التربية القاسية ) إي نَعَم
كُل تلقائية .. كُل حَيوية .. كُل طفولة ..
دتتعرض للوأد
كُل انوثة حقيقية
ممكن تتعرض للوأد بألف طريقة وطريقة ..
كُل رجولة حقيقية
مُمكن تتعرض للؤاد بأشكال مُختلفة
كُل جزء من نفسك
ممكن يتعرض للؤاد بأشكال مختلفة ..
كُل جزء من نفسك ممكن يتعرض للوأد
بالبيت او بالشارع او بالمدرسة او بالمجتمع ..
يَعني بيوتنا الأصلية بطريقة تربيتها العظيمة
دتشجع الطفل الهادي، المُسالم، اللي مثل النسمة،
اللي يسمع الكلام، اللي ميگول لاء،
اللي يشرب الحليب وينام من وكت
ومدارسنا الجميلة وتعليمنا العالي
كُلش يحب الطالب اليحفظ العاقل الميطلع صوت
اللي لما يجي المدرس يگوملة الطالب ويبقى واگف لحد ما الاستاذ يقرر يگعدة
اللي يقرة كلشي بالكتاب ويحل الاسئلة كلهن
ونماذج ويبُخ كل المعلومات اللي عندة
؏ ورقة الاجابة مجرد ميشوف ورقة الاسئلة .. ويغرگ بالشط اذا إجاه سؤال من خارج الكتاب المُقدس
خلونا نكون صريحين ..
منو بينا مصار وياه هِيچ !!
ومنو من الأباء مسوة هِيچ بأولادة !
اللّي راح يصفن بيها
راح يشوف ( غالبًا )
كل شخص من عدنا إندفن منّة جزء
( واحد ؏ الأقل )
اندفن مِن روحة الحقيقة
بمرحلة من مراحل حياتة
والأسباب هوايَّ
بينا اللي دفن تلقائيتة ..
بينا اللي دفن شعورة بالحرية ..
بينا اللي دفن طفولتة وفرحتها ..
بينا اللي دفن صوتة العالي
وبينا اللي دفن كلمة ( لاء)
بينا اللي دفن قدراتة وامكانياته الخ ..
ويعيش الواحد حياته كُلها
ب ( روح مزيفة )
روح مَيتة بالحياة
و (روحة الحقيقية) عايشة ومدفونة!
فَ هوَّ حبيبي شيسوي ؟؟
راح يكون مِثل ما هُمة يردون ..
يردونة يسمع الكلام !!
يسمع الكلام
يردونة ميگول لاء وميدوخهم !!
يبطل يگول لاء ويصير ( مؤدب )
يردونة ميكون تلقائي
ويصير مِثل الفون مِن يحطوه صامت !!
عادي يشدّة ؏ الصامت
ورة شوية يردونة يحفظ الدروس
ويجيب درجات كاملة
ويا ويلة إذا جاب اقل من الكاملة
بس علىٰ حساب شنو ؟؟
؏ حساب فرحتة واوقات لعبة
ومواهبة وإبداعة !!
شكو بيها يجيب درجات
احسن ما يگلولة
( الله يطيح حظك فلان ببيش احسن منك ) !
وراها يردونة يطلع الاول
ويدح قراية حتىٰ يدخل كلية طب أو هندسة
ويحقق أحلام وطموحات
أبو وأمة وخالة وعمتة ..
طبعًا كل هذا بَعد محاولات هواي
من المقاومة وصراع وي النفس
وغالبًا ينتهي بالاستسلام
يقرر الطفل يشوه نَفسه لحساب أهلة
علمود يرضيهم
ولازم يتعود ؏ الوضع علمود يعفي نفسة من الأذية
كُل واحِد بينا من ينولد أكو بداخلة إحتياج
إحتياجات نَفسية بَسيطة كُلش ..
إحتياج إنك تِنقبل .. تنحَب .. يُهتَم بيك ..
تُحتَرَم .. تنشاف .. تتقَدَر .. تگول لاء وغِيرها ..
المَفروض هالشي يكون الوظيفة الأساسيّة للأم والأب
أثناء التربية
تلبية هاي الأحتياجات بشكل مُناسب
وبقدر كافي
لكن للأسف هالشي غالبًا مَيصير
الطفل عادةً يكتشف أثناء التربية
إنُ علمود تتم تلبية إحتياجاتة
لازم يكون أكو مُقابل يَعني ..
( إسمَع الكلام علمود أحبَك )
( أشرب الحليب حتىٰ تصير قَوي )
( لتگول لاء حتىٰ مازعلك )
( نام حتىٰ اجيبلك فَد شِي )
اگعد عاقل حتىٰ نطلع ) والخ ..
بَلة گوم شوف حدودك منو دخلها ؟
راجع المسافات اللّي بينَك وبين الناس
شوف كُل واحد وين موجود
منو قريب ؟
منو قريب كلش ؟
منو قريب لدرجة الخَطر ؟
منو مقتحم ؟
منو مستحوذ ؟
منو محتل ؟
ومنو يمص الدم
وسوي التَعديلات اللازمة
وحُط كُل واحد بمكانة
بدربك شوف منو ؏ الباب ومنو رايح جاي ومنو واگف بعيد ..هذولة كلهم منتظرين اشارة اذا حبيت تدخلهم
أما هالناس فَ هذولة أخطر من كُل الفاتوا
هَذولة يذَوبون الحدود
ويزيلون الفَواصل
لحد ما مَتعرف وين حدودك مِن حدودهُم !
وين الخَط الفاصل بينك وبينهُم !
وين إنتَ ووين هُمة!
متعرف اللي دتحسة احساسك لو احساسهُم !
واللّي دتشوفة هذا بعيونك لو بعيونهُم ؟
واللي بداخلك !!
مالتك لو إنشُمر بيك من عدهم ؟
تتخربط ويتخربط عندك كلشي
تحتار وبعدين تضيع
اكو ناس هَم تكون مُحترفة بالإستحواذ
يعني تحب تمتلك الشخص تحتل گاعة
وتريدة يكون مُتاح يمها طول الوقت
تريد تستحوذ ؏ شنو ؟؟
علىٰ إنتباهك وإهتمامك
وتفكيرك ومشاعرك ..
واذا الله سَهللها تستحوذ ؏ حياتك
يعني تكون عايشلة الة مو لنفسك
وللأسف للأسف للأسف
هوايَّ مِن قصص الحُب المؤلمة
يكون بيها هِيچ شِي
وهذا الشي راح يدمر الطرفين
وهوايّ من العلاقات الزوجية تفشل
ويكون هذا السبب
وأكثر الأمراض النفسية
اللّي تصيب الأولاد الصغار والشباب اللي بمقتبل العُمر
يكون وراها إنُ الأم والأب
متصورين إن ابنهم مَشروع حياتهم
( مو مشروع حياتة )
وإنُ لازم يحقق احلامهم
( مو أحلامة )
ويسوي اللي هُمة مگدروا يسووه
( مو اللي يريد يسوي )
لنفرض جِسمَك بيت بي غُرف وصالة
هوَّ أساسًا البيت اللي تسكن بي نَفسك
ونَفسَك هِيَّ البيت اللّي يسكنون بي منو ؟؟
مشاعرك وأفكارك ودَوافِع سلوكك ..
يَعني مَحد يسكن غيرك بهالبيت
فَ إنتَ مِن حَقَك كلش من حقك ترفض
إنُ أحد يتقرب من حدودك النفسية
من حقك متسمح لأحد
يقتحمَك أو يخترقك أو يستحوذ عليك
تَحت أي مُسمىٰ ..
مِن حقك كلش إنُ تحدد المسافة النفسية بينك وبين المُقابل
مِن حقك تقرب اللي ترتاحلة وتتطمن يمة وتمنع اللي متطمنتلة إنُ يتقرب
من حقك تسمح لشخص إنُ يتقرب أكثر وتفتحلة بيبانك كُلهم
ومن حقك هَم
تحط الف سياج يمنع ويفصل
بينك وبين اي شخص
حتى من تدخلهم ..
أكو ناس تگعدهُم بالصالة
وأكو ناس تعزمهم ؏ الأكل
وأكو ناس تدخلهم غرفتك
بِمعنىٰ ( خصوصياتك )
واكو ناس تسمحلهم يتحركون براحتهم
وكأنهم اصحاب البيت ( نفسك )
بس كُلة بِيدك ..
كُل الحدود بيدك إنتَ
هَالحَياة مَليانّة نُصوص مُكَررة
وسيناريوهات مَحفوظة ..
مِن أوَّل نَص الأب والأم مال ..
إسمَع الكلام ولتعلي صوتَك ولتگول لاء
ولتزعلني حتىٰ الله ليذبك بالنار
وأشرب الحليب حتىٰ تصير قَوي
وبعدين نَص التفوق بالدراسة
مال.. أقرة وإفهم واحفظ
ولازم تطلع الأوَّل
لازم تجيب درجات عالية
حتىٰ شنو ؟؟
حتىٰ تدخل كُلية الطب وتطلع دكتور
وبعدين نَص المُجتمع مال..
ميصير تتطلگين حتىٰ لو هو مو زين
الناس شتگول
لازم تتحملين قرفة ومزاجة وطلعان الروح
لان نارة ولا جنة هَلچ
نارة ولا جنة هَلي؟؟
ليش منو هوَّ !!
ها هو الرجال اللي اذا عفته الناس شتگول ؟
ولازم تدوسين ؏ كرامتچ
لان اذا فسختي خطوبة
الناس شتگول ..
وصلتي ٣٠ سنة فاتچ القطار الناس شتگول
لو أن فيكَ من الوفاءِ بقيةً
لذكرتَ أياماً مضت وليالي
ووهبتني أسمى خصالِك مثلما
أنا قد وهبتُك من جميلِ خصالي
كم قُلت أنك خيرُ من عاشرتُهم
فأتيت أنت مخيبًا آماليَ
رجع طيري حزين وجنحه مايل
اضنك شاكها كباله الرسايل ...