-
الشاعر ابو حيدر الصبيحاوي.
بلطف مــن دنه وتحزم البين
اجه ياناس اخر ربع الحسين
بجولاته معروف النشمي
****
تره الهفهاف هذه ابن المهلب
اجه النصرة امامه الي تعذب
قصته من الخلگ ليش اتغيب
وينسونه ماظن الشيعه
****
يسمع بضمير اصــوات مولاه
وعاف الـديــره للغالي وتعناه
عمري گـال لحسين انه افداه
تعناله والموت ينادي
****
طب للحومه وتعــنه الامامه
ولگه نيران مــاترحم خيامه
صفه الدخان نيشان وعلامه
شافاها محتاره الخدر
****
نشد بحسين چا وين وتوزر
وگالولـــه ذبـيح وذاك منحر
وصـــاح بـــلوعته الله واكبر
سل سيفه مغتاض النشمي
****
گــال اليله اثـوب دمــي كله
جيش اعداك يلمهيوب اشله
شيخ مـن الرواسب ارد اگله
بتاليهه متعني ينصرك
****
عدت الطف تره لجلك ولينه
وشلي بلعـمر بعــده وسنينه
اموت اوياك يلروحك حنينه
لحسيني رخصت الدنيه
****
اظــل تاريخ والوادم يگولونه
روحي للحسين تروح ممنونه
انه الهفهاف بلحومه يعرفونه
وللغيره حطيت الغيره
****
ابوحيدر
الصبيحاوي
ادورك وين ياكفال الضعون
***
ادورك ويــن حتى ترد عدانه
علينه اندارت الدنيه اوهوانه
اصيح بصوت ياعزنه اولوانه
صفينه اجناب والوادم يلومون
****
عگــب عـيناك تاذينه الملامه
صفيت ابلا اهل بس اليتامه
وليل المر عليه اشلون انامه
واشوف ايتام ياخويه يلوبون
****
تعــال وشوفــنه وسمع ونينه
نســه واطفال مـــاخلو ولينه
علينه الشين ظل يامر علينه
بنتر وصياح علهزل يصعدون
****
على الــهزل خذونه وركبونه
وطلبو ثــار گـالو مـــن ابونه
بين اجسادكم خويه خذونه
سبيات اسمع اعدانه يصيحون
****
ادور اعله الكلف والبيه حميه
وشفنه اشكال بلــهم والاذيـه
وهــايــه اعيونه الظلت نديه
وعلينه النوب شفناهم يصدون
****
تعال وشوف سكنه وي رقيه
وشوف الموت واگـف بلثنيه
اون اعليك وانــه البـيه بـيه
اشوف ايتام گدامي ينوحون
****
جرحي اويــاك مـابطل نزيفه
گلبي ايـلوب يـوجعني رفيفه
دنيه اخلاف عينك مو عفيفه
وبچينه اعليك ماخلينه العيون
****
ابوحيدر
الصبيحاوي
بنات امدلله وهـسه سبوهه
تــره المذبوح ياوادم ابوهه
****
بــنات حسين ذنــي مـدللاته
لفاهن ضيم من فارگ حياته
رقيه وسكنه يولوهن شماته
وخوله وكل يتيمه حيروهه
****
صــار اصياح والونه شجيه
ركضت خايفه وتبچي رقيه
تون وتصيح يــايمه الزچيه
تحس محتاره ياوادم ولوهه
****
الركضت خايفه والنـار لهابه
ظالمهه الزمان وقسه دولابه
ياذيهه الدهر والعين سچابه
عزيزات الولي هسه خذوهه
****
عليهن خيل ركضت بلبوادي
تون يحسين وحدتهن تنادي
رقيه تصيح حرگولي فؤادي
روحي بروحتك بويه بلوهه
****
نــار اخـيامهن تسعر شجاهه
الركضت نارهه تحرگ گفاهه
راح الچان عـزوتهه وحماهه
عگب عباس ظلام الحدوهه
****
عزيزات المشن نص الحرايب
وباتن حيف ياوسفه بخرايب
زغار وعاشن الوعه ومصايب
ودهرهه وناسها هم يتموهه
****
بــنات اتعلعلن ومصابهن دام
املهن مات ويشيعن بلاحلام
عاشن بلدمع مـن جور الايام
وشما تعــثر رقــيه شتموهـه
**
ابوحيدر
الصبيحاوي
هاي خدام شدت احزام
*
مــوكــب الخــدام هــاي اليله
على حسين الدمع ظل يسيله
وكلهه خــدام ابــدمـع تبچيله
نعــزي غـايبنه بحزن نشكيله
هاي خدام هاي خدام
****
التمت الشبان خدامــك تــره
اگلوبهه لجـل الذبيح مجمره
تگول احنا ابــــــد لا منغيره
اليله للوادم نسولـف مجزره
هاي خدام هاي خدام
****
هــاي خــــدام تظــل محزمه
تعــزي الكــرار حمــاي الحمه
على ال البيت والماتــو ضمه
مانوافي قطره من ذاك الدمه
هاي خدام هاي خدام
****
تـوكلينه والـدمــع شلال صار
وحنه واحدنـه دليله كــله نار
الـغاضريــه بينه امخليه مرار
كلنه خدامه وخذنه هـل قرار
هاي خدام هاي خدام
****
مــوكــب تهيه وحـضر دمعته
وجاب للخدمه اليوالي بخلته
اخذ مــن حسين عزه وهيبته
وبين كل الناس تصدح چلمته
هاي خدام هاي خدام
****
بداعت الشيبات وي ذاك النحر
نقسم انــوافيـك بچفوف الگمر
بلنــفوس مصيــبتك خلــت اثر
بيــنه طــفك يـاامـامي هل كبر
هاي خدام هاي خدام
****
ابوحيدر
الصبيحاوي
يا عباس ظلت بس الأيتام
منين انجيب زلمه يطفي الخيام
.................
عليك عيوني صاحت ياكمر وين
دخان الخيم ظل يعمي بالعين
الجمر والشؤك اذاها النساؤين
شلون تنام عينك بين الاسهام
مين انجيب زلمه يطفي الخيام
...........
حيره لوحدي وبحالتي صار
اطفي بالخيم لو لم بالصغار
وحدي بكربله وبيه الوكت جار
عليه هدو ياخويه شبه الازلام
وياعباس ظلت بس الأيتام
......................
صحتلك ياشهم يا ريتك وياي
افزعمن ياخويه. غيرك بهاي
المو عباس ما حشمه اعله بلواي
كون وياي. خويه محزم. حزام
وياعباس ظلت بس الأيتام
....................
يا عباس لوتدري شصفه الحال
لا ظلت خيم لا ظلت اعيال
هجت بالصحاري. كل الأطفال
ويا عين تريد بفكدك تنام
يا عباس ظلت بس الأيتام
.. ....................؛
افزعك وين كلي لو طفل طاح
انا محتاره بين دموع وصياح
اشوف حسين بين سيوف ورماح
الحك خليهم تسحك بالامام
ويا عباس ظلت بس الأيتام
.................
غريبه لوحدي بهاي. المسيه
بعد لحظات وجتفون اديه
مو زينب يصيحولي السبيه
حيره شلون لوطبينا لشام
ويا عباس ظلت بس الأيتام
..............
..................... علي المطيري...................
تون ون اليتامه هاي وليانه
****
تعال وشوف مـن بعدك يتامه
وهسه بنص عـده كلهم ملامه
صفو باب الحزن واكبر علامه
بچت وتريد اهلها كلهه حزنانه
****
طش كـل الضعن محتاره كلها
هاي زغــار مــاتــت كــل اهلها
وفوگ الظيم كثرن هــم عللها
صواب ابن الزچيه بگلبي نيشانه
****
مــن نــار الخيم بيـهم بقت نار
وهــاي مــدلله ولــيـان وزغــار
عمت عيني وكتهم ظالم وجـار
الوكت ماضن نصفنه جار ويانه
****
بين اجناب طاحت دمعت العين
وكلها تنوح تلطم صاحت حسين
مـــن جــانــه غفــل وبيــن البين
طب وختار غالي فجع خلانه
****
الطف اسود يوادم حتى بضواء
وچـــم زغــير تــاه ومحد اوياء
بــروك الخيل مــاتو منهم اهناء
كلمن طاح منهم سال شريانه
****
تون اعلـه الجره بنوح الحزينه
ومـــــن الصار مـــاكفـت ونينه
مــن جــابـو هزل شـدو ادينه
ظهرنه ويه المتن اصوط عنوانه
****
ابوحيدر
الصبيحاوي
كــان يــامـاكان قصه بس دمع
بيهه دلالي احترگ مثل الشمع
طاحت انجوم الفله لهسه تبچي كربله
كان يامكان كان ياماكان
*****
الـيل متـحول صبح ودخنت كل اخيامه
انترست الگاع بدمه وهدت عليه ظلامه
رجال طاحت ياخلگ وهناك هـم اعمامه
طاحت زلمهم ودمـه عــفر يـناس الهامه
صــار بلطف نــايـره وكلهه دمه
عله الصار منگبه وتبچي السمه
بجهل ذبحو بسمله لهسه تبچي كربله
كان يامكان كان ياماكان
*****
الگاع ترجف حايره مرعوبه مـن ادمــاهم
سيوف واهات ونبل تنوح حتى اســماهم
هندس الدنيه مظلمه رادو يشح ضــواهم
الموت متحضر صفه لتمت يناس اعداهم
نــار شبت بلخيم وطـف بچه
ركضة ازغار بفله والهم حچه
والگلب هــم انمله لهسه تبچي كربله
كان ياماكان كان ياماكان
*****
حرگــو اگلوب شكثر والحزن خيم ضيمه
اطفالهم شافت رعب ظاگت عليهم هيمه
وتجزرو بلبر سوه طاحو اصحاب الشيمه
سوده لفتهم ياخلگ امنين اجت هلــغيمه
حافر بصدره ثبت فوگ الثره
والشمر لمه اعتله حز منحره
بطيحته حسين نوله لهسه تبچي كربله
كان ياماكان كان ياماكان
*****
ركضن ذراري فـاطمه مــرعوبه كل علويه
عــمه التصيح محيــره والــنار شــبت بيه
گاضين اهلنه صيحن والدنيه هم مگضيه
بعثراتهن گالن علي وشافن چـثث مـرميه
ليلهن اظلم صفه وبـلاء گمر
ذبلن الورداة من طاري النهر
صوت الاصياط اعتله لهسه تبچي كربله
كان ياماكان كان ياماكان
*****
جابو حبلهم والهزل وتحضرن لجل السبي
ومعروف مابين الــعرب وهنه الستر للعبي
يــاوسف هســه صفـن بقــيود يحبن حبي
چــم گلب بيهن كسر ومكسور گلـب النبي
ضلو اطفال ونسه بين العده
نــاس مـاعرگو ولا بيهم نده
الكون بلصار ابتله لهسه تبچي كربله
كان ياماكان كان ياماكان
*****
ابوحيدر
الصبيحاوي
مــاارهـم تره روحي محيره
تبقه مناطره بغيابك
*****
خويه هاك اعيوني خذهن شلي بيها بروحتك
الــدنيه مــن دونــك ذليله لــــو افــارگ طلتك
انتــه منــبع ســر حـياتي الموت اهوه بغيبتك
بيــش اصــبر الــروح بــعدك لو تهم الشوفتك
بغيابك اطيح ماتسندني ريح
مااگدر اصيح بغيابك
*****
لــــو يخلص يومي بعدك منين اجيبنه الصبر
بــيك شــلال اعــله طــولك يـــابعد كل العمر
لــو تمــر بخيمنه ندري بشوفتك يطفه الجمر
قصــة افــراگ انتـه بيهه شينفع وياهه العذر
ياجرح الچبير بفراگك احير
مسبيه اصــير بغيابك
*****
صــرت ورده تــريــد ماي لشوفتك خويه اهم
خلــي تشبع عــيني مــنك گــبل لا تصبح حلم
خــويــه ليلي يصير هندس يــابعــد كـل الزلم
انتــه يمي وگمت احسن بــذكرياتك گمت الم
ياليلي ونهار ياخويه يحار
دمعاتي مزار بغيابك
*****
گمت احس لچمه بدليلي وبينت لحظة وداع
روحي تطلع منــي چنهه المـوت بــدلال شاع
هاي اخــر لحضه احسهه بين ابروحي النزاع
دنيه مابيهه ابو فاضل مني كلشي بيها ضاع
يازود ومهيب يااغله حبيب
العالم غــريب بغيابك
*****
خويه خليني اعله بالچ ذكرئ من ذيچ السنين
وخذي عيني خاف عينچ خويه ماتحمل ونين
انــي لجــلچ يبــت حيدر راح اثــوبــهه الئدين
وراح اگول فراگ هذه فدوه عينچ عل حسين
يانار الدليل والهم الثجيل
يبرالي عليل بغيابك
*****
ابوحيدر
الصبيحاوي
بنت الحسين مظلومه
بنت الحسين مظلومه
******
طفله بطف نار بيهه الموت شافت جاهه
بخوف تركض وي يتامه ومادرت منواهه
ادور ابوها الچان يمها وهسه چن عافاهه
وتصبت بدمعهه لاواحـد سمعهه
مرعوبه وحزينه والبين الفجعهه
مظلومه مظلومه
*****
صب دمعها بدار غربه تنوح بس محتاره
زغيره علهم بين عسكر الگلب شبت ناره
چن رقيه تنوح سكته الطف حچه اسراره
وادمع يتجاره ماتروح اثارة
تبچي المظلومه والدمع كفاره
مظلومه مظلومه
*****
جروح كلها بيوم عاثر زغيره وطف حاكم
الموت بين بين اهلها وابد ماظل سالم
العده هدت عل مخيم وبيــنه الله عالم
ماترحمنه وادم اتولانــه ظـالم
مذبوحين اهلنه مــوتانه علايم
مظلومه مظلومه
*****
كون واحد من اهلهه تشكي يما الحاله
تريد عمها ابوفاضل ترضه لــو بخياله
كون هسه تگله عمي كلها اجـت چتاله
وتعنت رجــاله ولتمـت خـياله
اتجوب بخيمنه وتفرهد حلاله
مظلومه مظلومه
*****
عمه صاحت بيها خوفه هاي ناس شبيها
تگول فدوه راح اموتن عمه بس حاچيها
وگف گلبي حتار امري دمع اصب تاليها
اوتفرك ابئيديها الوكت امبچيها
بجره محتاره مـايصح واليها
مظلومه مظلومه
*****
وين اهلنه اليل چلچل بس عليل اويانه
البين شفته يحوم بينه بنص عده خلانه
قسه وكتي بين ناسي سوده چن دناينه
متوصطه عدانه ماظل الحمانه
طشينه ابــراري دمعتنه معانه
مظلومه مظلومه
*****
كـــل الدمـع صبيت نشفت العيون
وخلصت ليلي ابـــاه بلكـت يردون
*****
ليليه انــوم اليــل ونــطر صــباحي
اگضيها بس نشغات اني وصياحي
انطر خــبر يــانــاس توديه رياحي
وتگلب ويــه الــيل يمكن يعودون
*****
خلصة عمري احلام وهسه يجوني
الراحو اعــزاز الروح خافن نسوني
بدمعه اونيـــن اواه مـــن فارگوني
بگد مــااحن وشتاگ ادري يحنون
*****
كــون العــمر اگضيه يـــم الاريده
هــاي امنــيه بلــبال ضـلت بعيده
المــني راح ابعيد يـــاهـــو يعيده
تمنيت انـــه الاحباب يمي يظلون
*****
كون البچي يـاناس يــرد الجفونه
چا گمنه نبچي اعيون علـفارگونه
گلبي شبع لوعـات بكثرت ضنونه
راحو هلي وضليت افرك بلجفون
*****
وحشه اليالي تصير علمالــه والي
يگضيها بس حسرات كـــل اليالي
بلعبره ظــل مخنوگ ودمعه يلالي
المــنه مشو غالين لـــوعه يخلون
*****
عايش غريب بدار ودموعه سلوه
الفتح عيونه وشاف ماعده تچوه
الــچانـــو ذراه بـيوم وبيهم تـگوه
راحو يوسفه بعيد ماظن يسئلون
******
ابوحيدر
الصبيحاوي
مثلك ماشفت يالچنك گمر
يبنـي تحـيرت يمبچي القدر
*****
يدمعاتي الجرن احسنك وطن
يلــمبعد تــــعال دلالــي حــزن
ياذيني الغياب وبگلبي عتاب
يبــني بغيبتك ايــامي عذاب
بغيابك خذت ويــاك الئــثر
*****
يچويني الدمع والون ينسمع
عبدالله مشه ومبچي الجمع
گــابلت المهد وانعــه يــلولد
حيـــر دنيته الــغالـي بتعد
سكته هاجرت ودموعي نهر
*****
تسعر جمرتي تخنگ عبرتي
يامالي الفراغ وحشه دنيتي
بگماطك اشم وبلذكرئ الـم
يغزيني الدمع بطاريك اهم
ياوكتي جرت انته والسهر
*****
يلچنك ضــوه يانسمة هوه
يــااتـرف بشر دلالـي نچوه
يلمالي المكان يلكـلك حنان
رحت بلاوداع ماصح الامان
عليك تعودت يلموتك عـثر
*****
بجروحي ملح واهــاتي ربح
نگعان ابــدمه بلفرگه انذبح
الظامي گضه مات ومارضه
صـله بمنحره عبدالله قضه
بروحي صرت مــاي وشجر
*****
ابوحيدر
الصبيحاوي
چــم اه مــاتـت نــص دليلي
بويه من اصيح يبيد حيلي
تعبني الفراگ للغالي اشتاگ
ويبيد حيلي
****
بــويــه الدمـع مافارگ اعيوني هذني
وحسرات بيــه مــن رحت كلهن ولني
ابطيف مرني امسح ادموعي الچوني
وگابلني فـدوه خــل ابطل ساعه وني
مــن يـوم بعدك ياذي يومي
حسبالي جيت تگلي گــومي
البعد حراگ للغالي اشتاگ
ويبيد حيلي
*****
ابــالي بقيــت ودمعـتي تنادي اريده
تمنيت انـام بحضـنه وشــتم بوريده
ظليت اصيحن غـايتي ياهــو يعيده
من يوم راحـو خلتي الهــسه وحيده
اهاتي كلها خلصة محد اجاني
حنيتلك يــابوي يامنبع حناني
نشفت الرياگ للغالي اشتاگ
ويبيد حيلي
*****
انطر وتـانــي الباب ينفك اعله حيله
بگلبي البعد يــانــاس گـام يبان ميله
بكل ساعه علراحو دمع عيني اسيله
وليلة هجرهم عل گلب كلش طويله
بلكت يمر لــو هم اشوفه
لــو بعد اموتن مــااعوفه
افراگه مالاگ للغالي اشتاگ
*****
اليل موحش من عفتنه بگلبي لوعه
الجفن فايض مايكض حتى دموعه
لوني عليك مـن الحزن غيرت نوعه
ودلالي صفره صبحت كلــهن ربوعه
ابچي بكثر كل هل ليالي
فارگت كل اهلي الغوالي
احزاني تنظاگ للغالي اشتاگ
*****
من دمعي احني الباب بلكت تجينه
ودلالي احس يــانـاس يكلف ونينه
بويه اشتهت ملگاك روحي الحنينه
واتمــنه كــون ابــيوم وتـــرد علينه
رد ليــه رد يـــابعــد روحي
يوم الرحت زادت جروحي
امحمله اشواگ للغالي اشتاگ
******
ابوحيدر
الصبيحاوي
عشنه بدنيه نحب حسين ومانتصافه
عشنه بدنيه واحدنـــه عله الثاني افه
مـــاچنه انصـاره واحبابه
ولاچنه احراره واصحابه
عشنه بدنيه عشنه بدنيه
******
كون اليمشي بدرب العتره ينصرونه
ويستاهل لـــو خــادم كـلهه يسمونه
وكـــون اليــنقد مـــايحتاج يكـتلونه
وكــون الاحـه العوز احبابه ايعينونه
هذه البينه ونتنطر مهدي وماجانه
هذه البينه كــل الــوادم هل تعبانه
والـــوادم چــنهم اذيـــابه
ولاچنه احراره واصحابه
عشنه بدنيه عشنه بدنيه
*******
شنسمي الباع اهلــه ويحمي الجيرانه
وخــان العــشره وگـــام يـدولب اذانه
البــايــع روحــه لجل الراتب عــافــانه
منبوذ بكــل ربـــعه واهــــله وخــوانه
ضدك صاير ويحچيلك هيهات الذله
ضدك صاير والحق ميعرفــه ويندله
من عدهم غايب سد بابه
ولاچنه احراره واصحابه
عشنه بدنيه عشنه بدنيه
*******
ليــش انـخلي الــغربــه علينه شماته
وليــش احنـه واحدنــه تلچمه اهاته
شــگد نتـرجه ومحد توصل دعواته
غــايب مــايظـهر بـي زادن حسباته
احنه انئخره ونگــول اتئـــخر ملــــينه
احنه انئخره عطلنه الباقي من اسنينه
شــمايتئخر احــنه اسـابه
ولاچنه احراره واصحابه
عشنه بدنيه عشنه بدنيه
*******
كون اليعشگ گاعه ويحامي اعليهه
ومــن جــيرانــه لابــد هوه يحميهه
واحنــه للــگاع الام نظــل تــاليهــه
احــزاب انــعوف وخــل نعـمر بيهه
نادي الغايب تصافينه نگله ويحضرنه
نادي الغايب عــد عونك صحنه امرنه
ويفــتر مــولانــه دولابــه
ولاچنه احراره واصحابه
عشنه بدنيه عشنه بدنيه
*******
ايدي بئيدك خلي حسين يشاهدنه
مذهب واحـد وسفه احنه تباعدنه
حــب العتــره بينه ودوم موحدنه
وكلمن خـل يوگف متوزر واحدنه
الدم واحد ونــرد اردود العــشرتــنه
الدم واحد فوگ الهامه تظل چلمتنه
والدنيه نحس بيها غــابه
ولاچنه احراره واصحابه
عشنه بدنيه عشنه بدنيه
*******
ابوحيدر
الصبيحاوي
جسام يمه جسام
*****
كــونـك تــظل ويــاي ياشمعة اهلنه
اشــبع ييــمه بـشوفتك وشبع محنه
يــابــعدروحــي يلــولــد انتــه املنه
يلماخذ الروح ورحت عايفلي الالام
*****
من زغرك وعيني تصد بس الخيالك
احـتار يــمه يلـــولــــد انـــه ابدلالك
بلكون كـله مـــاشفت واحــد مثالـك
عمرك گظيته بــدنيتك مـانزلت هام
*****
بعيوني اشوفـنك ضوه هيبة زماني
بس انته احسنك الـي صايــر اماني
من رحت بغيابك تـره دهـري ولاني
واليوم بغــيابــك احسنه علي عـام
*****
يلغالـي خطواتك نبض چنها بدليلي
تمنيت ساعــه كــونــك تنام بشليلي
ماغفت عيني بروحتك لا نمت ليلي
وايست منك يـلولــد حتى بلاحلام
*****
الطولك اباوع يابخت كـل العشيره
يمعدل محزم اشوفــك مملي غيره
يـــاورد اهلــنه يـاشهم انته وعبيره
يــارقم بين الوادم وعديت الارقام
*****
شلون اخلص عمري بفراگك يغالي
وشلون تگضي بلبـچي كـــل اليالي
ابروحي وتظل انته يلساكن خيالي
خلافك تولان الحجر وبيوتنه جام
*****
ابوحيدر
الصبيحاوي
مايرحمونه مايرحمونه
ذبيح اگبال عيني مايرحمونه
*****
فــوگ التله زينــب شــافــت الحاله
وشافــت فــوگ صدره گــعد چتاله
مـــن بـــعد الــذبــح ركــته الخـياله
دمه اعله الارض ابن امي هل ساله
مايرحمونه مايرحمونه
ذبيح اگبال عيني مايرحمونه
*****
عليــه اهـــل الظلالــه تلملـمت كلهه
وحيد بطرگ روحــه وروحه باذلهه
سيوف اعداء كــل اجروحه تندلهه
علــيه نــاحــت الدنيه اليله بكملهه
مايرحمونه مايرحمونه
ذبيح اگبال عيني مايرحمونه
*****
شفت المـوت بين بلطفوف اشكال
وشفت الوكـت بلغالي يــوادم مال
عليـه ملتمـه عــدوان ونــبل ينهال
تالي الراس فوگ الرمح هم ينشال
مايرحمونه مايرحمونه
ذبيح اگبال عيني مايرحمونه
*****
علي ملتمه نــاس ابلارحم لاطيب
واحــمر خضبو ابــدمه كل الشيب
فتر بي الزمان وگام كلشي يجيب
ولته اسهام بـي محزمــه وتصيب
مايرحمونه مايرحمونه
ذبيح اگبال عيني مايرحمونه
*****
ركضة اعليه والخطوه عمر صارت
حدبت وغزاني الشيب مـــن دارت
وادم علولي متحضره هـــم جارت
دنــيه بــلوعتي مــن الحزن حارت
مايرحمونه مايرحمونه
ذبيح اگبال عيني مايرحمونه
*****
عليه ايتام ركضت حــايــره ابوالي
اجـت يــم الشفيه بــدمــعه التلالي
تصيح بصوت بويـه بحرگه ياغالي
اجــت يمك يتامــه وناحت اعيالي
مايرحمونه مايرحمونه
ذبيح اگبال عيني مايرحمونه
*****
ابوحيدر
الصبيحاوي
رقيـه مــدلله والموت اجاها
مـر بيهه يــوادم هـل خذاها
*
تــراها مــدلله وكلش عزيزه
وگلبهه اليــوم مابطل نزيزه
صــارت للحزن اكبــر ركيزه
الحزن ياناس بين هم لفاها
*
شافت خــيل وسيوف واذيه
وطاحت دمـعت الترفه رقيه
صاحت يمه الحگيلي الزچيه
تدور عل ابو ماكو الحماها
*
داســت خيـلهم صـبيان بينه
وگــالو حضرو حبــل الادينه
نــدور الــراح مــابيــن ولينه
الدنيه شمالهه ومدري شجاها
*
لاعــم البــقه ولاظــل ابونه
مــدري منين ياوادم اجونه
نســه وزغار وعـدانه ولونه
شفنه الغاضريه اسود سماها
*
جــابـوهه الهزل وحبال لينه
سبايــه وكـلهه تتفرج علينه
صلف چتالنه وتصدنه عينه
مصايبنه الوكت صاح ونعاها
*
سبيات وخذونه وين ماوين
وبروحي ادور ماكو الحسين
علينه اندارت الظلام صوبين
ونور اعيونه بــاگــو ضواها
*
اخــر يــوم ظــل يوم الخرابه
جابو راس ابوي وصحت يابه
مــرنــي الموت ماطول عتابه
وروحي هل منيه تظل وراها
*
ابوحيدر
الصبيحاوي
انه بعازت ابو وانته ابونه
ادور احباب گلبي المـا اجونه
****
تعــال اعيونــه صبت نضرهه
حزينه وبلبچي گضت عمرهه
روحي تلـوب يلسامع خبرهه
بدليلي الاه والحرگه بشجونه
****
يتيمه ودهـري مايرحم دليلي
جرت دمعاتي وترست شليلي
اصيحن بويه وانه يبيد حيلي
واون ونات عل راحو جفونه
****
مــطر حسيتهن صبن عيوني
بگــد دنياي يــاناس الجفوني
ردت اخيال مــن الــفارگوني
تره الحسبات وليه هم ولونه
****
اليالي شلون نگضيهه بدونك
وحشه اعيونه وماكو عيونك
يلموسـد تــرب گلـي اشلونك
اوجهك بـعده لــو غيرو لونه
****
انـوح اعليك والمـدمع اصبه
وعـگبك بيتنه مــاريـد اطبه
مجلس بلگلب للغالـي انصبه
الحزن والنوح ياوادم لفونه
****
اگولن بــويــه واتچه بخيالي
وتــمر صعبات يــاناس اليالي
مــن يوم العفتنه بظيم حالي
تهنه مـن الحزن هـسه لگونه
****
يخيمتنه الچبيره وكل ضوانه
يبخــت اسـنينه وهيبت لوانه
يــريــت الخذك يابويه خذانه
ســوه يــاريت ويـاكم خذونه
*
ابوحيدر
الصبيحاوي
ها يحسين ظلت بس يتامه
******
اصد اطفال مرعوبه وحزينه
وگلبي اعليك مابطل ونينه
اثار الموت عادتنه اوسنينه
ولاك الموت بس رافع الهامه
*****
وي حز النحر ماضلي والي
صفت دمعات بعيوني اتلالي
الركض والطاح وتعثر خيالي
اسمع بلحچي وكثرت ملامه
*****
الحافي الشوك والجمره تلسعه
وهول امصابكم والله يفجعه
شاف الخيل بضلوعك تگطعه
ويون اعليك ونات الحمامه
*****
زغار محيره والدمعه سالت
تحس الگاع بيها اليوم مالت
كلهه اتصيح اه يحسين گالت
عليك اتصيح ياوسفه وندامه
*****
وعلى المذبوح ملتمات كلهن
يتامه اوخوف مايحصل مثلهن
ينوح الصخر من يسمع ابونهن
وعلى الذبحو والحرگو خيامه
*****
تعال اوشوفني وشصار بيه
انه اربات الولي وهسه سبيه
كظو ياحيف كل اهل الحميه
ومن ذبحوك ذبحوهه السلامه
*****
يتامه اوطشت ابين البراري
وطفت نار الخيم اوبقت ناري
يوسفه اعلى الترب فوگاك ذاري
وانه اليل بعده شلون انامه
*****
ازغار امسنسله گظوهه عثرات
ماشافو هظم تلمع النجمات
اليرمش گام يتفيض ابدمعات
ودمع العين صارلهم علامه
******
ابوحيدر
الصبيحاوي
يــاحسراتها الجار الزمن بيهه
سكنه بلسبي والشمر حاديهه
*****
شافت بلطفوف اهات مالومه
وكل احبابها متوسده الحومه
گلبهه خزن ومتروس بهمومه
يلچمونه دلال الحره
*****
عاشة لحضة الاهات والدمعه
كل عدوانهه متوزره مجتمعه
ابوها شافته من داسو بظلعه
تاذيهه نظرات البيهه
*****
ماظلت خـيم والحره محتاره
والـظالــم عليـهم لملم اشراره
ذاع المــوت بلــغالــين اخباره
عينوهه ماتحمل ونه
*****
گالت عمي والحسرات تچويهه
وعبرتهه تـره خنگت محاچيهه
يــاراعي الشريعه شوف تاليهه
حاديهه يحضرها تريده
*****
بــت حسين متحزمـه ابچيهه
وهــاي الــدارت الدنـيه عليهه
هسه احبال شـدوهــن بـديهه
بويلاته حيرها الطف
*****
مشت والمــوت تتمناء يمرهه
بعــد شيـفيد ظلتـهه ابعمرهه
بچت ياناس ومبچيه صبرهه
المظلومه ياعمي تصيح
*****
ابوحيدر
الصبيحاوي
مــر محــرم وانتــه مـو ويـانه
صفت بينا احزان فوگ احزانه
*****
ذكره خليت الــبواچي ودمعتي
وگمت ادور منــي راحــو خلتي
بيه تحرگ گمت احسن حسرتي
والــبعد هــــد حـــيلي اواذانــه
****
اذانــه بعــدك واليالي وفرگتك
وليليه نشعلك يـــغالي شمعتك
بلبال ضلت من اسولف چلمتك
وطــاري احبــابي المشو بچانه
****
بچانه طاري الراحو وعــافونه
بحيره كــل احـنه تــره خلونه
احباب گلبي اليله هل جافونه
ودمعي مــابطل بــعد جريانه
****
جره دمعي الكل عزيز وغالي
بعيني احسنها الدموع اتلالي
والحزن وي گلبي ظل يبرالي
الاه والحسره صفــت عنوانه
****
الضيع احبابـه بواچـيه ثغيب
يگضي عمـره واليالي بنحيب
الله يعينه المشه عنه الحبيب
شلون تـــاليــه الــجفو خلانه
****
صفنه يگضيها ويظل بحيرته
الحملو بضعونهــم كــل خلته
بفرگت احبابه تواسيه دمعته
مهدله ادموعه وتظل عـريانه
****
ابوحيدر
الصبيحاوي
كــل الطــف صبح هندس ياعباس
*****
يتامــه بــلاء كفـيل الــيله تدري
ختار الموت مني حــزام ضهري
خذو زينب اسيره وتــاه صبري
عليهه اليله تتـفرج تـــره الناس
تاليهه مسبي الحره
كــل الطــف صبح هندس ياعباس
*****
صـــفو بلاء گــمر واليله ضلمه
وتگول اعـدانـه هـل ملتمه لمه
تــالي تگول ريــت الــيله نعمه
لو ميتين بس منشوف الرجاس
ياحاديهه مظلومه اختك
كــل الطــف صبح هندس ياعباس
*****
طبــو خيمـه خيمه وشعلو النار
وطــشو بلبــراري ازغــار وكـبار
مــدري شبـي وكتهم ياخلگ دار
وديوان الـولي ياوسفه ينحاس
ياذيهه عباس افراگك
كــل الطــف صبح هندس ياعباس
*****
تعال وشوف حال اختك ولوها
ومن كل صوب عدوان الاجوها
بهــزل يــاحـيف حرتكم خذوها
گوم من الشريعه ونكت الراس
ياخوها تتنطر جيتك
كــل الطــف صبح هندس ياعباس
*****
چــم طفله ويتيمه ماتت اهنــاك
لفــانــه الظيم گـمنه نلوذ بلــواك
گمنه نصيح كــون نــروح ويــاك
صدر حسين شفنه بحافر انداس
ياهيبه دورنه اخيالك
كــل الطــف صبح هندس ياعباس
*****
اخوي حزام ضهري جيت انشدنه
اليوم بعازته وهــل ردت احشمنه
گلبــي علــيه يحـــمل اه والــونـه
ومـــن فـرگاه تخنگ بيه الانفاس
يابو الغيره عباس اسمك
كــل الطــف صبح هندس ياعباس
******
ابوحيدر
الصبيحاوي
يوم العاشر بعـاشور اهــــاتي
زينب ياخلگ تسبيني شماتي
*****
دمه ونيران عــاشـر والمنيه تحوم
ومدري شبيه يــاوادم طويل اليوم
بصباح الله نفجعنه وسـيرة الهموم
صار الطف دمع وتغطه بس ادموم
بگلبي تزاحمت ياناس حسرتي
زينب يـــاخلگ تسبيني شماتي
*****
يــاهــو انذبحو اهله وينضر بعينه
ويــاهو المثلي حـرم نوحه وونينه
المــثلي بــهل مصايب الله اليعينه
صفت بس اليتامه ومــاكو حادينه
گلبي بـنار مــاتــبرد يجمراتي
زينب ياخلگ تسبيني شماتي
*****
شفت الموت حـادي والمنيه اهناك
صحت خويه اريدن روحتي وياك
لـــو عني غبت يحسين وين الگاك
وهسه يــاشهــم دارت عليه اعداك
گبل ماتمشي ابلياك خطواتي
زينب ياخلگ تسبيني شماتي
*****
الــم اطفال طشت والدروب هـواي
تسحگ خيلهم وانه الصحت بـهداي
ضحايه تگنطرو بلحومه كل اعضاي
ومــن بـعد اخوتي تفتر عليه اعداي
انه المخنوگه وتئذيني عبراتي
زينب يــاخلگ تسبيني شماتي
*****
اصيح بصوت يــمي اتگربو يـاعمه
هــذه حسين شــفته سابــح بـدمه
واشوف اعـداء كلــهه اعليه ملتمه
بــاسم حسين طفنه اتسمه اباسمه
وانه اعليك شيسكتها دمعاتي
زينب يـاخلگ تسبيني شماتي
*****
ابوحيدر
الصبيحاوي
عريس وتحده الموت هــذه حفيـدك حيدره
*****
جســام درت مـولاي جسام بلطف جـوهره
زغير وبچفوفه الزود مشاهم اعله المصطره
شمس وتدنه لطفوف خــلاهــم ابعـازت ذره
ابن الحسن يــامحلا ضـربات سيفه مـعتبره
يگلبها بيده الميدان وتظــل عــداء مـــعثره
اطه دروس ابدنياه جـسام صــايـر مفـخره
يخوطهم بيده خوط چـن عمه سبع الگنطره
خيرهم يشوف الموت لوسيفه يوصل منحره
يطويها گـاع العدوان يفنــيها نــاس الكافره
يرعب الجيش بملگاه قــاده وجنود امرمره
سوه الطفوف بيمناه هندس وصارت مگبره
وعيون امــه ياناس مــاتغـفه ظلت ساهره
العالم الهــسه ينـوح وگلوب لجـله موجره
ضحه بحياته للدين والــكون بفـعالــه دره
زغيرون گالو ياناس بفــعله هـوه شمكبره
يحــتار كلمــن لاگـاه ويتيــه مـــنه مــعبره
بعيونه ايصد مولاي حسين ظـــل يناطره
ياحيد وابن الاكرام مثلك فلا جابت مره
الموت دنــگ محتار مكسور بيــن خاطره
******
ابوحيدر
الصبيحاوي
ذبيح الله ذبيح الله
*****
جاب الدروب والگلوب نبض بيهه الدمه
نعت الها السمه عليهه هايمه وبانت خاتمه
طبو اطفوف ميامين عداهم ظالمه
يمــهم الــموت تحــزم تــوزر بلـدمه
صفــن جــيوش رجــف هــم لايـمه
لفاها ابلاها امامي اصبح هواها
طب للظلمه مولانه ضواها
يعرف دنيته شـتالي وراها
هــايــه كربله تعنه واجاها
ماهمه الجره يعرف عناها
هــله وربعه خذاها وظــل يرف لواها
حط ارحاله مولاي بخت عنده ونباها
طب الاطفوف گايم يروف
ذبيح الله
****
وكتك احتار وينـــدار يبن خير البشر
عفت بينه اثر امصابك كبر يلمنطي النحر
عشت متجلي جيدوم مـاهمك خطر
سحابه الدنيه يحسين وتخلص مطر
وانتــه عــايــش مثــل عيشت شجر
يهيبه عجيبه الوكت طلعله شيبه
هذه الحسين والحره الغريبه
القدر يــانــاس عناء النصيبه
بگلبه نيـران متوجره ولهيبه
يدري مولاي بلطف المصيبه
تظــل ليــله رهيبه تخضب من مشيبه
بينه العاشر يعيش وبحزانــــه ونحيبه
بذيچه الاصفوف گايم يروف
ذبيح الله
****
تحضر وياه وتلگاه القدر لمن وصل
ابد ماظل امل بفراگه علل والموت بتهل
كلهه ياناس تتاني يطيحون الجبل
جــابو الموت عليهم والطف اكتمل
كلــشي بلكــون حـــزن هسـه شمل
ملامه علامه صفت كلهه خيامه
تالي بطف يئسرون اليتامه
تون كلها مثـل ون الحمامه
طاحت بلارض اكبر جهامه
طــاح الــدين ويرتل كلامه
اخذ مــوته مرامه ولا بيــن نــدامــه
طاح الحافر وياه واخذ كل السلامه
عينه اتشوف گايم يروف
ذبيح الله
****
التله تنداس يعباس من حره وعقيله
دمع هيه تسيله معروفه اجليله ليلتها طويله
كونك اهناء يعباس ليلتنه ثجيله
رتــك الــطف يــبن يحيـدر تميله
وجيش الــعداء تعگره ويه خيله
بلــيه ومنــيه لفت بت الزچيه
الدنيه مغنتبه وياها بمسيه
بـس مصايب تحوم السبيه
اهلهه اعــزاز شافتهم رميه
ولا كفــال لا ضــلت تچــيه
صفت سوده الرزيه بذبح عترت نبيه
زينب رايحه للشام تطب اديــار اميه
يخوف الخوف گايم يروف
ذبيح الله
****
ابوحيدر
الصبيحاوي
هاي خدام شدت احزام
*****
مــوكــب الخــدام هــاي اليله
على حسين الدمع ظل يسيله
وكلهه خــدام ابــدمـع تبچيله
نعــزي غـايبنه بحزن نشكيله
هاي خدام هاي خدام
****
التمت الشبان خدامــك تــره
اگلوبهه لجـل الذبيح مجمره
تگول احنا ابــــــد لا منغيره
اليله للوادم نسولـف مجزره
هاي خدام هاي خدام
****
هــاي خــــدام تظــل محزمه
تعــزي الكــرار حمــاي الحمه
على ال البيت والماتــو ضمه
مانوافي قطره من ذاك الدمه
هاي خدام هاي خدام
****
تـوكلينه والـدمــع شلال صار
وحنه واحدنـه دليله كــله نار
الـغاضريــه بينه امخليه مرار
كلنه خدامه وخذنه هـل قرار
هاي خدام هاي خدام
****
مــوكــب تهيه وحـضر دمعته
وجاب للخدمه اليوالي بخلته
اخذ مــن حسين عزه وهيبته
وبين كل الناس تصدح چلمته
هاي خدام هاي خدام
****
بداعت الشيبات وي ذاك النحر
نقسم انــوافيـك بچفوف الگمر
بلنــفوس مصيــبتك خلــت اثر
بيــنه طــفك يـاامـامي هل كبر
هاي خدام هاي خدام
****
ابوحيدر
الصبيحاوي
يتامه يتامه تون ضلت يتامه
ملامه ملامه فوگ الهم ملامه
نولينه نولينه
****
طشت كل يتامانــه بيها نتــرست الحومه
اليعثر للمنيه ايروح هــناك تبيــن اعــلومه
لتسحگه حوافر خيل متخلي تره ارسومه
يتامه وحــايره بلبر وكلهه صفت مهمومه
مناحه مناحه صفت يهلي مناحه
نيـاحه نياحه الگلب زايــد نياحه
نولينه نولينه
****
جيوش التمت بكثره هدت حرگت اخيمنه
شبوهــا الطفوف ابنـار وكلشي گـام يالمنه
فــوگ المــوت والاهــات بيــنه كثرو همنه
طشرنــه الوكت ياناس حيل الدهر ظالمنه
سبونــه سبونه غرب وادم سبونه
خذونه خذونه على الهزل خذونه
نولينه نولينه
****
نتعثر گمنه بلموته عشنه برعب والحسره
شفنه ايــام مجهولــه لــيل وفارگ الگمره
خلصنه العمر يــانـاس عثره مچلبه بعثره
بطف طاحت الوليان بدمهم گاعنه حمره
مماتــه مماته الكل يعرف مماتــه
شماته شماته طحنه بنص شماته
نولينه نولينه
****
ايــد ابئــيد خلينه وتـرجف كــل اصابعنه
حسينه الزمان انــدار وچنه ياخلگ ضعنه
مثل الغدرته الايــام وبظهره صفت طعنه
بلخوف وتعب ياناس اه وحسره تجمعنه
بچينه بچينه بكثر دنيه بچينه
عليـنه علينه الكل هدت علينه
نولينه نولينه
****
نمشـي بلسبي كلــنه كلــمن لازم اخــوانه
نمشي والحزن حـادي نسه ويتام حزنانه
دنيه وظاگت اعلينه زغـار وكلهه حيرانه
جابونه بهزل للشام وعفنـه اهناك موتانه
بــدينـه بــدينه حبل شدو بدينه
نسبينه نسبينه كل احنه نسبينه
نولينه نولينه
****
ابوحيدر
الصبيحاوي
هاي احرار كلها انصار يم حسين ودايه
*******
اليله انصار ابو السجاد ليلتهم فـــــــــلا تنعاد
والموت التدنه وراد لاگه انصار كلها اشداد
بيها اسرار چنها اعصار بواليمه صفه غايه
*****
عاشو لجل ابــو اليمه وضحو دمهم الدمه
زلم متحزمه بس همه انــطو للــولـي چلمه
هاي الناس چن عباس صــارو كلـــها روايه
*****
وگفو علمنيه وگوف واحدهم يشگ ويروف
طافو والمنيه اطوف تون الهم تظل اطفوف
چم خيال مثل اجبال تلـوگ بچفهم الرايه
*****
تــرف ليهسه رايتهم صار حسين غايتهم
علت ياناس چلمتهم ذوله البخت هيبتهم
بيهم زود راعي الجود نـاس بطيب وفايه
*****
ذوله اهل الوفه بينه كلمن حط عناوينه
وكلنه عــون والــينه گالو نحمي حادينه
كلنه اوياه احنه احماه وندگ ياخلگ ثايه
*****
وهسه اهواي انصاره صارو سيل يجاره
وبيهه اعداء محتاره حطو بيهم الشاره
رجالك هاي گل لعداي بكثر العلگمي ومايه
*****
ابوحيدر
الصبيحاوي
يــل نــازليــن بــكربــله سمعوني
يمكم عزيزي هــوه نــور عيوني
******
سيد شباب الجنه عاش بروحي
ليليه باسمه يبدي ونـي ونوحي
اجروحه تلچم بي كل اجروحي
وياي ونــو فــدوه هــم عينوني
*****
عينوني لن عشة انه كل مصابه
معصوم بس فــر الوكت دولابه
گبال عينه الموت اخــذ احـبابه
ويگول ناس ابلاء ذنب عادوني
*****
عـــادو كــل اهــل الحـقد والينه
وبلطف گظت مولاي كل اسنينه
شــاهــد عليهم بــل حشر بارينه
حسين گال اهـل الكفر ظلموني
*****
ظلموني گال وكل جرح ياذيني
وكل المصايب بيها تشهد عيني
انطيت كل احبابي فدوه الديني
سيد شباب الجـنه كــل يدروني
*****
يدروني گال حسين اني الغايه
ويـــدري نظـــل ويـــاه للمـنايه
يعت بينه شوگ محبته الهدايه
مــاعدي غيـر حسين ليلوموني
*****
خــل اليلوم يلوم اهوه احروفه
لمــن اغمض عيني هـيه تشوفه
مـاعــدي غيره بلحچي سالوفه
كل ناسي احبه تدري ايعرفوني
*****
ابوحيدر
الصبيحاوي
انوح يبن امي انوح يبن امي
****
اتمنه موتي ولا اعوفك عيني صوبك بس تناطر
شلون اشوفــك انته عمري وكــــل حياتي
بروحي اطوفك وانته تدري الحد ممامتي
شتحمل اعيوني واشوفن صارن اظلوعك گناطر
بذبحك الكون استحه وچان كلشي اهناك حاضر
التله مـن البــچي طاحت
واحس بيــهه علي ناحت
انوح يبن امي انوح يبن امي
****
الدنيه دونــك چــن يتيمه خويه مـل بينه الصبر
وبل هظيمه دموع سكته بلايه حس
بهــل ظليمه نخاف نبچي وگالــو اس
گمت اشوفك سيل يجري ومني احس تاه العمر
وچني مــو علتله اوگـف وگمت احسن عل جمر
شلي بلروح الجفاهــا غالي
بهيده يبنبض ياخلگ دلالي
انوح يبن امي انوح يبن امي
****
تــون الــفاجــده الغــالــي اوكتهه مــارحــم ليله
وتظل حزنانه بعينها رسمه تظل تشوفه
بلبعد حيرانـه للاخو ياناس هم ملهوفه
هاي حــال الحره زينب گبالها طاح وذاب حيله
والوكت لملم جيوشه وداست اعله الصدر خيله
شلون تگضي الـيل بعده
وتدري روحه ابلايه رده
انوح يبن امي انوح يبن امي
****
اعيش بعده بس نياحه بگلبي احسن باقي لومي
بكل صياحه گلبي اسمعه ردداها احروفه
بضل جناحه ردت عمري خلصيته بشوفه
هســه كــل عمــري گضيته زادن بگلبي همومي
گمــت اتــمنه المنيه وگبل يــومــك ريته يومي
حسين خويه گضه دمعي
لــيل ونــهار انـــي انعـــي
انوح يبن امي انوح يبن امي
****
ابوحيدر
الصبيحاوي
هل اهلال الحزن خلانه بس نون
بهاي المسيه
******
كـــل سنــه متانينك تمر
بس بيك محسوب العمر
واحدنــه چـن موگد جمر
ونحمل اذيه بهاي المسيه
*****
مــن يـمر يكسر خاطري
يصب الدمع ظل ناضري
بي انـه اعيشن حاضري
بلطمة اديه بهاي المسيه
*****
كانون گلبي بــي احـس
وتچويني ناره بـلا لمس
مــن العام اونـن بلهمس
عيني نديه بهاي المسيه
*****
تلچمنه كــل ذكــرى الـه
وتتراوه الي تظل كربله
ابــالي انـي اسمع قافله
اهل الحميه بهاي المسيه
*****
يغـيم دلـيلي مــن تجي
يخنگني احسنه الحچي
ايصير كـل همي البچي
بجيته عليه بهاي المسيه
*****
بجيتك حضر كل الدمع
وكـل عالمي بيك نجمع
سويت ونــي هـم طبع
جبت الرزيه بهاي المسيه
*****
عايش جرح بينه وكبر
معلمنه عل ون علسهر
خليت دمعي چــن نهر
والبيه بيه بهاي المسيه
*****
ابوحيدر
الصبيحاوي