•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

31 May 2025 13:25

كمال: اين عتسير؟؟

اخوها بنبره تعجب: البيت كيف وين تسير
كمال: وهذا بيتها ، جت عندكم فتره عيافه وذلحين ماعد بش عيافه، او انا غلطان ياغاده ؟؟

اخوها: انا مالي دخل بشي ، انا عليا اشل وارجع ، اما اتدخل مالي دخل لأن مابش مشكله تستدعي تدخلي، سدو و رديت لي خبر شاراعي خارج
كمال: نسد على ايش !! انا الي زعلان ، وخلص سامحتها

اخوها شاف غاده : اخطى لي ؟

غاده: ليش ؟ مستعجل !!

اخوها: ايوه انتي داريه بعملي ، عتجلسي ؟؟

غاده : هزت راسها موافقه

كمال شافها مبتسمه وكأنها موافقه رأيه: اليوم عتتغدا عندنا

اخوها: انت تغدا من يد مرتك، وانا اتغدا من يد مرتي ، خاطركم، عاد مرتك مافعلت شي

كمال ضحك: شاطلب الان

اخوها: اسلم الله يحفظك قرب لاعند غاده مسك أذنها بسفاط( انا تعبت سيره جيه، غر اعقلي المره هذه اخر مره لش بتفهمي) حب راسها : الله يصلح حالكم ويعوضكم الذريه الصالحه...

ومشي
في المحل حقها..

تمكين دخلت : سرت شفت المدرسه، يشتونا نفعل لهم تصوير عشان يفتتحوا المدرسه، مارأيش العصر تقدري ؟

حنان: تمام ، ايوا صح جت واحده تدورش

تمكين: من هي ؟

حنان: اسمها فاتن صالح قالت تشتي يخطبوش

تمكين ضحكت: قد بيجو يخطبوني منش

حنان ضحكت: مع جت تشتي عنوانكم ورقمكم

تمكين: ياهمتاااه او اديتي لها !

حنان: ايوه بس البنت حلفت وادت بطاقتها أنهم يشتو يتقدموا لش

تمكين: ياهمتاه لامي دحس وانا الصدق رافضه، مشتيش شي الان، اهدأ شويه .

حنان: ارفضي

تمكين: هذا اكيد بس امي الله يحفظهم دحس ، خليني اتصل لهم أقلهم شاتغدا انا وانتي خارج ونسير نصور

بعد المغرب ...

تمكين دخلت البيت..

ترتيل: جو لش خطاب

تمكين: مسرع ، عادها اليوم جت المحل تشل العنوان

ترتيل: اتصلت تشتي وقت فاضي تجي تحاكي امي قالو لها العصر وجت

تمكين: ايوه !

ترتيل بضحكه شريره : اقلش مافعلنا

تمكين: ماهو ؟

ترتيل: جاوبت بنت عبدالوهاب قالت لها وين امش ناولتني السماعه وانا وقعت أمش ..ضحكت

تمكين: ايوه !

ترتيل: قالت نشتي نجي العصر لاعندكم، قلت لها ليش خير ومن انتو ، قالت احنا ناس ابسرنا بنتكم ونسائها ، قلت هي مخطوبه ، قالت صدق ! يلا خير

تمكين حضنتها: احلى تفاهه تفعليها في حياتي ، شكرااا

اشتي وقت الصدق ارتاح شويه من القلق بينحس كلهم ساع امجد، اشتي أنساه وأصدق أن به ناس مختلفين عنه

ترتيل: ناهي سكته لايدرو امي عيجننو

تمكين هزت راسها بابتسامه فرح تمام



في مكان ثاني

البنت بتتكلم في التلفون: والله ماكذب عليش ، سرت للمحل وشليت عنوانهم و رقمها واتصلت وجاوبتني واحده يمكن اختها وبعدين جاوبت الام وقالت مخطوبه.

(ت.ع.خ)

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

31 May 2025 13:25

اخوها: امي كل مره يسيرو عرس يقولو ابسرنالك واحده، اليوم اول مره في حياتي احضر عرس صاله نسوان ولا ابسرت واحده ، كيف يبسروهن وهن ملثمات.

اخته ضحكت: قصدك بيجلسين في العرس هكذا.؟؟

اخوها: ايوه

اخته: بس هباله

اخوها: والله ماهبلا الا انتي، كنت امزح معش وشفتش متحمسه تشرحي

اخته ذكرت : يووو نسيت اقل لامي نسيت كان عينهم ع واحده وسالنا عليها وقالو مخطوبه، واليوم حاكت اختي انها فسخت

اخوها: مشتيش غيرت رأيي، ماشاركن على اختيار امي ابدا، طالما وهن مغطيات شاختار انا

ثاني يوم ..

غاده بتكلم اخوها: اشتي اسير بيتي ؟

اخوها: اي بيت؟
غاده: كيف اي بيت؟ ثيابي اشيائي كلها هانك

اخوها: ها قصدش بيت كمال ؟

غاده:ليش هو قلك أنه ماعد يشتيني؟

اخوها: ماقال هو، انتي الي قلتي ، او نسيتي

غاده: مانسيت ، بس كيف واشيائي ؟؟! عيشلهن والكل ؟

اخوها: ماشي ، شاتصل له ونسير نديهن

غاده : تمام ، قد طلقني؟

اخوها : لا كنا منتظرين تولدي

غاده: وذلحين كيف عيطلق أو ماشي؟

اخوها شافها بتحوم حول شي معين: انتي تشتي يطلقش؟؟

غاده: الصدق مافعلش شي يزعلني عشان اطلب طلاق ، كنت احس الفتره الي راحت مش طايقته ، بس بينبسر اني ظلمته، لاقد تقله اني تراجعت ، خليه نقله اسير ادي ثيابي وبعدا نبسر رده فعله

اخوها: تمام

بعد ماخرجت من عندها اتصل لكمال

كمال: عادي تجي تشل الي تشتيه

اخو غاده: بيني وبينك شكله بعد ماسار الجاهل رجعت تجمع حسها، بتحس إنه مابش سبب يخليها تطلب طلاق ومش فاهمه ليش كانت حاسه هكذك ، وانا ماشضغط عليك طبعا ، بس قلت ابلغك وانت اخبر ماتفعل

كمال: انت عارف اننا شاريها وصبرت ع الحمل ، ماكنت اشتي أطلقها ولكن ماشعيش معها وهي مش طايقتني

اخو غاده: كانت مش طايقتك ، ذلحين تغير تفكيرها شويه

كمال: خلاص ، خليها لما تهدأ من مره وتقرر هي، والان تجي تشل الي تشتي البيت بيتها

اخوها: خلاص شاوصلها للبيت واسير مشوار معي عمل وارجع لها

كمال: تمام حاضر .

في مكتبها ..

تمكين : اليوم مابحد السياره الي بتشغلنا

حنان: لانش طرحتي سيارتش قبال المحل

تمكين بتشوف يمين يسار: ايوه، بس حتى مابحد من مره، يعني ماكان موظف بالعماره هذه

حنان: يمكن عمله في هذه المنطقه ومايلقاش موقف
بس كان يجلس خيرات في السياره

تمكين: كنت قلقه منه، الحمدالله ماجاش اليوم

حنان: ضبح مابش زباين مارأيش نشتغل تعديلات الصور

تمكين: تمام .

حنان: كيف كان عرس امس ؟

تمكين: حالي ماشاءالله ، ماحسيت بتعب،

حنان: الحمدالله، ذلحين نبدأ ببقيه تعديل تصوير يوم الثلوث ، ونرجع لعرس امس .

تمكين: تمام

دخلت واحده : انتي تمكين ؟

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

30 May 2025 23:58

غاده شافت تعليقاتهم جننت غيره رغم ترددها تعاتبه بس ماقدرت تمسك نفسها : من هذه القمر الي بتزبج انت وياها ؟

كمال مافهم رسالتها مانتبه انها شافت تعليقات استغرب كيف رسلت فجاه : من ؟

غاده: عادو عيسأل من ، لاتلف وتدور، الي بتعلق وترد عليك وتضحكو وتتجابرو

كمال: هاا، ماشاءالله عليش عادحنا ذلحين علقت و رديت عليها ، مسرع ابسرتيها ،

غاده: بالصدفه وصل قبال عيني المنشور
كمال: هذه واحده شكلها طايقتني
غاده: بتسيخف او ماهو !!

كمال: عادو انا الي بينتسيخف؟ اصلا ليش بتحاسبيني ؟؟ بصفتش من!

غاده : اهااا ، بصفتي من صح ، ولا كانك غاثي اننا سقطت ولا رسلت تسأل عليا وعادك غاثي حين بينحاسبك

كمال: مش قلتي تشتي تتطلقي!!! مالش دخل من احاكي ، وبالنسبه لو غاثي حين سقطتي ماغثيت عشان لايجي جاهل مابش معه ام واب مع بعض ، ولو غاثي ففعلا غاثي لاني انجرحت منش انتي اما الجاهل ، ربنا يعوضنا غاثي لانش جرحتيني وانتي تعرفي كم كنت احبش واشتيش وجيت لش وتقدمت باول فرصه وقعت لي وبدون سبب مكنتينا حنوقه وطلاق وشكاوي عند الناس بدعتي بي.

غاده زعلت وتاثرت بكلامه ماعرفت ترد ولا بكلمه....

كمال انتظر ردها مالقي رد ، وشاف ايش بيغيضها لقيها فرصه عشان يرجع لها عقلها ...

شاف المنشور بيعلقو عليه اصحابه جلس يرد عليهم، والبنت تدخل وتعلق معهم وتشارك في مجابرتهم ...

غاده كان يوصلها اشعارات الفيسبوك وتفتح تشوف بيعلقوا ويردو ع بعض ( متوتره وهي بتقرا تعليقاتهم وجالسه متنرفزه) منه صدق قدو بايعني !! برضو ماقال لي كيف انتي ولا الف سلامه عليش ولا ماحصلش ( بتبكي)

في بيت تمكين..
ابوها : لما يتاخر الوقت مره ثانيه، تتصلي لاخوش يروحش تمام

تمكين: تمام انا اسفه ، بس ركنت الصاله قريبه قوي من بيتنا

ابوها : ولو في نفس الحاره ، خرجه هذا الساع وحدش ممنوع

تمكين فتحت ظرف المبلغ الي سلموه لها : حاضر ، وهذه رشوه لكم ياحج حين زعلناكم

ابوها ابتسم و رد يدها: خلي فلوسش يابنتي، وفريها وافعلي بها ماشتيتي

تمكين: بس هذه مني غير، تذكروا حين كنت اشل منكم مصروفي رغم اني كنت استلم راتب ! تبقى حقكم حق الجعاله طعمها ثاني

ابوها ضحك: مابلا كان نصب وهواره، وانا مش ساعش طماع

تمكين : وانا طماعه هيا شلوها قبل ماغير رأيي، واسير اقرحها في اشياء هبلا

ابوها: خليها عند امش تشتري لش بها ذهب

ترتيل بمشاوره وصوت واطي وهي جنبها : قدو وقت تواتي ذهب لخيبه الحب القادمه...

فجأه سمعوهن بيكركرين بصوت

امها: يعلم الله مابيخططين ، هاتي الظرف بكله شاخليه عندي

تمكين: ايوه صح، ام الحريوه طلعت صحبتكم مدري تعرفكم وغاثيه وعاتبه عليكم انكم ماسرتوش وانهم ادو دعوه

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

29 May 2025 20:30

العروسه ابتسمت: ماشاءالله عليش ، هيا وين الي يمنعوا العمل على النسوان يجو يبسروا قوتهن وكيف يقدرين يسيطرين على مشاعرهن ويلتزمين بمواعيد عملهن، لو يعرفوا كيف هذا صعب لايقدروا

تمكين:لما تاخذي قرار عن قناعه، المشاعر تكون تمام قوي الحمدالله، والعمل للاسف كان احد نقطه اختلافنا، لذلك مش رابطه شي ومش حاسه غير بحماس وحب لعملي.

العروسه: وانا اقول ليش تصويرش حلو، والكل بيدورش

تمكين فرحت ابتسمت وبتصلح لها فستانها :( الفستان من عندنا اخذتيه صح )؟؟

العروسه:لا

تمكين : قوي قوي يشبه الموديلات الي معنا او تقريبا نفس التطريزه والقماش لانهن مميزات غير الي بالسوق

العروسه: هذا اخي رسله لي هو بالخارج

تمكين هزت راسها: اهاا ،

دخلت اخت العروسه : هيا قالو وقت تدخلي ..

تمكين : يلا شسبق اخرج نجهز الاشياء

في غرفه العروسه .

العروسه لاختها: شفتي محلاها ؟ لطيفه قوي قوي ، البنت رزانه وحبوبه ، وشخصيتها جميله

اختها : بس سبحان الله مابش نصيب

العروسه بفرحه وحماس مسكت يدها : الا ، لو تبسري ايش

فسخت اليوم

تمكين على دخلتها تدي الشنطه حقها سمعت الكلمتين الاخيرات

العروسه: فسخت اليوم التخدير قالو قدها احسن كانت مخدره

تمكين شلت الشنطه و
اختها بهررت مقفيه مافهمت اللخبطه هذه: من هي ؟
تمكين خرجت قبل ماتسمع من هذه بتفكر ( فكرتها بتتحاكا عليا ظلمتها حسها عند مريضتها جبرها)

ام العروسه : تشتي شي حبيبتي ؟ اكلتي ! اخذتي وجبه؟ تشتي ماء زياده !! ماديلش ؟

تمكين بتجهز الستاندات حق الاضاءه والكاميرا : تسلموا قوي قوي معي كل شي ، سلامتكم ..

ام العروسه : وين امش اسير اسلم عليها ؟

تمكين: امي ؟ اين تجي

ام العروسه شافتها مستغربه: انتي ماتذكريني كنتي صغيره ، امش تعرفني ، ادينالكم دعوه ( هي وصلت او ماشي.)

تمكين:مدري والله

ام العروسه: الله المستعان قلي لامش لو وصلت وماجت ولو ماوصلت والله اننا فعلت لها دعوه حق النقش والحفله ، تعذرني لو جهالي لخبطوها

تمكين: حاضر


بعد الزفه والتصوير وو وقت يدخلوا اهل العروسه يتصوروا معها ابوها واخوتها

تمكين لبست بتدور اللثمه مالقيتها بتكلم نفسها( يلا سهل مش انا فاعله مكياج)..

دخلوا ولقطت لهم صور وبتصور فيديو..

كان حضورهم جميل مبتسمين فارحين ومرحين مع بعضهم البعض
مبتسمه من الجمال الي بتلقطه..

ولما كلهم في الكوشه الي يتكلم والي يصلح الكوت حقه والثاني يحب راس امه والي يدور اخته الثانيه ،، من بينهم كلهم ضحكها واحد الي وحده مركز مع الكاميرا مبتسم ( شكله مستعد من قلبه ، هذا اول مره يتصور او كيف)

تأشر لهم يترتبوا اثناء اللقطه ويرجعو يتشتتوا الا هووو

ت ع.خ

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

29 May 2025 20:30

امها : والناس ماعيقولوا ، لاقبل عرسها وفسخت

تمكين: اين اهم عندكم انا ولا الناس .؟

امها: انا منش ، بينهمش انتي، ماعيقولوا ، انخطبت وقبل عرسها فسخت ! وبعدين من عاد عيتقدم

تمكين: لو مكتوب لي نصيب سوا ربي عيتمها، ولو مش مكتوب ماشاعيش مع شخص مش متقبلته عشان ارضي الناس ، يهمني ارضي ربي وانتو وبابا بس

ابوها: خلاص ، خلي بنتي هي حره

مرته: انت حر انت وبنتك ، بس مابش سبب مقنع نقوله للناس

تمكين: مش ضروري تقولوا لهم الاسباب !! مش لازم الناس تعرف كل شي عننا ! في خصوصيات وهذه خصوصيه ، ايش السبب ( مابش نصيب) وبس

امها: وهم ياسعم ماعيتحاكو لو حد سألهم !

زوجها: يقولو ماقالو ، هجعينا ذلحين بتهم النسوان . اعقلي.

تمكين: رجاء لاتزعلوا وتتصايحو بسببي

ابوها : بينفهمها، تبطل تهم النسوان .
امها: خيره الله، الله يعينش على عقلش ،

تمكين راضتها وسارت تجهز الاشياء لاخوها...

الصباح سار عبدالوهاب سلم إلى امجد وناوله كل شي.

امجد : مابش داعي لهن .

عبدالوهاب مسك كتفه ب ود : الفسخ جا مننا، هذا حقك ، وكل شي قسمه ونصيب، الله يعوضكم خير.

طلع سيارته ومشي.

امجد اشر له سلام ودخل وعيال اخوه بيساعدوه .

دخل جلس وابوه وامه جالسين مراعيين يدخل يتفاقدو الاشياء اكلات او لا ( كان شويه متندم وهو بيشوف الاشياء ، كان داخله تخوف إنه يفقدها زي الاولى ،وحس إنه غلط لما عاملها بتحدي شويه فكر لو فرض سيطرته عتخاف لانه لما دلع حبيبته تمردت، لكن اكتشف إنه غلطان كل انسانه ولها اسلوبها وشخصيتها وتختلف من واحده لثانيه).

امه: مالك مطنن ؟؟؟ ماعجبتنيش البنت من اولها ابدا

وجلست مصمم مصدق لمرت اخوك ، هيا عتبسر حين اخطب لك احسن منها، امانه إن كل بنت احسن من الثانيه ومايدرين مايفعلين لي .

ابوه: ماحصل بينكم ؟

امجد يشتي يهنجم قدام ابوه : البنت راسها عنيد ، ماتشتي الا قولها في كل شي ، وتحدتني ورجعت لعملها ، قلت لها الله يفتح عليش، اشتي مره تستمعني .

ابوه: رجاااال ، اليوم امك تسير تبسر لك احسن منهاط ونخطب وتزوج بنفس الموعد الي حددته .

امجد: تمام ، افعلوا مشتيتو انا بعدكم





في بيت اهلها..

غاده ضابحه ليش مارسل وتاسف وقلها فاقد لها ؟؟
اول مره يدعمم هكذا ومايسالش عليها..


مرت اخوها : مالش ماسكه تلفونش او بيرسلش؟

غاده بضبح: بالعكس ، مدعمم ولا خبر، تقلي منه صدق عيطلق؟


مرت اخوها : مش انتي طلبتي تطلقي؟

غاده : ايوه، بس على الاقل يحسسني إنه شاريني حامل

مرت اخوها :خلص هذه المره قد انتي تشتي الانفصال ماعد عيقول شي ، ابسر منش الصدق

غاده بتعرق وماسكه بطنها بتتعطف: ويهون عليه الجاهل !!

مرت اخوها : مالش ؟

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

28 May 2025 21:24

تمكين: يبقى مافيش نصيب يا ابن الناس..
امجد: اكيد مابش نصيب للعمل

تمكين طنشته وخرجت لاعند ابوها قررت تفتح معهم الموضوع..

ابوها كان بيتفرج الاخبار ويشرب شاهي شافها جت وجلست سكته سارحه عرف انها تشتي تقول شي

تمكين بتسعل كذب : احم

ابوها: مابسرش تجي عندي الا وقد معش طلب او قرار ، خير؟

تمكين: ليش سمحتوا لي اتواصل بخطيبي؟

ابوها : لاني واثق ببنتي

تمكين فرحت شويه: بس قصدي ايش السبب المهم

ابوها: قولتكم هذا الجيل تفهموا بعض، خطبت امش وماعرفتها ولا ابسرتها الا وهي عندي قبالي شوعه ولا حاليه قدي نصيبي

تمكين: حلو ابردوا لكم من المقارنه، خلونا في ذاحين، قلتو نفهم بعضط ولو مافهمنا بعض او ماقدرنا نسد ايش نفعل؟

ابوها : مابش حاجه غصب ، اذا الاسباب مقنعه خلص

تمكين: طيب ولو قلتلكم اني حاولت افهمه واتفهمه واتغير واتنازل بس قد زيد بها ، عتسمحوا لي افسخ.

ابوها: في ايش تنازلتي وايش زيد بها؟؟؟ احكي بالتفصيل

تمكين بدات تكلم ابوها بطباع امجد وشروطه وقراراته و و و

ابوها : يعني مقتنعه ماعد تشتي تكملي معه؟

تمكين: ايوه

ابوها:انا مالي دخل بحياتكم انتي بسن فاهمه وعاقله وانتي اخبر بحياتش

تمكين : وانا مافكرت وقررت الا بعد ماعرفت ايش الي اشتيه وايش الي شاقدر اتقبله او ارفضه، الموضوع مش هو شويه شروط ، الموضوع هو الاسلوب ، التحدي ،التهديد، وريتكم رسائله يعني عتكون العيشه كلها بهذا الاسلوب وانتو ماربيتونا وعودتونا على هذا الشي ،لذلك مشتيش اكمل معه ،

ابوها :خلاص جهزي اشيائهم وانا شاكلم اخوش واتصل لامجد واتفاهم معه...

تمكين : حاضر

بنفس الوقت شاف اتصال من امجد

ابوها بيوريها الرقم ، جاوب: وعليكم السلام

امجد: كيف انتو ي عن

ابوها: الحمدالله، وانت كيف حالك؟

امجد: الحمدالله، كيف صحتكم ان شاءالله بخير

ابوها: نحمد الله ونشكره

امجد: اتصلت لكم ياعم احكي لكم واشكي من تمكين، اخر فتره ، بتستفزني بردودها وكلامها وتحدي وعناد ، اول شي تقلي عتفلت العمل تعبت قلت لها عادو احسن ارتاحي واشتغلي خفيف من البيت ، وبعدين اليوم تقلي رجعت وشاشتغل وهذا قراري وانا حره ولو مش عاجبك مابش نصيب

ابوها ضحك: يمكن انت ماقرات سوا، اقرا سوا كلامكم الاثنين، انا قرأت رسائلكم وشفت

امجد سكت شويه ماتوقع إن تمكين تكلم ابوها وتوريه : يعني ابسرتوا بنفسكم اسلوبها

ابوها: ايوه ، اسلوب طبيعي جدا

امجد: كيف طبيعي؟

ابوها: يا امجد اولا مش من حقك تتشرط من الآن وتمنعها وتطرح شروطك، كان عنتفق وقت العقد ساع الناس كلهم...

امجد: وافرضوا ماقبلناش مش حاليه وقت العقد ، انا فهمتها ، مشتيش تشتغل.

ابوها: كنت تقدر باسلوب توصل لها

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

27 May 2025 01:56

اخوها: انا قلتلها تمام شاخليه يطلق ، واصلا ماينفعش الطلاق الا بعد ماتولد ، لذلك خليها تتأدب هنا لوما تعقل ولا تراسلها ولا تحاكيها

كمال: تمام خليها ، تشتي الصدق ، قد كسرت نفسي منها

اخوها: هيا بينقل انك عاقل

كمال:هو الي معقلني اننا ماشتيش اظلمها، حين قالو إنه الحمل سبب ، عنبسر اخرتها معها

اخوها: الله يسد ويصلح

كمال قفل وحس بحقد لتمكين جلس يتذكر كيف جت زواجه ومازعلت وكانت قويه وليش جت تصورهم ايش معنى هي دخل الشك بعقله ( معقول هي فعلت لهم شي)

قرر يتصل لها رغم انها حاظره رقمه، نزل شل شريحه جديده واتصل لها...

في غرفتها ...

تمكين بعد ماتغدت وارتاحت رجعت لأسئله سحر ومن ضمنها...

لحل المشاكل وعشان ترتاحي ( واجهي، لاتكتمي الشعور، واجهي مشاعرش وواجهي الشخص بقوه عشان تخلصي من الشعور ، بصيغه المواجهه وكانه امامش)

بدات تشتي تكتب وتفرغ مشاعرها بدايه من كمال والي حصل لها منه ....
( انا حبيتك وتعلقت بك وبادلتني نفس الشعور وكانت اعرف ان شعورك كذاب ، ماكنت عارفه انك بتخدعني وتغدر

اتصل رقم غريب قاطعها...
تمكين فكرت زبونه: الو

كمال: الو

تمكين: مابتستحي حظرتك مازيد افعل !!

كمال: اسمعي، ماتصلت فارح بش، اشتي بس توقعي صريحه لمره واحده في حياتش، وتقولي الصدق
( انتي فعلتي لمرتي سحر يوم ماصورتينا؟؟)

تمكين من الصدمه ضحككت : ايوووه ، لقيته؟ نسيت مابعد توقيعي منه

كمال: لاتزبجي بينتكلم صدق..

تمكين حست هذا وقت الموااااجهه : طالما وهو صدق هيا اسمع كلام كان نفسي اقوله لك بس احترمت زوجتك كانت عروسه جنبك ولاني اصلا نسيتك وماعد فرقت معي بعد ماواجهت وجعي وصدمتي فيك وحدي ، لما شفتك ماكانك بني ادم قدامي ، ثانيا اسحرها ليش !! على اساس من شلها عشان ازعل واسحرها؟؟( شلها ابو هشيمه ولا ناصيف ،ضحكككت( كان يغير ويكره ناصيف لانها كانت تتحيلا لاغانيه)

لو شاسحر ، كنت سحرتك توفي معي، واسحرك ترد فلوسي ، ماليش في الطريق حق الي بيعلموك هولا


سير شلها عند شيخ، ولا اقلك معها اكبر مشعوذ خرج السحر انت ) اخر همي انت وياها، واجهوا فشل اختياراتكم بدون ماتتهموا الناس تهم وهميه ، وشوف نفسك كيف انت معها ، لما كرهتك زوجتك، اسالني انا ..

و قوي ايمانك تمام...

مع السلامه..قفلت وحظرته

حست براااااحه( اخيرا خرجت مشاعرها له، بس بعد ماجرحها وشك فيها ، انتزع اخر حنين وشعور وحب له )

كانه قطع كل الروابط الي بينهم ..

كملت تكتب فقرته برااااحه...
ولعت الشمعه وحرقت الورقه ( تخيلت بتحرق كل مابقي من ذكريات معه ، خلص من بعد هذه اللحظه لا حلو ولا شوعه بيذكرها به)

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

26 May 2025 01:17

لو ماكنتي واحمه ، كنت رديت عليش الان برساله من كلمتين، لكن قوليها في وجهي وابشري مش انتي اول واخر من حمل كل النسوان بيوحمين ويعيفين بس هذه قدها قله ذوق ماشغصبش تعيشي معي غصب، مفكره اننا فارح بش او ايش ..

غاده جلست تبكي لما شافت الرساله لبست البالطو وخرجت تروح بيتهم ، جلست تنزل الدرج بسرعه دعست البالطو حقها وطحست من راس الدرج...

جارتهم سمعتها فتحت باب الشقه ، لبست وخرجت تشوفها :سعليش يابنتي ، مابش فيش شي؟؟

غاده بتبكي: مدري ،ظهري بيوجعني ويدي مش قادره تحركها

جارتها شافت التلفون بيدها: اتصلي لزوجش

غاده : الله يقلعه، مشتيش ، شاتصل لاخي..

جارتها : او هو الي فعل بش هكذا؟؟

كمال كان معصب من رسالتها بنفس اللحظه رجع كان قريب بيسمع الجمله هذه: او هو الي فعل بش هكذا( صداها في الدرج) سمع جوابها

غاده: تقالعنا انا وياه

وقف قدامها شافها جالسه وحالتها حاله البالطو فيه تراب: ايش حصل ؟؟
جارتهم بحكم انها كبيره في السن بتنصحه( يابني اتقي الله في مرتك هذه بنت الناس امانه عندك)

كمال عصب: طريق طريق جالسه تشتكي بي وتبهذليني

جارتهم: والله ماقالت شي ، غير تقالعتو

كمال شاف مش وقت يكبر المشكله وهم خارج البيت مسك يدها ومشيت معه للسياره . .

غاده ساكته مراعيه يسأل ايش حصل لها

كمال وقف عند مستشفى : انزلي

غاده: مشتيش

كمال عصب لاول مره تشوف عصبيته خافت بدون اي كلام نزلت معه

غاده: اين شاسير مابش فيني شي..

كمال ولا بيرد عليها، وصل قطع لها موعد مع دكتوره عشان يتطمن وضع النونو .

وهم في الانتظار خارج..
غاده شافت قلقه وهو بيصيح: فوق الممرضه، ايش نراعي وايش من دور ، اقلش مرتي حامل وطحست من الدرج

الممرضه: ها ، طيب الان اكلم الدكتوره...

كمال واقف وهو ضابح مارضي يلفت لها

الممرضه: قل لها تدخل

كمال اشر لها ، ودخلوا عند الدكتوره

بعد اسئله حول وضع حملها بدأت بالتلفزيون تشوف: مابش خطر قوي في انفصال بسيط للمشيمه، لو تاخذ هذه مثبتات الحمل افضل عشان الجنين وراحه ، ولو في اي شي تجي على طول..

خرجوا وهي بتسأله: يعني ايش ؟؟ ايش الي قالته !

كمال مارضي يرد عليها خرجوا وأخذ الادويه، وطلع السياره

غاده وهم في الطريق : عتشلني بيتنا !!!!

كمال مطنش

غاده تعصبت: ليش بتدعمم ،بينحاكيك مشتيش اسير بيتنا ،عناد فيك بطلت

كمال وقف قدام بيتهم ورسل لاخوها ينزل لها

غاده حنقت منه لما شافت اخوها نزلت بنفسها و رجعت الباب..


في المحل الساعه ٣ العصر ...
حنان: ماعتروحيش؟

تمكين بتشوف السياره جالسه والشخص الي فيها رجع فتح الباب وطلع السياره : الا ، الان ، كملت التعديل،
تشتي تلحق تشوف الشخص...

ت.ع.خ

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

26 May 2025 01:17

سحر: وهل برايك كل هذا حقيقي ؟ هل الحب الي متمسكه فيه وكانك ماسكه على شوك ( هل هذا حب.؟) هل بيدوم الحب هذا؟

ولا المجتمع ايش بيعمل لك لو تزوجتي او ماتزوجتي؟

تمكين: بكون خلصت من نظره الشفقه واسئلتهم ليش عادها ماتزوجت

سحر: وايش يهمك نظرتهم! ايش بتسوي نظرتهم. ؟ هل بتعيشي سعاده حقيقيه وتكوني ارضيتي المجتمع على سعاده مزيفه ؟ مين مهم المجتمع او انتي ؟؟؟

تمكين: انا

سحر: تمكين ليش مش راضيه تفهمي انك لو قدرتي نفسك وحبيتيها وفهمتيها واعطيتيها حقها، بتوصل لكل شي بدون تعب، كوني انتي حقيقيه ، لا تكوني شخص ثاني عشان ناس واشخاص ترضيهم وتهون نفسك ..

تمكين: الي بتقوليه ككلام سهل ، بس تنفيذ صعب

سحر: والله مافيها اي صعوبه، التغيير يبدأ من الداخل، من داخلك انتي، عاملي نفسك مثل ماتحبي الناس تعاملك، لاتجبريها على اي شي عشان اي حد ، عاملي تمكين ، وكانها طفله، اسمعي قلبك وعقلك ايش يقول وايش يحس ، ولاتخافي من كلمه لا ، لاتخافي إنه حد يشوفك او ياخذ عنك نظره، وقت ماتكوني عطيتي نفسك حقها الكل بيعطيكي نفس الشي وبيعاملوكي مثل ماتعاملي نفسك، جربي مش خسرانه

تمكين: هذه المره تقدري تقولي كلامش فهمته ، حسيته اصلا، فعلا انا مش سامعه نفسي جالسه انفذ اوامر وطلبات بتزعلني وبتكسرني وبتحبطني ، وعد من اليوم اشتغل على المواضيع والاسئله الي معي وبعدين بقرر انا ، هذه المره انا الي بختار لنفسي الطريق الي حاسه اني تهت فيه

سحر: انبسطت جدا انك وصلتي لشئ مهم، واي شي تحتاجيه انا معاكي

امجد شاف أنها بدأت تبعد عنه رجع يحس بالخوف أنه ينترك ، بيكلم نفسه عادي ولو شافت نفسها عليا حين قد قلت لها كلمتين، بس انا باوريها إذا ماعلمتها كيف تتعامل معي وأبطل لها الدلع وشوفه النفس هذه ماكون امجد...

تمكين طفت تلفونها عشان لاتتنرفز من استفزازه لها وترد عليه...

وخرجت الاوراق الي معها وبدأت تقرا الاسئله حق سحر وتكتب الاجابه

فضفضت وعبرت عن كل شي كانت متجاهلته ومش مديه لتفكيرها ونفسها وقت، بكيت على الوضع الي هي فيه، والمواجهه الي بتكون فيها ...



ثاني يوم...

تمكين راحت المحل تسلم العمل ، دخلت لاعند حنان: صباح الخير

حنان: صباح النور

تمكين: كيف العمل معش؟

حنان: تشتي الصدق، مش زي قبل، يجين خيرات ، ولما يعرفين مش انتي الي عتصوريهن يكنسلين

تمكين : كم قد جين ؟

حنان: اربع كنسلين، وواحده لأنها مضطره مالقيت حد

تمكين: لاتزعلي، لما تشتهري عيدورنش انتي بدلي


حنان: بس الصدق انتي غير

تمكين : وانتي عيجي يوم توقعي غير، متى جين الي كنسلين.

حنان: امس

تمكين: اتصلي لهن لو ماقد حجزين حد ، يجين شرجع

حنان: صدق؟

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

25 May 2025 01:36

ام تمكين: ايوووه صاحبه الطفوله، كانين واااااصل مع بعض ، لوما تزوجت لمى وسافرت ، ذلحين لو تبسري محلا بناتها ثنتين توأم و حامل ، جت تولد عند مرت عمش،بينبسرها واقول الله يوصلني لتمكين ابسر جهالها

تمكين: انتو اجلسوا تخورو وبعدين تمسكوا الخيزران وتلاحقو الجهال، (لفتت لعيال اخوها): صح ياجهال

وهم بصوت: ايووووه
امها: ايحين عتخرجي تحجزي قاعات وتتكسي؟

تمكين( كيف تصارحهم انها انكسرت نفسها من الخطبه وماعد تشتي ): ماشحجز ذلحين لبعدا لما يدو المهر

ابوها: ماعنراعي لهم، مافي نفسش وانا احجز لبنتي ،

امها: وابدأي خيطي امد تعدلي على مهلش لاترتبشي بعدا

تمكين بتشوف كلامهم ومحانبتهم على الصاله، وموديلات الفساتين وهي سارحه في كلامه واسلوبه بتكلم نفسها: متحمسين ومش هم داريين اننا ناويه انثرها، الصدمه عتوقع فيهم مش فيني .

امها: كملتي عملش؟

تمكين: باقي شويه ، جيت ابسركم وارجع

امها: تعشيتي ؟

تمكين: لا
امها: هيا قومي تعشي وتمي عملش

تمكين كيف تحكي لامها إنه سد نفسها اضطرت تمشي الوضع سكته: تمام...

وسارت غرفتها

ترتيل : قد تلفونش طفح وغرق قطره قفا قطره( نغمه الرسائل)

تمكين ضحكت: اكيد هو بيفحر...

ترتيل: بالله لارفستي طبعي مشتيش اسمع عنه شي ، تحمليه وحدش مش مجبوره اعيش معش الوجع الي مابتعيشيه انتي ولاتغثي ع نفسش

تمكين طنشتها وفتحت رسائله: ليش ماتردي ؟ احسش بتدوري مشاكل معي


ردت عليه : انت قلت مانتواصل !

امجد: يعني مصممه ماتحذفي الحسابات

تمكين: اكيد مستحيل احذفهن !! وعملي ؟

امجد: او رجعتي بكلامش؟ قلنا مابش عمل

تمكين: وانا قد وقفت العمل عشانك ، لاتتعذر بتعبي انت اقنعتني بدل ماتقلي مابش تعب، لكن تمام وقفت عملي حساباتي ليش احذفهن؟

امجد: مايعجبنيش ، اشتي مرتي مابش معها غير تلفون للاتصال و رسائل بس

تمكين: مرتك ، !! انا خطيبتك، بعدين مش كل شي تشتيه لازم يتحقق، الموضوع يخصني يعني اوافق ماوافقش

امجد: شوفي ياتمكين من ذلحين اقلش ، مابش عندي جدال، اي شي اقوله تقولي حاضر ، ساعتها شاهدأ ممكن اغير رأيي واخليش تفعلي الي تشتيه، وممكن لو عاندتي كلامي اعاند اكثر منش


تمكين: وليش هذا التعب كله! ليش مصعب العيشه وهي سهله !!


امجد: اي رجال هكذا طبعه ، ولاعتلقي حد مثلي عادو سامح لش باشياء مش عاجبته، عادنا احسن من غيري .

تمكين: لاتقارن نفسك بالسيئين قارن نفسك بالافضل عشان توقع صدق احسن من غيرك

امجد : انا احسن من غيري ولا واحد عيقع ربعي ، احمدي ربش إن انتي نصيبي

تمكين متعصبه : عادحنا ماقد وقعنا نصيب بعض ، وبالنسبه لاحسن من غيرك، ماحد عيقع ربع ابي واخي

امجد : اكيد اهلش عتبسريهم غير

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

24 May 2025 04:12

تمكين : وبيتغير مثل ما اشتي !

سحر: مش شرط ، بس ممكن تغييرك، يقرر إنه مش الشخص هذا الي يناسبني ، او ممكن تتقبليه طباعه وماتكون مشكله بالنسبه لك..

تمكين: مستحيل، بهذه الطباع كلها اتقبل، لازم لغيره او اتغير انا

سحر: يبقى نفسك اولى ، ابداي بنفسك، افهميها وشوفي من ايش خايفه! وليش خايفه، ! واستمري اسالي نفسك وطبقي الي جبتلك المواضيع كلها، بعدها بنتناقش انا وانتي.

تمكين: طيب ( مشتته من كثر رسائله الي بيرسلها وهي بتكلم سحر)، متواصلات وشكرا لسؤالش عني واهتمامش دائما بينشغلش معايا.

سحر: حبيبتي ،مافي اي شغله ، اتمنى جد تكملي على شخصيتك مثل مابدأنا، كنتي رائعه جدا.

تمكين كملت تتكلم معها ودخلت تشوف رسائله: ...

عتاب و زعل وآخرها( خلي صحبتش تنفعش)
تمكين: نفعتني جبرها ، ربي يسعدها ويدي لها ع قدر نيتها

امجد: بتحانكي هاااا ؟بتتذربي صح؟

تمكين شافته معصب حبت تنرفزه: هههههه، مالك؟

امجد: شوفي اسلوبش ، عتخليني اقلش الان تحذفي كل التطبيقات ماعد نشتي تواصل ،قدو حريق دم

تمكين بصدمه : انت عارف كان البعض ينصحني لا اتواصل إنه بيزيد المشاكل بسبب التواصل ، والبعض يقول عتفهميه اكثر

امجد: مافهمتيني ولا شي مابلا بتحرقي دمي

تمكين: طلع كلامهم كلهم صح، كان لازم افهمك، وطلع التواصل مع الي مثل طبعك يفعل مشاكل.
امجد : اووووهو ابسري كيف بتتكلمي معي ؟؟ ماشاءالله والذوق !مع الي شكلك؟؟

تمكين: انا قلت شكلك؟ انا قلت طبعك!

امجد: وماله طبعي ؟ ماعجبش؟

تمكين: لا... في تصرفات منك ماعجبتني

امجد: شكرا لش ، بدأ يبان قناعش

تمكين: انا !!!

امجد: خلاص ولا كلمه .

تمكين حنقت قفلت محادثته...
( تذكرت حنيه كمال ، صح جرحها وزعلها، بس فتره تواصلهم كانت حنيه ومايسخاش يزعلها، ولو عرف انها زاعله ، كان مايرقد الا وقد راضاها،، بس ليش خرب كل افعاله لما تركها )

( صوت تمكين وهي بتكلم نفسها)
ليش رجعت افكر فيك ياكمال واقارنك به ، ليش ماقدرت اتخلص منك معقول مازلت بينحبك ، لا مابينحبك انت حرقت كل شي بيننا ، بس ماانكرش الايام الحلوه والصفات الي كانت فيك، هذا هو)
فتحت عملها وبدات تعدل الصور حق العروسه.
ويتكلم نفسها ليش حظي زفت!!عمري ماذيت حد ، بينتمنى الخير لكل الناس وافرح لفرح كل الناس ...

جت على طول الاجابه عقلها ذكرها لما قالت لسحر نفس الكلام و ردت عليها ( لانش اذيتي نفسش ، اهتميتي وراعيتي كل الناس، وهنتي على نفسك، استكثرتي عليها كل شي مقابل إرضاء الطرف الآخر عشان لايروح وفي الاخير راح، ولو تستمري بنفس الطريقه، بيروح كل شي )

تناست كل الي في بالها وجلست تركز على الصور وتنغمس في لحظات اللقطات.

ت.ع.خ

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

24 May 2025 04:12

كمال: مروح للبيت
غاده: عاد انت بعيد؟
كمال: تشتي شي؟؟ ماعليش لو بعيد او قريب ! فيش شي؟
اخوها بيسمع صوته لاعنده
غاده: مابلا انا عند البيت مابش معي مفتاح
كمال دعس بترول اكثر ودخل من لفه الحاره

غاده بنرفره : الوو، مالك بتدعمم ؟؟
اخوها لفت لها بنظره وبياشر بيده تهدأ

كمال وقف قدامهم : اهلا وسهلا ، دعممت عشان تبسريني قدامش

غاده بمجرد ماشافته قدامها ، قفلت على طول ، فتحت باب السياره ونزلت , تشتي تشل شنطتها

كمال مسك يدها: انا شاشلها ،ناولها المفتاح، ها ادخلي .
سلم على اخوها: هيا انزل نتغدا سوا

اخو غاده: سبقناك، عليك بالعافيه، معي الخبره مراعيين، وصلتها على طريقي

كمال سلم عليه ومشي اخوها... دخل فارح انها رجعت

غاده بتتلوى ( البيت نظيف ) سمعته دخل: ليش بتكذب؟

كمال : في ايش؟

غاده: البيت نظيف

كمال مسك يدها : اولا ، حيا بش نورتي ، ثانيا نظفته ،

غاده سحبت يدها ودخلت غرفتها تعلق البالطو: يخ مالك ماتفتح الطيقان ، شم عطرك في البيت بكله

كمال استغرب: هذا العطر الي يعجبش واشتريتيه لي !!

غاده: يغاثي قوي، لاعد تتعطر به، ترجمه

كمال : حاضر

غاده تلثمت: شل الاكل للمطبخ لو سمحت

كمال : حاضر، عتاكلي معي

غاده: ماااشي، قد تغديت

كمال انكسف من رده فعلها متغيره معه قوي ومقززه منه ، شل الاكل وسار المطبخ بيكلم نفسه( فعلا مش طايقتني) ماعد مشتيش الوحام هذا

في بيتهم...
امها: هيا تمكين البسي ..

تمكين: معي عمل لازم اسلمه بعد ساعه

امها: عيب مرت عمش فاعله العزومه لنا، انا وانتي

تمكين بضبح( كان نفسها تسير) : العمل متراكم عليا سهل قولو لهم وعيتفهمين هن داريات.

ترتيل مصدومه فيها راعت لما خرجت امها: مش قد تجهزتي وصلحتي شعرش؟؟؟

تمكين بضبح: عيجنني بغيرته يا ترتيلط قلك اذا معش عيال عم ماتسيريش او لاتقابليهم ( كيف لاقابلهم، عيسلمو علينا ويخرجوا)

ترتيل بنرفزه: منش صددددق !!! تمكين ماعد باقي الا يحبسش ،ماهو هذا !! انا تعبت لش وانتي ماتعبتي، طز فيش

شاشل شنطتش الرمادي طالما مش جايه، خاطرش..

تمكين ساكته بتقلب التلفون في يدها وصلت رساله
امجد:( خرجتي؟)
تمكين: ماشي وحدي ساع الكلبه في البيت، كلهم عيخرجوا، حتى ابي وامي

امجد: انا معش ، او ضابحه مني

تمكين: ماشي

امجد: الا صالحه اعرفش لما تتكلمي

تمكين: مش ضابحه، معي شويه عمل شاكمل واراسلك

امجد: اهااا، قد العمل اهم مني، هذا واحنا مخطوبين؟ كيف بعدا واحنا سوا

تمكين: مش قد قلت العمل الاساسي عشانك؟ ماعد معي الا هذا العمل تشتي والكل افلته؟

امجد: لو عليا مشتيش شي يشغلش عني حتى اهلش، تعلقت بس قوي ، لو يسبر لاعجل العرس بعد شهر، بس مارضيو اهلي

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

23 May 2025 22:49

في بيته قام الصبح قد البيت مرفوس والمطبخ مكوم صحون، مابش معه ثياب ، اتصل لها

كمال: ايحين عتروحي ؟ ماعد بش ما البس والبيت حالته حاله

غاده: اتصل لاختك لامك اي حد يجي ينظف لك ، ياكمال تاعبه مع الوحام ،

كمال: صلي على النبي عادش الشهر الاول ، قدلش بيتكم اسبوعين ، انا ضبحت

غاده: شاجلس لما تتم العيافه

كمال: الان شاجي اتجهزي يلا، ارجعي عندي يومين ثلاث وبعدا سيري

غاده : والله لو تموت مارجع

كمال تعصب : ماقلتي ؟؟؟ والله لو اموت؟لاترجعيش من مره

غاده: عادو احسن ، اديت الي في نفسي

كمال بصدمه وعصبيه: هكذا ؟؟؟

غاده: ايوه هكذا ، مش انا شغاله عندك

كمال: ايش من شغاله يا مجنونه بينقلش ضبحت والبيت حالته حاله ، بيت من هو ؟ بيتش قلك شغاله

غاده: وانا قلتلك مشتيش ارجع

كمال: شاجي ونتفاهم

غاده: لاتجيش

كمال: زعلتش بشي؟ يعني سرتي حانقه!!

غاده: هاااا قد بتدور عذر ؟ تشتي تقل لي انني سرت حانقه!! بينقلك تاعبه ايش من حنق

كمال:تاعبه جي اتعبي عندي واوبه لش ياسعم شاقتلش

غاده: مشتيش ، اشتي عند امي

كمال: تمام كم ؟

غاده: لبعد ماولد

كمال: انتي بتتخيبلي او ماهو هذا الساع؟؟ تشتي تجننيني !؟؟

غاده: والله مابينجننك، مش طايقه البيت ولا طايقتك ، بعد ماولد له حلات شافكر

كمال:تفكري ؟!!! خاطرش لاحول ولاقوه الا بالله( مع السلامه) قفل وهو بيدور رقم اخوها
هذه جننت ماعيعقلها الا اخوها..

اخوها: قد بينصيح فوقها يوميا والله قلت عيفي عندنا بس سيري وجي مايسبرش تفلتي زوجش ..

كمال: قالت لما تولد عتروح وعتفكر ومش طايقتني ولا البيت، مافعل انا ؟؟؟؟

اخوها : اهدأ دعممها، وانا شاديها بنفسي لاعندك.

كمال: خيره الله..

اخوها قفل مع كمال و دخل عند اخته: ماهو هذا الكلام؟

غاده: قد اشتكالك؟

اخوها : ايوه ابن ناس بدل مايجي يروحش صميل

غاده: وانت عتخليه يشلني صميل؟

اخوها : مرته؟ ايوه يروحش صميل

غاده بكيت: اقلك شي ياخي، انا مش طايقته والله ، ولا حبيت عيشتي معه، اشتي اتطلق ، قوا طلقني منه

اخوها : بغير جنان ، هذه بس تقلبات مشاعر مع الوحام

غاده: ماشي ، ياريت ماوحمت

اخوها: غثاش؟؟ بيعاملش شوعه؟

غاده: ماشي، بس مدري احسه مش طايقني ، ولا بيهتم بي

اخوها : مش طايقش كيف

غاده: مدري بينحس هكذا

اخوها : ايش التصرفات مثلا، ومن ايحين

غاده : من حين وحمت وهو ضابح واصل مكشر ومقزز ويتنخفر ويدور مشاكل ، حسيته مش فارح اننا وحمت، تصرفاته كلها مش طايقتني

اخوها: بغير دلع وخباله، عنتكلم بعدين معي عمل الان...

في الطريق

ابوها اين عتسيري لفي

تمكين لفت بسرعه كانت سارحه في كلام امجد و رسالته ...

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

23 May 2025 01:40

تمكين: قلت له سهل العمل مايقتلش لو الزوج حالي كله عيسبر

ترتيل: والله مابينبسر غير الخباله فيش انتي مالش مقعيه يختي هكذا!!! اشتحطي

الكبر الي كبرتيه في نظره انتي داريه إنه عيقتلش التزام ومقارنه، اشرطي من ذلحين ، نظامش لوحده ، معش عمل مش انتي فاضيه

تمكين: بيني وبينش هو افضل ، حين يبكر واحد يلحق عمل سوا

ترتيل ماسكه وجهها : يووووو ، فلجتي قلبي يختي

تمكين: اصلا مش انتي داريه شي ، اسكتي بس


ترتيل: ماعد اشتي ادرا شي، عاجبش جلسه البيت ؟

تمكين: قوووووي

ترتيل: معش تعديلات صور قومي عدليهن

تمكين: راعي اكلمه، مايعجبه اشتغل واجابره بيضبح حين اتاخر

ترتيل: عتجلسي تجابريه وبعدا تسهري عمل !!!

تمكين: ايوه

ترتيل: الله يعينش...رفعت يدها تدعي ( يارب لاتبتلينا ساع مابتليت غيرنا )

تمكين: عنبسر بعدا لما يجي نصيبش كيف عتتغيري غصب عنش

شافت رساله منه، فتحتها
امجد( شفتش انشغلتي عني ، دخلت صفحاتش في الفيس والانستا ابسر انتي مشكلجيه او مع)

تمكين ضحكت : ( وما ابسرت؟!)

امجد: طبعا اول مره بعد الخطوبه ابسرت وعجبني قوي قوي عملش تصويرش ذوقش ، اختيار منشوراتش ، بس المره هذه ماعجبني شي)

تمكين زعلت شويه :( ايش الي ماعجبك؟)

امجد: ماعجبني عندش خيرات شباب في صفحتش

تمكين : شباب !!!! اين هم؟ مابش ؟ متاكد صفحتي ؟

امجد : متاكد ؟؟ ياسعم اننا مش داري صفحتش او كيف؟

تمكين: غريبه مابش حد غير اقارب بس

امجد :بعضهم مش اقارب ، ...

تاخر شويه بالرد عليها ورجع بلقطات لصفحاتهم عندها

تمكين ضحكت ردت: ايوه فجعتني لو قد تهكر، هولا اقاربي ، هذا ابن اخي

امجد: وهذا ( صوره ثانيه)

تمكين: هذا ابن خالي تربينا جمعه ساع الاخوه

امجد: قلتيها بفمش( ساع الاخوه) بس مش اخوه، انتي عارفه يا يا ملكه عمري اني اغير قوي !!.

تمكين: ايوه عارفه، بس من صدق احنا اخوه

امجد: براحتش

تمكين: ايش الي براحتي؟

امجد: جالسه ترفسي بالموضوع وانا مش عاجبني انهم عندش

تمكين: طيب حرام لو الغي صداقته عيزعل قوي مني

امجد: وانا طز فيني احرق؟

تمكين: ماشي، لما نتزوج شابعدهم واقول زوجي ماخلاني ، بس ذلحين احراج موقفي

امجد: طيب براحتش ماعد بضغط عليش

( وهذا من)؟

تمكين: ابن عمي اصغر مني

امجد: قد شنبه اطول من حياتي وتقلي اصغر منش

تمكين: ابن عمي ي امجد ، احنا متربيين جمعه ، واصغر مني ، بعدا هي صفحه يعني ايش عيبسرو

امجد: حتى لومانشرتي شي، استمعيني وبس

تمكين منصدمه في اسلوبه: الموضوع مش هكذا طيب بزعل ، نتناقش بالمنطق
امجد: خصمي المجادله يا بنت الناس بتفهمي !
ها شالغي صداقتش واشبعي بهم، انا يانا بصفحتش يا هم، مايبقى الا اخوش وابوش

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

23 May 2025 01:40

ترتيل: حين يبسرش ماعاندتي يخليش ترجعي تشتغلي صح؟ ياسعم إن هو ابوش ، صدقيني لو تجلسي ماعد عترجعي



تمكين : طيب انتي مش حاسه بي ولا فاهمتني ، انا اولا تعبت هو عشاني ، وبعدين من حقه يغير عليا

ترتيل: يعني ابوش واخوش مابيغيرو عليش ؟ عيحنجش اكثر منهم !!!

تمكين سكتت شويه: في فرق، بعدين مش هي نهايه العالم، عادي ، شارجع اي وقت اشتي ، انا بينشتغل بنفسي لنفسي مش موظفه عند حد

ترتيل: غلطانه، انتي كسبتي شهره وقد انتي حرفيه قوي ، وبتنافسي مشهورات قدلهن وقت في مجالش ، فعلتي لش علاقات حلوه مع ناس ومع منسقين ومنظمين اعراس وحفلات، حتى إن انتي بدأتي طريق جديد تتوسعي فيه، انش تكوني منسقه انتي ، تقدري تتعاملي مع بقيه التفاصيل وهو

تمكين : يو ياترتيل وجعتي راسي ، سيري المكتب اشتغلي بدلي طالما قد انتي افهم مني.

ترتيل: ماعنديش خبره ولا اهتمام ولا مجالي هذا ، طز فيش من قلي انصحش ، قلك راسها وجعها

تمكين بمزح وابتسامه : خلاااص لغاجه انا حررره

ترتيل زعلت منها وطنشتها ، فتحت كتبها تذاكر

في بيته جالس بيفكر سبعين فكره وفكره عنها قرر يعزم ابراهيم ، يمكن يقدر يخرج منه كلام

بعد ماوصل

كمال: مالك تاخرت؟

ابراهيم شاف الساعه: ماتاخرت مثل موعدنا، امد ماتصلت لي جيت ساع وقت كل مره

كمال حس إنه هو الي معاجل على ابراهيم، اما ابراهيم فعلا ماتأخر

ابراهيم: ماخبارك كيف الدنيا

كمال: الحمدالله، كيف العمل معك

ابراهيم: اي عمل ، قدنا متشعب ياخي في سبعين مهره

كمال : مافعلت مع مكتب الفساتين
ابراهيم: ولاشي رفضت تعديلات الديكور روحنا

كمال: ماعد عتشتغل معها يعني؟

ابراهيم: الا ، مابلا الديكورات ماتشتيش ، بيني وبينك والله انها سمخه ، احسن لها

كمال : ليش ؟

ابراهيم: اخاف يرجع يقلب ويدفعها وهي ماتشتيش ، هو لو بيهم ديكور محل فساتين يسير يستاجر

كمال: طيب من هو هذا

ابراهيم: التاجر صاحب الفساتين

كمال: تمام من هو ، تعرفه ؟؟ صاحبك؟ مقصدي هكذا

ابراهيم: ماشي والله صاحبي يقرب له هو توسط لي اشتغل له التسويق في اليمن معه في كل دوله فرع محلات باسمه

كمال بتعجب: الله !!! وليش طالما مقتدر يشل زاويه محل تصوير ؟

ابراهيم: ياخي ذكائك هذا مدري وين بتخليه، من حين تزوجت رجعت اعيد لك الكلام والشرح مليون مره

كمال : انت القفل انت مابتفهم

ابراهيم: قلنالك البنت مشهوره ، وعتفعل لنا تسويق بدون تعب

كمال بسخريه: قلك تسويق ، قدلكم كم ايام، قد حد عبركم

ابراهيم ضحك : كنا عاملين حسابنا يستأجرو بعضهم ، قد ابتاعين من عندها اربع فساتين بمبلغ محترم ، وتاجرين ٨ فساتين

كمال اخذ نفس عميق وتنهد : طيب انت داري انها بطلت العمل !!

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

31 May 2025 13:25

دخلت واحده : انتي تمكين ؟

حنان: تمكين خرجت قبل شويه عترجع بعد ساعه ، تشتي تحجزي ؟

البنت : لا ، بيني وبينش جيت استفسر عليها، تعرفي وين بيتهم؟؟

حنان خافت: من انتي وماتشتي منها ؟
البنت بتهديها : سعليش، ناس يشتو يخطبوها بس ، الصدق احنا

حنان: طيب لوماتجي وتعرفي منها التفاصيل

البنت خرجت بطاقتها طرحتها لها: يمكن تخزا هي، ها خلي بطاقتي عندش لو خايفه، بس الموضوع صدق والله العظيم مابه شي غيره

حنان : تمام ، شكتب لش عنوانهم ورقمهم

البنت: وعنتصاحب لما توقع تمكين من نصيبنا وترجعي تضحكي انش خفتي

حنان ضحكت : أن شاءالله لو في خير الله يوفقها، ناولتها بطاقتها

البنت خرجت ...

في بيتها..

غاده دخلت شافت البيت مرتب مهوى ، فقدت لبيتها دخلت غرفتها مرتبه

كمال خرج من الديوان بيدور من دخل ( بيمثل إنه مش داري انها عتجي) : من ؟؟؟؟

غاده نكزت : فجعتني

كمال: العفو فجعتش، شاخرج من البيت ، تطمني

غاده: ماقلت تخرج بس نكزت فكرتك في العمل
كمال: ماسرتش تاعب, خرج من عندها رجع الديوان

غاده دخلت تشتي تجمع لها ملابس شافت صورتهم وتذكرت كيف كانت معه اخر فتره عصبيه ...

خرجت من غرفتها وراحت للديوان : كمال

كمال: ماهو ؟

غاده: تشتي شي ؟ افعل لك شي ؟

كمال: لاتتعبي نفسش تسلمي

غاده : طيب شربت علاج؟

كمال: لا ، ماقدرت اخرج لبعدا يبعد البرد وأخرج..

غاده دخلت الغرفه أدت من الدرج حبوب مسكنه وفيتامين سي ودخلت لاعنده: ها اشرب

كمال شربهن: تسلمي

غاده: انت زاعل مني؟

كمال : من ايش؟؟

غاده: لاني طلبت اتطلق ؟

كمال: ما رأيش انتي؟

غاده: معرفش، انا مدري مالي اعوذ بالله ، كنت مش طبيعيه ، غصب عني كنت اشتي اتطلق، بس الان احس اني ظلمتك لانه مابش سبب

كمال: عاد انتي مش طايقتني ؟؟؟

غاده: ماشي

كمال: طيب ليش ماتحاكيتي !

غاده : اخي قلب فوقي اخر مره قال ماعد لي وجه احاكيه ولا احاكيك

كمال: مقدر لش لاني عارف انش معيفه ، صح انجرحت منش ومازلت، حتى لو مش طايقتني مش اسلوب هكذا ، و زعلت لانش بتتكلمي عننا لاي حد ، مش لازم صحباتش يعرفين


غاده: ماقلت لهن شي بيننا بس قلت مش ...سكتت ( مشتيش اعيد اقولها لاتغثى مني)


كمال: المهم ، حتى لو كان في شي بسبب أو بدون سبب مفروض مايخرج اي شي بيننا ، الا لاهلش لو شي كبير مثل موضوع طلاق


غاده:صح كلامك

الباب دق...

غاده: من عيجي ؟

كمال قام يفتح: ماقد قلت من مادراني من جا.


اخو غاده دخل سلم عليه وتجابرو بصوت واطي شويه...

غاده ارتبشت ماقد جهزت ثيابها وقفت تشتي تخرج من الديوان ...

اخوها دخل: هيا قد انتي جاهزه؟

كمال : اين عتسير؟

اخوها: البيت كيف وين تسير

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

30 May 2025 23:58

امها : بيت من ؟
تمكين خرجت لها الدعوه ورتها : انا شاسير ابدل وارتاح قدنا تاعبه

امها: هاااا الا اعرفها، يو وين زد ضاعت كم لي منها ، من حين نقلو،

تمكين سمعت امها رجعت للباب: تعرفوهم..

امها بتكلم ابو تمكين ويتذكروا

تمكين ماحست باهتمام للموضوع مشيت غرفتها...

ترتيل لحقتها الغرفه: امي ذلحين اي حد تعرفهم كانو يشتو يخطبونا

تمكين ضحكت: قد فيش لقانه يختي ، مالش تحاكيني هكذك قبال ابي لو سمعوش على الذهب

ترتيل: بصوت واطي ، بعدين مزحه مالش وانتي .

تمكين: ولو لاعد تمزحي ،خليني نسيتهم .

ترتيل: تمام بعيني ، جاوعه؟ اجهز لش عشاء؟

تمكين: مع اكلت هانك ماشاءالله على عرس يجنن، والناس حبوبين قوي قوي بس غريبه يعرفوا امي اول مره ابسرهم

ترتيل: ياسعم بنخرج مع امي كل بقعه ، ماقد عرفنا نص الاهل

تمكين: صح على قولتش

ترتيل: منش صدق قد عترقدي؟

تمكين: ماباقي معي عمل الصبح
ترتيل: ايش الحماس هذا قلت هذك... سكتت

تمكين: ايش؟

ترتيل: ولاشي قلتي نسيتي خلاص

تمكين: تحاكي اخر مره لانش اديتي لي فضول

ترتيل باسلوب مزح وتقليد شكل اختها : قلت بعد ماردينا قلافد الخطوبه عترجع الغرفه ساع زمان وترجعي مشعفله وتغثي سنتين بس شكلش عقلتي يختي

تمكين ضحكت وبتصلح شعرها: انا كنت هكذا ياسخيفه
ترتيل ضحكت: مابسرتيش نفسش ،مالي خليت لش الغرفه كنت اكوبس وافتح عيني صميل وابسرش وارجع الكابوس مره ثانيه اهون

تمكين بتضحك : اخررررجي من غرفتي يلا ، مطروده ياكابوس ارحم
ترتيل حضنتها: خلاص يكفي زبج عليش لليوم نكمل بكره ، تصبحي ع خير

تمكين حضنتها بقوه : وانتي من اهل الخير ي احلى من يضحكني ويهون عليا مصايبي بزبجات لطيفه


في مكان ثاني ( بيت العرس )
اخته الصغيره بتبكي على اختها، جالس يواسيها: هيا بس حركات بتبكي حين سبقتش

اخته: بينبكي حين ماعتبكيش هي عليا عيجي عرسي ومش فارقه معها

اخوها ضحك: كان نفسي تبكين عليا كلكن،بس مدري ايحين

اخته ضحكت: مانبكيش ع الاخوه بالعكس نفرح نطايركم

اخوها باستغراب:ليش؟
اخته: مش انت، اخوتك هرمين كوي الزنه، اديت خمسه اصحاب جهزين غدا جهزين عشا، مابش سيارتي اشتيها ، ماشوصلكن معي مشوار.. مابش منهم فائده

اخوها: وانا؟

اخته: وانت مابش منك فائده بس مش بيدك وضعك غير انت
اخوها: ايوه، كيف كان العرس كل شي تمام، ؟

اخته: ايوه الحمدالله على مافي نفسها الله يسعدها

اخوها : سرح شويه

اخته: وين طننت
اخوها: امي كل مره يسيرو عرس يقولو ابسرنالك واحده، اليوم اول مره في حياتي احضر عرس صاله نسوان ولا ابسرت واحده ، كيف يبسروهن وهن ملثمات.



ت.ع.خ

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

30 May 2025 23:58

تمكين كملت تصورهم وبدأت تجهز ادواتها عشان تروح..

ام العروسه: تسلمي يابنتي وسامحينا اخرناش ، شاخلي حد يوصلش

تمكين: الله يسلمكم ،شكرا معي سيارتي شاروخ انا ومساعدتي، والبيت قريب.

ام العروسه سلمي على امش ولاتنسي ماتوصلي لها عتابي

تمكين: حاضر
ام العروسه اتصلت لابنها : خلي اخوتك الصغار يجو يساعدوا البنات يشلو لهن الشنطه للسياره

تمكين : مابش داعي ياخاله شكرا..

خرجت من باب الصاله هي ومساعدتها والولد المبتسم جا بنفسه مارسل اخوته ، بس كانت ملامحه جاده وعينه في الارض وصل حمل الشنطه وبيمشي

تمكين سكتت ماعرفت ايش تدعيه وايش اسمه ولوين ياخذهن وفين سيارتها ....الخ

مساعدتها: ماشاءالله كيف عرف سيارتش ؟

تمكين فتحت له سيارتها بريموت: عادنا اشتي ادعيه ماعد لحقته نزل سريع، بس صدق كيف عرف ! يمكن كانو في باب الصاله لما جينا..

الشاب فتح خانه السياره وشاف مرتبه نظيفه السياره ريحتها فانيلا و ورد لفتت انتباهه سجادتها وترتيب اشيائها ، حط الشنطه وغلق خانه السياره

تمكين قربت من السياره: شكرا
الشاب بدون مايرفع راسه : العفو، مشي.

تمكين طلعت سيارتها وشغلتها ومشيت من جنبه

مساعدتها: محترم قوي

تمكين :نصيحه لاتحكمي على حد ، صدقيني إن الناس معهم كم ياطباع،لاتغرش النظره الاولى الكلمه الاولى ، اي شي بالبدايه كذاب ،

مساعدتها بتضحك: ماعندش حجه، مش من قليل الي مريتي به.

تمكين خرجت من بوابه الصاله: فعلا هذا الي تعلمته ، إن في البدايه كلهم حاليين.

مساعدتها : مش مصدقه ايحين اوصل بقعتي ، قدنا تاعبه

تمكين: الصاله كبيره وطلعه نزله وتاخرنا اليوم ، ماقدرت ارفض حين طلعت تعرف امي ، وذواقين قوي احرجونا باخلاقهم وتواضعهم

مساعدتها: والله صدق ، نادر تلاقي ناس هكذا راقيين ومتواضعين وحبوبين من قلبهم

في بيت اهلها

غاده بتكتب له رساله: هانت عليك العشره ! حتى ماقلت لي الحمدالله على السلامه !حذفتها

فتحت الفيسبوك لقيته متصل موجود نزل منشور بيتنمر ويمزح فيه على صاحبه وفاعل له مشاركه لصفحته...علقت عليه واحده متابعه لصاحبه ( شفت صفحتك راقيه ماتوقعت المنشور هذا منك)
كمال رد عليها: لما يكونوا معش اصحاب مثل هذا غصب عنش تتنمري ههههه
البنت ردت عليه: كنت دخلت ادافع عنه بس شكلي شاتنمر معك هههه

كمال دخل لصاحبه على الخاص: من هذه السامجه، من بتساير يا سامج ،

صاحبه: ماطيقهاش ، واحده هبلا تضحك وتعلق في كل منشور وتضيف اي حد تتكلم معه،

كمال: ها يعني حتى انت مستثقلها مش وحدي
صاحبه: قوي ، ازعل على بنات بيتصرفين هكذا، يفكرين انهن حبوبات بس بينزلين من نظر الولد وهن فاكرات انهم بيعجبوا بهن.

غاده شافت تعليقه :

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

29 May 2025 20:30

بعد ماروحت بيتها من المستشفى..
غاده سالت اخوها: كيف افعل اكلم كمال ولا مش ضروري يعرف !

اخوها : الا ضروري يعرف

غاده تحمست مسكت التلفون

اخوها: قد قلتله

غاده طرحت التلفون بربشه: هلا

اخوها : ذلحين طالما مابش حمل ، شاخليه يسرع في اوراق الطلاق

غاده سكتت وغالطت الموضوع: اين الماء يا لولي( بنت اخوها) اشتي اشرب عاطشه

اخوها قام: يلا لو تشتين شي اتصلين لي، خاطركن.

مرته: الله معك.

غاده حست بزعل شويه ( ليش ما اتصل لها ويتطمن عليها ) حتى لو بينهم مشكله ( الموضوع كبير راح حملها.

بكيت

مرت اخوها: مالش؟

غاده:ولاشي زاعله على النونو ماتوقعت شاغثى هكذا

مرت اخوها : سهل ابكي افتهني، يلا يالولي نخرج، خلي عمه تفتهن وترقد وحدها

غاده جلست وحدها بالغرفه تتذكر فرحته بالحمل واهتمامه بها وخوراتها وكيف تحمل عصبيتها نفسها تكلمه بس زاعله منه ونفس الوقت حاسه انها السبب....

كانت تمسك التلفون تشتي ترسل وتتردد ، لما رقدت

في العرس..
تمكين بعد ماصورت العرسان جلست في غرفه العروسه معها تصورها قبل الزفه..
العروسه جالسه تتواصل بالتلفون مع استشارات بتوصل لها

تمكين: انتي دكتوره.

العروسه: ايوه

تمكين: يعني امس داومتي وانتي عروسه؟

العروسه بابتسامه: مابلا هي حاله تابعتها ،واضطريت امس اسير عشانها، اخذت اجازه للعرس بس مع ذلك سرت
تمكين: وعتشتغلي بعد العرس؟؟

العروسه بصدمه: طبعا، كان كيف افلت!!

تمكين: اكيد لانش دكتوره ماعتفلتي، بس قصدي الرجال يشرطوا اغلبهم مايشتو عمل بعد العرس

العروسه: لا ، مش شرط مش كلهم، رغم انه مش طبيب وعملي ماله وقت معين بس ماشرط اي شي

تمكين: لانش دكتوره ، يمكن لو عملش شي ثاني عيشرط،

العروسه : زوجي لا، بس غيره ممكن ، خيرات بيشرطوا

تمكين: لو كان عملش ثاني كنتي عتتركي عملش لو شرط

العروسه: مدري يمكن اقلش ايوه من ناحيه ارتاح ويصرف هو ويتحمل كل طلباتي، وممكن لو العمل احبه وانا متمسكه به ماوافق .

تمكين سكتت شويه بتعدل في كاميرتها: الان اوقفي قدام المرايا وكان نصش باين ونص معكوس هكذا ( وقفت ترويها)
العروسه وهي بتعدل وضعيتها: معي اخ شرطه نخطب له واحده موظفه عنده قناعه إن الموظفه عتكون سند له وجهاله لو بيوم حصل له شي، ومعي اخ رافض زوجته تشتغل ، يعني يختلف

تمكين لقطت لها الصوره: وبتوريها..

العروسه: وانتي مش كنتي مخطوبه !!؟

تمكين عقدت حواجبها ( ايش عرفها)؟ : ايوه ، وفسخت

العروسه مستغربه: صدق! قلت اسالش لاني ماشفت الدبله بيدش قلت يمكن بتتضايقي ويمكن مش مخطوبه بس الي اعرفه مخطوبه

تمكين: من قلش !

العروسه: ناس يعرفوش

تمكين: ايوه فسخت اليوم

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

28 May 2025 21:24

امجد: ايش من اسلوب وقد بينقلها مشتيش وقراري رافض وهي تعاند وتقل مابش نصيب

ابو تمكين : لانك جيت لها بتحدي وقرارات ووصلت لها انك الامر الناهي في قرارات تخصها ، هي عملت صوره وفكره عن الشخص الي عتعيش معه هو الي يقرر هو الي يمنع هو الي يرفض ،بينما كنت تقدر تقنعها باسبابك لو هي مقنعه
وعارف انك صح ومش غلطان

امجد ترك الكلام كله: يعني انا غلطان؟؟ ذلحين هو انا الغلطان؟

ابو تمكين: اسلوبك غلطان وتعاملك مع الموقف غلط ، انت من حقك تقرر الي يناسبك، وهي برضو من حقها تقبل قرارك او تقرر الي يناسبها

امجد: يعني انتو موافقين لقرارها.؟

ابو تمكين: مش هي حياتها !!! اكيد موافق لقرارها،

امجد: يعني عتفسخ خطوبه وقد العرس بعد شهرين وحجزنا عشان عمل !

ابو تمكين: مش عشان عمل ، عشان اسلوب كلامك وقراراتك ،وشخصيتك الي ماناسبت شخصيتها ، من حقك تقرر وهي من حقها تقرر ، وهذا هو نصيب ، وكل شي واضح من البدايه افضل من انفصال بعد زواج وجهال.

امجد: قلت اتصل لكم انكم عتعقلوها، وتقنعوها إن المره بعد زوجها ، لكن دريت ذلحين سبب عنادها، وهو انكم بتخلوها تفعل ماشتت.

ابو تمكين: لاني ربيت وواثق ولما اسمح لها بشي من قراراتها فهي الي عتتحمل المسئوليه ، مش من حقي ولو ابوها اجبر بنتي على شخص او شي ماتشتيه ، بكره ابني عبدالوهاب عيجيب الاشياء ، تمكين كلمتني بقرارها قبل ماتتصل لي انت، والله يعوضكم .

امجد ضبح وتعصب ماقدر يدي كلمه :مع السلامه....

قفل

تمكين حضنت ابوها وحبت راسه: الله يحفظكم لنا يا احسن أب

ابوها : لو كانت اسبابه مقنعه كنت وقفت معه، بس انا عارف كيف بنتي طموحه وطيبه ، ولما قلتي اسلوبه الي ماخلاش تتقبليه كعيشه طول العمرط وافقت قرارش ، زمان جا يخطبش ابن صاحبي اسماعيل وقلتي مش موافقه على شخص ماكملش تعليمه، وانا اعز صديقي واعرف اخلاق عياله، انا ي بابا معاكم ، مش ضدكم، كل واحد اخبر بحياته ومصلحته


تمكين: انا فدالكم والله، فرحتوني قوي قوي انكم مش زاعلين مني وفهمتوني ...

ابوها: كنت عارف بلثمتش ولما وقفتي العمل، إنه السبب بس قلت هي حره، لو راضيه مادخلني ..

تمكين هزت راسها

مرته : هو ما دلع بناتك وخلاهن يزيدين التشراط الا انك كل شي تمام حاضر ، مافيها لو وقفت العمل ياسعم إن هي عتموت جوع ، كل النسوان بينشغلين ببيت وجهال ، يابنتي راجعي عقلش ولو تزوجتي غيره واشتغلتي عتتعبي وتفلتي

تمكين: سهل ، العمل قد فلت ي ماماط قد فعلت له كل شي يشتيه، بس زيد الاوامر والزنط والتهديد وطبعه نفسه ماقدرش اتقبله،

متناقض وكذاب ( زمان واحنا في مصر عيساعدني ويعدل ديكور المحل، واول ماحسيته طيب رجع يغير رايه

ت ع.خ

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

27 May 2025 01:56

تمكين: امتدت ترتاح شويه كانت تتذكر صوته وكلامه ، وتحاول تخرجه من عقلها بما انها ردت عليه.
جت لها فكره ( بدل مافكر بالي ضيعو وقتي ، ليش ماشوف اخر الافكار في التصوير، واخر الاشياء الي ماقد توفرت عشان اوفرها وتتميز اكثر)...

مابتميز ولا بترتفع قيمتي بحبهم لي ، ولا بترجع ثقتي بنفسي لما يحبني حد ، برجعها لما اقوي نفسي وابعد من حياتي الناس السامه.


امجد بيرسل

تمكين : وهذا مش وقته ابدا،

جلست تضحك ..
ترتيل دخلت : بسم الله عليش ؟ جننتي يختي ؟

تمكين: جننوني يختي..

ترتيل جلست جنبها وهي تضحك من ضحكها: ماوقع؟

تمكين: اتصل رقم غريب قد اختش متحمسه لو زبونه ، ويطلع صوت كمال

ترتيل انصدمت: مايشتي؟

تمكين: اوقع صريحه لمره في حياتي واعترف ، سحرت مرته او مع

ترتيل ضحكت: منه صدق ؟

تمكين: يس

ترتيل: ماقلتي له؟

تمكين: قلت له من انت!

ترتيل ضحكت : ياسعم مالها مرته !

تمكين: مدري

ترتيل : لاتضحكي يختي عتجنني
تمكين: بينضحك على نفسي ، من حبيت !! معقول حبيت شخص بهذا التفكير !!!

في الطريق بيمشي ويذكر كلامها
كمال ندم: ليش يتهمها مش هي هكذا ،( يمكن ربي عاقبني بغاده لاني ظلمت تمكين)


مرت ايام واسابيع تقريبا( شهرين)
امجد راسلها: انتي طلبتي نوقف تواصل، بس مضطر ارسل لش عشان اشتي احجز القاعه واحدد يوم..

تمكين: قصدك قبل الحجوزات ، قررنا نوقف تواصل ، ونشوف هل كل واحد راضي بقرارات الثاني

امجد : بالضبط ، رسلت لش ابسر ! شيعتي عمل او عادش مصممه ؟؟

تمكين: قلنا قرارات بعض ، مش قراراتك انت !!

امجد: انا قراري واضح من البدايه

تمكين: بس انت قلت لي ، نوقف تواصل وبشوف لو بغير رايي
امجد: ايوه وشفت اني مصمم ومن حقي وكل الناس بيتشرطوا وبيقبلين ليش اما انتي عتعاندي !

تمكين: وليش اقبل بشي انا مشتيش تقبله

امجد: عشان محد عيجي لش على مافي نفسش ، اغلب الرجال بيرفض مرته تشتغل

تمكين: ماشتزوجش اغلب الرجال ، بينتكلم معك انت ، كلمني بدون مقارنه ، ليش اقبل بشي مشتيش

امجد: لانه مش كل شي على ماتشتي في اوقات لازم نقدم تنازلات عشان تمشي الحياه

تمكين: طيب مش شرط اي شي نرفضه او نقبله نقدم تنازلات، تنازلات في اشياء مهمه وضروريه، بس هذا عشان انت ماتشتي ، ليش ماتحترم رغبتي وقراري وشغفي وابداعي والتعب الي وصلت له .
امجد: لاني مشتيش ، هكذا .

تمكين: وانا تنازلت في اشياء عشانك وسويتها ، تلثمت وقلت حاضر بعيش معك وين ماتشتي ، بس عند عملي وحبي له اسفه، مقدرش اقدم تنازل، تاركه التنازل عن قرارك يجي منك هذه المره.

امجد: وانا كلمتي كلمه .

تمكين: يبقى مافيش نصيب يابن الناس



ت.ع.خ

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

27 May 2025 01:56

تشتي تلحق تلقى الشخص وتقله ممنوع يجنب قدام المحل...

صاحب السياره شافها قدها خارجه، شغلها ومشي .
تمكين مالحقت تشوفه كان مقفي يريوس : ماله هذا بيقفي يشوف الطريق وسيارته حديثه يعني بدون مايعوج راسه الشاشه عتوريه الطريق ...

امجد بيتصل لها :ليش ماتردي على رسائلي..
تمكين : كنت مشغوله ، ماصدقين الزبائن اني رجعت ، رجعين يحجزين

امجد : ذلحين انتي بتعاندي او بتدوري مشاكل ، ليش اتفقنا و رجعتي بكلامش ؟

تمكين: قد تكلمنا في هذا الموضوع، ليش انت بتفتح موضوع الشغل وقد قلتلك

امجد: يعني مصممه ؟

تمكين: ايوه

امجد: تمام، كنت شاغير رايي بعد الزواج، بس ذلحين شاوريش عنادش

تمكين شافت دبلتها وبتكلم نفسها: اي زواج واي تغيير ، مش داري اني جالسه ادي له فرص لعل يقتنع ويوافق بقراراتي

امجد: الووو.. من بينحاكي؟

تمكين: انا الان بينسوق والشارع زحمه ، نتكلم لما اروح، باي
قفلت
امجد تعصب اتصل لها: مش انا الي يتقفل بوجهي وتتكلمي معي هكذا تمام .. اخر مره تسوي الحركه هذه معي ..
وقفل..

تمكين رجمت تلفونها وبتسأل نفسها : ل ايش انا مراعيه؟؟؟ ليش امشي في موضوع مش مرتاحه فيه ، ليش اسمح له يعاملني بهذا الاسلوب !!! اقرحها لوجهه وقدي هي ، ولا اصبر واشوف ايش عاد عيقول عشان محد يمنعني في قراري وفسخ الخطبه ، عارفه عيقولو لي من حقه يشرط ووو

جلست تكلم نفسها فوق السياره لما وصلت بيتهم ..

ثاني يوم في بيت اهلها

غاده فتحت حبه علاج ورجمتها الزباله ،،

مرت اخوها دخلت لاعندها: هيا كيف انتي ذلحين احسن؟

غاده: الحمدالله

مرت اخوها : شربتي العلاج؟؟

غاده: ايوه

مرت اخوها : ماحصل ؟ اخوش عيجنن مغلطش انتي

اخوها على دخلته وهي بتجاوب مرته

غاده: اخي هكذا حتى لو يدسعني عيغلطني،

اخوها: وايحين انا هكذا؟

غاده: المره الاولى رديتني صميل، وذلحين من امس قالب عليا مابتحاكيني سوا


اخوها : لانش داريه مافعلتي ، كيف تحاكي صحبتش وتقلي لها مش طايقته واشتي يطلقني وترسليها لاعنده!!! لو انا بقعته إن قد طلقتش ،بس عاقل وابن ناس ، لاتخليه يكره الجاهل هذا بسبب تصرفاتش

غاده: يكره ، ياريت ومايبقى جاهل

اخوها: يعني ايش الي تشتيه ؟ تشتي تتطلقي!!

غاده: ايوه
اخوها : تمام ،

مرته شافته بصدمه : غاده صلي ع النبي ، مالكم يختي ؟ يمكن حد فعلكم شي

غاده: مدري

اخوها خرج من عندها ..: اتصل لكمال

كمال: والله مالي علم ، من ايحين وهي مش طايقتني

اخوها: محد فعل لكم شي؟

كمال: مثل ايش؟

اخوها: سحر اي شي
كمال: منك صدق ؟ من عيفعل لنا سحر وعلى ايش

اخوها: انا قلتلها تمام شاخليه يطلق ، واصلا ماينفعش الطلاق الا بعد ماتولد ، لذلك خليها تتأدب هنا

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

26 May 2025 01:17

تمكين وهي بتفتح تلفونها بعد ماطفته من الليل : صدق، احس ارتحت ، وأخذت وقتي، وفقدت للعمل

حنان: احلى خبر، الان اتصلهن

تمكين فتحت رسائله: صباح النور

امجد رد بسرعه: مبكره اليوم

تمكين تشتي تشوف تغير فعلا؟: ايوه اصلا جيت المحل

امجد: ليش؟

تمكين: تميت تعديل الصور وجيت اتفاقد العمل

امجد: قد انتي مروحه.

تمكين: لا ، خسرت زبائن كثير كنت وعدتهن، قررت اوفي بوعدي معهن وبعدين نتفق ع موضوع العمل.

امجد: هكذا ؟؟ مش يدينا!

تمكين: ايوه انت عشان تعبي اقنعتني ، احس ارتحت وعادو مافي معي مسؤوليات ، وبصراحه احب عملي ماقدرت ابعد عنه

امجد: براحتش

تمكين: شكرا لتفهمك، واهتمامك براحتي

امجد: تمكين انتي متضايقه مني؟

تمكين بتشوف حنان بتسألها: عنتكلم بعدين، مشغوله شويه

امجد رد :باي

تمكين قفلت منه : شوفي نسقي التواريخ واقبليهن

حنان: تمام، عتجلسي؟ يشتين يجين يناقشين معش

تمكين: ايوه انا هنا، يجين
حنان شافت السياره الي قدام المحل : من هذا الي مجنب قدام المحل من الصبح..

تمكين: مدري ، مش شايفه حد

حنان: كان هنا قبل شويه، بعدين نزل وانا بينكلمش

تمكين: يمكن مالقي موقف...

حنان شافت زبونه رجعت بفستان استعارته

تمكين بعد مامشيت: مفروض يدفع الايجار هذا الشهر هو، مش شغال في المحل غير الفساتين حقه، واحنا خسرنا زبائن

حنان: سهل فداش اهم شي افتهنتي ، ذلحين عترجعي وبقوه أن شاءالله لما يعرفين كلهن انش رجعتي

تمكين: أن شاءالله ، بصراحه ماشلقاش مثلش يا حنان، نادر ناس هكذا تحب الخير لغيرها وماتحسد ، الي خلاني اركن عليش بكل شي اني عارفه كيف طبعش

حنان: والله انا الي فارحه بثقتش فيني ، وبينتعامل وكان المكان مكاني



في بيت كمال..

كمال: ليش رجعبعش هكذا

غاده: انت مش حاسس بتعبي

كمال: الا حاسس ، بس مادخل طبعش ، نفسي ترجعي مثل ايام ماحبيتش

غاده: ارجع انت اول، وانت تغيرت وهذا الي غير طبعي

كمال بيحاول يضحكها: انا مافيني ! انتي الواحمه المقززه

غاده : يخ منك ايش هذا الطبع ، واصل وانت كريه

كمال: طيب مافعل ، اخرج من قبالش تفتهني

غاده: ياريت

كمال قام يلبس: حاضر ، الحجه عندي قلت اساليش اونسش


غاده: بترجم كلام يضيق قلك توانسني

كمال سكت وضبح : تشتي شي؟ خاوره شي؟

غاده: ماشي ولاشي ، الله يفتح عليك

كمال زعل منها : خرج ...

ضبح منها وندم على كل لحظه صمم عليها


غاده تشتي ترسل لصاحبتها مش مركزه ، ردت على رسالته

كمال( شلي فاتوره الكهرباء من تحت الباب)

غاده رسلت لكمال بدل صاحبتها( يختي محد فاهمني مش طايقته، مني صدق نفسي يطلقني)....

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

25 May 2025 03:24

تمكين : مش عشان اهلي ، بس لو قلت لك صعب تفهم ، لانك رافض لاشياء كثيره في عقلك ، لذلك عتشوفهم غير ماشوفهم انا

امجد: ذلحين مادخلنا من هذا كله، ايش اخرتش قلي لي؟

تمكين: مش عارفه لايش منتظره ! لذلك مش عارفه ايش آخرتي ، بس اشتي آخرتي تكون عن قناعه اني عملت احسن ماعنديش

امجد فهم من كلامها انها ضبحت من علاقتهم حاول يفعل نفسه مش فاهم ( لانه مش هي الي عتنهي العلاقه هذه المره ولا عيحط نفسه بموقف بايه) : لاتنتظري شي ، خلاص انا اسف لو زعلتش سامحيني، بس يمكن لاني حبيتش ماقد قلتلش اننا حبيتش ، لذلك ماعندش حجه تضبحي إنه بينغير وعادنا خطيب مش زوج ، مش داريه اننا حبيتش وحسيتش قدش شي لي خاص فيني ماسمحش لحد يشوفك او يعلق لش او يكلمش ، فهمتيني !

تمكين استغربت رده فعله شكت بنفسها ( يمكن فهمته غلط !! حاسه اني ظلمته؟ يمكن بينخرج عقد كمال فيه، ردت عليه : فهمت

تمكين كانت في لحظه اعترافه نسيت المواقف الي بينهم حصلت ( شعور انها تنحب وانه حبها ،خلاها تعوض الشي الي ناقصها وتأذت بسببه من كمال)

حست انها عايشه في صراع مش عارفه تفكر وتقرر.. رسلت لسحر..: ممكن سؤال ، قلتي لي لما نقرر نشوف الإيجابيات صح ؟ يعني لو حبيت اتقبل عيوب الشخص ؟ بقدر اتعايش معها؟

سحر ردت عليها: في العلاقات ،لاتبنِ قرارك فقط على الايجابيات ، اسألي نفسك : هل استطيع التعايش مع عيوب هذا الشخص ؟
الحب مايعني إنكار العيوب ، بل إدراكها بوعي، يعني تكوني عارفه عيوبه وتقولي لنفسك بقدر اعيش مع هذه العيوب ؟؟؟ واختبري قدرتك لما تتقبليها بدون ما تهيني نفسك،  او تستنزفك العلاقه،واعرفي انه التقبل الناضج لايساوي التنازل المستمر، ولكن انك فاهمه الاختلاف وراضيه فيه بدون ان يؤذيكِ

تمكين: عارفه بالعيوب بس بتاذي قوي ، بتعصبني ، بتحسسني اننا ولاشي، ماعنديش راي ولا كيان ولا حريه اختيار وقرار ،
سحر: هذا مش حب ! ارجعي اسالي نفسك مثل اول مره سالتك ( ايش الحب؟)

برايك الي بتمري فيه حب ! المشاعر الي بتتعرضي لها حب

تمكين: الغيره المبالغ فيها، والتملك ،والكلام بقسوه ،انه حد ينقص مني وانه احسن مني ومحظوظه فيه( بيقلي هذا كله حب)

سحر: هو يقول الي يقوله، انتي ايش الي بتحسي؟؟ ايش المشاعر الي بتوصلك منه ! راجعي نظرتك وحكمك في الحب ايش ، وشوفي ايش مخاوفك لما قبلتي حب زي هذا؟؟

تمكين: يمكن لاني انرفضت وانهجرت مره وانا مفكره إنه يحبني، اضطريت اقبل بحب هذا الشخص وصدقت إنه يحبني بشده ويغير عليا !! او لخوفي من المجتمع خايفه اوصل سن الثلاثين وانا ماتزوجت !!)

سحر: وهل برايك كل هذا حقيقي ؟ هل الحب الي متمسكه فيه وكانك ماسكه على شوك ( هل هذا حب.؟)

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

25 May 2025 01:36

تناست كل الي في بالها وجلست تركز على الصور وتنغمس في لحظات اللقطات الي بين العرسان، كانت نظراتهم لبعض حب حقيقي ، نظرات البنت له حب وخجل ونظراته لها حب ولهفه وفرحه) تنهدت( ربي يسعدكم) ويختار لي مافيه الخير

معرفش كيف اتصرف في مشكلتي ياربي ، انت دلني وساعدني

بعد ساعتين...

امجد ضبح شاف تطنيشها يكتب كلام ويمسحه اخر شي : الف من يتمنى كلمه مني ، مدعمم الف رساله بتوصلني ، والي اخلصت لها بتدعممني وشايفه نفسها عليا، لكن والله ماتذليني لش ، ماعجبش تواصل مع مثل الي طبعي خلاص لانتواصلش

تمكين قرأت الرساله تشتي ترد بس مش عارفه ايش ترد ، بتحس إنه مابيفهمها مهما بررت بيقول الي يشتيه وخلاص

امجد : وبتقرأي وتدعممي، حاضر

تمكين قررت ترد عصبها: لانه لو رديت عليك وقلت ايش ماقلت مابتفهم الا الي تشتيه ! ايش دخل البنات والرسائل الي معك بتعايرني او تمن عليا؟ طيب شكرا لك انك مدعمم الكل ، بس ممكن افهم واحده ناوي تكمل حياتك معها!!!
انا قلت صح التواصل مع الي مثل طبعك بيعمل مشاكل ، انت ماكنت من البدايه هكذا! ليش الان تغيرت، لو كان تغير او مايعجبك شي، كنت حطيت شروطك من البدايه

امجد: فكرتش عاقله زي ماقالولي وشفتش بالبدايه، بس طلعتي عنيده فعلا بتفعلي كل شي في راسي

تمكين: ومازلت عاقله مابينسوي شي غلط ، انت الي عندك المشكله وهي الغيره الي مدري على ايش

امجد: هذا جزاتي قد الايام هذه البنات يضايقين من الغيره

تمكين: لاتخدع نفسك بشي مش فاهم معناه، لما تغير، فهو غيره بحدود لاسباب مقنعه لشخص تحبه ، بس انت بتغير من حسابات وصديقات واهل وعمل ( مش حاسس انك مبالغ شويه) ؟؟

امجد: لا ، انتي الي مفكره نفسش عشتي في الخارج، وهو الا شهرين سافرتيهن رجعتي تتفلسفي ..

ترتيل دخلت لاعندها..:مساء الخير

تمكين طرحت تلفونها: مساء النور
ترتيل: مالش بتبكي؟

تمكين: ولاشي صداع وضبحت عمل

ترتيل بتبعد من يدها شوكه بلس: يو جعله شوكه، الي مره اختي

تمكين: كيف كان يومكم؟
ترتيل: يجنن كلهن بيسألين عليش ، وتعبو نفسهم، ومن فرحتهم عتجي، قالين يرتبين ليش البوفيه وديكور وحركات عشان تصوري حين كل مره تصبحي فوقهن

تمكين هزت راسها: تمام
ترتيل : اخرجي جاوبي امي

كلهم في الصاله..
تمكين دخلت عندهم: مساء الخير..
ابوها: مساء النور ، عمش بيسال عليش

امها: كلهم، ولمى والكل فاقده لش

تمكين بفرررحه : جت ؟ ايحين جت !!! يووو كان نفسي ابسرها

مرت اخوها: هات ماذلحين سمعنا صوتك

ام تمكين: ايوووه صاحبه الطفوله، كانين واااااصل مع بعض ، لوما تزوجت لمى وسافرت ، ذلحين لو تبسري محلا بناتها ثنتين توأم و حامل ، جت تولد عند مرت عمش،بينبسرها واقول

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

24 May 2025 04:12

امجد: لو عليا مشتيش شي يشغلش عني حتى اهلش، تعلقت بس قوي ، لو يسبر لاعجل العرس بعد شهر، بس مارضيو اهلي قالو ماعيلحقو

تمكين تنرفزت: اهلك مايلحقو او انا قصدهم.

امجد: مع انا، نشتي نجهز الغرفه ونرنج البيت ونحجز الفنان وبعاسس خيرات

تمكين: انا العروسه الي معي تجهيزات اكثر منك، ماشرضاش انا

امجد: مش على ماتشتي لو يرضو لاعرس بعد شهر...

تمكين كانت متعصبه قوي من كلامه( حاسه كلامه بينرفزها، بدات تحس بيحب نفسه قوي ، واهم شي هو ، مش مهتم ابدا لرأيها ومشاعرها في كل شي)

وصلتها رساله في هذا اللحظه من سحر: كيفك تمكين ، اخبارك، جيتي على بالي اليوم من الصبح، اشتقتلك ، ايش رايك نلتقي؟

تمكين: ياريت ياسحر ، والله فقدت لش وكلامش، بس يمكن مش انتي عارفه انا رجعت اليمن

سحر: حبيبتي ، الله يسعدك وين ماكنتي ، كيف امورك طمنيني ، كل شي تمام

تمكين: الحمدالله، بس بصراحه انا مش تمام ،ابدا ، في اشياء كثير زاعجتني مش قادره افهمها...

سحر : مثل ايش؟ احكي الي تحبي ، انا هنا معاكي حتى لو من بعيد، بفهمك
تمكين شافت اشعار رساله منه :( فتحتها)

امجد: وينش؟ من صدق فلتينيي وبتشتغلي.

تمكين: بينكلم صحبتي

امجد: من صاحبتش؟ مش قلتي مابش معش خيرات صاحبات، ؟؟

تمكين: صحبتي من مصر..بعدين ايحين قلت؟ بالعكس انا اجتماعيه وقوي معي صاحبات، بس عملي وانشغالي بعدني عنهن شويه

امجد : حلو يعني تعودتي، انا الصدق اكره كثره الصاحبات، مامنهن الا خراب البيوت ولايعجبني كثره الدخله والخرجه

تمكين: ليش؟

امجد: هكذا طبعي ، قد قلتلش ، احب البيت واكيد احب مرتي تكون عندي .

تمكين ضبحت ماردت عليه، خرجت من محادثته، و ردت على سحر : ( احس خطيبي يا سحر، فيه انفصام شخصيه، كان طبعه بالبدايه غير، ولما تواصلنا وتعمقنا اكثر بدات اشوف شخصيه ثانيه تماما، كيف اقدر اغيره؟ ايش الطرق الي بتغيره!

سحر: قبل لا اسأل واوضح لك إنه انفصام الشخصيه غير الي قلتيه ، بوقف عند اخر شي قلتيه ( كيف اقدر اغيره؟ ايش الطرق الي بتغيره؟)

تمكين: ايوه !

سحر: هل خلقتي ، او انخطبتي عشان تغيريه؟ وبتسألي على الطرق ! طيب هل انتي تغيرتي ؟ هل طبقتي الاسئله وجلساتك مع نفسك الي قلتلك تكتبيها !!)

تمكين: لا ، ماعد يهمني نفسي ، بقدر ما يهمني افهمه، كل مره عن مره احسه شخص صعب اتعامل معه

سحر: برايك كيف بيتغير؟

تمكين: مش عارفه وليش سألتك؟ عشان انتي اكيد عارفه

سحر: انا ما اعرفه ولا اعرف الي بينكم وايش الي شفتيه منه، بس صدقيني لو انتي تغيرتي وفهمتي نفسك بتعرفي تغيريه او تتغيري ويتغير ،

تمكين : وبيتغير مثل ما اشتي !

(

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

23 May 2025 22:49

تمكين لفت بسرعه كانت سارحه في كلام امجد و رسالته وانه تغير عشانها حبته اكثر

بعد مشاويرهم روحت البيت الساعه ١

دخلت تصلي ظهر

ترتيل دخلت وهي منعسه : تمكين ، هيا غدا

تمكين نكزت : يووو الحمدالله حلم

ترتيل: ايش حلمتي؟

تمكين: كنت في شارع كبير مغيممممم وانا وسط الطريق في اشاره الف يمين او يسار بس مابش لفه والطريق طويله تخوف

ترتيل: الفرغه مابش عمل وسمره فوق مسلسلات اكشن اكيد عتحلمي نفسش خارقه في الغابه، قومي اسلتي الجوع خلاش تكوبسي

تمكين: ماقلتي الا اكثر شي اكرهه؟ ماحبش السلته، ايش الغدا

ترتيل : عادها عتتشرط ، كان زمان ومعش عمل تتشرطي، ماذلحين معش الحاصل ولا حمشي المطبخ...

تمكين: يو كيف قد انتي كريهه، ماحصل لش !!

ترتيل : بينعاملش مثل مابتعاملي نفسش

تمكين: كذابه، اين معاملتش لي من معاملتي لنفسي بينتخور اكل طعيم وانتي تخوري لي الي تكرهه

ترتيل: مقصدي بشكل عام مش في الاكل

تمكين: مش فاهمتش،و مش وقتش ، هيا امي بيصيحو

في بيت اهلها...
اخوها : هيا غدا

اخته: قد سبقتكم، كنت جاوعه غرفت لي

اخوها: ادخلي لفي اداتش يلا، شاشلش على طريقي حين اسير اخزن

اخته: اين؟
اخوها: بيتش

اخته: و رجعنا
اخوها قلب ،قدلها كثير من قلباته هذه تخاف منه عارفه عصبيته
غاده: اخي قلتلك ماعد اشتيه

اخوها: مابنلعبش ، مش هي جعاله ترديها ساع ماكنتي زمان تتخوري، اسمعي ياغاده انا سكتت لانه وقع ابن ناس وجاء من الباب وعارف تربيه اختي، انتي اخترتيه بنفسش وحبيتيه ، والي بتحسيه الان عيافه، هذه مرتي قبالش عيفتني ، كانت تبكي حين تبسرني ، وجلست بيتها، بعد مابسرتها تضايق انا الي كنت اشلها بنفسي يوميا بيتهم ، وانا الي كنت اكلها خارج واخورها لوما خرجتها من الي هي فيه، وانتي ماينفعش تقلي له لاوشه مش طايقتك ، عادو بني ادم احترميه.

غاده انصدمت كيف عرف ! نفسها اساله كيف عرف انها حبت كمال ؟ بس خايفه تتبهذل اكثر امها بتسمع ونظراتها لها مش خير ابدا...

قامت غرفتها تلف اشيائها



في الطريق ...

كمال ضابح من غاده ، نادم إنه رسم لها صوره في عقله وتفاجأ انها غير الي رسمها في باله، طلعت شخصيتها وقت ماحبها متصنعه، وشخصيتها لما تزوجها وعاش معها مختلفه...


تذكر تمكين عفويتها ، بساطتها ، انها حقيقيه قوي مش متصنعه لذلك قارنها بغاده وحب غاده اكثر بسبب تصنعها ، زعل لما شاف التغييرات الي خاف ماتتغير عشانه، تغيرتها عشان الشخص الي خطبها...



فجأه بدون شعور نطقها: ياريتني خطبتها هي .


رقم غاده تتصل له ، شاف الرقم ( اعوذ بالله ، كأنها سمعت ماقلت )...

كمال جاوب :الو

غاده بتشوف اخوها وبترد : ها كمال وين انت؟

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

23 May 2025 22:48

ها شالغي صداقتش واشبعي بهم، يانا بصفحتش يا هم، مايبقى الا اخوش وابنه وبس

تمكين : هذا مش اسلوب ، وماحب نتناقش بالتهديد

امجد مطنشها مارد عليها

تمكين استفزها لدرجه بدأت تفكر ، معقول هذا غيره؟ طيب ماقد قال إنه بيحبني ؟ ولا وصلنا لمشاعر حب ! غيره من ايش ؟ مش فاهمه ايش في ، ليش بيعاند هكذا، يمكن يشتي يشوف لو انا مشكلجيه؟؟( خلاص شافعل نفسي هادئه وعاديه )...

رقدت والصبح..
ابوها: تمكين

تمكين خرجت من غرفتها: صباح الخير

ابوها : ياصباح الظهر

تمكين: الساعه عشر ونص ايش من ظهر

ابوها: انا عندي هذا الوقت ظهر ، مشغوله؟

تمكين: ماشي ، مافي نفسكم

ابوها: وصليني معي مشاوير

تمكين: حاضر،، البس واخرج

ابوها: ماعد بينقدر على السواقه ظهري وارجلي متخشبه

تمكين: من عيني بس البترول عليكم، والساعه بالفين

ابوها: سلبطه ، اتم مشاويري والباقي لش

تمكين: يلا الان بساعتين البس والحقكم

خرجت ملثمه ( اول مره يشوفها ابوها)
تمكين طلعت : اين عنسير؟

ابوها: بينقل انش مرت عبدالوهاب ، قلت مالها عتوصلني هي وايحين بتسوق

تمكين ضحكت: ماعرفتونيش

ابوها: ماشي ، من ايحين بتتلثمي؟

تمكين خافت تقله إنه اوامر خطيبها: امد العرس قريب قلت انتبه لبشرتي

ابوها: قد بنقلكن من زمان مارضيتين انتي واختش
بس ماعد تبعديها

تمكين شغلت السياره وخرجت : ماشبعدها حاضر

ابوها( يعرفها لما ترتبش): اكيد خطيبش قلش
تمكين اشرت لبنت اخوها تقفل باب الحوش ، ومشيت: ماشكذب عليكم صح قلي لو تتلثمي احسن لش عيضايقوش، وبعدا فكرت لما شاتزوج شاكون اخرج ممكيجه واصل ضروري اتلثم

ابوها شاف اعذارها مازالت طفله مش ساخيه تزعله ضحك: تمام يا ممكيجه واصل ، اهم شي توقعي ساع امش ، كم لها تطلبني نخرج السوق تشتي تشتري مكياج ولا شدي لش زلط تشتري لها معش حين تتكسي

تمكين بتمازح ابوها: يهي يهي الي عادهم يعجبهم الحلا والمكياج

ابوها قفزوا من فوق مطب وهي بتسافطه: هيا اوبهي المطب فلعتي راسي

امجد ضابح منها مارسلت ولا بعدتهم من الصفحه رسل لنا ( صباح الخير، و شكرا لاني هنت عليش ، رغم طول الليل مارقدت زعلت اني غثيتش بغيرتي المبالغ فيها انا مش هكذا ابدا بس مدري كيف وقعت حين حسيت هذه البنت تخصني خطيبتي عتوقع لي زوجتي وام جهالي؟)

لما وقفت ابوها ينزل يعامل فتحت الرساله و ردت له
( صباح النور، الي زعلني اسلوب الكلام والتهديد ، يعني معقول عنعيش هكذا العمر كله يا انا يا مدري ايش )

امجد: اسف وشاخليش انتي وقبيلتش تشتي تبعديهم ماتشتي عادي ).

تمكين: تسلم انك راجعت نفسك في القرار.

امجد: عشان تعرفي غلاوتش عندي .

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

23 May 2025 01:40

ابراهيم بدهشه : اي عمل ؟؟ مادراك وانت ؟؟؟

كمال: سارو اهلي اليوم يحجزوها، قالت ماعد عتشتغل هي بطلت ، عتمسك بدلها البنت الي معها

ابراهيم: قصدك العمل يخطى ، يشتغل من ماشتغل هي ولاصحبتها مافرقت، اهم شي الفساتين يلاقين مخارجه

كمال: طيب كيف لما اخترت المحل هذا، به مصورات مشهورات اكثر

ابراهيم: عمنا مايشتي الا المصوره تمكين بالاسم

كمال: ياخي هو هذا الي مجنني ، إنه وانت مخزن عندي صمم عليها، لذلك سالتك من هو

ابراهيم طرح الي في يده ولفت له: كمال ؟؟؟ مافي نفسك !!! انت ملاحظ إن البنت هذه شاغله تفكيرك؟ كل مالتقينا تسال وتحقق معي ؟؟؟

كمال ضبح خاف ينفضح اكثر ويبان عليه انها كانت حبيبته : ماحد يتناقش معك، كان اسكه افتح موضوع

ابراهيم: ابسرت مباراه الكلاسيكو ياخي

كمال: مشتيش مباريات ، غيرها

ابراهيم ضحك: اللحظه هذه حسستني انك ام العيال

كمال ضحك: الله يقلعك.
بعد يومين...

امجد بيتكلم معها : كيف طبعش تحبي المشاكل ؟

تمكين استغربت من سؤاله وضحكت: من يحب المشاكل؟ هذا سؤال او تمزح؟

امجد: والله مابينمزح ، مني صدق، كيف طبعش لو وقعت مشكله في البيت تنفعلي او تدعمني او تحلي الموضوع بالعقل

تمكين: مابتوقع مشاكل كبيره الحمدالله، صح بيحصل خلافات بس بنحلها ،اغلبها بيني وبين اختي وبنات اخي على الدور والعمل

امجد ضحك: هو هذا قصدي يعني مشكلجيه

تمكين: ليش؟
امجد: سلايفش اليوم فعلين مشاكل وصياح وجنان عتنضمي معهن الحمدالله ، كنت اقول خطيبتي عاقله

تمكين: مش عنسافر؟

امجد: يمكن ويمكن ارجع اشتغل هنا واستقر

تمكين: طيب اكيد عنكون بيت وحدنا

امجد: ماركنش ، ابي مايشتي حد فينا يخرج

تمكين : خلاص ماشفعلش مشاكل

امجد: صدق؟

تمكين: صدق ، ماشفعلش عمل من مره، احسن.

امجد ضحك: انتي عتجي عند شويه سلايف تتعسكري ، قلك ماتفعل عمل

تمكين لفتت لترتيل: بنت

ترتيل: مالش؟

تمكين: قلك شاعيش بيت ابوه

ترتيل : ايوه؟

تمكين : انتي عارفه إن في بيتهم نظام قدو ضابح منه!!

ترتيل : ماهو؟

تمكين: يصلو فجر ومايرقدوش ، يقومين يعجنين يخبزين يفعلين صبوح من الساعه ٦

ترتيل صفقت لها بضحكه: ماشاءالله، هيا من بكره تقومي تفعلي لنا صبوح من ٦ ماكودش تتعلمي

تمكين شافت رسالته
امجد: مالش؟ ماعد رديتي ، شكلش افتجعتي
تمكين: لا ، اصلا داريه تمزح

امجد: والله مابينمزح، اكلمش جد، بينحاول امهد لش الوضع

تمكين: العمل مايقتلش سهل ، لاقد الزوج حالي كله عيسبر

امجد : يوو والله انش كبرتي في نظري قوي قوي

تمكين فرحت قوي بكلامه : قال كبرت في نظره ياترتيل!! بتبسري اللطافه الي فيه؟

ترتيل: ماقلتي له!! حين قلش هكذا

•┇ رَوَايَاتْ صنَـعـۛۛۛ♕ـۛۛۛـا۽ رَوَحُۧـ♡ـيَۧ ┇•

22 May 2025 02:45

بعد ماكملت اتفاقات وتنسيقات خرجين، لفتت لحنان

حنان: اسفه والله قوي قوي وعد اخر مره, ربشوني حين، جو وغيرو ديكور المحل ونقلت بقعه مكتبش ماقد رتبت

تمكين: حنان ، الذواكر ماتبقاش في الادراج، بتسمعي!! ليش شليت خزنه وزنها طن عشان، الناس امانه في ذمتنا، الشغل العشوائي هذا ماينفعش

حنان: حاضر، بس ايحين قد معش مواعيد! مابش ابدا

تمكين: الان شابقى كصوره رسميه ،انتي عتشتغلي تصوريهن وانا شاعدل من البيت

حنان: ليش؟

تمكين: خطيبي بيغير مايشتي اشتغل تصوير
حنان: يو منش صدق ! يختي يغير عادو الا خطيب ،

تمكين: الصدق انا تعبت ضغوطات العمل احس اشتي ارتاح ومعي تجهيزات لعرسي، لذلك شاعدلهن انا

حنان : تمام

بعد ماخرجت تمكين.. وصلين ثنتين نسوان

حنان: تمكين موجوده بس ماعد عتصور ، انخطبت وعرسها قريب

واحده منهن بضحكه: ليش ولو عرسها قريب تصورنا وبعدا تشل اجازه عرس، اشتغلت لقبل عرسي مافيها

حنان بمزح معهن: معها خطيب يغير عليها، لكن تعديلات هي عتشتغل التعديلات كامله يعني لمساتها موجوده

اتفقين معها و روحين..

فوق السياره

كمال: حجزتين؟

خالته: ايوه

بنتها: ماهو ايوه، قهر حين مش هي تمكين الي عتصور،

كمال : قد بنقلكن به احسن منها ابردين

بنت خالته : عجبتني تصويرها في عرسك قوي واخلاقها معروفه عند الكل

خالته: قلك خطيبها بيغير خبلا، لو عادو زوجها لانقل تمام

كمال انصدم ( خطيبها بيغير)؟: يعني ماعد عتصور عشان خطيبها؟
جاوبين: ايوه

كمال حس بقهر اكثر ( احد اسباب تخليه عنها، إنه ماكان يشتيها تصور بس ماقال لها لانه عارف ردها ، ليش اما هذا سمعت كلامه)؟؟!!



في بيتهم .

ابوه: بتسمع !! لاتعق بنت الناس بالخطبه، اشرط ولا افسخ

امجد كان فارح برسالتها وتعمد يروح عند ابوه عشان لو كلمه في الموضوع يوريه : قد اتفاهمنا

ابوه: على من بتكذب ؟في يوم وليله تفاهمتو؟


امجد ورا ابوه الرساله :( تصدق هم وانزاح ،سرت اليوم وقلت البنت تمسك بدلي ماعد شاصورش، احس ارتحت شويه من ضغط العمل، يعني تركت التصوير للمساعده، وانا شاعدلهن من البيت)

ابوه قرأ الرساله وبهنجمه:( ايوه قع رجال، قلك مرتي مابحد سارت تصور)


امجد: انا من نفسي ماكنت شاسمح لها، بس قلت عادحنا مخطوبين

ابوه: ولو ، الناس عيسألو من ذلحين ، مخطوبه لبيت من

امجد: خلاص ذلحين طيبنا نفسك ياحج

ابوه: سير ابسر على شحطه في عيال عمك ، ادو نسوان صدق من البلاد ، وانتو مكنونا متعلمه جامعيه ،

امجد : وخواتي متعلمات

ابوه : سكت


في بيتهم..

ترتيل: والله اننا زاعله اكثر منش ، كيف تفلتي !

تمكين: قلي فتره ارتاح و ارضي امجد ، بعدين حين يبسرني ماعاندت...

ت.ع.خ