7103
إحنه غير حسين ما عدنه وسيله والذنوب اهـــواي چـفّـتـها ثجيله
/channel/princesszeinablove
قناة الشاعر سلوم الگشاوي
/channel/muamalalselmaoe
قناة الشاعر مؤمل العراقي
ا
👇👇👇
/channel/ali_kahdim199
الشاعر علي كاظم المياحي
/channel/Jaffarattea
قناة الشاعر جعفر عطية البزوني
/channel/Mmustafa88m
رابط قناة الشاعر الحسيني مصطفى الياسري
قصيدة باب الحوائج
طور كربلائي
كرامه وباب للحاجات ربك شاء وانطاهه
والجابت مثل عباس حقهه إنچان تتباهه
.....................................................................................................................................
حيّ الله الوفه والطيب عدهه تشوف تفسيره
أم الأربــعــة الأطــيــاب غِــيـره وخلّفت غِيره
كل همهه يرد حســـيــن ظلــــت تنطر إبْحيره
نواظر شابحه أعله الباب.. تنشد حتى ريح الهاب
تنشد عن بدرهه الغاب
شريكة حزن أهل البيت هيچ الباري خلاهه
.....................................................................................................................................
جـــرّب لو ردت تــعــرف فكرك ما يظل حاير
باب الحاجة أم عـــبـــاس تنطـي إمراد للزاير
إقره الفاتحه وإطلب توافــــي وتجبر الخاطر
حلّفهه بغلات حسين ... بالصابه السهم بالعين
بالگطعوا إله چفين
لو عن بُعد بالعباس يمّك هيّه تلگاهه
.....................................................................................................................................
چانت أُمنيتهه تگول عندي من الولد عشره
كلهم إي وحق عبـــاس فدوه الظنوة الزهره
كتبت بالوفه تاريخ ضـــحّـــت كلشي للعتره
سألت بالدمع أم عون ... حاچيني الردتهم عون
وفّوا بالعهد وشلون
موقفهم بعاشر صار ويّه حسين مولاهه
.....................................................................................................................................
زينب جاوبــت گالــت كفـو منهم ورفعة راس
طاحوا گبل إخويه حسين زلم الغيره والنوماس
يعجز كل وصف بالكون ما يتوصف العباس
إخويه وكافلي وذخري ... فديته الكافل بعمري
راحوا وانكسر ظهري
أولادچ فخر للدوم روّت كربله إدماهه
.....................................................................................................................................
عاشت كل عمرهه تگول ما عاف القهر عمري
بس إلّي جره بعـــاشــــور أذّاني وكسر ظهري
أسوي گبور الطيبين وأنحــــب والدمع يجري
دم يجري مصب العين ... يم تشبيه گبر حسين
راح وبعد يحصل وين
رادت روحي بس يا حيف ما حصّلت منواهه
.....................................................................................................................................
واجب عالخلگ مفروض ويّا الطاهره يوفّون
يذكروهه بشهر عاشور لأم الأربعه يحضرون
وكل مرادهم مـنــهــه بأمــــر الخالق يطلبون
عنهم لا مَـتـتـأخر ... تجازي الخادم اليحضر
على الصعبه وعلي تگدر
ربك قاضيةْ حاجات للطيبين سمّاهه
.....................................................................................................................................
خادم أم البنين عليها السلام
عمار هليل الواسطي
قصيدة عشق خادم { شور }
ناذر حياتي يا حسين ابخدمتك
كل روحي دمعه وسالت اعله مصيبتك
خادم الك يا سيدي طول العمر
أدعي الله يرزقني القبول وحضرتك
عمري المضه والقادم بحبك وقف
بيتي الأعشقه سيدي احسينيتك
على حبك عاقد آمالي .. وبكل ترحالي .. أهتف يالغالي .. حسين
مالي غيرك يبن الزهره .. أتمنى النظره..خادم بالفطره .. حسين
بخدمتك طول العمر تلگاني
اعتقادي بدفترك عنواني
گلبي ينبض حبك وحبك أمان
حاشه في يوم الوعد تنساني
أصبحت مجنونك ..يا حبيبي حسين
...........................................................
عاشق الك يا سيدي أقسم قسم
بمصابك وطف كربله وستر الحرم
تبقه بخيالي كربلاء الفاجعة
موت وسبي ونار الگلب نار الخيم
راية ونهر طيحة گمر يا سيدي
دمع ولطم آه وشجن حسره وألم
كربلاء وعاشر الفجعه .. حسرات ودمعه .. لبيك وأسعى .. حسين
الك لبّى گلبي ولساني .. غيرك لا ثاني .. حبك عنواني .. حسين
جيت اواسي فاطمه والوالي
أغله من الروح حبك غالي
منبرك يا سيدي أعظم مكان
رايد أبقه بخدمتك للتالي
إي وحق عيونك .. يا حبيبي حسين
...........................................................
ما عندي غيرك انته مالك مهجتي
فدوه الك عمري وحياتي ودمعتي
لوما وجودك يا إمامي وملهمي
لا ديني يبقه ولا ترفرف رايتي
نصرك نصر دم اعله سيف الطاغيه
وبكل زمن إنته حسيني وهيبتي
هذا حبك مالك احساسي .. نبضي وانفاسي .. يا رفعة راسي .. حسين
حب شريف ودائم الفطره .. يا روح الزهره .. أقسم بالعتره .. حسين
يا حسين أمن الصغر حبيتك
بالمهد وبدمعتي واسيتك
أمي غذتني محبتك يا حسين
ساكن بنص الگلب ظميتك
سيدي ممنونك.. يا حبيبي حسين
...........................................................
يبدي محرم والحزن سادس فرض
سبع السماوات وبعد كل الأرض
تجري الدمع دم الدمع لمصيبتك
تلطم لأن حافر بقه بصدرك يرض
إنته الإمام الخالد وغيرك عدم
واليعترض ما همني مهما يعترض
عن عقيده باقي بالخدمه .. مو بس الكلمه .. بل أكبر نعمه .. حسين
نعمه والله خِدمتك رحمه .. من أجل الأمة .. يا محلى الخدمه .. حسين
مجلسك من الصغر ربّاني
خادم برتبة ملك خلاني
يا شفيعي بالحشر روحي فداك
أشكر الله خادمك سوّاني
للحشر مديونك .. يا حبيبي حسين
...........................................................
خادم الإمام الحسين عليه السلام
عمار هليل الواسطي
ذو الحجة / ١٤٤٤ هجري
ليلة ١٠ محرم الحرام
ليلة الوداع
قصيدة { الحسين والوداع}
ليل العاشر كله جروح .. ياهو اليبقه وياهو يروح
حاير بالطف ظل حسين
وين الليله وباچـــر وين
مذبوح ويعرف مذبوح
.........................................................................
وداع وخيمه خيمه حسين يوصلهه
بعد هالليله ما يلتم شمل الهه
صعبه ويدري عد رب العرش حلهه
آيات الحفظ بلسانه رتّلهه
گبل المدمع والأحزان..أهله يرتلون القرآن
باچر حسره ودمعة عين
وين الليله وباچـــر وين
مذبوح ويعرف مذبوح
...........................................................................
كل خطوه بجرح والگلب يتفطر
كل ساعه تمر يصفه الحزن يكثر
الله يعينه لمّن گابل الأكبر
يحضنه بكل حنان ومهجته تسعر
نار اوداع وتطفه شلون .. ما تطفيهه دموع عيون
تصعب لمن يگصي البين
وين الليله وباچر وين
مذبوح ويعرف مذبوح
..............................................................................
وداع وهالوداع شما صعب يحله
رغم گلبه حمل حزن الأرض كله
ترخّص دخل خيمه جاسم ورمله
هذا ابن الحسن بموادعه يگلّه
عد عينك يا عمي الروح .. تفديك ومتظل مجروح
امنين الفرحه بعرسه امنين
وين الليله وباچر وين
مذبوح ويعرف مذبوح
............................................................................
شنهو الصار محد يدري تفسيره
حسين وراح يم خيمة أبو الغيره
گمر عباس يعرف زين تأثيره
فداك الروح گله وما تظل حيره
ما دام الرايه بيمناي .. آني الساقي و الوفاي
فدوه عيوني والچفين
وين الليله وباچر وين
مذبوح ويعرف مذبوح
.............................................................................
آخر خيمه بالطف والفجر يقرب
عند أم الخدر وٱم الستر زينب
گلهه ودمعته بجفنه غدت تلهب
گلهه بكلشي گلهه ووين تتغرب
باچر فجعه وحرگ اخيام.. تبدأ رحلتكم للشام
بكل اعيالي تتكفلين
وين الليله وباچر وين
مذبوح ويعرف مذبوح
...............................................................................
خادم الإمام الحسين عليه السلام
عمار هليل الواسطي
محرم الحرام/ ٢٠٢٣
ليلة ٨ محرم الحرام
ليلة مولاي القاسم بن الحسن عليهما السلام
غبت يهلال عمري وفرحة إرباي
يجسام الوكت ما أنصــف اوياي
ينجمعن سوه عرس ومنيه
................................................................................................
عليْ تشهد اعيوني وإنته غالي
يلن سهرن عـليــك شگــد ليالي
ظلام سنيني وانته هلال عالي
وفــيــت بكربله تعـبــي ودلالي
وصاني الحسن من أول أيام
يرمله كربلــه منتظـره جسام
والعاشر ننفذ هالوصيه
ينجمعن سوه عرس ومنيه
................................................................................................
شبابك يبني كله يا ضـوه العين
فده العمك يمهجة عمك حسين
عاشر من محـــــرم جامع اثنين
عرسك والشـــهـــاده وبيّه نارين
نار الحنّــتـك تنداف بدماك
نار اموادعك وهموم فرگاك
شيجيبك بعد وترد عليه
ينجمعن سوه عرس ومنيه
................................................................................................
مصيبه وفاجعـــه من فارگتني
أنا الثكلــى برحيلك مال متني
ثگل حــمــل الرزيـــه العذبتني
مثل نار الخيـــم نـــارك چوتني
تعال الگلب خلّص من الفراگ
وگلب الأُم إذا يشتاگ يشتاگ
يبني عالجره ما صح بديه
ينجمعن سوه عرس ومنيه
................................................................................................
أنا الضاگ الفضا بعيوني بجفاك
يبعد الروح راحت روحــي ويّاك
أصفن والدمع يحچـــيـلي ذكراك
يلمـــذبّــل اعــيــوني ويــن الگاك
تعال بطيف شوف شصار بيه
تعال وخـــلّــي أحچيلك عليّه
ثكلى وفاگده وأطلع سبيه
ينجمعن سوه عرس ومنيه
................................................................................................
حل فرض الشـهــاده وگلبك إهـتـم
غيــــور ومــوعــدك عــاشــر محرم
ترخّصت الحســـــيـــن وگتله يا عَمْ
فــدايـــاك الــعــمــر والــــروح والدم
خذاك ابدمعـتـه عمّـك بالأحضـان
هلا بـشبـل الحســــن زينة الشبان
شوف عيوني إنته تصير ضيه
ينجمعن سوه عرس ومنيه
................................................................................................
يغالي المـوت عــاده لآل الأطياب
كرامتهه الشهاده الـيــوم الحساب
من الله العــــظــيــم بنص الكتاب
أشرف دم جره بالطــــف عالتراب
أهل بيت النبــوة والإمـامه
سبحانه اليخصهم بالكرامه
سلام الله على عنرة نبيه
ينجمعن سوه عرس ومنيه
................................................................................................
مــكـتـوب بأمــر رب البـريّــه
بعاشـــــر من محرم هالقضيّه
تفارگنه يــروحــــي الغاضريه
شهيد اتروح وآني أطلع سبيّه
أودعك يا نظر عيني وضواهه
يروحي وبــعـد أكثر من غلاهه
بالجنه نرد نلتم سويه
ينجمعن سوه عرس ومنيه
................................................................................................
خادم الإمام الحسين عليه السلام
عمار هليل الواسطي
محرم الحرام/ ٢٠٢٣
ليلة ٦ محرم الحرام
ليلة أنصار الإمام الحسين عليهم السلام
كربلاءْ وَجدُنا.. والحُسينْ مجدُنا
يكتبُ المجدَ نجيعُ الثائرينْ
وعلى العهدِ سنمضي سائرينْ
......................................................................
انطينه كلمه لو بده يوم السجال.. موعد وكلمة شرف
من يصيح حسين حي الله الرجال.. صف يشد حزام صف
إحنه صحنه الموت گلناله تعال.. تحيّر وعقله وگف
ما نعوف حسين بالحومه محال.. زلم إحنه وهذا طف
لا يَلينْ عزمُنا.. والفداءْ هَمُّنا
وحسينُ السبطِ برهانُ اليقينْ
وعلى العهدِ سنمضي سائرينْ
........................................................................
اوياك شدينه الحزم يبن البتول.. إطلب وتأمر أمر
إحنه گول وفعل گدهه من نگول.. ناذريلك هالعمر
تصعب شما تصعب نلاگي الحلول.. نمشي دربك لو جمر
بينك وما بينّه محد يحول.. ما نلوذ بأي عذر
قادِمون للفداءْ... والوغى كربلاء
عهدُنا للمصطفى طه الأمينْ
وعلى العهدِ سنمضي سائرينْ
...........................................................................
حسين ياروح الفده وسر الوجود.. بيك دين الله إكتمل
تنذر شما تملك وعنّه تذود.. هذي تربات الفحل
سيوفك إحنه وبالنفس لجلك نجود.. مانهاب امن الأجل
هذا ميدان وطلب زود الحيود.. ماكو خوف ولا وجل
أيُّ خوفْ والفؤادْ... نابضاً بالجهادْ
وعلى الأرزاءِ طوعاً مُقبِلينْ
وعلى العهدِ سنمضي سائرينْ
...........................................................................
من مراجل عابس وجون وحبيب.. يكتب افصوله المجد
يافخرنه وياك محلاه النصيب.. عازمين وما نرد
نافع وهمة زهير الماتخيب.. غيره بالطف تنوجد
ياحسين شما طغه بجوره يزيد.. يبقه ميت مَنْوِلَدْ
فالبقاء ردّدا... الحُسين خالدا
نحنُ في الأذهانِ نبقى خالدينْ
وعلى العهدِ سنمضي سائرينْ
............................................................................
هيچ أنصارك تخط عهد الوفاء.. وحق شيال اللوه
واليفكر شنهو حبك والولاء.. يشوفه أغلى امن الهوه
إنته ثوره وبيهه حق وكبرياء.. وجحفل أنصارك نوه
دمنه يروي الدين لو يطلب دماء.. للظلام إحنه الضوه
عهدُنا للمماتْ... موتُنا ذا حياة
بَشّرَ اللهُ تعالى الصابرين
وعلى العهدِ سنمضي سائرينْ
.........................................................................
كربله وعاشور موعد للنحور.. نصرك إنخط بالدمه
عالمخيم يابو الأكبر إحنه سور.. وداعت أمك فاطمه
من وفه العباس أبو الهمه الغيور.. هالوفه نستلهمه
خلّه ياقطب الرحه وكتك يدور.. إحنه إحنه نفهّمه
كربلاءْ نبضُنا... والفداءْ فرضُنا
للعُلى يغمُرُنا هذا الحنينْ
وعلى العهدِ سنمضي سائرينْ
............................................................................
خادم أهل البيت عليهم السلام
عمار هليل الواسطي
ليلة ٤ محرم الحرام
ليلة مولاتي أم البنين عليها السلام
أربع بنين اعــلـــه الوفـه ربّيتكم
وبعاشر الطف للحسين انطيتكم
................................................................................................................
يولادي يربات الولي غيره وحميّه
بيكم أشد حيلي إذا طحت برزيّه
موعدكم أنتظره چنت بالغاضريه
بيكم أريد أتفاخــــر إگبال الزچيه
آخر وداع بهالعــهــد حاچــيتــكم
وبعاشر الطف للحسين انطيتكم
................................................................................................................
هذا الحسين وأدري كل الغيره بيكم
مو بس أخوكم هذا أمـــه بت نبيكم
هذا الإمام ومفـتـــرض طاعه عليكم
بالطف أريدنكم فـعـل يشبه حچيكم
كل غالي يرخص ويّا شمعة بيتكم
وبعاشر الطــــف للحسين انطيتكم
................................................................................................................
صح أبقه وحدي بالمدينه وگلبي صابر
بس گلبي يبقــــه اوياكم اوياكم يسافر
خل كربله تحچي بفخـــر عنكم وافاخر
قدموا النــحــور بلا مـقـــابل يوم عاشر
عالي يظل ويّا أبو الأكبر صيتكم
وبعاشر الطف للحســين انطيتكم
................................................................................................................
أم البنين الأربعــه وأسمــي بعددكم
يبياض وجهي يا غلاكم واني أمكم
مو مهم آني بس الحسيـــن اليهمكم
صولاتكم يوم الوغى ولدي وعزمكم
وبروح روحـــي يالزلم وصّيتكم
وبعاشر الطف للحسين انطيتكم
................................................................................................................
ما جازي مهما قدمت والغالي يسوه
كل فخري هذا من فخـر بيت النبوه
خوّتكم أدري بالشـــدد محلاهه خوّه
يحزام ظهري وبيكم اعله الدنيا أقوه
مخنوگه بالعبــــره تره وناديتكم
وبعاشر الطف للحسين انطيتكم
................................................................................................................
أتنطر أخبار الوفه مــنـكــم يالأحباب
أصبر على حر الجمر وعيوني عالباب
ترجعولي أتاني بالسلامه يهل الصعاب
ويّاكم يعود الحســـيـــن وكل الأطياب
ذخر الحُسيـــــن بكربله خليتكم
وبعاشر الطف للحسين انطيتكم
................................................................................................................
يكفيني عباس الگمر روحه الحنينه
يكفلها مــولاتــي العقيله والضــعينه
رب الجلاله وخالقي تحــرسـها عينه
روحي معاكم والجسد برض المدينه
يولادي مـــــن دُر الوفه غذيتكم
وبعاشر الطف للحسين انطيتكم
................................................................................................................
خادم الإمام الحسين عليه السلام
عمار هليل الواسطي
محرم الحرام/ ٢٠٢٣
ليلة ٢ محرم الحرام
الخدمة الحسينية المقدسة
ما أعوفك ... خدمتك هيّه الحياة
ما أعوفك ... يا ســـفيــنــة النجاة
أكتب بدمعي العهد ...
مــا أعــوفــك للأبد ... ما أعوفك
........................................................................................................
سجلت عمري يبعد العـمر بسمك
يا حسين وأمنية روحي تخدمك
بيقظتي والنوم ميفارگني رسمك
خادم إقبلني علــيـك الزهره أمك
ما أعوفك ... يا أمل روحي ومُناي
ما أعوفك ... يا نبض گلبي وهَواي
ربنا سبحانه شهد ...
مــا أعــوفــك للأبد ... ما أعوفك
........................................................................................................
بخدمتك يالغالي أريدن يگظي عمري
هيچي حباً بيك واعلـــه الزهره أجري
يا عشگ ويّــا الدمَـــه بشرياني يجري
الله وحده بهالعشـــــگ يحسين يدري
ما أعوفك ... أبقه خــــادم منبرك
ما أعوفك ... هاي روحي تناصرك
يلي مثلك مَنْوِجَد ...
مــا أعــوفــك للأبد ... ما أعوفك
........................................................................................................
إي يروح الروح يـا روح الزچيه
أدعي الله بخدمتك ترضه عليه
يالقضية ْ عاشرك أشـرف قضيه
يالهويـةْ خدمتــك أعظـم هويه
ما أعوفك ... سيدي طول الزمان
ما أعوفك... والله يا نــبـع الحنان
للخدم حُبك مدد ...
مــا أعــوفــك للأبد ... ما أعوفك
........................................................................................................
خادم وبسمك أصيح بعالي صوتي
امن المهد يحسين والميعــاد موتي
بيتي الحسينيــــه واللطامه إخوتي
أستــمــد مــنــك يبـو الأحرار قوتي
ما أعوفك ... الخدمتك روحي فديت
ما أعوفك ... العِبـــره والعَــبــره لگيت
إي وحق واحد أحد ...
مــا أعــوفــك للأبـد ... ما أعوفك
........................................................................................................
من يهل شهر المواجع يابو الأكبر
كلشي بيه يصيح يالخادم تحضّر
وبوسط گلبــي الك منصوب منبر
وبفجر عاشر يــنادي النبض حيدر
ما أعوفك ... يا أمــير الثائرين
ما أعوفك ... يا ملاذ العاشقين
هالعشگ لا ماله حد ...
مــا أعــوفــك للأبد ... ما أعوفك
........................................................................................................
بالسـواد أتوشـح وطفّـك مُصابي
گلب ولسان العهد مو بــس ثيابي
ناصرك والصرخـتـــك هذا جوابي
يا حسيــــن وبــيــدك توقّع كتابي
ما أعوفك ... خادم الكل الخدم
ما أعوفك ... يا وجود إبلا عدم
لحظه ما شوگي بُرد ...
مــا أعــوفــك للأبد ... ما أعوفك
........................................................................................................
هالشعائر نعـمــه مـن رب الجلاله
وهذا دربك بالفـــخــر ماكو مثاله
يا ضوه درب اليخدمـــك والدَلاله
ما أعوفك ... ولا أعوفن خدمتك
ما أعوفك ... عالي راسي بهيبتك
أدري من جَدَّ وَجَدْ ...
مــا أعــوفــك للأبد ... ما أعوفك
........................................................................................................
خادم الإمام الحسين عليه السلام
عمار هليل الواسطي
محرم الحرام/ ٢٠٢٣
السلام عليكم ورحمة الله وبركاته
أحبتي من الإخوة والأخوات الأفاضل
على بركة الله تعالى
سيتم نشر قصائد شهر محرم الحرام وصفر للعام الهجري ١٤٤٥ / ٢٠٢٣ ميلادي هنا في قناتكم بعد الإنتهاء من الإحتفال بعيد الغدير الأغر إن شاء الله تعالى.
وفقنا الله تعالى وإياكم في خدمة سادتي وموالي أهل البيت عليهم السلام
أخوكم
خادم الإمام الحسين عليه السلام
عمار هليل الواسطي
ذو الحجة/ ١٤٤٤ هجري
تموز / ٢٠٢٣ ميلادي
/channel/ahmadalsaiah2
قناة الشاعر احمد محسن الصياح
/channel/wwHaider1
قناة الشاعر أبو رقية الحچامي
السلام عليكم ورحمة الله وبركاته
مساهمة مني والفضل كله لله سبحانه وتعالى في نشر قصائد إخوتي وأولادي من الشعراء الشباب وتحديداً شعراء المنبر الحسيني المقدس لأجل إيصال قصائدهم إلى أكبر عدد ممكن من إخوتنا الرواديد سأقوم بنشر روابط قنواتهم هنا في هذه القناة وأرجو من الله سبحانه وتعالى القبول مني ومنهم بفضله وببركة الصلاة والسلام على سيدنا ونبينا وحبيب قلوبنا محمد وآل محمد الطيبين الطاهرين.
أخوكم
خادم الإمام الحسين عليه السلام
عمار هليل الواسطي
قصيدة { نصر عاشور }
طور كربلائي
بوابة نصر عاشور مسلــم لو ذكرنـه إسمك
انفتحت وانكتب تاريخ والمفتاح من دمك
................................................................................................................................
يا أول نزف للطف جرحك بالضــمـــاير صاح
فتح بوابة امـحـــرّم لـيـــل وثورتـك مصباح
سفير حسين واعلومك تشهد واليضدك طاح
تاريخ أسود ابن ازياد... ظالم والظلم ما فاد
صبرك فوگ صبرك زاد
رجحت كفّتك والجور وأهل الجور مَتهمّك
................................................................................................................................
وحياتك يبن عم حسين ما گدروا يرغمونك
لوما غدر شيگـــــدرون محال أنهم يهزمونك
إنته بهيئة الكــــرار وأهـــل الشـــــر يعرفونك
من تغضب ترد حيفك... مدام بقبضتك سيفك
تطشُّر تجمع بكيفك
مو عجبه وعلي الكرار حيد الموزمه عمّك
................................................................................................................................
ذمم لاچن ألف يا حيف للطغيان مبيوعه
كلها بسلطة ابن ازياد چانت كلهه مخدوعه
زلم خانت عهدهه اوياك وحرمه ونصرتك طوعه
فرق ما بين هاي وهاي ... بين الخان والوفّاي
صفت نيتك أخذت الراي
قارعت الظلم والجور زلمه وما رجف عزمك
................................................................................................................................
يمسلم درس للأجيال خطّيته بحروف النور
أصبح نهج للأحرار ولرفـــض الظلــم دستور
خطوه الأولى من كوفان تصير بكربله عاشور
نصر دمك نصر دينك ... كتبته بنصرت حسينك
ما غمضت أبد عينك
لحد ما سطرت بالدم فداءك والسطع نجمك
................................................................................................................................
نباوع مرقدك معمور ليل انهار زوارك
ما يرجع أبد خسران رابح دوم خطارك
باجر يظهر الموعود حتماً يأخذ بثارك
بالطلعه البهيّه يعود ... حي يرزق تراه موجود
حيد ومن ظهر الحيود
سلام الله على المهدي وسط گلبه حمل همّك
................................................................................................................................
حتماً يظهر الغايب واليوم الظهور انعِد
قريب هواي غالينه محال اعله المحب يبعد
منتظرين هاي سنين ندعي الله ونظل ننشد
ربنا وهاي دعوانه ... يعجّل فرج مولانه
وكلنا أنصاره واعوانه
يشهدلك فديت الدين محد يگدر يهزمك
................................................................................................................................
خادم الإمام الحسين عليه السلام
عمار هليل الواسطي
محرم الحرام/ ١٤٤٥ هجرية
قصيدة في إستقبال شهر العزاء شهر محرم الحرام
قصيدة ( شهر الدمع )
للحسين إعلن ولاءك
يا شهم رتب عزاءك
روحك انذرهه وقــف هـــاي الليالي
كلشي يرخص بالزمن وحسين غالي
ياشهم رتب عزاءك
........................................................................
يا غيور ولو بده شهــر المصايب
خلي گلبك عالجره بعاشور ذايب
كل مصيبه الطفل منهه يصير شايب
والتعازي للإمام البعده غايب
إبچي عالشيبه الخضيبه
عدنه كل ليله مصيبه
إخدم الظامي بحضورك يالموالي
كلشي يرخص بالزمن وحسين غالي
ياشهم رتب عزاءك
........................................................................
ليله ليله عيش كل فجعه ومصيبه
دنيه غدرت بالحسين شگد عجيبه
ينكسر گلبه الذي يفگد حبيبه
وچم حبيب يروح ما واحد يجيبه
إذكر أحزان العليله
لا تفوت حزن ليله
إفزع وتاخذ أجر هالفزعه تالي
كلشي يرخص بالزمن وحسين غالي
ياشهم رتب عزاءك
........................................................................
ليلة أم الأربعه القدمت ولدهه
فدوه لحسين ودمعهه فوگ خدهه
إحزن لأم البنين وتلگه عدهه
باب للحاجات ما خاب الگصدهه
وبگلبهه الهم علامه
ما إجه حسين بسلامه
كل إبن عدهه گمر بالسمه عالي
كلشي يرخص بالزمن وحسين غالي
ياشهم رتب عزاءك
........................................................................
لمسلم المظلوم ليله وكلهه حيره
والسفير حسين يبچي العنده غيره
آخ من الكوفه چي خانت سفيره
ينشمر من القصر وسفه مصيره
ليلة الأنصار بعده
للغيارى تلبي عهده
بالخطر والموت أبد لا ما تبالي
كلشي يرخص بالزمن وحسين غالي
ياشهم رتب عزاءك
........................................................................
من بعدهه إذكر گمر هاشم وفاءه
گطعوا چفوفه ولا يترك لواءه
ليلة العباس تحچي عن ولاءه
العين والچفين من مطلع فداءه
عالنهر دمه يسيله
كافل الحره العقيله
انهضم گلبه يوم شاف الجود خالي
كلشي يرخص بالزمن وحسين غالي
ياشهم رتب عزاءك
........................................................................
نوح عالقاسم تصير الحنّه دمه
ساعد بنوحك يشيعي گلب أمه
وعلى الأكبر هالدمع بالك تضمه
وللرضيع المنذبح نبله تفطمه
بليلة العاشر مواجع
چم وداع بگلب خاشع
وبنهاره تصيح زينب من بقالي
كلشي يرخص بالزمن وحسين غالي
ياشهم رتب عزاءك
........................................................................
تگظي عشره وتبدي عشره بالرزيه
حسين مرمي عالثره بالغاضريه
الخيم تلهب نار من أشرار أميه
ومن بعدها أم عون رادوهه سبيه
آه يا شهر العجايب
ما گظت بيك المصايب
لطلعة المهدي الحزن شاغلي بالي
كلشي يرخص بالزمن وحسين غالي
ياشهم رتب عزاءك
........................................................................
خادم الإمام الحسين عليه السلام
عمار هليل الواسطي
محرم الحرام/ ٢٠٢٣
ليلة ٩ محرم الحرام
ليلة مولاي علي الأكبر عليه السلام
( قصيدة نزلة عزاء )
گلبي ويّاك يالأكبر ... گلبي ويّاك
گلبي ويّاك يالأكبر ... گلبي ويّاك
………………………………………………………………………………………
يبني يا سِبّاح گلبي وماي عيني
أدعي ربي يا علي ســالم تجيني
من دخلت المعركه واشتد حنيني
آنه أُمك والگلــب يـخــفي ونيني
روحي بحماك يالأكبر ... روحي بحماك
گلبي ويّاك يالأكبر ... گلبي ويّاك
………………………………………………………………………………………
يبني گلب الوالده يـبــاصر إبنهه
لا تلومه إنچان ذايب من حزنهه
وآنه روحي اوياك ما ينگطع ظنهه
تظل غريبه لو رحت وإنته وطنهه
دمعي ناداك يالأكبر ... دمعي ناداك
گلبي ويّاك يالأكبر ... گلبي ويّاك
………………………………………………………………………………………
بخيمتي وعيوني ما عافت خيالك
اليوم حگ إرباي أريده وحگ دلالك
يالمليت اعيـــــوني يوليدي بجمالك
لو ردت روحي إخذ روحي بدالك
صعبه أنساك يالأكبر ..صعبه أنساك
گلبي ويّاك يالأكبر ... گلبي ويّاك
………………………………………………………………………………………
شگد ثگيله اعله الگلب هاي الليالي
الله بس يعلم يبعد الروح حالي
غالي إنته وهذا أبوك حسين غالي
أنتظر ترجعلي وتجاوب سؤالي ؟
وين الگاك يالأكبر .. وين ألگاك
گلبي ويّاك يالأكبر ... گلبي ويّاك
………………………………………………………………………………………
صابره وأتنطرك والخوف بيه
عالجمر يوليدي أتاني رد إليه
آخ منهه دولبتنـــي الغاضريه
امروّتك يعيوني فدوه رد عليه
عمري يفداك يالأكبر .. عمري يفداك
گلبي ويّاك يالأكبر ... گلبي ويّاك
………………………………………………………………………………………
يا بعد گلب أمك وتفديك أمك
أرجع ومشــتاگه يالأكبر أشمّك
گلبي ما يحمل مرار وصعب همّك
يا مناي وآنه أروحن فدوه لٱسمك
ربنا حيّاك يالأكبر .. ربنا حيّاك
گلبي ويّاك يالأكبر ... گلبي ويّاك
………………………………………………………………………………………
خادم الحسين عليه السلام
عمار هليل الواسطي
محرم الحرام/ ٢٠٢٣
ليلة ٧ محرم الحرام
ليلة مولاي قمر العشيرة العباس عليه السلام
محرم الحرام / ١٤٣٩ هجرية
لو عـــدل أدري مَـتـقـبل
زينبك واوگف على التل
حايره ودموعــــي تسأل
وينه عباس .... وينه عباس
………………………………………………………………………………
يا كفيلي والذي حط إيدي بيدك
كلشي بيه يصيح يا عباس أريدك
يلي دمك للوفه يكتب نشيدك
منين يا خويه إلي دهري يعيدك
بينك وبيني الكفاله
بعد ترجع استحاله
يا نبض گلبي وسؤاله
وينه عباس .... وينه عباس
………………………………………………………………………………
واگفه عالتل يبن حامي الحميه
وانته من صوب النهر تنظر عليه
حتى لو ظليت بس جثه رميه
ما تعوف اختك يفخر الهاشميه
غيرتك ياروح روحي
تستمع كل لحظه نوحي
صحت وانلچمت جروحي
وينه عباس .... وينه عباس
………………………………………………………………………………
صعبه ياخويه واعرفك كلّك احساس
ما أعاتب لو بقت تتشمت الناس
منبعك غيره وحميه ووفه ونوماس
لچن حرگة گلبي صاحت وينه عباس
لو عدل يابو الحميه
ما تخليني سبيه
ولا أصيح بهالرزيه
وينه عباس .... وينه عباس
………………………………………………………………………………
يا گمر دنياي هاي جروحي صاحت
بلحظة الفوگ الشريعه الرايه طاحت
راحت ايام التلمنه خويه راحت
على الخوّه يا كفيلي الروح ناحت
يا شمل من تالي يلتم
والدمع بجفاك من دم
صاح الك حتى المخيم
وينه عباس .... وينه عباس
………………………………………………………………………………
هاي سكنه يبو فاضل ناحت اوياي
جاوبتهه يا كفيلي بدمع عيناي
تگول خل يرجعلي عمي ويترك الماي
هدّمَت حيلي بدمعهه وذهلت الراي
كل عذر مقبول منّك
بس شگل لسكينه عنك
گالت وما ترد چنّك
وينه عباس .... وينه عباس
………………………………………………………………………………
ذكرياتي استرجعتهه والدمع هل
يا هضم من هضمي يا عباس أسهل
شگد مواجع دولبتني ابوگفة التل
واگفه ودموع عيني اعليك تسأل
يالچنت حارس خيالي
عالرمح راسك برالي
جاوبت بالطف سؤالي
وينه عباس .... وينه عباس
………………………………………………………………………………
خادم الحسين عليه السلام
عمار هليل الواسطي
ليلة ٥ محرم الحرام
ليلة سيدي ومولاي مسلم بن عقيل عليه السلام
أول دم أول گطره .. سالت من أجل الثورة .. مسلم مظلوم
تاريخ يخط حروفه .. شرّف كل أهل الكوفه .. مسلم مظلوم
..........................................................
مسلم عنوان الهيبه تاريخ ارجال
لمبعوث حسين الغالي كل الإجلال
تاريخ بدمه تسطر والحق ينگال
ما يگدر يحجب شمسه حقد الغربال
موثوق بنفس الغايه .. آيه ومرسال الآيه ..
هذا المعلوم
خل نتصفح أخباره .. كل إنجازه وآثاره .. مسلم مظلوم
..........................................................
بالكوفه يحط ارحاله وهذا المقياس
رحبت بي أول مره وفرحانه الناس
طالب إصلاح الأمة مرفوع الراس
مصلح وبهذا الموقف غاض الوسواس
ابن ازياد وأنصاره .. وصلتهم كل أخباره .. يا غدر القوم
أحقاد وواضح شرهم .. حاقد كلمن ناصرهم .. مسلم مظلوم
..........................................................
من بعد صفوف الصلّت خلف المظلوم
صارت فتنه وأغواهم كيد المشؤوم
وادم ما عدهم كلمه إي والقيّوم
صارت غربان الفتنه عالغالي تحوم
ناس بشيطان إنخدعت .. ضد مسلم لمن طلعت .. يا حق يدوم
ضده اسيوف يرفعوهه .. كل أنصاره يروعوهه .. مسلم مظلوم
..........................................................
ظل مسلم رايد مأمن بالكوفه وشاف
بس طوعه النصرت حقه دون الآلاف
من عرفت أصله وفصله من الأشراف
سل سيفه بچفه وطبعه عالحق ميخاف
كرر صولات الأوحد .. حيدر بالكوفه تجدد .. أمر ومرسوم
راواهم موت الأحمر .. فارس قائد يتصدر .. مسلم مظلوم
..........................................................
من ذاك الزمن الماضي حد هذا اليوم
خلي نقارن ونشاهد بمنطق مفهوم
حضرة مسلم معمورة زواره تدوم
وين الظالم وأعوانه صرح ومهدوم
مسلم عنوان الكوفه .. أعمى الماراد يشوفه .. حتماً موهوم
نعم المبعوث الثائر .. نعم القائد والناصر .. مسلم مظلوم
..........................................................
خادم الإمام الحسين عليه السلام
عمار هليل الواسطي
محرم الحرام/ ٢٠٢٣
ليلة ٣ محرم الحرام
ليلة مولاتي فاطمة العليلة عليها السلام
أتانيك وحسرتي إنرسمت بدمعي
يشمعة بيتي دونك ينطفي شمعي
عليله وعيني عالباب ...
أتاني وطـــال الغياب ... أتانيك
............................................................................................................
ضوه اعيوني بغيابك عمــري ظلمه
يبويه وعيشتي هضمه اعله هضمه
لا طــيــفــك يـمــر بــيّــه وأكــلــمـه
حلم ترجع گــمـــت بدموعي أرسمه
رحت بس من رحت خذت العمر كلّه
والـمـفــارگ أبــوه الــمــوت أسـهــلّـه
زغيره والگلب ذاب ...
أتاني وطال الغياب ... أتانيك
............................................................................................................
مشيت وچــم جــرح خليـت بيّه
بوداعك ما يـصـــح كلشـي بديّه
الجسد برض المدينه يتاني جيّه
لأن روحــي مـشــت للـغـاضــريه
نعم وياك راحت روحي يا روحي
جسد ظليت بعدك تنزف جروحي
صعب يفراگ الأحباب ...
أتاني وطال الغياب ... أتانيك
............................................................................................................
صغيره عالحزن والفرگــه تدري
ولا بدمع النواظر يطفــه جمري
على عمرك يبويه أنطيك عمري
بس إرجع إلي لن ضاگ صدري
تراهه أيامي وحشه وتخنگ ابدونك
ما تســوه حيــاتـــي وداعت اعيونك
الگلب گبل الشعر شاب ...
أتاني وطال الغياب ... أتانيك
............................................................................................................
على الموعد بقيت شگد أتاني
لا عمي الگمــر لا خويه إجاني
أنا بشمْ الهوى أتحسر وعاني
بعد شيريد من عــنـدي زماني
بغيابك لحظه لحظه الـروح تتكدّر
وأحسب ظني يرجعلي علي الأكبر
مثلك ما إجه وغاب ...
أتاني وطال الغياب ... أتانيك
............................................................................................................
بده إحساس اليتم يتمـلك الروح
ولا بلسم يداوي ويشفي الجروح
لو أدري يـــرجـعــك ســالم النوح
أنوح وخلي عمري امن البچي يروح
لا تـنـفـع منــاحـه ولا دمــع يــنــفـع
سؤال بگلبي وينك واشوكت ترجع
أبد ما حاسبه احساب ...
أتاني وطال الغياب ... أتانيك
............................................................................................................
مشتاگه وحياتك بويــه يحسين
الوجهك والكلامك يا ضوه العين
وين الدهـــر عنّــي ماخــذك وين
بعدهي صورتك بعيونـي الاثنين
تروح وبالگلب لهمومك تخلّي
مشتاگه أسمعك فاطمــه تگلّي
دمعتي تكتب اعتاب
أتاني وطال الغياب ... أتانيك
............................................................................................................
على عمري السلام إقره يغالي
إذا ما ترجــع وتــنـظـر الحالي
يبويه حسين وهمـــوم الليالي
غزت گلبي وأناطر موتي تالي
فوگ المرض هجرك زوّد أحزاني
يتاني وما دريت الگــلب شيتاني
ولا أعرفها الأسباب...
أتاني وطال الغياب ... أتانيك
............................................................................................................
خادم الإمام الحسين عليه السلام
عمار هليل الواسطي
محرم الحرام/ ٢٠٢٣
ليلة ١ محرم الحرام
هلال الشهر
يشهر الفاجـعــه تاذيني ذِكـراك
يا شوغت گلب ما تگظي بلواك
وهلالك جــــرح مرسوم بسماك
......................................................................................................
أعدلك يا شـــهـــر عاشور يلما تگظي آلامك
فاتــحــــة الحزن تبــــدي كلها جروح أيامك
أصيرن كلّي دمعة عين وأوگف جرح گدامك
نهار وليل يا عاشـــور تكــــدّر روحي أنسامك
دنيا وبالفــعــل ظلت عجيبه
مصيبه تنتهي وتبدي مصيبه
تاخذ روحي لمن تبدي ويّاك
......................................................................................................
تجدد كربله همومي وتفزز كل جرح بيّه
وأرد للواحد وستيـــن من السنه الهجريه
أرد ولگه دمع طاهــــر محمد يبچي ليليه
يواسي المرتضى حيدر والراضيه المرضيه
ناحت أنبيــــاء اللـه الحزينه
على الصار بأبو اليمه وبنينه
أسود للحِداد يرفرف الواك
......................................................................................................
مصيبه بكل گلب مفجوع والهَم ما يسد بابه
تلگه بكل مكان الصوت آه يحسين وامصابه
أنوح وأذكر الظامي ودمعتــي بخدي سچابه
المثلك يا شهر عاشور گلبي حاسب احسابه
شجازي من الغريب وسبي الضعون
لون أبچي المصــابــه دموع وعيون
ملگه الفاگد أهله بروحي ملگاك
......................................................................................................
مجالس للحزن عيني تشاهد والمدامع دم
كل مجلس عزا يواسي خيـمه من المْخيّم
نهارك أظلم وليلــك بأحــــزان السبط خيّم
فرض سادس فرض حزنك كل الخلگ تتيتم
أنــحــب واللطــم ليليـه سلواي
على روح الغريب الماشرب ماي
هاك إخذ الگلب شوف الحزن هاك
......................................................................................................
جيل الجيل يتوارث شعائر الله ما تخلص
ملايين التون لحسين دوم تزود ما تنقص
عشگ فطري وحزن فطري هيچ الحال يتلخص
وهنيال اليوافي حسين ويظل الخادم الأحرص
ما تخلــص أبد هاي القضيه
إلى أن تبتدي الطلعه البهيّه
ويرد ثاره الأگله آني بحماك
......................................................................................................
ثار ومن يرد الثــــــأر غــيــر القائـــم المهدي
والله اليعلم بگلــبـــي وشگــــد الحزن عندي
أشوفه وهاي أمنيتي ويشاهد دمعتي بخدي
وأنصره ابثــورتـــه الكبرى لمن بالعـدل تبدي
الله يعين گلبه بهاي الأيام
يا شهر الحزن يا شهر الآلام
ينعه حسين جدّه شما تلگّاك
......................................................................................................
أشوف هلالك ومدري يحمل چم خبر مو زين
أتخيّل گلب زينب وأعيش احساس فگد حسين
مسيرة هضم ما خلصت أحاه من گطعهه البين
حرارة دمعتي طفله وخيم محترگه جفن العين
هيچ بكل سنه عندي المشاعر
لأن حسيــــن عايش بالضمائر
علا صوت الحزن وبحرگه ناداك
......................................................................................................
خادم الإمام الحسين عليه السلام
عمار هليل الواسطي
محرم الحرام/ ٢٠٢٣
شهادة سيدي ومولاي أمير المؤمنين علي بن أبي طالب عليه السلام
زينـب واليـتم يوميـه هاضـمـهه
أخذ منهـــه أبوهـــه من بعد أُمهه
بعد من يا عزيز الدنــــيه تحرمهه
.....................................................................................................................................
من أول سنين العمر ... والحسره تــتــبع حسره
من دَفعة الباب وكسر ... ضلع الزچيـــه الزهـره
ويّا الحزن عِشرة عُمُر ...بس صعبه هاي العِشره
صار اسم زينب ينذكـــر... ونذكــر اوياه العبره
ما تخلص أبد للموت حسرتهه
هيّه اعيونهه عالضيم فِتحتهه
تصبر والدهر كل فتره ظالمهه
.....................................................................................................................................
ربّاهه أبو اليمه علـــــي ... عالصـبـــر حتى تكابر
يدري التشوفه امن الزمن ... يحتاج گلب الصابر
ظلت عزيزه امدللـه ... بــوجــــود أبوهه الحاضر
يحرسهه حتى امن الهوه .... خافن يكدر الخاطر
كلـــهـه امدللت حـــيـدر تسمّيهه
هذا أجمل اسم من بين أساميهه
على خير الصفات الوالي علّمهه
.....................................................................................................................................
بهاي السنين اترَعرِعت ... كل الفضائل بيهه
بنت الولي ونعم الولي ... ويا نعم المْرَبّـيـهه
شگد بأبوهه اتعلّقت ... تاريخ خل يحچيهه
من عنده أخذت كم صفه ... هاي الفخر يدريهه
صار المرتضى كلشي بنظر زينب
مو بس الإمام ولاهــــو بس الأب
والجَـنّـه منو اليوصف معالمهه
.....................................................................................................................................
عام أربعين الهجــري حل ... بس يا مصايب جايب
برمضـــــــان وبلــيلـــة قدر ... تنطر قدرهه الغايب
يتأمــــــل بزيــنــــب علي ... اشينطر گلبهه الذايب
وشكاتب اعليهه اليتــــــم ... والعــلـــم لله اشكاتب
يتأمل علي وما تنشف ادموعه
باچر زينبه يدريهــــه مفجوعه
عن هذا الأمر دمعه اليكلّمهه
.....................................................................................................................................
ليله انرسم بيهه الأجل ... جفن السمه دموعه اشگد
للفرض يتعــنّــه الولي ... وفـــرض الشــهـــاده اتحدد
وبسيف ابن ملجم وسف ... طاح الفرض دمعه ابخد
الزينب منو يودّي الخبر ... هذا المصير اتحدد
رد ينزف دمه الكرار من جرحه
ليل اسود يزينب لا طلع صُبحه
وبهذا الخبر ضجّت عوالمهه
.....................................................................................................................................
محتاره گعدت يم علي ... يا بويه فدوه اسنيني
هاك العمر كله فـــده ... بــس يالأبــو حاچــيــني
يلبيك أشد حيلي شعجب ... حيلك تعب يا عيني
ريت المنيه ولا شفت ... جرحك لأن ياذيني
ويلي ومن علي غمضهن اعيونه
زينب لونهه أمــــســى مثل لونه
راح ومن جديد الزمـــن يـتّـمـهـه
.....................................................................................................................................
قصة ابتدت من فاطمه ... وفگد الولي والدهه
باچر على افراگ الحسن ... هم الزمن يضهدهه
اللهُ أكبر كربله ... لو حلّت بموعدهه
عد يا عزيز تهل دمع ... يحفر دمعهه بخدهه
عاشر من محرم بالحزن عاجل
يحرم زينب امن حسين والكافل
يسبيهه وترد الحسره تلچمهه
.....................................................................................................................................
خادم الإمام الحسين عليه السلام
عمار هليل الواسطي