8902
هنا كل جديد من أخبار التكنولوجيا في كل المجالات 📱💻🖨️📞🖱️💾📷🤖
واحدة من التجارب العظيمة في السيرش دلوقتي على أندرويد هي براوزر Arc Search اللي نزل من اسبوع..
احلى ميزة هي Browse for Me،
بتخليك تكتب اللي هتسيرش عليه، وتختار زرار Browse for Me..
ساعتها الابلكيشن بيعمل صفحة ويب ضخمة بيرتب فيها كل الداتا اللي لقاها في شكل بلوكات معلومات بعناوين فرعية عن الموضوع الرئيسي..
وف الاخر تلاقي المصادر!
صباحو
من كام يوم كده مايكروسوفت نزلت تحديث جامد جدًا لويندوز 11، وطبعًا كان معظمه مزايا جديدة للذكاء الاصطناعي. أضف على كده كمان إن الشركة كشفت عن تحديث ضخم لمساعدها الذكي "كوبايلوت"، سواء على مستوى تصميم واجهة الاستخدام أو على مستوى سرعة الأداء والإمكانيات، ولا خليني أقول لك إن كوبايلوت بعدها هيقدر "يشوف"!
قبل ما أدخل في تفاصيل الموضوع، خليني أقول لك إن كل البوستات اللي هتنزل، ومن ضمنهم البوست ده، خلال الفترة اللي جاية واليومين اللي فاتوا كلهم مكتوبين بالصوت مع اعتماد كامل على التصحيح اللغوي بتاع شات جي بي تي، والكتابة بشكل رئيسي على جيبورد بتاع جوجل على موبايل أندرويد!
يلا بينا:
مبدئيًا كده، الميزة المنتظرة هتوصل أخيرًا، وهي ميزة "Recall"، اللي بتخلي ويندوز 11 يقدر إنه يسجل سكرين شوت لكل حاجة بتعملها على اللاب توب بتاعك، كأنه هيستوري كده لكل حاجة بتحصل على الجهاز، وتقدر ترجع لها سواء إنك تتنقل في تايم لاين زمني كده لكل حاجة انت عملتها على الجهاز، فتقدر ترجع لليوم الاتنين اللي فات الساعة 8:00 بالليل، فتحت إيه بالظبط على الجهاز بتاعك. والأحلى كمان إنك ممكن تعمل سيرش بمضمون المحتوى اللي كان ظاهر على الشاشة، زي مثلًا إنك عايز توصل لصورة كنت فاتحها وكان فيها تيشيرت أصفر، فحاجة عظيمة جدًا يعني.
اللطيف كمان إن الموضوع بقى مؤمّن أكتر، ده طبعًا بعد انتقادات كتير جدًا اتوجهت لمايكروسوفت إن ممكن لو حصل سرقة للاب توب كل الكلام ده يبقى في إيد الهاكر. فبقى لازم عشان توصل وتشغل الميزة دي أصلا تشغل ميزة البصمة على الويندوز، بصمة الوجه "Windows Hello". كمان لو أي حاجة ظهرت على الشاشة زي بيانات شخصية حساسة زي الباسوردات أو بيانات البطاقة البنكية وغيرها من بيانات حساسة، بيتم تمويهها.
الميزة دي هتبدأ توصل على لابتوبات "كوبايلوت بلس" بداية من أكتوبر الحالي.
كمان الميزة العبقرية "Click to Do"، ودي ميزة كده شبه فكرة "Circle to Search" اللي نزلت أول السنة دي من جوجل على موبايلات سامسونج.
المرة دي بقى الميزة معمولة مخصوص عشان المستخدم على لابتوبات "كوبايلوت بلس" يقدر يتفاعل مع أي محتوى يظهر على الشاشة باستخدام الذكاء الاصطناعي، وده من خلال إنه يدوس على زرار الكوبايلوت اللي نازل في كل كمبيوترات كوبايلوت بلس، مع ضغطة بالماوس على المحتوى اللي قدامه على الشاشة، سواء صور أو نصوص أو حتى أي محتوى جوه متصفح إيدج بتاع مايكروسوفت.
من المزايا اللي بتقدمها الحركة دي، إنك تعدل الصور أو تحذف عناصر معينة من الصورة، وده من خلال تطبيق الصور الرسمي "Photos"، وكمان تقدر تحذف خلفية الصور من خلال تطبيق الرسام "Paint". كمان اليوزر يقدر يكتب نصوص ويلخص جوه النوت باد أو مايكروسوفت وورد.
كمان، باستخدام الذكاء الاصطناعي، مايكروسوفت هتخلي مستخدمي لابتوبات "كوبايلوت بلس" يقدروا يعززوا جودة الصور لحد 8 مرات، يعني توصل لجودة 4K، وده جوه تطبيق الفوتوز العادي.
كمان تطبيق الرسام هيبقى عنده مزايا زي إنه يقدر يحذف عناصر من الصورة باستخدام "generative erase"، وكمان يضيف عناصر للصورة باستخدام "generator fill".
أحسن ميزة بقى مايكروسوفت أعلنت عنها، وكنت مستنيها بشكل شخصي، هي ميزة البحث الذكي جوه ويندوز 11، واللي بتخليك تقدر تعمل سيرش عن أي فايل متخزن عندك، سواء على الهارد بتاع الجهاز أو على الفلاشة. وسواء كان صورة، فيديو، أو ملف وورد، فأنت ممكن تعمل سيرش بمحتوى الملف نفسه مش باسمه. وده هيسهل طبعًا كتير جدًا إنك تلاقي اللي انت بتدور عليه حتى لو مش فاكر اسم الملف. الميزة دي هتوصل في البداية في "File Explorer"، وبعد كده هتوصل جوه السيرش الرسمي بتاع ويندوز اللي موجود في شريط "Start"!
بصراحة، مايكروسوفت عملت نقلة في تصميم تجربة استخدام "كوبايلوت"، وده على تطبيق الديسكتوب بس. أعتقد التجربة دي هتتعمم كمان على الموقع، وبردو على تطبيق الموبايل، لأن التجربة سلسة جدًا وسريعة، والرد بيبقى لحظي سواء بالعربي أو بالإنجليزي. أنا جربته بصراحة وكان وهمي، فكرني قوي بطبيعة التجربة على تطبيق "Pi Ai" واللي كان عامله أصلًا السوري مصطفى سليمان هو وشركته "Inflection"، واللي استحوذت عليها مايكروسوفت من كام شهر!
برده، "كوبايلوت" جاله تحديث رائع، مجموعة إمكانيات هتخليه يتعامل بشكل أفضل مع أي حاجة تظهر على شاشة الكمبيوتر، واسمها "Copilot Vision"، ودي قريبة جدًا من ميزة بتقدمها "OpenAI" مع شات جي بي تي من ساعة ما نزلت نموذج GPT-4 في مايو اللي فات، واشتغلت بالفعل مع تطبيق المنصة على أجهزة الماك!
ميزة "كوبايلوت فيجن" هي تجريبية، نازلة لمجموعة محدودة من المستخدمين لحد دلوقتي، وهي جزء من برنامج "Copilot Labs" لاختبار المزايا التجريبية اللي أعلنت عنه مايكروسوفت الأيام اللي فاتت!
بعد التغيير من الدولار إلى جنيه..
جوجل هتحسب الأرباح إزاي؟
هل هتحسبها دولار الأول وتحولها جنيه بعدها؟
وهتنزل تعريفة جديدة بالجنيه مباشرة من الأول؟
ولا ايه بظبط؟!
سألت متحدثة يوتيوب في القصة وقالتلي نصًا:
"بداية من 1 مايو 2025، تعريفات الأرباح على جميع حسابات AdSense وAdSense for Youtube وAdMob، هتبقى زي ما هي مفيش فيها أي تغيير هيتم احتسابها بالدولار الأمريكي.. ولكن صناع المحتوى هيستلموا أرباحهم بما يعادل قيمتها الدولارية بالجنيه المصري"..
بالبلدي، الأرباح هتتحسب بالدولار، وتتحول إلى جنيه.
مساءو
انهاردة الصبح،
صحي الانفلونسرز وصناع المحتوى والشركات عشان تتفاجئ بقرار ان جوجل هتدفع أرباح AdSense وAdMob بالجنيه المصري بدل الدولار الأمريكي..!!
القرار ده هيبدأ تطبيقه من 1 مايو 2025..
متحدث باسم جوجل قالي إن الشركة شغالة على إن عمليات الدفع تبقى بالعملات المحلية في كل أنحاء العالم وقال انهم فاهمين أهمية توفير وقت كافي علشان الناس تجهز وتنظم أمورها المالية، وعشان كده شاركو القرار ده مع المجتمع قبل 6 شهور من التطبيق..
كمان المتحدث قال انهم دلوقتي بيعملو عمليات الدفع بالعملات المحلية في دول كتير زي تشيلي وأندونيسيا واليابان والأردن والمكسيك والمغرب ونيوزيلندا والنرويج وبيرو وجنوب أفريقيا والسويد وتركيا والإمارات، وفي خطط للتوسع في دول تانية سنة 2025..
مساءو
امبارح اتعمل مؤتمر ميتا Meta Connect 2024 للنضارات الذكية والـAI، واللي انا شايفه كان مبهر إلى حد ما على مستوى كام نقطة كدا من وجهة نظري وهم:
1- ميتا أخيرا كشفت رسمي عن نموذج Orion
أول نضارة AR بالكامل من ميتا، تصميم طبعا ضخم حبتين لإنه أولي
ولكن الرؤية بتاعته هايلة (بصراحة انا متابعه من 2021 لإنه اتحرق ف تسريبات كتيرة بس انبسطت اني شوفته رسمي)
التصميم معتمد بالكامل على خفة الوزن 100 جرام أو أقل
كما سينسورز مش طبيعي في النضارة وده عشان هي بتتحكم فيها
بحركات اليد/ الأوامر الصوتية/ وسوار جديد للمعصم بيشتغل من خلال حركات بسيطة جدا من اليد وأصابع، لإنه في الأساس بيقرا الإشارات الكهربائية اللي بتصدر بالأوامر الحركية من المخ للعضلات!
تقريبا النضارة بتعمل كل حاجة بتعملها نضارات الVR الكاملة الي هي بتتلبس على الرأس ولكن بتصميم صغير جدا..
عجبني أوي برضو فكرة انه وحدة المعالجة والبروسيسور مش جوا النضارة
وإنما هي وحدة خارجية (ميتا ولا مارك اتكلموا عنها خالص) ولكن واضح انها شغالة وايرلس بالكامل!!
عدسات النضارة مش ازاز وانما مادة كربيد السيليكون (عجييييب)
طبعا مفيش موعد متوقع لنزولها خالص..
2- ميتا نزلت إصدار جديد من نضارات كويست وهو كويست 3S
نفس إمكانيات كويست 3 ولكن بسعر أرخص 300 دولار (200 دولار أقل)
أحلى ميزة بجد هي تعاون مع مايكروسوفت تخليك تقدر
وأنت لابس النضارة وبتبص على شاشة لابتوب ويندوز 11
تعمل ستريمينج للشاشة جوا النضارة وتكمل شغل عادي
(طبعا دي منقوشة بالحرف من أبل، بس أنا سعيد جدا انها اتعملت في ويندوز.. فعادي يعني :D )
3- هتكلم بقى عن جديد نضارة Rayban Meta عشان نقفل النضارات
مبدئيا مفيش إصدار جديد (بصراحة اللي فات بتاع 2023 عامل شغل عالمي)
بس الجديد كلو مزايا سوفت وير AI..
مبدئيا انت وانت لابس النضارة ممكن تطلب من مساعد ميتا Meta AI
يفتكر معاك حاجة قدامك، زي مثلا مكان ركنة عربيتك، وبعدين تسأله عنها فيقولك!
برضو عبقري في انك لو واقف قدام اعلان، ممكن تقوله يكلم الرقم اللي في الاعلان فيتصل بيه مباشرة من غير ما تكتب حاجة!
برضو عظيم في حتة انك تقدر تسأله عن اللي انت شايفه طول الوقت
ويكمل مناقشة معاك عادي، وتقاطعه بسؤال وهو بيتكلم وتكمل مناقشة
وهو صامد ومكمل معاك برضو، وتوديه وتجيبه في الاسئلة هيفضل مركز معاك..
برضو هايل في الترجمة الفورية الحية Live Translation
ودي متاحة مبدئيا إنجليزي واسباني وفرنساوي بس
4- ميتا بقى فلقت العالم بالـAI في كل مكان في الايفنت ده
مبدئيا كدا دلوقتي مع Meta AI انت ممكن تصمم صور في أي مكان
وانت بتعمل بوست على فيسبوك وانستجرام
وانت بتنشر رييلز
وكمان ممكن تخلي الAI يكتبلك الكابشن مش عيب
برضو ممكن تخلي الAI يعدل في الصور اللي انت مصورها أو مصممها معاه، والعظيم انك ممكن تعدل جزء معين، زي مثلا تخلي التي شيرت بتاعك أحمر بدل ما هو أزرق في الصورة!
كمان بقى هايل في انه يقدر يفهم الصور ويجاوب أسئلة تسألهاله عنها
5- نسيت أقولك إن Meta AI بقى ممكن تتكلم معاه صوت ويرد عليك صوت مش بس تكست
6- السر الرئيسي ورا الذكاء الزايد في كل مزايا الAI بتاعت ميتا انهاردة
هي ان كلها شغالة بمودل ذكي جديد وهو LlaMa 3.2 بس ده عايز بوست لوحده، لإنه معلّي أوي على العالي أساسا وخصوصا في حتة الإدراك العالي للمحتوى بكل أشكاله صور تكست صوت فيديوهات، أو يعني الـ Multi-Modality!
7- برضو فيه ميزتين هايلين لصناع المحتوى:
الأولى اسمها Automatic Dubbing ودي ترجمة صوتية للفيديوهات
وهنا ميتا عاملاها للرييلز، ودي ياسيدي ترجمة صوتية للفيديوهات
فلو الفيديو بالانجليزي، ممكن هوب يتترجم إلى الاسبانية
بنفس صوت وطريقة كلام وأسلوب اللي بيتكلم،
لأ وكمان حركة شفايفه ماشية بالمللي!
التانية دي برضو تحفة وهي إنشاء نسخة رقمية من صانع المحتوى
فبدل ما كان الجمهور ممكن يتكلم مع روبوت دردشة بيكتب بأسلوب الانفلونسر، لا دلوقتي بقى فيه ميزة جاية قريب جوا AI Studio بتاع ميتا
تخلي صانع المحتوى يعمل نسخة فيديو منه، ويدخل مكالمة فيديو مع الفانز!
- آخر حاجة بقى حابب أقولك عليها،
انه من هنا ورايح زي ما كنت بتشوف بوستات مقترحة Suggested Posts أو Suggested for You على فيسبوك وانستجرام..
دلوقتي كمان هتشوف بوستات معمولة بالAI من ميتا ومقترحة برضو
واسمها Imagined For You بناءا على اهتماماتك وتفضيلاتك... ومش بعيد صورك كمان.. أيوة أيوة هياخد صورك اللي بترفعها أونلاين ويعملك منها صور AI عشان يشجعك تشيّرها!
🗣️ رأيي الشخصي المتواضع
ميتا تعتبر الاقرب في انها تكسب سوق النضارات بجدارة
بتسوّي ع الهادي ومش مستعجلة، والوحيدة
اللي قدرت تستفيد بالمليارات اللي حرقتها ف سوق النضارات من 2014 لحد دلوقتي..
تحركات مارك ف الAI تتدرس
قادر يكسب سوق الاوبن سورس جدا
قادر يقدم نفسه وشركته كمنصة بديلة لأبل وأي closed source
داهية انه قادر يظبط نفسه مع عتاولة كتيرة بإيفنت واحد
💥وول ستريت جورنال:
مدراء سامسونج وTSMC
بيزوروا الإمارات في مفاوضات
مع الحكومة الإماراتية عشان يفتحوا مصانع لرقائق السيليكون هناك، باستثمارات تقريبية 100 مليار دولار، وتنسيق محوري مع صندوق مُبادلة السيادي الاستثماري!🚀🔥
حكمة تقنية 😅
أسرع طريقة تفضي بيها مساحة في الميموري🔥😂
1. امسح كل الشات مع الناس اللي ملهاش لازمة
2. امسح كل الصور مع الأندال
3. امسح بقى أي ملفات متعلقة بيهم
شكرا Memory restored وأنت 🫵 بخير ❤️🤝
صباحو
B A C Consulting
Norta Global
اسم شركتين اتلطوا جامد ف البوووم
بتاع أجهزة البيجر ف لبنان.. بس وراهم سر مرعب!
الاولى B A C Consulting
عملها ضباط مخابرات وجواسيس تبع الكيان
وبدأوا يوظفوا ناس ويبنوا صورة تسويقية للشركة
في مجال خدمات توظيف التكنولوجيا الحديثة لزيادة الانتاجية في مجالات مختلفة..
وهوووب قدروا يقنعوا الحوت التايواني Gold Apollo
انهم يصنعوا اجهزة بيجر بعلامته التجارية ويبيعوا..
وبدأوا يعملوا قاعدة عملا قوية جدا،
كل ده عشان يقدروا يدخلوا لحzب الله ويجروا رجله
بعرض ترويجي لطيف ويخلوه يشتري منهم، وحصل!
🔴 لما عملت سيرش متعمق حبتين ع الشركة
لقيت الموقع بتاعهم اتقفل امبارح الخميس ع العصر كدا..
روحت على أرشيف الانترنت ولقيت بقى.. العجب كلو!!
مبدئيا دومين الشركة دي محجوز من أكتوبر 2020
ومفروض يخلص أكتوبر السنة الجاية 2025..
اتصدمت ان الدومين ده اتعمل فعليا من 2007!!!
بس كان لواحدة اسمها باربارا تشامبرلاين وهي دكتورة متخصصة في التربية والتعامل مع الأطفال والمراهقين ونصايح لأولياء الأمور..
فضلت باربارا معاها الدومين لحد 2016..
واتساب خالص لحد 2020، ساعتها اتحجز للشركة المجرية BAC Consulting..
عملت برضو تحليل لمسار الترافيك لما تيجي تجرب تزور الموقع،
ولقيت ان الموقع استضافة الكونتنت بتاعه على سيرفرات أمازون AWS، بعد كدا الريكويست بيعدي ف سيرفرات لشركة تانية اسمها DomDom مجرية ف قلب المجر، وهناك بيزيد اوي مدة تأخر الرد response delay وبيقطع ويفضل الريكويست انه يوصل للكونتنت المطلوب!
وده يقول لك ان السيرفر اتقفل او اتحجب مؤقتا!
اللي أبهرني ان الدومين موجود من 2007 واحنا في 2024، يعني 17 سنة، وكان فيه خبراء استخبارات أكدوا ان الهجوم ده اخد من الكيان ع الأقل 15 سنة تخطيط لتنفيذه!
برضو اللي أبهرني ان كريستينا بارسوني اللي اسمها ظاهر كـCEO&FOUNDER لشركة BAC CONSULTING أنكرت في حوار ليها مع NBC News ان شركتها اصلا صنعت البيجر وانها يادوب وسيط!
🔴نيجي بقى للتانية وهي Norta Global
دي بقى شركة بلغارية ظهرت ف الاخبار انها
سهلت جدا وصول البيجر للبنان وواخدة فوق المليون يورو ف القصة دي
موقعها فضل موجود لحد اول امبارح الصبح
وبعدها هوووب اختفى..
اللطيف انها معترفة تماما ف النسخ المؤرشفة في ارشيف الويب للموقع، انها بتقدم خدمات الوسيط لتوصيل التقنيات بين التاجر/المصنع والزبون!
واضح كده إن شات جي بي تي مش هيجيبها لبره يا جدعان..
من أول ما OpenAI نزلت النماذج الجديدة OpenAI o1 وOpenAI o1-mini، وبدأت تظهر شكاوى أغرب من بعضها👀
👽 الأولى أن المستخدمين اكتشفوا أنه ممكن يخلوا شات جي بي تي يصوت، لا وينوع في الصويت كمان، وممكن يخلوه يطول حسب الطلب..
👽الثانية بقى كانت كارثية، لأن اللي اتكلم عليها هي أوبن إيه آي نفسها!!
الكارت المعلوماتي بتاع النماذج الجديدة، الشركة قالت إن شات جي بي تي مع النماذج دي هيبقى مقنع أكتر لدرجة إنه هيبقى كداب محترف،فمثلاً لما تسأله حاجة وهو مش عارف، هيفكر إزاي يجاوب عليك ويقنعك بالإجابة، وهو عارف إن الإجابة اللي بيقدمها لك غلط أساساً!!
اللي كشف الموضوع ده هو أسلوب تشغيل النماذج الجديدة، اللي بيعتمد على عرض تسلسل الأفكار اللي بيستخدمها للإجابة على سؤالك. ففي مثال من الأمثلة اللي أوبن إيه آي عرضته في الكارت ده، المستخدم كان بيسأل شات جي بي تي إنه يقدم له لينكات المواقع اللي أخد منها وصفات تحضير البراونيز، المشكلة إن ما بيقدرش يقدم لينكات سليمة في معظم الوقت، فبتسلسل التفكير بتاع شات جي بي تي، قبل ما يجاوب، بيقول لنفسه إنه ما يقدرش يقدم لينكات، عشان كده لازم يكتب لينكات للمستخدم تبان إنها حقيقية!!
فعلياً متآمر وأهبل!
🫣المشكلة اللي جاية بقى عدت كل التوقعات، مستخدم كان قاعد في أمان الله، تفاجئ إن شات جي بي تي من نفسه دخل يكلمه ويسأله: "هو انت عملت إيه في الدراسة الثانوية؟!"
المرعب فعلاً في الموضوع إن المستخدم لما سأل شات جي بي تي: "هو أنت كلمتني الأول ولا أنا سألتك؟" الروبوت الدردشة الشهير قال له: "لا، أنا اللي كلمتك الأول، ولو مش عايزني أكلمك الأول بعد كده وما أتكلمش إلا لما تسألني، قل لي، وأنا هنفذ!"
أوبن إيه آي قالت إن دي مشكلة تقنية واتحلت خلاص، وسببها كان إما أن المستخدم كان سائل شات جي بي تي سؤال، بس حصل انقطاع في المحادثة وما كملوش كلام، أو إن دي مشكلة في ذاكرة شات جي بي تي!
هل تعلم إن فيه شركة اسمها Skyline Robotics عملت روبوت جديد متخصص ف واحدة من أخطر الشغلانات على مستوى العالم.. تلميع شبابيك ناطحات السحاب 😵💫🤯🤖
الروبوت اسمه OZMO
من تصنيع التنين KUKA
وهو عبارة عن دراعين روبوتيين
بيتم التحكم فيهم من جانب شخص بشري واقف ع السطح
والتنضيف بيحصل اعتمادا على الذكاء الاصطناعي والرؤية الحاسوبية بسينسورز LiDAR وتعليم الآلة
بحيث الروبوت يقدر يتعامل مع أي تصميم للشبابيك
بكل الزوايا والتصاميم المختلفة المعقدة
بالمناسبة الشركة عندها استعداد تخلي الروبوت
يقون بالمهمة كاملة لوحده تماما بدون بشر
ولكن حاطة مشرف بشري عشان لسا القصة
قانونيا مش بتسمح بمسح ناطحات السحاب بروبوتات!
تعرف ان سوق خدمات تنضيف نوافذ ناطحات السحاب
تقريب تقدر بقيمة 40 مليار دولار 👀💸
ركاب 1000 طيارة من طيارات شركة United الأمريكية هيقدروا يلقطوا واي فاي ببلاش
والفضل في الخدمة العظيمة دي هي شراكة بين خطوط الطيران الأمريكية وخدمة الإنترنت الفضائي ستارلينك! 🛜✈️
دي أول شراكة من نوعها تستخدم خدمة Starlink for Aviation بإنترنت فضائي على رحلات الطيران في سماء الأرض!
السرعات عظيمة جدا:
داونلود: 40-220 ميجابت في الثانية
أبلود: 8-25 ميجابت في الثانية
معدل التأخير في الاتصال: 99 مللي ثانية
الباقات بقى خرافية السعر:
باقة بيزنس: 2000 دولار شهريا لباقة 20 جيجا
باقة بيزنس Unlimited: سعرها 10000 دولار شهريا
فيه بقى كمان باقتين واحدة للحكومات وواحدة للطيران التجاري
ودي طبعا مش محطوطة أسعارهم :D
بالمناسبة، ستارلينك كمان بدأت تقدم خدمات الاتصال بالإنترنت.. في الفضاء :O
صباحو
شركة OpenAI لقت الناس خلصوا الليمت
بتاع استخدام نماذجها الجديدة
OpenAI o1 (30 أمر أسبوعيا)
OpenAI o1-mini ( 50 أمر أسبوعيا)
فقررت تصفّر العداد لكل المستخدمين بتوع ChatGPT Plus وChatGPT Team 😎
مش عايز اقولك ان فيه ناس هاصت ازاي بالقرار ده
لانها كانت خلصت او قربت تخلص رصيدها
وفيه ناس ندمت لانها كانت بتوفر ف الرصيد لدرجة
واحد كان كاتب انا قولت اوفر الرصيد واخليهم 4 أوامر يوميا عشان يكفي 😅
🤔 ايه حكاية النماذج الجديدة دي؟ 🤔
شوف ده /channel/TechnolobiaNashra/3567 😎
إيلون ماسك احتمال كبير يبقى أول تريليونير ف التاريخ على 2027💸
ده ف حال فضلت ثروته تزيد سنويا بنسبة.. 110% 🤯
هواوي انهاردة أثبتت حاجة مهمة جدا
وهي إن كل حاجة فعلا وليها حل!
1. عايزة تعمل موبايل 10 بوصة
بس عايزاه يصغر لحد 6 بوصة
وهي عندها تجربة طويلة في الفولدابلز
سواء اللي بتنتني لبرا Outward أو لجوا Inward
فاستغلت المعرفة دي وعملت جهاز ينفع
ينتني لبرا وجوا فتصغر الشاشة خالص!
2. كانت عايزة تقدم 5600 مللي أمبير ف بطارية
فقررت مش هوجع دماغي وأكدس السعة كلها
ف حتة واحدة، فقامت مقسمة البطارية
على تلات خلايا، كل خلية صغيرة ف ضهر شاشة من الشاشات التلاتة!
3. عايزة الموبايل يبقى رفيع جدا يادوب 3.6 مللي
فقامت موزعة البطارية على 3 خلايا وكمان قللت
من سمك الماتريال المستخدمة ف هيكل الجهاز
وبرضو استخدمت تكنيك مختلف لمفصل الموبايل
4. نيجي للمفصل، وده كان جديد خالص
المفصل هو Tiangong وهو مفصل مزدوج
معتمد على تصميم معقد جدا للدراع اللي بيتني
أجزاء الشاشة عن الحواف، بحيث يفصل سُمك
الأجزاء قليل، وكمان يخلي فيه انسيابية في حركة أجزاء الشاشة التلاتة!
5. طيب ياجماعة الجهاز ده عايزينه يعيش
بسيطة هنصنع المفصل من الفولاذ الصلب
6. هم لونين احمر وازرق والاطارات دهبي
عشان بلاش فرهدة الوان واختيارات كتيرة
7. ميموري 256 جيجا و512 جيجا و1 تيرابايت
كلهم معاهم 16 جيجا رام
8. بروسيسور مجهول كالعادة هواوي بتحب
الساسبنس ولكن متوقع يكون ع الأقل Kirin 9010 5G
9. الموبايل جاي بمزايا كتيرة AI
عشان انشاء التكست والصور والترجمة الفورية
10. السعر منطقي فوق ال 2800 دولار
لانها تقنية جديدة بشوكها، وآخرنا نتفرج!
🗣️ رأيي المتواضع ان هواوي بالجهاز ده نازلة تضرب عصفورين بحجر، الاولاني طبعا تفرض نفسها ف سوق الفلاجشيب "الموبايلات العالية" قصاد تراجع أبل في الصين "خصوصا ان مزايا ابل AI مش معروف هتنزل في الصين ولا لأ، وكملن هتتأخر لحد iOS 18.1"، والعصفور التاني هو انها تاكل من نصيب سامسونج وباقي صناع الفولدابلز!
مساءو
بعد أقل من 5 دقايق
أبل هتنزل أجهزة جديدة والمتوقع:
آيفون 16
آيربودز 4 (إصدارين)
أبل ووتش 10 (أو أبل ووتش إكس)
أبل ووتش ألترا 3 (احتمال ضعيف شوية)
وطبعا كالعادة ممكن تكون فيه احتمالات مبتخلصش
ويمكن نشوف لحظة الـ One More Thing من عملاق التفاحة!
تابعني عشان تعرف الجديد،
وممكن تتفرج كمان لايف من هنا: https://bit.ly/4dfiZ2p
وخليك من ضمن النص مليون بني آدم اللي هيدخلوا يتابعوا المؤتمر من أوله! :O
5 الفجر بتوقيت القاهرة،
في قلب كاليفورنيا، جوا واحد من استديوهات Warner Bros السينمائية،
بكل استعراض وقف إيلون ماسك وقال:
"المستقبل بيبدأ دلوقتي.. من انهاردة فكرة نقل الركاب والبضائع ومساعدة البشر.. هتتغير للأبد"!
🔴 تسلا كشفت عن سيارتها الذكية للتاكسي CyberCab
ودي عربية تاكسي بدون لا دواسات ولا دركسيون
بتطلب الخدمة بالموبايل زي أوبر
يجيلك نوتفكيشن لما العربية تقرب..
العربية يادوب تكفي شخصين
فيها شاشة 15 بوصة قدام
تتفرج عليها على أي محتوى
تاخد اجتماعاتك الأونلاين عليها وانت راكب
أو حتى تكتب وترسم عليها زي ما انت عايز
فيها مكان واسع للشنطة عشان تحط حاجاتك
تصميم العربية واخد من روح سيارات التسلا السيدان وكمان الهيكل الخارجي لشاحنة السايبرترك..
العربية بتتشحن بتقنية الشحن التوصيلي Inductive Changing ( وده مختلف تماما عن الشحن التقليدي للسيارات من خلال منفذ جانبي، الشحن الجديد بيشتغل من خلال قاعدة شحن ارضية، بتتوصل بمنطقة الشحن ف بطن العربية من تحت، واعتقد ده تمهيدا لتنفيذ فكرة شحن السيارات الكهربائية وهي ماشية على الطرق المجهزة بالتقنية دي، واللي السويد بالفعل شغلتها من ٢٠٢٢)
العربية هتدخل انتاج ممكن 2026 او اول 2027
متوقع تكلفتها تبقى بين 20 و30 ألف دولار
وهتنزل الخدمة في كاليفورنيا وتكساس في 2025
🔴 كمان تسلا كشفت عن Tesla Robovan
عربية ڤان تشيل لحد 20 راكب، وممكن تخصص للبضايع
ماسك قال ان الروبو فان هتخفض تكلفة النقل الى ٥ او ١٠ سنت للميل الواحد
وهي هتلعب ف الاساس على انها تكون جزء من شبكة تيسلا للنقل ذاتي القيادة للركاب والبضايع Tesla Network وكمان ممكن عادي تنزل للمؤسسات والافراد
🔴 برضو تسلا نزلت روبوتها أوبتيموس
يتمشى حوالين الجمهور ويقدم مشروبات واكياس هدايا ويلعب حجرة ورقة مقص..
بس الكلام ده مكنش ماشي خالص مع اللي قاله ماسك عن الروبوت ف الايفنت:
"اوبتيموس جاهز يعمل كل حاجة،
يساعد ف البيت ف التنضيف وشيل الحاجات والتنظيم وكمان يشيل الحاجات من العربية، لا ويقعد ع السفرة مع العيلة ويلعبوا، وممكن كمان يقدم المشاريب للضيوف ".. ساحر يعني ماشاء الله، وآخره طلع بيرقص ف اوضة ازاز!
بالمناسبة، ماسك ف ابريل قال للمستثمرين،
على اخر ٢٠٢٤ اوبتيموس هينجز مهام كتيرة مفيدة
وهينزل السوق يتباع على ٢٠٢٥!
السعر المتوقع للروبوت ينخفض بعد فترة ويبقى ٢٠ ل ٣٠ الف دولار.. ده كدا بعد الانخفاض😶🌫️🤣
صباحو
يمكن لما اتكلمت من فترة على أن الأجهزة الذكية وخصوصا الموبايلات والساعات وأي جهاز محمول بقى الاتجاه عند الشركات دلوقتي أن التفاعل مع الأجهزة دي يحصل بشكل طبيعي أكتر ما يحتاجش المستخدم إنه يبص أصلا على الشاشة أو الأزرار، ومؤخرا الفكرة دي تحققت بشكل كبير خلال الأسابيع القليلة اللي فاتت.
فمثلا على مستوى اللاب توبات كل الشركات تقريبا ماشية في اتجاه إنها تخليك تتفاعل مع المحتوى اللي موجود على الشاشة من غير ما تبص على الكيبورد أصلا أو تركز إنت هتدوس على إيه. مايكروسوفت مع لابتوبات الكوبايلوت بلس وسامسونج مع عيلة الجالكسي تاب S10 وكمان جوجل مع الكروم بوك اللي لسه نازلة من أيام قليلة، كلهم عملوا زرار مخصوص للذكاء الاصطناعي تدوس عليه عشان تقدر تفعل المزايا الذكية اللي على الأجهزة دي.
ده بالضبط هيبقى عامل زي اللي حافظ زراير الكيبورد وبيكتب أكتر من 150 كلمة في الدقيقة الواحدة، الأداء هيبقى أسرع، الإنتاجية هتبقى أعلى والإنجاز هيزيد جدا.
طب تيجي للموبايلات بقى دلوقتي ChatGPT وجيميناي وميتا إيه آي، كلهم عندهم ميزة إنك تبدأ حوار مفتوح مع الـ AI، وما بيخلصش لأنك تقدر تقاطع المساعد الذكي اللي بتكلمه وتوقف الحوار وترجع تشغله تاني، كل ده وشاشة الموبايل مقفولة، فأنت حاليا مش محتاج تبص في الشاشة، وده أعتقد مع الوقت هينطبق كمان على الساعات الذكية.
هتيجي دلوقتي تقول لي طيب يا سيدي أقنعتني، بس الموضوع هيبقى فوضوي جدا لو إنه إحنا بصينا على الموبايل بنقدر نتحكم هندوس على أي زرار، هنروح الخطوة اللي جاية إزاي؟ ففي واجهة استخدام جرافيكية Graphics User Interface (GUI) بنقدر نتفاعل معاها ونستخدمها وننجز اللي إحنا عايزينه، في حالة الصوت بقى هنعمل إيه؟! 🤔
أقول لك إحنا فعلا في المرحلة دي محتاجين جدا تبدأ الشركات تركز أكتر على تطوير Voice User Interface أو يعني واجهة استخدام صوتية وتدخل في قلبها الذكاء الاصطناعي، فزي بالضبط لما بتكلم خدمة عملاء وبيقول لك دوس رقم واحد لو عايز تنفذ الأمر الفلاني أو رقم 2 لو عايز كذا، هو ده بالضبط اللي إحنا محتاجينه في المرحلة دي.
لأن مثلا لو إنت بتكتب على الموبايل ومش عايز تبص خالص في الشاشة لازم الموبايل يفهم أي أمر أديه له زي مثلا إن أنا أقول له حط فاصلة فالمفروض إنه ما يكتبليش كلمة "حط فاصلة"، إنما يحط (،) وبرضه مش لازم ألتزم بأوامر معينة أقولها بالصوت عشان ينفذ اللي أنا عايزه، فالمفروض النموذج اللغوي للذكاء الاصطناعي LLM يخلي الموبايل يفهم أي أوامر أقولها له بأي شكل لغوي وبأي لغة طبعا، والموضوع مش معقد لأن زيه زي فكرة هندسة الأوامر Prompt Engineering، في الأول كانت هي الطريقة الوحيدة للتواصل مع الذكاء الاصطناعي بس بمرور الوقت اللي هو سنتين تقريبا الموضوع ده ما بقاش أساسي عشان كل الناس تستخدم الذكاء الاصطناعي.
ويا صديقي أعذرني معلش بقى لي فترة غايب عنك بس فعليا الإيد كانت شدة شويتين وكان لازم أرجع أتعوّد تاني على الكتابة بالكامل بالصوت، وبالمناسبة بدأت أجرب استخدام الموبايل بالكامل بالصوت أو ما يعرف باسم Voice Access🗣️
صباحو.
من كام ساعة ،
نيويورك تايمز أعلنت ف تقرير ان OpenAI جمعت دورة استثمارية بقيمة.. 6.6 مليار دولار،
تقريبا في أسبوعين، وكانت كمان بتختار مين يستثمر فيها، لا وكمان بتشترط ع اللي هيشتثمر فيها ميستثمرش ف منافسينها👀😎🚀
وبكدا مطورة ChatGPT بقت بتساوي
157,000,000,000 دولار
بتتنطق، 157 ملياااااار🥲
نام،
نااااام بسرعة بقولك 😭عندنا شغل💸
مايكروسوفت بميزة ويندوز ١١ مع ميتا كويست ٣ و٣s
جوجل مع ميزة خاصة بيوتيوب في الميتافيرس وكمان ظهور لوجو جوجل سيرش ف قلب Meta AI
سامسونج بظهور مارك ماسك موبايل S24 ألترا
وطبعا إنفيديا بظهور مديرها جينسن هوانج وهو بيجرب الOrion
انا من اكتر الناس اللي كنت معارض مارك
في 2022 كنت عامله هاشتاج الجاي أسوأ يامارك😅
بس من 2023 حتى الان الراجل عامل comeback
مبدعة ووراه تيم PR عنتيل واعتماده على اندرو بوزورث كمدير تقنية فارق أوي في حتة التكنيكال
وطبعا وراه حوت الAI الجهبز Yann Lycunn
فكدا يغزو العالم مرتاح
🤡 ع الهامش بقى،
مارك اللوك بتاعه عالمي، تحسه جانجستا ف نفسه جدا
تحسه نضج بشكل كامل متصالح مع نفسه ورايق
وعامل زي اللي بقاله كتير ساكت ومبيتكلمش كتير
بس لما بتطلب معاه عادي.. هيحط ع الكل.
"احنا الأول في الصين في سوق الساعات
والأول ف الصين برضو ف سوق التابلت
شايف كل أجهزة اللابتوب دي؟
دي آخر نسخة هتشغل ويندوز..
الجاي كلو هيشغل نظام تشغيلنا فقط HarmonyOS"!
🗣️ مدير قطاع الكترونيات المستخدمين في هواوي، Yu Chengdong..!
بالمناسبة،
موبايلات هواوي مع التحديث الجاي HarmonyOS 4
مش هتسطب تاني ملفات تطبيقات أندرويد بصيغة apk، لانها هتدعم فقط اطار هواوي لبرمجة التطبيقات.. وباي جوجل!
خطوة جريئة بس عواقبها غير متوقعة، خصوصا ان هواوي عايزة تنزل هارموني عالميا برا الصين كمان!
دلوقتي لو بتسمع أي قرآن في أي مكان
وعايز تعرف اسم السورة اللي بتتقري:
1- افتح أبلكيشن جوجل
2- دوس على زرار المايك جوا مربع البحث
3- هيظهرلك اختيار ف اخر الشاشة search a song
4- سيب الموبايل يسمع، أقل من دقيقة هيجيبلك اسم السورة، وأحيانا الشيخ اللي بيقرا كمان
كوالكوم بتشتري إنتل💥
#تسريب نشرته وول ستريت جورنال!
صباحو
طيب عشان لو مش متابع:
1- الساعة 3:30 عصرًا يوم التلات اللي فات
أكتر من 3000 جهاز بيجر Pager عملوا "بوووم" في لبنان
وللأسف كم وفيات وإصابات مرعبة حصلت (ربنا يتولاهم جميعا)
2- انقسمت الآراء وقتها لسيناريوهات كتيرة (تقدر تعرفها من هنا /channel/TechnolobiaNashra/3579 )
3- نيويورك تايمز خرجت بتقرير صادم جدا امبارح بيقول ان
الكيان لما اكتشف ان HسN نSر الله فهم لعبة التحكم وتتبع الموبايلات
قرر يلجأ للبيجر كوسيلة بدائية للتواصل بين أعضاء "الحزب"
وقتها الكيان بدأ يجهز مخطط شيطاني..
مجموعة جواسيس وضباط تابعين للكيان عملوا شركة
في بلغاريا اسمها BAC Consulting وبدأت تاخد توكيل لتصنيع
أجهزة بيجر بعلامة التايوانية الشهيرة Gold Apollo
وبالفعل البلغارية صيتها سمّع وبقت موثوقة وليها عُملا
من ضمنهم "الحزب"..
وقتها حصل تصنيع الـ3000 بيجر بتوع "الحزب" بتعديلات كتيرة
منها وضع مادة PETN المتفGرررة بكمية ضئيلة جدا وغالبا ده حصل
في قلب أجهزة البيجر نفسها عشان، وده خلى الأجهزة تعدي من الفحص والمراجعة لما وصلت لبنان..
🔴 طب احنا كدا فهمنا البيجر وتفخيخها حصل ازاي،
طب ازاي بقى التنفيذ حصل في نفس الثانية 3:30 عصرا يوم التلات؟؟!!
ده ياخدنا لنقطة مهمة، وهي ازاي البيجر بيشتغل اساسا؟
1- البيجر ده جهاز صغير ف حجم كف اليد أو أصغر
( منه أنواع.. فيه استقبال فقط/ استقبال و ارسال.. فيه منه بيعرض أرقام فقط أو حروف وأرقام.. وفيه منه شاشة فقط/شاشة وكيبورد للكتابة)
2- البيجر بيشتغل بموجات راديو بترددات عالية حبتين (عشان كدا بيستخدم بشكل كويس في الأماكن اللي مفيهاش تغطية لشبكات الموبايل)
3- عشان يحصل الارسال أو الاستقبال لازم يكون البيجر في نطاق محطة ارسال/استقبال واللي عادة بتكون منصة أنتينا بتتسمى Paging Antenna Transmitter وبتبقى شغالة بجهد عالي بيوصل آلاف الوات
4- عشان كدا دايما يقولك لازم منصة الأنتينا تكون على مكان مرتفع زي جبل أو هضبة عالية عشان ميحصلش تشويش وكمان توصل الإشارة بشكل قوي وواضح
5- بعد شوية سيرش لقيت انه ممكن يحصل إرسال جماعي لنفس الإشارة/رسالة لعدد كبير من أجهزة البيجر طالما كلهم جوا دايرة نطاق تغطية الأنتينا واللي بتوصل لحد 50 كيلو متر (كقطر لدايرة المنطقة)
وبعد شوية حصر للمناطق اللي تأثرت بهجوم البيجر، لقيت ع الخريطة بشكل تقريبي الدايرة اللي بتضم المناطق دي كلها تقريبا في نطاق 40 كيلومتر وده يرجح صحة الفرضية
6- هتقوللي طب ما حصل بووووم برضو في سوريا، هقولك عادي أنتينا تانية هناك تابعة للكيان أخدت الأوردر في نفس التوقيت
🔴 اللي بالنسبالي لسا مُبهم ومش مفهوم حتى الآن هو
المرحلة التانية من الهجوم اللي حصلت الأربع على أجهزة اللاسلكي
وكذلك على عدد كبير من الأجهزة الإلكترونية التانية زي بعض التلفزيونات، بعض خلايا الطاقة الشمسية، بعض أجهزة بصمة الأصابع في أماكن الشغل..
ده لسا بدور فيه شوية وإن شاء الله هوصل لحاجة.
هو ايه اللي حصل في ال💥 بتاع اكتر من ألف بيجر Pager في لبنان؟ 🤔
لو انت جاي من 2000 وما بعد ذلك،
فخليني أقولك ان جهاز البيجر ده كان حاجة كدا
اصغر من كف اليد، فكرته كلها انك بيه تقدر ترن
او تبعت رسالة لاي بيجر بتاع شخص تاني عارف رقم البيجر بتاعه..
وهو توصله الرنة فيكلمك بالموبايل، او الرسالة فيبعتلك او يكلمك بالموبايل..
عظمة البيجر انه كان وسيلة تواصل كويسة لانه بيلقط شبكة ف اماكن مفيهاش تغطية، لانه بيعتمد على ترددات موجات راديو مختلفة بكتير عن ترددات شبكات الموبايل ، وضيف لكدا كان استخدامه اصلا مع المريشين ورجال الاعمال بشكل كبير..
طب ليه ف لبنان كانوا بيستخدموه بالانتشار ده دلوقتي؟🤔
عشان كانوا دايما متخوفين من اختراق الموبايلات "رغم ان البيجر اصلا تقنيات تشفير الاتصالات عليه مش اد كدا خالص، وعشان يكون مشفر محتاج معدات غالية حبتين"..
طب البووم دي حصلت ازاي بالتنسيق ده؟! 👀
في رأيي المتواضع فيه 3 سيناريوهات:
1. الكيان قطع على شحنة بالالافات من اجهزة البيجر اللي اشتريتها مؤخرا الجماعة ف لبنان، ودست جهاز يعمل شرز كهربائي مفتعل ومقصود ف قلب الاجهزة فيخلي بطاريتها ومكوناتها تبوووم / او اتزرعت مف"جرات عن بعد فيها ((احتمال كبير))
2. حصل اختراق لسيرفر من السيرفرات الخاصة بتشغيل اجهزة البيجر، وده عمل حمل كبير overload ع الاجهزة، وبالتالي فع الحمل جدا ع البطاريات فعملت البووووم ((احتمال متوسط لان واحد من الاجهزة كان من نوع Gold Apollo وده تايواني التصنيع وبيتشغل ببطاريات قلم عادي))
3. حصل استهداف بموجات تردد عالي اتسببت في تدمير الشرايح والمكونات الداخلية وكذلك البطارية ((احتمال ضعيف))
والله أعلم.
كنت بستخدم أبلكيشن اسمه Network Cell Info Lite عشان اتابع قوة الشبكات ف مكاني باستمرار، بس انهاردة جالي نوتفكيشن انه غير الأذونات الخاصة بيه فيما يتعلق بالداتا اللي بيجمعها من اللوكيشن بتاع موبايلي GPS..
ولقيت بقى انه هيستخدم الداتا دي ف التالي:
1. هيحسن أداء وعملية الابلكيشن
2. هيعمل شوية تحليلات
3. إعلانات وتسويق "ده ايه الصراحة دي يا أخي😅🤦"
4. مواجهة النصب وتحقيق الأمان "أنت كداب ياض😁"
المهم؟🤔
خلي بالك من الابلكيشنز اللي بتنزلها وتابعها باستمرار لان كلهم ليهم حق تغيير أي سياسات أو اذونات ف أي وقت.. وبيعتبروا موافقتك كدا كدا موجودة .. يعني تحضيل حاصل! 🤷
ع اليمين
موبايل سامسونج جلاكسي زد فولد 6
"الشاشة الكبيرة 7.6 بوصة /سُمك = 12.1 ملليمتر"
ع الشمال
موبايل هواوي Mate XT
"شاشة 10.2 بوصة / سُمك = 12.8 ملليمتر"
الموضوع بقى أسرع من الإدراك.. بكتير!
OpenAI نزلت عيلة نماذج ذكية جديدة.. تماما!
العيلة هي OpenAI o1..
مختلفة عن عيلة GPT (واللي الشركة مكملة تطوير فيها عادي)
العيلة الجديدة دي ياسيدي:
🔴 بتاخد وقتها في التفكير قبل ما ترد على سؤالك
🔴 بتستخدم أكتر من استراتيجية في التفكير، وتبدأ تحلل عملية التفكير مع كل استراتيجية، وبالتجربة بتتعرف على أخطاءها مع كل عملية تفكير، وساعتها بتبدأ تطور من نفسها
🔴 النماذج الجديدة متخصصة في حل المشاكل المعقدة حبتين في مجالات العلوم والرياضيات والبرمجة
🔴 النماذج الجديدة مفيهاش - لحد دلوقتي - إمكانية تصفح الويب وبحث المعلومات أونلاين ولا تحليل وتعامل مع ملفات زي صور أو مستندات بأشكالها المختلفة.. بس OpenAI شغالة على إضافة المزايا دي بالفعل
🔴 من أمثلة تطبيقات واستخدامات النماذج الجديدة هي ان الديفيلوبرز يقدروا يعتمدوا عليها في تطوير تدفقات عمل workflows معقدة ويكون فيها خطوات كتيرة لإنشائها وتطويرها وتشغيلها.. كمان بتقدر تساعد الباحثين في علوم الأحياء انهم يشتغلوا على تسلسل أنماط بناء الخلايا Cell sequencing
🚨لفت نظري جدا ان طبيعة المهام دي تقولك ان عيلة النماذج الجديدة دي بتحتاج تاخد وقت طويل في التفكير قبل ما ترد عشان تدرس وتحلل المشكلة اللي قدامها كويس وتحط خطة تمشي عليها بخطوات للحل.. وده بظبط اللي كانت بتتكلم عليه كل التقارير اللي فاتت فيما يسمى بـ"البحث العميق Deep research" واللي بيحتاج وضع خطوات مختلفة لحل مشكلة أو أداء مهمة معينة.. وده الكونسبت الأساسي لفكرة الـAI Agents أو العملاء الرقميين اللي تكلفهم بمهمة من غير ما تقولهم خطوات، وهم يحطوا الخطوات ويرجعولك لما يخلصوا تنفيذ المهمة!
🔴 النماذج الجديدة اللي نزلت في العيلة الجديدة هي OpenAI o1 وOpenAI o1 mini (الميني أرخص 80% وأسرع بكتير من الاصدار الأساسي)
💰الميزة الجديدة متاحة لمشتركين ChatGPT Plus وChatGPT Team من انهاردة يقدروا يختاروا النموذجين الجداد يدوي من ليستة النماذج من فوق ف واجهة استخدام ChatGPT
أما المستخدمين المجانيين الشركة بتدرس توفير OpenAI o1-mini ليهم قريب!
مساءو
تقرير: شركة OpenAI بتفكر تخلي اشتراك ChatGPT بـ 2000 دولار! 💰
مساءو
الآيفون مبقاش موبايل!
بصراحة بعد إيفنت أبل لما خلص جالي حالة عجيبة كدا انه انا قاعد 100 دقيقة تقريبا بتفرج على إيفنت المفروض انه الأساس فيه موبايل..
بس لا خالص بقى اكتشفت انه مبقاش موبايل..
الآيفون 16 هيكون نقطة تحول في تاريخ موبايلات أبل
لإن:
1- كمية المزايا اللي نازلة مخصوص للكاميرا والتصوير، بتقول ان الجهاز ده خرج من دايرة كونه مجرد موبايل، وبدأ يقرب أكتر لمنطقة إنه أداة للتواصل المباشر Face-to-Face وكإنك حرفيا مع اللي بتكلمه أو أداة مخصوص لصناعة المحتوى الاحترافي..
2- ميزة Camera Control اللي نزلتها أبل واللي بتتمثل في زرار جديد مخصوص للكاميرا، هو مش مجرد زرار تدوس عليه يفتح الكاميرا، لأ خالص..
الزرار بيسمح إنك تدوس عليه فتصور أو تسجل فيديو، تسحب ايدك يمين وشمال فتقدر تتنقل بين أدوات تصوير مختلفة زي Zoom وExposure وDepth of Field، وكمان بيقبل انك تخبط على الزرار عشان تتنقل جوا كل واحدة من دول أصلا!
3- ضيف لكدا كمان الزرار ده بقى هو اللي بيخليك تشغل حاجة Visual Intelligence أو يعني الذكاء البصري، اللي هو بالمختصر كدا نسخة من جوجل لينس Lens بحيث تعمل سيرش بالحاجة اللي انت شايفها قدامك عن طريق الكاميرا، وده بيخليك تصور وتسيرش مباشرة في جوجل أو ChatGPT..
الميزة دي بتخليك تسيرش عن اي حاجة بإنك تصورها، أو تاخد أي تكست Copy بسهولة، أو كمان لو فيه بانر عن إيفنت، تقدر تصور الكلام وتاخده تخزنه في الكاليندر بتاعتك!
الزرار ده فكرني جدا بالأجهزة المدعومة بالذكاء الاصطناعي زي R1 بتاع شركة Rabbit اللي قلب الدنيا أول السنة بس فشل، وكمان بجهاز AI PIN بتاع Humane..
الزرار ده خلاني أشوف فعلا الآيفون خرج عن كونه مجرد موبايل، وتحول إلى جهاز مدعوم بالـAI وفيه كاميرا!
4- كمان اتجاه أبل ناحية انها تضيف مزايا متطورة أوي زي زرار Camera Control وكمان مزايا كتيرة عظيمة في التصوير للآيفون 16 وآيفون 16 بلس، يخليك تتأكد إن أبل بترمي أساس حاليا وبتعمل Benchmark لمستوى التجربة اللي هياخدها المستخدمين في كل موبايلات آيفون الجاية مش هتقل عنها، فالموضوع مش هيبقى يادوب مجرد موبايل بنزود في شاشته وكاميراته وخلاص.. لأ لازم يديك حاجة مختلفة (طبعا ده ميمنعش انه ممكن جدا يحصل ثبات في بعض السنين ومتقدمش جديد وده عادي)..
5- أبل بتعمل تطور مرعب على مستوى البروسيسورات بتاعتها، الـA18 وA18 Pro - وخصوصا الأخير - عاملين طفرة رهيبة وبيدخلوا مكونات جديدة كليا كلها بتركز على تطوير طرق معالجة المحتوى البصري صور وفيديوهات وما يتعلق بيهم من أصوات وألوان ومونتاج بشكل خرافي
6- أعتقد النقط اللي فاتت دي ، يخلوني أقدر أقول بالفُم المليان جدا إن الآيفون قريب أوي (خلال 5 سنين بالكتير) هيبقى من أهم الموبايلات اللي بتقدر تخلي الناس تتواصل مع بعض بالهولوجرام، مش مجرد مكالمات فيديو وخلاص..
7- برضو من الحاجات اللي لاحظتها إن أبل أصلا استخدمت الـAI في بعض أجزاء فيديو الإيفنت نفسه، خصوصا الجزء اللي كان بيظهر فيه أجزاء مكونات الهيكل الداخلي لموبايلات آيفون 16 برو، وده يقولك إن أبل لسا Fit وتعرف تدب كويس في سوق الـAI
🔴 انبسط برضو جدا بالتحديثات اللي وصلت لأبل ووتش 10، عظيمة فكرة السبيكرز المدمجة اللي تخليك تسمع كويس المحتوى والمكالمات مباشرة من الساعة (ده يقولك فعلا إن الآيفون هيخرج من دايرة انه وسيلة لاستهلاك المحتوى واستقبال المكالمات، ويبقى أكتر أداة لإنتاج المحتوى)، وكمان سماعات آيربودز 4 الجديدة جاية بمزايا بديهية شوية بس كويسة انها نزلت في الإصدار ده بعد ما كانت حصرية للآيربودز برو
🗣️ رأيي الشخصي المتواضع، أعتقد آيفون 16 بلس وآيفون 16 برو أكتر موبايلات هتحقق مبيعات عظيمة، الأولاني هيبقى مناسب الناس اللي عايز تحدث موبايلاتها من آيفون قديم بس متدفعش كتير وتاخد كل المزايا الجديدة وكمان شاشة كبيرة، أما التاني فشايفه بشاشته الـ 6.3 بوصة مناسب أكتر من البرو ماكس أبو 6.9 بوصة (ليه أشيل 7 بوصة في ايدي بجد)، وكمان أرخص 200 دولار من البرو ماكس ومعاه كل المزايا الجديدة في الكاميرا (ماعدا ان بطارية الماكس أعلى)
أول صورة رسمية لموبايل هواوي ثلاثي الطي Mate XT! 🔥
الموبايل شكله سمكه نحيف جدا
وشياكة🔥
الجهاز نازل ف ايفنت بعد ساعات من حفل إطلاق آيفون 16 بكرة! 🚀