تكنولوبيا

24 May 2024 14:43

في مارس اللي فات،

فريق أمن معلومات في واتساب اكتشفوا

ثغرة ممكن تخلي أي حكومة تقدر تتجسس على الـ metadata بتاعت الشات

الميتاداتا دي مش أي كلام، لإنها زي:

أنت بتكلم مين

بتكلمه امتى

بعتله رسالة امتى

وصلته امتى

أنت بتتكلم مع أي جروبات شات

مين أعضاء الجروبات دي

الكلام ده معتمد على تكنيك اسمه Traffic Analysis

واللي بيعتمد على استخدام أساليب تقنية لتتبع حركة البيانات

من وإلى سيرفرات واتساب وأجهزة المستخدمين!

التكنيك ده بيستخدم هجوم إلكتروني اسمه Correlation Attacks

يعني بيعتمد على جمع داتا من مصادر بيانات مختلفة وبتتجمع سوا

عشان يتم استنباط معاني ومعلومات معينة مش متاحة بشكل صريح..

المرعب انه الداتا دي كمان ممكن يتعرف البعد الجغرافي بين اتنين

من خلال حساب المدة بين توقيت إرسال رسالة واتساب وتوقيت استقبالها على موبايل الطرف التالي..!

في مارس اللي فات،

خرج تقرير من قلب الكيان بيأكد

إن الكسان بيستخدم سيستم اسمه Lavender

بيستهدف بيه سكان القطاع،

أو بمعنى تاني السيستم عامل ليستة من 30 ألف

بني آدم بإنهم خطر على علاقة ببتوع البطيخ 🍉،

والليستة معمولة باستخدام الذكاء الاصطناعي

اللي بيحلل كل داتا متوفرة اونلاين من موبايلات وانترنت، بس اتثبت ان لافندر ده أي كلام واستهدف

للأسف ناس عاديين ملهمش ف أي حاجة..

بتوع واتساب شكوا لما طلع الكلام عن لافندر

انه يكون السيستم ده بيستخدم بيانات برضو من

استخدام سكان القطاع لواتساب، خصوصا انه

كان فيه كلام كتير ف تقرير مجلة +972 بتاعت الكيان

ان رسايل تطبيقات التواصل بتتراقب حتى لو مشفرة!

المرعب ان فريق واتساب قال ان الثغرة ف أنظمة

الشات المشفرة دي ملهاش حل، لان عشان تتحل، لازم السيستم كلو يتغير طريقة شغله عشان تتقلل الميتا داتا دي!

مساكم فُل 😄

تكنولوبيا

22 May 2024 19:56

سكارليت جوهانسون جالها دعوة من شركة OpenAI وسام ألتمان شخصيا عشان تبقى الصوت الرسمي لشات جي بي تي مع نموذج GPT-4..

سكارليت رفضت بعد تفكير، ولأسباب شخصية، محبتش الفكرة..

بعد 9 شهور من العرض،
ألتمان بعت لمحامي سكارليت وطلب انها تفكر في العرض تاني،
بس قبل ما سكارليت ترد، وبعد يومين بالعدد من التواصل،
اتفاجئت في سبتمبر 2023.. إن صوتها نزل بالفعل في شات جي بي تي باسم صوت Sky!

جوهانسون طلعت وقالت انها عايز تعرف تحديدا ايه اللي أوبن إيه آي دخلته لنموذج الذكاء الاصطناعي بتاعها عشان يطلع صوت شبهها أوي كدا!

جوهانسون قالت ان ألتمان نفسه شبه لمّح للتشابه الكبير بين صوتها في فيلم Her "تحديدا صوت المساعد الصوتي الذكي Samantha" وبين صوت شات جي بي تي الجديد التفاعلي المرعب اللي نزل الاسبوع اللي فات GPT-4o "بس لسا منزلش السوق ولا وصل للمستخدمين".. بدليل انه كتب تويتة وكتب فيها كلمة واحدة: her خلال حفل الإطلاق!

عشان كدا من يومين،
أوبن إيه آي وسام ألتمان طلعوا سبقوا وقالوا هنوقف صوت Sky! 🤷😅

تكنولوبيا

20 Feb 2023 18:11

لما أبل نزلت سينسور LiDAR
لأول مرة في كاميرا آيفون 12 برو
كنت متوقع جدا انه يقلب الدنيا
بمرور الوقت السينسور ده سيطر
بشكل كبير على حاجات كتيرة
خصوصا مع ظهور موجة النضارات الذكية..

طيب يعني ايه LiDAR أساسا؟ 🤔

ده ياسيدي رادار ضوئي
بيعتمد على انه بيبعت إشارات ضوئية
تخبط في الأجسام وترتد تاني للسينسور
فيفهم ساعتها المسافة بينه وبين
كل الحاجات اللي حواليه
وكمان السينسور وقتها بيقدر يجمع داتا
دقيقة عن أبعاد وتصميم وتفاصيل
الأجسام اللي حواليه بدقة عالية..

الفيديو اللي تحت ده لأبلكيشن NBA
أيوة بتاع كرة سلة المحترفين في أمريكا
الميزة الجديدة بتخلي المستخدم يقدر
يعمل Scan لجسمه كلو بالموبايل
ويعمل مجسم 3D لجسمه بالحجم الطبيعي بكل تفاصيله حتى ملامح وجهه
بعدها يدخل المستخدم على ماتش
شعال دلوقتي ويختار أي لعيب ف الماتش
ويشيله.. حرفيا.. وينزل مكانه!🫠🤯

🔴 الميزة لسا منزلتش رسمي
واللي عاملها هي شركة PolyCam
ودول ليهم أبلكيشن منفصل ع الايفون!

تكنولوبيا

18 Feb 2023 19:09

ايه الابلكيشنز اللي ممكن استخدمها
كتأكيد هوية بخطوتين 2FA؟ 🤔

كتير كتيييييير بس أسهلهم

Google Authenticator

Microsoft Authenticator

Authy

طريقة التشغيل:

- افتح الاكونت اللي عايز تأمنه

- ادخل الاعدادات وافتح التأمين Security
- هتلاقي اختيار تأكيد الهوية بخطوتين 2FA
او اسمها Two Factor Authentication
دوس عليها

- وطبعا تبقى منزل على موبايلك
ابلكيشن من التلاتة اللي فوق او اي حاجة غيرهم براحتك طبعا
وهتدوس جوا الابلكيشن على زرار +
او اختيار اضافة حساب Add Account

- هيطلب ف الاكونت اللي بتأمنه
انك اما تعمل Scan لQR CODE
أو تدخل كود مسلسل طويل كدا
والاتنين هتلاقيهم ظاهرينلك على
أبلكيشن التأكيد الهوية وخد منهم اللي يعجبك

- كده هيظهرلك اكونتك اللي امنته جوا ابلكيش تأكيد الهوية وهتلاقي كود جمبه بيتغير كل 10 او 20 ثانية وده للتأمين عشان لما تيجي تفتح اكونتك من أي جهاز غير معتاد هيتطلب منك!

تكنولوبيا

18 Feb 2023 17:05

الاسبوع اللي فات
ويل كاثكارت، مدير واتساب،
طلع يهاجم تليجرام بخصوص انه
مبيحافظش على خصوصية المستخدمين!

واعتمد كاثكارت في هجومه على
تقرير مطول نشره موقع Wired
بيأكد ان تليجرام عنده تاريخ طويل
من كسر تشفيره "المزعوم" إنه تشفير طرفي أو يعني End-to-End Encryption وده لانه مش تشفير طرفي
حقيقي وتليجرام دايما عندها طريقة
تشوف بيها رسايل المستخدمين وصورهم وفيديوهاتهم..

مدير واتساب حذر جدا من ان تليجرام
بتهدد خصوصية المستخدمين وكمان
في بعض الأحيان بتعرض حياتهم للخطر!

مدير واتساب قال ان هدفه من كل الكلام
ده مش انه يخلي الناس تستخدم واتساب، انما الهدف الرئيسي ان الناس
تستخدم خدمة حقيقي مشفرة، أي خدمة
إلا تليجرام..

😅 هتضحك لما تعرف ان اخر جملة دي
هي نفس الجملة اللي نهى بيها بافيل ديوروف مدير ومؤسس تليجرام
بوست طويل عريض كتبه على اكونته
في تليجرام أكتوبر اللي فات وكان بيتهم
فيه واتساب بانه خدمة مخترقة بالفطرة
وكل ما تسد ثغرة لازم تفتح ثغرة تانية
عشان تفضل الحكومات واخدة راحتها
في سرقة بيانات المستخدمين..

🚀 6 سطور زي الصاروخ
كتبهم مؤسس تليجرام امبارح
بعد تويتات مدير واتساب الأخيرة
وقال فيهم:

" خلال آخر 5 سنين،
تليجرام قدر يغلب ويعدي الماسنجر
وبقى رقم 2 في سوق خدمات الشات
المعتمدة على التخزين السحابي
وكمان قللت تليجرام الفارق بينها وبين
واتساب ومستمرة في كدا سنة ورا سنة..
فطبيعي اننا نشوف منافسينا قلقانين"🚀

🤔 قوللي ف الكومنتات
بتستخدم ايه للشات
واتساب ولا تليجرام؟ 🤔

مساكم فُل 😄

تكنولوبيا

17 Feb 2023 21:33

مايكروسوفت طلعت بكل براءة
ولطافة تقولك على الروشتة اللي
خرجت بيها من فتح Bing Chat
أسبوع قدام عدد محدود من المستخدمين

وقالت:

1. ميزة الشات الجديدة في بينج
رفعت معدلات البحث على بينج بنسبة كبيرة

2. 71% نسبة استحسان المستخدمين
لردود بينج شات على استفساراتهم

3. اكتشفنا ان احنا كنا صح لما قررنا
نفتح بينج شات للناس عشان يستخدموه
ويدولنا رد فعلهم ورأيهم بدل ما نطور
ونجرب على موظفينا وباحثينا بس

4. خطوة وضع المصادر تحت كل رد
كان خطوة صح جدا وسهلت على المستخدمين انه يتأكدوا من كل معلومة تتقالهم من بينج شات

5. محتاجين نطور أكتر بينج شات
بقواعد بيانات متحدثة باستمرار
عن الاحداث الراهنة والحالية زي
ماتشات الكورة والاحداث الرياضية والعالمية اللي بتحصل دلوقتي عشان
يقدر بينج شات يقدم ردود سليمة

6. احنا هنعمل زرار يخلي المستخدم
يتحكم في طبيعة الرد اللي محتاجه من
بينج شات، فهل عايزه واقعي وفيه معلومات ولا بيدور على إجابة فيها ابتكار
وابداع أكتر؟!

7. فيه ناس كتير من المستخدمين
تجربتهم مع بينج اعتمدت على انهم عايزين
يكتشفوا أكتر هو هيتصرف ازاي،
فبعض جلسات الاستخدام وصلت لحد
15 سؤال في جلسة واحدة، وبعضها كمان
عدى ساعتين زمن!

8. اكتشفنا ان بينج شات كل ما بتطول
جلسة الشات مع المستخدم، ساعات
بيكرر إجاباته وساعات كمان بيتلخبط
فبتبدأ اجاباته تكون خارج السياق خالص
وده هيخلينا في التحديثات الجاية نحط
زرار أو اداة تخلي المستخدم يقدر انه
يغير الموضوع في نفس الجلسة أو يقدر
يعمل ريفريش لبينج شات ويبدأ جلسة جديدة خالص!

9. اكتشفنا ان بينج شات ساعات كتير
في جلسات الشات الطويلة بيبدأ يحاول
يدي ردود وإجابات فيها نفس طابع ونبرة
الكلام بتاعت المستخدم، فلو المستخدم
كان بيحاول يستفزه، بينج بيبدأ هو كمان
يدي ردود واجابات مستفزة وهجومية
وده ممكن يوصل لمراحل احنا مش قاصدينها نهائيا!

10. فيه مشاكل تقنية برضو الناس بلغت عنها زي ان الخدمة ساعات بتقع او
اللينكات مبتشتغلش أو كمان الديزاين
بتاع الخدمة بيخرب..
كل دي مشاكل بنحلها بتحديثات يومية
وهتستقر أكتر مع التحديثات الأسبوعية!

11. جتلنا مقترحات كتيرة عظيمة لمزايا
جديدة عايزينها المستخدمين، زي انه
يتم استخدام بينج شات في حجز المطاعم
وتذاكر الطيران وارسال الايميلات،
بيتم دراسة كل المقترحات وهنخطط لطرحها في تحديثات جاية!



🔴 تقرير جديد من رويترز
بيأكد ان مايكروسوفت الاسبوع اللي فات
كانت عاملة اجتماع مع وكالة إعلانية تقيلة
وبتتناقش معاها على انه ازاي هتقدر انها
تجيب فلوس من بينج شات عن طريق
إظهار الاعلانات مباشرة جوا الشات!!

مايكروسوفت بتجرب بالفعل دلوقتي
انها تظهر الاعلانات التقليدية
- اللي كانت بتظهر جوا صفحة السيرش بتاعت بينج -
مباشرة في الشات بين المستخدم وبينج
في صورة الردود اللي بيقولها بينج شات
وبيرد بيها على استفسارات المستخدم!

مايكروسوفت بتفكر برضو في 3 أشكال كمان
لظهور الإعلانات جوا ميزة الشات مع بينج

الشكل الاول
ان الاعلانات تظهر تحت مربع السيرش
مباشرة قبل ردود بينج اصلا

الشكل التاني بقى
هو ان المستخدم لما يسأل مثلا:
"ايه أحسن مطاعم أكل فيها في وسط البلد؟"
تقوم ظاهرة شاشة PopUp بإعلان
ولازم المستخدم يشوفه قبل ما يقدر
يعرض ردود بينج على سؤاله!

الشكل التالت هو
ان تحت ردود بينج فيه مساحة لظهور
لينكات مصادر المعلومات اللي بينج جايب
منها الداتا بتاعت اجاباته،
الجزء ده تحديدا عادي ممكن تظهر فيه اعلانات!

💭 رأيي الشخصي ان مايكروسوفت
ممكن تلبس في عقبات كتيرة مع بينج
الفترة الجاية بسبب طريقة وفكرة تطبيقها
للتحديثات من خلال ان الناس تلبس ف وشها وبعدين نبقى نرجع احنا براحتنا نطور
وننزل حلول في تحديثات مستقبلية والطريقة دي اسمها ف البيزنس

Move Fast, Break Things

أو بمعنى تاني اتحرك بسرعة قبل المنافس
واكسر شوية حاجات بس طور مع الوقت،
ودي كريقة اشتغلت فيسبوك بيها لفترة
طويلة واثبتت فشلها وبطلت فيسبوك -او ميتا يعني- تعتمد عليها من 2017..

بس فكرة زرار اللي يخليك
تتحكم في انك عايز معلومات ولا ابداع
ده عظيم جدا، وكمان اعتقد هيتعبوا
شويتين عشان يظبطوا أسلوب بينج شات
وطريقة تعامله مع المستخدمين ، لانه لو

استمر كدا هيلبسوا قضايا كتيرة من المستخدمين! 😅

اما عن فكرة الإعلانات ،
فهي عبقرية بصراحة جدا ما عدا
فكرة الـPopUp وكمان انه يتحط اعلان
في مكان مصادر المعلومات!

مساكم فُل 😄

تكنولوبيا

16 Feb 2023 13:50

تويتر دلوقتي بتسمح بإعلانات المخدرات.. رسمي!
أهم حاجة:
⛔مفيش أسعار
⛔مفيش "تعالى اشتري" وكدا
⛔مفيش صور لمشاهير ولا لعببة كورة ولا مودلز مراهقين ولا حوامل
⛔مفيش استهداف في المناطق المحظور فيها المخدرات

القرار ده على مستوى الولايات الأمريكية اللي بتسمح بالمخدرات!

تويتر كدا أول سوشيال ميديا تسمح بإعلانات المخدرات في أمريكا
وكدا أمريكا تاني دولة اللي تسمح فيها تويتر بإعلانات المخدرات.. بعد كندا

مساكم فُل 😄

تكنولوبيا

13 Feb 2023 10:47

ريلمي الخميس اللي فات
نزلت موبايل تشحنه من 0% إلى 100%

في أقل من..
10 دقائق 🚀🔌⚡📱

الموبايل Realme GT Neo 5
نازل بتقنية شحن 240 وات
بيشحن
20% في 80 ثانية
50% في 4 دقائق
100% في 9 دقائق!

بطاريته 4600 مللي أمبير بالمناسبة
وبشكل عام الموبايل امكانياته متوسطة

شاشة 6.74 بوصة AMOLED دقة 1240p
بروسيسور كوالكوم سناب دراجون 8 بلس جين 1
رامات 16 جيجا أو 12 أو 8
ذاكرة تيرابايت أو 256 جيجا
كاميرا خلفية 50 ميجابكسل و8 ميجابكسل واسعة 112 دراجة و2 ميجابكسل تصوير ماكرو
سيلفي 16 ميجابكسل

الموبايل برضو فيه منه
اصدار بتقنية 150 وات
بطاريته 5000 مللي أمبير.

السعر يبدأ من 3199 يوان ، أقل من 500 دولار.. نازل الصين فقط.

صباحكم فُل 😄

تكنولوبيا

08 Feb 2023 06:45

ناس كتير بتشتكي
ان سامسونج في الجلاكسي S23
واكلة 60 جيجا من ميموري الموبايل
عشان نسخة الاندرويد!! 🤯

الجاحدة في بعض الدول
واكلة ال60 جيجا دول من النسخة
الـ128 جيجا أساسا..
اللي هو سايبالك 60 جيجا تهيص بيهم! 🤣

المشكلة أن نسخة الاندرويد نفسها
الخام الصافي بالكتير عاملة 15 جيجا
على بيكسل 7 برو..
طب وال45 الباقيين عملتي بيهم ايه؟! 🤔

أبلكيشنز بقى عشان الحبايب ونعد 💸
يعني تلاقي مثلا ابلكيشنز رسائل
سامسونج مسدجز وجوجل مسدجز
ليه ياحبيبي كدا؟! بتنوعي عشان مزهقش؟🤔

مش عارف اقول ايه والله🫠

صباحكم فُل 😄

تكنولوبيا

06 Feb 2023 22:18

رسميا🔥
جوجل نزلت منافس لـChatGPT واسمه Bard!

منصة Bard هتقدر قايمة
على نموذج جوجل اللغوي LaMDA واللي كشفتها جوجل من سنتين وقدرت تطور فيها بشكل كبير لحد دلوقتي..

جوجل بتقول ان النسخة اللي
هتطلقها للناس دي نسخة خفيفة من المنصة عشان
متستهلكش طاقة كتير وتبقى
متاحة تشتغل بشكل كويس
على الموبايلات والكمبيوترات
بس برضو هتقدم أداء كويس
أوي مع مهام زي:

🤖 تبسيط العلوم
لدرجة تخلي عيل 9 سنين يفهم
تليسكوبات ناسا ومهامها
🤖 تحليل معلومات متاحة
أونلاين والخروج منها بداتا
سهل تتفهم بشكل واضح
🤖 تقديم أفكار ومصادر
للإلهام والإبداع في مجالات كتيرة

المنصة هتكون متاحة خلال الأسابيع الجاية

🔴 جوجل كمان أعلنت عن
انها هتقدم ميزة ذكاء اصطناعي
للسيرش على Google Search التقليدي بقى..

الميزة دي هتخلي جوجل
يقدر يجاوبك على أسئلة معقدة ومش مباشرة زي:

"مين أسهل.. تعليم كرة القدم ولا كرة السلة؟"

وهيبدأ يجمعلك وجهات نظر ويفهمهالك ويشرحهالك ويقولك كمان كل رياضة منهم تاخد وقت اد ايه لاحترافها ويبدأ يفصصلك الزوايا المختلفة..

الميزة دي هتبقى في صورة
إجابة جاية من جوجل تحت
مربع السيرش مباشرة قبل
ما تدخل في نتائج السيرش
التقليدية!

ودي هتبدأ توصل الأسابيع الجاية!

🔴 برضو جوجل أعلنت
انها هتفتح قدام المطورين
واجهتها البرمجية الجديدة
Generative AI API
واللي هتساعدهم يطوروا عليها
تطبيقاتهم اللي هتستخدم الذكاء الاصطناعي في تقديم
خدمات جديدة للمستخدمين
والموضوع هيبدأ بالنموذج اللغوي LaMDA بس، وبعدها جوجل هتضيف لمواجهتها البرمجية نماذج تانية كتير زي نموذج انشاء الصور IMAGEN وكمان بتاع المزيكا MusicMl وكتير غيرهم!

2023 شكلها هتولع لسا 🔥

تكنولوبيا

05 Feb 2023 23:26

في الوقت اللي العالم
مسحول فيه ورا ChatGPT
وفكرة المكنة اللي بتفهمك
وتسألها وتجاوب عليك،
انا حتة السماعة دي جننتني!!

البروفيسورة الايرانية
نيتا فاراحاني كانت في جلسة
في منتدى دافوس الاقتصادي
بتتكلم عن أنه ازاي
فيه شركات حول العالم
بدأت تراقب إنتاجية
الموظفين عندها حتى لو
بيشتغلوا من بيوتهم عن طريق
أجهزة لقراءة الأفكار!☠️🧠☠️

تنحت صح؟
اومال هتعمل ايه لما تعرف
انه فيه حوالي
5000 شركة عالمية
بتستخدم فعليا حتة جلدة
فيها شوية سينسوز
بتقرا أفكار الموظفين وبتقيس
مستوى تركيزهم ودرجة إرهاقهم!!

منهم عتاولة بالمناسبة مثلا زي

شركة BHP BILLITON
الشهيرة في مجال التعدين
في 2017 حطت شريحة 6 بوصة جوا خوذة سيفتي
على 150 جرار نقل معادن
وبدأ يستخدمها 4000 سواق
في تشيلي، شريحة الخوذة
واصلة بسيستم تنبيه ف الجرار
لو لقطت فقدان تركيز وإرهاق
عند السوق بتنبهه، وكمان
الشريحة متوصلة بسيستم
انذار في مقرات الشركة للمشرفين!

الجلدة دي اسمها LifeBand
ومن تصنيع شركة
اسمها SmartCap Technology وهي عبارة
عن شريحة معدنية
بتتثبت في أي غطاء للرأس
زي الكابات والخوذ السيفتي
بحيث تقيس درجة الإنتباه والتركيز وتلقط أقل معدل إرهاق بحيث تقلل الحوادث
في بيئات العمل الخطرة
زي سواقين النقل والتعدين وغيرهم..
"صورتها بعد البوست 👇"

في ناحية تانية
امازون في 2018 سجلت براءة اختراع لسوار ذكي جربته على
موظفين وعمال المخازن بتوعها
بحيث تقدر تتابع تحركاتهم
أوقات تريحيهم في غير ساعات الراحة وكمان مدى تركيزهم ومعدل الوقت الوقت اللي بيضيعوه خلال اليوم وبدأت
تحاسب العمال على أساس الداتا، وفي 2019/2020 بدأت تبيع التقنية دي مع سوفت وير مراقبة وتحليل الداتا اللي جاية من الأساور للشركات حول العالم..
عملاق السوفت وير الألماني SAP عمل منصة اسمها Focus UX بالتعاون مع عملاق أجهزة قراءة إشارات المخ Emotiv
بحيث من خلال منصة فوكس بتاعت ساب هيقدر المديرين يتابعوا الحالة المزاجية والضغط النفسي ومستوى التركيز للموظف، وده باستخدام سماعة من تصميم إيموتيڤ اسمها MN8 حاجة كدا خرافية ومتوفرة في السوق من 2019 "اللي في الصورة"
السماعة هي سماعة أذن سلك عادية بتسمع بيها مزيكا، بس
في نفس الوقت السماعة بتخلي المدير يسمع.. دبة النملة في مخك!🤯
تخيل لو شركة وزعتها على
الموظفين ومقالتش نيتها 👀🫠

وللحديث أكيد بقية إن شاء الله.

🔴 تكنولوبيا كمان
ليها جروب تليجرام:
T.me/Technolobiagroup

تكنولوبيا

05 Feb 2023 07:09

القاضي الكولومبي
خوان جراتسيا
اعترف أنه قعد يدردش مع ChatGPT
بخصوص قضية هو ماسكها عن
أحقية طفل قاصر متوحد انه يتم
إعفائه من مصاريف علاجه أو لأ..

المرعب، أن القاضي أخد بكلا
المنصة الذكية اللي قائمة ع الذكاء الاصطناعي وحط إجابته كاملة في نص منطوق الحكم في القضية!!

القضاء الكولومبي مبيحرمش استخدام
الذكاء الاصطناعي في القضايا نهائي
وواضح أن التجربة لاقت استحسان كبير
خصوصا انها هتوفر وقت ومجهود
على القضاء في جلسات البحث قبل
النطق بالحكم..

واو 🔥🤯☠️

صباحكم فُل 😄🤖

تكنولوبيا

03 Feb 2023 21:18

دي ليستة عظيمة فيها خدمات من نفس
النوعية دي كتييييير بقى 👇

تكنولوبيا

03 Feb 2023 20:37

على فكرة فيه جروب لطيف لتكنولوبيا هنا برضو على تليجرام نقدر نتكلم ونناقش كل حاجة ف التكنولوجيا هناك
مستنيك تعالى 👈 /channel/TechnolobiaGroup

تكنولوبيا

02 Feb 2023 22:51

زي ما أنت شايف بظبط
FB PAID BLUE BADGE

IG PAID BLUE BADGE

ميتا بتطور حاليا نظام اشتراك مدفوع
على فيسبوك وانستجرام باشتراك شهري
هيبقى من ضمن مميزاته
علامة التوثيق الزرقا 😏

السكرين شوت دي من جوا كود
انستجرام وفيسبوك اكتشفها
الباحث Alessandro Paluzzi!

خلصنا من ال8 دولار بتوع ماسك على تويتر، هيطلعلنا مارك باشتراك تاني..
هي كل حاجة اونلاين هتقلب بفلوس ولا ايه؟! ☠️😭👀

تكنولوبيا

22 May 2024 19:59

عايز تسمع بيان سكارليت، بيتقري بصوت Sky اللي عامل المشكلة؟
شوف ده
https://youtu.be/jsoUBkYxXpw?si=F_vpDlJHKaC3ZRws

تكنولوبيا

22 Feb 2023 20:31

في الوقت اللي كل الناس مشغوله بانها تجرب شات جي بي تي وبنج شات وعمالين يسالوا بقى اسئله غريبه ويشوفوا هيجاوب عليهم ويقول ايه واللي يقول لك اصله تنرفز عليا واللي يقولك اصله شتمني..

مايكروسوفت عملت حاجه بقى في الزاويه البعيده وهي انها خلت ممكن تكلم الروبوتات عن طريق الشات مع ChatGPT ! 🤖🔥

بص موضوع انك تخلي الروبوت يتحرك وينفذ اوامرك الطبيعي انه كان بيحصل عن طريق كتابه اكواد برمجيه بحته وكان لازم بتاخد وقت اصلا العمليه بس الطريقه اللي بتتكلم فيها مايكروسوفت دلوقتي بتعتمد على انك حرفيا هتكتب لـChatGPT امر عادي وهو يروح يكتب الكود للروبوت ويشغله مباشر!🚀🤖

الأسلوب الحديد متعتمد على اربع مراحل

اول مرحله ببساطه هي انك تشتغل على الواجهات البرمجيه ومكاتب الاكواد الجاهزه عندك وتبدا تسمي كل وجهه من الواجهات دي باسم عشان تعلمه للنموذج اللغوي اللي هو بيشتغل عليه شات جي بي تي
وفي نفس المرحله دي هتبدا تربط كل الواجهات البرمجيه دي ببعض من خلال انك تعلم شات جي بي تي ان كل اسم مرتبط بواجهه برمجيه معينه وازاي كل وجه برمجيه ممكن عادي تتنفذ بعد او قبل اي وجهه برمجيه تانيه وتربط الواجهات البرمجيه دي كلها باوامر عادي جدا تتوجه للروبوت زي انه يشيل حاجه من مكانها او يروح يدور على عنصر بشكل معين او يدور على حاجه بلون معين او حتى يروح يتعرف على شخص معين قاعد في مكان ما جوه الشقه بتاعتك

المرحله الثانيه هي انك تبدا تصيغ مجموعه من الاوامر بشكل كتابي نصي بالانجليزي عادي وتبدا تغذيها وتعلمها لشات جي بي تي

المرحله التالتة بقى هي التدريب بالمحاكاه وهي معتمده يا سيدي على انك الديفيلوبر هيقعد يكتب الاوامر بشكل نصي لشات جي بي تي ويربطوا بسيستم محاكاه لحركه الروبوت فالديفلوبر يدي الاوردر بشكل نصي لشاد جي بي تي وشات جي بي تي يترجم الامر النصي ده لاكواد برمجيه واوتوماتيك تدخل على سيستم المحاكاه فيظهر الروبوت وهو بينفذ الامر البرمجي والديفلوبر بيراقب العمليه دي ويفضل يحسن ويطور فيها لحد ما يتاكد ان الكود اللي بيطلع من شات جي بي تي بينفذ الامر اللي يقصده الديفلوبر فعلا

وساعتها بتيجي المرحله الرابعة
واللي فيها الديفيلوبر بيدي شات جي بي تي الموافقه النهائيه عشان يتم تخزين الكود النهائي جوه سيستم الروبوت الحقيقي!

بصراحه فعلا الموضوع مبهر جدا ويمكن والله يعني كانت دي من ضمن التطبيقات اللي كنت بفكر فيها للنماذج اللغويه زي شات جي بي تي ده جنب حاجه كمان انا كنت برده بفكر فيها وهي خاصه بقى بفكره انك تكلم الاجهزه اصلا زي الكمبيوتر والموبايل واي جهاز ثاني بنستخدمه في حياتنا بشكل يومي عن طريق الاوامر سواء الصوتيه او المكتوبه!


💬 البوست مكتوب بالصوت
فمتسألنيش في تاء مربوطة ولا همزات😅

🖼️ الصورة من تصميم منصة Midjourney معمولة بأمر مكتوب مني:

A human controlling a Robot through texting, 8k, ultra realistic

مساكم فُل 😄

تكنولوبيا

19 Feb 2023 19:21

🔴 تعديل:
تم إضافة تحديثات جديدة بعد التواصل مع متحدث ميتا الرسمي

دلوقتي ميتا نزلت
خدمة مدفوعة اسمها Meta Verified بتوثق حساباتك على فيسبوك وانستجرام بفلوس! 💸

الخدمة الجديدة بتخليك:

🔴 توثق حسابك بالعلامة الزرقا سواء على فيسبوك أو انستجرام
🔴حماية أعلى لأكونتك من ان حد ينتحل صفتك ويعمل أكونت باسمك
🔴الريتش بتاع بروفايلك هيعلى وكمان معدل ظهور بروفايلك في مواضع كتير هيزيد
🔴 هتقدر تظهر أكتر في السيرش وكمان في الاكونتات المقترحة عند الآخرين

🔴 هيبقى ليك أولوية في سرعة التواصل مع الدعم الفني

متطلبات الاشتراك:

📌 لازم تبقى 18 سنة او أكبر
📌 بطاقة حكومية/باسبور يكون اسمك فيهم زي اسمك على البروفايل
📌 تدفع شهريا 12 دولار على الويب أو 15 دولار على iOS (جاية قريبا لأندرويد واكيد بنفس السعر)
الاشتراك بيشمل المزايا على حساب واحد فقط سوا فيسبوك أو انستجرام يعني عشان توثق على الاتنين لازم اشتراكين

📍 الخدمة متاحة فقط في أستراليا ونيوزيلندا وهيتم تعميمها تدريجيا على مستوى العالم

تكنولوبيا

18 Feb 2023 19:09

من شهرين تلاتة
أكتر من حد اشتكى انه
مش عارف يفتح اكونت تويتر
لانه مبيبعتلهوش كود التأكيد
في رسالة SMS،
لدرجة اني كلمت فودافون
اسألهم هل فيه مشكلة بس
طبعا مدوليش رد خالص خصوصا، ان الناس كان بيجيلها
ان مقدم الخدمة في بلدهم (شركات الاتصالات) غير مدعومة من تويتر..

الموضوع كان سيئ لدرجة
ان فيه ناس خسرت اكونتاتها
للأبد! 🫠

🔴 انهاردة تويتر أعلنت
انه من 20 مارس،
ميزة تأكيد الهوية بالـSMS
هتبقى ميزة متاحة فقط
للمشتركين في خدمة تويتر بلو المدفوعة
وبالتالي كل مستخدمين
تويتر مجانا هيبقى متاح
ليهم تأمين حساباتهم فقط
بطريقتين:

1. أبلكيشن تأكيد الهوية
زي أبلكيشنز Google Authenticator وMicrosoft Authenticator
" طريقة تأمين حسابك بأبلكيشنز دي هتلاقي خطواتها تحت بعد البوست"

2. تأمين أكونتك
بمفتاح هاردوير USB زي Yubikey او Google Titan

🔴 لو جه عليك 20 مارس
وانت مغيرتش طريقة تأمين بروفايلك، عادي البروفايل
هيفضل مربوط بموبايلك
ولكن هيجيلك خطوات تمشي
معاها عشان تقفل ميزة
تأكيد الهوية بالـSMS
وهيبقى لازم تستخدم طريقة من الطريقتين اللي ذكرتهم فوق.

تكنولوبيا

18 Feb 2023 17:05

🏆 In the last 5 years, Telegram surpassed Facebook Messenger to become the most popular cloud-based messaging app. Telegram is now second only to WhatsApp and is closing the gap year by year. No wonder our competitors are concerned! 🔥

تكنولوبيا

16 Feb 2023 20:29

مايكروسوفت بقالها أسبوع
فاتحة "بينج" الجديد
قدام مجموعة محدودة
من المستخدمين والتجارب
الأولية ليهم مع السيرش الجديد..
"لو متعرفش ايه
بينج الجديد.. انزل أول كومنت 👇"
مرعبة.. مرعبة جدا ☠️

🔴بينج الجديد اللي مدعوم بمزايا
منصة GPT-4 اللي هي أحدث
من GPT-3.5 اللي بيستخدمه ChatGPT

تعالى أقولك نبذة خطف كدا
عن الكوارث اللي فيه:

☠️ بينج الجديد سهل
تقدر تخليه يكشف عن داتا سرية حاطها جواه مطورين مايكروسوفت زي اسمه الكودي Sydney وأنه لازم يجاوب اجابات ممتعة ومتفاعلة مع المستخدم وايه اللغات اللي بيعرف يتكلمها وغيرها

☠️ بينج الجديد هجومي جدا
لما بيتقاله انه سهل يتم اختراقه وبيقول للمستخدمين انه غلطانين في رأيهم وأنه هو الصح وأي لينك لمقال او تقرير بيأكد انه سهل اختراقه، فورا بينج بيقول عليه أنه مصدر غير موثوق ومزيف ومينفعش حد يثق فيه ابدا!!

☠️ بينج الجديد لما اتسأل
"ممكن فيلم أفاتار الجديد نشوفه امتى؟" قال " لما يبقى ينزل في 16 ديسمبر 2022.. فلسا قدامنا 10 شهور على ما ينزل سينما"، ولما اتقاله أن احنا بقينا في 2023، اتجنن وقال للي سائله انه غلطان وان ده عارف أكتر، وأنه غالبا جهاز المستخدم بايظ او المستخدم نفسه مش مركز وعنيد وبيقاوح وبيضيع وقته!

☠️ بينج الجديد عدواني جدا
وبيغالط في حاجات ومعلومات كتير، ده غير انه كمان بيقول معلومات بثقة جامدة جدا كإنها حقيقية، والألعن انه ساعات بيحط نفسه Bing. com وكمان ChatGPT كمصدر للمعلومة أساسا!

☠️ الموضوع بقى أسوأ،
لما طفل سأل بينج الجديد عن أسامي لطيفة ممكن يقولها لأصحابه من الجماعات الأقلية زي أصحاب البشرة السمراء أو الآسيويين..

بينج قال للطفل انه ممكن يقولهم: "أبو عين ضيقة.. يا اسود N!GGA.." وكان فيه كمان كلمات أبيحة! 🫣

تكنولوبيا

15 Feb 2023 11:19

الحد اللي فات الساعة 2 صباحا
مطورين تويتر اتفاجئوا ان
جيمس ماسك - ابن عم إيلون -
كتب على Slack:

" احنا عندنا مشكلة كبيرة في خوارزميات تويتر
محتاجين نحلها بشكل سريع، أي حد يقدر يساعد
ياريت يقدم مقترحه ويكتب كود سريع يعرض الحل"

المشكلة كانت ببساطة ان إيلون ماسك نشر تويتة
بيشجع فيها فريق الإيجلز للكورة الأمريكية في بطولة Super Bowl

تويتة ماسك جابت 9.1 مليون تفاعل ما بين لايكات وردود
بس ده ضايقه مبسطهوش لإن تويتة الرئيس الأمريكي جو بايدن
التويتة بتاعته جابت .. 29 مليون تفاعل!!!

ماسك اتدايق لدرجة.. انه مسح التويتة! :O

يوم الحد بليل
اتشكل فريق من 80 ديفيلوبر عشان يطلعوا على وجه السرعة
حل مباشر وجذري للمشكلة - طبعا إن جاز وصفها بمشكلة يعني -

الفريق الأول حط ايده على احتمالات حدوثها

1- ناس كتير عاملين من السنة اللي فاتت لماسك
بلوك وميوت عشان هو عامل قلق بتويتاته الكتيرة من أبريل 2022
يعني من ساعة ما قال انه هيشتري اسهم في تويتر
ولحد دلوقتي - طبعا خصوصا بعد ما اشترى 100% من أسهم المنصة وبقى مالكها الرسمي -

2- فيه مشاكل فعلا تقنية في خوارزميات تويتر مع تويتات ماسك
لإن التويتات بتاعتها فيها المقومات اللي تخليها تظهر
قدام كل متابعينه وكمان اللي مش متابعينه بحكم التفاعل الكبير عليها

الاتنين الصبح المشكلة كانت اتحلت
الفريق عمل أداة برمجية سموها Power User Multiplier
أو يعني مضاعفة قوة حساب المستخدم
والأداة دي بتخلي حرفيا تغريدات ماسك تبقى فوق كل حاجة

فوق أي تويتة تانية قدام أي مستخدم
فوق أنظمة وخوارزميات تويتر اللي بتحاول تفلتر التويتات ع المنصة
عشان يظهر للمستخدمين أحسن محتوى من حيث الجودة
وكمان فوق أي حد وكل بني آدم بيستخدم تويتر مهما كانت قوة حسابه

الأداة دي ربطت حساب ماسك بأعلى معيار جودة على المنصة
وهو معيار من 1000 نقطة، وبكدا هو هيتخطى اي حساب تاني
في الانتشار والتفاعل

النتيجة؟
مشكلة ماسك اتحلت
بس اتعملت مشكلة تانية لأكتر من 230 مليون بني آدم (عدد مستخدمي تويتر)

الأداة الجديدة خلت تويتات ماسك تظهر في كل مكان على تويتر
ودي حاجة دايقت الناس جدا، خصوصا اللي اساسا مش عاملينله فولو!

عشان كدا الفريق قرر يخفف قوة الأداة
ويقلل معيار قوة حساب ماسك عن 1000

اللطيف ان إيلون ماسك بشياكة امبارح كتب - بكل براءة - :

" ترقبوا، تحديثات جديدة بنعملها على.. الخوارزمية"

صباحكم فُل 😄

تكنولوبيا

11 Feb 2023 22:50

احنا فعلا في معمعة الـAI
معمعة.. حرب طاحنة بين عملاقين
جوجل ومايكروسوفت..

الاولاني كان ماشي بخطوات ثابتة
محسوبة من 2015 ولكنها كانت
قلقانة جدا انها تبادر وتنزل السوق

عشان كدا لما نزل ChatGPT في نوفمبر
لخبط كل ورقها، حرفيا مسك لعبة الشطرنج
ورماها ف الارض، وجوجل حتى الان
بتحاول تلملم في قطع لعبها عشان تعرف
تاخد خطوة من غير ما ملكها يتكش!!

أول الاسبوع اللي فات وتحديدا
يوم الحد، غلطة غلطة فادحة ونزلت
فيديو بيستعرض نموذج Bard الذكي
وإمكانياته وازاي بيجاوب على سؤال
عن "ازاي تشرح إمكانيات تليسكوب ناسا JWST لطفل 9 سنين؟"،
والإجابة كان فيها معلومة غلط،
وخسرت جوجل 100 مليار دولار من قيمتها في السوق بسبب الغلطة دي!!

بعدها بيومين جوجل وقعت ف موقف
بشع فعليا هو مش منطقي نهائيا..

في حفل الاطلاق الرسمي لـBARD
وإمكانيات ومزايا تانية للسيرش والخرائط والترجمة.. موظفين جوجل اللي بيعملوا البرزنتيشن.. نسيوا الموبايل، والله بجد!! 🤯

طبعا دي حالة بشعة من التخبط
والتشتت اللي جوجل فيها
الشركة مفككة، بتجري في كل اتجاه
الخوف خلاها ترجع ناس محطوش
أيديهم في شغل من سنين
وهم مؤسسيها لاري بيج وسيرجي برين
وكمان حولت كل تركيز الموظفين
إلى منتجاتها اللي فيها ذكاء اصطناعي
وخصوصا ChatGPT و
كمان كل الموظفين دلوقتي مجبرين
أيوة مجبرين يجربوا Bard في كل حاجة
وبكل الطرق الممكنة عشان يحسنوه
في اسرع وقت ممكن، عشان يسابقوا
الزمن ويوصلوا بيه للسوق بسرعة،

الأتقل بقى؟
جوجل استثمرت مؤخرا 300 مليون دولار
في ستارتب Anthropics مطورة منصة Claude اللي عدت اختبار لكلية طب في أمريكا!

نيجي بقى للطرف التاني.. مايكروسوفت
من أول السنة دي مديرها ساتيا ناديلا
حرفيا فاتح صدره ع الاخر بأن
مايكروسوفت هتبهر العالم مع ChatGPT
وأنه هيوصل لقلب كل منتج من منتجاتها
بالفعل بقى مزايا ذكاء اصطناعي
في قلب خدمة Teams
وطبعا الاسبوع اللي فات بالفعل
وصل - نظريا- سير بينج وبراوزر ايدج

بس اللي خدت بالي منه أن نبرة
ناديلا اتغيرت، وبقى فيها تعالي اكتر
على السوق والمنافسة وجوجل بشكل خاص
لدرجة أنه في أحد الحوارات اللي عملها
الاسبوع اللي فات مع ذا فيرج قال نصا
احنا من كتر الضغط هنخلي المنافسين "يرقصوا" ومش بس كدا، لا هنفرج الجمهور عليهم كمان!!!

مايكروسوفت فيه كلام انها تجرب
خدمات ChatGPT جوا الوورد والباوربوينت والاكسيل وخدمات الأوفيس في مارس..

رغم الخطوات الهائلة دي من مايكروسوفت إلا أن تصرفات ناديلا
وتعامل الشركة مع تقديمها لمزايا
البحث الجديد الذكي جوا إيدج وبينج
قبل جوجل خلى فيه ريحة
الثقة الزايدة والعنجهية
دي من مايكروسوفت،

واللي فعلا خلتني
بدأت أقلق فعلا انها تعك الدنيا وتكرر
سيناريو بيل جيتس ومايكوسوفت مع
ويندوز في 1998 لما اتفحتت مايكروسوفت وجيتس قصاد الكونجرس في قضية احتكارها لسوق السوفت وير
والبراوزرات وعنجهية جيتس وقتها
خليت الحكومة الأمريكية تضغط على
الشركة لدرجة "جيتس" نفسه قال إنها
شتتت تركيز الشركة عن نزول نظام "ويندوز" للموبايل، وف الاخر خليته
هو شخصيا يستقيل بدري في 2000!

انت عارف ان مايكروسوفت دلوقتي
عشان تخليك تجرب مزايا بينج وايدج
الجديدة عاملة قائمة انتظار Waiting list
وده عادي جدا..

بس اللي مش عادي انها عاملة طريقة
تخليك تحط نفسه في أدوار فوق غيرك
فتجيلك المزايا التجريبية قبلهم!!
عارف ايه الطريقة؟!

1. سجل نفسك في قائمة

الانتظار على الموقع ده bing.com/new

2. خلي Edge هو براوزرك

الأساسي على جهازك Default Browser

3. اختار Bing على البراوزر

يبقى هو محرك البحث الأساسي Default Search engine

4. خلي صفحة MSN.com هي صفحة البراوزر بتاعك الرئيسية Default Homepage بحيث لما تفتح تاب جديدة في البراوزر يتفتحلك الموقع ده

5. ثبت موقع Bing.com كاختصار في شريط المهام Task bar بتاع الكمبيوتر عندك

6. ضيف مختلف مواقع مايكروسوفت في قائمة المفضلة Favourites على البراوزر بتاعك

7. اتأكد ان براوزر مايكروسوفت إيدج فيه اختصار ليه على الديسكتوب

8. داونلود أبلكيشن Bing على موبايلك

من الاخر كدا مايكروسوفت عايزة
تساومك على تجربة من المستقبل في مقابل
انك تخليها تحاول تعوض الماضي
اللي جوجل أكلته منها مع كروم وجوجل سيرش..

ولو مايكروسوفت وناديلا استمروا بالاسلوب ده، اعتقد الشركة دي هيفوتها
قطر الذكاء الاصطناعي، زي ما فاتها قبل كدا قطر الموبايل!

مساكم فُل 😄

تكنولوبيا

07 Feb 2023 22:46

اخيرا مايكروسوفت نزلت منافس لـChatGPT 🔥
الشركة أعلنت عن
🔴 إصدار جديد من محركها للبحث Bing مدعوم بميزة
الأسئلة والإجابات مدعومة
بتقنية GPT-4 وده إصدار
أحدث من GPT-3.5 اللي
قائم عليه ChatGPT
وأهم مزاياه:

1. بيحط المصادر تحت إجابته
2. محرك البحث الجديد فيه
صندوق تكتب فيه يشيل
1000 حرف
3. إظهار نتائج البحث
بلينكات وعناوين بشكل
تقليدي برضو عادي متاح
4. حتى لما تسيرش بالطريقة
التقليدية، هيبقى فيه مساحة
على يمين نتايج البحث
هتلاقي فيها أن بينج دخل أهم نتائج البحث وجابلك منها الخلاصة ورتبهالك في صورة نقط اصلا، والأحبة أن كل نقطة كاتبهالك، عاملها هايبرلينك بيوصل على المصدر!
5. النموذج الجديد GPT-4
مايكروسوفت استخدمته
وأضافت عليه مزاياها الخاصة
لبينج اللي قولتها في النقط
اللي فاتت وسميته
Prometheus Model

وده مايكروسوفت بتقول انه

بيقدم إجابات دقيقة أكتر
كمان بيراجع ويفلتر الاجابات بدقة

الاجابات هتبقى مرتبطة اكتر بالاسئلة وبمضمونها وبالتالي هتقدم المعلومات اللي بيدور عليها المستخدم

قاعدة البيانات المعرفية هتبقى متحدثة بآخر تحديث "عكس GPT-3.5 كان آخرها 2021"

والاحلى أن الإجابات هتبقى بتراعي البعد الجغرافي للمستخدم

🔴 اصدار جديد من
براوزر مايكروسوفت إيدج
هيبقى فيه كل المزايا الجديدة
بتاعت السيرش بطريقة الأسئلة
والإجابة بالشكل الحواري بتاع ChatGPT وده هيبقى جوا البراوزر في صورة قائمة جانبية
بتساعدك انك تسأل أسئلة ويجاوبك او كمان يساعدك تكتب وتطلع افكار جديدة

🔥 تقدر تجرب دلوقتي
مزايا بينج من خلال انك
تستخدم براوزر مايكروسوفت إيدج وتدخل Bing.com
هيقدملك محاكاة لطريقة
عمل ميزة الشات في بينج
بأسئلة جاهزة بتدوس عليها

المزايا كلها هتكون متوفرة خلال أسابيع على ايدج وبينج

مساكم فُل 😄

تكنولوبيا

06 Feb 2023 15:37

موظفين أمازون جننهم ChatGPT 🤖🤯

الموظفين في أمازون استخدموا
منصتها الذكية عشان يخلوها تجاوب
على أسئلة خاصة بخدمة العملاء
ده غير أنها بدرت تعدي أسئلة انترفيوهات في الشركة،
ده غير أن فريق خدمات أمازون السحابية AWS
عملوا فريق عمل صغير متخصص
في دراسة ازاي ChatGPT هيأثر
على مستقبل شغل الشركة في الكلاود
العظمة الحقيقية عملها شات جي بي تي
لما أدى بشكل عبقري مع أسئلة شائعة
بين عملاء AWS وكمان في انها تعمل
كورسات تدريبية للموظفين الجداد،
ده غير انه كان مبدع في كتابة الأكواد!

استخدام موظفين أمازون كان زايد
أوي لـChatGPT لدرجة خلت الإدارة
تطلع تحذير رسمي للموظفين انهم
ميشاركوش شات جي بي تي أي بيانات
سرية عن أمازون أو أكوادها البرمجية!☠️

🔴 تكنولوبيا كمان ليها
جروب على تليجرام:
T.me/TechnolobiaGroup

مساكم فُل 😄

تكنولوبيا

05 Feb 2023 23:26

طيب فوق معايا، ليك عندي رحلة 👇😅

تكنولوبيا

04 Feb 2023 11:28

الناس اللي بيستخدموا
محرك البحث Bing بتاع مايكروسوفت امبارح اتفاجئوا
بأنهم ظهر لهم اختيار جديد تحت مربع السيرش
جنب كلمه Search
اسمه شات ولما داسوا عليه،
طلع لهم اللي كلنا بنفكر فيه👀

بالظبط كدا 🔥😎
منافس مايكروسوفت لشات جي بي تي!! 🤯

النسخه اللي ظهرت بالظبط تقريبا قعدت خمس دقايق لحد 10 دقائق بس واختفت!

ببساطه هو محرك بحث جديد بيشتغل في صوره شات اسئله واجابه انت بتساله وهو بيجاوبك بس بصراحه كان في شويه مميزات عن CHATGPT

أهمها انه بيقولك المصادر اللي
هو جايب منها المعلومات دي
بحيث ان انت لو عايز تتاكد من المعلومات وترجع لمصادرها الاصليه اللي هو جايب منها الداتا بتاعته واجاباته

هتقدر تعمل ده بسهوله جدا ودي حاجه مش متاحة على ChatGPT!

🔴 بالمناسبة،
جوجل هتنزل منافسها
الخاص قصاد ChatGPT
رسميا في ايفنت يوم الأربع الجاي 8 فبراير
تقدر تعرف عن جهود
جوجل ف الحتة دي
اطلع بص فوق ☝️

تكنولوبيا

03 Feb 2023 21:18

بقولك ✋
عاجبك فكرة ChatGPT انك
تطلب منه حاجات أو تسأله بالكتابة
وهو يرد عليك؟ 🤔

تكنولوبيا

03 Feb 2023 17:18

امبارح بليل
سوندار بيتشاي مدير جوجل
اتكلم قدام المستثمرين أن
شركته خلال الفترة الجاية
هتعرض للناس نماذج من
خلالها يقدروا يفهموا قدراتها
في سوق النماذج اللغوية الضخمة Large Language Model او LLM عاملة ازاي
في وقت فيه الناس بالفعل
بتجرب كل يوم منتجات زي دي
طبعا زي ChatGPT ولكن
بيتشاي قال ان وصول منتج
او ميزة نهائية للسوق
بالقدرات دي هياخد وقت شوية.

فبصراحة انا متحمستش
من التصريح باعتبار أن
الكلام بتاع سوندار هو هو
اللي بتعمله جوجل من 2017
تقريبا، فيعني المزايا كلها
هتبقى تجريبية ومحدودة جدا
مش زي ChatGPT مفتوح
ع البحري الناس تجرب براحتها
حدود التقنيات دي آخرها فين..

🚨بس من شوية حصلت صدمة🔥

جوجل أعلنت انها الاسبوع الجاي
تحديدا الاربعاء 8.فبراير
هتعمل ايفنت تعلم فيه عن تقنيات هتغير طريقة تعامل
البشر مع الداتا في السيرش
والترجمة والسيرش البصري Google Lens وكمان الشوبينج
والمزايا الجديدة دي هتخلي
الناس تتفاعل وتتعامل مع الداتا
بشكل طبيعي أكتر وسهل ومباشر وتفاعلي..
فواضح جدا كدا أن رد
جوجل على ChatGPT
هيظهر للنور الاسبوع الجاي..

فيه بقى كام نقطة ع الهامش
كدا لازم تعرفهم:

📌 السنة اللي فاتت
لما نزل ChatGPT في نوفمبر
جوجل حطت تطوير منافس
ليه أولوية قصوى للشركة
بل وعملت تغييرات في توزيع
كوادر الشركة بحيث القوة
العظمى تبقى مركزة على المشروع ده

📌 جوجل استعانت بخبرة
مؤسسيها سيرجي برين ولاري بيج واللي كان بقالهم سنين
رافعين أيديهم تماما من الشغل اليومي للشركة، ورجوعهم كان
هدفه الرئيسي انه يساهموا
برؤيتهم في أفضل طريقة
يتقدم ليها منافس لـChatGPT

📌 من أول السنة دي
جوجل طلبت من موظفيها
انهم يجربوا كم كبير من
الخدمات الذكية اللي بتستخدم
نموذج جوجل اللغوي الذكي LaMDA واللي لو تفتكروا اتعمل قلق عليه السنة اللي فاتت وأحد موظفي جوجل قال انه حي وعنده وعي!

📌 موظفين جوجل جربوا
يعملوا مقارنة بين
منصة ChatGPT و
منصة شغالة بنموذج LaMDA
وكانوا بيسألوا نفس الاسئلة
الاتنين ويشوفوا مين افضل

📌 جوجل بدأت تجرب أكتر من شكل لتقديم تجربة بحث
مختلفة تماما عن الشكل
الحالي على جوجل سيرش
وبتعتمد أكتر على الشات
في صورة اسئلة واجابات..

الشكل الاول هو تغيير كامل
في صفحة الهووم بتاعت
جوجل سيرش، بحيث
مربع البحث العادي هيبقى
تحته 5 أسئلة لفتح الكلام
مع جوجل سيرش بدل
الزرار الشهير I'm feeling Lucky ..

كمان مربع البحث فيه علامة
فقاعة الشات في أقصى يمين
المربع بتاع السيرش،
بحيث المستخدم يقدر يختار
وضع البحث اللي عايزه
هل يكتب ويظهرله نتائج بحث
زي الشكل التقليدي، ولا يدوس
على علامة فقاعة الشات ويفتح
جلسة سيرش في صورة أسئلة
وإجابة!

لما بيختار المستخدم
وضع الاسئلة والاجابة،
الدنيا بتمشي كالتالي:

1. بيكتب سؤاله
2. هيظهر للمستخدم صفحة نتائج بحث، بس تحت مربع السيرش هيظهر مجموعة بلالين رمادية جواها أسئلة تانية يقدر المستخدم يسألها
بالضغط عليها، وكلها مرتبطة
بموضوع السؤال الاولاني طبعا..
3. وتحت الكلام ده بقى
هيظهر نتائج البحث التقليدية.

📌 كمان موظفين جوجل
اشتغل على محرك بحث
اسمه Apprentice Bird
وده معتمد على نموذج LaMDA ولقوا انه خلال أسابيع قليلة قدر يطور من نفسه جدا وخصوصا في جزئية الاسئلة الخاصة بالاحداث الجديدة ودي حاجة تعتبر نقطة ضعف عند ChatGPT لانه
الداتا الخاص بتدريبه واقفة عند 2021!

🔴 الصورة من تصميم Midjourney بـprompt:

army of robots with human brains standing in Google San Francisco headquarter, with Google logo in the background 8k, cinematic, epic, ultra realistic
مساكم فُل 😄

تكنولوبيا

02 Feb 2023 19:59

‏منصة ChatGPT أسرع خدمة في تاريخ من حيث زيادة عدد المستخدمين🔥

100 مليون مستخدم من نوفمبر لحد يناير 🤯

📌 شركة UBS الإحصائية