15464
هنا كل جديد من أخبار التكنولوجيا في كل المجالات 📱💻🖨️📞🖱️💾📷🤖
طب عشان أنا جبت أخري🤬
ازاي تخلص وميوصلكش أي نوتفكيشنز من أي حد يعمل @highlight أو @followers على فيسبوك؟ 😎
صباحو
في سنة 2022
الدنيا كانت برد وعاصفة رهيبة محدش عارف يستحملها، وشركة ساوثويست إيرلاينز حاولت تعيد توجيه الرحلات بس السيستم بتاعها مكانش مستحمل. ليه؟ عشان شغالين بويندوز 3.1 اللي نازل سنة 1992!
السيستم ده كان أقصى حاجة يقدر يعملها 300 تعديل في اليوم، بس في 2022 كانوا محتاجين أكتر من 20 ألف تعديل عشان ينقذوا الموقف!!
المشكلة الأساسية إن الشركة أصلاً كانت بتستخدم ويندوز 3.1. تخيلوا!
بس الجمعة اللي فاتت، 19 يوليو، حصلت حاجة العكس تماماً. تحديث من شركة CrowdStrike بوظ 8.5 مليون جهاز ويندوز حول العالم وسبب شلل في حركة الطيران في كل حتة في أمريكا، ما عدا ساوثويست. ليه؟ عشان هما شغالين بويندوز 3.1، اللي مبيوصلوش أي تحديثات أصلاً 😅
حاجة تجنن بصراحة!
من 23 أغسطس الجاي..
لما تدوس على أي لينك مختصر بخدمة Goo.gl هيوديك على صفحة تقولك ان اللينك ده قريب مش هيشتغل تاني، قبل ما يوديك على صفحة اللينك الاصلي..
ومن 25 أغسطس 2025،
كل لينكات Goo.gl هتتوقف للأبد!
❗ جوجل أعلنت وقف خدمة Goo.gl في 2018 ومنعت وقتها عمل أي لينكات جديدة بالخدمة!
فوكك من الهاك اللي هناك ..
واتساب بيجرب يخلي الايموجيز تتحرك🤣
قولت اليوم خلص،
لقيت OpenAI بتنزل نموذج GPT-4o mini جديد:
نازل للمستخدمين المجانيين ومشتركين ChatGPT Plus وكمان ChatGPT Team من انهاردة
أرخص 60% من GPT-3.5 Turbo "للمطورين"
قدراته مميزة في التعامل مع المهام المعتمدة على اسئلة واجابات سريعة ومركزة جدا، فهايل اوي لو مطور هيستخدمه عشان يساعد بيه في إنشاء روبوت دردشة يخدم بيه العملا بتوعه ويرد على أسئلتهم بسرعة وبكفاءة
اول ما ينزل هيبقى شغال تكست وvision "يفهم الصور وتفتحله الكاميرا يفهم العالم قدامها"، وقدام هيفهم كمان الفيديوهات والصوت، ويقدر يصمم صور كمان
برضو النموذج جاي بيستخدم أسلوب جديد في التعامل مع الاوامر اسمه Instructions Hierarchy ، واللي بتخلي النموذج يرتب الاوامر اللي بتديهاله في صورة أولويات، فيشوف هينفذ مين قبل مين، الشركة بتقول الطريقة دي هتبقى في المقام الاول بتحارب هجمات اسمها Prompt Injections أو Jailbreaking ، ودول طريقتين بيستخدمهم البعض عشان يخلي النموذج يطلع ليانات او يجاوب اجابات او يطلع اسرار عن طريقة تشغيله، هو اصلا مدرب انه ميقولهاش!
الشركة بتقول انها قدرت تحقق طفرة ف تطوير نماءجها من حيث قدراتها مقارنة بتكلفة الاستخدام، فتكلفة استخدام GPT-4o mini بقت أقل في التكلفة 99% مقارنة بتكلفة استخدام نموذج كان اسمه Davinci-002 في 2022!!
عملًا بمبدأ "بيدي لا بيد عمرو"..
مؤسس ومدير شاومي - Lei Jun -
نشر اليومين اللي فاتوا كل حاجة تتخيلها أو لا تتخيلها عن
موبايل الشركة الأول للطي الرأسي Mix Flip.. وده قبل الإطلاق الرسمي بكرة الجمعة 19 يوليو (وهيبقى نازل جمبه شاومي Mix Fold 4)
واللي بعون الله نازل ينافس
سامسونج جلاكسي زد فليب 6
موتورولا رازر 2024
موتورولا رازر+ 2024
هواوي بوكيت 2
أونور ماجيك V فليب
أعتقد لو قدر ينزل بسعر ينافس (أقل من 1000 دولار) هيبقى قادر يسحب في السوق جامد خصوصا في الصين.
خلي بالك ألا يبألشوك🫣
بنك CIB بيقولك:
"حبيبنا العميل، عايزين نقولك إننا هنعمل تطوير للنظام بتاعنا يوم الجمعة 19 يوليو 2024 من الساعة 2 الفجر لحد الساعة 2 الضهر بتوقيت القاهرة، وده هيخلي بعض الخدمات مش متاحة مؤقتاً.
الخدمات اللي هتكون مش متاحة خلال الفترة دي هي:
- خدمات الإنترنت والموبايل البنكي
- إدارة النقد في CIB Business Online
- خدمات IPN
- الخدمات المالية من خلال الخدمة المصرفية عبر الهاتف، بما في ذلك الاستعلام عن الرصيد، التحويلات وتسوية بطاقات الائتمان
- بعض خدمات الـATM زي كشف الحسابات الصغيرة، والإيداعات بدون بطاقة
- خدمة تحويل العملات على الموقع الرسمي للبنك
ناخد بالنا إن خدمات البطاقات (الخصم، الائتمان والمدفوعة مقدماً) هتشتغل عادي خلال فترة التحديث.
ياريت تعملوا معاملاتكم المالية قبل ما التحديث يبدأ. إحنا آسفين على أي إزعاج".
ليلتكم جميلة ❤️
لا لا ده مش أوردر أكل..
دول 4 جوابات قبول بعتاهم جامعة جنوب الصين للتكنولوجيا لأربع طلاب .. بالدرون! :O
المشوار من الجامعة لمكان الهبوط كان تقريبا 7 كيلومتر، خدوا من الدرون 40 دقيقة في المشوار..
لما وصلت المكان المحدد للهبوط - ومساحته 5 متر مربع -
كان فيه موظف من البريد الصيني مستنيها عشان ياخد الجوابات ويسلمها باليد للطلبة!
الدرون من تصنيع شركة EHang وبتقدر تقطع مسافة 20 كيلومتر على شحنة واحدة.
مساءو
بمناسبة محاولة اغتيال ترامب، وان التحقيقات اثبتت ان المنفذ اشترى ٥٠ طلقة قبل الهجوم مباشرة..
الشهر اللي فات امريكا بدأت تنزل في السوبرماركتات مكنة تدخلها فلوس تشتري منها طلقات!! 🤯
لا بجد والله، زي تلاجات البيبسي كدا اللي تحطلها فلوش تنزلك كنزاية:
1. تختار نوع الطلقات
2. توثق هويتك من بصمة وجهك عشان المكنة تتأكد انك ف السن القانوني
3. يلا بينا ادفع
4. غربل العالم بقى براحتك😎
تسريب جديد بيأكد إن OpenAI شغالة على سيستم .. فراولة Strawberry".. ياعم لأ مش اللي دماغك فيها 🤦
السيستم ده بيستخدم أسلوب جديد تماما لتدريب النماذج الذكية بتخلي المطورين يقدروا يعلوا مستوى "الإدراك" عند النماذج.. لدرجة تخليهم قريبين من .. إدراك البشر للعالم!! 🤯
طريقة التدريب اسمها Post-Training او يعني معالجة النماذج ما بعد التدريب!!
الطريقة دي لتحسين أدائها بعد تدريبها على بيانات ضخمة، وده يتضمن "التدريب الدقيق Fine-tuning"، اللي بيخلي النماذج أكتر تخصص في إجاباتها، زي إن مجموعة من المراجعين البشر يقدموا ردود أفعال للنموذج بخصوص إجاباته، ويقدموا أمثلة للإجابات الجيدة والسيئة.. وده مفيد مثلا في جعل نماذج الذكاء الاصطناعي عشان تخليها تقدر تنجز مهمة معينة، زي مثلا تخلي نموذج يجاوب عن مواضيع ليها علاقة بمجال معين متخصص زي الطب والمحاماة وغيرهم!!
"الستروبيري" بيستهدف تحسين التخطيط بشكل متقدم، يعني يقدر يخطط لتحقيق هدف معين عن طريق خطوات محددة، وده أكتر من القدرات الحالية للنماذج اللي بس بتجاوب على الأسئلة..
فمثلا افترض انك عايز تحجز تذاكر طيران وتخطط اجازة كاملة.. تقدر تطلب ده من نموذج متظبط بأسلوب الستروبيري ده، فيدخل ع الإنترنت ويفتح مواقع شركات الطيران ويراجع العروض ويختار احسن سعر، ويشوف الفنادق ويختار أنسب حاجة ليك ولميزانيتك ويخلص كل الحجوزات وكمان يحضرلك ويحجزلك اماكن تزورها تنبسط فيها.. كل ده بيعمله عشان يحقق الهدف اللي انت طلبته ف الاول خالص!
بالمناسبة ،
التحديث ده هينزل السنة دي، وده مش كلامي، ده تصريح التسريب كشف ان الشركة نفسه بتأكده لكل شركاءها والمطورين.. والموظفين كمان!
📍المصدر: Reuters
أونور الصينية نزلت موبايلها الجديد ماجيك V3 بينافس الجلاكسي زد فولد 6.. وبيضربه في منطقة.. حساسة! 😵💫
مبدئيا الماجيك V3 هو أنحف موبايل فولد في العالم.. 9.2 مم
في حين موبايل فولد 6 .. 12.1 مم
الماجيك V3:
شاشته الداخلية 7.92 بوصة OLED بتحديث 120 هيرتز
الخارجية 6.4 بوصة OLED بتحديث 120 هيرتز
الكاميرا الخلفية:
رئيسية 50 ميجابكسل (زي سامسونج)
التانية 40 ميجابكسل عدسة واسعة جدا (في سامسونج 12 ميجابكسل)
الأخيرة 50 ميجابكسل عدسة للتكبير 3.5 مستوى تكبير بصري (في سامسونج 5 مستويات بس دقة 10 ميجابكسل بس)
نفس البروسيسور كوالكوم سناب دراجون 8 جين 3
رامات بتوصل لحد 16 جيجا (أكتر من 12 جيجا بتوع سامسونج)
ذاكرة داخلية بتوصل لحد 1 تيرا (زي سام)
بطارية 5150 مللي أمبير (اكتر من سام 4400 مللي أمبير)
سعر يبدأ من 8999 يوان (حوالي 1240 دولار.. طبعا عظمة قصاد الـ 1899 دولار بتوع الفولد 6)
👀 غاوي تعرف أكتر عن الفولد 6؟ (تعالى هنا https://bit.ly/4bH3CPs )
مساءو
طب نيجي لميزة Double Pinch واللي بتخلي المستخدم مع جلاكسي ووتش 7 وجلاكسي ووتش ألترا يقدر يتحكم سواء في شاشة الساعة او كمان يصور مصلا صورة عن بعد بموبايله!
🔴طبعا كلو هيقولك دي متاخدة من أبل ووتش 9 وميزة Double Tap.. بس احب اقولك لأ😅
سامسونج منزلة أبديت ضخم من سنة في يونيو 2023 (قبل أبل )بمجموعة مزايا اسمها Universal Gestuers لساعاتها الذكية بتخليك تتحكم بالكامل في الساعة بحركات من ايدك وصوابعك من غير ما تلمس الشاشة خالص!
طب ليه سمعنا عن بتاعت ابل وسامسونج لأ؟
عشان أبل بتسوق صح وحلو🤷🔴
بطارية الجلاكسي ووتش ألترا بتديك 100 ساعة ف وضع توفير الطاقة، اما الابل ووتش ألترا 2 بتقدم يادوب 72 ساعة بس!
🎧 نيجي بقى للسماعة جلاكسي بادز 3
هنا سامسونج قلدت التصميم بتاع أبل آيربودز بس ضافت لمسة عجبتني بصراحة وهي انها خلت الهيكل الخارجي الطويل حاد الزاوية مش أسطواني ملفوف زي تصميم ابل..
كمان جسم السماعة عليه لمبة LED عشان تعرفك مستوى الشحن للبطارية، ده غير ان السماعة نازل منها اصدارين، واحد عادي وده القطعة بلاستيك مبتعملش عزل كامل فتحربة الصوت هنا Open Type ودي مناسبة لمعظم الناس اللي بتستخدمها ف المكالمات والمزيكا واستخدام طول اليوم بشكل مريح، فيه بقى الجلاكسي بادز 3 برو ودي Canal Type لان تصميم الجزء البلاستيك بيبقى ساقط اكتر جوا الودن بحيث يقدم تجربة صوتية أفضل بكتير!
الاتنين هيبقوا جايين بمزايا:
🔥المترجم الفوري Interperter
بحيث تترجم الصوت المسموع مباشرة للغتك ف ودانك وده طبعا استخدام عبقري للAI
🔥 كمان تقدر بأمر بسيط Voice Command تتحكم ف اللي ف ودانك، زي انك تعلي الصوت توطي الصوت تغير المزيكا توقفها تشغلها
🔥 برضو هايل ان السماعة بتظبوط دقة ووضح الصوت اللي بتسمعه حسب اللي بتسمعه والاصوات المحيطة بيك والدوشة حواليك ، وده من خلال مجموعة ميكروفونات داخلية وخارجية وده من خلال مزايا Adaptive ANC وAdaptive EQ..
كمان مستوى الصوت بيعلى ويوطى اوتوماتيك حسب اللي بيحصل حواليك، فلو فيه مثلا صوت سرينة بوليس هيوطى عشان تنتبه، كمان لو حد بيكلمك الصوت هيوطى عشان تاخد بالك، وده من خلال مزايا Adaptive Noise Control وSiren Detect وVoice Detect!
لطيف برضو ان اصدار البرو من السماعة جاي بمكونات أعلى من العادي:
- مكبرات صوت ثنائية الاتجاه: يعني السماعات بتستخدم نوعين من مكبرات الصوت لتحسين جودة الصوت، وده بيخلي الصوت أوضح
-جهاز Tweeter Planar: ده نوع معين من مكبرات الصوت بيختص بتقديم الصوت عالي التردد بدقة وجودة عالية.
- تقنية الصوت عالي الجودة جدًا: تقنية حديثة بتمكنك من سماع الصوت بأعلى دقة ممكنة، بحيث تقدر تستمع لكل تفاصيل الموسيقى أو الصوت كما تم تسجيلها.
- معدل أخذ العينات المضاعف مع ترميز SSC: دي تقنية بتضاعف معدل العينات الصوتية اللي بتتسجل في الثانية الواحدة، وده بيخلي الصوت يكون أدق وأوضح، وترميز SSC هو تقنية لضغط الصوت بدون فقدان جودته، عشان تقدر تستمتع بجودة صوت عالية جدًا.
💍 أخيرا بقى نيجي لخاتم الجلاكسي رينج!
خطوة جريئة بصراحة من سامسونج انها تدخل سوق جديد تماما زي الخواتم الذكية ف وقت برضو لسا الذكاء الاصطناعي فيه ف الطالع، ده غير انها كمان بتدخل "قصدي بترجع بعد 5 سنين غيبة 😉" سوق النضارات الذكية اخر السنة دي، فالشغل ف سوقين جداد مرة واحدة قرار صعب، الا اذا لعبتها صح!
الختم٥فيهزمنه 3 ألوان: دهبي اسود فضي
وزنه 2.3 جرام لحد 3 جرام
وده حسب مقاسه المتوفر منه 9 اصدارات ( من مقاس 5 لحد 13)
الخاتم مصنوع من تيتانيوم من الدرجة الخامسة عشان يبقى قوي ويتحمل
بيقاوم المية لحد عمق 100 متر والاتربة بتقييم IP68
بيقدر يقيس حاجات كتيرة اوي زي:
معدا وانضباط التنفس
ضغط الدم
نبض القلب
الحركة خلال النوم
الدورة الشهرية للسيدات ودرجة حرارة الجسم وقتها
الشخير خلال النوم
احلى حاجة فيه ميزة اسمها Energy Score
وده بيقيس درجة نشاط الجسم على حسب 3 حاجات: جودة النوم ودرجة النشاط حلال اليوم ومعدل نبض القلب يوميا..
كمان الخاتم بيلقط نوع النشاط اللي بتعمله تلقائيا وبيتابع تطورك فيه من غير ما تحتاج تختار وتحدد النشاط جوا ابلكيشن الخاتم ع الموبايل..
كمان برضو لو فيه فترة المستخدم بيفضل وقت طويل خامل وقاعد Inactive Alert، الخاتم بيبعت نوتفكيشن تشجيعية للحركة..
كمان فيه ميزة انك تتحكم ف موبايلك أو أجهزتك، اللي كلها لازم اكيد تكون سامسونج جلاكسي، من خلال حركات ايدك Gestuers زي مثلا حركات الابهام والسبابة اللي هي Double Pinch..
سامسونج سهلت برضو انك تلاقي الخاتم لو ضاع، بميزة Find My Ring من قلب خدمة Samsung Find..
الخاتم بطاريته سعته مختلفة حسب المقاس، مقاس 5 بطاريته 18 مللي أمبير ومقاس 13 بطاريته 23.5 مللي أمبير، بتعيش لحد 7 أيام استخدام.. بيجي الخاتم مع علبة شحن فيها بطارية 361 مللي أمبير بتشحن الخاتم 40% ف نص ساعة!
للسنة التانية على التوالي،
ولتاني مرة ف نفس السنة على التوالي برضو 😅
سامسونج مش محتاجة تعمل ايفنت عشان تطلق أجهزتها، لإن التشريبات مخلتش.. ومنها طالع من سامسونج نفسها🤣
سامسونج جلاكسي فولد 6
🔴 هييجي بشاشة خارجية 6.3 بوصة وداخلية 7.6 بوصة.
🔴 المعالج كوالكوم "سناب دراجون 8 جين 3".
🔴 البطارية نفس سعة الجيل السابق 4400 مللي أمبير، بس بأداء أحسن.
🔴 الكاميرا الرئيسية 50 ميجابكسل، وكاميرا بزاوية واسعة 12 ميجابكسل، وكاميرا للتكبير 10 ميجابكسل.
🔴 الكاميرا السيلفي بدقة 10 ميجابكسل، وكاميرا أسفل زجاج الشاشة 4 ميجابكسل.
سامسونج جلاكسي فليب 6
🔴 هييجي بشاشة خارجية 3.4 بوصة وداخلية 6.7 بوصة.
🔴 نفس معالج فولد 6 "سناب دراجون 8 جين 3".
🔴 البطارية سعتها 4000 مللي أمبير.
🔴 الكاميرا الرئيسية بدقة 50 ميجابكسل، وكاميرا واسعة 12 ميجابكسل، وكاميرا للتكبير 10 ميجابكسل.
الموبايلين هينزلوا طبعا بمزايا Galaxy AI الذكية زي:
🔴 ميزة الترجمة الفورية Interpreter.
🔴 ميزة البحث برسم دائرة Circle to Search.
🔴 ميزة Auto Zoom على فليب 6 وAI Zoom على فولد 6.
ساعات سامسونج جلاكسي ووتش 7
🔴 هتنزل بقياسين، 40 بوصة و44 بوصة.
🔴 المعالج Exynos W1000.
🔴 الذاكرة 2 جيجابايت و32 جيجابايت.
سامسونج جلاكسي ووتش ألترا
🔴 هيبقى فيه منافسة مع أبل ووتش ألترا.
🔴 التصميم مربع جواه دايرة وزراير شبه بتاعت أبل
🔴 البطارية 590 مللي أمبير.
سماعة جلاكسي بادز 3
🔴 هتتغير عن تصميم الفاصولياء Beans Design وهتبقى شبه الآيربودز
🔴 يُقال ان ميزة ANC وجودة الصوت هتبقى أحسن من أبل.
🔴 التحكم بالسحب Swipe والضغط Squeeze على جسم السماعة
🔴 على هيكل السماعة فيها مؤشر LED لعمر البطارية
خاتم سامسونج جلاكسي رينج
🔴 هيقيس نبض القلب، وضغط الدم، ومستوى الشخير.
🔴 هيقيس حرارة الجلد وتوقيتات الدورة الشهرية.
🔴 البطارية هتختلف حسب الحجم، والسعر المتوقع 449 يورو.
⌚يوم الأربع الجاي 10 يوليو
كلنا لازم نعمل اننا متفاجئين لما سامسونج تعلن المنتجات الجديدة *كوميك كريم عبد العزيز بيغمز* ألا تزعل🤷🤦😅
9,900,000,000 باسورد
معروضة للبيع أونلاين بقالها يومين
عشان تبقى أضخم مكتبة باسوردات مسروقة تتباع أونلاين ف التاريخ!
يا أهلا بشلالات الاختراقات على كل المنصات
اللي هنشوفها الأيام الجاية! 🫣
عايز تأمن نفسك؟ 🤔
🔥 غير باسورداتك حالا
🔥 أمن اكونتات بأبلكيشن مصادقة ثنائية أوفلاين زي Google Authenticator او Microsoft Authenticator .. "بلاش Authy عشان اتهاك وهتكلم عنه كمان شوية💩"
🚫 انسى خالص طريقة التأمين بتاعت يوصلك كود على رقم تليفونك ده ياريت 🙏
مساكم فُل 😄
كريزي تاكسي جاية بإصدار جديد قريب:
1. عالم مفتوح Open World زي بابحي كدا
2. هيبقى فيها امكاني لاعبين كتير Multiplayer
3. أوضاع لعب "زي ان حد يبقى بوليس وبيجري ورا زميله اللي سايق تاكسي"
4. المفاجأة المبهرة ان الخرايط وبيئة اللعبة هتبقى واقعية جدا لانها مطورة بالاسطورة Unreal Engine 🤯🔥🚀
مساءو
امبارح ميتا غرقت الدنيا AI 🔥
🤖 نزلت نماذج جديدة Llama 3.1 طبعا مفتوحة المصدر
بتلات أحجام
8 مليار متغير
70 مليار متغير
405 مليار متغير " أكبر نموذج مفتوح المصدر ف السوق بإمكانيات تضاهي اتقل نموذج مثفول المصدر.. على حد قول مارك زوكربيرج"
تكلفة تشغيله أوفر 60% مقارنة بنموذج أوبن إيه آي الأحدث GPT-4o mini
🤖 مزايا كتيرة بقى بالكوم لـMeta AI:
🔷 مساعد ميتا الذكية بقى متوفر في 22 دولة جديدة مفيش منهم ولا دولة عربية ومتوفرة ب8 لغات.. العربي مش منهم
🔷 دلوقتي فيه ميزة اسمها Imagine Me
دي بتخليك تستخدم Meta AI في انك تصمم صورة لنفسك وانت بتعمل اي حاجة "طالما مش عيب ولا أبيحة ولا عنيفة" فتقول الذكاء الاصطناعي "Imagine me ..." يعني تخيلني وانا بعمل كذا او راكب كذا او باكل كذا او ف ستايل لبس فلاني او ف المكان الفلاني.. والتصميم بيكون كرتوني طبعا
الميزة دي مدعومة بنموذج ذكي اسمه Imagine Yourself بيطلب منك ف اول استخدام انك تدخل 3 صور سيلفي لنفسك بالكاميرا من قلب الميزة، بالوش و من الجنبين!
🔷 فيه ميزة كمان بتخليك تقدر تعدل على الصور اللي بتصممها بالMeta AI سواء تحءف او تضيف او تستبدل عنصر من العناصر في الصورة..
ودي بنموذج ذكي اسمه Emu Edit نزل من سنة ف نوفمبر
🔷 ميتا هتبدأ الأسبوع ده تخلي Meta AI يخليك تصمم صور او فيديوهات وانت بتعمل بوستات ستوريز كومنتات رسايل على فيسبوك وانستجرام وواتساب وماسنجر
🔷 كمان النموذج العملاق Llama 3.1 405B هيخلي Meta AI على موقعه للويب meta.ai او ف واتساب يقدروا يساعدوا كتابة تطوير مراجعة الأكواد البرمجية، وكمان هيبقى عبقري ف حل المسائل والمعادلات الحسابية
🔷 الحركة العبقرية بقى الاخيرة هي ان ميتا نزلت Meta AI كمان على نضارات ميتا كويست VR وده بعد شهرين من نزوله على نضارات ميتا رايبان للواقع المعزز!!
عبقرية ليه، عشان المستخدم دلوقتي بعد ما كان بيستخدم سيستم للاوامر الصوتية المحددة اسمه Voice Commands هيبقى بيستخدم Meta AI الذكي مباشرة، فمش هيحتاج يقول امر بطريقة معينة عشان ينفذ حاجة، لا يتكلم زي ما هو متعود..
دي بالانجليزية فقط وفي كندا والولايات المتحدة بس لحد دلوقتي!
بس خليني اقولك ان دي بنسبالي حركة "كش ملك♟️" قصاد عتاولة زي ابل ونضارتها ابل فيجن برو اللس ابل قالت انه هيوصلها نسخة من سيري مطورة بالApple Intelligence، وكمان لجوجل لان مفروض فيه تعاون بينها وبين سامسونج وكوالكوم ف نضارة XR هتنزل اخر السنة دي، وكمان تقرير طلع مؤخرا بيأكد إن جوجل نفسها تنزل جيميناي على نضارات راي بان الذكية بتاعت ميتا، من خلال مفاوضات بين جوجل وLuxottica الإيطالية صاحبة أعتى براندات ف العالم.. بس بالحركة دي مارك قطع على جوجل، وكمان قطع مسبقا بانه هيشتري من خلال مستا حصة 5% من أسهم لكسوتيكا نفسها! 😅
مساءو
ازاي ميزة NATRA Alert بتظهر اسم الشركة اللي بتكلمك مكالمة اعلانية واللي جاية حديد من الجهاز القومي لتنظيم الاتصالات - مصر ؟
عشان نحط الأمور في نصابها الصحيح من الأول، الميزة دي موجودة في دول العالم من كتير، ودي حاجة احترمتها جدا في بيان القومي لتنظيم الاتصالات انه قال انه درس أصلا التجارب برا عاملة ازاي مع المسألة دي..
طيب نيجي بقى للتكنولوجيا بتاعت الميزة دي شغالة ازاي:
1. الشركات اللي عايز تعمل مكالمات ترويجية للعملا لازم تروح لشركات المحمول اللي بتشتغل في السوق المصري.
2. عشان ده يحصل، الشركات دي لازم تقدّم كل البيانات المطلوبة لتسجيل أرقامهم المستخدمة في المكالمات الترويجية بأسمائهم عند شركات المحمول اللي هم تبعها
3. بعد ما تتأكد شركات المحمول من صحة البيانات، تفعّل خدمة المكالمات الترويجية للشركات.
اسم الشركة اللي بيطلع ده اسمه CNAM أو اختصار لـ Caller NAMe (مفروض بيتكون من حروف بتوصل لحد 15 حرف)
وده مفروض بيتخزن في قاعدة بيانات إما موحدة عند جهاز بينظم (زي القومي لتنظيم الاتصالات) أو موزعة على شركات تقديم خدمات المحمول (يعني فودافون عندها قاعدة بيانات واتصالات عندها واحدة منفصلة وهكذا)
لو الشركة قررت تغير الاسم لازم تقدم طلب
لو الشركة قررت تنقل رقمها لشبكة تانية.. لازم تقدم طلب للشبكة الجديدة عشان تسجل CNAM جديد عندها (طبعا لو قاعدة داتا موحدة مش محتاجة تغير حاجة)
طب في حالة ان شركة حبت تتذاكى وتعمل اتصالات اعلانية من رقم موبايل مش متسجل بشكل رسمي عند شركات الموبايل وجهاز تنظيم الاتصالات، ساعتها بقى هيحصل غرامات وكدا، بس لازم انت تبلغ عن طريق حاجة من دول:
1. المستخدمين يقدروا يتصلوا بمراكز خدمة العملاء لشركات المحمول للإبلاغ عن المكالمات المزعجة.
2. فيه كمان مراكز اتصال تابعة للجهاز القومي لتنظيم الاتصالات، يقدر المستخدمين يتصلوا بيها للإبلاغ.
3. الخط الساخن للجهاز 155 متاح للإبلاغ عن المكالمات المزعجة.
4. المستخدمين يقدروا يستخدموا التطبيق الإلكتروني للجهاز My NTRA للإبلاغ عن المكالمات المزعجة.
5. فيه كمان موقع إلكتروني مخصص من الجهاز القومي لتنظيم الاتصالات، يقدر المستخدمين يقدموا من خلاله الشكاوى والبلاغات
صباحو
من مدة (سنتين تلاتة) كدا
كانت خرايط جوجل ف امريكا بدأت تظهر أماكن الرادارات ع الطرق..
صديق عزيز انهاردة بعتلي دي من على الدائري! 🤣
قلبان حاصل من صباحية ربنا ف كل حتة ف العالم
مطارات
سلاسل سوبرماركت
مولات
قنوات تلفزيون
سكك حديد
عتاولة بيزنس
كلهم عطلانين بسبب أبديت مش تمام!!
حوت السيكيوريتي CrowdStrike بعت أبديت برمجي فيه مشكلة تقنية لمنصته Falcon واللي بيستخدمها تقريبا تقريبا أتقل شركات في العالم، والابديت ده كان سبب انه كمبيوترات معظم العالم تفتح انهاردة على شاشة الموت الزرقا Blue Screen Of Death او مجازا BSOD..
المتضررين كتير جدا
سكاي نيوز بريطانيا
بورصو لندن
عملاق الاتصالات الاسترالي Telstar
أكبر خطوط طيران أوروبية Ryanair
كل رحلات الطيران ف أمريكا اتوقفت بقرار من وكالة الملاحة الجوية الفيدرالية FAA
وغيرهم وغيرهم كتير
كراود سترايك قالت انها حدد المشكلة وحاليا بتتراجع عن الابديت وهتسحبه من كل كمبيوترات العالم وتنزل حل برمجي فوري عشان كل حاجة ترجع تمام!
صباحكم .. فُل؟ 🫣
مزايا:
شاشة خارجية ٤.٠١ بوصة "اكبر ب .٠١ بوصة من السوق".. تصميمها لطيف كيبورد كامل كل الابلكيشنز بتشتغل بواجهة كاملة وكمان فيها سماعة مكالمات فتقدر تتكلم بدون ما تفتح الشاشة الداخلية
الشاشة الداخلية ٦.٩ بوصة اموليد
كاميرا اساسية عدستين
٥٠ ميجابكسل.. زووم ٦٠ ميجابكسل
بروسيسور كوالكوم سناب دراجون 8 جين 3
بطارية 4780 مللي امبير "اعلى من كل السوق"
بالمناسبة، ده 👆
كتبه ChatGPT بالكامل، متدخلتش
الا ف اخر كلمتين.. لا حرفيا😅
هواوي جاية لسوق الكمبيوترات مع HarmonyOS NEXT عشان تنافس ويندوز.. وماك! 😅
مساءو
شركة Intuit للبرمجيات المالية سرحت 1800 موظف عشان عايزة تستثمر أكتر في الـAI 🤖
صباحو
انهاردة وزير الاتصالات د. عمرو طلعت قال " شهرين وهنشغل ال eSIM خلاص في مصر" 🔥
🔴وكالعادة لما مصر بتطبق تقنية جديدة بنحس انها أول مرة تنزل ف العالم 😅
تقنية الـeSIM
دي تكنولوجيا في الموبايلات بتسهل عليك انك تشغل لحد 10 خطوط موبايل من غير ما تركب ولا شريحة في التليفون!!
التكنولوجيا دي نزلتها أبل مع ايفون XS ومن ساعتها موجودة ف كل الايفونات اللي نزلت بعدها وكمان نزلت ف موبايلات اندرويد كتيرة..
الفكرة كلها قايمة على ان الـeSIM "أو يعني الـEmbedded SIM" بتبقى مدمجة جوا قلب التليفون مش بتتشال وتتركب زي SIM العادية..
بتشتغل عن طريق انك بتعمل داونلود لملفات الخط وتعريفات الشبكة وتتخزن كل ده على الشريحة الافتراضية اللي في الموبايل وشكرا على كدا، وانت من قلب الاعدادات تقدر تشغل وتوقف اي خط منزله على الeSIM دي..
طبعا كل ده، جنب الشرايح التقليدية اللي في موبايلك اساسا اللي هي الشريحة الكارت دي..
🔴اعرف ازاي ان موبايلي بيدعم التقنية دي ولا لأ؟
1. كلم خدمة العملا واعرف
2. افتح الاعدادات بتاعت موبايلك وادخل على مدير الشرائح SIM Manager وهناك لو لقيت كلمة eSIM يبقى انت تمام عندك الخدمة..
🔴 ازاي اشغل خط eSIM على موبايلي؟
1. اتأكد ان الشبكة اللي انت تبعها بتقدم خدمة eSIM وظه بالتليفون مع خدمة العملا عادي
2. لو بتقدم، هتروح أقرب فرع من فروع الشركة
3. اشتري وادفع الرسوم، هيدولك ورقة فيها QR Code
4. وصل موبايلك بالواي فاي
5. افتح اعدادات موبايلك واختار Set up Cellular أو Connections عشان توصل الجزء بتاع SIM MANAGER
6. من هناك اعمل Scan QR Code وساعتها هتتفتحلك الكاميرا تعمل مسح للكود اللي ع الورقة وشكرا كدا 😎
7. تقدر تعمل نقل للخط eSIM و كمان ممكن تحول خط شريحتك التقليدية الكارت الى eSIM بس ده لازم الشبكة بتاعتك من الاساس تكون بتوفره!
مساءو
السعر 499 دولار!
🗣️ سامسونج عملت شغل حلو بالAI والسوفت وير، كمان عملت لمسات لطيفة ف التصميم والزراير "بس دي قليلة"، الاكتر بصراحة كان نقل كتير من أبل ف الساعة الالترا بشكل خاص، السينسورز سامسونج عملت بيها شغل هايل بصراحة وبرضو بروسيسور الساعة Exynos W1000 عامل شغل حلو بس كان محتاج وحدة معالجة عصبية عشان يجاري الAI اللي ف قلب ساعات ابل ووتش 9 والالترا 2 "دول فيهم سيري ياجماعة شغالة on-device🚀".. بس بشكل عام الأجهزة عاملة خطوة كويسة وأتمنى تكون سامسونج بيهم بتفرش لمستقبل أفضل بكتير لاحهزة معتمدة اكتر ع الai، وبالتالي تقلل تكلفة الهاردوير المعقد المطلوب، والتكلفة كلها تبقى ف البروسيسور قريب، وبالتالي السعر يبقى اقل .. اه طبعا تسعير سامسونج هتقدر تلعب بيه كتير اوي قصاد تسعير أبل العالي اوي، وكمان خاتم الجلاكسي رينج لعب على فكرة ان المنصة الذكية Samsung Health مجانا من غير اشتراك، بعكس المنافسين ف السوق ده زي Oura اللي خاتمها بتحتاج تشتريه، وتدفع كمان اشتراك شهري 6 دولار للمنصة اللي هي قلب الخدمات الصحية اللي بتقدمها!
صباحو
حاول وانت بتقرا البوست ده
تركن تحيزاتك الشخصية وحبك لأي شركات
وخلينا نبص للموضوع بشكل حيادي حبتين..
سامسونج طلعت من جرابها 6 منتجات جديدة
موبايل جلاكسي زد فولد 6= يبدأ من 1899 دولار
موبايل جلاكسي زد فليب 6 = يبدأ من 1099 دولار
ساعة جلاكسي ووتش 7 = يبدأ من 230 دولار
ساعة جلاكسي ووتش ألترا = يبدأ من 650 دولار
سماعة جلاكسي بادز 3 = 179 دولار/ البرو= 250 دولار
خاتم جلاكسي رينج = 499 دولار
أول خمسة كوم، والأخير ده كوم تاني!
يلا بينا:
📱 الموبايلات الجديدة مكنش فيها تغيير كبير ملموس يادوب، تغيير في ابعاد الفولد 6 بحيث يبقى مربع اكتر وكمان تحسين شوية في تصميم المفصلات عشان تظبط طي الشاشة احسن وميبقاش في التنية مع الاستخدام، كمان لعب ف مزايا الذكاء الاصطناعي مع Galaxy AI وطبعا جيميناي نازل بشكل لطيف على الفليب 6 والفولد 6، كمان فيه شوية تحديثات بالAI في تصميم الصور وأكيد كتابة النصوص فيها شغل حلو، بس ده بقى الطبيعي، ضيف لكدا شوية حاجات خفيفة كدا بتحسن التصوير خصوصا على مستوى الزووم، فمع ال AI ZOOM في فولد 6 انت بتزوووم اوي من غير ما تخسر كواليتي بشكل كبير، فمع سامسونج بقى فيه زووم بصري Optical Zoom وزووم رقمي Digital Zoom وكمان A ZOOM ودي وصلت افتطر من اول السنة مع جلاكسي S24 ألترا..
ف الفليب 6 بقى، لما بتعمل طي الموبايل 90 درجة وبتشغل ميزة FlexCam، بيخليك تتصور وتشوف نفسك بالشاشة الخارجية والكاميرا بتعمل اوتوماتيك Auto Zoom واللي بتظبط الكادر بحيث تبقى انت متـcenter في نص الكادر!
معجبنيش بصراحة ان سامسونج مطورتش اكتر في استخدام الشاشة الخارجية 3.4 بوصة، هي برضو شوية الحاجات المحدودة بتاعت النوتفكيشنز وانك ترد على مسج وعملت بس ميزة الردود المقترحة السريعة Suggested Replies، بعكس مثلا موتورولا رازر + اللي عامل شاشة خارجية 4 بوصة وبيقدملك تشغيل كل الابلكيشنز ع الشاشة الخارجية عادي جدا، ماعدا الapps اللي بتحتاج دقة وضوح شاشة عالية..
⌚نيجي للساعات بقى، جلاكسي ووتش 7 وجلاكسي ووتش ألترا، هنا كان فيه حاجات حلوة وحاجات مش اد كدا، سامسونج أبدعت مثلا في الجيل الجديد من سينسور BioActive واللي ده جاي بتصميم جديد تمامًا، بيخلي المستخدم يقدر يقيس المتغيرات الحيوية لجسمه بدقة، لان مهندسين سامسونج اشتغلوا على تحسين أداء الصمامات الضوئية المستقبلة للضوء، وإضافة ألوان جديدة من الصمامات الضوئية الباعثة للضوء (LEDs)، وترتيبها بشكل مثالي في المستشعر، الصمامات الضوئية دي اللي بتضرب ضوء في سطح الجلد عشان تلقط داتا مختلفة، زي حركة الدم عشان يتقاس الضغط وكمان نبض القلب، ده غير مسبة الاكسجين في الدم فيتقاس مستوى التنفس ويترصد لو حصل توقف للتنفس خلال النوم وهو ما يعرف باسم Sleep Apnea !
سامسونج لما عيرت التصميم بتاع السينسور
قدرت تضاعف أداء كل صمام ضوئي، وده خلاها تقدر تقلل العدد المطلوب من 8 لـ 4 للحفاظ على الكفاءة، والتصميم الجديد أتاح مساحة أكبر لدمج عدد أكبر من الصمامات الضوئية اللي بتضرب إضاءة وتستقبل ارتدادها من الجلد..
كما ضافت ألوان جديدة الصمامات، زي الأزرق، الأصفر، البنفسجي، وفوق البنفسجي، بالإضافة لزيادة عدد الصمامات الباعثة للضوء باللون الأخضر، الأحمر والأشعة تحت الحمراء..
كل لون من دول بيساعد على اكتشاف وقياس متغير معين في الجسم من سطح الجلد!
كمان من الحاجات الهايلة انه تنوع ألوان الصمامات الباعثة للضوء، والصمامات المستقبلة للضوء المصممة حديثاً، بيفتح إمكانيات جديدة في الرعاية الصحية الوقائية، وأولى الإمكانيات دي: مؤشر المنتجات النهائية المتقدمة للسكريات (AGEs)، وده مؤشر لسلامة التمثيل الغذائي وبيقدر يقيس العمر البيولوجي للجسم وأجهزته الداخلية، اللي بيتأثر بشكل كبير بنمط الحياة والعادات الغذائية!
بالمناسبة في المزايا سامسونج معدية أبل جامد..
🔴بس ف التصميم، سامسونج عملت فضيحة!🔴
مبدئيا سامسونج جلاكسي ووتش ألترا ناقشة التصميم بتاع أبل ووتش ألترا بالمللي!!
غير بس ان سامسونج سمت تصميمها Cushion design او يعني تصميم المخدة، واللي بيعتمد على لامؤاخذة قاعدة مربعة صخمة فوقيها هيكل دائري..
ضيف لكدا سامسونج برضو نقشت لون البرتقالي بتاع الزراير من أبل ووتش ألترا 2، حتى زرار Action Button اللي بيخلي المستخدم يقدر يغير استخداماته والمهام اللي بيعملها حسب احتياجاته، سامسونج قلدته بس سميته Quick Button 🤦
طب نيجي بقى لميزة تانية اسمها MultiSport Mode وده ياسيدي وضع الستعة بتقدر تتبع فيه المجهود والاداء بتاع المستخدم في تمارين معقدة زي الترياثلون ودي رياضة ثلاثية داخل فيها سباحة وركوب العجل والجري، فلما بيتمرن المحترفين النوع ده، مع الميزة الجديدة بتقدر تتابع اداءهم بدقة ف كل تمرين!
أبل قدمتها السنة اللي فاتت مع ابل ووتش الترا ٢، سامسونج نقشتها بالمللي ف جلاكسي ووتش الترا.. بالاسم حتى!
ماسك عمل comeback تاريخي في الصين🔥
فبعد ما كانت تسلا محظور استخدام عربياتها من جانب موظفين بكين خوفا من التجسس عبر مستشعرات العربيات ،
ماسك قدر بعلاقاته يخلي تسلا لأول مرة تدخل لستة الحكومة الصينية للشركات المسموح لموظفيها انهم يشتروا منها منتجات..
فالموظفين الصينيين ف الحكومة يقدروا دلوقتي يشتروا عربيات مودل Y يعملوا ليها مشاوير رسمية!
بالمناسبة،
تسلا هي براند العربيات الأجنبي الوحيد اللي داخل لستة حكومة بكين للمشتريات الحكومية!
🔴 الصورة من زيارة ماسك للصين السنة اللي فاتت
سوق السوشيال ميديا بقى ممل بشكل كبير سواء بسبب الفقر ف الابتكار، استسهال ف المزايا، قص ولزق بين الكل..
فوق كل ده الكل بيجري ورا خوارزميات أتقل عشان الكل يفهم الكل بيستخدم ايه وبيحب ايه وعايز ايه، والكل يبدأ يغرق الدنيا إعلانات يمين وشمال!
بس وسط كل ده، طلعت شبكة جديدة كليا اسمها noplace !
نو بليس فكرتها عبقرية وهلخصهالك ف كام نقطة:
1. شبكة جديدة بتخليك تنشر بوستات نصوص وبس.. لا صور ولا فيديوهات
2. الشبكة بتخليك تقدر تغير ألوان البروفايل على كيفك "حاجة كدا من ريحة MySpace وHi5" وكمان تحط ستيكرز وحركات
3. الشبكة بتخليك تقدر تحدد حاجة اسمها "نجوم Stars" ودي بتعبر عن كل الاهتمامات اللي بيهتم بيها المستخدم، فمثلا انا مثلا ممكن اضيف نجمة عن التكنولوجيا.. دول بيتم استخدامهم عشان المستخدم يقدر يشوف اكونتات ناس تانيين بينهم نجوم "اهتمامات يعني" مشتركة بينهم وبالتالي يقدر يتابع اللي بينشروه!
4. الشبكة مبتستخدمش الخوارزميات وكدا عشان تعرض وترتب المنشورات قدام المستخدمين، ولا كمان عشان تقترح منشورات "زي ما بيعمل فيسبوك وانستجرام وإكس وتيك توك"..
نو بليس بقى بتستخدم الذكاء الاصطناعي عشان يادوب تلخص فقط البوستات اللي فايتة المستخدم مش أكتر!
5. الشبكة عندها مساحتين Feeds
واحد فيهم بيظهر فيه البوستات اللي بينشرها الاصدقاء والعيلة وكدا
والتاني بقى عالمي يجيلك فيه كل حاجة من الاكونتات ع المنصة، وخصوصا اللي انت عاملهم زي فولو وبينكم "نجوم" مشتركة!
6. الابلكيشن يادوب متاح للـiOS
بنظام الدعوات وبس ومتصدر آب ستور!
حبايب قلبي واخواتي بتوع الآيفون والماك،،، أما بعد
حابب أقولك ان أسطورة ان جهازك ضد الهاك..
ده مش هنا.. ده هناك😅
مجموعة من الباحثين في شركة EVA Security
نشروا تفاصيل 3 ثغرات في بعض المكتبات البرمجية (معروفة باسم CocoaPods وهي خاصة بلغات برمجية Swift وObective-C) اللي بيعتمد عليها مطورين عدد كبير من التطبيقات.. منهم 3 مليون أبلكيشن على الآيفون والماك!
الثغرات التلاتة بتخلي الهاكرز يقدروا يسيطروا ع المكتبات البرمجية دي بشكل كامل، بحيث يقدر الهاكر يضيف أي أكواد برمجية ف قلب الابلكيشنز اللي بتستخدم المكتبات دي، وبكدا يقدر الهاكر يخلي الابلكيشن يعمل حاجات وينفذ أوامر مطورين الابلكيشن نفسهم، ميعرفوش عنها حاجة!
الكارثة الحقيقية ان ملايين - ان مكنش أكتر من مليار مستخدم - متضررين من القصة دي، وممكن بيانات كارثية ليهم تتسرب وتوصل لها ايدين الهاكرز، زي بطاقات بنكية بيانات صحية صور وفيديوهات شخصية..
فنتكلم عن الخصوصية بصوت واطي
ألا حد يضحك علينا (((أو يسمعنا))) 😅
كلنا على الله حكايتنا.. فاهدوا بقى 🤷
والسلام ختام.