•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

24 Jun 2025 23:24

الي كنت مخطوبه له شرط اتلثم ولما تلثمت حسيت معد ينفع افتش

مهاب : افعلي الي يريحش لاتهمي حد

تمكين: يعني عادي عندك افتش؟

مهاب : تشتي الصدق عادي ومش عادي، اشتيش تاخذي راحتش وبنفس الوقت اغار عليش بس في الاخير القرار يرجع لش وانا شاتأقلم مع الوضع ماعنديش اي مانع ،انتي حره بقرارات نفسش

تمكين: يكفيني الي قلته اهم شي ، صدقني الواحده تعاند وتتمسك برأيها لما يعاندونا في قرارات تخصنا نادر من يفكر مثلك

مهاب: قلتلش فيني غيره اي حد مثلهم مارضاش ونفس الوقت مالي حق امنعش، لكن الحمدالله تلثمتي من نفسش


تمكين: وين اسير ؟؟

مهاب : اين تشتي تسيري ؛

تمكين: مدري

مهاب : خلاص خلينا هكذا نمشي محلا نسمات الصباح...

تمكين حاسه بتنعس فيها نوم مارقدت ، مشيت من جنبها سياره مسرعه تجاوزتها يمين والسياره الي بتسابق دخلت يسار فجاه من قدامها بس هي بطئت سرعتها مابينهم ...


لما السيارتين صدمين ببعض

مهاب : يستاهلوووووا ، لاتفتجعيش مالش دخل ...

تمكين: خلاص جي انت بقعتي

مهاب : طيب اشري جنبي وانزلي

تبادلوا الاماكن ...

مهاب بيشجعها : انتي داريه انش ذكيه يستاهلوا محد قدر يغلطش خليهم ذلحين يتضاربو

تمكين: انا والله عليهم بس انا كمان نعست لما مانتبهت المرايات

مهاب : يووو اسف، طيب قلي لي من اولها

تمكين: عادي كنت مصحصحه بس نعست

ثاني يوم وقت الظهر ...
مراعيين لهم اهلها..

تمكين سلمت عليهم بشوووق حضنتهم : فقدت لكم قوووي

ابوها: البيت طافي بدونش

تمكين: بتسلم ع امها وآخرها والجهال

مهاب واقف مبتسم : هذا ماقدلش الا يومين ، ماعتفعلي لما تسيري شهر وترجعي

ابوها ضحك

تمكين: انت ماحسيت لانك بيت اهلك، بس انا حين خرجت من عندهم حسيت اننا فقدتهم

مهاب : انتي داريه اننا بينسافر وعادي

تمكين: لانك تعودت ، انا معهم ماقد فلتهم ابدا

اخوها: جو يتجابرو ، عتجابرونا
تمكين: يلا تجابرو ، شادخل لاعندهن بسرعه
مهاب ضحك: لاتتاخري

اخوها: الى اين! عتتغدو هنا

مهاب: ماقد جهزنا الشنط

اخوها : عاد السفر الساعه٨ الليل

مهاب: مدري يعجبني ارتب كل شي قبل ساعتين واسير قبل ثلاث ساعات،

اخوها : خلاص تغدو وسيرو والله ماناخركم ، الغدا جاهز، قلي لهن يقربين ياتمكين

ترتيل جالسه تتكلم مع اختها ومرت اخوها وتحكي لهن المواقف المضحكه حق جدته والمفتاح ...

بعد نص ساعه
عبدالوهاب خرج لاعندهن : هيا اقطبين قربين ، عيتاخرو

ام تمكين دخلت تسلم على مهاب وجالسين يكلمهم اين عيسافر
ابوها: اندنوسيا حلوه

بعد الغدا روحو البيت ...
مهاب : دخل يتوضا لصلاه العصر شافها نوم ، دفاها
كمل يصلي ، جهز شنطته ورقد...


ت.ع.خ

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

24 Jun 2025 23:23

تمكين قامت مسكت يد جدته: لو سمحت خليهم عيب ماينفعش هكذا

مهاب : ماعليش شي هم مابيرتاحو الا في غرفتهم

اخته شافت باب الغرفه مفتوح جت : حيا جده، ابسرتو محلا مرت مهاب

جدتها : قوي حاليه، احلى من الاوله..

مهاب غمز لاخته ...

اخت مهاب ضحكت : اين اوله ياجده

تمكين شافتهم بدأت تحس بغموض في شي نظراتهم لبعض مالهم ليش خبو عليا : اين هي مرته الاوله؟

جدته: اح بس لاعد تدريش مافعل بها

مهاب متوتر ضبح ومش ساخي ع جدته ولا ع تمكين بضبح شاف اخته: شليهم غرفتهم

اخت مهاب استغلت مقالبه الي بيفعل لهن: تمكين صدق انتي احلى من مرته الاولى

تمكين شافتها وهي بتتكلم بجديه سكتت مصدومه

مهاب : الله يقلعش صدق ماجابش انتي ، ...

اقلكم اجلسو انتو هنا مسك يد مرته : جي نخرج لنا وهن يجلسين يتحازين ويحلمين لهن

تمكين سحبت يدها: اين اخرج

مهاب مسكها وخرجها من الغرفه : خلينا نتكلم خارج

خرجوا للصاله جلس وهو ماسك يدها : خليني اشرحلش

تمكين: لاتشرح شي ليش ماقلت لي من البدايه !! كيف تخليني اعرف هكذا

مهاب شافها معصبه تحيلا لها : اصلا قلت ماعترضيش اغدرش غدر اشلش وبعدا تنطرحي امام امر واقع غصبن عني

تمكين بعدت يده ووقفت : ياسلااااام !!!

مهاب بيضحكككك: مافيها من حقي

تمكين بتقلده : مش قلت لي انتي الاولى والثانيه والثالثه والرابعه

مهاب : ايوه خلاص انتي مسك الختام

تمكين: ماتوقعتها منك

مهاب : والله اشتيش تدري انش انتي وبس بحياتي

تمكين مبهرره

مهاب : عتخليني اتحاكا بتفجعيني احس عتقاحصي

تمكين واقفه ساكته

مهاب : جدتي بتخرف ماعد بتدراش مابتقل

تمكين: ياسلام واختك ؟

مهاب : بتتخيبل ماراحت لها، هي داريه ماتشتي نحسس جدتي إن فيهم زهايمر، انتي داريه بيخرجو الشارع هكذا يشعرهم ماعد الا يردوهم الجيران، لوما طرحنا حارس ،، ولايدخلو المطبخ يفعلو عمل خليها ع الله بس ،، يفعلو صابون وسط الرز ، بنفتجع عليهم يستوجعوا لذلك قلت لهم ليش خرجتو من غرفتكم

تمكين : يوو مغلاهم

مهاب : محلاش وانتي مبهرره ، ماكنت اشتي حتى تصبري دقيقه تسمعي الخبر هذا بس مقدرش افاصلهم يصيحو ويبكو بيحسو انهم فيهم شي لما حد يشككهم بالي بيقولوه يدخلو في ازمه

تمكين: يووو

مهاب : جي نرجع المقلب على اختي انا وانتي

تمكين :كيف ؟

مهاب: قومي البسي نخرج نفعل لفه ، وشاقلها مارضيت تصدق عتسير بيتهم


تمكين: تمام

مهاب : لو عندش قدرات تمثيليه اكثر ، ادعمي شريكش وحسسيها تانيب ضمير انها ليش خبت عنش والكل



تمكين ابتسمت: تمام شاساعدك ، لانه هي الي حسمت الموضوع عندي خلتني اصدق واضبح


مهاب هيا : نغير ملامحنا ونمشي بضبح ...


تمكين مشيت بعده..

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

23 Jun 2025 22:09

ترتيل: ياشيخه ايش الادب هذا لحالش اليوم، مابش لقانه، وجاوبتي حياااا ،

تمكين: يوو ياسعم مابنيقلش حيا

ترتيل: ماشي كنتي تجاوبي هاااا ياترتيل ماتشتي


تمكين ضحكت: الله يقلعش هذك وانا بعد عمل تلعبه

ترتيل: اكيد هو جنبش لما فاعله نفسش كيوت

تمكين: مابحد والله ،بس وحشتيني

ترتيل: عادش ماوحشتيني ، امم الا شويه ، الصدق وانتي والله البيت شوعه بدونش

تمكين ضحككت: صدقتي انش وحشتيني ،

ترتيل ضحكت: بعيني يابياعه ، خلي مهاب ينفعش يوقع اختش هو تمام

تمكين: تمام ، بينفعني عادو احسن منش انتي بضبح وصياح وهو بيدلعني دلع،

ترتيل: بس بتحبيني اكثر من مهاب صح انا اختش ياشوعه

تمكين : لا بينحب مهاب اكثر منش وانتي خلاص يكفي

مهاب على دخلته سمعها وهي واقفه تتكلم : ايوه يكفي ، مش انا داري من بتحاكي بس اهم شي بتحبيني اكثر

تمكين لفتت له ضحكت : الله يقلعش ياترتيل، بتحانكني وانا احانكها

مهاب : قليلها اليوم محانكه بكره عيقع صدق عتحبيني اكثر منها.

ترتيل سمعته جاوبتها: الله يسعدكم يارب قليله سهل تحبيه تكثر مني بشرط يطرحش وسط عينه ومايسخاش عليش .

تمكين: تمام

ترتيل: قلي له الان

تمكين: خلاص شاقله ناهي

مهاب : الا قلي لي

تمكين : نسيت ماقالت

ترتيل بتعيد الكلام

تمكين فتحت السبيكر

مهاب سمع : والله انها وسط عيني وقلبي


ترتيل: انا اوريش ي تمكين، خليتيه يسمعني ههه كنت شاسبر صوتي بدل مابينتحاكى ساع المعزه بعد المحاجر حق عرسش صوتي شحب

تمكين: سهل سهل ، عيرجع يسمعش وقد تباخرتي


ترتيل : صدق عتسافري؟ اخي قال عتسافرو بكره

تمكين : ايوه شهر ونرجع ، بكره قبل مانسير شاجي صليكم
اودعكم


ترتيل: تمام إن شاء الله ، تحتاجي اجهز لش شي هنا

تمكين : ايوه شرجع ارسلش رساله


مهاب كان بيكلم صاحبه بالتلفون : تمام انت تصرف بغيابي بكل شي ولو لازمك اي شي عنبقى ع تواصل اهم شي انت هنا صح

صاحبه: إن شاءالله تقريبا ايوه

مهاب كمل المكالمه وقفل ...

شاف تمكين : وانتي راكنه على حنان ؟

تمكين: ايوه
مهاب: لو تحتاجي حد جنبها شادبرلش

تمكين: مابش داعي ، العمل خفيف قوي رتبت انا وياها جدول لشهرين خفيف عملها عيكون

مهاب: تمام ،،،


جدته دقت باب غرفتهم و دخلت : هي تيه حريوتك؟

مهاب يشتي يرجعها غرفتها

جدته بتداهف تشتي تدخل

مهاب بيمسكها ويخرجها

تمكين مصدومه: مهاب ، خليهم يدخلو

جدته: محلاش صورتش طيبه، ما مرته الاولى ياساتر كيف هي ، هي وياه خبيثين قوي يكرهوني



ت.ع.خ

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

22 Jun 2025 03:41

مهاب هز راسه وابتسم: هاااا ، قد قلت مش انتي هكذا ، مافعلتيش هكذا وبيننا شراكه محل

تمكين ضحكت
مهاب فتح الدولاب خرج صندوق طرحه جنبهم ،

تمكين: ايش هذا ؟

مهاب مبتسم فتح الصندوق ( اشياء قديمه ايام طفولتهم...

هذه صوره تصورناها كلنا عيدميلاد بسمه ، مادخلنا العيال نتصور معاكم وكنا كبار ، ضحك

تمكين : يوو كيف كان شعري ساع الشمس

مهاب ضحك شافها : ساع ايش؟

تمكين اشرت بيدها وشعرها مشعفل من قدام: ساع الشمس

مهاب ضحك قرب باس راسها :البنت صاحبه الشمس هذه عجبتني

تمكين بتبعد بيدها حاجه فوق الصوره  وايش فوق اسناني كوركت هذا لون ابيض  ؟؟

مهاب: انتي حين شفتي صورتش حين وزعوهن بكيتي مارضيتي تشليها كنتي ثرما اسنانش مقلوعه وقعت سودا في الصوره رجعت راضيتش وانا كبير ولونتها ابيض

( سارح في الصوره بيوصف كل كلمه بحب؟

تمكين بتشوف نظراته الصادقه وهو بيوصف

مهاب خرج الكاميرا: وهذه الي كنتي تصوري بها نسيتيها في الشارع خبيتها ،

تمكين شافت طوق شعر ( تذكرررر كان معها مثله شافته فوق راسها في صورها وهي صغيره) مسكته ولفتت له: هذا حقي ؟؟
مهاب : وعاد السنن الي في ااطوق فيهن شعر خبيته كله عشان اناولش وبطلتي تخرجي مافعلش

تمكين: ماشاءالله كيف قدرت تحتفظ بالاشياء هذه قدلهن خيرات نقلتو وسافرت! انا مابش معي خيرات تفاصيل قديمه هكذا ، امي الله يحفظهم يرجموووو اول باول

مهاب: معي العابي بعض دفاتري فيهن طوابع احبهن خبيتهن عشان الطوابع، انا لو شي عزيز عليا وغالي احتفظ به لو يوقع ايش متوقع

تمكين : فرحت قوي ، طيب ليش ماقلت لي انك بتحبني ؟ ليش ماصارحتني

مهاب : اشتيش بالحلال ومن الباب ، وجيت وانرفضت و رحت حليت سبب الرفض و رجعت ، قالو مخطوبه ، ...سكت شويه

تمكين: يعني ماحبيت ابدا بحياتك؟

مهاب : اوف كيف كملتي سكوتي ، بصررراحه شاقلش ، لانه اي حد ممكن يضعف يعجب يحب ينحب ، بعد ماقالو مخطوبه تعرفت على بنت وتواصلت معها اعجبت بها حبتني وتعلقت بي ، ولما قلت لها حددي لي موعد مع اهلش كلمت امها ، وامها رفضت قالت إنها وعدت اخوها تكون لابنه ، وخلاص تركتها لنصيبها وانشغلت بعملي والمشاريع لحد مارجعت عرس اختي وعرفت بالصدفه انش فسختي مسكتش قلت والله ماتفلت البنت هذه هي حب طفولتي، بس يارب تقبل وتوافق خفت ترفضي وقدش كبيره لانش ماتعرفيني او ماتحبيني او يمكن في شخص بحياتش


تمكين : الحمدالله انحنا وقعنا لبعض

مهاب : الحمدالله صدق الله يقدرني اسعدش العمر كله ..

تمكين : إن شاءالله وانا والكل ، إن شاءالله اسعدك بقدر حبك والي سويته كله عشاني


مهاب : لو تحسي كيف انا  فارح بش عتعرفي انش اسعدتيني


ت.ع.خ

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

22 Jun 2025 00:19

في مكان ثاني بيتهم ،بعد مارجعوا من بيت العريس
ام تمكين : ناولتيها شنطه الذهب ؟؟

مرت عبدالوهاب : دخلتها غرفتها، واخته فتحت الدولاب وخبتها وقفلت بالمفتاح وناولت تمكين قبالي

عمتها: تمام، وكيف تمكين غثيت كيف خرجت من هنا

مرت ابنها : ولافيها شي وصلت ويجابرنها ويضحكين ويحبنها خيرات البنات الشابات يعرفنها من عرس بنتهم

ام تمكين: الله يسخرلها كل قلب

ترتيل جالسه زاعله سارحه

امها: وهذه مالها، اين الفقعسه الي مراعيه اختها تسير امد تشل غرفتها

ترتيل بكيت

موت عبدالوهاب شافت بناتها: هيا تخاوين من ذلحين مش محانبه وحين تتزوج واحده فيكن تعددين

ترتيل: والله كنا متخاويات

مرت اخوها : ايوه بينقل لبنات اخوش يوقعين ساعكن واصل محانبه على فستاني ، بلوزتي جزمتي ، سريري بقعتي كسار راس طول اليوم

ترتيل: لو مافعلين هكذا ماعيحسين بطعم الاخوه ولاعيبكين على بعض، ذلحين بينبكي حين ماعد شستلف من تمكين

بنت عبدالوهاب ضحكت: واحنا ياعمه بتستلفي مننا اكثر من تمكين

ترتيل : ابسري الي بيعايرين عمتهن، مشتيش ترفعين الكلفه خلاص ، قلين لي عمه امد استلف ولاواحده فيكن تتحاكى

بنات اخوها : هيا كلهم سارو يرقدو، واحنا اليوم عنجي نوانسش عنرقد عندش

ترتيل فرحت بهن: حيا بكم ، قد انا ضابحه حين فضي البيت فجاه كلهن راحين لهن...

بنت اخوها الصغيره: ماعندهن حجه يهربين قدنا اشتي اهرب انا، ابسرين كيف البيت وكم معنا عمل ..

ترتيل : مايخلوش واحد يحزن على اخته سوا..

جلسين يضحكين ..


(في بيت العريس.)

اخته دخلت ماسكه الكاميرا: اصوركم ؟

مهاب ماحبش يكسفها : قوا يختي صور تبيض الوجه
بيشاور تمكين بصوت واطي : مش عارف من فين جت لها الجرأه تقول تصور مصوره،


تمكين: عادي مافيها احنا تعلمنا

مهاب ضحك: مش داريه إن اختي حتى لو تعلمت بتخلي الصور ساع الواحد اول مايفوق من التخدير

تمكين ماقدرت تمسك نفسها ضحكككت

اخته: هيا خلو المجابره بعدين ، ابتسموا

مهاب : حتى لو مابتسمتيش الصوره عتخليش مبتسمه من الاذن للاذن

تمكين بتضحك: خلاص تعليقات امانه خليها تصور حرام

اخته بتصور بحماس وثقه وهم يقطعو الترته وياكلو ويشربو

مهاب: مش داري ليش كررتو الفقره هذه قد فعلناها

اخته: ماعليش منه اخي مايعرفش يسكت يعلق على كل شي

تمكين بتضحك : عادي

كملو تصوروا دخلوا اهله خواته ابوه وامه يتصورو معهم
بعدين بعد ماضحكو وتصوروا ورحبو بها عندهم خرجوا من شقتهم ...

مهاب لفت لها : اهلا وسهلا

تمكين مبتسمه

مهاب: مش مصدق انش معي

تمكين : ليش

مهاب: انتي اول الاشياء الي سعيت لها بلا يأس

تمكين : وايش معنى انا

تفاعل انزل الي بعده 🙂

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

21 Jun 2025 00:43

امها مافهمت: سهل سيارته ولا من ما وقع ، له حلات للخميس

كلهن ضحكين بصوووت انها مافهمت

ترتيل: خلاص لاعد حد يبرر

تمكين : ليش مافيها شي جي يمه اول ابي يعرف بعدا انتي ، محد عيفرع لش منش الا هو...

هربت سبقت امها بممازحه لها لاعند ابوها

ابوها : حيا بنور عيني ، ماشاءالله تبارك الله على بنتي

تمكين بتتدلع بالطرحه وتغطي وجهها وتفتش : كيف وقعت

ابوها : قمررريه يحرسش الله ويسعدش

تمكين بريحمه: بابا اقلكم شي، اليوم شاغبت اخر مشاغبه وانا عندكم ، بكره وبعد بكره شاتأدب لما يشلوني عليكم

ابوها ضحك: ماقد فعلتي

تمكين : تخيلوا لو في عرسكم انتو وامي خورتو تجننو، وسرتو قلتو لها قد انتي مرتي اليوم يحق لنا ننزف جمعه انا وانتي بسياره معكسه من هدار الناس الي فارغين، لايقولو شي ،والخميس عتوقع زفه ساع الناس والعادات والتقاليد..
فيها شي

ابوها تحمس لما ربطت الموضوع بهم جاوب بسرعه: مافيها شي مرتي انا حر

تمكين: واليوم طلبني مهاب واستاذنت من اخي وقلت شاقلكم لما ارجع لو مارقدتوش

ابوها ضحككك شافها بنظره : انتي داريه شازوجش وانا راكن عليش،.معش دهاء يابنتي بتفعلي الي تشتي وترجعي تستاذني ، حين هي اخر مشاغبه لش وانتي عندي ماشقول شي

تمكين حضنت ابوها وفرحت : احلى اب في الدنيا

ابوها : مكنيني من هذا المجبر الحالي حين انا مسكين بتزيدين عليا

تمكين حضنته وتذكرت انها باتتركه وتترك بيتهم وطيبته ماتعرفش مهاب بنفس الطيبه حق ابوها ولا هو نفس طبعه الحالي بكيت في حضن ابوها

ابوها دمع عليها وبكي : هيااا بس عاد باقي معنا يومين ماعنعددش من اليوم ، بكره مامعكن

تمكين ضحكت مسحت دموعها: يو نسيت اتصل للمنقشه

ابوها حب راسها مسح دموعها: هيا سيري اتصلي لها

امها كانت تشوفهم وتسمعهم سكته وتبكي معهم سكته بتتحيلا لموقفهم سوا، خرجت تمكين وبكيت : هذه الخبلا منها صدق ايحين كبرت عاد طفولتها قبال عيني

زوجها: الله يستر عليهن ويسعدهن.

في غرفتها بتتكلم مع المنقشه...

ترتيل والبنات جنب الباب الغرفه يشتين ياسعم يتسمعين ايش بتكلمه فجاه سمعين حوارها ..
( خلاص تمام ، على الساعه عشر اتصلي شوصف لش البيت، ويامنعاه نقش مايفعلش حساسيه)

كلهن بصوت واحد : هااااه المنقوشه

تمكين لفتت لهن: يا الله فجعتني مالكن

ترتيل: قلنا نتسمع طالما بتهربي علينا وتتخبي وماتقلي لنا بشي

تمكين: والله انها المنقوشه

بنت خالتها: ايوه درينا،، خلاص

تمكين: هيا جين نفعل سلفي كلنا واحنا واقفات وانا عروسه

كلهن وقفين جنبها

مرت اخوها وخالتها ... بيداعين عشاء

ترتيل : بدلي وجي تعشي

تمكين : تمام..

....

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

21 Jun 2025 00:43

تمكين جاوبت تلفونها: ايوه اخي احنا باب الصاله وانتو ؟

عبدالوهاب : ولا ابسرت ولادريت ايش من سياره ووين كانت ، ما اخطركم...يلا تمام ، قد طلعين تحركو واحنا بعدكم

تمكين قفلت: هيا امشي

مهاب مصدوم: اخوش ؟

تمكين: ايوه استاذنته مسخاش ازعله ابدا وداريه ماعيرفض لي طلب

مهاب: ماصيح؟

تمكين:يعني تعبني شويه وانا اشرح له ويقل للخميس ومدري ايش واقله مابش زفه الخميس، المهم بعد نقاشات رضي

مهاب: محلاش صدق انا فدا الطيبه الي ماتسخاش تغثي حد منها.

مشيووو والبقيه وراهم
مهاب: ابعدي الي ع راسش العبايه واجلسي بدون السياره معكسه شافتح لنا من فوق نتهوى

تمكين فرحت بعدت العبايه : بس حاسه الكل بيبسرني

مهاب: بعقلش شاخلي حد يبسرش شاصدمه

تمكين : طيب انت ملاحظ انك بتسوق ووجهك عندي

مهاب: طيب مش عيب افلت القمر الي جنبي هذه واشوف قبالي

تمكين بضحك وجديه: لااا مش عيب، انتبه للطريق

مهاب فتح لها اغنيه وبعدا الزفه وجالس يزف ويرقص السياره

تمكين شوف الرسائل كلهن بيسألين اي سياره انا ، جلسين يتحانبين من يطلع معي

مهاب: قلي لهم مع عريسي ، حانكيهن

تمكين ردت عليهن في مجموعتها واتساب

مشيو بالسياره حقهم من جنبهم وهن كلهن مركزات يشوفين ومش باين شي بس شايفات سياره مزينه

في السياره الثانيه
ترتيل: والله انها صدق مع مهاب شكلها هذه سيارته

بنت اخوها: بس هذه مش سيارته نعرف سيارته

ترتيل بتسوق سياره تمكين: خدعتنا، يو ياويلها من امي وابي واخي مجنوووونه

بنت اخوها : امانه لحد يحاكيهم

ترتيل: كيف لحد يحاكيهم وابوش ياسعم ماعيسال وين هي

بنت اخوها: اصلا كيف ماركز انها مش معه

ترتيل: الله يستر، وعادهم بيترقوصو بالسياره بتبسرررري

بنت اخوها: محد عيقلها شي ابردي

بنت خالتها: اسكه اشري لها تفتح نتاكد

ترتيل قربت السياره وشافين في سقف السياره مثبته كاميرتها

بنت اخوها: يعني هي هنا قد بينقل سياره من هذه المدينه

ترتيل: فكرتها سياره ابن خالي

بنت خالها: مااااشي هم بيسوقوا البرادو البيضا

فوق سياره العرسان ...

مهاب : جننا اخوش كل ماشر يلف السياره نواصل ونسبقه ويرجع بعدنا يخطى

تمكين ضحكت:عيندم إنه وافق

مهاب: هو يا اروحش معي يا اما شادوخهم في الشوارع واهرب بش

تمكين :بغير جنان
مهاب: والله مابه احلى من الجنان، اناااا فارح وانتي فارحه؟؟؟

تمكين: ايوووه

مهاب : زيد السرررررعه...

بعد نص ساعه زفه ...

تمكين بتوريه اتصال اخوها ...

مهاب سحب التلفون وفتح: الف شكر يانسب ، الله يسعدك ويوصلني ازف ذريتك واردلك جميلك

عبدالوهاب ضحك: من جنانكم هذا اسلم، لاتمسخوا ذريتي، عنتحرك للبيت تمام

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

21 Jun 2025 00:42

تمكين: تزفني ! ماينفعش !
مهاب : ليش ؟

تمكين: مدري بس اظن انه ماينفعش

مهاب: شاخليها تنفع ، عندش استعداد تغامري !

تمكين ضحكت: بس اخي زين سيارته عتحاكيه؟

مهاب: لا ، احرج اطلبه شي مش متعارف عليه، بس يكون اتفاق بيننا، تعالي نسوي شي مجنون وجديد لاول مره ممكن يرجع بعدنا عادي

تمكين: تمام ولو صيحو

مهاب: انا شاتحمل اي شي ينقال وماعيعرفوش اننا الي بينسوق السياره معكسه ومزينه قولي لهم وقت الزفه صحبتي ونخليهم يلاحقونا ملان صنعاء يزفونا

تمكين : طيب ، بعدك و لو مادوني الخميس لاعندك نتحمل جنوننا

مهاب ضحك: ولاعيوقع شي افعلي نفسش عروسه مادراش اول مره تتزوجي ومابنسوي شي غلط انتي مرررتي وعنزف بعضنا بس ، تممممام

الباب يدق وترهم

تمكين اضطرت توافق وبس حبت الفكره

مهاب : يلا ذلحين افتحي لهم وانا الفلف اشيائي بس الدنيا مربوشه هنا عطرش وعطري وعلب اكسسواراتش و

تمكين سهل: لاتهمهن شاخلي حنان تلفهن لك كلهن

مهاب : تمام

تمكين فتحت الباب

وترتيل : مالش رقدتي ؟ ساعه ادقدق لش

تمكين مبتسمه: مهاب هنا

ترتيل: اوووهوو ماشاءالله ...

تمكين مسكت فمها بهررت خافت تخبص بالكلام ويسمع

مهاب سمعها ضحك...: اخرج يا تمكين.

تمكين غطي وجهش وابسري له طريق

ترتيل: من وين النسوان ملان عند المرايات

تمكين: من الباب الخلفي ، انزلي من هنا يسار يوصل للموقف

ترتيل :تمام... تغطين يانسوان عيخرج العريس

مهاب مشي من جنب تمكين : من عاد عيبسر حد ومعه القمر حقهن بكلها ...تحتاجي شي؟

تمكين: تسلم

مهاب : الله معش ، امانه كلي الي اديت لش الاكل

تمكين: حاضر تسلم..

مشي بسرعه ورا ترتيل وعينه للارض وخرج
تمكين قدها تاعبه جلست تريح شويه
ترتيل دخلت لاعندها : اكلتي ؟

تمكين: لا ، اسكه اديلي الكيس الي هانك ادالي مهاب غدا وانتو نسيتوني وانا العروسه

ترتيل: خلاص من زوج زلج ( شافت الاكل ) : واوو ، من ايحين تاكل الحريوه يابنت ، مابش عتخربي مكياجش وتوسخي فستانش ( شلت قطعه بيتزا واكلت بتحانك تمكين؟

تمكين: هيااا ترتيل، جاوووعه

ترتيل قربت لها الاكل والعصير...
تمكين: ادي فوقي الكيس حق بدله مهاب لايتوسخ فستاني..

بعد احداث وتفاصيل العرس اخر اليوم دخل ابوها واخوها وعياله وبناته وتصوروا كلهم وخرجوا مراعيين لهن عشان النسوان يروحين ويروحو

ابوها: عبدالوهاب انا شاسبق، ماقدرش اتاخر على نومي شرق

عبدالوهاب : تمام انا شابقى معهن، ابني عيوصلكم
ابوه: تمام
كلهن بيتوزعين ويختارين السيارات ومن يطلع معها ترتيل وبنات اخوها ..

تمكين ساكته مبتسمه بتكتب له

مهاب : انا في الحوش داخل والسياره مزينه

( برأيكم جنونهم طبيعي! ايش عيحصل ؟

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

21 Jun 2025 00:42

تمكين وهي بتنزل من الدرج بتشوف قدامها الكوشه فخمه ملكيه الالوان متناسقه وكبيره فخمه ضخمه حبت التفاصيل التابعه للكوشه منها منصه وممر وحواليه كنب ملكيه

مهاب شايف الدهشه بعيونها: عجبش .؟ خااايف مايعجبش بس حاسس إنه عيعج

تمكين قاطعته:مهاااااب من وين استاجرتها !؟؟ ماقد شفت مثلها ابدااااا

مهاب : صممتها عشانش ، شاف يده بتنسحب وتعاجل النزله: اصبري طيب عتشقلبينا ههههه
تمكين : حبيت قووووي ، شكرااا من قلبي ماتخيلتها بهذا الجمال

مهاب كانت تفاصيل ملامحه كلها بتبتسم سعاده إنه عجبها: صممته لش وطبعا عيكون حقنا المحل الي كلمتش اجرته عنخليه فرع تنسيقات زفاف وحفلات لو لش نفس و مود فيه شاركي بذوقش افكارش وانتي اختاري ناس تساعدش فاهمين بالمجال

تمكين: انت بصراحه عقليتك التجاريه خطيرررره رابط كل شي ببعضه

مهاب : ماعد خليتي لي عقل تجاري ولا طبيعي ، ذلحين كيف تقلي لي اتصور واخرج !! وتسخي؟؟ هذا كله الجمال من احق به يشوفه ويستمتع به انا او هم ؟؟

تمكين ضحكت : هو اصلا جايين يشوفو من عيستحق ويشل الجمال هذا ، من المحظوظ

مهاب : عاد الثقه هذه اموت فيها وتخليني اجنن عليش اكثر

حنان : عنتصورررر ياعرسان لاحقين على المجابره، مابش وقت اقطبو

ضحكوا وبدأو يتصورو سوا وكل نظره وابتسامه منها بتخليه يسرح فيها ويتشوق يعرفها اكثر ، الكلام معها ممتع مزاحها ممتع ثقتها ،هدوئها وشخصيتها الجاده لطافتها وهنجمتها فيها من كل صفه شي

تمكين : احسك مشتت ، قصد حنان نوقف هكذا النظره تكون لهنا

مهاب : مشتت بش والله ، بينحصي واعد صفات حبيتها وعجبتني فيش تخيلي هذا وماقد عرفتش سوا كيف لما اعيش معش

تمكين: لما تعيش معي خلاص عتكون عرفتني راح فضولك وحماسك وشويه وقدك مثل البقيه بتدور الثانيه والثالثه وما احل الله لكم

مهاب ضحك : انتي الاولى والثانيه والثالثه والرابعه ، انتي بصفاتش المتضاده هذه جمعتي كل النسوان فيش ،

تمكين حست عيونها امتلت دموع و داخلها كلام:-
( الامان الوحيد هو لما تحس اليوم فيه ظل حولك يحتويك في سند يكاتفك الدرب، في يد بتربت على كتفك في لحظه ضعف في ابتسامه بتهون عليك صعوبات الحياه، اليوم في نظره بتخليك تستشرق المستقبل حتى لو مش انت شايف هذا الشي، هذا هو المقصد )
بتحس نفسها تقوله بس مش عارفه تصيغه وحنان بتقاطعهم...

كملو التصوير وطلع مهاب يخلص جلسه التصوير..

مهاب : عفوا منش اخت حنان، ممكن عروستي تاخذ لي هي تفاصيل اللقطات حقي ؟؟؟

تمكين ضحكت : ماجت على بالي الفكره

حنان: انا كنت اشتي اقلها ، بس قلت بالفستان وو

مهاب : عادي شاساعدها

حنان : طيب احسن شي، اسير اصلي سريع واتغدا ، وارجع لكم

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

19 Jun 2025 03:48

اخته: الصدق معه حق ، بينشوف تعاملش مع تمكين شويه فيه كبره ، مش ساع ماشفتيها اول مره وعجبتش وحين سرتي بيتهم، حرام لاتكسفي البنت تدخل عندنا وهي بتهم وانتي مابش اطيب من قلبش

امها: والله يابنتي ماكان قصدي شي بينعلق عادي ، والصدق اشتي اوريها اننا حازمه امد لاتغنج علينا

بنتها: كما دخلت اول اعرفي طبعها وبعدا احكمي


في بيتهم...
تمكين جالسه هي وحنان بيعدلين الصور ويختارين الحلوات ويحذفين...

ترتيل: ياتمكين مالش مدعممه ، الكوشه كيف ؟ ماقد اخترتي ولا ابسرتي

تمكين : هي مفاجأه من مهاب قال ماعيوريني ولا شي غير يوم الزفاف

ترتيل : ولو ماعجبتش !

تمكين: ذوقه حلو ،وهو واثق من نفسه انها عتعجبني

ترتيل: يو والبورده ، تخيلي لو هي غابه وقفاش قرود و طرزان ماهو حقكم الجنان

تمكين : انتي كنتي تنفعي توقعي زوجه ابن لعمتي ام مهاب شابسر لو باقي معهم اخوه تدخلي معي سليفه ماعياخذ بحقي غيرش

ترتيل جلست: ايوه صح مال عمتش اليوم ماعجبها حين عزمناها او حين تصورتو، مادريت ايش ضبحها

تمكين : مدري ماركزت عليها...

ترتيل: يوو قالت حنان انها جاوبت عليها..

مرت اخوها : خلاص ماسمعت مشي هي داريه ليش تقلي لها، خليها قدها عاقله عتجننين البنت صميل


تمكين: انا بينهم اشياء ثانيه وهن حسهن في ايش


مرت اخوها: مالش ايش بتهمي؟

تمكين: العرس اشتي اتواصل مع الحجوزات ، ااكد لهم


ترتيل: هذا الساع !!

تمكين: اكتبهن اعمال بكره عشان لانساش


مرت اخوها : طيب يلا تمي لاعد تسمري ، خلنها ترقد وآخرين ارقدين خارج ... خرجت مرت اخوها من عندهن..


بنت خالها: تمكين لو ترقدي إنه ياويلش ، ماجيناش نرقد عندش عشان ترقدي ، هيا احكي لنا ايش احساسش مشاعرش قد بتحبيه؟؟


تمكين شافتهم ضحكت : ايش هذا ؟ شكلكن زي سندوتشات الشاورما


كانين مفرشات فراشات نوم في الارض جنب بعض يتسع ٨ اماكن وسط الغرفه


بنت خالتها : عشان نسمر معش

تمكين : حاسه نفسي الاميره فوق السرير

ترتيل سحبتها : هيا انزلي جنبنا ، هيااا

تمكين نزلت جنب ترتيل : طيب نزلت ، تصبحين على خير

صاحين : والله ماترقدي ، هيا معش تحقيق

تمكين: ايش مشاعري ، الله يوصلكن عشان تعرفين إنه مشاعر مختلطه، قلق على العرس كل شئ عيكون تمام ماعيحصل شي ينقص شي ، كيف عيكون مكياجي تسريحتي


بنت خالها: طيب والعريس ايش شعورش له حبيتيه !

تمكين: مدري حب مدري إنه قبول بشخص ارتبطت به وشاكمل عمري معه ، او اني معجبه بلطافته فيه اشياء بينكتشفها تنحب

بنت خالتها: مثل ايش

تمكين بمزح: مالش دخل

بنت خالتها: مابش رقده ، لوما تقلي لنا عنعرف يعني عنعرف

تمكين: معرفش تصرفاته عقلانيه حبوبه

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

18 Jun 2025 03:01

حنان مش عارفه من الي دخلت تتليقن جاوبتها وهي بتصور : نفس فكره الي اخترعوا صور العرس، تبقى كلها ذكريات لهم
تمكين بهررت لها
ام مهاب : يلا على عافيتهم، غير ماعد توقعش قبله للعروسه يوم العرس من كثر مابسرها

مهاب : كل لبس وكل يوم له قبلته وجماله، وبعدا هو عرسنا البقيه غير ضيوف انا احق اشوف لبسها وتسريحتها كل يوم في عرسنا

امه دعممت كلامه

مهاب بيشاور تمكين: امي يعجبها تسوي اكشن لايدخل في نفسش امانه والله انها طيبه.

تمكين: لاتبرر عادددي يقولوا الي يشتوا ماغلطوش عليا ، حتى امي نفس الشي قالو ،ماعليك شي

مهاب مسك يدها تعبيرا عن شكره: الله يحفظش بس

حنان شافتها مستحيه ضحكت: هيا تمكين وين الحركات الي بتخلي العرسان يتصوروهن امسكي يده شوفي عينه ، شاعلمش وانتي استاذتي

تمكين استحت ضحكت

مهاب : عادي قلي لي انا وانا شافعل بدلها

جلسوا يتصوروا ويشوفها مهاب مستحيه لما تجي عينها بعينه يرجع يسوي لها الفيس المحانك وهي تضحك...

مهاب : مابينبسر الا لمعه اسنانش من تحت البرقع هذا وعادهم يحاسبونا عليه

كملو يتصوروا وخرج مهاب روح...وتمكين دخلت غرفتها ترتاح شويه امد مايتجهزو وتوصل المغنيه بتنزل تفاصيل يوم الذبال تزيين السياره ، زفه الطريق ولما خرجت بزفه من الحمام ( كانت تفاصيل وليس صورها)..

غاده جالسه تحدث صفحه تمكين : واوو ، محلا فكره تزيين السياره حق الحمام حقها ...محلا التوزيعات روعه

كمال داخل نفسه( ربي عاقبني اشد العقاب ياتمكين انتي اقتهرتي حين حضرتي عرسي يوم، وانا بينحضر عرسش كل يوم مع هذه المجنونه)


اخر اليوم في بيتهم ...

مهاب : انتو تحبوني؟

امه: بتتخيبل ؟

مهاب: مني صدق ! انتو بتحبوني ؟ جننتوني اتزوج ؟

امه: ايوه

مهاب: طيب ليش احسكم مش طايقين فرحتي ؟

امه: يو من اين بتدي هذا الحكا

مهاب : يعني اليوم غثيت حين هكذا واحنا بنتصور فعلتو

امه: اصلا مابش داعي يعزمو الذبال ولاتجي

مهاب: بالعكس نقل كثر الله خيرهم ، ابوها من كرم وطيبه نفس قال عيب يدرو اهل العريس غدينا وماعزمناهم، هي حاكتني ماحاكاني ابوها


يعني طيبين ، والبنت ولا ادت كلمه محترمه

امه: ليش انا ماقلت

مهاب : يعني لو انا مكانها شاتحسس من الكلام وكانها هي الي تشتي تتصور معي وادخل ووو، وانا الي هرمتها اشتي نتصور ماخليتها تتغدا وبعدا مافيها اشتي ادرا، ليحين عتمسكوا حقكم العادات ! شي مش حرام ولاعيب مافيها


امه: نتبدع قبال الناس يضحكوا عليك ماقدرش يراعي ليوم الحفله


مهاب: يتحاكو لما يشبعو ازيد ادي لهم مكرفونات ، هي فرحتي انا وعرسنا


امه: الله يعينك بس


مهاب: اهم شي بحجر الله لاتسخو عليها والله انها نسمه

ت.ع.خ

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

18 Jun 2025 03:01

غاده : احلى شي لما تكون العروسه مصوره، تهتم بتفاصيل فخمه قوي ، ابسري محلا صفحتها وعجبتني فكرتها اول مره ابسر عروسه تفعل لهن قوانين ، مراعيه لعرسها كله تفاصيله ياريت وتعرفت على تمكين سوا عشان اسير

كمال قاطعها وهو ضابح من الي سمعه: به عشاء؟؟

غاده: يلا خاطرش اقوم ابسره قذا جا.

كمال: يعني مابش معكم هدره غير الناس مافعلو ماتركو

غاده: مال حبيبي غارق ، ضبحت وحدي اتصلت لخبيرتي

كمال : تمام كل مواضيعكن حش على الناس ، ماعتفعلي لي جاوع

غاده: مافي نفسك
كمال: اي شي ، اقطبي... لحقها للمطبخ

غاده: لو تبسر يا كمال على حلا في قصتهم

كمال: من هم.

غاده: تمكين المصوره حق عرسنا ، تخيل الي خطبها هو الي فعل لها مشروع فساتين اول شي ياسعم إنه عمل بعدا خطبها ذلحين ادالها كل شي، قالو معه ماشاءالله فروع في كل بقعه تاجر كبير ، وبينهم قصه حب من الطفوله يعرفها وعادهم صغار تخيل لذلحين ماتزوج؟؟ كان يشتيها

كمال حس بكذب وضبح من الكلام : ابسري حرقتي البيض رافعه الغاز وجالسه تجابري

غاده: يووو ، نسيت نفسي ، وانت اوف منك كيف تكبد واحد متحمسه احكي لك وانت ولافي حسك

كمال: طنشها خرج صحن وفعل فوقه جبن وسكب شاهي وخرج ياكل

غاده: يوو هذا كله جوع ! كنت عتتصل لي اجهز لك عشاء

كمال بعصبيه: من اين اتصل وانتي مشغوله بقصص الناس وحياتهم الفضول قلتلش

غاده: اصلا من ايحين بتتعشا اولا !! لاتدور مشكله هذا السع قدنا ضابحه من اول

بعد ثلاث ايام..( يوم الذبال )
يوم الذبال في صنعاء : تروح العروسه الحمام البخار وترجع وقت الظهر تستقبلها النسوان والاهل بزفه من الحوش لفوق الغدا ويكون في ضيوف مقربين اهل واصدقاء وجيران...
تمكين اول ماوصلت : جت بنت اخوها تشاورها
لو تبسري جدو مافعلو من فعله !!
تمكين : ايش ؟ خير !!
بنت اخوها بتضحك : قالو عيب نعزم الاهل والاصحاب والعريس واهله ماشي ، قامو يتصلو لمهاب واخوه وابوه وعزموهم هم والنسوان

تمكين: يووو ؟؟ منش صدق !! قد جو يعني

بنت اخوها: ايوه ، قد بيقولوا مش ضروري نزف بصوت عالي هم طالع في الديوان الي داخل ، قالو زفه بدون مكرفون وسماعه

تمكين واقفه بتسمعها : خرجي تلفوني من الشنطه حقي ،وولعيه واديه لاعندي .


بعد الزفه وهي بتتغدا في الغرفه الي فيها صحباتها وبنت خالها وعمها وخالتها وووو..

تمكين جالسه بتتغدا وتلفونها جنبها فتحت تشوف كم يارسايل اختارت اسم مهاب وفتحت ...

هيا قد تغدينا قالو الرجال عيسيرو يخزنو خارج وانا مراعي لش لوحدي تتمي تتغدي نتصور


تمكين: تمام

بعد نص ساعه ...

مهاب :ماقد تميتي ؟

تمكين : عادحنا شاقلك لما نتم


مهاب : كم لش ما اكلتيش ايام ؟

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

17 Jun 2025 01:05

مهاب: مابش داعي اوقع ، مش لاني ملاك وضامن نفسي ، بس لان بتحصل متغيرات واسباب ممكن تخليني ارفض لسبب مش لنظام امشيش عليه فهمتي

تمكين : يعني

مهاب :خلص عتفهمي لما تعيشي ، الكلام مهما اتقال مش زي المواقف نفسها

تمكين: صح، وبنتغير

مهاب : حتى لو تغيرنا ، يبقى اساسيات وقناعات داخلنا ولو تغيرنا بنتغير للافضل مش للاسوا

تمكين : و اوقات عنمر بظروف تغيرنا للاسوا
مهاب : صح بتحصل ، المهم لانفجعش بعضنا البعض ، خلينا نعيش ونتعود ع بعض بسيئاتنا وحسناتنا وتكتشف بعضنا البعض بدون مانتكلم ع نفسنا

تمكين: هذا الي انا فعلا قررته .

مهاب : طيب صوري لي الاتفاقيات كلها حق بكره عشان اساعدش وانتي معي تلتزمي بها

تمكين ضحكت : هي زبجه يعني مش صدق

مهاب: حتى لو زبجه خليها توقع حقيقه وبعدين مش انتي شريكتي فخلاص لازم اضمنش واساعدش ..

تمكين ضحكت : خلاص طيب

مهاب بمزح: تحتاجي اجي شاهد اثناء توقيع الاتفاقية

تمكين : لا

مهاب : هههه، تمام ، إن شاء الله يكون يومش حلو مثلش

تمكين انحرجت : تسلم، إن شاءالله يكون .

مهاب: يلزمش شي تحتاجي شي رسلي لي

تمكين: تمام، وشكرا لانك كل مره بتقلي هكذا ،بينحس فعلا اني شريكتك.

ثاني يوم...
ترتيل : لو خليتي الحفله في مزرعه قد الكل بيفعل في مزرعه عشان التصوير

تمكين : لو عشان التصوير شقدر ادمج الصور بمزرعه ، اهم شي احنا ننبسط وترتاح ومانعاجل وبيتنا قريب من الكل واسهل ،

ترتيل: من عاد بيفعل في بيت

تمكين: يختي احنا نرجع ترند البيوت مش لا م نصعبها على الي بعدنا في اشياء انتشرت مش مهمه ، الي يشتي يفعل والي مايشتي طز في الناس.

ترتيل: طيب جهزت كل شي ، باقي البنت تجي الصبح تكمل تزيين الكوشه، اخرجي شوفي لو عجبش او تغير شي



ثاني يوم الحفله...

تجمعين صحباتها واختها وبنات اخوها لبسين سوا


تمكين كتبت لهن رسائل مع توزيعات وهدايا تذكاريه منها : نويت حياه جديده بدايه جديده ، دعواتكن لي ، ويارب لكل واحده ضعف مادعت لي وتمنت لي...



بنت عمها: ولو واحده حاسدتش

ترتيل: يبقى تستاهل ضعف ما نوته لاختي


تمكين حضنت بنت عمها: انتي بالذات اطيب قلب

بنت عمها ابتسمت: عشان هكذا عجبتني دعوتش هذه شفعلها لعرس بنتي



بنت خالها: بعدين ايش القوانين هذه الجديده اول مره اشوفها ؟؟


تمكين: مش وحدكن عتفعلين قوانين وانا معي قوانين ، هيا شوفنها


بيقراين ويضحكين...

ام تمكين: ايش القوانين حد يقرا يسمعنا....


ترتيل: ممنوع تتجمعوا سكته بدوني بعد العرس ومحد يعزمني بحجه اني عروسه ، كل مناسبه ولا جمعه تكلمني


ومش معناها تزوجت يعني ماعتجابريني انا ، وتحملين لترتيل، انا هذك انا

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

17 Jun 2025 01:05

مهاب سمع صوت رنه الرساله ، رسل بسرعه نقطه يتأكد هي ؟؟ وصلت ...

تمكين فتحت تلفونها قرأت الرساله وضحكت شافت نقطه ، بتكتب له وهي بعيده شويه من الطاقه مش واضحه قوي : حياك الله اهلا وسهلا ،الصدق ماطبخت ، بس شافعل لك العصير انا !

مهاب نفسه يداعيها من الطاقه يحرجها وخائف عمه يدخل فجاه رجع رسل لها: اكيد ماعتطبخي وانتي عايشه دور الشجره في حوشكم ، اسهل شي لش تقطفي مادا الله وتعصريه،، سمع ضحكتها من الطاقه دخلت بسرعه لغرفتها

مهاب مبتسم وماعد شاف ردها ، دخل عمه بطيسان المرق

مهاب وقف يساعده

عمه: الان عبدالوهاب جاي

سمعوا صوت السياره وبيفتخ الباب

مهاب: شكله وصل

عمه : ايوه هو

مهاب: هولا دعوات الرجال اعزمو من اشتيتو ولو نقصين بلغوني شازيد لكم

عمه : أن شاءالله عيكفين،

عبدالوهاب دخل بيسلم عليه ويرحب به


في غرفتها بتتنبع: ترتيل شلوش من قلي اصدقش وافعل هذا كله اليوم

ترتيل: مالش

تمكين: حاسه إنه ابسرني مهاب ، رسالته ابسري ! اصلا لما دخل ...جالسه تحكي لها تشرح لها
ترتيل ضحكت: ابسرش هكذا !!! وعادة جالس بيتغدا، مسكين ذلحين اسير ادي له ماء بيتكبد ، مش قادر كيف يقلهم خلو شجرتكم لكم

تمكين: بطلي خباله يمكن ماستضاش اصلا وجهي لونه اخضر ويدي خضر وشعري فيه خلطه

ترتيل:بتضحك على شكلها ، لو انا بش لانكر اننا في البيت بكله

تمكين: خلص مابش فايده قلي يارب ماشافني ماقد علق على شكلي

في الديوان ..
مهاب كمل يتغدا وشرب الشاي تحابرو شويه : أكرمكم الله ، اقوم أنا استأذنكم



عبدالوهاب : دقيقه اسير ادي لك دعوات النسوان ...

تمكين ناولته الدعوات

عبدالوهاب بهرر : يووو والفعله مسكين الرجال لو يبسرش بس لايرجع الدعوات


تمكين : لاتخليني ادخلهن بيدي لاعنده عسب ابسر عيرجعهن او مع

عبدالوهاب : مالش ماحصل بش. حرقتي او ايش

تمكين: ماشي ، هذه خلطات بسم الله عليا

عبدالوهاب : الله يعين صدق ماعيقع بعد هذا يعني !! ايش خورتش تصبغي وجهش اخضر !!!


تمكين بتضحككك : شلهن بعدا ارجع


عبدالوهاب خرج من الصاله الي هو وتمكين فيها ، يشتي يروح الديوان وقد مهاب واقف مراعي له عند باب الديوان يعني سمع كلامهم ...

مهاب مبتسم شل منه الدعوات وخرج


تمكين دخلت غرفتها مراعيه يكلمها ..


مهاب : عندي فضول جاوبي اخوش وجاوبيني ليش صبغتي وجهش اخضر ؟؟


تمكين ضحكت ورسلت له شرحت له انها خلطه تصفي الوجه من آثار الشمس

مهاب: اهاا يعني فلتر طبيعي


تمكين : بالضبططط ،

مهاب : خساره لو دريت إنه انتي ، اني جيت سلمت عليش بس بسرعه


قفيت ظنيت حد من النسوان.. ماكنت شالفت بس الي فتح لي الباب استغربت حركاته فجعني

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

16 Jun 2025 01:43

امها دمعت ومشيت بعدهن...: لو علينا مانشتيكن تسيرين بس الله يستر عليكن ويسعدكن

ترتيل: يوو امي قالو هكذا؟ وهم الي بيفرحوا باي خاطبي يدق الباب ،ماشصدقكم

امها: تعشي سكته من اللقانه

تمكين : هو صدق كلامها

امها: هيا تعشي يا حريوه ، جالسه تهلكي روحش عمل، مارضيتي تسمعيني

تمكين: خلاص باقي معي ثلاث عرايس وبعدا ماعد شافعل شي

وصلتها رساله منه: مساء الخير ، الفستان عيجهز خلال اسبوعين ، مارأيش نطلبهم الاكسسوار المناسب له؟ بيصمموا اكسسوارات من نفس تطريزه الفستان

تمكين اول ماقرأتها فرحت كانت بتهم كيف ومن وين تلاقي اكسسوار مناسب له، ردت بعفويه على اخر كلامه: ايوووه احسن شي ياريت، بس ماعيقعش مكلف ؟

مهاب: ولو وقع مكلف!!

تمكين: خلاص مش ضروري

مهاب: ليش مش ضروري ، مايغلى عليش.

تمكين: تسلم ، خلاص قلي بكم عيقع

مهاب: ليش عتحاسبي انتي؟

تمكين: لو سعره مناسبني

مهاب: ذلحين انا بينكلمش زوج مش شريك عمل ، انتي مسؤوله مني

تمكين تشتي ترد تحمست وابتسمت من كلامه

ترتيل: عتتعشي ياجاوعه

تمكين بتبهرر لها : رساله عمل ضروري ارد، بعدين شبعت..

قامت عشان تركز و تعرف ترد سوا، ربشوها كلامهم وضحكهم.. دخلت الغرفه

تمكين: مش قصدي ، بس ماحبيت اكلف عليك اكثر، يعني معك التزامات عرسك ومصاريف وكذا

مهاب: وانتي من ضمن التزاماتي ، استغلي الفتره هذه عادنا فارح بش

تمكين: اهااا صح، يعني بعدين ماعتفرح بي !

مهاب : لا ، شاكون فارح اصلا على طول بمجرد ماتكوني معي ، امزح طبعا استغلي كل لحظه معي ونفسش بشي واقدر عليه مايغلى عليش

تمكين: الله يحفظك ، يكفيني الكلام الحلو واهتمامك هذا.

مهاب: انتين هكذا بالبدايه تخزين ، بس بعدين طلباتكن بتزيد (وغمزه شقاوه)

تمكين ضحكت: لو الزوج كريم ومابيقصر ، ماعتزيد الطلبات عتكتفي بكرمه .

مهاب: واو، كلامش سكتني ، بيننبش معش المواضيع عشان اعرفش وكل ماعرفتش كل ما عرفت اني محظوظ بش.وان تصميمي عليش في محله.

تمكين : أن شاءالله ، بس كيف يعني تصميمك عليا !

مهاب حب يقاطعها ويحكي لها تفاصيل عشان يرجع يوصل لجواب سؤالها: تمكين ايش لعبتش المفضله لما كنتي صغيره ؟؟

تمكين: ههههه، لو تكون عارف بها انك ذكي ماشاءالله وذاكرتك اخطر من احدث فون بالاسواق ،

مهاب ضحك : طيب جاوبي
تمكين: الكاميرا الي كنت اقلبها وفيها صور داخلها صحراء ومكه ووو

مهاب: تذكري لما ضاعت حقش الكاميرا وبكيتي ايش حصل !!!

تمكين اتحمست اكثرررر وتذكرت : صححححح، ذكرت ، انت فعلت لي كاميرا بكرتون ولصقت صور تتقلب لما احرك العودي حق الايس كريم من ورا الكاميرا الي بكرتون،

مهاب: الحمدالله انش ذاكره

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

24 Jun 2025 23:24

مهاب في الغرفه بيلبس
واخته نازله بتدق باب شقتهم تدخل

تمكين بتلبس البالطو سمعت باب الشقه

مهاب صيح لها: ادخلي

اخته بتضحك: قلت لها ؟ فهمتها

تمكين يتقلد زاعله قفت شافت وجه مهاب ابتسمت وهي بتلبس

مهاب شافها بدون ابتسامه ويصبح

اخته: مالكم بتلبسو؟اين عتسيرو !

مهاب: بسببش سايره بيتهم ؟

تمكين قاطعته: ليش خبيتي عليا من البدايه !

اخته : يووو يوووو مهاب بس خباله فهمها وضع جدتي الصحي

مهاب : ايش من صحي مارضيت تصدق ماذلحين اقنعيها انتي

تمكين لبست وخرجت من الغرفه

اخته: يو الله يقلعك تصرف فهم البنت عيب عليك حرام تغثا

تمكين بتسمع رجعت: طالما ماسخيت عليا خلاص نستسلم لهنا المقلب

مهاب : محد يشارك المقالب مع طيبات القلب مايسخين يتمين

تمكين: حرام هي همت اغثا، وانا والله مافيها

اخته: يو الله يسامحكم فجعتوني والله، ياسعم هذا عيجنن عليش كيف مقدرش يفهمش ويقنعش

تمكين: شكلنا عنتفق الثلاثه ع بعض ، طلعنا نحب المقالب

اخت مهاب: زوجش اشرس واحد مقالبه نخليش تبطلي

تمكين: عنبسر من عيبطل انا ولاهو

مهاب: تحدي وسيمخه وانتي ماتميتي دقيقه ماسخيتي تغثا

اخته: وين رايحين

مهاب : نسير نفعل لفه ونرجع نتغدا ،

اخته: ايحين عتجهزو الشنط

مهاب : الليل

تمكين بضحكه: انا عن نفسي جاهزات

اخت مهاب: انتي عاد يشتي لش فرز وبعدين نجهزهن شاساعدش لو تشتي

تمكين: تمام

مهاب : قومي سيري عند زوجش شاجهز لها انا

اخته: مشتيش زوجي معيفته

مهاب : يووو منكن كيف تقلبين ع واحد، هرمتنا ع زوجها اطيب واحلى واحد وذلحين كرهته

اخته بتكلم تمكين تشرح لها: الصدق ماكرهته احبه، بس بينتدلع بيتنا كل واحد فارح بوحامي يخورني يدلعني ، وانا بينتعذر بالعرس

تمكين: ماعندش حجه خلاص اجلسي ندلعش ، امانه ماتخوري من خارج ؟

اخت مهاب : يووو انا فدالش سلامتش والله

تمكين: فكري ورسلي لنا

اخته حضنتها وشكرتها

خرجوا جنب السياره

مهاب فتح لها باب السواق : اطلعي

تمكين: من اول يوم تخليني اسوق

مهاب: ايوه عشان ابسرش وانتي تبسري الطريق، تشتي ابسرش وافلت الطريق؟

تمكين طلعت : لا
مهاب : طلع جنبها فتح الزفه

تمكين: وطي الصوت عيقولو فارحه بنفسها

مهاب : مش انتي فارحه؟

تمكين: هيا مهاب لو سمحت خزا انا الي بينسوق

مهاب نزل الصوت : هيا دوووسي

تمكين خرجت بالسياره ...

مهاب شاف واحد في الحاره بيصيح له : دام الله السرور يا حريووو ، ضحكك وجاوبه ورفع الزجاج...

تمكين : لو كنت فاتشه انك ماوقفته تصيح له

مهاب : صح صح ذكرتيني انتي كنتي فاتشه ليش تلثمتي !.
تمكين حست سؤال مش عارفه تجاوب او تتهرب بس هي حابه تكون واضحه وماتخبي شي: الي كنت مخطوبه له

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

23 Jun 2025 22:09

جدته: محلاش صورتش طيبه، ما مرته الاولى ياساتر كيف هي ، هي وياه خبيثين قوي يكرهوني

تمكين بصدمه : من هو ؟

الجده بضبح وعصبيه: هذا الكلب ...شافت مهاب

تمكين شافته بنظرات استغراب و رجعت تشوف الجده وهي بتتفرج الغرفه وتستغفر وتصلي على النبي

مهاب يشتي يفتح الموضوع مع تمكين قبل ماتنفعل نظرات الشراره في عينها الي امتلت دموع.


في بيت اهلها كلهم مجتمعين بعد الصبوح.


ترتيل : قالت تمكين عيجو بكره قبل مايسافروا يودعونا

ابن عبدالوهاب الصغير اصغر واحد عمره ٤ سنوات: يارب ترجع عمه تمكين تعيش عندنا


جدته صيحت: تعوذب من الشيطان ، الله لاقال

ابن عبدالوهاب : ليش ياجده قد انتي تكرهي عمه تمكين ، خرجتيها من البيت واديتيها للناس

جدته: حين هي شغله وماتاكلش وتجلس تلعب بالماء وتخرج الشارع وتفتح لاي حد يدق الباب، قلت ماعد اشتيهاش هنا تسير

ترتيل : مايتحاكوش هكذا يمه هذا الجيل حساس عينهار ، مش هو ساعنا ربل ، لاتصدقش عمه تمكين تزوجت وسارت تعيش في بيتها

ابن اخوها : ايوه شلها عمو الي تصور، وانتي وين عمو الي عيشلش

ترتيل استحت وضحكت معهم عليه...: اسير اجهز اشياء نسيتهن وتحتاجهن للسفر

ابن اخوها : ماشي لاتجهزي ، لما تجي عمه ماشخليهاش تسير، تجلس عندنا

جدته: رحلك ياولد مني شاضربك ، مايتحاكوش هكذا، انطق خير

زوجها: مالش من الخباله جاهل مادراه مابيقل، بيتحاكا من حب


في بيت مهاب..
الجده قاطعت مهاب وبابتسامه وهدوء وبتتحيلا لتمكين: كيف كان العرس ؟؟ كنت اشتي اجي ابسرش ماخلونيش اجي

مهاب : ياجده اصبري

تمكين رحمت الجده: لو سمحت يامهاب خليهم يتحاكو مالك
خايف

مهاب : سمعتي مابيقولو
جدته: هو انت امد لافضحك ياملعون، انت حاكيتها او مع؟ شكلها مش هي داريه

تمكين :, مش داريه مه ياجده ؟؟
الجده ببهرره وملامح تهديد لمهاب : قالو عيزوجوه وهو حين جا وراني صوره مرته الاولى، اقله داريه خطيبتك قال ماشي انا حر

تمكين مبهرره تشوفه وتشوفها

مهاب شاف تمكين: مالش ؟

تمكين مشيت واقفه جنب الطاقه ماسكه يدها : مدري

بتحاول مثل ماعلمتها سحر كيف تتعامل مع كل مشكله لما تواجهها ،،تتحكم بالغضب تدي اول دقيقه من الموقف لنفسها تستوعب تتنفس تفكر وبعدين تتصرف
مهاب قرب منها مسك كتفها : ياروحي اسمعي شاقلش ، ماجا في حسي احكي لش

تمكين: مهاب لو سمحت خليني لوحدي..

مهاب شاف جدته: هيا افتهنتي ياجده نثرتيها ، هيا تخطي الغرفه حقش هيا

تمكين : عيب عليك، خليهم

جدته: هو قليل حيا الولد هذا، تستاهل تدرا بنات الناس مش هن لعبه

مهاب ضبح مسك يدها دلا وقام يمشيها يخرجها غرفتها


( يو النثرات كيف بتخليكم تتفاعلوا، 🥲😂)

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

23 Jun 2025 22:09

ثاني يوم الصباح ...
مهاب بيشوفها بتاكل ببطء : هيا كلي سوا

تمكين: بيناكل

مهاب: ماعجبش صبوحنا
تمكين : بالعكس ، طعيم ماشاءالله

مهاب: انا ماشبسرش كيف بتاكلي لو مستحيه

تمكين: ماشي عادي

مهاب ضحك: ايش من عادي ، كلي ساع مابتاكلي في المكتب

تمكين ضحكت : قد ابسرتني وانا بيناكل والكل؟؟

مهاب : طبعا

تمكين: ايحين

مهاب: مره مشيت من قدام المحل لما كنت اوقف سيارتي واشوف السندوتش تم باربع لقمان

تمكين ضحكت وانحرجت: والله ماكان كامل ، قسمته لي وحنان

مهاب: تعذبي حنان بنص سندوتش ليش

تمكين اكلنا واحد والثاني قسمناه نصين

مهاب: هااا انا يمكن جيت وانتي بتاكلي الثاني شفت اربع لقمات بالضبط ولفيتي الكيس الزباله قلت مسكينه شكلها جاوعه او معها عمل

تمكين: وايش زد ابسرت واخذت مني نظره هكذا ،ابرر لنفسي

مهاب ضحك: سعليش بس السندوتش ، ولما تعصبي ويوقعين حواجبش سبعه من الضبح

تمكين ضحكت وبتقلد : هكذا قصدك؟

مهاب : ياساتر ايوه بس خلاص ، جي ابسري الجهال حق بيتنا اعرفش عليهم ...
تمكين وقفت جنبه وهو بيعددهم اساميهم وعيال من ..
كل اخوتي معهم اطفال وانتي طفلتي لما يرزقنا الله ويلعب بينهم

تمكين : إن شاءالله

مهاب : كم ضحكني اخوش اليوم حين جو ( يسلمو عليها) قرب مني قال مارايك نفعل شي جنوني ساع زفتكم واشل اختي معنا البيت ، شكله حاقد عليا بزفتنا

تمكين : بالعكس قال ياريت وانا سويتها مثلكم بس كنت بعدهم ماقالو فعلت

في بيتهم الصبح...

كمال:غااده ، كويتي لي زنه ، اشتي اسير اصلي

غاده: يووه ياكمال اشتي ارقد

كمال: كنت عترقدي من بدري ، هيا اقطبي ، اليوم معزوم انا غدا

غاده قامت بضبح: يا كمال ياريت وفعلنا ساع تمكين وعريسها ،، يووو لو تبسر محلا صفحتها كل صوره تحتها وصف وقصه تجنن، تعلقت بعرسهم قوي


كمال شايف حماسها والورطه الي هو وفيها ولو تعرف انها كانت حبيبته وجالسه تكلمه عنها ماقدر يمسك نفسه ضحككك

الله يزكيش عقلش بس ، ماعد افعل انا مدري، مش ساخي اكبدش

غاده: تكبدني حين مافعلت لي هكذا، يلا سامحك الله
انت داري إنه ساق سياره زفتهم هو، وبعدين هي

كمال مش قادر يستحمل يسمع اكثر تفاصيل خرج لنفسه ثوب وسار يكويه في الغرفه الثانيه وهو ضابح منها ...


في بيت اهلها...
ترتيل : ماهكذا ظلم، شاتصل لها ...

اتصلت لتمكين

تمكين : حيااا

ترتيل ضحكت: كنت اشتي اهزأش بس الكياته سكتتني مش ملاحظه اول مره تقلي لي حيا،،

تمكين ضحكت: ليش تشتي تهزأيني

ترتيل: والله رفستي البيت كله وعصدتيه وفلتيه وسرتي لا دول ولا معاونه والبيت مرفوس بسببش وانا وحدي

تمكين : ولايهمش اجي اعاونش الان

ترتيل: ياشيخه ايش الادب هذا ؟

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

22 Jun 2025 00:19

تمكين : وايش معنى انا

مهاب: انا لو طرحت شي في راسي من عاد يقدر عليا عنيد في الاشياء الي تعجبني واتمناها

تمكين: هاااا

مهاب: وليش وافقتي بي؟

تمكين: لانك كنت هنا،، قصدي لانكم كنتو جيراننا نعرفك
مهاب ضحك: احب صراحتش ووضوحش يعني ايش عتقولي حبيتك من اول يوم تقدمت لي فيه

تمكين ضحكت : بس تقدر تقول في اشياء عرفتها فيك خلتني اغير مشاعري تجاهك

مهاب : ايوووه ، وايش تغير

تمكين: يعني كنت شخص عادي لشخص مش عادي

مهاب : حلوو، وايحين اول مره شفتيني فيها

تمكين ضحكت ( ذكرت موقف ابتسامته)

مهاب عدل جلسته يسمعها بحماس : دام فيها ضحكه اسالش بالله ليش ضحكتي ومتى! شفتيني لما كنت اجي قدام المحل ؟

تمكين رفعت حواجبها: كنت تجي؟

مهاب : ايوه بس لما احس عتلمحيني اختفي ، اهبل لو جلست قد اسمي شاعترف لش

تمكين : هو انت ،كم كان يستفزني الي يشل موقفي ويوقف قدام المحل

مهاب ضحك مسك يدها : هو انا هو انا قلك يستفزني

تمكين ضحكت: كنت تستفزني، بس لو انت كنت شاغير رايي

مهاب: ليش يعني؟

تمكين: لانك شريكي ومشارك في المحل وخلاص عادي وقف بقعتي

مهاب: نرجع للسؤال متى اول مره شفتيني وليش ضحكتي

تمكين ضحكت مره ثانيه : لما صورت اختك في عرسها

مهاب : ايووووه

تمكين: منتظره كنت الكل يوقف ينتبه للكاميرا، محد غيرك مركز ومبتسم عشر دقائق متصنم وكانه بتعمل صوره فك عند دكتور اسنان

مهاب كان يضحكككك على نفسه بصوووت : الله يساااامحش ، يووووووه منش جالسه جنيه مثل ماكنتي صغيره ، وانا اشوف العقل والرزانه خدعتيني بتحشي عليا هاه

تمكين ضحكككت: مش حش بس ابسر الصور وانت تعرف مقصدي

مهاب : تصدقي مانتبهت ولا فكرت اشوفهن رغم جينا نستلمهن منش كان همي بس اشوفش

تمكين استحت وهي مبتسمه

مهاب: وانا متجمل من نفسي قلت عتعجب بي وان البنت بتتنمر على اسناني

تمكين: لاااا ماتنمرت غير على حماسك ، اسنانك حلوه

مهاب : احم ، لاتغازليني مشتيش استحي ساعش

تمكين ضحكت

مهاب : طيب ليش ماتبسريني بينكلمش شوفيني كاني سارقش او خاطفش تبسريني وتبعدي عينش بسرعه

تمكين شافته : اصلا لو اشوفك وانا بينشرح لك الموقف شاجلس اضحك

مهاب : اضحكي جعل مايضحك غيرش ياسعادتي، طيب انتي شفتيني اول مره وانا بيناخذ صوره فك اسنان
متى اول مره شفتيني بإعجاب او مشاعر

تمكين: ممم كان كل موقف بعد الثاني يخليني اغير توقعاتي فيك لما تاكدت انك مميز وتعاملك غير

مهاب: ايوه كيف

تمكين: صعب احدد لك كيف يعني اشياء كثيره تصرفات كلام مبادئ

مهاب: ايش ورانا !اشتي اعرف قد دخلت قلبش ولا عادنا !حتى غطسه


تمكين ضحكت: اكيد

مهاب بضحكه : يعني راضيه بي ولا زواج تقليدي

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

21 Jun 2025 00:57

ثاني يوم...

تمكين بتتنقش وكل ماتوصل لها رساله تتحرك شويه

المنقشه توقف شويه : كملتي

تمكين: ايوه

شويه يوصل الرد ...
تمكين تتحرك وتفتح تلفونها وترد

المنقشه تمسح وتعيد النقشه : ي حبيبتي راعي ابسري كيف قد يدش

تمكين: طيب بسرعه
المنقشه تعبت معها : اخر مره ولا ماعد شانقشش

تمكين : خلاص ها ...

المنقشه بضبح : هم هكذا بالبدايه عيموت لو ماحاكيتيه وبعدا ماعيدراش وين انتي ، اتنقشي بس افتهني خليه يجنن

تمكين ضحكت: من قصدش؟

المنقشه بضحكه: بتجابري زوجش اكيد

تمكين: ايوه بس ليش البدايه وبعدا ماعيدراش وين انا

المنقشه: هيا ماشتيش اسد نفسش ، بس بينحاكيش من واقع ، في البدايه فارح بش وبعدا خلص عتفقدي لهذا الاهتمام

تمكين: عادي طبيعي هذا الشي، البدايه مشاعر جديده وبعدين عنعرف بعض عيكون روتين وكل واحد منشغل بحياته

المنقشه: ماشاءالله عليش ، بس بعدا ماعد عيعجبش إنه يدعممش عتجلسي تعايريه وتجننيه تذكر كيف كنت

تمكين : كلكن بتقلين هكذا ، قدنا مجهزه نفسي من ذلحين

المنقشه ضحكت:مغلاش صدق، الله يسعدش ويوقع حظش غيرنا كلنا

تمكين: الجميع يارب

كمل اليوم بعد نقش وضحك وسهره وداع بينهن كلهن وتصوير الشنط حقها و وو

ثاني يوم ( يوم الزفه) بعد ماستر اليوم كوافير وبيت اهلها وتجهزت ولبست وجو المخرجين وخرجت...

في الطريق وهي بتنزف لبيت مهاب ..

وصلت عند باب بيتهم وحست بشعور غريب كل المرح والضحك وايام العرس تمت ، الان عتبدأ فصل جديد من حياتها اهل جداد ناس جداد عيشه مختلفه و زوج ماعرفته الا شويه بس...

كانت حاسه كل شي بيحصل حولها حلم مابين زعلها من خرجتها من بيت اهلها و دموع اهلها ، ومابين فرحتهم وهم بيستقبلوها بالمحاجر والزفه والترحيب ...

كلهم وجوه جديده حتى اهلها الي حولها شويه و راخين وبقيت هي

دخلت غرفتها ترتاح شويه قبل ماتدخل عند النسوان ...

تمكين بتتفرج الغرفه عجبتها ( ذكرت انها ماختارتها بس عجبتها اكثر من لو احتارت لو خيرها)

اخت مهاب: اخيرا قد انتي هنا عندنا

تمكين ابتسمت
مهاب دخل بلبسه وهو عريس يمني مختلف عن لبسه الي تعرفه به شافها ابتسم




ت.ع.خ

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

21 Jun 2025 00:43

مهاب : على طول ، احنا بعدك اين ماسرت

عبدالوهاب : تمام ،يلا مع السلامه

تمكين: ايش قدهم راجعين البيت؟
مهاب : يشتو يشلوش عليا ، سهل ، شاشلش العمر كله
تمكين: مبتسمه
مهاب : في نفسش زد شي؟

تمكين: ايوه هيا نتبادل السواقه وصورني وانا بينسوق

مهاب ضحك : طيب خلينا نبسر شارع فاضي .

تمكين بفرحه : شكرا

مهاب : سوقيها لبيتكم انتي

تمكين : تمام

ترتيل والبقيه لاحظوا انهم خرجوا من الشارع الرئيسي ودخلوا شارع فرعي بقعه طافيه ، لبست عبايتها وبدلت المكان هي وياه

مهاب جالس ومتكئ ظهره على طبلون السياره مقابل لها بيصورها

تمكين : جالسه تسابق ترتيل وتجي لها يمين يسار، وتضحك

مهاب مبسوط وهو بيصورها وجالس يتاملها

تمكين تلفت له شويه تبتسم وترجع تشوف قدامها

ترتيل مستغربه: ماله هذا زوجها شكله مدكوم ،

بنت اخوها : من اول عاقل ماشاءالله بعدا مش مركزه إنه مابلا بيلاحق سيارتنا

ترتيل: يمكن الهبلا تمكين بتقل له

تمكين وقفت جنبها بالسياره وهم على يسارها شافت مابش حد فتحت الطاقه ابتسمت لهن

بنت اخوها كانت بتصور صورتها...

تمكين رفعت الزجاج وبيتسابقين

قريب حارة بيتهم دخلوا الحاره بطريقات

مهاب بيسمع الطريقات ويضحك: محد قد زفته عروسته الا انا

تمكين واقفه باب بيتهم يفتحوا الباب عشان تدخل

مهاب بدهشه : تمكين مستوووعبه إن محد عارف الا اخوش ؟؟

تمكين :ايوه وترتيل والبنات

مهاب : بس

تمكين: ايوووه

مهاب : انا شادخل حوش بيتكم

تمكين ضحكككت : يووه صح

مهاب انزلي وانا شانتقل للكرسي من هنا واريوس

تمكين: عادي انزل قبالهم واطلع وسوق ولاتتخبى ، شاكلم ابي ، بس اخي قبل وابي بعد ، مقدرش اخبي عليهم شي تعووودت
مهاب : متاكده ماعيصيحوش مشتيش تغثي بعد مانبسطنا ويوم حلو مثل هذا

تمكين: ولااعيقع شي، تطمن

بيطرقو لهم يمشو عشان يدخلين بقيه السيارات

تمكين نزلت ومهاب نزل وانتظر عبدالوهاب يدخل سلم عليه وخرج بالسياره ..

دخلين البيت وكلهن مانتظرين تقول لابوها كل واحده ترمي سؤال وبانفعال وضحك مصدومات في جنانهم

بنت خالتها: جلسنا ندووورش وكل واحده غاااثيه و حشينا كلنا على بعضنا كل ثنتين يحشين على ثنتين في سيارات ثانيه انك خططتين وهربتين سكته

ترتيل : والاخت مع مهاب ، وايش بتسوق هي

تمكين: سقت بعدين هو ساق اول

بنت عمها ضحكت هاااا: ماشاءالله عليكم ،

بنت اخوها: ياعمه بابا داري ؟؟ اخاف يصيح

ام تمكين: ليش يصيح ماوقع؟

ترتيل شافت تمكين

بنت ابنها شافت عماتها

كلهن سكتين

تمكين: اخيرا سكتين اقدر اكلمكم وتسمعوا : اصلا انزفيت بسياره مهاب

امها مافهمت: سهل سيارته ولا من ما وقع ، له حلات

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

21 Jun 2025 00:43

مهاب : انا في الحوش داخل والسياره مزينه واقفه قدام جدر لحد يركز ويسالني اول ماتخرجي جي من الباب الي نزلت منه تمام
تمكين ماسكه عباييتها البيضا ىتلفونها وشنطه صغيره فيها كاميرا ومسند تثبيت الكاميرا ...
قربت من اخوها وهو بيساعدهن بنقل الكراتين واغراضهم...

تمكين: عبدالوهاب

عبدالوهاب وقف مشي لاعندها: ها

تمكين: اطلب منك طلب
عبدالوهاب اشر لعيونه( كان وقت الزفه حق الاهل لما دخلوا عيونه كلامها دموع عليها متاثر انها كبرت وعتتزوج وتفلتهم) اطلبك طلب ووعد إنه اخر طلب لي

عبدالوهاب عقد حواجبه: ليش اخر طلب ! بغير خباله انا اخوش سندش عمري كله عيوني لش ، مافي نفسش ماناقصش ماتشتي
تمكين مسكت يده بقوه مسكه حب وشكر: الله يحفظك لي ونعم الاخ والسند واحس نفسي بنتك مش اختك بس،،

مقصدي اخر طلب مجنون او اخر مره استأذنك، ابسر هو مهاب فكرته وقال نسوي شي مجنون ننزف سوا، لان الخميس هو بزفه رجال وشاجي مع سيارات يعني ماعيزف ولا عننزف سوا

عبدالوهاب : طيب ومابينزفوش العرسان سوا ؟ احنا عنشلش لبيتهم مع المخرجين حقهم

تمكين : اخي مش يوم الخميس انا في ذلحين ، نفسي ننزف سوا بسياره واحده وانتو تزفونا ، قال نسويها سكته وتتحمل الصياح ، بس انا مقدرش اسوي شي يغثيك والله مسخاش لانك مابترفض لي طلب ، وشاوقع كبيره بنظره لما يدرا اني ستاذنت اخي

عبدالوهاب حب كلامها وانها استاذنته: طيب وتعرفي ابي وامي ووو البهذله لي وانتو مفتهنين

تمكين: مع كلمتك بس لاتزعل مني وافعل نفسك مش داري تمام ، قل النسوان طلعين مادراني من معي ماشتفاقدهم اتعذر ياخي قووااا يامنعاه هو عرسنا و زفتنا وقدنا مرته مش حرام ولاعيب ولاعنهرب

عبدالوهاب : يلا فحطي سريع لحد يبسرش وانا مالي دخل بشي

تمكين حضنتها: تمام جريت والفستان ينسحب وراها وهي مبتسمه

عبدالوهاب : دلا يامجنونه ، لما قفت ابتسم وتحيلالها وداخل نفسه( الله يستر من ابي كيف قدرت تضحك على عقلي وسمحت لها ، والله انها عتفعل لنا فعله بعدها بنات العائله عيقلدين)

تمكين شافت الكل منشغل وبيلفلفين ويدورين والي ضاع عليها والي ناسيه وين اشيائها... مشيت بخطوات بطيئه من الباب الخلفي ورسلت له قرب السياره انا نزلت

مهاب شغل السياره ومشي وصل قبل ماتنزل ، نزل فتح الباب ومسك يدها ولما اخر درجه مرتفعه عن الارض شويه

تمكين: كيف افعل مش عارفه إن الدرج هكذا اقفز؟ ادي يدك طيب اتكأ عليها

مهاب حملها من خصرها للارض

تمكين لتصبح: لا لا.. بتضحك

مهاب مسك فستانها : هيا اطلعي
تمكين طلعت

مهاب رفع فستانها والعبايه وغلق باب السياره ومشي لاعند باب القاعه...

تمكين جاوبت تلفونها: ايوه اخي

( تفاعل او نرقد؟)

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

21 Jun 2025 00:42

تمكين بترتب معه علبه الساعه والخاتم وعطره

مهاب: قلي لي انا شاساعدش مافعل

تمكين: ابعد الكوت والكرفته علق الكوت

مهاب : الكوت تمام، بس الكرفته مابقدر اربطها بعدين

تمكين: سهل انا اعرف

مهاب فرح : تمام، سجل يامهاب ، من ذلحين اضمن الاناقه والشياكه مرتك عتلبسك الكرفته

تمكين ضحكت : اعلمك سهله

مهاب: لا مشتيش اتعلم، عشان تلبسيني كل يوم

تمكين: تمام البسك

مهاب : طيب الان جهزنا كل شي
تمكين لقطات صور للاشياء وبعدين : ايوه ابدا البس الدبله ببطء هكذا شاوريك ( بعدت دبلتها ولبست)

مهاب بيقلدها

تمكين صورته : وبعدين الساعه ...الان تمسك الكوت من الطرف

مهاب : هكذا ؟

تمكين ضحككككت: لاااا ، هكذا ، قربت وبتعلمه كيف ...
مهاب بيضحكك: اضحكي عليا اضحكي ( قلدها وصورته)

تمكين: باقي الكرفته

مهاب: قلتلش معرفش لاتحرجيني
تمكين: لا بس هكذا ع اساس بتربطها انت وبعدين انا بصور لما تشدها وقد ربطتها

مهاب بيقلد: طيب

تمكين شافت مابش وقت بتسمع المغنيه بدات تغني وطلعين يدقين الباب وهي مغلقه عشان لايقاطعوهم ...

قربت طرحتها فوق رقبته

مهاب مسك يدها فوق كتفه وباسها

تمكين انحرجت ابتسمت :رجعت خطوتين شلت الكاميرا وصورته

مهاب قرب منها : هيا اربطيها
سمع الباب بيحاولو يفتحوا ويدقدقين

تمكين: ماعليك ماعد بخلص من الدقدقه، خلينا نكمل اخر لقطات

مهاب قرب : يلا اشوف تعرفي صدق او لا

تمكين ضحكت: تمام ، مسكت الكرفته ، تبدا من هنا وتلفها هكذا...

مهاب بيشوفها وهي بتتكلم وعيونها ، شاف فوق شعرها ورق ورد لما تصوروا عند الكوشه، بعدها لها

تمكين لفتت له
مهاب : هذه ورده فوق راس وردتي

تمكين : ماعد بش ؟

مهاب : الا

تمكين ماسكه شعرها تتحسس: وين

مهاب مسك يدها باسها: هذه قدامي ، بقطفها واهرب

تمكين كملت تشد الكرفته وعدلتها : ذلحين شوف المرايه ، كيف حلوه؟

مهاب مسك يدها وقربها: حلوه وهي جنبي قوي
تمكين ابتسمت له
الباب بيددددق
مهاب: ازعجونا

تمكين: طيب هيا اصورك اخر لقطه بعدين نفتح لهم

مهاب: الله يعينش كيف بتسوي لما تصوري

تمكين: بينمنع دخول اي حد ، بس هذا لاني العروسه صعب امنعهن



مهاب صح : هكذا واقف تمام

تمكين : ايوه اسحبها ببطء وكانك بتلبسها

مهاب بيمشي بتعليماتها..


بعد ماخلصت

مهاب: ونسوي سيلفي تصبيره لما تجي عندي بعد يومين

تمكين وقفت جنبه ابتسمت

مهاب طرح يده حول كتفها وطرح راسه براسها وابتسمو وصور


تمكين: عدل التلفون لفوق شويه ، ايوه هكذا


مهاب : ينفع اجلس هنا اراعي لش لليل

تمكين ابتسمت : للاسف ماينفع النسوان بيطلعين وينزلين ووو

مهاب : خلاص في الزفه تطلعي معي تمام ؟!

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

19 Jun 2025 03:48

تمكين : ونفس الوقت ماعرفته سوا ، يعني عندي تخوف كيف طباعه بقدر افهمه ! شاكون سعيده معه ؟ مدري احس كل شي مجهول

بنت عمتها: هيا قالت ترتيل إنه يشتيش من زمان

تمكين: ماشاءالله ترتيل لو حكت لكن فيعني قد كل شي عندكن ، انا ناسيه تفاصيل تخصني وهي تذكرني هي

بيضحكين ،، وينكتين على بعض اذن فجر وهن سامرات صلين ورقدين...

بعد يومين يوم الزفاف لانها كنسلت يوم النقش

تمكين صحيت الصباح مروقه فاصله افكارها عن كل شي حولها بتحاول تكون ريلاكس وتدعي الله كل شي يكون تمام مثل ماتمنته ، شربت ماء وشلت شنطتها و راحت الكوافير...

في غرفته مهاب اول مافتح عينه شاف الساعه ١٠ ، رسل لها : صباح احلى عروسه في العالم، صباح الجمال واللطافه والكياته، كيف المعنويات يا عروستي؟

تمكين شافت رسالته وهي في الكوافير و ردت: صباح الورد، معنوياتي حلوه الحمدالله، كل شي تمام ، جهزت كل شي؟

مهاب: ايوه الان بروح الحلاق عشان اوقع وسيم واناسب جمال شريكتي

تمكين: مناسبني بجمال روحك

مهاب: لا لا هكذا انا قلبي الصغير لا يحتمل الغزل اللطيف هذا، بس صح ليش روحي بس يعني مش حلو !

تمكين ضحكت: الا حلو ، بس قلت لازيد جرعه الغزل اخلي شويه لبعدين لما اشوفك

مهاب: هاااه طالما هكذا، الان رايح اتجهز واسبقش للصاله

تمكين: تمام نلتقي هناك نتصور قبل النسوان

بعد ماخلصت مكياج وتسريحه راحت الصاله عشان تتصور
وصلت وسيارته مش موجوده ...
دخلت قبل ماتطلع غرفه العروسه تشتي تشوف الكوشه

حنان ( قلها مهاب تغالطها عشان يشوفها لما تشوف الكوشه يكون موجود): مش الان في رجال هانك

تمكين طلعت معها لغرفه العروسه عشان تلبس الفستان وتتجهز تتصور...


بعد نص ساعه
مهاب : وصل الصاله طلع الدرج ومنتظرها ...

تمكين بعد مالبست فستانها وتجهزت وتصورت ، خليه اول ننزل نتصور عند الكوشه ولقطات الساعه والكرفته ووو ، بعدين ، مابش صبر


حنان : تمام حاضرر قد بينشوفش معاجله، نسيتي تلبسي هذه( ناولتها )


تمكين انتي اخرجي عشان تصوري اللقطه ، وانا بفتح الباب بعدش واخرج



مهاب كان بيتكلم بالتلفون شافها قفل فجاه تلفونه وخباه في جيبه وابتسم : واووو واووو


تمكين ابتسمت وانحرجت

مهاب: ايش الحلاوه هذه يابنت طيرتي عقلي ،مش مصدق مسك يدها باسها ...


تمكين: هيا ننزل نتصور عند الكوشه قبل مايجين النسوان وبعدين تكمل جلسه تصوير تفاصيل اللبس حقك


مهاب : طيب ينفع انتي تشوفي لي الطريق وانا اجلس اشوفش

تمكين ضحكت : لا ، شوف الطريق انت وساعدني الفستان ثقيل قوي


مهاب : تدللي يابرنسيسه ، ماقد شفت عروسه بهذا الجمال

تمكين بتنزل من الدرج.... ؟!!

بكره معنا عرس💫

ت.ع.خ

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

18 Jun 2025 23:07

مهاب : اهم شي لاتسخو عليها والله انها نسمه

امه: مادراك انت، عادها بتخزا منك ، وانا الصدق ماقد بسرت منها شي، بس حين تبسرني هكذا مهنجمه عتفعل لي الف حساب

مهاب ضحك على تفكير امه : خلاص عادحنا بدايه ايام العرس وعاد البنت بيت اهلها تجلس هانك معززه مكرمه، ليش عاد التعب هذا كله، هي عيشه اما وتجي تعيش بيننا  نعززه مكرمه بدون رجام كلام، ولا بيت ابوها وانا ارجع لي العمل نلغي الزواجه اتصلي قلي لهم خلاص تراجعنا والمهر لهم وكل شي لهم شاخرج احجز لي تذكره وارجع...

خرج من عند امه وهو مقفي مبتسم لما اف نظرتها ونبرتها تغيرت افتجعت وقامت تلحقه

امه قامت بعده للصاله: عتبطل جنان ؟ هذه مش هي خطبه تفعل لي فيها ساع ماكنت اسير اخطب ، هذا قدو عرس ، حرام البنت وزعت دعوات والناس جايين بكره النقش حقها ، عتعقل من الجنان حقك

مهاب رجع غير ملامحه ضبح ولفت لها: انتي تعرفي اننا خصمي المشاكل واننا هربت من جو المشاكل هنا ، كان خصمي في المشاكل بينش انتي وعمتي وجدتي وهن عايشات معش وسط البيت وابسرش مقهوره ، انا مشتيش عيالي يتربو هكذا ومشتيش اسمع كلام مرتك فعلت  و امك قالت ..وكل واحد يهرمني ، عادحنا لاتزوجنا ولاشي ، كل واحد عند امه

امه: ناهي ذلحين مافعلت يابني اتقي الله لهذا الجنان

مهاب : ولاشي بس شفتش ماحبيتيها وماحترمتي وجودي ووجودها ، قلت خلاص كل واحد يجلس بقعته وانا عندش .

امه: بس.جنان اعقل بينقلك ... مابنلعبش، هذا وانت فارح بها وعتجنن عليها وهي السبب انك تاخرت في الزواجه مراعي لها

مهاب : قد انكسرت نفسي منها خلاص ، ماعد اعجبتني

اخته جت مصدومه بالكلام الي بتسمعه ( غمز لها مهاب)
امه:اسمعي اي قال ماعجبته ، واليوم عيخرف وهو يتصور معها

مهاب بملامح جديه وضبح : هي نفس كنت فارح بها وكسرتو نفسي خلاص...

اخته: والله انها طيبه ، صح يمه؟ ابسرتي محلاها كيف بتجابرنا وتمزح وتضحك ولا كانها عروسه ومقلده دور المستحيه

امه خافت من ترددات مهاب الي قد فعلها لهم في خطبتين: ايوه يابني انا ماقلت فيها شي غير انه اعترضت على التصوير ولاحد يضحك علينا سرنا نتغدا بس البنت، انا حبيتها من عرس اختك اول مره اتعامل معها واحاكيها

مهاب وصل إلي يشتيه يخلي امه تتذكر انها كانت فارحه بها لما قلهم يشتي يخطبها... يعني ذلحين ما افعل انا ؟

امه: بس خياله ترضى حد يفعلها بخواتك.

مهاب: ماشي وانتي ترضي ام زوجها تغثي اختي
بالكلام

امه: ماشي ، الله يهدينا لانظلم حد ولا حد يظلمنا

مهاب باس راسها :الله يسمع منش،
يلا شاسير معي مشاوير وارجع لو تشتو شي رسلتو لي.

بعد ماخرج..

اخته: الصدق معه حق ، بينشوف تعاملش مع تمكين شويه فيه كبره

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

18 Jun 2025 03:01

تمكين ضحكت و ردت : مش قصه الاكل ، ، بس بيرفعين يكملين ويدخلين واقلك تنزل .. طرحت التلفون وبتكمل حقها الصحن بتاكل دلا وتجابرهن شويه

مهاب: لو النسوان خيرات بدل مانحرجهن اطلعي نتصور

تمكين وهي بتكلمهن رنه رساله تلفونها

صحباتها التفتيت: هيااا عيخليش تتغدي نسينا نخليش توقعي مايشغلش وانتي معنا

تمكين شلت تلفونها من جنبها بتضحك وشافت رسالته ابتسمت : الكوشه هنا عنتصور فيها !

مهاب : ياليلااااه ، طيب مراعي قدلي ساعه ضبحت ومتشوق ابسرش وحاسس وجودي وحدي غلط والبيت ملان نسوان فلتوني وسارو

تمكين: خايف لوحدك وفيس محانكه😜
مهاب ابتسم :هههه طيب هذا الفيس شافعله واحنا بنتصور كل الصور اخلي المصوره تضبح وانتي ماتلقي صوره سابره

كملت تراسله وقد رفعين اكلها والسفره وبيكنسين

تمكين: مالكن.

ترتيل: عنجلس نراعي لش انتي والحريو ، عيجين نسوان

حنان : اسير ادي الكاميرا ؟ قالت مرت اخوش مراعي لش العريس تتصوري يشتي يخطى

تمكين: تمام اديها ، ترتيل ادي حقي الروج اعدل

ترتيل: عتتلثمي مابش له بسره غير الحفله

تمكين متوتره: هيا ترتيل مش وقت المزح من الخباله

ترتيل: تمام حاضر ، قلدش الله من اين عتبان ولثمتش كلها مرجان وفضه

بنت اخوها: انا شاسير اديها ياعمه ،اين هي ؟

تمكين: في شنطتي حق اليوم الي شليناها حق المكياج لونها ياجوري

مرت اخوها دخلت بالمبخره ...

ترتيل بتعدل لبسها ..

تمكين كانت لابسه ( فستان قطيفه اسود مكمم عاري الاكتاف والرقبه كلها تطريزه فضه ومرجان ، طويل منفوش من تحت والحاشيه كلها مطرزه بفضي خيوط فضه ومطرز بالمرجان ( كان اللبس مودرن من التراث) وفاعله برقع مش لثمه القماشه حقه ملس وفيه خيوط فضه وورود صغار بالمرجان الاحمر تسريحه خفيفه نص مرفوع من قدام ومن ورا مرفوع وكيرلي خصلات وطرحه قصيره بنفس الوصف حق البرقع بالفضه والمرجان ...



نزل مهاب اول ماشافها ابتسم وقف جنبها : شكلش عروسه يمنيه ، بس ليش لابسه اسود ؟


تمكين: هو اللبس القديم اغلبه مصون بس انا صممته بطريقه مودرن


مهاب: شكله فخم قوي قوي، امانه انتي صممتيه؟؟

تمكين: والله رسمته وفكرته اديتها للمخيطه


مهاب: يعني لما اخترتش شريكتي مش من قليل معي حق ، ذوق زوجتي جميل باللبس، واختياراتها لمشروعنا ضخم


تمكين ابتسمت له وبتشوف لمعات الفلاش: قد بتصورنا واحنا بنتجابر

مهاب : خليها تصور براحتها اصلا انتي عارفه بما انش مصوره إن احلى لقطات الي هي عفويه خليني استمتع بجمالش، شويه وطردوني



امه دخلت وهم بيتصوروا جلست : من اين اديتين لنا موضه تصوير يوم الذبال

تمكين استغربت وسكتت

مهاب شافها بنظره إنه مش وقت

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

17 Jun 2025 01:05

بنات عمتها ضحكين: تمام انتي بس جي، مش تتعذري معش عمل معش تصوير معش بيت و جهال

تمكين: خلص بلا توقيعات بلا اتفاقات ،
بنت خالها قد بصمتي ...

كانين مبسوطات بيرقصين ويغنين ...

في مكان ثاني ...
ابراهيم ومهاب كملو يشوفو المحل الجديد..

بيتمشو للسياره

مهاب: ماعجبنيش نشتي شي ع الواجهه دور ارضي
ابراهيم : اصبر اتصل لصاحبي كلمني على مكان هنا ، اتصل لكمال ...

كمال : انا مخزن عنده بالدور الثاني ، جي لهنا وابسر الموقع ولو عجبك اطلع اتفق معه.

مهاب مشي هو وإبراهيم ، للشارع

ابراهيم : هذا هو محل واحد معه بابين للمحل

مهاب : ضخم قوي موقعه ، ابسر بينه وبين السوق شارررع وهو عيكون محب فساتين ، يعني مابش منافسين جنبه، الباقي محلات ملابس عاديه

ابراهيم : طيب نطلع نتفق معه ؟

مهاب : ايوه ، مابش وقت اشتي نكمل واترك لك الباقي شانشغل بعرسي الاسبوع الجاي

ابراهيم هيا اطلع توكلنا على الله...

وصلوا واتفقوا و دفع له مهاب ووقع ورقه العقد للايجار

كمال جالس وهو متوتر شويه رغم انه وقع بالعقد من ضمن الشهود بس جلس سارح في القات الي بيده و يفكر ( حبته مثل ماحبتني ؟ اكيد ايوه، شكله شخص محترم وحبوب ، وباين عليه مش متردد ، على طول اتفق مع الرجال ووقع ، مشكلتي الي خلتني اخسرها اننا، شخص متردد ، وارجع اختار غلط بعد ماضيع الفرص من يدي، اكيد نسيتني الان، وعايشه حياه جديده وسعاده ، يلا الله يسعدها)




اخر اليوم..

مهاب بيكلمها : إن شاءالله كان يومش لطيف ، وتم الاتفاق والتواقيع

تمكين: ايوه وانا كمان الزمتهن بقوانين ، مش انا وحدي


مهاب : ههههه سوا ، وانا ؟ ماتشتي تلزميني بقوانين !!!


تمكين : ممم ، الا

مهاب : اوف فتحت لنفسي باب لو سكتت، طيب ايش قوانينش

تمكين : ماينفعش من الآن ، لان قد تكون انت ملتزم بها بدون ماطلبها، لذلك خليها بوقتها مع كل موقف


مهاب : حبيت ، افهم من كلامش انش مابتحكمي بسرعه ع حد !!

تمكين: كنت ، وبطلت برضو هذه من التغييرات الي تغيرتها

مهاب: عارفه انش تجنني ؟ صراحتش تنحب مش بس صراحتش ، انتي كلش ع بعضش تنحبي ، فيش صفات حلوه كثيره

تمكين انحرجت : وانت كمان ..

مهاب قاطعها: انا ايش انحب ؟

تمكين: انت قاطعتني ، انت كمان فيك صفات حلوه كثيره حبوبه


مهاب ضحك: استعجلت شكلي ، يلا سهل عتجي عتجي ، عتحبيني انا قبل صفاتي


تمكين غالطته: ايوه وكيف كان يومك


مهاب : برضو تواقيع مثلش سرت استاجرت..... بيكلمها



في مكان ثاني

كمال وصل البيت و زوجته بتتكلم في التلفون مع صحبتها : ايوه ، اليوم عادو شكله حقها حفله توديع العزوبيه، احلى شي

ت.ع.خ( تفاعلكم يدي صفر افكار 😥)

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

17 Jun 2025 01:05

تمكين : قصدك جاد ؟ هاااه كان يبسرني واقله اسكت

مهاب: مادراني من بيبسر مابش حد غير شجر وبعدا لقيت عيون بتتحرك ،

تمكين: عتقل ضفدع هذا

مهاب ضحك : ماقلتش انتي قلتي

تمكين: عادي قول مازعلش

مهاب: مش انا من زعلش او لا، ماسخاش، اما الزعل سهل شاعودش

تمكين: كيف تعودني وماتسخاش

مهاب : يعني عادها اول مره ابسرش هكذا مسخاش من اولها اكسفش ، بس بعدين شتعود عليش وتعرفي طبعي يعني عتتقبلي المزح

تمكين: ماشي وذلحين اتقبل والله، لاني عارفه اننا قمر، والي بينفعله بيحافظ على جمالي

مهاب : ياعيني على الثقه ، ايوه هكذا، كنتي عتتحمسي وانا عندكم وتدخلي تدي الدعوات انتي

تمكين ضحكت: سهل لو عجبك لوك اليوم شافعله خيرات واحنا سوا

مهاب : طيب طمنتيني خلص مافاتتني الضفدعه حق اليوم

تمكين ضحكت : لا لا مافاتتك

مهاب :حبيت الشعار الي مزينه به بيتكم ، ((وداعا حياة العزوبيه )) بتهدديهم او ايش

تمكين : هااا مش مزينه به بيتنا، هذا كنت بينزين عشان حفله بكره صحباتي يشتين يفعلين لي يوم توديع العزوبيه

مهاب ضحككك ومستغرب: وكيف بتودعين العزوبيه ؟

تمكين: نجتمع الصاحبات من الاهل والصديقات المقربات مني ونسوي يوم لطيف ضحك رقص زفه صغيره بيننا وبعدين يدين عقود واتفاقات يخلني اتعهد والتزم واوقع ماتغيرش عليهن

مهاب ضحك : ايووه ! وبتلتزمي؟؟ كيف تتغيري عليهن؟

تمكين: يعني بنجلس نتهم الي زوجين من صحباتنا انهن ماعد بيجتمعين معنا ، ومعهم ظروف ولا زوجها مارضي ولا مناسبات اهل زوجها الي تحلق في يوم جمعاتنا ، ولا بعضهن لو قدي مزوجه ماعد تجلس معنا تشوفنا صغار وتجلس مع النسوان ، ف احنا قبل ماتتزوج نبصمها انها ماتوقع هكذا

مهاب : حبيت والله و اول مره اعرف ، طيب لو احنا كرجال نسويها تقولي ماعنسوي ؟؟

تمكين: صح ماجت على بالي ، اصلا انتم متحكمين بالنسوان، ف مابش داعي توقعوا لهم شي عتسيرو ايحين ماتشتو وبتجلسو كلكم مع بعض عادي ومايزنطوش الي تزوجوا منكم على العزاب ...

مهاب ضحك : ممكن لو فعلنا حفله توديع عزوبيه، عنتمرد على بعض ، شاقلهم ماعد اشتي اشوف صوره واحد فيكم، اخيرا شاودعكم واودع السمرات معاكم و زبجكم الي يمغص ،
اما بالنسبه لنا انحنا المتحكمين ، كيف قصدش؟

تمكين : يعني الرجال الي عيمنعها تخرج وهي مايحق لها تمنعه...

مهاب : من قلش ! طيب عن نفسي ، ليش امنع ؟

تمكين: مثلا عتقل لي كل يوم خرجات مابش

مهاب: ممم ، لو معش مناسبات وبترتاحي في الخرجه كل يوم ومش تعب عليش عادي اهم شي عندي تكوني مبسوطه ، ونفس الوقت لو تحتاجي اكون معش بالبيت تقدري تطلبي مني اجلس وماخرج عادي شاجلس

تمكين : متاكد شكلي شاخليك انت توقع

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

16 Jun 2025 01:43

تمكين فعلت فيسات احراج: ذاكره تفاصيل بس كنت صغيره عمري ست سنوات عشان هكذا ماجت على بالي اذكرها لك

مهاب: يبقى ذاكرتي اقوا ، عرفتي ليش الان صممت عليش

تمكين: لا ، صراحه ماعرفت ! لاني كنت احب تصوير ؟؟

مهاب ضحك عليها : لا، ايش دخل التصوير ،

تمكين: ممم، لانك عرفتني من وانا صغيره ؟

مهاب: لاني حبيتش في صغرش وجلستي في بالي بعدها استسلمت لظروف الحياه وانه مابش نصيب، وسبحان الله رجعتي ووقعتي نصيبي .

تمكين حاسه بشعور غريب اول مره تحسه ، انها محبوبه وحد متمسك بها وعنده امل فيها، عكس المشاعر الي حستها في اختياراتها الغلط.... حست بمشاعر حقيقيه بقلبها مش قادره تميز هي حب او ايش بالضبط، !! يمكن لان هذه المره ماتصنعت وصنعت الشعور وسمته ، لكن عاشته حقيقه ..

مرت الايام
تمكين تعمقت بشعورها الحقيقي وعرفت مهاب نوعا ما ، وهو زاد اعجاب بها لما شاف الصفات الي حبها فيها تغيرت من طفوله لنضج وعقلانيه

وقت شهر العرس تحديدا قبله باسبوعين ...
مهاب وصل جنب بيت تمكين واتصل لعمه :العفو منكم، جيت بوقت مش مناسب ، انتو في البيت ؟ انا خارج كنت اشتي اناولكم الدعوات

ابو تمكين: حياك الله، الان عيفتح لك الباب ادخل ، جاد سير افتح الباب ...

جاد خرج مسرع يفتح باب الشارع ..
تمكين كانت جالسه في الحوش تجمع ورق سدر

جاد شافها : يمه فجعتيني ياعمه ايش حصلش ! تشبهي زورو

تمكين : هذا ماسك وجه يا زورو ، ياي لاتفتح راعي ..

جاد ماسمعش فتح الباب

تمكين تخبت ورا أغصان الشجر بس كانت باينه شويه

مهاب بيتكلم بالتلفون مع عمه: والله مافي داعي ادخل ، خلاص شاناول البطل هذا

تمكين بهررت صوت مهاب !! ايش بيفعل ؟ كيف تهرب عيشوفها ! بتأشر باصبعها في فمها ( اشش) لجاد عشان لو لمحها لايفضحها

مهاب دخل محرج من عمه لانه حلف بيغلق الباب لمح نظرات جاد بيضحك وياشر برأسه تمام : لا إراديا شاف من بيكلم ! ( وبسرعه نزل عينه لما شاف في واحده)

بس جلس مصدوم ( من هذه ! مالها مسرحه شعرها هكذا !! وايش فيه وجهها ويدها !! مستغرب بيمشي بيفكر ويسأل نفسه

ابو تمكين استقبله من باب البيت : حياك الله، اهلا وسهلا ، ادخل مالك مستحي

مهاب: مابلا قلت وقت اخطى ولا ازعجكم

ابو تمكين: مابش ازعاج قدك من البيت وحياك الله على الحاصل

تمكين تعبت وقفه في الحوش مراعيه يدخلوا تدخل ...

بتفكر شويه وادخل الحمدالله ماشاف يارب مالمحني ولاعرفني يو والفعله خزا


مهاب دخل الديوان وجالس وقدامه الطاقه للحوش ...
رسل لها رساله: ايش عتغديني ؟ اسوي بروڤه لمعدتي ، عشان أقرر اشتري بوتجاز أو اتعامل مع مطعم ..

سمع صوت رنه الرساله وهي بتطلع من الدرج جنب الطاقه

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

16 Jun 2025 01:42

كمال: غاثيه من ايش ، اقلش ميه مره بطلي فضول ماتفهميش ، بطلي تكلميني وانا معصب

غاده:انت مابسرتش نفسك كيف زيدت بها، عتخليني اصدق كلام اختك

كمال: ايش من كلام

غاده: قالت شكلك كنت تشتيها لما انت معاند هكذا

كمال: صدقي

غاده: هكذا؟؟
كمال: هكذا انتي !! مش حبيتش ؟ ووفيت معش؟ وجيت خطبتش!! لو اشتيها اني خطبتها

غاده: يمكن رفضتك

كمال حس بتأنيب ضمير: يمكن انا الي حبيتش أكثر وشليتش انتي ، عاد انتي بتحاسبيني وقدنا معش

غاده: طيب انا اسفه لو زعلتك بكلامي بس بينقلك ماقالت

كمال: تقول ماشتت معش عقل

غاده: طيب خلاص ماعلينا طز تتصور لا عمرها لاتصورت ماعلينا ماكرها حياتنا سبرت وسدينا...

كمال: هي سابره من يومها بس انتي الي كنتي تدوري نكد ومشاكل

غاده: خلاص ياكمال مالك صلي على النبي ، مالك بتدور تقالع صميل

كمال: وانتي بتسمعي مابتقلي

غاده: قلت حياتنا سبرت ماقلت

كمال: من الي كان معكننها!

غاده: هرمونات الحمل وخلصنا منها خلاص ، وذلحين انا حامل وابسر كيف عاقله

كمال: الله يتمش بعقلش.
اخذ نفس عميق وتنهد داخل نفسه: يارب تكوني سامحتيني ياتمكين، وانتي يارب يسعدش بحياتش الجايه ويعرف قيمتش ومايندم مثل ماندمت ...


في مكان ثاني.....
تمكين وصلت البيت : اخيراااا، يوووه كم قد انا تلعبه

اختها: وانتي محل وبعدا تصوير وبعدا سرتي تحجزي كوافير ومغنيه ووو

تمكين: مافعل طيب

اختها: قسمي لنا مانفعل معش شلي ورقه واكتبي كل شي ووزعي انا ومرت اخي بنات خالتي وعمتي كلهم بيتصلو يسالو مانفعل مانسوي معاكم

تمكين: والله فكره، خليني ارتاح وبعدين اكتب ، ممكن تدلعي اختش العروسه وتفعلي لها سندوتش وشاهي وماء ميته عطش وجاوعه

ترتيل: مطعم دخلت مش بيت، وعادش مش حريوه باقي شهر وتتدلعي لاقد تعيشي الجو من ذلحين وتبداي الأوامر

تمكين: عترجعي تفقديني وتتصلي تتراشيني اجي عندكم

ترتيل شافتها وامتلت عينها دموع حضنتها : وبكيت

تمكين بكيت معها

بنات اخوها دقين الباب دخلين شافين بيبكين سالين ليش وبكين مع بعض

ام تمكين فوق العشاء وين هولا كل ماقلنا تسير واحده ماعد جت ، جاد سير ادعيهن

جاد سار شافهن خرج لاعندهم: بيبكين كلهن مدري مالهم

الام خافت قامت تشوفهن وعبدالوهاب ومرته

تمكين شافتهم: يو شلوكن هيا قومين قد جو البيت كلهم

عبدالوهاب : مالكن ؟

بنته: بنبكي على عمه ؟

جدتها: مالها عمتش؟

ترتيل بتمسح الدموع: حين عتسير

مرت عبدالوهاب : وين تسير؟

ضحكين كلهن وهن بدموعهن

ترتيل: حين عتتزوج
عبدالوهاب دلهفهن على واحده واحده ، امشين امشين الله يزكيكن عقلكن، فجعتنا

امها دمعت ومشيت