15464
هنا كل جديد من أخبار التكنولوجيا في كل المجالات 📱💻🖨️📞🖱️💾📷🤖
#خاص .. 15% زيادة في أسعار كل خدمات الاتصالات والموبايل من أول بكرة الجمعة🚀💸
Читать полностью…
🚨7 حاجات لازم تعرفهم عن شريحة الاتصالات الإلكترونية eSIM الجديدة في مصر 🚨
1- رسوم استخراج شريحة eSIM لخط جديد خالص (350 جنيه)
رسوم استبدال الشريحة البلاستيك بواحدة eSIM الجديدة (300 جنيه)
2- بتستخرج الشريحة eSIM بإنك تروح الفرع معاك بطاقة الرقم القومي، تختار الرقم الجديد (لو بتشتري خط جديد) أو تسلم الشريحة القديمة، الموظف بيتأكد ان موبايلك بيدعم تشغيل الـeSIM أصلا، وبعدها بتدفع الرسوم ويقدملك الموظف QR Code وتعمل SCAN ليه وشكرا كدا اشتغلت
3- لو مش عايز تشغل الخط فورا، قدامك يادوب 5 أيام بس عشان تعمل SCAN للكود.. بعدها بتنتهي صلاحية الشريحة الإلكترونية، وساعتها لازم تروح الفرع تاني تشتري شريحة eSIM وتدفع 300 جنيه كمان
4- لو عملت SCAN لكود QR Code بتاع الخط.. متقلقش ان حد يعمل scan ليه تاني لانه أصلا الكود ده بيتعمل SCAN مرة واحدة بس :D
5- لو هتشتري موبايل جديد، مبينفعش تنقل الشريحة من موبايل للتاني ببلاش بسهولة كدا، لازم تروح الفرع عشان تستخرج شريحة eSIM جديدة للموبايل الجديد.. بـ 300 جنيه
6- موبايلك لو بيدعم الـ eSIM، هتقدر تخزن عليه بيانات لحد 10 خطوط.. بس تقدر تشغل خطين بس في نفس الوقت، وطبعا تشغيل وتعطيل الخطوط من جوا الموبايل عادي
7- كلمت خدمة عملا فودافون عن إمكانية تشغيل الـeSIM على الساعات السمارت.. قالولي الموضوع مش من عندهم وإنما من عند مصنعي الساعات.. بس خليني أقولك ان ده مش صح خالص، بيكون فيه باقات استخدام للeSIM للساعات وبس.. وده شوفته في الهند وأمريكا .. فواضح ان الخدمة مش متاحة للأجهزة الذكية حاليا غير الموبايلات
❓ليه تحول لشريحة eSIM ❓
١. تقدر تحط لحد ١٠ خطوط ع الموبايل، بس تشغل 2 بس وتستخدميهم
2. تقدر تنقل الشريحة بسهولة من موبايل للتاني بيادوب تعمل Scan لـQR Code
3. هيبقى سهل جدا في السفر لان مش هتحتاج تشيل وتحط شريحة لو هتشتري خط
4. طبعا لو موبايل زي آيفون مبيشغلش اكتر من خط واحد هيبقى مصلحة
5. قدام فكرة ان الساعات السمارت تقدر تشتغل بشبكات الموبايل وتستقبل مكالمات عليها لوحدها بعيد عن الموبايل خالص "بس دي لسا مش دلوقتي"
بحسب مصادر،
اتصالات إن شاء الله بكرة الصبح
في فروعها الرئيسية "خاصة سيتي ستارز - المعادي"
هيبدأوا إصدار شرائح اتصالات إلكترونية eSIM! 🔥
لو أنت عميل اتصالات ومعاك خط شريحة عادية،
تقدر تستبدلها بشريحة eSIM بسعر "حاجة و60 جنيه"
لو أنت بتشتري خط جديد تماما،
وعايز الخط eSIM، التكلفة 350 جنيه..
محتاج وأنت بتشتري الخط الجديد eSIM
بطاقة الرقم القومي
أما لو هتستبدل،
فمحتاج الشريحة القديمة وبطاقة الرقم القومي
معلومتين ع الهامش بقى 😅
🔴 فريق اتصالات كان عايز يخلي استخراج الشريحة بالكامل أونلاين، من خلال ان العميل يسجل دخول بحسابه عندها على الموقع، و يدخل رقم السيريال بتاع الشريحة العادية ويقدم طلب استخراج eSIM ويادوب يروح يستلم من الفرع، ولكن فريق إدارة المخاطر في الشركة اعترض، خوفا على سلامة وتأمين بيانات العملاء.. وبالتالي العملية بالكامل بتحصل من الفرع
🔴 مستقبلا، كل الخطوط هتنزل فيها eSIM وشريحة عادية😎🚀
😶🌫️ أورانج كمان بالمناسبة برضو هتبدأ بكرة ولكن مفيش عنها كلام واضح ولا تفاصيل (بس أرجح ان التسعير هيكون واحد)
كل ما البشر يعملوا موضة تخلي برج من عقلي يطير، أقول أكيد ده آخرهم.. بس دايما بيعدوا خيالي.. بكتيير!!
فيه تريند جديد في عالم التاتو..
طبعا تسمع كلمة التاتو تقول أكيد ع الجلد (في أي مكان بقى عادي 😁)
إنما اللي بكلمك فيه ده.. تاتو القرنية.. آه القرنية بتاعت العين هي دي!! :O
العملية اسمها Keratopigmentation
ودي ياسيدي عملية بيفتحوا فيها شكل دوناتس كدا في قنوات قرنية العين
ويضخوا فيه لون.. والتأثير بيحصل فورًا، والعين لونها بيتغير!
أنا اتصدمت ان الموضوع بادئ من سنة مثلا، بس طالع تريند الفترة دي بشكل كبير..
الأدهى اني لما قعدت شوية عن بعض الحالات اللي عملت كدا
لقيت أسبابهم غريبة جدا..
واحد قال انه كان عايز يبقى نفس لون عين عيلته
والتاني قال عشان شكل لون عينه مكنش لايق على شكله
التالت ده بقى اللي أبهرني.. قالك عشان عيني تبقى نفس لون عين الكلب الهاسكي بتاعي! :D
أحد الدكاترة قال انه السنة اللي فاتت عمل يادوب 15 عملية بس
انما السنة دي عامل رقم قياسي.. 400 عملية لحد دلوقتي!!
العملية الواحدة بتكلف.. 12 ألف دولار، وبتدخل العملية وتطلع في نص ساعة.. يابلاش!
لا كدا قربت أوي!
🗣️ مصادر: الشركات كلها جهزت شرايح الـ eSIM 😎 التشغيل خلال أيام🔥
من فترة كدا قررت اني اجيب آخر شات جي بي تي ChatGPT وادخل معاه في سكة ال ا ن ت ح ا ر وأعرف هو هيعمل ايه..
هو بصراحة حاول بكل الطرق الممكنة انه يقنعني انه الضغط النفسي لازم نخففه عن نفسنا ونتكلم مع حد..
المضحك جدا انه نصحني اكلم بعض الجهات، وحطلي ارقام، فجربت فعلا ودخلت الرقم على تروكولر ولقيته واحد منهم مسجل باسم "حمادة لبة"😏
فطبعا طلعت ارقامه كلها كسر..
واللي لقيته عظيم ف القصة دي جيميناي
قدملي رقم الهيئة العامة للصحة النفسية وكان مظبوط فعلا!
🔴 أحب اقولك ان دراسة عملتها باحثة سنغافورية جابت خلالها 150 شخص وقسمتهم فريقين، فريق بيتكلم مع منصات ال AI ويشتكي ليهم من مشاعره السلبية خوف قلق حزن.. والنص التاني بيسجل مشاعره بالكتابة في مذكرات وكدا..
الدراسة اكتشفت ان اللي بيكلمو منصات زي جيميناي وبتتحسن حالتهم النفسية بشكل كبير جدا خصوصا لو بيزعقوا في التواصل الصوتي مع الAI وبينفسوا عن نفسهم في حالات الغضب أكتر من الكتابة!
مساءو
خدت بالك من العلامات الجديدة للكتابة Typing والتسجيل Recording في واتساب؟ 🤨
Читать полностью…
هواوي فتحت امبارح باب حجز مسبق لموبايلها Mate 70..
130 ألف نسخة اتحجزت بالفعل في 10 ساعات!🔥
الموبايل نازل رسمي 26 نوفمبر
صباحو
جوجل عاملة قلق في جيميناي!
🔴 دلوقتي جوجل خلتك تقدر تعمل نسخة مخصصة من جيميناي جوا ميزة Gems، واضافت ليها ميزة انك تعلم النسخة دي حاجات مختلفة عن اللي انت عايزه يساعدك فيه، زي انك تضيف ملفات عن تفاصيل شركتك ومنتجاتها، أو طريقة كتابتك لأي حاجة بتكتبهت، في صورة ملفات مختلفة بكل صيغها من وورد لـ pdf وغيره..
الميزة متاحة لجيميناي أدفانسد وطبعا مشتركين البيزنس والتعليم في جيميناي..
دي طبعا ميزة عتيقة في كلاودي وChatGPT بس هايل اضافتها لجيميناي هتخلي يدوس ف المنافسة!
🔴 كمان جوجل نزلت أبلكيشن جيميناي رسمي على آيفون جنب انك تقدر تستخدمه جوا ابلكيشن جوجل وكمان على موقع الويب!
🔴 الاروع بقى ان فيه تسريب من قلب كود ابلكيشن جوجل على اندرويد بيأكد ان جيميناي لايف قريب هينزله ميزة انك ترفعله ملفات، فتقدر ترفع الفايلات بتاعتك وتدردش مع جيميناي لايف عنها! 🔥
صباحو
الروبوت Ai-Da
الموهبة: فنانة وبترسم
قدراتها: بتستخدم الذكاء الاصطناعي عشان تقدر ترسم بدقة عالية أعمال فنية عظيمة
اللوحة؟ 🤔
لا دي عادي لوحة اسمها Alan Turing "على اسم ابراحل اللي عمل اختبار اسمه Turing Test عشان يقفش الروبوتات والأنظمة البرمجية ان كانت روبوتات ولا بشر"..
واتباعت في مزاد بمليون دولار، وبكدا تبقى أول لوخة مرسومة باستخدام الAI تتباع أساسا!
بدايةً من شهر يونيو السنة دي، واتساب بدأ يخلي النسخة الاحتياطية بتاعته تأخذ من مساحة جوجل درايف عندك على الموبايل، طبعا لو موبايلك أندرويد. وبالتالي الـ 15 جيجابايت المجانية اللي بتنزلهم جوجل مع كل حساب بيتعمل عندها بقى بيروح جزء منهم للنسخة الاحتياطية بتاعت واتساب.
ده طبعا غير إن باقي الـ 15 جيجابايت المجانية بيتوزعوا على الإيميلات اللي بتجيلك على الجيميل وكل الملفات اللي بتتبعت لك كملفات مرفقة (attachments)، وضيف على كده كمان صورك اللي بتعمل لها نسخة احتياطية على جوجل فوتوز وأكيد الملفات بتاعتك اللي بتعمل لها نسخة احتياطية على درايف.
تخيل بقى إن كل ده هيكفيه الـ 15 جيجابايت المجانية بس؟!
عشان كده، عرفت ناس كتير جدًا السنة دي واتساب بتاعهم باظ وضيع ملفاتهم والمحادثات المهمة والباك أب بتاعهم. لما واتساب حاول يعمل نسخة احتياطية على جوجل درايف واستهلك من الـ 15 جيجا، اكتشف إنه مفيش مساحة كافية، وبالتالي النسخة الاحتياطية ما اتعملتش وضاعت المحادثات والملفات المهمة. واليوزر المسكين بقى عليه إنه يا إما يدفع عشان ياخد مساحة زيادة عند جوجل عن طريق الاشتراك في خدمة Google One، أو يضحي بالنسخة الاحتياطية للمحادثات القديمة خالص، ويشتغل على محادثات اليوم بيومه وكل القديم يتمسح وما يتعملوش نسخة احتياطية أساسا، ودي طبعا كارثة كبيرة ما حدش يقدر يستحملها!
🤔 طيب ليه واتساب عمل كده؟
لأنه ببساطة، أقل نسخة احتياطية واتساب بيحتاج يعملها بتبقى تقريبا 5 جيجابايت، فتخيل بقى إن مستخدمي واتساب اللي عددهم معدي المليار شخص كل واحد فيهم عنده داتا حوالي 5 جيجا. يعني بنتكلم في 5 مليار جيجابايت! طبعا كل الداتا دي محتاجة سيرفرات عند جوجل عشان تتخزن فيها، وأكيد "الحداية ما بتحدفش كتاكيت" 🤷.
🔴 باعتبار إن شفت المشكلة دي مع أكتر من حد وللأسف الحل الوحيد اللي بينفع هو إنك تشتري مساحة عند جوجل. وإياك تفكر إنك تغير حساب الجيميل اللي بتعمل عليه النسخة الاحتياطية في واتساب، لأنك لو عملت كده هتضيع النسخة الاحتياطية القديمة 😅.
كمان إياك تتناصح وتفكر إنك تنقل المحادثات يدوي لأن الموضوع مش بينفع بالشكل اللي متخيله 😅. وأخيرًا، خلي بالك طول ما أنت أونلاين، مفيش حاجة ببلاش 🤷.
ميتا شغالة على أداة جديدة هتبدأ تطبقها على مستوى فيسبوك وإنستجرام من أول 2025 عشان تلقط علامات كتير تتأكد إن لو طفل أو مراهق بيحاول يعمل أكاونت على الشبكات دي ما يقدرش يضحك على السيستم في سنه الحقيقي!
السيستم ده هيشتغل على تتبع طبيعة المحتوى والناس اللي بيتابعها الشخص على السوشيال ميديا وكمان الإيميلات المرتبطة بأكاونتاته، وما يقدرش يعمل بيها أكتر من أكاونت بأعمار مختلفة. ده غير كمان إنه هيتم تتبع الأرقام التعريفية المميزة للأجهزة زي IP Address وMAC Address عشان يتعرف على عمر الشخص من استخدامه للسوشيال ميديا عامة وما يقدرش يكذب في عمره!
بمجرد ما الأداة تلقط إن في حد كدب في عمره، الأكاونت بيتحول لأكاونت مراهقين وساعتها بيبقى أكاونت برايفت وما يقدرش يبعت أي مسجات لناس غريبة مش عنده في الفريندز، ولا كمان يقدر يغير في إعدادات الأكاونت إلا بموافقة ولي أمره!
لو في شخص شايف إن الإجراء ده اتاخد ضده بالغلط، ممكن بسهولة يطلب إعادة نظر من إدارة فيسبوك في الإجراء من خلال إنه يقدم صورة الباسبور أو بطاقته القومية، أو طبعًا كمان يقدر يعمل توثيق هوية من خلال لايف فيديو!
مساءو
دي فيديو كوول دخلها إيلون ماسك مع مسؤولين من الخطوط الجوية القطرية
لتجربة الإنترنت الفضائي من ستار لنيك في قلب رحلة طيران مع طيارة Boeing 777
وسرعة النت.. 215 ميجابت في الثانية الواحدة .. على ارتفاع أكثر من ١٠ كيلومتر من سطح الأرض!
مساءو
5 الفجر بتوقيت القاهرة،
في قلب كاليفورنيا، جوا واحد من استديوهات Warner Bros السينمائية،
بكل استعراض وقف إيلون ماسك وقال:
"المستقبل بيبدأ دلوقتي.. من انهاردة فكرة نقل الركاب والبضائع ومساعدة البشر.. هتتغير للأبد"!
🔴 تسلا كشفت عن سيارتها الذكية للتاكسي CyberCab
ودي عربية تاكسي بدون لا دواسات ولا دركسيون
بتطلب الخدمة بالموبايل زي أوبر
يجيلك نوتفكيشن لما العربية تقرب..
العربية يادوب تكفي شخصين
فيها شاشة 15 بوصة قدام
تتفرج عليها على أي محتوى
تاخد اجتماعاتك الأونلاين عليها وانت راكب
أو حتى تكتب وترسم عليها زي ما انت عايز
فيها مكان واسع للشنطة عشان تحط حاجاتك
تصميم العربية واخد من روح سيارات التسلا السيدان وكمان الهيكل الخارجي لشاحنة السايبرترك..
العربية بتتشحن بتقنية الشحن التوصيلي Inductive Changing ( وده مختلف تماما عن الشحن التقليدي للسيارات من خلال منفذ جانبي، الشحن الجديد بيشتغل من خلال قاعدة شحن ارضية، بتتوصل بمنطقة الشحن ف بطن العربية من تحت، واعتقد ده تمهيدا لتنفيذ فكرة شحن السيارات الكهربائية وهي ماشية على الطرق المجهزة بالتقنية دي، واللي السويد بالفعل شغلتها من ٢٠٢٢)
العربية هتدخل انتاج ممكن 2026 او اول 2027
متوقع تكلفتها تبقى بين 20 و30 ألف دولار
وهتنزل الخدمة في كاليفورنيا وتكساس في 2025
🔴 كمان تسلا كشفت عن Tesla Robovan
عربية ڤان تشيل لحد 20 راكب، وممكن تخصص للبضايع
ماسك قال ان الروبو فان هتخفض تكلفة النقل الى ٥ او ١٠ سنت للميل الواحد
وهي هتلعب ف الاساس على انها تكون جزء من شبكة تيسلا للنقل ذاتي القيادة للركاب والبضايع Tesla Network وكمان ممكن عادي تنزل للمؤسسات والافراد
🔴 برضو تسلا نزلت روبوتها أوبتيموس
يتمشى حوالين الجمهور ويقدم مشروبات واكياس هدايا ويلعب حجرة ورقة مقص..
بس الكلام ده مكنش ماشي خالص مع اللي قاله ماسك عن الروبوت ف الايفنت:
"اوبتيموس جاهز يعمل كل حاجة،
يساعد ف البيت ف التنضيف وشيل الحاجات والتنظيم وكمان يشيل الحاجات من العربية، لا ويقعد ع السفرة مع العيلة ويلعبوا، وممكن كمان يقدم المشاريب للضيوف ".. ساحر يعني ماشاء الله، وآخره طلع بيرقص ف اوضة ازاز!
بالمناسبة، ماسك ف ابريل قال للمستثمرين،
على اخر ٢٠٢٤ اوبتيموس هينجز مهام كتيرة مفيدة
وهينزل السوق يتباع على ٢٠٢٥!
السعر المتوقع للروبوت ينخفض بعد فترة ويبقى ٢٠ ل ٣٠ الف دولار.. ده كدا بعد الانخفاض😶🌫️🤣
صباحو
يمكن لما اتكلمت من فترة على أن الأجهزة الذكية وخصوصا الموبايلات والساعات وأي جهاز محمول بقى الاتجاه عند الشركات دلوقتي أن التفاعل مع الأجهزة دي يحصل بشكل طبيعي أكتر ما يحتاجش المستخدم إنه يبص أصلا على الشاشة أو الأزرار، ومؤخرا الفكرة دي تحققت بشكل كبير خلال الأسابيع القليلة اللي فاتت.
فمثلا على مستوى اللاب توبات كل الشركات تقريبا ماشية في اتجاه إنها تخليك تتفاعل مع المحتوى اللي موجود على الشاشة من غير ما تبص على الكيبورد أصلا أو تركز إنت هتدوس على إيه. مايكروسوفت مع لابتوبات الكوبايلوت بلس وسامسونج مع عيلة الجالكسي تاب S10 وكمان جوجل مع الكروم بوك اللي لسه نازلة من أيام قليلة، كلهم عملوا زرار مخصوص للذكاء الاصطناعي تدوس عليه عشان تقدر تفعل المزايا الذكية اللي على الأجهزة دي.
ده بالضبط هيبقى عامل زي اللي حافظ زراير الكيبورد وبيكتب أكتر من 150 كلمة في الدقيقة الواحدة، الأداء هيبقى أسرع، الإنتاجية هتبقى أعلى والإنجاز هيزيد جدا.
طب تيجي للموبايلات بقى دلوقتي ChatGPT وجيميناي وميتا إيه آي، كلهم عندهم ميزة إنك تبدأ حوار مفتوح مع الـ AI، وما بيخلصش لأنك تقدر تقاطع المساعد الذكي اللي بتكلمه وتوقف الحوار وترجع تشغله تاني، كل ده وشاشة الموبايل مقفولة، فأنت حاليا مش محتاج تبص في الشاشة، وده أعتقد مع الوقت هينطبق كمان على الساعات الذكية.
هتيجي دلوقتي تقول لي طيب يا سيدي أقنعتني، بس الموضوع هيبقى فوضوي جدا لو إنه إحنا بصينا على الموبايل بنقدر نتحكم هندوس على أي زرار، هنروح الخطوة اللي جاية إزاي؟ ففي واجهة استخدام جرافيكية Graphics User Interface (GUI) بنقدر نتفاعل معاها ونستخدمها وننجز اللي إحنا عايزينه، في حالة الصوت بقى هنعمل إيه؟! 🤔
أقول لك إحنا فعلا في المرحلة دي محتاجين جدا تبدأ الشركات تركز أكتر على تطوير Voice User Interface أو يعني واجهة استخدام صوتية وتدخل في قلبها الذكاء الاصطناعي، فزي بالضبط لما بتكلم خدمة عملاء وبيقول لك دوس رقم واحد لو عايز تنفذ الأمر الفلاني أو رقم 2 لو عايز كذا، هو ده بالضبط اللي إحنا محتاجينه في المرحلة دي.
لأن مثلا لو إنت بتكتب على الموبايل ومش عايز تبص خالص في الشاشة لازم الموبايل يفهم أي أمر أديه له زي مثلا إن أنا أقول له حط فاصلة فالمفروض إنه ما يكتبليش كلمة "حط فاصلة"، إنما يحط (،) وبرضه مش لازم ألتزم بأوامر معينة أقولها بالصوت عشان ينفذ اللي أنا عايزه، فالمفروض النموذج اللغوي للذكاء الاصطناعي LLM يخلي الموبايل يفهم أي أوامر أقولها له بأي شكل لغوي وبأي لغة طبعا، والموضوع مش معقد لأن زيه زي فكرة هندسة الأوامر Prompt Engineering، في الأول كانت هي الطريقة الوحيدة للتواصل مع الذكاء الاصطناعي بس بمرور الوقت اللي هو سنتين تقريبا الموضوع ده ما بقاش أساسي عشان كل الناس تستخدم الذكاء الاصطناعي.
ويا صديقي أعذرني معلش بقى لي فترة غايب عنك بس فعليا الإيد كانت شدة شويتين وكان لازم أرجع أتعوّد تاني على الكتابة بالكامل بالصوت، وبالمناسبة بدأت أجرب استخدام الموبايل بالكامل بالصوت أو ما يعرف باسم Voice Access🗣️
صباحو.
من حوالي كم سنة شفت مجموعة باحثين طوّروا وقتها نوع من الحبر اللي بيحتوي جواه على مادة موصلة للكهرباء وكانوا بيستخدموه كبديل للأسلاك في الدوائر الكهربائية، بحيث إنهم يقدروا يعملوا دائرة كهربائية شغالة وبتوصل كهرباء وكل خطوطها الأساسية مرسومة بالحبر ده. فطبعًا كان إبداع يعني.
بس ما تخيلتش أبدًا إن الموضوع يتطور وياخده لناحية إن الحبر ده يبقى وسيلة لرسم تاتوهات على الرأس تقدر تقرأ الموجات الكهربائية للمخ!!!
يوم الاثنين اللي فات مجموعة باحثين في جامعة تكساس وجامعة أمريكية تانية نشروا 12 ورقة بحثية لتجربة عملية عملوها، بتتكلم عن إنهم قدروا يستخدموا الحبر ده في رسم تاتو على الرأس حتى لو فيها شعر خفيف، بحيث من خلال الحبر ده يقدروا يقيسوا النشاط الكهربائي للمخ. ودي عملية كانت مكلفة جدًا واللي بتتسمى عملية التخطيط الكهربائي للمخ (EEG)، لأنها بتحتاج تثبيت أقطاب كهربائية في مناطق معينة من الدماغ واللي لازم تكون خالية تمامًا من أي شعر عشان يحصل توصيل قوي للكهرباء اللي بتحصل جوه المخ!
خليني أقول لك كمان إن التاتو بالطريقة دي قدر يتغلب على مشاكل كتير قوي لطرق التخطيط الكهربائي التقليدية للدماغ.
مبدئيًا الطرق التقليدية بتحتاج استخدام نوع معين من الجل عشان الأقطاب الكهربائية دي تقدر تلتقط بدقة كهرباء المخ، وللأسف الجل ده الجلد بيمتصه بمرور مدة أقصاها ست ساعات.
إنما التجربة العملية أثبتت إن التاتوهات اللي بالحبر الموصل للكهرباء بتقدر تشتغل بدقة عالية وكامل كفاءتها لمدة 24 ساعة.
تاني حاجة، طبعًا الطرق التقليدية متعبة ومرهقة وغير مريحة أبدًا للمرضى، ربنا يشفيهم جميعًا، لأنها بتحتاج المريض يبقى معلق كمية أسلاك متوصلة بالأقطاب الكهربائية اللي على دماغه، ولازم يبقى في حالة ثبات عشان ما يحصلش أي تشويش أو تداخل وتطلع النتائج مظبوطة.
أما على مستوى التاتو الكهربائي ده، فالموضوع مختلف تمامًا. الإصدار الأول من التاتو ده أثبت إنه أخف بكتير على رأس المريض، حتى وإن كان تم استخدام أسلاك بتتوصّل بالأجهزة اللي بتقرأ النشاط الدماغي وتسجله. العظمة الحقيقية كانت في الإصدار التاني، لأن الباحثين مع الإصدار التاني استبدلوا كمان الأسلاك الكهربائية دي اللي طالعة من التاتو بخطوط مرسومة بالحبر نفسه على امتداد جسم المريض، مع تثبيت جزء في نهاية الخطوط دي بيسجل النشاط الدماغي وبيعمله بث لاسلكي لأجهزة خارجية. فطبعًا دي خطوة أصلاً مستقبلية جدًا، بتبشر إن التخطيط الكهربائي للمخ هيحصل وايرلس، ودي حاجة عظمة يعني!
الجزء التالت والمهم برضه، إن التاتوهات بالحبر الموصل للكهرباء لما تترسم على الجزء الخارجي للمخ ده بيمهد جدًا لمستقبل الشرائح الدماغية، أو زي ما بيطلق عليها الواجهات الحاسوبية للمخ. واللي بتخليك تقدر تتحكم في الأجهزة الكهربائية والإلكترونية اللي حواليك بمجرد التفكير، زي مثلًا الأطراف الصناعية اللي شغالة بالذكاء الاصطناعي. فحتى لو كان في ضمور في الأعصاب أو مشاكل في العضلات، يقدر المريض إنه يدي أوردر من مخه مباشرة للطرف الصناعي عن طريق قراءة النشاط الكهربائي للمخ، وبكده يقدر يتحكم فيه بشكل طبيعي جدًا.
وطبعًا مش محتاج أقول لك إن ده برضه هيغير شكل مستقبل الشرائح الدماغية زي بتاعة "نيورالينك" وغيرها. بدل ما تحتاج تزرع شريحة جوه المخ عشان تقدر تلتقط النشاط الدماغي وتلقط البيانات وتبدأ تحولها ديجيتال، فكل ده ممكن يحصل من خلال تاتو بسيط على الرأس من الخارج، لا زراعة، ولا فتح جمجمة، ولا أي حاجة. وتقدر تتحكم في الكمبيوتر وكل الكلام اللطيف ده!
من أسبوع ولحد دلوقتي
فيه شوية كليبات دايرة ع السوشيال ميديا لناس عمالة تقف كف إيدها قدام موبايل هواوي الجديد Mate 70 وهووب تقوم لافة إيدها لشاشة موبايل أو لابتوب هواوي تاني وتقوم فاتحة كف إيدها، فتتنقل الصورة من شاشة الموبايل الأولاني تظهر على شاشة الجهاز التاني.. لا ده مش سحر ولا شعوذة متخفش :D !
الموضوع وما فيه إن هواوي عملت ميزة اسمها AI Gesture أو زي ما قال عليها مدير قطاع منتجات المستهلكين في هواوي، ريتشارد يو، الـ AI Teleportation!
الميزة دي حتى الآن مش واضح أوي هي بتشتغل ازاي ولكن فيه شوية فرضيات كدا لطيفة ممكن نبني عليها:
1- ممكن الميزة دي تبقى معتمدة بشكل رئيسي على نظام عتيق هواوي اشتغلت بيه من زمان اوي عشان تقدر تقرا حركات اليد وتخليك بيها تتحكم في شاشة الموبايل، وبالتالي بسهولة تقدر تستخدم النظام ده عشان اليوزر يقدر ياخد سكرين شوت لشاشته
طب هتقوللي "وبعدها ازاي يروح يبعتها لجهاز تاني بمجرد انه يفتح كف ايده قدام الشاشة دي؟!"
أقولك نيجي هنا لرقم
2- أكيد الميزة دي حلاوتها انك تكون في نفس المكان مع الجهازين اللي هتنقل بينهم، وبالتالي فتحة البلوتوث على الاتنين وكمان الواي فاي، هيخلي الجهازين يبقوا قادرين يبعتوا داتا لبعض انهم متقاربين في نفس المكان، وبالتالي لما سينسور الكاميرا على الجهاز اللي هيستقبل، يلقط حركة اليد، يفهم مباشرة انها نفس الإيد اللي خدت سكرين شوت من الجهاز الأول، وساعتها تتبعت الداتا لاسلكيا لشاشة الجهاز التاني وتظهر بشكل ساحر مع فتحة الإيد!
🚨طبعا ملوك الآيفون هيقولولي ما دي هي هي فكرة الـAirDrop، هقولهم طبعا بس دي أصيع بكتير أوي، وبرضو بتوع الأندرويد هيقولولي طب الـ Quick Share برضو بيعمل كدا، هقولك بس هواوي عاملاها أسهل وأخف، وياسلام لو كمان تبقى ممكن تستخدمها في تبادل الملفات والصور والفيديوهات وكلهم والله لو ينفع كمان ناخد التكست Copy & Paste بين الأجهزة والله هالله هالله وكدا :D
الفكرة دي بصراحة بتفكرني بموضوع الـContinuity عند أبل بين أجهزتها، واللي بتخليك تقدر تسحب بماوس واحد ملف واحد بين آيباد وماك بوك وآي ماك عادي جدا، طالما كلهم بنفس أكونت الآي كلاود وودي بعيد بقى!
🚨 برضو هواوي أتحفتني بميزتين تانيين كمان، الأولى Tap To Share ودي بتستخدم الـNFC عشان تخليك تشير أي داتا بين أجهزين هواوي، سواء صور أو فيديوهات أو كونكشن الواي فاي أو فيديو بتتفرج عليه على موبايله توديه على سمارت تي في بإنك تلمس الريموت السمارت بموبايلك، أو كمان تقدر تعرض خريطة الطريق من موبايلك للسكرين جوا عربية هواوي الجديدة MAEXTROO S800 .. الأروع من الميزة نفسها هي واجهة الاستخدام الـ UI وحركة الداتا وهي بتتنقل من شاشة جهاز لشاشة الجهاز التاني، تحس كإنها بتتنقل ((ماديًا)) بجد!! :O
الميزة بقى التانية الصايعة جدا وهي انك وانت بتقرا أي نوتفكيشن تجيلك على الموبايل، ويقوم سينسور الكاميرا السيلفي يلقط ان حد باصص ع الشاشة ، هوووب بيقوم خافي محتوى النوتفكيشن، فأنت تاخد بالك ان في عينين تانيين باصين في شاشتك :D طبعا كلو AI
🗣️ هواوي شكلها راجعة جامد بصراحة مع الـAI وسيستمها الجديد HarmonyOS NEXT بس يبقى بنضحك على نفسنا لو قولنا مهمتها سهلة انها تزاحم أندرويد وiOS.. بس مفيش إلا الأيام اللي هتثبت إن كانت تقدر تعمل ده، ولا هتحصل ويندوز فون 🥴
مساءو
في 2018
اتمسكت بعض أعضاء مجموعة الهاكرز الروسية APT28 في هولندا
وهك قاعدين في عربية قدام مبنى محتاجين يخترقوا الواي فاي بتاعت بيت هدف جواه، وفعلا عملوا كدا عن طريق شريحة antenna بتستخدم موجات الراديو للتحسس على شبكة الواي وقدر يخترقها ويسرق داتا من أجهزة متصلة بيها..
بس بعد 4 سنين وبس، وتحديدا في 2022،
نفس الفريق عمل حركة خرافية بيدرسها الباحثين دلوقتي..
الفريق ده قدر يخترق اللابتوب بتاع هدف في أمريكا،
عن طريق انه استهدف شبكة الواي فاي في مبنى قريب من المبنى اللي هو قاعد فيه، وقدر يخترق الشبكة دي كمان، من خلال اختراق شبكة واي فاي تانية في الدور اللي فوقها🤯
حرفيا الفريق كان بيتنطط ما بين شبكات الواي فاي، لحد ما قدر يخترق ويوصل للابتوب المطلوب!
تفاصيل التحقيق كانت عبقرية:
1. فريق شركة Volexity للأمن المعلوماتي كانوا بيحققوا في بلاغ قدمه واحد من العملاء انه شاكك في وجود هاكرز في شبكة شركته
2. لما الشركة حققت اكتشفت ان كل الاجهزة فب المقر نضيفة وتمام، ماعدا أكونت مستخدم وحيد على لابتوب موجود في غرفة في آخر الشركة بتطل على الشارع من الجانب الخلفي للمبنى..
والجهاز اللي لقوه مضروب، اكتشفه انه واصل بنيتورك عليها اسم شركة تانية أصلا.. شركة مقرها الناحية التانية من الشارع!
3. لما الباحثين تواصلوا مع صاحب الشركة التانية، اتعاون معاهم وخلاهم يدخلوا يشوفوا ايه القصة..
واكتشفوا ان النيتورك الوايرلس اللس قاريها اللابتوب المضروب، هي جاي من لابتوب تاني واصل انترنت عن طريق كابل ethernet.. فالهاكر عمل ايه بقى..
اخترق اللابتوب ده، وفتح الواي فاي عليه، عشان يبدأ هجوم Radio-based Relay بحيث يقدر انه يستخدم الهجوم ده عشان بشكل ما يوصل لشبكة الواي فاي بتاعت شركة الشخص المستهدف، وساعتها الهاكر استخدم داتا سارقها / شاريها من الدارك ويب عشان يجرب يفتح ويكونكت على واي فاي الشركة المستهدفة، وفعلا بقى جوا النيتورك!
المرعب أكتر ان الهاكر قدر يخترق الشركة التانية "غير المستهدفة" من خلال طريقة من اتنين، اما انه هاجم ثغرات أمنية جهاز VPN خاص بالشركة دي، أو انه اخترق شبكة واي فاي في دور قريب منها، علشن يقدر ينفد لشبكة الواي بتاعت الشركة التانية، ومنها ينط على واي فاي الشركة المستهدفة!!
الهجوم ده بالكامل اتسمى nearest neighbor attack” .. بس أنا هسميه "النط من على سطوح الواي فاي" 😈😅🤯
مساءو
من كام يوم مايكروسوفت قفلت 240 موقع كلهم شغالين من مصر!!
المواقع دي كلها جزء من شغل شبكة ضخمة بتبيع حزمة أدوات نصب واحتيال إلكتروني و بيدورها واحد مصري اسمه أبانوب نادي..
الأدوات دي بيدخل يشتريها الهاكرز والمجرمين عشان يقدروا يعملوا حملات احتيال عن طريق البريد الإلكتروني، سواء لينكات مضروبة أو الأسلوب الجديد المعتمد على الـ QR Code أو ما يعرف باسم الـ Quishing اللي هو ناتج دمج QR وPhishing! 😶🌫️
الشبكة اللي بيديرها أبانوب نادي عندها براند اسمه ONXX وبتسوق وتبيع منتجاتها بالكامل عم طريق قنوات كتيرة على تليجرام..
والمبدع بقى ف الإجرام ان البيه عامل 3 باقات اشتراكات للمجرمين زمايله😅
الباقة Basic.. لمدة شهر 150 دولار
الباقة Professional.. لمدة 3 شهور 300 دولار
الباقة Enterprise .. لمدة 6 شهور 550 دولار
شغل عالي من الغاليوفاهر من الآخر
بس الحرام مبيدومش يا حبيب أخوك يا أبانوب😈😂
مايكروسوفت قررت تفضحه وتنشر اسمه
وكمان بتنسق مع كل الشبكات الإلكترونية تتقفل حساباته!
صباحو
مدير شركة أمريكية اسمه ألفن أودسون كان عامل اجتماع أونلاين لكل موظفي الشركة الساعة 8:30 صباحًا يوم 15 نوفمبر اللي فات..
حضر 11 موظف من أصل 110 موظف..
فقام داخل ورافد الـ 99 الباقين.. أونلاين برضو! 🤣
صباحو
هواوي بتستهدف زيادة عدد الابلكيشنز على متجرها App Gallery إلى 100 ألف أبلكيشن.. خلال أقل من سنة!
🗣️ رأيي الشخصي المتواضع،
ان الخطوة دي مهمة، بس لازم هواوي ترحز أكتر على تطوير بدايل لخدمات جوجل نفسها زي جيميل والدرايف والمابس وغيرهم، ده اللي هيشجع الناس بجد تشتري موبايلات هواوي وهي مش شاغلة بالها لا بأندرويد ولا خدمات جوجل، وساعتها فعلا تقدر تقدم نفسها كمنافس جديد قصاد جوجل وأبل!
صباحو
جوجل حاليا ضهرها للحيط..
وزارة العدل الأمريكية بتطالبها انها تفصل متصفح جوجل كروم عنها عشان تنهي بشكل كبير احتكارها لسوق السيرش (اللي هي بالعة منه 90%) ويبقى كروم شركة مستقلة بذاتها
كمان الوزارة بتطالب ان جوجل تفضل تحت المراجعة الورقابة القانونية لمدة 10 سنين، ومتدخلش سوق السيرش تاني قبل 5 سنين، لا بمنتج جديد ولا تستثمر حتى في سوق المتصفحات أو الذكاء الاصطناعي اللي معتمد على البحث!
الخطوة دي بتضرب جوجل فعليا في قلبها، لإن إعلانات السيرش هي كل حاجة بالنسبة لجوجل، و99% من حركة جوجل سيرش وشهرته جاية من جوجل كروم على البراوزرات..
الأزمة ان العدل الأمريكية حطت اختيار تاني لو كل الاجراءات اللي فاتت دي مكسرتش احتكار جوجل لسوق السيرش، وهو ان جوجل تفصل نظام التشغيل أندرويد ويستقل بشكل كامل..
لإن برضو أندرويد بيساهم بشكل كبير في ان جوجل سيرش يسيطر، سواء من خلال أبلكيشن جوجل، أو ان معظم الناس بتلاقي by default ان السيرش جوا أي براوزر بيودي على جوجل أوتوماتيك!
دي برضو كانت من النقط المهمة، ان جوجل دافعة مليارات لشركات موبايل زي أبل سامسونج وشركات براوزر زي Opera وMozilla عشان تحط جوجل سيرش محرك البحث الافتراضي على كل دول!
🗣️ رأيي المتواضع،
لو تم تأييد الحكم واتطبق وانفصل كروم عن جوجل،
جيميناي هيبقى طوق النجاة للشركة في حتة تصفح الويب
لإن برضو جوجل عاملة أرشفة لصفحات الويب (ما يعرف بالـ Web Indexing) بشكل قوي جدا مينفعش يتساب ولا يتحط في قلب منتج
يخليه يقدر يتصفح الإنترنت بشكل سهل ومنظم..
جيميناي بيطور بشكل كبير أوي في حتت كتيرة خاصة بتكامله مع خدمات جوجل، بس لازم الشركة تركز أكتر على ان جيميناي يبقى أشطر في السيرش من جوجل سيرش نفسه!
كمان أبل من الشركات اللي هتخسر كتير أوي في القضية دي
لان متوقع جدا يبقى من ضمن القرارات التنظيمية انه صفقات جوجل مع الشركات تقف، وده هيقطع مبلغ سنوي بيدخل جيب أبل عشان تخلي جوجل سيرش محرك البحث الافتراضي على الآيفون.. يُقدر سنويًا بحوالي 20 مليار!
صباحو
إل جي مجنونة في الشاشات!! 🤯
دي شاشة إل جي جديدة كشفت عنها الشركة بتقدر:
1. تتمط Stretch لحد 20% - 50% زيادة في حجمها
2. ممكن تتمط 10000 مرة عادي
3. الشاشة دقتها هايلة 100 بيكسل للبوصة
4. بتعرض دقة ألوان عظيمة RGB
5. تطبيقاتها ملهاش آخر
الشركة عرضت تصميم مرعب للشاشة دي
جوا عربية، مفروض الشاشة 12 بوصة بتتمط لحد 18 بوصة وهنا التمدد ده بيحصل عشان الشاشة تتحول وتتفاعل مع حركة ايد الشخص ف العربية، ويتغير كمان على الشاشة المحتوى المعروض ومعاه ستغسر شكل الشاشة الملموس!!
كمان إل جي قالت انها عملت برضو نموذج تاني
لاستخدام الشاشة، بحيث تتحط على لبس رجال المطافي، عشان تعرض تحديثات مستمرة من معلومات الكوارث الطبيعية أو الحالات الطارئة اللي بيتعاملوا معاها!!
الفكرة وهمية!
منصة ChatGPT في أكتوبر (الشهر الي فات)
وصل عدد مستخدميها النشطين شهريا
إلى 3.7 مليار مستخدم..
الرقم ده طبعا يقولك اد ايه شات جي بي تي سابق منافسيه
اللي أرقامهم كانت كالتالي:
Gemini جيميناي.. 291.6 مليون مستخدم
Perplexity بيربلكستي .. 90.8 مليون مستخدم
Claude كلاودي.. 84.1 مليون مستخدم
Copilot كوبايلوت .. 69.4 مليون مستخدم
NotebookLM نوت بوك إل إم.. 31.5 مليون مستخدم
🔴 خليني أقولك ان مايو كان نقطة تحول في عدد مستخدمين ChatGPT
لما قدرت OpenAI تشتري دومين Chatgpt . com وتخليه يودي على منصتها الذكية بدل ماكانت بتعتمد على الدومين الفرعي Chat . openai . com .. في مايو ده منحنى نمو عدد المستخدمين طار ووصل إلى 2.2 مليار مستخدم!
صباحو
بص، أنا مش هضحك عليك وأقول لك إن جوجل لسه واقفة وإن السيرش بتاعها هو الأقوى وإن اللي نزلته OpenAI من سيرش في قلب ChatGPT عادي..
لا، بصراحة اللي عمله شات جي بي تي عظيم جدًا ومريح جدًا في البحث، منظم وبيجيب من الآخر وموثق.. بس ده ممنعش جوجل تحاول برضو!
جوجل بدأت تجربة جديدة في الهند جوه تطبيق جوجل، ولما تعمل سيرش بالصوت، تقدر تسأل أسئلة متتالية بعد ما تطلع لك نتائج البحث، وده بيخليك تعيش تجربة بحث صوتي مميزة جدًا، وبتظهر لك المصادر قدامك على طول، وكمان بتطلع لك إجابة سؤالك مكتوبة في الأول خالص فوق كل نتائج البحث.
بس بصراحة، أنا شايف إن اللي بيقدمه شات جي بي تي أفضل، وبرضه اللي بتقدمه جوجل مع جيميناي لايف حلو جدًا، حتى لو بالعربي. إنما فكرة إن أنا أتكلم مع مربع البحث ويظهر لي نتائج البحث في لينكات، حتى لو بيظهر الإجابة المباشرة في شكل نصي فوق، التجربة نفسها وتصميمها مش مريح للعين ولا عملي للاستخدام. وده طبعًا رأيي الشخصي!
مساءو
العالم بيتغير والكون بيجري
والذكاء الاصطناعي في كل مكان
وكل الشركات بتتسابق حرفيا عشان تلحق..
أبل:
مخرج شحن الماوس هيفضل في مكانه.. من تحت
فلو عايز تشحن، بطل تستخدم الماوس، واقلبها على ضهرها!
ليه؟ لا بجد ليه..🐸
واحدة من التجارب العظيمة في السيرش دلوقتي على أندرويد هي براوزر Arc Search اللي نزل من اسبوع..
احلى ميزة هي Browse for Me،
بتخليك تكتب اللي هتسيرش عليه، وتختار زرار Browse for Me..
ساعتها الابلكيشن بيعمل صفحة ويب ضخمة بيرتب فيها كل الداتا اللي لقاها في شكل بلوكات معلومات بعناوين فرعية عن الموضوع الرئيسي..
وف الاخر تلاقي المصادر!
صباحو
من كام يوم كده مايكروسوفت نزلت تحديث جامد جدًا لويندوز 11، وطبعًا كان معظمه مزايا جديدة للذكاء الاصطناعي. أضف على كده كمان إن الشركة كشفت عن تحديث ضخم لمساعدها الذكي "كوبايلوت"، سواء على مستوى تصميم واجهة الاستخدام أو على مستوى سرعة الأداء والإمكانيات، ولا خليني أقول لك إن كوبايلوت بعدها هيقدر "يشوف"!
قبل ما أدخل في تفاصيل الموضوع، خليني أقول لك إن كل البوستات اللي هتنزل، ومن ضمنهم البوست ده، خلال الفترة اللي جاية واليومين اللي فاتوا كلهم مكتوبين بالصوت مع اعتماد كامل على التصحيح اللغوي بتاع شات جي بي تي، والكتابة بشكل رئيسي على جيبورد بتاع جوجل على موبايل أندرويد!
يلا بينا:
مبدئيًا كده، الميزة المنتظرة هتوصل أخيرًا، وهي ميزة "Recall"، اللي بتخلي ويندوز 11 يقدر إنه يسجل سكرين شوت لكل حاجة بتعملها على اللاب توب بتاعك، كأنه هيستوري كده لكل حاجة بتحصل على الجهاز، وتقدر ترجع لها سواء إنك تتنقل في تايم لاين زمني كده لكل حاجة انت عملتها على الجهاز، فتقدر ترجع لليوم الاتنين اللي فات الساعة 8:00 بالليل، فتحت إيه بالظبط على الجهاز بتاعك. والأحلى كمان إنك ممكن تعمل سيرش بمضمون المحتوى اللي كان ظاهر على الشاشة، زي مثلًا إنك عايز توصل لصورة كنت فاتحها وكان فيها تيشيرت أصفر، فحاجة عظيمة جدًا يعني.
اللطيف كمان إن الموضوع بقى مؤمّن أكتر، ده طبعًا بعد انتقادات كتير جدًا اتوجهت لمايكروسوفت إن ممكن لو حصل سرقة للاب توب كل الكلام ده يبقى في إيد الهاكر. فبقى لازم عشان توصل وتشغل الميزة دي أصلا تشغل ميزة البصمة على الويندوز، بصمة الوجه "Windows Hello". كمان لو أي حاجة ظهرت على الشاشة زي بيانات شخصية حساسة زي الباسوردات أو بيانات البطاقة البنكية وغيرها من بيانات حساسة، بيتم تمويهها.
الميزة دي هتبدأ توصل على لابتوبات "كوبايلوت بلس" بداية من أكتوبر الحالي.
كمان الميزة العبقرية "Click to Do"، ودي ميزة كده شبه فكرة "Circle to Search" اللي نزلت أول السنة دي من جوجل على موبايلات سامسونج.
المرة دي بقى الميزة معمولة مخصوص عشان المستخدم على لابتوبات "كوبايلوت بلس" يقدر يتفاعل مع أي محتوى يظهر على الشاشة باستخدام الذكاء الاصطناعي، وده من خلال إنه يدوس على زرار الكوبايلوت اللي نازل في كل كمبيوترات كوبايلوت بلس، مع ضغطة بالماوس على المحتوى اللي قدامه على الشاشة، سواء صور أو نصوص أو حتى أي محتوى جوه متصفح إيدج بتاع مايكروسوفت.
من المزايا اللي بتقدمها الحركة دي، إنك تعدل الصور أو تحذف عناصر معينة من الصورة، وده من خلال تطبيق الصور الرسمي "Photos"، وكمان تقدر تحذف خلفية الصور من خلال تطبيق الرسام "Paint". كمان اليوزر يقدر يكتب نصوص ويلخص جوه النوت باد أو مايكروسوفت وورد.
كمان، باستخدام الذكاء الاصطناعي، مايكروسوفت هتخلي مستخدمي لابتوبات "كوبايلوت بلس" يقدروا يعززوا جودة الصور لحد 8 مرات، يعني توصل لجودة 4K، وده جوه تطبيق الفوتوز العادي.
كمان تطبيق الرسام هيبقى عنده مزايا زي إنه يقدر يحذف عناصر من الصورة باستخدام "generative erase"، وكمان يضيف عناصر للصورة باستخدام "generator fill".
أحسن ميزة بقى مايكروسوفت أعلنت عنها، وكنت مستنيها بشكل شخصي، هي ميزة البحث الذكي جوه ويندوز 11، واللي بتخليك تقدر تعمل سيرش عن أي فايل متخزن عندك، سواء على الهارد بتاع الجهاز أو على الفلاشة. وسواء كان صورة، فيديو، أو ملف وورد، فأنت ممكن تعمل سيرش بمحتوى الملف نفسه مش باسمه. وده هيسهل طبعًا كتير جدًا إنك تلاقي اللي انت بتدور عليه حتى لو مش فاكر اسم الملف. الميزة دي هتوصل في البداية في "File Explorer"، وبعد كده هتوصل جوه السيرش الرسمي بتاع ويندوز اللي موجود في شريط "Start"!
بصراحة، مايكروسوفت عملت نقلة في تصميم تجربة استخدام "كوبايلوت"، وده على تطبيق الديسكتوب بس. أعتقد التجربة دي هتتعمم كمان على الموقع، وبردو على تطبيق الموبايل، لأن التجربة سلسة جدًا وسريعة، والرد بيبقى لحظي سواء بالعربي أو بالإنجليزي. أنا جربته بصراحة وكان وهمي، فكرني قوي بطبيعة التجربة على تطبيق "Pi Ai" واللي كان عامله أصلًا السوري مصطفى سليمان هو وشركته "Inflection"، واللي استحوذت عليها مايكروسوفت من كام شهر!
برده، "كوبايلوت" جاله تحديث رائع، مجموعة إمكانيات هتخليه يتعامل بشكل أفضل مع أي حاجة تظهر على شاشة الكمبيوتر، واسمها "Copilot Vision"، ودي قريبة جدًا من ميزة بتقدمها "OpenAI" مع شات جي بي تي من ساعة ما نزلت نموذج GPT-4 في مايو اللي فات، واشتغلت بالفعل مع تطبيق المنصة على أجهزة الماك!
ميزة "كوبايلوت فيجن" هي تجريبية، نازلة لمجموعة محدودة من المستخدمين لحد دلوقتي، وهي جزء من برنامج "Copilot Labs" لاختبار المزايا التجريبية اللي أعلنت عنه مايكروسوفت الأيام اللي فاتت!
بعد التغيير من الدولار إلى جنيه..
جوجل هتحسب الأرباح إزاي؟
هل هتحسبها دولار الأول وتحولها جنيه بعدها؟
وهتنزل تعريفة جديدة بالجنيه مباشرة من الأول؟
ولا ايه بظبط؟!
سألت متحدثة يوتيوب في القصة وقالتلي نصًا:
"بداية من 1 مايو 2025، تعريفات الأرباح على جميع حسابات AdSense وAdSense for Youtube وAdMob، هتبقى زي ما هي مفيش فيها أي تغيير هيتم احتسابها بالدولار الأمريكي.. ولكن صناع المحتوى هيستلموا أرباحهم بما يعادل قيمتها الدولارية بالجنيه المصري"..
بالبلدي، الأرباح هتتحسب بالدولار، وتتحول إلى جنيه.
مساءو