•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

11 May 2025 20:56

تمكين بترد على تعليقات صاحباتها وفجأه علق امجد يبارك لهم وردت عليه...

كمال بيقلب في الفيسبوك دخل صفحتها شاف المنشور والتعليقات ، دخل صفحه الولد ،جلس مقهورررر معصب ضااابح، دخل رسل لها خاص ( مبروووووك، اقلش شاطلقها واشتيش واحبش ، وانتي بتنخطبي، كيف انتي انانيه، بس والله مايحبش مثل ماحبش ولا عتنسعدي لاني داري تحبيني انا )
تمكين شافت رسالته وفعلت له حظر:( مش راضي تخرج من حياتي بالأدب ، اخرج صميل ، بلوووك)
خرجت وفي رساله من امجد
رساله من امجد: ( على فكره اسمش حلو ،كله قوه بعكس ملامحش ، الحمدالله اني شفتش بنفسي ، وصف النسوان ظلمش شويه، تحبي اقلش كيف وصفنش)؟

تمكين ضحكت وردت: كيف وصفني؟

امجد: شكلهن يشتين يمدحين عيونش ويقولين نظره ثاقبه قالين عيونها واسعه كانها مبهرره بس حاليات عيون كبيره حلوه، وانفها مرسومه بطول وجهها ، تخيلت نخرتش متر ونص ووجهها مدور ، حاليه قوي، قلت بعد الوصف هذا اشتي اشوف

تمكين ردت: ضحكه

امجد: بس ماسالتيني ايش رأيي؟

تمكين: ماسالت لاني مش شوعه

امجد: مش شوعه!! ماشاءالله عليش اول شي بهرت مشيتش كلها ثقه، وشموخ رغم انش مستحيه، وحبيت خجلش وهدوئش ، ولما رفعتي راسش جاوبتي ابوش ، قلت سبحان الله اللي خلق، عيونش نظراتها وملامحش جميله.

تمكين ماعرفت ايش ترد مستحيه قوي بتشوف وساكته تكتب وتمسح مش عارفه ايش ترد

امجد: والشكليات مش مهمه، اهم شي نتفق ، هذا المهم

تمكين: ان شاءالله

امجد: حبيت شغلش ماشاءالله ، تصويرش ولقطااتش جميله قوي ، هذا دراسه او موهبه

تمكين وضحت له دراستها شي وموهبتها شي ثاني،

امجد: كنت اقول زوجتي اشتي متعلمه وتتعلم وتشتغل بس بعد ماشفتش وجمالش اشتي اخبيش من عيون الناس كلهم

تمكين فرحانه بكلامه باعجابه بها ( شعور البدايات الي بتخلينا مانفهم اشياء كثيره بتنقال لها معنى وبنترجمها بعواطف )

امجد جلس يكلمها عن نفسه واختياره لدراسته وفين اشتغل وايش قد عمل من مشاريع ووو

ترتيل تراسلها ولابترد صحباتها يرسلين ولا بترد ، منسجمه مع كلامه عن نفسه ومبادئه وشخصيته...الخ




ابوها جا جلس جنبها: شكلنا ماعنتعشاش اليوم

تمكين ضحكت بتوريه: شوف بيدي سيرته المهنيه والذاتيه وكل شي

ابوها مسك كتفها: مش مهم من هو وايش معه، اهم شي طباعه واخلاقه ، وانا واثق ببنتي

تمكين طرحت تلفونها: انتو اهم من الكل، افعل لكم احلى عشاء ، ايش تخوروا ؟

ابوها بيتدلع عليها بيتخور...


في مكان ثاني ( اليمن)

غاده: ايش رأيك نخرج ضبحت

كمال: مابش نفس مشتيش

غاده: ليش الجو حالي ، هيا كمال

كمال : مشتيش اخرجي مع اختي

غاده: مشتيش اشتي معك هيا خرجني الان ولا شازعل منك

ت.ع.خ

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

11 May 2025 20:55

تمكين متعصبه حست الي كتبت له قليل اول مره جت لها فرصه تواجهه وتخرج الي في قلبها:( وفارح بنفسك قوي ومصدق خوراتك، يعني من قلك اني بوافق عليك، مقرر ومخطط ، وتطلقها وجالس تلعب بمشاعر اي حد تلقاه في حياتك، روح تعالج انت شخص مش طبيعي ماعندك ذره انسانيه، انا مصدومه ونادمه اني حبيت شخص مثلك، مش زاعله منك وعليك، زاعله على كل مشاعري الي خرجت لحد مثلك وعلى الوقت الي ضاع لحد مثلك مايستاهل)

حذفت كل كلامها الي كتبت ، حست حتى التبرير له خساره مايستاهل، خليه يحرق بحسراته عملت له حظر ، رجعت فكت الحظر ، وبتكلم نفسها: لو حظرته بيجلس في بالي كل شويه خليني ابعد الحظر وامسح رقمه وحساباته وتفاصيله ويمتسح من راسي
كمال جالس كل شويه منتظر ترد يفتح يشوف مافي رد، ويكلم نفسه ( يمكن تشتي اعتذر اكثر؟ احسها سامحتني! ولا اسكت اخليها تفكر احسن)

بعد ايام( وافقو وحددو الخطوبه)...

تمكين بتكلم ترتيل: حاضر شاصور لش كل شي
ترتيل: وهو صوريه، كيف ماتعرفي شكله،

تمكين:مش مهم الشكل، وبعدين من كلامهم عنه حسيت حبوب، خليني مراعيه انخطب عشان اسوي منشور واقهر الي مايتسمى
ترتيل: ناهي اشتي اشوفه لو مش فارقه معش ، اشتي اشوف خطيب اختي ولا ماسوي لش حاله خطبه

تمكين ضحكت: تمام لو ادوها، انا شفته لمحه لما جا وتكلم مع ابي ماله شي

ترتيل: اسكه افتحي فيديو اشوفش

تمكين فتحت لها

ترتيل: ليش مش فاعله مكياج؟ قلتي عيجين نسوان

تمكين: ايوه عشان احتياط لو شافني او طلب نظره شرعيه

ترتيل عصبت فوقها بمزح: شلوش هو يتشرط يشتي يشوفش ،وانتي اهم شي اخلاقه، هيا خلي اخلاقه تنفعش ،
تمكين: خطيبي ولاخطيبش،،،، اصصصص شكلهم جووو ، يلا باي

ترتيل: لاتقفلي خليني معش

تمكين: كيف اصور

ترتيل : بتلفون ابي بكاميرتش

تمكين: طيب يلا شاخرج البلكونه اصور السيارات
خرجت شافت عشر سيارات فخمه( يووو كم سيارات ي ترتيل كانني في صنعاء من اين اداهم هولا كلهم)

ترتيل: عارفه ايش احلى شي، مابش قات، ماعيكتسر ظهرش كناس

تمكين بتضحك معها : اسكتي بينضحك مشتيش تهتز الكاميرا

امها دخلت لاعندها: وين انتي تمكين

تمكين: وصوت امي الله يحفظها بالفيديو

امها قربت للبلكونه: بنتي بتصوري مش وقت ادخلي

ترتيل بتكلم امها: ليش تدخل ياماما تستقبلهم عيقولوا ماصدقت فارحه مراعيه

امها مربوشه: ها صح، بس مدري وحدي مابش حد معي يلا ادخلي مش وقت تصوير

تمكين كملت صورتهم لحقتها ، عادنا شاصور من هنا
( اختارت بين الممر عند الغرف مكان ردت الستاره الفاصله ومن شق الجانب بتصور وهم بيدخلوا غرفه الاستقبال)
بعد مادخلوا ، طلعين النسوان في يدهن الاشياء حق الخطبه والهدايا

ازيد بارت( في حد ؟؟

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

11 May 2025 20:55

حسين صاح: غاددده

غاده قامت مشيت جلست جنبه وقدامها كمال مراعيه تثبت له وتسمعه وتحرجه وتكشف كذبه متحمسسسه يسالها اخوها قدامه.

كمال: كيف عرفتي ، الي كلمش ماحكالش القصه سوا
غاده تحمست تحرجه وقربت جلست جنب اخوها واتصلت لنسيم وفتحت مكبر الصوت

كمال خايف اول ماسمع بنت قالت الو بيدقق الصوت من هذه ؟ سمعها عرف مش تمكين

غاده: نسيم كيف انتي

كمال عقد حواجبه من نسيم الي تعرفهم

غاده: تعرفيني صح ؟

نسيم : لا من انتي ؟
غاده بنبررره تحرجها : تمكيييين، مالش

نسيم: لا غلطانه، يختي، كلمتش المره الاولى فكرتش واحده بس طلعتي مش تمكين

غاده: راعي طيب مش انا تمكين، بس قلتي تعرفي صوره زوجي وانه كمال وتزوجتي ياتمكين ومدري ايش

نسيم: ايوه يختي الله يهديش شبهت وفكرتش صحبتي بس بعدين تحاكيت معها ،واستغربت انش كذبتي عليا وقلتي انش هي

غاده: بس كمال زوجي انا كيف قلتي زوج تمكين وحبو بعض ووو

نسيم: هذك البنت ثانيه وحبيبها ثاني، قلتلش غلطانه مالش الله يهديش بس، مع السلامه...قفلت

حسين بنظره غضب: قلدش الله فعلتي مشكله ع تشبيه واحده بش؟

غاده متعصبه: اصبر افهمك ياخي والله انها كذابه

حسين: الان ولا كلمه تدخلي تشلي ثيابش وتلبسي ويلا مع زوجش واعتذري له

كمال ولا عاد ادا كلمه صح تخارج في هذا الموقف، بس من هذه الي تعرفه وتعرف قصته

قبل ساعات
نسيم دخلت المجموعه حق صحباتها تعاتبهن ليش ماقلتين لي تمكين خطبت وتزوجت ووو
وقالين لها ماشي وشلت رقمها وتواصلت مع تمكين

تمكين ساعتها فهمت الي حصل مع كمال كله، وطلبتها تنكر الموضوع.





في مصر.. بيت صاحب ابوها..

بعد مجابره وشافنها

دخلين في المطبخ يتكلمين زوجه صاحب ابوها وبنتها الكبيره على تمكين

خرجت مرت صاحب زوجها : يا اختي ذلحين اسألش بنتش مخطوبه؟

ام تمكين ضحكت: ماشي مش مخطوبه

تمكين احرجت نزلت راسها وداخل نفسها ( والله لو تقدمو لي وهو شاب كويس لاوافق واقهرك ياكمال والله لاقهرك ، واتزوج واخليك تندم انك تخليت عني)


مرت صاحب زوجها: بنتي المزوجه بتسأل يشتو يخطبو لاخو زوجها هو هنا بيدرس ولد محترم ومقتدر ومعه شقه مجهزه منه كله، كان يهمو يروحو اليمن يدورو له، بس جت نصيبه هنا ، اذا مش ممانعه عيجو اهله بعد شويه يشتين يشوفنها

ام تمكين: والله مانا داريه ماقلش

مرت صاحب زوجها ضحكت: انا ماعرفش كيف يتكلمو الناس وكيف يدخلوا للمواضيع هذه، ع طبيعتي تحاكيت بدون مقدمات ورسميات




تمكين محرجه قوي

البنت الكبيره بتسألها: انتي ايش رايش ي تمكين، انتي صاحبه الرأي

تمكين محرجه شافتها واشرت مدري

ام تمكين: في الاخير القرار لابوها ،يعرف ويشوف ويسال ويقرر

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

10 May 2025 22:26

تمكين ضحكت( داخل نفسها شعور وقرارات جديده بعد زواج كمال) : خلاص ماعد شاتدلع واتشرط، الان لو يجي اي حد تشوفوه مناسب قرروا انتو .

امها فرحت: عيجعله صدق
تمكين : مسرع امي يفرحوا

بياكلوا، شبعت قبلهم عشان الرساله الي لمحتها منه، نفسها تشوف ايش كتب لها، قامت فتحت تلفونها وانصدمت وهي بتقرا، خافت ( ليش انفضح؟) وايش فعلت انا ايش من خراب! ردت له: ( مابتقول؟ مش فاهمه شي ؟ ايش فعلت انا! انا الانانيه؟ اخرب بيتك ليش ؟ وليش انفضح؟)

مارد عليها ، مرااااعيه وهي متبرقطه وبتفكر ومتوتره

ابوها: هيا تمكين ، قومي البسي ، نسير معنا مشاوير

تمكين بتاكل نفسها ليش مايرد وايش فعلت: مشتيش اجي معاكم
ابوها لاحظ ملامحها تغيرت: مالش؟ او في شي؟

تمكين حاولت تخلي نفسها طبيعيه: لا مابش شي، بس مابش نفس اخرج

امها: مش هو على ماتشتي، ماشخليش وحدش في البيت قومي معنا ، نشتي نفعل فحوصات

تمكين بضبح قامت تلبس وتتجهز وكل شويه تفتح تلفونها، وتخلي وضع رنين الهاتف اعلى شي عشان تسمع نغمه الرساله لما يرد

في المستشفى...
الدكتور: الفحوص تمام، وظائف الكبد متحسنه عندك ... بيتكلم بقيه التعليمات

تمكين جالسه منشغله بتلفونها، ولا رد.

خرجوا وهم في الطريق

امها: مالش يابنتي بينحاكيش وين حسش

ابوها: مدري مالها اليوم قلبت علينا فجأه، خلاص ماعنزوجش

تمكين: مابلا معي شويه مشاكل بالعمل والمكتب

ابوها: تمام ، عادي ، مفروض قد تعودتي، لاتجلسي تتبرقطي هكذا، ماشي ابوه العمل هذا غلقي المكتب وافتهني

تمكين: ماشي ماله دخل المكتب

ابوها شاف اعلان دورات تصوير احترافيه، :جي ندخل نبسرلش لو في دورات تحبي تتعلميها

تمكين دخلت معهم كم لها بتدور في النت معاهد ومواضيع حابه تتعلمها وتتطور فيها بس الان ماعد لها نفس لشي تشتي تفهم ماله وايش الموضوع

في اليمن...
كمال نكز من نومه تلفونه بيرن جاوب: الو، من معي

اخو غاده: معك حسين نسبك

كمال: اهلا يا حسين

حسين: راقد لذلحين ! الساعه ١ ظهر، ماداومت؟

كمال: من اين واحد له نفس يداوم،

حسين: وانا اتصلت لك اسالك مالكم، خير ماحصل، قلت شاسمع منك ساع ما سمعت من اختي

كمال: ماقالت لك؟

حسين: جي تغدا ونخزن ونتجابر سوا

كمال: ماشي تغدا شاشل قات واجي اخزن

حسين: مراعي لك غدا قطبه، سلام...غلق

كمال بيتمطط ويتقعم بيقلب تلفونه شاف ردها ورسالتها

دخلت امه لاعنده: كمال ، وين مرتك.؟؟ اتصلت امها تعاتب ليش بنتها حانقه مادريت ماقلها مش انا داريه ايحين خرجت، ماوقع بينكم؟

كمال غلق تلفونه مارد على تمكين: وجلس يكلمها

امه : ومن هذه الي كنت تشتي تخطبها

كمال : اختي في الجامعه قبل غاده عرضت عليا فكره اخطب واحده

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

08 May 2025 01:15

كمال : اجلس انت الا تشرط، واخر الشهر حين تحيرف تدور اي مشروع وعمل تدخل فيه، وافق وانت فساتين فساتين مافيها لاتلبسهن انت، ضحكك

ابراهيم رجمه بالوساده:اهدأ وانت جاي يفصل
كمال بضبح بصوت عالي: قلنا اطلب الله

مُهاب سمعه : ايوه هذا صاحبك شكلي شاشغله بدلك.
ابراهيم: نسير ندور منسقات الاعراس نعرض لهن فساتين من الصين سمول لارج مديم اخرتي

كمال ضحك : وعادها عتقلك تشتي فستان حوريه البحر ، ويد الضفدع مدري جلد الحنش وجلد النمر وهي اول ماتبسر شوصري( صرصار) يسمعوها الجن والانس

جلسوا يضحكوا ، قفل ابراهيم وجلس يجابر كمال

كمال: مالك بتدلع ياخي

ابراهيم: مدري الولد بيحب،  بيدعم حبيبته، اخاف يفلتها و اقرح جو، خليني بس في عملي ، وانت مالك ماتجي تخزن معنا ، جيت ذلحين

كمال: ياخي الحب هذا مشكله، خرجت من البيت من تحت راس الدحس
ابراهيم: ما انت لحالك محد قد حب ثنتين الا انت، ابليس مش قادر عليهن بيفتجع منهن وكيدهن
.كمال: والله انه صدق ، يعني مرتي مالقيت من البلاد هذه كلها الا صاحبه البنت الي حبيتها وتقلها كان عيخطبها واوصل لك على تحقيق

ابراهيم ضحك: تستاهل من اكل بالثنتين اشترغ

كمال: وهذا صاحبك رغم ثقالته، الا انه فكرته ضخمه اشتغل ماعد بتخطى الا التجاره

ابراهيم: بالعكس والله انه مكافح ماشاءالله عليه ،مابلا خايف اودف حين انا وسيط بينهم اشتي عمل مضمون

كمال: لو مش هو بياع توكل وسيط ولا ماوقع
ابراهيم: ان شاءالله خير , قد شابكر اعرض فكرته وعلى الله

في مكان ثاني..

غاده رجعت تراسل نسيم: مستغربه حين ذاكره تفاصيل قصتي ، نسيتها انا

نسيم : يمكن نسيتيها لان بعد الزواجه الحب يتغير

غاده: بس احنا ماحبينا بعض هو الموضوع ومافيه اخته اختارتني له

نسيم ردت ضحكه وعلامه تعجب: صدق ؟ هو هكذا كان ، بس حبش وخفتي يوافقو على الي تقدم لش وسمعت اشاعه مدري صدق او لا، قالت لي واحده ماشقلش من هي لاتسالي حلفتني، انه من حبش له دعمتيه بمبلغ يقطب يخطبش قبل مايسيروا لاعند ابوش الي حاكين امش
الصدق قصتكم قصه.

غاده بينها وبين نفسها: ياربي شاجنن من اصدق محد راضي يتحاكا وايش من مبلغ ( هو ماعيتحاكى الا لما اوريه قلبتي)

قامت تلف ثيابها( عارفه انه يحبها وعيفعل اي شي يرضيها)

في مكان ثاني ...

كمال: تشتي الصدق والله اني ندمت اني اخترت هذه وخطبتها، اكتشفت ان حبي كان لهذك بس مادريت الا بعد ماسارت مني. فرق شاسع ياخي فرق وين كان حسي

ابراهيم: ذلحين ظلمت واحده لاتظلم الثانيه، حرام صدقني حين حسيت انك ظلمتها بتظن بتحبها اكثر، امسك الي في يدك ولا تجلس تلاحق اوهامك

كمال: ياريت وهي تطلب الطلاق...



ت.ع.خ

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

07 May 2025 23:39

كمال اشترا عشاء وجعاله وعصاير وكل الي تحبه و وصل فارح ، شافها على نفس جلستها وبجامتها: وين السهره

غاده: مستعجل ع روحك

كمال: قد اديت عشاء معي ، حسيت ان انتي كسله ماعتفعلي شي

غاده بضبح: لو عليا لافعلك عشاء انت

كمال بيفتح اكياس العشاء: مالش بتقلبي صور وتتكلمي هكذا، قلتي ارجع! هيا اقربي

غاده: مشتيش خليه لك ، لوما تقل لي ذلحين مابينك انت وتمكين؟!

كمال خاف فكر انها عرفت بموضوع الفلوس : قصدش الفلوس الي ناولت حنان تدي لها

غاده ضحكت لانها قد حاسبتها وهو عارف انها حاسبتها مقدم: فلوس حق ايش؟

كمال حس براحه شويه انها ماعرفت الا الفلوس: هذا صاحب كان يشتي يشتري منها معدات تصوير كنت وسيط بينهم

غاده: وايحين لحقت لهذا كله! وماقلت لي

كمال: ومادخلش بمشاريع اصحابي اقلش !

غاده بسخريه: اهااا مادخلني! وانت حتى اللبانه لو اشتروها بتحاكيني، ماعلينا شاصدقك في تيه، بس ايش بينكم

كمال: بيننا عقد بيع وشراء

غاده: من باع من ومن اشترا من

كمال بدأ يخاف: ايش قصدش؟

غاده: بطل لف و دوران وتحاكا انت احكي لي ايش بينكم

كمال: لاحول ولاقوه الا بالله! مابتدوري ؟ مافي نفسش

غاده: كنت تعرف تمكين قبل عرسنا

كمال: تمام وبعدا

غاده: بطل اسلوبك هذا، تعرفها ؟

كمال: ماشي

غاده: كيف ماشي وانت كنت عتخطبها؟

كمال ضحك بمراوغه: اخطب تمكين! ؟ وانا خاطبش ؟

غاده: قبل ماتخطبني

كمال: لو قبل ماخطبش ف انا حر اخطب من ماشتي مالش حق تحاسبيني ! اهم شي خطبتش انتي خلاص

غاده: يعني تشتي تقلي مابش بينكم شي؟

كمال( ظن ان تمكين هي الي خربت بينهم) بضحكه سخريه
: هي قالت لش اننا اشتي اخطبها!
غاده: ماشي صحبتها

كمال: ومادخلني بصحبتها ! او هي امي طلبتها تخطب لي، عتوقعي مره عاقله وتبطلي هدره نسوان

غاده بدأت تحس انها مقتنعه بكلامه بس مصدقه البنت ادت تفاصيل عنهم كثيره اكدت لها انها مش مشبهه عليهم

كمال: قومي تعشي ماعد بش نفس سديتي نفسي تدوري مشاكل دوار

غاده: انت الي سديت نفسي ، كيف اصدقك؟ شاسأل تمكين

كمال سحب التلفون من يدها: بطلي جنان ، بينقلش حتى لو كنت اشتي اخطبها ، قد خطبتش

غاده رجعت تلفونها منه وفتحت محادثه بينها وبين تمكين وبتسجل : يعني تعرفها من قبلي؟

كمال خايف يكذب وتكتشفه: ايوه

غاده: كيف وايش بينكم؟ اشرح لي كل شي

كمال: كانت اختي ( اخته من ابوه) صحبتها وهي الي قالت اخطبها وحاولت تقربنا من بعض بس انا رفضت ماعجبتني اختيار فاتن الي مانطيق بعض و زد البنت شفتها وماعجبتني

غاده تشتي تحذف التسجيل ارتسل عليها حاولت ماتبين له

كمال قام يدي ملعقه ويتهرب منها

غاده رجعت حذفت التسجيل شافت تمكين اونلاين بتطبع

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

01 May 2025 20:03

تمكين شافت امها نعست شويه وابوها خرج مع اصحاب
دخلت الغرفه الي جهزتها امها لها ،رتبت اشيائها ، وبتتفرج من الطاقه ، دخلت امتدت على سريرها، وفتحت تلفونها ترد على الرسايل صحباتها اهلها اختها

فتحت محادثه ترتيل وبتطمنها وتكلمها وتحانكها : والله يجنن الغدا اكلت لما قلت بس، عقبالش لما تجي،

ترتيل: غرفتش رجعت طافيه مثل فتره انطفائش

بعد مارسلتها ترتيل انتبهت رجعت حذفت الرساله لدى الجميع

تمكين ردت عليها بضحكه: وانتي افتحي ستايرها وهويها ونظفيها مش اجي وقدي مسكونه ارواحي و ارواح النذل بتحوم

ترتيل ضحكت: جبرش رجعتي العسوله، قد حذفت لايدخل نفسش قلت مدري لو رجعتي نفسيه

تمكين: طيب اتنمري عيجي لش يوم تحبي بس يارب تختاري الشخص الصح ويكون احلى حب بعد ماتنخطبي ، يجي اول من الباب، القلب غالي قوي ياترتيل ، انتبهي تسلميه لحد الا وجا من الباب.

ترتيل: حتى الي عيجي من الباب ماشسلمه اي حب الا لما اشوف الحب صدق و ارد بالمثل

تمكين: قد امي تشتي اجمع فلوسي اذهب نفسي مش داريه ان الي جمعته، اديته للي عيخطبني وهرب يتزوج به ( هههههههه)

ترتيل: حين عاد لش نفس تزبجي

تمكين: اصلا ي حبيبتي بعد ماتفوقي من الصدمات يرجع عقلش ،ولما تكرهي يرجع قلبش يدعم عقلش باالتفكير الصح، ساعتها تستحي من نفسش قوي كيف كنتي غبيه

ترتيل: يلا انتي ضحيتي بتجربه ومش وحدش استفدتي، حتى انا استفدت.
تمكين شافت رقم رسل لها خرجت من محادثه ترتيل وفتحت الرساله: ( تمكين رجاء سامحيني بس، فلوسش لوين اردها، اشتي ارجعها ، انا نادم قوي قوي وبينتعاقب بسببش )

ردت عليه : لو تشتي تردها معك المكتب اوصل لاعند واحده اسمها حنان وقل لها هذا حق تمكين وصليه لها وياريت بعدها ماعد اشوف حرف منك واحترم نفسك رجاء لاعد ترسل خلي عندك شويه دم.

كمال: تمام وانا اسف لو ازعجتش.

تمكين حظرت الرقم ورجعت تكلم ترتيل وبلغت حنان انه يمكن يجي لاعندها شخص يسلم لها مبلغ تاخذه وتسلمه لاختها ترتيل ،
وتقلب في النت تدور معاهد او ماجستير لو ينفع تكمل تعليم في مجال التصوير والتنسيقات للاعراس

بعد المغرب خرجت هي وامها و ابوها يتمشوا ويعشوها خارج

تمكين مبسوطه كانت محتاجه لهذا التغيير في حياتها ..


وهم جالسين مر واحد من اصحاب ابوها مع عائلته سلموا عليهم وتعرفوا على تمكين

زوجه صاحب ابوها بتسلم على تمكين: ماشاءالله على العروسه

تمكين شافت امها بنظره وبعد ماسلمت جلست جنب امها: حتى هنا صاحباتكم مثلكم ، قدنا عروسه


ام تمكين بتعرف مرت صاحب زوجها : معها ترتيل وتمكين وعبدالوهاب و محمد بس محمد عايش في المانيا مع زوجته وجهاله


ت.ع.خ

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

01 May 2025 20:02

كمال رجع: تمكين
تمكين وقفت: نعم؟
كمال: لو سمحتي خليني قبل ماتسافري اقلش
تمكين بتشوف الوقت: شي متعلق بالصور!
كمال لفت للباب يشوف مابحد غاده: اشتي اقلش اني ندمان ومش متهني ومش مرتاح وبيندفع ثمن كل لحظه غبتها عنش
تمكين بابتسامه تعجب: طيب.. مشيت خطوتين

كمال: رجاء اوقفي بس دقيقه

تمكين: وقفت لك دقايق وسمعتك ايام وحبيتك شهور وكرهتك بيوم ،
كمال: هذا الي قاهرني ماتوقعت تكرهيني ،كنت ضامن حبش واننا قادر ارجع لش وعتسامحيني، ماتوقعت تكوني بهذه القسوه، قوا تفهميني احنا بني ادم بنضعف مش انبياء.

تمكين: وهذا الي قاهرني ، انك ماعرفت قيمتي الا بعد ماخسرتني ياريتني خسرتك من اولها و لا اقلك مافي فايده لاي حرف بيننا زياده.....مشيت وخرجت

غاده رجعت للمحل شافت تمكين على خرجتها: في شي ؟ احنا قد دفعنا مقدم صح؟ وكملنا اخر مبلغ يوم العرس

تمكين : ايوه مابش شي... مع السلامه..مشيت طلعت سيارتها

كمال واقف بيبرر لغاده: ولاشي بس طلبت لو نشتي نكبر صور اين تنصحنا

تمكين وهي بترجع السياره لورا عينها على المرايه تشوف خلفها مافي سيارات وعين عليهم وهو واقف يبرر لها كذباته مثل ما كذب عليها...
خرجت ومشيت في الطريق.( ياريتني لعنته، ياريت بس مايستاهل انزل نفسي )

بعد ايام جهزت نفسها ووصلت المطار وكل اهلها معها شافت ابن خالها واقف يشوفها وفيه حزن مش هاين عليها تعشمه وتعلقه وهي اكثر حد عرف وجرب هذا الشعور..
قبل ماتمشي لبوابه المغادره سلمت عليهم وحضنت ترتيل وبكيت في حضنها وحضن اخوها وبنات وعيال اخوها...
ودعت بنات خالها وبقي واقف ابن خالها قربت منه: ارجع ان شاء الله قريبا في عرسك انت ولا ترتيل ولا واحده من بنات خالتي عشان اصوركم والتذكره ع حسابكم، اهم شي عروسه تشبه طيبه قلبك، موفق ي اخي الثالث من بين اخوتي.

ابن خالها كان قد عنده ردها من خواته وبدأ يتقبل رفضها وانها تشوفه اخ: توصلي بالسلامه واي شي تحتاجيه انتي بس تأمري امر.

سمعت نداء الطائره مشيت

بعد الإقلاع بنص ساعه

فوق الطائره مبتسمه وبتشوف الغيوم بتكلم نفسها: كيف كل واحد فينا قادر يعيش راحه البال وبيده يعيش العذاب، وانا ضيعت وقت كبير وانا مموته نفسي عشان من، طلعت الحياه حلوه وواسعه ومابتوقف على حد ، بس احنا الي بنوقفها ونضيع من اعمارنا، اسفه يا انا لو حملتش فوق طاقتها بيوم من الايام ووعد من اليوم وصاعدا ، اعوضش على كل لحظه زعل وضيق عشتيها..


في اليمن عند اعز صاحب له

كمال: والله ماعرفت اني احبها الا بعد ما راحت من يدي ، لدرجه ان البنت الي حبيتها بدلها وتزوجتها هي، اكتشفت انها مش بغلاوتها، تقول عتسامحني؟ عترجع لي !

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

30 Apr 2025 20:43

ترتيل بمشاوره: شوفي ابو قلصات( كانت تمكين تسميه هكذا وهم صغار) ، مسكين عادو لحاله في عالم تمكين.

تمكين دكمتها: اسكتي بدأنا حش.

دخلين المطبخ بدأين قربين الغدا وبعدها غسولين وطلعين الجبا بجعالتهن..

بنات خالها وبنات خالتها ، قررين يلعبين صراحه.

تمكين: انا داريه ماتشتين تلعبين هذه اللعبه الا عشان واحده تحكي اسرارها، بدل الاعذار باللعبه ،اجلسين ونتجابر وبس

بنت خالتها: شكلش خايفه تتحاكي، طالما هكذا انا مصممه، نلعب وانتي اول واحده

تمكين جلست بكل ثقه: تمام
ترتيل مستغربه قوه اختها توقعتها تكون اضعف من قبل

بدأت اللعبه والاسئله..
دور بنت خالتها ترد على السؤال: ايش مواصفات عريس احلامش( يكون وسيم ، مزلط، مرح)
لعبين مره ثانيه دور تمكين ترد ع نفس السؤال
جوابها( يحبني بصدق، يكون وفي ، وطيب وصادق ومايتخلى عني ابدا )

كلهن ضحكين عليها بسسسس ! طلعتي مسكينه قوي مواصفاتش عاديه لو يطلع بشع! لو يطلع بخيل ، لو هو حراف)

تمكين جاوبت: لو بشع بسبب حبه لي وتعامله الطيب شاشوفه اجمل شخص، ولو بخيل عيتغير لان لو يحبني ماعيبخل عليا، ولو حراف مش عيب لانه يحبني عيفعل لي كل شي وماينقص عليا شي)

بنت خالها: جبر العاقله ، على هكذا مواصفاتش في اخي عيموت عليش

تمكين ضحكت: هيا بس خباله كبرنا ماعدحناش جهال.

بنت خالها: تمام استحي لش بس ، عتبسري.
ترتيل بممازحه: لاتجلسي تعلقي اخوش باختي صميل، اختي واعرفها راسها يابس قالت اخوه يعني اخوه.

بدأت بنت خالها الثانيه تسأل لما شافت تكرر دور تمكين: طيب معش حد في حياتش او بتحبي حد؟ طالما واخي مدعممه له.

تمكين: مابش في حياتي حد الحمدالله ، مشطبه، واخوكن اخي وعلى عيني و راسي الله يوصلني حين اصوره في عرسه هو و زوجته، .

بنت خالها: خلاص مابش داعي للعب ، خلي الكبار يسدو

ترتيل: قد عتسافر الاسبوع الجاي، يمكن ماتلحق جمعتنا الاسبوع الجاي، جت صميل اليوم معها عمل خيرات

بنت خالتها: ماشاء الله ياتمكين قدش مشهوره قوي ، قد اغلب صحباتي مايشتين الا نتوسط لهن عندش

تمكين حست بفرحه وشوية امل انها ماتنست من الناس : الحمدالله، رغم قد به غيري خيرات ومشهورات وماشاءالله عليهن.

بنت خالها: وانتي والكل الصدق مافرقتي عنهن.

بعد مارجعين البيت..

تمكين كانت نفسيتها متغيره شافت مكانتها عن الكل مثل ماهي ماتغيرت، هي الي تغيرت وماكانت حاسه ع نفسها وفكرت ان الناس هم الي متغيرين عليها، المواقف حق يومها هذا زادتها شجاعه وقوه مواجهه وهي بتعدل الصور حق كمال وعروسته بدون ماتنزل لها دمعه او تفكر بماضيهم سوا...
كل ماتشوفه في الصور وتتغير ملامحها لا اراديا ، تتذكر انها عتطور نفسها اكثر وتبدع

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

30 Apr 2025 20:43

ترتيل: اختي دلا عليا، سكتي شهور وجيتي في يوم تقلي لي اشياء مش مستوعبتها، يعني وهو بيحبش عرفها!

تمكين: ايوه ، يعني ليش كان يشتي يخبطني!

ترتيل: عشان توفي له حق الخطبه لها، سألتيها متى خطبها

تمكين: لا، مايهمنيش يخطبها يتزوجها ، خلاص مش شايفته بني ادم عشان ازعل عليه ،بس الله يوريني فيه.

ترتيل : ايش عتفعلي؟
تمكين: في ايش !
ترتيل: فلوسش، معش فرصه تهدديه بها ولا تقلي لمرته

تمكين: قلدش الله اسير اطلبه فلوسي، طز فيه عيخرجها الله ماعد اشتي اشوف صورته ولا بيني وبينه شي مشتيش افتح باب للبهذله، في الاخير لاكنت خطيبته ولا شي رسمي بيننا، استاهل لاني اديت قدر من ورا اهلي لشخص مايستحق

ترتيل: انتي عارفه ابي وامي يشتو واحده مننا تسافر عندهم تنتبه لهم، قلت اسير انا بس معي جامعتي، وانتي عملش حرام، بينقل اسير وارجع اختبر

تمكين: لا ، اجلسي تمي جامعتش، وانا شاسير والعطله تعالي وانا برجع عيكون معي حجوزات وموسم اعراس

ترتيل: حلو فكره ضخمه ، خلاص اكلم اخي انش عتسيري يقطع لش تذكره ويحدد لش متى تجهزي نفسش

تمكين: تمام بكره، الان تاعبه اشتي ارقد ، ولا فيني طافه للكلام .

ترتيل: يلا ارقدي ، تصبحي على خير.

تمكين جلست تتقلب فوق سريرها وهي بتتذكر تفاصيل رده فعله لما شافها وبتكلم نفسها( مابسمح لنفسي ارجع يضيع نومي وصحتي ونفسيتي)
بدأت تتذكر نصايح قرأتها في كتب ساعدتها على تغيير شخصيتها والتعافي من الصدمات ( خليني اشغل تفكيري الان ، كيف اطور من موهبتي ، ونفسي ، ايش خططي لقدام)
بدأت تفكر لما تسافر لو تدخل دورات تطورها ، ايش تدخل بحثت في تلفونها شويه وكتبتهن في ملاحظه ، قرأت اذكار النوم والسور الي تعودت عليهن) و رقدت

قامت الصباح


حست براحه انها قدرت ترقد بعد اليوم الصعب الي عاشته والي فكرت بعده باترجع ضعيفه، بس اوقات القسوه تصنع قوه للشخص وتخليه يتجاوز ويتخطى بسهوله..



ثاني يوم ...

اخت كمال: مبروك ياعريس ، وين عروستك؟

كمال: داخل في الغرفه

اخته: انا ساكته من امس ماقدرت اسألك من ادا تمكين تصوركم

كمال: مدري بينقل اختش بس منقطع تواصلنا

اخته: معقول انها بالعاني قالت لتمكين

العروسه سمعتهم تدخلت : انا مرت تخي كلمتها ليش مالها؟

اخته بتغمز وتسوي حركات لاخوها بصوت واطي( هي عارفه؟)

العروسه: مالكم ايش في ؟

اخته ضحكت: ولاشي ولاشي ، طلعت ابارك لكم مش افعل لكم مشكله

كمال ضبح منها لفت لعروسته: هي اختي هكذا هبلا ماتعرف تتكلم ، شكلها منبهره بالمصوره بس ماعرفت تمدح

العروسه : ابشري باذن الله في عرسش اديها لش

اخته: كمان! هههه تشتو تكرهوها في التصوير

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

29 Apr 2025 17:27

البارت الخامس


ترتيل: شم حالي، ايش اديتي لنا ياتمكين
تمكين سارحه بتتذكر اليوم العجيب الي كانت فيه ،حاسه من حولها صياح وضحك وسفاط واصوات
عبدالوهاب بصوته الجهوري خلاها تنتبه: تمكين مااالش يختي ماتفرعي بينهم شوفي ايش فعلتي لنا

تمكين شافتهم كل واحد بيختار وجبته المفضله والي يشتي سبايسي والي بيدور دجاج مش لحم ويتهازرو ويهربوا

ابتسمت وهي بتشوف الجنان حقهم، كانت مجنونه اكثر منهم بتسأل نفسها( انا كبرت او هو كسرني من الحياه؟ ليش انا تغيرت؟!)

مرت عبدالوهاب: كيف كان عملش اليوم بعد راحه، قد شكلش باين انش تاعبه

تمكين: هو تعب العمل هذا وقفه من حين سرت وسيره وجيه
كلهم جلسوا اختها وعيال اخوها وقربوا الاكل للوسط وبياكلوا سوا

تمكين شبعت رفعت معهن وبيتضاربين ياخذين الصحن منها ومحد يخليها تسوي شي ، دخلت غرفتها، امتدت فوق السرير بتشوف السقف و دموعها بتنزل
ترتيل دخلت وهي بتنفخ يدها: حرقت بالشاهي

تمكين خافت عليها قامت تشوف وادت لها مرهم

ترتيل شافتها عن قرب عيونها محمره : بتبكي؟
تمكين لفتت لها وهي بتفتح المرهم وتسويه ع يد اختها

ترتيل: مش قلتي خلاص و

تمكين قاطعتها : تعرفي انه العرس حق اليوم حقه هو وياها

ترتيل سحبت يدها بصدمه ومسكت يد تمكين: احلفي، كذابه

تمكين جلست تضحك ضحك هستيري ودموعها بتنزل: وايش!!! قلك قصه حب! متخيله؟

ترتيل: يتهيألش مش معقول يحب وهو كان يحبش مجنون فيش

تمكين مسحت دموعها وبعصبيه: الله يلعنه ليش جالسه ابكي انا، مايستاهلش

ترتيل حضنتها: عادي ابكي ابكي لو عترتاحي

تمكين في حضن اختها بتتذكر بعدت اختها: تعرفي انه
الحقير خدعني
ترتيل: تمكين انتي مستوعبه انا مش فاهمه ايش حصل معش مش عارفه كيف حبيتي ، كل ماكنت اسألش تقلي كما خطبني شاقلش، عادش صغيره.
تمكين: مش صغيره ، لازم اكلمش عشان لاتوقعي بغلطي وماتصدقي حد يضحك ع عقلش

ترتيل: محد عيضحك عليا

تمكين بضبح: قلت مثلش، جلس يحوم بعدي بعدي بعدي، ادا زوجه اخوه للجامعه

ترتيل: هو بنفس دفعتش؟

تمكين: لا كان سنه ثالثه حاسوب، وانا سنه ثانيه لغات.
وجا عشان اخته معنا في دفعتي بس اخته من ابوه كان مجبور عليها مايحبها ابدا وبينهم مشاكل ابوه يغصبه يوصلها ويروحها وكان يشوفني وليوم حكت له عني اننا اختلفت معها وقلك عجبته اننا ع مبدأ واخته ع غلط ، اخذ حسابي منها وتواصل معي ع اساس هي اعتذر لي وتصاحبنا وفكرته هي نفسها

ترتيل: اووف ولما تلتقين بالجامعه ماتقلش شي كان بينكن

تمكين: كان عطله وقتها بعد شهر صارحني انه هو وانه معجب وسوا حساب باسمها عشان يوصل لي

ترتيل: تمكين كان بدايته معش خداع .
(

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

29 Apr 2025 17:27

البارت الثالث

كمال: تمكين انا داري انش زاعله بس اسمعيني

تمكين خرجت من الغرفه لاعند العروسه: كملي سريع عشان ماينفعش اجلس معه بالغرفه والصوره وحدي، لازم حد جنبي .

العروسه كملت تاكل شويه وقامت: طيب ، هو لطيف قوي وحبوب لاتستحي منه، عادي ، بس شاجي معش لو تحبي.

تمكين بتسمعها وراحمه لها وبينها وبين نفسها: ماعتعرفيه اكثر مني.

كمال كان بيدخن ومتوتر شويه وبيفكر ايش معها ، من الي قدر ينسيها حبه ومسرع باعته هكذا، حتى لو كذبت عليه انه مش فارق معها ، بس كيف قدرت ماتتأثر؟

العروسه: حبيبي خلص الدخان بسرعه، عشان قد الساعه ٢ ، والنسوان عيجين من الساعه٣ نشتي نقطب.

كمال بتوتر: طيب.
العروسه بتسأله : كيف مكياجي ماشفتك علقت والتسريحه وشكلي
تمكين رن تلفونها ردت: حيا ، الحمدلله، وانت كيفك؟
كمال اذنه مع تمكين مش سامع العروسه ايش بتقله:ها
العروسه: ايش ها
كمال مطنش وبيسمع من هذا الي بتكلمه رجال
تمكين ضحكت على سؤال اخوها( صدق خرجتي تشتغلي؟.ماصدقت ترتيل): الا صدق ، والله صدق .
رفعت راسها تشوف ااي بيحصل حولها لما سمعت العروسه تقله( مالك مربوش لهذه الدرجه جمالي سحرك)؟
شافت كمال عينه عليها، حبت تغيضه اكثر وترد ع اخوها: تسلم حبيبي على اتصالك وسؤالك، اول ماخرج شاكلمك.
كمال : عادي لو البيت قلقين عليكم اتصلي كلميهم ليش
قفلتي ؟
تمكين: ماقد شفت زباين مهتمين مثلكم ( ضحكه مستفزه) كان يكرهها لما تتليقن عليه

العروسه لفتت له باستغراب
تمكين : اشرحي له لو سمحتي الخطوات الي سويناها، يلبس دبلته وساعته ويتعطر ويربط الكرفته ويلبس الكوت
العروسه بتساعده وتوريه كيف سوت
تمكين بتصوره وهو بيلبس الدبله وبقيه الخطوات ماسكه دمعتها بالقووووه حاسها روحها مم داخلها بيرجف من الغضب المكتوم وفجاه عطست( فرحت بالعطسه عشان الدمعتين الي خرجين منها غصب عنها)
بعد بقيه التفاصيل وهم يرقصوا وياكلو الكيك ويشربها
،ولقطات حب بينهم بتصورها بعيونها وبتحرق مشاعرها..
اخر لقطه..:( الاثنين بيدهم بيكملو شكل قلب)
العروسه: هذا قلبي الي سرقه
تمكين:هيا طالما سرق قلبش انتبهي لذهبش
كمال بهرر خاف تتكلم اكثر
العروسه ضحكت
تمكين بنظره تحدي شافت كمال، ورجعت تبتسم للعروسه:خلاص تقريبا كملنا صوركم، قلي لهم لو يشتي يخرج، عشان النسوان يدخلين، وانتي اطلعي غرفتش.
خرج العريس بعد ماخلص فقرته، وطلعت العروسه غرفتها

تمكين طلعت معها تصورها لحالها عدة صور
العروسه: هم كلهم العرسان هكذا الي تصوريهم سامجين! مابيندهشوا ساع عريسي؟
احسه عادي لما شافني!
ماستغرب؟
او فرح او اندهش!
حتى ماتحمس معي مثل يوم ماتصورنا في العقد كان قوي مجنون مش قادر يبعد عينه مني ، وماسك يدي.

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

29 Apr 2025 17:26

البارت الأول


"أول خطوة أخذتها بحق نفسي كانت أنه اقول ( كفاية)

مافي شي بيتغيّر فجأة.


كل القصه ومافيها
أنني اليوم الصباح، شفت نفسي في المرايه كيف قد انا ،
وبكيت.

بس تعرفي ايش؟ بكيت بطريقة مختلفة.
مش بكاء الانكسار، مابلا بكاء الشوق لنفسي.

كيف سخيت على نفسي وضيعت نفسي على شخص مايستحق .

بس يكفي.

كفايه انتظار
كفايه الوم نفسي واعاتبها،
اخذ مني وقت وياريته يستحق الوقت هذا كله

**
اختها ( ترتيل) : كم كلمتش كم نصحتش، انتي حتى ماسمحتي لحد يسألش مالش، عزلتي نفسش في الغرفه ، تمكين قدلش تسعه شهور وانتي مفلته عملش ومناسباتنا والجلسه معنا وبتتعذري بانشغالش وانا عارفه انش كنتي مكتئبه، بس عنيده، شوفي اليوم محلاش ، الغرفه حتى تغيرت

غيرتي مكان سريرش!!

تمكين: ايوه .

ترتيل: اخيرا فتحتي الستاره هذه ودخل الضوء ، كل مادخل عندش و روتينش يبدأ الليل كم لي من الضوء في غرفتش.

تمكين بضحكه خفيفه : خلاص انتو مايعجبكم حد يتغير ولا يكتئب، قوا اختي ساعديني معي اليوم تصوير عرسان ، اشتي اتجهز بسرعه اصلي واخطى ، تفاقدي لي شنطه الكاميرا والذواكر وكل شي موجود ؟؟؟

ترتيل : واووو ، والله انحنا رجعنا صدق اخيرا ،عترجعي لعملش.

تمكين: اوف ماكنت اشتي اسير بس غصب ، مرت اخو العروسه كانت مساعدتي قبل ماتتزوج وتراشتني خيرات.

ترتيل: احسن شي سويتيه انتي وياها، طيب شاجهز لش كل شي .

تمكين: سيارتي مدري واقفه أو ....

ترتيل قاطعتها: لوما اخوش يتفاقدها ويعبيها بترول ويخرجها كل فتره والثانيه أنها راقده ساعش.

تمكين بابتسامه: ضروري اللقانه ضروري ..

ترتيل حضنتها قوي ودمعت: اخيرا ابتسمتي وتكلمتي و زبجتي، وحشتيني قوي ، كنت مقهوره عليش واتمنى تكلمي اختش بما انش هدأتي ، ايش الي حصل معش وسبب لش الاكتئاب هذك.

تمكين تنهدت وهي بتلبس ثياب الصلاه ،فرشت السجاده وبدأت: الله وأكبر


ترتيل رتبت لها شنطه التصوير وغلقتها : كل شي جاهز، شاسير افعلش سندوتش وعصير ، كليه ع طريقش.

..
بعد ما خلصت وتجهزت خرجت في الحوش شغلت سيارتها، وبترتب شنطه التصوير في الخانه...

تمكين: كلمي عبدالوهاب اخي اننا خرجت معي تصوير بينتصل له مقفل تلفونه.

ترتيل : تمام الله معش، انتبهي لنفسش، عادش تعرفي شوارعنا!

تمكين ابتسمت : زباجه ،هيا ادخلي شافتح باب الشارع.


اول ماوصلت الصاله...

العروسه متوتره بتتصل كل شويه لعريسها: هيا وينك ، المصوره جت ، شرق ، نشتي نتصور قبل مايجين النسوان..

تمكين: عادي ،لاتتوتري، تعالي شابدأ اصورش ،امد مايجي

العروسه: تمام

تمكين: من نسق لش العرس ! تصدقي نفس فكرتي بالضبط والألوان الي قلت شاختارها لعرسي

العروسه بفرحه: عريسي نسق لي!

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

28 Apr 2025 22:02

قصتنا مش بس عن الحب ، هي عن الخذلان والغياب والصمت الي ماله اي مبرر، والصدمه الي حصلت بدل الاعتذار.
تمكين فتاة عشرينيه، معها قلب اكبر منها، ونيه صافيه لكل من دخل حياتها، بس دخل حياتها الشخص الغلط و راح مثل العاصفه بعد ما اخذ منها العاطفه،
سرق منها :- ثقتها ، أمانها ،احلامها،وبعض اشياء من مدخراتها ، سار بدون اي كلام، وخلا لها وراه فوضى كاملة
أسابيع من الاكتئاب، الإهمال، والبكاء الصامت.
لكن في كل قلب مظلم، شرارة ضوء صغيرة بتقاوم.

وهكذا بدأت رحلتها الحقيقية…
مش في الانتقام، بالعكس في التشافي منه.

"لأنك كنت هنا"

مش هي حكاية عن شاب غدر بحبيبته، ولكن عن بنت قررت أن تنقذ نفسها ، لما شافت نفسها في المرايه وقالت : انا رجعت ، وانا كافيه .

نتفق أن أقسى أنواع الخسارات، هي انه تخسر نفسك في سبيل حد مايستحق.

" وأعظم أنواع الانتصار، أنك ترجع نفسك قوية من جديد"

ابتعاده عنها ماكان مجرد نهاية قصة حب.

كان يشبه (سقوطً حرًا من مكان ظنّت أنه الأمان.؟)

سرق ثقتها، خفّتها، صورتها عن نفسها، و راح، كأن شيئًا لم يكن.

وفي صباح جديد اشرقت الشمس ، وشافت نفسها في مرايتها القديمة، وبدل ماتشوف وجهها، شافت شي أعمق :- سؤال بسيط، بس يخوف.

( اين سرتي؟ واين انا منش !)
ومن هذك اللحظة، بدأت الرحلة ، رحلة العودة، مش له، لنفسها.
بعدها رجع من كان هنا يوما ما..

لأنك كنت هنا


عجبتكم المقدمه ومتشوقين للروايه ؟؟

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

19 Sep 2024 00:14

بماذا تفكر الان ...!

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

11 May 2025 20:56

دخلين صاله الاستقبال حق النسوان
مرت صاحب ابوها وبناتها

بنتها الكبيره سليفه تمكين: تمكين عادي يشوفش نظره شرعيه؟ سألتي ابوش عيكلمه وخايف ينحرج

تمكين: استحيت اكلمهم، عادي يكلم بابا مايتحاكوش

بعد شويه كلام ومجابره
زوجه صاحب ابوها: و ماتقل خطبه بنتكم عن اي حد، وصينا كل شي من اليمن الاقمشه والذهب من الامارات ويارب يجعل في ذلك الخير ويتمم لهم وعقبال الفرحه الكبرى

ام تمكين: احنا اهم شي عندنا الرجال اخلاقه والباقي بيتعوض

حنان: وانا اشهد له الصدق ، ومعها معها باتعرفه اكثر بنفسها ويعرفها ويألف الله بينهم.

بعد شويه

ابوها: الله الله

راحت ام تمكين تجاوبه
زوجها: خرجوا الرجال باقي امجد يشتي يشوفها نظره شرعيه خليها تلبس وتجي

ام تمكين دخلت: البسي و دخلتي لاعند ابوك خطيبك يشتي يشوفك

تمكين حست باحراج قامت للغرفه وهي مستحيه ، كيف ادخل انا يمه

امها: عادي ادخلي قلتي السلام عليكم

تمكين: ماشي يخرج هو

امها : هيا من الدلع مافرقت امشي يابنتي شاسير للنسوان هن وحدهن عيب

تمكين لبست وراحت واقفه خارج المكان الي هو فيه بتداعي ابوها: بابا

ابوها: جي ياتمكين

تمكين ولا ردت مراعيه ابوها يجي

الاب وامجد منتظرين

تمكين ساكته

ابوها قام مبتسم: شكلها مستحيه

تمكين بتاشر له يجي

ابوها: هيا جي

تمكين مشيت خطوتين مسكت يد ابوها ودخلت، وبتشوف الارض مستحيه

ابوها مشي اكثر وهي وقفت من بعيد شويه

امجد وقف: مبروك الخطوبه ربنا يتمم لنا بالخير

تمكين ردت وهي موطيه وبصوت واطي محرج: الله يبارك

امجد يشوفها شويه ويستحي من ابوها ينزل راسه

ابوها : امجد درس هندسه مدنيه ، يعني مجال قريب من مجالش
تمكين استغربت رفعت راسها شافت ابوها: لا مش قريب من مجالي مختلف

ابوها ضحك: قلت اخرج منش كلمتين

امجد ضحك
تمكين رفعت راسها شافته و رجعت خرجت

ابوها : يلا اهم شي لحقت لك بسره

تمكين خرجت وبتمشي وهي مراعيه ايحين تنزل منشور تغير حالتها في الفيس لمخطوبه وتسوي منشور

دخلت عند النسوان وهن مروحات

حنان: خلاص حددو يوم ونفعل لهم حفله خطوبه سوا نترتب وتعزموا الي تعرفوهم هنا

ام تمكين: ان شاءالله...

بعد وداع وكلام ..خرجوا

تمكين جلست تصور لترتيل ومرت اخوها وبنات اخوها الهدايا والكسوه وبعدها دخلت صفحتها نزلت منشور وصورت الورد ، وغيرت حالتها لمخطوبه..

ابوها : ماشاءالله كل شي ادوه تمام، والولد يبان محترم.
شل حسابش الفيسبوك مني يشوف اعمالش وتصويرش اعتقد استئذان مني تتواصلوا، وانتي لاتزيدي ، اهم شي عندي تعرفيه تقتنعي به

تمكين احرجت وماردت عليهم...

ابوها: بدخل امتد اتوضا قد عيأذن مغرب

تمكين بترد على تعليقات صاحباتها

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

11 May 2025 20:55

جلسين يتجابرين واندمجت تمكين مع البنات حبوبات ونفس جوها وطباعها

بعد ماروحين فوق السياره..
ابو تمكين بيضحك معها : يعني كانت العزومه فخ لتمكسن اصتادوها يشوفوها
مرته: تعرف ايش الحالي ان بنتك هذه المره مقتنعه

تمكين انحرجت: وايحين اقتنعت ووافقت

امها بتشوف رده فعلها: بدأنا ، قد بينقل عاقله بنتي عتدي فرصه نسأل ونشوف لو كويس ، اعذارش تمت دراسه وخلصتي واشتغلتي ، وانا اشتي افرح بكن واشوف جهالكن

تمكين: خلص طالما اعذاري تمت وقدكم ضابحين قوي مني شوفوا الصح واعملوه
ابوها: موافقه بس بتهنجم وتدلع علينا، يلا على الله مافيه الخير ربنا يقدمه

تمكين بتشوف من الطاقه وتكلم نفسها: موافقه ، كنت ارفض عشان الي مايستاهل كنت افكر محد عيحبني مثله ،وان احلامنا ماكانت تنفع الا معه ، وان مابش حد ساعه، وكل الي خفت منهم ورفضتهم طلعوا ارحم واوفى واطيب منه، انا الي ضيعت حبي وقلبي لشخص مايستاهل، وهذه المره شاوريه هو ومرته الي فارح بها قلك اخرب بيته مجنون

ابوها: تمكين جاهزه من بكره عتبدأي الدوره حق ااتصوير، تحتاجي شي على طريقنا؟

تمكين: ايوه وقفوني جنب مكتبه اشل دفتر قلم

ابوها: من عيني
تمكين: تسلم لي عينكم ، عتعودوني الدلع واحلف ماعد ارجع وترتيل تجلس للسنه الجايه

ابوها: كلنا عنرجع كملي ادرسي لش شويه امد اتم مشروع العمل ونرجع

امها: ولو قاالو يشتو يعرسوا هنا؟

تمكين: مشتيش، اشتي اتعرس في اليمن

ابوها: طبعا ، يجو هانك

في اليمن في بيتهم

كمال وصل وغاده ضابحه: هيا خلاص قد سمعتي باذنش بطلي نكد

غاده: مش نكد، والله ان به شي مش فاهمته

كمال: الله يعينش ، عتجهزي لي بقعه

غاده:ماشي

كمال: غاده صح انا احبش لاتستغلي حبي لش وتضيعيه بتصرفاتش هذه وتكرهيني في ضعفي لش ، الواحد عيتحمل بس مش واصل دلع

غاده:افعل ماشتيت، انا انكسرت نفسي منك، ولوما اخي مارجعت معك.

كمال طنشها دخل الكلام في قلبه وجلس يصلح لنفسه بقعه وهو يتذكر طباع تمكين الي ماكانت تسخى تزعله ولو زعلته كيف تجلس تداريه وتدلعه وتراشيه وتعامله طفل وتضحكه...

غاده : جلست تقلب التلفزيون تتفرج مسلسلها

كمال فتح الرسايل وكتب رساله يعتذر من تمكين

( انا اسف ونادم على كل كلمه قلتها لش ، سامحيني ، الان عرفت قيمتش، وياريت تسامحيني وترضي عني ، صدقيني لارضيش ياتمكين واجي اتقدم لش وارفع راسش ، واعوضش كل لحظه زعل تركتش فيها، )

تمكين فتحت رسالته وتعصبت من الي قرأته ردت عليه:( و زوجتك ؟؟؟


كمال: انا وياها ماقدرنا نسد، بطلقها

تمكين:بنات الناس عندك لعبه هكذا عادي ؟!!! الغلط مش منك، من الي دلعك وكان يدي لك اي شي تشتيه وتشوفه، كل حاجه تروح من يدك تشتيها ؟

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

10 May 2025 22:26

امه: مرتك حنقت امد هذا السبب؟ والله انها قليله عقل، ماعتفعل؟

كمال: شاسير اخوها اتصل قال اسير نخزن ونتجابر

امه: هيا جي تغدا معنا

كمال: مراعي لي غدا

امه: يلا اقطب قوم شرق ، الله يهديكم، خرجت من عنده

كمال رسل لها: مش داريه، او بتفعلي نفسش مش داريه؟
مادراها مرتي اننا كنت شاخطبش وبالاسم حددت اسمش والي بيننا وانحنا بنحب بعض ، ليش تفعلي هكذا

تمكين اخيرا وصلت لها الرساله منه عشان تقراها وترد عليه وافقت على عرض المعهد وبدأ ابوها يسجل لها وهي سارت تجلس فوق ااكرسي تكمل كلامها معه ، كتبت له:( انت مفكر كل الناس ساعك ! الاناني في الموضوع كله انت، وانا لو اشتي اخرب بيتك كانت معي اكثر من فرصه اخربها من اول لحظه شفتكم فيها ، ولما جيت لاعندي تشل صورك وتتراشاني اسمعك واسامحك، ومن انت عشان اخرب بيتك ، الله يعينك على روحك، سير اسأل مرتك اول من قلها وكيف دريت وبعدا حاسب واتهم الناس ، ومش خايفه انفضح ماسويت شي غلط ، افتجع انت الي عتتبهذل صدق بياع وسارق وهارب ومخادع ، خطبت مرتك بفلوس حبيبتك)

كمال تعصب من رسالتها رجم التلفون وقام يلبس ويتجهز وخرج كان يسوق وهو معصب ماقدر يرد على اي كلمه ، بس صدقها انها مش هي ، وعنده فضول يعرف من كلمها، كيف عرفت..

في مصر
بعد ماروحت وطبخت مع امها غدا وهي ضابحه

امها: مالش ؟

تمكين بهدوء وتحاول تبين انها طبيعيه: ولاشي، مالكم عليا اليوم

امها: مدري كيف فجاه تغير مزاجش،

تمكين: فقدت لترتيل وعياال اخي
امها: اقطبي غسولي الباقي وانا اسير اصلي واجهز لي ملابس، ماعتلبسي؟

تمكين: ينفع ما اجي معاكم؟( بيت صاحب ابوها الي التقوا في المطعم)

امها: مش انتي الي قلتي تشتي تتعرفي عليها حبوبه وبناتها متحمسات قالت يبسرنش ويتعرفين عليش

تمكين: طيب.

في اليمن..( بيت حسين)

كمال بيشرب الشاهي: وبس هذا كل الموضوع

حسين: طيب شادعيها تسدوا، الموضوع تافه ، مابش له داعي ، والنسوان هن يزيدين

كمال : قوي حلقتها تتصل لك وانا اقلها اعقلي للصبح، طيب نتفاهم وهي ولا

حسين ضحك: خير ، مسرع بدأت الغيره، الناس ينبشو بعد مش قبل.

خارج الديوان واقفه جاوبت اخوها: مشتيش ابسره، داريه ماعيقول

حسين: ومابش عندنا بنات يحنقين بدون سبب مقنع، ادخلي تحاكي انتي وياه وانا بينكم وانا معش لو في غلط ماشسكت انتي اختي.

غاده : طيب اسير ادي تلفوني واجي

في الديوان

كمال مراعي بيشرب الشاهي ويقلب في تلفونه ، حذف رسايله مع تمكين لانه حسين قال عتجي يتواجهو..

غاده دخلت جلست في طرف الديوان فوق المدكا

حسين: جي هنا مالش الشمس لاوجهش مابينبسرش

غاده: ياخي مش ضروري تبسر اسمعني بس

حسين صاح: غاددده

ت.ع.خ

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

10 May 2025 22:26

كمال وصل البيت : ايش هذا ؟ اين عتسيري؟

غاده مجهزه شنط العرس كلهن ولابسه الباالطو: شلني بيتنا

كمال: ايش معاكم!

غاده: بتزبج؟

كمال : ايش من زبج! مالش حد غثاش ؟ اهلي قالو لش شي؟

غاده: مصمم تفعل نفسك غبي وانت داري ليش شاحنق

كمال بصدمه: تحنقي ؟؟؟؟ ليش !

غاده: لانك كذاب خلي الخباي ينفعك ، قوم وصلني ولا اتصل لاخوتي

كمال: صلي على النبي بطلي جنان الساعه١٢ ، للصبح
دخل الحمام

غاده بترفع صوتها يسمع: والله ما اجلس دقيقه ، اتصلت لاخوها

كمال خرج مش عارف انها اتصلت بيحاول يشرح لها: يابنت الناس قلتلش كان مشروع خطوبه بس ماحصلش نصيب هي اختي شعبت لي بها ليش بتكبري المواضيع

غاده ساكته

كمال: قومي ابعدي البالطو ولش الي يرضيش

غاده: ماشبعدش وشاسير ذلحين

كمال بعصبيه ضابح منها: سيري الله معش ، مش من حقش تحاسبيني على شي كان من قبلش، انا حر احب اخطب اتزوج حتى، اهم شي حبيتش وخطبتش خلاص تغلقي المواضيع كلها

غاده معصبه شافت رساله اخوها: خمس دقايق وانا عندش

كمال: من رسل لش؟

غاده: اخي في الطريق

كمال: اتصلتي له!! وعاندتيني ، تمام

غاده خرجت شنطها لخارج عند الباب اخر شنطه رجعت : كما قلت لي الصدق ساعتها شاسامحك لانه مثل ماقلت هو قبلي الموضوع بس لاتكذبش وغلقت الباب وخرجت

كمال طنشها وجالس بضبح وتوترررر ايش عتقول لاهلها وليش تحنق من موضوع بسيط ويرجعو يتدخلوا الكبار
فتح حساب تمكين الفيسبوك يشتي يرسل لها ومتردد يشتي يشرح لها الي حصل ويسألها من قلها هي كلمتها بشي !
كتب رساله لها :( ماتوقعتش انانيه لهذه الدرجه ، خليتيني لما تعرست وجيتي تقلي لمرتي كل شي كان بيننا، عتفرحي حين تخربي بيتي ، همي نفسش الي عتنفضحي )


الصباح...

تمكين قامت رتبت الشقه، جهزت الصبوح لابوها وامها ومراعيه لهم يقربوا ، فتحت تلفونها تشوف من رسل لها من اتصل اخبار الشغل من حنان...الخ

فتحت رسايل الماسنجر لقيت رساله تشتي تفتحها ابوها وقف قدامها يسافطها بقص خدودها : مافعلتي لنا صبوح

تمكين غلقت تلفونها وقامت : جي ابسر بنتك الحميش فعلت لكم رشوش عيضيع الشيباني

ابوها ضحك: هيا بسم الله

امها: ليش الشاهي هكذا فاسخ

تمكين: اشهد على مرتك مايعجبهم العجب امي

ابوها: انا ظنيت انه قهوه قشر ، مالش بتتبيخلي علينا

تمكين: والله حتى انتو ي بابا

ابوها ضحك عليها : مالش ياحجه فلتي الرشوش والفول وجيتي تحطمي على الشاهي

امها زيدت شاهي ورجعت الي في القلصات ورجعت تسكب: بنعلمها ، عشان عتسير بيت الناس وهي ماتعرف تفعل قلص شاهي
ابوها: هي وترتيل شكلهن عيجلسين عندنا، كل ماجا لهن خاطبي قالين مدري ماله ، مدري مافيه، مدري مال احساسهن

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

07 May 2025 23:39

غاده رجعت حذفت التسجيل شافت تمكين اونلاين بتطبع ، خافت خرجت من النت
كمال جلس يكمل اكله: غلقي الموضوع خلاص

غاده: ماشغلقه اشتي ادرا الان الصدق منك ، لو اعرفه من غيرك لاتندم.

كمال : حاسبي ع كلامش بطلي تهديدات عيب

غاده: انت الي عيب عليك الكذب

كمال: حتى لو بيننا شي وحبيتها ، احمدي الله خطبتش انتي مش هي

غاده تعصبت: احمد الله ! ليش شفتني ميته عليك او مابش في العالم غيرك

كمال: قصدي احمدي الله اننا وفي معش وجيت من الباب والي قبلش مادخلني تحاسبيني عليه.

غاده ضبحت طنشته وفتحت تلفونها شافت رساله منها

تمكين : ( ليش حذفتيه؟ سمعت التسجيل، الواتس حقي مايحذف )

غاده: كان بينش وبين زوجي شي؟

تمكين: زوجش عندش واقرب لش مني وعتصدقيه اكثر مني ، خليه يجاوبش هو ، وعيب ترسلي تسجيل زوجش لبنت الناس قبل ماتتاكدي .

غاده تنرفرت ماقدرت ترد عليها طنشت ، و رجعت تدحس
كمال : من كلمش؟

غاده: صحبتها

كمال: خليها تحكي لش القصه كامله وبعدين تفلسفي وكذبي واحد

غاده: يعني هو كلامك صدق مالي دخل من قبل بس انا سألتك حبيت حد قبلي، قلت ماشي

كمال: ماحبيتهاش لو حبيتها انها مرتي الان، مثل ماحبيتش وخطبتش

غاده صدقته كلامه مقنع ، بس ضبحت انه كلامه متناقض مع كلام نسيم الي بتقلبه في راسها

كمال ضبح واتصل لصاحبه : رايح عند اصحابي ،انتي والسمره حقش الي تسد النفس... خرج

في مكان ثاني عند الشباب

كمال وصل عند صاحبه والبعض بيروح: كمال مالكم ، عادنا جيت وهذا مدري من بيجابر شاجلس وحدي ، بختي

اصحابه: عادك عريس اجلس في البيت .

كمال طنش وهو ضابح .. شاف صاحبه: هيا عتغلق

صاحبه بيكلم صاحبه بالزوم سمع كمال: امانه اسكت خليني ارد على الي جنبك

صاحب كمال ضحك شافه: بيسمعك تحاكى
كمال انحرج رفع يده سلام وهو بيشوفه بالكام : مش انت بينحاكي الي في الباب،

صاحب كمال: لاتصدق بيقصدك انت

صاحبه: لو بيقصدني دعممه وكمل معي اخر نقطتين شارسلك التقرير كامل ، اشتي نوسع المشروع نستثمر فيه معهم برأس مال بسيط مبدأيا

كمال جالس مطنن بيقلب تلفونه وبيسمعهم وبصوت واطي : هيا يا ابراهيم

ابراهيم بيأشر له ثواني بس : ايوه يا مُهاب بينسمعك واصل، يعني تشتي مني اسير اعرض لهم فكرتك وخطه العرض؟ يتخي دور مشروع غيره

مُهاب تعصب :ساعه اشرح لك ومقتنع ومكنتني تمام حاضر وتناقش ونعدل في الافكار وذلحين تقلي اغير بعقلك !!! اطرح العلاقيه انا لي منعك وافهمني مشتيش الا هذا المشروع مصممم وبقوه

ابراهيم: ناهي لك، انا الي شاتعامل معهم انت الا عتمول اخرتي انسق انا والبنات فساتين وعروض ..
كمال : اجلس انت الا تشرط، واخر الشهر حين تحيرف تدور اي مشروع وعمل

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

07 May 2025 23:39

البارت ١٤


ام تمكين بتعرف مرت صاحب زوجها : معها ترتيل وتمكين وعبدالوهاب و محمد بس محمد عايش في المانيا مع زوجته وجهاله .

مرت صاحب زوجها: وانتي ياتمكين مابتدرسي ،او كملتي؟

تمكين: ايوه كملت، ومعي مشروع صغير ، تصوير وتنسيقات بسيطه ديكورات تصوير .

مرت صاحب ابوها: ماشاءالله تبارك الله ، احب البنات الي مثلش هكذا ، معتمدات على نفسهن وناجحات، بيكونين قويات

تمكين ابتسمت لها وبينها وبين نفسها( للاسف القوه الي بيشوفوها الناس بتجي بعد ضعف وعجز كبير)

مرت صاحب عبدالوهاب: اسمي باسمه وساكنه في مدينه النصر وانتو ؟
ام تمكين: احنا في المهندسين

باسمه: خلاص جو عندي يوم، اهلا وسهلا ، وتمكين تتعرف على بناتي في نفس السن تقريبا ، معنا عرس بنتي بعد شهر ، وعنفعل لها هنا يوم نقش في البيت ويوم في فندق

ام تمكين: ان شاءالله ( تبادلين الارقام ،جلسين شويه)

و روحوا.

تمكين: حبوبه قوي وبشوشه، نسير ، ونتعرف عليهم

امها: كيف لش ، وانتي مايعجبش العجب ولاتسيري عند حد

تمكين: خلاص قد تغيرت ، ولو عتخطبني موافقه

امها ضحكت :ابوش قام شكلنا عنروح

تمكين: ايوه هيا بيأشر لنا نمشي

في مكان ثاني ...
كمال: مارأيش نخرج؟

غاده: مشتيش،

كمال: طيب ضابح، جي نشوف اي شي سوا

غاده: مابش نفس شوف انت

كمال: انتي فوق التلفون طول اليوم.
غاده: طيب وانت امسك تلفونك سير اخرج مع اصحابك

كمال: ضبح قام لبس وخرج،

غاده بتتكلم مع بنات في مجموعه في الواتساب وعامله خلفيتها صوره كمال في عرسه

واحده رسلت لها: انتي تمكين؟
غاده ضحكت وردت: قصدش الي تصور؟

البنت: ايوه شايفه صوره كمال ! تزوجتوا؟

غاده كانت ممدده قامت جلست منصدمه: من الي تزوج؟ قصدش من؟

البنت: انتي وكمال!

غاده: ومادخل تمكين بكمال!

البنت: سوت وجه محرج وماعد ردت

غاده جلست تفحر بعد سؤالها دخلت لها خاص

( ايوه انا تمكين بينمزح معش ، مالش ماعد رديتي)

البنت: يو فجعتيني، حسيت اني ودفت

غاده: بس من انتي ذكريني؟ الرقم مش مسجل عندي، تفرمت تلفوني

البنت: هو انا كمان رقمش مش عندي بعد ماغيرت تلفوني ، متى انخطبتو وتزوجتوا( انا نسيم)

غاده: اهلا يانسيم العفو ماعرفتش، ايحين اخر مره التقينا؟

نسيم: في حفله خطوبه ساره ، وكان هذك اليوم بتسألي من نسق لها ديكورات الخطوبه عشان خطبتش انتي وكمال، فرحتيني قوي ايحين تزوجتوا

غاده: قبل شهر

نسيم: اخس عليش ولاعزمتيني ، وانا اقول وين اختفيتي ماجيتي عرس ساره ولاشي

غاده رسلت لكمال: روح ياروحي مجهزه لك احلى سهره اغيرلك الجو .

غاده جلست تكلمها وتعرف اكثر

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

01 May 2025 20:03

كمال: والله ماعرفت اني احبها الا بعد ما راحت من يدي ، لدرجه ان البنت الي حبيتها بدلها وتزوجتها هي، اكتشفت انها مش بغلاوتها، تقول عتسامحني؟ عترجع لي !

صاحبه: ي اخي ايش بتفعل بنفسك، كما دريت ايش تشتي ساعتها عتعرف تقرر، كم نصحتك كم قلتلك لاتلعب بحبلين، كيف تحب ثنتين، وبعدها تشوف من افضل

كمال: يا اخي تمكين كانت عنيده وشخصيتها قويه، بس الزوجه المصونه الي فضلتها على تمكين طلعت اخس، كانت بتقلد الهدوء والخزا وحاضر ومن عيني وكلامك اوامر، بس بعد ماضمنتني وعقدنا بدأت تبان ع حقيقتها، غير هذا كله حسيت اننا حبيت تمكين اكثر.

صاحبه: طالما عادك حسيت يعني ماحبيت، لو حبيت انك انعميت و وفيت ومافتحت مجال لحد جنبها ابدا، اللعب على الحبلين حرقك انت ولو تواصل الي انت فيه الضياع عتخسر الثنتين.

كمال: انا جيت تنصحني مش تبهذلني

صاحبه: انت ماجيت لي الا وانت عارف موقفي وكلامي ولا المطبلين خيرات، سير قلهم وشوف .

كمال خرج وهو مش مقتنع بكلامه بيراقب صفحتها شاف ستوري لها وهي في المطار بتصور لقاها بأهلها.

في البيت فارحه بهم
امها: كملي اكلش

تمكين: يو كم قد اكلت ، كنت فاقده لاكلش ، اليوم حسيت اني شبعت من سنه
ابوها: كيف اخوتش، وعمش افتهن؟

تمكين: ايوه الحمدالله قد عمي ماشاءالله ، اهتم بصحته واستقرت الجلطه مع التمارين الطبيعيه تحسن وبيحرك يده

ابوها: الحمدالله ، وانتي كيف انتي ، كانت اخر فتره صورتش ماعجبتني قلت لاخوتش يمنعوش من العمل ارهقتي نفسش يابنتي عادش صغيره.

تمكين بابتسامه وراها تأنيب ضمير اقلقت اهلها وخلتهم يهموها وسبب ارهاقها شخص مايستاهل: خلاص ، قد خففت العمل، وقدنا الحمدالله.

امها شافتها بترفع: خليهن ، انا شاغسلهن، ادخلي ارتاحي

تمكين: والله اننا مرتاحه حين ابسرتكم ، فقدناكم قوي

امها بترفع معها الصحون: كيف خواتي وامي وترتيل ، بتذاكر بتصلي بتاكل سوا

تمكين: والله وانتو عندنا بنتدلع قوي عليكم، وانتو مابحد كل واحد بيعاني روحه، لاتهموا، حد، ليش طولت فتره علاجكم؟

امها: بيني وبينش ابوش ، مرتاح هنا نفسيته، تمينا العلاج بس بنتعذر بعلاجه، بدأ مشروع يمني ضخم مع مقاولين ، قال يتمه و رجعنا.

تمكين بتغسل الصحون: ماشاءالله ،عتقولوا لنا بدل مانهمكم انه عاده تاعب

امها: اخوش داري بس ماتحاكا ، عشان مرته( بنت عمه) عتكلم اعمامش عيجننوه يرد الزلط حقهم، وهو عيستلم حقوقه ويقاضي اخوته منها

تمكين: انا وعد ادولي فرصه سنه بس وماعد تهموا شي.

امها: خلي لش زلطش ، عتتزوجي وتحتاجي للعرس

تمكين بمزح: ياسعم شادي المهر انا ، داخل نفسها( كأن امي داريه مافعلت بتلمح لي، صدق لاقالوا اذن السارق تطن)

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

01 May 2025 20:02

كل ماتشوفه في الصور وتتغير ملامحها لا اراديا ، تتذكر انها عتطور نفسها اكثر وتبدع اكثر وتنجح اكثر ، وتكلم نفسها
هو ماحبني هو حب حبي له وانا كنت مفكره بيحبني، بدأت تظهر لها قناعات اكثر كانت مش على بالها .

بتعدل الالوان والاضاءه حق صوره وهو واقفٌ جنب عروسته.. يبتسم، بعيون تعرف تفاصيلها بقوه. كم مرةً حلمت وتخيلت أن أنا العروسه الي يشوفها بهذك الطريقة؟تنهدت بصعوبة، وواصلت عملها كأن حد ماكان لها اي شي .
لكن داخلها اصوات بتقاطعها،:


، هذا هو الذي وعدش تكوني شريكته للأبد؟،كذااااب

هذا هو الذي أقسم أنه ماعيشوف حد بجمالش ، ضحكككت باستهزاء"كبرت الصورة شويه، وقربت وجهه من عينها اكثر من اللازم، كانها بتفتش عن سبب، عن تفسير...
بس مالقيت الا انه كان مبسوط ،وكأنها ما كانت هنا ، داخل عيونه، كأنها حلم عابر في حياته، بينما هو كان عمرها بكله..
فعلت نسخ لصوره في ملف ودخلت شخبطتها وعرضت حواجبه وخلته بلا شنب و دموع من عينه سوت له راسين وجسم افعى ، جالسه تضحك ضحكه هزيمه وانتقام
اختها لفتت لها بتضحك: بسم الله بتضحكي على ايش؟
تمكين: جي ابسريه كيف قدو بعيوني:
ترتيل جلست تضحك: يو يو كيف فعلتي به
تمكين: صدقيني لو مش مزوج وعيب كنت نشرتها في حائطه حق الفيسبوك بحساب مجهول يستاهل ، لكن مايستاهل التعب هذا كله واسسوي حساب عشانه..
جلسين يضحكين على الصوره ، وبعدها رجعت للصور ، ، الاصليه تكمل تعديلات ولما خلصت( اخيرا انتهيت منك، مقلع من حياتي للأبد) .

قامت رفعت جهازها الحاسوب وتتجهز للنوم شافت نفسها في المرايه، والله ابتسامتي جميله ،
كتبت في صفحتها على الفيسبوك
أعظم انتقامٍ من الخذلان... أن تعود إلى نفسك، وتحبها أكثر مما أحببتهم جميعًا."





بعد ايام وقبل سفرها بيوم

تمكين قالت لغاده تجي تستلم الصور في مكتبها كانت منتظره لهم.

وصلت غاده هي وكمال: ماشاء الله اسرع من الموعد جهزتيهن

تمكين بدون ماتلفت لكمال: كنت اشتي اخلص سريع، ولاني مسافره

غاده: يووو عاد اهل كمال واهلي يشتو تصويرش، ماعترجعيش؟ عتتزوجي او ايش

تمكين ضحكت: كنت شاتزوج، بس العريس طلع حراف سرقني عشان يتزوج

غاده ضحكت: دمش خفيف، تخيلي لو به هكذا
كمال بضبح قفا ومشي شويه ولع سجاره
تمكين: والله ان به بس انتي عادش مسكينه .. المهم هذه الصور شوفيها، لو تشتي اي تعديل عتجي واحده مصوره صحبتي تمسك مكتبي

غاده: يعني عادش عترجعي؟

تمكين: الله واعلم يمكن اتزوج واهرب انا وياه ماعد ارجع

كمال شافها بنظره ضبح

تمكين: يلا بستأذنش والف مبروك تتهني بحياتش ياعروسه..

شلت شنطتها وبتدور مفاتيح سيارتها..

غاده سبقت مشيت هي وكمال، رجع

ت.ع.خ

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

30 Apr 2025 20:43

كمال بسفاط دهفها: انتي لو تبطلي بس فلسفه وخلي لنا حالنا.

اخته مشيت

كمال دخل الغرفه هو وعروسته..
العروسه مسكت تلفونها رسلت لتمكين: لو سمحتي رسلي لي بعض من الصور اسوي حالات.

كمال: من بتراسلي؟

زوجته غاده: تمكين المصوره اقلها تدي صور ماقد فعلت ولا حاله

كمال: مش ضروري عادي ، وكيف تفعلي حالات صورش!

غاده: شاقصهن واغطي و

كمال ذكر تمكين ماكنت تهتم بهذه الاشياء:, مابش حالات انا مايعجبني

غاده: مالك ، مايعجبك لاتسوي انت حر، انا يعحبني

كمال ضبح: طيب من اولها تحدي

غاده: لاتتفلسف ذلحين، لما كنا مخطوبين كنت تفرح وترد على كل حالاتي

كمال: حالات مش صورش حالات

غاده: بعقلك انا شاغطيها

كمال: قد عتغطيها ليش عاد تنزليها

غاده: لاحول ولاقوه الا بالله ، خلاص معد اشتي صور ولا حالات ، وهي ردت وقالت لما تجهزهن عادها مش فاضيه افتهنت

كمال اسكه اشوف :( سحب التلفون بيقرا ، طلع فوق المحادثه يشوف نفس الرقم!)

تمكين شافته: ايش تشتي من رقمها؟

كمال: بالغلط انضغط ( ناولها)، تجابرتي انتي وياها؟
احسها مغروره وتعاملها زفت

غاده: بالعكس حبوبه قوي هادئه، ودلعتني .

كمال: لما تتزوج هي من عيصورها؟ ماقالت لش لو مخطوبه او لا؟

غاده: ماشي مابش في يدها دبله ،ليش بتسأل؟مادخلك منها

كمال بممازحه سخيفه: شاخطبها، بينسأل لان صاحبي بيدور عروسه، وهو مجاله التصوير قلت نوفق راسين بالحلال.

غاده: هاااه ، احس معها حد لانها ولا فلتت تلفونها اتصالات رسايل، شكله معها حبيب او خطيب مدري.

كمال قتلته شكوكه جالس بيفكر

ثاني يوم( الجمعه)

عبدالوهاب : خلاص يعني اخر عمل وحجز معش هذا الاسبوع، احجز لش الي بعده

تمكين: تمام

ترتيل: هيا تأخرنا بيت جدي بيتصلوا من اول مراعيين لنا لانتأخر على الغدا.

تمكين : انا معي عمل اشتي اكمل عشان اسلم الصور حق الناس قبل السفر

ترتيل : اول جي غيري جو وبعدا روحي لافوق النكد

تمكين ضحكت لانها فهمتها تقصد صور من: تمام

بعد العصر..
خالتها: اخيرا ياشوعه جيتي عندنا حين قد عتسيري عند امش وابوش، مش احنا داريين انش كنت غاثيه حين سافروا وحابسه روحش في البيت

تمكين ابتسمت:وداخلها الاسباب القويه الي ندمت انها سحبتها وغيبتها عن الحياه والناس والاهل

بنت خالتها حضنتها: وحشتنا ايام الجنان معش كنتي تفعلي لنا اجواء ، فقدنا روحش الحاليه.

تمكين حست بفرحه ان الكل يحبها وفاقد لها، كانت حاسه ان الناس كلها تكرهها ( خلاها تفقد ثقتها بنفسها)

ابن خالها جالس بيسترق نظراته لها ( يحبها بس ماعنده الجرأه يصارحها حاليا، منتظر لما يخيروه العروسه يخطبوا له عشان يقول اسمها)

ترتيل بمشاوره: شوفي ابو قلصات

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

30 Apr 2025 20:43

البارت السادس


ترتيل: تمكين كان بدايته معش خداع كيف وثقتي فيه؟
تمكين : لاتسألي هذا السؤال، معرفش كيف ، مثل اي حد بيحب وينعمي على قلبه وعقله، انتي متخيله اننا صورتهم اليوم ! كنت احاول اصحصح افعل احم اشوف انا بحلم صوتي مسموع حركتي طبيعيه ، لا وايشششش الصدمه! تخيلي كل شي كنت اشتيه سواه لها،في عرسها، الالوان انواع الورود وطريقه التزيين والاضاءه ولون الكوشه

ترتيل دمعت على اختها: مابكيتي قدامهم؟

تمكين: لا ، ساعتها كنت معصبه تحت تأثير الصدمه بس بعدين لما صورتهم مع بعض، جلست اغالط دموعي واعطس كذب واشرب ماء واتنفس واتهرب من الضعف الي كنت فيه بقوه كرهي له واحتقاري له.

ترتيل: يعني قد وصلتوا لتنسيقات زفاف!!! يعني كان يشتيش ، قلش عيخطبش؟

تمكين حست بضيق نفس قامت فتحت الطاقه جلست جنبها : ياترتيل تذكري حين تقدم لي ابن صاحب ابي كم كنت ادعي ربي ان ابي يرفض مايوافق، وهو كلم اهله وامه كلمتني وقلت لها ابي وامي مسافرين، قالت سهل عتجي لمرت عبدالوهاب تحاكيها وتبسرني وتكلم امي فيديو بتلفوني

ترتيل متحمسه قامت قربت وجلست جنبها طرف السرير: ايوه؟؟

تمكين: كان حانب بالفلوس لانه عادو طالب وبيشتغل بعد العصر في محل اجهزه الكترونيه و راتبه يلا مصاريف جامعه وجزء منه ييفعل جمعيه، استلمها بس ماكفت يجهز شنطه الخطبه قلت له سهل شاسلفك معي مبلغ ، كنت اجمع حق التصوير

ترتيل صاحت: الجنيهات؟ الي شليتيهن !!! اديتيهن له!

تمكين بضبح: ترتيل الفلوس تسير وتجي كنت واثقه فيه واصلا هو مارضيش و زعل وقفل تلفونه وقال بينحسسه بنقص وانه مايستاهلني

ترتيل: قدو اخبر بنفسه تكذبيه وتراشيه ليش

تمكين: قلتلش طز بالفلوس انا زعلي مش ع الفلوس ، عارفه ان ربي ماعيهنيه بها، انا الي قهرني انه بعد ماشل الذهب واتفقنا ع يوم قال عيسأل امه ايحين ماكملت تجهز اشياء الخطبه ويحددوا يوم،

ترتيل : ايوه

تمكين: اختفى ، غلق تلفونه، ماعد فتح حسابات السوشل ميديا راعيت شهر ، في الجامعه ولا له اثر ، اختفى تماما، اول شي خفت عليه قلت حادث ، اخته اسألها قالت هو متزاعل هو وابي مش احنا داريين وين هو ، قلت زعلوه فعل شي بنفسه انتحر،،،، متخيله اني بكيت وزعلت عليه خوف وشوق وبعدها قلت مات وفعلت له عزاء في عقلي وقلبي بعدها في الاختبارات ، لقيت اسمه في الكشوفات يعني موجود واختبر، طلعين النتايج نجح ومجموع كويس، طلع عايش، رجعت ابكي قهر منه، انتي متخيله ايش فعل فيني ، وفاها اليوم.

ترتيل ساكته

تمكين بتتذكر كلام عروسته عنه وايش يحب و يكره فتره حبهم ومعرفتهم ببعض من وقت ماكان يقلي عيجي يخطبني ( ضحكت)

ترتيل: اختي دلا عليا، سكتي شهور وجيتي في يوم تقلي

( تصبحوا ع امان)

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

29 Apr 2025 17:27

البارت الرابع
تمكين( تشتي تعرف الي بينهم) : بعض رجال يستحوا ، وبعضهم لو زواج تقليدي يكونوا هكذا محرجين ، لاتخافي الحب بيجي من بعد.

العروسه: بس هذا قصه حب عشناها ، لو تبسري كم قاتل عشاني واعجب بي.
تمكين بضحكه صدمه قووويه: صددق ، ماشاء الله،؟ وكيف !
حبيتوا بعض؟
العروسه: شافني في المعهد، كان هو في دورات متقدمه، وكان يساعدنا لو نشتي شي يكتب لنا واجبات انا وصحباتي ، وحبني انا.قال اننا شخصيه
تمكين قاطعتها وتكلمت بقيه الكلام: وانش غير عن صحباتش وانش الوحيده الي دخلتي عقله وقلبه
العروسه ضحكت بحماس: بالضبط كيف دريتي
تمكين بينها وبين نفسها ( اقلش انه قلي نفس الكلام)!!: اكيد اي حد يحب .حد عيبسره غير البقيه عشان هكذا اختارش

كملت التصوير وخرجت الليل بسيارتها من الصاله
كان في سيارته في طرف الشارع مراعي لها : قرب من سيارتها وبيطرق نزل زجاج سيارته وبيقلها: تمكين هذا رقمي الي اتصلت لش ردي.

تمكين دعست بترول ومشيت بسررررعه من جنبه.

كمال رجع للشارع حق الصاله ومنتظر خارج.
تمكين وقدها في الطريق بعد مابعدت حاسه نفسها بحلم،شعور غريب حسته شعور الاستغفال التطنيش المكر ، كيف كانت غبيه،ومنتظره له! كم حبست نفسها بعده ، وموتت نفسها جوع بسبب الاكتئاب عليه ، شافت الطريق زحمه وجنبها مطعم يعجب اختها وعيال اخوها ، وقفت جنبه ونزلت طلبت لهم عشاء

سارحه تحتاج تنعاد لها الجمله مرتين عشان تركز وتستوعب هي فين
صاحب الكاشيير: سبايسي ولا عادي

تمكين بضبح كانه قاطع افكارها وتوترها مع نفسها: ياخي اي شي.

نزلت دموعها وعشان ماتشتي ترجع للحاله الي كانت فيها ، طرحت بطريقه عفويه بيد فاين عند عينها اليمين وفاين عند طرف عينها اليسار تشفط دموعها اول باول.

طول الوقت مراعيه متى يخلص الحلم بس شافت طول يعني مش حلم الي هي فيه، حقيقه.

المباشر الي في المطعم بيدقدق لها زجاج السياره ومد يده بالاكياس

تمكين فتحت الزجاج شلت من الاكل حاسبته ، خلت الطاقه مفتوحه عشان تتنفس ، حاسه ان حد سارق منها الهواء.

وصلت البيت وكلهم منتظرين لها للعشاء ..
بنات اخوها فرحين : الحمدالله انحنا راعينا لش، ولا كان عيفوتنا العشا الحالي هذا.

تمكين كانت تشتي تدخل غرفتها وتقفل بس استحت لما شافت الكل جالسين فوق العشاء ومغطى منتظرين لها

( في البيت ساكنين اخوها و زوجته، واربعه عيالهم اثنين عيال واحد سنه ثالثه جامعه والثاني اول ثانوي
وبنوتتين واحده ثمان سنوات والكبيره ثالث ثانوي)
واختها ترتيل، ابوها و امها في مصر مستقرين عشان علاج ابوها.

عبدالوهاب: حيا ببنتي الرابعه.

بنته الصغيره: احنا ثنتين ي بابا

عبدالوهاب: وهولا بناتي لما يتزوجين.

ترتيل : شم حالي

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

29 Apr 2025 17:26

البارت الثاني


العروسه بفرحه: صدق! تسلمي فرحتيني، ذوق عريسي هو مهندس ديكور

تمكين: ذواق ،الله يخليكم لبعض.

بعد نص ساعه..

العروسه قامت وقفت : قد جا اروح اشوفه ماله تأخر

تمكين بحماسها الي بتعمله لكل عروسه:لحظه بس ي حجه، جي هنا، خلينا نصوره اول مايشوفش ردة فعله
اوقفي بسرعه هنا ادي ظهرش للباب الي عيدخل منه...

العروسه واقفه: بعدين مافعل

تمكين: لما يقرب منش التفي له، اقلش ، خليش بطبيعتش شاصور لقاكم ببعض ع طبيعتكم

العروسه بتوتر وحماس مقفيه

تمكين راحت ورا مدخل الباب عشان تصور العريس من وراه وهو رايح لعروسته

العريس دخل وبيمشي بخطوات يتلفت مالها مقفيه وبيواسيها وهو ماشي لاعندها: من اولها حنوقه وتدي لي ظهرش حين تأخرت شويه


تمكين اول ماسمعت الصوت بعدت الكاميرا من وجهها وبتشوفه وهو بيمشي تتأكد !!!

العريس مسك كتف العروسه وباين من الجنب وجهه

تمكين بصدمه من صوت جنبها قاطعها ...

اخت العروسه: مالش نزلتي الكاميرا مالش ماتصوري

تمكين رجعت الكاميرا وبتصور ، ودقات قلبها متساااارعه وحاسه بضيق نفس وهي بتشوف اجمل لقطه رسمتها في خيالها من سنوات

قاطع خيالها وتفاصيل عصفت بذاكرتها ؟العروسه وهي بتقلها

العروسه: ممكن اشوف كيف وقعت اللقطه...

تمكين بتوريها وتسرق نظرات للعريس كمل يتكلم وقرب عندهن

العريس رفع رأسه يشتي يسأل المصوره شافها

. العروسه بتكلم اختها مش شايفه النظرات الي بينهم
اقتربت بخطوات كلها ثقه وقفت قدامهم،

العريس تفاجأ وارتبش مش قادر يتعامل مع عروسته أو يمسكها ،منتظر رده فعلها

تمكين: نبدأ اول شي نصورك لوحدك عده مقاطع فيديو وانت بتلبس ساعتك وتربط الكرفته،قدك عارف الخطوات ( اخذت نفس لايتغير صوتها وتبان الغصه الي فيها ، لانها شرحت له في عرسهم كيف بتخليه شي مميز")
هدأت شويه وكملت وبعدين نصوركم سوا
العروسه:خلاص يا كمال ،شاكل لي حاجه ماقد تغديت، امد ماتتم تصورك.
تمكين شافتها بتقحص السندوتش ومستغربه مش خايفه ع مكياجها: حاولي تقسمي قطع صغيره بيدش وكلي ، عشان لايمتسح مكياجش بيبان فرق بالصور لو عملناه.
العروسه:تمام صح .
كمال مستغرب كيف عادها مهتمه بمكياجها: معقول ! مش في بالها؟ ولا انصدمت وبكيت ؟ ليش هكذا مش فارق معها!!
قد معها حد بحياتها ؟ اكيد معها حد بحياتها
تمكين جالسه تشرح له ايش يسوي بس حاسه إنه مشتت انتباهه وسارح: ي استاذ كمال ، لو سمحت
كمال: ايش؟
تمكين برسميه: اقلك من اول افتح علبه الساعه وانا بصور وانت بتلبس ، عيد اللقطه.
كمال حس بتوتر وهي قريبه منه شاف مابش حد : تمكين؟ ليش ماسألتيني اي سؤال؟
تمكين: عتعيد اللقطه يا اخي ؟او نكنسلها سريع مابش معنا .
.وقت

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

28 Apr 2025 22:03

طبعا الرواية للكاتبة الرائعة عبير االكبسي

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

16 Jan 2025 20:45

‏- كيف تصنع سعادتك بنفسك  ؟ 



♕ لن يتم نشر اسماء المشاركين ♕






للمششارككهة ↓
@no_name27        ←


والنشر هنـــــا  ↓
@sanaaroohi4        ←

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

08 Sep 2024 23:10

بماذا تفكر الان ...!