15464
هنا كل جديد من أخبار التكنولوجيا في كل المجالات 📱💻🖨️📞🖱️💾📷🤖
كمان إنفيديا دخلت في سوق الجيمز واستغلت أدواتها وتقنياتها الخاصة بإنشاء اللي إحنا اتكلمنا عليه فوق، اللي هو AI Agents، عشان تقدم شخصيات افتراضية جوه الألعاب تكون مفيدة لتجربة اللاعبين. فمثلًا إنفيديا تعاونت مع مجموعة ألعاب من أهمهم وأشهرهم ببجي عشان تعمل صديق رقمي للاعب يساعده جوه اللعبة، ويبدأ يقترح عليه إزاي ممكن يحقق أكبر عدد من النقاط جوه اللعبة، وطبعًا كله قانوني وما فيهوش غش!
جنب كل ده، إنفيديا نزلت جيل جديد طبعًا من معالجة الجرافيكس ضمن عيلة جديدة RTX 50!
العيلة الجديدة بثلاث إصدارات:
- RTX 5090
- RTX 5080
- RTX 5070 & RTX 5070i
طبعًا جيل الـ 5090 هو الجيل الرائد والقوي جدًا، واللي نازل بميموري 32 جيجا بايت، وده سعره 1999 دولار.
أما جيل الـ 5080 فده نزل بأداء متوسط بميموري 16 جيجا بايت.
والـ 5070 نازل بـ549 دولار.
المرعب في القصة إن الأخير ده جاي بنفس أداء المعالج العالي RTX 4090 الطفرة بتاعة السنة اللي فاتت... بتلت التمن تقريبًا!! لأنه كان عامل وقتها 1599 دولار 🤯.
بص، إنفيديا مش عايزة تسيب حاجة ليها علاقة بالذكاء الاصطناعي من قريب أو بعيد إلا وتاكل منها عيش، الخوف كله إن كل اللي بتعمله إنفيديا ده يقطع عيشنا إحنا... والرزق على الله بقى 🤷🏻♂.
سلطانية شوربة عادية جدا.. صح؟ 🤔
👀 شايف الكائن الابيض اللي ع الطرف ده؟
اهو ده روبوت بينفخ ف الشوربة عشان تبرد 😅
والله مبهذرش🤷🏻♂️
وسعره 25 دولار 👀
سامسونج عايزة تـFold العالم!
في CES 2025،
الشركة نزلت شوية أفكار عبقرية:
1- شاشات للأجهزة المحمولة
واحدة منهم Slidable Flex Duet
ودي بتتمدد أفقيا من الناحيتين بطريقة الSlide
ودي بتكبر من 8.1 بوصة إلى 12.4 بوصة
التانية Slidable Flex Solo
دي بتتمدد أفقيا برضو بس في ناحية واحدة
فبتكبر من 13 بوصة إلى 17.3 بوصة
التالتة Slidable Flex Vertical
دي بقى بتكبر رأسيا لفوق من 5.1 بوصة إلى 6.7 بوصة (أقرب للموبايل أوي)
2- سامسونج قررت كمان تدخل بقوة سوق شاشات السيارات الذكية
فعملت حاجة اسمها Real Black HUD ودي ياسيدي طريقة ذكية
عشان اللي بيسوق يبقى شايف قدامه أهم المعلومات اللي محتاجها
وهو بيسوق زي السرعة وحرارة العربية والبنزين وغيرهم..
الفكرة خرافية لانها بتعتمد على شاشة OLED بتتحط ورا الدركسيون
وهتبقى مصممة عشان تعكس الشاشة محتواها على مساحة باللون الأسود
قدام عين اللي سايق ع الزجاج الأمامي للسيارة..
وبكدا هيبص ع الطريق ويشوف الداتا دي قدام عينه من غير ما يحتاج يبص
ورا الدركسيون أصلا..
الحاجة التانية سامسونج دخلت تقنية Under Display Camera أو يعني UDC واللي هتخلي مصنعين العربيات يقدروا يحطوا كاميرا لمراقبة درجة انتباه اللي سايق طول الوقت، وده هيبقى تحت ازاز الشاشة اللي ورا الدركسيون..
التالتة والجاحد هنا هي الشاشة اللي في نص التابلوه بتاعت العربية
حجمها 18.1 بوصة، وكمان قابلة للطي Foldable
بحيث وانت سايق، الشاشة تبقى قافلة نفسها
أما لو مشغل القيادة الذاتية والعربية سايقة نفسها
فالشاشة هتوسع مساحة الرؤية شوية عشان اللي ف كرسي السوق يتفرج براحته لانه كدا كدا مش مركز اوي ع الطريق..
اما لو العربية واقفة خالص.. فالشاشة هتتفرد ع الآخر
وكلو أوتوماتيك من غير تدخل من البني آدم! :O
3- آخر حاجة بقى هي شاشة 18.1 بوصة
ودي ممكن تستخدم كلابتوب كامل لو مفرودة، ولو مقفول طيها
هتبقى 13.1 بوصة وتقدر تستخدمها مع كيبورد!
صباحو #CES2025
في 2021
وزارة التعليم في الصين
أصدرت قرار انه كل المقاطعات والمدن لازم تبدأ تنظم استخدام الطلبة للموبايلات جوا المدارس..
بس في نفس الوقت لازم يقدموا بدايل عشان الطلبة تقدر تتواصل مع الأهل وقت الحاجة..
عشان كدا المدارس فعلا بدأت تطبق ده تدريجيا من وقتها
وامبارح مدينة تشنجتشو بقت أول مدرسة صينية تحظر استخدام الموبايل بالكامل جوا الحرم المدرسي إلا لأغراض تعليمية!
اللطيف ان التليفونات العامة (زي ميناتل عندنا كدا زمان) كان من البدايل بتاعت الموبايل للتواصل.. والألطف ان المدارس في تشنجتشو حولت كروت الهوية ID بتاعت الطلبة اتجددت، واتحط فيها NFC عشان يتم شحنها رصيد، ويتكلموا عن طريق التليفونات دي جوا المدرسة!
صباحو
امبارح بليل نزل أبلكيشن تليفوني Telephony
رسمي على متاجر التطبيقات على آيفون وأندرويد
(( الغريب انه لما تسيرش عليه على آب ستور يظهرلك بسهولة
حتى لو بتسيرش في جوجل..
إنما على جوجل بلاي ستور مبيظهرلكش خالص لا جوا الستور ولا في السيرش وعشان ألاقيه دخلت دورت على أبلكيشن My NTRA
ومنه روحت على صفحة المطور NTRA ومن هناك لقيت الأبلكيشن بتاع "تليفوني" ))
طيب نيجي بقى للمهم:
1- ايه لزمة أبلكيشن تليفوني Telephony؟
- الأبلكيشن ده مهم عشان تتأكد ان موبايلك معليهوش أي رسوم جمركية
- أي موبايل مستورد واتحط فيه شريحة بعد 1 يناير هيبقى عليه رسوم جمركية ده في حالة انك مصري مقيم في مصر واشتريت موبايل التاجر مستورده (وده العادي لاننا منصنعش موبايلات) وشغلته بعد 1 يناير، أو انك مصري جاي من الخارج ومعاك موبايل جديد من برا وهتفعله لأول مرة في مصر على شريحة عادية أو eSIM في مصر
- لو أنت سايح وجاي فترة مصر ليك 90 يوم ببلاش استخدام على الشبكات المصرية بعدها لازم تدفع الرسوم الجمركية
2- إزاي أستخدم أبلكيشن تليفوني Telephony؟
- الأبلكيشن بسيط جدا، بتنزله وبيطلب منك تدخل الـIMEI الخاص بموبايلك
- لو الموبايل بتاعك بيدعم شريحتين، هتلاقي فيه رقمين IMEI، واحد لكل شريحة.. ولو مشغل كمان eSIM، هتلاقي واحد كمان
- بمجرد ما تدخل رقم الـ IMEI بتاع أي شريحة من الاتنين أو التلاتة
هيقولك على طول إن كان موبايلك تمام متسجلة كل الـ IMEI بتاعته ولا عليك فلوس (وبيظهرلك قيمتها)
فيه نقطتين كمان مهمين أوي:
🔴 مبدئيا تقدر توصل لأرقام الـIMEI بتاعتك بطريقتين:
1- تسيرش في الإعدادات Settings على كلمة IMEI وبرضو تقدر تلاقيها مباشرة في الAbout جوا الاعدادات
2- تقدر تتصل بكود *#06# (من اليمين للشمال) وهيطلعلك الIMEI على طول
🔴 لو موبايلك شغال بالفعل من قبل 1 يناير، وشغال عليه حتى شريحة واحدة (وهو بشريحتين) هتلاقي ان الشريحتين عادي متفعلين ومعليكش فلوس
ولكن لو موبايلك بيدعم ESIM بس مشغلتهاش، غالبا لما تيجي تشغلها لازم هتدفع فلوس على الـIMEI بتاعها لانها مش شغالة بشكل تلقائي زي الشريحتين..
أبسطهالك،
يعني لو موبايلك فيه شريحتين، وانت عمرك ما استخدمت إلا فتحة واحدة لشريحة اتصالات واحدة، هتلاقي مخرج الشريحتين تمام الIMEI بتوعهم متسجل عادي.. إنما الـeSIM لازم تفعلها عشان يظهرلك الـiMEI بتاعها وبالتالي لما تشغلها بعد 1 يناير.. هتلاقي لازم تدفع (بنسبة 99%)
صباحو
عندك 10 دقايق؟ 🤔
تعا نلم السنة🏃🏻♂️.. يلا بينا 👇🏻🔥
ممكن خلال سنة 2024 يكون فيه طفرة كبيرة في نماذج الذكاء الاصطناعي سواء على مستوى التكست أو الفيديوهات أو الصور.
على مستوى التكست، نماذج الذكاء الاصطناعي بدأت تقدر تفهم أكتر كلام واستفسارات المستخدمين أحسن من قبل كده بكتير، وكمان بتقدر تعرض معلومات أدق بكتير لأنها بقت جواها قدرة أكبر على البحث على الإنترنت مع إظهار المصادر.
طبعًا ده غير إنها بقت قادرة على التفاعل الصوتي مع المستخدمين، فالتجربة ما بقتش أقرب للشات النصي، إنما أقرب لدردشة لايف بين اتنين أصحاب. وطبعًا ضيف على كده كمان إنها بتقدر تفهم أحسن اللي هي شايفاه بالكاميرا!
برده المجالات اللي اتطورت بشكل كبير هو إنشاء الصور بالذكاء الاصطناعي.
دقتها أعلى شوية من الأول، بس التطور اللي حصل السنة دي واللي أنا شايفه بشكل قوي هو إن الميزة دي بقت متاحة في منصات كتير جدًا زي ميتا ومختلف شبكاتها زي واتساب وماسنجر.
وأكيد التطور الكبير اللي حصل في دقة النماذج اللي أصلًا بتصمم صور زي ميدجيرني وImagen 3 من جوجل، وأكيد DALL-E في قلب ChatGPT. برده ما أقدرش أنسى أبدًا التطور الكبير اللي حصل في النماذج الخاصة بإنشاء الفيديوهات واللي ظهرت بقوة خلال الأسابيع القليلة اللي فاتت، وعلى رأسهم أكيد Sora من شركة OpenAI وأكيد كمان Veo2 من جوجل، وضيف عليهم طبعًا Pika 2 وKling AI 1.6 وRunway 3.
الغالبية العظمى من النماذج دي بقت تقدر تفهم بشكل أفضل بكتير العلاقات بين العناصر جوه الفيديوهات اللي بيعملوها، وبالتالي بيتم مراعاة عوامل كتير زي الجاذبية، طبيعة الأسطح، جغرافية الأماكن. وده بيخلي الفيديوهات تظهر واقعية جدًا، ما عدا إن لسه برده تصميم البشر وحركة أجزاء جسمهم المختلفة من أهم العيوب اللي بتسهل التعرف على إن الفيديو ده حقيقي فعلًا ولا معمول بالذكاء الاصطناعي.
برده فعليًا حصل تطور كبير في إنشاء الصوتيات بالذكاء الاصطناعي، سواء على مستوى المزيكا أو على مستوى كمان إنشاء مقاطع صوتية بأصوات بشرية سواء كلها مصطنعة ومش حقيقية أو بتقلد أصوات بشر حقيقيين.
وبصراحة، في التلات مجالات حصل تطور وطفرة ضخمة جدًا هتساعد صناع المزيكا إنهم يبدعوا أكتر.
في نفس الوقت، عملت أزمات كبيرة بين بعض المغنيين بسبب انتحال أصواتهم وانتهاك حقوق ملكيتهم لأصواتهم، وده عمل أزمات مع شركات الإنتاج وكمان خلق حالة من الخلاف بين بعض المغنيين بسبب إن جمهورهم عمل أغاني بالذكاء الاصطناعي بأصواتهم عشان يشتموا بعض!
وطبعًا مش هتكلم عن إن كل أدوات الذكاء الاصطناعي اللي اتطورت بشكل ضخم جدًا السنة دي تم استخدامها في عدد كبير جدًا من الاختراقات وعمليات الاحتيال الإلكتروني والهجمات السيبرانية!
في الوقت اللي حصل فيه تطور ضخم جدًا في نماذج الذكاء الاصطناعي وقدرتها وطرق تدريبها وتطورها، كان فيه مجموعة من الشركات بتحاول إنها تستخدم النماذج دي وتوظفها لخلق جيل جديد من الأجهزة الذكية.
بس للأسف، بشكل كبير، كل المحاولات ما حققتش النجاح المتوقع منها، بل بالعكس بعضها فشل فشل ذريع. والمشكلة الرئيسية كانت إن المستخدمين ما كانوش قادرين يحددوا بالظبط إيه الميزة الفارقة بجد اللي تخليهم ياخدوا قرار إنهم يشتروا جهاز جديد بمئات الدولارات وأحيانًا بتوصل لآلاف الدولارات.
النوع ده من الأجهزة لسه برده مش قادر يحط في خطط الماركتينج بتاعته الميزة الأساسية أو اللي بنسميها الـKiller app اللي تخلي الجهاز يبيع بالظبط. كده زي الموبايلات، فالـKiller app مثلًا في الموبايل هو إنك بتقدر تعمل مكالمات، تبعت مسجات، تدخل على الإنترنت من أي مكان وفي أي وقت. ده خلّى الموبايل جهاز ما نقدرش كلنا نستغنى عنه، وهي دي النقطة اللي لسه الجيل الجديد من الأجهزة المعتمدة بالكامل على الذكاء الاصطناعي مش قادر يحققها!
2024 ما كانتش سنة الموبايلات قوي. كل الشركات تقريبًا كانت بتحاول إنها تدخل الذكاء الاصطناعي بشكل أو بآخر. ويمكن أتقل اتنين في القصة دي كانوا أبل وسامسونج، والاتنين المزايا بتاعتهم ما كانتش أقوى حاجة، ولا كانت السبب الرئيسي في مبيعات موبايلاتهم. بس ده ما يمنعش برده إن مواصفات الموبايلات وتصميمها وقدرتها على مستوى الأداء، البطارية، العدسات، الكاميرات لعبت دور مهم في إن الشركات دي تقدر تبيع بمليارات الدولارات.
يمكن اللي كانت بتغرد شوية خارج السرب هي هواوي، اللي قدرت بشكل كبير إنها تحقق حاجة كانت محتاجة تعملها من زمان، وهي إنها تنزل نظام تشغيل مخصوص لنفسها سواء يشغل موبايلاتها أو كمان يشغل كل الأجهزة بتاعتها من أول اللابتوبات والموبايلات ولحد السيارات الكهربائية.
وكمان حاطة خطوة مهمة جدًا وهي إن موبايلاتها اللي بتشغل نظام تشغيلها الخاص مش هتقدر تسطب تطبيقات الأندرويد التقليدية المتاحة أون لاين من برة ستور جوجل، واللي بتبقى عبارة عن ملفات موجودة على مواقع أون لاين بامتداد APK.
مدرسة أمريكية مفيهاش مدرسين بشر.. كلهم AI🤖
أكاديمية أمريكية اسمها Unbound Academy قررت تعمل نظام تعليم مختلف حبتين..
نظام تعليمي قايم على حصة ساعتين يوميا
بيدرس فيها الـAI للطلبة البشر 9 سنين لحد 13 سنة
بحيث الذكاء الاصطناعي هيبقى شغال على تابلت او كمبيوتر ويقدر يقيس قدرات الطلاب ف الوقت الفعلي real time وبالتالي يطور أسلوب الشرح حسب قدرات واستيعاب كل طالب وده ينعكس كمان على مستوى سهولة او صعوبة الاسئلة للتقييم..!!
باقي اليوم؟
لا كلو بقى ورش عمل وأنشطة عملية
على مواضيع زي الثقافة المالية وريادة الأعمال وأساليب عرض الأفكار.. ودي بيقدمها خبراء متخصصين بشر
الأكاديمية طبقت الكلام ده في مدارس خاصة في فلوريدا وتكساس.. وحاليا داخلة بيه في أريزونا مع مدارس حكومية مستقلة Charter Achools زي التجريبي عندنا كدا!!
مساءو
من زمان والهاكينج يعتبر واحدة من أكتر الحاجات اللي بتقلق الناس في أي مكان..
زمان كان فيه حركات نص كم كدا تخلي حد
يبعتلك لينك "وممكن يكون صاحبك" ويقولك
شوفت الصورة دي ليك اونلاين بص كدا،
تدوس عليه، بدل ما تشوف الصورة، تشوف العصفورة
ويركب موبايلك..
الموضوع اتطور اكتر وبقى trend-related
يعني كل ما يطلع تريند تلاقي كامبين لينكات محترم
بيشتغل، ع الميل وف السوشيال ميديا وواتساب
لانه عارف ان كل الناس مهتمة تعرف عن الموضوع التريند، فمعندهاش مشكلة تستعجل وتجري تدوس اللينك المهم تشوف القط أم راسين..
بس مع موجة الـAI وتحديدا الذكاء الاصطناعي التوليدي GenAI، دخلنا ف ليڤل تاني خالص..
وهو ان الهجمات بقت بتحصل بحرفية أعلى كتير
فالانجليزي او العربي بتاع الايميلات او المسجات
اتحسن كتير لان اللي بيكتب مبقاش الهاكر، بقى الAI
والهجمات مبقتش تكست بس،
لا كمان بقت مكالمات صوت وفيديو بحرفية عالية جدا
تخليك تتجاوب وتصدق وتقتنع، وتحول فلوس كمان
والأنقح ان الهاكرز بقوا يستغلوا الAI عشان يلاقيلهم
ثغرات أصلا يستخدموها كمان في الهاكينج..
والموضوع مبقاش أفراد بس، لا كمان
شركات ومؤسسات وحكومات بتخسر مليارات من هاك..
كل ده كوووم
والهجمات اللي بقت بتستهدف شبكات الموبايل
في كل حتة في العالم كوووم تاني خالص..
فعندك مثلا الهجوم الصيني Salt Typhoon
على كل شبكات الموبايل الأمريكية حرفيا مركّع امريكا
والبنتاجون محذر كبار المسؤولين من استخدام موبايلاتهم ف المكالمات والSMS لان الهجوم لسا شغال لايڤ حتى الآن ومش عارفين يقفوا قدام الطوفان ده..
وبرضو فيه لسا أسئلة كتيرة ف دماغي متجاوبتش
عن الـ eSIM وهو ليه الآيفون مكنش بيجيب ان حد waiting وأنت بتتصل بيه وهو ف مكالمة تانية وبرضو الWiFi Calling ممكن أساسا توصل امتى مصر ومحتاجة ايه عشان تبقى متاحة؟!
🎙️عشان كدا حبيت نعمل بودكاست لطيفة كدا في بيس على إكس ((بفكر اسميها #TechTalks🤔)) انهاردة 10 بليل مع اتنين من قلب أمن المعلومات في مصر وهم المهندس محمد فتحي Mohamed Fathy مدير أمن المعلومات في شركة Cylert، والمهندس محمد الجزار Mohamed El Gazar مدير أمن المعلومات في شركة Inovasys هندردش فيها ف كل اللي فوق ده وأكتر بكتير 🔥🔐🛡️🚨
شركة Red Rabbits أعلنت انها دلوقتي بدأت مرحلة الطرح الأولي لروبوتها "مفتوح المصدر بالكامل والقابل للتطوير وإعادة التشكيل حسب الطلب" ف المصانع وسلاسل التوريد وخطوط الإنتاج لانجاز الاعمال الخطرة والمملة والمتكررة بدل البشر!
سعر الوروبت الواحد 20 ألف دولار تقريبا..
وده شامل الصيانة الدورية!
الروبوتات حاليا ف الاختبارات الأولية هيتم التحكم فيها عن بعد
المرحلة التانية هتبقى بتتحرك وتتحكم في نفسها بشكل نصف آلي.. المرحلة الأخيرة، الآلية الكاملة!
مساءو
المناقشة مسجلة:
https://x.com/iMohamedAdel/status/1867934364803498242
الحمدلله امبارح بودكاست الـAI والروبوتات على إكس كان فوق التوقعات بكتير بفضل الله وأصحاب الخبرة أصدقائي اللي شرفوني المهندس Mohamed Shokry El Kholy والمهندس محمد عبد الرحمن "هتلاقوا لينك بروفايله النشط على لينكد إن 👇🏻"..
والحمدلله المناقشة كاملة متاحة مسجلة 👇🏻
صباحو
دلوقتي على ChatGPT
تقدر تخليه "يشوف" بكاميرا موبايلك
أي حاجة حواليك، سواء بالسيلفي او الخلفية
وتسأله عن اللي هو شايفه..
كمان تقدر تعمل Share Screen للمعروض على موبايلك، وتطلب مساعدته أو رأيه ف اللي على الشاشة.. زي مثلا يقترح عليك رد على مسج، او رأيه في صورة أو حتى تقدر تسأله عن أي حاجة ظاهرة ع الشاشة وانت بتستخدم الموبايل عادي..
🔴 الميزة دي نازلة لكل مشتركين شات جي بي تي بلس وشات جي بي تي برو من انهاردة توصل تدريجي للكل لحد الاسبوع الجاي
🗣️ رأيي الشخصي المتواضع
كدا احنا عدينا كل المراحل اللي تخلي شات جي بي تي كائن بيشوف وبيسمع وبيدرك وبيتكلم،
الخطوة التانية انه يبقى له جسم ودي بالفعل حصلت زي استثمارات OpenAI الضخمة في شركات روبوتات كتيرة أشهرهم وأتقلهم Figure AI..
وأعتقد برضو الخطوة الجاية انه يوصله ميزة ال Tools Use بمعنى انك تطلب منه يعمل حاجات على موبايلك وهو يقدر ينجزها عادي من نفسه، خصوصا ان كم الداتا اللي OpenAI هتجمعها من استخدام المستخدمين لميزة ال Screen Share دي هتخلي ChatGPT مساعد صوتي ذكي جاحد قريب جدا هيعدي سيري واليكسا وجوجل أسيستانت بمراحل، الا بقى لو جوجل قررت تعمل الدنيئة وتنزل جيميناي الملعب ويبلع سوق الموبايل على أندرويد بسرعة!
احنا لسا بنعافر عشان أبل تشتغل عندنا في مصر..
الإمارات: أبل تبدأ تشغيل خدمة الدفع مباشرة على الآيفون بدون مكنة دفع🤤
دي خدمة اسمها Tap to Pay on iPhone
بتخليك تنزل أبلكيشن رسمي من أبل بيحول الآيفون لمكنة دفع
أي حد يقدر على ضهر موبايلك يخبط لمسة خفيفة بكارت بنك او آيفون أو أي موبايل فيه NFC، يقوم دافعلك فلوس 💸
ياجماعة طالما أبل باي بدأت تشتغل
يبقى مسألة وقت عشان جوجل باي وسامسونج باي وأي خدمة تانية فيها دفع مباشرة بالموبايل تشتغل عادي..
"انت ليه واثق أوي كدا يعني؟"🤔
لإن حضرتك احنا عملنا أهم حاجة أصلا وهي الحاجة الأساس لكل ده
وهي عملية ترميز البطاقات البنكية أو ما يعرف باسم Tokenization
ودي حضرتك عملية بيتم فيها استبدال مشاركة بيانات الكروت البنكية بتاعت المستخدمين لبيانات زي الـ16 رقم بتوع الكارت وتاريخ الإنتهاء ورمز التحقق CVV بكود عشوائي مكون من شوية أرقام وحروف مميزة..
مفيش كارتين في العالم ليهم نفس الرقم العشوائي ده واللي اسمه Token..
التوكين ده ياسيدي بيستخدمه موبايلك لما تيجي تدفع على أي مكنة دفع POS في أي محل، أول ما تقرب الموبايل ويبقى بينه وبين المكنة 4 سنتيمتر أو أقل،
هووووب موبايل يبعت التوكين للمكنة
والمكنة تبعت التوكين ده للبنك اللي المكنة تبعه
والبنك يبعت التوكين ده للشبكة اللي تبعها الكارت المتسجل في موبايلك (إن كانت فيزا أو ماستركارد أو غيرهم)
وهوووب المعلمين دول يبعتوا التوكين للبنك بتاعك
عشان البنك يفك شفرة التوكين (ويكشف بيانات الكارت ويخصم الفلوس اللي دفعتها من حسابك) وساعتها
تحصل العملية بالعكس،
البنك بتاعك يبعت لشبكة الكارت ومنها إلى البنك اللي تبعه المحل، ومنه إلى مكنة الدفع، ساعتها هيطبعلك إيصال الدفع
ويجيلك على الموبايل رسالة إنك فعلا دفعت واتخصم منك!
وشكرا كدا ✌️
بصراحة مش عارف أجيبها لك إزاي، ولكن اللي إنفيديا أعلنت عنه الفجر النهارده هيغير العالم على الأقل لحوالي 50 سنة قدام!
جنسن هوانج، مدير إنفيديا، وقف وقال إن دلوقتي بدأ عصر جديد تمامًا للذكاء الاصطناعي، وهو شايف فيه فرصة ممكن الشركات تعمل بها تقريبًا مليارات الدولارات.
العصر اللي بيتكلم عليه مؤسس إنفيديا هو عصر الروبوتات بكل أشكالها...
سواء روبوتات مادية، اللي هي شبه البشر أو أيا كان شكلها إيه بس ليها جسم ملموس على أرض الواقع...
أو كمان روبوتات برمجية، أو اللي قريب هتبدأ تتعود إنك تسميها AI Agents!
إنفيديا النهارده نزلت كمية أدوات برمجية مش طبيعية بتستهدف بيها إن كل المطورين والشركات في كل المجالات يقدروا يستخدموا الذكاء الاصطناعي ويعملوا به روبوتات برمجية تقدر تساعد كل الموظفين مهما كانت درجة بساطة أو تعقيد المهمة اللي هم محتاجين يقوموا بيها.
كمان، إنفيديا نزلت مجموعة أدوات بتحل مشكلة صعبة جدًا، تقريبًا كل اللي شغالين في مجال الذكاء الاصطناعي الكم أسبوع اللي فاتوا اشتكوا منها، وهي قلة البيانات المتاحة لتدريب نماذج الذكاء الاصطناعي عشان تتطور وقدرتها تبقى أحسن.
الأدوات دي بكل بساطة بتركز على فكرة إنها تنتج محتوى بشكل معين عشان نماذج الذكاء الاصطناعي تحللها وتتدرب عليها فتفهم وتتطور أكثر.
والكلام ده على مستوى تدريب النماذج اللي هتشغل الروبوتات البرمجية أو كمان الروبوتات المادية...
فمثلًا لو عندك نماذج ذكاء اصطناعي بتشغل روبوتات مادية بتستهدف قطاع المصانع والمخازن، فإنت ممكن تستخدم الأدوات بتاعة إنفيديا دي عشان تعمل كم ضخم جدًا من الفيديوهات اللي بتعرض سيناريوهات ومواقف مختلفة بيتعرض لها الروبوتات وهي شغالة في المصانع والمخازن، وبعد كده الفيديوهات دي بتدخل لنماذج الذكاء الاصطناعي تتدرب عليها، وبعد كده توصل لدماغ الروبوتات، اللي بالحالة دي تبقى اتعلمت بالظبط زي البشر!
المسألة الثانية اللي اشتغلت عليها إنفيديا إنها قدمت نماذج ذكاء اصطناعي خاصة بها بتشتغل بكل الطرق، سواء محليًا، يعني نماذج الذكاء الاصطناعي تشتغل وتعالج البيانات على جهاز المستخدم نفسه من غير إنترنت خالص، أو في الكلاود.
ده غير إنها كمان نزلت نماذج ذكاء اصطناعي مفتوحة المصدر بالتعاون مع أكبر منصات شغالة في سوق نماذج الذكاء الاصطناعي مفتوحة المصدر، وعلى رأسهم طبعًا ميتا.
ضيف لي كده كمان إنها نزلت نماذج ذكية جديدة تمامًا اسمها كوزموس، ودي هدفها الرئيسي إنها تحلل أي شكل من أشكال المحتوى المصور من صور أو فيديوهات عشان تقدر الشركات المختلفة إنها تستفيد من المحتوى اللي بتلقطه أشكال كثيرة من الكاميرات اللي موجودة في حياتنا، زي كاميرات المراقبة في كل مكان، وكمان كاميرات العربيات ذاتية القيادة، وكمان كاميرات الدرونز، وغيرها من الكاميرات. ده طبعًا اللي بيبقى ليه تطبيقات كثيرة جدًا في مجالات مختلفة زي المراقبة والأمان والمصانع وغيرهم.
ضيف لي كده كمان إن النوع ده من نماذج الذكاء الاصطناعي ممكن يفتح باب كبير من الخدمات والتطبيقات على مستوى المحتوى الترفيهي. زي مثلًا النماذج دي ممكن تشغل مزايا جديدة على تطبيقات بث المحتوى، زي نتفليكس وشاهد وغيرهم، بأنك تعرف مثلًا معلومات عن لاعب معين أو تعرف تاريخه وأداءه في المباريات اللي فاتت والماتش شغال وهكذا.
في جزء برضه من نماذج كوزموس دي اسمه كوزموس وورلد، وده نوع من النماذج بيعلم الروبوتات المادية إزاي تتحرك وتتفاعل وتتعامل مع العالم اللي حواليها زي البشر بالظبط. النماذج دي متدربة على تقريبًا 20 مليون ساعة من الفيديوهات اللي بتعرض البشر وهم بيتحركوا، وبيمشوا، وبيجروا، وبيتفاعلوا مع حاجات كثيرة بإيديهم ورجليهم وجسمهم عشان الروبوتات تقدر تفهم وتعرف إزاي تتعامل مع العالم بشكل آمن وسليم.
إنفيديا كمان علّت على نفسها ونزلت مجموعة أدوات بتخليها تقدر تعلم الروبوتات من خلال المحاكاة. يعني الروبوت يتعلم من خلال إنه يشوف البني آدم إزاي بيعمل المهمة دي، وده ممكن يتعمل من خلال تتبع ورث حركة جسم الإنسان وإن الداتا دي تتنقل في الآخر للروبوت نفسه. إنفيديا هنا ضربت مثال مهم جدًا باستخدام نظارة أبل فيجن برو، إن الإنسان يبقى لابسها وهو بيعمل مهمة معينة وفي نفس الوقت الداتا دي تروح للروبوت يقلد الإنسان في نفس اللحظة!
إنفيديا ما وقفتش لحد الروبوتات، إنما كمان دخلت على العربيات، لأنها نزلت مجموعة أدوات هتستخدمها شركات كثيرة زي أوبر، إنها تبدأ تخلق كم كبير من الداتا اللي تعلم بيها سياراتها ذاتية القيادة إزاي تسوق في ظروف وبيئات ومواقف مختلفة من غير ما تحتاج تمشي في شوارع وتخوض التجربة أو تتعلم بالطريقة الصعبة. فكده هيبقى متوفر كمية داتا ضخمة جدًا كلها بتعمل محاكاة للظروف اللي ممكن العربيات تمر بيها في الحقيقة، بس كل ده بيحصل في بيئة افتراضية في قلب الذكاء الاصطناعي!
فكرة عبقرية عشان تأمن الفلاشة بباسورد
من غير ما اللي جمبك يضرب عينه ف الكيبورد يشوف الباسورد😅👀😝
دلوقتي لو فاتح واتساب من الكمبيوتر (أبلكيشن الديسكتوب مش موقع الويب)
تقدر تخزن Save أي صور تجيلك بسهولة جدا،
من خلال انك تفتح الصورة، ومن الكيبورد دوس CTRL + S..
ودوس Enter!
بس خلاص شكرا كدا 💁
صباحو
أعتقد هتبقى واحدة من أروع صور السنة 2025😅
🧠 عشان تفهم:
دي عربية سايبرترك "من تصنيع تسلا بتاعت إيلون ماسك" ولعت وفرقعت قدام فندق ترامب في لاس فيجاس..
لسا مش لاقط؟ 👀 (ماسك دعم ترامب ف انتخابات الرئاسة الأمريكية، لحد ما كسب والاتنين خاربين الدنيا حاليا بتحالفهم ده).. فالصورة نبذة عن طبيعة التعاون بينهم😁
مساءو
وما أضحكش عليك، برده هواوي بدأت تعمل Ecosystem بيجي مع كل أجهزتها الذكية ويسهل على المستخدم إنه يستفيد بتجربة متكاملة بينها كلها، سواء من نقل للملفات بينها وبين بعض أو إنه يبدأ ينجز شغله على جهاز ويقدر يكمل على جهاز تاني. الخطوة دي كمان خلت هواوي تقدر تحط نفسها رأس برأس مع أبل، اللي بيتضرب بيها المثل في نقطة الـEcosystem. وكمان تثبت للسوق كله إنها لسه موجودة وقادرة تنافس رغم حرمانها من المعالجات الأمريكية بتاعة كوالكم وكمان حرمانها من أندرويد بتاع جوجل!
ما أضحكش عليك، بدأت أحس إن سوق السوشيال ميديا شوية بدأ يروح أكتر ناحية التواصل الخاص، اللي هو الـPrivate Social Media. تقريبًا كل الشبكات في 2024 حاولت إنها تقدم أدوات تساعد المستخدم إنه يحافظ على خصوصية بياناته ويحافظ على خصوصية اللي بيشاركه على السوشيال ميديا. وكمان بدأوا ينزلوا أدوات جديدة تسهل على المستخدم إنه يشارك محتوى أكتر مع الناس اللي يهمه. وده طبعًا جزء كبير منه بيتعمل بالذكاء الاصطناعي. واللي متفردة بصراحة في المسألة دي هي ميتا، اللي نزلت Meta AI في قلب فيسبوك، إنستجرام، واتساب، وماسنجر. المساعد الذكي ده بقى يقدر يتفاعل مع المستخدمين ويقدم ليهم اقتراحات بناءً على المحتوى اللي بيتكلموا عنه أو بيشاركوه.
في الوقت نفسه، ثريدز قدرت تاخد خطوات كتير عشان تكون جزء من السوشيال ميديا اللامركزية أو الـDecentralized Networks. دلوقتي أي حد على ثريدز يقدر يعمل فولو لأي حد على شبكات تانية زي ماستودون، وكمان يتفاعل مع المحتوى اللي هناك بشكل طبيعي. ده غير طبعًا المزايا الجديدة اللي الشبكة قدمتها عشان تجاري المنافسة القوية اللي حصلت بسبب بلو سكاي. بلو سكاي اكتسبت رواج واسع جدًا بعد ما ترامب كسب في الانتخابات الأمريكية اللي فاتت في نوفمبر، وده خلّى المنصة تحقق ارتفاع قياسي في عدد المستخدمين الجدد، خصوصًا بعد الهجرة الجماعية اللي حصلت من منصة إكس (تويتر سابقًا) بسبب دعم إيلون ماسك للرئيس الأمريكي الجديد.
أما بخصوص الروبوتات، مع التطور الكبير اللي حصل في نماذج الذكاء الاصطناعي وقدرتها على إدراك العالم وفهم اللي بيحصل حواليها بشكل أفضل، ظهرت طفرة كبيرة في سوق الروبوتات. بقى فيه كمية روبوتات جديدة ضخمة جدًا، وكلها بتتروج على إنها روبوتات معتمدة على الذكاء الاصطناعي، وفي قلبها نماذج ذكية بتخليها تقدر تتفاعل مع البشر بشكل طبيعي وآمن. ظهرت روبوتات منزلية زي روبوت Neo Beta من شركة 1X، واللي بيقدر يساعد في الشغل اليومي في البيت. كمان فيه روبوتات متخصصة زي Figure 02 اللي بيشتغل في خطوط إنتاج مصانع BMW وبيساهم في تحسين الكفاءة وتقليل الأخطاء في التصنيع.
غير كده، ظهرت أدوات برمجية ومنصات جديدة بتسهل على الشركات تدريب الروبوتات دي بطرق مبتكرة. التدريب اللي كان زمان بيعتمد على إدخال قواعد بيانات أو فيديوهات بتصنيفات واضحة بقى دلوقتي يعتمد على إن الروبوت يتفرج على الفيديوهات بنفسه ويفهمها بشكل مباشر. الخطوات دي بتقربنا أكتر من فكرة إن الروبوت يبقى جزء من حياتنا اليومية، سواء في الشوارع، الكافيهات، السوبر ماركت، أو حتى في أماكن الشغل.
بالنسبة للنظارات الذكية، 2024 كانت من أحسن السنين اللي عدت على السوق ده. نظارة أبل "Apple Vision Pro" أخيرًا وصلت للسوق بعد ما كانت مخصصة للمطورين بس في 2023، بس أبل نفسها قالت إن المنتج ده مش معمول للجمهور العادي، وده بسبب تصميمه الفخم وسعره العالي.
في المقابل، ميتا لسه متفوقة بمنتجاتها زي Meta Quest 3 وMeta Quest 3S، واللي بقت تعتبر من أقوى النظارات الذكية في السوق.
الميزة الكبيرة اللي بتميز ميتا هي التركيز على تطوير الألعاب والمحتوى، بجانب فرق السعر الضخم اللي بيخلي منتجاتها متاحة لعدد أكبر من المستخدمين مقارنةً بأبل.
النظارة الجديدة من ميتا، Meta Ray-Ban، دخل فيها الذكاء الاصطناعي بشكل قوي جدًا.
بقى فيها مساعد ذكي اسمه Meta AI، واللي بيقدر يتفاعل مع المستخدم بالصوت، وكمان يجاوب على أي استفسارات بخصوص الحاجات اللي المستخدم شايفها قدامه. الكاميرا المدمجة في النظارة بتخلي المساعد ده يقدر "يشوف" اللي قدام المستخدم ويتفاعل معاه.
على الجانب التاني، جوجل دخلت المنافسة وطرحت نظام تشغيل جديد للنظارات الذكية اسمه Android XR، وده اتطور بالشراكة مع سامسونج وكوالكوم. أول نظارة بتشغل النظام ده متوقع إنها تنزل السوق في 2025، وده هيزود المنافسة بشكل كبير بين اللاعبين الرئيسيين في السوق.
مساءو
تعرف إن حواسك ونقاطك الشعورية في جسمك بتقدر تجمع تقريبا تريليون نقطة بيانية (Trillion Bits of Data) في الثانية الواحدة..
ولكن مخك بيقدر يادوب بس يعالج 10 نقاط بيانية في الثانية عشان يقدر يعمل المهام الطبيعية بتاعتك زي انك تتكلم وترد وتشرب وتاكل وتكتب وتفكر وهكذا..!
مساءو
السنة اللي فاتت فيه مدينة اسمه صوريا في اسبانيا
شاب 33 سنة كان رايح لحبيبته تقريبا.. وفجأة، اختفى!
ملهوش أي أثر، أهله وصحابه بلغوا عن اختفائه
الشرطة وسعت البحث ومفيش أثر..
لحد ما لقوا بقايا بشرية في مقبرة في المدينة
بس متعرفش بتاعت مين، وبعد تدخل الطب الشرعي
اتعرف انها أجزاء من أعضاء الشاب ده!!!
التحقيقات الموسعة عشان يتعرف مين عمل كدا في الشاب
تضمنت طلب قانوني من الشرطة الإسبانية اتقدم لجوجل
عشان تتجاب الداتا الخاصة بتواجد كل الناس في محيط منطقة جغرافية معينة (طبعا اعتمادا على بيانات الGPS بتاعت الموبايلات الأندرويد وكدا..
ومن ضمن الداتا دي كمان كانت بيانات من خدمة Google Street View..)
وهنا كانت الصدمة!!
الصورة اللي في البوست دي سكرين شوت من لقطة لقطتها كاميرات
جوجل ستريت فيو، واللي بتبين واحد بيحط كيس ضخم في شنطة عربية..
واتجاب الشخص بعد تحقيقات مطولة جدا..
واتعرف ان ده هو الحبيب السابق لحبيبة الشاب اللي اختفى
وبعد ضغط طويل، اتعرف ان الحبيبة وحبيبها السابق اتخلصوا منه
واتقبض عليهم في نوفمبر..!
بالمناسبة،
في 2022، صورة برضو من جوجل ستريت فيو ساهمت
في انه يتقفش عنصر خطير من عناصر المافيا في إيطاليا! 🤯
امبارح بودكاست#TechTalks مع جزار Mohamed El Gazar وفتحي Mohamed Fathy راح ف حتة تانية خالص..
وفتحنا فيه شوية ملفات عن أمن المعلومات والخصوصية وازاي شبكات الموبايل بتشتغل وتتأمن واتكلمنا عن شوية اختراقات.. ترعب🥶
🎙️اسمعوا البودكاست في سبيس مسجلة على إكس🙏🏻 الـ📎 في أول 💬
صباحو
امبارح OpenAI عملت حركة "كش ملك" على جوجل في شطرنج السيرش!
1- دلوقتي السيرش على الويب في ChatGPT بقى مجانا لكل الناس، المهم تعمل أكونت
2- وأنت مفعل ميزة السيرش (علامة الكرة الأرضية في مربع الكتابة)، هتلاقي ChatGPT بقى يظهرلك نتايج بحث إجابة على استفسارك بحيث تدوس على أي نتيجة وتفتح معاك موقع المصدر مباشرة (زي جوجل)
العبقري برضو ان نتايج البحث كمان ممكن تعرض خرايط من أبل مابس أو جوجل مابس حسب موبايلك آيفون أو أندرويد، وكمان فيديوهات وتقدر تشغلها في قلب ChatGPT من غير ماتسيبه وتروح موقع تاني، وكمان تقدر تاخد أرقام ولوكيشنز مطاعم وكافيهات من جوا الشات برضو!!
3- دلوقتي تقدر تخلي ChatGPT هو محرك البحث الافتراضي Default Search Engine على براوزرك أيا كان هو ايه.. وده من خلال:
- تدوس على صورة بروفايلك جوا ChatGPT
- تدول على اختيار Get ChatGPT Search Extension
- هيدخلك على ستور الاكستنشنز وتعملها داونلود وشكرا كدا
- الاكستنشن فكرتها انها بتغير أوتوماتيك محرك البحث الافتراضي في إعدادات البراوزر بتاعك.. واللي غالبا هيبقى جوجل سيرش إلى ChatGPT
- وبكدا لما تيجي تكتب في مكان الURL في قلب البراوزر، هيفتحلك ChatGPT مباشرة ويجاوبلك على اللي انت كتبته :D
4- دلوقتي ميزة البحث على الويب كمان وصلت في التفاعل الصوتي Advanced Voice Mode، فـ وأنت بتسأل شات جي بي تي بالصوت، هو هيقدر يروح يدور ويجيبلك الاجابة Up to date من الويب مباشرة :D
بس دي ميزة للمشتركين في البلس والبرو بس
👀 اللقطة الأولى في القصة دي،
إن مسألة انه يفتح لك كونتنت تفاعلي زي صور وفيديوهات وخرايط
دي خطوة جوهرية جدا تخليك تقضي وقت أطول في قلب ChatGPT
وده يقدم تجربة عالية أوي للويب، فده يرتقي بالمنصة من مجرد حاجة بتجاوبلك على اسئلتك في العموم أو بتساعدك مع التكست والصور، بس لازم جمبها تستخدم جوجل سيرش واليوتيوب، لأ دلوقتي ChatGPT بقى منصة شاملة أكتر..
👀 اللقطة التانية كونه يخلي موضوع انك تعمل ChatGPT هو محرك البحث الافتراضي دي خطوة خزعبلية هتخليه ينتشر زي انتشار google .com بظبط، فأي حد يقدر يستخدمه، ده هيخليه يلم داتا مرعبة في مسألة تفاعل الناس معاه وبيدوسوا على ايه أكتر وايه بيجذبهم اكتر صور ولا فيديوهات ولا تكست.. وبالتالي هيسهل على المطورين انهم يطوروا التصميم والتجربة كلها..
الأروع في النقطة دي برضو ان ده بيرفع ChatGPT من مجرد منصة شات معلوماتية تفاعلية، إلى براوزر متكامل، بيقدر يعرضلك محتوى في قلب صفحة واحدة من مختلف المواقع..
ده كمان هيزود المدة اللي بيقضيها الناس في قلبه Time on Page، وكمان ده غالبا مستقبلا هيتترجم إلى عرض إعلانات وشلالات فلوس، خصوصا انه لو اتعمل سيرش على مطاعم هيظهر عناوينها وأرقام تليفوناتها وكمان أماكنها على الخرايط، ومع الوقت أكيد هيفتح الإعلانات مين يظهر قبل مين (وجوجل خير مثال طبعا)
👀 اللقطة الأهم بنسبالي كمان واللي كانت زي ساخرة جدا،
ان كل تجربة ChatGPT في عرض المزايا دي، OpenAI عملتها على جوجل كروم! 😅
فيه حد ابن جنية في جامعة طوكيو في اليابان
عمل حركة داهية عشان ميخليش طلبة صينيين يقدموا في برنامج دراسي بتنظمه الجامعة..
دخل على كود الHTML بتاع موقع البرنامج الدراسي
وقام ضايف فيه عبارة "June 4th Tiananmen" أو يعني 4 يونيو تيانامن..
وللي ميعرفش، تيانانمن هو اسم ميدان مشهور في بكين في الصين حصلت فيه مظاهرات رهيبة زمان وهو دليل على فكرة المعارضة للنظام وكدا..
فالصين عندها الفاير وول الجبار the Great Wall
اللي من أهم الكلمات المفتاحية اللي بيحجبها هي أي حاجة ليها علاقة من قريب أو بعيد بميدان تيانانمن..
وبالتالي كدا موقف البرنامج الدراسي بتاع جامعة طوكيو هيتحجب أساسا في الصين، وبكدا يبقى ضمنوا انه مفيش نفر صيني يدخل البرنامج🤣🔥
لينك بروفايل باشمهندس محمد عبدالرحمن:
https://www.linkedin.com/in/mohamed-abdul-rahman-ba194197
اليومين اللي فاتوا
نزلت OpenAI بشكل رسمي نموذجها الذكي Sora
وفتحته بسكل تجريبي قدام الجمهور عشان يقدروا
يعملوا فيديوهات من أوامر نصية..
وقالت في سطر مستخبي ان النموذج ده هيبقى مقدمة لتطوير روبوتات أذكى وبتفهم العالم وبتشوفه أقرب للبشر! 🤖
ده غير ان جوجل قال ان الجيل الجديد Gemini 2.0
هينزل ومعاه تجارب كتيرة لروبوتات برمجية تقدر تفهم العالم بشكل كويس أوي وتقدر انها تفهم وهي بتتحرك في العالم الحقيقي كل اللي بيحصل حواليها.. وبرضو ده كان مستخبي ف نص الكلام! 🤖
طب هو يعني ايه النماذج الجديدة T2V أو Text to Video Models وازاي بيشتغلوا و ازاي بيتدربوا عشان يطلعوا الفيديوهات الرهيبة دي، وازاي كل ده هيقدر يساعد الروبوتات تفهم العالم بتاعنا لما ينزلوا يتحركوا بينا ف الشوارع؟!
عشان كدا فكرت أعمل بودكاست سريع كدا في سبيس على إكس وهيكون معايا عتاولة ف المجالين الذكاء الاصطناعي والروبوتات 😎🚀🤖🧠
المهندس محمد شكري Mohamed Shokry El Kholy جهبز إنشاء الفيديوهات بالذكاء الاصطناعي واللي كل مرة بينزل فيها صور أو فيديوهات بيخليني أشك ف نفسي "هو ده حقيقي؟!" 😅
والمهندس محمد عبدالرحمن المبدع في مجال الروبوتات "واللي بحب اسميه المريخي عشان شركته Marses Robotics 👽😁" ويمكن واحد من أقدم الناس اللي شوفت دماغه ازاي بدأت بتصميم الروبوتات وبرمجتها وتشغيلها لحد خلق تطبيقات ليها على ارض الواقع أفقيا في قطاعات كتيرة جدا 😎
🕙 10 مساءا إن شاء الله بتوقيت القاهرة، هنبقى على إكس عندي على بروفايلي الشخصي، هسيبلك لينك https://x.com/iMohamedAdel
شوف هو اللي حصل امبارح مش مفهوم لحد دلوقتي:
1- كل خدمات ميتا ضربت
2- إكس وريديت وتيك توك ضربوا
3- ألعاب عطلت زي روبلوكس وفورتنايت وكوول أوف ديوتي
4- بعض خدمات جوجل زي السيرش وجيميل
5- خدمات OpenAI زي Sora وChatGPT
الغريب بقى:
👀 محدش اتكلم على ان فيه سبب مشترك لكل الأعطال (رغم ان كلهم تقريبا حصلوا في نفس الوقت)
👀 ميتا قالت ان كل حاجة تمام رغم ان ناس كتير اشتكت ان حساباتها سجلت خروج أصلا وبيحاولوا يغيروا الباسورد مش عارفين لانه بيطلب كود ال 2FA، بس الكود مبيوصلش
👀 ناس (زي حالاتي) استقبلوا ايميلات بأكواد 2FA وهو مطلبوش أساسا يغيروا الباسورد
مش عارف حصل ايه،
بس مش قادر أشوفها حوادث منفصلة عن بعضها، ولا عارف أشوفها منفصلة عن اختراق Salt Tayphoon الصيني اللي اخترق كل شبكات الموبايل في أمريكا، وتتبع وقرا رسايل SMS الأمريكيين وكمان سجل مكالمات عدد كبير من كبار المسؤولين هناك!
صباحو
أول امبارح جوجل طلعت شريحة معالج جديد اسمه Willow..
معالج مخصوص للحوسبة الكمية Quantum Computing..
للي ميعرفش الحوسبة الكمية هي ايه
خليني أشرحهالك سريعا ببساطة عشان تفهم
جوجل ازاي عملت طفرة بالمعالج الجديد..
الحوسبة الرقمية Digital Computing
بتعتمد على فكرة معالجة البيانات في شكل Bits
كل Bit قيمتها بتكون إما 0 أو 1.. مينفعش تبقى الاتنين مع بعض
وبالتالي معالجة الداتا بياخد وقت طويل وعقبال ما بتوصل لنتيجة بيبقى الموضوع واخد وقت طويل خصوصا مع المعادلات والعمليات المعقدة..
بس لما تيجي تبص على الحوسبة الكمية Quantum Computing
فهنا التعامل بيحصل مع احتمالات كتيرة جدا في نفس الوقت
زي 0 و1 و01 و10 و و و و .. كل ده في نفس الوقت فالعملية منجزة أكتر بكتير..
نيجي لجوجل وشريحة Willow..
دايما الحوسبة الكمية كان عندها مشكلة وهي عدم القدرة على ثبات استقرار الجزيئات في الحواسيب الكمية (اللي هي شغالة بحاجة اسمها Qubits)، وأي تغير في حالتها بيخلي في حالة من التغير في النتايج وبتزيد أوي نسبة خطأ النتايج اللي بتوصلها..
شريحة جوجل جت بظبط عشان تحل ده..
جوجل قدرت مع المعالج الجديد (المكون من 105 كيوبت) انها توصل لطريقة تخليها تقدر تزود عدد الكيوبت في الحواسيب الكمية اللي شغالة بالمعالج ده، وفي نفس الوقت تقدر تحافظ على استقرار حالة الكيوبتات جواه (بحيث ميحصلش تغير لا في حالتها ولا في الداتا اللي بتتعامل معاها) وساعتها بتقدر انها تخفض جدا مستوى خطأ النتايج لمستويات قليلة جدا..
الأروع بقى هو سرعة معالجة الداتا،
جوجل قالت انها في أقل من 5 دقايق، شريحتها الجديدة تقدر تحل معادلة
كانت هتاخد من أقوى كمبيوتر خارج Super Computer حوالي 10 سبتليون سنة..
السبتليون ده رقم 1 وجمبه 25 صفر.. وده تقريبا أكتر من العمر التقديري للكون نفسه!!
الفترة الجاية جوجل هتركز أكتر على انها تطور في شريحتها عشان تبدأ تقدم تطبيقات عملية لاستخدام معالجها Willow على أرض الواقع!
صباحو
#خاص انهاردة بدأ تشغيل تجريبي لخدمات الدفع بآيفون "أبل باي Apple Pay"..!!
وبنك CIB تعاقد مع أبل عشان يبقى للعملا بتوعه حق انهم يقدروا يسجلوا الكروت بتاعتهم "debit - Credit" على أبل باي ويدفعوا بموبايلاتهم الآيفون!
وكدا غالبا جوجل باي هتتفتح قريب!
🤔الإطلاق الرسمي؟ الله أعلم😅
مساءو