222
"سنی آنلاین" ایران اهلسنت هالرسانی سایت: www.sunnionline.us/balochi سنی آنلاین مَں اینستاگرام : https://instagram.com/sunnionlinebalochi
✨مولانا عبدالحمید:
🔷 کارمستراں زانتلۆٹانی حرمت ءَ سات انت ءُ گپان اش بُشکن انت
شیخالاسلام مولانا عبدالحمید، ماں زاهدان ءِ نمازجمعه ءِ دیوان ءَ (8 اسفند 1404/ 28 فبروری 2026) گۆں اشاره به ملک ءِ لهتے مزنشهدربرجاهانی زهرشانیاں په زانتلۆٹانی حرمت ءِ ساتگ، آوانی گپانی گۆش دارگ ءُ لۆٹانی رندگیری ءَ کڈن کرت.
په سنیآنلاین ءِ سرهال ءَ مولانا عبدالحمید درشان کرت: ماں هر چاگردے مزنشهدربرجاهاں شه آ چاگرد ءِ هژدری ئێں بنجاهاں انت که ماں تمامێں دنیا ءَ مدام ماں جنز ءُ زهرشانیاں دێم ءَ بوتگ انت.
واجه ءَ گێش کرت: ایران ءِ مردمانی دل شه دیماه ءِ پێشامداں انگت رێش انت. آ رۆچاں مزنشهدربرجاهاں بند بوت انت ءُ نون پچ بوتگ انت، زانتدربرۆکاں وتی مارشتاں درشانَ کن انت. کارمستراں بائد آوانی حرمت ءَ سات انت، گۆں آوان نند انت، گپان اش گۆش دار انت ءُ لۆٹان اش رندگیری کن انت.
شیخالاسلام ءَ گوشت: کارمستراں په زانتلۆٹاں گێشترێں مشکل جۆڑ مه کن انت تاں دگه ٹپے جۆڑ مه بیت، بلکه پێسر ءِ ٹپان اش علاج کن انت. زانتلۆٹانی گپانی گۆش دارگ گهترێں توجیل انت.
🔹 عدالت ءِ اێر دارگ، امنیت ءُ استمانانی وشنودی ءِ ضامن انت
مولانا عبدالحمید درائێنت: چٹِّیئے که مچێں مردمانی امنیت، تاهیر ءُ وشنودی ءَ پجائێن ایت، عدالت ءُ آمید ءِ اێر دارگ انت، درێگے دنیا ءِ حکومتاں اێشرا زانتێں ءُ باور اش کرتێں.
واجه ءَ ٹکاٹک گوشت: هژدری ئێں آزاتیانی پجائێنگ، ٹک ءُ مذهب ءُ جنێں ءُ مردێنانی میانجین ئے نابرابریانی دور کنگ شه عدالت ءِ اێر دارگ ءَ انت. هر حاکم ءُ حکومتے که آمید ءُ عدالت داشته بیت، وتی استمان ءِ وشنودی ءَ کٹ ایت. هچ زۆرآورێں حکومتے بےعدالت ءِ اێر دارگ ءَ نه توانت امنیت بیار ایت.
زاهدان ءِ آدێنگ ءِ امام ءَ گێش کرت: اگه عدالت مه بیت گۆں اێٹمی زۆر ءَ هم ماں چاگرد ءَ استمانانی تاهیر ءُ امنیت پجائێنگَ نه بیت. هر حاکمے که تنکچم بیت دنیا ءَ په وت ءُ دگراں جهندمَ کنت. تیوگێں مردمانی دلگۆش کنگ ءُ آهانی گپانی گۆش دارگ امنیت ءُ تاهیر کار ایت.
🔹 پاکستان ءُ اۆگانستان ءِ جنگ هچ کجامی خیر ءُ صلاح ءَ نه انت
مولانا عبدالحمید گۆں اشاره به پاکستان ءُ اۆگانستان ءِ جنگ ءَ گوشت: پاکستان ءُ اۆگانستان دو اسلامی ملک انت که گۆں وت دێرێں رهوت دار انت، اێشانی نیام ءِ جنگ هچ کجامی خیر ءَ نه انت، منی سۆگه په آوانی کارمستراں همێش انت که همدگر ءِ هاک ءُ سیمسرانی حرمت ءَ سات انت ءُ جێڑهاں گۆں ترانکاری ءَ گیشءُگیوار کن انت.
زاهدان ءِ آدێنگ ءِ امام ءَ همےرنگ شه پاکستان ءُ اۆگانستان ءِ مردمی رهشۆن ءُ زانتکاراں لۆٹ ات که دێم ءَ بیا انت ءُ شه اے جنگ ءَ دێمداری کن انت.
https://sunnionline.us/balochi/2026/02/4522
🏝🏝🏝
http://T.me/SunniOnlineBalochi
🌙#رمضان
✨شيخ الحديث مولانا عبدالرحمن چابهارى:
🔹 زمانگ رمضان ءِ ماه ءِ سر ءَ پهر کنت ءُ سال هم رمضان ءِ ماه ءِ سر ءَ پهر کنت؛ پچےکه اے ماه دراهێں ماهانی واجه انت، گڑا اے ماه ءَ برباد مه کن اێں.
🔹اے ماه ءَ گۆں قرآن ءِ وانگ ءَ، گۆں خرچ کنگ ءَ، گۆں صدقه دیگ به گریب ءُ مسکیناں ءُ گۆں وتی وس ءِ کساس ءَ دبۆجی ءُ سحوری ءُ شام ءِ دیگ ءَ گوازێں اێں.
🏝🏝🏝
http://T.me/SunniOnlineBalochi
#تامربند
واجه شیخ الاسلام مولانا عبدالحمید ءِ ٹکێں کلوہ په دُز، هلوچگر ءُ آھانی پلهمرزاں.
🏝🏝🏝
http://T.me/SunniOnlineBalochi
هلاکهداری ءِ سیاسی مزنکارمستر:
🔷 بےسجلانی پروندهانی جاورھال ءِ گیشءُگیواری سرکار ءِ اولی ذمه انت
سنیآنلاین| غلامرضا گنجی، هلاکهداری ءِ سیاسی مزنکارمستر ءَ گوشت: بےسجلانی پروندهانی جاورهال ءِ گیشءُگیواری ماں اے هلاکه ءَ شه سرکار ءِ اولی ذمهان انت ءُ همے بابت ءَ گۆں هلاکهدار ءِ حکم ءَ یک پاٹی ئے پرے کار ءِ گیشءُگیواری ءَ تعیین بوتگ.
آئی گوشت: بےسجلانی یک هزار ءُ 884 پرونده ماں ثبتاحوال ءُ شورای تأمین ءِ ادارهاں هست انت. اے گشت ءَ 27 کهول ءِ پرونده پد شه پٹءُپۆل ءَ، منّگ بوت که سجل دیگ به انت. آدگه پروندهانی باروا 15 رۆچانی ته ءَ پٹءُپۆلَ بیت ءُ جاورهال اش گێشءُگیوارَ به انت.
گنجی گوشت: گۆں اے پروندهانی گڈی گیشءُگیواری ءَ گێش شه 108 مردم شه اے کهولاں سجل ءِ واهندَ به انت.
🏝🏝🏝
http://T.me/SunniOnlineBalochi
✨مولانا عبدالحمید:
🔷هچکس «جنگ» ءِ واهشتءَ مهکنت/دێمداری شه جنگءَ کارمسترانی دست ءَ انت
شیخالاسلام مولانا عبدالحمید، ماں زاهدان ءِ نمازجمعه ءِ دیوان ءَ (۱ اسفند ۱۴۰۴/ ۲۰ فبروری ۲۰۲۶) گۆں اشاره به جنگ ءِ گرانێں تاواناں په استمانءَ ءُ اے که کسے جنگ ءُ دشمن ءِ دێمپهدێمی ءِ واهشت ءَ مهکنت، گوشت ئی: دێمداری شه جنگ ءَ کارمسترانی دست ءَ انت که گۆن تدبیر ءُ توجیل ءِ درگێجگءَ شه جنگ ءَ دێمداری کن انت.
په سنیآنلاین ءِ سرهال ءَ مولانا عبدالحمید درشان کرت: اے رۆچاں ملک ءِ ته ءَ جنگ ءِ هبر انت. هچکس جنگ ءُ دشمن ءِ دێمپهدێمی ءِ واهشت ءَ مهکنت، پچےکه جنگ تباهی ءُ گرانێں تاوان په استماناں دار ایت؛ جانی ءُ مالی تاوانانی سوبَ بیت ءُ ملک ءِ بنیاتی ڈیلءُ ڈۆلاں نقصان رسێن ایت.
واجه ءَ درائێنت: دێمداری شه جنگ ءَ کارمسترانی دستءَ انت که آ په دێمداری شه جنگ ءَ تدبیر کن انت ءُ توجیل درگێج انت.
🔹سیاسی بندیگ ءُ دیماه ءِ زهرشانیانی دزگر بوتگێں مردمانَ آزات کن ات
زاهدان ءِ آدێنگءِ مام ءَ گوشت: گهتر انت که ماں نونێں جاور ءَ پهکێن سیاسی بندیگ ءُ آوان که ماں دیماه ءِ زهرشانیاں دزگر بوتگ انت بےڈکّ ءُ بَے ءَ آزات بهانت.
واجه ءَ گێش کرت: ماں نونێن جاور ءَ گهتر انت که انچێن گامگێج زورگ بیت که شاید تاثیر داشته بهانت.
🔹هچ استمانے سگّات نهکنت که آیی مقدساتانی بدگوشی بیت
🔹عاقل ءُ گران مهذبێں مردماں دگرانی مقدساتانی بدگوشی ءَ نهکن انت
مولانا عبدالحمید ماں دگه بهرے شه وتی هبراں گوشت: لهتے مردم که درد ءُ مشکلانی آماچ انت زاهءُزکت کن انت ءُ برے هم دین ءُ مذهبانی مقدساتانی بدگوشی ءَ کن انت، وهدےکه اے رهبند گۆں عقل ءُ راستبندگری ءَ چپ انت. عاقل ءُ گرانمهذبێں مردم هچبر دگرانی مقدساتانی بدگوشی ءَ نهکنت. هماکه استمانانی مقدساتانی بدگوشی ءَ کن انت جذباتی ءُ سست عقلێں مردم انت.
واجه ءَ گێش کرت: یک استمانے ءِ مقدساتانی بدگوشی کنگ هچ دگری ئے گۆں آ استمان ءِ جند ءِ بدگوشی ءَ نه دار ایت. یک استمان شاید منّ ایت که آئی جند ءِ بدگوشی بیت، بلے وتی مقدساتانی بدگوشی ءَ هچبرَ نه منّ ایت. مقدساتانی بدگوشی گێشتر مارشتاں ٹپیگَ کنت. استمانانی بدگوشی هچ دینے ءِ ته ءَ روا نه انت. پمێشا مئے سۆگه انت که چۆشێں مردمانی دێم گرگ بیت، اگں کسے یک جائے ظلمے کرتگ پچے بائد مقدساتانی بدگوشی بیت؟!
🔹سیر ءُ آرۆساں آسان گر ات
زاهدان ءِ آدێنگ ءِ امام ءَ ماں دگه بهرے شه وتی هبراں په سیر ءُ آرۆسانی آسان گرگ ءَ کڈن کرت ءُ گوشت ئی: ماں نونێں مالزانشتی جاور ءَ که سُهر ءُ طلا ءِ نهاد باز برز انت ءُ مچێں چیز گران بوتگ انت، کسے سهر یا آدگه هرچانی وس ءَ نه دار ایت، گڑا اے مسائلانی پارءَ آرۆسانَ پد ءَ مه پرێن ات.
واجه ءَ دێمتر ءَ په مهریهئانی کم کنگ ءَ هم کڈن کرت ءُ گوشت ئی: اگں پێش ءَ مهریه گۆں بازێں سکه ءَ بوتگ، نون که سکه ءِ نهاد باز برز انت، شه بازێں سکه ءِ هلگ ءَ پهرێز کن ات. آرۆسانَ آسان گر ات تاں ورنائێں جنک ءُ بچکاں توان انت گۆں کمێں هرچاں آرۆس کن انت ءُ دین ءُ ایمان اش پهازگ بیت.
🔹دارالعلوم زاهدان ءَ کمک کن ات
مولانا عبدالحمید وتی هبرانی گڈسر ءَ شه لس مردماں لۆٹ ات که دارالعلوم ء زاهدان ءَ کمک کن انت ءُ گوشت ئی: دارالعلوم ء زاهدان یکے شه ملک ءِ ٹوهترێں هێلکاری بنجاهاں انت که شه مولانا عبدالعزیز رحمهالله ءِ دعائانی برکت ءَ ءُ شما درێں مردمانی همکاری ءُ هێمات ءُ دعا ءَ دێمرئیء کرتگ ءُ گۆں براس ءُ گهارانی اپسله ءُ هێلکاری ءَ گلائێش انت.
واجه ءَ گێش کرت: ماں نونێں آزگسمائێں مالزانشتی جاور ءَ، شه شما درێں مردماں لۆٹ اێں که دارالعلوم زاهدان ءَ کمک کن ات. بےوس ءُ نادار ءُ آدگه دینی وانگجاهانَ هم کمک کن ات. بازێنے شه وتی پاکونڈ/زکات ءُ خیراتانَ دارالعلومء زاهدان ءَ دےات.
https://sunnionline.us/balochi/2026/02/4515
🏝🏝🏝
http://T.me/SunniOnlineBalochi
مولانا فضلالرحمن کوهی:
🔹علما ءُ زانتکارانی بےبرمشی ءِ بزانت ملک ءِ پێشامدانی باروا بےترانگی نه انت/ گشنگ ءُ شدیگانی کوکارانی دێم ءَ بےبرمشَ نه بهاێں
سنیآنلاین| مولانا فضلالرحمان کوهی ماں پشامگ ءِ نمازجمعه ءِ دیوان ءَ (24 بهمن 1404/ 13 فبروری 2026) گۆں اشاره به ملک ءِ پێشامداں گوشت: ملک ءِ گوستگێں ماهانی پێشامداں شه هچ کس ءَ چێر نه انت. مردماں که شه گشن ءُ په وتی لۆٹانی پیلو کنگ ءَ کوکار کرت، بازێنے شه مئے هم ملکیاں کشگ بوت انت. اے پێشامد ءَ آزات سسائێں مردمانی زرد ءَ رنجێنت ءُ ماں چاگرد ءَ ٹوهێں تکانسری ئے جۆڑ کرت.
پشامگ ءِ آدێنگ ءِ امام ءَ گێش کرت: لهتے زانتکارانی بےبرمشی اے پێشامدانی باروا محافظهکاری یا بےترانگی نه انت، بلکه آئی سوب اێش انت که مولانا عبدالحمید ءَ شه اهلسنتێں زانتکارانی نێمگ ءَ اے لۆٹاں درشان کرتگ ءُ آدگه زانتکار ءُ علما وت ءَ گۆں واجه ءِ گپ ءُ دیدانکاں یکے زان انت.
مولانا کوهی ٹکاٹک گوشت: اهلسنتێں علما ءُ زانتکاراں گۆں کڈن په ملک ءِ سیمسرانی پهازگ ءَ، کُشگ بوتگێں مردمانی باروا که شه ناداری ءُ ظلم ءَ زهرشانی اش کرتگ، بےبرمشَ نه نند انت ءُ اگں آوانی هبراں بدل کنگ به انت، گڑا پکا اے بابت ءَ گواچن ءَ درا ءُ پدّرَ کن انت.
https://sunnionline.us/balochi/2026/02/4512
🏝🏝🏝
http://T.me/SunniOnlineBalochi
سنیآنلاین| «همفکری گندءُنند ءُ زاهدانء مزنمێتگ ءِ زانتکار، جمعه ءُ جماعاتانی امام ءُ پاکێن کلام ءِ حافظانی نیاد گۆں واجه شیخالاسلام مولانا عبدالحمید» ءَ مرۆچی دوشمبی (۲۷ بهمن ۱۴۰۴/ ۱۶ فبروری ۲۰۲۶) ءَ ماں زاهدان ءِ مزنێں مسیت مکی ءَ برجم دارگ بوت.
▫️ماں اے گندءُنند ءَ که چیزے پێسر شه رمضان ءِ مبارکێں ماه ءَ برجم دارگ بوت، اصلاحی ءُ هێلکاری برنامهئانی اێردارگ ءِ باروا مسیتانی ته ءَ ءُ همےرنگ «نماز تراویح» ءِ گهتر وانگ ءِ سر ءَ همفکری ءُ گپءُتران بوت.
▫️شیخالاسلام مولانا عبدالحمید، مفتی محمدقاسم قاسمی (حدیث ءُ فقه ءِ زبردستێں استاد ءُ دارالعلوم زاهدان ءِ دارالافتا ءِ سرمستر) ءُ مولانا عبدالمجید مرادزهی (شه اهلسنتانی نامپرشتێں زانتکار ءُ ندکاراں) ماں اے گندءُنند ءَ هبر کرت.
🏝🏝🏝
http://T.me/SunniOnlineBalochi
🕌 مولانا عبدالحمید ماں زاهدان ءِ نماز جمعه ءِ دیوان ءَ:
🔷 دیماه ءِ پێشامداں هچ توجیهے نهدار انت؛ کارمستراں توجیه ءِ بدل ءَ شه مردماں پهلی لۆٹ انت ءُ آوانی لۆٹانَ منّ انت
شیخالاسلام مولانا عبدالحمید، ماں زاهدان ءِ نمازجمعه ءَ دیوان ءَ (24 بهمن 1404/ 13 فبروری 2026) ملک ءِ دیماه ءِ پێشامداں سک تهل ءُ دلبرێجۆک زانت که ماں ایران ءِ راجدپتر ءَ بےمٹ انت ءُ شه کارمستراں لۆٹ ات که توجیه ءِ بدل ءَ شه گمجتێں مردماں ءُ دردمندێں کهولاں پهلی لۆٹ انت ءُ آوانی لۆٹاں منّ انت.
🔹ایران ءِ استمان ءَ مارشتَ بیت که آدگه استمانانی دێم ءَ جهل جنگ بوتگ انت
په سنیآنلاین ءِ سرهال ءَ مولانا عبدالحمید گوشت: دیماه ءِ 18 ءُ 19می رۆچانی پێشامداں سک تهل ءُ دلبرێجۆک ات انت که ماں ایران ءِ راجدپتر ءَ بےمٹ انت. لهتے شه کارمستراں کوشستَ کن انت که آ پێشامداں توجیه کن انت، پمێشا من لۆٹ آں اے بابت ءَ چیزے گپ جن آں.
واجه ءَ درائێنت: ایران ءِ مردماں «جمهوری اسلامی» ءِ نظام ءَ ماں ایران ءَ حاکم کرت ءُ پد شه انقلاب ءَ اے سالانی دراجی ءَ شه آ نظام ءَ پلهمرزیاش کرت، بلے بائد نون پٹءُپۆل کن اێں که مردمانی جاور چۆن انت. ایران ءِ استمان یکے شه دنیا ءِ سربلند ءُ هزگارێں استمانان بوتگ، بلے مرۆچی فقر ءُ ناداری ءِ ته ءَ گٹ انت ءُ همے مارشت ءَ کن انت که آدگه استمانانی دێم ءَ جهل جنگ بوتگ ءُ پێسر ءِ عزت ءَ نه دار انت.
زاهدان ءِ آدێنگ ءِ امام ءَ گێش کرت: ملک ءِ مردماں اے رۆچاں وتی زهگانی سیر ءُ آرۆس ءِ هرچانی وس ءَ نه دار انت، کهول ءِ سرپرستَ نه توانت وتی جنءُزهگانی هرچاں پجائێن ایت. کارمند ءُ کارنشت ءُ پوریاگراں گۆں اے ماجب ءَ نه توان انت زند گوازێن انت. باپار ءُ بازار هم گرانێں مشکلانی آماچ انت ءُ سوداگر ءُ بازاریاں نیزگار بوتگ انت. زندگی په هلک ءُ کلگانی مردماں هم باز سک بوتگ. یارانه ئے که مردمانَ دیگ بیت هچ ارزشے نه دار ایت، پچے که ملک ءِ زر ارزش نه دار ایت.
🔹ایران ءِ مردم باز براں بدلی ءِ لۆٹۆک بوتگ انت بلێں توار اش اشکنگ نه بوت
مولانا عبدالحمید گوشت: ایران ءِ مردم وهدے اے سکێں جاور ءِ آماچ بوت انت، گوشت اش که بائد ملک شه اے جاور ءَ رک ایت ءُ یک بدلی ئے پکار انت. دێرێں زمانے که ایران ءِ مردماں بدلی ءِ لۆٹۆک انت ءُ باز باراں هم کوکار اش کرتگ ءُ هر بر ءَ تاوان اش دیستگ.
واجه ءَ گێش کرت: مردماں ماں 98 ءُ 1401 ءِ سال ءَ زهرشانی کرت ءُ کشگ بوت انت، بلێں ماں 1404 ءِ دیماه ءِ زهرشانیاں بازێنے شه ملک ءِ نندۆکاں ماں وڑوڑێں شهراں کشگ ءُ ٹپی بوت انت ءُ بازێنے هم دزگر بوت انت ءُ بازێں کهولے داگانی ءُ سوگیگ بوت انت.
🔹مردمانی دل گۆں کارمسترانی توجیهاں تسلا نه بیت
زاهدان ءِ آدێنگ ءِ امام ءَ ٹکاٹک گوشت: تاوانے که مردماں ماں دیماه ءِ پێشامد ءَ دیست هچ توجیهے نه دار ایت. لهتے شه کارمستراں کوشست کرت که اے بنگپ ءَ توجیه کن انت. لهتے گوشت که «داعش» ءُ «گروهک/سلاهبندێں پاٹی» بوتگ انت. شاید آدگه مهزان انت، بلے ما ایرانیاں وتی زبان ءَ زبر سرپد به اێں. زاناں داعش ءُ گروهکاں اینکس واک ءُ زۆر دار انت که ماں صد شهر ءَ مردماں کُش انت ءُ مشکل جۆڑ کن انت؟! گهتر انت که کارمستراں اے توجیهانی بدل ءَ شه مردماں پهلی لۆٹ انت ءُ لۆٹان اش منّ انت.
🔹اگه کارمستراں مردمانی کوکار ءَ بُشکتێں اے مشکلاں جۆڑ نه بوت انت
مولانا عبدالحمید درائێنت: من که اے سالانی ته ءَ هبر ءُ ڈاه داتگ پرێشا بوتگ که همے رۆچ منی چم ءِ چێر ءَ ات که اگں مردم مشکلانی آماچ به انت ءُ ملک بنبست ءَ رس ایت، گڑا مردم زهرشانیَ کن انت ءُ مشکل جۆڑ بیت. یک عربی بتلے هست که: «إذُا یَئِسَ الإنسانُ طَالَ لِسَانُه»؛ وقتے انسان ناامێت بیت زوانی دراجَ بیت ءُ کوکارَ جنت.
واجه ءَ کڈن کرت: اگه کارمستراں مردمانی تواراں گۆش داشتێں ءُ لۆٹان اش رندگیری کرتێں گڑا اے مشکلاں په کارمستر ءُ مردماں پێش نه یات انت. بازێں ملکانی ته ءَ کارمستراں مردمانی هبراں گۆشَ دار انت ءُ سکیاناشَ بۆج انت ءُ آوانی وشنودی ءَ کٹ انت یا شه وتی کار ءَ گستا به انت، بلے ماں هچ ملکے اےرنگ گۆں مردماں کردارَ نه کن انت.
🔹اگاں مردم کارمسترے ءِ دزکشی ءَ لۆٹ انت گڑا آ شه اگده ءَ دزکش ایت
زاهدان ءِ آدێنگ ءِ امام ءَ ٹکاٹک گوشت: کارمستراں بائد سێل کن انت که مردم چے لۆٹ انت؛ اگه مردم کارمسترے ءِ دزکشی ءَ لۆٹ انت گڑا آ شه اگده ءَ گستا بیت. اے چیز شرع ءُ میاناستمانی ءُ چاگردی عرف ءِ رد ءَ جوانێں کردے. هروڑے که بوتگ بائد مردمانی وشنودی کٹگ بیت ءُ مردمانی لۆٹاں هرچۆں که تهل هم به انت بائد منّگ به انت، اے کار ءِ برورد وش انت.
مولانا ابوالحسن علی ندوی:
اگاں یک راجے ءَ پنچوقت نمازی وَ نه، بلکه صدماںصد تهجدوان جۆڑ کن ات، بلے آئی ءِ سیاسی شعور ءَ آگاه مه کن ات ءُ آیرا شه ملک ءِ جاوراں سرپد مه کنات، گڑا اے گپ بوت کنت که یک رۆچے نه ایوک ءَ تهجد ءِ سر ءَ بندش جنگ بیت، بلکه پنچوقتێں نمازانی سر ءَ ھم بندش جنگ بیت.
🏝🏝🏝
http://T.me/SunniOnlineBalochi
📢 سنیآنلاین بلوچی ءِ وٹسپی چێنل جۆڑ بوت
درێں باسکاں په ھال ءُ نبشتانکانی وانگ ءَ سنیآنلاین بلوچی ءِ وٹسپ چینل ءَ رندگیری به کن ات.
"سنیآنلاین بلوچی" ءَ ھوار بوگ ءِ ھاترا جھل ءِ لِنک ءَ دست به جن اِت. 👇
https://whatsapp.com/channel/0029Vb83lrPElagpWVrSHy3m
🏝🏝🏝
http://T.me/SunniOnlineBalochi
🟠بلوچستان چه هست ءَ چۆن نێست بوت
سردار ءِ کردءُکار
✍️میر محمداکرم بلوچ
حکومت قلات ءِ گڈی حاکم میراحمد یارخان وتی نویستگێں کتاب «تاریخ خوانین بلوچ» ءُ 12 اگست 1947 ءِ رۆچ ءَ ماں قلات ءَ داتگێں وتی یک تارخی گشتانکے ءِ حواله ءَ دنت که آئی ءِ ته ءَ آئی ءَ گشتگ ات:
«مئے پهر انت که مرۆچی گۆں شما بلوچی گپ کن آں، انشاءالله ماں آیۆک ءَ هم گۆں شما بلوچی گپَ کن آں، پچےکه بلوچی مئے درێں راج ءِ زبان انت.»
خان ءَ تران کنان ءَ گشت:
«نزیک پانزده سال انت که الله پاک ءَ من ءَ گچێن کرتگ تاں مردمانی هزمت ءَ بکن آں ءُ من ماں اے درگت ءَ شه ملک ءِ جاور ءُ مردمانی مارشتاں بےترانگ نه بوتگ آں، البت شه زمانگ ءِ مصلحت، بزاں ڈنی زۆرآورے ءِ سوب ءَ من نه توانتگ وتی مارشتاں شمے دێم ءَ درشان بکن آں. الله پاک ءَ شکرَ کن آں که شه همایی مدت ءُ کرم ءَ مرۆچی مئے ملک آزات انت ءُ من په آزاتی وتی لێکهاں شمے دێم ءَ درشانَ کن آں. الله ءِ کرم انت که راج ءِ هزمت ءَ من ءَ داتگ ئی. شه آ رۆچ ءَ من ءَ سے واهشت هست انت:
اولی: اے سرڈگار که آئی سیمسراں شه یک نێمگ ءَ اۆگانستان ءَ ءُ شه دگه نێمگاں ایران، هند ءُ دریاب ءَ لچ اتگ انت ءُ مئے راج ءَ پنجاه سال پێش ءَ ادا بلوچی حکومت ءِ بنهشت ءَ اێر کرتگ، شه درآمدانی اثرات ءُ گلامی ءُ سرجهلی ءَ آجو بیت.
دومی: اے حکومت مئے کُهنێں نکلانی رد ءَ پوره شرعی حکومتے بیت ءُ آیی بنیادی کانود قرآن بیت.
سێمی: بلوچ راج، گۆں همتپاکی ءَ ماں یک بنجاهے مچ به انت ءُ اۆد ءَ اے آزات ءُ بودیگێں راج وتی جند ءِ حکومت ءِ واهند بیت ءُ اے راج چۆ دنیا ءِ آدگه آزاتێں راجاں ءُ همکۆپگ گۆں آوان یک دێماشتگ، همتپاک ءُ آبرودارێں راجے ءِ رنگ ءَ دێم ءَ بروت.
یکے شه منی واهشتاں که راجی آزاتی ات، پێلو بوت، بلێں آ دوے دگه که شریعت ءِ اێر دارگ ءُ بلوچ راج ءِ تپاک به انت، انگت پێلو نه بوتگ انت. من نون گۆں الله ءِ مزنێں نام ئے گرگ ءَ اسلامی ءُ راجی بیرگ ءَ چستَ کن آں ءُ شه الله پاک ءَ آئی سلامتی ءُ راج ءِ یکویی ءُ آزاتی ءَ لۆٹ آں. وهدےکه لشکر ءِ توپخانه اے مقدسێں چێدگ ءَ سلام دیگ ءَ انت، شما هم اے درگت ءَ اوگام جن ات: الله اکبر، اسلام زنده باد، بلوچ ءِ آزاتێں راج زنده باد، حکومت بلوچ پاینده باد.»
روان انت...
🏝🏝🏝
http://T.me/SunniOnlineBalochi
سردار اکتر جان مینگل:
🔶راستی ھمیش اِنت بلوچستان ءَ ریاست سرین پروش اِنت، مھلوک سرمچاراں شرپ بکش ایت
بلوچستان نیشنل پارٹیءِ سروک سردار اکتر جان مینگل ءَ لاھور ءَ آسمہ جھانگیر ءِ نام ءَ برجم داشتگیں مراگش ءَ تران کرتگ ءُ گوشتگ کہ بلوچستان سچگ ءَ نہ اِنت بلکیں پُر بوتگ.
آئی ءَ گوشتگ کہ ریاست ھما مردماں ناشرکار گوش ایت گڑا لس مھلوک آیاں وش اتک کنت ءُ گوں آیاں اکس کش ایت.
آئی ءَ گوں پنجاپ ءِ مردماں دلگوش گور کرتگ ءُ گوشتگ کہ پاکستانی پوج کجام ھم ھنداں روت گڑا مردم چہ ترس ءَ گساں در نہ کپ اَنت۔چہ آیاں کسانیں زھگ ءُکماشیں مردم ھم تر س اَنتءُ وت ءُ چیر دے اَنت۔ ھمے ھنداں وزیر، گورنر ءُ اسمبلی ءِ باسک رو اَنت گڑا مھلوک آیانی کِر ءَ نہ روت ءُآیاں شرپ نہ بکش ایت.
بی این پی ءِسروک ءَ گوشتگ کہ پنجاپ اے گپ ءَ من ایت یا نہ من ایت ھما مردم کہ گوں آیاں اکس کش اَنت آیاں وتی بامرد سرپد بنت.
آئیءَ ریاست ءِ ٹاپار رد کرتگ اَنت ءُ گوشتگ من اے گپ ءَ نہ گوش آں کہ ما آئی سرین پروشتگ، بلے راستی ھمیش اِنت بلوچستان ءَ ریاست سرین پروش اِنت.
آئیءَ رسانکدر ءَ شنگ بوتگیں جتائیں اکس ءُ تامربندانی مسال داتگءُ گوشتگ کہ بلوچستان ءِ مھلوک پاکستانی پوج ءَ نہ لوٹ اَنت بلکیں زمین ءِ راستی بلوچ سرمچارانی مھر ءُشرپ ءَپیش دارایت.
بی این پی ءِ سروک ءَ گوشتگ کہ بلوچستان ءِ جیڑہ گوں توپک ءَ گیش ءُ گیوار نہ بنت، بلکیں گوں سیاسی گپءُ تران ءُ جمھوری گامگیج ءَ بنت۔اگاں نہ جاور گیشتر گنتر بنت.
بنشون: زرمبش بلوچی
🏝🏝🏝
http://T.me/SunniOnlineBalochi
🕌 مولانا عبدالحمید ماں زاهدان ءِ نماز جمعه دیوان ءَ:
🔷 ایران ءِ مردماں ماں سال 57 ءَ په «عدالت» ءُ «گهترێں زندگی» ءَ انقلاب کرت
شیخالاسلام مولانا عبدالحمید، ماں زاهدان ءِ نماز جمعه ءِ دیوان ءَ (17 بهمن 1404/ 6 فبروری 2026) گۆں اشاره به انقلاب ءِ چلءُهپتمی سالرۆچ ءَ وتی بژن ءَ شه آ رۆچانی وعدهانی پیلو نه بوگ چۆ عدالت ءِ اێر دارگ ءُ ملک ءِ آبادی ءَ درشاں کرت ءُ گوشت ئی که مردماں په «عدالت» ءُ «گهترێں زندگی» ءَ انقلاب کرت.
🔹ایران ءِ مردمانی انقلاب «راجی» ات؛ کسے قوم ءُ مذهب ءِ پد ءَ نه ات
په سنیآنلاین سرهال ءَ مولانا عبدالحمید درائێنت: ایران ءِ مردماں انقلاب ءِ زمان ءَ گۆں وت مهر ءُ مهبتَ داشت ءُ قوم ءُ مذهب ءُ دین ءَ نه چارت اش. ایران ءِ مردمانی انقلاب «راجی» ات که په وتی حق ءَ ءُ گهترێں زندگی ءَ انقلاب اش کرت.
🔹 ملک ءِ مشکلانی رۆتگ بنیادی کانود انت
زاهدان ءِ آدێنگ ءِ امام ءَ گوشت: وهدےکه خبرگان ءِ دیوان ءَ بنیادی کانود ءِ نبیسگ ءِ اراده ءَ کرت، مشکلاتے ماں کانود ءَ جۆڑ بوت. مولانا عبدالعزیز رحمهالله ءَ اێراد گپت که پچے اسلامی دین ءِ بدل ءَ یک هاسێں مذهبے په ملک ءَ گچێن کنگ بیت، چیا که اسلامی دین تیوگێں مسلمانانی دین انت چه شیعه به انت یا سنی. خبرگان ءِ دیوان ءَ دگه کانود هم په حکومت ءِ مانگ ءَ نبشت که نه ماں اسلام ءَ انت ءُ نه ماں میاناستمانی کانوداں.
واجه ءَ گێش کرت: ماں بنیادی کانود ءَ انچێن بند هست انت که ملک ءِ مرۆچی ئێں مشکلانی سوب انت. پمێشا ملک ءِ مشکلانی رۆتگ بنیادی کانود انت ءُ مدام گوشگ بوتگ که بنیادی کانود بائد بدل کنگ بیت.
🔹 انقلاب ءَ پد مذهبی ءُ قومی لێکه ملک ءِ ته ءَ غالب بوت
مولانا عبدالحمید وتی هبرانی دێمتر ءَ گوشت: انقلاب ءَ پد هوارێں سرکار ءِ جۆڑ کنگ ءِ بدل ءَ هما گلاں که انقلاب ءِ سۆبمندی ءَ کمک اش کرت ات، گلێنگ بوت انت ءُ مذهبی ءُ قومی لێکه ملک ءِ ته ءَ غالب بوت، وهدےکه الله ءِ وشنودی ءُ دین اسلام ءِ راه همێش ات که برزتر شه راج ءُ مذهب ءُ حتی دین ءَ بیت ءُ آ کمێں مردماں که دگه دینے دار انت دلگۆش بهانت ءُ بودیگانی کارگرگ ءَ ابید، پهکانی حقاں کمار بهانت.
واجه ءَ گوشت: کمکم ءَ تنکچمیاں گێشتر بوت انت ءُ گردی ءَ تنکتر اش کرت، هما زمان ءَ هم ڈاه دیگ بوت که دین اسلام ءِ گردی پراه انت ءُ جمهوری اسلامی هم که به دین اسلام ءَ لچتگ، بائد آئی گردی پراه ءُ شاهگان بیت. ڈاه دیگ بوت که اگاں تانسرپسنداں کارگرگ بهانت مشکل جۆڑ بیت، بائد کارانی دیگ ءِ درگت ءَ وس ءُ بود دلگۆش بیت.
🔹 «تنکچمیاں» ءُ «گرانێں گچێن کنگاں» پارلمان ءُ سرکار ءَ پادبند کرتگ
مولانا عبدالحمید گێش کرت: تنکچمی تاں اۆد ءَ رست که پارلمان ءَ هم پادبندء کرت ءُ گۆں گرانێں گچێن کنگ ءَ بودیگ ءُ وسیئێں مردماں شه پارلمان ءَ پشت کپت انت. سرکارانی آسر هم همےرنگ بوت، کارمستر ءُ وزیرانی گچێن کنگ بودشت ءُ وس ءِ رد ءَ نه بوت، بلکه سیادی ءُ رهوت ءُ دگه چیزانَ چار انت. مدام ڈاه دیگ بوتگ که تنکچمیاں ملک ءَ بنبستانی آماچ کن انت.
واجه ءَ درائێنت: اصلاحطلباں هم که په انقلاب ءِ سۆبێں بوگ ءَ جهد اش کرت ات، لۆٹاتاش که ملک ءَ اصلاح کن انت، بلے کارے نه کرت اش ءُ نه توانت اش که بدلی بیار انت. کمکم ءَ ملک ءِ جاور امنیتی بوت ءُ مذهبانَ انگت امنیتی اش کرت. پێسر ءِ مزنرهشۆن ءَ گوشت ات که سلاهبنداں نه بائد ملکاری ءُ مالزانشت ءِ ته ءَ هوار به انت، بلے آوان پتر ات انت ءُ ملکاری ءُ مالزانشت ءَ وتی دست ءَ گپت اش، وهدےکه سیاستزانتاں بائد سیاست ءِ ٹهێنگ ءَ کن انت نه سلاهبنداں، آوان دگه راهے دار انت که ملک ءِ ایمنی ءِ واگ آوانی اگده انت.
واجه ءَ ٹکاٹک گوشت: مذهبان اش هم امنیتی کرت ءُ ماں لهتے مزنمێتگاں نمازجاهان اش بند کرت یا واهندی اش کرت. رۆتاک ءُ تاکبنداں هم امنیتی بوت انت. سیاست ءَ هم امنیتی اش کرت ءُ باز براں شکایت بوتگ که مردمانی زندگی ءِ ته ءَ پتر انت.
🔹 دیماه ءِ پێشامد سک دلبرێجۆک ات/ هچ میانهرۆئێں عالمے اے کشتاراں روا نه زانت
زاهدان ءِ آدێنگ ءِ گشتانکار ءَ درشان کرت: بوتگێں پێشامد سک دلبرێجۆک ات، درێگے پێش مهیاتێں. نون که کمکم ءَ گواچن پدر به انت سک دل ءَ رێش کنت. مردم ءِ دل کپَ بیت وهدےکه کشگ بوتگێں مردمانی کهولانی آه ءُ نالگاں اشکنت. من گمان نه کن آں که میانهرۆئێں عالم چۆشێں کشتاراں روا زانت ءُ من سدک آں که هچ کسے نه توانت الله ءِ دێما پرے رێتگێں هۆناں نیمۆنے پێش کنت.
#تامربند
🔷مولانا یارمحمد پناد ءِ گپاں هۆردکێن چکانی کشگ، پلگ ءُ هلوچگری ءِ باره ءَ
شریعت آنلاین
🏝🏝🏝
http://T.me/SunniOnlineBalochi
🕌 مولانا عبدالحمید ماں زاهدان ءِ نمازجمعه ءِ دیوان ءَ:
🔷 گهترێں راه په دێمداری شه جنگ ءَ، استمان ءِ لۆٹانی منّگ انت
شیخالاسلام مولانا عبدالحمید ماں زاهدان ءِ نمازجمعه ءِ دیوان ءَ (10 بهمن 1404/ 30 جنوری 2026) جنگ ءِ هتره ءُ مردمانی ناوشنودی ءَ ٹوهترێں پاترپ ءُ جنجال زانت که ملک آوانی آماچ انت ءُ گوشت ئی گهترێں راه په در روگ شه اے گپچلاں استمان ءِ لۆٹانی منّگ انت.
🔹ایران ءِ استمان ءِ ناوشنودی یک گواچنے
په سنیآنلاین ءِ سرهال ءَ مولانا عبدالحمید درشان کرت: نزیک به پنجاه سال پێسر ءَ پد شه انقلاب 57 ءِ سۆبێن بوگ ءَ ماں ایران ءَ، گێشتری مردماں په آبادی ءُ وتی ءُ آیۆکێں پدرێچانی دنیا ءُ آخرت ءِ وشبهتی ءَ به «جمهوری اسلامی» ءَ رأی اش دات.
واجه ءَ گێش کرت: ایران ءِ مردماں 57 ءِ انقلاب ءِ پلهمرزی ءَ کرت ءُ په دێمپانی شه ملک ءِ سیمسراں ءُ امنیت ءِ پهازگ ءَ وتی جان اش ندر کرت ءُ کارمسترانی جارنامگ ءُ لۆٹگانی رد ءَ ماں سجێں پڑاں په بازی بهر اش زۆرت، بلێں اے یک گواچنے که ایران ءِ مردماں دێر انت که ناوشنود ءُ نالگ ءَ انت.
🔹بیست سال انت که ایران ءِ مردماں مشکل ءُ بندشانی آماچ انت
زاهدان ءِ آدێنگ ءِ امام ءَ ٹکاٹک گوشت: یکے شه مردمانی نالگ ءُ دلگرانیاں همێش انت که بیست سال انت مشکل ءُ بندشانی آماچ انت. آ زمان ءَ کارمستراں مردمانَ گوشت که دێمرئی ءُ سۆبمندیانی ٹل ءَ رس انت، بلے نون مردماں شه ناداری ءُ بدبهتی ءَ دلگران ءُ پرێشان انت.
واجه ءَ درائێنت: من اے سالانی دراجی ءَ وتی اگده ءِ رد ءَ جار جتگ که مردمانی گپاں گۆش دار ات ءُ گۆں آوان نند ات، اگں مردمانی لۆٹاں ناحق انت گڑا آوان سرپد کن ات، بلے اگه حق انت گڑا رندگیری به انت. بلێں ارمان که مردمانی لۆٹاں دلگۆش نه بوت انت، مردماں چنت بر زهرشانی کرت که کُشگ بوت انت. بلے ماں گوستگێں جنز ءَ که ایران ءُ دنیا ءِ مردماں سهیگ انت، مردماں گرانێں تاوانے دات.
🔹اگه ایران ءِ گێشتری مردماں نۆکێں حکومتی سیستمے لۆٹ انت، کارمستراں بائد آیرا منّ انت
مولانا عبدالحمید کارمستراں ٹکاٹک گوشت: من دوارگ هم پرامَ کن آں که مردمانی کر ءَ نند ات ءُ چار ات که مردمانی مشکلاں چےانت. اگاں من شمے جاگه ءَ بوتێن آں گۆں مردمانَ نشت آں ءُ هر لۆٹے که آوان داشتێں من آیرا پیلو کرت.
واجه ءَ ٹکاٹک گوشت: اگه ملک ءِ کارمستری منی دست ءَ بوتێں ءُ گێشتری مردماں ـ نه کمێناں ـ دگه حکومتی سیستمے لۆٹ اتێں، من اسلامی سیستم ءِ سر ءَ پاد ءَ مرّ نه کرت؛ پچےکه منی باور ءَ دین گۆں زۆر ءَ نه بیت ءُ نه توان اێں کسے را گۆں زۆر ءَ گلباگ ءَ بر اێں. الله ءِ مراد همێش انت که «حق» شه «باطل» پدر ءُ جتا بیت، گڑا هرکس راهے را گچێن کنت پایدگ ءُ تاوان آیی جند ءَ رس ایت.
🔹«جمهوری اسلامی» ءَ وتی مشروعیت ءَ شه مردماں گپتگ؛ مرۆچی هم شه مردماں جست کن انت که چے لۆٹ انت
زاهدان ءِ آدێنگ ءِ امام ءَ گێش کرت: «جمهوری اسلامی» ءَ وتی مشروعیت ءَ شه ایران ءِ گێشتری مردماں گپت. مرۆچی هم شه ایران ءِ مردماں که نزیک به نێم قرن انت به جمهوری اسلامی ءَ رأی اش داتگ، جست به انت که چے لۆٹ انت.
واجه ءَ گوشت: مردم شما کارمسترانی ولینعمت انت ءُ شما ءُ حکومت ءِ مشروعیت شه همے مردماں انت. ملک ءِ تیوگێں کارمستراں راستام یا ناراستام گۆں مردمانی رأی ءَ کارگرگ بوتگ انت. مزنرهشۆن هم ناراستام گۆں مردمانی رأی ءَ گچێن بوتگ. پمێشا مردم ملک ءِ واهند انت ءُ نبائد مردمانی دێم ءَ اۆشتات ءُ آوانَ لٹءُشاپ کرت.
🔹اگں مردمانی لۆٹاں منّ ات هچ زۆرآورے نه توانت شمے نێمگ ءَ لشکرکشی کنت
مولانا عبدالحمید درائێنت: ماں نونێں جاور ءَ که جنگ ءِ پاترپ انت ءُ مردماں سکاں ناوشنود انت، گهترێں را په دێمداری شه جنگ ءَ ایران ءِ مردمانی لۆٹانی منگ انت.
واجه ءَ ٹکاٹک گوشت: اگه شما ایران ءِ مردمانی لۆٹانَ منّ ات، دنیا ءِ مردم ءُ هچ زۆرآورے نه توانت شمے نێمگ ءَ لشکرکشی کنت ءُ شما شه جنگ ءَ دێمداری کرتگ، بلێں اگں ایران ءِ مردم گۆں شما همرا مه بنت اے سک خطرناک انت، جنگ هم خطرناک انت.
شیخالاسلام ءَ درائێنت: اگه حکومت ءُ سرکار ماں انقلاب ءِ اول ءِ هشت سالی ئێں جنگ ءَ سۆبێں بوت انت، آیی سوب تهنا سرکار ءِ زۆر نه ات، بلکه مردمانی زۆر هم همراه ات. سرکار ءِ زۆر کم انت، بلێں مردمانی زۆر الله ءِ داد انت
🔹گێشتری مردماں که کشگ بوت انت، آشوبگر نه ات انت
زاهدان ءِ آدێنگ ءِ امام ءَ درشان کرت: یکے شه کارمستراں جوانێں هبرے دات ات که مچێں مردماں «آشوبگر» مه گوش ات. ماں گێشتری زهرشانیاں دگه ملکاں هم لهتے ناشی ئێں ورنا بهر زور انت که آشوبَ کن انت، بلێں گێشتری مردماں که زهرشانی کرت، آشوبگر نه ات انت، بلێں پهکان کشگ بوت انت که اے ٹوهێں فاجعه ئے ات.
🌐 پاکستان ءُ اوگان تالبان ءِ میان ءَ میڑ ءَ دوئیں نیمگاں جانی تاوان ءِ ھال اِنت
پاکستان ءُ اوگانستان ءِ میان ءَ سیمسری ھنداں پنچ شمبے ءُ آدینگ ءِ میانی شپ ءَ بندات بوتگیں میڑاں دوئیں ڈیھان یکے دومی ءِ بنجاھی شھراں ارش کرتگ۔
اوگان تالبان ءِ جارکش زبی اللہ مجاھد ءَ گوشتگ کہ اوگان پوج ءَ بازیں کچے ءَ پاکستانی چوکی نشانگ کرتگ اَنت، لھتیں چوکی دستیگ کرتگ ءُ کاروائی ءَ پاکستانی پوج ءِ 55 کارمند کشتگ۔ میڑانی میان ءَ لھتیں پوجی دزگیر ھم کرتگ
پاکستان ءِ وزیر اتااللہ تارڈ ءِ گوشگ اِنت کہ کابل ، پکتیکا ءُ کندھار ءَ اوگان تالبان ءِ اڈہ نشانگ کرتگ انت۔
اوگان رسانکدر ءِ رد ءَ پاکستان ءِ بالی ارشانی میان ءَ اوگان پوج ءَ پاکستان ءِ جیٹے ھم جتگ ءُ تباہ کرتگ۔
چہ بازیں رسانکدری ادارھانی نیمگ ءَ جیٹ ءِ تباہ بوگ ءِ گپ ھم راست کنگ بوتگ۔
پاکستان سرکار ءِ نیمگ ءَ اوگانستان ءُ پاکستان ءِ سیمسری ھنداں بازیں کچے ءَ اوگان پوج ءِ چوکیانی دستیگ کنگ ءِ ٹاپار جنگ بوتگ۔ اوگان سرکار ءَ چوکیانی دستیگ کنگ ءِ گپ رد کرتگ۔
اوگانستان ءِ سرکار ءِ گوشگ اِنت کہ آئی ءَ مرچی نیمروچ ءِ یازدہ ءَ پاکستان ءَ بالی ارش کرتگ کہ اسلام آباد ءَ پیز آباد ءِ نزیک ءَ پوجی بنجل، نوشھرہ ءَ پوجی چھاونی،جمرود ءُ ابیٹ آباد ءَ ھم پوجی بنجل نشانگ کرتگ اَنت۔
بنشون: زرمبش بلوچی
🏝🏝🏝
http://T.me/SunniOnlineBalochi
✨ دیماه ءِ پێشامد، مردمانی توارانی نه اشکنگ ءِ گرانێں آسر انت؛ ما ایران ءِ جوانترێں ورنائاں گار کرت ءُ اے داگ هچبر شموشگ نه بیت. لس مردمانی لۆٹانی نادلگۆشی ملک ءَ جهلترێں گپچلانی نێمگ ءَ تێلانک دنت. مدامی ئێں امنیت تهنا گۆں مردمانی ارادهانی منگ ءُ آهانی لۆٹانی عملی ئێں حرمت کنگ ءَ بیت.
🏝🏝🏝
http://T.me/SunniOnlineBalochi
🔷 وهدےکه آمید گار بیت...
سنیآنلاین| بلوچستان وَ دلبرێجۆکێں پێشامدانی سرڈگار انت ءُ دراجکشێں وھدے بیت که انسانی حقانی لگتمالی، مالی جنجال، بےرۆزگاری ءُ دگه بازێں جنجالانی دێمپان انت، بلے لهتے انچێن گرانێں پێشامد انت که نادلگۆش کرت نه بهانت.
یکے شه اے وڑێن پێشامداں چیزے رۆچ پێسر ءَ (۲۸ بهمن ۱۴۰۴) ماں مهرستان ءَ پێش یات که ورنائے دزگر بوت ءُ چنکه رۆچ پد ءَ (2 اسفند) هم آیی آزار داتگێن لاش کهول ءَ دیگ بوت که شه اے پێشامد ءَ هر مردمے ءِ زرد رنج ات.
اگں کسے ڈۆهدارے گڑا کانود ءِ رد ءَ دیم ءَ آرگ بیت، بلے تاں وهدےکه آئی جرم انگت زانگ نه بوتگ آ کساس ءَ لٹءُشاپ بیت که ساه ئی سند ایت، اے وَ گۆں شریعت ءُ میاناستمانی کانوداں چپ انت.
🏝🏝🏝
http://T.me/SunniOnlineBalochi
مولانا عبدالعزیز رحمهالله:
🔹رۆچگ ءُ رمضان ءِ حق ءَ ادا کن اِت
رمضان ءِ ماه ءَ گۆں عبادت ءَ گوازێن ات. تاں وتی وس ءِ کساس ءَ «سبحان الله» ءُ «لا اله الا الله» گوش اِت ءُ قرآن بوان اِت ءُ باز استغفار کن اِت. گوستگێں کرداراں که گۆں شریعت ءَ چپ بوتگ انت ءُ سستیانَ ویل کن اِت تاں الله شما را بکشائیت. قرآن مجید ءُ رۆچگءِ ماه، په آ مردماں که اے دوئێنانی ارزشت ءَ زان اَنت شفاعتَ کن اَنت. بدترێن مردماں هماوان اَنت که رۆچگ ءِ ماهءَ بکشاتگ مه بهیَنت.
الله پاک ءَ اے ماهءَ را به اے امت ءَ ٹێکی داتگ تاں آوانَ بکشائیت ءُ شه جهندم ءَ رکّێن اِیت.
بازێں رۆچگدارے اَنت که یک منّگبوتگێں رۆچگے هم ندار انت ءُ ابید شه تُنّگی ءُ گُشنگی ءَ دگه چیزے نه کٹّ اَنت؛ پچے که اے ماه ءِ ارزشت ءَ را نه زانتگ اِش ءُ حق ئے ادایش نه کرتگ ءُ شه بدی ءُ گناهاں دست اِش نه زُرتگ. اسلامی احکاماں شه شما زحمت ءُ کۆشستَ لوٹ اَنت تاں دین ءِ دۆستی شمے دلانی ته ءَ بَیت. پرێشی واستا دلگۆش کن اِت که شمے اعمالان بےپایدگ مه بهینت.
🏝🏝🏝
http://T.me/SunniOnlineBalochi
🌙#رمضان
✨ شما را پھکاں رمضان مبارک بات ءُ امێت انت که اے وشێں ماھ ءَ گۆں اللہ پاک ءِ عبادت ءُ بندگی ءَ، نماز ءُ روچگ ءَ بگوازێن ات.
🏝🏝🏝
http://T.me/SunniOnlineBalochi
پاکستان ءِ وزارت خارجه ءَ 18 مارچ 1948 ءِ رۆچ ءَ مکران، خاران ءُ لسبیله ءِ گۆں پاکستان هۆری ءِ هال خان قلات ءَ دات. اے هال ءِ سربوگ ءَ رند، خان قلات ءَ گۆں قائد اعظم ءَ تران کت ءُ نه وشی زاهر کت، آئی ءَ گشت که مکران، خاران ءُ لسبیله ریاست قلات ءِ بهر انت ءُ جتائێں صورت ءَ گۆں پاکستان ءَ هۆر بوت نه کن انت، آئی ءَ گشت که منا حق است که اے غیرقانونی ءُ غیراخلاقی فیصله ءِ خلاف ءَ میاناستمانی کورٹ ءُ اقوام متحده ءَ رجوع بکناں.
قائد عظم محمدعلی جناح ءُ خان قلات ءِ تعلقداری ءُ دۆستی سک کۆهن ات. خان ءَ محمدعلی جناح ءِ سر ءَ پورئی ءَ اۆست ءُ بێسه است ات. وهدے آ بلوچستان ءِ دوره ءَ اتکگ ات ته آئی ءَ را ریاست قلات ءِ نێمگ ءَ «گارڈ آف آنر» ءُ 21 تۆپانی سلامی دیگ بوتگ ات. آ وهد ءَ اے شرپ ءُ عزت بێد چه وائسرائے هند ءَ دگه کسے ءَ دیگ نه بوتگ ات.
1943 ءِ سال ءَ وهدے «خاکسار تحریک» ءِ چیزے سلهبندێں مردماں قائد اعظم ءِ سر ءَ ارش کت ته خان قلات، خان داودخان ءَ اێشی ءَ را سک باز اێر جت ءُ جار جت که خان قلات ءِ ذاتی گارڈ په قائد اعظم ءِ پهرێز ءُ حفاظت ءِ واستا دێم دیگ بنت. رند ءَ خان قلات ءِ گارڈاں 1943 ءَ بگر تا 1947 ءَ، وهدے پاکستان جۆڑ بوت، قائد اعظم ءِ پهرێز ءُ حفاظت کت ءُ همائی گور ءَبوتگ انت.
محمدعلی جناح خان قلات ءَ سک دۆست ءُ عزیز بوتگ. آئی ءَ باز رند ءَ قائد اعظم ءِ ایمانداری ءُ زانتکاری ءِ سنا ءُ سپت کتگ ات ءُ گشتگ ات که آ قائد اعظم ءِ مشن ءُ مقصد ءِ پورا کنگ ءَ گۆں آئی ءَ هرپێمێں کمک ءُ مدت کنت. آئی ءَ برٹش بلوچستان ءِ ته ءَ مسلم لیگ ءَ را مهکم ءُ زۆرمند کنگ ءِ واستا گۆں قاضی محمد عیسی ءَ سک باز کمکاری کتگ ات.
وهدے پاکستان ءِ آ وهد ءِ حکومتی عهدهداراں په بےوڑ ءُ رهبندے ءَ قلات ءِ سئێں بهران ءَ سست ته قلات سک دلرنج ءُ دلپرۆش بوت. مکران، خاران ءُ لسبیله ءِ هۆر بوگ ءَ پد پاکستان ءِ آ وهدیگێں فارن سکریٹری کرنل ایس بی شاه گۆں اێدگه بلوچ سرداراں چۆ که وڈیره بنگلزئی، سردار شاهوانی، سردار سنجرانی، سردار رئیسانی ءَ دپ کپت ءُ گۆں آهاں گشت ئی که شما هم پاکستان ءِ ته ءَ هۆر به بئت. انچۆ زاهر بوت که پاکستان ءِ اختیاردار هچ صورت ءَ قلات ءِ جتائێں حیثیت ءِ منّگ ءَ تیار نه اتانت.
25 مارچ 1948 ءِ رۆچ ءَ قلات ءِ وزیر اعظم نوابزاده محمد سلیم ءَ خان قلاتءَ را رپۆرٹے دێم دات که ماں اێشی ءَ آئی ءَ حکومتِ قلات ءِ پشت ءَ بووکێں پندل ءُ چست ءُ اێرانی احوال نویستگ اتانت. آئی ءَ گشت که کوئٹه بریگیڈ قلات ءِ سر ءَ کجام وهدے ارش کنگ ءِ واستا ساڑی انت، دۆمی نێمگ ءَ چه حکومت پاکستان ءِ عهدهدارانی نێمگ ءَ اے حال ءُ کُلهه شنگ اتانت که آگں قلات تا یکم اپریل 1948 ءَ پاکستان ءِ ته ءَ هوار نه بوت ته قلات ءِ سر ءَ پولیس ایکشن بیت.
وزیر اعظم قلات ءِ رپۆرٹ ءَ ابید دگه بازێں هال ءُ احوال خان قلات ءَ سر بوگ ءَ اتانت. آ چوناها دلاورێں مردمے نه ات، دگه چیزے هنچێں واقعات بوت انت که آ سک ترس ات ءُ 30 مارچ 1948 ءِ رۆچ ءَ قلات ءَ را پاکستان ءِ ته ءَ هۆر کنگ ءِ جار ئی جت. آئی ءَ اے وهد ءَ اے هم گشت که من مارگاهاں که من چه وتی اهتیاراں گێش کنگاهاں بلے اگں من اے کار ءَ مکناں ته قلات ءِ سر ءَ لشکرکشی بیت.
خان ءِ برات آغا عبدالکریم ءَ اے فیصله نه منّ ات ءُ دراںڈیه بوت ءُ افغانستان ءَ شت، دگه بازێں سیاسی سرۆک ءُ مردم گرگ ءُ بندیجاهانی باهوٹ کنگ بوت انت. اے پێما یک نێمگے نۆکێں اسلامی ملک، پاکستان ءِ جۆڑ بوگ ءِ وشی ءُ شادانی ات ءُ دۆمی نێمگ ءَ بلوچستان ءِ اولس ءُ سیاسی سرۆکانی سر ءَ ناروائی ءُ زیادتی بوگ ءَ ات ءُ آ پرسیگ اتانت.
اے پێما ما دیت که یک رندے پد ءَ قبائلی سردار ءُ نواباں مهلوک ءِ واهگ ءُ واهشتانی احترام نه کت ءُ بێد شئور ءُ صلاح ءُ مهلوک ءِ منظوری ءَ وتی جند ءِ ذاتی غرض ءُ مقصدانی متابک ءَ فیصله کت، اگں اے تک ءَ آ ذاتی غرض ءُ مقصد یا ترس ءُ بیم ءِ آماچ مبوتێن اتانت ءُ جوانێں راه ءُ رهبند ءُ بلوچ اولس ءِ واهگ ءُ هۆرێں نف ءُ فائدگانی متابک ءَ فیصله اش بکتێں ته بلوچستان ءِ جاور پهک بدل بوتگ اتانت.
بنشۆن: تاکبند بلوچی لبزانک دسمبر 2000
https://sunnionline.us/balochi/2026/02/4507
🏝🏝🏝
http://T.me/SunniOnlineBalochi
🔹سیاسی جهدکاراں بندیگ ءُ محکوم مه کن ات
مولانا عبدالحمید وتی هبرانی دێمتر ءَ گۆں اشاره به سیاسی جهدکارانی بندیگ کنگ ءَ گوشت: اے رۆچاں بازێنے شه سیاسی جهدکار ءُ گلانی سرمستراں دزگر ءُ بندیگ کنگ بوتگ انت. سیاسی جهدکاراں دزگر مه کن ات، بلکه پێسر ءِ سیاسی بندیگاں هم آزات کن ات.
واجه ءَ درشان کرت: ماں نونێں جاور ءَ ملک ءَ راجی یکویی پکار انت ءُ بائد سیاسی جهدگار ءُ مچێن مردمانی هبراں اشکنگ به انت. اگں ما مردمانی گپاں گۆش دار اێں ءُ آوانی لۆٹاں منّ اێں، ملک ءِ امنیت پهازگَ بیت ءُ ملک جنگ ءِ آماچ نه بیت.
🔹پاهواں مردمانی بێزاری ءِ سوب بوتگ انت/ پاهو ءُ زۆرێں استه گرگ هچ شرعی ءُ کانودی توجیهے نه دار ایت
مولانا عبدالحمید ماں دگه بهرے شه وتی هبراں گۆں اشاره به بازێں پاهوانی آسر ءَ گوشت: پاهو شه انقلاب ءِ هما اول ءَ بوتگ ءُ نونێں سالاں گێشتر بوتگ ءُ مردمانی بێزاری ءِ سوب بوتگ انت. اے پاهواں شرعی ءُ میاناستمانی ءُ جمهوری اسلامی ءِ جند ءِ کانود ءِ رد ءَ هچ توجیهے نه دار انت. زۆرێں استه گرگ هم هچ شرعی ءُ فقهی توجیهے نه دار ایت ءُ ملک ءِ کانود ءِ ته ءَ شه آیی مکن بوتگ.
🔹هلوچگریانی باروا «شکّی» اێں؛ هلوچگراں بائد پجارگ به انت/ قضایی، امنیتی ءُ انتظامی ادارهانی اگده سک گران انت
زاهدان ءِ آدێنگ ءِ امام ءَ دوارگ هلوچگری ءِ پدرائشت ءَ اێر جت ءُ گوشت ئی: هلوچگری باز رڈێں ءُ آزاردهوکێں پدرائشتے. بژن انت که هلاکه ءُ زاهدان ء شهر ءِ ته ءَ باز بوتگ. آوان که هلوچگریَ کن انت، بےانصاف انت ءُ ما آوانی باروا شکی اێں که چۆنێں مردم انت! هلوچگراں بائد پجارگ ءُ هلوچاں آزات به انت.
واجه ءَ کڈن کرت: قضایی ءُ امنیتی ءُ انتظامی ادارهانی شرعی ءُ کانودی اگده سک گران انت. استان ءُ مزنمیتگاں ءُ زاهدان ءِ امنیت سک هژدری انت ءُ بائد پهازگ بیت.
شیخالاسلام ءَ راج ءُ ٹکانَ هم اے بابت ءَ سۆگه کرت ءُ گوشت ئی: پاگواجه، اسپےریش ءُ ٹکانی کماشاں اے باروا اگده دار انت. راج ءُ ٹکاں بائد په سار به انت که هلوچگراں وتی قوم ءُ ٹک ءِ پشت ءَ چێر مه کپ انت.
🔹مولانا یارمحمد رحمهالله زانتکارێں پاگواجهے ات ءُ سیستان ءِ ڈیه ءَ بازێں هزمتے کرتگ ات
زاهدان ءِ آدێنگ ءِ امام ءَ وتی هبرانی دێمتر ءَ گۆں اشاره به مولانا یارمحمد براهویی، هیرمند ءِ آدێنگ ءِ امام ءِ وفات ءَ گوشت: مولانا یارمحمد رحمهالله زانتکارێں پاگواجهے ات که سیستان ءِ ڈیه ءِ ته ءَ بازێں هزمتے کرت ئی. آئی ٹوهترێں مسیت ءَ هیرمند ءِ مزنمێتگ ءُ سیستان ءِ ڈیه ءِ ته ءَ جۆڑ کرت. من آ پاگواجه ءِ بێرانی ءَ آئی لۆگمان ءُ هیرمند ء مزنمێتگ ءِ مردماں ءُ سیستان ءِ لس مردماں تسلا گوش آں ءُ شه الله ءَ پرایی مغفرت ءُ برزێں درجه ءِ لۆٹۆک آں.
🔸شیخالاسلام مولانا عبدالحمید ءَ وتی هبرانی گڈسر ءَ شه لس مردماں لۆٹ ات که چارشمی ءِ رۆنشتن ءَ (29 بهمن/ 18 فبروری) په رمضان ءِ نۆک ءَ سێل کن انت.
https://sunnionline.us/balochi/2026/02/4501
🏝🏝🏝
http://T.me/SunniOnlineBalochi
برز ءَ گشتگێں اے هبر وَ همێش اتنت که سرزاهر ءَ ءُ رسمی صورت ءَ بوگ ءَ اتنت. بلے چێر اندر ءَ هم بازێں هبر ءُ چستءُاێر بوگ ءَ اتنت، چۆکه فروری 1948 ءَ گورنر جنزل پاکستان قائد اعظم محمدعلی جناح ءَ سبی دربار ءَ همے نیت ءَ بهر زرت که بلکێں میراحمد یارخان گۆں پاکستان ءَ هۆر بوگ ءِ جار ءَ جنت، بلے خان قلات ءَ چۆشێں اراده ءُ نیتے نێست ات، آ سبی دربار ءَ نهیتک ءُ اے دیوان ءَ بهر ئی نه زرت. محمدعلی جناح گۆں نه وشێں دلے ءَ کراچی ءَ واترت بوت. اۆدا آئی ءَ گۆں وتی حکومتی ءُ سیاسی باسک ءُ همکاراں شۆرءُصلاح کت. اۆدا همے هبر بوت که خان قلات میراحمد یارخان گۆں وشێں دل ءَ پاکستان ءَ هۆر نه بیت. پمێشکا قائد اعظم ءَ اے معامله وتی کابینه ءَ فارن آفس ءَ دات که آ اێشی ءَ بٹاهێن ایت. اێشان وهدے دیت که قلات ءِ پارلیمنٹ پاکستان ءَ هۆری ءِ حق ءَ نه انت ته آهاں همے فیصله کت که قلات ءَ هۆرێں ریاست چه آئی ءَ سندگ به بیت. اے تک ءَ گۆں نواب حبیبالله خا آف خاران، جام غلام قادر آف لسبیله ءُ نواب بائی خان آف مکران ءَ رابطه کنگ بوت. چدءُساری 3 ءُ 2 جنوری 1948 ءِ رۆچاں وهدے ریاست قلات ءِ ایوانِ زیرێن ءُ ایوان بالا ءِ دیوان بوت انت ءُ آهاں گۆں اکثریت ءَ قلات ءِ جتائێں ءُ آزاتێں حیثیت ءِ حق ءَ فیصله کرت ته نواب بائی خان آف مکران وت موجود ات. آئی ءَ همے روچ ءَ «دیوانِ خاص» ءِ باسکی ءِ عهده زرتگ ات. نواب بائی خان وهدے چه قلات ءَ واتر بوت ته زوت کراچی ءَ شت. خان قلات وهدے سهی بوت که نواب بائی خان کراچی ءَ شتگ ءُ مکران ءَ گۆں پاکستان ءَ هۆر کنگ ءِ نیت ءَ دار ایت ته آئی ءَ میر غوثبخش بزنجو، سردار رسول بخش مینگل، میر محمودخان گچکی ءَ کراچی ءَ دێم دات که نواب بائی خان ءَ سرپد بکن انت. ای کراچی ءَ کاینت ءُ گۆں نواب ءَ دپ کپ انت، بلے نواب بائی خان وتی هبر ءِ سر ءَ اۆشت ایت. اے ٹولی قلات ءَ واتر بیت ءُ خان قلات ءَ وتی گپ ءُ رپانی هال ءَ دنت. گڑا خان قلات گورنر مکران آغا عبدالکریم ءَ را حکم دنت که نواب مکران بائی خان ءِ جاگه ءَ آئی ءِ مسترێں چک حمیدالله خان ءِ دستاربندی ءَ بکنت. اےپێما حمیدالله خان ءِ دستاربندی بیت ءُ نواب مکران ءِ حیثیت ءَ آ قائد اعظم ءِ سر ءَ تارے روان دنت ءُ گش ایت که منی پت ءِ سر برۆبر نه انت، پمێشکا آئی ءِ هبر ءُ فیصله زورگ ءُ منگ مه بنت ءُ مرچی ءُ پد مکران ءِ نواب من آں. بلے آئی ءِ هبر منگ نه بیت ءُ 17 مارچ 1948 ءِ رۆچ ءَ نواب مکران، نواب خاران ءُ جام لسبیله ماں کراچی ءَ وتی ریاستان ءَ پاکستان ءِ ته ءَ هۆر کنگ ءِ کاگدانی سر ءَ دزهت کت.
رندتر ءَ سئێناں گۆں قائد اعظم ءَ گندءُنند کت ءُ چر آئی ءَ چیزے لۆٹ ءُ ڈیمانڈ کرت. نواب بائی خان ءَ وَ همنچۆ هم نه کت که پنجگور ءُ تمپ ءِ سرداراں مشوره بکنت که اے دوئێں هنداں داخلی آزاتی است ات. دگر ءَ بلّ، آئی ءَ چه وتی بچ حمیدالله خان ءَ مشوره نه کت ءُ وتی جند ءُ شےعمر ءَ نشت ءُ همے فیصله کت.
🏝🏝🏝
http://T.me/SunniOnlineBalochi
🌐 بلوچستان سرکار ءَ آجوئی لوٹوکانی لڑ شنگ کرتگ ءُ سر ءِ نھاد بستگ
بلوچستان سرکار ءَ بی ایل اے ءِ سروک بشیر زیب بلوچ ءَ ھوار آدگہ آجوئی لوٹوکیں جھدکار 39 مردم ءِ لڑ شنگ کرتگ ءُ آیانی سر ءِ نھاد بستگ۔
شنگ کرتگیں لڑ ءَ بی ایل اے ءِ سروک بشیر زیب، رھمان گل، میر سپیر بلوچ ءُ درانڈیھ ءَ نشتگیں ایپ بی ایم ءِ سروک ھیربیار مری ءُ بی آر پی ءِ سروک براھمداگ بگٹی ءَ ھوار دگہ باز سیاسی کارکنانی نام ھوار اِنت۔
آیانی بابت ءَ گوشگ بوتگ کہ پہ ھال دیوکاں چہ پنچ لک کلدار ءَ بگر داں25 ءَ کروڑ اِنت۔ درسانی سر ءِ نھاد یک ارب ءُ 38 کروڑ اِنت ءُ اے ھم گوشگ بوتگ کہ ھال دیوک ءِ نام چیر دیگ بیت۔
اے لڑ ءَ ھواریں مردماں درساں گیش زر بلوچ لبریشن آرمی ءِ سروک بشیر زیب ءُ بی ایل اے ءِ جھلی ادارہ مجید بریگیڈ ءِ کمانڈر رھمان گل پنام مرید ءِ سر ءَ ایر کنگ بوتگ کہ آیانی بابت ءَ سرپدی دیوکاں 25، 25 کروڈ کلدار دیگ ءِ جار جنگ بوتگ۔
چوش کہ بی ایل اے ءِ سروک بشیر زیب بلوچ ءِ سر ءَ چہ ایشی ءَ پیش ھم باز کیس جنگ بوتگ ءُ پاکستان سرکار ءِ نیمگ ءَ رھمان گل ءِ سر ءَ مجید بریگیڈ ءِ سروکی کنگ ءِ بھتام جنگ بوگ ءَ اِنت۔
اے لڑ ءَ ھواریں براھمدگ بگٹی ءُ ھیربیار مری یورپی ڈیھاں نشتگ اَنت ءُ سپیر بلوچ، بلوچ نیشنل موومنٹ (بی این ایم) ءِ کارکنے کہ بی این ایم یک سیاسی گلے۔
بنشون: زرمبش بلوچی
🏝🏝🏝
http://T.me/SunniOnlineBalochi
🔷سنیآنلاین/ دارالعلوم زاهدانِ قرآن مجید ءِ ترجمه ءُ تفسیر ءِ دوره شه مرۆچی چارشمبی 22 بهمن 1404، مکی مسیتّ ءَ بنگێج کنگ بوت.
جارنامگ ءِ رد ءَ اے دوره رۆچگ ءِ مبارکێں ماه ءِ گڈسر ءَ هلاس بیت.
🏝🏝🏝
http://T.me/SunniOnlineBalochi
#شدءشۆد
شيخ الاسلام مولانا عبدالحميد ءِ اۆشتگ گۆں ایران ءِ مردماں ءُ دێمپانی شه آوانی حق ءُ اۆبالاں، اۆشتگ گۆں گواچن ءَ انت ءُ همے گواچن سرکاری رسانکدرانی هژم ءِ سوب بوتگ. آوان پرێشا هژمیانت که پچے مسیت مکی ءِ منبر سرکار ءِ کردارانی توجیه ءِ بدل ءَ راج ءِ همراهی ءَ اۆشتاتگ ءُ آوانی بزگی ءُ بدرۆچی ءَ کوکار کنت ءُ سرکار ءِ زۆرێں روایتانی دێم ءَ اۆشت ایت.
آ رسانکدراں که آوانی اگده سرکار ءِ کردارانی توجیه کنگ ءُ گواچنانی چپکایی کنگ انت، اے آزاتێں توار ءَ سگ ات نه کن انت. بلے راستال هچبر بےتوار نه بیت. وهدےکه گپ شه مردمانی ساه ءَ بیت، گڑا بےبرمشی گدّاری انت، پمێشا واجه شیخالاسلام ءِ ٹک ءُ اخلاقی ئێں دیدانک انت که:
«هچ میانهرۆئێں عالمے اے کشتاراں روا لێک ات نه کنت.»
🏝🏝🏝
http://T.me/SunniOnlineBalochi
🔹هچ کارمستر ءُ سیاستزانتے نه بائد ماں یک راهے وتی پاد ءَ مرّ کنت
مولانا عبدالحمید گێش کرت: هچ کارمستر ءُ سیاستزانتے نه بائد راه ءُ رهبندے ءِ سر ءَ پاد ءَ مٹ دنت. هچ مردمے شه ردی ءَ پاک نه انت؛ وختے کسے ردی ئے کنت بائد شه آ ردی ءَ برگرد ایت. پهکێں مردمانَ شۆر پکار انت. کسے که وت ءَ وتبود ءُ شه شۆر ءَ بےنیاز زانت، آ ٹوهترێں ردی ءَ کنت. بائد انت گۆں جنێں ءُ مردێں ءُ ورنا ءُ دیدانک ءِ واهنداں شۆر ءُ سلاه بیت.
واجه ءَ گێش کرت: اے ٹوهێں ردی ئے که حاکم بس گۆں سنگت ءُ دۆزواهاں شۆر کنت؛ بلکه بائد گۆں شرگدار ءُ مخالفاں هم شۆر بیت، اگاں شرگدارانی گپاں اشکنگ بوتێن انت، اے پێشامداں جۆڑ نه بوت انت.
🔹 ایران ءِ ته ءِ جێڑهاں اے لشکرگری ءِ سوب انت/ گێشتری مردم ناوشنود انت
زاهدان ءِ آدێنگ ءِ امام ءَ درائێنت: نون ایران شه چنکه نێمگ ءَ انگِرّ انت. اگں اے جێڑهاں ایران ءِ مردمانی میان ءَ مه بوتێن انت اے لشکرگریَ نه بوت. اے لشکرگری ءِ سوب ملک ءِ ته ءِ جێڑه انت.
واجه ءَ گێش کرت: من مدام ڈاه داتگ که گۆں مردماں نند ات ءُ هبران اش گۆش دار ات ءُ مردمانی سۆبانی پکر ءَ به ات. انون ایران ءِ گێشتری مردم ناوشنود ءُ مشکلانی آماچ انت که په آسانی جۆڑ نه به انت. پچے آ سکیاں که بۆجگ اش آسان ات دلگۆش نه بوت انت که نونێں گرانێں جاور پێش آت؟!
🔹 اسلامی دین گۆں ترندی ءُ هۆنرێچی ءَ چپ انت/ اگاں اعتدال ءِ راه ءَ تچان بوتێں ءُ «عدالت» ءُ «آزاتی» اێر دارگ بوتێن انت، نونێں مشکل جۆڑ نه بوت انت
مولانا عبدالحمید گۆں اشاره به مکه ءِ فتح ءَ ءُ پیامبر صلیاللهعلیهوسلم ءِ درگوز کنگ ءَ شه دشمنان گوشت: اسلام اعتدال ءُ میانه ئێں دینے ءُ گۆں ترندی ءُ هۆنرێچی ءَ چپ انت. منی کلۆ په همملکیاں اێش انت که شه دین ءَ بدبین مه به ات، دین هما انت که پیغبمر صلیاللهعلیهوسلم ءُ صحابه ءُ اهلبیتاں داشتگ. دریگے مردمان زانتێں که اسلام ءِ ته ءَ چنکه رحم ءُ نرمی هست.
واجه ءَ درائێنت: اگاں ملک اسلام ءُ اعتدال ءِ راه ءِ سر ءَ بوتێں اے سکیاں هچبر پێش نه یات انت. اگاں عدالت ءُ آ وعدهاں که انقلاب ءِ اول ءَ دیگ بوت ات انت، اێر دارگ بوتێن انت، مرۆچی ملک اے گپچلانی آماچ نه ات. انقلاب ءِ اول ءَ هبر شه آبادی ءُ انچائێن آپ ءُ لین/برق ءَ ات.
🔹 هلوچگری ماں استان ءَ باز بوتگ؛ اے بنگپ راست «شورای تأمین» ءِ اگده انت
مولانا عبدالحمید وتی هبرانی گڈسر ءَ گۆں ترندێں شرگداری شه هلوچگری ءَ گوشت: بژن انت که هلوچگری ماں استان ءُ هاسکار زاهدان ءَ باز بوتگ. زهگ، ورنا ءُ پیرێناں پلگ به انت ءُ ٹوهێں زر شه آوانی کهولاں لۆٹگ بیت. شه لهتے مردماں که برگ بوتگ انت هچ هالے نێست. بهمانگ اێں که پچے جاور اےرنگ انت؟
واجه ءَ گوشت: مارشتَ بیت که آ کارمستراں که اگده اش امنیت ءِ پجائێنگ انت، وتی اگده ءِ رد ءَ کرد اش نه کرتگ. شورای تأمین ءِ اگده مردمانی امنیت انت ءُ بائد شهر ءُ استان ءِ امنیت ءَ جۆڑ کنت، مردم هم بائد همکاری کن انت، بلێں راست ءُ بنی اگده کارمستر ءُ استان ءِ شورای تأمین ئے انت.
🏝🏝🏝
http://T.me/SunniOnlineBalochi
خلیلزاد:
🔷 پاکستان ءِ استراتجی ماں بلوچستان ءَ بےسۆب انت
زلمی خلیلزاد، امریکا ءِ پێسر ءِ هاسێن جهگیر په اۆگانستان ءِ سهل ءَ گۆں اشاره به بلوچانی نونێن بازێں ءُ همپتێں بێڑاں گوشت که پاکستان ءِ استراتجی ماں بلوچستان ءَ بےسۆب بوتگ. آیی گپانی رد ءَ اے جاور پاکستان ءِ ایمنی ءِ رھبند ءِ ته ءَ مزنێں گپچل ءِ نشانی اِنت که بدلیَ لوٹ ایت؛ بلے مسترێں جست اێش انت که اے رھبند پهراستی بدل بیت یا نه بیت؟
🏝🏝🏝
http://T.me/SunniOnlineBalochi
مولانا عبدالحمید کڈن کرت: اگاں انگت وارے هست، گڑا عاقلانهترێں راه همێش انت که مردمانی گپاں گۆش دار ات ءُ مردمانی لۆٹاں منّ ات، تاں ایران ءِ گێشتری مردماں گۆں وتی دیدانکاں ملک ءَ دێم ءَ بر انت.
🔹«الله ءِ وشنودی» ءُ «مردمانی سۆب» په من مهم انت
مولانا عبدالحمید گوشت: دو چیز په من مهم انت: یکے الله پاک ءِ وشنودی؛ دومی مردمانی سۆب. اگاں اے دو چیز ءِ بابت ءَ منی ساه هم گرگ بیت من وشالَ بین. من په وتی سۆباں ءُ جاگه ءِ پد ءَ نه آں، من دۆزواه آں ءُ دۆزواه ءِ گپاں هرکس که بیت، بائد گۆش دارگ به انت.
🔹وهدےکه مردم گشنگ انت ءُ ناامنی ءَ مارشتَ کن انت، حاکم نبائد راحت بوسپ ایت/ الله پاک آ حکومتانَ دۆست دار ایت که وتی استمان ءِ سر ءَ رحم دار انت ءُ آوانی لۆٹاں رندگیریَ کن انت
زاهدان ءِ آدێنگ ءِ امام ءَ گێش کرت: اے الله پاک ءِ نظام انت که حکومتی سیستم ءَ په بندگاں جۆڑ ء کرتگ تاں بنی آدم حکومتے را گچێن کن انت که چۆناهی ءَ آوانی جهگیر انت ءُ شه مردمانی امنیت ءُ سۆباں دێمپان کنت ءُ په هێلکاری، مالزانشت، جانسلامتی ءُ... جهد کنت.
مولانا عبدالحمید گوشت: الله تعالی مردماں ءُ هاسکار هما حاکماں دۆست دار ایت که پراوان انسانیت مهم انت ءُ پهکێں مردمانی سر ءَ ابید شه آوانی دین ءُ باوراں رحم داشته بهانت. گۆں مردمانَ نند انت ءُ آوانی لۆٹاں دلگۆشَ کن انت.
🔹هلوچگری ءُ باج ءِ لۆٹگ بدترێں کار انت/ دێمداری شه هلوچگری ءَ حکومت ءُ سرکار ءِ اگده انت
مولانا عبدالحمید وتی هبرانی گڈسر ءَ «هلوچگری ءُ باج ءِ لۆٹگ» ءَ سک اێر جت ءُ گوشت ئی: هلوچگری یکے شه رڈترێں ءُ بدترێں کاران انت. آوان که مردماں هلوچَ کن انت بدترێں مردم انت ءُ بدترێں مال هم هما مال انت که شه اے راه ءَ کٹگ بیت. اگاں مردم ءِ زهگاں شه گشن ءَ مر انت گهتر انت تاں شه باجلۆٹی ءُ دزی ءِ راه ءُ زر کٹ ایت.
واجه ءَ کڈن کرت: اے حکومت ءِ اگده انت که شه هلوچگری ءَ دێمداری کنت.
https://sunnionline.us/balochi/2026/02/4492
🏝🏝🏝
http://T.me/SunniOnlineBalochi
سردار اکتر مینگل:
🔶من وتی سرجمیں زندگی ءَ جاور انچو نا گیگ بوگ ءَ نہ دیستگ اَنت
بلوچستان نیشنل پارٹی ءِ سروک ءُ بلوچستان ءِ پیشیگیں مزن وزیر سردار اکتر مینگل ءَ وتی درشانے ءَ گوشتگ کہ اے وھد ءَ بلوچستان ءِ جاور سک نا گیگ اَنت ءُ اے ھنداں روگ نہ بیت.
آئی گوشتگ کہ رسانکدر اے وھد ءَ سرجم ءَ بے توار اَنت، من وتی سرجمیں زندگی ءَ کدی ھم جاور اے وڑ ناگیگ بوگ ءَ نہ دیستگ اَنت. ھما تھی کارانی وزیر گشت کنت کہ آ ایس ایچ او کج ءَ انت.
چوش کہ اے وھد ءَ بلوچستان ءَ بی ایل اے ءِ نیمگ ءَ ھیروپ آپریشن ءِ دومی بھر برجاہ اِنت. بلوچستان ءِ جتائیں ھند ءُ دمگاں پدائی ارش، جنگ ءُ سرکاری کارجاھانی سر ءَ ارش گوں ترندی ءَ برجاہ اَنت.
بنشۆن: زرمبش بلوچی
🏝🏝🏝
http://T.me/SunniOnlineBalochi