7103
إحنه غير حسين ما عدنه وسيله والذنوب اهـــواي چـفّـتـها ثجيله
متباركين بذكرى المولد النبوي الشريف لسيدنا ومولانا وحبيب قلوبنا خاتم الانبياء والمرسلين أبي القاسم محمد صلى الله عليه وآله الطيبين الطاهرين.
قصيدة ( بشارة عيد )
ربيع أول إجانه وجاب البشاره
ميلاد النبي من أجمـــل أخباره
فرح ما أجمله ... هلا ومية هلا
.........................................................................
يا مسك الختام لكل نبي ومرسل
هلا يالمصطفى بميلادك الأجمل
أملاك السماء تطوف بالمحفل
فسبحان الذي صوّرك بالمُجمل
سبحان الذي سمّاك محبوبه
حروف اسمك فخر عالعرش مكتوبه
فخر أهل العُلا ... هلا ومية هلا
.........................................................................
حبيب الله وحياتك بيك نتباهه
والإسلام منك هيبته وجاهه
يرحمه وبسمك المعبود سواهه
رحمه واسعه للناس خلاهه
جلال الله ورحمته ونور قدسيته
مخصوص لمحمد ولأهل بيته
بسمكم سجّله ... هلا ومية هلا
.........................................................................
ميلادك سعاده وللفرح بُشرى
سماوات وأرض هالليله مزدهره
نتمسك بحبك يا أبو الزهره
وأبد ما نترك القرآن والعتره
وحق أربع حروفك يا نبي الرحمه
كل الناس دونك وانته بالقمّه
عظيم المنزله ... هلا ومية هلا
.........................................................................
صلاة الله وسلامه اعليك يالغالي
يمن بيك المجد يفتخر للتالي
يبو اخلاق العظيمه وطودنه العالي
كل عاشگ يگول الفرحه مرسالي
يعجزون البشر لا ما يوصفونك
بس الله وعلي فعلاً يعرفونك
روايه امفصّله ... هلا ومية هلا
.........................................................................
يقدوه لكل شريف ومن نبع طاهر
أشرق على العالم نورك الزاهر
معجزتك كتاب الخالق القاهر
نبي بمعنى النبوة باطن وظاهر
يا أشرف نبي الرب العرش صلّه
سلام الله على آمنه و عبد الله
عظيمه العائله ... هلا ومية هلا
.........................................................................
ختاماً يا فجر إسلامنه وصُبحه
ندعي الله يعيد اعلينه هالفرحه
يا بلسم يداوي لكل گلب جرحه
الك طير السعد ظل يصفگ بجنحه
كل الكائنات الليله فرحانه
تنادي يا هلا بعيدك يمولانه
قداست بسمله ... هلا ومية هلا
.........................................................................
خادم الإمام الحسين عليه السلام
عمار هليل الواسطي
ربيع الاول/١٤٤٥ هجري
قصيدة { بيان الملحمــه}
بسم الحسين وكربله راح أعلن النصر
أصدُر بيان الملحمــه من داخل القصر
والهِمّه حيدريه ... والخُطبه زينبيه
.............................................................................................................................
وحق روس النشامه الكلهه غيره
وأنا المكـفـــوله من بـدر العشيره
لخلّي ايزيــد بــــس الذل مصيره
أميره ورغـــم عــــن أنفــه أميره
عاشر محرم مستهل والثوره تبتدي
لازم أذل أهل القصر والشام موعدي
والغيره هاشميّه ... والخُطبه زينبيه
.............................................................................................................................
شلتهه ابگــلــبــي من عاشر محرم
مصايب بــيـهـــــه رب العرش يعلم
إخت حــســيـــن آنــــي شلون أندم
قضيتي السيــف أثلمه بمــنزف الدم
ماعاش كلمن يعتقد خســـرانه بالحرب
بالشام كل هذا الوضع عالطاغي ينگلب
والعفّه فاطميّه ... والخُطبه زينبيه
.............................................................................................................................
نعم روس إخـْـوتــي بــرمــاح تنشال
لأن مرفوعـــه أصـــــلاً روس الأبطال
وحق مِحــنــةْ عليلي ودمـــع الأطفال
ألــــقّــنــهُـــم درس أشـــبــاه الِرْجـــال
بالشام أخــلّــي خاتــمــه مطلعهه كربله
أثبت بأن أهل القـصـــر ما عدهه مرجله
لا يعتقد سبيّه ... والخُطبه زينبيه
.............................................................................................................................
عشت أفــجــع ليالــي وأصـعــب أيام
شفــت نــوح الثكالى ودمـــع الأيــتــام
هذن كلــهـــن شفــتــهـــــن مصدر إلهام
من مضــمـــونـــهـــن كل خطبـــة الشام
أجمـعـهــن جروح الهضم والفرگه والسبي
أفضح غدر أهل المــكــر ضـــد عترة النبي
بت حامي الحميه ... والخُطبه زينبيه
.............................................................................................................................
حرام إنــچـــان أذل نفــســــي بقصرهم
سَــبــيــهم والســيــــاط وكــل غـــدرهم
شتايــمــــهــم لأن طـــحت ابــأســرهــم
وصــمــتْ عــــار أخــلــــيـــهه ابعمــرهم
تاريخ أكـتبـــه ومــا أذل يتــوضــح المهم
والما تهدّم بالحـــــرب بالخُــطبـــــه ينهدم
أعني قصر أُميّه ... والخُطبه زينبيه
.............................................................................................................................
أنا إربـــات الفــحل وشلـــون أطـــخ راس
الكرامــــه العـــنــــدي بالــــدم وبالأنفـــاس
وي راس الكــفـــيــل أحــــچـــي بالإحساس
أذل إعـــــداك وآنـــــه إخـــتــــــك يعـــــباس
بعون الله أراويهم فعل مو بس حچي فقط
واعله الحــــروف الثــائــــره لازم أحط نقط
من حيدر الهويّه ... والخُطبه زينبيه
.............................................................................................................................
النــصـــر نصـــر الخــلـــود وهــذا عنــوان
منو الـيـبــقــه ومنـــو الكل عــمره خسران
عهــــد للمـــنـــذبــــح مظــلــــــوم عطشان
أزلزل شـــامـــهــم وتــطـــيـــــح الأركـــــان
باچـــر أخــلّــي اليســتــمــع للخـطـبـــه يبتلي
ويگول زيـــنـــب بالقصــــر مدري الفحل علي
إي والبعث نبيّه ... والخُطبه زينبيه
.............................................................................................................................
خادم الإمام الحسين عليه السلام
عمار هليل الواسطي
قصيدة لوفاة سيدي ومولاي الإمام السجاد عليه السلام
يا خامس أهل الدمع ... مِنْ يا جرح تنفجع
نــار ودمــع تـنگـظـي ... قصةْ حـياة الشمع
..........................................................................................................................
يرابــع شمـعــه من اشموع أهل البيت
خلص عمـرك نحـــيــب بكثر ما عانيت
مذبوحـــه اعله شِـفــتك كلمـــةْ اتهنّيت
رحت للطف علـــي بــــس يا علي ردّيت
اشخلّت الك كربله ... من صفوةْ العائله
چم ذكرى يا سيدي ... قصةْ حـياة الشمع
..........................................................................................................................
يــعــاشــر مــن مُـحــرّم گاطـــع آمالك
چم مصرع شفــت يا ســـيــــدي إگبالك
مــثــل نـــار الــمُــــخــيّـــم نــــار دلّالــك
يا عُــمـــر الـبَــعَـــد بالـــنــوح يحــلالــــك
شفت الرضيع بهضم ... بالنبله من ينفطم
نار السهم والعطش ... قصةْ حـياة الشمع
..........................................................................................................................
العِلم عـــنــد الله گــلــبــك چان يتفطر
جسد بالخيمه بــس الـــروح مـــــا تگدر
رِكْضَـــت ويّا ابــوك ابــطيـحـــــت الأكبر
تـشــوفـــه شلون يجـمـــع جسمه الموذّر
يا خويه لمّن صحت ... دمعه بحضن خد طحت
صوت الدمع ينسمع ... قصةْ حـياة الشمع
..........................................................................................................................
ولا يخــلــص نـحـيــب الـتـهـمــل ادمـوعه
شــفــت جــســـام لــمّــن طــفّــــو اشموعه
العرس عرس الشــهــــاده ورمــلــه مفجوعه
اعله چفّه اخــضـــاب دم مــو حنّه مطبوعه
تنوح اعله شبل الحسن ... وهمومك اتزاحمن
جفنك أبد ما نشف ... قصةْ حـياة الشمع
..........................................................................................................................
صـــرت كلّك دمـــع والعــمـــــر يتبدّه
وعمّك طـــيــحــتــه يا شِدّت الشِــدّه
إذا ظهر الحُسيـــن إنــكــسر من فگده
شــصـــار بحــال زينــب والضعن بعده
لي هسه فوگ النهر ... مرسومه صورة گمر
ما تنتهي قصّته ... قصةْ حـياة الشمع
..........................................................................................................................
الأشد چانت عليـــك ودم تصـــب العين
من هدّت أُميـّه بكــــربـــلــــه صــوبيــن
من گام الشـــمـــر يطـْـبـــر بنحـــر الدين
وحوافر خيل سحگت صدر أبوك حسين
نبضات گلبك ألم ... عندك يتامى وحرم
والنوب يبدي السبي ... قصةْ حـياة الشمع
..........................................................................................................................
جروحك يا عــلـــي الســجـــاد ما تــشـفــه
لأن ســـبـــي الحـــرم عــنــــد الشــهـم كلفه
يـــســــاره كل ربــيــبـات الخـــــدر تـصـفــه
الأشـــد بالســُــوگ باچـــــر للحَــرم وگــفــــه
كلهن شفتهن بعد ... يا فجعه منهن أشد
گلبك خلص بالبچي ... قصةْ حـياة الشمع
..........................................................................................................................
خادم الإمام الحسين عليه السلام
عمار هليل الواسطي
قصيدة { جسد بلا روح }
نويت ورافگتني حسرة مصابي
عليل ورايح أدفن أهلي واحبابي
المسافه الكربله جروح ..
جسد رايح بلا روح ... الدفنهم
..........................................................................
تعنيت كل خطوه بجرح والجرح ما لحظه هِده
عاشر محرم عاد إلي وبكل تفاصيله ابتده
حسيت روحي بهالدفن لتراب هم متوسّده
نار الدمع عالخد جرت والحال ربي شاهده
آني العليل .. مدمي الدليل .. حزني ثكيل .. شابع قهر
أحسّب من رحت لا تدري عدواني
ويلوعون الضعن واحد وره الثاني
ثگيل الحمل مطروح ...
جسد رايح بلا روح ... الدفنهم
..........................................................................
تخطّيت دربي واوصلت شفت الگلب قبلي وصل
وانعاد بعيوني الظهر ذاك الگظت بعده الأهل
شفت الأجساد موذره عالترب والراي انذهل
صدمه ومصيبه راتبه والدمع من كيفه نزل
وبيا نحيب ... شفت الخضيب
شفت الحبيب .. أصبح وذر
وصلت الوالدي وحاچيته بالحسره
آني ابنك علي يرويحت الزهره
دجاوبني يمذبوح ...
جسد رايح بلا روح ... الدفنهم
..........................................................................
شميت نحره المنگطع وسّدته أبويه بالگبر
لن صوت گلي يا علي وسّد رضيعي عالصدر
عبد الله روحه الفرفحت طير انذبح ذاك الظهر
ويلاه يفراگ الأبو ويفراگ أخوي المنغدر
أمسى صريع ...ليش الرضيع
بأحزاني أضيع ... ريشه بهوه
وحگ رب السمه خنگت هوه بريتي
أصيرن ثالث بهالگبر أمنيتي
انحنيت ودمعي مسفوح ...
جسد رايح بلا روح ... الدفنهم
..........................................................................
وتوجهت بس الگلب مجمور والهَم يعتلي
يم الحصيره الجمعته ذاك الوذر راجع الي
والساعدوني بالدفن من شافوا دموعي اتهلي
گلتلهم الحيل انفگد هذا تره الأكبر علي
ما بيه حيل ... كل عمري ليل
حسراتي سيل... ما تنحمل
شبيه المصطفى بتراب واريته
وحرت هذا علي لو گلبي خليته
وحيده رويحتي اتنوح
جسد رايح بلا روح ... الدفنهم
..........................................................................
هذا الدفن ناره أصبحت أنفاس بيه اموجره
هوّه الگمر هم يندفن ؟ وشلون أدفنه بالثره
عباس عمي كربله گتله اكسرت ظهري تره
للسبي زينب عمتي طلعت يسبع الگنطره
وبلا كفيل ... صار الرحيل
لا مو قليل ... هذا الحزن
حسّيت بخيالي بنوح وبعبره
يگلي يا علي عينك على الحرّه
عطر من جثته يفوح ...
جسد رايح بلا روح ... الدفنهم
..........................................................................
ما تنطفي نار الگلب هميت جدمي اعله الدرب
من كملت كل الدفن صار الوداع أكثر صعب
گلتلهم بصوت الجرح يا صفوة الله بالغُرب
يهلي سلام الله على أجسادكم تحت الترب
آل النبي ... راجع سبي
بذمتي عبي... لازم أرد
والنظره الأخيره نار تبرالي
چن نار المخيم رجعت گبالي
تره المجروح مجروح ...
جسد رايح بلا روح ... الدفنهم
..........................................................................
خادم الإمام الحسين عليه السلام
عمار هليل الواسطي
قصيدة { صاحب العزاء }
روحي لكَ الفِداءْ ... يا صاحِبَ العَزاءْ
يا مهدي ... يا مهدي
...........................................................................................................................
أبــتـدي يا ســيـــدي أول كـلامي
من بعد شوگي وتحياتي وسلامي
أدعي الله يعظّم أجـــرك يا إمامي
بين شــام وكربلـــــه والگلب دامي
يعلو لكَ النداءْ ... يا صاحِبَ العَزاءْ
يا مهدي ... يا مهدي
...........................................................................................................................
خلص عـمـري بانتظارك دمعه دمعه
تگظي جمعه وبالمدامع تبدي جمعه
أدري گلبك هسه كلّه جــروح وسعه
عالمصيــبــه وعالســـبايا هواي تنعه
فالقلبُ كربلاءْ ... يا صاحِبَ العَزاءْ
يا مهدي ... يا مهدي
...........................................................................................................................
كل محرم تحيي حـٕـزنه بگلب ذايب
وحده وحده تعيشهن كل المصــايب
وكل صَفَر مسبيّه روحك وانته غايب
يعـيــنك الله ســـــيــدي يبن الأطايب
تَسبيحُكَ البُكاءْ ... يا صاحِبَ العَزاءْ
يا مهدي ... يا مهدي
...........................................................................................................................
من أصيح بصوتي يا حامي الشريعه
خـــاف أذكـــرك بالوگع يـــم الشريعه
أقصـــد العــبــاس واچفوفه الگطيعه
والحسين الضــاگــــت بعينه الوسيعه
يا وارثَ اللواءْ ... يا صاحِبَ العَزاءْ
يا مهدي ... يا مهدي
...........................................................................................................................
هواي الك ثــــارات بالطلعه البهيّه
صعب عندك كل مصاب الغاضريه
والأشد زينـــــب يلن طلعت سبيّه
وتعرف بدرب السبي تفگد رقيه
متى متى اللقاءْ ... يا صاحِبَ العَزاءْ
يا مهدي ... يا مهدي
...........................................................................................................................
تحضر بمجلس عزاء حسين جدّك
لو حييت الفاجــعـه مولاي وحدك
غايب وبس الله يعلم يمته وعدك
يا صبر يا ســيــدي ومولاي عندك
لِنَصرِكَ البقاءْ ... يا صاحِبَ العَزاءْ
يا مهدي ... يا مهدي
...........................................................................................................................
رافع چفوفي وأظل أدعي القدومك
يا إمــامــي ومــا أعاتــــب ما ألومك
والفـــرج من الله من يحـيــــن يومك
لا مفر ساعــتـهــه يالمهدي الخصومك
بِخالقي الرَجاءْ ... يا صاحِبَ العَزاءْ
يا مهدي ... يا مهدي
...........................................................................................................................
خادم الإمام الحسين عليه السلام
عمار هليل الواسطي
قصيدة { حچي الشماتة }
يبن أمي وداعت قربانك ... ما تغمض يا خويه العين
ما بين العاشر واهمومه ...شامت يسأل وين حسين
..........................................................................................................................
يا خويه درب السبي ... عذبني كلش صعب
ثكلى وكفيلة ضعــن ... حرمه وأسيرة حرب
بكل ديره شفت الحقد ... وادمهه كلهم غُرب
بكل خطوه يعثر جرح ... وشطوله صار الدرب
چم موت أتحمّل بغيابك ... لا مِنْ مرّه ولا مرتين
ما بين العاشر واهمومه ...وشامت يسأل وين حسين
..........................................................................................................................
سألــونــي عـنــك نعـم ... حـچـي الشماتـه قهر
گالولي بس كل حرف ... مـنـهــم سهـــم بي أثر
سألوني وين السبط ؟ ... سألـــــوني وين الگمر ؟
حسّـــيــت بيّه النَفَس ... بالنَسمه طاح وعثر
كل هـمّي أحرسهم أيتامك ... أعرف عدوانك صوبين
ما بين العاشر واهمومه ...وشامت يسأل وين حسين
..........................................................................................................................
آنــي الأمـيــره چـنــت ... من قبل طف كربله
هسه الأسـيـره أنسَبـي ... مــوش آنــه المْدللـه
رمـــح اليشيل بحـقــد ... راســـك يـبـو العايله
چن شال گلبي ومشه ... يا ضيم أتحمّله
نار الطف و نار افراگك ... وآني اختك بين النارين
ما بين العاشر واهمومه ...وشامت يسأل وين حسين
..........................................................................................................................
حيرني دهري بدرب ... غير الله محّد إلي
حقد الخذوني سبي ... بغضاً لٱبويه الولي
أكبر دليل الحصل ... وأحزانه ما تنجلي
يشتموني وآني مَرَه ... يشتموني چي بت علي
أشباه ارجال وما عدهم ... غيره ولا ذمه ولا دين
ما بين العاشر واهمومه ...وشامت يسأل وين حسين
..........................................................................................................................
يحسين عگب الگمر ... ابدور الكفيله صرت
أجمع أيتام وحرم ... يا خويه حيره حرت
وبطول درب السبي ... من الهوا اتكدّرت
يمنعون حتى البچي ... ولو حتى ليك انظرت
كلما أنظر راسك أسمع ... واحد گلي اعيونچ وين
ما بين العاشر واهمومه ...وشامت يسأل وين حسين
..........................................................................................................................
آني وعليلي وجرح ... والعامل المُشترك
ليليه خِفْيه ابدمع ... يا خويه نتذكّرك
لا ما نسينه الحصل ... وشلون نتصّورك
من خيلهم سِحْـگِـتك ... نبچي على منظرك
مأتم ننصب كلمن گلبه ... الله يساعد هالگلبين
ما بين العاشر واهمومه ...وشامت يسأل وين حسين
..........................................................................................................................
فوگ الهزيله اركبت... للشام ضعني سره
ثق من هوان الدهر ... يسبون بت حيدره
بالناگه يحدي زجر ... يزجرني واني مَرَه
شتشوف عيني بعد ... من هالسبي يا ترى
كل لحظه أتمنى تظل يمي ... لكن ترجع خويه امنين
ما بين العاشر واهمومه ...وشامت يسأل وين حسين
..........................................................................................................................
خادم الإمام الحسين عليه السلام
عمار هليل الواسطي
/channel/ahmadalsaiah2
قناة الشاعر احمد محسن الصياح
/channel/wwHaider1
قناة الشاعر أبو رقية الحچامي
السلام عليكم ورحمة الله وبركاته
مساهمة مني والفضل كله لله سبحانه وتعالى في نشر قصائد إخوتي وأولادي من الشعراء الشباب وتحديداً شعراء المنبر الحسيني المقدس لأجل إيصال قصائدهم إلى أكبر عدد ممكن من إخوتنا الرواديد سأقوم بنشر روابط قنواتهم هنا في هذه القناة وأرجو من الله سبحانه وتعالى القبول مني ومنهم بفضله وببركة الصلاة والسلام على سيدنا ونبينا وحبيب قلوبنا محمد وآل محمد الطيبين الطاهرين.
أخوكم
خادم الإمام الحسين عليه السلام
عمار هليل الواسطي
قصيدة { نصر عاشور }
طور كربلائي
بوابة نصر عاشور مسلــم لو ذكرنـه إسمك
انفتحت وانكتب تاريخ والمفتاح من دمك
................................................................................................................................
يا أول نزف للطف جرحك بالضــمـــاير صاح
فتح بوابة امـحـــرّم لـيـــل وثورتـك مصباح
سفير حسين واعلومك تشهد واليضدك طاح
تاريخ أسود ابن ازياد... ظالم والظلم ما فاد
صبرك فوگ صبرك زاد
رجحت كفّتك والجور وأهل الجور مَتهمّك
................................................................................................................................
وحياتك يبن عم حسين ما گدروا يرغمونك
لوما غدر شيگـــــدرون محال أنهم يهزمونك
إنته بهيئة الكــــرار وأهـــل الشـــــر يعرفونك
من تغضب ترد حيفك... مدام بقبضتك سيفك
تطشُّر تجمع بكيفك
مو عجبه وعلي الكرار حيد الموزمه عمّك
................................................................................................................................
ذمم لاچن ألف يا حيف للطغيان مبيوعه
كلها بسلطة ابن ازياد چانت كلهه مخدوعه
زلم خانت عهدهه اوياك وحرمه ونصرتك طوعه
فرق ما بين هاي وهاي ... بين الخان والوفّاي
صفت نيتك أخذت الراي
قارعت الظلم والجور زلمه وما رجف عزمك
................................................................................................................................
يمسلم درس للأجيال خطّيته بحروف النور
أصبح نهج للأحرار ولرفـــض الظلــم دستور
خطوه الأولى من كوفان تصير بكربله عاشور
نصر دمك نصر دينك ... كتبته بنصرت حسينك
ما غمضت أبد عينك
لحد ما سطرت بالدم فداءك والسطع نجمك
................................................................................................................................
نباوع مرقدك معمور ليل انهار زوارك
ما يرجع أبد خسران رابح دوم خطارك
باجر يظهر الموعود حتماً يأخذ بثارك
بالطلعه البهيّه يعود ... حي يرزق تراه موجود
حيد ومن ظهر الحيود
سلام الله على المهدي وسط گلبه حمل همّك
................................................................................................................................
حتماً يظهر الغايب واليوم الظهور انعِد
قريب هواي غالينه محال اعله المحب يبعد
منتظرين هاي سنين ندعي الله ونظل ننشد
ربنا وهاي دعوانه ... يعجّل فرج مولانه
وكلنا أنصاره واعوانه
يشهدلك فديت الدين محد يگدر يهزمك
................................................................................................................................
خادم الإمام الحسين عليه السلام
عمار هليل الواسطي
محرم الحرام/ ١٤٤٥ هجرية
قصيدة في إستقبال شهر العزاء شهر محرم الحرام
قصيدة ( شهر الدمع )
للحسين إعلن ولاءك
يا شهم رتب عزاءك
روحك انذرهه وقــف هـــاي الليالي
كلشي يرخص بالزمن وحسين غالي
ياشهم رتب عزاءك
........................................................................
يا غيور ولو بده شهــر المصايب
خلي گلبك عالجره بعاشور ذايب
كل مصيبه الطفل منهه يصير شايب
والتعازي للإمام البعده غايب
إبچي عالشيبه الخضيبه
عدنه كل ليله مصيبه
إخدم الظامي بحضورك يالموالي
كلشي يرخص بالزمن وحسين غالي
ياشهم رتب عزاءك
........................................................................
ليله ليله عيش كل فجعه ومصيبه
دنيه غدرت بالحسين شگد عجيبه
ينكسر گلبه الذي يفگد حبيبه
وچم حبيب يروح ما واحد يجيبه
إذكر أحزان العليله
لا تفوت حزن ليله
إفزع وتاخذ أجر هالفزعه تالي
كلشي يرخص بالزمن وحسين غالي
ياشهم رتب عزاءك
........................................................................
ليلة أم الأربعه القدمت ولدهه
فدوه لحسين ودمعهه فوگ خدهه
إحزن لأم البنين وتلگه عدهه
باب للحاجات ما خاب الگصدهه
وبگلبهه الهم علامه
ما إجه حسين بسلامه
كل إبن عدهه گمر بالسمه عالي
كلشي يرخص بالزمن وحسين غالي
ياشهم رتب عزاءك
........................................................................
لمسلم المظلوم ليله وكلهه حيره
والسفير حسين يبچي العنده غيره
آخ من الكوفه چي خانت سفيره
ينشمر من القصر وسفه مصيره
ليلة الأنصار بعده
للغيارى تلبي عهده
بالخطر والموت أبد لا ما تبالي
كلشي يرخص بالزمن وحسين غالي
ياشهم رتب عزاءك
........................................................................
من بعدهه إذكر گمر هاشم وفاءه
گطعوا چفوفه ولا يترك لواءه
ليلة العباس تحچي عن ولاءه
العين والچفين من مطلع فداءه
عالنهر دمه يسيله
كافل الحره العقيله
انهضم گلبه يوم شاف الجود خالي
كلشي يرخص بالزمن وحسين غالي
ياشهم رتب عزاءك
........................................................................
نوح عالقاسم تصير الحنّه دمه
ساعد بنوحك يشيعي گلب أمه
وعلى الأكبر هالدمع بالك تضمه
وللرضيع المنذبح نبله تفطمه
بليلة العاشر مواجع
چم وداع بگلب خاشع
وبنهاره تصيح زينب من بقالي
كلشي يرخص بالزمن وحسين غالي
ياشهم رتب عزاءك
........................................................................
تگظي عشره وتبدي عشره بالرزيه
حسين مرمي عالثره بالغاضريه
الخيم تلهب نار من أشرار أميه
ومن بعدها أم عون رادوهه سبيه
آه يا شهر العجايب
ما گظت بيك المصايب
لطلعة المهدي الحزن شاغلي بالي
كلشي يرخص بالزمن وحسين غالي
ياشهم رتب عزاءك
........................................................................
خادم الإمام الحسين عليه السلام
عمار هليل الواسطي
محرم الحرام/ ٢٠٢٣
ذكرى إستشهاد الإمام الحسن العسكري عليه السلام
تنحب وگلبك جريح
بالصحـن لو بالضــريح ؟
تبچي سكته ....وينك إنته
بالصحن لو بالضريح ؟
****
الليله ليلة والدك الله اليعينك
أرد أواسيك بيميني تكض يـمينك
يا إمامي الـمنتظر جاوبني وينك
عالي حظي إنچان عيني تلاگي عينك
تشوف مدمع ناظري
عالإمـــــــام العسكري
يالفگدته ....وينك إنته
بالصحن لو بالضريح ؟
****
يابو صالح هاك إخذ عمري اعله عمرك
إنطيني بس لحظة أمل بيهه أنظرك
يالجزع حتى الصبر من طول صبرك
أدري بيد الباري يالـمحجوب أمرك
گلبي إجاك بهالـمسه
ينتظر جيتك عسه
تشفي علته ....وينك إنته
بالصحن لو بالضريح ؟
****
چم جرح گلبك حمل بس الله يعلم
ليا مصيبه بعترتك حيلك تهدّم
لطبرة الوالي علي الـمخضوب بالدم
لو على الزهره وضلعها إلي تهشم
گلبك شگد إنفجع
على الـمحسن من وگع
يالذكرته ....وينك إنته
بالصحن لو بالضريح ؟
****
لو غدر سم لو ذبح كل الـمصايب
عالحسن يبن الحسن گلبك الذايب
لو على حسين الذبيح اعله الترايب
لو على طول البُعد حزنك يغايب
لكل إمام وفجعته
شال گلبك لوعته
النوح عشته ....وينك إنته
بالصحن لو بالضريح ؟
****
أرد أحلفك وبحزن هاي الـمسيه
بيها أبوك العسكري شاف المنيه
نظره رايد عمري ما ظن بي بقيه
يگصر شما غيبتك طالت عليه
أقره وأنعى هالمصاب
أحمل هموم الغياب
شگد حـملته ....وينك إنته
بالصحن لو بالضريح ؟
****
آنه والحضروا نواسيك بعهدنه
ننتظر يالـمهدي وبلهفه بعدنه
طلب عدنه وكلنا نعرف ما تردنه
ردنه تحضر جيشنا وتحضر حشدنه
يلي تنصر شيعتك
والعراق بذمتك
ما تركته ....وينك إنته
بالصحن لو بالضريح ؟
****
خادم الإمام الحسين عليه السلام
عمار هليل الواسطي
قصيدة { رقية والرمح }
أريد بدمعتي أرويــك يالغالي
بس اگصار اديّه والرُمح عالي
چتّالك شمر واليتـم چـتّالي
.............................................................................................................................
أشيل دموعي الك بثنين إديّه
يماي عــيـوني شيرجعك إليّه
صحت شتريد منّي الغاضريه
أنا يــا والـــدي بــنـــتـك رقيّه
غصن أخضر چنت هسه الغصن ذابل
ذبل من أهد طيحة عمّـــي ابو فاضل
سبــيّــه وشنـتـظر مــن السبـــي تالي
.............................................................................................................................
مشتاگه الــك مــا أحـمـل افراگ
وجروحي بغيابــــك كلهن اغماگ
يلــتدريــنــي مــن أشتاگ أشتاگ
بعيوني الفــضـــا لمّن رحـت ضاگ
رغــم ما عالرمــح يا والــدي راسك
بس احساس گلبي يشبه احساسك
أريدك وانته هم تريد تبقالي
.............................................................................................................................
أشوفن عمتي زينب حارت اوياي
تصبّرني وتــنــوح النــوب بــهـداي
قليله سنين عمري وهجــرك اهواي
شَحّت شوفتك چن شَحّــــت الماي
يبويه اسياطهم ما ترحم امتوني
ترچيتي وخذوهــه ليش ياذوني
سبحانه الوحيد اليعلم ابحالي
.............................................................................................................................
يسبّاح الگلــب يالســـاكن الروح
إفتح باب گلبي وشوف الجروح
أحاول أوصلك بس والله ما لُوح
تبدّت دمعتـــــي والأمــل مذبوح
العطش هذا العطش صدّگ يمذبوحي
مثل نار الخــيم ظــل يـلـهــب بروحي
مذبوحه اعله جفن العين آمالي
.............................................................................................................................
يجيني الليل ما تگـظــي المعـانــات
يگصر عــمـــري لو طالــت الحسبات
أدوّر صَـفْـنـِتـــي وألگه الأمــل مــات
أفز وتبــقــى بــس كــلــمـــة حرامات
أصيح بداخــلــي يا شِــدّت الشِـــدّه
ومثل دمع الشمع مـــــن ناري أتبدّه
لا يرويك دمعي ولاهو طـفّــالي
.............................................................................................................................
يبويه وداعتك ظل جـفـنــي ساهــر
سَحَـگ صدري اليتم سَحگ الحوافر
أگول الروحي إصبري وعدنه باچـــر
كــم باچـــر گــظــه لـــي ويــن أكابر
يغالي وذبلــت الكلــمــات بشفــافـي
أعاين عالرمـــــح ما بي حضن دافي
رغم ما فوگه راسك دوم يبرالي
.............................................................................................................................
ولو بس طيف منك يا ضوه العين
أشوفك حتى أسولف فجعة البين
تضعضع حيل بنتك بويه يحسين
وين أيامنه ذيــچ المضــــت وين
ثق لو طيف من عندك يمر بيّه
خل بعده أمــــوت وهيّه مگظيّه
إحساس اليتم لا ما ترك بالي
.............................................................................................................................
خادم الإمام الحسين عليه السلام
عمار هليل الواسطي
قصيدة { أميرة ومو أسيرة }
طور كربلائي بحر طويل
أميره وتنسبي اعله النوگ يسبيهه الفلا يسوه
صاحت في سبــيــل الله كل هذا التعب فدوه
.....................................................................................................................
گالت والصبر عنوان أمــــس باليوم ما ينقاس
زجر لو عَشره أمـثــــالك ما توصل عِشر عباس
تحدي بناگتي اشحدّك وأمـــلاك السمــه حرّاس
هوان الدنيا تزجرني ... تروّعني وتشتّمني
المثلك بيش يطلبني
لا عندك شرف لا دين لا من عندك امروّه
.....................................................................................................................
لو بعده عدل عباس اسألك چـــان وين إنته
وإذا يحچي گمر هاشم تگظيهه وعلي سكته
راس برمح يرعبكم أخوي الشهم وآنه اخته
بيكم خوفه من إسمه ... رمح محد وصل يمّه
فصيلة غيرته بدمّه
كفّالي وكفو منّه شريف العِشره والخوّه
.....................................................................................................................
أمر الله ويريد ايصير حكمــــة خالقـــي المعبود
گلت سمعاً وطاعه إنچان النصر الدين بي مردود
أتحمّل مثل أمّـــي كل ضــيــم اللـــــيالــي السود
عاده الموت شفنه اهواي... كرامتنه الشهاده بهاي
آني والبقوا ويّاي
عاهدنه الحُسين يصير هذا النصر بالگوّه
.....................................................................................................................
باچر تــثــبــت الأيام عــنـــد الظالــم وقَـصــره
أراويكم بـــعــون الله معــنـــى الصبــر والثوره
عهد تنذكر بالتـــاريـــخ خُـطـــبــة زينب الكبرى
وحق امصيبت العاشر ... تشوفون الفلا صاير
نعم يا طغمت الكافر
وأذكّـركم بداحي الباب أبوي ابخُطبته شسوّه
.....................................................................................................................
خافن ظنكم تگدرون تجبروني على الأصعب
ما أخضع وحق عــبــاس إلكم هالنجوم أقرب
أنا الحق والشرف والزود أنا أم الصبــــر زينب
عند الله أحتسب أمري ... وهوّه ابحالتي يدري
أختم بالنصر عمري
ولا ذلّه مثل ذِلكم وربنا يسمع النجوه
.....................................................................................................................
بعون الله ويظل صبري على كل الظلم والجور
أخويه الحسين أسّسهه ثوره وهسّه يمي الدور
أهل بيت النبوة إحنه ويظل عبر الزمن معمور
كل ظالم يعادينه ... خصمنه إگبال بارينه
ومن يعود مهدينه
يسحگ راس كل ظالم ويأسس دولت التقوى
.....................................................................................................................
خادم الإمام الحسين عليه السلام
عمار هليل الواسطي
قصيدة { شرف الخدمة }
هاي مملكة الخَدَم يا مُخلصين
إدخــلــوها بِــســلام ٍ آمنــيــن
......................................................................................................................
خدمة حسين الشرف والفخر بيهه
خـــادم برتــبـــة ملك كلمن يجيهه
سنين و اجيال شكثر مــرّت عليهه
دروس من دروس أخذت من وحيهه
جيل يتبع جيل وبطول السنين
إدخــلــوها بِــســـــلام ٍ آمنــيــن
......................................................................................................................
الله لا يحرمنا من حُــب المجالس
خدمة المظلوم منـــهــاج ومدارس
الله يرزقـنــا جنــون وعشگ عابس
بالصـّـداره ومــاكو ويّــانـــه مُنافس
عن درايه وعن عقيده وعن يقين
إدخــلــوها بِــســلام ٍ آمــــنـــيــن
......................................................................................................................
مملكة الخدمة وتسر كل جفن ناظر
راية مرفـــــوعــه بســم كل الشعائر
بالضــمــائــر والحـنــاجـــر والمناحر
نعاهد إحنه حسيــــــن وبحبه نفاخر
أبد منعوفه أبد نقــســم يمين
إدخــلــوها بِــســلام ٍ آمنــيــن
......................................................................................................................
حسين كلشي انطانه والواجب نطيعه
حُــبـــه بكـــنـــوز الأرض لا مــا نبيعه
اي وحق دمّه الكـــتــب أعظم فجـيـعه
نخدم نواســي بحــــزن حامي الشريعه
يوم ياخذ ثار دامي الودجيـن
إدخــلــوها بِــســلام ٍ آمنــيــن
......................................................................................................................
شلون نترك خدمته وهوّه السفينه
للنجـــاة بكــــل زمـــن عينه عَـلينه
حسين يعني كل عمرنه وكلشي بينه
واليعوف حــسيـــن مـــا ثابت يقينه
وبطريق الخدمه كلنه عاشگين
إدخــلــوها بِــســلام ٍ آمنــيــن
......................................................................................................................
ربنا لا تحرمنا من هالخـــدمه يا رب
وإنته من حــبـــل الوريد هواي أقرب
بجاه نحر الظامي ربنا وهذا مَطْلب
كلشي يرخص للحُسين يهون الأصعب
فدوه كلنا لسبط هادينه الأمين
إدخــلــوها بِــســلام ٍ آمنــيــن
......................................................................................................................
إدخلــوهـــا بســــلام ٍ يالنشــامـــه
يلي بيكم عالي ظل صرح الخِدامه
ماكو ذِلّــه وخدمة حسين الكرامه
والظفر والفـــوز حتــمــــاً بالقيامه
والشفاعه من أمير المؤمنين
إدخــلــوها بِــســلام ٍ آمنــيــن
......................................................................................................................
خادم الإمام الحسين عليه السلام
عمار هليل الواسطي
قصيدة { صبر العقيلة }
ما رأيتُ إلّا جميلا... ما رأيتُ إلّا جميلا
................................................................................................................................
شعار لكل نصـــر للديـن والمذهب
صبر بس الصبر من عنده يتعجّب
بحروف الذهب مفروض أن يُكتب
بـعــد زيـنـب ومـا أدراكَ ما زيـنـب
كلمة من أم الصبر ... هزّت أركان القصر
ما رأيتُ إلّا جميلا... ما رأيتُ إلّا جميلا
................................................................................................................................
زينب يعـنــي دين البـاري عنـوانـه
نُبــوّة والإمــامــة وشـــرف قــرآنه
حــاول يـــســتــفــزهه إبن مرجانه
وبــهــاي الـعــبـــارة گصّـــت السانه
بكل ثبات وتختصر ... هزّت أركان القصر
ما رأيتُ إلّا جميلا... ما رأيتُ إلّا جميلا
................................................................................................................................
كـفـيــله للضـعــن من بعد أبو فاضل
وبـهــاي المــواقــف أبــد مَــتـجامـل
جواب أم الخدر بالحــق على الباطل
حـجر سجيل صـــار اعله الظلم نازل
بكل مكان وكل عصر ... هزّت أركان القصر
ما رأيتُ إلّا جميلا... ما رأيتُ إلّا جميلا
................................................................................................................................
رغم عاشــت مرار امصيبـت العاشـر
طلعت للسبــي وما عـدها كل ناصــر
على ابن ازياد صاحـت صيحـة الثائر
مـنهــه وتــعــرف الربــحــان والخاسر
صاغت احروف النصر ... هزّت أركان القصر
ما رأيتُ إلّا جميلا... ما رأيتُ إلّا جميلا
................................................................................................................................
حشاهه بيوم زينب تعـتـرض عالطَـفْ
لأن تـــدري علـيـهــه الـــثـورة تتوقـفْ
بنت المرتـضــى ومــو سهلة تـتـوصّــف
رغم شفــنه الزمـــان اوياهــه ما أنصَفْ
بكل بطولة تنتصر ... هزّت أركان القصر
ما رأيتُ إلّا جميلا... ما رأيتُ إلّا جميلا
................................................................................................................................
ظنـــهــم بالسبي زيــنــب يخـوفوهه
هضيمه ومـن هوان الدنيه شافــوهـه
بعـد كــل عالزمــن حــتّـى اليعرفوهه
لو مــليـــون شـــاعــر ما ينصـفـــوهه
كل وصف خل يقتصر ... هزّت أركان القصر
ما رأيتُ إلّا جميلا... ما رأيتُ إلّا جميلا
................................................................................................................................
أهــل بــيــت النـبـوة والفــخــر بـيهـم
هاي أفــعــالـهـــم تشــبــه محاچـيــهم
كلــنــا نـفـتــخـــر مهــديـنــه مهــديهم
يــعــجــز والنبي كــل چــــف يلاويهم
نقسم برب العصر ... هزّت أركان القصر
ما رأيتُ إلّا جميلا... ما رأيتُ إلّا جميلا
................................................................................................................................
خادم السيدة زينب عليها السلام
عمار هليل الواسطي
/channel/princesszeinablove
قناة الشاعر سلوم الگشاوي
/channel/muamalalselmaoe
قناة الشاعر مؤمل العراقي
ا
👇👇👇
/channel/ali_kahdim199
الشاعر علي كاظم المياحي
/channel/Jaffarattea
قناة الشاعر جعفر عطية البزوني
/channel/Mmustafa88m
رابط قناة الشاعر الحسيني مصطفى الياسري
قصيدة باب الحوائج
طور كربلائي
كرامه وباب للحاجات ربك شاء وانطاهه
والجابت مثل عباس حقهه إنچان تتباهه
.....................................................................................................................................
حيّ الله الوفه والطيب عدهه تشوف تفسيره
أم الأربــعــة الأطــيــاب غِــيـره وخلّفت غِيره
كل همهه يرد حســـيــن ظلــــت تنطر إبْحيره
نواظر شابحه أعله الباب.. تنشد حتى ريح الهاب
تنشد عن بدرهه الغاب
شريكة حزن أهل البيت هيچ الباري خلاهه
.....................................................................................................................................
جـــرّب لو ردت تــعــرف فكرك ما يظل حاير
باب الحاجة أم عـــبـــاس تنطـي إمراد للزاير
إقره الفاتحه وإطلب توافــــي وتجبر الخاطر
حلّفهه بغلات حسين ... بالصابه السهم بالعين
بالگطعوا إله چفين
لو عن بُعد بالعباس يمّك هيّه تلگاهه
.....................................................................................................................................
چانت أُمنيتهه تگول عندي من الولد عشره
كلهم إي وحق عبـــاس فدوه الظنوة الزهره
كتبت بالوفه تاريخ ضـــحّـــت كلشي للعتره
سألت بالدمع أم عون ... حاچيني الردتهم عون
وفّوا بالعهد وشلون
موقفهم بعاشر صار ويّه حسين مولاهه
.....................................................................................................................................
زينب جاوبــت گالــت كفـو منهم ورفعة راس
طاحوا گبل إخويه حسين زلم الغيره والنوماس
يعجز كل وصف بالكون ما يتوصف العباس
إخويه وكافلي وذخري ... فديته الكافل بعمري
راحوا وانكسر ظهري
أولادچ فخر للدوم روّت كربله إدماهه
.....................................................................................................................................
عاشت كل عمرهه تگول ما عاف القهر عمري
بس إلّي جره بعـــاشــــور أذّاني وكسر ظهري
أسوي گبور الطيبين وأنحــــب والدمع يجري
دم يجري مصب العين ... يم تشبيه گبر حسين
راح وبعد يحصل وين
رادت روحي بس يا حيف ما حصّلت منواهه
.....................................................................................................................................
واجب عالخلگ مفروض ويّا الطاهره يوفّون
يذكروهه بشهر عاشور لأم الأربعه يحضرون
وكل مرادهم مـنــهــه بأمــــر الخالق يطلبون
عنهم لا مَـتـتـأخر ... تجازي الخادم اليحضر
على الصعبه وعلي تگدر
ربك قاضيةْ حاجات للطيبين سمّاهه
.....................................................................................................................................
خادم أم البنين عليها السلام
عمار هليل الواسطي
قصيدة عشق خادم { شور }
ناذر حياتي يا حسين ابخدمتك
كل روحي دمعه وسالت اعله مصيبتك
خادم الك يا سيدي طول العمر
أدعي الله يرزقني القبول وحضرتك
عمري المضه والقادم بحبك وقف
بيتي الأعشقه سيدي احسينيتك
على حبك عاقد آمالي .. وبكل ترحالي .. أهتف يالغالي .. حسين
مالي غيرك يبن الزهره .. أتمنى النظره..خادم بالفطره .. حسين
بخدمتك طول العمر تلگاني
اعتقادي بدفترك عنواني
گلبي ينبض حبك وحبك أمان
حاشه في يوم الوعد تنساني
أصبحت مجنونك ..يا حبيبي حسين
...........................................................
عاشق الك يا سيدي أقسم قسم
بمصابك وطف كربله وستر الحرم
تبقه بخيالي كربلاء الفاجعة
موت وسبي ونار الگلب نار الخيم
راية ونهر طيحة گمر يا سيدي
دمع ولطم آه وشجن حسره وألم
كربلاء وعاشر الفجعه .. حسرات ودمعه .. لبيك وأسعى .. حسين
الك لبّى گلبي ولساني .. غيرك لا ثاني .. حبك عنواني .. حسين
جيت اواسي فاطمه والوالي
أغله من الروح حبك غالي
منبرك يا سيدي أعظم مكان
رايد أبقه بخدمتك للتالي
إي وحق عيونك .. يا حبيبي حسين
...........................................................
ما عندي غيرك انته مالك مهجتي
فدوه الك عمري وحياتي ودمعتي
لوما وجودك يا إمامي وملهمي
لا ديني يبقه ولا ترفرف رايتي
نصرك نصر دم اعله سيف الطاغيه
وبكل زمن إنته حسيني وهيبتي
هذا حبك مالك احساسي .. نبضي وانفاسي .. يا رفعة راسي .. حسين
حب شريف ودائم الفطره .. يا روح الزهره .. أقسم بالعتره .. حسين
يا حسين أمن الصغر حبيتك
بالمهد وبدمعتي واسيتك
أمي غذتني محبتك يا حسين
ساكن بنص الگلب ظميتك
سيدي ممنونك.. يا حبيبي حسين
...........................................................
يبدي محرم والحزن سادس فرض
سبع السماوات وبعد كل الأرض
تجري الدمع دم الدمع لمصيبتك
تلطم لأن حافر بقه بصدرك يرض
إنته الإمام الخالد وغيرك عدم
واليعترض ما همني مهما يعترض
عن عقيده باقي بالخدمه .. مو بس الكلمه .. بل أكبر نعمه .. حسين
نعمه والله خِدمتك رحمه .. من أجل الأمة .. يا محلى الخدمه .. حسين
مجلسك من الصغر ربّاني
خادم برتبة ملك خلاني
يا شفيعي بالحشر روحي فداك
أشكر الله خادمك سوّاني
للحشر مديونك .. يا حبيبي حسين
...........................................................
خادم الإمام الحسين عليه السلام
عمار هليل الواسطي
ذو الحجة / ١٤٤٤ هجري
ليلة ١٠ محرم الحرام
ليلة الوداع
قصيدة { الحسين والوداع}
ليل العاشر كله جروح .. ياهو اليبقه وياهو يروح
حاير بالطف ظل حسين
وين الليله وباچـــر وين
مذبوح ويعرف مذبوح
.........................................................................
وداع وخيمه خيمه حسين يوصلهه
بعد هالليله ما يلتم شمل الهه
صعبه ويدري عد رب العرش حلهه
آيات الحفظ بلسانه رتّلهه
گبل المدمع والأحزان..أهله يرتلون القرآن
باچر حسره ودمعة عين
وين الليله وباچـــر وين
مذبوح ويعرف مذبوح
...........................................................................
كل خطوه بجرح والگلب يتفطر
كل ساعه تمر يصفه الحزن يكثر
الله يعينه لمّن گابل الأكبر
يحضنه بكل حنان ومهجته تسعر
نار اوداع وتطفه شلون .. ما تطفيهه دموع عيون
تصعب لمن يگصي البين
وين الليله وباچر وين
مذبوح ويعرف مذبوح
..............................................................................
وداع وهالوداع شما صعب يحله
رغم گلبه حمل حزن الأرض كله
ترخّص دخل خيمه جاسم ورمله
هذا ابن الحسن بموادعه يگلّه
عد عينك يا عمي الروح .. تفديك ومتظل مجروح
امنين الفرحه بعرسه امنين
وين الليله وباچر وين
مذبوح ويعرف مذبوح
............................................................................
شنهو الصار محد يدري تفسيره
حسين وراح يم خيمة أبو الغيره
گمر عباس يعرف زين تأثيره
فداك الروح گله وما تظل حيره
ما دام الرايه بيمناي .. آني الساقي و الوفاي
فدوه عيوني والچفين
وين الليله وباچر وين
مذبوح ويعرف مذبوح
.............................................................................
آخر خيمه بالطف والفجر يقرب
عند أم الخدر وٱم الستر زينب
گلهه ودمعته بجفنه غدت تلهب
گلهه بكلشي گلهه ووين تتغرب
باچر فجعه وحرگ اخيام.. تبدأ رحلتكم للشام
بكل اعيالي تتكفلين
وين الليله وباچر وين
مذبوح ويعرف مذبوح
...............................................................................
خادم الإمام الحسين عليه السلام
عمار هليل الواسطي
محرم الحرام/ ٢٠٢٣