118
https://t.me/joinchat/AAAAAELl7xhbtwf4jkgpTw سلام و سایقیلار عزیز ادبیات سئونلر، آخاغیمیزی سئودیک‌لریزله پایلاشین لوطفن🌹🌹🌹 ادمینله باغلانتی یولو 👇👇👇👇👇 @yashasinaz1
منجه، شاعرین اوره‌یی و روحو بیر مؤوضو و یازیب، یارادتدیقی شعیر ایچین قابار وورماسا، حقیقتن اونلاری اداره ائده بیلمه‌یه‌جکدیر. شاعرین روحوندان دویغو و شعیر آخمالی گرکدیر. و سؤزلر یاراسینی، قلبینده یاراشیق وئرمه‌لیدیر، و بو یارا، شاعر ایچین چوخ بیر گؤزل سئوگیلی کیمی چیچکلنمه‌لی‌دیر، او واختدیر کلمه‌لر شاعرین روحوندا ورم باغلایاراق، بیر اعلا وضعییتده یارادیجیلیغا ال وورمالیدیر. بو شعیری آیدین باخیش‌دان اوخویون:
بیر سس گلیب- گلمه‌میشدن
گؤزلریمی دلمه‌میشدن
یوخودو قاچاندا قاچیردا !
گؤزلریمین قوجاغیندان
لاپ قاپینین- پنجره‌نین بوجاغیندان
اؤزونه بیر یول آچیردا
هانسی دیلده یالواریرسان گئتمه دایان آی بالا ایست!
قاباغیندا دورمور اونون نه گوزارچی، نده پلیس!
یوخودو قاچاندا قاچیردا!
گؤزلریمدن بیر آن دویور، قویور قاچیر
قاچاغان قیزلار کیمین‌دیر، جیبلریمی سویور قاچیر
گؤزلریمین قاپیسینی آچیق قویور، قویور قاچیر
نه بیلیرکی ساعات اوچدو یادا بئش‌دی!
دای یوخونون واقتی کئچدی!!
یوخودو قاچاندا قاچیردا!
قیچلارینی ایپ ایله باغلاماق اولمور
بیر درددیرکی! اونا خاطیر اوتوروب آغلاماق اولمور
یاستیق دؤنور داشا گئجه
دوشک سلیمان فرشینه
خیالیندا گزیشیرسن کائناتی
مگر چیخیر باشا گئجه
الین چیخیر بوشا کئجه
یوخودو قاچاندا قاچیردا !
بیر کویوین قوشودور اوچور، قونماق بیلمیر
بیر ارکؤیون اوشاقدی او، قانماق بیلمیر،
گئجه چاغی کوچه‌لرده اوشاق یوخدو، گؤره‌سن کیمله اویناییر؟
داما چیخیب اولدوزلاری بلکه ساییر!
یوخودو قاچاندا قاچیردا !
بیر آیریسین یوخوسوندان آییلتمیرکی،
سن ها دئنن:« قاییتگینان» قاییتمیرکی،
نه باخیر بیر من اؤلومه، نه ده باخیر سن آللاها،
یوخو دئییل ادادی بو!!
سانکی گیزلین قادادی بو !!
آدام دای نئینه‌سین داها،
یوخودو قاچاندا قاچیردا.
آیدین باخیشین چوخ اینجه و ایموسیونال دیلی وار و دیلین گؤزه‌للیک ائلئمنت‌لریندن ثمرلی استیفاده ائدیر. اصلینده بو شاعرین کلاسیک شعیرلرینده یئنی بیر دیل وار و اثرلری «نئو کلاسیک» حسابا گلیر، ساییلیر. بو گنج شاعرین اثرلرینده کی مؤوضو و مضمونا نظر سالساق، استفاده اولونان مؤوضوعون اکثریتی بکر، و توخونولمامیشدیر. و اگر بیر مؤوضو تکرارلانیرسا، چوخ یاراشیق‌لی و عاطیفی پوئتیک دیلی ایله هر کلمه ده هاوانی گؤزل یئرینه سالیب و ایشه آپارا بیلیر.
آیدین باخیش قارداشیما یالنیز دئییرم شعیر دیلینی داها زنگینلشدیرسین چونکو ایندیکی چاغداش شعیرررر، زنگین دیلی سئوییر و داها ساده لیک زامانی چوخدان اؤتوب و کئچمیشدیرررر.
هرحال‌دا اومید ائدیرم بو گنج شاعر پئشه‌کار یارادیجیلیغیندا باجاریقی قدر لازیم اوغورلارا ال تاپا بیلسین و یالنیز اؤز امضاسی شعیرلرینین آلتیندا اولسون. آیدینا یئنه اوغورلار…
سون.
@tanimanii:Telegram
aydin.baxish:Instagram
« #آیدین_باخیش »ین شعیرلرینه قیسا باخیش
#کامیل_قهرمان‌اوغلو
مقاله‌نی «نقدی» باشلامادان اول، سئوگیلی شاعرین اؤز دیلیندن یاشامینی اوخوساق گؤزلدى. آیدین باخیش بیوغرافیسی باره‌ده بئله سؤیله‌ییر:
«آدیم آیدین باخیش، ۱۳۵۴ گونش ایلینده حیاتا گؤز آچمیشام، «تبریز» شهرینده ساکینم. اوشاقلیق چاغ‌لاریم اوجان بؤلگه‌سینین «داش‌آتان» کندینده کئچیب، بو کند، خشکناب (استاد شهریارین دوغولدوغو یئر) کندی ایله یاناشی‌دیر. شعیر و ادبیاتی اوشاقلیقدان سئویردیم، بلکه‌ده بو سئوگی، بؤیوک شهریارلا و حیدربابا داغینا جغرافیا یاخینلیغینا گؤره، منیم اوره‌ییمه یول تاپمیشدیر. نه ایسه شعیر یازماغا، یالنیش بیر دوشونجه اساسیندا، همیشه الهام دالیسیجان گزیردیم، سونرالار باشا دوشدوم شعیره و یازماغا دوشونمه‌دن، بو الهام شاعره هئچ واقت گلمه‌یه‌جک. بیرینجی آددیم، باشلاماق، یازیب- پوزماق و اوخویوب- اؤیرنمک‌دیر. سونرالار ۲۸ یاشیمدا، لیسانس دؤره‌سینده تحصیل آلدیغیم زمانلار، تبریز بیلیم یوردوندا قورولان سهند ادبی درنه‌یینده اشتراک ائتدییم‌ده، شعیره ماراقلانیب، یازماغا باشلادیم. نه ایسه یازیلاریم منی راضی سالماییب، بیرینجی پیلله‌لرده شعیری بوراخدیم، سونرالار ۴۲ یاشیمدا بیرداها شعیره طرف چکیلیب یازماغا باشلادیم و ایندیسه شعیر ساحه‌سینین بیرینجی پیلله‌لرینده بیر اؤیرنجی کیمی گزیشیرم. بؤیوک شاعرلرین شعیرین اوخویوب لذت آلیرام. ایکی اوشاق شعیر کیتابی چیخارتمیشام؛ تانی منی ۱ (حئیوانلاری تانیماق) ۱۳۹۶ دا و تانی منی ۲ (طبیعت) ۱۳۹۷ ده. بو سون ایل‌لرده ادبیات‌لا باغلی، واقتیم اولدوغو قدر چالیشمیشام و بیرینجی شعیر کیتابیم چاپ مقدماتینی کئچیریر.»
آیدین بئی باخیش‌دان بیر نئچه شعر اوخوموشدوم اؤنجه‌لر و حقیقتن ده کلاسیک آذربایجان تورک قالیب‌لی، گرایلی، قوشما و غزل کلمه’لرینی تانییان، بیر شاعر حسابا گلیر. و هانسی کلمه‌نین اوره‌یی نقدر چیرپینا بیلرسه و هانسی کلمه‌لردن روح و جسد و جان دوغولاسی مومکوندیرسه، اعلا درجه‌ده دوشونور. و هانسی کلمه‌لر اؤزلویونده زامانلا، تاریخی بوغوب و نئچه عصیرلر سونرا یئنی نسلیمیز ایچین آثارینی گؤستره بیلر. بلی بو سادیلانان اؤزللیک‌لری سایین آیدین باخیش بئی شعرلرینده دویارکن، گؤردوم.
آیدین بئی عاطیفه باخیمدان آی‌دان آری، گونش‌دن دورو بیر اوره‌یی وارکن، بیر روایتی ائله‌جه ظریف و یانیخلی و سیرالی بیر معناده یارادیرکی، مخاطبینی حئیران ساخلاییر اؤزونده؛ آرتیق گؤردویونوز کیمى آیدین باخیش معللیمین بو ایکی بند گرایلی‌سینی اوخورکن، دئدییم اینجه‌لیینی گؤرورسونوز:
بیر کپنک قوناغی‌یام
گؤروشونه نه آپاریم؟
بیر جوت جوراب؟ آینا- داراق؟
یادا بیر کؤینک آپاریم!
و…
دوروم گئدیم سحر- سحر،
گئج گئتسم قلبینه ده‌یر.
کپنک‌لر گولو سئور،
بیر دسته چیچک آپاریم.
آرتیق گؤردویونوز کیمى آیدین باخیش معللیمین بو ایکی بند گرایلی‌سینی اوخورکن، دئدییم اینجه‌لیینی گؤرورسونوز. منجه بو عزیز شاعر کلمه دوزن‌لیینی «دوزولوشونو» یوکسک سوییه‌ده تانیرکن، یاخشی باشا دوشور.
باخما قانادی گوموش‌دی،
گلنده، «تک گل» دئمیشدی.
بلکه یازیق الی بوشدو!
قوی بیرآز چؤرک آپاریم.
و…
بلکه بو کپنک تک‌دی!
نئینیر؛ جورابدی،… کؤینک‌دی،
اونا لازیم بیر اوره‌ک‌دی،
قوی اونا اوره‌ک آپاریم.
منجه، شاعر بوتون دیل نورمالارینی و شعرین دیگر ائلمنت‌لرینی پوزسون دئیه و شعرین دیل آسپئکتینی وورغولایاراق، اؤزونده گؤرکملی بیر دیل آختارمالیدیر.
البتده دیلی و سبکی گزیب آختارماقلا تاپماق اولاسی مومکون دئییل، چون شعیر و دیل و دیگر اؤزللیک‌لر اشیا کیمی دئییل ایتیریب و سونرا تاپاراق مالیک اولاسان.
آنجاق عکسینه، شاعر پوتانسیالینا و زنگین فیکیر و دوشونجه‌لرینه گؤره دیلینی و پوئتیک اوسلوبونو تاپاراق و اثرلرینده، کئچمیش و ایندی‌نین شاعرلرینه هئچ بیرینه بنزه‌مه‌مه‌یه چالیشیر و شاعر بو شکیل‌ده بنزرسیز اولور و پوئتیک باغیمسیزلیقینی، و اؤزللیکله شعرینده دیل مستقیل‌لیگینی اعلان ائدیر.
سنین قبریستانین زیبیل دولچاسی!
اؤلور سنله بیرگه لحظه‌لر – آنلار
اوره‌ییم توتولور گؤزوم سولانیر
بیرین قبریستانا آتان زمانلار
نه غوسلون، تابیتین، نه یاس توتانین،
جیریق قارا نایلون کفنین اولور
اوزولمه، داریخما، غریب‌لیک اومما
بو زیبیل دولچاسی وطنین اولور
ایشله‌دین… دئمه بس بیر عؤمور بویو-
فلک یاتیرتمیشدی سنی سوغانا
آخیردا اؤلومون اؤدولون اولدو،
نئجه رحمت دئییم سنی دوغانا..
« آنالار گونو، قادین گونو موتلو»
قادین خزاندا آچان گول، یئل اوینادان سونبول،
قادین او یئل قوشودور اوغور وئرن یونگول
قادین یانی برکت، تارلالاردا آغ بوغدا،
قادین یانی نئچه دورنا، چن اوینادیر داغدا،
قادین یانی ائله باغوان، گول اوینادیر باغدا
قادین گؤزللیگه سمبول گؤزل ناز اینجه بیر اووو،
قادین قاب ایچره ظریف، اورک آلان تابلو،
هنر ساعاتلاری تانری چکیب آتیب حیاتا،
الینده داددی یا دوزدو بیر آز قاتیب حیاتا
حیاتدا دوزلو گولوشدو روح وئرندی سایخاشدی،
آیاقلاریندا بهشت وار دیرلی یولداشدی
قادین یانی کیشی بیلمز آغیردی دوققوز آی آغری،
نه دوققوز آی بیر عؤمور وار اوره‌ک‌ده درد ایله قایغی
قادین یانی ساری نور ساچیب قارانلیغا حاق،
حیات سیجیللی‌سی باطیل یانیندا بیر «آغا» حاق
باریشدان اؤترو هر آن تومار چکن اللر،
حیات بقاسینی جاندان پئیین تؤکن اللر
چمن‌لی گؤلچه‌لر ایچره کونول سئون بیر قو،
قادین یانی یئنیلیک، اینجه‌لیک، درین دویغو
شعیردی تانری دیلینده نده گؤزل یازیلیب،
او سئوگی قافیه‌سینده اینان غزل یازیلیب
قادین بیر آغ بولوتون یاغمامیش دولان گؤزودور،
اسنده قاپ- قارا یئل لاله‌نین سولان گؤزودور
قادین سمادا اوچان قوش، آماندی شیلتاق اوشاقلار آتیلماسین اونا داش
#آیدین_باخیش
@tanimanii:Telegram
aydin.baxish:Instagram
□□□ « بیلدیرکی اوغلان»
بیر حاکیم خالقینا اوز دوتوب دئدی:
«سؤزونوز؟ دردینیز؟ نه وارسا دئیین؟»
بیر اوغلان قورخوسوز قالخیب دانیشدی
میللتین وریندن دردین! گیلئیین!:
« وئردیگین وعده‌لر؟ سؤزلر نه‌اولدو؟
بو میللت فیکیردن، پولدان کاسیب‌دیر!
شهر کؤرپوسونده آی حاکیم آغا
نئچه‌سی آجلیقدان اؤزون آسیبدیر! »
حاکیم‌سه باشینی توولاییب دئدی:
«من دؤزه بیلمه‌رم بو قدر غمه
بوردا سؤز وئریرم هر شئی دوزه‌لسین
قویمارم ظولم اولسون منیم خالقیما»
بیر ایل سووشارکن خالقی توپلاییب
سوروشدو یئنه‌ده همن سؤزلری
هئچ کیم دانیشمادی! هئچ کیم دینمه‌دی!
آختاردی اوغلانی خالقین گؤزلری
یئردن گؤی اوزونه قورخو داشلانیب
گؤیون گؤبه‌یینده سوکوت دوغولدو
بیر قوجا آستاجا دوداغی آلتدا
سؤیله‌دی:« بیلدیرکی اوغلان نه اولدو؟»
#آیدین_باخیش
@tanimanii:Telegram
aydin.baxish:Instagram
زمی‌میز زومارلیق اولمادی هئچ ایل
هرگون قورا سیخدیق هرگون نم اولدوق
یئنه آرزیلارین پئیی شوملادی
نییت بهشت ایدی جهنم اولدوق
شهر مئیدانیندا ساعات زه چالیر
بو قیش زومارسیزدیر دئییر، بیلمیریک
آلا قارقالارین قاریلتی‌سی‌دا
هرگون بئینیمیزی یئییر، بیلمیریک
بیزیم یاخامیزدا دمیر سانجاق وار
بیر نفر گؤزلرین ساللاییب تاماه
جینیمیز توتاندا آدام اولوروق
بیر نفر چاغیریر یئنه بیسم‌الله
هامی لای- لای چالیر چؤرک وئرن یوخ
بلکه‌ده بو قیشدا باشیمیز باتا
گومان تانرینیندا الینده ایش یوخ
عزراییل حیاتا چکیر زومباتا
بیزیمکی بئله‌دیر، بئله‌ده گئدیر
نه یاخشی یاخشی‌نی- پیسدن قانمیریق
نسه قیسمتیمیز اؤلوب- دیریلمک
حیاتی یاشامدان آییرانمیریق
#آیدین_باخیش
@tanimanii
"ائشییه چیخمایین"دئدیز
چیخمایاندا اولمور آخی!
بوشالیر ائو اؤز-اؤزونه
ائو گؤز کیمین دولمور آخی!
ائله آغاج اکیب تاری
سایمیر کولک بیلمیر قاری
دردین یاشیل یاپراقلاری
پاییز اولور سولمور آخی!
بیز تانرینین بالالاری
اولمادیق بیلمیرم باری
هئچ شیطاندا بیزدن ساری
ساچلارینی یولمور آخی!
#آیدین_باخیش
بایرام آیی- 98
@tanimanii
آنا گونو موتلو اولسون دئیه‌رک:
اؤزومو آنام حاققیندا هئچ واقت راضی سالا بیلمه‌دیم:
بو نئجه دوراندیر بو نئجه عصیر؟!!!،
بو نئجه دوران دیر بو نئجه عصیر
دمیر محبتین قولاغین کسیر
اوره‌ییم جان آتیر آیاق تله‌سیر
محبت ائوینه بیر قاریش قالیب
آنامین دؤره‌سی یامان بوش قالیب
محبت یوکودور قورو نفسی
بیر سلام کئف- احوال آنامین بسی
الینده خاک‌انداز ائو سوپورگه‌سی
قاپییا گؤز تیکن جوت باخیش قالیب
آنامین دؤره‌سی یامان بوش قالیب
بیرگون کوچه‌میزین تام یاراشیغی
ایندی قوناقسیزدیر قابی- قاشیغی
چکیلیب گؤزوندن گؤرن ایشیغی
تؤکولوب آغزیندا نئچه دیش قالیب
آنامین دؤره‌سی یامان بوش قالیب
اوزونده بیر ذره شادلیق گؤروشمور
یورولوب دونیادان الی قیزیشمیر
سوفرهسی سویوقدور غذاسی پیشمیر
آخشامدان ائوینده بیر آز آش قالیب
آنامین دؤره‌سی یامان بوش قالیب
آنامین دانیشیر انتظار گؤزو
گؤز آغری، باش آغری، قوجاقدا دیزی
عؤمور قلبیریندن یای، یازی، گوزو
اله‌نیب قورتولوب اوزه قیش قالیب
آنامین دؤره‌سی یامان بوش قالیب
داغ اولسا آغناییب یاماجی گئدیب
قوشا قاریماییب باش تاجی گئدیب
قیریلیب بوی‌لاری آرغاجی گئدیب
جاهاز خالچاسیندان تک اریش قالیب
آنامین دؤره‌سی یامان بوش قالیب
سویوق بو عصیرلی زامانلیام هئی
گرکدیر اؤزومو یامانلیام هئی
هاوام قاریشیبدیر دومانلیام هئی
بولوتام گوزومده تر یاغیش قالیب
آنامین دؤره‌سی یامان بوش قالیب
بیر حزین ماهنی چال آی تئللی سازیم
پاییز خئشیلداییر باهاریم- یازیم
داغیلسین بو دونیا نه‌ییمه لازیم
دونیا قفسینده آنام قوش قالیب
آنامین دؤره‌سی یامان بوش قالیب
#آیدین_باخیش
بایرام آیی- 91
@tanimanii
انا ریحُ حزینة تهزُّ الغصنَ، و تراكِ تسقطین في سلالِ الآخرین... شاعر: عبدالعظیم_فنجان | زاده‌ی ۱۹۵۵ میلادی/ ناصریه عراق
من بادی اندوه‌گین‌ام، که شاخه را می‌تکاند؛ و می‌بیندت که در سبد دیگران می‌افتی... / ترجمه: فاطمه_محبی
کؤنلو توتقون اوزگون یئلم
کیمدیر‌کی دردیمی بیله؟
تیتره‌دیرم بوداقلاری
دوشورسن آیری زنبیله!
#آیدین_باخیش-
@tanimanii
« هارا قاییتسین بو آنا ؟ »2:
یازیق آنا ایشین یاشدی ، هله یئنی ارین واردی
سن سای بیرده فلک سایسین ، گؤره‌جک گونلرین واردی
یئتیم خانادان قاییدیب، بیر فیکیر ووردو باشینا
دئدی بوردان قاچمالییام، قاچدی چاتدی یولداشینا
سئویندی ارله- اوشاقلار، سئویندی‌لر قوهوم- قارداش
بیر نئچه گون کئچدی آنا، داریخدی هئی یاواش- یاواش
دئدی:« یولداش اسارتده ، منیم ایکی بالام قالیب
پاییز یئلی یامان اسیر، اوردا ایکی لالام قالیب
قوی گئدیم تاپیم گتیریم، آلیم اونلاری قوینوما
تانری آنالیق میدالین ، اؤزو سالیبدیر بوینوما»
یولداشی داشدی سؤیله‌دی:، « سیلمک اولماز بو لکه‌نی
اتکدن تؤک بو داشلاری، یئمه بو میردار تیکه‌نی
اوشاقلار حرام دوغولوب ، قبول ائیله‌مز بونو دین
بیزی اوندا ائل قینایار، چکمز بونو هئچ بیر آیین»
قانع اولانمادی قادین ، آیریلیغا دؤزه‌نمه‌دی
دئدی بس گئتمسه اولماز، دئدی بس شولوزومبه‌دی
ار دئدی:« گئتسن امما بیل، نه اوشاق نه ارین واردی!
نه دای منیم آدیمی توت ، نه ده بوردا یئرین واردی! »
دوتدو آلین یازیسینی ، قادین یولا دوشدو گئتدی
بالا بالا دئیه- دئیه ، بالا- بالا گؤزدن ایتدی
گئتدی چاتدی همن یئره ، لله وار یوردو یوخ ایدی
پارتلامیشدی یئتیم خانا، اوشاقلار سانکی یوخو ایدی
اود دوتدو یاندی دونیاسی، وای- وای دئدی یانا- یانا
بوتون کؤرپولر سینمیشدی ، هارا قاییتسین بو آنا؟
هارا قاییتسین بو آنا ؟ ، نه یئر بیلیر نه گؤی دردین
الهی بو قدر دردی ، ندن بیر یئرده گؤندردین؟
#آیدین_باخیش
@tanimanii
الیف ب جیم غلط چیخدی
ائله جواب دال گؤرونور
گونش اعتیاد گتیریب
اوزاقدان لاپ خال گؤرونور
چیینیمیزده قوش اوچوردو
دئدیلر خوشدو اوغوردو
قار آدامی نه دوغوردو؟
یئرینده بیر شال گؤرونور
پاخیر باسیب بو گوموشلر
بیزه چؤب قویدو قمیش‌لر
آغاجدادیر یئتیش‌میشلر
قوطو بوتون کال گؤرونور
آشیق توخان آلچی گئتدی
آت شیل اولدو نالچی گئتدی
دوعا یازدیق فالچی گئتدی
اوستوموزده فال گؤرونور
ایشیغی یوخ بئش قیرانلیق
گلدی گئتسین بو قارانلیق
سؤز دانیشدی بیر قورانلیق
اما ایندی لال گؤرونور
اللی اوزلو آیاقلی‌سی
آرخالیسی دایاقلی‌سی
هله انسان سایاقلی‌سی
درین باخسان مال گؤرونور
#آیدین_باخیش
@tanimanii
هومایون- کؤنول قنبر اووا- قولاق وئر ذهنین دورولسون!
@tanimanii
یولا دوشدو بیر آرخدان، بیر کیچیک قارا بالیق
او آرخین درینلییی، اونا وئرمیردی قانیق
گئتدی چاتدی دنیزه، درینلیک سوراغیندا
معللیمین سؤزلری، سیرقا تک قولاغیندا
دایاز اولدو دنیزده، درینلییی گؤرمه‌دی
بوز باغلادی دونیاسی، سرین‌لییی گؤرمه‌دی
دؤندو همن یوللاری، ایسته‌دی گؤیه اوچسون
یانی نئجه اوچماغی، معللیم‌دن سوروشسون
قاییتدی شاهید اولدو، معللیمین یاسینا
ائله بیل گمی دیدی، ساحیلین قایاسینا
بو نئجه ایشدیر تانری، دور یوخودان آییل‌دی
سن یاتیبسان دونیادا، آرازدا عزراییل‌دی
ایندی قوجالیب بالیق، قالیب کیچیک بیر آرخدا
او اوچماق هوسینده، او صمد آختارماقدا
#آیدین_باخیش
@tanimanii
اوخونمور تقویمده بیزیم یازیمیز
ایندی فصیللرین قیشی چوخالیب
حاققا یئیلمه‌یه داد – دوز ووروبلار
باطیلین آج قارین دیشی چوخالیب
چوخالیب دردلرین آلچاق- اوجاسی
نئچه‌سین یئمیشیک قالیب نئچه‌سی
بیزیم سنگکلرین باجا- بوجاسی
سیزین سنگکلرین داشی چوخالیب
نه دئیم قارقیمیش بو کائناتدان
قوشجیغاز کؤنلوموز چکیر قاناتدان
هئچ نه دییشیلمیر بیزیم حیاتدان
یالنیز قفسلرین قوشو چوخالیب
باشینا بوشلاییب بیزی قورتولوب
دانیشمیر بیز ایله سؤزو قورتولوب
بیزه کی اوز وئرمیر اوزو قورتولوب
بلکه‌ده تانرینین ایشی چوخالیب
بو ناغیل اوزون‌دور اوزوندان اوزون
گولسک‌ده گولموشوک هئی حزین- حزین
بیزکی آغلامیریق گؤزلریمیزین
بس نییه بوقدر یاشی چوخالیب
#آیدین_باخیش
@tanimanii
هؤروکلو قیز/ شعیر: #آیدین_باخیش
سس: #آیدین_باخیش
@tanimanii
سایین قارداشیم آیدین باخیش ایچین سؤزلر و کلمه‌لر اؤنملیدیر. نئجه کی جانلی بیر مؤوجودون روحو و جسدی وارکن، هر کلمه‌ده اؤزونه داییر روحا مالیک‌دیر. اؤزونه مخصوص دیلی، و قالارقیلیغی. بونا رغمن هاچان دیلده یارانان کلمه‌لر بیر- بیرینین کناریندا، بیر نوع اویغونلوقا چاتا بیلدی، شعیرده دیلینی، شاعر یاراتدیغی هارمونیالاردا آردینی توتوب و گئتمه‌لیدیر. البتده، بو شاعرین شعیرینی اوخومالی و گؤزل گؤسترن، فورما و ایچ ییغجاملیغی، سئچدییی مؤوضو، و اوبرازلارین یئنی‌لییی، کلمه‌لرین جانلیغی، و بعضنده خیطابی اولماقی و معین درجه‌ده دانیشیق دیلینه یاخینلیغی‌دیرررر. دئدییم واریانتلارا گؤره، بو شعیری اوخویون:
یورولاجاق قانادی،
گؤیدن یئره گلینجه.
هر یاغیشین حیاتی
گؤیدن یئره گلینجه.
بیلمیر گولسون، آغلاسین؟
اؤلسه، توتان یوخ یاسین.
کیمه اوره‌ک باغلاسین؟
گؤیدن یئره گلینجه.
هئچ نه‌یه یوخدو واختی
یوخدو یاتماغا تاختی
نئجه توی توتاجاقدی-
گؤیدن یئره گلینجه.
بیلمیر واختی، ساعاتی
دوغوم‌گونو، وفاتی
هر یاغیشین حیاتی-
گؤیدن یئره گلینجه.
اصلینده آیدین بئی ایمگه‌لره عینیت باغیشلاییر، یعنی اوبرازلاری بئینینده فورمالاشدیراراق، اوبیئکتیولشدیریر. و شاعر آرتیق اعلا باخیمدا، عینیتله، ذهن آراسیندا ایلگی ووراراق، یاخشی بیر قارشیلیقلی علاقه گؤستره بیلیر. آیدینین شعیرلری اؤزلویونده دالغالی و جوشارلی اثرلر کیمی‌دیر. فیکریمجه شعیرررر شاعری یازیر، شاعر شعیری یوخ. نئیه کی شعیری یارادان کلمه‌لر، شاعرین روحوندا و یاشامیندا جان آتیب و یاشاییر. و اونلاری جانلیجاسینا کاغیذ اوزه‌رینده رقصه گتیریر. بؤیوک فیلسوف نیچه دئمیشکن؛ «شاعر قان ایله یازیر شعیری» بلی قاندا حرکت وار، دالغالیق وار، هیجان وار، حرکت وار، یئنیلیک وار و شاعر بونلارین هامیسینی شعیرینده یاراشیق وئررکن، جان باغیشلاییر اثرلرینه.
قئید ائتمک لازیمدیر؛ غزل فورماسی عنعنه‌وی بیر فورما اولاراق، بوگون چاغداش سوسیال آنلاییشلاری اؤزونده توپلاشدیرمالیدیر. و خالقیمیزین، گله‌جک نسلیمیزین آرزولارینین، سیمبوللارینین و خیاللارین تنقیدسل ترجمانی اولمالیدیر. بیر نمونه:
سن آغلاما یانیقلی- حزین گول هؤروکلو قیز
تر- تر آیاقلانیر ائله‌بیل گول هؤروکلو قیز
هر یول گؤرنده بؤیله سنی کؤنلوم اودلانیر
سانکی سوخور فلک گؤزومه میل هؤروکلو قیز
هئی دیسگینیر مزاردا آنان قبر اوچوقلاییر
دای آغلاما اووون گؤزونو سیل هؤروکلو قیز
قایتار گئری شیکایتینی تانری اینجی‌یه‌ر
سپ بؤیله دونیانین باشینا کول هؤروکلو قیز
سن آغلایاندا ترله‌دی قرآن سطیر- سطیر
تورات اوتاندی دینمه‌دی انجیل هؤروکلو قیر
لای- لای دئیه‌نلرین دیلینه اویما اونلارین،
یوخدور الینده بیر تیکه نیسگیل هؤروکلو قیز
ایندی بولاقلاریندا اوزو آغ دئییل یازیق
باشدان نسه سو واردی گلیر لیل هؤروکلو قیز
سیندیر عدالت آدلی جامین دیکتاتورلارین
یاغدیرماسینلا خالقا یالان دیل هؤروکلو قیز
صولح آدلا سالدیلار قاپینیزدا ساواش سیزین
صولحو ذلیل نجور بیلیسن بیل هؤروکلو قیز
حتی ائشیتمیشم کی دئییبدیر یازیق نوبئل
منله توتون برابر اونا ایل هؤروکلو قیز
آزادلیغین سیجیللی‌سی ایسلاق اوخونماییر
فرعون چاغی گؤتوردو اونو نیل هؤروکلو قیز
آچ وئر یئله هؤروکلرینین زنجیرین گولوم
زنجیرله‌نن زمان داریخیر تئل هؤروکلو قیز
آنجاق اینانما هئچ کیمه حتی اوچان یئله
چون بیجلرینده اولگوسودور یئل هؤروکلو قیز
بئل باغلاساندا باغلا بیر آیدین باخیش ائله
یانسا یانار سنین حالینا ائل هؤروکلو قیز
آیدین قارداشیم دئدییم سایاق، شعیرین اؤزل فضاسینا، مضمونونا و بوتون باغلی و آچیق زاویه‌لرینه کامیلن گیریشی واردیر و هانسی کلمه‌نی هاردا گتیره‌جه‌یینی آشکار حالدا بیلیب و تانیر. بو شعیرده کلمه لرین اویغونلوغونا دقت وئرین:
آی سپن گؤزلریمین سئرچه‌سینه دن بری باخ
تور دا قورسان دوشه‌رم، اول منه دوشمن بری باخ
سنه خاطیر، بو داغین ساغلیغینا، قورد رؤیالیم-
گؤی‌لرین دوزقابی‌سیندان سپیلیر چن بری باخ
نازی ناز چکمه‌لی‌دیر تانری، بونون میننتی یوخ
سنه خاطیر دئییرم تانریا احسن بری باخ
بری باخما یئری گئت آی کیمی گؤی‌لرده دولان
من دئسم کیمدی آییم؟ سؤیله «منم من» بری باخ
سنسیز اولسام صنمیم ائلدن آتیلمیش غریبم
سنله اولسام منه نیسگیللی وطن‌سن بری باخ…
هر نه شر وار منه گلسین، نه خئییر وارسا سنه
اوزاق اولسون قادانین کؤلگه‌سی سندن بری باخ
هارا باخسام سانیرام دونیا تیکانلیق چؤلودور
سن باخارکن گول اچیر اوردا بو کؤشن بری باخ.
« دوروم بیر چای قویوم ایچیم»
سؤزلریم آغزیمدا قالیب
دیلیم منی قارشیلامیر
یاناندا توستوم گؤرونمور
کولوم منی قارشیلامیر
سوسوزدو بوردا کیریشلر
بایات‌دیر تام بیلدیریش‌لر
هاردایدی قیرمیزی فرشلر؟
کیلیم منی قارشیلامیر
هارا گئتسم همن یولدو
بیلدییم یوللار قورتولدو
هرزادین بیر باشی پولدو
پولوم منی قارشیلامیر
یاسدان سورا بیر تؤرن یوخ
گئدیرم من اؤتورن یوخ
منی یئردن گؤتورن یوخ
اؤلوم منی قارشیلامیر
گرک بیر یئنی یول سئچیم
کدر منیم ساندیویچیم
دوروم بیر چای قویوم ایچیم
حایات منی قارشیلاییر.
#آیدین_باخیش
@tanimanii:Telegram
aydin.baxish:Instagram
زنگیلان شهرینین آزاد اولونماسینا
« بیر شوشه توپراق، بیر پاسلی آچار، اؤلوب گئدن آنالارین یادیگاری»
آچیلان سحر ده، باتان گونش ده
داها بو توپراقی بوراخ قاچ دئدی
دامغا باسیلیردی دوشن مرمی‌لر
اورک گئتمیرم‌سه قوی قاچ قیچ دئدی
نه چاره، قالسایدی اؤلوم قیسمتی
توپراقدان دویونون آچدی قاچدی او
دوغما یوواسیندان یئتیم قوش کیمین
قوووشدو حسرته سورگون اوچدو او؟
بیر شوشه توپراقدان یادگار کیمین
بیرده آچارلارین گؤتوره بیلدی
قالدی ائرمنی‌یه واری دولتی
یالنیز گؤز یاشلارین گتیره بیلدی
یئتیشدی «قاچقین‌لیق» مرحله‌سینه
هئچ کیم بو آنایا بوساط وئرمه‌دی
همیشه بیر فیکری زنگیلاندایدی
آخی گولدانلارا سو زاد وئرمه‌دی
«قارا باغ بیزیمدیر» هایی سؤز اولدو
هئچ یئره چاتمادی هئچ گورلشمه‌دی
دئه بیر گون، ایکی گون اوچ گون سووشدو
دوغما ائو- ائشییی اؤزگورلشمه‌دی
اونون قونداقداکی اوغلان اوشاغی
بؤیویوب اولموشدو 27 یاش
نسه تاپشیردیغی سؤز بو ایدی گئت
« عسگر اول اوردویا باشلاسا ساواش»
دونن آناسینین ایل دؤنومو ایدی
عکسینین یانییندا بیر شوشه توپراق
ائوین آچارلارین بیر ده سیلاحین
گؤتوردو سؤیله‌دی:« سن یاشا تؤپراق
من بوگون یوردوما ایگیت عسگرم
حسرتلی آنامین آرزوسو ایچین
گئدیرم ساواشدا جان دئیم جانا
قاییتسین یوردوما زنگیلان لاچین »
بوگون ائولرینین آستاناسیندا
اسیردی هاوادا اوچ رنگلی بایراق
آچماغا بیر قاپی یوخ ایدی آنجاق
شوشه‌‌دن هر یئره سپیلدی توپراق.
#آیدین_باخیش- گوز 99
@tanimanii:Telegram
aydin.baxish:Instagram
□ گوجوم تک دونیایا چاتیر:
بو دونیانین چیخاری یوخ
یاشادیقجا شورو چیخیر
پته‌ییندن بال گزیریک
زهرماری چورو چیخیر!
آی، تانرینین چوبان قیزی
اولدوزلاردا قویون- قوزو
دان آچاندا تانری اؤزو
خیمیر- خیمیر اوغرو چیخیر!
باش- گؤت وورور بو تره‌زی
باشا وورور چوت قاپازی
پاییزی یاندیریر یازی
توستوسو فسفرو چیخیر !
درد سویولور دری- دری
فیئسی یاتیر اورکلرین
چارقاتیندان ملکلرین
شیطانلارین تورو چیخیر!
نئجه دئییم بو قالانی؟
تولکودور شیپور چالانی
بوردا بئله ایت یالانی
قالیر- قالیر دوغرو چیخیر!
گؤزلریمیز باخا- باخا
بیزلر آسیلمیشیق میخا
یئر قازیریق قیزیل چیخا
ده‌ده‌میزین گورو چیخیر!
او آتلی بیزلر پیادا
بوشلو دوشدوک بو حایاتا
هئی یانیریق بو دونیادا
اولدوزلاردان قورو چیخیر!
دونیانین ایلانی اوزون
بیر چکن یوخودو تورموزون
من بیلمیرم بو دوزسوزون
هاردان بئله شورو چیخیر!!؟
#آیدین_باخیش
@tanimanii:Telegram
aydin.baxish:Instagram
«زندگانلیق بیر قارانلیق زنداندی*» هن
منیم ایلکین ایناندیغیم ائله بودور
ائله بؤیوک پارتلاییشدان، باشلانیشدان
یاشاییش بیر زندان تمللی قورقودور
من تبریزده او بیریسی بارسلوندا
لاپ مئشه‌ده بیر دووشاندا زنداندایر
اؤلکه‌لری سرحدلری قاچاق سووش
یئر کوره‌سی کهکشاندا زنداندادیر
بیر چرده‌یی قابیغیندا زنداندا بیل
بیر نطفه‌نی یوخ ایله وار آراسیندا
یازدیغیم سؤز دوشوب کیتاب دوستاغینا
بیر پنجره قالیب دووار آراسیندا
«بو زندانین دربچه‌سین آچان یوخ *»دور
چیرمالاندیم گئتدیم اونو اؤزوم آچدیم
یئددی نسیل اجی- مججی آرخا دوردو
آچدیم چیخدیم آخی ایندی هارا قاچیم!؟
#آیدین_باخیش
* شهریارین حیدربابا شعیریندن.
@tanimanii
آنامین دؤره سی یامان بوش قالیب ...
شعر: آیدین باخیش
دکلمه: بابک قوجازاده
@Ark_Radio
خالق یازیچی‌سی «حسین حاوید»ین خاطیرینه:
بو فنجان، بو ماسا، بو کاغیذ- قلم
اونون اللرینین ایزین ساخلاییب
اونون سون گئجه‌سی منیم کؤنلومو
اؤلونجه کدرلی حزین ساخلاییب
او گئجه یئنه‌ده قهوه ایسته‌دی
یازیب-پوزماق ایچین یوخوسو قاچسین
قلم- دفتریندن قاناد آچیردی
چپرلی یئرلرین گؤیونده اوچسون
گوندوزون سویونو گئجه‌یه قاتماق
یازی- پوزو اونون عادتلریدی
یئنه‌ده قافیلدان قاپی دؤیولدو
یئنه ده «استالین» سالداتلاریدی
توتوب باغلادیلار بیلکلرینی
دفتری میز اوسته هله آچیق‌دیر
او اؤز طالعینی بوتونلتمه‌دی
سونونجو یازیسی یاریمچیلیق‍‌دیر
«ماگادان» سویوقدور شاختادیر یقین
اونون طالعینه بو یای- یاز قوربان
دوستاقدا یوخوسوز قالان گؤزونه
گؤزو یولدا قالان« موشگ‌ناز» قوربان
او گئتدی ائو- ائشیک اوشوتمه دوتوب
تکی ماسا اوستده بیر ایستی قالیب
او گئتدی بیر داها قاییتمادی آخ
سونونجو قهوه‌سی میز اوسته قالیب.
موشگ‌ناز: حسین جاویدین حیات یولداشی
ماگادان: سیبریادا سورگون یئری
#آیدین_باخیش
@tanimanii
بیر سئوگی شعری:
«گؤزومدن دوشه بیلمیرسن!»
سئوگی قاتارینا میندین
دوراق یوخ دوشه بیلمیرسن!
چؤل قوشو بیابان داشی
بیر یئرده شیشه بیلمیرسن!
درد تاپیرسان یئنی– یئنی
بوغدورورسان هارایینی
اؤز الینله اوره‌یینی
چکیرسن شیشه بیلمیرسن!
سئوگی شیرین سئوگی حاقدیر
اینه ایله گور قازماقدیر!
آپار بیر عاغلینا باخدیر!
داغ نه؟ تئشه نه؟ بیلمیرسن!
چایلار گؤزونون نمیدیر
بو غم تانرینین غمی‌دیر
نمرودون جهننمیدیر
ابراهیم پیشه بیلمیرسن!
چاپیرسان گاهدان آت کیمین
وفا قیلیرسان ایت کیمین
ایکی مووازی خط کیمین
اونا یئتیشه بیلمیرسن!
« حیات ندیر؟ ندیر اؤلوم؟
فرقی یوخ آغلاییم- گولوم
یئرین کؤنلومده‌دیر گولوم
گؤزومدن دوشه بیلمیرسن!»
بسدیر آیدین بو ایش نه‌دیر؟
یئدیین غم هؤووشنه‌دیر
یا بیلمیرسن‌کی داش ندیر؟
یاداکی شوشه؟ بیلمیرسن!.
#آیدین_باخیش
@tanimanii
- میخواستم به شما بگویم سلام. اما شما سریع رد شدید، میخواستم بگویم حال شما چطور است؟ اما شما به من نگاه نکردید، میخواستم بگویم حال من خوب نیست، اما شما دیگر رفته بودید....، برای همین هیچ چیز به شما نگفتم، فقط پوست موز را زیر پایتان انداختم .... تا زمین بخورید و یک لحظه بایستید، شاید اینبار مرا ببینید.! .... شعر:شل سیلور استاین از کتاب 25 دقیقه مهلت ترجمه چیستا یثربی.
سلام وئرمک ایسته‌ییردیم
قوش کیمین بیردن اوچدونوز
حالینیزی سوروشوردوم
باخمادینیز سووشدونوز
دئیه‌جکدیم حالیم پیسدی
اما داها گئتمیشدینیز
سوزوم آغزیمدا قالمیشدی
گؤز ائویندن ایتمیشدینیز
الیمده‌کی موز قابیغین
سونرا تولازلادیم یئره
دئدیم بلکه ییخیلاندا
گؤزلرینیز منی گؤره
#آیدین_باخیش- 19/07/98
@tanimanii
« هارا قاییتسین بو آنا ؟ »1:
ایزدی قادینلارینین، نه یئر بیلدی نه گؤی دردین
الهی بو قدر دردی!، ندن بیر یئرده گؤندردین؟
دونن تلویزیا گؤستردی، فاجیعهنین بیر قیرتی‌سین
دونن دونیا دینله‌ییردی، بیر آنانین قیشقیرتیسین!:
« درد دنیزده یئل اسینسه، سینار یئلکن دؤنر گمی
الهی سن دئیلمی‌سن؟، کیم دؤندردی دؤنرگه‌می؟»
داعیش‌لرین بیر عسگری، اوزونه دوتموشدو دینی
آپارمیشدی زورلا گلین ، ایکی اوشاقلی قادینی
او گون تانری یوخوسوندان، بیرآزجا گئج قوتولموشدو
آنا بالالی قوش تکین، قوزقونلارا توتولموشدو
ییرمی اوچ آی اسیرچیلیک، قادینی غمده اوزدوردو
او نامرد داعیشین بیری، ایکی اوشاق دوغوزدوردو
آنا آیریلیق آجی‌سین ، شیریندن شیرین اودوردو
یئنه یئنی بالالارین ، نغمه ایله بؤیودوردو
خبر گلدی:« شهید اولدو، عسگر دییشیدی دونیاسین
سنده قیرخ گون دول قالمالی ، ساخلا اونون هله یاسین
سونرا اؤزونو اوخشاتما ، چوخدا باشقا آنالارا
سونرا آپار اوشاقلاری، تاپشیر یئتیم خانالارا
سونرادا الله یولوندا ، گئتمه‌لیسن یئنه اره
جیبهه‌لرده قادین آزدیر، یاردیمجی اول بیر عسگره»
#آیدین_باخیش
@tanimanii
آردی 👇
سایین یولداشیمیز رحمتلیک روشن رنجبرین اؤلمز روحونا اتحاف اولور.
سس: رضا جوادی
شعیر: #آیدین_باخیش
@tanimanii
«بایاتی»
اود دوشسون ساچی یانسین
تؤکولسون قیچی یانسین
یوردوما بوز باخانین
قارنینین ایچی یانسینن
#آیدین_باخیش
@tanimanii
« هی شاخه به شاخه پس بیفتد، بهتر
اصلن وسط قفس بیفتد، بهتر
وقتی که پرنده فکر پروازش نیست
بگذار که از نفس بیفتد، بهتر » « قاسم پهلوان»
سینسین قاناتی قوی یئره دوشسون نئیلیم
دوشسون قفسه زنجیره دوشسون نئیلیم
بیر قوش کی اوچوش فیکرینی باشدان آتسا
هر هاردا دوشور قوی گیره دوشسون نئیلیم.
#آیدین_باخیش
«هؤروکلو قیز »
سن آغلاما یانیقلی- حزین گول هؤروکلو قیز
تر- تر آیاقلانیر ائله‌بیل گول هؤروکلو قیز
هر یول گؤرنده بؤیله سنی کؤنلوم اودلانیر
سانکی سوخور فلک گؤزومه میل هؤروکلو قیز
هئی دیسگینیر مزاردا آنان قبر اوچوقلاییر
دای آغلاما اوون گؤزونو سیل هؤروکلو قیز
قایتار گئری شیکایتینی تانری اینجی‌یه‌ر
سپ بؤیله دونیانین باشینا کول هؤروکلو قیز
سن آغلایاندا ترله‌دی قرآن سطیر- سطیر
تورات اوتاندی دینمه‌دی انجیل هؤروکلو قیر
لای- لای دئینلرین دیلینه اویما اونلارین
یوخدور الینده بیر تیکه نیسگیل هؤروکلو قیز
ایندی بولاقلاریندا اوزو آغ دئییل یازیق
باشدان نسه سو واردی گلیر لیل هؤروکلو قیز
سیندیر عدالت آدلی جامین دیکتاتورلارین
یاغدیرماسینلا خالقا یالان دیل هؤروکلو قیز
صولح آدلا سالدیلار قاپینیزدا ساواش سیزین
صولحو ذلیل نجور بیلیسن بیل هؤروکلو قیز
حتی ائشیتمیشم کی دئییبدیر یازیق نوبئل
منله توتون برابر اونا ایل هؤروکلو قیز
آزادلیغین سیجیللی‌سی ایسلاق اوخونماییر
فرعون چاغی گؤتوردو اونو نیل هؤروکلو قیز
آچ وئر یئله هؤروکلرینین زنجیرین گولوم
زنجیرله‌نن زمان داریخیر تئل هؤروکلو قیز
آنجاق اینانما هئچ کیمه حتی اوچان یئله
چون بیجلرینده اولگوسودور یئل هؤروکلو قیز
بئل باغلاساندا باغلا بیر آیدین باخیش ائله
یانسا یانار سنین حالینا ائل هؤروکلو قیز
#آیدین_باخیش
@tanimanii
یولوم دوشدو باداملیغا
ایتیلدیردیم هئی دیشلری
سئوینه‌رک دؤشوروردوم
گؤیدن یئره دوشموشلری
جیبیم دولدو یئریکله‌دیم
من اولدوم لاپ بادام آجی
سیندیردیم اما بیر به بیر
یا پوک چیخدی یادا آجی
هانی بورانین باغوانی
دئمه اوزو آغ دئیلمیش
بیزیم شهره بنزه‌ییر
بورا دئمه باغ دئییلمیش
امه‌ییم زحمتیم هدر
تولازلادیم باداملاری
من کیملره یئریکله‌دیم
تانیمادیم آداملاری!!
#آیدین_باخیش