8902
هنا كل جديد من أخبار التكنولوجيا في كل المجالات 📱💻🖨️📞🖱️💾📷🤖
تقرير: شركة OpenAI بتفكر تخلي اشتراك ChatGPT بـ 2000 دولار! 💰
مساءو
الآيفون مبقاش موبايل!
بصراحة بعد إيفنت أبل لما خلص جالي حالة عجيبة كدا انه انا قاعد 100 دقيقة تقريبا بتفرج على إيفنت المفروض انه الأساس فيه موبايل..
بس لا خالص بقى اكتشفت انه مبقاش موبايل..
الآيفون 16 هيكون نقطة تحول في تاريخ موبايلات أبل
لإن:
1- كمية المزايا اللي نازلة مخصوص للكاميرا والتصوير، بتقول ان الجهاز ده خرج من دايرة كونه مجرد موبايل، وبدأ يقرب أكتر لمنطقة إنه أداة للتواصل المباشر Face-to-Face وكإنك حرفيا مع اللي بتكلمه أو أداة مخصوص لصناعة المحتوى الاحترافي..
2- ميزة Camera Control اللي نزلتها أبل واللي بتتمثل في زرار جديد مخصوص للكاميرا، هو مش مجرد زرار تدوس عليه يفتح الكاميرا، لأ خالص..
الزرار بيسمح إنك تدوس عليه فتصور أو تسجل فيديو، تسحب ايدك يمين وشمال فتقدر تتنقل بين أدوات تصوير مختلفة زي Zoom وExposure وDepth of Field، وكمان بيقبل انك تخبط على الزرار عشان تتنقل جوا كل واحدة من دول أصلا!
3- ضيف لكدا كمان الزرار ده بقى هو اللي بيخليك تشغل حاجة Visual Intelligence أو يعني الذكاء البصري، اللي هو بالمختصر كدا نسخة من جوجل لينس Lens بحيث تعمل سيرش بالحاجة اللي انت شايفها قدامك عن طريق الكاميرا، وده بيخليك تصور وتسيرش مباشرة في جوجل أو ChatGPT..
الميزة دي بتخليك تسيرش عن اي حاجة بإنك تصورها، أو تاخد أي تكست Copy بسهولة، أو كمان لو فيه بانر عن إيفنت، تقدر تصور الكلام وتاخده تخزنه في الكاليندر بتاعتك!
الزرار ده فكرني جدا بالأجهزة المدعومة بالذكاء الاصطناعي زي R1 بتاع شركة Rabbit اللي قلب الدنيا أول السنة بس فشل، وكمان بجهاز AI PIN بتاع Humane..
الزرار ده خلاني أشوف فعلا الآيفون خرج عن كونه مجرد موبايل، وتحول إلى جهاز مدعوم بالـAI وفيه كاميرا!
4- كمان اتجاه أبل ناحية انها تضيف مزايا متطورة أوي زي زرار Camera Control وكمان مزايا كتيرة عظيمة في التصوير للآيفون 16 وآيفون 16 بلس، يخليك تتأكد إن أبل بترمي أساس حاليا وبتعمل Benchmark لمستوى التجربة اللي هياخدها المستخدمين في كل موبايلات آيفون الجاية مش هتقل عنها، فالموضوع مش هيبقى يادوب مجرد موبايل بنزود في شاشته وكاميراته وخلاص.. لأ لازم يديك حاجة مختلفة (طبعا ده ميمنعش انه ممكن جدا يحصل ثبات في بعض السنين ومتقدمش جديد وده عادي)..
5- أبل بتعمل تطور مرعب على مستوى البروسيسورات بتاعتها، الـA18 وA18 Pro - وخصوصا الأخير - عاملين طفرة رهيبة وبيدخلوا مكونات جديدة كليا كلها بتركز على تطوير طرق معالجة المحتوى البصري صور وفيديوهات وما يتعلق بيهم من أصوات وألوان ومونتاج بشكل خرافي
6- أعتقد النقط اللي فاتت دي ، يخلوني أقدر أقول بالفُم المليان جدا إن الآيفون قريب أوي (خلال 5 سنين بالكتير) هيبقى من أهم الموبايلات اللي بتقدر تخلي الناس تتواصل مع بعض بالهولوجرام، مش مجرد مكالمات فيديو وخلاص..
7- برضو من الحاجات اللي لاحظتها إن أبل أصلا استخدمت الـAI في بعض أجزاء فيديو الإيفنت نفسه، خصوصا الجزء اللي كان بيظهر فيه أجزاء مكونات الهيكل الداخلي لموبايلات آيفون 16 برو، وده يقولك إن أبل لسا Fit وتعرف تدب كويس في سوق الـAI
🔴 انبسط برضو جدا بالتحديثات اللي وصلت لأبل ووتش 10، عظيمة فكرة السبيكرز المدمجة اللي تخليك تسمع كويس المحتوى والمكالمات مباشرة من الساعة (ده يقولك فعلا إن الآيفون هيخرج من دايرة انه وسيلة لاستهلاك المحتوى واستقبال المكالمات، ويبقى أكتر أداة لإنتاج المحتوى)، وكمان سماعات آيربودز 4 الجديدة جاية بمزايا بديهية شوية بس كويسة انها نزلت في الإصدار ده بعد ما كانت حصرية للآيربودز برو
🗣️ رأيي الشخصي المتواضع، أعتقد آيفون 16 بلس وآيفون 16 برو أكتر موبايلات هتحقق مبيعات عظيمة، الأولاني هيبقى مناسب الناس اللي عايز تحدث موبايلاتها من آيفون قديم بس متدفعش كتير وتاخد كل المزايا الجديدة وكمان شاشة كبيرة، أما التاني فشايفه بشاشته الـ 6.3 بوصة مناسب أكتر من البرو ماكس أبو 6.9 بوصة (ليه أشيل 7 بوصة في ايدي بجد)، وكمان أرخص 200 دولار من البرو ماكس ومعاه كل المزايا الجديدة في الكاميرا (ماعدا ان بطارية الماكس أعلى)
أول صورة رسمية لموبايل هواوي ثلاثي الطي Mate XT! 🔥
الموبايل شكله سمكه نحيف جدا
وشياكة🔥
الجهاز نازل ف ايفنت بعد ساعات من حفل إطلاق آيفون 16 بكرة! 🚀
لو عندك مشكلة في الانترنت خلال الساعتين اللي فاتوا، متقلقش انت مش لوحدك!
Читать полностью…
أبل:
هننزل الآيفون 16 يوم 9 سبتمبر
هواوي: حلّق يا وِلد..
أول موبايل ثلاثي الطي 10 سبتمبر 🤣
كان نزل تسريب من فترة كدا واتصور الجهاز اكتر من مرة، وواضح ان هواوي هتعلي سقف المنافسة أوي الفترة الجاية.. هاردوير وسوفت وير😎
كام مرة كنت بتكلم حد ف حاجة،
ولقيت فيسبوك مغرقلك الدنيا اعلانات عنها..؟! 😵💫
وانت واللي بتكلمه تبصو لبعض..
معقول يكون مارك سامعنا؟ 🫣
لا المرة دي مش هنـ هاهاها وكدا ونقول لأ
لأنه للأسف، طلع سامعنا بجد! 👀
بص يا سيدي، الموضوع ببساطة إن فيه تسريبات ظهرت بتورط شريك تسويقي لفيسبوك في التنصت على ميكروفونات تليفوناتنا عشان يطلعوا إعلانات للحاجات اللي بنتكلم عنها!
التقرير ده جابه موقع "404media"، وبيوضح إن مجموعة اسمها "كوكس ميديا" (CMG) بتستخدم برنامج اسمه "الاستماع النشط Active Listening"، والبرنامج ده بيعتمد على الذكاء الاصطناعي عشان يسمع المحادثات ويحللها ويجمع منها بيانات ، لحظة ما بتحصل real time!
والمصيبة الأكبر إن المعلنين بيقدروا يجمعوا البيانات الصوتية دي مع البيانات السلوكية بتاعتنا (اللي هو طبيعة استخدامنا لمنصاتهم وبنستخدم ايه عليها وبندوس على ايه وبنشتري اونلاين ايه وهكذا..)
عشان يستهدفونا بإعلانات لمنتجات معينة. والأدهى والأمر بقى إن فيسبوك وجوجل وأمازون كانوا ضمن العملاء اللي بيستخدموا الخدمة دي! 😁
الموقع "404" لما عرف الموضوع ده، راح سأل جوجل عن الشراكة دي، وجوجل على طول شالت مجموعة CMG من قائمة الشركاء في مواقعها الرسمية. وكمان فيسبوك "ميتا" قالت إنها هتراجع علاقتها مع CMG عشان تشوف لو كان في انتهاك لشروط الخدمة ولا لأ.
أما أمازون، قالت إنها ما اشتغلتش مع CMG في البرنامج ده، ومش ناوية تعمل كده. وكمان المتحدث باسمها أضاف إنهم هيتخذوا إجراءات لو أي شريك تسويقي خالف القواعد
دي المرة الثالثة اللي بتظهر فيها تسريبات عن خدمات CMG في خلال سنة واحدة بس، وكله بيدور حوالين توجيه الإعلانات باستخدام تقنيات الاستماع الصوتي. قبل كده في ديسمبر اللي فات، موقع "404 ميديا" كشف عن وجود ميزة "الاستماع النشط"، وقال إن CMG بتاخد 100 دولار في اليوم عشان تستهدف ناس في نطاق 10 أميال، و200 دولار عشان توسع النطاق لـ 20 ميل..
العجيب ان CMG كانت فخورة بخدماتها لدرجة إنها كانت بتعرضها على موقعها الإلكتروني بشكل علني قبل ما الناس تاخد بالها وتأرشف مقالات بتتكلم عن البرنامج فيها أساسا!
اللهجة الفلاحي
اللهجة الاسكندراني
اللهجة الصعيدي
اللهجة النوبي
ما طبيعي ياجماعة نشوف الحاجات دي،
ما لازم يفهموا الAI لهجات العامية المصرية
أكتر عامية عربية منتشرة في كل الشرق الأوسط
بس المرة دي ناصحين بقى، عاملينها جدول Google Docs فيبقى سهل يرميها في الداتا بيز بتاعت أي نموذج لغوي بيتشغل ذكاء اصطناعي LLM، فيقدر يتكلم باللهجة بعد كدا لبلب، ولا يجيب موظفين ب 3 دولار ف الساعة ولا يحزنون "ودول اصلا كانوا مغرقين الدنيا outsourcing في أفريقيا بالمناسبة السنتين اللي فاتو عشان شغل تصنيف وتنظيم الداتا"..
فتخيل وفر كل ده وخلاك انت تساعده ف الشغل ده ببلاش🤷🔥 جدددااااععععع ( بصوت جابر الشرقاوي 🤣)
مساءو
تقرير عبقري كدا نزله موقع The Information بيأكد ان نموذج Strawberry السري بتاع OpenAI - واللي متوقع يكون هو GPT-5 - احتمال كبير ينزل في سبتمبر أو أكتوبر!!!
تلتوقعات ف التقرير بتقول ان امكانيات "الفراولة" هتبقى خرافية ف الرياضيات وحل المسائل والمعادلات الحسابية بشكل متفوق على أي نموذج تاني خرج للنور لحد دلوقتي!!
المرعب جدا انه من فترة كان فيه تقرير طالع عن ستروبيري برضو بيقول انه بيركز ف المقام الاول على ما يعرف بالسيرش العميق Deep Research، اللي معتمد ف الاساس على انك بتطلب حاجة من الAI وهو بيروح يدعبس ف النت، ويلاقي نتايج أولية، بس بدل ما بيجي يعرضها عليك، وانت تقوله لأ مش ده اللي بدور عليه أو محتاج تركز على حاجة معينة عشان تعلي جودة الداتا اللي جايبهالك، ستروبيري هيعمل العملية دي من نفسه، ويروح يكمل سيرش عشان يلاقي بظبط اللي انت عايزه ويناسب احتياجاتك ويجاوب على استفسارك!!
يُقال ان ستروبيري هيكون أول نواة حقيقية لفكرة الAI Agents، اللي تقدر انت تطلب منها حاجة تعملهالك اونلاين، زي انها مثلا تدخل تحجزلك معاد دكتور او تذاكر طيران او ترابيزة ف مطعم، ويبقى انت عليك بس يادوب تراجع وراها اما تخلص وتدفع!
تاني حاجة بقى، OpenAI مفروض انها خلاص عرضت ستروبيري على مسؤولين في الأمن القومي الأمريكي عشان يوافقوا عليه قبل إطلاقه رسميا..
أعتقد - والعلم عند الله - ان ممكن أبل تلمّح القصة دي في مؤتمرها 9/9 بتاع آيفون 16.. أو تتكتم خالص، ويبقى مؤتمر إطلاق ستروبيري بعد الايفون بأسبوع أو اتنين بالكتير، بحيث أبل تلحق التحديث مع نزول الايفون الجديد قبل ما يوصل السوق، وده يضمن للاتنين مبيعات خرافية للآيفونات، وكمان يضمن لOpenAI انها تتمم صفقة استثمار بتقييم لقيمتها معدي.. ال100 مليار دولار 🤯😵💫 (وكلمة ف سرك، وول ستريت جورنال بتقول أن أبل وإنفيديا من أوائل المستثمرين في الجولة الاستثمارية دي)
يلا تصبح على خير 😅
انهاردة بدأ تشغيل تجريبي لخدمات الشرائح الرقمية للاتصالات eSIM في أورانج 🔥🚀📱
يعني ايه eSIM؟ 🤔
اعرف 👈 https://bit.ly/4dK68pA
مساءو
شوف احنا ف سيزون أبل
و 9/9 هو يومها المنشود عشان تنزل آيفون 16،
بس بيني وبينك.. أنا شايفها ضهرها للحيط جدا
وف موقف Fight or Fligh أو بالبلدي كدا
"العدو أمامكم والبحر خلفكم، فهتعملوا ايه بقى"!
خليني أقولك ليه بقول كدا وايه علاقة ده بصورة البوست:
1- مبيعات آيفون في النازل بقالها فوق السنتين
2- مبيعات الماك والآيباد في أسوأ حالاتها
3- الجمهور مش مستعد يدفع في أجهزة جديدة لإنه مش شايفها بتقدم جديد
4- حتى الـAI بتاع أبل Apple Intelligence على أجهزتها مكنش سبب كافي يشجع المستخدمين يتحمسو عشان الآيفونات الجاية
5- بس أبل خدت خطوة انها متشغلش الـAI بتاعها إلا على آيفون 15 برو وآيفون 15 برو ماكس والأحدث بقى مع عيلة آيفون 16 (طبعا الحجة انه الامكانيات المادية من بروسيسور ورامات اللي هيحتاجها الAI مش متوفر في الموبايلات القديمة بتاعتها)
6- اللي يدعم نظرية ان فعلا أبل مش شايفة آيفون 16 هيقدم جديد،
هي انها ركزت على سيري في دعوة الايفنت وكلمة "It's Glowtime"، فواضح ان ايفننت 9 سبتمبر هيبقى كلو عن Apple Intelligence وسيري وكدا
7- ضيف لكدا كمان التوقعات كلها قالت آيفون 16 مش هيقدم جديد ف التصميم عن آيفون 15 برو، ممكن بس الكاميرا الخلفية تعلى شوية وتصميمها يختلف مع شوية اختلافات في الشاشة
8- التوقعات برضو قايلة ان موعد نزول macOS Sequoia لحواسيب الماك هيبقى بدري عن المعتاد، وأعتقد ده عشان أبل تتفشخر بإنك ممكن تستخدم الآيفون من خلال iPhone Mirroring على شاشات الماك مع السيستم الجديد فهيبقى سبب جديد برضو انك تشتري الجديد عشان تستخدم iOS 18 مع سيستم ماك الجديد..
طيب ايه بقى علاقة كل ده بصورة البوست؟!
قبل كدا قولتلك ان آبل داخلة بقوة في عالم الروبوتات، وده مش مجرد كلام، الشركة بتحاول تثبت نفسها في بيوت الناس وتزود منتجاتها بحاجات جديدة وجذابة، وأهو تحاول تفتح شلال فلوس جديد بعد ما باقي الأنهار قربت تجف!
عقول "آبل" الكبيرة لما بتقعد تفكر في المنتجات الجديدة، بيلقوا نفسهم في مأزق شوية: أجهزة "آبل" بقت جزء من حياة كل واحد فينا. من أول "آيفون" و"آيباد"، مرورًا بـ"ماك" و"آبل تي في" اللي بنشوف عليها كل حاجة، حتى السماعات زي "إيربودز" و"بيتس" اللي بنسمع بيها، وصولًا لساعة "آبل" اللي بتقولك إنت صحتك عاملة إزاي. وكمان بيلعبوا دور كبير دلوقتي في تغيير نظرتنا للعالم من خلال "فيجن برو"...
"آبل" ممكن تطور الأجهزة دي أكتر وتخليها أصغر وأسرع وأقوى، بس إنهم يبتكروا حاجة جديدة كليًا تجيب فلوس؟ ده التحدي الأكبر!
مع إن حلم بيع سيارة ذاتية القيادة انتهى، الفكرة في الأساس كانت عبارة عن روبوت ضخم بيتحرك!
والتكنولوجيا اللي طلعوا بيها ممكن تتطبق في حاجات تانية. في حوالي 2020، "آبل" بدأت تستكشف فكرة تحريك منتجات تانية باستخدام الروبوتات، والجهود دي لسه شغالة لحد دلوقتي.
لكن لسه "آبل" في بداية الطريق، ولسه بتحاول تعرف إزاي تستفيد من الروبوتات بأحسن طريقة.
تقرير خرج للنور أول الأسبوع من بلومبرج
بيأكد التجربة الأولى لأبل في الروبوتات هتكون جهاز مكتبي اسمه الكودي J595، بيجمع بين شاشة كبيرة زي "آيباد"، وكاميرات، وقاعدة مزودة بمحرك روبوتي، متوقع ينزل في السوق حوالي 2026 أو 2027، وبعدها نشوف روبوتات متحركة، وربما حتى نماذج شبيهة بالبشر في الـ10 سنين الجاية!
"آبل" شايفة إن الروبوتات ممكن تحل مشاكل كتير من اللي بنواجهها في حياتنا اليومية زي:
1. جهازك الذكي هيكون مفيد بس لو في متناول إيدك. كتير ممكن تحتاج تستخدم الكمبيوتر بتاعك، بس هو مش قريب منك أو إيدك مشغولة بتكتب أو بتطبخ. ممكن تكون سايب الجهاز في مكتبك، بس إنت دلوقتي في المطبخ أو في الصالة وعاوزه، فتخيل لو يقدر يمشي ويجيلك!
2. التقاط الصور وجلسات الفيديو: ممكن تحتاج تاخد صور لحاجة أو تبدأ مكالمة فيديو، بس مش ماسك الجهاز أو مش قاعد قدامه مباشرة.
3. التحكم عن بُعد في البيت: ممكن تكون عايز تشغل حاجة أو تفحص حاجة في البيت وإنت مش موجود فيه.
فكر مثلًا في جهاز "آيباد" لو ركبته على ذراع روبوتي، هيبقى أداة قوية في الفيديوكونفرانس أو حتى في المطبخ لما تحتاج تشوف وصفة وأنت بتطبخ وايدك مش نضيفة!
أبل كمان بتفكر في إنها تستخدم الروبوتات في يوم من الأياح عشان غسيل الأطباق ولم الهدوم وحطها في الغسالة!
التطورات في الذكاء الاصطناعي هتساعد كمان في تعزيز المفهوم ده. الذكاء الاصطناعي هيكون في قلب أي جهاز روبوتي في المستقبل. و"آبل" تقدر تطبق خبرتها في الاستشعار، والهندسة المادية، والبطاريات، ورسم خرائط الأماكن حوالين الأجهزة.
خلصت شغلك ومروّح؟
أحب أقولك إنك دلوقتي لو في أستراليا
هيبقى من حقك متردش على أي مكالمات/إيميلات/SMS/شات شغل
طالما خلصت ساعات عملك الرسمية..
وده مش بالحب، لأ بالقانون!
انهاردة دخل في حيز التفعيل قانون أسترالي اسمه "الحق في إنك تشد الفيشة Right to Disconnect"
وده بيخليك - بالقانون - تفصل من الشغل مجرد ماخرجت من بابه بعد ساعات العمل الرسمية!
بتفصل ولا بتكمل في البيت؟ 👀
متخليش القبض على مؤسس تليجرام يخليك تتعاطف معاه شخصيًا خالص، لإن دماغه تعبانة... خاااااااالص! اقرا 👆
Читать полностью…
لما بيبدا طفل يتعلم الحركه لاول مره في حياته بيبقى لازم ان انت تاخد بايده وتفهمه ازاي اصلا يفرد رجله ويرفعها ويحركها لقدام لورا وفي كل الاتجاهات انت في الوقت ده بتبني قاعده معرفيه عن حركه الجسم جوه مخ الطفل عشان بعد ما يتعلم بشكل كامل يبدا يقدم المهمه دي بالكامل لوحده..
هو ده بالظبط اللي بتعمله شركات كثيره دلوقتي مع الروبوتات!
هتقول لي ايه علاقه الروبوتات بالاطفال هقول لك سهله وبسيطه يا سيدي تعالى وانا افهمك ازاي..
زمان لما كنت بتيجي تعلم روبوت كان لازم تخليه هو شخصيا يقوم بالمهمه ويغلط فيتعلم من غلطه انما مع تطور الذكاء الاصطناعي الموضوع بقى بسيط جدا من خلال انك تلبس كمبيوتر اتجاهي Spatial computer زي نظاره ابل فيجن برو او ساعات ذكيه او سنسورز في اليد بتتبع وترصد بدقه حركه الايدين او حتى بدلات كامله تتلبس على الجسم كله وتلقط كل حركه بتقوم بيها بجسمك من مشي تفاعل مع العالم اللي حواليك!
يمكن لما تقرا الكلام ده تقول ان ده ممكن يكون في فيلم اجنبي من هو اليود ومش حقيقي انما يخليني اقول لك ان الموضوع حقيقي جدا ونفذته شركات كثير زي انفيديا اللي نزلت منصه اصلا متكامله فيها ادوات بتاخد الداتا بتاعه حركات البشر وهم لابسين الكمبيوترات الاتجاهيه دي وبتدخلها جوه المنصه بحيث يتم تدريب الروبوتات عليها فانت بتتحرك وبتقطع طماطم مثلا بايديك وبالسكينه هتلاقي جنبك والروبوت واقف بيقلد حركتك بالظبط وبرده بالسكينه!
اللطيف في الموضوع ان القصه ما بقتش تحصل داخليا جوه الشركات من الموظفين لا دلوقتي الشركات بقت توظف ناس مخصوص عشان تدرب الروبوتات وتتحرك ثمان ساعات و12 ساعه في اليوم عشان تخلي الروبوتات تقدر تتعلم كل حاجه البشر بيعملوها في حياتهم ويطبقوها لوحدهم عندك مثلا شركه تسلا بالفعل في تقرير جديد بيقول انها بتدفع لحد 48 دولار في الساعه لفريق جديد من الموظفين كل مهمتهم جوه الشركه انهم يتحركوا ويعلموا الروبوت بتاعها اوبتيموس حركات البشر عشان يبقى جاهز بسرعه جدا وينزل السوق!
الموضوع بقى يتطور أسرع.. من تفكيرنا 🫣
مساءو
ساعات بدخل مواقع ويب وبتعجبني فيها صور للشغل بس للأسف إما بيكون عليها تكست overlay أو مبيبقاش مفتوح فيها تحميل الصور أصلا ولو أخدتها سكرين شوت طبعا بتضيع الكواليتي..
بس لقيت طريقة لطيفة اوي :D
1- خد اسم الموقع Copy
2- روح على Google.com واعمل Paste للموقع (أيوة هتعمل سيرش في جوجل باسم الموقع)
3- بعدها افتح تبويب الصور Images
4- هتلاقي هناك بقى كل الصور اللي موجودة في الموقع ده مفتوحة قدامك للتحميل 😎
5- لأ خلاص كدا.. ادعيلي بقى <3
صباحو
هواوي انهاردة أثبتت حاجة مهمة جدا
وهي إن كل حاجة فعلا وليها حل!
1. عايزة تعمل موبايل 10 بوصة
بس عايزاه يصغر لحد 6 بوصة
وهي عندها تجربة طويلة في الفولدابلز
سواء اللي بتنتني لبرا Outward أو لجوا Inward
فاستغلت المعرفة دي وعملت جهاز ينفع
ينتني لبرا وجوا فتصغر الشاشة خالص!
2. كانت عايزة تقدم 5600 مللي أمبير ف بطارية
فقررت مش هوجع دماغي وأكدس السعة كلها
ف حتة واحدة، فقامت مقسمة البطارية
على تلات خلايا، كل خلية صغيرة ف ضهر شاشة من الشاشات التلاتة!
3. عايزة الموبايل يبقى رفيع جدا يادوب 3.6 مللي
فقامت موزعة البطارية على 3 خلايا وكمان قللت
من سمك الماتريال المستخدمة ف هيكل الجهاز
وبرضو استخدمت تكنيك مختلف لمفصل الموبايل
4. نيجي للمفصل، وده كان جديد خالص
المفصل هو Tiangong وهو مفصل مزدوج
معتمد على تصميم معقد جدا للدراع اللي بيتني
أجزاء الشاشة عن الحواف، بحيث يفصل سُمك
الأجزاء قليل، وكمان يخلي فيه انسيابية في حركة أجزاء الشاشة التلاتة!
5. طيب ياجماعة الجهاز ده عايزينه يعيش
بسيطة هنصنع المفصل من الفولاذ الصلب
6. هم لونين احمر وازرق والاطارات دهبي
عشان بلاش فرهدة الوان واختيارات كتيرة
7. ميموري 256 جيجا و512 جيجا و1 تيرابايت
كلهم معاهم 16 جيجا رام
8. بروسيسور مجهول كالعادة هواوي بتحب
الساسبنس ولكن متوقع يكون ع الأقل Kirin 9010 5G
9. الموبايل جاي بمزايا كتيرة AI
عشان انشاء التكست والصور والترجمة الفورية
10. السعر منطقي فوق ال 2800 دولار
لانها تقنية جديدة بشوكها، وآخرنا نتفرج!
🗣️ رأيي المتواضع ان هواوي بالجهاز ده نازلة تضرب عصفورين بحجر، الاولاني طبعا تفرض نفسها ف سوق الفلاجشيب "الموبايلات العالية" قصاد تراجع أبل في الصين "خصوصا ان مزايا ابل AI مش معروف هتنزل في الصين ولا لأ، وكملن هتتأخر لحد iOS 18.1"، والعصفور التاني هو انها تاكل من نصيب سامسونج وباقي صناع الفولدابلز!
مساءو
بعد أقل من 5 دقايق
أبل هتنزل أجهزة جديدة والمتوقع:
آيفون 16
آيربودز 4 (إصدارين)
أبل ووتش 10 (أو أبل ووتش إكس)
أبل ووتش ألترا 3 (احتمال ضعيف شوية)
وطبعا كالعادة ممكن تكون فيه احتمالات مبتخلصش
ويمكن نشوف لحظة الـ One More Thing من عملاق التفاحة!
تابعني عشان تعرف الجديد،
وممكن تتفرج كمان لايف من هنا: https://bit.ly/4dfiZ2p
وخليك من ضمن النص مليون بني آدم اللي هيدخلوا يتابعوا المؤتمر من أوله! :O
ميتا أعلنت انها بداية من 2025
واتساب وماسنجر هيبقوا جاهزين
يبعتوا ويستقبلوا رسايل مع الخدمات المنافسة زي تليجرام سيجنال ڤايبر وغيرهم..
وفي 2027، واتساب وماسنجر
هيبقوا جاهزين يستقبلوا ويعملوا مكالمات
مع الخدمات المنافسة!!
🔴 للأسف فيه شرطين عشان ده يتحقق:
1. لازم تبقى عايش في دولة من دول الاتحاد الأوروبي
2. لازم الخدمات المنافسة تبدأ تطبق البروتوكولات والمعايير بتاعت ميتا اللي حددتها عشان يتحقق ده من السنة اللي فاتت!
مساءو
البلوتوث 6.0 وصل🚀
بلوتوث 6 بيعتبر أكبر تحديث للبلوتوث من ساعة ما نزل الجيل الحالي، بلوتوث 5، سنة 2016. الجيل الجديد جاي مع مميزات كتيرة هتفرق في طريقة استخدامنا للبلوتوث في حياتنا اليومية.
💡تحديد أدق لمكان الأجهزة
من أهم المميزات اللي جاي بيها بلوتوث 6 هي Bluetooth Channel Sounding، واللي بتعتمد على إرسال موجات صوتية بتساعد في نقل البيانات بشكل دقيق وفوري. الميزة دي هتمكن الأجهزة المتصلة بالبلوتوث إنها تحدد مكانها واتجاهها والمسافة بينها بدقة.
الميزة دي هتفيد مطورين التطبيقات إنهم يطوروا حاجات جديدة تشتغل على تحديد الموقع بدقة، زي أجهزة التتبع اللي زي AirTag من أبل وSmartTag من سامسونج. فمثلاً، الأجهزة دي هتقدر ترسل موجات صوتية تلتقطها موبايلاتك وتحدد مكان الحاجات اللي ضايعة بدقة، بناءً على انعكاس الموجات دي.
كمان الميزة دي هتضيف طبقة حماية إضافية في حالات زي لما تستخدم موبايلك كمفتاح رقمي لفتح الأبواب الذكية أو العربيات الذكية. لما تقرب من الباب أو العربية، هيتبعت موجات صوتية للموبايل بتاعك عشان يتأكد إنك الشخص الصح اللي معاه المفتاح الرقمي ويفتح لك الباب.
💡استهداف إعلاني ذكي
واحدة من المميزات التانية في بلوتوث 6 هي إنه هيساعد المحلات في الاستهداف الإعلاني بشكل أدق. ميزة Monitoring Advertisers هتخلي المحلات تقدر تتتبع الناس اللي بتمر قدامهم وتبعت لهم رسائل إعلانية لمرة واحدة، من غير ما تكرر الاستهداف وتضيع طاقة. الأجهزة دي كمان هتقدر تلتقط الهواتف لما ترجع تاني لدائرة المحل، وبكده يبقى الاستهداف الإعلاني أكثر ذكاءً وكفاءة.
💡نقل أسرع للبيانات
بلوتوث 6 بيحسن كمان ميزة ISOAL أو "طبقة التكيف التزامني للبيانات"، واللي بتخلي البيانات تتقسم لأجزاء وتتنقل بشكل أسرع. الميزة دي هتفرق معاك لما تسمع موسيقى من موبايلك على سماعات لاسلكية، أو حتى لما تستريم فيديوهات من الموبايل للتلفزيون أو الكمبيوتر.
موبايلي هيشغل البلوتوث 6؟🤔
لحد دلوقتي، SIG لسه ما أعلنتش بشكل رسمي عن موعد نزول الأجهزة اللي هتدعم بلوتوث 6، لان بلوتوث 6 مش سوفت وير بس لا ده طبعا هاردوير متطور،فغالبا كدا هنشوف اول موبايلات بتشغل الجيل الجديد على ٢٠٢٥!
مساءو
من التوقعات اللي طالعة على آيفون 16
إن أبل هتغير ترتيب تصميم عدسات الكاميرا الخلفية،
فبدل ما كانت بترص العدستين في آيفون 15 وآيفون 15 بلس بزاوية
قررت أبل ترجع للتصميم القديم بتاع آيفون 11 إن العدستين يبقوا على خط واحد رأسيا..
طب ليه يا حبيب قلبي؟ 👀
بعد شوية دعبسة محترمة، اكتشفت حاجتين:
1- أبل لو حطت العدستين على خط واحد رأسيا، هتقدر تتبنى هيكل كاميرا أصغر بشكل بيضاوي طولي (شبه حباية الدوا كدا) وده هيوفر معاها في شاسيه الكاميرا أحسن من الشاسيه المربع المعتاد
2- وده الأهم بقى واللي أبهرني..
أبل مع آيفون 15 برو نزلت ميزة اسمها Spatial Video أو الفيديو الاتجاهي
وده ياسيدي فيديو بيتصور بموبايلك الآيفون 15 برو أو آيفون 15 برو ماكس
النوع ده من الفيديوهات بيعتمد في تصويره على الكاميرتين الأساسية والـUltra Wide عشان يتلقط أبعاد مختلفة للعناصر قدام الكاميرا بالنسبة للعدستين، وساعتها الموبايل بيقدر يعمل الفيديو 3D!
الفيديوهات دي عبقرية ومصممة مخصوص من أبل عشان تتفرج عليها
على نضارتها أبل فيجن برو، وبكدا أبل عملت طريقة تعمل محتوى تستهلكه وتتفرج عليه على نضارتها..
هتقوللي ((يا عمي انت توهتني.. ايه علاقة ده بكاميرا آيفون 16؟))
أقولك، أبل على صفحة آيفون 15 برو على موقعها الرسمي
حاطة الصورة دي وكاتبة تحتها ((أفضل طريقة لتصوير فيديوهات Spatial Video هي ان الموبايل يتمسك بالعرض Landscape Orientation))
بحيث الكاميرتين الأساسية والألترا وايد يبقوا أفقيا على خط واحد فيبقى التقاط الأبعاد أدق..
لو طبقنا الكلام ده على التصميم الجديد بتاع كاميرا آيفون 16
هنلاقي ان فعلا لو اتحطت عدستين الكاميرا الخلفية رأسيا على خط واحد،
لما الموبايل يتمسك بالعرض Landscape هيقدر اليوزر يصور فيديوهات Spatial Video..
وبكدا الميزة تنزل للأربع إصدارات بتوع آيفون 16 وآيفون 16 بلس وآيفون 16 برو وآيفون 16 برو ماكس!
وبكدا يبقى في السوق فيه 6 موبايلات تصور Spatial Video وبكدا
ده هيبقى تشجيع أكبر على إنتاج محتوى لنضارة فيجن برو..
وإياك كل ده ينسيك إن النضارة دي بـ 3499 دولار 😅
مساءو
"قعدت ساعة اتناقش معاه..
ياعم انت المكونات دي متنفعش مع بعض
وهو يقوللي أكيد هتعجبهم متقلقش، جرب بس وهتناسب كل الأذواق..
المهم قولت اجرب مش هخسر حاجة، عجنت العجينة
وحطيت:
قطع شاورما فراخ
قطع جبنة بانير هندي مشوية
شوية زعتر وعليه طحينة
دخلت الفرن، خرجت قطعتها، ويادوب كلت حتة..
الطعم ده لا يمكن يكون بتاع بني آدمين.. ده شغل روبوتات
آه بجد فعلا، ما صاحب الوصفة ChatGPT" 😅
🔴 الكلام ده عبر عنه الشيف الهندي Spartak Arutyunyan مسؤول تطوير المينيو في مطعم DoDo Pizza لما اتكلم مع بي بي سي مؤخرا :D
والبيتزا بالطعم الجديد حققت نجاح غير مسبوق على مينيو المطعم!
مساءو
كل الناس عارفة ميدجورني دلوقتي
منصة عملاقة في تصميم الصور بالAI
بس من يومين الشركة دي قلبت الدنيا
لما قالت انها هتدخل سوق الهاردوير وتنزل جهاز 🤯
كل ده كان بنسبالي عادي
(لإن فيه كاميرا بتصور بالAI وكمية أجهزة
كتيرة نزلت مؤخرا شغالة AI وكلها بتقدم
تجارب جديدة كليا بعيد عن الموبايل والكمبيوتر)..
لحد ما عرفت ان اللي ماسك قطاع الهاردوير في ميدجورني.. خريج جامعة المنصورة!! 😵💫👀🔥🚀
أحمد عباس
كان هندسة اتصالات المنصورة دفعة 2006
اشتغل على الهاردوير في أماكن مرعبة 👽
🚨 اشتغل في نيورالينك "بتاعت إيلون ماسك"
9 شهور من 2017 لـ2018
ضمن فريق التكنيكال جوا الفريق المسؤول عن تصميم شرايح نيورالينك الدماغية
🚨 اشتغل في Leap Motion "حوت من حيتان النظارات الذكية"
من 2015 لحد 2019
اتدرج من مهندس هاردوير لحد ما بقى Senior في الشركة
🚨 اشتغل في أبل 🔥🚀
5 سنين
من 2019 لحد 2023
اتدرج ف الوظايف ف العملاق الأمريكي لحد ما استغل على نضارة أبل فيجن برو من 2021 ولحد ديسمبر اللي فات 2023
🚨 اشتغل في ميدجورني، بقى مدير قطاع الهاردوير هناك
من ديسمبر 2023 لحد دلوقتي
وطبعا كدا كلنا عرفنا ايه الهاردوير اللي هتعمله ميدجورني 👀 نضارة ذكية بالAI بتتحكم فيها بمجرد التفكير 🤔😵💫 دماغي جابت 404 error 😅
🔴 عباس وصل ازاي لميدجورني؟! 🤔
ديفيد هولز - مدير ومؤسس ميدجورني -
كان مدير التقنية ومن مؤسسي Leap Motion
من 2008 لحد 2021، وبالتالي اشتغلوا سوا طول مدة شغل عباس هناك! 😎💪🤷
أرزاق وشطارة وسعي❤️
مساءو
شاومي بتخطط تنزل السنة الجاية
موبايل بدون زراير Buttonless!
هتبقى مفروض زراير Haptic (اللي هي تديك فايبريشن لما تدوس عليها)
وكمان جنبين الموبايل Squeezable (اللي هي ممكن تضغط بكف إيدك على جنبين الموبايل بحيث تقدر تشغل أبلكيشنز أو مزايا معينة)
وطبعا أكيد حركات اليد Gestures على ضهر الموبايل وجوانبه هتبقى عملية جدا!
طبعا دي توقعات كلها مفيش أي تأكيد،
بس كفكرة مش جديدة خالص طبعا،
في 2019 شركة Meizu عملت موبايل Meizu Zero 2019
وشركة فيفو عملت موبايل APEX 2019
والاتنين كانوا بنفس الفكرة بظبط، بل ان موبايل ميزو دي كان بدون فتحات كمان HoleLess Phone!
مساءو
بعض الناس في "آبل" شايفين إن الوقت مناسب للدخول في تحدي الروبوتات. وإغلاق مشروع السيارة، اللي كان فيه مئات المهندسين المتخصصين في تكنولوجيا القيادة الذاتية والأنظمة الروبوتية، ساعد في توفير الموظفين والموارد لمتابعة الفكرة بشكل مكثف. لكن في ناس تانية شايفة إن أبل مش هتقدر تعمل فرق في سوق الروبوتات زي ما عملت في سوق الموبايلات!
عايز أقولك إن أبل جدية في قصة الروبوتات، لدرجة انها في 2019 كانت بتحاول تستحوذ على حوت الروبوتات Boston Dynamics، ولكن المفاوضات فشلت، وهيونداي اللي كسبت الرهان وبلعت الاستحواذ!
جزء مهم في شغل الروبوتات هو إنشاء شخصية للأجهزة دي.
معاك طبعا ان "سيري" هي المساعد الرقمي حاليًا في أجهزة "آبل"، بس الشركة شغالة على واجهة تفاعلية إنسانية (مساعد صوتي ذكي بتصميم بشري وتعبيرات وجه كمان) تعتمد على الذكاء الاصطناعي التوليدي، واللي ممكن تشتغل على المنتج المكتبي وعلى الأجهزة الروبوتية المستقبلية التانية!
سوق الروبوتات ف الطالع حاليا، ودخول أبل تحديدا دلوقتي هيفرق معاها إنها تبقى مع الموجة من الأول، خصوصا ان معظم الشركات دخلت السوق ده زي سامسونج وإل جي وهواوي وجوجل كمان، وتطور الـAI السريع مؤخرا هيقلل التكلفة بسرعة جدا خلال الفترة الجاية، وبالتالي تكاليف إنتاج الروبوتات هتبقى أقل، والأسعار هتفضل تنزل لحد ما يبقى سعر الروبوت بيساوي سعر موبايل بـ 1000 دولار!
صباحو
الإثنين 9 سبتمبر
موعد إطلاق آيفون 16 وساعات وسماعات جديدة واحتمال آيباد!
الأكيد؟🤔
شعار It's GlowTime ده يأكدلك فعلا ان الإيفنت ده هيكون إيفنت Siri بدون منازع وطبعا ف قلبه هيكون مزايا الذكاء الاصطناعي Apple Intelligence..
أبل غالبا هتخلي سيري تتحرك ف خلفية كل أجهزتها عشان تربكهم كلهم ببعض وتسيرش بالعرض ف الكل
فوق كدا كمان أتوقع تشويق كدا لتقنيات جديدة خاصة بنضارات أبل فيجن برو!
فكرة كمان جتلي من تقارير بتأكد ان سيستم ماك macOS Sequoia هينزل بدري للماك تزامنا مع الآيفون الجديد عشان أبل تركز اكتر على فكرة ان الاجهزة كلها هتبقى حتة واحدة، وخصوصا فكرة الPhone Mirroring اللي بتخليك تستخدم الموبايل على شاشة كمبيوترات الماك (وكإن الموبايل بشحمه ولحمه ف قلب شاشة الماك)!
من شهر كدا
مجموعة علماء صينيين فاجئونا ببروسيسور عجيب اسمه "تاي تشي-2" TaiChi ||..
ولامؤاخذة بيستخدم النور مش كهربا!
لا مترفعليش حواجبك، افهم هقولك😅
بص ياسيدي، الكمبيوتر أو الموبايل اللي ف ايدك ده شغال بالإلكترونات، اللي هي الكهربا يعني، وهنا معناها ان كدا ف اتحاه واحد للداتا، انما مع الحوسبة الضوئية، أو الـ Optical Computing، فهي بتعتمد على استخدام الضوء بدل الكهرباء في إجراء العمليات الحسابية داخل الأجهزة. وبدل ما الإلكترونات تتحرك في الأسلاك علشان تنفذ العمليات دي، الفكرة هنا إن الفوتونات، اللي هي جزيئات الضوء، بتتحرك في الأنظمة الضوئية وبتقدر تنفذ نفس العمليات الحسابية لكن بسرعة أعلى وكفاءة أكبر.
الفكرة ببساطة إن الضوء، بعكس الكهرباء، ممكن يتحرك من غير ما يتداخل مع بعضه، وده بيسمح بإنجاز مليارات العمليات الحسابية في الثانية الواحدة!
نرجع للشريحة الجديدة،
الشريحة بتستخدم الضوء في تدريب وتشغيل الذكاء الاصطناعي، وده طبعا نقلة كبيرة في مجال الحوسبة الضوئية.
البروسيسور ده بيشتغل بالضوء بالكامل، عكس الجيل الاول منه كان شغال في جزء من انجازه بالاعتماد على محاكاة لشغل الشرايح الضوئية على كمبيوتر، وبالتالي العملية كانت نص ضوء ونض كهربا!
المعالج الجديد مخصوص لتدريب نماذج الذكاء الاصطناعي، وبالتالي بيقدم أداء خرافي في سرعة التدريب وكمان توفير الطاقة المستهلكة!
الباحثين قالوا إن الشريحة القديمة "نص كهربا ونص ضوء" كانت متفوقة في توفير الطاقة عن شريحة إنفيديا H100 بأكتر من ألف مرة.
فما بالك بقى بالجيل الجديد!! 🔥
فواضح ياجماعة ان في الوقت اللي امريكا
فيه قافلة الطريق على الصين ف الذكاء الاصطناعي عن طىيق عقوبات وحدر استيراد السرايح الرائدة بتاعت إنفيديا،
الصين جاية بتقلب.. "نور عااالي" وفاتحة ه الرابع! 😅
امبارح لما وصلني خبر القبض على مؤسس تليجرام بافيل ديوروف في فرنسا، أول ما نزل من الطيارة الخاصة بتاعته، وده في إطار قرار برلماني خاص بتحقيق مفتوح حوالين ان تليجرام بيسهل عمل المجرمين عشان بيخفي هويتهم..
قولت أعمل سيرش سريع كدا عشان أعرف.. اشمعنى يتقبض عليه دلوقتي؟!
أصل تليجرام طول عمره معروف انه عنده مشاكل في كل الدول تقريبا
بخصوص انه بيخفي هوية مستخدميه بشكل غير عادي، حتى قصاد بوتين وفي عقر داره موسكو بيعمل كدا برضو!
لقيت مثير جدا وهو ان وزارة الأمن الداخلي الإسرائيلية كانت ناشرة تنبيه من كام أسبوع حوالين إن الإسرائيليين بدأوا يوافقوا على تجنيدهم من جانب Eراn عشان يعملوا مهمات في قلب تل أبيب، والتجنيد كلو بيحصل على تليجرام من خلال جروبات إيرانية متنكرة في هيئة جروبات إسرائيلية قائم عليها حسابات وهمية لشخصيات افتراضية اسرائيلية مبنية وعاملة نشاط إلكتروني عشان تكسب ثقة المُجندين.. اللطيف؟!
إن المهمات بيعملها الاسرائيليين الناقمين على حكومتهم مقابل فلوس بياخدوها :D
فعرفت سبب القبض على ديوروف دلوقتي.
أخيرا.. ميدجورني Midjourney - منصة تصميم الصور الأشهر بالذكاء الاصطناعي - بقت متاحة *للجميع* في موقع ويب، بعد ما كانت متاحة فقط على منصة ديسكورد!
دلوقتي لما تعمل أكونت، هيجيلك رصيد 25 صورة ببلاش، بعد كدا لازم تدفع وتشترك في باقة من أربع، أرخصهم 10 دولار شهريا!
لو عندك أكونت على ديسكورد ومستخدم قديم،
تقدر تعمل Sign up بأكونت ديسكورد، فيجيلك أكونتك القديم بكل صورة!
صباحو
واتساب بيجرب حاجة عظيمة جدا
مبدئيا كدا هو من سنة تقريبا
بيجرب يخليك تعمل يوزرنيم للأكونت
فمش لازم توزع رقم موبايل على خلق الله..
يجي واحد يقوللي "طب ما حضرتك كدا كل من هب ودب هيكلمني ويقرفني ويوجع دماغي"..
أقوله أنت صح، عشان كدا بظبط واتساب بيجرب
حاجة اسمها Username PIN..
وده رقم سري من 4 أرقام ع الاقل،
تبعته لأي حد عايز يكلمك باليوزرنيم "معهوش تليفونك"..
يجي يبعتلك، فيقوم مدخل الpin بتاعك،
هووب كدا واتساب اتأكد انك موافق وعارف الشخص ده ويسمحله يكلمك عادي..
🔴 الفكرة حلوة بصراحة وهتحمي خصوصية
ناس كتيرة اوي، لانها ميزة اظن معمولة للأشخاص
مش الشركات خالص، وكمان معمولة للناس اللي علاقتك بيهم سطحية يادوب أو مرة واحدة، زي مناديب التوصيل مثلا، حد قابلته ف ايڤنت شغل ومحتاج تتواصل معاه ف الوقت الحالي، شخص مبتطيقهوش مثلا بس لازم تتواصلوا 😅
كل ده ينفع تبعتلهم اليوزر بتاعك والPIN
فتتكلموا عادي، وبعدها عادي جدا ياسيدي اعمله archive او حتى بلوك لو دايقك،
كدا كدا معهوش رقم تليفونك، فمش هيكلمك..
بس اللقطة اللي مش عارف واتساب هيعمل فيها ايه
هي ان الPIN بتاعي مثلا لو حد عرفه، وكدا كدا اليوزرنيم معروف، فأي حد ممكن يديه لأي حد وبالتالي هيكلمني حتى لو انا مش عايز..
فهل ف الحالة دي:
1. هل أقدر ألغي أحقية شخص ما من انه يتواصل معايا بالPIN؟
2. هل لو غيرت الPIN، الناس اللي تواصلت معايا بالPIN القديم هتطير المحادثات بينا؟
أسئلة كتيرة لسا هنعرفها لما الميزة تدخل حيز التطبيق.. امتى؟ لأ الله أعلم ☝️🤷
ايه حكاية مكالمات التليفون بالواي فاي
أو ال WiFi Calling اللي نازلة قريب دي؟! 👀
ميزة "مكالمات الواي فاي" بتخليك تقدر تعمل مكالمات تقليدية باستخدام شبكة WiFi الموجودة حواليك بدل ما تتصل من خلال شبكة الموبايل. يعني من خلال شبكة الإنترنت الأرضي، تقدر تستفيد من خدمة المكالمات، وفي الحالة دي المكالمة بتسلك طريقين: يا إما تستمر عبر شبكة الاتصالات العادية لحد ما توصل للطرف التاني لو الشبكة قوية، أو بتوصل للطرف التاني عبر الإنترنت لو هو كمان مفعّل الميزة دي على موبايله.
🔴إيه الفرق بين WiFi Calling وVoLTE وVoIP؟
لما الناس سمعت عن قرب إتاحة ميزة WiFi Calling في مصر في نهاية السنة، البعض اتلخبط بينها وبين ميزات تانية زي VoLTE وVoIP. ميزة VoIP بتعني إنك تعمل مكالمات صوتية أو فيديو عبر تمرير البيانات خلال شبكة الإنترنت بس، ودي موجودة في تطبيقات زي واتساب وماسنجر وسكايب.
لكن مكالمات WiFi Calling بتختلف شوية، لأنها بتعتمد على تمرير البيانات عبر شبكات المحمول التقليدية كمان. أما مكالمات VoLTE، فبتتم عبر شبكات 4G وبتكون مكالمات عالية الدقة، لأنها بتمرر البيانات عبر مسارين بالتوازي، واحد للمكالمات والتاني للإنترنت، وده اللي بيخليها تشبه شوية WiFi Calling، لكن الفرق إن VoLTE بتعتمد على شبكة المحمول نفسها، بينما WiFi Calling بتعتمد على الإنترنت اللاسلكي.
🔴متطلبات تشغيل ميزة WiFi Calling
علشان تقدر تستخدم ميزة WiFi Calling، لازم مقدم خدمة المحمول اللي مشترك معاه يشغل الميزة دي على شبكته، وكمان لازم موبايلك يدعمها. معظم الموبايلات الذكية سواء كانت أندرويد أو آيفون من أول آيفون 6 بتدعم الميزة دي.
وكمان، لازم تفعّل الميزة دي من جوه إعدادات موبايلك، وده بيكون إما من إعدادات شبكات المحمول أو من إعدادات تطبيق المكالمات. لازم تاخد بالك إن الميزة دي بتظهر بأسماء مختلفة زي WiFi Calling أو HD Calling أو Advanced Voice Calling.
🔴تكلفة مكالمات الواي فاي WiFi Calling
تكلفة مكالمات WiFi Calling بتختلف حسب شركة المحمول، في شركات بتقدمها مجاناً لأنها معتمدة على باقات الإنترنت اللي المستخدم بيدفع عليها، وشركات تانية بتحسب تكلفة معينة. لكن الشركات في مصر هتحسب تكلفة مكالمات الواي فاي بنفس سعر المكالمات العادية لما الخدمة تتوفر في نهاية السنة!