Telegram-канал tayfeyesheykhlu - کانال طایفه ی بزرگ شیخلو: Unsorted

کانال طایفه ی بزرگ شیخلو

08 Jan 2021 12:36

ائششک‌له یولداشلێق

بیر کندده بیر کیشی وارمێش، بونون بیر دوه و بیر ائششگی وارمێش.
بیر ایل یایێین ایستی چاغێندا او بونلاری چوخ ایشلدیب یوْرورموش. بیر گۆن بونلار فۆرصت ائلییب قاچێب کنددن ائششیگده کی اوْتلاقلارا دۆشۆرلر. دورلو - دورلو گؤم گؤی اوْتلار، سرین سولار ایچینده یئییب ایچیب خوْش کئچیریرلر.

آجێندان یوْرغونلوقوندان سۆمۆگۆ بئللنمیش ائششگین بالا بالا دریسینین آلتێنا ات سو گلیر، ائله‌جه دوه‌ده. او سارسێز سروان‌سێز* اؤز خوْشلادیغی کیمی گۆن کئچیریر.

بیر گۆن ائششک یئییب ایچیب شنلنیر دوه‌یه دئییر دوه قارداش منیم اوخوماقیم گلیر قولاق‌آس گؤر نئجه اوْخورام. دوه ایسه او هَندَوَرده* آدام قوْخوسو دویوب ائششگه دئییر یوْخ، ائشک قارداش ایندی اوْخوماق چاغی دئییل، اولابیلر کی یییه‌میز* سسینی ائشیدیب گلیب بیزی تاپیب یئنیدن او سارسێدێجی* گۆنلریمیزه قایتارا.

ائشک بیر آز دایانیر آنجاق یئنیدن دئییر: یوْخ دوه قارداش من اوْخوماقێمی ساخلایانمیرام! دوه نه قدر یالوارسادا سؤزلری ائششگین قولاغینا کئچمیر کی کئچمیر. او ْ آغزێن گؤیه توتوب اوجادان آنقێرێر. بونلارین یییه‌لری نئچه گۆن بونلاری آختارێب یوْرولموشدو ائوه قایتماق ایستیردی کی ائشگین سسین ائشیتدی. یاخێندا کی چوْبانلاردان کؤمکلیک آلیب بونلاری توتوب نوْخدالایێب اوسارلایێر*. او کی اولده اۆرگی بوْشالینجا بونلاری تاپدالادی سوْنرا ایسه ائششگی مینیب دالێنجا دوه‌نین اوْسارێندان* توتوب یوْلا دۆشدۆ. بو زامان گؤیده بولوت واریدی، بولوتلار آرتێلێب بیرلشیب گؤی گورولدادی، اێلدێرێم چاخدی، یاغیش سئل کیمی گؤیدن یئره تؤکۆلدۆ.

کندلی کیشی، بیر سیلدیریم* داشێن آلتێندا یاغێش آچێنجا آرخالاندی، سوْنرا یئنه یوْلا دۆزۆلۆب کنده سارێ قایێتدێ. اوْنلار آخشاما یاخێن کندین یانێندا کی چایا چاتدێلار. آنجاق چایدان ائله زوْر سئل گلیردی کی کیشی باخدی گؤردۆ دوه‌دن باشقا هئچ نه اوْ سئلدن کئچه بیلمز. اوْنون اۆچۆن دوه‌نی خێخلایێب اوْتوردوردو. ائششگی دوه‌نین یانێ اۆستۆنه چاتێب اؤزۆ ایسه بوخومونا مینیب دوه اوسارێن الینه آلدێ. دوه آیاغا قالخێب چایێن ایچینه گیردی. آنجاق سئلین آراسێندا دایانێب ائشگه دئدی: ائششک قارداش منیم بتر اوْیناماغێم توتور. ائششک باشلادێ یالوارماقا: یوْلداش منه باخما، منه ائسگی چاغدان بری ائششک دئییب‌لر، آدێم اۆستۆمده‌دیر. آنجاق سن ایسه نجیب حمیل یاخشێ حئیوان‌سان. دوه دئدی: یوْخ ائششک قارداش، من اوْیناماغێمی ساخلایانمێرام گرک اوْینایام.

دوه بونو دئییب یانێن بیر اویانا بوردو بیر بویانا. ائششگی اۆستۆندن سالدێ. ائشک سئله دۆشۆب سئلیله گئتدی. دوه ایسه دئدی بیرده من اوْللام ائششک‌له دوْستلوق ائتمرم.

#قیسا_حیکایه‌لر

سروان‌سێز: صاحیب‌سیز (بی‌صاحب بدون‌ ساربان)
هَندَوَر: یان-یۆره (اطراف، دوره)
یی‌یه: صاحب
سارسێدێجی: (عذاب‌دهنده، تکان‌دهنده)
اوسارلایێر: نوخدالاماق (بستن حیوانات، افسار زدن)
اوسار: نوخدا (افسار)
سیلدیریم، قایا (صخره)

@TAYFEYESHEYKHLU