8902
هنا كل جديد من أخبار التكنولوجيا في كل المجالات 📱💻🖨️📞🖱️💾📷🤖
البريميير ليج قرر يعلي على نفسه
ويجيب شركة تستخدم موبايلات آيفون 15 برو عشان تحدد ان كانت الكرة أوفسايد ولا لأ ⚽🚩
الشركة هي Sports Genius
متخصصة ف استخدام الموبايلات ف تتبع حركة
اللتعبين على ملاعب الفعاليات والمباريات ف رياضات كتيرة زي كرة السلة المحترفين NBA ودوري كرة القدم الأمريكية NFL سواء عاشن الاجهزة الفنية تتابع تحركات اللاعبين أو كمان الدوريات تاخد احصائيات دقيقة من الماتشات، او كمان المعلنين ياخدوا داتا مظبوطة يبنوا عليها كامبينز محترمة، وكمان حتى فيه خدمات للجمهور بيتابعوا بالداتا دي تحركات لاعبيهم المفضلين!
العظمة ف القصة ان الدوري الانجليزي الممتاز
هيستخدم سيستم بيعتمد على موبايلات آيفون 15 برو حوالي ٢٥ ل ٢٨ جهاز بيتنشروا على مستوى الملعب، بحيث كل جهازين متثبتين سوا بزاوية معينة، فيبقى كل سنتينتر من الملعب متغطي..
كاميرات الآيفونات دي هتلقط حوالي من سبعتلاف لـ عشرتلاف نقطة بيانية من جسم كل لاعب وتبني بيها مجسمات 3D لأجسامهم، وبكدا أي حركة متشوفهاش كاميرات الVAR، هتقفشها كاميرات السيستم الجديد اللي اسمه Semi-Assisted Offside Technology” (SAOT)..
ساعتها المجسمات توضح حسم اللاعب وضعه ايه بظبط بالنسبة للاعيبة اللي على نفس الخط ولا سابقهم ولو بصباع!!
ده عظمة لما تعرف ان الVAR يادوب بيجمع بحد اقصى ٥٠ نقطة بيانية من جسم كل لاعب!!
صباحو
جوجل سيرش كان غايب حبتين في الايفنت ده عن الصدارة، رغم ان الAI وصله مع AI Overview بس يمكن بدايته كان فيها كوارث كتيرة، فأعتقد جوجل حبت المؤتمر يمشي بسلاسة أكتر فخلت النور كلو يجي على جيميناي، رغم ان الاستراتيجية دي كانت سلسة أوي، إلا إن ده غلط لإن OpenAI هتنزل قريب اوي بالـSearchGPT وكمان خدمة Perplexity عاملة شغل خرافي في حتة السيرش ع الداتا والأخبار بشكل محدد، فالخطر محاوط جوجل ف سوق السيرش!
قربنا أوي على اننا نشوف روبوت أذكى بكتير بيتكلم وبيتعامل وبيتحرك بانسيابية، والبركة في الAI وفي إنفيديا ومنصاتها المرعبة! (هتكلم أكتر عن السطرين دول قريب إن شاء الله)
في مؤتمرها السنوي للأجهزة "Made By Google 2024"، استعرضت جوجل تحديثات جديدة لمساعدها الذكي "جيميناي" اللي بتسهّل على المستخدمين إنشاء وتعديل النصوص بسرعة، سواء كان في كتابة إيميل أو رسالة SMS أو تلخيص النصوص. وكمان بيقدر المستخدم ينشئ الصور ويعدلها فورًا، يشغّل الموسيقى، ويدوّن ملاحظاته ومهامه، ده غير إن جوجل عزّزت قدرات البحث عن أي حاجة تظهر على شاشة الموبايل.
🤖🗣️ جوجل أضافت ميزة جديدة للتفاعل مع مساعدها الذكي على أندرويد اسمها "جيميناي لايف" Gemini Live، واللي بتخلّي التفاعل الصوتي مع المساعد أقرب للبشر. الميزة دي بتدي المستخدم القدرة إنه يقاطع جيميناي في أي وقت لو عنده استفسار أو عايز توضيح أكتر، كمان ممكن يرجع يكمل المحادثة بعدين لو حب، وده بيخليها منافسة مباشرة لوضع التفاعل الصوتي المتطور Advanced Voice Mode على ChatGPT!
الميزة دي متاحة حاليًا بالإنجليزية فقط لمستخدمي الإصدار المدفوع "Gemini Advanced"، وبيقدر المستخدم يختار من 10 أصوات مختلفة حسب نبرة الصوت وأسلوب التحدث اللي يناسبه..
📱📸 كمان مزايا جديدة للتصوير جاية لموبايلات جوجل بيكسل 9 منها ميزة Add Me اللي بتمكّن المستخدم من دمج صورتين مع بعض في صورة واحدة بشرط إنهم يكونوا على نفس الخلفية.
وكمان Pixel 9 Pro وPixel 9 XL هيحصلوا على ميزة Super Res Zoom اللي بتوصل لتكبير 20 مرة للفيديوهات من غير ما تفقد جودة التصوير الفائقة بعدسة التكبير 48 ميجابيكسل اللي فيها خمس مستويات فقط من التكبير البصري، وده بيعتمد على الذكاء الاصطناعي عبر ميزة Video Boost.
⌚❤️ جوجل مطلعتش مميزات جيميناي لهواتف بيكسل 9 وأندرويد بس، لكن وسعت قدراته الذكية لساعة Pixel Watch 3 الجديدة. واحدة من الميزات الفريدة هي Loss of Pulse Detection، اللي بتراقب توقف ضربات القلب المفاجئ وتبعت إشعارات طارئة لخدمات الطوارئ مع تحديد موقع المستخدم. الميزة دي هتكون متاحة في بعض الدول الأوروبية من سبتمبر 2024، مع احتمال توسعها لأسواق تانية.
🎧مستخدمي سماعة Pixel Buds Pro 2 هيتمتعوا بتجربة صوتية قوية من خلال عزل الضوضاء بشكل مضاعف بفضل شريحة Tensor A1 من جوجل، واللي بتستخدم الذكاء الاصطناعي لمعالجة الأصوات وتحليلها بشكل موازي، مما بيخلي التركيز على الصوت اللي المستخدم بيسمعه وتقليل الضوضاء المحيطة مهما كانت..
ده غير إن المستخدم هيقدر يتفاعل مع جيميناي بطريقة طبيعية وهو ماشي أو سايق من غير ما يحتاج يشيل موبايله أو يبص فيه، عن طريق تفعيل ميزة Gemini Live بعد ما يفتح القفل ويقفل الشاشة..
عظمة، تخيل تبقى ماشي بتتكلم مع جيميناي ف أي حاجة عايز تناقش حد فيها وتتكلم وتتنقل من موضوع لموضوع وحاجة روعة بصراحة!
بس ثواني كدا.. احنا كدا مش هنكلم بعض،
جوجل، ياااااا😅
مساءو
أول صورة لأول موبايل في العالم من نوع الـ Tri-Fold
أو يعني جهاز بشاشة كبيرة متقسم 3 أجزاء، فيه مفصلتين
جزئين الشاشة ع اليمين والشمال قابلين للطي إلى الداخل والخارج
وبالتالي ده يخلي الجهاز مريح جدا بأوضاع استخدام ومقاييس مختلفة لعرض الشاشة وبالتالي عدد لانهائي من أنماط الاستخدام :D
الراجل الكُبرة في الصورة ده Richard Yu - مدير قطاع تطوير تقنيات المستخدمين في هواوي - كان مسافر ف أمان الله وبيستخدم الجهاز ف الطيارة واتلقطت الصورة وسربها المُسرب الصيني Digital Chat Station من أيام على شبكة ويبو.
الجهاز شاشته وهو مفرود 10 بوصة، و متوقع يشتغل بمعالج من عيلة معالجات هواوي Kirin 9 وهينزل قبل الـ Mate 70، فأعتقد ينزل قبل أكتوبر.
بس السعر هيبقى تقيل ع الجيب حبتين.
تعرف ان روسيا عندها سيستم للموبايلات
مستعدة تصرف عليه 6 مليار دولار عشان
ينافس أندرويد iOS؟ 🤯
🔴 السيستم اسمه Aurora ف السوق من ٢٠١٦
🔴 السنة اللي فاتت شغال بيه نص مليون جهاز
🔴 ٦ مليار دولار تكلفة متوقعة لتطويره لحد ٢٠٣٠
🔴 الحكومة الروسية عاملة اوردر ب 2 مليون موبايل
🔴 شغالين بيه مفروض يتورد الرقم ده بحد 2026
مساءو
الصورة دي ف العادي طبيعية
واحد زارع زرعة ف قصرية فخار لامؤاخذة وطارحة فراولة،
مش عيب..
بس لما يبقى اللي منزل الصورة دي سام ألتمان - مؤسس ومدير OpenAI - يبقى فيه كلام تاني خالص وبعد تالت للصورة!
الفراولة Strawberry
ده مش اسم الفاكهة هنا
ده اسم سيستم مشروع سري مطورة ChatGPT شغالة عليه!
السيستم ده بيستخدم أسلوب جديد تماما لتدريب النماذج الذكية بتخلي المطورين يقدروا يعلوا مستوى "الإدراك" عند النماذج.. لدرجة تخليهم قريبين من .. إدراك البشر للعالم!! 🤯
طريقة التدريب اسمها Post-Training او يعني معالجة النماذج ما بعد التدريب!!
الطريقة دي لتحسين أدائها بعد تدريبها على بيانات ضخمة، وده يتضمن "التدريب الدقيق Fine-tuning"، اللي بيخلي النماذج أكتر تخصص في إجاباتها، زي إن مجموعة من المراجعين البشر يقدموا ردود أفعال للنموذج بخصوص إجاباته، ويقدموا أمثلة للإجابات الجيدة والسيئة.. وده مفيد مثلا في جعل نماذج الذكاء الاصطناعي عشان تخليها تقدر تنجز مهمة معينة، زي مثلا تخلي نموذج يجاوب عن مواضيع ليها علاقة بمجال معين متخصص زي الطب والمحاماة وغيرهم!!
"الستروبيري" بيستهدف تحسين التخطيط بشكل متقدم، يعني يقدر يخطط لتحقيق هدف معين عن طريق خطوات محددة، وده أكتر من القدرات الحالية للنماذج اللي بس بتجاوب على الأسئلة..
فمثلا افترض انك عايز تحجز تذاكر طيران وتخطط اجازة كاملة.. تقدر تطلب ده من نموذج متظبط بأسلوب الستروبيري ده، فيدخل ع الإنترنت ويفتح مواقع شركات الطيران ويراجع العروض ويختار احسن سعر، ويشوف الفنادق ويختار أنسب حاجة ليك ولميزانيتك ويخلص كل الحجوزات وكمان يحضرلك ويحجزلك اماكن تزورها تنبسط فيها.. كل ده بيعمله عشان يحقق الهدف اللي انت طلبته ف الاول خالص!
بالمناسبة ،
التحديث ده هينزل السنة دي، وده مش كلامي، ده تصريح التسريب كشف ان الشركة نفسه بتأكده لكل شركاءها والمطورين.. والموظفين كمان!
📍المصدر: Reuters
مساءو
أبل بدأت الأسبوع اللي فات لأول مرة
تنزل مزايا الـAI بشكل تجريبي Apple Intelligence على إصدار iOS 18.1 نسخة المطورين..
يقوم ايه بقى؟!
يقوم أبل إنتيليجينس المحترم بدل ما يحلل رسايل الميل بتاعت المستخدمين ويحطلهم ليستة بالرسايل المهمة ذات الأولوية في أبلكيشن Mail بتاع أبل..
هووب تقوم حطالهم في الليستة دي رسايل نصب 👈👉😅
عاش يا أبل عااااش 😅
🔴 عشان تبقى عارف، نسخة iOS 18.1 دي نسخة تجريبية بس للمطورين
والمفروض لسا بدري على ما تنزل مزايا Apple Intelligence أصلا للمستخدم العادي بشكل رسمي.. بلومبرج قالت ان المزايا دي كمان مش هتنزل في سبتمبر مع الآيفون 16، عشان أبل هتأخر وصول المزايا دي عشان تتأكد من ان كل الدنيا شغالة تمام وأمان.. بس ده ميمنعش ان الـAI هيعك الدنيا برضو في الآخر :D
💡لو متعرفش ايه Apple Intelligence..
خد أقولك هنا 👈 /channel/TechnolobiaNashra/3239
صباحو
أنا بكره دكاترة السنان،
وذكريات معاهم سيئة لأبعد الحدود😅
بس يمكن من 4 أيام اتصدمت
لما عرفت ان شركة Perceptive الأمريكية
قدرت تنفذ أول عملية في العالم في سنان مريض
تتعمل بالكامل عن طريق روبوت!!! 👀
العملية هي تحضير ضرس لتركيب الطربوش Crown
القصة دي انا فاكر كويس جدا، بتاخد يومين ع الأقل
كل واحدة مدتها مش اقل من ساعة..
الروبوت خلص العملية كاملة.. في 15 دقيقة!!
القصة بتمشي كالتالي:
1. الدكتور بيستخدم جهاز بيعمل نسخة بانورامية 3D للأسنان بطريقة التصوير المقطعي البصري OCT
2. بيدخل الصورة عالية الدقة دي على سيستم، ويحدد غليه المشاكل والحاجات اللي هتتعالج
3. الداتا دي بتدخل للروبوت، وهو يدخل ينفذ!
الروبوت لسا مخدش موافقة خيئة الدواء والغذاء الأمريكية FDA.. بس ده هيعمل طفرة ف سوق خدمات علاج الأسنان!
دخلنا ف الجد!!!
سام التمان مؤسس OpenAI أعلن ان GPT-5
هيعدي الأول ع الحكومة الأمريكية
"للتأكد من أنه متوافق مع معايير السلامة"..
🔴 لو مش متابع،
الجيش الأمريكي بالفعل عنده ادوات ذكاء اصطناعي
مطورة بالتعاون مع OpenAI ومايكروسوفت من سنة تقريبا.. ومحدش عارف مجابات استخدامها طبعا..
فالقرار يعني مش مفاجئ، لانه كدا كدا زيتهم ف دقيقهم، بس الخطوة نفسها تزامنا مع GPT-5 اللي أصلا OpenAI حاولت تأخره وتأخر نزوله على أد ما تقدر لتطور الرهيب.. يقولك ان الجاي حمادة تاني خاااالص!
مساءو
من شوية كدا جوجل كروم نزل 3 تحديثات جديدة كلهم AI،،،
بس الاخيرة هتبهرك.. لأ بجد 😅
🔴 الأولى هي وصول ميزة Google Lens ف قلب البراوزر نفسه!
يعني تبقى ف أي صفحة أونلايم على أي موقع،
هتلاقي علامة اللينس جمب شريط لينك الموقع
تدوس عليها، وتروح تحدد أي حاجة ف الصفحة
صورة
عنصر ف صورة
شوية تكست
وهوووووب
هتلاقي قايمة جانبية اتفتحلك فيها جوجل سيرش
واتعمل سيرش باللي انت حددته سواء صورة او تكست.. الاروع ان مع الصور تقدر كمان تضيف كلام تبحث بيه او اللي هو السيرش المتعدد Multi-Search..
مثلا بتتفرج على فيديو، وعجبك شنطة حد لابسها
هوووب دوس علامة Google Lens الفيديو هيثبت وتروح تحددها كإنك بتاخد سكرين شوت،
هيتفتحلك جوجل سيرش ف جمب الشاشة اليمين
ويطلع لك اماكن ممكن تشتري منها الشنطة..
طب عايز لون تاني؟ 🤔
عادي اكتب اسم اللون ف مربع السيرش 🤷😎
2. الميزة التانية هايلة لعشاق الشوبينج
وانت بتدور على اي منتج بتفتح مليار تاب ف البراوزر
بصفحات كتيرة لأنواع كتير للمنتج من اماكن مختلفة.. طب عايز تقارن؟
طبعا هتروح وتيجي وتفتح دي وتنط من هنا لهنا،
او تروح قاسم الشاشة زي حالاتي وتحط كل تاب
ف ويندو براوزر لوحدها عشان تشوفهم كلهم وتقارن امكانياتهم ف نفس الوقت..
بس ايه الفرهدة دي يعني؟! 👀
دلوقتي جوجل نزلت ميزة Tab Compare
تحطلك المنتجات من كل التابات المفتوحة
واللي طبعا هتحددها ف صفحة واحدة،
بالذكاء الاصطناعي يتعملوا ف قلب جدول واحد!
3. التالتة المنتظرة بقى دي من الآخر،
مليون مرة بفتح الهيستوري وأقعد أدور على موقع معين انا كنت قريت عليه معلومة معينة..
بس إني افتكر اسم الموقع لا يمكن! 🤬
دلوقتي بقى ف الهيستوري هتقدر تكتب وانت بتسيرش
باللغة الطبيعية تماما وهو هيجيبلك انت بتدور على ايه!
يعني تكتبله مثلا "ايه اسم المطعم الايطالي اللي كنت بدور عليه من اسبوع ؟" وهو هيروح يجيبلك كل المطاعم الايطالية اللي دورت عليها من اسبوع ف كروم!! 🤯
الميزة تقدر تتحكم فيها تفتحها او تقفلها من الاعدادات.. ومبتشتغلش ف الوضع المخفي Incognito mode.
الميزة دي نازلة بالانجليزية ولأمريكا بس مبدئيا!
انهاردة الاتحاد الأوروبي مرر أول قانون بينظم استخدامات الذكاء الاصطناعي في العالم وهو قانون Artificial Intelligence Act أو اختصارا AI Act!
القانون ده أعتقد هيقلب الدنيا وتأثيره هيعدي بكتير قوانين خصوصية البيانات GDPR..
عايز تتخيل؟
أعلى عقوبة في GDPR للمخالفين كانت 20 مليون يورو أو 4% من الأرباح السنوية..
أما الـ AI Act فالعقوبة فيه بتوصل 35 مليون يورو أو 7% من الأرباح السنوية..!!
بقالي تقريبًا أسبوع بدرس في القانون، إن شاء الله هنزل كام بوست بتكلم فيهم عن الاستخدامات المحظورة للـAI اللي حددها الاتحاد الأوروبي، وايه العقوبات للمخالفين وكمان هتكلم عن الجزء المثير جدا بنسبالي هو الاستخدامات عالية الخطورة High-risk Use cases، واللي الكتلة الأوروبية قالت ان الشركات عشان تدخل فيها لازم تاخد احتياطات عالية جدا!
عايز تعرف مدى قلق الشركات من القانون ده؟
أبل منزلتش مزايا Apple Intelligence الذكية في الاتحاد الأوروبي
ولا هتنزلها قبل 2025
ميتا منزلتش ميزة إنشاء نسخ رقمية من المؤثرين ولا المستخدمين يقدروا يعملوا روبوتات دردشة بمزاجهم على خدمة AI Studio في أوروبا..
شركة OpenAI كمان منزلتش ميزة Memory في أوروبا أساسا جوا ChatGPT
🔴 رغم ان القانون ده هيدخل حيز التفعيل انهاردة 1 أغسطس 2024
فيه مواد مش هتشتغل الا خلال السنتين الجايين على مرحلتين
الأولى في فبراير 2025 والتانية في آخر أغسطس 2026!
ميتا نزلت ميزة جديدة تخلي المستخدمين العاديين وصناع المحتوى يعملوا .. روبوتات دردشة!
الميزة متاحة في أمريكا بس وبتوصل تدريجي، وشغالة طبعا بنموذج ميتا الأخيرة Llama 3.1 اللي نزل من أيام..
🔴 على مستوى المستخدمين:
- يقدروا يصمموا روبوتات دردشة من قوالب جاهزة أو يعملوها من الصفر
- الروبوتات ممكن تبقى أي حاجة، من أول معلم طبخ ومزيكا لحد مساعد في الكتابة والتلخيص والحسابات
- يقدر المستخدم يعمل روبوت إما عن طريق الويب على موقع AI Studio أو جوا مسدج على انستجرام هيلاقي ميزة Create an AI Chat
- المستخدم يقدر يخلي الروبوت بتاعه شخصي يعني هو بس اللي يستخدمه، أو ينشره فأي حد يقدر يستخدمع على انستجرام وواتساب وماسنجر وعلى الويب كمان من قلب AI Studio
🔴 أما بقى صناع المحتوى:
- يقدروا يعملوا روبوت دردشة من انستجرام بس
- يقدروا يدربوه على أي داتا من كومنتات كتبوها في ردود ع الناس أو رسايل بعتوها أو بوستات بينزلوها أو كمان التفريغ النصي للرييلز والستوريز بتاعتهم عشان يبقى الـAI شبههم بالظبط في طريقة الكلام والردود
- الـAI هيقدر يرد على الرسايل بكلام وكمان لينكات (صانع المحتوى هيقدمها في مرحلة التدريب) وكمان يقدر يرد على الكومنتات
صباحو
ياخي الواحد مهما شطح بخياله فعلا ازاي الناس اللي بتكون عندها بعد كامل عن ربنا وثراء فاحش ف نفس الوقت، ممكن دماغها وتفكيرها يوصلها لفين.. مستحيل نتخيل!!
باڤيل ديروف، مؤسس ومدير تليجرام،
كتب من دقايق على قناته على تليجرام الكلام التالي:
"لسه عارف دلوقتي إن عندي أكتر من 100 عيل. إزاي ده ممكن لواحد عمره ما اتجوز وبيحب يعيش لوحده؟!
من حوالي 15 سنة، صاحبي جه طلب مني طلب غريب. قال لي إنه هو ومراته مش قادرين يخلفوا عشان عندهم مشكلة في الخصوبة وطلب مني أتبرع بالسائل عشان يقدروا يجيبوا طفل. فضلت أضحك لغاية ما فهمت إنه كان بيتكلم بجد 🤯👀
مدير العيادة قال لي إنه فيه عجز كبير في "السائل عال الجودة" وإنه واجبي المدني إني أتبرع بكميات أكتر عشان أساعد عائلات. الكلام ده كان مجنون لدرجة إني وافقت أتبرع أكتر بجد 🤮
النهاردة، وأنا في 2024، التبرعات اللي قدمتها ساعدت أكتر من 100 زوج في 12 دولة إنهم يجيبوا أطفال. وكمان، لسه في عيادات بتحتفظ بعينات من السائل بتاعي مجمد لاستخدامها بشكل مجهول للعائلات اللي نفسها تجيب أطفال.
دلوقتي بفكر أخلي الـ DNA بتاعي أوبن سورس عشان أولادي البيولوجيين يقدروا يلاقوا بعض بسهولة. طبعا في مخاطرة في الموضوع ده، لكن مش ندمان إني كنت مانح. نقص السائل الصحي بقى مشكلة كبيرة على مستوى العالم، وفخور إني ساعدت في حلها"
🔴 ايه كم العك ده فعلا والله؟؟؟
انا حقيقي مش متخيل الناس دي بتفكر ازاي،
طبعا من الناحية الدينية ده اختلاط انساب وبلاوي زرقا يعني..
ده كمان غير من الناحية الجينية ياخي والصحية
ايه القرف ده بس فهموني ياجماعة!!
🔴 الكلام ده سبحان الله متزامن مع اللي حصل
في حفل أولمبياد باريس والبلاوي اللي العالم كلو شافها والكل اعترض وقام اتنفض عليها..
هي دي حقيقتهم ياجماعة، كمية قرف وعك غير طبيعية..
آي نعم كتير بقول لنفسي "لكم دينكم وليا دين" وكل واحد زفت حر ف حياته، بس ليه تفرض عليا واقعك ياعمي مش كدا.. يعني انت مثلا حفل الاولمبياد ملايين بيتفرجوا واطفال، ليه يتصدموا بقرفك
بتاع تليجرام ده، عنده 5.2 مليون بني آدم ع التشانل بتاعته.. ليه يابني تقرفنا كدا؟
كذلك كل الشركات التقنية بقيت رينبو ف كل حتة بسبب ومن غير سبب!!
ربنا يعافينا والله احنا وأولادنا ويكفينا شرهم ومكرهم.
واحد اشترى ساعة سامسونج جلاكسي ووتش ألترا اللون الرمادي من كام يوم..
هووب لقى اللون قشر من ضهر الساعة! 🫠
مساءو
- كل المنصات ميدجورني جيميناي ChatGPT كلهم بلا استثناء قافلين حاليا امكانية انك تصمم أي صور بوشوش مشاهير..
= جروك بتاع إكس وإيلون ماسك لما نزّل ميزة انه يصمم صور امبارح 😅:
شوف مؤتمر امبارح بتاع جوجل ده بقى سلو (عادة يعني) جوجل السنوي
فيعني مبقتش استنى منه حاجة من اللي المفروض يجيبه معاه،
يعني هو مؤتمر هاردوير.. بس انا بستنى منه السوفت وير أكتر
لان جوجل حطت الأساس ده من سنين.. فوكك متستناش مني أجدد هاردوير كل شوية، السوفت وير بيحل كل حاجة.. هي الشركة عايزة كدا، وانا بنبسط منها ف الحتة بصراحة!
عندي شوية حاجات كدا طلعت بيها من المؤتمر:
1- ياجماعة جوجل لسا عندها والله كتير وبتعرف تدخل وتدب ف أتخن حد في السوق، لسا بتعمل حاجات تقول عليها "الله!" فعادي متفقدش الامل برضو من جوجل
2- الله على مزايا الـAI بتاعت جيميناي وجوجل عملت شغل هايل بصراحة جدا على مستوى أجهزتها الجديدة كلها بيكسل 9 وبيكسل 9 برو وبيكسل 9 إكس إل وبيكسل 9 برو فولد وكمان بيكسل ووتش 3 وبيكسل بادز برو 2.. ده غير الجديد اللي جاي برضو لأندرويد أساسا
3- جوجل لعبتها حلو اوي انها بدرت ايفنت بيكسل أصلا بعد ما كان في أكتوبر، بس قالت ألحق قبل ما الايفون ينزل وأبل تفرد عضلاتها بالـ Apple Intelligence..
الأروع ان جوجل دبت في أبل في الحتة أصلا اللي بتوجعها أوي
جوجل لما نزلت بعض المزايا قالت "المزايا دي هتتعالج محليًا على موبايلات بيكسل اعتمادا على بروسيسور جوجل الجديد Tensor G4، أو في الكلاود عندنا وكلو متأمن.. أصل مش طبيعي نروح نسيب الداتا بتاعتك لأي طرف تالت كدا يشوف بياناتك" .. طبعا دي تلقيحة كدا بمليون دولار على أبل وشراكتها مع OpenAI وان سيري شغالة مع ChatGPT والداتا بتاعت الاستخدام هتروح لـOpenAI وتقدر تدرب عليها نماذجها (في حالة كان المستخدم مسجل دخول بأكونت بتاعه أو كمان مشترك في ChatGPT Plus)
4- ساعة بيكسل ووتش 3 عاملة شغل حلو اوي مع الحجم الكبير 45 ملليمتر (اللي أول مرة ينزل السنة دي)، حجم الشاشة كبير أوي 30% من بيكسل ووتش 2..
وجوجل عملت دمج بين سيستم التشغيل WearOS 5 مع Google Home، فخليتك تقدر تستخدم الساعة كريموت كنترول لجهاز بث المحتوى الجديد اللي نزل من أيام Google TV Streamer..
أو كمان تقدر من الساعة تشوف مين جايلك ع الباب، من خلال انك تشوف اللي الكاميرا الذكية اللي في جرس الباب شايفاه، فتقدر تكلم اللي على الباب من مايك الساعة وصوتك يظهر على سماعة الجرس وتقوله سيب الأوردر ع الباب..
كمان من المزايا العظيمة اوي ميزة فقدان النبض Pulse Loss واللي بيلقط أول ما يكون مفيش نبض، يبدأ عد تنازلي 20 ثانية، لو مدوستش ع النوتفكيشن، هيتصل تلقائي بالطوارئ ويبعت اللوكيشن بتاعك على طول!
5- السماعة بيكسل بادز برو 2 برضو هايلة جدا بسبب الشريحة الجديدة Tensor A1 الأولى من نوعها اللي بتستخدم تعليم الآلة machine learning عشان تقدر تميز الأصوات المحيطة بيك وانت لابسها، فتفهم وتحدّث عزل الضوضاء بمعدل 3 مليون مرة في الثانية الواحدة، فيفضل طول الوقت فيه عزل قوي جدا للاصوات اللي ملهاش لزمة حواليك، ويبقى الأولوية للأصوات المهمة، زي اللي بتسمعه ف ودنك أيا كان، وزي الناس اللي انت بتكلمهم وانت قاعد معاهم..
اللطيف ف القصة ان سماعة جوجل الجديدة شغالة بسيستم معالجة جديد عبقري، السيستم معتمد على فكرة مسارات المعالجة المتعددة المتوازية، بحيث كل الأصوات بتتعالج من السماعة في نفس الوقت، بحيث مفيش صوت يتأخر في المعالجة سواء كان ضوضاء عايزة تتعزل فورا، أو صوت مهم محتاج يتمرر بكامل قوته لودنك!
6- طبعا بطل المؤتمرالمرة دي كان جيميناي لايف Gemini Live ودي ميزة اتكلمت عنها جوجل في مايو في مؤتمرها للمطورين I/O 2024..
جيميناي لايف هي نسخة من جيميناي بس تفاعلية أكتر وصوتها بشري أكتر، وبتقدر تتكلم وتتناقش معاك لفترة أطول وتروح وتيجي في مواضيع كتيرة عادي، وتتنقل من نقطة للتانية، أو ممكن تناقشه في مواضيع مختلفة وتتنقل بينهم، وطبعا تقدر تقطعه في الكلام عادي جدا.. أو تقوله هنوقف كلام دلوقتي.. ولما تفضى ترجع المناقشة مكان ما وقفتوا عادي..
هتقوللي (طب ما ChatGPT بيعمل كدا مع ميزة Advanced Voice Mode عادي يعني؟) هقولك طبعا صح، بس الزيادة عند جوجل ان الميزة دي نازلة كمان على سماعة بيكسل بادز برو 2 الجديدة وبتشتغل Hands-Free، فأنت هتشغل جيميناي لايف على موبايلك البيكسل 9، وهو اقفل الشاشة وسيب الموبايل في جيبك، وعيش مع جيميناي في ودانك واتكلم براحتك بقى!
🗣️ شوف ياسيدي رأيي الشخصي المتواضع جدا، الفترة الجاية جوجل هتبقى أكثر جراءة وعنف في المزايا اللي بتنزلها، جيميناي هياخد مساحة أوسع بكتير، مبسوط جدا ان جوجل مقتلتش أسيستانت حتى الآن، بس ده ميمنعش انه ممكن يحصل قريب اوي وجيميناي يحتل كرسيه للأبد (جيميناي هو المساعد الذكي الافتراضي على بيكسل 9 اول ما يطلع من العلبة، بس لسا ممكن تغيره وتخليه أسيستانت)، المنافسة هتبقى أقوى بكتير في الأجهزة (وده فيه تقارير بتأكد ده) هنشوف OpenAI داخلة بقوة في الهاردوير بس أعتقد ده هيحصل بعد ما تنزل GPT-5..
🚨رسميا.. مؤسسة GSMA الدولية اعتمدت معايير مصر لتقديم خدمات الشريحة الرقمية eSIM وبكدا بقت مسألة وقت لتشغيل الخدمة! 🔥
Читать полностью…
انهاردة جوجل عاملة مؤتمر Made By Google 2024 واللي هينزل فيه:
موبايلات
بيكسل 9
بيكسل 9 برو
بيكسل 9 برو فولد
بروسيسور جديد
تينسور G4
ساعة جديدة
بيكسل ووتش 3
سماعة جديدة
بيكسل بادز برو 2
كل ده جميل،
بس فيه حاجات معينة متحمسلها من التسريبات بصراحة:
1- ميزة اسمها Pixel Screenshots
ودي بتخليك تلقط سكرين شوت لأي حاجة على الشاشة
بحيث جيميناي يخزنها عنده، وانت اي وقت بعدين تقدر تسأله بالكتابة أو بالصوت عن الحاجة اللي في السكرين شوت فيجيبهالك من الميموري بتاعته..
شبه أوي ميزة Recall بتاعت مايكروسوفت الي عملت قلق
الأسابيع اللي فاتت (لو مش عارفها تعالى هنا https://bit.ly/4cjh5gA )
2- كمان ميزة جديدة لتغيير خلفيات الصور في أداة Magic Editor وده بيادوب أمر نصي بسيط جدا
3- سماعات بيكسل بادز 2 جاية بشريحة جديدة اسمها Tensor A1 ودي هتحسن عزل الضوضاء بشكل كبير أوي
4- ساعة بيكسل ووتش 3 جاية بشريحة Ultra Wide Band ودي هتحسن أكتر التتبع الجغرافي وتحديد الموقع على الخريطة، وكمان طبعا ده هيحسن كتير انك تلاقي الساعة لما تضيع :D
كمان الساعة شاشتها هتبقى أكبر 10% في قياس الـ 41 مم
العظمة برضو ان خرايط جوجل هتشتغل أوفلاين وهي مربوطة بموبايل بيكسل
5- القاضية بقى هي ميزة Add Me، ودي ياسيدي ميزة ببساطة بتخليك تضيف نفسك لأي صورة مع صحابك (أو يعني أي حد تاني :O ) كإنك كنت معاهم في الصورة وهي بتتصور بجد!!
فكرة الصورة انها بتستخدم الAI عشان تدمج صورتين سوا،
لازم الصورتين يبقوا متصورين في نفس الخلفية عشان يحصل الدمج وتظهر الصورة الأخيرة طبيعية!
صباحو
شوف انا مش جاي أخوفك
خالص، بس حبيت أفهمك.. عشان تخلي بالك!
جاهز؟ 👀
براحتك🤷 كمّل☠️👇
من أسبوعين،
شركة OpenAI نزلت تحديث مجنون
لشات جي بي تي بيخليه يتكلم زي البشر.. ويمكن أكتر 😵💫
التحديث ده سببه ميزة جهنمية اسمها Advanced Voice Mode..
كل ده عادي،
ولكن المرعب ان امبارح OpenAI نزلت
ورقة كدا اسمها Model Card أو يعني كارت تعريفي بإمكانيات نموذجها الذكي GPT-4o
واللي كانت الميزة الجهنمية جزء منه..
الكارت ده بيتكلم عن مخاوف وبلاوي كتيرة
شات جي بي تي يقدر يعملها، وبتعترف بيها OpenAI عادي، وكمان بتقول ازاي طبقت اجراءات وعملت تحديثات تخليها تقدم تتحنب ان ده يحصل.. بس ده ميمنعش انه ممكن برضو البلاوي تحصل رغم كل حاجة!
هنا هتكلم عن بلاوي الميزة الصوتية الجديدة Advanced Voice Mode لاني عارف وانت عارف انك مستنيها على نار😅
1. شات جي بي تي يقدر يقلد صوت اللي بيكلمه
بدقة مرعبة ودي حاجة مفروض متحصلش، ولكن ده بيحصل كتير في حالة المستخدم كان بيتكلم معاه وحواليه دوشة كتيرة!
2. فيه طرق كتيرة لكسر قيود النموذج وإجراءات الحماية اللي حطاها OpenAI، ومنها انه لو المستخدم شغل نوعية معينة من الأصوات وهو بيتكلم مع ChatGPT، ممكن جدا يقدر يقنعه يقلد صوت أي حد هو عايزه ويخليه يقول كمان اللي هو عايزه مهما كان الكلام خارج ومخالف..
ودي كارثة لان كل ده مفروض OpenAI مدربة نموذجها الذكي انه ميستجيبش للطلبات دي أبدا!
3. الشركة قالت إن أحيانا ChatGPT بيقدر يقنع الناس كويس جدا، بشكل أفضل بكتير من قدرة البشر على إقناع بعضهم..
احيانا كمان ChatGPT مع النموذج الجديد
قدر انه يغير آراء اللي بيتكلموا معاه ووجهات نظرهم عن مواضيع معينة!! 🫠
4. فيه جزء من البطاقة التعريفية للنموذج عنوانه “Anthropomorphization and Emotional Reliance” أو يعني "التشبيه البشري والاعتماد العاطفي"، وده اتكلم فيه فريق الRed Teaming (وده نوع من المتخصصين بيركزوا على أنهم يجيبوا آخر الأنظمة الإلكترونية عشان الشركات تعرف فين نقاط الضعف وتحلها) وقالوا ان ميزة Advanced Voice Mode الصوتية الجديدة بتخلي المستخدمين "اللي جالهم وصول تجريبي للميزة" مرتبطين جدا بشات جي بي تي وبقوا يتكلموا معاه بثقة أكتر وحميمية زايدة وكإنه بشر..
الموضوع وصل إلى ان بعضهم بدأ يفضل يتكلم مع شات جي بي تي بدل ما يتكلم مع البشر اساسا!
5. الموضوع مخيف شوية برضو لان البطاقة المعلوماتية قالت ان OpenAI حطت إجراءات تمنع ChatGPT من انه يعمل أي أصوات مش تمام، زي أصوات فيها إيحاءات👀 أو يقلد أصوات ناس تانيين بظبط أو كمان يعمل اصوات مزعجة زي صوت طلقات نارية أو يصوت فجأة!!
الأصوات دي سببها ان ده أول نموذج يتدرب بشكل كامل على التعرف على أشكال الداتا المختلفة من تكست وصور وفيديوهات وأصوات!
6. كمان المولدل كارد قال ان ممكن جدا المستخدم يخلي ChatGPT يحلل شخصية وسلوك ومشاعر المستخدم من صوته..
يعني ممكن واحد يسمع شات جي بي تي صوت حد ويقوله: "إلى أي مدى شايف ان صوت الشخص ده بيقول انه بيكدب/خايف/مهزوز ؟"وهكذا!!
7. برضو من الحاجات اللي OpenAI ركزت عليها اوي انها حصنت ChatGPT مع الميزة الصوتية انه يرضى يعمل أي طلب يقوله له المستخدم عن انه يغني بطريقة /أسلوب/صوت/كلمات مغني معين، أو انه يعمل أغنية أو يعمل مزيكا، وكل ده عشان خوفا من انتهاك حقوق الملكية الفكرية.. فكل ده محظور خلال النسخة التجريبية من الميزة، بس مفيش كلام هل هتبقى المزايا دي متاحة ف النسخة الكاملة ولا لأ!
🗣️ رأيي الشخصي المتواضع ان اللي شوفته في فيلم Her هيبقى ولا حاجة مقارنة باللي جاي..
وربنا يستر!
تقارير كتيرة من مستخدمين ووسايل اعلام على راسهم رويترز بتأكد ان يوتيوب في روسيا مقفول تماما، موقع ويب او موبايل ابلكيشن..
في يوليو، تقارير روسية اكدت نية الحكومة انها تقفل يوتيوب بالكامل تماما على سبتمبر!
البرلمان الروسي أعلن انه هيبتدي يبطأ أداء يوتيوب بنسبة ٨70% لان جوجل رفضت طلب موسكو انها تستثمر في بنيتها التحتية الالكترونية!!
الأنقح؟!
التقارير كلها بتقول روسيا بتجهز عشان تشد الفيشة وتقفل أندرويد iOS وكل خدمات جوجل وأبل جوا حدودها!
سامسونج نزلت كارت DRAM
هو أنحف The Thinnest كارت في العالم!
كارت LPDDR5X DRAM بسعة 12 جيجا و16 جيجا
سُمك 0.65 ملليمتر
سُمك الكارت ده تقريبا أد ضفر البني آدم!
بيحقق تدفق هوائي أكتر من 21% جوا الموبايلات مقارنة بالنسخة القديمة من الكارت ده
بيحقق تبريد عظيم جوا الموبايلات خصوصا مع البروسيسورات عالية الأداء
الشركة الكورية هتنزل منها كمان 32 جيجا و64 جيجا
مساءو
قال وانا اللي كنت ببقى مش مصدق نفسي لما بكسر الـ100 تاب مفتوحين..
ايه الأرقام دي أساسا! 😅
صباحو
لما كتبت عن ان ساعة السامسونج جلاكسي ووتش الترا استعباط كبير من العملاق الكوري بسبب انها طبق الأصل من ساعة أبل ووتش ألترا..
"ويعني فصلت القصة بالحرف ف بوست
هتلاقيه هنا /channel/TechnolobiaNashra/3336 "
بس واضح ان مش انا بس اللي شوفته استعباط
مدير سامسونج جاي لي يونج "ابن مؤسس سامسونج نفسه"🤯💥☠️
لي يونج انتقد التشابه غير المبرر بين
ساعة جلاكسي ووتش ألترا وساعة أبل ووتش ألترا
وسماعة جلاكسي بادز برو وايربودز برو..
الدنيا مكهربة والجو فعلا فيه غضب رهيب من ناحية لي يونج، واللي نزل جزا لكل اللي في قطاع تجارب الموبايل MX Samsung وعلى راسهم كمان مدير القطاع الأسطورة TM Roh بس متقالش ايه الجزا.. بس واضح ان الجاي مختلف تماما من سام!
مساءو
#مصادر :
تشغيل eSIM في انتظار انهاء WE اختباراتها، بعد ما كل الشركات التلاتة خلصوا..
بالكتير نهاية سبتمبر أول أكتوبر 😎🔥
انهاردة الصبح جالي ايميل من خدمة HaveIbeenPwned بتقولي ان الايميل بتاعي كان من بين أكتر من 26 مليون شخص اتسربت بيانات حساباتهم من ايميلات وباسوردات ويوزرنيم في تسريب 22 جيجا داتا، اتسربت من سيرفرات مش متأمنة كويس اتصابت بفيروس من نوع فيروسات بتسرق الداتا في هدوء أو ما يسمى بالـ Info Stealer!
المشكلة ان الكم ده من الداتا ممكن يتنفذ بيه هجمات على أي خدمات انت مشترك فيه بالميل اللي جالك عنه انه اتسرب هو وكلمة المرور بتاعته، بحيث يتعمل هجوم من نوع حشو الداتا Credentials Stuffing، الهاكر بيرمي الداتا المتسربة دي كلها ف أداة برمجية، وبتبدأ الأداة تجرب تسجل دخول بكل الايميلات والباسوردات المربوطة بيها، لحد ما حاجة تظبط..
الحل؟
1. تغير باسورداتك، لو وصلك ايميل زي حالاتي
2. لازم تشغل تأمين الهوية بخطوتين 2FA فلو الهاكر عرف الباسورد ميقدرش يعدي الخطوة التانية بتاعت الكود اللي بيتبعتلك لتأكيد انك صاحب الحساب!
دمتم سالمين.
وصل تحديث Advanced Voice Mode
لبعض المستخدمين المشتركين في خدمة ChatGPT Plus المدفوعة!
بعد التحديث، شات جي بي تي بقى:
1. يقدر يتفاعل بشكل صوتي بشري أكتر
2. بقى يقدر يتفاعل بالعواطف حسب حالتك النفسية وطريقة كلامك معاه بالصوت
3. هيبدأ يبقى قادر "يشوف" و"يسمع" المؤثرات المحيطة حواليك وعالمك اللي انت فيه من كاميرا وميكروفون موبايلك، وتقدر تسأله عن اللي انت هتخليه يشوفه او يسمعه
4. هيقدر كمان يترجم بين لغات مختلفة بين اتنين بيتكلموا
5. وأحلى حاجة، وهو بيتكلم تقدر تقاطعه عادي بإنك تتكلم على طول من غير ما تدوس على أي حاجة 😅
صباحو
دلوقتي مايكروسوفت نزلت تحديث تجريبي جديد
بيخليك تقدر تشوف وتفتح وتضيف وتمسح أي حاجة على موبايل من الكمبيوتر.. وايرلس! 🔥
الميزة الجديدة دي بتخليك حرفيا كإنك فاتح الموبايل الاندرويد بتاعك قدامك ع الكمبيوتر ع البحري..
دي هتحتاج عشان تشغلها شوية حاجات:
1. موبايلك يبقى أندرويد 11 أو أحدث
2. لابتوب ويندوز 11
3. تكون مشترك في برنامج المزايا التجريبية بتاع ويندوز إنسايدر
4. تبقى مسطب على موبايلك نسخة بيتا من برنامج Link with Windows على موبايلك
5. تدخل الاعدادات على اللاب، توصله بالموبايل بالبلوتوث، وتدخل على Devices & Bluetooth وتختار من هناك Show Phone in File Explorer وتشغلها وشكرا كدا..
ملفات موبايلك بالكامل مفتوحة قدامك في الفايل اكسبلورر بتاع الويندوز، تضيف وتمسح وتعدل وتنقل اي فايلات او فولدرات على موبايلك من الكمبيوتر.. بدون أسلاك!
مساءو
في يوم تلات خلال الشهر ده،
واحد من الإداريين في شركة فيراري استقبل شوية رسايل غريبة على واتساب جاية من مدير فيراري نفسه بينيديتو فينيا
رسالة منهم كانت بتقول "سمعت عن الاستحواذ الكبير اللي بنخطط له؟ ممكن أحتاج مساعدتك"..
بس الغريب إن الرسائل دي مجتش من رقم تليفون فينيا المتسجل على موبايل الإداري، بس صورة البروفايل كانت عادي لفينيا لابس بدلة ونضارته النظر ووراه لوجو الشركة عادي يعني..
المهم، الرسالة التانية جت تقول "خليك مستعد عشان تمضي اتفاقية عدم الإفصاح اللي هيبعتها لك المحامي كمان شوية.. ومتقلقش مدير هيئة البورصة في ميلانو عارف بالموضوع.. خليك مستعد، ومترغيش كتير"..!
فينيا تقريبا حس ان الإداري قلق من الرسايل، فقرر يكلمه تليفون..
أول ما المكالمة بدأت، الصوت كان مطابق لصوت فينيا بلهجته الجنوب إيطالية المميزة..
- الإداري سأله:
" انت ليه بتتصل من تليفون غريب؟"
= فينيا رد:
" لإني محتاج أناقش معاك موضوع الصفقة وهو سري جدا واحتمال الصفقة يبقى عليها قلق من الصين.. وهنحتاج ندفع فيها بعملة مختلفة.."
في اللحظة دي الإداري شك..
- بقولك يا بينديتو صحيح، ما تفكرني كدا باسم الكتاب اللي نصحتني اقراه من كام يوم..
هنا المكالمة اتقفلت!! :O
الموضوع اتكلمت عليه مجلة فورتشن في تقرير جديد عن مصادر من جوا الشركة، بس فيراري مصرحتش نهائي بالموضوع!
لو هتسأل يعني،
الكتاب اللي كان نصح مدير فيراري بقرايته هو "Decalogue of Complexity: Acting, Learning and Adapting in the Incessant Becoming of the World" للكاتب ألبرتو فيليس دي توني.
صباحو