7103
إحنه غير حسين ما عدنه وسيله والذنوب اهـــواي چـفّـتـها ثجيله
منهاج الليالي الفاطمية الحزينة
قصيدة ( آية وفه )
بعينه مات الضوه.. خنگه حتى الهوه
قالع الباب..ينصاب.. راحت فاطمه
حزنه لا ماگظه..الخالق ايعوضه
محسن يصير..عباس..يوم الملحمه
ربنه گله لا تهم .. صار صگار الزلم
هذا أبو فاضل
......................................................................
فگدهه فاطمه وصي المصطفه
دليله المنضهد ولا جفنه غفه
اندفع باب النبي ضوه الگمره طفه
بجنين الي سگط العرش چنه انچفه
حزين بدمعه رتل
اعلموده الباري أنزل
كفيل الحره الأول ...أبو فاضل
عجيد وكله غيره
نعم بدر العشيره
شهم ماكو نظيره ...أبو فاضل
دمعة المرتضه .. بيهه ضاگ الفضه
جرحه ملچوم .. مهموم .. حماي الحمه
هالجرح ما بره .. أوله وآخره
راحت الروح .. يا روح .. والمدمع دمه
طالب الثار بعزم .. صار صگار الزلم
هذا أبو فاضل
......................................................................
......................................................................
هله بأم البنين..وإسمهه فاطمه
تگله يا علي ..تراني خادمه
خدمتك شرف..أبد مو نادمه
يبو الگلب السمح .. يگلبي وعالمه
زمان احزانه أصعب
أحط بروحي زينب
كفيل الحره گرّب .. أبو فاضل
أمر رب الجلاله
يجي وبيده الكفاله
بوفاءه من مثاله ...أبو فاضل
اتنادي أم الگمر ..إنچان ذخري حضر
يأخذ الثار .. والثأر .. هاي المظلمه
يبدي بسم الوفه .. الدمعك ينشفه
يجلي الأحزان ..عنوان .. للحق مقدمه
كل عهد عنده مهم .. صار صگار الزلم
هذا أبو فاضل
......................................................................
......................................................................
نعم شافت حلم..بعيون الدامعه
بحجرهه زهت ..بدور الأربعه
يميزهه گمر .. بجماله وموضعه
فلا يريد المهد .. يريد المشرعه
بمهد لكن سلامه
اعله زينب كل غرامه
بنظرته كل كلامه .. أبو فاضل
يسر گلبك يغالي
ضوه بعين الليالي
كفيل الحره تالي ...أبو فاضل
يردد القل هو ... بجفه يرفع لوه
يرهب إعداه .. والله .. لو سل صارمه
موت الأحمر يهد..والعساكر ترد
شيچهب الموت .. لو صوت .. غيره يلازمه
من الأعادي ينتقم .. صار صگار الزلم
هذا أبو فاضل
......................................................................
......................................................................
وعدهه بكربله .. إذا العاشر حضر
ضوه يم النهر .. يشع شمس وگمر
أبو الأكبر شمس..تشع من النحر
أبو فاضل گمر ..يخط چفه القدر
ترفرف بيده رايه
الحرب عنده هوايه
بوجوده ثق كفايه .. أبو فاضل
يحيدر وإنته أعلم
شنو يصير بمحرم
يسيل و يرجح الدم ...أبو فاضل
أسرع أمن الزمن ... مثلك بكل محن
بحربه طاعون ..وشلون.. يگظي الموزمه
هذا تربيتك علي .. للمعالي يعتلي
بالسمه يلوح .. ويلوح .. شعله أمن السمه
حدر جدمينه النجم .. صار صگار الزلم
هذا أبو فاضل
......................................................................
......................................................................
وريثك يا علي .. يگظاي الشدد
يزلزل كربله .. يحل كل العگد
عساكرهم منو .. يخليهم بدد
إذا خيمة الشرف ..أنا إبني الوتد
بعد ما تبقه عسكر
الشمل كله ايتطشر
إذا بالحومه كبّر .. أبو فاضل
غشيم الي يگصده
بلا هامه يرده
ضربته ضربه وحده ...أبو فاضل
هازم لكل جَسر .. منه أبد ما يفر
خاطف الروح .. مسموح .. يمحي الظالمه
إبني غيره وفخر .. إبني هيبه وقدر
ربنا يرعاه .. خلاه .. بهاي المكرمه
خصمه يرجف ينهزم .. صار صگار الزلم
هذا أبو فاضل
......................................................................
......................................................................
تراهه زينبك ..أمانه للشهم
زمانك لو عكس ..يحيدر لا تهم
فداءك أربعه ..زلم نعم الزلم
للحسين نذر ..إذا حل الحسم
بدور أولادي كلهم
فداءه أربعــتـهــم
رفع بيده علمهم .. أبو فاضل
عهد للموت عهدي
تهون إگباله ولدي
لحسينك سند عندي ..أبو فاضل
يا علي وبالمجد .. هالگمر مستعد
عوضك بي .. تدري .. رب المرحمه
جرح محسن شفه ..وأبو فاضل وفه
بلسم يصير ..لتحير .. هاي الخاتمه
والمجد بي ينختم .. صار صگار الزلم
هذا أبو فاضل
......................................................................
......................................................................
خادم السيدة الزهراء عليها السلام
عمار هليل الواسطي
جمادي الأولى ١٤٤٣ هجرية
منهاج الليالي الفاطمية الحزينة
قصيدة حيلك يا علي .... (( گعدة ))
علي الليله .. إنهدم حيله ..انكسر گلبه على الزهره
چف البي قلعها الباب ..
بالگوه يهيل إتراب ..
دفنهه وبالگلب حسره
........................................................................
هدمت حيله المصيبه وبعد ما ينجبر كسره
فاطمه لمن دفنهه باللحد چن دفن عمره
هيه مو كل فجعه فجعه وهيه مو كل حسره حسره
أظلم نهاره بلا فجر ..كسر الگلب ما ينجبر.. للباري فوض هالأمر .. وبقت عنده شلون ذكره
يهل دمعه ..على البضعه..يتامه صارت أولاده
هذا امصاب من امصاب ..
بالگوه يهيل إتراب ..
دفنهه وبالگلب حسره
........................................................................
مچتف بحبل الوصيه وملتزم والباري يشهد
يصبر الفقار گوه بس جمر گلبه ميبرد
بيا غمد يقنع فقاره وفاطمه تنسطر عالخد
بالباب طيحت محسنه .. ويلچمه يا فگد الظنه..من حقه لو ظهره انحنه..فوض أمره لواحد أحد
انحنه ظهره..فگد عمره..للباري اشتكى أمره
والمثله صعب ينعاب
بالگوه يهيل إتراب ..
دفنهه وبالگلب حسره
........................................................................
گالوا الأصحاب ذوله بري من عدهم نبينه
تبت ايده الگام ينگل حطب يم باب الحزينه
والشعل بالحقد ناره ووجت بغيض وضغينه
لاهم صحابه ولاربع ..كلمن سعه بكسر الضلع..وراد الزچيه تنصفع..عدو الربنه وعدو الدينه
خصم ياسين..عدو للدين .. التجسر يظلم البضعه
والعدوان موش أصحاب
بالگوه يهيل إتراب ..
دفنهه وبالگلب حسره
........................................................................
حيدر وحيل الله حيله يتعب بشيل الجنازه
حيف والمثله بصفاته هيچ بالتالي ايتجازه
كل مجد بالكون حيدر ..بعد طه النبي حازه
تاليهه ينضد بأمر..بظلم السقيفه ينغدر ..بمحرابه باچر ينطبر ..وعازت الكرار عازه
واليعادون ..واليبغضون .. خلافه بقوه أخذوهه
ولهذا الفعل أسباب ...
بالگوه يهيل إتراب ..
دفنهه وبالگلب حسره
........................................................................
آه يا حال اليتامه شلون يتوصف حزنهم
أمس وياهم الزهره الليله ماموجوده أمهم
حيدر ينشف دمعهم..وبحضن دافي يلمهم
يتفايض المدمع دمه ..زينب تنشده تألمه
ما هيه أمي فاطمه..وينسمع عالزهره ونهم
دمع زينب..جمر يلهب..يتيمه الليله منكسره
يصبرهه بدمع سچاب
بالگوه يهيل إتراب ..
دفنهه وبالگلب حسره
........................................................................
من بعد فجعة نبينه فجعه أم الحسن فجعه
عيون حيدر هالمسيه تطيح دمعه وتبدي دمعه
يساعده الله علينه..ضاگت بعينه الوسعه
وسدهه هالليله الثره
راحت حزينه الطاهره
تروح ودليله تفطره
أصعب مصاب اعليه جره
يخفي الگبر ما يظهره
هذا الحصل هذا الجره
منهه الضلوع امكسره
گلوب اليتامى امكدره
دافن بأيده الزچيه فاطمه ورد الوديعه
خادم السيدة الزهراء عليها السلام
عمار هليل الواسطي
جمادي الأولى ١٤٤٣ هجرية
منهاج الليالي الفاطمية الحزينة
قصيدة (( أمنية روحي ))
أمنية روحي بعمرهه
فاطمة أوصل گبرهه
نِذرَتْ شما عندي غالي
بيا زمان تفك نذرهه ؟
...............................................................................
هيه مو بس أمنيه بروحي وگلتهه
هيه حسره ومن صغر سني عشتهه
نار وسط ضلوعي وآنه اتحملتهه
طلبه من الباري سبحانه اطلبتهه
والگبر ضايع جوابه
أحتيي بشمّت ترابه
حاير وتسأل دمعتي
بيا زمان تفك نذرهه ؟
...............................................................................
ناذر لشوفت گبر أمي الزچيه
أهدي روحي وكل كياني وكلشي بيه
وأعتذر مو گد مقام الزهره هيّه
ياهو آني إگبال بت سيد البريه
حيرتي حيره چبيره
وهيه مو كل حيره حيره
مهجتي تسأل حسرتي
بيا زمان تفك نذرهه ؟
...............................................................................
لا أمل عندي ولا عندي وسيله
صحت يا زهراء مولاتي الجليله
الليله أحلفچ رايد بسبي العقيله
گبرچ تدليني يالزهره دليله
ردت گبل الموت أشوفه
روحي ودموعي تطوفه
لهفتي تطلب جوابي
بيا زمان تفك نذرهه ؟
...............................................................................
أصعب أمن جروحي نظرات الشماته
واليريدچ ينذر لحبچ حياته
لكن اليگظي سهر ليله بسكاته
هذا جرحه بوسط روحه ووسط ذاته
هيه هيچ جروحي سكته
يلي گبرچ ما وصلته
كل حياتي تهون لجله
بيا زمان تفك نذرهه ؟
...............................................................................
ليش گبرچ مو مثل باقي المراقد
هالسؤال يأذي گلبي والله شاهد
مثل حيرة فاگده عالدرب گاعد
مدري شنطر مدري أباصرمن وأواعد
سالفة گبرچ طويله
فجر ضاع وطال ليله
حسره ظلت يالزچيه
بيا زمان تفك نذرهه ؟
...............................................................................
روحي نذرت لو تزور القبر مره
تحچي كل هم إنتظاري حسره حسره
الماوصل گبرچ عليمن عاش عمره
تموت أحلامه وتظل جروحه ذكره
عن بُعد لو عن مراره
يقره بسطور الزياره
دمعه يجري روحه ذابت
بيا زمان تفك نذرهه ؟
...............................................................................
آه يا أم الحسن لو مر مصابچ
تبقه أمنيتي أشم عطره ترابچ
إنتي باب الله إنعرف يالزهره بابچ
ليش مجهول وفلا أعرف جوابچ
أدعي الله بكل مسيه
يعجل الطلعه البهيه
روحي تنشد أبو صالح
بيا زمان تفك نذرهه ؟
...............................................................................
خادم السيدة الزهراء عليها السلام
عمار هليل الواسطي
١٤٤٣ هجرية
جديد ...
ذكرى شهادة سيدي ومولاي الإمام علي بن موسى الرضا عليهما السلام
قصيدة (( ثامن جروح الآل ))
يوم المنيه وينطوي عمرك كتابه
ما نشفت دموعك على حسين ومُصابه
يالرضا ودمعك همّال
يا ثامن جــروح الآل
على حسين ومُصابه
على حسين ومُصابه
.................................................................................
أحاديثك يبو محــمـــد قريناها
بفضل النوح عالمذبـوح شفناها
بحياتك ما نسيت الطف مناياها
مناياها بوســط گلــبــك لگيناها
حتى بمنــيـتك ما نسيت
تبچي على الظامي بقيت
چم لوعه بيك وچم جرح يبن الإمامه
من كربله وگلبك تفطّر عاليتامه
يلشايل جروح اثگال
يا ثامن جــروح الآل
على حسين ومُصابه
على حسين ومُصابه
.................................................................................
رغم سم التگطع منه كل چبدك
لكن دمعتك ما فارگت خدك
على حسين الغريب المنذبح جدّك
بعدك عايش بطف كربله بعدك
كل لحظه تجري بيهه عين
تصرخ حبيبي يا حسين
لوعة مصابك گرّبت يوم المنيه
يبن الغريب ودمعتك ظلت سريه
مگطوعه عندك آمال
يا ثامن جــروح الآل
على حسين ومُصابه
على حسين ومُصابه
.................................................................................
شرايد منك الدس بطعامك سَم
يبو محمد هضيمه اليوم تتألم
دموعك بالنيابه اعليك تتكلم
غدروك وبقه بنص الگلب مأتم
آه إعله فگدك يالغريب
آه اعله حزنك يالحبيب
يالماترد كلمن يگصدك يبو محمد
الدنيه كلهه اعليك لبست ثوب الأسود
حزنك يهد ضيمه اجبال
يا ثامن جــروح الآل
على حسين ومُصابه
على حسين ومُصابه
.................................................................................
ما ناسي الحسين بلحظه من عمرك
تلهج بإسمه حتى بموت اليحضرك
يا شمس الشموس وينكسر ظهرك
يطفه الليله نورك بس يظل ذكرك
شمس الشموس وهاللقب
يفتخر بيك وبالنسب
مفجوعه أرواح التودك من مصابك
هالليله أملاك السمه كلهه اعله بابك
يا حال تبقه بيا حال
يا ثامن جــروح الآل
على حسين ومُصابه
على حسين ومُصابه
.................................................................................
غريب بطوس وتواسي غريب الطف
بيا حاله المنيه اعليك تتوصف
حكمة الله هاي وبيهه الله أعرف
بس أرواحنه بهالألم تتحسف
حيف اعله حالك يالرضا
سم الغدر تتمضمضه
چبدك تگطع يا غريب الله أكبر
ويلي اعله هضمك يا إبن موسى بن جعفر
يا محنه بعدك تنزال
يا ثامن جــروح الآل
على حسين ومُصابه
على حسين ومُصابه
.................................................................................
تنعاك السمه والگاع مهضومه
موتك هالمسه حان ووصل يومه
الله يساعدك يا أخو المعصومه
بينه جروح هاي الليله ملچومه
وبمشهد الليله العزاء
خطاره أملاك السماء
بصحنك تقيمه واللطم هاي المسيه
يذكر غربتك وي غريب الغاضريه
حزنين ما ظن تنشال
يا ثامن جــروح الآل
على حسين ومُصابه
على حسين ومُصابه
.................................................................................
خادم غريب طوس عليه السلام
عمار هليل الواسطي
ذكرى شهادة نبي الرحمة والمغفرة أبي القاسم محمد صلى الله عليه وآله وسلم
قصيدة ( غربة علي )
ودعتك وضاگ الفضا بعيني
وبدفنتك چن دافـن اسنيني
جمر الحزن يالهادي يچويني
............................................................................................
حسبة امصابك صدگ حسبه طويله
الليله دين الله إنهـــدم يالهادي حيله
يا حبيب الله المواجع مو قليله
والله ليله الباعدتنه شلون ليله
فرض الحزن من خلصت أيامك
بالمهجه يبدي وكلنه أيتامك
حال الأجل ما بينك وبيني
............................................................................................
هيه مو بس فاطمه اليتّـمـهـه بُعدك
چم يتيم الليله يابو الزهره عندك
تدري أولادي يماي العين ولدك
تثگل الحسره على السبطين بعدك
أظلم نهاري وبالگلب حسره
كلما أشوفن بنتك الزهره
يجري دمعهه وهذا ياذيني
............................................................................................
هيه غربه وابتدت وبروحي غربه
ليله اوداعك وحگ العِشره صعبه
تگظي حسبه وتبتدي بالروح حسبه
مثل المضيع دليله وليل دربه
هيه الهضيمه من أظل وحدي
والگالوا أصحابك صفو ضدي
لا مو غريبه الكل يعاديني
............................................................................................
وحشه يا مولاي هالليله المدينه
واليحبك ينسمع لجلك ونينه
آه واويلاه عالبضعه الحزينه
هذا أمر الله وبعد شيصح بدينه
يختم كتابك هسه صفحاته
ليل الفگد تذبح معاناته
ويجيبني النوح ويودّيني
............................................................................................
شراح يحصل يا نبي الرحمه بغيابك
بينت الأطماع من ليلة مصابك
يا چفوف التدفع اعله الزهره بابك
عالخلافه الوضحتهه بنص كتابك
(( يهجر )) عليك شلون گالوهه
يا حرمه بعدك بالله حفظوهه
چف الزمن رايد يلاويني
............................................................................................
آني حيدر والحزن نيرانه بيه
غربة عايش بعدك وكلهم عليه
ضاگت بعيني السمه وهاي الوطيه
وبلغتني بكل تفاصيل الوصيه
هاي الوصيه ألتزم بيهه
والطاهره بعيوني اخليهه
رغم المآسي الراح تلفيني
............................................................................................
خادم الحسين عليه السلام
عمار هليل الواسطي
ميمر للإمام السجاد عليه السلام
الرابع ضوه دموع العين هذا المسه سچابه
…………………………………………………………………….............................................
عن بُعد مرســـال الدمــع ودّيته
لزين العباد وفخر أهله وبيته
عندي يقين وطبـعي من تربيته
يوصل ونيني لمثواه والجفن فاتح بابه
…………………………………………………………………….............................................
وحشه البقيع الليله يالنورك نور
من الله يا رابع البيت المعمور
يا سوء عاقبته الخليفة المدحور
نال الخزي من عاداك باچر عسير احسابه
…………………………………………………………………….............................................
عاداك وانته العشــت هم الغربه
معناهه عاده النبي وأغضب ربه
عشت بمراحل قاهره شكد صعبه
طف كربله وسبي الشام لا ما يطيب اصوابه
…………………………………………………………………….............................................
گد ماچنت مهموم ماغمضت عين
ليليه تجري دموعك الطف حسين
غادر زمنكم آه من يگصي البين
راس السقيفه الملعون غدرتك حيف أذنابه
…………………………………………………………………….............................................
مولاي ودموع الحزن أجريهه
أستذكر امصابك ودم أغديهه
واويلي عالمسموم من أنعيهه
طول الزمن عهدي إوياك لا ما يسد اكتابه
…………………………………………………………………….............................................
إسوه إلك والروح كل لحظه تنوح
بكل گلب منكم گظه مليان جروح
مسموم چان إنچان مدمي ومذبوح
شاء الآله وسبحان ربنا وعظيم أسبابه
…………………………………………………………………….............................................
أنعاك يا مولاي عهدي بكل يوم
يبن الشهيد الظامي وهمومي هموم
ما أنسه عهدك وحق ربنا القيوم
گبرك الظل بس اتراب كل ودّي أشم إترابه
…………………………………………………………………….............................................
خادم الحسين عليه السلام
عمار هليل الواسطي
قصيدة (( سؤال))
سؤالٌ أذهلَ التاريخَ معناه
وأبكى كلَّ عينٍ تَعرِفُ الله
بدمعٍ من دمٍ يُكتبْ
أَتُسبى هكذا زينبْ ؟؟
................................................................................
هضيمه وصعبه كلش هالروايه
تخـيّــل بــت علــي وبـلا حمايه
تگول بحــســره يا طف المنايه
وصلـنـه إعــزاز ونـغـادر سبـايه
جراحاتُ الأسى قُومي وقولي
أَسِتْرُ اللهِ أم بنتُ البتولِ ؟؟
وذا خطبٌ هو الأعجبْ
أَتُسبى هكذا زينبْ ؟؟
................................................................................
حيره ليا مصيبه تباوع العين
بيمن تبدي همهه وتنتهي وين
من رأس الگمر لو رأس الحسين
علن فوگ العوالي شلون شمسين
أعانَ اللهُ قلباً ظلَّ دامي
صبوراً حامداً للهِ ظامي
لقى حزناً هو الأصعب
أَتُسبى هكذا زينبْ ؟؟
................................................................................
رزيه تنـتهي وتبــدي رزيّه
يسَمْعُوها غصب چلمة سبيه
الأشد واصعب عليهه بكل مسيه
إذا عن الأبو نشدت رقيه
هُنا في وحشةِ الليلِ الكئيبِ
سؤالٌ مؤلمٌ أين حبيبي ؟؟
لعمري للأسى مَطلب
أَتُسبى هكذا زينبْ ؟؟
................................................................................
على روس الرماح أقمار لاحت
عليهه أم عون من كل گلب ناحت
عليهه يامه نادت يامه صاحت
عليهه تنوح تعرف زين راحت
وللذِكرى حديثٌ لا يطولُ
فمن أحداقها الدمعُ هطولُ
فيا تاريخنا الأغرب
أَتُسبى هكذا زينبْ ؟؟
................................................................................
المراجل عالحرم لا مو مراجل
چانوا وين من چان أبو فاضل
سكتوا من صرخ هل من مُنازل
حيف ووسف مصروعه البواسل
فحقدٌ للنسا أمسى يُماري
وضوحَ الشمسِ في عِز النهارِ
وشمسُ الحق ِ لن تُحجبْ
أَتُسبى هكذا زينبْ ؟؟
................................................................................
ليالي شگد حزينه ومالهن حد
بخــرابــة گـعّـدوا عترة محمد
بعد يا حيل من هالحال ينْشد
يا تاريخ وجهك صار أسود
فلا التبريرُ يُجدي اليومَ نفعا
وبنتُ الآلِ نحو الشامِ تسعى
عيالُ المصطفى تُضرب !!!
أَتُسبى هكذا زينبْ ؟؟
................................................................................
شبعد عند الليالي هموم وأحزان
گلب زينب خلص والصبر عنوان
عفاه شگد حمل من جور سفيان
ما چنّه گلب بل هذا قرآن
فمن ذا مزّق القرآن في الطفْ ؟
فمهما زيّفوا الأمرَ سَيُكشفْ
فؤادٌ بالأسى أشعبْ
أَتُسبى هكذا زينبْ ؟؟
................................................................................
خادم الحسين عليه السلام
عمار هليل الواسطي
قصيدة (( مصيبة ومصيبة))
اللّه اليـســاعِـد زَيـنـب الغَـريبه
والطفْ مُصيبه والسَّبي مُصيبه
.................................................................................................................................
زينب اجتي الكربلـه أميره
كافلــهــا بــدر الكــون والعشيره
من عدها طلعت ياوسف أسيره
عند الله هـــــذي مؤلمه وچبيره
جدها النبي وتطلع سبي عجيبه
والطفْ مُصيبه والسَّبي مُصيبه
.................................................................................................................................
عالغبره عافــتْ زينب البـواســل
عالهِزلْ صعدت ماكو كل مَحامل
دمـعـتـهــه كـتبــت آه يابو فاضل
وينـك تـشــاهــد حـالِـتــي يكافل
واليمشي للموت اشبعد يجيبه
والطفْ مُصيبه والسَّبي مُصيبه
.................................................................................................................................
الـلــه اليـعـيــن أُم الخِــدِر سـبـيّـه
كل لحظه حسره وفاجعه ومـنـيّـه
عـــدوان لا غِــيــــــره ولا حـمـيّــه
يعرفــوهـــه بنــت الطاهره الزچيه
يشتمــون أمهه الراضيه النجيبه
والطفْ مُصيبه والسَّبي مُصيبه
.................................................................................................................................
تـتـكـفّـل ابـضـعــن الأهـــل تِبـاصر
أطــفــال ويّــاهـــه وحـــرم تِكــابـر
بــيــن الشِـمــاتــه والسَبـــي مخاطر
تـجــرح گلـبــهـه وتكـســر الخــواطر
عافت گُــمــرهـه وعالنهر مَغيبه
والطفْ مُصيبه والسَّبي مُصيبه
.................................................................................................................................
فوگ الرِمــاح اشـچــم جَرح ضِـهـدهه
روس النـِشــامــه امخـضّـبَــه بَـعَــدهه
شـمــا تـنــظــر اتـچـوّي المدامع خدهه
بــس الله چــان بــــهـالــدرب سَـنَــدهه
عاشت ليـالي مؤلـمــه وعصيبه
والطفْ مُصيبه والسَّبي مُصيبه
.................................................................................................................................
كل خـطــوه حـســره والـدرب مـواجـع
زيـنـــب عــلــى راس الگــمـــر تــبــاوع
ما تحــچـــي كــلمــه تســولــف المدامع
چَـنّــــه يگـلــهــه إويـــاچ أنـْـطـُــر طالع
أبـقـه كــفــيلچ يختي يالحبيبه
والطفْ مُصيبه والسَّبي مُصيبه
.................................................................................................................................
خادم أهل البيت عليهم السلام
عمار هليل الواسطي
الكوت
٢٠٢١
قصيدة (( آن الأوان))
آن الأوان وبالدمــع رحلتنه تبدي
أول سؤال الينطرح وينك يمهدي
.........................................................................................................................
شهر المـحــرم والگلب يالمـهـدي مشتاگ
الله اليعينك عالحزن وسنـــيــن الفراگ
بشهر الحسين المنذبح بيك الفضا ضاگ
كل ليله مقترنه بجرح وجروحك اغماگ
وبإنتظارك سيدي دمعي اعله خدّي
أول سؤال الينـطـرح وينك يمهدي
.........................................................................................................................
طوّل غيابك سيدي وبـيـك الله يعلم
يا هَمْ على گلــبك يـمــر لو هل مُحرّم
كل مجلس تحضره بألم يالدمعتك دم
وبشوفتك ظل المحب كل عمره يحلم
بس نظره منك أنتظر لجروحي تهدي
أول ســؤال اليـنــطــرح وينك يمهدي
.........................................................................................................................
وينك يمن تدري الگلب عايش مواجع
أصبح مــثــل حال الشمع نار ومدامع
عندي عقيده بطلعتك بيك أدري راجع
بس إشوكت حتى الصبر من صبري جازع
اسأل وأشاهد دمعتي تكتبلي رَدّي
أول سؤال الينطرح وينك يمهدي
.........................................................................................................................
هاي الليالي الوحّدك لـو هَـمْ تسـافـر
وتوزّع دمــوعــك على كــل المـنــابر
غايب ولكن بالگلب يالمهدي حاضـــر
وتبارك الناس الصدگ تحيي الشعائر
أدعي آلهي الطلعتك يالغالي عندي
أول سؤال الينطــرح وينك يمهدي
.........................................................................................................................
يبن الأطايب چم جرح بالطف تذكْره
من المخيم للنهر حســره اعله حسره
من كربله الدرب السبي دمعك تسَطره
كل هذا وإنته بمفردك عايشهــــه ذِكره
رايد أعـِيْـنَك عالحزن كل هذا وِدّي
أول سؤال الينـطـرح وينك يمهدي
.........................................................................................................................
رحله مآسي وفاجعه وكل اليلطمون
گالوا سؤال المستهل ويــنـك يسألون
يالمهدي ما ظل كل صبر ياماي العيون
تدريهه حسره بكل گلب بغيابك شلون
ناذر حياتي الطلعتك وبروحي أفدي
أول سؤال الينطرح وينك يمهدي
.........................................................................................................................
يا خاتم الآل اشوكت يا نسـل الاطهار
عن كل مصايــب كربلـــه يترجّـع الثار
هالدنيه دار بغيبتك تظل وحشه هالدار
وينك يســبّــاح الگلـــب تفديك الأعمار
يجيب الزمان بحسْرِتي ويرجع يودّي
أول سؤال الينطرح وينك يمهدي
.........................................................................................................................
خادم الحسين عليه السلام
عمار هليل الواسطي
الكوت
٢٠٢١
قريباً جداً
قصائد الليالي الباقية من محرم الحرام وقصائد المشاية..
هنا على قناة التلغرام
أخوكم
#عمار_هليل_الواسطي
أهدي ثواب هذه القصائد إلى أرواح شهداء العراق لا سيما شهداء الحشد الشعبي وشهداء الحوزة العلمية في النجف الأشرف
وإلى روح والدي ، وإلى روح شقيقي علي، وإلى روح العم العزيز كريمش رحمه الله تعالى عليهم.
مع رجاء قراءة سورة الفاتحة المباركة إلى أرواحهم الطاهرة.
أخوكم
#عمار_هليل_الواسطي
قصيدة (( كفو منك))
مولاي علي الأكبر (ع).. (( نزلة))
كفو منك يا علي الأكبر
كفو منك يا علي الأكبر
.......................................................................................................
هذا الأكبر لمن برز للحق يعتلي
علي إسمي هيچ ارتجز وانه جدي علي
آل أميه من صولته هاليوم تبتلي
سيفه بيده موت الأحمر واعداه تصطلي
فده روحه والله ما قصر
كفو منك يا علي الأكبر
.......................................................................................................
شافه عمه ويشگف إله گبت حومته
گله عمي ها يالگمر شاهد رايته
گله عفيه يبن الأخو الماعوف خوته
ماتقصر يوم الحرب ترهب رهبته
وبسيفك كلهه تتوذر
كفو منك يا علي الأكبر
.......................................................................................................
بده دوره وعباس إجاه گام يشيّمه
على خصمه وهدوا سوه ليث وضيغمه
الله يستر شنهو الجره چنهه الحاطمه
خله أميه تلزم سره عالموت صارمه
هذا الأكبر هذا لو حيدر
كفو منك يا علي الأكبر
.......................................................................................................
كلهه فرت محد بقه خلاهم بدد
محلى صوته كلما هتف ياحيدر مدد
يلي شافه شمرة علي الخيبر من گصد
ما يبالي بسبعين ألف أغلبهم شرد
عله زوده هلل وكبّر
كفو منك يا علي الأكبر
.......................................................................................................
ظل يسمّي وتكبيرته مثل الزلزله
لولا ربك جان وعلي يمحي كربله
منو يگدر يوصل اله محد يوصله
زوده عالي والوحدّه جيش بأكمله
منهو يگرب كلهه ما تگدر
كفو منك يا علي الأكبر
.......................................................................................................
بالحومه من ينتبه من جيش العده
چم فارس كلهه اسألت وياه گاصده
كلهه داخت ما ميّزت طالع وحدّه
هذا حمزة مدري علي بوجهه ومشهده
واليشوفه حقه يتحير
كفو منك يا علي الأكبر
.......................................................................................................
خادم الإمام الحسين عليه السلام
عمار هليل الواسطي
قصيدة (( وفّه بالوعد))
مولاي القاسم (ع).. (( نزلة))
وفه بالوعد يرمله وفه بالوعد
والعرس عرس الشهاده وفه بالوعد
......................................................................................................
طب وصاحته الحومه هلا باليرفع الراس
حقهه ضجت الدنيه متسمع بس الأنفاس
تخيل جيش بي واگف علي وجاسم وعباس
زين وما حشر يحصل دخيل الله يمتراس
والباري شهد يرمله والباري شهد
والعرس عرس الشهاده وفه بالوعد
......................................................................................................
عود الحسن من أنوه غضب عالجيش نازل
گلهم يابني المدري شنو آني المقاتل
زلزل لكن شزلزل زلازل من زلازل
رد باوع على الرايه وتبسم له أبو فاضل
خيال وأشد يرمله خيال وأشد
والعرس عرس الشهاده وفه بالوعد
......................................................................................................
گلهم هذي توصيته أبوي وخل يقر عين
وين الكم مفر مني يشباه الزلم وين
موت أحمر أراويكم أعذبكم والحسين
هذا هنا تكليفي أوفي بعمي للدين
فارس من گصد يرمله فارس من گصد
والعرس عرس الشهاده وفه بالوعد
......................................................................................................
أراويكم بطش سيفي تطخ گدامي الرگاب
ولو زايد تره سيفي يكفي اوياكم گراب
بيادركم أذريهه دشوفو صولة الشاب
حظكم جابكم يمي حفيد الوالي أبو تراب
عالغيره إعتمد يرمله عالغيره اعتمد
والعرس عرس الشهاده وفه بالوعد
......................................................................................................
فارس واعشگ الحومه أرتل عزمي ترتيل
سيفي تصير ضرباته عليكم حجر سجيل
عدكم بس مفر واحد مجرد كلمة ادخيل
أعوفه اليمي يحچيهه ليتعب بالتواسيل
ثابت كالوتد يرمله ثابت كالوتد
والعرس عرس الشهاده وفه بالوعد
......................................................................................................
أعدل بيدي الميله وأوازن حومة الموت
ألمنكم أجل واحد أسوي الحومه تابوت
ما أسمع نفس منكم الي والسيفي الصوت
كلمح البرق طبراته رعيد بنص سمه يفوت
هذا إبنج بعد يرمله هذا إبنج بعد
والعرس عرس الشهاده وفه بالوعد
......................................................................................................
خادم الإمام الحسين عليه السلام
عمار هليل الواسطي
منهاج الليالي الفاطمية الحزينة
قصيدة (( عهد الفاطميين ))
هاي الليالي الفاطميه
للطاهره ننصب عزيه
نكتب عهد من فيض الأحزان
ونواسي بي حامي الحميه
بنت النبي وأم النبي شلون
لهل الغدر صارت ضحيه
.................................................................................
هاي المجالس كل عام
نحييهه واحنه الخِدّام
ما تنگطع ..يبقه الدمع .. من ننفجع..ليل انهار
لأم الحسن دمع العين
للمحسن وللضلعين
وبكل غدر .. من تنسطر .. أهل المكر ..شعلوا نار
شعلوهه من جابوا حطب
يم باب فاطم والسبب
مكر العده ودهر العجب ..كلشي انكتب .. بالأعبار
حيف وهضيمه روّعوهه
وبكل حقدهم عذبوهه
أمر الوصيه خله أبو حسين
يسكت على من حاربوهه
وإحنه بدمعنه نعيد المصاب
حد موعد الطلعه البهيه
.................................................................................
نلبس سواد الآلام
كل احنه هالليله ايتام
مدمع دمه .. والفاطمه .. بينه ظمه ..وحسره ونوح
هاي الشعائر للموت
نحييهه ويظل الصوت
لأم الحسن..مد الزمن ..صوت الشجن ..نزف اجروح
ما تخلص أحزان العمر
عالزهره والمدمع جمر
مظلومه چا وين القبر ..ما ينذكر ..وين انروح
ظلينه للتالي حياره
وبكل گلب شوگ الزياره
وين القبر بس الله يدري
نوح المحب واضح مساره
شوگ وحنين الأم الحسين
نوح وعزاء بكل مسيه
.................................................................................
تجمع شملنه البضعه
شمل العزاء اتجمعه
ما ينگطع ..فيض الدمع ..سطره وضلع .. گطعة بين
غيره وحميه الأحباب
وسط الگلب دفعت باب
لطم الصدر ..خل ينكسر .. من تنذكر ..أم حسين
شتجازي أمنه فاطمه
هاي الصفوف اللاطمه
واللهِ لو مدمع دمه ..حد العمه ..وامقصرين
للمنتظر نرفع ندانه
يحضر يشاركنه عزانه
ندعيله يظهر والگلب نار
بيده الشريفه يرف لوانه
ويرجّع الثار بحسامه
ثأر البتول وكل رزيه
.................................................................................
وبكل زمن وبكل گاع
منزف دمه جروح اوساع
مجلس لطم ..نوح وهضم .. هذا العزم .. من اسنين
نحييهه وازغار إكبار
نحضر بفيض الأعبار
واجب يظل ..يبقه الأمل .. من الأزل ..وبكل حين
مرفوعه رايات الحزن
ليل المصيبه من يجن
كل گلب للزهره يحن ..يبقه يون .. يالطيبين
هذا العهد يالجعفريه
يعني الوفه الربنا ونبيه
ولعترة الهادي محمد
يخواني دنيه وآخريه
هذا أقل واجب نقدمه
لأم الحسن أبسط هديه
.................................................................................
خادم الإمام الحسين عليه السلام
عمار هليل الواسطي
منهاج الليالي الفاطمية الحزينة
قصيدة ((ثأر الزچيه )) نزلة
أبو صالح مـيعـوف ثأر الزچيه
..................................................................................................................................
من يحين بـمـوعــده أمر الظـهــور
ملحمه والســـيــف صيّـــاد النحور
لا مفر من أمره سبحانــــــه الصبور
يدخل المهدي اعله گلب أمه السرور
طـلْـعِة المهدي تصير طلعه بهيّه
أبو صالح مــيـعـــوف ثأر الزچيه
..................................................................................................................................
هواي ثارات وحســابــات السنيـن
ويلْـهُـم أعـــداء أمــيــر المؤمنيــن
ثأر ضلـعـيـــن وسَطـُـر خَـدْ وجنين
صَوْلَــه بس بــأمـــر رب العالمــيــن
والشرط هيّه تكون كالحيدريه
أبو صالح مـيعـوف ثأر الزچيه
..................................................................................................................................
من يسود العــدل والظالــم يزول
يظهر المهدي ويحــط كل الحلول
والفجع گلب الولي وگلب الرسول
يدوس رأسه وروس أتباعه الذيول
وتنبني بســــم الله دوله قويه
أبو صالح مـيعـوف ثأر الزچيه
..................................................................................................................................
واهم اليعـتـقـد حــق الزهـره ضاع
هيه حسبت وكت يظـهـــر عالبقاع
والسفيـنـــة تنـتـظــر رفــع الشراع
وخبر عاجل نستــمــع بالدنيا شاع
ظهر نور المحجوب عالدنيه ضيّه
أبو صالــــح مـيعـوف ثــأر الزچيه
..................................................................................................................................
وارده هـــاي الحـقـيـقــــه لا محــال
يظهــر المــهـــدي برفــع رايــــة الآل
بيده سيف المرتضى ويبدي السجال
ضد جمــيـــع الي غُضب رب الجلال
غيرة الله ويعيد حق الرضيّه
أبو صالح مـيعـوف ثأر الزچيه
..................................................................................................................................
سيف گدامه ولا تصـمــد سـيــــوف
ما يهاب الموزمــــه ولا عنـده خوف
يجمع أنصاره ويوحّدهــــه الصفوف
بگلبه ثأر الطاهـــره وثـــــأر الطفوف
للنواصب هيــهــات تبقى بقيّه
أبو صالح مـيعـوف ثأر الزچيه
..................................................................................................................................
أبد ما يبقون لو ضي وجهه لاح
ثق يذرهم كالرمــــاد بنص رياح
ربنا ينصر طلعته لو صوته صاح
وطلب ثأر البضعه وبهالمنوى راح
شيعه ونروح إنزور قبر النقيّه
أبو صالح مـيعـوف ثأر الزچيه
..................................................................................................................................
خادم السيدة الزهراء عليها السلام
عمار هليل الواسطي
جمادي الأولى /١٤٤٣ هجري
منهاج الليالي الفاطمية الحزينة
قصيدة (( هذا معروف الأمر ))
هـذا مـعـروف الأمـر أرض وسمه
يغضب الله انچان تغضب فاطمه
.............................................................................................................................
ما أغالي وهذا واقع مو خيال
فاطمه روح النبي وزهرة الآل
ربنا أكرمهه تبــارك ذو الجلال
بت نبي وزوجة وصيّــه المكرمه
يغضب الله انچان تغضب فاطمه
.............................................................................................................................
باب رحمه وما ترد طالب طلب
يمهه أشباه الزلم جمعــو حطب
وأضرموا نار الحقد أدري السبب
والسبب حــقــد السقيفه الظالمه
يغضب الله انچان تغضب فاطمه
.............................................................................................................................
اتجمّعوا وين الترس گلبه الحقد
تآمروا ضد حيــــدر وهذا القصد
تبّت إيــده الّـي سطر خــد الورد
وأضرم الـنـار ابْـفـعـلتـه المُجــرمه
يغضب الله انچان تغضب فاطمه
.............................................................................................................................
بالوصيّه التزم حيـــــدر ما ضَعَـف
حاشه أبو الحسنين گلبه ما رجف
لا فتـــى إلا علــي هـيــچ إنوصف
غير لو مرخــوص تبدي الحاطمه
يغضب الله انچان تغضب فاطمه
.............................................................................................................................
طاح مـُـحـسِـنـهــه الزچيه بهالمصاب
طاح بس ما طاح من عدهه الحجاب
وين يرحـــون العِــــده بيوم الحساب
الله يلــعــن مِـنْ سِـعَـه بهالمَظلَمه
يغضب الله انچان تغضب فاطمه
.............................................................................................................................
هيچي جازوهه بحقد كلش دفين
كسر ضلعين وسگط منهه الجنين
عيونهم شافتهه ، مسمـــوع الونين
عيونهم يا ريت مصيوبــه ابْـعَمَه
يغضب الله انچان تغضب فاطمه
.............................................................................................................................
شما تمر ذكـرى البـتـول بكل حزن
ليل الأحــزان بـســواد الهَــمْ يجن
الما حفظ حُرمتهه والردّد (( وإن ))
يســكــن ويخـــلــد بنص إجْهنّمه
يغضب الله انچان تغضب فاطمه
.............................................................................................................................
خادم السيدة الزهراء عليها السلام
عمار هليل الواسطي
جمادي الأولى /١٤٤٣ هجري
ذكرى شهادة نبي الرحمة والمغفرة أبي القاسم محمد صلى الله عليه وآله وسلم
قصيدة (( بعدك يتيمة ))
ميمر
بعدك يتيمه بيا حال ..
تدري إشجره اعله الزهره
******************
من غمضت عيونك يسيد الأكوان
واتيتم الدين ونعاك القرآن
ياوحشة الزهره وگلبهه الوجعان
فارغ مكانك تلگاه ..تسچب عليك العبره
*****************
فارغ مكانك والمن تصد العين
لو شافت بفگدك دموع الحسنين
لي وين يمسافر رحيلك لي وين
كل لحظه يالغالي بعام ..والدمعه صارت جمره
*****************
جمر الدمع ما ينطفي وجرح الروح
هيهات يشفه والحمل ظل مطروح
گلب الولي الكرار بعدك مجروح
يصبر الزهره اعله الآه ..
بس گلبه بيش يصبره
*****************
بعدك يغالينه شحصل بالأطياب
ما حفظوا الحرمه التسمّوا أصحاب
دفعوا على الزهره يهادينه الباب
والضلع صابه البسمار ..
وطاح الجنين بعصره
******************
من أضرموا يم دارهه النار شلون
ما فكروا هذي بنت سيد الكون
شيمتهم الأحقاد من يغدرون
رادوا خلافه وخانوك..
واتربصوا للعتره
******************
والله لو أم الحسن تشكي اليوم
وترفع إديهه للآله القيوم
جان الأرض خسفت بأشرار الگوم
يالماردت نقمه تصير ..
يا رحمة الله الكبرى
******************
بأمر الوصيه ملتزم حامي الجار
لولاهه چان الحكم حكم الفقار
بدعوة الزهره هالكواكب تندار
آذوهه بعدك يا حيف ..
خانتك هاي الزمره
******************
خادم الحسين عليه السلام
عمار هليل الواسطي
قصيدة رسائل من المهدي
رِسايل جَمرةْ امصابك
تِخطْهَه وتِنْـعه أحبابك
بدمع مِدرار... يراعي الثار
.............................................................................................................................
يمهدي ودمعتي كتبت غيابك طال
أظل ليا وكت أحچي بلسان الحال
ليالي حزنك وهــمّـــك ليالي إثگال
وحيد ابْغُربــتــك تجري دمع همّال
أبد مــا تنـشــف الدمعه
تره امن الجمعه للجمعه
أتاني أخبار ... يراعي الثار
.............................................................................................................................
بمصيبةْ جــدّك الظامــي رسايل نوح
تواسي شيعتــك بيهه بگلب مجروح
تحز بنفسي أمنيتي وتصير اجروح
أشوفك تلطم اويايــه على المذبوح
خدم جدك تره اضيوفك
تشاهدهـــه ولا اتشـوفك
شكثر تحتار ... يراعي الثار
.............................................................................................................................
سؤال بكل وكت حايــر جوابـه إمنين
ابمحرم وبصفر أســأل أشوفــك وين
أگول بكربـلـــــه تحضر تزور حسين
تزور الشام والزيــنــب دمــــوع العين
بقيع اتزوره من تحضر
لعلي السجـــاد والشـبّـر
يضيْ كل دار ... يراعي الثار
.............................................................................................................................
رسايل دمعة أحزانـــك حـبـرهه ادموم
نزف جرحك فجر صبحك يطر يا يوم
نشيـــدك صــــار واويلي على المظلوم
صـــرت كلّك جــرح عمرك ألم واهـموم
وأنا عمري عمر شمعه
أسير النـــــار والدمعه
حرت شختار ... يراعي الثار
.............................................................................................................................
يسـبّــاح الگلــب يبقــه الأمـــل عنــدي
نداء امـــن السمــــه أسمع إجـه المهدي
فــــــداءك سيـــدي القائـــم أنــا وولدي
أعز من روحــــي لو عـــنـــدي إلك أهدي
حياتي وموتتي بزودك
متى توفـيـهـــن اعهودك
فده الأعمار ... يراعي الثار
.............................................................................................................................
وحياتك سيـّـدي المهدي الگـلــب لهفان
نبض حسره وألف جـــمــره وأثر أحزان
إذا يــشــتــاگ ما يـمـلـك إلــك عــنــوان
أصير امــن الألــم والــهَــمْ بـقــايا إنسان
كثر ما تنزف جــروحي
ألوذ بروحي من روحي
أشبْ ابنار ... يراعي الثار
.............................................................................................................................
دُعائي الخـالـقـي اليعلم حــزن بلـواي
يعجّل في ظــهــورك يــا أمـــل دنياي
إمامي الغائب الحاضـــــر أنا رجـــواي
بدعائك أنشمل وافــخــر ترانـــي بهاي
أشارك حزنك وهمّـك
يمن دمعك مثل دمك
على الأطهار ... يراعي الثار
.............................................................................................................................
خادم الحسين عليه السلام
عمار هليل الواسطي
الكوت
قصيدة غربة وطن
عاشت بغربة وطن
كابرت رغم المحن
كافله لكل الضعن ... بالسبي زينب
.........................................................................................
حيره شتكتب الأقلام
والتاريخ يتعجب
عبرت مستوى الإعجاز
وما أدراكَ ما زينب
عگب الجره بعاشور تتكفل أيتام
إلمن تدير العين والمنوه للشام
مانصف بيهه الدهر
شافت هموم وقهر
من كثر همهه انفطر ..يا گلب زينب
.........................................................................................
ليالي تسابگن بالهم
والحسرات يلتمّن
عليل وحرم والأيتام
حارت تتجه إلمن
هاي الثكالى تنوح ويا الأرامل
تركب هزل يا حيف عگب المحامل
خيمه صارت عالعبي
بالعفاف الزينبي
طاهره وجدهه النبي .. والفخر زينب
.........................................................................................
دمعات الغريبه جروح
وشچم نايبه عدهه
كل ساعه ورقيه تنوح
منهه تريد والدهه
تصبّر گلبهه شلون وحشه الليالي
راس العميد يلوح فوگ العوالي
رأسه مرفوع برمح
يا مصيبه ويا جرح
كل مسيه ينذبح .. لو نظر زينب
.........................................................................................
بخرابه مالهه كل باب
بنت الزهره گعدوهه
چي تشتاگ كل لحظه
عن الروس بعدوهه
تتوسد التربان بنت الزچيه
شنهي أشد ياهالناس من هالرزيه
ساهرت ليل الغرب
والسبي كلش صعب
لازم تكمل الدرب ..قررت زينب
.........................................................................................
مصائب ما تمر عالبال
بس أم عون تحملهه
نطت كلمة شرف لحسين
هالثورة تكملهه
من عاشر الأحزان والختمه بالشام
ثورة شرف وأم عون مرفوعة الهام
هالمسيره تخلدت
للزمن هذا بقت
شامخه وما دنگت .. للعده زينب
.........................................................................................
خادم الحسين عليه السلام
عمار هليل الواسطي
قصيدة (( درب السبي))
أم الخــدر صـــار الحزن عنوانها
بدرب السبي ما تنوصف أحزانها
.....................................................................................................
أحزان زينب يا بشر وصفهه
دهر المصايب لا تظن نصفهه
من الصغر طبع الحزن عرفهه
صارت جرح نزف الألم نزفهه
حــزن الرزايا ســاكـــن بوجدانها
بدرب السبي ما تنوصف أحزانها
.....................................................................................................
عافت على الغبره الزلم صريعه
هاي الفجيعه من صدگ فجيعه
ضاگت علـيــهــا بعاشر الوسيعه
كافلها ظل مرمي على الشريعه
واتشمتت حيف ووسف عدوانها
بدرب السبي ما تنوصف أحزانها
.....................................................................................................
بالحسره ودعت كربله شتباصر
يا ذكرى عافـــت كربلــه بالعاشر
كلش صعب من تكسر الخواطر
ظنوهه تخضــع بس بقت تكابر
ثابـــت بقه رغـــم السبـي إيمانها
بدرب السبي ما تنوصف أحزانها
.....................................................................................................
مهضومه أم عون إنكسر گلبهه
كل خطوه حسره وشبعد دربهه
بيش الدهـــــر أم الخدر يطلبهه
فوگ السبـــــي تحمل ألم غُربهه
والحــمـــد لله دائــمــاً بلــســانها
بدرب السبي ما تنوصف أحزانها
.....................................................................................................
رفگت علي السجاد تمشي هيّه
تـــدري عـلـــيـــل وونّــته خفيه
يگلهـــه يـعـمّـــه نـحـمــل الرزيّه
عدنه قـضــيــه ونـنـصـر القضيه
وبــيــوم عاشـــــر قدّمت قربانها
بدرب السبي ما تنوصف أحزانها
.....................................................................................................
لا ما تــطــخ راس وتذل نفسهه
زينب شمس ما تنطفي شمسهه
الله بــجــلالـــه بالسبي حرسهه
لقنت كل طاغــــي بصبر درسهه
طود الفــخــر مــحـــد يهز بنيانها
بدرب السبي ما تنوصف أحزانها
.....................................................................................................
تاريخ كتبت زينب بصبرهه
أم الصبر إسمهه كل عمرهه
يتخلد بطول الأمد نصرهه
كلمن خدمهه يفتهم فخرهه
أركان دين المصطفى أركانها
بدرب السبي ما تنوصف أحزانها
.....................................................................................................
خادم أهل البيت عليهم السلام
عمار هليل الواسطي
الكوت
٢٠٢١
قصيدة (( إلى من يهمّه الحسين عليه السلام))
محرم الحرام ١٤٤٣ هج
قصيدة (( فضل الخدمة))
خدمتك لحسين شوف أفضالهه
والهديه إمن الزچية تنالهه
**********************************************
هاي خدمة وشرف للخادم تصير
وبالقيامه لا تظن بالك يحير
مأمن وهيه النجاة امن السعير
وراح أسولفلك فضل أعمالهه
**********************************************
تدري من تسيل بيهه دمعتك
تغسل ذنوب الشلتهه بنظرتك
حسين يتكفل وينظر حالتك
گبل وگفة حشرك وأهوالهه
**********************************************
ولحظة التلطم على صدرك تشوف
يزول كل وهواس من دگ الچفوف
يقوى ايمانك وما يدناك خوف
والدليل الخدمة شوف أجيالهه
**********************************************
حتى من توزع المي بالسبيل
تنظف الگلبك بأذن الله الجليل
هالشعائر لا تظن فد شي قليل
ربك اليكرم الناس بجالهه
**********************************************
حسين يرضه بخدمتك هاك الأمان
تفوز دنيه وآخره وحبه الضمان
حسين ما يرضالك الذل والهوان
حسين يعرف ناسه يكرم حالهه
**********************************************
باچر امن أم الحسن تاخذ جزاء
ومثل ما بالدنيه دفعت كل بلاء
عنك وبالأخرة تقيم العزاء
وحاشه تنسه إلي يسر دلالهه
*******************-*************************
همّه أهل الكرم صدگ ما تحير
بجاههم نتقرب الربنه المجير
ما تمسه بيوم نيران السعير
خادم حسين الهديه ينالهه
********************************************
خادم أهل البيت عليهم السلام
عمار هليل الواسطي
قصيدة (( الدفنة))
يعـمّــه لا تــنـشــدينـي عالغياب
رجعت الكربله وادفنت الأحباب
الگلب ذاب
عفتهم حدر التراب
................................................................................................
معذوره يا تاج الخدر بالضعن ما شفتيني
تسأليمن بدرب السبي وبيا كتر تلگيني
آني العليل بكربله وطف كربله ياذيني
أحچيلچ الصار وجره ومتأكد تعذريني
رجعت الكربله والجفن هامل
دفنت بگاعهه كل البواسل
بالمصاب
عفتهم حدر التراب
................................................................................................
جثة أبوي موذره وفوگاهه دم دمعي يهل
يا عمّه گلي والدي وسّد على صدري الطفل
واريتهم جرح بجرح ذاك الموادع مو سهل
فگد الأبو فگد الأخو يا عمتي ما ينحمل
حملت آنه المآسي حسره حسره
عبد الله توسد فوگ صدره
هالأسباب
عفتهم حدر التراب
................................................................................................
يا عمه والأكبر علي وبدفنه يثگل نوحي
گد ما تعب گلبي أحس گمت أدفن آنه بروحي
كل مصرع بگلبي جرح حسبيهه عمه جروحي
يا ريت مو بس دم أهل كون أبچي عيني وموحي
علي الأكبر دفنته وگلبي ردد
سلام الله على جدنا محمد
والجْواب
عفتهم حدر التراب
................................................................................................
بيدي احفرتهه حفرته والدمعه تلحگ دمعه
ما دافن القاسم أنا دافن شباب وشمعه
متخضب بعمر الورد الله يهاي الفجعه
عن بُعد واسيت الحسن عمي وبديت آنه أنعه
يعمي وقاسم إدفنته بديه
طفت شمعة شبابه الغاضريه
الضوه غاب
عفتهم حدر التراب
................................................................................................
يا عمه يا أم الصبر گلبچ الباري يعينه
شحچيلچ بدفن الگمر ذاهلني منظر عينه
متصوبه ومن جثْته متگطّعه چفينه
عباس والرايه هوت وفراگه أثر بينه
يعمه عالمصايب شدي حيلچ
انهدم حيلي بدفن عمي وكفيلچ
والعتاب
عفتهم حدر التراب
................................................................................................
گلبي العليل ومحنته زادت وروحي اوياهم
نمشي سوه بدرب السبي جرحين من فرگاهم
الروس ويانا مشت وارماحهن ملگاهم
لازم نكابر عالحزن من يوم ودعناهم
تره بعاشر محرم كثره الجراح
هسه روس أهلنا فوگ الارماح
هالأطياب
عفتهم حدر التراب
................................................................................................
خادم الإمام الحسين عليه السلام
عمار هليل الواسطي
قصيدة (( مجانين الحسين))
ليلة الوداع
مجانين الحسين خلهم يسمونه
نبضنه يا حسين لا ما يغيرونه
..........................................................................................................
هالعِشره عالفطره لا ما نفترگ
لو سبعه عالسبعه تهوي وتنطبگ
غالينه علمنه أسرار العشگ
شفناهه عشناهه بالمعنى الصدگ
عشگنه من سنين تتدرس افنونه
نبضنه يا حسين لا ما يغيرونه
..........................................................................................................
كل عاشگ ميفارگ بل قاسم قسم
بالكافل أبو فاضل والجود والعلم
وبزينب والمعصب وبخدر الحرم
ما نهوه بس هوه والباقي عدم
فرض هذا الغرام كلهم يعرفونه
نبضنه يا حسين لا ما يغيرونه
..........................................................................................................
حبينه والينه نفديه بالنفس
والدارس عد عابس يفهم هالدرس
امن الذرّه هالعِشره مو يوم وأمس
تخضعله تسجدله الجن ويا الإنس
تقرّب للآله طوعاً يزورونه
نبضنه يا حسين لا ما يغيرونه
..........................................................................................................
هالبذره عن فكره مو بس عاطفه
علمنه اخو زينب منهاج الوفه
يا عاشگ من لطمه شفناه إكتفه
والقامه عالهامه أصل المعرفه
الميبچي عالحسين چا شله بعيونه
نبضنه يا حسين لا ما يغيرونه
..........................................................................................................
كل واهم ما فاهم من منهجنه شي
للباري ما سبّح ببكار والعشي
ما حقق ما دقق لحسين المشي
معناهه يا روحي الروحچ غبّشي
عهد بالأربعين من ترجع ضعونه
نبضنه يا حسين لا ما يغيرونه
..........................................................................................................
كل خادم ظل عازم لحظه ما يرد
يتمنه لحسينه كلسع ينولد
يرد عمره وينذره والله مستعد
يا ربي اجعلني للظامي عبد
ملوك وشي أكيد كلهم يحسدونه
نبضنه يا حسين لا ما يغيرونه
..........................................................................................................
خادم الإمام الحسين عليه السلام
عمار هليل الواسطي
قصيدة (( هل هذا الأكبر))
مولاي علي الأكبر ((ع))
قد شاءت الأقدار
أن تُصرعَ الأقمار
هل يُقتل المختار
أم أنه الأكبر
.....................................................................................................
من عالم العليا صور حره بسمه الأمجاد
كل الكواكب حاضره وبكربله الميعاد
أقمار من هاشم بدت أولهه أبو السجاد
هالليله نتذكر قمر فاق بجماله وزاد
رب العلى يشهد
وكأنه أحمد
هل ما أرى فرقد؟
أم أنه الأكبر
.....................................................................................................
يوم الذي اشتد الوغى وتزاحم الميدان
خيل وعساكر واگفه وبكربله البرهان
فارس مثل وجه النبي من شافته الفرسان
ما صدگت هذا علي مدري نبي الرحمن
من يعلم العنوان
كي يخبر الفرسان
هذا نبي الرحمن
أم أنه الأكبر
.....................................................................................................
قاتَل مثل جده علي منهو النكر حيدر
وبكربله احتار البعض من حقه يتحير
هذا النبي هذا علي هذا القلع خيبر
معقوله هذا الي برز علي الأكبر
بيمينه البتار
وكأنه الكرار
هل يحمل الفقار
أم أنه الأكبر
.....................................................................................................
لولا غدر أهل الغدر فرسان مزدحمه
ما طاح الأمبر بالحرب ماوذروا جسمه
هنانه السؤال الينطرح لمن نزف دمه
يادين يقبل يا شرع نفجع نبي الرحمه
دمه جرى لله
كدمِ حبيب الله
هل كان وحي الله
أم أنه الأكبر
.....................................................................................................
بهاي المصيبه شينكتب دم الدمع من سال
يذكر علي الأكبر خلد وبمعجَم الأبطال
للدين قدم تضحيه صال بحسامه وجال
باچر إذا حان الحشر كلمة عدل تنگال
يا معشر الكفار
مَن أفجع المختار؟؟
قمر من الأقمار
أم أنه الأكبر
.....................................................................................................
خادم الإمام الحسين عليه السلام
عمار هليل الواسطي
قصيدة (( عرس الشهادة))
مولاي القاسم بن الحسن (ع)
عرس الشهاده بكربله بعاشر محرم
يالقاسم شموعك دمع تتحنه بالدم
........................................................................................................
كربلاء وموعد الحومه يناطر
الك يا شبل الحسن لو صار عاشر
من وصية والدك تقراهه باچر
توفي عمك ما تهاب امن المخاطر
عندك مهمه بكربله المظلوم يسلم
يالقاسم شموعك دمع تتحنه بالدم
........................................................................................................
من طلعت امن الخيم عمك تگله
ارخصني يا عم يلي ما ترضالي ذله
توادعت ويا أمك ومعذوره رمله
لو بچت دم والمصيبه ماهي سهله
امودع ييمه بالسلامه لنصرة العم
يالقاسم شموعك دمع تتحنه بالدم
........................................................................................................
فارس وللحومه طالع ما تهمك
كثرت العدوان لو تلگاهه يمك
اترخصت من الحسين وصاح عمك
هلا يا شبل الكريم ودمه دمك
ناوي الشهاده وبالشهاده دوم تحلم
يالقاسم شموعك دمع تتحنه بالدم
........................................................................................................
بعمرك وخل يفتخر كلمن بعمرك
للشباب إنته مثال وعالي قدرك
تفتدي هاي القضيه وهذا نصرك
شگد حلو عرس الشهاده للينظرك
عاقد عليهه همتك والباري أعلم
يالقاسم شموعك دمع تتحنه بالدم
........................................................................................................
ساعة الصارت عليك اعداك صوبين
منك اقتربت منيتك يا ضوه العين
سلّمت آخر سلام بگطعة البين
وبالدمع رد السلام اعليك الحسين
يالتكرم بنفسك منو المن عندك أكرم
يالقاسم شموعك دمع تتحنه بالدم
........................................................................................................
للشهاده دروس والدم الكتبهه
ألف هنياله البذل نفسه بدربهه
نعم أمك ذاب بالحسره گلبهه
بس وصية والدك هذا طلبهه
عطر الشهاده إمن النحر يالغالي ينشم
يالقاسم شموعك دمع تتحنه بالدم
........................................................................................................
خادم الإمام الحسين عليه السلام
عمار هليل الواسطي